ಕವಿತಾकविताPoem

ಪ್ರತಿಕಾರಾಚಿಂ ಮುಳಾಂ

ಕವಿತಾ

ಪ್ರತಿಕಾರಾಚಿಂ ಮುಳಾಂ

ದೀಸ್ ಗೆಲ್ಲೆಪರಿಂಚ್ ಆಮಿ ಜಿಯೆಂವ್ಚೊ ಕಾಳ್ ಸಯ್ತ್ ಮಾರೆಕಾರ್ ಜಾವ್ನ್ ಪರಿವರ್ತಿತ್ ಜಾತಾ. ಹಾಂಗಾ ’ಕಾಳ್’ ಗುನ್ಯಾಂವ್ಕಾರಿ ನ್ಹಯ್, ಕಾಳಾಂತ್ ಜಿಯೆವ್ನ್ ಆಸ್ಚೊ ’ಮನಿಸ್’. ಮನ್ಶಾಕ್ ಮನಿಸ್ ದುಸ್ಮಾನ್ ಕಸೊ ಜಾಲಾ. ಹೊ ರಾಗ್, ದುಸ್ಮಾನ್‌ಕಾಯ್, ಧ್ವೇಶ್ ಆನಿ ಹಗೆಂ ಕೊಣಾಯ್ಕ್‌ಯೀ ಕೆದಿಂಚ್, ಕಿತೆಂಚ್ ಕಾಯಮ್ ಫಾಯ್ದೊ ಜೊಡುನ್ ದಿಂವ್ಕ್ ಸಕೊಂಕ್ ನಾ ಮ್ಹಳ್ಳೆಂ ಅಡ್ಹೂಕ್ ಸತ್ ಜಾಣಾಸೊನ್‌ಯೀ ಕಿತ್ಯಾಕ್ ಮನಿಸ್ ಜಾತ್, ಧರ್ಮ್, ಭಾಸ್, ಲಿಪಿ, ಪ್ರಾಂತ್ಯ್ ಮ್ಹಳ್ಳ್ಯಾ ನಿಬಾಂನಿ ಎಕಾಮೆಕಾಚೊ ಸಂಹಾರ್ ಕರುಂಕ್ ಲಾಗ್ಲಾ, ಆನಿ ಹ್ಯಾ ಪರಿಸ್ಥಿತೆಂತ್ ಅಸ್ಕತ್ ಆನಿ ಲಾಚಾರ್ ಜಾಲ್ಲೆಂ ’ಮನ್ಶಾಪಣ್’ ಮಾತ್ರ್ ಪಯ್ಸ್ ರಾವೊನ್ ಪಳೆತಾ.

ಕೆದ್ನಾಂಯ್ ಹ್ಯಾ ಪ್ರತೀಕಾರಾಚಿಂ ಮುಳಾಂ ಸೊಧುಂಕ್, ವಾ ಸಮ್ಜೊಂಕ್ ಮತಿಂತ್ ಚಿಂತಪ್ ಆಟಯ್ಲಾಂ? ಹಿ ಕವಿತಾ ವಾಚುನ್ ಗೆಲ್ಲೆಪರಿಂಚ್ ಹೆಂ ಸವಾಲ್ ಆಮಿಂ ಆಮ್ಕಾಂ ಕರ್ಚೆಂ ಅನಿವಾರ್ಯ್ ಜಾಲಾಂ.

ಪ್ರತಿಕಾರಾಚಿಂ ಮುಳಾಂ

sm1

ತಾಂಣಿ ತುಕಾ ಲ್ಹಾನ್ ಕರ್ಪಾಚೊ ಯತ್ನ್ ಕೆಲೊ
ಗರ್ದೆಚ್ಯಾ ಬೊವಾಳಾಂತ್ ಎಕ್ಸುರೊ ಶೆಣಿಲ್ಲೊ ಆವಾಜ್
ಪೂಣ್ ತುಂ ಪಯ್ಲೀಂಚ್ ಶಿಕಿಲ್ಲೊ
ದೊಂಗರ್ ಫಾತ್ರಾಂಚಿ ಭಾಸ್
ಆನಿ ಖಡ್ಪಾಂ ಲೆಗೀತ್ ಕಾತ್ರತಾತ್
ತ್ಯಾ ನ್ಹಂಯಾಂಚೊ ಆವಾಜ್.

