ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಹಫ್ತ್ಯಾಚಿ ಕಥಾ: ಅಖ್ರೇಚಿ ರಾತ್
ಎಚ್.ಜೆ.ಗೋವಿಯಸ್: ಕೊಂಕ್ಣಿ ಸಾಹಿತ್ಯಾಂತ್ ಏಕ್ ಭಳ್ವಂತ್ ಕಾಣ್ಯೆಗಾರ್, ಅಪುರ್ಭಾಯೆಚ್ಯೊ ಮಟ್ವ್ಯೊ ಕಾಣ್ಯೊ, ಸಾಂಕಳ್ ಕಾಣ್ಯೊ ತಶೆಂಚ್ ಕಾದಂಬರಿ ಹಾಣೆ ಬರಯ್ಲ್ಯಾತ್. ವಾಚ್ಪ್ಯಾಂಕ್ ಭರ್ಪೂರ್ ಮನರಂಜನ್ ದಿಂವ್ಚ್ಯಾಂತ್ ಹಾಚ್ಯೊ ಕಾಣ್ಯೊ ಸಲ್ವಾನಾಂತ್. ಹಾಚ್ಯಾ ಕಾಣ್ಯಾಂನಿ ವಾಪಾರ್ಚಿ ಭಾಸ್ ಸಾದಿ, ಆನಿ ವಿಶಯ್ ಸಾಮಾಜಿಕ್ ಮನರಂಜನ್ ದೆಕುನ್ ಚಡಿತ್ ಲೋಕ್ ಹಾಚ್ಯೊ ಕಾಣ್ಯೊ ಖಾಯ್ಸ್ ಕರ್ತಾ. ’ಯೆತಾಂ ತುಜಿ ವಾಟ್ ಧರುನ್’, ’ಕಾಳೊಕಾಂತ್ಲೆ ದೊಳೆ’, ’ಹಾಂವ್ ತುಕಾ ನಾಸ್ ಕರ್ತೆಲಿಂ’, ’ಭುಂಯಾರಾಂತ್ಲೊ ಘುಟ್’ ಹಾಚ್ಯಾ ಲೊಕಾಮೊಗಾಳ್ ಕಾದಂಬರೆ ಪಯ್ಕಿಂತ್ಲ್ಯೊ ಥೊಡ್ಯೊ.
ಹೆರ್ ಕಾಣ್ಯೊ: ಹಾಂವ್ ತುಜಿಂ ಜಾಂವ್ಕ್ ಆಶೆತಾಂ, ಮ್ಹಜ್ಯೆ ಆವಯ್ ಖಾತಿರ್, ಕಾಳಿಜ್, ನಿರ್ಧಾರ್
ಎಚ್.ಜೆ.ಗೋವಿಯಸ್
ಫೊರ್ಡ್ 4D ಕ್ಲಾಸಿಕ್ ಕಾರಾನ್ ನ್ಯೂ ಜೆರ್ಸಿ, ರಿಡ್ಜ್ವುಡ್ ವೆಚೆ ಹಾಯ್ವೇಚೆರ್ ಉಜ್ವ್ಯಾ ದಿಕ್ಕಾರ್-ಕ್ಯಾಸ್ಟನ್ ಎವೆನ್ಯೂಂತ್ ಘುಂವ್ಡಿ ಘೆತ್ಲಿ! ತೊ ರೂಂದ್ ರಸ್ತೊ ಲಾಂಬಾಯೆಕ್ ವಿಸ್ತಾರ್ಲ್ಲೊ ಆನಿ ತಿ ವಾಟ್ ಜಾವ್ನಾಸ್ಲ್ಲಿ ‘Grace & Peace’ ಹ್ಯಾ ಬಂಗ್ಲ್ಯಾಚಿ!
ರಾತ್ಚಿಂ ವೊರಾಂ ನೋವ್ ಜಾಂವ್ಕ್ ಆಯಿಲ್ಲಿಂ. ಬಾರೀಕ್ ಪಾವ್ಸ್ ಶೆಣಯ್ತಾಲೊ. ರಸ್ತ್ಯಾ ವಯ್ಲೆ ಲಾಯ್ಟಾ ಖಾಂಬೆ ಪಾವ್ಸಾಚಾ ಪಾವ್ಳ್ಯಾಂನಿ, ಉಜ್ವಾಡ್ ಮಂದ್ ಪ್ರಕಾಸಾಚಾ ವಿಸ್ತಾವರಣೆಂತ್ ಸೂರ್ಯಾಚಾ ಭಾಲ್ಯಾಪರಿಂ ಫಾಂಕಯ್ತಾಲೆ.
ರಸ್ತ್ಯಾರ್ ವಾಹನ್ ಸಂಚಾರ್ ವಿರಳ್ ಜಾಲ್ಲೊ. ಕಾರಾಚಾ ಮುಖ್ಲ್ಯಾ ಆರ್ಶ್ಯಾಚ್ಯೊ ವೈಪರ್ ಬ್ಲೇಡಿ, ಪಾವ್ಸಾಚೆಂ ಉದಾಕ್ ಸವ್ಕಾಸ್ ನಿಸ್ರಾವ್ನ್ ಆರ್ಶೆ ನಿತ್ಳಾವ್ನ್ ವಾಟ್ ಸುಗಮ್ ಕರ್ತಾಲ್ಯೊ.
ಕಾರ್ 110-ಚಾ ವೆಗಾರ್ ಡಾರ್ಲಿನ್ ಚಲಯ್ತಾಲೆಂ. ತಾಚಾ ತೊಂಡಾಚೆರ್ ಉತ್ಸಾವಾಚೊ ಛಾರೊ ಝಳ್ಕಾತಾಲೊ. ಕೇಸ್ ವೊಲೆ ಕಶೆ ಆಸೊನ್ ಘಡ್ಯೆ-ಘಡ್ಯೆ ಗಾಲಾಂಕ್ ಚುಂಬನ್ ದಿತಾಲೆ. ದೊಳ್ಯಾಂನಿ ರಸ್ತ್ಯಾಚಿ ಲಾಂಬಾಯ್ ಖಂಚ್ಲ್ಲೆ ಸಂಗಿಂ ಶೂನ್ಯತಾ ವಿರಾಜ್ ಕರ್ತಾಲಿ.
ಸೆಲ್ಲ್ ಫೊನ್ ರಂಗೀನ್ ನವ್ಯಾಚ್ ಸಿನೆಮಾಂತ್ಲ್ಯಾ ಪದಾಚಾ ತರಂಗಾಂನಿ ಜಾಗೆಂ ಜಾತಾನಾ, ಡಾರ್ಲಿನಾನ್ ಕಾರಾಚೊ ವೇಗ್ ಮಿತಿರ್ ಹಾಡ್ಲೊ. ದುಸ್ರ್ಯಾಕ್ಷಣಾ ತಾಚೆ ಹಾತಿಂ ಸೆಲ್ಲ್ ಫೊನ್ ಲಾಗ್ಲೆಂ. ಎಕಾ ನಾಜೂಕ್ ಹಾಸ್ಯಾಸಂಗಿಂ ತೆಂ ಸೆಲ್ಲ್ ಫೊನಾಚಾ ಸ್ಕ್ರೀನಾಕ್ ಪಳೈಲಾಗ್ಲೆಂ.
ರಾಯ್ನಲಾಚಿ ಹಾಸ್ತ್ಯಾ ಮುಖಮಳಾಚಿ ತಸ್ವೀರ್ ಉದೆಲ್ಲಿ. ತ್ಯಾ ತಾಚ್ಯೆ ತಸ್ವೀರೆಕ್ ಉಮಾಳ್ಯಾಚೊ ಉಮೊ ದೀವ್ನ್, ಕಾರ್ ಉಣ್ಯಾ ವೆಗಾನ್ ಚಲಂವ್ಚೆ ಲೈನಿಕ್ ಘುಂವ್ಡಾಯ್ಲಾಗ್ಲೆಂ.
“ಹಾಂವ್ ತುಜ್ಯಾಚ್ ಘರ್ಚೆ ವಾಟೆರ್ ಆಸಾ ಮೊಗಾ..... ಆನ್ಯೇಕಾ ಪಂದ್ರಾಚ್ ಮಿನುಟಾಂನಿ ತುಜ್ಯಾ ವೊಂಟಾಂಕ್ ತೃಪ್ತಿ ಮೆಳ್ತೆಲಿ........" ರಂಗೀನ್ ತಾಳ್ಯಾನ್ ವೊಳೂ ಹಾಸ್ಲೆಂ ತೆಂ.
“ತುಜೆಂ ಕಾರ್ ಪಾಟಿಂ ಘುಂವ್ಡಾಯ್ ಹನಿ, ಹಾಂವ್ ಹ್ಯಾ ವಗ್ತಾ ಮ್ಹಜಾ ಘರಾ ನಾ....." ರಾಯ್ನಲಾಚೊ ತಾಳೊ ಗದ್ಗದೀತ್ ಉತ್ರಾಂನಿ ಡಾರ್ಲಿನಾಚಾ ಕಾನಾಂತ್ ಸಾದ್ಲೊ.
“ತುಂ ಖಂಯ್ ಆಸಾಯ್ ಮೊಗಾ.....?" ತುಂವೆಂಚ್ ಕಾಲ್ ಆಪಯಿಲ್ಲ್ಯಾ ಪ್ರಕಾರ್ ಹಾಂವ್ ಸಗ್ಳ್ಯಾಂಚೆ ದೊಳೆ ಚುಕವ್ನ್.....
“ಕಾಂಯ್ಚ್ ವಿಚಾರಿನಾಕಾ....." ಮಧೆಂಚ್ ರಾಯ್ನಲಾಚೊ ತಾಳೊ, ಡಾರ್ಲಿನಾಚಿಂ ಭಗ್ಣಾಂ ಶಿಂದಿಲಾಗ್ಲೊ. “ಜರ್ತರ್ ತುಂ ಮ್ಹಜೊ ನೀಜ್ ಮೋಗ್ ಕರ್ತಾಯ್ ತರ್, ಶೀದಾ ಪಾಟಿಂ ಪರ್ತಾ...."
ಫೊನ್ ಸಂಪರ್ಕ್ ತುಟ್ಲ್ಲೊ ಆವಾಜ್!
ಡಾರ್ಲಿನಾಚಾ ಸಂತೊಸಾಚೊ ಸ್ಪೀರಿತ್ ಉಬೊನ್ ಗೆಲೊ. ಸೆಲ್ಲಾ ವಯ್ಲಿ ರಾಯ್ನಲಾಚಿ ತಸ್ವೀರ್ ಮಾಯಾಗ್ ಜಾಲ್ಲಿ!!
ಎಕಾಚ್ಫರಾ ತಾಚೊ ಪಾಂಯ್ ಬ್ರೇಕಿಚೆರ್ ಆಂರ್ದಾಲೊ! ಮುಖಾರ್ ದಿಸ್ಚ್ಯೆ ‘U ಘುಂವ್ಡೆರ್ ಡಾರ್ಲಿನಾನ್ ಕಾರ್ ಪಾಟಿಂ ರಸ್ತ್ಯಾಕ್ ಲಾಯ್ಲೆಂ....
ತಾಚೆಂ ಕಾಳಿಜ್ ದುಃಖಾಂಚಾ ಉಮಾಳ್ಯಾಂನಿ ಭುಡೊಂಕ್ ಸುರು ಜಾಲೆಂ..... ವ್ಹಯ್ ತೆಂ ರಡ್ತಾಲೆಂ.
**********
ಡಾರ್ಲಿನ್, ಎಕಾ ಗ್ರೇಸ್ತ್ ಕುಟ್ಮಾಂತ್ಲಿ ಚಲಿ! ಪುಣ್ ಸೊಬಾಯ್ ಮ್ಹಳ್ಳೊ ಗ್ರೇಸ್ತ್ ಸೊಬಿತ್ ಸಬ್ದ್, ತಾಚಾ ಉಣ್ಯಾ ಪಣಾಚಿ ಕರಂದಾಯ್ ಜಾಲ್ಲಿ!! ವ್ಹಯ್ ಗ್ರೇಸ್ತ್ ಕಾಯೆನ್ ಡಾರ್ಲಿನ್ ಕಿತ್ಲೆಂ ವಯ್ಲೆಂ, ಸೊಬಾಯೆಂತ್ ತಿತ್ಲೆಂಚ್ ಸಕೈಲೆಂ. ತಾಕಾ ಸಾಂಗಾತಿಣ್ಯೊ ಸಭಾರ್ ಆಸ್ಲ್ಲ್ಯೊ, ತೆಂ ಕೊಲೆಜಿಂತ್ ಶಿಕ್ತಾನಾ. ಸಗ್ಳ್ಯಾ ಮಿತ್ರಿಣ್ಯಾಂಕ್ ತೆಂ ಜಿವಾಪ್ರಾಸ್ ಚಡ್ ಮೋಗ್ ಕರ್ತಾಲೆಂ. ತಾಂಚಾ ಗರ್ಜಾಂತ್, ತಾಂಚಾ ಆರ್ಥಿಕ್ ಅಡ್ಚಣೆಂತ್, ಸದಾಂಚ್ ಡಾರ್ಲಿನ್ ಕುಮ್ಕೆಚೊ ಹಾತ್ ಜಾವ್ನ್ ಸಾಂಗಾತ್ ದಿತಾಲೆಂ.....
ಪುಣ್ ಚಡಾವತ್ ಚಲಿಯೊ ಚಂಚಲ್ ಆನಿ ಮತ್ಲಾಬಿ ಮಳ್ಳೆಂ ರುಜು ಜಾಲ್ಲೆಂ ಡಾರ್ಲಿನಾಚೆ ಜಿಣ್ಯೆಂತ್, ತಾಂಕಾಂ ತಾಂಚಾ ಪಸಂದೆಚೊ ಚಲೊ ಮೆಳ್ತಾನಾ....
ಡಾರ್ಲಿನ್ ಆಪ್ಲಿಂ ಭಗ್ಣಾಂ ಆನುಭವಿಸಿತಾಲೆಂ, ತಾಕಾಯ್ ಏಕ್ ತಾಚೊ ಮೋಗ್ ಕರ್ಚೊ ಖರೊ ಪ್ರೇಮಿ ಮೆಳೊಂಕ್ ಜಾಯ್ ಮ್ಹಣ್. ಪುಣ್ ಚಲೆ ತಾಚಾ ಲಾಗ್ಶಿಲ್ಯಾನ್ ಅಶೆ ಪಾಶಾರ್ತಾಲೆಕೀ, ಎಕೆ ಕುರುಪಿಕ್ ಪಳಯಿಲ್ಲೆ ಪರಿಂ ವ ಕೊಣಾಯ್ಕಿ ಪಳೆನಾತ್ಲ್ಲೆ ಪರಿಂ! ಡಾರ್ಲಿನ್ ಕಳ್ವಳ್ತಾಲೆಂ ಆಪುಣ್ ಜಲ್ಮಾತಾನಾ ಘೆವ್ನ್ ಆಯಿಲ್ಲ್ಯಾ ರುಪಾಕ್ ಚಿಂತುನ್. ಪುಣ್ ತೆಂ ದೆವಾಲಾಗಿಂ ವ ಆಪ್ಲ್ಯಾ ಜನಮ್ ದಿಲ್ಲ್ಯಾ ದಾತಾರಾಂ ಥಂಯ್ ಬಿಲ್ಕುಲ್ ರಾಗಾನ್ ನಾತ್ಲ್ಲೆಂ, ಕಿತ್ಯಾಕ್ ತಾಚೆಲಾಗ್ಗಿಂ ಸೊಬಾಯೆ ಪ್ರಾಸ್ ಚಡ್ ಗ್ರೇಸ್ತ್ ಕಾಯೆನ್ ಭರ್ಲ್ಲೆಂ ಮೊಗಾಚೆಂ ಕಾಳಿಜ್ ಆಸ್ಲ್ಲೆಂ. ಆನಿ ತೆಂ ರಾಕೊನ್ ಆಸ್ಲ್ಲೆಂ ತಾಕಾ ದೀಂವ್ಕ್, ತಾಚೊ ಮೋಗ್ ಕರುಂಕ್, ತಾಚಿ ಚಾಕ್ರಿ ಕರುಂಕ್, ತಾಚ್ಯೆ ಗುಲಾಮೆಂತ್ ಆಪ್ಲಿ ಜಿಣಿ ಸಾರುಂಕ್, ಜೊ ತಾಚ್ಯೆ ಸೊಬಾಯೆಕ್ ನಹಿಂ, ಬಗಾರ್ ತಾಚಾ ಕಳ್ಜಾಚಾ ಗ್ರೇಸ್ತ್ ಗುಣಾಂಕ್ ವಳ್ಕೊನ್ ತಾಕಾ ಆಪ್ಣಾಂವ್ಕ್ ಮುಖಾರ್ ಸರ್ಚೊ, ತಾಕಾ.
ಏಕ್ ದೀಸ್ ಡಾರ್ಲಿನ್ ಮತಿಚಿ ಬೆಜಾರಾಯ್ ಪಯ್ಸ್ ಕರುಂಕ್, ಕೆಸೀನೊಕ್ ಪಾವ್ಲ್ಲೆಂ. ತಿ ತಾಚಿ ಆಪೂರ್ವ್ ಸವಯ್ ಜಾವ್ನಾಸ್ಲ್ಲಿ. ಕೆಸೀನೊ ಥಾವ್ನ್ ತೆಂ ಕೆದಾಳಾಯ್ ಜಿಕೊನ್ ಬಿಲ್ಕುಕ್ ಯೇಂವ್ಕ್ ನಾತ್ಲ್ಲೆಂ ಬಗಾರ್ ಹೊಗ್ಡಾವ್ನ್ಂಚ್ ಆಯಿಲ್ಲೆಂ. ಪುಣ್ ಹ್ಯೆ ಪಾವ್ಟಿಂ ತಾಕಾ ಖೆಳ್ತಾನಾ ಥೊಡ್ಯಾಚ್ ವೆಳಾನ್ ಜೆಕ್ಪೊಟ್ ಲಾಗ್ಲೊ!! ವ್ಹಯ್, ತೆಂ ಜೆಕ್ಪೊಟ್ ಜಿಕ್ಲ್ಲೆಂ ಆನಿ ತೊ ಐವಜ್ ಜಾವ್ನಸ್ ಲ್ಲೊ
111,000 ಡೊಲರ್!!! (ಏಕ್ ಲಾಖ್ ಇಕ್ರಾ ಹಜಾರ್ ಡೊಲರ್)
ಡಾರ್ಲಿನಾಕ್ ತಿತ್ಲಿ ವ್ಹಡ್ಲಿ ಕಾಂಯ್ ಖುಶಿ ಜಾಂವ್ಕ್ ನಾತ್ಲ್ಲಿ. ‘ಆಪ್ಣೆ ಅಸಲ್ಯಾ ಕೆಸೀನೊಂತ್ ಹೊಗ್ಡಾಯಿಲ್ಲ್ಯಾ ಪಯ್ಶ್ಯಾಂ ಮುಖಾರ್ ಕಾಂಯ್ ಕಾಲ್ದೆ ಪಯ್ಶೆ ಪಾಟಿಂ ಮೆಳ್ಳೆ ಜಾಂವ್ಕ್ ಪುರೊ’ ತೆಂ ಚಿಂತಿಲಾಗ್ಲೆಂ.
ಚಡಿತ್ ಖೆಳೊನ್ ಆಯಿಲ್ಲೆ ಪಯ್ಶೆಯಿ ಹೊಗ್ಡಾಂವ್ಚ್ಯಾ ಪ್ರಾಸ್ ಪಾಟಿಂ ವೆಚೆಂ ಮ್ಹಣ್ ಚಿಂತುನ್, ತೆಂ ಮೆಳ್ಲ್ಲೆ ಪಯ್ಶೆ ಘೆವ್ನ್ ಕೆಸೀನೊ ಥಾವ್ನ್ ಭಾಯ್ರ್ ಆಯ್ಲೆಂ.
ಡಾರ್ಲಿನ್ ಆಪ್ಲ್ಯಾ ಕಾರಾ ಥಂಯ್ ಪಾವೊನ್ ಹಾತಿಂ ಆಸ್ಲ್ಲ್ಯಾ ರಿಮೊಟ್ ಕಂಟ್ರೊಲಾನ್ ದಾರ್ ಉಘಡ್ತಾನಾ, ಎಕ್ಲೊ ತರ್ನಾಟೊ ತಾಚಾ ಪಾಟಾಪಾಟ್ ಪಾವೊನ್ - “ಮಡಾಮ್.... ಏಕ್ ಉಪ್ಕಾರ್ ಕರುಂಕ್ ಜಾಯ್.... ತುಂ ಆಜ್ ಕೆಸೀನೊ ಥಾವ್ನ್ ವ್ಹಡ್ಲೊ ಐವಜ್ ಜಿಕೊನ್ ವೆತಾಯ್...., ಮ್ಹಜಾ ಎಕಾ ಮಿತ್ರಾಕ್, ತಾಣೆ ಆತ್ಮ್ಹತ್ತ್ಯಾ ಕರ್ಚ್ಯಾ ಅನ್ವಾರಾ ಥಾವ್ನ್ ರಾಕೊನ್ ನವೆಂ ಜೀವನ್ ದೀಂವ್ಕ್ ಜಾಯ್...."
ಡಾರ್ಲಿನಾನ್ ಕಾರಾಚೆಂ ದಾರ್ ವ್ಹಡುಂಕ್ ಮುಖಾರ್ ವೆಲ್ಲೊ ಹಾತ್ ಪಾಟಿಂ ಕಾಡ್ಲೊ ಆನಿ ತ್ಯಾ ತರ್ನಾಟ್ಯಾಕ್ ಪಲೈಲಾಗ್ಲೆಂ. ಆಮೆರಿಕಾಂತ್ ಪಿಸ್ತುಲ್ ದಾಖವ್ನ್, ಸುರಿ ದಾಖವ್ನ್ ಬೆಷ್ಟಾವ್ನ್ ವ ಖುನಿ ಕರುನ್ ಉಟ್ತೆಲ್ಯಾಂಕ್ ಡಾರ್ಲಿನ್ ಬರ್ಯಾನ್ ಜಾಣಾಸ್ಲ್ಲೆಂ. ಪುಣ್ ಹೊ ಆಪ್ಲ್ಯಾ ಮಿತ್ರಾಚಾ ನಾಂವಾನ್.... ತಾಚಾ ಜಿವಾಚಾ ರಕ್ಷಣೆ ಖಾತಿರ್ ಭಿಕ್ ಮಾಗ್ಚೆಂ, ಡಾರ್ಲಿನಾಕ್ ವಿಚಿತ್ರ್ ದಿಸ್ಲೆಂ ಆನಿ ತ್ಯಾ ತರ್ನಾಟ್ಯಾಕ್ ಸವಾಲ್
ಕರಿಲಾಗ್ಲೆಂ, “ಹಾಂವ್ ಕೆಸೀನೊ ಥಾವ್ನ್ ಜಿಕೊನ್ ವೆಚೆಂ ತೆಂ ತುಂವೆಂ ಜಾಣಾ ಕೆಲಾಂಯ್ ಆನಿ ತುಜ್ಯಾ ಮಿತ್ರಾಚಾ ಜೀವ್ ರಕ್ಷಣೆಚಾ ನಿಬಾನ್ ಪಯ್ಶ್ಯಾಂಕ್ ವಿಚಾರ್ಚೆಂ ಪಳೈತಾನಾ, ಹಾಂತುಂ ಮ್ಹಾಕಾ ಸತ್ ಕಾಂಯ್ ದಿಸಾನಾ..... ಕೋಣ್ ತೊ ತುಜೊ ಮಿತ್ರ್, ಆನಿ ಆತ್ಮಹತ್ತ್ಯಾ ಕಿತ್ಯಾಕ್ ಕರುಂಕ್ ಚಿಂತಾ.....?"
“ಮಡಾಮ್ ತುಂವೆಂ ಕೆಸೀನೊ ಥಾವ್ನ್ ಜಿಕೊನ್ ವೆಚೆಂ ಮಾತ್ರ್ ನ್ಹಯ್ ಬಗಾರ್ ತಾಚೆ ಪ್ರಾಸ್ ಬರೆಂ ಮನ್ ಆನಿ ಕಾಳಿಜ್ ತುಜೆ ಕಡೆನ್ ಆಸಾ ತೆಂವೀ ಹಾಂವೆಂ ಜಾಣಾಂ ಕೆಲಾಂ... ಹ್ಯಾ ಕೆಸೀನೊಕ್ ಹಜಾರಾಂನಿ ಯೆತಾತ್ ಆನಿ ಲಾಖಾಂನಿ ಹೊಗ್ಡಾಯ್ತಾತ್ ವ ಜಿಕ್ತಾತ್ಯಿ. ವ್ಹಡ್ ವ್ಹಡ್ ಮಿಲಿಯನರಾಂಕ್ಯೀ ಹಾಂವೆಂ ಪಳಯ್ಲಾಂ. ಜಿಕ್ಲ್ಲ್ಯಾ ವೆಳಾರ್ 10 ಡೊಲರಾ ಥಾವ್ವ್ನ್ ಚಡ್ಡ್ ಮ್ಹಳ್ಯಾರ್ 100 ಡೊಲರ್ ಪರ್ಯಾಂತ್ ಟಿಪ್ಸ್ ದಿಂವ್ಚಿ ತಾಂಚಿ ಮೀತ್. ಪುಣ್ ತುಂವೆಂ ಲಗ್ಬಗ್ 10 ಜಾಣಾಂಕ್ ಎಕೇಕ್ ಹಜಾರ್ ಡೊಲರಾ ಲೆಕಾನ್ ಟಿಪ್ಸ್ ದೀವ್ನ್ ವೆಚೆಂ ಪಳವ್ನ್ ಹಾಂವ್ ತುಜೆ ಲಾಗ್ಗಿಂ ಮ್ಹಜಾ ಮಿತ್ರಾ ಖಾತಿರ್ ಮಾಗೊಂಕ್ ಆಯ್ಲೊಂ...."
