ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಸಾಹಿತಿಕ್ ಪ್ರತಿಕ್ರಿಯಾ (- ಸ್ಟೇನ್ ಅಗೇರಾ, ಮುಲ್ಕಿ)
ಶ್ಹರೊ: ಎಚ್ಚೆಮಾಚೆಂ ’ಮುಕ್ತ್ ಉಲವ್ಪ್’ ಪರ್ಗಟ್ ಕೆಲ್ಲ್ಯಾಚೆರ್ ಸಭಾರ್ ವಾಚ್ಪ್ಯಾಂನಿ ತಶೆಂಚ್ ಥೊಡ್ಯಾ ಬರಯ್ಣಾರಾಂನಿ ಪ್ರತಿಕ್ರಿಯಾ ದಿಲ್ಯಾ. ವಿಂಚ್ಣಾರ್ ಪ್ರತಿಕ್ರಿಯೆಕ್ ಮಾತ್ರ್ ಆಮಿ ಪರ್ಗಟ್ ಕರ್ತಾಂವ್.
ಆಗೋಸ್ತ್ ಧಾ ತಾರಿಕೆರ್ ಭಿಸ್ಪಾಚಾ ಶ್ರೀಮಾನ್ ಎಚ್ಚೆಮ್ಮಾನ್ ವಾಚ್ಲ್ಲೊ ಮುಕ್ತ್ ಉಲೊವ್ಪ್ ಪ್ರಬಂಧ್ ಆಯ್ಕೊಂಚೆಂ ಅದೃಷ್ಟ್ ಯಾ ದುರಾದೃಷ್ಟ್ ಮ್ಹಾಕಾ ಫಾವೊ ಜಾಲೆಂ ನಾ ತರೀ ಆಯ್ಲೆವರ್ ತ್ಯಾ ವಾಚ್ಪಾಚಿ ಪ್ರತಿ ವಾಚ್ತಾಚ್ ಹ್ಯಾ ವಿಶಿಂ ಏಕ್ ಪ್ರತಿಕ್ರಿಯಾ ವೆಕ್ತ್ ಕರ್ಚೆಂ ಧೈರ್ ಮ್ಹಾಕಾ ಭಗ್ಲೆಂ. ಸಾಹಿತಿಕ್ ಗುಣಮಟ್ಟಾಚೆರ್ ವಾದ್ ಮುಕಾರ್ಸುನ್ ಎಕಾ ನವ್ಯಾ ಘುಂವ್ದೆಚೆರ್ ಪಾಂಯ್ ದವರ್ಚೊ ಹೊ ಮ್ಹಜೊ ಅಬ್ಲೇಸ್ ಶಿವಾಯ್ ಹೆರ್ ಖಂಚೊಯಿ ಗುಪಿತ್ ಇರಾದೊ ನ್ಹಯ್ ಯಾ ಮ್ಹಜೆಂ ನಾಂವ್ ಉಲ್ಲೇಕ್ ಕೆಲಾಂ ಮ್ಹಣೊನ್ ಸ್ಪಷ್ಟಿಕರಣ್ ದಿಂವ್ಚೆಂ ಕುಮ್ಸಾರ್ ನ್ಹಯ್.
ಸಾಹಿತಿಚೊ ಖಂಚೊಯಿ ಪ್ರಕಾರ್ ಜಾಂವ್, ಕಾಣಿ, ವಿಡಂಬನ್, ಕವಿತಾಂ, ಲೇಕನ್, ವಿಮಾರ್ಸೊ ಯಾ ಪ್ರಬಂಧ್, ಹಾಚೆಂ ಅಭಿವೆಕ್ತ್ ಸಾಹಿತಿಕ್ ರೂಪಾರ್ ದೋನ್ ಥರಾಂನಿ ದೀಷ್ಟಿಕ್ ಪಡ್ತಾ.
1. ಪಯ್ಲ್ಯಾ ವರ್ಗಾಂತ್ ಬರವ್ಪಿ ಸಾಮಾನ್ಯ್ ಥಳ್ ಶಿಂದುನ್ ಖೊವ್ಳಾಂ ಉಗ್ತೆಂ ಕರ್ನ್ ವಯ್ಲಿ ಕಾತ್ (ಏಕ್ ಯಾ ಅಧಿಕ್ Layer) ಉಸ್ವೊನ್ ವಾಚ್ಪ್ಯಾನ್ ದೆಕಾನಾತ್ಲ್ಲೆಂ ಬರವ್ಪಿ ದಾಕಯ್ತಾ. ಹ್ಯಾ ಸಾಹಿತ್ಯಾಚಿ ಬುನ್ಯಾದ್ ಅಧ್ಯಯನ್, ಸಂಶೋಧನ್ ಆನಿ ಮಾಹೆತಿಚೆರ್ ಉಭೆಂ ಜಾವ್ನ್ ಚಿಂತ್ನಾಂ ಸಾಹಿತಿಕ್ ಅಲಂಕಾರಾಂತ್ ಪರ್ಜಳ್ತಾತ್. ವಿಶ್ಲೇಶಣ್ ಅಸಾಮಾನ್ಯ್.
2. ದುಸ್ರ್ಯಾ ವರ್ಗಾಂತ್ ಬರವ್ಪಿ ಏಕಾ ಸಾಮಾನ್ಯ್ ಥಳಾಚೆರ್ ಅಪ್ಲಿಂ ಚಿಂತ್ನಾಂ ವೆಕ್ತ್ ಕರ್ತಾ. ಹೆಂ ದೆಕ್ಲ್ಲೆಂ ಆಸಾತಶೆಂ ಸಾಂಗ್ಚೆಂ. ಹಾಂಗಾಸರ್ ಅಧ್ಯಯನ್, ಸಂಶೋಧನ್ ಆನಿ ಮಾಹೆತ್ ಉಣೆ, ಫಕತ್ ಚಿಂತ್ನಾಂಚೆಂ ಪ್ರಕಟನ್. ವಿಶ್ಲೇಶಣ್ ಅತೀ ಸಾಮಾನ್ಯ್.
