ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್ ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಕಥಾಂಕರ್ - 9
ಮಟ್ವಿ ವಳೊಕ್: ಅಲ್ಫೋನ್ಸಸ್ ಡಿ’ಸೋಜ್ ಬ್ರಹ್ಮಾವರ್ ಸಭಾರ್ ತೆಂಪಾಥಾವ್ನ್ ಕೊಂಕ್ಣಿ ವಾಚ್ಪಿ ತರ್ಯೀ ಕೊಂಕ್ಣಿ ಕಾಣ್ಯೆಗಾರ್ ಜಾವ್ನ್ ಉದೆಲ್ಲೊ ಆಯ್ಲೆವಾರ್ಚ್ಚ್. ಹಿ ಕಾಣಿ ಅಜೀಕ್ ತೀನ್ ವರ್ಸಾಧಿಂ ದಾಯ್ಜ್ ಸಾಹಿತಿಕ್ ಸ್ಪರ್ಧ್ಯಾಖಾತಿರ್ ಬರಯಿಲ್ಲಿ ಜಾವ್ನಾಸಾ. ಫುಡೆಂಯೀ ಅಪ್ಲೆಂ ಪ್ರೇತನ್ ಜ್ಯಾರಿ ದವರುನ್, ಹಾಚ್ಯಾಕ್ಯೀ ಬರ್ಯೊ ಕಾಣ್ಯೊ ಬರಂವ್ಕ್ ಸಕೊಂದಿ ಮ್ಹಣ್ ಆಶೆತಾಂ.
ಅಲ್ಫೋನ್ಸಸ್ ಡಿ’ಸೋಜ್
ಕಥಾಂಕರ್ - 9. ಸುಟ್ಕಾ.
ರಾತಿಚೊ ಸುಮಾರ್ ಧಾ ವರಾಂಚೊ ವೇಳ್ ತೊ. ಲಾಗ್ಶಿಲ್ಯಾ ತ್ಯಾ ಹಳ್ಳೆಂತ್ ಆನಿಕ್ಯೀ ದಿವೆ ಪಾಲ್ವಂವ್ಕ್ ನಾತ್ಲ್ಲೆ. ಥಂಯ್ ಹಾಂಗಾ ರಾನ್ವಟ್ ಕಿಟಾಳಾಂಚೊ ಆವಾಜ್. ಪಯ್ಶಿಲ್ಯಾ ರುಕಾರ್ ಥಾವ್ನ್ ’ಘುಗ್’ ರಡ್ಚೊ ಆವಾಜ್! ಹೆಂ ಸೊಡ್ಲ್ಯಾರ್ ನಿಶ್ಯಬ್ಧ್ ರಾತ್- ತಿ!
ಆನಿ ಏಕ್ ವ್ಯಕ್ತಿ ತ್ಯಾ ರಾತಿಂ ಹೆಣೆ ತೆಣೆ ಲಕಾತ್ತ್ ಧುಳಿಚಾ ಮಾರ್ಗಾರ್ ಪಾಯ್ ವೊಡಿತ್ತ್ ಚಲ್ತಾಲಿ. ತಿ ವ್ಯಕ್ತಿ ತ್ಯಾ ತಳ್ಯಾಕಡೆಂ ಪಾವ್ತಾನಾ, ಎಕಾಚ್ಛಾಣೆಂ ತಾಚೆಂ ಚಾಲ್ ರಾವ್ಲಿ. ಉಪ್ರಾಂತ್ ತೊ ಥಂಯ್ಸರ್ ಆಸ್ಲ್ಲ್ಯಾ ಎಕಾ ಆಂಬ್ಯಾ ಕಾಟಾರ್ ಬಸ್ಲೊ. ಆನಿ ತ್ಯಾಚ್ ಘಡ್ಯೆ ಕೊಣೆಂಗೀ ತಾಕಾ ಆಪಯಿಲ್ಲ್ಯಾಬರಿಂ ತೊ ಯೆಕಾಚ್ಛಾಣೆ ಉಟ್ಲೊ...... ’ಹಾಂ ... ಆಯ್ಲೊಂ’ ಮ್ಹಣಾಲೊ...... ತಳ್ಯಾ ದೆಗೆರ್ ಪಾವ್ಲೊ. ವ್ಹಾಣೊ ಆನಿ ವಸ್ತುರ್ ನಿಕ್ಳಾವ್ನ್ ತಡಿರ್ ದವರ್ನ್ ತ್ಯಾ ತಳ್ಯಾಂತ್ ತೊ ಉಡ್ಲೊ! ತಳೆಂಯೀ ಚಿಂತಿನಾತ್ಲೆಂ ತೆಂ ಘಡ್ತಾನಾ; ಕಾಲುಬುಲೊ ಜಾಲೆಂ. ಭಾರಿಚ್ಚ್ ಲಾರಾಂ ಉಟವ್ನ್ ಉಪ್ರಾಂತ್ ಶಾಂತ್ ಜಾಲೆಂ. ಆನಿ ಉಡ್ಲ್ಲೊ ತೊ ವ್ಯಕ್ತಿ ದೋನ್ ತೀನ್ ಪಾವ್ಟಿಂ ಉದ್ಕಾ ವಯ್ರ್ ಹಾತ್ ಹಾಲವ್ನ್; ಸಂಸಾರಾಕ್ ಆದೇವ್ಸ್ ಮಾಗೊನ್; ಥಳಾರ್ ವಚೊನ್ ಥಂಡ್ ನಿದ್ಲೊ. ಆನಿ ಹ್ಯಾ ವಿಶಯಾಕ್ ಫಾಲ್ಯಾಂಚೊ ದೀಸ್ ಉಜ್ವಾಡ್ತಾ ಪರ್ಯಾಂತ್ ವಿರಾಮ್ ಪಡ್ಲೊ!
ದುಸ್ರ್ಯಾ ದಿಸಾ ತಳ್ಯಾ ದೆಗೆರ್ ಆಯಿಲ್ಲ್ಯಾನಿ ದೆಗೆರ್ ಆಸ್ಲ್ಲ್ಯೊ ವಸ್ತು ಪಳೆಲ್ಯೊ. ಖಬಾರ್ ಜಾಲಿ. ಗಾಂವ್ಚೆ ಸಾಂಗಾತಾ ಮೆಳ್ಳೆ. ಪೊಲಿಸ್ ಆಯ್ಲೆ; ಆನಿ ಉದ್ಕಾ ಥಾವ್ನ್ ತಿ ಕೂಡ್ ವಯ್ರ್ ಕಾಡ್ಲಿ. ಆನಿ ತಿ ಕೂಡ್.... ವ್ಹಯ್ ತಿ ......... ತ್ಯಾ ನಿರ್ಭಾಗಿ ಮಂಜುಚಿ..... ಸಬಾರ್ ಜಣ್ ಚುರ್ಚುಲೆ ಆನಿ ಥೊಡೆ ಶಿಣ್ ಉಚಾರಿಲಾಗ್ಲೆ; ಆನಿ ಥೊಡೆ ’ಆಮ್ಕಾಂ ನಾಕಾ’ ಮ್ಹಣೊನ್ ಮುಕಾರ್ ಸರೊನ್ ಗೆಲೆ. ಕುಡಿಚೆಂ ಪೋಸ್ಟ್ಮಾರ್ಟಾಂ ಜಾತಾಚ್ಚ್ ಗಾಂವ್ಚ್ಯಾನಿ ತಿ ಕೂಡ್ ಲಾಸ್ಲಿ ಆನಿ ಹಾಚ್ಯಾ ಪಾಟ್ಲ್ಯಾನ್ ಎಕಾ ತರ್ನ್ಯಾ ಅಧ್ಯಾಯಾಚೆಂ ಸಮಾಪ್ತ್ ಜಾಲೆಂ! ಏಕಾ ಕುಟ್ಮಾಚಾ ಚರಿತ್ರೆಚೊ ಕಡೇಚೊ ತೊ ಅಧ್ಯಾಯ್ ಭಸ್ಮೊನ್ ಗೆಲೊ.