ಡಾರ್ಲಿನ್ ವಿಚಿತ್ರ್ ದಿಷ್ಟಿನ್ ತ್ಯಾ ತರ್ನಾಟ್ಯಾಕ್ ಪಳೈಲಾಗ್ಲೆಂ. ತಾಚಾ ಉತ್ರಾಂನಿ ತಾಕಾ ಸತ್ ಝಳಾಲ್ಲೆಂ.
“ತೆಂ ಸಕ್ಕಡ್ ಆಸೊಂ, ತುಜೊ ಮಿತ್ರ್ ಕಿತ್ಯಾಕ್ ಆತ್ಮ್ಹತ್ತ್ಯಾ ಕರುಂಕ್ ಚಿಂತಾ...? ಖಂಯ್ ಆಸಾ ತೊ...?" ಡಾರ್ಲಿನ್ ದೋನ್ ಮೆಟಾಂ ಮುಖಾರ್ ಸರೊನ್ ವಿಚಾರಿಲಾಗ್ಲೆಂ.
“ಪಯ್ಲ್ಯಾ ಸುವಾತೆರ್ ಮೆಡಾಮ್, ಹಾಂವ್ ತ್ಯಾ ಕೆಸೀನೊಂತ್ ಕಾಮ್ ಕರ್ತಾಂ. ಮ್ಹಜೊ ಮಿತ್ರ್ ಮ್ಹಜೊ ಸ್ಕೂಲ್ ಫೆಲ್ಲೊ. ಸಬಾರ್ ತೆಂಪಾ ಥಾವ್ನ್ ತಾಚಾ ಆವಯ್ಚಿ ಬಲೈಕಿ ಬರಿ ನಾ ಆನಿ ಬೋವ್ ವ್ಹಡ್ ಒಪೊರೇಶನ್ ಕರಂವ್ಕ್ ಆಸಾ ತಿಚೆಂ. ಮಿತ್ರಾಚಾ ಆರ್ಥಿಕ್ ಆಡ್ಚಣೆಂತ್ ಆಪ್ಲ್ಯಾ ಆವಯ್ಚೆಂ ಒಪೊರೇಶನ್ ತಾಚಾನ್ ಕರಂವ್ಕ್ ಜಾಲೆಂನಾ ಮ್ಹಣ್, ಪಿಶ್ಯಾ ಬುದಿನ್ ಕೆಸೀನೊಂತ್ ಆಪ್ಲೆಂ ನಶೀಬ್ ಪಾರ್ಕುಂಕ್ ಪಳೆಯ್ಲಾಗ್ಲೊ. ‘ಜರ್ತರ್ ಜಿಕ್ಲೊಂ ತರ್, ತೆ ಪಯ್ಶೆ ಆವಯ್ಚ್ಯಾ ಒಪೊರೇಶನಾ ಖಾತಿರ್ ಖರ್ಚಿತಲೊಂ’ ಮ್ಹಣ್ ಸಾಂಬಾಳಾಚೊ ಸಾಂಬಾಳ್ ಆನಿ ರೀಣ್ ಕಾಡುನ್ ಹಾಂಗಾ ಕೆಸೀನೊಂತ್ ಲಾಗಯ್ಲೆ..... ತೊ ಲ್ಹಾನ್ ಆಸ್ತಾನಾ, ತಾಚೊ ಬಾಪುಯ್ ತಾಚಾ ಆವಯ್ಕ್ ಸೊಡುನ್ ಗೆಲ್ಲೊ ಪರಾತ್ ಪಾಟಿಂ ಪರ್ತುಂಕ್ನಾ......
“ಆಜ್ಚ್ ಭೋವ್ಶಾ ಎಕಾ ಹಜಾರಾ ವಯ್ರ್ ಡೊಲರ್ ತಾಣೆ ಹೊಗ್ಡಾಯ್ಲೆ. ಹಾಂವೆಂ ಕಿತ್ಲೆಂ ಆಡಾಯ್ಲೆಂ ತರೀ, ಘಾಲ್ಲೆ ಪಯ್ಶೆ ಕಾಡ್ಚ್ಯಾ ಪ್ರಯಾತ್ನಾಂತ್, ಆಸ್ಲ್ಲೆ ಪೂರಾ ಹೊಗ್ಡಾಯ್ಲಾಗ್ಲೊ. ಆತಾಂ ತಾಚಿ ತಕ್ಲಿ ಪಾಡ್ ಜಾಲ್ಯಾ. ಕಾಂಯ್ ವಾಟ್ನಾ ತೆಂ ಚಿಂತುನ್ ತೊ, ಅವಯ್ ಮೊರ್ಚ್ಯೆ ಆದಿಂ ಆಪುಣ್ ಜೀವ್ ಹೊಗ್ಡಾವ್ನ್ ಘೆತಾಂ ಮ್ಹಣ್ ಹಟಾರ್ ಪಡ್ಲಾ. ಹಾಂವೆಂ ತುಕಾ ಪಳಯ್ಲೆಂ ತುಂವೆಂ ಜಿಕೊನ್ ಸಭಾರಾಂಕ್ ಟಿಪ್ಸ್ ದೀವ್ನ್ ವೆಚೆಂ.... ಆನಿ ತಾಕಾ ಕಶೆಂಯೀ ಆಡಾವ್ನ್ ಆತ್ತಾಂ ಯೆತಾಂ ಮ್ಹಣ್ ಸಾಂಗೊನ್, ತುಜೆ ಲಾಗ್ಗಿಂ ತಾಚಾ ಜಿವಾಚೆಂ ಭಿಕ್ ಮಾಗೊಂಕ್ ಆಯ್ಲಾಂ ಮಡಾಮ್..... ಮ್ಹಜಾ ಮಿತ್ರಾಕ್ ಕಾಂಯ್ ತರೀ ಕುಮೊಕ್ ಕರುನ್ ವಾಂಚೈ ಮಡಾಮ್...." ತರ್ನಾಟೊ ಹಾತ್ ಜೊಡುನ್ ರಡಾಲಾಗ್ಲೊ.
ಡಾರ್ಲಿನಾಕ್, ತರ್ನಾಟ್ಯಾಚಿ ಕಾಣಿ ಆಪ್ಲ್ಯಾ ಅಸಹಾಯಕ್ ಮಿತ್ರಾ ಖಾತಿರ್ ರಡೊನ್ ಪರಾತ್ತುನ್ ಸಾಂಗ್ಚಿ ಆಯ್ಕೊನ್ ಬಿರ್ಮೊತ್ ದಿಸ್ಲಿ. ತೆಂ ಆಪ್ಲ್ಯಾ ಹ್ಯಾಂಡ್ ಬ್ಯಾಗಾಂತ್ ಹಾತ್ ಘಾಲುನ್ ನೊಟಾಂಚ್ಯೊ ಆಟ್ಟ್ಯೊ ಕಾಡಿಲಾಗ್ಲೆಂ.
“ಘೆ, ಹಾಂತುಂ ಪಂದ್ರಾ ಹಜಾರ್ ಆಸಾತ್, ತುಜ್ಯಾ ಮಿತ್ರಾಕ್ ದೀ...."
ಅಜಾಪ್ ಪಾವ್ಲ್ಲೊ ತರ್ನಾಟೊ, ವ್ಹಡ್ಲ್ಯಾ ದೊಳ್ಯಾಂನಿ ಆಪ್ಲ್ಯಾ ಹಾತಾರ್ ಘಾಲ್ಲ್ಯಾ ತ್ಯಾ ನೊಟಾಂಚಾ ಆಟ್ಟೆಂಕ್ ಪಳೈಲಾಗ್ಲೊ. “ತುಜೊ ವ್ಹಡ್ ಉಪ್ಕಾರ್ ಮಡಾಮ್......" ತೊ ಮ್ಹಣಾಲೊ ಕೃತಜ್ಞತಾ ಆರ್ಪುನ್. “ತುಂವೆಂ ಥಂಯ್ ಕಾಮ್ ಕರ್ತೆಲ್ಯಾಂಕ್ ಹಜಾರ್ ಹಜಾರ್ ಡೊಲರ್ ಟಿಪ್ಸ್ ದೀವ್ನ್
ವೆಚೆಂ ಪಳವ್ನ್, ಹಾಂವ್ ಫಕತ್ತ್ ಮ್ಹಜಾ ಮಿತ್ರಾನ್ ಹೊಗ್ಡಾಯಿಲ್ಲೆ ಪಯ್ಶೆ ತುಜೆ ಕಡೆನ್ ಮೆಳ್ತಿತ್ಗಿ ಮ್ಹಣ್
ಆಯಿಲ್ಲೊಂ. ಪುಣ್ ತುಂವೆಂ ತಾಣೆ ಹೊಗ್ಡಾಯಿಲ್ಲೆ ಮಾತ್ರ್
ನ್ಹಯ್, ಸಾಂಗಾತಾ ತಾಚಾ ಆವಯ್ಚ್ಯಾ ಒಪೊರೇಶನಾಚೆ ಪಯ್ಶೆಯಿ ದಾನ್ ಕೆಲೆಯ್. ತುಜೆಂ ಮನ್ ವಿಶಾಲ್ ಆನಿ ವಿಚಿತ್ರ್ ಮಡಾಮ್. ತುಂವೆಂಚ್ ಕಿತ್ಯಾಕ್ ತುಜ್ಯಾ ಹಾತಾಂನಿ ತಾಕಾ ಯೇವ್ನ್ ದೀಂವ್ಕ್ ನಜೊ ಮಡಾಮ್.....?"
” ತರ್ನಾಟೊ ಪಯ್ಶೆ ಪಾಟಿಂ ವಡ್ಡಾವ್ನ್ ಮ್ಹಣಾಲೊ.
“ತುಜ್ಯಾ ಮಿತ್ರಾಕ್ ಹೆ ಪಯ್ಶೆ ಫಾವೊ ಜಾಲ್ಯಾತ್, ಮ್ಹಜೆ ಥಾವ್ನ್ ನ್ಹಯ್, ತುಜೆ ಥಾವ್ನ್. ಹಾಂವೆಂ ಕಾಂಯ್ ಕುಮೊಕ್ ಕರುಂಕ್ನಾ. ಬಗಾರ್ ತುಂವೆಂ ದಾಖಯಿಲ್ಲ್ಯಾ ಬರ್ಯಾ ಮನಾಕ್ ದೆವಾನ್ ಮೆಚ್ವೊನ್, ಮ್ಹಜೆ ಥಾವ್ನ್ ದಿವಯ್ಶೆಂ ಕೆಲೆಂ ಮಾತ್ರ್. ಮ್ಹಳ್ಯಾರ್ ಹೆ ಪಯ್ಶೆ ತುಕಾ ದೆವಾನ್ಂಚ್ ದಿಲ್ಯಾತ್ ಮ್ಹಣ್ ಚೀಂತ್ ಆನಿ ವರುನ್ ದೀ ತುಜ್ಯಾ ಮಿತ್ರಾಕ್....." ಇತ್ಲೆಂ ಸಾಂಗೊನ್ ಡಾರ್ಲಿನ್ ಕಾರಾಂತ್ ರಿಗ್ಲೆಂ.
ಪಾಶಾರ್ ಜಾಲ್ಲ್ಯಾ ಡಾರ್ಲಿನಾಚಾ ಕಾರಾಕ್ ಆನಿ ಆಪ್ಲ್ಯಾ ಹಾತಾಂತ್ಲ್ಯಾ ನೊಟಾಂಚಾ ಆಟ್ಟೆಂಕ್ ತರ್ನಾಟೊ ಘಡಿಬರ್ ಪಳೈಲಾಗ್ಲೊ. ತಾಕಾ ವಿಚಿತ್ರ್ ದಿಸ್ಲೆಂ! ‘ಹೆಂ ನಿಜಾಯ್ಕಿ ಮನಿಸ್ ಗಾಯ್...., ವ ದೆವಾಚೆಂ ಪ್ರತಿರೂಪ್?’ ತೊ ಆಪ್ಣಾಕ್ಚ್ ಸವಾಲ್ ಕರಿಲಾಗ್ಲೊ.
********
‘ನ್ಯೂವ್ ಯೊರ್ಕ್ ಟಾಯ್ಮ್ಸ್’ ಡಾರ್ಲಿನ್ ವಾಚುನ್ ಆಸ್ಲ್ಲೆಂ. ಆಚಾನಕ್ ತಾಚಿ ದೀಷ್ಟ್ ಎಕಾ ಅಪೀಲಾಚೆರ್ ಖಂಚ್ಲಿ!
ವ್ಹಯ್ ತೆಂ ಅಪೀಲ್ ಜಾವ್ನಾಸ್ಲ್ಲೆಂ ‘ಎಕೆ ಪ್ರಾಯೆಸ್ತ್ ಬಾಯ್ಲೆಕ್ ಕಿಡ್ನಿ ಜಾಯ್’ ಹಾಚೊ ಮೂಳ್ ವಿವರ್ ಕಾಣ್ಸಿಲ್ಲೊ ಆನಿ ವಿನಂತಿ ಜಾವ್ನಾಸ್ಲ್ಲಿ, ಜಿ ವ್ಯಕ್ತಿ ಹೊ ಸಾಕ್ರಿಪೀಸ್ ಕರುಂಕ್ ತಯಾರ್ ಆಸಾ ತಿಣೆ ಗಳಾಯ್ ಕರಿನಾಸ್ತಾಂ ಜೋರ್ಜ್ ವಾಷಿಂಗ್ಟನ್ ಮೊಮೊರಿಯಲ್ ಹೊಸ್ಪಿಟಲಾಕ್ ಯೇವ್ನ್ ಆಪ್ಲೆಂ ರಗಾತ್ ತಾಪಾಸಣ್ ಕರುಂಕ್ ಜಾಯ್ ಮ್ಹಣ್.
ಡಾರ್ಲಿನ್ ಘಡಿಬರ್ ಗೂಂಡ್ ಚಿಂತ್ನಾಂನಿ ಬುಡ್ಲೆಂ.
ದುಸ್ರ್ಯಾ ದಿಸಾ ಟಿವಿಚೆರ್ ಸಾಕಾಳಿಂ ಫುಡೆಂ ‘ಗುಡ್ ಮೋರ್ನಿಂಗ್ ಆಮೇರಿಕಾ’ ಚಾನಲಾಚೆರ್ ಖಬ್ರೊ ಪಳೈತಾನಾ, ಹಾಂತುಯಿ ತ್ಯೆ ಪ್ರಾಯೆಸ್ತ್ ಸ್ತ್ರೀಯೆ ವಿಶಿಂ ಉಲ್ಲೇಕ್ ಆಸ್ಲ್ಲೊ. ಭಾಯ್ಲ್ಯಾ ಗಾಂವಾಂಕ್ಯಿ ಅಪೀಲ್ ಕೆಲ್ಲೆಂ ಪೂಣ್ ತ್ಯೆ ಬಾಯ್ಲೆಕ್ ಲಗ್ತಿ ಜಾಂವ್ಚಿ ಕಿಡ್ನಿ ಪ್ರಾಪ್ತ್ ಜಾಂವ್ಕ್ ನಾತ್ಲ್ಲಿ.
ಡಾರ್ಲಿನಾನ್ ನಿಚೆವ್ ಕೆಲೊ, ಎಕಾ ಜೀವ್ ಹೊಗ್ಡಾಂವ್ಚ್ಯೆ ಪಿಡೆಸ್ತ್ ಸ್ತ್ರೀಯೆವಿಶಿಂ ಚಿಂತುನ್; ಜರ್ತರ್ ಆಪ್ಲಿ ಕಿಡ್ನಿ ತಿಕಾ ಲಗ್ತಿ ಜಾತಾ ತರ್, ಆಪುಣ್ ತಿಚೊ ಜೀವ್ ವಾಂಚಯ್ತೆಲಿಂ ಮ್ಹಣ್.
ತಶೆಂ ಡಾರ್ಲಿನ್ ನೆಸೊನ್ ತ್ಯೆ ಆಸ್ಪತ್ರೆಚಿ ವಾಟ್ ಧರುನ್ ಗೆಲೆಂ.
ಡಾರ್ಲಿನಾನ್ ಕರುಂಕ್ ಚಿಂತ್ಲ್ಲೊ ಸಾಕ್ರಿಪೀಸ್ ಆಯ್ಕೊನ್ ಆಸ್ಪತ್ರೆಚೊ ಜಿಮ್ಮೆಧಾರ್ ದಾಕ್ತೆರ್ ಆಜ್ಯಾಪ್ ಪಾವ್ಲೊ. ಡಾರ್ಲಿನ್ ತರ್ನಾಟಿ ಚಲಿ ಆನಿ ತಿ ಪಿಡೆಸ್ತ್ ಬಾಯ್ಲ್, 75-ಕ್ ಮಿಕ್ವಾಲ್ಲಿ. ದಾಕ್ತೆರಾಕ್ ಕಳಿತ್ ಆಸ್ಲ್ಲೆಂ ಡಾರ್ಲಿನಾಚಿ ಕಿಡ್ನಿ ತಿಕಾ ಉಪಾರ್ಚಿನಾ ಮ್ಹಣ್. ದೆಕುನ್ ತಾಣೆ ಡಾರ್ಲಿನಾಕ್ ಸಮ್ಜಾಯ್ಲೆಂ.
ಪುಣ್ ಡಾರ್ಲಿನ್ ಆಯ್ಕೊಂಕ್ ತಯಾರ್ ಜಾಲೆಂನಾ. ಜರ್ತರ್ ಆಪ್ಲಿ ಕಿಡ್ನಿ ತಿಕಾ ತಾಳ್ ಪಡ್ತಾ ತರ್, ಆಪುಣ್ ಖಂಡಿತ್ ಜಾವ್ನ್ ದಿತಲಿಂ ಮ್ಹಳ್ಳ್ಯಾ ಹಟ್ಟಾಕ್ ಪಡ್ತಾನಾ, ಅಸಹಾಯಕ್ ಜಾಲ್ಲೊ ದಾಕ್ತೆರ್ ಡಾರ್ಲಿನಾಕ್ ರಗಾತ್ ತಪಾಸಣ್ ಕರುಂಕ್ ಧಾಡಿಲಾಗ್ಲೊ.
ಡಾರ್ಲಿನಾಚೊ ರಗ್ತಾ ವಿಭಾಗ್ಚ್ ನ್ಹಯ್, ಕಿತೆಂಯಿ ತ್ಯೆ ಮ್ಹಾತಾರೆಚೆ ಭಲಾಯ್ಕೆಕ್ ತಾಳ್ ಪಡಾನಾ ಮ್ಹಣ್ ಖಚಿತ್ ಜಾತಾನಾ, ಬೆಜಾರ್ ಜಾಲ್ಲೆಂ ಡಾರ್ಲಿನ್, ಖಂತಿನ್ ಜೀವನ್-ಮರ್ಣಾ ವಿರೋಧ್ ಝುಜ್ಚ್ಯೆ ತ್ಯೆ ಪಿಡೆಸ್ತ್ ಪ್ರಾಯ್ವಾಂತ್ ಸ್ತ್ರೀಯೆಕ್ ಪಳಂವ್ಕ್ ಗೆಲೆಂ.
ಎಕಾ ಖಟ್ಲ್ಯಾರ್ ದುಕಿನ್ ನಿತ್ರಾಣಿ ಜಾಲ್ಲಿ ಏಕ್ ಪಿಡೆಸ್ತ್ ಸ್ತ್ರೀ ಮೊರ್ನಾಚಾ ಯೆಣ್ಯಾಕ್ ರಾಕೊನ್ ಆಸಾ, ತಶೆಂ ಭಗ್ಲೆಂ ಡಾರ್ಲಿನಾಕ್, ತಿಚೆರ್ ದೀಷ್ಟ್ ಘಾಲ್ತಾನಾ. ದಾಕ್ತೆರ್ ಡಾರ್ಲಿನಾಸಂಗಿಂ ಆಸ್ಲ್ಲೊ.
ಖಟ್ಲ್ಯಾಚೆ ಕುಶಿಕ್ ಉಮ್ಕಾಳ್ಚೊ ತಿಚಾ ಮೆಡಿಕಲ್ ರಿಪೊರ್ಟಾಚೊ ಬೋರ್ಡ್ ಪಳೆಲೊ ಡಾರ್ಲಿನಾನ್. ‘ಎಲಿಜಾ ಇಂಗ್ರಿಡ್ ಮಾರ್ಟಿನ್’ ತಿಚೆಂ ನಾಂವ್ ವಾಚ್ಲೆಂ ತಾಣೆ.
“ಹಲೋ ಮಿಸೆಸ್ ಮಾರ್ಟಿನ್, ಕಶಿ ಆಸಾಯ್ ತುಂ....?" ಡಾರ್ಲಿನಾನ್ ಆಪ್ಲ್ಯಾ ತೊಂಡಾರ್ ಸಹಾನಿಭೂತಿಚೊ ಹಾಸೊ ಹಾಡುನ್ ತಿಕಾ ವಿಚಾರ್ಲೆಂ.
“............" ತಿಣೆ ಆಪ್ಲ್ಯಾ ನಿಸ್ತೇಜ್ ದೊಳ್ಯಾಂನಿ ಡಾರ್ಲಿನಾಕ್ ಪಳೆಲೆಂ. ಪುಣ್ ಕಾಂಯ್ ಜಾಪ್ ದೀಂವ್ಕ್ ತಿ ಸಕ್ಲಿನಾ.
“ತುಂ ಖಂಡಿತ್ ಬರಿ ಜಾವ್ನ್ ಆಪ್ಲ್ಯಾ ಘರಾ ವೆತೆಲಿಯ್ ಮಿಸೆಸ್ ಮಾರ್ಟಿನ್. ದೆವಾಚೆರ್ ಭರ್ವಸೊ ದವರ್. ಆಮಿ ಸಗ್ಳಿಂ ತುಜೆ ಖಾತಿರ್ ಮಾಗ್ತಾಂವ್....." ತಿಚೊ ಹಾತ್ ಆಪ್ಲ್ಯಾ ಹಾತಿಂ ಘೆವ್ನ್ ಡಾರ್ಲಿನಾನ್ ಮೊಗಾನ್ ತಿಚಾ ಮಾತ್ಯಾರ್ ಹಾತ್ ಪೊಶೆವ್ನ್ ಸಾಂಗ್ಲೆಂ.
ಮ್ಹಾತಾರೆನ್ ಡಾರ್ಲಿನಾಚಾ ತೊಂಡಾರ್ ಏಕ್ ಕೃತಜ್ಞತೆಚೊ ಹಾಸೊ ಉಡೈಲೊ. ಪುಣ್ ತ್ಯಾ ಹಾಸ್ಯಾಂತ್ ಭಳ್ಯಿ ನಾತ್ಲ್ಲೆಂ ಆನಿ ಉರ್ಬಾಯಿ.
ಡಾರ್ಲಿನಾನ್ ಮುಖಾರ್ ಸರೊನ್ ಮ್ಹಾತಾರೆಚಾ ಕೊಪಾಲಾಚೊ ಉಮ್ಹೊ ಘೆತ್ಲೊ. ಕಿತ್ಲೆಂ ಆಪ್ಲೆಂಪಣ್ ಆಸ್ಲ್ಲೆಂ ತ್ಯಾ ಉಮ್ಹ್ಯಾಂತ್.
ಮ್ಹಾತಾರೆನ್ ಭರ್ಲ್ಲ್ಯಾ ಕಾಳ್ಜಾಚಾ ಉಮಾಳ್ಯಾಂನಿ ಆಪ್ಲೊ ಹಾತ್ ಉಕ್ಲುನ್, ಡಾರ್ಲಿನಾಚಾ ಮಾತ್ಯಾರ್ ದವರ್ಲೊ.
ಆಂಕ್ವಾರ್ ಮರಿಯೆಚಿಂ ಹಜಾರ್ ಆಶೀರ್ವಾದಾಂ, ಪವಿತ್ರ್ ಸ್ಪೀರಿತಾಸಂಗಿಂ ಡಾರ್ಲಿನಾಚೆರ್ ವತ್ಲ್ಲೊ ಅನುಭವ್ ಜಾಲೊ ತಾಕಾ. ತಾಚೆಂ ಜಡ್ ಜಾಲ್ಲೆಂ ಮನ್ ಇತ್ಲೆಂ ಫುಳಕಿತ್ ಜಾಲೆಂಕೀ ತೆಂ, ತೊ ಸಂತೊಸ್ ಜಿರಂವ್ಕ್ ಅಸಮರ್ಥ್ ಜಾಲೆಂ. ಕಾಂಯ್ ಜಾಪ್ ಕಾಡಿನಾಸ್ತಾಂ ತೆಂ ತ್ಯಾ ರುಮಾ ಥಾವ್ನ್ ಭಾಯ್ರ್ ಆಯ್ಲೆಂ.
