[ಖಬರ್] ಕೊಂಕಣಿಕ್ ಏಕ್ ನವೊ ಸಾಂಕವ್ ಕೊಂಕಣ್ಗಾರ್
1 ಮಾರ್ಚ್ (ಕಲಂಗೂಟ್, ಗೊಂಯ್): ’ಕೊಂಕಣ್ಗಾರ್ ಖರೊಚ್ ಜಾವ್ನ್ ಕೊಂಕಣಿಚ್ಯಾ ವೆವೆಗಳ್ಯಾ ಲಿಪಿ, ಬೊಲಿಚ್ಯಾ ಮನಶಾಂಕ್ ಎಕಾ ಮನಾನ್ ವಾವ್ರ್ ಕರುನ್ ಕೊಂಕಣಿಕ್ ಫುಡೆಂ ವರಚ್ಯಾ ದಿಶೆನ್ ಏಕ್ ಸಾಂಕವ್’ ಮ್ಹಣಾಲೊ ನಾಮ್ನೆಚೊ ಕೊಂಕಣಿ ಕಥಾಕಾರ್, ಕಾದಂಬರಿಕಾರ್ ಬಾಬ್ ದಾಮೋದರ್ ಮಾವ್ಜೊ. ’ಕನ್ನಡ್, ನಾಗರಿ, ಆನಿ ರೋಮಿ’ ತಿನ್ಯೀ ಲಿಪಿಂನಿ ಕೊಂಕಣಿ ಸಾಹಿತ್ಯ್ ಪ್ರಕಾಶಿತ್ ಕರ್ಚೆಂ ಪಯ್ಲೆಂ ಕೊಂಕಣಿ ಪ್ರಕಾಶನ್; ’ಕೊಂಕಣ್ಗಾರ್ ಪ್ರಕಾಶನಾಚೆಂ’ ವಿಮೋಚನ್ ಆಯ್ತಾರಾ (1 ತಾರಿಕ್ ಮಾರ್ಚ್) ಗೋವಾ ಹೆರಿಟೇಜ್ ಹೊಟೆಲಾಂತಲ್ಯಾ ಸಭಾಸಾಲಾಂತ್ ಗೊವಾ ಕೊಂಕಣಿ ಅಕಾಡೆಮಿಚೊ ಅಧ್ಯಕ್ಶ್ ಜಾವ್ನಾಸ್ಚ್ಯಾ ಬಾಬ್ ಅರುಣ್ ಸಾಖರ್ದಾಂಡೆನ್ ಕೆಲೆಂ.
ಬಾಬ್ ದಿಲೀಪ್ ಬೋರ್ಕರಾನ್ ಆಂಟೊನಿಯೊ ವೆರೊನಿಕಾ ಫೆರ್ನಾಂಡಿಸಾಚ್ಯಾ ಇಂಗ್ಲೀಶ್ ಬುಕಾಚೆಂ ಕೊಂಕಣೀ ತರ್ಜಣ್ ’ಮಾಡಾಥಾವ್ನ್ ತೆಲಾಖಣಿ ಪರಯಾಂತ್’, ಬಾಬ್ ದಾಮೋದರ್ ಮಾವ್ಜೊನ್ ವಲ್ಲಿ ಕ್ವಾದ್ರೂಶಾಚೊ ವೆಂಚಿಕ್ ಕಥಾಜಮೊ ’ಸಾಂಕವ್’ ಪುಸ್ತಕ್, ಬಾಬ್ ಮಾಧವ್ ಬೋರ್ಕರಾನ್ ’ರಾಶ್ಟ್ರೀಯ್ ಮಟ್ಟಾಚ್ಯಾ 27 ಕವಿಂಚ್ಯಾ ಕೊಂಕಣಿ ಕವಿತಾಜಮೊ’ ಪುಸ್ತಕಾಂಚೆಂ ವಿಮೋಚನ್ ಕೆಲೆಂ. ಬಾಬ್ ಪ್ರಭಾಕರ್ ತಿಂಬ್ಲೆ ಆನಿ ಬಾಬ್ ವಿನ್ಸಿ ಕ್ವಾದ್ರೂಶ್ (ದಲ್ಗಾದೊ ಕೊಂಕಣಿ ಅಕಾಡೆಮಿಚ್ ಅಧ್ಯಕ್ಷ್) ಹಾಣಿಂ ಪಯ್ಣಾರಿ-ವೀಜ್ ರಾಶ್ಟ್ರೀಯ್ ಮಟ್ಟಾಚೊ ದೆ|ವಿಲ್ಫಿ ರೆಬಿಂಬಸ್ ಸ್ಮಾರಕ್ ತೀನ್ ಲಿಪಿಂನಿ ಚಲ್ಚೊ ಕೊಂಕಣಿ ಸಾಹಿತಿಕ್ ಸ್ಪರ್ಧೊ ಘೋಶಿತ್ ಕರುನ್ ಬಾಯ್ ನಯನಾ ಅಡಾರಕರ್ ಆನಿ ಬಾಯ್ ಸರಸ್ವತಿ ದಾ. ನಾಯ್ಕ್ ಹಾಂಚ್ಯಾ ಬಾಲ್ ಸಾಹಿತ್ಯ್ ಪುಸ್ತಕಾಂಚೆಂ ವಿಮೋಚನ್ ಕೆಲೆಂ.
ಸುರ್ವಾತೆರ್ ಬಾಯ್ ಉರ್ಜಿತಾ ಭೊಬೆನ್ ಸಮೇಸ್ತಾಂಕ್ ಯೆವ್ಕಾರ್ ಮಾಗ್ತಚ್ ಮುಖೆಲ್ ಸಯ್ರ್ಯಾಂಕ್ ವೆದಿಚೆರ್ ಬಸ್ಕಾ ಘೆಂವ್ಕ್ ಆಪವ್ಣೆಂ ದಿವುನ್ ಸರ್ವ್ ಮುಖೆಲ್ ಸಯ್ರ್ಯಾಂಚಿ ವಳೊಕ್ ಕರುನ್ ದಿಲಿ. ಕಾರ್ಯಾಚೆಂ ಉಗ್ತಾವಣ್ ದಿವ್ಲಿ ಪೆಟವ್ನ್ ಜಾಲ್ಲೆಂಚ್ ಬಾಬ್ ವೆರೊನಿಕಾ ಫೆರ್ನಾಂಡಿಸಾನ್ ಸ್ವಾಗತ್ ಉಲವ್ಪ್ ಕರುನ್ ಮುಖೆಲ್ ಸಯ್ರ್ಯಾಂಕ್ ಕೊಂಕಣಿ ಪುಸ್ತಕಾಚಿ ಕಾಣಿಕ್ ದಿವುನ್ ಸ್ವಾಗತ್ ಕೆಲೊ.
ಕುವೇಯ್ಟ್ ಕೊಂಕಣಿ ಕೇಂದ್ರಾಚೊ ಸ್ಥಾಪಕ್ ಅಧ್ಯಕ್ಷ್ ಬಾಬ್ ಎಲ್ವಿನೋ ರೊಡ್ರಿಗಸನ್ ಬಾಬ್ ವೆರೊನಿಕಾ ಫೆರ್ನಾಂಡಿಸಾಚಿ ಸವಿಸ್ತಾರ್ ವಳೊಕ್ ದಿಲಿ. ವಲ್ಲಿ ಕ್ವಾಡ್ರಸಾನ್ ಪ್ರಸ್ತಾವಿಕ್ ಉಲವ್ಪ್ ಕರುನ್ ಕೊಂಕಣಿಕ್ ಡಿಜಿಟಲ್ ಆನಿ ತಾಂತ್ರಿಕ್ ಸಕ್ತೆಚ್ಯಾ ಆಧಾರಾನ್ ಕಸೆಂ ಆಮಿ ಎಕಾ ಮನಾನ್ ಎಕ್ವಟಿಕ್ ಜಾವ್ನ್ ಕೊಂಕಣಿ ವಾವ್ರ್ ಕರುಂಕ್ ಜಾತಾ ಮ್ಹಳ್ಳೊ ಆಶಾವಾದ್ ವೆಕ್ತ್ ಕರುನ್ ಕೊಂಕಣ್ಗಾರ್ ಪ್ರಕಾಶನಾಚೊ ಮೂಳ್ ದಿಶ್ಟಾವೊ ಸಾಂಗ್ಲೊ.