ಮಂಜು ತ್ಯಾಚ್ ಗಾಂವಾಂತ್ಲೊ ಏಕ್ ಗರೀಬ್ ಕುಟ್ಮಾಂತ್ಲೊ. ತಾಚಿ ಮ್ಹಳ್ಳಿ ಎಕ್ಲಿ ಆವಯ್ ಮಾತ್ರ್. ಬಾಪಯ್ ಲ್ಹಾನ್ ಪ್ರಾಯೆಚೆರ್ಚ್ಚ್ ಹಾಂಕಾ ಸೊಡ್ನ್ ಗೆಲ್ಲೊ. ಆವಯ್ಚ್ಯಾ ಮೊಗಾನ್ ಆನಿ ಪೊಸಾಪಾನ್ ಮಂಜು ಕುಡಿಂತ್ ಧಡಂಗ್ ಜಾವ್ನ್ ವ್ಹಾಡೊನ್ ಆಯಿಲ್ಲೊ. ಕೊಣಿಂ ತಾಕಾ ಪಳೆಲ್ಯಾರ್ ಪರತ್ ಪರತ್ ಪಳೆವ್ಯಾಂ ಮ್ಹಳ್ಳೆಂ ಆಕರ್ಷಕ್ ವ್ಯಕ್ತಿ ತೊ ಜಾವ್ನ್ ವಾಡೊನ್ ಆಯ್ಲೊ. ತ್ಯಾ ಗಾಂವ್ಚ್ಯಾ ಜಮಿನ್ದಾರಾನ್ ಹಾಚೆ ಕಾಮ್ ಪಳೆವ್ನ್ ಆಪ್ಲೊ ಖಾಯಂ ಕಾಮೆಲಿ ಜಾವ್ನ್ ಹಾಕಾ ನಮ್ಯಾರ್ಲೊ.
ಮಂಜು ಆತಾಂ ಕಾಜಾರಾಚಾ ಪ್ರಾಯೆಕ್ ಪಾವ್ಲೊ. ಗಾಂವ್ಚ್ಯಾ ಸಬಾರಾಂಕ್ ತಾಚೆರ್ ದೊಳೆ ಆಸ್ಲೆ. ಆನಿ ತೆಂಚ್ ತೆಂ... ಚೆನ್ನಿ ಹಾಕಾ ಪಿಸ್ವಾಲ್ಲೆಂ. ಆನಿ ಮಂಜುಯೀ ತಾಕಾ ಮೆಚ್ವಾಲ್ಲೊ. ತಿಂ ದೊಳ್ಯಾಂನಿ ಮಾತ್ರ್ ಉಲಯ್ತಾಲಿಂ.