ಎಚ್ಚೆಮಾಚೊ ಪ್ರಬಂಧ್ ವಯ್ರ್ ಕಾಣ್ಸಿಲ್ಲ್ಯಾ ವರ್ಗಾಂತ್ ತುಲನ್ ಕೆಲೊ ತರ್ ಹೆಂ ಏಕ್ ಸಾಮಾನ್ಯ್ ದುಸ್ರ್ಯಾ ವರ್ಗಾಚೆಂ ಪ್ರಯತನ್ ಮಣ್ಯೆತ್. ಚಾಲು ಭಾಶೆಂತ್ ಹಾಕಾ ಸಜ್ಜಿಗೆ-ಬಜಿಲ್ ಮ್ಹಣ್ತಾತ್. ಪುಣ್ ಹಾಂಗಾಸರ್ ಸಜ್ಜಿಗೆ-ಬಜಿಲಾ ಸಂಗಿಂ ಬೆಳ್ಶೆಲ್ಲ್ಯಾ ಇಡ್ಲಿ- ವಡಾ- ದೋಸಾ- ಸೀರಾ- ಗೋಳಿಬಜೆಂಚೆಂ ಮಿಶ್ರಣ್ಯಿಂ ಜಾಲಾಂ. ಚಳ್ವಳ್ ಮ್ಹಣ್ಚಾ ಬದ್ಲಾಕ್ ಪೊಟ್ಕಾಣಿ ಚಡ್ ದಿಸ್ತಾ. ಕ್ವಾಲಿಟಿ ಆನಿ ಮಟ್ಟ್ ಬಿಲ್ಕುಲ್ ಝಳ್ಕಾನಾ. ಜಾಯ್ತೆಂ ಸಾಂಗ್ಚಾ ದರ್ಚಡ್ಯಾನ್ ಸೂಕ್ಷಿಮ್ ಸಂಗ್ತಿಂಚಿ ಬೆಪರ್ವಾ ಜಾಲ್ಯಾ. ದಾಕ್ಲ್ಯಾಕ್ ಥೊಡೆ ವಿಚಾರಾಂನಿ ಎಚ್ಚೆಮ್ ಸಂಪೂರ್ಣ್ ಸಲ್ವಲಾ:
1. ಅಪ್ಲೆ ಪ್ರಬಂಧಾಂತ್ ಎಚ್ಚೆಮ್ ಸಾಂಗ್ತಾ... "ಮಟ್ಟ್ ಮಳ್ಯಾರ್ ಕಿತೆಂ? ಸಾಹಿತಾಕ್ ಸಾಹಿತಾಚಿ ವಳಕ್ ದಿಂವ್ಚೆಂಚ್ ಜಾವ್ನಾಸಾ ಸಾಹಿತ್ಯಾಚೆಂ ಮಟ್ಟ್." ಕ್ವಾಲಿಟಿ ಆನಿ ಮಟ್ಟಾ ವಿಶಿಂ ಎಚ್ಚೆಮ್ ಕಿತೆಂಚ್ ನೆಣಾಂ ಮ್ಹಣ್ಚೊ ದುಭಾವ್ ಆತಾಂ ಮ್ಹಾಕಾ ಉಭ್ಜಲಾ. ಆತಾಂ ಹಾಂವ್ ವಿಚಾರ್ತಾಂ ಮಟ್ಟ್ ಮಳ್ಯಾರ್ ಇತ್ಲ್ಯಾಯಿ ಅಸ್ಪಷ್ಟ್? ಹಾಂವೆ ಚಿಂತ್ಚಾ ಪರ್ಮಾಣೆ ಮಟ್ಟ್ ಜಾವ್ನಾಸಾ ಸತಾಂಚೆಂ ಗ್ಯಾನ್. ಕಸಲ್ಯಾಯಿ ವರ್ಗಾಚೊ ತೊ ಬರವ್ಪಿ ತೊ ಜಾಂವ್ ಆನಿ ಪ್ರತ್ಯೇಕ್ ಜಾವ್ನ್ ಏಕ್ಲೊ ವಿಮರ್ಶಕ್, ಹಾಣಿಂ ಬರಯ್ತಾನಾ ಅಪ್ಲೆ ವಿಷಯಾಂತ್ / ಅಭಿವೆಕ್ತಾಂತ್ ಏಕಾ ಸಾಮಾನ್ಯ್ ಭಾಯ್ಲ್ಯಾ ಥಳಾ ಥಾವ್ನ್ (superficial) ತೆಂ ಥಳ್ ಪಿಂಜುನ್ ಭಿತರ್ ರಿಗ್ಚೆಂ (beneath the surface) ಜಾವ್ನಾಸಾ ಸಾಹಿತಿಚೆಂ ಆನಿ ತಾಣೆ ರಚ್ಚಾ ಸಾಹಿತ್ಯಾಚೆಂ ಮಟ್ಟ್. ಕಿತ್ಲ್ಯಾ ಭಿತರ್ ರಿಗೊಂಕ್ ತುಂ ಸಫಲ್ ಜಾಂವ್ಕ್ ಸಕ್ತಾಯಿ ಆನಿ ಕಿತ್ಲ್ಯಾ ಲಾಗ್ಶಿಲ್ಯಾ ಸತಾಚಿ ಪರಿಚಯ್ ಕರುಂಕ್ ಸಕ್ತಾಯಿ ತೆಂ ಜಾವ್ನಾಸಾ ತುಜೆಂ ಆನಿ ತುಂವೆ ರಚ್ಲ್ಲ್ಯಾ ಸಾಹಿತ್ಯಾಚೆಂ ಮಟ್ಟ್. ಹೆಂ ಸಾಮಾನ್ಯ್ ಥಳ್ ಶಿಂದುಂಕ್ ಬರವ್ಪ್ಯಾನ್ ಅಪ್ಲ್ಯಾ ವಿಷಯಾಚಿ ಫಕತ್ ಚರಿತ್ರಾ ವಿಣ್ಲ್ಯಾರ್ ಪಾವಾನಾ. ಹಾಕಾ ಆಧಾರ್ ಜಾವ್ನ್ ಸತಾಂ, ವಿಗ್ಯಾನ್, ಮನಶಾಸ್ತ್ರ್, ಸಮಾಜ್ ಶಾಸ್ತ್ರ್, ಅರ್ಥಿಕ್ ಶಾಸ್ತ್ರ್ ಆನಿ ಸಂಬಂಧಿತ್ ಹೆರ್ ಶಾಸ್ತ್ರಾಂಚೆ ತೀರ್ ವಾಪಾರ್ನ್ ವಾಚ್ಪ್ಯಾಂಕ್ ದಿಸಾನಾತ್ಲ್ಲೆಂ ಲೇಕಕಾನ್ ದಾಕಯ್ಜಾಯ್.
