Daaiz ದಾಯ್ಜ್

ದಾಯ್ಜ್ ಸಬ್ಧಾಚೊ ಅರ್ಥ್ ಖಜಾನ್. ಆಶಾವಾದಿ ಪ್ರಕಾಶನಾಚ್ಯಾ ಸಂದರ್ಬಾಂತ್, ದಾಯ್ಜ್ ಮ್ಹಣ್ಜೆ ಕೊಂಕಣಿ ಭಾಸ್, ಸಾಹಿತ್ಯ್, ಸಂಸ್ಕೃತಿ ಆನಿ ಕೊಂಕಣಿ ಲೊಕಾಚೆಂ ಏಕ್ ಸಮೃದ್ಧ್ ಖಜಾನ್.

2000 ಇಸ್ವೆಂತ್ ಸುರು ಜಾಲ್ಲ್ಯಾ ಆಶಾವಾದಿ ಪ್ರಕಾಶನಾಚೆಂ ಏಕ್ ಮಿಸಾಂವ್ ಜಾವ್ನಾಸ್ಲೆಂ ಡಿಜಿಟಲ್ ಮಾಧ್ಯಮಾಚೆರ್ ಕೊಂಕಣಿ ಸಾಹಿತ್ಯ್ ಪ್ರಸಾರಣ್. ದೆಕುನ್ 2003 ಇಸ್ವೆಂತ್, ವಲ್ಲಿ ಕ್ವಾಡ್ರಸಾಚ್ಯಾ ಸಂಪಾದಕ್‌ಪಣಾಖಾಲ್ ದಾಯ್ಜ್ ಸಾಹಿತ್ಯಿಕ್ ಕೊನ್ಸೊ ಜಾವ್ನ್ ಬೆಳ್ಳೆವಿಶನ್ ಸಂಕೇತ್‌ಥಳಾಚೆರ್ ಸಂಪಾದಕೀಯ್, ಕಥಾದಾಯ್ಜ್, ಕವಿತಾದಾಯ್ಜ್ ಅಶೆಂ ತೀನ್ ಮಯ್ನ್ಯಾಳಿಂ ಅಂಕಣಾಂ ರುಪಾರ್ ಸುರ್ವಾತ್ಲೆಂ, ತಶೆಂಚ್ 2004 ಇಸ್ವೆಂತ್ ದಾಯ್ಜ್.ಕೊಮ್ ಡೊಮೆಯ್ನಾ ಮುಖಾಂತ್ರ್ ಪುರ್ತೆಂ ಸಾಹಿತ್ಯಿಕ್ ವೆಬ್‌ಸೈಟ್ ರುಪಾರ್, ನಾಮ್ನೆಚೊ ಕೊಂಕಣಿ ಕವಿ, ವಿಮರ್ಶಕ್ ಆಂಡ್ರ್ಯೂ ಎಲ್. ಡಿಕುನ್ಹಾಚ್ಯಾ ಹಾತಿಂ ಉಗ್ತಾವಣ್ ಜಾಲೆಂ.

ಡಿಜಿಟಲ್ ಮಾಧ್ಯಮಾಂತ್ ಏಕ್ ಮಹತ್ವಾಚೆಂ ರೂಪಾಂತರ್ ಜಾಂವ್ಚಾಕ್ ದಾಯ್ಜ್.ಕೊಮ್‌ನ್ ಬುನ್ಯಾದಿ ವಾವ್ರ್ ಕೆಲೊ. ಸಾಹಿತ್ಯಿಕ್ ಸರ್ತ್, ಸಾಹಿತ್ಯಿಕ್ ಅಧ್ಯಯನ್ ಕಾಮಾಸಾಳಾಂ, ಕೊಂಕಣಿ ಅಭಿಯಾನ್ ಸಮಿತಿ, ಪುಸ್ತಕ್ ಪರ್ಗಟ್ಣಿ ತಶೆಂಚ್ ಸಾಹಿತಿಂಕ್ ಆರ್ಥಿಕ್ ಮಜತ್ ಅಶೆಂ ದಾಯ್ಜ್.ಕೊಮ್ ಮುಖಾಂತ್ರ್ ಪ್ರಸಾರ್ ಜಾಂವ್ಚೆಂ ಕೊಂಕಣಿ ಸಾಹಿತ್ಯ್ ಚಡುಣೆಂ 65 ದೆಶಾಂನಿ ವಸ್ತಿ ಕರುನ್ ಆಸ್ಚ್ಯಾ ಕೊಂಕಣಿ ವಾಚ್ಪ್ಯಾಂಕ್ ಆವಡ್ಚೊ ಸಾಹಿತ್ಯಿಕ್ ಕೊನ್ಸೊ ಜಾಂವ್ಕ್ ಪಾವ್ಲೆಂ.

ದಾಯ್ಜ್.ಕೊಮ್ ಡಿಜಿಟಲ್ ಮಾಧ್ಯಮಾಚೆರ್ ಕೊಂಕಣಿ ಸಾಹಿತ್ಯ್ ಪ್ರಸಾರ್ ಕರುನ್ ಆಸ್ಲೆಪರಿಂಚ್ ಪ್ರಿಂಟ್ ಮಾಧ್ಯಮಾಚ್ಯಾ ನೆಮಾಳ್ಯಾಂಕ್ ಸಯ್ತ್ ತೆಂಕೊ ದಿಂವ್ಚೆಂ ಕಾಮ್ ಕರುನ್ ಆಯ್ಲೆಂ; ಝೆಲೊ ವಿಶೇಸ್ ಅಂಕೊ, ದಿವೊ ವಿಶೇಸ್ ಅಂಕೊ, ಮಿತ್ರ್ ವಿಶೇಸ್ ಅಂಕೊ. ತಶೆಂಚ್ ಮಾಯ್‌ಗಾಂವಾಂತ್ ಸಾಹಿತ್ಯಿಕ್ ಶಿಭಿರಾಂ/ಕಾಮಾಸಾಳಾಂ ಚಲಯ್ಲಿಂ. 2003 ಥಾವ್ನ್ 2013 ಮೆರೆನ್ ದಾಯ್ಜ್.ಕೊಮ್ ಸಕ್ರಿಯ್ ಆಸ್ಲೆಂ.