ಆನಿ ಏಕಾ ದೀಸಾ ಗಾದ್ಯಾಂತ್ ಕಾಮ್ ಕರ್ತಾನಾ ಮಂಜುಚ್ಯಾ ಪಾಯಾಂಕ್ ಖೊರೆಂ ಲಾಗ್ಲ್ಲೆಂ. ರಗಾತ್ ವ್ಹಾಳೊಂಕ್ ಸುರು ಜಾಲ್ಲೆಂ. ಆನಿ ಹೆಂ ಪಳೆಯಿಲ್ಲ್ಯಾ ಚೆನ್ನಿನ್ ವೇಳ್ ಕಾಡುಂಕ್ ನಾ. ಕಸೊಲೊಗೀ ಪಾಲೊ ಹಾಡ್ನ್ ಮುರ್ಡುನ್ ತಾಚೊ ರೋಸ್ ತ್ಯಾ ಘಾಯಾಕ್ ಸೊಡ್ಲೊ. ಆನಿ ತೊಚ್ಚ್ ಪಾಲೊ ತ್ಯಾ ಘಾಯಾಕ್ ದವರ್ನ್ ಆಪ್ಲ್ಯಾ ಪಾಲ್ವಾಚೆಂ ಪೋಂತ್ ಪಿಂಜುನ್ ಬಾಂದ್ಲೆಂ. ಆನಿ ರಗಾತ್ ವ್ಹಾಳ್ಚೆ ರಾವ್ಲೆಂ. ಚೆನ್ನಿನ್ ವಿಚಾರ್ಲೆಂ ’ಮಂಜು..... ಈಗ ನೋವು ಹೇಗಿದೆ?’ ’ಪರವಾಗಿಲ್ಲ.... ಈಗ ತುಂಬಾ ಕಡಿಮೆ ಇದೆ... ಇದೆಲ್ಲಾ ನಿನ್ನ ಕೈಗುಣ ಚೆನ್ನಿ.....’ ಮ್ಹಣಾಲೊ ಮಂಜು. ಆನಿ ತ್ಯಾ ವೆಳಿಂ ಚೆನ್ನಿಚೆ ಗಾಲ್ ತಾಂಬ್ಶೆ ಜಾಲ್ಲೆ.
ಅಶೆಂ ಆರಂಭ್ ಜಾಲ್ಲೆಂ ತಾಂಚೆಂ ಉಲವ್ಣೆಂ ಮೊಗಾಂತ್ ಬದ್ಲುನ್ ತಾಂಕಾ ಜಿಣ್ಯೆ ಸಾಂಗಾತಿ ಕರುಂಕ್ ಚಿಂತುನ್ ಆಸ್ಲ್ಲೆಂ. ತಿಂ ದೊಗಾಂಯ್ ಮೊಗಾಚಿಂ ಸ್ವಪ್ಣಾಂ ದೆಖ್ತಾಲಿಂ.
ಮಂಜುಬಾ ಧನಿಯಾಚೊ ಪೂತ್ ರಾಜೇಶ್ ಪಯ್ಶಿಲ್ಯಾ ಬೆಂಗ್ಳುರ್ ಶಹರಾಂತ್ ಶಿಕ್ತಾಲೊ. ರಜೆರ್ ತೊ ಗಾಂವಾಕ್ ಆಯಿಲ್ಲೊ. ಲ್ಹಾನ್ ಪ್ರಾಯೆರ್ ಮಂಜು ಆನಿ ರಾಜೇಶ್ ಸಾಂಗಾತಾ ಖೆಳ್ತಾಲೆ.
ಆನಿ ಎಕಾ ದಿಸಾ ಚೆನ್ನಿ ರಾಜೇಶಾಚಾ ಝಳ್ಕೆಕ್ ಪಡ್ತಾ. ಹ್ಯಾ ಹಳ್ಳೆಚಾ ಗಾಂವಾಂತೀ ಅಸಲಿ ಏಕ್ ಸೊಭಾಯ್ ಆಸಾಗೀ? ಮ್ಹಣೊನ್ ತೊ ಅಜಾಪ್ತಾ. ಖುಶಾಲಿ ಜಿವಿತಾಚೊ ತೊ. ಎಕಾ ಭ್ರಮರಾಪರಿಂ; ತಾಚೆಂ ಮನ್ ಫುಲಾಂತ್ಲೆಂ ಮಕರಂದ್ ಚಾಕೊಂಕ್ ಆಶೆತಾ. ಆಪ್ಲಿ ಖುಶಿ ತೊ ಏಕಾ ಚಾಕ್ರಾ ಮುಖಾಂತ್ರ್ ತ್ಯಾ ಚೆನ್ನಿಕ್ ವ್ಹಕ್ತ್ ಕರ್ತಾ. ತರೀ ಚೆನ್ನಿ ಹ್ಯಾ ವಿಶಿಂ ಆಪ್ಲಿ ನಾ ಖುಶಿ ದಾಖಯ್ತಾ. ತಾಣೆ ಯೆದೊಳ್ಚ್ಚ್ ಆಪ್ಲ್ಯಾ ಕಾಳ್ಜಾ ಶಿಯಾಸಾಣಾಚೊ ರಾಯ್ ಮ್ಹಣೊನ್ ಪಾಟ್ ಬಾಂಧುನ್ ಜಾಲ್ಲೊ.