2. ದೃಷ್ಟಾಂತಾಕ್ ಎಚ್ಚೆಮ್ಮಾಚೆಂ ಉತಾರ್ ಆಸಾತಶೆಂ ಪಳೆಯಾ.... "ದಾಕ್ಲ್ಯಾಕ್ ಸ್ಟೇನ್ ಅಗೇರಾ ಸಂವಾದ್ ಕಾರ್ಯೆಂ ಪಳೆಯಾ- ದಾಯ್ಜಿನ್ ಸ್ಪೊನ್ಸರ್ ಕೆಲಾಂ ಮಣೊನ್ ದಾಯ್ಜಿ ಮನ್ಶಾಕಡೆಚ್ ಸಂವಾದ್, ತಾಕಾ ಪಯ್ಲೆಂ ಸನ್ಮಾನ್." ಮ್ಹಳ್ಯಾರ್ ಹಾಂಗಾಸರ್ ಕಿತೆಂ ತರೀ ಘುಟ್ಮಳ್ ಘಡ್ಲಾ ಮ್ಹಣ್ ಎಚ್ಚೆಮಾಕ್ ದುಭಾವ್? ಹ್ಯಾ ದುಬಾವಾ ಥಾವ್ನ್ ಉಭ್ಜಾಲ್ಲಿ ಪ್ರತಿಕ್ರಿಯಾ ಸಾಮಾನ್ಯ್ ಮನ್ಶಾಚಿ, ದೆಕ್ಲ್ಲೆಂ ಆಸಾತಶೆಂ ಸಾಂಗ್ಚೆಂ. ಹಾಂತುಂ ಸಾಹಿತಿಕ್ ಮೆಂದು ಕಾಮ್ ಕರಿನಾ. ಅಸಲಿಂ ಪ್ರತಿಕ್ರಿಯೆಂ ಏಕ್ಲೊ ಸರ್ವ್ ಸಾಮಾನ್ಯ್ ಅಶಿಕ್ಪಿಯಿ ದೀಂವ್ಕ್ ಸಕ್ತಾ. ಬದ್ಲಾಕ್ ಎಚ್ಚೆಮ್ಮಾನ್ ಇಲ್ಲೆಶೆಂ ಸಂಶೋಧನ್ ಕರ್ನ್ ಅಸಲ್ಯಾ ಕಾರ್ಯಕ್ರಮಾಂಚಿ ಪರಿಗತ್, ಸ್ಥಿತಿಗತ್, ಗರ್ಜ್, ಪರಿಣಾಮ್, ದುಷ್ಪರಿಣಾಮ್, ಸ್ಟೇನ್ ಅಗೇರಾ ಆನಿ ದೊತೊರ್ ಎಡ್ವರ್ಡ್ ನಜ್ರೆತಾಚಿ ಘುಟ್ಮಳ್, ಫಿತೂರೆ ಪಾಟ್ಲಿ ಚರಿತ್ರಾ, ಮನಶಾಸ್ತ್ರ್, ಅರ್ಥಿಕ್ ಶಾಸ್ತ್ರ್, ಕೋಣಾಕ್ ಕಸಲೊ ಫಾಯ್ದೊ, ಹಿ ಏಕ್ ಘುಟ್ಮಳ್ ವಯ್ ಯಾ ನ್ಹಯ್, ಆನಿ ಹಿ ಖರೆಂಚ್ ಏಕ್ ಘುಟ್ಮಳ್ ತರ್ ಅಸಲ್ಯಾ ಘುಟ್ಮಳೆಂ ಥಾವ್ನ್ ಕಶೆಂ ಬಚಾವ್ ಜಾವ್ಯೆತ್ ಮಣೊನ್ ಸಂಸೊಧ್ ರುಜ್ವಾತೆಂಚೊ ಆಧಾರ್ ವಾಪರ್ನ್ ಸಾಮಾನ್ಯ್ ಮನ್ಶಾಕ್ ದಿಸಾನಾತ್ಲ್ಲೆಂ ದಾಕಯಿಲ್ಲೆಂ ತರ್ ಪ್ರಬಂಧಾಚೆಂ ಮಟ್ಟ್ ಭೋವ್ಶಾ ಸುಧ್ರಾತೆಂ ಆಸ್ಲ್ಲೆಂ!