ಕನ್ನಡ್, ನಾಗರಿ ಆನಿ ರೊಮಿ ಲಿಪಿಂನಿ ಕೊಂಕಣಿ ಭಾಶೆಂತ್ಲೆಂ 95-99% ಠಕ್ಕೆಂ ಸಾಹಿತ್ಯ್ ರಚನ್ ಜಾತಾ ದೆಕುನ್ ಕೊಂಕಣಿಚ್ಯಾ ಸರ್ವ್ ಲಿಪಿಚ್ಯಾ, ಬೊಲಿಚ್ಯಾ ಲೊಕಾಕ್ ಲಾಗಿಂ ಹಾಡ್ಚ್ಯಾ ದಿಶೆನ್ ಏಕ್ ಲ್ಹಾನ್ ಪ್ರಯತ್ನ್ ಜಾವ್ನ್ ಬಾಬ್ ವೆರೋನಿಕಾ ಫೆರ್ನಾಂಡಿಸಾಚ್ಯಾ ಪ್ರಕಾಶಕ್ಪಣಾಖಾಲ್, ಬಾಬ್ ವಲ್ಲಿ ಕ್ವಾದ್ರೂಶಾಚ್ಯಾ ಸಂಪಾದಕ್ಪಣಾಖಾಲ್ ’ಕೊಂಕಣ್ಗಾರ್ ಪ್ರಕಾಶನ್’ ಮ್ಹಳ್ಳೆಂ ಪ್ರಕಾಶನ್, 1 ಮಾರ್ಚ್ 2020 ಚ್ಯಾ ಆಯ್ತಾರಾ ದನ್ಪಾರಾಂ 3 ಥಾವ್ನ್ 5 ಪಾಸುನ್, ಕಲಂಗೂಟಾಂತಲ್ಯಾ ’ಗೋವಯ್ ಹೆರಿಟೇಜ್ ಹೊಟೆಲಾಂತ್’ ಗೋವಾ ಕೊಂಕಣಿ ಅಕಾಡೆಮಿಚೊ ಅಧ್ಯಕ್ಷ್ ಬಾಬ್ ಅರುಣ್ ಸಾಖರ್ದಾಂಡೆನ್ ವಿಮೋಚನ್ ಕೆಲೆಂ.
ಅಧ್ಯಕ್ಶಾಚ್ಯಾ ಉಲವ್ಪಾಂತ್ ಬಾಬ್ ಅರುಣ್ ಸಾಖರ್ದಾಂಡೆನ್ ಬಾಬ್ ವೆರೊನಿಕಾ ಫೆರ್ನಾಂಡಿಸಾಚ್ಯಾ ’ಮಾಡಾಥಾವ್ನ್ ತೆಲಾಖಣಿ ಪರಯಾಂತ್’ ಬುಕಾವಿಶ್ಯಾಂತ್ ಉಲವ್ನ್, ಕೊಂಕಣಿ ಆಜ್ ಮುಕಾರ್ ವರುಂಕ್ ಅಕಾಡೆಮಿ, ಸಂಘಟನಾಂಲಾಗಿಂ ದುಡು ನಾ ದೆಕುನ್ ಆಮಿ ಎಕಾಮೆಕಾ ಆಧಾರ್ ದಿವುನ್ ಹೊ ವಾವ್ರ್ ಕರ್ಚೊ ಮ್ಹಳ್ಳೊ ಉಲೊ ದಿಲೊ.