ರಾಜೇಶ್ ಥೊಡೆ ದೀಸ್ ರಾಕ್ತಾ ಆನಿ ಏಕಾ ದೀಸಾ ರಾನಾ ದೆಗೆರ್ ಸೊಪ್ ಕಾಡುಂಕ್ ಗೆಲ್ಲ್ಯಾ ಚೆನ್ನಿಕ್ ಆಡಾಯ್ತಾ. ಆನಿ ಚೆನ್ನಿ ಕಶೆಂ ಪುಣೀ ಹಾಚಾ ಘಾಸಾಂತ್ಲೆ ಚುಕೊವ್ನ್ ಘೆವ್ನ್ ಧಾಂವ್ತಾ. ಆಪ್ಣಾಕ್ ರಾಜೇಶಾನ್ ಧೊಶಿ ದಿಲ್ಲ್ಯಾವಿಶಿಂ ಮಂಜುಚಾ ಹರ್ದ್ಯಾರ್ ತಕ್ಲಿ ದವರ್ನ್ ದು:ಖಾಂ ಗಳವ್ನ್ ಸಾಂಗ್ತಾ.
ಆನಿ ತಿಂ ಚಿಂತಾಪ್ ಕರ್ತಾತ್. ಸ್ವಾತಂತ್ರ್ ಆಶೆಂವ್ಚಿಂ ಸುಕ್ಣಿಂ ಜಾವ್ನ್ ತಿಂ ಉಬೊಂಕ್ ಚಿಂತ್ತಾತ್. ಆನಿ ಏಕಾ ರಾತಿಂ ತಿಂ ತೊ ಗಾಂವ್ ಸೊಡ್ನ್ ಪೊಳಾಫಳ್ ಘೆತಾತ್.
ಗಾಂವ್ ಥೊಡೆ ದೀಸ್ ನವಿ ಖಬಾರ್ ಜೊರಾನ್ ಗಾಜಯ್ತಾ. ದೀಸ್ ವೆತಾಂ ವೆತಾಂ ತಿ ನಿವೊನ್ ಯೆತಾ; ಕ್ರಮೇಣ್ ವಿಸರ್ ಪಡ್ತಾ.
ಪೊಳ್ನ್ ಆಯಿಲ್ಲಿಂ ಮಂಜು ಆನಿ ಚೆನ್ನಿ ಘಟಾರ್ ಪಾವ್ತಾತ್. ತಿಂ ಎಕಾ ಕಾಫಿಯೆ ಎಸ್ಟೇಟಾಂತ್ ಕಾಮಾಕ್ ಲಾಗ್ತಾತ್. ಹಾಂಚೆಂ ಕಾಮ್ ಪಳೆವ್ನ್ ಸಾವ್ಕಾರಾಕೀ ಭಾರಿ ಖುಶಿ ಜಾತಾ.