3. ಆಮ್ಚೆ ಬರವ್ಪಿ ಕೃತಕ್ ಜಿಣಿ ಜಿಯೆತಾತ್ ಮ್ಹಣ್ತಾ ಎಚ್ಚೆಮ್? ’ಕೃತಕ್ ಜಿಣಿ’ ಮಳ್ಯಾರ್ ಕಿತೆಂ ಮ್ಹಣ್ಚಾ ವಿಶಿಂ ಕಿತೆಂಚ್ ಉಲ್ಲೇಕ್ ನಾ. ಸ್ವಾಭಾವಿಕ್ ಆನಿ ಕೃತಕ್ ಜಿಣ್ಯೆ ಮಧೆಂ ಕಿತೆಂ ತಫಾವತ್, ಹ್ಯಾ ವಿಶಿಂ ಉಜ್ವಾಡ್ ಗರ್ಜೆಚೊ. ಏಕ್ ಉತಾರ್ ಸಾಂಗೊಂಕ್ (Statement) ಕೆದಾಳಾಯಿ ಸಲೀಸ್, ಹೆಂ ಸಾಮಾನ್ಯ್ ಮನಿಸ್ ಕರ್ತಾ. ಸಾಹಿತಿಕ್ ಠೀಕಾ ಕರ್ತೆಲ್ಯಾನ್ ಹಾಚೆಂ ವಿವರಣ್ ದೃಷ್ಟಾಂತಾ ಸವೆಂ ಪ್ರಕಟನ್ ಕರ್ನ್ ವಿಷಯಿ ಸ್ಪಷ್ಟ್ ಕರ್ಚೆಂ ಅತೀ ಗರ್ಜೆಚೆಂ. Justification of statements ಕಿತ್ಯಾಕ್ ಎಚ್ಚೆಮ್ ವಿಸ್ರಾಲೊ? ಜವಾಬ್ದರೆಭರಿತ್ ಸಾಹಿತ್ಯಾಂತ್ ಹೆಂ ಅತೀ ಮಹತ್ವಾಚೆಂ. ನಾ ತರ್ ಮಟ್ಟ್ ಕಶೆಂ ಸುಧ್ರೊಂಚೆಂ?
4. ಚಡಾವತ್ ಠೀಕಾ (points) ಜೆರಾಲ್ ವರ್ಗಾಚಿ. ದೃಷ್ಟಾಂತಾಕ್, ’ಆಮ್ಚೆ ಸಾಹಿತಿ ಖಬ್ರೆ ಪತ್ರಾಂ ಸೊಡ್ಲ್ಯಾರ್ ಹೆರ್ ಕಿತೆಂಯಿ ಸಾಹಿತ್ಯ್ ವಾಚುಂಕ್ ವಚಾನಾಂತ್, ಆಮ್ಚೆ ಬರವ್ಪಿ ಕೃತಕ್ ಜಿಣಿ ಜಿಯೆತಾತ್... ಇತ್ಯಾದಿ" ಸಾಹಿತ್ಯಾಂತ್ ಜೆರಾಲ್ ಉತ್ರಾಂಕ್ ಮೋಲ್ ಉಣೆ. ಹಿ ಬೇಜವ್ದಾರಿ ಠೀಕಾ. ಜವಾಬ್ದರಿ ವಿಮಾರ್ಸೊ ಯಾ ಠೀಕಾ ನಿಶ್ಚಿತ್ ನಿಶಾನೆಚೆರ್ ಆಸ್ತಾ, ಜೆರಾಲ್ ನ್ಹಯ್. ಆಮ್ಚೆ ಬರವ್ಪಿ ಹೆರ್ ಸಾಹಿತ್ಯ್ ವಾಚಿನಾಂತ್ ಮ್ಹಣೊಂಕ್ ಎಚ್ಚೆಮ್ಮಾ ಲಾಗಿಂ ಆಧಾರ್ ಕಿತೆಂ ಆಸಾ? ಕಿತ್ಲೆ ಠಕ್ಕೆ ಬರವ್ಪಿ ಹೆರ್ ಸಾಹಿತ್ಯ್ ವಾಚಿನಾಂತ್? ತೊ ಘರಾಂ-ಘರಾಂನಿ ಸೊಧುಂಕ್ ಗೆಲಾ? ತಾಣಿ ರಚ್ಲ್ಲ್ಯಾ ಸಾಹಿತ್ಯಾಚೆಂ ಗುಣಮಟ್ಟ್ ಉಣೆ ಮ್ಹಣ್ಚೆಂ ಏಕ್ಚ್ ಕಾರಣ್? ತರ್ ಹೆರ್ ಭಾಷೆಂಚೆಂ ಸಾಹಿತ್ಯ್ ವಾಚ್ಚಾ ಎಚ್ಚೆಮ್ಮಾಚಾ ಪ್ರಬಂಧಾಚೆಂ ಗುಣಮಟ್ಟ್ ಕಿತ್ಯಾಕ್ ಇತ್ಲೆಂ ಡೌನ್ ಆಸಾ? ಹೆರ್ ಭಾಷೆಚೆಂ ಜಾಯ್ತೆಂ ಸಾಹಿತ್ಯ್ ವಾಚ್ಲ್ಲೊ ಇತ್ಲ್ಯಾ ಚಿಲ್ಲರ್ ವರ್ಗಾಚೊ ಪ್ರಬಂಧ್ ಬರಂವ್ಕ್ ಪಾವ್ತಾ ತರ್ ಹೆರ್ ಸಾಹಿತ್ಯ್ ವಾಚಾಪ್ ಸರ್ವಾಂಕ್ ಉಪ್ಕಾರಾಚೆಂ? ಹೊ ಗಂಭೀರ್ಪಣಿಂ ಚಿಂತಿಜಾಯಿ ಜಾಲ್ಲೊ ವಿಷಯಿ.