ಡಾರ್ಲಿನಾಸಂಗಿಂ ಭಾಯ್ರ್ ಆಯಿಲ್ಲ್ಯಾ ದಾಕ್ತೆರಾಚೆರ್ ಫಕತ್ತ್ ಏಕ್ ದೀಷ್ಟ್ ಉಡವ್ನ್ ತೆಂ ಸರಾಂ-ಸರಾಂ ಆಸ್ಪತ್ರೆಚಾ ಭಾಯ್ರ್ ಪಡ್ಲೆಂ.
“ಡಾರ್ಲಿನ್......" ಕಾರಾಲಾಗಿಂ ಪಾವ್ಲ್ಲ್ಯಾ ತಾಕಾ ಎಕಾ ತಾಳ್ಯಾನ್ ಪಾಟಿಂ ಪಳಯ್ಶೆಂ ಕೆಲೆಂ. ತಾಚೆ ಮುಖಾರ್ ಏಕ್ ಸೊಬಿತ್ ಆನಿ ಆಕರ್ಷಿತ್ ಮುಖಮಳಾಚೊ ತರ್ನಾಟೊ ಉಭೊ ಆಸ್ಲ್ಲೊ!
ಘಡ್ಯೆಕ್ ಡಾರ್ಲಿನಾಚಿ ದೀಷ್ಟ್ ತಗ್ಸಾಲಿ.
“ಹಾಂವ್ ರಾಯ್ನಲ್.... ರಾಯ್ನಲ್ ರೊಯ್ಸನ್ ಮಾರ್ಟಿನ್...., ತುಂವೆಂ ಆತ್ತಾಂ ಪಳವ್ನ್ ಆಯಿಲ್ಲ್ಯೆ ಸ್ತ್ರೀಯೆಚೊ ಪೂತ್....."
”
ಡಾರ್ಲಿನಾಚಾ ಕೊಪಲಾಚೆರ್ ಮಿರ್ಯೊ ಪಡ್ಲ್ಯೊ.
“ಹಾಂವ್ ತುಕಾ ದೋನ್ ವರ್ಸಾಂ ಥಾವ್ನ್ ವಳ್ಕಾತಾಂ...."
“ದೋನ್ ವರ್ಸಾಂ.....?"
“ವ್ಹಯ್ ದೋನ್ ವರ್ಸಾಂ....." ತೊ ಚಲೊ ಸಾಂಗಾಲಾಗ್ಲೊ. “ಡಿಜ್ನಿಲ್ಯಾಂಡ್ ಶೆರಟೊನ್ ಕೆಸೀನೊಂತ್ ತುಕಾ ಜೆಕ್ಪೊಟ್ ಲಾಗ್ಲ್ಲೊ. ತುಂವೆಂ ಮ್ಹಜಾ ಎಕಾ ತ್ಯಾಚ್ ಕೆಸೀನೊಂತ್ ಕಾಮ್ ಕರ್ಚ್ಯಾ ಮಿತ್ರಾಕ್ ಮ್ಹಜೆ ಖಾತಿರ್ ಪಂದ್ರಾ ಹಜಾರ್ ಡೊಲರ್ ದಾನ್ ದಿಲ್ಲೆಯ್, ತೊ ಹಾಂವ್ಂಚ್...."
ಡಾರ್ಲಿನಾಚಾ ತೊಂಡಾರ್ ಹಾಸೊ ಉದೆಲ್ಯೊ
“ಆತಾಂಯ್ ಕೆಸೀನೊಕ್ ವಚುನ್ ಪಯ್ಶೆ ಹೊಗ್ಡಾಯ್ತಾಯ್ ವ ಸುಧಾರ್ಲಾಯ್....?"
“ತುಂವೆಂ ತ್ಯಾ ದೀಸ್ ದಿಲ್ಲೆ ಪಯ್ಶೆ ಮ್ಹಜೆ ಖಾತಿರ್ ಗ್ರೇಸ್ತ್ ಕಾಯೆಚಿ ವಾಟ್ ಜಾಲ್ಲೆ. ತುಂವೆಂ ತ್ಯಾ ದೀಸ್ ಮ್ಹಜಾ ಮಿತ್ರಾಕ್ ದಿಲ್ಲೆ ತೆ ಪಂದ್ರಾ ಹಜಾರ್ ಡೊಲರ್, ತಾಣೆ ಮ್ಹಜಾ ಹಾತಿಂ ಘಾಲ್ತಾನಾ ಹಾಂವ್ ಪಾತ್ಯೆನಾ ಜಾಲೊಂ. ಹಾಂವ್ ಹಾಂವೆಂ ಹೊಗ್ಡಾಯಿಲ್ಲೆ ಪಯ್ಶೆ ಪಾಟಿಂ ಕಾಡುಂಕ್ ಚಿಂತಾನಾ, ಮ್ಹಜಾ ಮಿತ್ರಾನ್ ಆಡಾಯಿಲ್ಲೆಂ ಅಶೆಂ ಸಾಂಗೊನ್- ‘ರಾಯ್ನಲ್ ಎದೊಳ್ ಪರ್ಯಾಂತ್ ತುವೆಂ ಜಿಕ್ಲ್ಲೆಂ ಕಾಂಯ್ನಾ. ಫಕತ್ತ್ ಹೊಗ್ಡಾಯಿಲ್ಲೆಂ ಮಾತ್ರ್. ಬಿರ್ಮೊತ್ ತ್ಯೆ ಚಲ್ಯೆನ್ ಮ್ಹಜೆ ವಿನಂತೆಕ್ ಮಾಂದುನ್, ತುಕಾ ತುಜೆ ಹೊಗ್ಡಾಯಿಲ್ಲೆಚ್ ನ್ಹಯ್, ಬಗಾರ್, ತುಜೆ ಆವಯ್ಚ್ಯಾ ಒಪೊರೇಶನಾಚೆ ಪಯ್ಶೆಯಿ ದಿಲ್ಯಾತ್. ಪಯ್ಲೆಂ ತುಜ್ಯಾ ಆವಯ್ಚೆಂ ಒಪೊರೇಶನ್ ಕರಯ್... ತಿಕಾ ಬರೆಂ ಕರುನ್ ಉಪ್ರಾಂತ್ ತುಕಾ ಜಾಯ್ ಜಾಲ್ಲೆ ಪರಿಂ ಕರ್....."
“ಹಾಂವ್ ಘಡಿಬರ್ ಮ್ಹಜಾ ಮಿತ್ರಾಕ್ ಪಳಯ್ಲಾಗ್ಲೊಂ. ಉಪ್ರಾಂತ್, ‘ಹೆ ಪಯ್ಶೆ ತುಕಾ ತ್ಯೆ ಗಲೀಜ್ ತೊಂಡಾಚೆ ಚಲಿಯೆನ್ ದಿಲ್ಲೆಮೂ....?’ ಹಾಂವೆಂ ಆನ್ಉಪ್ಕಾರ್ಯಾಪರಿಂ ತುಕಾ ಹಿಣ್ಸುನ್ ಸಾಂಗ್ಲೆಂ. ತೆದ್ನಾಂ ತೊ ಮ್ಹಣಾಲೊ-‘ಜಾಂವ್ಕ್ ಪುರೊ ತಿಕಾ ಸೊಬಾಯ್ನಾ. ಪುಣ್ ತಿಚೆಂ ಮನ್ ಆನಿ ಕಾಳಿಜ್ ನಿತಳ್ ಆನಿ ವಿಶಾಲ್. ಗಲೀಜ್ ನ್ಹಯ್. ಗಲೀಜ್ ತುಜೆಂ ಚಿಂತಾಪ್. ಉಪ್ಕಾರ್ ಕೆಲ್ಲ್ಯಾಂಕ್ ಅಕ್ಮಾನ್ ಕರ್ತಾಯ್....’
“ಹಾಂವೆಂ ತಿಕಾ ಪಳಯ್ಲಾಂ. ಜಾಂವ್ಕ್ ಪುರೊ ತಿಣೆಯಿ ಮ್ಹಾಕಾ ಪಳಯ್ಲಾಂ. ತಿ ಮ್ಹಜೆ ಥಂಯ್, ಮ್ಹಜ್ಯಾ ಸೊಬಾಯೆ ಥಂಯ್ ಪಿಸ್ವಾಲ್ಯಾ. ದೆಕುನ್ ತುಕಾ ತಿಣೆ ಮ್ಹಜೆ ಖಾತಿರ್ ಪಯ್ಶೆ ದಿಲೆ. ಪಯ್ಶ್ಯಾಂಚಾ ಮಜತಿನ್ ಮ್ಹಾಕಾ ಭುಲಂವ್ಕ್ ಚಿಂತಾಸ್ತೆಲಿ. ಹಾಂವ್ ತಿಚಾ ಪಂದ್ರಾ ಹಜಾರ್ ಡೊಲರಾಂಕ್ ಮ್ಹಾಕಾ ವಿಕಿನಾ. ಮ್ಹಾಕಾ ನಾಕಾತ್ ತಿಚೆ ಪಯ್ಶೆ.... ಹಾಂವ್ ಹಾಂಗಾ ಥಾವ್ನ್ ಹಾಂವೆಂ ಹೊಗ್ಡಾಯಿಲ್ಲೆ ಪಯ್ಶೆ ಪಾಟಿಂ ಕಾಡ್ಲ್ಯಾ ಶಿವಾಯ್ ವೆಚೊನಾ.....’ ಹಾಂವೆಂ ಹಟ್ಟ್ ದಾಖಯಿಲ್ಲೆಂ.....
‘ದೆವಾಕ್ ತರೀ ಭಿಯೆ ರಾಯ್ನಲ್....’ ಮಿತ್ರ್ ಸಾಂಗಾಲಾಗ್ಲೊ. ‘ತ್ಯೆ ಚಲಿಯೆಕ್ ಹೆ ಪಯ್ಶೆ ಕೊಣಾಕ್ ದಿಲ್ಯಾತ್ ಮ್ಹಳ್ಳೆಂ ಸೈತ್ ಕಳಿತ್ನಾ. ತಿಕಾ ಹಾಂವೆಂ ಸಭಾರ್ ಪಾವ್ಟಿಂ ಪಳಯ್ಲಾಂ ಹ್ಯಾ ಕೆಸೀನೊಂತ್. ಬಿರ್ಮೊತ್ ತೋಂಡ್ ಉಕ್ಲುನ್ ಸೈತ್ ತಿ ಖಂಚಾಯ್ ದಾದ್ಲ್ಯಾಕ್ ಪಳೈನಾ. ತಿಕಾ ತಿಚಾ ಅಸೊಬಾಯೆಚಾ ಉಣೆಪಣಾ ಥಂಯ್ ಲಕ್ಷಾ ಆಸಾ, ದೆಕುನ್ ಕೊಣಾಯ್ಕಿ ಪಳಂವ್ಕ್ ತಿ ನರ್ಗಾತಾ ಮಾತ್ರ್ ನ್ಹಯ್, ಭಿಯೆತಾ.
ಹಾಂವೆಂ ತಿಣೆ ಎದೊ ವ್ಹಡ್ ಐವಜ್ ತುಜೆ ಖಾತಿರ್ ದಿತಾನಾ, ತುಂಚ್ ಯೇವ್ನ್ ತಾಕಾ ದೀ ಮ್ಹಣ್ ಸಾಂಗ್ತಾನಾ ಸೈತ್, ‘ಹೆ ಪಯ್ಶೆ ತಿಣೆ ದಿಲ್ಲೆ ನ್ಹಯ್ ಬಗಾರ್ ದೆವಾನ್ ಮ್ಹಜೆ ಥಾವ್ನ್ ತುಕಾ ಪಾವಿತ್ಸಿಲ್ಲೆ ಮ್ಹಣ್ ಸಾಂಗೊನ್, ಮ್ಹಜಾ ಜಾಪಿಕ್ ರಾಕಾನಾಸ್ತಾಂ ಚಲ್ತೆ ರಾವ್ಲ್ಲಿ ಆಪ್ಲ್ಯಾ ಕಾರಾರ್.....’
“ಮಿತ್ರಾಚಿಂ ಉತ್ರಾಂ ಆಯ್ಕೊನ್ ಹಾಂವ್ ಪಶ್ಚಾತ್ತಾಪ್ ಪಾವ್ಲ್ಲೊಂ, ತೆದ್ನಾಂ ತಾಣೆ ಮುಖಾರ್ಸಿಲೆಂ- ‘ಜರ್ತರ್ ತುಂವೆಂ ಸಾಗ್ಲ್ಲೆಪರಿಂ ತುಕಾ ತಿಣೆ ಪಳೈಲಾಂ ಆನಿ ತುಜೆ ಸೊಭಾಯೆಕ್ ಭುಲೊನ್ ತುಕಾ ಆಪ್ಣಾ ಥಂಯ್ ವ್ಹಡುಂಕ್ ಚಿಂತಾಲಿ ತರ್, ತಿ ಸ್ವತಾಃ ಯೇವ್ನ್ ಆಪ್ಲ್ಯಾಚ್ ಹಾತಿಂ ತುಕಾ ದಿತಿ ಆಸ್ಲ್ಲಿ. ತಿ ಚಲಿ ದಾನಿ ರಾಯ್ನಲ್. ಜಾಂವ್ಕ್ ಪುರೊ ಸೊಬಿತ್ನಾ. ಪುಣ್ ಹಜಾರ್ ಕೊರೊಡ್ ಸೊಬಾಯೆಚಾ ಚಲಿಯೆಂ ಪ್ರಾಸ್ ಚಡ್ ಬರಿ, ತಿಚಾ ಉತ್ತೀಮ್ ಕಾಳ್ಜಾನ್! ತಿಚೆಂ ನಾಂವ್ ಡಾರ್ಲಿನ್. ಮಸ್ತ್ ಗ್ರೇಸ್ತ್ ಚಲಿ ತಿ. ಪುಣ್ ಗ್ರೇಸ್ತ್ಕಾಯೆಚೊ ಹಂಕಾರ್ ವ ದವ್ಲತ್ಪಣ್ ತಿಕಾ ಕುಸ್ಕುಟ್ ನಾ....’
“ಮಿತ್ರಾನ್ ಮ್ಹಜೆ ದೊಳೆ ಉಘಡ್ಲ್ಲೆ. ಹಾಂವ್ ಮ್ಹಜೆಚ್ ದಿಷ್ಟಿಂತ್ ಪಡ್ಲ್ಲೊಂ, ಮ್ಹಾಕಾ ಮ್ಹಜೊಚ್ ಕಾಂಠಾಳೊ ಆಯಿಲ್ಲೊ.
ಪಶ್ಚಾತ್ತಾಪಾಚ್ಯಾ ಉತ್ರಾಂನಿ ಹಾಂವೆಂ ಖಾಲ್ತ್ಯೆ ವಿನಂತಿಸಂಗಿಂ, ಮ್ಹಜಾ ಮಿತ್ರಾಚಾ ಹಾತಿಂ ತುಂವೆಂ ದಿಲ್ಲೆ ಪಯ್ಶೆ ಪಾಟಿಂ ದೀವ್ನ್ ಸಾಂಗ್ಲೆ-
“ತುಜ್ಯಾಚ್ ಹಾತಿಂ ತುಂ ಮ್ಹಕಾ ಹಾಂತ್ಲೆ 100 ಡೊಲರ್ ಮಾತ್ರ್ ದೀ. ಹಾಂವ್ ಜಿಕೊಂ ಯಾ
ಸಲ್ವೊಂ, ಉಪ್ರಾಂತ್ ಕೆಸೀನೊಕ್ ಪಾಂಯ್ ದವರ್ಚೊನಾ. ಪುಣ್ ಹ್ಯಾ ವಗ್ತಾ ಮ್ಹಾಕಾ ಖೆಳೊಂಕ್ ಸೊಡ್. ಜಿಕ್ಲ್ಯಾರ್ ಮ್ಹಜೆಂ ನಶಿಬ್ ಆನಿ ತ್ಯೆ ಚಲಿಯೆನ್ ಫಾವೊ ಕೆಲ್ಲೊ ಫುಡಾರ್ ಮ್ಹಣ್ ಚಿಂತುನ್ ಹಾಂವ್ ವೆತಲೊಂ. ಸಲ್ವಾಲ್ಯಾರ್, ಹ್ಯಾ ಉರ್ಲ್ಯಾ ಪಯ್ಶ್ಯಾಂನಿ ಮ್ಹಜ್ಯಾ ಆವಯ್ಚೆಂ ಒಪೊರೇಶನ್ ಆನಿ ಬರಿಂ ಕಾಮಾ ಮಾತ್ರ್ ಕರ್ತಲೊಂ...."
“ಮ್ಹಜಾ ಮಿತ್ರಾನ್ ಸಂತೊಸಾನ್ ಮ್ಹಜಾ ಹಾತಿಂ ತುಂವೆಂ ದಿಲ್ಲ್ಯಾ ಪಂದ್ರಾ ಹಜಾರಾಂತ್ಲ್ಯಾ ನೊಟಾಚಾ ಆಟ್ಟೆತ್ಲೆಂ ಫಕತ್ತ್ 100 ಡೊಲರಾಂಚೊ ಏಕ್ ನೋಟ್ ಕಾಡುನ್ ದಿಲೊ. ವ್ಹಯ್ ಡಾರ್ಲಿನ್ ಹಾಂವ್ ತ್ಯಾ ಕೆಸೀನೊಂತ್ ಜಿಕ್ಲ್ಲೊಂ! ಇತ್ಲೆ ಪಯ್ಶೆಕೀ, ತುಂ ಪಾತ್ಯೆಂವ್ಚೆಂ ನಾಂಯ್. ಫಕತ್ತ್ ಎಕಾ ವೊರಾಚೆ ಆವ್ದೆಂತ್ ಹಾಂವೆಂ ಖೆಳ್ಲ್ಲೆ ಸರ್ವ್ ಖೆಳ್ ಮ್ಹಜ್ಯಾ ಪಕ್ಷೆಂತ್ ಉಪ್ಕಾರಿತ್ತ್ ಜಾಲ್ಲೆ!! ಹಾಂವೆಂ ತುಜ್ಯಾ ಎಕಾ ಶೆಂಬೊರ್ ಡೊಲರಾಂಚಾ ನೊಟಾನ್, ಜಿಕ್ಲ್ಲೊ ಐವಜ್ ಪಂದ್ರಾ ಮಿಲಿಯಾ ಡೊಲರ್!! ದೇಡ್ ಕೊರೊಡ್ ಡೊಲರ್....!!!
ಡಾರ್ಲಿನ್ ಶೂನ್ಯ್ಪಣಿ ಆಯ್ಕಾತಾಲೆಂ.
“ತುಂವೆಂ ದಿಲ್ಲೆ ಪಂದ್ರಾ ಹಜಾರ್...., ಶೆಂಬೊರ್ ಉಣೆ ಪಂದ್ರಾ ಹಜಾರ್ ಹಾಂವೆಂ ಆನಿಕೀ ಹಾತ್ ಲಾಯ್ನಾಸ್ತಾಂ ಮ್ಹಜೆಲಾಗಿಂ ಸಾಂಬಾಳುನ್ ದವರ್ಲ್ಯಾತ್. ತ್ಯಾ ಪಯ್ಶ್ಯಾಂನಿ ತುಂ ಮ್ಹಾಕಾ ಸದಾಂಯ್ ಪಂದ್ರಾ ಕೊರೊಡ್ ಪಾವ್ಟಿಂ ದಿಸ್ತಾಯ್. ತುಕಾ ಫಕತ್ತ್ ಹಾಂವ್ ಮ್ಹಜಾ ಕಾಳ್ಜಾಂತ್ ಮಾತ್ರ್ ಆರಾದಾನ್ ಮಾತ್ರ್ ಕರುಂಕ್ ಸಕ್ಲ್ಲೊಂ. ಶಿವಾಯ್, ತುಕಾ ಸೊಧುನ್ ಕಾಡುನ್, ತುಜಿ ಇಷ್ಟಾಗಾತ್ ಕರುನ್, ಮ್ಹಜಾ ಕಾಳ್ಜಾಂತ್ಲೆಂ ಕುರ್ಪೆಸ್ತ್ ದೇವಿಕ್ ದುಖಂವ್ಕ್ ತಯಾರ್ ನಾತ್ಲ್ಲೊಂ....."
“ಮ್ಹಜಾ ಮಾಮ್ಮಿಚಾ ಕಾಳ್ಜಾಚೆಂ ಒಪೊರೇಶನ್ ಜಾಲೆಂ. ತಿ ಮರ್ಣಾಂತ್ಲಿ ಪರಾತ್ ಜಿವಾನಾಕ್ ಪರ್ತಾಲ್ಲಿ ತುಜೆ ಮಜತೆನ್. ಹಾಂವೆಂ ನ್ಯೂ ಜೆರ್ಸಿ ರಿಜ್ಡ್ವುಡಾಂತ್ ಏಕ್ ಜಾಗೊ ಘೆವ್ನ್ ಸೊಬಿತ್ ಬಂಗ್ಲೊ ಬಾಂದ್ಲಾ. ಜಾಚೆಂ ನಾಂವ್,
‘Grace & Peace ಮ್ಹಣ್ ದಿಲಾಂ. ಮ್ಹಜ್ಯೆ ಮಾಮ್ಮಿಕ್ ಹಾಂವ್ ಹರ್ಯೆಕ್ ದೀಂವ್ಕ್ ಪೆಚಾಡ್ಲೊಂ. ಪುಣ್ ಪಾಟ್ಲ್ಯಾ ತೆಂಪಾರ್ ತಿ ಚಡ್ ಅಸ್ವಸ್ತ್ ಜಾಲಿ. ಆಖ್ರೇಕ್ ತಿಚ್ಯೊ ದೋನ್ಯಿ ಕಿಡ್ನ್ಯೊ ಪೈಲ್ ಜಾಲ್ಯೊ. ಸಂಪೂರ್ಣ್ ಪ್ರಯತ್ನಾಖಾಲ್ ವೊದ್ದಾಡುನ್ ಹಾಂವ್ ಸಲ್ವಾತಾನಾ, ತಿಚೆ ಕಿಡ್ನೆ ಖಾತಿರ್ ಅಪೀಲ್ ಕೆಲೆಂ, ಜಾಹಿರಾತಾನಿಂ ಆನಿ ಟಿ. ವಿ. ಖಬ್ರಾಂನಿ.....
“ನಿರಾಶಾ ವಾಡುನ್ಂಚ್ ಗೆಲಿ ಶಿವಾಯ್ ಸಮಧಾನ್ ಲಾಭ್ಲೆಂನಾ. ತೆದ್ನಾಂ ಕಳ್ಳೆಂ ಪಯ್ಶೆ ಕಿತ್ಲೆಯ್ ಆಸೊಂ, ತೆ ಜೀವ್ ವಾಂಚಂವ್ಕ್ ಸಕಾನಾಂತ್ ಮ್ಹಣ್. ತಶೆಂ ಆಸ್ತಾಂ, ತುಕಾ ಹ್ಯಾ ಜೊರ್ಜ್ ವಾಷಿಂಗ್ಟಾನ್ ಮೆಮೊರಿಯಲ್ ಹೊಸ್ಪಿಟಲಾಂತ್ ಪಳೈತಾನಾ ಹಾಂವ್ ವಿಸ್ಮಿತ್ ಜಾಲೊಂ, ತುಂವೆಂ ತ್ಯಾ ದಾಕ್ತೆರಾಕ್ ಮೆಳೊನ್ ತುಜಿ ಕಿಡ್ನಿ ದಾನ್ ಕರ್ಚೆವಿಶಿಂ ವಿನಂತಿ ಕರ್ತಾನಾ. ತುಜೆಂ ರಗತ್ ಆನಿ ಹೆರ್ ತಪಾಸಣ್ ಜಾವ್ನ್ ತುಂ ಕಿಡ್ನಿ ದಾನ್ ಕರುಂಕ್ ಸಕಾನಾಂಯ್ ಮ್ಹಣ್ ಪಾಚಾರ್ತಾನಾ ತುಕಾ ಜಾಲ್ಲಿ ಬೆಜಾರಾಯ್ ಹಾಂವೆಂ ತುಜ್ಯಾ ತೊಂಡಾರ್ ವಾಚ್ಲ್ಯಾ; ಹಾಂವ್ ತ್ಯಾ ವಗ್ತಾ ದಾಕ್ತೆರಾಚಾ ರುಮಾಂತ್ಚ್ ಆಸ್ಲ್ಲೊಂ......"