ಹಾಂಗಾ ಕಾಮಾಗಾರಾಂಕ್ ಬಿಡಾರಾಂ ಆಸ್ಲ್ಲಿಂ. ಹಾಂತ್ಲಿ ಏಕೇಕ್ ಕುಡಾಂ ಏಕೇಕಾ ಕುಟ್ಮಾಕ್ ವಸ್ತೆಕ್ ದಿಲ್ಲಿಂ. ಚೆನ್ನಿ ಆನಿ ಮಂಜುಯೀ ಏಕ್ ದಂಪತಿ ಮ್ಹಣೊನ್ ಲೆಕುನ್ ಹಾಂಕಾಯೀ ವಸ್ತಿ ಮೆಳ್ಳಿ. ಚೆನ್ನಿನ್ ಖಂಯ್ಚಿಗೀ ಏಕ್ ಸಾಂತೆಂತ್ ಘೆತ್ಲ್ಲಿ ಕರಿಯಮಣಿ ಆಪ್ಲ್ಯಾ ಗಳ್ಯಾಂತ್ ಘಾಲ್ನ್ ಘೆತ್ಲ್ಲಿ.
ಹಾಂಗಾ ಪಾವ್ಸಿಲೆ ದೀಸ್ ಭೋವ್ ಕಷ್ಟಾಂಚೆ ಆಸ್ಲ್ಲೆ. ವಿಪ್ರೀತ್ ಜಳಾರಿ; ಮಲೇರಿಯಾಯೀ ಮಾರೆಕಾರ್ ಜಾವ್ನ್ ಧೊಸ್ತಾಲೆಂ. ಕಾಳೊಕ್ ಜಾಲ್ಲೆ ಕೂಡ್ಲೆ ಸರ್ವ್ ಧುವ್ರಿ ಘಾಲುನ್ ಬಸ್ತಾಲೆ. ಭಾಯ್ರ್ ಕಾಮಾಕ್ ಗೆಲ್ಲೆ ಕಡೆಂ (ಇಂಬ್ಳ) ರಗಾತ್ ಪಿಯೆತಾಲೆ. ದೆಕುನ್ ಚುನೊ ಆನಿ ಧುಮ್ಟಿ ಹರ್ಯೆಕ್ಲೊಯೀ ದವರ್ನ್ ಘೆತಾಲೆ. ನಾ ತರ್ ಹ್ಯೊ ಜೀವಿ ಮನ್ಶಾಚೆಂ ರಗಾತ್ ಪಿಯೆವ್ನ್ ಪುಗ್ತಾಲ್ಯೊ.
ಕಸಲಿಯೀ ಪಾಡ್ ಸವಯ್ ನಾತ್ಲ್ಲ್ಯಾ ಮಂಜುನ್ ಥೊಡೆ ಪಯ್ಶೆ ಜಮೊ ಕೆಲ್ಲೆ. ಆನಿ ಹೆಂ ಲ್ಹಾನ್ಶೆಂ ಕುಟಾಂಬ್ ಆಪ್ಲೊ ಸ್ವಂತ್ ಠಿಕಾಣೊ ಘಡ್ಚೊ ಸ್ವಪ್ಣಾಂ ದೆಖ್ತಾಲೆಂ.
ದೀಸ್ ಗೆಲೆ, ಮಹಿನೆ ಪಾಶಾರ್ ಜಾಲೆ. ಹಾಂಚಾ ಮೊಗಾಚಿ ನಿಶಾನಿ ಜಾವ್ನ್ ಬಾಳ್ ಜಲ್ಮೊಂಚಿ ಖುಣಾಂ ದಿಸೊನ್ ಆಯ್ಲಿಂ. ಅಬ್ಳೆ ಮಂಜು ಆಪುಣ್ ವೆಗಿಂಚ್ ’ಅಪ್ಪ’ ಜಾತೊಲೊಂ ಮ್ಹಣೊನ್ ಭೋವ್ ಖುಶ್ ಜಾಲೊ. ತೊ ದೀಸ್ ಲಾಗಿಂ ಪಾವ್ಲೊ. ಮಂಜು ಏಕ್ ಸೊಭಿತ್ ಚೆರ್ಕ್ಯಾ ಭುರ್ಗ್ಯಾಚೊ ಬಾಪಯ್ ಜಾಲ್ಲೊ. ಆನಿ ತಾಕಾ ಮಾಧವ್ ಮ್ಹಣ್ ವೊಲಾಯ್ಲೆಂ.