5. ಏಕಾ ಲೇಕಕಾನ್ ಸುಧ್ರೊಂಕ್ ವಾಚಾಪ್ ಆನಿ ’ಗುರು’ಚಿ ಗರ್ಜ್ ಆಸಾ ಮಣೊನ್ ಎಚ್ಚೆಮ್ ಸಾಂಗ್ತಾ. ಇತ್ಲೆಂಚ್ ಪಾವ್ತಾ? ಪ್ರಭಾವಿತ್ ಸಾಹಿತ್ಯಾ ಥಾವ್ನ್ ಮೆಕ್ಳೊ ಜಾಂವ್ಕ್ ಸಾಹಿತಿಕ್ ವಾಚ್ಪಾ ಸವೆಂ ಪರಿಪಿಕಾಯಿ ಆನಿ ಜಿಣ್ಯೆ ಆನ್ಭೋಗ್ ಚಡ್ ಮಹತ್ವಾಚೊ ಮ್ಹಣ್ ಎಚ್ಚೆಮ್ ನೆಣಾ?
ಪಯ್ಲೆಂಚ್ ವೆಕ್ತ್ ಕೆಲ್ಲ್ಯಾ ಪರ್ಮಾಣೆ ದೆಕ್ಲ್ಲೆಂ ಆಸಾತಶೆಂ ಸಾಂಗ್ಚೆಂ ಮಟ್ಟ್ ಎಕಾ ಸಾಮಾನ್ಯ್ ಮನ್ಶಾಚೆಂ. ಪುಣ್ ಏಕಾ ಲೇಕಕಾನ್ ಸತಾಚಿಂ ಸೊಧ್ನಾಂ ಕರ್ಚೆಂ ಅವಶ್ಯ್. ತ್ಯಾ ಸತಾಂಕ್ ರುಜ್ವಾತ್ ಎಕ್ಟಾಂಯಿ ಕರ್ಚೆಂ ಅತೀ ಗರ್ಜೆಚೆಂ. ಪ್ರತ್ಯೇಕ್ ಜಾವ್ನ್ ಎಕಾ ವಿಮರ್ಶಕಾನ್ ದಿಸಾನಾತ್ಲ್ಲಿಂ ಸತಾಂ ಖಂಯ್ಸರ್ ಚುಕ್ಲ್ಯಾಂತ್ ಆನಿ ಕಶೆಂ ಲಿಪೊನ್ ಗೆಲ್ಯಾಂತ್ ತೆಂ ಕಳಿತ್ ಕರ್ಚೆಂ ಅಧಿಕ್ ಮಹತ್ವಾಚೆಂ. ಕೆದಾಳಾ ಸತಾಂ ಥಾವ್ನ್ ಆಮಿ ಪಯ್ಸ್ ಸರ್ತಾಂವ್ ತವಳ್ ಆಮ್ಚೆಂ ಮಾತ್ರ್ ನ್ಹಯ್ ಸರ್ವ್ ಭಾಷೆಂಚೆಂ ಸಾಹಿತ್ಯ್ ಸಲ್ವತಾ. ಥಂಯ್ಸರ್ ಉರ್ತಾ ಫಕತ್ ಏಕ್ ಫಟಿಂಚೊ ಭುಂಯಾಂವ್.
ಬ್ರಿಟಿಷ್ ತತ್ವ್ಗ್ಯಾನಿ ಬರ್ಟ್ರ್ಯಾಂಡ್ ರಸೆಲಾಚೊ ವಾದ್ ಹಾಂವೆ ಮುಕಾರ್ ದವರ್ಚೊ ತರ್ ತಾಚಾ ತತ್ವ್ಶಾಸ್ತ್ರಾಂತ್ ತೊ ಸತಾಂಕ್ ಎಕಾ ನಿತಳ್ ಮೆಜಾಕ್ ಸರಿ ಕರ್ತಾ. ಆಮ್ಚಾ ಸಾಮಾನ್ಯ್ ದೊಳ್ಯಾಂಕ್ ಮೇಜ್ ನಿತಳ್ ದಿಸ್ತಾ ಆನಿ ತೆಂ ನಿತಳ್ ಆಸಾ ಮ್ಹಣ್ ಖಚಿತ್ ಸಾಂಗ್ತಾಂವ್. ಪುಣ್ ಎಕಾ ಮೆಗ್ನಿಫಾಯಿಂಗ್ ಗ್ಲಾಸಾಂತ್ (ವಿಶಾಲಿತ್ ಲೆನ್ಸ್) ದೆಕ್ಲೆಂ ತರ್ ಸಾಮಾನ್ಯ್ ದೊಳ್ಯಾಂಕ್ ದಿಸಾನಾತ್ಲ್ಲಿಂ ಖತಾಂ ಆಮ್ಕಾಂ ದಿಸ್ತಾತ್. ಚಡ್ ಭಳ್ವಂತ್ ಮೆಗ್ನಿಫಾಯಿಂಗ್ ಗ್ಲಾಸ್ ವ್ಹಾಪರ್ಲೊ ತರ್ ಅತೀ ಸೂಕ್ಶಿಮ್ ಖತಾಂ ಸ್ಪಷ್ಟ್ ಜಾತಾತ್. ತವಳ್ ಮಾತ್ರ್ ಆಮಿ ಮೆಗ್ನಿಫಾಯಿಂಗ್ ಗ್ಲಾಸ್ ವಾಪರಿನಾಸ್ತಾನಾ ದೆಕ್ಲ್ಲೆಂ ಸತ್ ಕಿತ್ಲ್ಯಾ ಫಟ್ಕಿರೆಂ ಮಣ್ ರುಜು ಜಾತಾ.