ರಾನ್ ಪಾತಳ್ ಜಾಲೆಂ ಥಂಯ್ ತುಂ ಉಬೊ ರಾವ್ಲೊ,
ಜಂಯ್ ಕಾಗ್ದಾಚೆರ್ ಶಾಯೆನ್ ಸಯ್ ಕೆಲ್ಲಿ
ತ್ಯಾ ಕಾಗ್ದಾಕ್ ಯೆತಾಲೊ ವಾಸ್
ರಗತ್ ಆನಿ ತೆಲಾಚೊ
ತಾಂಣಿ ಸಾಂಗ್ಲೆಂ ತೊ ವಾಸ್ ಉದರ್ಗತಿಚೊ.

ಫುಡಾರಾಚೆ ಬಾರೀಕ್ ಬಾರೀಕ್ ಕುಡ್ಕೆ ಕರೂನ್
ಹಾಡಾಂ ದಳ್ಪಿ ಯಂತ್ರಾಂಚ್ಯಾ
ಕಾನ್ ಫೊಡ್ಪಿ ಗಡ್ಗಡಾಂತ್
ತುವೆಂ ಆಯ್ಕಲೊ ಎಕ್ ತಾಲ್
ಆಪ್ಲಿಂ ಮುಳಾಂ ಘಟ್ಟ್ ಧರೂನ್
ಮೌನ್ ನ್ಹಯ್‌ಕಾರ್ಪಿ ಬಿಯಾಂಚೊ.

ತುಜೊ ಸಂಘರ್ಷ್ ನಾಶಿಲ್ಲೊ
ಸ್ವತಾಚ್ಯಾ ಫಾಯ್ದ್ಯಾ ಖಾತೀರ್
ತಿ ಆಶಿಲ್ಲಿ ಎಕ್ ಸ್ಥಿರ್ ಪ್ರತಿಜ್ಞಾ
ಫಾಂತೊಡೆರ್ ಜಾಗೊ ಜಾವ್ನ್
ಯೆವ್ಕಾರ್ ದಿವ್ಪಾಚೊ
ಸತ್ಯಾಚಿಂ ಕಿರ್ಣಾಂ ಪಾತ್ಳಾವಪಿ ಸುರ್ಯಾಕ್.

ತುವೆಂ ಆಡಾಯ್ಲೆಂ ತಾಂಚೆ ರಾಜ್-ರಸ್ತೆ
ಜಾಂಕಾಂ ತಾಣಿಂ ದಿಲ್ಲಿಂ ನಾವಾಂ
ಇತಿಹಾಸಾಕಡೆನ್ ಫಟಿಂಗಪಣಾ ಕರ್ಪಿ
ತಾಂಚ್ಯಾ ಮ್ಹಾಪುರುಶಾಂಚಿಂ
ಜೆ ಉಬೆ ರಾವಿಲ್ಲೆ ವಣ್ಟಿ ಜಾವ್ನ್
ತುಜ್ಯಾ ಆನಿ ಹೆರಾಂಚ್ಯಾ ಮಧೆಂ

ಜೆನ್ನಾ ತಾಂಣಿ ತುಜಿ ಫಕಾಣಾಂ ಕೆಲಿಂ,
ರಾವ್ಲೊ ತುಂ ಧೀರಾನ್ ಹಿಮಾಲಯಾವರಿ
ಜೆನ್ನಾ ತಾಂಣಿ ತುಕಾ ಧಮ್ಕಾಯಲೊ
ತುವೆಂ ದಾಖಯ್ಲಿ ಜಿದ್ದ್ ದರ್ಯಾ ಲ್ಹಾರಾಂಚಿ
ತಾಂಣಿ ತುಕಾ ಮಿಟೊವ್ಪಾಚೊ ಯತ್ನ್ ಕೆಲೊ
ತೆನ್ನಾ ತುವೆಂ ಯಾದ್ ಕರೂನ್ ದಿಲಿ
ಧರ್ತರಿ ಉರ್ಲ್ಯಾ ಜಿವಿ
ತುಜ್ಯಾಚ್ ಘಾಮಾಚೆರ್ ಪೊಶಿಲ್ಲ್ಯಾ
ಆನಿ ತುವೆಂಚ್ ಸಾಂಬಾಳಿಲ್ಲ್ಯಾ
ಸೈಮಾಕ್ ಲಾಗೂನ್

[ಸೆಪ್ಟೆಂಬರ್, 2026]

Comments

No comments yet. Be the first to say what you thought of it.