ಪುಣ್ ಚುಕೊನ್ಯಿ ತುಜಿ ದೀಷ್ಟ್ ಮ್ಹಜೆರ್ ಪಡ್ಲಿನಾ. ಹಾಂವ್ ನಿಜಾಯ್ಕೀ ಚುರ್ಚುರ್ಲ್ಲೊಂ, ದೋನ್ ವರ್ಸಾಂ ಆದಿಂ, ತುಜೆ ವಿಶಿಂ ತುಕಾ ನೆಣಾಸುನ್ ಮ್ಹಜಾ ಮಿತ್ರಾಕ್ ತುಜೆವಿಶಿಂ ಸಾಂಗ್ಲ್ಲಿಂ ಉತ್ರಾಂ ಚಿಂತುನ್. ಉಪ್ರಾಂತ್ ತುಂ ವಾರ್ಡಾಕ್ ಆಯ್ಲೆಂಯ್. ಮ್ಹಜೆ ಮಾಮ್ಮಿಕ್ ತುಂವೆಂ ವ್ಹಡಾ ಮೊಗಾನ್ ಸಮಾಧಾನ್ ಕರುನ್ ವೆತಾನಾ, ಹಾಂವೆಂ ತಿಚಾ ದೊಳ್ಯಾಂನಿ ತಿಚೆಂ ಮರಾಣ್ ಪಳೈಲಾಂ ಡಾರ್ಲಿನ್. ಭೋವ್ಶಾ ಖಂಚೊಗಿ ಗಾಂಚ್ ಮೆಳೊಂಕ್ ಆಸ್ಲ್ಲೊ, ಭೋವ್ಶಾ ತಿ ತುಜ್ಯಾ ಯೆಣ್ಯಾಕ್ಚ್ ರಾಕೊನ್ ಆಸ್ಲ್ಲಿ..... ಆಜ್ ತಿಚೆಂ ಆಂತ್ಯ್ ಜಾತಾ ಡಾರ್ಲಿನ್...., ತುಂ ನಿಜಾಯ್ಕಿ ಮನಿಸ್ ನ್ಹಯ್, ಮನ್ಶ್ಯಾ ರುಪಾರ್ ದೆವಾಚೆಂ..... ತಾಚೆಂ ಪ್ರತಿ ರೂಪ್.....! ಮ್ಹಜೆ ಆವಯ್ ಉಪ್ರಾಂತ್ ಮ್ಹಾಕಾ ಕೊಣ್ಂಚ್ನಾ.... ತಿಚೆ ಸಾಂಗಾತಾ ಹಾಂವ್ಯೀ ಮೆಲ್ಲೊಂ ತರ್.........”
ರಾಯ್ನಲ್ ಆಪ್ಣಾಕ್ ಸಾಂಗೊಂಕ್ ಆಸ್ಚೆಂ ಸರ್ವ್ ಸಾಂಗೊನ್ ಜಾತಾನಾ ತಾಚೆಂ ಕಾಳಿಜ್ ಖರೆಂಚ್ ಭರೊನ್ ಆಯಿಲ್ಲೆಂ ಆನಿ ತೊ ರಡೊಂಕ್ಚ್ ತಯಾರ್ ಜಾಲ್ಲೊ.
ಚೀತ್ ದೀವ್ನ್ ಆಯ್ಕೊಂಚೆಂ ಡಾರ್ಲಿನ್, ಕಸಲಿಂಚ್ ಭಗ್ಣಾಂ ವ ಸಮಧಾನ್, ರಾಯ್ನಲಾ ಥಂಯ್ ವ್ಯಕ್ತ್ ಕರಿನಾಸ್ತಾಂ, ಥೊಡ್ಯೊ ಘಡಿಯೊ ಮೌನ್ ಪಣಿ ಥಂಯ್ಚರ್ ರಾವ್ಲೆಂ. ಉಪ್ರಾಂತ್ ಕಿತೆಂಚ್ ಉಲೈನಾಸ್ತಾಂ, ಆಪ್ಲ್ಯಾ ಕಾರಾಂತ್ ರಿಗ್ಲೆಂ.
ಪಾಶಾರ್ ಜಾಂವ್ಚ್ಯಾ ಡಾರ್ಲಿನಾಚಾ ಕಾರಾಕ್ ರಾಯ್ನಲ್ ನಿರ್ಜೀವ್ ದೊಳ್ಯಾಂನಿ ಪಳೈಲಾಗ್ಲೊ. ಉಪ್ರಾಂತ್ ಜಡಾಯೆಚಿಂ ಮೆಟಾಂ ಕಾಡುನ್ ಆಸ್ಪತ್ರೆ ಭಿತರ್ ರಿಗ್ಲೊ.
ವ್ಹಯ್ ರಾಯ್ನಲಾಚಿ ಆವಯ್ ಹ್ಯಾ ಸಂಸಾರಾಚೆಂ ಪಯ್ಣ್ ಆಖೇರ್ ಕರುನ್ ಗೆಲ್ಲಿ! ರಾಯ್ನಲಾನ್ ತಿಚೆ ನಿರ್ಜೀವ್ ಕುಡಿಚೆರ್ ದೀಷ್ಟ್ ಘಾಲಿ. ತಿಚಾ ಮುಖಮಳಾಚೆರ್ ತೊಚ್ ಆಖ್ರೇಚೊ ಕೃತಜ್ಞತೆಚೊ ಹಾಸೊ ಉರ್ಲ್ಲೊ, ಜೆದ್ನಾ ತಿಣೆ ಡಾರ್ಲಿನಾನ್ ತಿಕಾ ಸೊಡುನ್ ವೆತಾನಾ ದಿಲ್ಲೊ.
ಆಪ್ಲ್ಯಾ ಕಾರಾರ್ ಘರ್ಚ್ಯೆ ವಾಟೆರ್ ಆಸ್ಲ್ಲ್ಯಾ ಡಾರ್ಲಿನಾಕ್ ರಾಯ್ನಲಾಚಾ ಉತ್ರಾಂಚೊ ಆವಾಜ್ ಆಯ್ಕಾತಾಲೊ.... ತಾಣೆ ಸಾಂಗ್ಲ್ಲೆಂ ಎಕೇಕ್ ಉತಾರ್, ಎಕೇಕ್ ವಾಕ್ಯ್....! ಆಪ್ಲ್ಯಾ ಮುಖಮಳಾಕ್ ‘ಗಲೀಜ್ ತೊಂಡಾಚೆಂ’ ಮ್ಹಳ್ಳೆಂ ಉತಾರ್ ತಾಕಾ ಥೊಡ್ಯಾ ವೆಳಾಕ್ ಬೆಜಾರ್ ಕರುಂಕ್ ಸಕ್ಲ್ಲೆಂ ತರೀ, ಉಪ್ರಾಂತ್ಲ್ಯಾ ತಾಚಾ ಹರ್ಯೆಕಾ ಸಬ್ದಾಂತ್ ಬರೆಂಪಣ್ ಝಳ್ಕಾಲ್ಲೆಂ.
ರಾಯ್ನಲಾಚಿಂ ನಿಮಾಣಿ ಉತ್ರಾಂ ಎಕಾಚ್ ಫರಾ ಡಾರ್ಲಿನಾಚಾ ಕಾನಾಂಕ್ ಆಪ್ಟಾಲಿಂ. ‘ತುಂ ಮ್ಹಜ್ಯೆ ಮಾಮ್ಮಿಕ್ ಸೊಡುನ್ ವೆತಾನಾ, ಹಾಂವೆಂ ತಿಚಾ ದೊಳ್ಯಾಂನಿ ತಿಚೆಂ ಮರಾಣ್ ಪಳೈಲಾಂ ಡಾರ್ಲಿನ್...... ಕಸಲೊಗೀ ಗಾಂಚ್, ಮೆಳೊಂಕ್ ಆಸ್ಲ್ಲೊ, ಭೋವ್ಶಾ ತಿ ತುಜ್ಯಾಚ್ ಯೆಣ್ಯಾಕ್ ರಾಕೊನ್ ಆಸ್ಲ್ಲಿ....!!!’
ಎಕಾಚ್ಫರಾ ಡಾರ್ಲಿನಾನ್ ಬ್ರೇಕಿಚೆರ್ ಪಾಂಯ್ ಅಂರ್ಧಿಲೊ....! ಕಾರ್ ಎಕೆ ಆರಾಬಾಯೆಸಂಗಿಂ ಥಾಂಬ್ಲೆಂ....!! ಡಾರ್ಲಿನಾನ್ ಕೂಡ್ಲೆ ಕಾರ್ ಘುಂವ್ಡಾವ್ನ್ ಪರಾತ್ ಆಸ್ಪತ್ರೆಚಿ ವಾಟ್ ಧರ್ಲಿ...!!!
***********
“ಕಿತ್ಲೆಂ ವಿಚಿತ್ರ್ ಮಿಲನ್ ನ್ಹಯ್ಗೀ ಆಮ್ಚೆಂ......? ಕಾಣಿಯಾಂನಿ ವಾಚ್ಲಾಂ...., ಫಿಲ್ಮಾಂನಿ ಪಳೈಲಾಂ..., ಪುಣ್ ನೀಜ್ ಜಿಣ್ಯೆಂತ್ ಜೆಂ ಘಡ್ಲಾಂ, ತೆಂ ಮ್ಹಾಕಾ ಭಗ್ತಾ ಆಮ್ಚ್ಯಾ ಜಿಣ್ಯೆಂತ್ ಮಾತ್ರ್ ಘಡ್ಲಾಂ..... ” ರಾಯ್ನಲ್ ಆಪ್ಲಿಂ ಭಗ್ಣಾಂ, ಉಮಾಳ್ಯಾಂನಿ ತಾಚಾ ಮೊಗಾಚಾ ಡಾರ್ಲಿನಾಕ್ ಸಾಂಗ್ತಾಲೊ.
ವ್ಹಯ್, ಆವಯ್ಚ್ಯಾ ಮೊರ್ನಾ ಉಪ್ರಾಂತ್ ರಾಯ್ನಲಾನ್, ಪರಾತ್ತುನ್, ರಡೊನ್, ಖಾಲ್ತ್ಯಾಪಣಾನ್ ಭಿಕ್ ಮಾಗೊನ್ ಮ್ಹಳ್ಳ್ಯಾಪರಿಂ ಡಾರ್ಲಿನಾಚೊ ಸಾಂಗಾತ್ ವಿಚಾರ್ಲ್ಲೊ.
ಡಾರ್ಲಿನಾನ್ ಸಭಾರ್ ದೀಸ್ ಕಾಡ್ಲ್ಲೆ ಆಪ್ಲಿ ಒಪ್ಪಿಗೆ ದೀಂವ್ಕ್. ಕಿತ್ಯಾಕ್, ತೆಂ ತಾಚ್ಯೆ ಅಸೊಬಾಯೆಥಂಯ್ ಭಿಯೆತಾಲೆಂ. ತಾಕಾ ತಾಚಿಚ್ ಲಜ್ ಭಗ್ತಾಲಿ, ಎಕಾ ಸೊಬಿತ್ ತರ್ನಾಟ್ಯಾ ಚಲ್ಯಾಚಿ ದೊಸ್ತಿ ಕರುಂಕ್. ಸಾಂಗಾತಾ ಭಿರಾಂತ್ಯಿ ದಿಸ್ತಾಲಿ, ಚಲ್ಯಾಂಚಾ ಚಂಚಲ್ ಮನಾ ಥಂಯ್. ಕಿತ್ಯಾಕ್ ಸೊಬಾಯೆ ಥಂಯ್ ಕೊಣ್ಯ್ ಆಕರ್ಷಿತ್ ಜಾತಾ ತೆಂ ಸ್ವಾಭಾವೀಕ್. ಆನಿ ಅಸೊಬಾಯೆಥಂಯ್ ಕಿತ್ಲೊ ಬರೊ ಮನಿಸ್ಯಿ ಜಾಂವ್ ತೊ ನಾಕಾರ್ತಾ. ಥೊಡೆ ಪಾವ್ಟಿಂ, ಪಾಟಿಂ ಮುಖಾರ್ ಚಿಂತಿನಾಸ್ತಾಂ, ತರ್ನಾಟ್ಪಣಾಚೆ ದವ್ಲತೆನ್, ಜಾಂವ್ಕ್ಪುರೊ, ಚಲೊ ವ ಚಲಿ ಎಕಾಮೆಕಾಕ್ ಆಕರ್ಷಿಕ್ ಜಾವ್ನ್ ಎಕ್ಟಾಂಯ್ ಜಾಲಿಂ. ಆನಿ ತ್ಯಾ ಉಪ್ರಾಂತ್ ವಿವಿದ್ ರಗ್ಳ್ಯಾಂಕ್, ಝಗ್ಡ್ಯಾಂಕ್ ಅನಾವಶೆಂ ಕಾರಣಾಂ ಉಬ್ಜಾತಾತ್ ಆನಿ ಜಿವಿತಾಚೆರ್ ಕಾತರ್ ಪಡ್ತಾ.
ಪುಣ್ ರಾಯ್ನಾಲಾಕ್ ತೆಂ ಪಾತ್ಯೆಲ್ಲೆಂ, ತಾಚಾ ಸ್ವಂತ್ ಅನುಭವಾ ಉಪ್ರಾಂತ್. ರಾಯ್ನಲ್ ಆಪ್ಲ್ಯಾ ವ್ಯಕ್ತಿತ್ವಾಂತ್ ಖಂಚಾಯ್ ಹೊಲಿವುಡ್ ಹೀರೊಕ್ ಸೊಡ್ನ್ ದೀನಾತ್ಲ್ಲೊ. ತಾಕಾ ಪಳೆತಾನಾಂಚ್ ಚಲ್ಯೊ ನಾಕಾ ನಾಕಾ ಮ್ಹಳ್ಯಾರೀ, ತಾಕಾಚ್ ಪಳವ್ನ್ ರಾವ್ತಾಲ್ಯೊ. ಇತ್ಲ್ಯಾ ಹ್ಯಾಂಡ್ಸಮ್ ಚಲ್ಯಾ ಥಂಯ್ ಎಕ್ಯೆ ಕುರುಪಿ ಚಲ್ಯೆನ್ ಆಸ್ಚೆಂ ಡಾರ್ಲಿನಾಕ್ ನರ್ಗಯ್ತಾಲೆಂ. ತರೀ, ರಾಯ್ನಾಲಾಚಾ ನೀಜ್ ಮೊಗಾಕ್ ತೆಂ ವಳ್ಕಾಲ್ಲೆಂ.
ಸಬಾರ್ ಪಾವ್ಟಿಂ ಡಾರ್ಲಿನ್ ಆಪ್ಲ್ಯಾ ಸೊಭಿತ್ ಮಿತ್ರಿಣ್ಯಾಸಂಗಿಂ ಆಸ್ತಾನಾಂಯ್ ರಾಯ್ನಲಾಚಿ ಭೆಟ್ ತಾಕಾ ಜಾಲ್ಲಿ. ರಾಯ್ನಲಾಚೆ ಸೊಭಾಯೆಕ್ ಪಿಸ್ವೊನ್ ಡಾರ್ಲಿನಾಚ್ಯೊ ಮಿತ್ರಿಣ್ಯೊ ರಾಯ್ನಲಾಸಂಗಿಂ ಚಂಗಾಯ್ ಕರುಂಕ್ ಪೆಚಾಡ್ತಾನಾಂಯ್, ರಾಯ್ನಲಾನ್ ತಾಂಕಾಂ ಮಹತ್ವ್ ದೀಂವ್ಕ್ ನಾತ್ಲ್ಲೊ. ಹೆಂ ಡಾರ್ಲಿನಾನ್ ಪಾರ್ಕುನ್ ಜಾಲ್ಲೆಂ.
ಹೆಂ ಸಗ್ಳೆಂ ತಜ್ವೀಜ್ ಕರ್ತಾನಾ, ಡಾರ್ಲಿನ್ ನಿಜಾಯ್ಕೀ ಕುಡಿ ಆತ್ಮ್ಯಾ ಸಮೇತ್ ರಾಯ್ನಲಾಚೆಂ ಜಾಲ್ಲೆಂ!! ವ್ಹಯ್ ತೆಂ ರಾಯ್ನಲಾಚಾ ಮೊಗಾರ್ ಪಡ್ಲ್ಲೆಂ. ರಾಯ್ನಲ್ಯಿ ಡಾರ್ಲಿನಾಚಾ ಮೊಗಾರ್ ಇತ್ಲೊ ಭುಡ್ಲ್ಲೊಕೀ, ತಾಕಾ ಸಂಸಾರಾಚೆಂ ಹೆರ್ ಖಂಚೆಂಚ್ ಸುಃಖ್ ನಾಕಾ ಮ್ಹಣ್ ಭಗ್ತಾಲೆಂ. ಸಂಸಾರಾಂತ್ಲಿ ಹೆರ್ಯೆಕ್ ಚಲಿ, ಡಾರ್ಲಿನಾ ಮುಖಾರ್ ಕುರುಪಿ ದಿಸ್ತಾಲಿ.
ವ್ಹಯ್ ರಾಯ್ನಲ್, ಡಾರ್ಲಿನಾಚ್ಯೆ ಮತಿಚಿ ಆನಿ ಕಾಳ್ಜಾಚಿ ಸೊಭಾಯ್ ಪಾರ್ಕುಂಕ್ ಸಕ್ಲ್ಲೊ. ಕುಡಿಚಿ ಸೊಭಾಯ್ ಪಕತ್ತ್ ಸಂಸಾರಿ, ಪುಣ್ ತ್ಯೆ ಸೊಭಾಯೆಕ್ ನಾ ವಾಟ್ ಖರಿ!
ಆಪ್ಣಾಚೊ ಖರೊ ಮೋಗ್ ಕರ್ಚೊ, ತಾಣೆ ದೀಸ್ ರಾತ್ ಆಶೆಲ್ಲೊ ಚಲೊ, ತಾಕಾ ತಾಚಾ ಬರ್ಯಾ ಮನಾಕ್ ಮೆಚ್ವೊನ್ ಫಾವೊ ಜಾಲ್ಲೊ. ಆನಿ ತೆಂ ತಾಚೊ ಹ್ಯಾ ಸಂಸಾರಾಂತ್ಲ್ಯಾ ಸರ್ವ್ ವಸ್ತು ಪ್ರಾಸ್ ಚಡ್ ಮೋಗ್ ಕರುಂಕ್ ಲಾಗ್ಲ್ಲೆಂ.
“ಕಾಂಯ್ಚ್ ಸಾಂಗಾನಾಕಾ, ಫಕತ್ತ್ ಮ್ಹಜೊ ಮೋಗ್ ಕರ್.... ಇತ್ಲೆಂಚ್ ಪುರೊ ಮ್ಹಾಕಾ ಮ್ಹಜ್ಯೆ ಕುರುಪಿ ರುಪಾಕ್ ಸೊಬಾಯೆಂತ್ಲ್ಯಾ ಸಾವ್ಳೆಂತ್ ಲಿಪಂವ್ಕ್....." ಡಾರ್ಲಿನಾನ್ ವೆಂಗೊನ್ ಸಾಂಗ್ಲ್ಲೆಂ ರಾಯ್ನಲಾಕ್, ತೊ ತಾಚಾ ಗುಣಾಂಚಿ ಹೊಗ್ಳಿಕ್ ಉಚಾರ್ತಾನಾ.
“ಆಪ್ಣಾಕ್ ಆನ್ಯೆಕ್ ಪಾವ್ಟಿಂ ಕುರುಪಿ ಮ್ಹಣ್ ಸಾಂಗಾನಾಕಾಮಾ, ಮ್ಹಾಕಾ ಸೊಸಾನಾ. ಹಾಂವೆಂ ತುಜೆ ಖಾತಿರ್, ಪಯ್ಲೆಂ ನೆಣಾಸುನ್ ಉಚಾರ್ಲ್ಲಿಂ ಉತ್ರಾಂ ಸೈತ್ ನಿಯಾಳ್ತಾನಾ, ಮಾಕಾ ಮ್ಹಜೊಚ್ ರಾಗ್ ಯೆತಾ. ಹಾಂವ್ ಮ್ಹಾಕಾಚ್ ಭಗ್ಸುಂಕ್ ಸಕಾನಾ. ತುಂ ನಿಜಾಯ್ಕಿ ಸೊಭಿತ್. ತುಜೆ ತಿತ್ಲೆಂ ಸೊಭಿತ್ ಹ್ಯಾ ಸಂಸಾರಾಂತ್ ಕೊಣ್ಂಚ್ನಾ. ಹ್ಯಾ ಸಂಸಾರಾಂತ್ಲ್ಯಾ ಕೃತಕ್ ಸೊಭಾಯೆಕ್ ಸೊಧುನ್ ಭಂವ್ಚಿಂ ಸರ್ವಂಯ್ ಮತ್ಲಾಬಿ ಮ್ಹಜೆಪರಿಂ. ಪುಣ್ ತುಂ ಕೃತಕ್ ನ್ಹಯ್.... ತುಂ ನಿಜ್ ಸೊಭಾಯ್, ಜಿ ದೆವಾನ್ ಮ್ಹಜೆ ಖಾತಿರ್ಚ್ ಮ್ಹಣ್ ರಚ್ಲ್ಲಿ. ಜರ್ತರ್ ತುಂ ಕೃತಕ್ ಸೊಭಾಯೆನ್ ಜಲ್ಮಾಲ್ಲೆಂಯ್ ತರ್, ಮ್ಹಾಕಾ ಖಂಡಿತ್ ಮೆಳ್ತೆಂನಾಂಯ್....." ರಾಯ್ನಲಾನ್ ಡಾರ್ಲಿನಾಚಿ ವೆಂಗ್ ಆನಿಕೀ ಮಜ್ಭೂತ್ ಕೆಲಿ.
ದೊಗಾಂಯ್ಚೆ ವೋಂಟ್ ಏಕ್ ಜಾಲ್ಲೆ....! ಮೊಗಾಚೆಂ ಚುಂಬನ್ ತೆಂ....!! ಮೊಗಾಚಿ ಸುರ್ವಾತ್ ತೀ....!!!
ತ್ಯಾ ಉಪ್ರಾಂತ್ ಡಾರ್ಲಿನಾಚಿ ಆನಿ ರಾಯ್ನಲಾಚಿ ಭೆಟ್ ಸದಾಂಚಿ ಜಾಲ್ಲಿ. ಬೋವ್ ಲಾಗ್ಶಿಲಿಂ ತಿಂ ಜಾಲ್ಲಿಂ. ತಾಂಚೊ ಮೋಗ್ ಅಖಂಡ್ ಬಾಂದ್ ಜಾಲ್ಲೊ ತರೀ, ಕುಡಿಚೊ ಬೋಗ್ ತಾಣಿಂ ಅಧಾರಿನಾಸ್ತಾಂ ತಾಚಿ ಗಡ್ ಕಾಜಾರಾ ಪರ್ಯಾಂತ್, ನಿಯಂತ್ರಣಾಚಾ ಮಿತಿರ್ ದವರ್ಲ್ಲಿ.
ರಾಯ್ನಲ್ ಆಪ್ಲ್ಯಾ ವಿಶಾಲ್ ಬೊಂಗ್ಲ್ಯಾಂತ್ ಎಕ್ಲೊಚ್ ಜಾಲ್ಲೊ, ಆವಯ್ಚ್ಯಾ ಮರ್ಣಾ ಉಪ್ರಾಂತ್.
ಡಾರ್ಲಿನ್ ಆಪ್ಲ್ಯಾ ಪಾಟ್ಲ್ಯಾ ಶಿಕ್ಚ್ಯಾ ದೊಗಾಂ ಭಾವ್ಡಾಂ ಆನಿ ಆವಯ್-ಬಾಪಾಯ್ಸಂಗಿಂ ಜೈತಾಚಾ ಬೊಂಗ್ಲ್ಯಾಂತ್ ಜಿಯೆತಾಲೆಂ.
ಡಾರ್ಲಿನಾಚಾ ಘರ್ಚ್ಯಾಂಕ್ ತಾಚಾ ಮೊಗಾವಿಶಿಂ ಕಳಿತ್ ಆಸ್ಲ್ಲೆಂ ಆನಿ ತಿಂ ಖರ್ಯಾ ಸಂದರ್ಭಾಕ್ ರಾಕ್ತಾಲಿಂ.