ಗೊವಾ ಕೊಂಕಣಿ ಅಕಾಡೆಮಿಚೆಂ ಪತ್ರ್ ’ಅನನ್ಯ’ಚಿ ಸಂಪಾದಕ್, ನಾಮ್ನೆಚಿ ಲೋಕ್ವೇದ್ ಸಂಶೋಧಕ್, ಆಯ್ಲೆವಾರ್ ಸಾಹಿತ್ಯ್ ಅಕಾಡೆಮಿಚೊ ತರ್ಜಣೆಚೊ ಪುರಸ್ಕಾರ್ ಜೊಡ್ಪಿ ಬಾಯ್ ದೊ|ಜಯಂತಿ ನಾಯ್ಕ್ ಹಿಣೆಂ ವಲ್ಲಿ ಕ್ವಾದೂಶಾಚ್ಯಾ ಕೊಂಕಣಿ ಕಾಣಿಯಾಂಚೆರ್ ಉಲವ್ನ್ ’ಸಾಂಕವ್’ ಬುಕಾಂತಲ್ಯಾ ಥೊಡ್ಯಾ ಕಾಣಿಯಾಂಚೆರ್ ಖೊಲಾಯೆನ್ ವಿಚಾರ್ ಸಾಂಗುನ್ ಬುಕಾಚಿ ವಳೊಕ್ ಕರುನ್ ದಿಲಿ.
ನಾಮ್ನೆಚೊ ಕೊಂಕಣಿ, ಮರಾಠಿ ಕಥಾಕಾರ್, ಕವಿ, ಬಾಬ್ ಎನ್. ಶಿವದಾಸ್ ಹಾಣಿಂ ’ಮಯಲಾ ಫಾತರ್’ ಬುಕಾಚಿ ವಳೊಕ್ ಕರುನ್ ದಿತಚ್ ಹ್ಯಾ ತೀನ್ ಬುಕಾಂಚೆಂ ವಿಮೋಚನ್ ಕಾರ್ಯೆಂ ಚಲ್ಲೆಂ.
ಉಪ್ರಾಂತ್ ಬಾಬ್ ಪ್ರಭಾಕರ್ ತಿಂಬ್ಲೆ ಆನಿ ಬಾಬ್ ವಿನ್ಸಿ ಕ್ವಾದ್ರೂಶ್ ಹಾಣಿಂ ದೆ|ವಿಲ್ಫಿ ರೆಬಿಂಬಸ್ ಸ್ಮಾರಕ್ ಪಯ್ಣಾರಿ-ವೀಜ್ ಹಾಂಚ್ಯಾ ಜೋಡ್ ಆಯೋಗಾನ್ ಮಾಂಡುನ್ ಹಾಡ್ಚ್ಯಾ ತ್ರಿ-ಲಿಪಿಂತ್ಲ್ಯಾ ಕೊಂಕಣಿ ಸಾಹಿತಿಕ್ ಸ್ಪರ್ಧ್ಯಾಚೆಂ ಘೋಶಣ್ ಕೆಲೆಂ. ಹೆಚ್ ಸಂಧರ್ಭಾರ್ ಬಾಯ್ ನಯನಾ ಅಡಾರಕರ್ಚೊ ’ಬೆಲಾಬಾಯಚೊ ಶಂಕರ್ ಆನೀ ಹೆರ್ ಕಾಣಯೊ’ ತಶೆಂಚ್ ಸರಸ್ವತಿ ದಾಮೋದರ್ ನಾಯ್ಕ್ ಹಿಚ್ಯ್ ’ಜಾದುಚೊ ಪತಂಗ್ ಆನೀ ಕಾಣಯೊ’ ಮ್ಹಳ್ಳಿಂ ದೋನ್ ಬಾಲ್ ಸಾಹಿತ್ಯಾಚ್ಯಾ ಪುಸ್ತಕಾಂಚೆಂ ವಿಮೋಚರ್ ಕೆಲೆಂ.