ಹೊ ಸಂಸಾರ್ ಆಸೊಚ್. ಸಾಹಿತ್ಯ್ ಫಕತ್ ತ್ಯಾ ಸತಾಂಚೆಂ ಪ್ರತಿಫಲನ್. ಸತಾಂಚಿ ಬುನ್ಯಾದ್ ಪಯ್ಲೆಂ, ಸಾಹಿತ್ಯಾಕ್ ಸಂಬಂಧಿತ್ ಬಾಕಿಚೆ ಅಲಂಕಾರ್ ಉಪ್ರಾಂತ್ ಯೆತಾತ್. ಸಾಹಿತ್ಯಾಚಿ ಊಂಚಾಯಿ ಆನಿ ಗುಂಡಾಯಿ ಏಕಾ superficial ಥಳಾ ಥಾವ್ನ್ beneath the surface-ಕ್ ವೆಚೆಂ ಸಾಧನಾಂಚೆರ್ ಪ್ರಕಾಶಿತ್ ಜಾತಾ.. ಕಸಲೊಯಿ ವಿಷಯಿ ಜಾಂವ್ ಉಲಯ್ತಾನಾ ಯಾ ಬರಯ್ತಾನಾ ತುಂ ಕಿತ್ಲೆ ಕವಚ್ ನಿಕ್ಳಾವ್ನ್ ಭಿತರ್ ವಚೊಂಕ್ ಸಕ್ತಾಯಿ ತಿತ್ಲ್ಯಾ ಮಹಾನ್ ಜಾವ್ನಾಸಾ ತುಜೆಂ ಮಟ್ಟ್. ತುಜ್ಯಾ ವಿಷಯಾಚಿ ಸತಾಂ ಕಿತ್ಲ್ಯಾ ಸೊಭಿತ್ ಸಾಹಿತಿಕ್ ಅಲಂಕಾರಾಂನಿ ನೆಸವ್ನ್ ವಾಚುಂಕ್ ಕುತೂಹಲ್ಭರಿತ್ ಕರ್ತಾಯಿ ತಿತ್ಲ್ಯಾ ಅಧಿಕ್ ಜಾವ್ನಾಸಾ ತುಜೆಂ ಮಟ್ಟ್. ಕಿತ್ಲ್ಯಾಯಿ ಸೊಭಿತ್ ಆನಿ ಕುತೂಹಲ್ಭರಿತ್ ಆಸೊಂ, ಅಧ್ಯಯನ್, ಸಂಶೋಧನ್, ಮಾಹೆತ್ ಆನಿ ವಿಶ್ಲೇಶಣ್ ನಾತ್ಲ್ಲೆಂ ಸಾಹಿತ್ಯ್ ಪೊಕೊಳ್. ತಶೆಂಚ್ ಅಧ್ಯಯನ್, ಸಂಶೋಧನ್, ಮಾಹೆತ್ ಆನಿ ವಿಶ್ಲೇಶಣಾ ಸವೆಂ ಕಿತ್ಲ್ಯಾಯಿ ಬಳ್ವಂತ್ ಆಸೊಂ, ಕುತೂಹಲ್ಭರಿತ್ ಜಾಂವ್ಕ್ ಸಕಾನಾತ್ಲ್ಲೆಂ ಸಾಹಿತ್ಯ್ ನಿರ್ಜೀವ್. ಜಿಣ್ಯೆಂತ್ ಥೊಡಿಂ ಲಿಸಾಂವಾಂ ಬೂಕಾ ಥಾವ್ನ್ ಯಾ ಗುರು ಥಾವ್ನ್ ಲಾಭ್ತಾತ್, ಪುಣ್ ಸಕ್ಕಡ್ ಲಿಸಾಂವಾಂ ಇತ್ಲ್ಯಾ ಸಲೀಸಾಯೆನ್ ಮೆಳಾನಾಂತ್. ಹಾಕಾ ಗರ್ಜ್ ಆಸಾ ಕಷ್ಟ್, ಪರಿಶ್ರಮ್, ಮಿನತ್, ಸುಕ್-ದೂಕ್, ಸಲ್ವಣ್ಯೊಂ, ಯಶಸ್ವಿ, ಜಿಣ್ಯೆ ಪಯ್ಣ್, ವಿವಿಧ್ ಜಾಗೆ-ಮನ್ಶಾಂಚಿ ವ್ಹಳೊಕ್, ಶೋಧನ್ ಆನಿ ಪ್ರತ್ಯೇಕ್ ಜಾವ್ನ್ ತೊ ಆನ್ಭೋಗ್ ಭೊಗ್ಚಿ ಪರಿಪಿಕಾಯಿ (self realization). ಜಿಣ್ಯೆಚಿಂ ಥೊಡಿಂ ಅಮೂಲ್ಯ್ ಲಿಸಾಂವಾ ಮೇಸ್ತ್ರಿ ಥಾವ್ನ್ ಯಾ ಪುಸ್ತಕಾ ಥಾವ್ನ್ ಫಾವೊ ಜಾಯ್ನಾಂತ್, ಜಿಣಿ ಜಿಯೆವ್ನ್ ಜಿಣ್ಯೆ ಥಾವ್ನ್ ಶಿಕಾಜಾಯಿ. ನಾತರ್ ತುಕಾ ಲಿಸಾಂವ್ ದಿಂವ್ಚೊ ಮೇಸ್ತ್ರಿ ಕಿತ್ಲ್ಯಾ ಉದ್ಕಾಂತ್ ಉಬೊ ಆಸಾ ಮ್ಹಣ್ ಕಶೆಂ ಕಳ್ಚೆಂ?