Leave a comment

Write in Kannada, Nagari or Romi, whichever you like. He reads every comment before it appears here, so yours will not show straight away. Your name is printed above it.

Your name

Your comment

0 of 2,000 characters

Only your name and your comment are kept - no email address. They stay on the site until he removes them; to have yours taken down, write to him through the contact form and say which one. Privacy.

Author

ಶೈಲೇಂದ್ರ ಮೆಹ್ತಾ

ಜಲ್ಮ್: ಪಣ್ಜಿ
ಮುಳಾವೆ ಶಿಕ್ಷಣ್ ವಾಗ್ಳೆ ಹಾಯ್ಸ್ಕೂಲ್ ಮಂಗೆಶಿ, ತಾಚೆ ಉಪ್ರಾನ್ತ್ ಸರ್ಕಾರಿ ಉಚ್ಚ್ ಮಾಧ್ಯಮಿಕ್ ವಿದ್ಯಾಲಯ್ ಆನಿ ಧೆಂಪೆ ಕೊಲೆಜ್, ಪಣ್ಜಿ. ಉಪ್ರಾಂತ್ ಮುಂಬಯ್ ವಿದ್ಯಾಪೀಠಾಚಿ ತತ್ವಗಿನ್ಯಾನ್ ವಿಶ್ಯಾಂತಆನಿ ಗೊವಾ ವಿದ್ಯಾಪೀಠಾಚಿ ರಾಜ್ಯಶಾಸ್ತ್ರ್ ಆನಿ ಲೆಟಿನ್ ಅಮೆರಿಕನ್ ಸ್ಟಡೀಜ್ ವಿಶ್ಯಾಂನಿ ಪದ್ವ್ಯುತ್ತರ್ ಪದ್ವಿ. 1980 ಚ್ಯಾ ದಸ್ಕಾಂತ್ ವಿದ್ಯಾರ್ಥಿ, ಕಾಮ್ಗಾರ್ ಆನಿ ಕೊಂಕ್ಣಿ ಚಳವ್ಳೀನಿ ಸಕ್ರಿಯ್.
ಕೊಂಕ್ಣಿ, ಮರಾಠಿ, ಇಂಗ್ಲೆಝ್ ಭಾಶಾಂತ್ಲ್ಯಾನ್ ಕವಿತಾ, ಲೆಖ್, ನಾಟ್ಯಪರಿಕ್ಷಣ್, ನಿಬಂದ್, ಸೊದ್ ನಿಬಂದ್, ಮುಲಾಖತಿ ತಶೆಂಚ್ ಸ್ಥಾಪ್ತ್ಯಶಾಸ್ತ್ರ್, ಡೀಝಾಯ್ನ್, ಹಸ್ತಕಲಾ, ಸಮಾಜಶಾಸ್ತ್ರ್, ರಾಜ್ಯಶಾಸ್ತ್ರ್ ಅಶ್ಯಾ ವಿಂಗ್ಡವಿಂಗಡ್ ವಿಶ್ಯಾಂವೆಲಿ ಬರ್ಪಾವಳ್ ಥಳಾವ್ಯಾ, ರಾಶ್ಟ್ರೀಯ್ ಆನಿ ಆಂತರರಾಶ್ಟ್ರೀಯ್ ನೆಮಾಳ್ಯಾಂನಿ ಸಾತತ್ಯಾನ್ ಉಜ್ವಾಡಾಕ್ ಯೆತ್ ಆಸಾ.
ಗೊವಾ ವಿದ್ಯಾಪೀಠಾಚ್ಯಾ ಕೊಂಕ್ಣಿ ವಿಶ್ವಕೊಶ್ ಪ್ರಕ್ಲ್ಪಾಂತ್ ಸಂಶೊಧನ್ ಸಹಾಯ್ಕ್: 3 ವರ್ಸಾಂ
ಗೊವ್ನ್ ವಿಕ್ಲಿಚೊ ಸಂಪಾದಕ್: 1 ವರ್ಸ್
ಗೊಮಂತಕ್ ಟಾಯ್ಮ್ಸ್ ನೆಮಾಳ್ಯಾಂತ್ ಪತ್ರಕಾರ್: 5 ವರ್ಸಾಂ
ಫಾದರಆಗ್ನೆಲ್ ಕೊಲೆಜ್, ಪಿಲಾರ್ ಹಾಂಗಾ ರಾಜ್ಯಶಾಸ್ತ್ರ್ ವಿಶ್ಯಾಚೊ ವ್ಯಾಖ್ಯಾತಾ: 6 ವರ್ಸಾಂ
ಗೆಲಿಂ 26 ವರ್ಸಾಂ ಚಡ್ಸೊ ಮುಂಬಯ್ ರಾಬಿತೊ.
'ಇಂಡೆಕ್ಸ್ ಫರ್ನಿಚರ್ ಜರ್ನಲ್ ' ಹ್ಯಾ ಆಂತರರಾಶ್ಟ್ರೀಯ್ ನೆಮಾಳ್ಯಾಚೆಂ 20 ವರ್ಸಾಂ ಸಂಪಾದನ್,
'ಮಾಯ್ ಮಂಟರ್'(3 ವರ್ಸಾಂ) ಹ್ಯಾ ಇಂಗ್ಲೆಝ್ ಆನಿ 'ಸಂಗ್ರಾಮ್' (7 ವರ್ಸಾಂ) ಹ್ಯಾ ಮರಾಠಿ ನೆಮಾಳ್ಯಾಚೆಂ ಸಂಪಾದನ್
ಗೊಮಂತಕ್ ಟೀವ್ಹಿ ಹ್ಯಾ ಚೆನ್ಲಾಚೊ ಮಾಜಿ ಸಲ್ಲಾಗಾರ್ ಸಂಪಾದಕ್: ದೆಡ್ ವರ್ಸ್
ಪಯ್ಣಾರಿ ಪೊರ್ಟಲ್, ಸಹ್ಸಂಪಾದ್ಕ್: 2020 ಸಾವ್ನ್
ಸಂಪಾದಕ್: ವರ್ಣಮುದ್ರಾ, ಕೊಂಕ್ಣಿ ಸಾಹಿತ್ಯಿಕ್ ತೀನ್ ಮ್ಹಯ್ನ್ಯಾಳೆಂ 2024 ಸಾವ್ನ್