ಮಾಧು ವಾಡ್ಲೊ. ತರೀ ತಾಕಾ ಶಿಕ್ಪಾಚಿ ಸವ್ಲತಾಯ್ ನಾ ಜಾಲಿ. ಹಾಂಗಾ ಇಸ್ಕೊಲ್ ನಾತ್ಲ್ಲೆಂ. ತಾಂಕ್ ಆಸ್ಲ್ಲೆ ಮಾತ್ರ್ ತಾಂಚಾ ಭುರ್ಗ್ಯಾಂಕ್ ವಾಹನಾರ್ ಪಯ್ಶಿಲ್ಯಾ ಗಾಂವಾಕ್ ಇಸ್ಕೊಲಾಕ್ ಧಾಡ್ತೆಲೆ. ಆನಿ ಅಶೆಂ ಆಸ್ತಾನಾ ಏಕ್ ಘಡಿತ್ ಘಡ್ಲೆಂ,
ತ್ಯಾ ಸಾವ್ಕಾರಾಚೊ ಎಕ್ಲೊ ಭಾವೊಜಿ ತ್ಯಾ ದಿಸಾ ತ್ಯಾ ಎಸ್ಟೇಟಾಕ್ ಪಾವ್ಲೊ. ತೊ ಬೆಂಗ್ಳುರಾಂತ್ ಆನಿ ಆಂಧ್ರಾಂತ್ ಹೊಟೆಲಾಂ ಚಲಯ್ತಾಲೊ ಖಂಯ್. ತಾಚಾ ಗಳ್ಯಾಂತ್ ಬೊಟಾ ತಿತ್ಲಿ ಮೊಟಿ ಭಾಂಗಾರಾಚಿ ಸರ್ಪೊಳಿ! ಹರ್ಯೆಕಾ ಹಾತಿಂ ಚಾರೀ ಬೊಟಾಂಕ್ ಥಿಕಾಂಚ್ಯೊ ಮುದಿಯೊ! ಧೀಗ್, ಧಡಂಗ್, ಗಂಭೀರ್ ವ್ಯಕ್ತಿ ತೊ! ರಾಗಿಷ್ಟ್ ವ್ಯಕ್ತಿ ತಸೊ ದಿಸ್ತಾಲೊ.
ಆನಿ ತೊ ಆಯಿಲ್ಲೊ ತಾಚಾ ಹೊಟೆಲಾಚಾ ಕಾಮಾಕ್ ಭುರ್ಗ್ಯಾಂಕ್ ವರ್ಚಾಕ್. ಸಾವ್ಕಾರ್ಯೀ ಹ್ಯಾ ತಾಚಾ ಭಾವೊಜಿಕ್ ಭಾರಿಚ್ಚ್ ಭಿಯೆತಾಲೊ. ಆನಿ ತಾಣೆಂ ಸರ್ವ್ ಆಪ್ಲ್ಯಾ ಕಾಮಾಗಾರಾಂಕ್ ಎಕ್ಟಾಂಯ್ ಕರ್ನ್ ಇರಾದೊ ಕಳಯ್ಲೊ.
ಆನಿ ಆತಾಂ ಮಂಜು ಆನಿ ಚೆನ್ನಿಚೆರೀ ಆಕಾಂತ್ ಆಯಿಲ್ಲೊ. ತಾಂಚಾ ಬಾಳಾಕೀ ಆತಾಂ ಧಾಡುಂಕ್ ಪಡ್ಲ್ಲೆಂ.