ಹಾಂವೆಂ ವೊರಾಯಿಲ್ಲ್ಯಾ ಪರ್ಮಾಣೆ ಆಮ್ಚಾ ಕೊಂಕ್ಣಿ ಸಾಹಿತ್ಯಾಚಿ ಹಿ ಏಕ್ ಆನೊಕಿ ಪರಿಗತ್. ಠೀಕಾ/ವಿಮಾರ್ಸೊ ಕೆಲ್ಲ್ಯಾ ಫರಾ ಆಮ್ಚೆ ಬರವ್ಪಿ ತಾಪ್ತಾತ್ ಮ್ಹಣ್ ವಿಮರ್ಶಾಕಾಂಚೆಂ ದುರ್ಸೊಣೆ. ವಿಮಾರ್ಸೊ ಕೆಲ್ಲಿ ರೀತ್ ಸಾರ್ಕಿ ನಾ, ವಿಮಾರ್ಶಾಚೆಂ ಮಟ್ಟ್ ಕೀಳ್ ಆಸಾ ಮ್ಹಣ್ ಠೀಕಾ ಕೆಲ್ಲ್ಯಾಂಚಿ ಠೀಕಾ ಕೆಲಿ ತರ್ ವಿಮರ್ಶಾಕ್ಯಿ ತಾಪ್ತಾ. ಸುಧ್ರೊಂಕ್ ಬರವ್ಪಿಯಿ ತಯಾರ್ ನಾಂತ್, ವಿಮರ್ಶಾಕ್ಯಿ ತಯಾರ್ ನಾಂತ್! ಕೊಣೆ ಕೊಣಾಕ್ ಸಾಂಬಾಳ್ಚೆಂ?
ಪೊಕೊಳ್, ಕ್ರಾಂತಿಕಾರಿ ಆನಿ ನಿಶ್ಟುರ್ ಸ್ವಭಾವ್ ದಾಕಯ್ಲ್ಯಾರ್ ಸಮಾಜ್ ಬದ್ಲಾನಾ. ಕೋಣಾಯ್ಕಿ ’ಗಾಡಾಂವ್, ದುಕೊರ್, ರೆಡೊ, ಪಾಡೊ, ಸುಣೆಂ,’ ಮ್ಹಣ್ ನಿಂದಾ ಕೆಲ್ಲ್ಯಾ ಫರಾ ತೊ ಮನಿಸ್ ಬದ್ಲಾನಾ. ಕೋಣಾಯ್ಕಿ ಹಲ್ಕ್ ಕರ್ನ್ ’ಶೆಣ್, ಮಾತಿ, ಮೂತ್, ಗೊಬೊರ್, ಸಾರೆಂ...’ ಇತ್ಯಾದಿ ಮ್ಹಳ್ಳ್ಯಾ ಫರಾ ಸಾಹಿತ್ಯ್ ಸುಧ್ರಾನಾ. ಹೆಂ ಫಕತ್ತ್ ವಿಮರ್ಶಕಾನ್ ವಾಡ್ಲ್ಲಿ ರೀತ್, ತಾಚೆಂ ಶಿಕಾಪ್, ತಾಚಿಂ ಮೌಲ್ಯಾಂ ಆನಿ ತಾಚೆ ಸಂಸ್ಕಾರಾಚೆಂ ಪ್ರತಿರೂಪ್ ದಿತಾ. ವಿಮರ್ಸೊ ಕರುಂಕ್ ನ್ಹಜೊ ಮ್ಹಣ್ ಖಂಚೊ ಬರವ್ಪಿ ಸಾಂಗ್ತಾ? ಕೋಣ್ಯಿ ಆಶೆಂ ಸಾಂಗ್ತಾ ತರ್ ತೊ ಬರವ್ಪಿ ಜಾಂವ್ಕ್ ಯೋಗ್ಯ್ ನ್ಹಯ್. ಪುಣ್ ವಿಮರ್ಸೊ ಕರ್ತೆಲ್ಯಾನ್ಯಿಂ ಅಪ್ಲಿ ಜವಾಬ್ದಾರಿ ಸಾಂಬಾಳ್ಚೆಂ ಅವಶ್ಯ್. ವಿಮರ್ಸೊ ಅಭಿವೆಕ್ತ್ ಕರುಂಕ್ ಜಾಯ್ ಆಸ್ಚೆಂ ವಿವರಣ್, ರೂಪ್ರೇಕಾ, format ವಿಸ್ರೊನ್ ಸಾದ್ಯಾ ವಾಚ್ಪ್ಯಾ ಪರಿಂ ಚಾಲು ಉತ್ರಾಂನಿ ಖೆಳ್ಕುಳಾಂ ಕೆಲಿಂ ತರ್, ಹ್ಯಾ ಕುಸ್ಕಾಲ್ಲ್ಯಾ ಕೊಂಕ್ಣಿ ಸಾಹಿತ್ಯಾಕ್ ಆನಿ ಸಾಹಿತಿಂಚಿ ಸೊಡ್ವಣ್ ಕರುಂಕ್ ಆಮಿ ಸರ್ಗಿಂಚಾ ಸೊಡ್ವೊಣ್ದಾರಾಕ್ ರಾಕಾಜಾಯಿ ಪಡಾತ್. ಆವೇಶ್ಭರಿತ್ ಪೊಕೊಳ್ ಉತ್ರಾಂಚಾ ಫಟ್ಕಿರ್ಯಾ ಕಪಟಿ ಪ್ರವಾದಿಂ ಥಾವ್ನ್ ಹಿ ಸೊಡ್ವಣ್ ಅಸಂಭವ್!