ಉಜ್ವಾಡಾಯಿಲ್ಲೆಂ ಸಾಹಿತ್ಯ್:
1. ಸಿಸಿಫಸ್ ತೆಂಗ್‌ಶೆರ್: ಕೊಂಕ್ಣಿ ಕವಿತಾಸಂಗ್ರಹ್
2. ಮುಕ್ತ್ ಚಿಂತನ್: ನಿಬಂದ್ ಸಂಗ್ರಹ್ (ಕೊಂಕ್ಣಿ)
3. ಅಭಿಜಾತ್: ಸಂವ್ಸಾರೀಕ್ ಸಾಹಿತ್ಯಾಚೆರ್ ಮರಾಠಿ ನಿಬಂಧ್ ಸಂಗ್ರಹ್.
4. ವಿಜ್ನವಾಸಾಂತಲೊ ಭೊವಂಡೆಕರ್: ಕೊಂಕ್ಣಿ ಕವಿತಾಸಂಗ್ರಹ್
5. ಶೀಮೆಪಲತಡಚೆಂ ದಾಯ್ಜ್: ಕಥಾಸಂಗ್ರಹ್ (16 ಸಂವ್ಸಾರೀಕ್ ಕಥಾಂಚೊ ಕೊಂಕ್ಣೀಂತ್ ಅಣ್ಕಾರ್)
6. ಮುಕ್ತ್ ಮಂಥನ್: ನಿಬಂದ್ ಸಂಗ್ರಹ್ (ಕೊಂಕ್ಣಿ)
7. ಮುಂಬಯ್ಚೊ ವೆಪಾರಿ: ಕೆ ಜಿ ಮಲ್ಲ್ಯಾ ಹಾಂಚೆ ಕಾದಂಬರೀಚೊ ಕೊಂಕ್ಣಿ ಅಣ್ಕಾರ್
8. ಆಲ್ಗೊರಿದಮಾಚ್ಯಾ ವಿಶ್ವಾಂತ್: ಕವಿತಾ ಸಂಗ್ರಹ್ (ಕೊಂಕ್ಣಿ)
9. ಪ್ಲೆಗ್: ಆಲ್ಬೆರ್ ಕಾಮ್ಯುಚೆ ಫ್ರೆಂಚ್ ಕಾದಂಬರೀಚೊ ಕೊಂಕ್ಣಿ ಅಣ್ಕಾರ್
10. ಗೊವ್ಯಾತೀಲ್ ಪರ್ಶುರಾಮ್ ಕಥಾ ವ ಬ್ರಾಹ್ಮಣಿ ಇತಿಹಾಸಲೆಖನ್: ಮರಾಠಿ