ತೊ ದೀಸ್ ಸೊಮಾರ್, ಮಾರ್ಚಾಚಿ 9 ತಾರೀಕ್, 1981 ಇಸ್ವಿ. ಡಾರ್ಲಿನ್ ಆಪ್ಲ್ಯಾ ಪ್ರೇಮಿ ರಾಯ್ನಲಾಕ್ ಮೆಳೊಂಕ್ ತಾಚಾ ಘರ್ಚ್ಯೆ ವಾಟೆರ್ ಆಸ್ಲ್ಲೆಂ. ಕಿತ್ಯಾಕ್, ಆದ್ಲ್ಯಾ ದಿಸಾ ಆಯ್ತಾರಾ 8 ತಾರಿಕೆರ್, ರಾಯ್ನಲಾನ್ ತಾಂಚಾ ಕಾಜಾರಾಚಿ ತಾರೀಕ್ ನಖ್ಖಿ ಕರುಂಕ್ ಆನಿ ತ್ಯಾ ವಿಶಿಂ ಇತ್ಯರ್ಥ್ ಕರುಂಕ್ ಆಪ್ಲ್ಯಾ ಘರಾ, ತಾಚಾ ಮೊಗಾಚಾ ಡಾರ್ಲಿನಾಕ್ ರಾತಿಂಚ್ಯಾ ನೋವ್ ವೊರಾ ಉಪ್ರಾಂತ್ ಭೆಟುಂಕ್ ಆಪಯಿಲ್ಲೆಂ. ತ್ಯಾ ಪ್ರಕಾರ್, ಡಾರ್ಲಿನ್ ಆಪ್ಲ್ಯಾ ಘರ್ಚ್ಯಾಂಚೆ ದೊಳೆ ಚುಕವ್ನ್ ಪ್ರೇಮಿಚಾ ಆಪವ್ಣ್ಯಾಕ್ ಪಾಳೊ ದೀವ್ನ್, ಆಪ್ಲ್ಯಾ ಕಾರಾರ್ ರಾಯ್ನಲಾಚಾ ‘Grace & Peace’ ಬೊಂಗ್ಲ್ಯಾಚ್ಯೆ ವಾಟೆರ್ ಆಸ್ತಾನಾ, ರಾಯ್ನಲಾಚಾ ಫೊನಾನ್ ತಾಕಾ ಆಡಾವ್ನ್ ಪಾಟಿಂ ವಚಾಶೆಂ ಕೆಲ್ಲೆಂ. ಆಪ್ಣೆಂಚ್ ಆಪವ್ನ್, ಎಕಾನೆಕಿ ಫೊನಾರ್ ಪಾಟಿಂ ಪರ್ತುಂಕ್ ಸಾಂಗ್ಚೆಂ..... ಆಖ್ರೇಕ್ ಘರಾನಾ ಮ್ಹಣ್ ಸಾಂಗ್ಚೆಂ.... ಡಾರ್ಲಿನಾಚಾ ಅಸಮಧಾನಾಕ್ ಆನಿ ದುಖಾಕ್ ಕಾರಣ್ ಜಾಲ್ಲೆಂ. ಕಾಂಯ್ಚ್ ಮ್ಹಣಾನಾಸ್ತಾಂ ತೆಂ ಪಾಟಿಂ ಪರ್ತಾಲ್ಲೆಂ.
*********
ದಾಕ್ತೆರಾಕ್ ಭೆಟುನ್ ಆಯಿಲ್ಲೊ ರಾಯ್ನಲ್ ವಿಚಿತ್ರ್ ಸಮಶ್ಯಾಂನಿ ಆನಿ ವರ್ತ್ಯೆ ಬೆಜಾರಾಯೆಚಾ ಖೊಂಡಾಂತ್, ಜಿವೊಚ್ ಪುರೊನ್ ಗೆಲ್ಲೊ! ದಾಕ್ತೆರಾಚಿಂ ಉತ್ರಾಂ ತಾಚಾ ಕಾನಾಂಕ್ ಸಾದ್ತಾಲಿಂ.
ತೊ ಆಶೆಲ್ಲೊ ತಾಚಾ ನವ್ಯಾ..... ಮುಖ್ಲ್ಯಾ ಜೀವನಾಕ್, ಪುಣ್ ದಾಕ್ತೆರಾನ್ ತೀರ್ಪ್ ಉಚಾರ್ಲ್ಲೆಂ ಆನಿ ತಾಕಾ ವಾಯ್ದೊ ದಿಲ್ಲೊ ಫಕತ್ತ್ ಎಕಾ ಮಹಿನ್ಯಾಚೊ!!!
ಪಾಟ್ಲ್ಯಾ ದೇಡ್ ದೋನ್ ಮಹಿನ್ಯಾ ಥಾವ್ನ್ ತಾಕಾ ಪೊಟಾಂತ್ ಆಚಾನಕ್ ದೂಕ್ ಯೇಂವ್ಕ್ ಸುರು ಜಾಲ್ಲಿ. ಪುಣ್ ಥೊಡ್ಯಾ ವೆಳಾನ್ ತಿ ಥಾಂಬ್ತಾಲಿ. ಪಯ್ಲೆಂ, ಪಯ್ಲೆಂ ತಾಣೆ ತ್ಯೆ ದುಕಿಕ್ ಗುಮಾನ್ ಕರುಂಕ್ ನಾತ್ಲ್ಲೆಂ. ಕಾಂಯ್ ವಾಯ್ ಜಾಂವ್ಕ್ ಪುರೊ ಮ್ಹಣ್. ಏಕ್ ದೀಸ್ ತೊ ಡಾರ್ಲಿನಾಚ್ಯೆ ವೆಂಗೆಂತ್ ಸುಃಖಾಚೊ ಉಸ್ವಾಸ್ ಘೆವ್ನ್ ಆಸ್ತಾನಾ, ಎಕಾಚ್ಫರಾ ಡಾರ್ಲಿನಾಕ್ ಪಯ್ಸ್ ಲೊಟುನ್ ಪೊಟಾಕ್ ಹಾತ್ ಧರುನ್ ವಳ್ವಳ್ತಾನಾ, ಡಾರ್ಲಿನ್ ಭುಯೆವ್ನ್ ಗೆಲ್ಲೆಂ. ಉಪ್ರಾಂತ್ ಥೊಡ್ಯಾಚ್ ವೆಳಾನ್ ತೊ ಸಾರ್ಕೊ ಜಾಲ್ಲೊ.
“ಕಿತೆಂ ಜಾಲೆಂ ಮೊಗಾ....? ತುಂ.... ತುಕಾ ಪೊಟಾಂತ್.... ದೂಕ್.....?"
“ಕಾಂಯ್ ನಾ....." ಆಪ್ಲ್ಯಾ ಜಿನೊಸಾಂತ್ ಭಿಯೆವ್ನ್ ಗೆಲ್ಲ್ಯಾ ಡಾರ್ಲಿನಾಚಿ ಉತ್ರಾಂ ಮಧೆಂಚ್ ರೊಕುನ್, ರಾಯ್ನಲ್ ತೊಂಡಾರ್ ಹಾಸೊ ಹಾಡುನ್ ಮ್ಹಣಾಲೊ. “ಹಿ ಏಕ್ ದೂಕ್ ಯೆತಾ, ತ್ಯಾ ವೆಳಾ, ಹಾಂವ್ ಮೆಲೊಂಚ್ ಮ್ಹಣ್ ಭಗ್ತಾ. ಉಪ್ರಾಂತ್ ಎಕ್ದಮ್ ಸ್ವಸ್ತ್ ಜಾತಾಂ ಹಾಂವ್”ಡಾರ್ಲಿನಾಕ್ ರಾಯ್ನಲಾಚ್ಯಾ ಉತ್ರಾಂನಿ ಸಮಧಾನ್ ಜಾಲೆಂನಾ. ತೆಂ ಸಮಸ್ಯಾಂನಿ ರೆವ್ಡಾಲ್ಲ್ಯಾ ಚಿಂತ್ನಾಂನಿ ಭುಡೊನ್, ಭಿಯೆಲ್ಲೆ ನದ್ರೆಂತ್ ತಾಕಾ ಗೂಂಡ್ ದಿಷ್ಟಿನ್ ಪಳೈತಾನಾ,"
“ಒಹ್ ಕಮ್ ಓನ್ ಬೇಬಿ.... ತುಂ ಕಿತ್ಯಾ ಭಿಯೆಲೆಂಯ್....?" ರಾಯ್ನಲ್ ಡಾರ್ಲಿನಾಕ್ ಹಾಸೊನ್ ಸಮಧಾನ್ ಕರ್ತಾನಾ,
“ರಾಯ್ನಲ್ ತುಂ ಜಾಣಾಂಯ್.... ತುಂ ಮ್ಹಜೆ ಖಾತಿರ್ ಕಿತೆಂ ಜಾವ್ನ್ ಆಸಾಯ್ ಮ್ಹಣ್.....?" ರಾಯ್ನಲಾಚಾ ತೊಂಡಾರ್ ಹಾಸ್ಯೊ ಮಾತ್ರ್ ಆಸ್ಲ್ಲ್ಯೊ.“ಹಿ ದೂಕ್ ತುಕಾ ಕೆದಳಾ ಥಾವ್ನ್ ಯೆತಾ....?" ಡಾರ್ಲಿನ್ ಕಾಂಪ್ಲ್ಲ್ಯಾ ತಾಳ್ಯಾನ್ ವಿಚಾರಿಲಾಗ್ಲೆಂ.
“ತುಂ ಕಿತ್ಯಾಕ್ ಹೆಂ ಸವಾಲ್ ಕರ್ತಾಯ್....? ಐ ಆಮ್ ಒಕೆ....."
“ಹಿ ದೂಕ್ ತುಕಾ ಕೆದ್ನಾಂ ಥಾವ್ನ್ ಯೆತಾ....?" ಡಾರ್ಲಿನಾಚೊ ತಾಳೊ ಭರುನ್ ಆಯಿಲ್ಲೊ.
“ಓಹ್ ಹನಿ, ತುಂ ಬೆಷ್ಟೆಂ ತರೀ ಘಡ್ಭಡ್ತಾಯ್.... ಹಿ ದೂಕ್ ಕಾಂಯ್ ಮಹಿನೊ ಉತ್ರಾಲೊ. ಪುಣ್ ಕಾಂಯ್ನಾ. ಮಾಗಿರ್ ಹಾಂವ್ ಎಕ್ದಮ್ ಬರೊ ಜಾತಾಂ....."
“ಮಹಿನೊ ಉತ್ರಾಲೊ ಆನಿ ತುಂ ಆಜೂನ್ ಕೇರ್ಲೆಸ್ ಆಸಾಯ್.....?" ಡಾರ್ಲಿನ್ ಭಿಗಡ್ಲೆಂ. “ದಾಕ್ತೆರಾಕ್ ದಾಖಂವ್ಕ್ ಕಿತ್ಯಾಕ್ ವಚುಂಕ್ ನಾಂಯ್......? ತುಕಾ ಮ್ಹಜೊ ಮೋಗ್ ನಾ....."
“ತಶೆಂ ಕಿತ್ಯಾಕ್ ಮ್ಹಣ್ತಾಯ್ ಮೊಗಾ....?"
“ಮ್ಹಜೊ ಮೋಗ್ ಆಸ್ಲ್ಲೊ ತರ್, ತುಂ ತುಜೆ ದುಕಿ ವಿಶೆಂತ್ ಮ್ಹಾಕಾ ಸಾಂಗ್ತೊ ಆಸ್ಲ್ಲೊಯ್. ದಾಕ್ತೆರಾಕ್ ದಾಖವ್ನ್ ದುಬಾವ್ ಪರಿಹಾರ್ ಕರ್ತೊಯ್....."
“ಹಾಂವ್ ಮೆಲ್ಯಾರೀ ವ್ಹಡ್ನಾ ಮಾ..... ಪುಣ್ ತುಜೊ ಮ್ಹಾಕಾ ಮೋಗ್ ನಾ ಮ್ಹಣ್ ಮ್ಹಣಾನಾಕಾ. ಜಾಂವ್ಕ್ಪುರೊ ಹಾಂವೆಂ ಹಿ ದೂಕ್ ತುಜೆ ಥಾವ್ನ್ ಲಿಪೈಲ್ಲಿ, ತುಕಾ ಕಳವ್ನ್ ಘಡ್ಭಡಾಂವ್ಕ್ ಮನ್ ನಾತ್ಲ್ಲ್ಯಾನ್. ಶಿವಾಯ್ ಹಾಂವ್ ಸ್ವತಾಃ ಹ್ಯಾ ದುಕಿ ವಿಶೆಂತ್ ವಿಶೇಷ್ ಚಿಂತುಂಕ್ ವಚುಂಕ್ ನಾ. ಜಾಯ್ತ್, ಫಾಲ್ಯಾಂಚ್ ದಾಕ್ತೆರಾಕ್ ದಾಖಂವ್ಕ್ ವೆತಾಂ....." ರಾಯ್ನಲಾನ್ ಡಾರ್ಲಿನಾಚಾ ದೊಳ್ಯಾಂನಿ ಪಳವ್ನ್, ತಾಚಾ ಮಾತ್ಯಾರ್ ಹಾತ್ ಪೊಶೆವ್ನ್ ಮೊಗಾನ್ ಸಾಂಗ್ಲೆಂ.
ತಶೆಂ ದುಸ್ರ್ಯಾಚ್ ದಿಸಾ ರಾಯ್ನಲ್ ಆಪ್ಲ್ಯಾ ಫೆಮಿಲಿ ದಾಕ್ತೆರಾಕ್ ಮೆಳೊಂಕ್ ಗೆಲೊ. ದಾಕ್ತೆರಾನ್ ಸಮಸ್ಯಾ ಆಯ್ಕೊನ್, ರಾಯ್ನಲಾಕ್ ‘Diagnostic Centre (ಡಾಯ್ಗ್ನೊಸ್ಟಿಕ್ ಸೆಂಟರಾಕ್) ವಚುಂಕ್ ತ್ಯಾ ಲಗ್ತಿ ಪತ್ರ್ ದಿಲೆಂ, ಪಿಡಾ ತಪಾಸ್ಣಿ ಕರುಂಕ್.
“ಕಾಂಯ್ ಭಿಯೆನಾಕಾ ರಾಯ್ನಲ್, ತುಂ ಇತ್ಲೊ ಘಟ್ ಮೂಟ್, ಬಲೈಕೆಂತ್ ಆಸ್ಲ್ಲೊ ತರ್ನಾಟೊ....." ದಾಕ್ತೆರಾನ್ ರಾಯ್ನಲಾಕ್ ಧೈರ್ ದೀವ್ನ್ ಸಾಂಗ್ಲೆಂ, “ಅಸಲ್ಯೊ ದುಕಿ ನಮುನ್ಯಾವರ್ ಆಸ್ತಾತ್. ತಾಂಕಾಂ ಸಮ್ಜೊನ್ ವೆಳಾರ್ ಫಾವೊ ತೆಂ ಟ್ರೀಟ್ಮೆಂಟ್ ಘೆತ್ಲ್ಯಾರ್ ಬಲೈಕಿ ಮಾತ್ರ್ ಬರಿ ಜಾತಾನ್ಹಯ್, ಬಗಾರ್ ಆವ್ಕ್ಯಿ ವಾಡ್ತಾ....."
ದಾಕ್ತೆರಾಚಿಂ ಉತ್ರಾಂ ಆಯ್ಕೊನ್ ರಾಯ್ನಲಾಚಾ ಮತಿಕ್ ಸಮಧಾನ್ ಜಾಲ್ಲೆಂ. ಆನಿ ತೊ ತಾಚೆ ವಿಶಿಂ ಭಿಯೆವ್ನ್ ಖಂತ್ ಕರುನ್ ಆಸ್ಲ್ಲ್ಯಾ ಡಾರ್ಲಿನಾಕ್ ಹಿ ಗಜಾಲ್ ಸಾಂಗೊಂಕ್ ಗೆಲ್ಲೊ- “ಹಾಂವ್ ಸರ್ವ್ ಟೆಸ್ಟಾಂ ಕರುನ್ ಆಯ್ಲಾಂ ಮೊಗಾ.... ರಿಪೊರ್ಟ್ ಶೀದಾ ಮ್ಹಜಾ ಫೆಮಿಲಿ ದಾಕ್ತೆರಾಕ್ ವೆತಾ. ತೊ ಜಾಣಾ ಜಾಂವ್ಕ್ ಮ್ಹಾಕಾ ದಾಕ್ತೆರಾನ್ ದೋನ್ ಹಪ್ತ್ಯಾ ನಂತರ್ ಆಪಯ್ಲಾಂ. ಅಸಲ್ಯೊ ನಮುನ್ಯಾವಾರ್ ದುಕಿ ಆಸಾತ್ ಖಂಯ್. ಕಾಂಯ್ ಭಿಯೆಂವ್ಚಿ ಗರ್ಜ್ ನಾ ಮ್ಹಣ್ ದಾಕ್ತೆರಾನ್ ಸಾಂಗ್ಲಾಂ. ಸದ್ದ್ಯಾಕ್ ದುಕಿಕ್ ನಿಯಾಂತ್ರಾಣಾರ್ ಆನಿ ಆನ್ಕಿಟೆಕ್ ಘಟ್ ಕರುಂಕ್ ಥೊಡಿಂ ವಕ್ತಾಂ ಬರವ್ನ್ ದಿಲ್ಲಿಂ ಹಾಂವೆಂ ಹಾಡ್ಲ್ಯಾಂತ್. ಆತಾಂ ಮ್ಹಕಾ ಮಸ್ತು ಬರೆಂಪಣ್ ಆಸಾ...." ರಾಯ್ನಾಲಾನ್ ಡಾರ್ಲಿನಾಕ್ ಸಾಂಗ್ಲ್ಲೆಂ.
ಡಾರ್ಲಿನ್ ಆಯ್ಕೊನ್ ಸಮಧಾನ್ ಜಾಲ್ಲೆಂ. ತ್ಯಾ ಮಧೆಂ ತಿಂ ಸಬಾರ್ ಪಾವ್ಟಿಂ ಮೆಳ್ಲ್ಲಿಂ. ತಾಂಚಿಂ ವೊಂಟಾಂ ಏಕ್ ಜಾಲ್ಲಿಂ. ರಾಯ್ನಲ್ ಬರೊ ಆಸ್ಲ್ಲೊ ಜಾಲ್ಲ್ಯಾನ್, ಪಾಟ್ಲ್ಯಾ ದಿಸಾಂನಿ ಜಾಲ್ಲ್ಯಾ ತಾಚಾ ದುಕಿಚೆರ್ ಪಡ್ದೊ ಪಡ್ಲ್ಲೊ.
ರಾಯ್ನಲಾನ್ ಆಪ್ಲ್ಯಾ ಕಾಜಾರಾವಿಶಿಂ ನಿಘಂಟ್ ಕೆಲ್ಲೆಂ! ಡಾರ್ಲಿನಾಕ್ ಆಪ್ಲಿ ಹೊಕಾಲ್ ಕರುನ್ ವೆಗ್ಗಿಂಚ್ ಆಪ್ಲ್ಯಾ ಘರಾ ಹಾಡುಂಕ್ ಚಿಂತ್ಲ್ಲೆಂ!! ತ್ಯಾ ಪ್ರಕಾರ್, 1981-ಇಸ್ವೆಂತ್ ಮಾರ್ಚಾಚ್ಯೆ 8 ತಾರಿಕೆರ್ ಆಯ್ತಾರಾ ಇಗರ್ಜೆಂತ್ ಡಾರ್ಲಿನಾಕ್ ಮೆಳ್ಲ್ಲೆ ತವೊಳ್, ದುಸ್ರ್ಯಾ ದಿಸಾ ಸೊಮಾರಾ 9 ತಾರಿಕೆರ್ ರಾತ್ಚ್ಯಾ ನೋವ್ ವೊರಾಂ ಉಪ್ರಾಂತ್ ಆಪ್ಲ್ಯಾ ಬೊಂಗ್ಲ್ಯಾಂತ್ ಗಜಾಲ್ ಇತ್ತ್ಯಾರ್ಥ್ ಕರುಂಕ್ ಡಾರ್ಲಿನಾಕ್ ಆಪಯಿಲ್ಲೆಂ.
ತ್ಯಾಚ್ ಸೊಮಾರಾ ಸಾಂಜೆಚ್ಯಾ ಸ ವೊರಾಂಚೆರ್ ರಾಯ್ನಲಾಕ್ ತಾಚಾ ಫೆಮಿಲಿ ದಾಕ್ತೆರಾಚೊ ಫೊನ್ ಆಯಿಲ್ಲೆಂ! ದೋನ್ ಹಪ್ತ್ಯಾಂನಿ ದಾಕ್ತೆರಾಕ್ ಮೆಳುಂಕ್ ವಚುಂಕ್ ಆಸ್ಲ್ಲೆಂ ತರೀ, ಬಲೈಕೆಂತ್ ಆಸ್ಲ್ಲ್ಯಾ ರಾಯ್ನಲಾಕ್ ದಾಕ್ತೆರಾಚಾ ಎಪೊಂಯ್ಟ್ಮೆಂಟಾಚಿ ವಿಸರ್ ಪಡ್ಲ್ಲಿ. ಆಪಯಿಲ್ಲ್ಯಾ ತಾರಿಕೆರ್ ಯೇಂವ್ಕ್ ನಾತ್ಲ್ಲೊ ಪಳವ್ನ್ ದಾಕ್ತೆರಾನ್ ಸ್ವಃತಾ ಫೊನ್ ಕರುನ್ ರಾಯ್ನಲಾಕ್ ಆಪಯಿಲ್ಲೆಂ, ಗಜಾಲ್ ಗಂಬೀರ್ ಆಸ್ಲ್ಲ್ಯಾನ್.
ರಾಯ್ನಲ್ ದಾಕ್ತೆರಾಕ್ ಮೆಳೊನ್ ಆಯಿಲ್ಲೊ.....!
ದಾಕ್ತೆರಾಚಿಂ ಉತ್ರಾಂ ತಾಚಾ ಕಾನಾಂತ್ ಸಾದ್ತಾಲಿಂ......!!
ತೊ ತಾಚಾ ಜೀವನಾಕ್ ಆಶೆಲ್ಲೊ....., ಡಾರ್ಲಿನಾಸಂಗಿಂ ಕಾಜಾರ್ ಜಾವ್ನ್ ಆಪ್ಣೆ ದಿಲ್ಲ್ಯಾ ಬಾಷೆಚೆಂ ಪಾಲನ್ ಕರುಂಕ್ ತೊ ಆಶೆಲ್ಲೊ..... ಡಾರ್ಲಿನಾಕ್ ಕೊಣೆಂಯ್ ಎದೊಳ್ ದೀಂವ್ಕ್ ನಾತ್ಲ್ಲೊ ಮೋಗ್ ದೀಂವ್ಕ್ ತೊ ಆಶೆಲ್ಲೊ.... ಪುಣ್ ದಾಕ್ತೆರಾನ್ ದೆವಾಚೊ ಜಾಗೊ ಘೆತ್ಲ್ಲೊ, ರಾಯ್ನಲಾಚಾ ಬಾಕಿ ಆಸ್ಲ್ಲ್ಯಾ ದಿಸಾಂಚೆಂ ಲೇಖ್ ಸಾಂಗೊನ್.....!!!
“ರಾಯ್ನಲ್ ದೆವಾನ್ ಅಜ್ಯಾಪ್ ಕರ್ಯೆತ್.... ತುಕಾ ವಾಂಚವ್ಯೆತ್.... ಪುಣ್ ಮನಿಸ್ ಜಾಲ್ಲೊ ತೊ ಕೊಣ್ಯಿ ತೊ ಜಾಂವ್, ತುಕಾ ತುಜ್ಯಾ ಯೆಂವ್ಚ್ಯಾ ಭಿರಾಂಕುಳ್ ಮರ್ಣಾ ಥಾವ್ನ್ ವಾಂಚಂವ್ಕ್ ಸಕ್ಚೊನಾ.......!!!” ದಾಕ್ತೆರಾನ್ ರಾಯ್ನಾಕ್ ಸಾಂಗ್ಲ್ಲೆಂ.
ವ್ಹಯ್, ಪಯ್ಲೆಂ ದಾಕ್ತೆರ್ ಪಿಡಾ ಲಿಪಯ್ತಾಲೆ ಆನಿ ಆಪ್ಲೆಂ ಸಾಧನ್ ಚಲಯ್ತಾಲೆ ಪಿಡೆಸ್ತಾಚೊ ಜೀವ್ ಉರಂವ್ಚ್ಯಾಕ್. ಪುಣ್, ಗೂಣ್ ಜಾಯ್ನಾತ್ಲ್ಲಿ ಪಿಡಾ ಬರಿ ಜಾಂವ್ಚಿ ತರೀ ಕಶಿ? ಪಿಡಾ ಸಾಂಗ್ಲ್ಯಾರ್, ವಾಯ್ದೊ ಸಾಂಗ್ಲ್ಯಾರ್, ಪಿಡೆಸ್ತ್ ಮರ್ಣಾ ಆದಿಂಚ್ ಮೊರುಂಕ್ ಆಸಾ ಮ್ಹಳ್ಳ್ಯಾ ಚಿಂತ್ಪಾನ್ ದಾಕ್ತೆರ್ ಚಡಾವತ್ ಪಿಡಾ ಪಿಡೆಸ್ತಾಕ್ ಸಾಂಗಾನಾಸ್ತಾಂ ಲಿಪಯ್ತಾಲೆ.
ಪುಣ್ ಆತಾಂ ತಶೆಂ ನ್ಹಯ್. ಪಿಡಾ ಮರ್ಚ್ಯಾ ಪಿಡೆಸ್ತಾನ್ಂಚ್ ಜಾಣಾ ಜಾಂವ್ಕ್ ಜಾಯ್, ತೆಂ ಕಾಯ್ದ್ಯಾ ಕಾಲ್ ಜಾರ್ಯೆಕ್ ಆಯಿಲ್ಲೆಂ. ಕಿತ್ಯಾಕ್ ಪಿಡೆಸ್ತಾನ್ ಆಪ್ಲ್ಯೆ ಪಾತ್ಕಿ ಜಿಣ್ಯೆಕ್ ನಿಯಾಳುನ್ ಪಶ್ಚಾತ್ತಾಪ್ ಪಾವ್ಯೆತ್ ಮೊರ್ಚ್ಯಾ ಆದಿಂ. ತಾಣೆ ಲಿಪಯಿಲ್ಲೆ ಘುಟ್ ತಾಚಾ ಲಾಗ್ಶಿಲ್ಯಾಂಕ್ ಉಗ್ಡಾಪೆ ಕರ್ಯೆತ್, ರೀಣ್ ದಿಲ್ಲೆಂ ವ ಘೆತ್ಲ್ಲೆಂ- ವಜಾ ಕರ್ಯೆತ್ ವ ಫಾರಿಕ್ ಕರ್ಯೆತ್.....ಇತ್ತ್ಯಾದಿ.