ಅಕ್ರೇಚೆಂ ಉತಾರ್: ಖೆಳಾ ಕ್ಷೇತ್ರಾಂನಿ ಏಕ್ ಉತಾರ್ ತವಳ್ ತವಳ್ ವಾಪರ್ತಾತ್, ’The team could be as good or as bad as a coach’. ಹೆಂ ಉತಾರ್ ಥೊಡ್ಯಾ ಮಟ್ಟಾಕ್ ಕೊಂಕ್ಣಿ ಸಾಹಿತ್ಯಾಕ್ ಸಾರ್ಕೆಂ ವೊಂಬಾತಾ. ಸತೆವಂತ್ (ಫಟ್ಕಿರೆ ನ್ಹಯ್!) ಆನಿ ನಿತಿವಂತ್ ವಿಮರ್ಶಾಕಾಂಕ್ ಹಾಂವ್ ಸಾಹಿತ್ಯಾಚೆ ಕೋಚ್ ಮ್ಹಣ್ ಮಾಂದ್ತಾಂ. ಆಶೆಂ ಆಸ್ತಾನಾ ಆಮ್ಚಾ ವಿಮಾರ್ಶಾಂಚೆಂ ಮಟ್ಟ್ ಕಿತ್ಲೆಂ ಆಸಾ ತಾಚೆ ಪ್ರಾಸ್ ಸಕಯ್ಲ್ಯಾ ಮಟ್ಟಾರ್ ಕೊಂಕ್ಣಿ ಸಾಹಿತ್ಯ್ ಬಿಲ್ಕುಲ್ ನಾ. ಹಾಚೊ ಅರ್ಥ್ ಕೊಂಕ್ಣಿ ಸಾಹಿತ್ಯ್ ಊಂಚ್ ಆಸಾ ಮ್ಹಣ್ ನ್ಹಯ್. ವಿಮಾರ್ಶಾಂಚೆಂ ಮಟ್ಟ್ ಸುಧ್ರಾಲೆಂ ತರ್ ಸಾಹಿತ್ಯಾಚೆಂ ಗುಣಮಟ್ಟ್ ಬರೆಂ ಜಾತೆಲೆಂ. ತವಳ್ ಪರ್ಯಾಂತ್ The quality of our literature is as good as or as bad as the quality of our critical analysis! ಅಸಲ್ಯಾ ಸ್ಥಿತೆರ್ ಸಾಹಿತಿಂಕ್ ಆನಿ ತಾಂಚೆ ಸಾಹಿತ್ಯಾಕ್ ಬೊಟ್ ಜೊಕ್ಚಾ ಪಯ್ಲೆಂ ಆಮ್ಚೆ ವಿಮಾರ್ಶೆ ಆನಿ ವಿಮಾರ್ಶಾಕಾಂಚೆಂ ಮಟ್ಟ್ ಕಶೆಂ ಸುಧ್ರೊಂಚೆಂ ಮ್ಹಣ್ಚಾ ವಿಶಿಂ ಗಮನ್ ದಿಂವ್ಚೆಂ ನಿಜಾಯ್ಕಿ ಗರ್ಚೆಚೆಂ!! ತುಮಿ ಕಿತೆಂ ಮ್ಹಣ್ತಾತ್? ಕೊಂಕ್ಣಿ ಸಾಹಿತ್ಯ್ ಉದರ್ಗತೆಕ್ ಪಕ್ಷಪಾತ್ ಕರಿನಾಸ್ತಾನಾ ನಿರ್ದಿಷ್ಟ್ ನಿಶಾನೆಚೆರ್ ವಿಷಯಾಚಾ ಪರಿಧಿ ಭಿತರ್ ವಿಶ್ಲೇಶಣ್ ವೆಕ್ತ್ ಕರ್ಚಾ ಸ್ವವಿಚಾರ್-ಸ್ವತಂತ್ರ್ ಚಿಂತ್ಪಾಚಾ ಸತೆವೆಂತ್ ಆನಿ ನಿತಿವಂತ್ ಶಿಕ್ಪಿ ಸಾಹಿತಿಕ್ ಗ್ಯಾನಿ ವಿಮರ್ಶಾಕಾಂಚಿ ಗರ್ಜ್ ಆಸಾ ಯಾ ಉತಳ್ ಚಿಂತ್ಪಾಚಾ ಆವೇಶಿ ಕಪಟ್ಯಾಂಚಿ (ಸ್ಟಫ್ ನಾಸ್ತಾನಾ ಸ್ಟೇಟ್ಮೆಂಟ್ ಕರ್ತೆಲೆ)??? ದುಸ್ರ್ಯಾ ವರ್ಗಾಚೆ ಜಾಯ್ತೆ ಆಸಾತ್, ಪುಣ್ ಪಯ್ಲ್ಯಾ ವರ್ಗಾಚಾಂಕ್ ಖಂಯ್ ಥಾವ್ನ್ ತಲಾಸ್ ಕರ್ಚೆಂ? ಕೋಣ್ಯಿಂ ದಿಸ್ತಾತ್?
About us | Feedback | Contact us
Copyright ©
2005 DAAIZ.COM All rights reserved.
Page concept, designed and maintained by Ashawadi Publications