ಫುಡೆಂ ಯೆವ್ಪಿ ಪ್ರಕಾಶನಾಂ:
1. ಅಕ್ಷರ್: ನಿಬಂದ್ ಸಂಗ್ರಹ್ (ಪುರ್ವಿಲ್ಲ್ಯಾ ತೆ ಮಧ್ಯಯುಗಾಮೆರೆನ್ಚ್ಯಾ ನಾಮ್ನೆಚ್ಯಾ ಸಾಹಿತ್ಯ್ ರಚ್ಣೂಕಾಂಚಿ ಮೊಲಾವ್ಣಿ) (ಮರಾಠಿ)
2. ಅಸ್ವಸ್ಥ್ ವರ್ತಮಾನ್: ಕವಿತಾ ಸಂಗ್ರಹ್ (ಮರಾಠಿ)
3. ಪರ್ದೆಸಾಂತಲಿಂ ಫುಲಾಂ: 60 ಸಂವ್ಸಾರೀಕ್ ಕವೀಂಚೆರ್ ಟಿಪ್ಣಾಂ ಆಣಿ ತಾಂಚ್ಯಾ ಕವಿತಾಂಚೆ ಅಣ್ಕಾರ್ (ಕೊಂಕ್ಣಿ)
4. ಕಥಾ ಪರಿಕ್ರಮಾ: ವೀಸ್ ಸಂವ್ಸಾರೀಕ್ ಕಥಾಂಚೊ ಮರಾಠಿ ಅಣ್ಕಾರ್
5. ಅಸ್ಮಾನತೆಆಡ್ ಬಂಡ್: ಪೆರಿಯಾರ್ (ಕೊಂಕ್ಣಿ)
6. ಸೌಂದ್ರ್ಯಶಾಸ್ತ್ರ್ ಆನಿ ಕೊಂಕ್ಣಿ ಸಾಹಿತ್ಯ್
7. ಕಾಳ್ಖಾಂತಲೆಂ ರಂಗ್ ಆನಿ ಹೆರ್ ಕಥಾ: ಕೊಂಕ್ಣಿ ಕಥಾಸಂಗ್ರಹ್
8. Against the Silence: Poetry collection in English
9 Mocking the Mundane: Collection of Essays in English
10. The Parashuram Myth and Brahminical Historiography in Goa (English)
11. ಅಲ್ಪಾಕ್ಷರ್: ಕಥ್ನಾಂ ಆನಿ ಕವ್ನಾಂ (ಕೊಂಕ್ಣಿ)
12. ಆರ್ವಿಲ್ಲ್ಯಾ ವಿಚಾರವಿಶ್ವಾಂತಲೆ ಬಂಡ್ಖೊರ್: 10 ಚಿಚಾರವಂತ್ ಆನಿ ತಾಂಚೆ ವಿಚಾರ್ (ಕೊಂಕ್ಣಿ)
13. ಸೃಜನಸಂವಸಾರಾಚೊ ಹಾರ್ಸೊ: ಸಂವ್ಸಾರೀಕ್ ಸಾಹಿತ್ಯಾಚೆರ್ ನಿಬಂದ್ (ಕೊಂಕ್ಣಿ)