“ಮ್ಹಾಕಾ ಪಿಡಾ ಕಸಲಿ ಡೊಕ್ಟರ್.....?" ಜೀವ್ ನಾತ್ಲ್ಲ್ಯಾ ತಾಳ್ಯಾನ್ ಮರ್ಣಾಕ್ ಮುಖ್ಲ್ಯಾ ದಿಸಾಂನಿ ಪಳಯಿಲ್ಲ್ಯಾ ರಾಯ್ನಲಾನ್ ದಾಕ್ತೆರಾಕ್ ಸವಾಲ್ ಕೆಲ್ಲೆಂ.
“ಹ್ಯೆ ಪಿಡೆಚೆಂ ನಾಂವ್ ಮೆಡಿಕಲ್ ಸಾಯನ್ಸಾಂತ್ ಯೆದೊಳ್ ಯೇಂವ್ಕ್ನಾ..... ಹ್ಯೆ ಪಿಡೆಚೆಂ ನಾಂವ್ ಖಂಚ್ಯಾ ದಾಕ್ತೆರಾನ್ಯಿ ಸಾಂಗೊಂಕ್ ಜಾಯ್ನಾಂ, ವ ಕಳಿತ್ ನಾ. ಹ್ಯೆ ಪಿಡೆಕ್ ಪರಿಹಾರ್ ಜಾವ್ನ್ ಒಪೊರೇಶನ್ ಕರುಂಕ್ಯೀ ಜಾಯ್ನಾಂ ಮೂಳ್ ಕಾರಣ್ ನಾಸ್ತಾಂ....."
“ಡೊಕ್ಟರ್.....!" ಭಿಯೆಲ್ಲೊ ರಾಯ್ನಲ್ ಬಸ್ಲ್ಲೆ ಥಂಯ್ಚ್ ಕಾಂಪೊಂಕ್ ಲಾಗ್ಲೊ.
“ತುಕಾ ಸಮಧಾನ್ ಕರುನ್ ಘೆ ಮ್ಹಣ್ ಸಾಂಗೊಂಕ್ಯಿ ಹಾಂವ್ ಸಕಾನಾ....."
“ಡೊಕ್ಟರ್...." ಪರತ್ ಮಧೆಂಚ್ ಬೊಬಾಟ್ಲೊ ರಾಯ್ನಲ್, “ಮ್ಹಕಾ ಕಿತೆಂ ಜಾಲಾಂ ತೆಂ ತರೀ ತುಮಿ ಸಾಂಗ್ಶ್ಯಾತ್......?"
“ತುಜ್ಯಾ ಪೊಪ್ಸಾಚ್ಯಾ ಸಾಡೆತೀನ್ ಇಂಚಾ ಸಕೈಲ್ ಏಕ್ ಕಾಳಿ ಶಿರ್, ಜಿ ಮೆಟಾಲಿಕ್ ಪದಾರ್ಥಾಂತ್ ತಬ್ದೀಲ್ ಜಾವ್ನ್ ಮೊಟ್ಯೆ ಆನ್ಕಿಟ್ಯೆ ಭಿತರ್ ರಿಗೊನ್ ಆಸಾ. ತಿ ಹೆರ್ಯೆಕಾ ಚೊವೀಸ್ ವೊರಾಂನಿ ಏಕ್ ಸೆಂಟಿಮೀಟರ್ ವಾಡೊನ್ ಆಸಾ. ಹ್ಯೆ ಮೆಟಾಲಿಕ್ ಶಿರ್ಯೆಕ್ ಆಪ್ಡುಂಕ್ ಸೈತ್ ಜಾಯ್ನಾಂ, ಒಪೊರೇಶನ್ ಕರ್ಚಿ ಪಯ್ಶಿಲಿ ಗಜಾಲ್. ತಿಚಿ ವಾಡವಳ್ 20 ಥಾವ್ನ್ 25 ದಿಸಾಂ ಭಿತರ್ ಸುಮಾರ್ ಮುಕ್ಕಾಲ್ ಫುಟ್ ವಾಡುಂಕ್ ಸಾಧ್ಯ್ ಆಸಾ. ತಿ ಶೀದಾ ತುಜ್ಯಾ ಶೀಘ್ರ್ ಅಂಡ್ಕೋಶಾಂತ್ ರಿಗ್ಚ್ಯಾ ವಾಟೆನ್ ವಾಡೊನ್ ಆಸಾ. ಹ್ಯೆ ನಿಮ್ತಿಂ ತುಕಾ ಮುಖ್ಲೆ ದೀಸ್ ಸೊಸುಂಕ್ ಸಕಾನಾತ್ಲ್ಲ್ಯೆ ದುಕಿಚೆ ಜಾತೆಲೆ......, ಆನಿ ಆಖ್ರೇಕ್ ತುಜೆಂ ಭಿರಾಂಕುಳ್ ಮರಣ್....."
ದಾಕ್ತೆರಾಚಿಂ ಉತ್ರಾಂ....., ಆಪ್ಲ್ಯಾ ಉರ್ಲ್ಲ್ಯಾ ದಿಸಾಂಚೆ ಜಿಣ್ಯೆಚೆಂ ಫೈಸಲ್, ಮುಖ್ಲೆ ಸೊಸುಂಕ್ ಜಾಯ್ನಾ ತಸಲೆ ದುಕಿಚೆ ದೀಸ್.... ರಾಯ್ನಲಾಚೆಂ ಶಿಂತಿದ್ ಹೊಗ್ಡಾಂವ್ಕ್ ಸಕ್ಲ್ಲೆಂ. ತೊ ಆಪ್ಲ್ಯಾ ಕುಡಾಂತ್ ಕಳ್ವಳ್ಯಾಂಚಾ ಕಾಳೊಕಾಂತ್ ಡಾರ್ಲಿನಾಕ್ ಆಶೆವ್ನ್ ನಿಯಾಳುನ್ ಆಸ್ಲ್ಲೊ.
ವ್ಹಯ್ ಆಜ್ ತಾಣೆ ಡಾರ್ಲಿನಾಕ್ ನೋವ್ ವೊರಾಂ ಉಪ್ರಾಂತ್ ಆಪಯಿಲ್ಲೆಂ, ಆನಿ ಭೋವ್ಶಾ ಡಾರ್ಲಿನ್ ತಾಕಾ ಮೆಳುಂಕ್, ವಾಟೆರ್ ಆಸ್ಲ್ಲೆಂ. ಸವ್ಕಾಸ್ ತೊ ಉಟ್ಲೊ. ರುಮಾಂತ್ ಕಾಳೊಕ್ ಆಸ್ಲ್ಲೊ ತಾಣೆ ವೀಜ್ ದಿವೆ ಪೆಟೊಂಕ್ ನಾತ್ಲ್ಲ್ಯಾನ್. ದುಸ್ರ್ಯಾ ಕ್ಷಣಾ ತಾಚಾ ಹಾತಿಂ ಸೆಲ್ಲ್ ಫೊನ್ಲಾಗ್ಲೆಂ.
ಡಾರ್ಲಿನ್ ಪಾಂವ್ಚೊ ವೇಳ್ ಜಾಲ್ಲೊ.....
ಡಾರ್ಲಿನಾಚಾ ಸೆಲ್ಲ್ ಫೊನಾಚೊ ಸಂಪರ್ಕ್ ಮೆಳಯ್ಲೊ.....
ಡಾರ್ಲಿನಾನ್ ಆಪ್ಲ್ಯಾ ಸೆಲ್ಲ್ ಫೊನಾರ್ ಉದೆಲ್ಲ್ಯಾ ರಾಯ್ನಲಾಚ್ಯೆ ತಸ್ವೀರೆಕ್ ಉಮೊ ದೀವ್ನ್ ಆಪುಣ್ ಥೊಡ್ಯಾಚ್ ವೆಳಾನ್ ತಾಚಾ ವೊಂಟಾಂಕ್ ತೃಪ್ತಿ ದೀಂವ್ಕ್ ಪಾವ್ತಾಂ ಮ್ಹಣ್ ಸಾಂಗ್ತಾನಾ, ರಾಯ್ನಲಾನ್ ತಾಕಾ ಪಾಟಿಂ ಪರ್ತುಂಕ್ ಸಾಂಗ್ಲ್ಲೆಂ, ಆಪುಣ್ ಘರಾನಾ ಮ್ಹಳ್ಳೆಂ ನೀಬ್ ಘೆವ್ನ್.
ಡಾರ್ಲಿನಾಚಾ ಸಂತೊಸಾಚೊ ಸ್ಪಿರಿತ್ ಉಬೊನ್ ಗೆಲ್ಲೊ ಆನಿ ತೆಂ ಆಸಾ ತಶೆಂ ಆಪ್ಲ್ಯಾ ಕಾರಾರ್ ಪಾಟಿಂ ಪರ್ತಾಲ್ಲೆಂ. ಘರಾ ಪಾವ್ಲ್ಲೆಂ ಡಾರ್ಲಿನ್, ಜೆವಿನಾಸ್ತಾಂ ಆಪ್ಣಾಕ್ ಬೆಡ್ಡ್ ರುಮಾಂತ್ ಪಿಚಾರ್ ಕರುನ್ ಸಗ್ಳಿ ರಾತ್ ರಡೊನ್ ಬಸ್ಲ್ಲೆಂ.
ಬೆಜಾರಾಯೆನ್ ಘರಾಚ್ ಆಸ್ಲ್ಲ್ಯಾ ಡಾರ್ಲಿನಾಕ್ ವಾಚ್ಲ್ಲ್ಯಾ ತಾಚಾ ಆವಯ್ನ್ ಏಕ್ ದೀಸ್, ತಾಚಾ ಮಾತ್ಯಾರ್ ಹಾತ್ ಪೊಶೆವ್ನ್ ವಿಚಾರ್ಲ್ಲೆಂ - “ಪಯ್ಲೆಂ ತುಂ ಕೆದ್ನಾಂಯ್ ರಾಯ್ನಲಾಕ್ ಮೆಳೊಂಕ್ ವೆತಾಲೆಂಯ್...., ಆತಾಂ ಹ್ಯಾ ದಿಸಾಂನಿ ಕಿತೆಂ ಜಾಲಾಂ ಪುತಾ ತುಕಾ.....? ಏಕ್ ಹಪ್ತೊ ಉತ್ರಾಲೊ, ತುಂ ಖಂಯ್ಯೀ ವಚುಂಕ್ನಾಂಯ್.....?"
ಜಾಪ್ ದೀನಾಸ್ತಾಂ ಡಾರ್ಲಿನ್ ಉಟೊನ್ ಭಿತರ್ ಗೆಲ್ಲೆಂ.
ವ್ಹಯ್ ತ್ಯಾ ದಿಸಾ ಉಪ್ರಾಂತ್, ಡಾರ್ಲಿನ್ ಖಂಯ್ಯಿ ಭಾಯ್ರ್ ವಚುಂಕ್ ನಾತ್ಲ್ಲೆಂ. ತಾಕಾ ಬೆಜಾರಾಯ್ ಜಾಲ್ಲಿ, ರಾಯ್ನಾಲಾನ್ ಆಪ್ಣಾಕ್ ಆಪವ್ನ್ ಪಾಟಿಂ ಪರ್ತುಂಕ್ ಕಿತ್ಯಾಕ್ ಸಾಂಗ್ಲೆಂ ಗಾಯ್ ಮ್ಹಣ್. ತ್ಯಾ ವೆಳಿಂ ತೊ ಘರಾಚ್ ಆಸ್ಲ್ಲೊಯೀ ಮ್ಹಳ್ಳೆಂ ತಾಕಾ ಭಗ್ಲ್ಲೆಂ. ತ್ಯಾ ಉಪ್ರಾಂತ್ ನಾ ರಾಯ್ನಲಾನ್ ಡಾರ್ಲಿನಾಕ್ ಫೊನ್ ಕೆಲ್ಲೆಂ ವ ಡಾರ್ಲಿನಾನ್.
ರಾಯ್ನಲಾನ್ ಡಾರ್ಲಿನಾಕ್ ಫೊನ್ ಕರಿನಾಸ್ತಾಂ ಪಯ್ಸ್ ರಾವೊಂಕ್ ಕಾರಣ್ ಆಸ್ಲ್ಲೆಂ. ಪುಣ್ ಬಿರ್ಮೊತ್ ಡಾರ್ಲಿನ್ ಕಿತೆಂ ಜಾಣಾಂ...? ತೆಂ ರಾಯ್ನಲಾಚಾ ಫೊನಾಕ್ ರಾಕ್ತಾಲೆಂ. ತಾಣೆ ತಾಕಾ ಫೊನ್ ಕರುನ್ ಆಪಂವ್ಕ್ ಜಾಯ್.... ತಾಣೆ ತಾಚೆ ಲಾಗ್ಗಿಂ ಪಶ್ಚತ್ತಾಪ್ ಪಾವೊನ್ ತಾಕಾ ಪುಸ್ಲಾವ್ನ್ ಮಾಫಿ ಮಾಗೊಂಕ್ ಜಾಯ್ ಮ್ಹಣ್.
ಜರ್ತರ್ ರಾಯ್ನಲ್ ಬರೊ ಆಸ್ಲ್ಲೊ, ಖಂಡಿತ್ ತೊ ತಶೆಂ ಕರ್ತೊ. ಪುಣ್ ತಾಚಿ ಅಸ್ವಸ್ತ್ ಗಜಾಲ್, ಗತ್ ತೊ ಮಾತ್ರ್ ಜಾಣಾ, ಜಿ ಡಾರ್ಲಿನಾಕ್ ಸಾಂಗೊಂಕ್ ಸೈತ್ ತೊ ಸಕಾನಾ. ದಾಕ್ತೆರಾಕ್ ಮೆಳೊನ್ ಆಯ್ಲ್ಯಾ ಉಪ್ರಾಂತ್ ರಾಯ್ನಲ್ಯೀ ಘರಾ ಭಾಯ್ರ್ ವಚುಂಕ್ ನಾ, ಜಶೆಂ ಆಪ್ಲ್ಯಾ ಮರ್ಣಾಕ್ ರಾಕೊನ್ ಆಸಾ ತಶೆಂ.
ಆಖ್ರೇಕ್ ಸೊಸುಂಕ್ ಸಕಾನಾಸ್ತಾಂ, ಡಾರ್ಲಿನ್ ಫೊನ್ ಕರಿನಾಸ್ತಾಂ, ರಾಯ್ನಲಾಚಾ ಘರಾ ದಿಸಾ ಉಜ್ವಾಡಾಕ್ ಗೆಲೆಂ, ಸಮ್ಜೊನ್ ಘೆಂವ್ಕ್ ರಾಯ್ನಲ್ ಕಿತ್ಯಾಕ್ ತಾಚೆ ಥಾವ್ನ್ ಪಯ್ಸ್ ಜಾಲಾ ಮ್ಹಣ್. ತೊ ದೀಸ್ಯಿ ಸೊಮಾರ್ ಮಾರ್ಚಾಚಿ 16 ತಾರಿಕ್, 1981 ಇಸ್ವಿ.
ದಾರಾಚಿ ಕಾಂಪಿಣ್ ಆಯ್ಕೊನ್ ರಾಯ್ನಲಾನ್ ದಾರ್ ಉಘಡ್ತಾನಾ ಮುಖಾರ್ ತಾಕಾ ಡಾರ್ಲಿನ್ ಉಭೆಂ ಆಸ್ಲ್ಲೆಂ ದಿಸ್ಲೆಂ, ಜೆಂ ರಾಯ್ನಲಾನ್ ಆಪೆಕ್ಷುಂಕ್ ನಾತ್ಲ್ಲೆಂ. ತೊ ಉಮಾಳ್ಳೊ ಜಶೆಂ ತಾಚಿ ಜಿಣಿ ಪಾಟಿಂ ಮೆಳ್ಲ್ಲ್ಯಾ ಪರಿಂ. ಪುಣ್ ತಾಚಾ ತೊಂಡಾಂತ್ಲ್ಯಾನ್ ಡಾರ್ಲಿನಾಕ್ ಸ್ವಾಗಾತ್ ಕರ್ಚಿಂ ಉತ್ರಾಂ ಭಾಯ್ರ್ ಸರ್ಲಿಂನಾಂತ್.
ಡಾರ್ಲಿನಾಚೆಂ ತೊಂಡ್ ಪಯ್ಲೆಂಚ್ ರಾಯ್ನಲಾಚಾ ಖಂತಿನ್ ದೆಂವ್ಲ್ಲೆಂ. ಆತಾಂ ರಾಯ್ನಲಾಚೊ ಹಾವ್-ಬಾವ್ ಪಳವ್ನ್ ತೆಂ ಪುರ್ತೆಂ ಗಳ್ಳೆಂ. ತರೀ ಕಷ್ಟಾಂನಿ ಮುಖಮಳಾರ್ ಹಾಸೊ ಖೆಳಯ್ಲೊ ಡಾರ್ಲಿನಾನ್.
“ಹಪ್ತ್ಯಾ ಭಿತರ್ ವ್ಹಳಕ್ಯೀ ವಿಸ್ರಾಲೊಯ್ ತುಂ.....?" ದಾರಾರ್ ಶಾಂತ್ ಉಭೊ ಆಸ್ಚ್ಯಾ ರಾಯ್ನಲಾಕ್ ಕುಶಿಕ್ ಲೊಟುನ್ ಡಾರ್ಲಿನ್ ಭಿತರ್ ಸರ್ಲೆಂ. “ಹಾಂವ್ ಡಾರ್ಲಿನ್...., ತುಜೆಂ ಡಾರ್ಲಿನ್, ಜೆಂ ತುಜ್ಯಾ ಸಂಸಾರಾಂತ್ಲ್ಯಾ ಸರ್ವಾಂ ಪ್ರಾಸ್ ಮೊಗಾಚೆಂ..... ಜೆಂ ತುಕಾ ದೀಸ್ ರಾತ್ ನಿಯಾಳುನ್ ರಾಕೊನ್ ತುಜೆಸಂಗಿಂ ಎಕ್ವಟೊಂಕ್, ತುಜೆ ಸಂಗಿಂ ಕಾಜಾರ್ ಜಾಂವ್ಚೆಂ ಸ್ವಪಾಣ್ ದಿಸಾ ಉಜ್ವಾಡಾಕ್ಯೀ ಪಳವ್ನ್ ಆಸ್ಚೆಂ....." ಸಾಂಗೊನ್ ಡಾರ್ಲಿನ್ ಮುಖಾರ್ ಸರೊನ್ ಹೊಲಾಂತ್ಲ್ಯಾ ಸೊಫಾಚೆರ್ ಗಳ್ಳೆಂ.
ದಾರ್ ಬಂಧ್ ಕರುನ್ ರಾಯ್ನಲ್ ಡಾರ್ಲಿನಾಚಾ ಮುಖ್ಲ್ಯಾನ್ ಬಸ್ಲೊ.
“ಕಶೆಂ ಆಸಾಯ್.....?" ತ್ಯಾ ತಾಳ್ಯಾಂತ್ ಜೀವ್ ನಾತ್ಲ್ಲೊ.
“ತುಕಾ ನಿಯಾಳುನ್, ಚಿಂತುನ್, ಖರ್ಗುನ್ ಎದೊಳ್ ಜಿವಾಂತ್ ಆಸಾಂ. ಪುಣ್ ತುಂ ಕಿತೆಂ ಮ್ಹಾಕಾ ಪಯಿಲ್ಲೆ ಪಾವ್ಟಿಂ ಪಳಯಿಲ್ಲೆ ಪರಿಂ ನಟನ್ ಕರ್ತಾಯ್....? ಎಕಾ ಹಪ್ತ್ಯಾ ಭಿತರ್ ತುಂ ಇತ್ಲೊ ಬದಾಲ್ಲೊಯ್....?"
“ನಾ ಮೊಗಾ, ಹಾಂವ್ ಬದ್ಲುಂಕ್ನಾ, ಏಕ್ ಘಡಿಯೀ ತುಕಾ ನಿಯಾಳಿನಾಸ್ತಾಂ ಹಾಂವೆಂ ಪಾಶಾರುಂಕ್ನಾ. ಮ್ಹಜಾ ಚಿಂತ್ನಾಂನಿ ಮಾತ್ರ್ ನ್ಹಯ್, ಮ್ಹಜಾ ಉಸ್ವಾಸಾಂತ್ಯಿ ತುಂ ವಾಳೊನ್ ಆಸಾಯ್...."
“ಫಟಿ.....! ಆಪುಟ್ ಪಟಿ...." ಡಾರ್ಲಿನ್ ಭರ್ಲ್ಲ್ಯಾ ತಾಳ್ಯಾನ್ ಮ್ಹಣಾಲೆಂ. “ಏಕ್ ಫೊನ್ ಸೈತ್ ಕರುಂಕ್ ಸಕಾನಾತ್ಲ್ಲೊ ತುಂ, ತುಜ್ಯಾ ತೊಂಡಾಂತ್ ಹಿಂ ಉತ್ರಾಂ......?"
“............" ರಾಯ್ನಲಾ ಕಡೆನ್ ಜಾಪ್ ನಾತ್ಲ್ಲಿ.
“ಕಿತ್ಯಾಕ್ ಮಾ....., ಕಿತ್ಯಾಕ್ ತುಂ ಮ್ಹಜೆ ಥಾವ್ನ್ ಪಯ್ಸ್ ಸರ್ಲಾಯ್....? ಕಿತ್ಯಾಕ್ ಮ್ಹಾಕಾ ಪಯ್ಸ್ ಕರ್ತಾಯ್....? ಹಾಂವೆಂ ತುಕಾ ಕಿತೆಂ ಅನ್ನ್ಯಾಯ್ ಕೆಲಾ....? ತ್ಯಾ ದಿಸಾಯ್ ತುಂವೆಂ ಮ್ಹಾಕಾ ಆಪವ್ನ್ ಪಾಟಿಂ ಪರ್ತುಂಕ್ ಸಾಂಗ್ಲೆಂಯ್..... ಹಾಂವ್ ಜಾಣಾ ತುಂ ತ್ಯಾ ವೆಳಾ ಹಾಂಗಾಚ್ ಆಸ್ಲ್ಲೊಯ್...."
“ಹಾಚೆಂ ಕಾರಣ್ ಆಸಾ...., ಹಾಂವ್ ತುಜೆ ಕಡೆನ್ ಕಾಜಾರ್ ಜಾಂವ್ಕ್ ಸಕಾನಾ ಮೊಗಾ...."
“ರಾಯ್ನಲ್.....!!!" ಲಗ್ಬಗ್ ಡಾರ್ಲಿನಾನ್ ಏಕ್ ಖಿಳಂಚ್ಚ್ ಮಾರ್ಲಿ.
“ವ್ಹಯ್ ಡಾರ್ಲಿನ್, ಹಾಂವ್ ತುಜೆ ಕಡೆನ್ ಕಾಜಾರ್ ಜಾಂವ್ಕ್ ಸಕಾನಾ..... ತುಂ ಮ್ಹಾಕಾ ಮಸ್ತು ಮೊಗಾಚೆಂ.... ತುಕಾ ವಿಸ್ರುಂಕ್ಯೀ ಹಾಂವ್ ಸಕ್ಚೊನಾ.... ಹೆಂ ಕಾಳಿಜ್ ಆಜೂನ್ ಚಲಾವಣೆರ್ ಆಸಾ ಫಕತ್ತ್ ತುಜ್ಯಾ ಮೊಗಾಚಾ ಅಧಾರಾನ್..... ತರೀ ತುಕಾ ಹಾಂವ್ ಆಪ್ಲೆಂ ಕರುಂಕ್ ಸಕಾನಾ ಜಾಲಾಂ....." ರಾಯ್ನಲ್ ಆಪ್ಲೆ ಆಟೆವಿಟೆ ಲಿಪಂವ್ಕ್ ಸಕಾನಾಸ್ತಾಂ, ತ್ಯಾ ಕಾರಣಾಚೆಂ ತೊಂಡ್ ಉಘಡ್ಚ್ಯಾರ್ಚ್ ಆಸ್ಲ್ಲೊ, ಆನಿ ತ್ಯಾಚ್ ವೆಳಾ ಡಾರ್ಲಿನಾನ್ ಭಗ್ಣಾಂನಿ ವಿಚಾರ್ಲೆಂ- “ಕಾಜಾರ್ ಜಾಂವ್ಕ್ ಸಕಾನಾಂಯ್ ವ ಕಾಜಾರ್ ಜಾಂವ್ಕ್ ತುಕಾ ನಾಕಾ.....?"
“ಡಾರ್ಲಿನ್.....?"