ಉಪ್ರಾಂತ್ ಬಾಬ್ ದಿಲೀಪ್ ಬೋರ್ಕರ್ ಆಪ್ಲ್ಯಾ ಉಲವ್ಪಾಂತ್ ಕೊಂಕಣಿ ವಾವ್ರ್ ಫುಡೆಂ ವರುಂಕ್ ಆಮಿ ಖರೆಂಚ್ ಜಾವ್ನ್ ಸರ್ವ್ ಮನಾಂಚಿಂ, ಸರ್ವ್ ಮತಾಂಚಿಂ, ಸರ್ವ್ ಲಿಪಿ-ಬೊಲಿಚ್ಯಾ ಲೊಕಾನ್ ಸಾಂಗಾತಾ ವಾವ್ರ್ ಕರ್ಚಿ ಗರಜ್ ಆಸಾ ಆನಿ ತೆಂ ಕಾಮ್ ಭೋವ್ ಗರ್ಜೆಚೆಂ ಕಾಮ್ ದೆಕುನ್ ಹಿ ಕೊಂಕಣೆಂತ್ ಏಕ್ ಬರಿ ಸುರವಾತ್ ಮ್ಹಣಾಲೊ.
ಬಾಬ್ ಮಾಧವ್ ಬೋರ್ಕರ್ ಆಪ್ಲ್ಯಾ ಉಲವ್ಪಾಂತ್ ಹೆರ್ ಲಿಪಿ-ಬೊಲಿಚ್ಯಾ ಲೊಕಾಂಸವೆಂ ಅಪ್ಲೊ ಅನ್ಭೋಗ್ ವಾಂಟುನ್ ಘೆವ್ನ್, ಸರ್ವ್ ಕೊಂಕಣಿ ಲೊಕಾಕ್ ಲಾಗಿಂ ಹಾಡ್ಚೊಚ್ ಆಮ್ಚೊ ಶೆವೊಟ್ ಜಾಂವ್ಕ್ ಜಾಯ್ ಆನಿ ಹ್ಯಾ ದಿಶೆನ್ ಸರ್ವ್ ಉರ್ಭೆವಂತ್ ಸಾಹಿತಿಂಕ್ ಎಕಾ ಮನಾನ್ ವಾವ್ರ್ ಕರುಂಕ್ ಉಲೊ ದಿಲೊ.
ಬಾಬ್ ದಾಮೋದರ್ ಮಾವ್ಜೊನ್ ಅಪ್ಲ್ಯಾ ಉಲವ್ಪಾಂತ್ ಮೋಗ್, ದಯಾ, ಕರುಣಾ ಆಯ್ಚ್ಯಾ ಸಮಾಜೆಂತ್ ಭೋವ್ ಗರ್ಜೆಚೆಂ, ತಶೆಂಚ್ ಆಜ್ ಜೊ ಸಾಂಕವ್ ಭಾಂದ್ಚೆಂ ಪ್ರೇತನ್ ಸುರು ಜಾಲಾಂ, ಹಾಕಾ ಸರ್ವಾಂನಿ ಆಧಾರ್ ದಿಂವ್ಚಿ ಗರ್ಜ್ ಆಸಾ. ಸಾಂಕವ್ ಮೊಡ್ತೆಲ್ಯಾಂನಿ ಜಾಯ್ತೆ ಸಾಂಕವ್ ಮೊಡುನ್ ಆಮ್ಕಾಂ ಪಯ್ಸ್ ಪಯ್ಸ್ ದವರ್ಲಾಂ ಪುಣ್ ಕೊಂಕಣಿ ಆಮ್ಚಿ ಸರ್ವಾಂಚಿ ಭಾಸ್ ದೆಕುನ್ ಆಮಿ ಸಾಹಿತ್ಯಾಮುಖಾಂತ್ರ್, ಡಿಜಿಟಲ್ ಸಕ್ತೆಮುಖಾಂತ್ರ್ ಅಸಲೆ ಸಾಂಕವ್ ಉಭಾರುಂಕ್ ಮೆಟಾಂ ಕಾಡ್ಯಾಂ ಮ್ಹಣಾಲೊ.
ವಲ್ಲಿ ಕ್ವಾದ್ರುಶಾನ್ ಧಿನ್ವಾಸ್ ಉಲವ್ಪ್ ಕೆಲೆಂ.
ಹೆಂ ಕಾರ್ಯೆಂ ಭೋವ್ ಬರೆ ರಿತಿನ್ ಬಾಯ್ ಉರ್ಜಿತಾ ಭೊಬೆನ್ ಚಲವ್ನ್ ವೆಲೆಂ.