ಲಿಪ್ಯಾಂತರಣ್ ಜಾಲ್ಲಿಂ ಪುಸ್ತಕಾಂ
1. ಸಿಸಿಫಸ್ ತೆಂಗ್‌ಶೆರ್: ಕೊಂಕ್ಣಿ ಕವಿತಾಸಂಗ್ರಹ್ (ಕನ್ನಡ್)
2. ನಿರ್ವಾಸಿತ್ ಯಾತ್ರೀಚಿ ಭೊವಂಡಿ (ಕನ್ನಡ್)

ಇ ಬುಕ್ಸ್
ಸಿಸಿಫಸ್ ತೆಂಗ್‌ಶೆರ್: ಕೊಂಕ್ಣಿ ಕವಿತಾಸಂಗ್ರಹ್

• 100 ಪರಸ್ ಚಡ್ ವಿಂಗಡ್ ವಿಂಗಡ್ ಅಂತರರಾಶ್ಟ್ರೀಯ್ ಆನಿ ಭಾರ್ತೀಯ್ ಭಾಶಾಂತ್ಲ್ಯಾ ಕವಿತಾಂಚೊ ಕೊಂಕ್ಣೀಂತ್ ಅಣ್ಕಾರ್.
• ಪಯ್ಣಾರಿ ಅಂಕಾಚ್ಯಾ ಕವಿ ಹಕ್ಕ್ ಆನಿ ಮಾನ್, ಮ್ಹಯ್ನ್ಯಾಚೊ ಕವಿ ಭೌಮಾನ್ ಮೆಳಿಲ್ಲ್ಯಾ ಕವಿತಾಂಚೆರ್ ಪರೀಕ್ಷಣಾಂ

ಪುರಸ್ಕಾರ್:

ಸಿಸಿಫಸ್ ತೆಂಗ್‌ಶೆರ್ (ಕವಿತಾ ಸಂಗ್ರಹ್):
• ಕೊಂಕ್ಣಿ ಅಕಾದೆಮೀಚೊ ರಾಜ್ಯ್ ಪುರಸ್ಕಾರ್ (2018)
• ಕೊಂಕ್ಣಿ ಭಾಶಾ ಮಂಡ್ಳಾಚೊ ರೊಕ್ ಬಾರ್ರೆಟೊ ಪುರಸ್ಕಾರ್ (2018)
• ವಿಶ್ವ್ ಕೊಂಕ್ಣಿ ಕೆಂದ್ರಾಂಚೊ ವಿಮ್ಲಾ ಪೈ ಪುರಸ್ಕಾರ್ (2021)
ಮುಕ್ತ್ ಚಿಂತನ್ (ನಿಬಂಧ್ ಸಂಗ್ರಹ್):
• ಕೊಂಕ್ಣಿ ಅಕಾದೆಮೀಚೊ ರಾಜ್ಯ್ ಪುರಸ್ಕಾರ್ (2024)
ಮುಬಂಯ್ಚೊ ವೆಪಾರಿ (ಅಣ್ಕಾರ್):
• ಕೊಂಕ್ಣಿ ಭಾಶಾ ಮಂಡ್ಳಾಚೊ ಪುರಸ್ಕಾರ್ (2024)
ನಿರ್ವಾಸಿತ್ ಯಾತ್ರೀಚಿ ಭೊವಂಡಿ
• ಆಶಾವಾದಿ ಪ್ರಕಾಶನಾಚೊ ದೆ. ಡೆನಿಸ್ ಡಿಕುನ್ಹಾ ಕನ್ನಡ್ ಲಿಪ್ಯಾಂತರಣ್ ಪುರಸ್ಕಾರ್ (2025)

All 9 pages by this writer