“ರಾವ್ ಮ್ಹಾಕಾ ಪಯ್ಲೆಂ ಉಲಂವ್ಕ್ ಸೊಡ್....." ರಾಯ್ನಲಾಕ್ ಹಾತ್ ಬಾಶೆನ್ಂಚ್ ಥಂಡ್ ರಾವೊಂಕ್ ಸಾಂಗೊನ್ ಡಾರ್ಲಿನ್ ಮುಂದರ್ಸಿಲಾಗ್ಲೆಂ. “ತುಂ ಮ್ಹಜೊ ಮೋಗ್ ಕರ್ತಾಯ್, ತುಜ್ಯಾ ಉಗ್ಡಾಸಾಂತ್ ಹಾಂವ್ ವಾಳೊನ್ ಆಸಾಂ, ತುಜೆಂ ಕಾಳಿಜ್ ಮ್ಹಜಾ ಮೊಗಾಚಾ ಅಧಾರಾಂತ್ ಚಲಾವಣೆರ್ ಆಸಾ, ಅಸಲಿಂ ಸಕ್ಕಡ್ ಉತ್ರಾಂ ಕಾಣಿಯಾಂನಿ ಆನಿ ಫಿಲ್ಮಾಂನಿ ಮಾತ್ರ್ ವಾಚುಂಕ್ ಪಳಂವ್ಕ್ ಬರಿಂ ಲಾಗ್ತಾತ್. ನೀಜ್ ಜಿಣ್ಯೆಂತ್ ತಿಂ ಫಟಿ ರುಜು ಜಾತಾತ್. ತುಂ ನಿಜಾಯ್ಕಿ ಫಟ್ಕಿರೊ.... ತುಜ್ಯಾ ಹ್ಯಾ ಅಚಾನಕ್ ಜಾಲ್ಲ್ಯಾ ಬದ್ಲಾವಣೆಂತ್ ಆನಿ ವರ್ತಾನಾಂತ್ ಮ್ಹಾಕಾ ತುಜೆರ್ ದುಬಾವ್ ಜಾಂವ್ಕ್ ಸುರು ಜಾಲಾಕೀ, ತುಕಾ ಏಕ್ ಸೊಬಿತ್ ಚಲಿ ಬೆಟ್ಲ್ಯಾ, ಆನಿ ತುಂ ಮ್ಹಾಕಾ ಮೊಗಾನ್ ಪುಸ್ಲಾವ್ನ್ ಪಯ್ಸ್ ಕರುನ್, ತಿಕಾ ಆಪ್ಣಾಂವ್ಕ್ ಚಿಂತಾಯ್. ವ್ಹಾ ಬಾರೀ ಹುಶ್ಯಾರ್ ಆಸಾಯ್ ತುಂ.....
“ತುಂವೆಂ ಕಿತೆಂ ಮ್ಹಾಕಾ ತಿತ್ಲೆಂಯ್ ಬುದ್ದು ಮ್ಹಣ್ ಲೆಕ್ಲೆಂಯ್....? ತುಂ ಸೊಭಿತ್ ಆಸಾಯ್ ಆನಿ ಹಾಂವ್ ಕುರುಪಿ...., ಗಲೀಜ್ ತೊಂಡಾಚಿಂ. ಹೆಂ ಗಲೀಜ್ ತೋಂಡ್ ತುಜ್ಯೆ ಜಿಣ್ಯೆಚೆರ್ ಏಕ್ ಕುರುಪಿ ಕಳಂಕ್ ಕಶೆಂ ತುಕಾ ಭಗೊಂಕ್ ಲಾಗ್ಲಾಂ ಆಸ್ತೆಲೆಂ. ತುಕಾ ಮ್ಹಜೆ ಲಾಗ್ಗಿಂ ಕಾಜಾರ್ ಜಾವ್ನ್ ಭಂವೊಂಕ್ ಲಜ್ ದಿಸ್ತೆಲಿ ಮ್ಹಳ್ಳೆಂ ಭಗ್ತಾ ಆಸ್ತೆಲೆಂ. ದೆಕುನ್ ತುಂವೆಂ ಕಾಜಾರಾ ಆದಿಂಚ್ ಮ್ಹಾಕಾ ಪಯ್ಸ್ ಕರ್ಚೊ ಹೊ ನಾಟಕ್ ರಚ್ಲಾಯ್. ಹಾಂವೆಂ ಹೆ ಸಗ್ಳೆ ವಿಶೆಯ್ ತುಕಾ ಪಯ್ಲೆಂಚ್ ಸಾಂಗ್ಲ್ಲೆ, ಆನಿ ಹಾಂವ್ ತುಜೊ ಮೋಗ್ ಸ್ವೀಕಾರ್ ಕರುಂಕ್ ನರ್ಗಾತಾಲಿಂ. ಪುಣ್ ತುಂವೆಂಚ್ ಮ್ಹಾಕಾ ಧೈರ್ ಆನಿ ಆಶಾ ದಾಖವ್ನ್ ತುಂ ತಸೊ ನ್ಹಯ್ ಮ್ಹಣ್ ಮ್ಹಾಕಾ ಸಮ್ಜಾವ್ನ್ ಆಪ್ಣಾಂವ್ಕ್ ರಾಜಿ ಕೆಲ್ಲೆಂಯ್. ತುಕಾ ತಶೆಂ ಕರ್ಚಿ ಕಿತೆಂ ಗರ್ಜ್ ಆಸ್ಲ್ಲಿ ರಾಯ್ನಲ್....? ಹಾಂವ್ ಆತಾಂ ತುಜೊ ಇತ್ಲೊ ಮೋಗ್ ಕರುಂಕ್ ಲಾಗ್ಲ್ಯಾಂ ಆಸ್ತಾಂ ತುಕಾ ಕಶೆಂ ವಿಸ್ರುಂ ರಾಯ್ನಲ್.....? ಕಿತ್ಯಾಕ್ ಮ್ಹಾಕಾ ಆಶಾ ದಾಖವ್ನ್ ಆತಾಂ ಮ್ಹಜೆ ಸಂಗಿಂ ಖೆಳ್ತಾಯ್ ರಾಯ್ನಲ್?" ಸಾಂಗ್ತಾಂ ಸಾಂಗ್ತಾಂ ಡಾರ್ಲಿನ್ ರಡ್ಲೆಂಚ್.
ಹಾಂಗಾಸರ್ ರಾಯ್ನಲ್ ಜಾಗ್ರುತ್ ಜಾಲೊ.
‘ವ್ಹಯ್ ಸಾಂಗ್ಲ್ಲೆಪರಿಂ ಹಾಕಾ ಮೊಗಾನ್ ಸಾಂಗೊನ್ ಪಯ್ಸ್ ಕರುಂಕ್ ಸಾಧ್ಯ್ನಾ. ಮ್ಹಜಿ ಪಿಡಾ ಸಾಂಗ್ಲ್ಯಾರೀ ತೆಂ ಮ್ಹಕಾ ಸಾಂಡುಂಕ್ ತಾಯಾರ್ ಜಾಂವ್ಚೆಂ ನಾ. ಕಿತ್ಯಾಕ್ ತಿತ್ಲೊಯೀ ತೆಂ ಮ್ಹಜೊ ಮೋಗ್ ಕರ್ತಾ. ಹಾಕಾ ನಕ್ಲಿ ರಾಗಾನ್ಂಚ್ ದುಖವ್ನ್ ಪಯ್ಸ್ ಸುಲಬಾಯೆನ್ ಕರ್ಯೆತ್’ಅಶೆಂ ಚಿಂತುನ್, ರಾಯ್ನಲ್ ಆಪ್ಲ್ಯಾ ತೊಂಡಾರ್ ನಕ್ಲಿ ಹಾಸೊ ಹಾಡುನ್ ಮ್ಹಣಾಲೊ;
“ತುಂವೆಂ ಲಾಯಿಲ್ಲೊ ಅಂದಜ್ ಖರೊ ಡಾರ್ಲಿನ್. ಮ್ಹಜೆ ತಸಲ್ಯಾ ಸೊಬಿತ್ ಚಲ್ಯಾಕ್, ಸೊಬಿತ್ ಚಲ್ಯೆಂಚೊ ಬರ್ಗಾಲ್ನಾ. ದೆಕುನ್ ತುಜ್ಯೆ ತಸಲ್ಯೆ ಕುರುಪಿ ಚಲ್ಯೆಕ್ ಮ್ಹಜಿ ಪತಿಣ್ ಕರುನ್ ಉಪ್ರಾಂತ್ ಚುರ್ಚುರ್ಚ್ಯೆ ಪ್ರಾಸ್, ಹಾಂವೆಂ ಹೊ ನಾಟಕ್ ಖೆಳ್ಲ್ಲೊ. ತಶೆಂ ಹಾಂವ್ ಎಕ್ಯೆ ಸೊಬಿತ್ ಚಲ್ಯೆಚಾ ಸೊಧ್ನೆರ್ ಆಸ್ಲ್ಲೊಂ, ಆನಿ ತಿ ಆತಾಂ ಮ್ಹಾಕಾ ಮೆಳ್ಯಾ. ತ್ಯಾ ದೀಸ್ಯಿ ತಿ ಚಲಿ ಮ್ಹಜಾ ಬೆಡ್ಡ್ ರುಮಾಂತ್ ಆಸ್ಲ್ಲಿ, ದೆಕುನ್ ತುಂವೆಂ ಹಾಂಗಾ ಪಾಂವ್ಚ್ಯೆ ಆದಿಂ ತುಕಾ ಹಾಂವೆಂ ಪಾಟಿಂ ಪರ್ತುಂಕ್ ಸಾಂಗ್ಲ್ಲೆಂ......"
“ರಾಯ್ನಲ್......" ಡಾರ್ಲಿನ್ ಫುಗಾರ್ ಜಾಲ್ಲ್ಯಾ ತಾಳ್ಯಾನ್, ಕಾಳ್ಜಾಚಾ ದುಖಿನ್ ಪಿಂರ್ಗಾಲೆಂ, ರಾಯ್ನಲಾಚಿಂ ಸೊಸುಂಕ್ ಜಾಯ್ನಾತ್ಲ್ಲಿಂ ಉತ್ರಾಂ ಆಯ್ಕೊನ್. ಪುಣ್ ತಾಚೊ ತಾಳೊ ಕ್ಷೀಣ್ ಆಸ್ಲ್ಲೊ.
“ಕಶೆಂ ಆಯ್ಲಾಂಯ್ ತಶೆಂಚ್ ಪಾಟಿಂ ವಚ್ ಡಾರ್ಲಿನ್. ತಿ ಚಲಿ ಕೆದ್ನಾಂಯ್ ಹಾಂಗಾ ಪಾವೊಂಕ್ ಸಾಧ್ಯ್ ಆಸಾ, ಆನಿ ತುಕಾ ಹಾಂಗಾಸರ್ ಪಳವ್ನ್ ತಾಣೆ ಮ್ಹಾಕಾ ಚೂಕ್ ಸಮ್ಜೊಂಚೆ ನಾಕಾ....."
“ತುಕಾ ಚೂಕ್ ಚಮ್ಜೊಂಚೆ ನಾಕಾ.....?" ಡಾರ್ಲಿನ್ ಸೊಸುಂಕ್ ಸಕಾನಾಸ್ತಾಂ ಸಾಂಗಾಲಾಗ್ಲೆಂ. ತ್ಯಾ ದುಖೆಸ್ತ್ ತೊಂಡಾರ್, ದುಃಖಾಂ ಮಧೆಂಯೀ ಹಾಸೊ ಹಾಡುನ್ ತೆಂ ಮ್ಹಣಾಲೆಂ, “ತುಂ ಇತ್ಲೆವೆಗ್ಗಿಂ ಇತ್ಲೊ ಬದಲ್ಶಿ ಮ್ಹಣ್ ಹಾಂವೆಂ ಚಿಂತುಂಕ್ ನಾ ರಾಯ್ನಲ್......"
“ವೆಳಾ ಕಾಳಾ ತೆಕಿದ್ ಮನಿಸ್ ಬದಲ್ತಾ ಡಾರ್ಲಿನ್. ಹೆಂ ಸಂಸಾರಾಚೆಂ ನಿಯಾಮ್. ಮ್ಹಜಾ ಜಾಗ್ಯಾರ್ ತುಂ ಆಸ್ಲ್ಲೆಂಯ್ ತರೀ ತುಂಯಿ ತೆಂಚ್ ಕರ್ತೆಂಯ್ ಜೆಂ ಆಜ್ ಹಾಂವೆಂ ಕೆಲಾಂ...." ಮತ್ಲಾಬಾನ್ ಉಲೈಲೊ ರಾಯ್ನಲ್.
“ತುಜೆ ತಸಲೆ ಗುಣಾಂಚೆ ಚಲೆ ಆನಿ ಚಲಿಯೊ ಮಾತ್ರ್, ವೆಳಾ ಕಾಳಾ ತೆಕಿದ್ ಬದಾಲ್ತಿತ್...., ತುಜೆ ತಸಲೆಂ ರೂಪ್ ಆಪ್ಣಾಯ್ತಿತ್ ಆಪ್ಲ್ಯಾ ಫಾಯ್ದ್ಯಾ ಖಾತಿರ್ ರಾಯ್ನಲ್; ಪುಣ್ ಮ್ಹಜೆ ತಸಲ್ಯೊ ಚಲ್ಯೊ ಖಂಡಿತ್ ತುಜೆಪರಿಂ ಘಾತ್ ಕರುನ್ ಅಸಲೆಂ ರೂಪ್ ಆಪ್ಣಾಂವ್ಚಿಂ ನಾಂತ್....." ರಾಯ್ನಲಾಚಾ ಉತ್ರಾಂಚೊ ಅರ್ಥ್ ಸಮ್ಜಾನಾಸ್ತಾಂ, ಡಾರ್ಲಿನ್ ಮ್ಹಣಾಲೆಂ.
“..........." ರಾಯ್ನಲ್ ಜಾಪ್ ದಿಂವ್ಚ್ಯಾ ಸ್ಥಿತೆರ್ ನಾತ್ಲ್ಲೊ. ಜಿ ದೂಖ್ ತೊ ಆಪ್ಲ್ಯಾ ಕಾಳ್ಜಾಂತ್ ವಾವವ್ನ್ ಆಸ್ಲ್ಲೊ ಹಾಚೊ ಅಂದಜ್ ಡಾರ್ಲಿನಾಕ್ ನಾತ್ಲ್ಲೊ.
“ಜಾಯ್ತ್ ರಾಯ್ನಲ್...., ತುಜ್ಯಾ ಸುಃಖಾ ಖಾತಿರ್, ತುಜ್ಯಾ ಸ್ವಾರ್ಥಾ ಖಾತಿರ್, ಹಾಂವ್ ತುಕಾ ದೊಸಿನಾಸ್ತಾಂ, ತುಜ್ಯಾ ಜಿಣ್ಯೆಂತ್ಲಿಂ ಪಯ್ಸ್ ವೆತಾಂ. ಪುಣ್ ತ್ಯಾ ಪಯ್ಲೆಂ ತುಂವೆಂ ಏಕ್ ದಯಾ ಮ್ಹಜೆ ಥಂಯ್ ಕರಿಜಾಯ್....." ಡಾರ್ಲಿನ್ ಗೂಂಡ್ ಚಿಂತುನ್ ಮ್ಹಣಾಲೆಂ.
“ಮ್ಹಜಾ ಜಿಣ್ಯೆಂತ್ಲೆಂ ಪಯ್ಸ್ ವಚುಂಕ್, ತುಂವೆಂ ವಿಚಾರ್ಲ್ಲೆಂ ಕಿತೆಂಯ್ ಹಾಂವ್ ದೀಂವ್ಕ್ ತಯಾರ್, ತುಜೆ ಖಾತಿರ್ ಕಿತೆಂಯ್ ಕರುಂಕ್ ಹಾಂವ್ ತಯಾರ್....." ರಾಯ್ನಲ್ ಮ್ಹಣಾಲೊ.
“ತುಜೆರ್ ಮ್ಹಾಕಾ ಆತಾಂ ಪಾತ್ಯೆಣಿ ನಾ ಜಾಲ್ಯಾ...., ದೆಕುನ್ ಭಾಸ್ ದೀ ರಾಯ್ನಲ್......"
“ಹಿ ಮ್ಹಜಿ ಭಾಸ್ಚ್ ಮ್ಹಣ್ ಚಿಂತ್ ಡಾರ್ಲಿನ್....." ಪಾಟಿಂ ಮುಖಾರ್ ಚಿಂತಿನಾಸ್ತಾಂ, ರಾಯ್ನಲ್ ಮ್ಹಣಾಲೊ.
“ಮ್ಹಜೆ ಕಡೆನ್ ಎಕೆಚ್ ರಾತಿ ಖಾತಿರ್ ಕಾಜಾರ್ ಜಾ......."
“ಡಾರ್ಲಿನ್....!?"
“ಆತ್ತಾಂ ಭಾಸ್ ದಿಲ್ಯಾಯ್ ಮೊಗಾ ತುಂವೆಂ....., ಎಕಾ ಸೆಕುಂದಾನ್ ವಿಸ್ರಾಲೊಯ್.....?"
“ಪುಣ್ ಡಾರ್ಲಿನ್....."
“ವ್ಹಯ್ ರಾಯ್ನಲ್, ತುಂವೆಂ ಮ್ಹಜೆರ್ ಹಿ ದಯಾ ಖಂಡಿತ್ ಜಾವ್ನ್ ಕರಿಜಾಯ್. ತ್ಯಾ ಉಪ್ರಾಂತ್ ಹಾಂವ್ ತುಕಾ ಜೀಣ್ ಬರ್ ದೊಸ್ಚಿಂನಾ. ಹ್ಯಾ ಗಲೀಜ್ ತೊಂಡಾಚೆ ಚಲಿಯೆಸಂಗಿಂ ತುಂ ಫಕತ್ತ್ ಎಕೆಚ್ ರಾತಿ ಖಾತಿರ್ ಕಾಜಾರ್ ಜಾ. ಉಪ್ರಾಂತ್ ಹಾಂವ್ ತುಜೆ ಜಿಣ್ಯೆಂತ್ಲಿಂ ಸಸ್ಣಾಕ್ ಪಯ್ಸ್ ವೆತೆಲಿಂ....." ದುಃಖಾಂ ಭರ್ಲ್ಯಾ ದೊಳ್ಯಾಂನಿ ಡಾರ್ಲಿನ್ ರಾಯ್ನಲಾಕ್ ಪಳವ್ನ್ ಮ್ಹಣಾಲೆಂ.
ಕಿತೆಂ ಕರ್ಚೆಂ ತೆಂ ರಾಯ್ನಲಾಕ್ ಸಮ್ಜಾಲೆಂನಾ. ತೊ ದೆದೆಸ್ಪರ್ ಜಾಲೊ. ಜಾಪ್ ದಿಂವ್ಚೆ ಸ್ಥಿಥೆರ್ ತೊ ನಾತ್ಲ್ಲೊ.
“ಆತ್ತಾಂ ತುಂವೆಂ ಭಾಸ್ ದಿಲ್ಲಿಯ್ ಮಾ.... ಉಪ್ಕಾರ್ ಕರುನ್, ಎಕೆಚ್ ರಾತಿ ಖಾತಿರ್ ತುಂ ಮ್ಹಜೊ ಜಾ. ಬಾಕಿಚ್ಯೊ ಸರ್ವ್ ರಾತಿ ತುಂ ಹೆರಾಂಕ್ ವಾಂಟುನ್ ಜಿಯೆ. ಹಾಂವೆಂ ತುಜೊ ಮೋಗ್ ಖರೊಚ್ ಕೆಲಾಮಾ. ತ್ಯಾ ಖಾತಿರ್ ತರೀ, ತುಕಾ ಎಕೆ ರಾತಿಕ್ ಆಪ್ಣಾವ್ನ್ ಹಾಂವ್ ಮ್ಹಜಾ ಮತಿಕ್ ಆನಿ ಕಾಳ್ಜಾಕ್ ಸಮಾಧಾನ್ ಕರ್ತಾಂ...." ಆತಾಂ ತೆಂ ರಡ್ಲೆಂಚ್.
“ಜಾಯ್ತ್ ಮೊಗಾ...., ರಡಾನಾಕಾ, ಹಾಂವ್ ತುಜೆಲಾಗ್ಗಿಂ ಕಾಜಾರ್ ಜಾತಲೊಂ......" ಕಿತೆಂಗಿ ಚಿಂತುನ್ ರಾಯ್ನಲ್ ಮ್ಹಣಾಲೊ.
***********
ತೊ ದೀಸ್ ಮಂಗ್ಳಾರ್ ಎಪ್ರಿಲಾಚಿ 7 ತಾರಿಕ್ 1881 ಇಸ್ವಿ. ಡಾರ್ಲಿನಾಚೆ ಘರ್ಚಾಂಚೆ ಹಾಜ್ರೆಂತ್ ಫಿಲೆಡೆಲ್ಫಿಯಾಂತ್ಲ್ಯೆ ಕೊಡ್ತಿಂತ್ ಡಾರ್ಲಿನಾಚೆಂ ಕಾಜಾರ್ ರಾಯ್ನಲಾಸಂಗಿಂ ಜಾಲೆಂ! ತೆಂ ಮಸ್ತು ಖುಶ್ ಆಸ್ಲ್ಲೆಂ.
ಧನ್ಪಾರಾಚೆಂ ಜೆವಾಣ್ ಕಾಜಾರಾಚೆ ಬಾಬ್ತಿಂ ಎಕಾ ಹೊಟೆಲಾಂತ್ ಸರ್ವಾಂನಿ ಗಮ್ಮಾತಾಯೆನ್ ಕೆಲೆಂ. ಡಾರ್ಲಿನಾಚಾ ಘರ್ಚಿಂ ಹೊಕಾಲ್ ನೊವ್ರ್ಯಾಕ್ ಬರೆಂ ಮಾಗೊನ್ ಆಪ್ಲೆ ಘರ್ಚೆ ವಾಟೆಕ್ ಲಾಗ್ಲಿಂ.
ಹೊಕಾಲ್ ನೊವ್ರೊ ಎಕಾಮೆಕಾಕ್ ಪಳೈಲಾಗ್ಲಿಂ. ದೊಗಾಂಯ್ಚ್ಯಾ ತೊಂಡಾರ್ ಹಾಸೊ ಆಸ್ಲ್ಲ್ಯೊ. ಪುಣ್ ತ್ಯಾ ಹಾಸ್ಯಾ ಪಾಟ್ಲ್ಯಾ ದುಃಖಾಕ್ ತಿಂ ಮಾತ್ರ್ ಕಾಳ್ಜಾ ಪಾಟ್ಲ್ಯಾನ್ ಅನುಭವಿಸುನ್ ಆಸ್ಲ್ಲಿಂ.
ಡಾರ್ಲಿನಾಚ್ಯೆ ಖುಶೆ ಖಾತಿರ್ ರಾಯ್ನಲ್ ಹೆಂ ಕಾಜಾರ್ ಜಾಲ್ಲೊ, ತರೀ ತೊ ತಾಚೆಂ ಮರಣ್ ಸದಾಂಯ್ ಆಪ್ಲ್ಯಾ ದೊಳ್ಯಾಂ ಮುಖಾರ್ ಪಳೈತಾಲೊ. ತಾಕಾ ಘಡ್ಯೆ ಘಡ್ಯೆ ಯೆಂವ್ಚ್ಯೆ ತ್ಯೆ ಭಿರಾಂಕುಳ್ ದುಕಿಚೆರ್ ಬೋವ್ ಕಷ್ಟಾಂನಿ ತೊ ಜೈತ್ ವರ್ತಾಲೊ, ದಾಕ್ತೆರಾನ್ ಬರವ್ನ್ ದಿಲ್ಲ್ಯಾ ತ್ಯಾ ವಕ್ತಾಂಚಾ ಮಜತಿನ್. ದಾಕ್ತೆರಾನ್ ಸಾಂಗ್ಲ್ಯಾ ಪ್ರಕಾರ್ ತಾಚಿ ಆವ್ದಿ ಮುಗ್ದೊನ್ ಆಯಿಲ್ಲಿ.
ತೊ ಕಾಜಾರಾಚೊ ದೀಸ್ ದೊಗಾಂಯ್ನಿ ಘರಾ ಭಾಯ್ರ್ಚ್ ಖರ್ಚಿಲೊ. ಸಾಂಜೆಚೆಂ ಜೆವಾಣ್ಯೀ ಬಾಯ್ರ್ಚ್ ಕರುನ್, ವೇಳ್ ಕರುನ್ ತಿಂ ‘Grace & Peace’ ಬೊಂಗ್ಲ್ಯಾಚ್ಯೆ ವಾಟೆರ್ ಆಸ್ಲ್ಲಿಂ.
ದೊಗಾಂಯ್ ವಾಟೆರ್ ಉಲಂವ್ಕ್ ಸಕ್ಲಿನಾಂತ್. ರಾಯ್ನಲ್ ಮಾತ್ರ್ ದೊಗಾಂಚ್ಯಾ ಬೆಜಾರಾಯೆಚೆಂ ಕಾರಣ್ ಜಾಣಾಸ್ಲ್ಲೊ ಆನಿ ಬಿರ್ಮೊತ್ ಡಾರ್ಲಿನ್ ಆಪ್ಲಿ ಎಕ್ಲ್ಯಾಚಿ ಮಾತ್ರ್ ಬೆಜಾರಾಯ್.
ಘರಾ ಪಾವ್ಲ್ಲಿಂ ತಿಂ ಗಳಾಯೆಕ್ ಆವ್ಕಾಸ್ ದೀನಾಸ್ತಾಂ ನ್ಹಾಣ್ ಘೆವ್ನ್ ರಾತಿಂ ನೆಸ್ಚಿ ಮುಸ್ತಾಯ್ಕಿ ನೆಸೊನ್ ಬೆಡ್ಡ್ ರುಮಾಕ್ ಪಾವ್ಲಿಂ.
ಕುಡಾಂತ್ಲೊ ಉಜ್ವಾಡ್ ಮಂದ್ ಕರುನ್, ರಾಯ್ನಲ್ ಖಟ್ಲ್ಯಾರ್ ಪಾಂಯ್ ಸೊಡುನ್ ವೊಣ್ಕೊನ್ ಬಸ್ಲೊ. ಡಾರ್ಲಿನ್ ರಾಯ್ನಲಾಚಾ ಹರ್ದ್ಯಾರ್ ಆಪ್ಲಿ ತಕ್ಲಿ ದವರುನ್ ಆಪ್ಲ್ಯಾ ಭಗ್ಣಾಂನಿ ತಲ್ಲೀನ್ ಜಾಲೆಂ.
ಸವ್ಕಾಸ್ ರಾಯ್ನಲಾನ್, ಡಾರ್ಲಿನಾಚೆಂ ಮಾತೆಂ ಪೊಶೆಂವ್ಕ್ ಸುರು ಕೆಲೆಂ. ಡಾರ್ಲಿನ್ ಉಸ್ಕೆಲೆಂ.
ರಾಯ್ನಲ್ ಮಾತೆಂ ಪೊಶೆವ್ನ್ಂಚ್ ಗೆಲೊ.
“ಹಿ ಮ್ಹಜಿ ಆಖ್ರೇಚಿ ರಾತ್ ಮೊಗಾ....." ಡಾರ್ಲಿನಾನ್ ಆಪ್ಲಿಂ ಭಗ್ಣಾಂ ಉಚಾರುಂಕ್ ಸುರು ಕೆಲೆಂ. “ತುಜೆಸಂಗಿಂ ಜೀವನ್ ಸಾರುಂಕ್ ಹಾಂವ್ ಆಶೆಲ್ಲಿಂ ಮೊಗಾ, ಸ್ವಪ್ಣಾಂ ಬಾಂಧ್ಲ್ಲಿಂ....., ತುಜೊ ಮೋಗ್ ಕರುನ್, ತುಕಾ ಸದಾಂಚ್ ಸುಖಿ ದವರುಂಕ್ ಚಡ್ಪಡೊನ್ ಆಸ್ಲ್ಲಿಂ. ಪುಣ್ ಮನಿಸ್ ಚಿಂತಾ ಏಕ್ ಆನಿ ಜಾತಾ ಏಕ್. ಜಶೆಂ ಮ್ಹಜ್ಯಾ ನಶಿಬಾಂತ್ ಆಸ್ಲ್ಲೆಂ ಜಾಲೆಂ. ಪುಣ್ ಮ್ಹಾಕಾ ಸಂತೊಸ್, ಮೊರ್ಚ್ಯೆ ಆದಿಂ ತುಜೆಸಂಗಿಂ ಏಕ್ ರಾತ್ ಪಾಶಾರ್ ಕರುಂಕ್ ಆವ್ಕಾಸ್ ಮೆಳ್ಳೊ ದೆಕುನ್. ಹಿ ರಾತ್ ತುಂವೆಂ ಮ್ಹಜೆರ್ ದಯಾ ಕೆಲ್ಲ್ಯಾಕ್ ಹಾಂವ್ ತುಕಾ ಋಣಿ ಜಾವ್ನಾಸಾಂ....., ಮೆಲ್ಯಾ ಉಪ್ರಾಂತ್ಯೀ ಋಣಿ ಆಸ್ತೆಲಿಂ...."
“ಕಿತ್ಯಾಕ್ ರಾಯ್ನಲ್ ತುಂವೆಂ ತಶೆಂ ಕೆಲೆಂಯ್.....? ಕಿತ್ಯಾಕ್ ತುಂವೆಂ ಮ್ಹಾಕಾ ಸಾಂಡುನ್, ಹೆರಾಂಕ್ ಬುಲೊನ್ ಬದ್ಲಾಲೊಯ್....?"
ಸಂಸಾರಾಂತ್ ಸೊಬಾಯಿಚ್ ಸರ್ವಸ್ವ್ಗೀ? ಸೊಬಾಯ್ ನಾತ್ಲ್ಲ್ಯಾಂಕ್ ಮೋಗ್ ಕರ್ಚೆಂ ವ ಮೋಗ್ ಘೆಂವ್ಚೆ ಹಕ್ಕ್ ನಾಂಗೀ....? ತಾಂಚೆ ಲಾಗ್ಗಿಂ ಮೋಗ್ ಕರ್ಚೆಂ ಕಾಳಿಜ್ ಆಸಾನಾಂಗೀ....? ತಾಂಕಾಂ ಸಂಸಾರ್ ಕಿತ್ಯಾಕ್ ಕೆಂಡ್ತಾ.....? ತಾಂಕಾಂಯ್ ರಚ್ಲ್ಲೆಂ ತ್ಯಾ ದೆವಾನ್ಂಚ್ ಮ್ಹಣ್ ಮನಿಸ್ ಕಿತ್ಯಾಕ್ ಚಿಂತಿನಾ....?
“ತುಂ ಇತ್ಲ್ಯಾ ವಿಶಾಲ್ ಮನೋಭಾವಾಚೊ, ಖರೊ ಮೋಗ್ ಕಿತೆಂ ಮ್ಹಣ್ ಜಾಣಾಸ್ಲ್ಲೊ, ಮ್ಹಜೊ ಇತ್ಲೊ ಮೋಗ್ ಕೆಲ್ಲೊ ತುಂ......, ತುಂ ಕಿತ್ಯಾಕ್ ಬದಾಲ್ಲೊಯ್ ಮೊಗಾ.....?"
ರಾಯ್ನಲಾಚೊ ಹಾತ್ ಡಾರ್ಲಿನಾಚೆಂ ಮಾತೆಂ ಪೊಶೆವ್ನ್ ಆಸ್ಲ್ಲೊ ಥಾಂಬ್ಲೊ.....!
“ತುಕಾ ಮ್ಹಜೆರ್ ರಾಗ್ ಆಯ್ಲೊಗೀ ಮೊಗಾ....? ಹಿ ರಾತ್ ತುಂವೆಂ ಮ್ಹಾಕಾ ಫಾವೊ ಕೆಲ್ಲಿಯಿ...., ತುಕಾ ಹಾಂವೆಂ ದುರ್ಸಾಲ್ಲೆಂ ತುಕಾ ದುಖ್ಲೆಂಗೀ ಮೊಗಾ.....? ಪುಣ್ ಹ್ಯಾ ದುರ್ಸೊಣ್ಯಾಂತ್ಯೀ ಮೋಗ್ ಮಾತ್ರ್, ಶಿವಾಯ್ ರಾಗ್ ನಾ ಮೊಗಾ. ತುಕಾ ಹಾಂವ್ ವಿಸ್ರುನ್ ಕಶೆಂಯ್ ಜಿಯೆಂವ್ಕ್ ಸಕ್ಚಿಂ ನಾ, ದೆಕುನ್ ಹಾಂವೆಂ ಮ್ಹಜಿ ಬಂದಾಬಸ್ತ್ ಕೆಲ್ಯಾ ಮೊಗಾ......"
ಆಪ್ಣೆಂ ಇತ್ಲೆಂ ಉಲೈಲ್ಯಾ ಉಪ್ರಾಂತ್ಯೀ ರಾಯ್ನಲಾನ್ ಕಸಲಿಚ್ ಜಾಪ್ ದೀನಾತ್ಲ್ಲಿ ಪಳವ್ನ್, ಡಾರ್ಲಿನಾನ್ ರಾಯ್ನಲಾಚಾ ಹರ್ದ್ಯಾರ್ ದವರ್ಲ್ಲಿ ತಕ್ಲಿ ಉಭಾರ್ನ್, ರಾಯ್ನಲಾಚಾ ತೊಂಡಾಕ್ ಪಳಯ್ಲೆಂ.....
ರಾಯ್ನಲ್ ತಾಕಾಚ್ ಪಳವ್ನ್ ಆಸ್ಲ್ಲೊ ಪುಣ್ ಉಲೈನಾತ್ಲ್ಲೊ ಪಳವ್ನ್-“ರಾಯ್ನಲ್.... ರಾಯ್ನಲ್....." ಡಾಲಿನ್ ಉಟೊನ್ ಬಸ್ಲೆಂ.
ರಾಯ್ನಲಾಚೆ ದೊಳೆ ಮಾತ್ರ್ ಉಗ್ತೆ ಆಸ್ಲ್ಲೆ ಪುಣ್ ತಾಚೊ ಪ್ರಾಣ್ ಉಭೊನ್ ಗೆಲ್ಲೊ!
“ರಾಯ್ನಲ್..... ರಾಯ್ನಲ್...." ಡಾರ್ಲಿನ್ ವ್ಹಡ್ಲ್ಯಾನ್ ಬೊಬಾಟ್ಲೆಂ.
ವ್ಹಯ್ ಘರಾ ಪಾವ್ತಾನಾಂಚ್ ರಾಯ್ನಲಾಕ್ ದೂಕ್ ಚಡ್ಲ್ಲಿ. ತಾಕಾ ಭಗ್ಲ್ಲೆಂ ಆಪ್ಣಾಚಿ ನಿಮಾಣಿ ಘಡಿ ಲಾಗ್ಗಿಂ ಪಾವ್ಲ್ಯಾ ಮ್ಹಣ್. ತರೀ, ತಾಣೆ ಡಾರ್ಲಿನಾಕ್ ನಿಮಾಣೊ ಮೋಗ್ ಕರುಂಕ್ ಆಶೆವ್ನ್, ಆಪ್ಲ್ಯಾ ಹರ್ದ್ಯಾರ್ ತೆಂ ನಿದೊನ್ ಆಪ್ಣಾಕ್ ಆಪ್ಲಿಂ ಭಗ್ಣಾಂ ಸಾಂಗ್ತಾನಾ, ದುಕಿಚೆರ್ ನಿಯಂತ್ರಣ್ ದವರುನ್, ತಾಚೆಂ ಮಾತೆಂ ಪೊಶೆವ್ನ್ ತೊ ಆಸ್ಲ್ಲೊ.
ಜೆದ್ನಾ ತಾಕಾ ಆನ್ಯೆಕ್ ಭಿರಾಂಕುಳ್ ದೂಕ್ ಆಯಿಲ್ಲಿ, ತೆದ್ನಾಂ ತಾಚೊ ಪೊಶೆಂವ್ಚೊ ಹಾತ್ ಥಾಂಬ್ಲ್ಲೊ, ತ್ಯಾಚ್ ಸಂಗಿಂ ತಾಚೊ ಪ್ರಾಣ್ ಉಬ್ಲ್ಲೊ!!
ಡಾರ್ಲಿನ್ ಬೊಬೊ ಮಾರುನ್ ಉಟ್ಲೆಂ.....!
ಮುಖ್ಲ್ಯಾಚ್ ಮೆಜಾರ್ ಏಕ್ ಲೊಕಾಟೊ ಆಸ್ಚೊ ತಾಚಾ ದಿಷ್ಟಿಕ್ ಪಡ್ಲೊ ಆನಿ ತೊ ವಿಂಚುನ್ ತಾಣೆ ಫಡ್ಲೊ.
ಭಿತರ್ ರಾಯ್ನಲಾಚಾ ಆಸ್ತಿಚೊ ವೀಲ್ ಆಸ್ಲ್ಲೊ, ಜೊ ರಾಯ್ನಲಾನ್ ಡಾರ್ಲಿನಾಚಾ ನಾಂವಾರ್ ಕರುನ್ ದವರ್ಲ್ಲೊ.
“ತುಕಾ ಕಿತೆಂ ಜಾಲೆಂ ಮಾ......? ತುಕಾ ಕಳಿತ್ ಆಸ್ಲ್ಲೆಂಗೀ ತುಂ ಮೊರ್ತಾಯ್ ಮ್ಹಣ್.....? ಆನಿ ತ್ಯಾಚ್ ಲಾಗೊನ್ ತುಂವೆಂ ಮ್ಹಾಕಾ ಪಯ್ಸ್ ದವರ್ಲ್ಲೆಂಯ್....? ಮ್ಹಜೆ ಕಡೆನ್ ಕಾಜಾರ್ ಜಾಂವ್ಕ್ ಸಕಾನಾ ಮ್ಹಳ್ಳೆಂಯ್...? ಆಪ್ಣಾಕ್ ತುಂವೆಂ ಬೆಷ್ಟೆಂಚ್ ಮ್ಹಜ್ಯಾ ನದ್ರೆಂತ್ ಪಡಯಿಲ್ಲೆಂಯಿ ತುಕಾ ಆನ್ಯೆಕಾ ಸೊಬಿತ್ ಚಲಿಯೆಚೊ ಮೋಗ್ ಜಾಲಾ ಮ್ಹಣ್....? ತುಂ ಕಿತೆಂ ಚಿಂತಾಯ್ ತುಜೆ ಕಡೆನ್ ಎಕ್ವಟ್ಚಿ ಏಕ್ ರಾತ್ ಹಾಂವೆಂ ಮಾಗ್ಲ್ಲಿ, ಕುಡಿಚಾ ಸುಖಾ ಖಾತಿರ್ ಮ್ಹಣ್....? ನ್ಹಯ್ ಮಾ, ತುಕಾ ಹೆರಾಂಚೊ ಜಾಂವ್ಚೆ ಆದಿಂ, ತುಜ್ಯಾ ಗೊಪಾಂತ್ ತುಜಿಂ ಹಕ್ಕಾನ್ ಜಾಂವ್ಕ್ ರಾವೊನ್, ಸಾಸ್ಣಾಕ್ ಆದೇವ್ಸ್ ಕರುಂಕ್....."
“ತುಂ ಜಾಣಾಂಯ್, ಹಾಂಗಾ ಆಯ್ಲ್ಯಾ ಉಪ್ರಾಂತ್ ನಾಂವ್ಚ್ಯಾ ವೆಳಿಂ ಹಾಂವೆಂ ವೀಕ್ ಸೇವಾನ್ ಕರುನ್ ಜಾಲಾಂ ಮ್ಹಣ್....? ಫಕತ್ತ್ ತುಜ್ಯಾ ಗೊಪಾಂತ್ ಮ್ಹಜಿ ಭಗ್ಣಾಂ ಮ್ಹಾಕಾ ಸಾಂಗೊಂಕ್ ಆಸ್ಲ್ಲಿಂ....., ತುಕಾ ದುರ್ಸೊಂಕ್ ನ್ಹಯ್, ತುಜ್ಯಾ ಗೊಪಾಂತ್ ಮ್ಹಜೊ ಪ್ರಾಣ್ ಸೊಡುಂಕ್ ಮ್ಹಜೆ ಲಾಗ್ಗಿಂ ಫಕತ್ತ್ ಏಕ್ ವೊರ್ ಮಾತ್ರ್ ಆಸ್ಲ್ಲೆಂ. ಮ್ಹಜ್ಯಾ ಮರ್ಣಾಚೆಂ ಕಾರಣ್ ಹಾಂವ್ಂಚ್ ಮ್ಹಣ್ ಹಾಂವೆಂ ಎದೊಳ್ಚ್ ಸುಸಾಯ್ಡ್ ನೋಟ್ ಬರವ್ನ್ ದವರ್ಲಾ, ಹಾಂಗಾಚ್ ಆಸಾ ಪಳೆ....." ಆಪ್ಲ್ಯಾ ಹ್ಯಾಂಡ್ ಬ್ಯಾಗಾಂತ್ಲೆಂ, ಆಪ್ಣೆ ಆತ್ಮಹತ್ತ್ಯಾ ಕರ್ಚೆಂ, ಬರವ್ನ್ ದವರ್ಲ್ಲೆಂ ಕಾಗದ್ ಕಾಡುನ್ ರಾಯ್ನಲಾಚ್ಯೆ ನಿರ್ಜೀವ್ ಕುಡಿಕ್ ದಾಖವ್ನ್ ರುದಾನ್ ಕರಿಲಾಗ್ಲೆಂ ಡಾರ್ಲಿನ್.
“ಏಕ್ಚ್ ಉತಾರ್ ಸಾಂಗ್ತೊಯ್ ತುಂ ಮಾ, ತುಜ್ಯಾ ಪಿಡೆವಿಶಿಂ.....? ಕಿತ್ಯಾಕ್ ಮ್ಹಜೆ ಥಾವ್ನ್ ಲಿಪವ್ನ್ ಮ್ಹಕಾ ಕಾಳ್ಕಾಂತ್ ದವರುನ್ ತುಕಾ ಚೂಕ್ ಸಮ್ಜೊಂಕ್ ಅವ್ಕಾಸ್ ಕರುನ್ ದಿಲೊಯ್ ತುಂವೆಂ....? ತುಕಾ ತಿ ದೂಕ್ ಯೆತಾಲಿ ಆನಿ ತುಂವೆಂ ದಾಕ್ತೆರಾಕ್ ದಾಖವ್ನ್ ಆಯ್ಲ್ಯಾ ಉಪ್ರಾಂತ್ ಚಿಲ್ಲಾರ್ ದೂಕ್ ಮ್ಹಣ್ ಸಾಂಗೊನ್ ಮ್ಹಾಕಾ ತ್ಯಾ ವಿಶಿಂ ಬೆಫಿರ್ ಕೆಲ್ಲೆಂಯ್ ಆನಿ ಹಾಂವ್ಯಿ ಪಾತ್ಯೆಲ್ಲಿಂ. ತಿ ಮಾರೆಕಾರ್ ಜೀವ್ ಘೆಂವ್ಚಿ ದೂಕ್ ಮ್ಹಣ್ ತುಂವೆಂ ಮ್ಹಾಕಾ ಏಕ್ ಉತಾರ್ ಕಿತ್ಯಾಕ್ ಸಾಂಗೊಂಕ್ನಾಂಯ್ ಮಾ.....? ತುಕಾ ಹಾಂವ್ ಕಿತ್ಲಿಂ ಆಶೆಲಿಂ, ತುಕಾ ಹಾಂವ್ ಕಿತ್ಲಿಂ ದುರ್ಸಾಲಿಂ...., ತುಂವೆಂ ಮ್ಹಾಕಾ ಎದೊ ವ್ಹಡ್ ಘಾತ್ ಕಿತ್ಯಾಕ್ ಕೆಲೊಯ್ ಮಾ....? ತುಜೆ ಶಿವಾಯ್ ಹಾಂವೆಂ ಜಿಯವ್ಯೆತ್, ಹೆಂ ಕಶೆಂ ಚಿಂತ್ಲೆಂಯ್ ತುಂವೆಂ ಮಾ....? ಮ್ಹಾಕಾ ವಳ್ಕುನ್, ಇತ್ಲೊಚ್ಗೀ ತುಂ ವಳ್ಕಾಲ್ಲೊಯ್......?" ಡಾರ್ಲಿನಾಚಾ ರಡ್ಯಾಕ್ ಆಂತ್ಯ್ ನಾತ್ಲ್ಲೆಂ.
ತ್ಯಾ ವೆಳಾ ತಾಕಾ ಭಾಸ್ ಜಾಲೆಂ, ತಾಚೆ ದೊಳೆ ಗಯ್ರೆ ಜಾವ್ನ್ ಯೆಂವ್ಚೆ..... ತೆಂ ಶೀದಾ ಖಟ್ಲ್ಯಾರ್ ಚಡ್ಲೆಂ.....ಆನಿ ರಾಯ್ನಲಾಚಿ ನಿರ್ಜೀವ್ ಕೂಡ್ ಹಾತಿಂ ತಾಣೆ ಘೆತ್ಲಿ. ತಾಣೆ ಸೆವ್ಲ್ಲೆಂ ವೀಕ್ ತಾಚಾ ರಗ್ತಾಂತ್ ಭರ್ಸುನ್ ಯೆತಾಲೆಂ. ತಾಚೆಂ ಮರಣ್ ತಾಚೆ ಮುಖಾರ್ ಉಭೆ ಆಸ್ಚೆಂ ತಾಕಾ ದಿಸ್ತಾಲೆಂ. ಮತ್ಯೀ ಸವ್ಕಾಸ್ ಮಂದ್ ಜಾವ್ನ್ ಯೆಂವ್ಚಿ ತಾಕಾ ಕಳ್ತಾಲೆಂ.
ತೆಣೆ ರಾಯ್ನಲಾನ್ ಆಪ್ಲ್ಯೆ ಭಿರಾಂಕುಳ್ ಪಿಡೆ ಧರ್ಮಾನ್ ತಾಚಾ ವಿಪ್ರೀತ್ ಮೊಗಾಚ್ಯೆ ಪ್ರೇಯಸಿಕ್ ದುಖವ್ನ್ ಪಯ್ಸ್ ಕರುಂಕ್ ಚಿಂತ್ಲ್ಲೆಂ, ಫಕತ್ತ್ ಡಾರ್ಲಿನಾಚಾ ಬರ್ಯಾ ಫುಡಾರಾಕ್ ಚಿಂತುನ್, ತೆಂ ಸವ್ಕಾಸ್ ಆಪ್ಣಾಕ್ ವಿಸ್ರುನ್ ಆಪ್ಲೊಫುಡಾರ್ ಭಾಂದುನ್ ಜಿಯೆತೆಲೆಂ ಮ್ಹಣ್. ಆನಿ ಹೆಣೆ, ಡಾರ್ಲಿನ್ ಆಪ್ಣೆಂ ಕೆಲ್ಲ್ಯಾ ಪಯಿಲ್ಲ್ಯಾ ಮೊಗಾಕ್ ಸೊಡುಂಕ್ ತಯಾರ್ ನಾಸ್ತಾಂ...., ಆಪ್ಣೆ ಫುಡೆಂ ಕೊಣಾಯ್ಚೊ ಮೋಗ್ ಕರುಂಕ್ಯೀ ಸಾಧ್ಯ್ನಾ ವ ರಾಯ್ನಲಾನ್ ದಿಲ್ಲೊ ಮೋಗ್ ಕೊಣ್ಯಿ ತಾಕಾ ದಿಂವ್ಚೊ ನಾ ಮ್ಹಣ್, ಚಿಂತುನ್, ರಾಯ್ನಲಾಕ್ ಆಪ್ಣಾಲಾಗ್ಗಿಂ ಎಕೆ ರಾತಿಕ್ ಕಾಜಾರಾಕ್ ಒಪ್ವಾಶೆಂ ಕೆಲ್ಲೆಂ.
ಆನಿ ರಾಯ್ನಲ್ ಜಾಲ್ಯಾರೀ ಕಾಜಾರ್ ಜಾಲ್ಲೊ, ಮೊರ್ಚ್ಯಾ ಆದಿಂ ತಾಣೆ ಮೋಗ್ ಕೆಲ್ಲ್ಯಾ ಡಾರ್ಲಿನಾಸಂಗಿಂ ಎಕೆ ರಾತಿಕ್ ತರೀ ಎಕ್ವಟೊನ್ ಆಪ್ಣಾಚಾ ಅತ್ಮ್ಯಾಕ್ ಸಮಾಧಾನ್ ಕರುಂಕ್. ತೊ ಕಿತೆಂ ಜಾಣಾ, ಡಾರ್ಲಿನಾನ್ ಕರುಂಕ್ ಚಿಂತ್ಲ್ಯಾ ಆತ್ಮ್ಹತ್ತ್ಯಾ ವಿಶಿಂ?
ಡಾರ್ಲಿನಾಚೆ ದೊಳೆ ವಾಟಾರ್ಲೆ! ತಾಚೊ ಸ್ವಾಸ್ ವೆಗಾನ್ ಚಲೊಂಕ್ ಸುರು ಜಾಲೊ. ತಾಣೆ ಆತ್ಮ್-ಹತ್ತ್ಯಾಚಾ ಪಾತ್ಕಾಚೆಂ ಭಗ್ಸಾಣೆ ದೆವಾಲಾಗ್ಗಿಂ ಮಾಗ್ಲೆಂ, ದುಸ್ರ್ಯಾ ಕ್ಷಣಾ ತಾಣೆ ರಾಯ್ನಲಾಚಾ ನಿರ್ಜೀವ್ ವೆಂಗೆಂತ್ ಆಪ್ಲೊ ನಿಮಾಣೊ ಸ್ವಾಸ್ ಸೊಡ್ಲೊ....!!!
ತಾಚೊ ಅತ್ಮೊ ರಾಯ್ನಲಾಚಾ ಅತ್ಮ್ಯಾಚಿ ವಾಟ್ ಧರುನ್ ಗೆಲೊ.......
ತಶೆಂ ಡಾರ್ಲಿನ್ ಆನಿ ರೈನಾಲಾಚಾ ಜಿವಿತಾಚಿ ವಿವಿದ್ ರಿತಿಚಿ ತರೀ, ಏಕ್ ಸಂಗಿಂ ಜಾಂವ್ಕ್ ಪಾವ್ಲ್ಲಿ ಆಖ್ರೇಚಿ ರಾತ್!!!
About us | Feedback | Contact us
Copyright © 2005
DAAIZ.COM All rights reserved.
Page concept, designed and maintained by Ashawadi
Publications