ತ್ಯಾ ರಾತಿಂ ರಡೊನ್ ರಡೊನ್ ಚೆನ್ನಿಚೆಂ ಉಶೆಂ ಪುರ್ತೆಂ ಭಿಜ್ಲ್ಲೆಂ. ಮಂಜುಯೀ ಭೋವ್ ಬೆಜಾರಾಯೆನ್ ಆಸ್ಲ್ಲೊ. ತ್ಯಾ ರಾತಿಂ ತಿಂ ದೊಗಾಂ ಜೇಂವ್ಕ್ ನಾಂತ್.
ಆನಿ ದುಸ್ರ್ಯಾ ದಿಸಾ ಜೀಪ್ ಆಯ್ತೆಂ ಜಾಲ್ಲೆಂ. ಸಬಾರ್ ಭುರ್ಗಿಂ ತಾಂತು ಬಸ್ಲ್ಲಿಂ. ಮಾಧುಯೀ ಬಸ್ಲ್ಲೊ. ತೊ ಭಾರಿಚ್ಚ್ ಖುಶೆನ್ ಆಸ್ಲ್ಲೊ. ಜೀಪ್ ಆತಾಂ ಸುಟ್ಲೆಂ. ಆನಿ ಥೊಡ್ಯಾ ವೆಳಾನ್ ತೆಂ ದೊಳ್ಯಾಂ ಥಾವ್ನ್ ಪಯ್ಸ್ ಜಾಲ್ಲೆಂ.
ಮಂಜುಕ್ ಆನಿ ಚೆನ್ನಿಕ್ ಹಾಂಗಾ ಇಸ್ಕೊಲ್ ಆರಂಭ್ ಕರಿನಾಸ್ತಾನಾ ರಾವ್ಲ್ಲ್ಯಾಚೊ ಮತ್ಲಬ್ ಆತಾಂ ಸುಸ್ತಾಲ್ಲೊ!
ಆಂಧ್ರಾಚಾ ನೆಲ್ಲೂರಾಂತ್ ’ಗಣೇಶ್ ಭವನ’ ಏಕ್ ಭಾರಿಚ್ಚ್ ವ್ಹಡ್ಲೆಂ ಹೊಟೆಲ್. ಥಂಯ್ಸರ್ ಮಾಧುಕ್ ಕಾಮ್ ಕರುಂಕ್ ಸಾವ್ಕಾರಾನ್ ನಮಿಯಾರ್ಲೆಂ. ತೊ ಸಾವ್ಕಾರ್ ಕಾಮಾಗಾರಾಂಕ್ ಭಾರಿ ಕಠಿಣಾಯೆನ್ ದೆಖ್ತಾಲೊ. ಹ್ಯಾ ಕಾಮಾಗಾರಾಂಕ್ ಪಳೆಂವ್ಕ್ ಎಕ್ಲೊ ಮನಿಸ್ ಆಸ್ಲ್ಲೊ. ಹೊ ಮನಿಸ್ ಭೋವ್ ಅಪಾಯ್ಕಾರೀ ವ್ಯಕ್ತಿ ಜಾವ್ನ್ ಆಸ್ಲ್ಲೊ. ತಾಚೆಂ ನಾಂವ್ ’ಗಿರಿಧರ್’ ಜಾವ್ನ್ ಆಸ್ಲ್ಲೆಂ.
ಹೊ ಗಿರಿಧರ್ ಏಕ್ ’ವಿಕೃತ್ ಆನಿ ಸ್ವಲಿಂಗ್ ಕಾಮಿ" ಜಾವ್ನಾಸ್ಲ್ಲೊ. ತೊ ಆಪ್ಲ್ಯಾ ಆಶೆಕ್ ಥಾಂಬಂವ್ಕ್ ಕಾಮೆಲಿ ಭುರ್ಗ್ಯಾಂಕ್ ವಾಪರ್ತಾಲೊ. ಜರಿತರೀ ಕೊಣೀ ತಾಚೆ ಆಶೆಕ್ ಕಬೂಲ್ ಜಾಯ್ನಾಂತ್ ತರ್; ಸಾವ್ಕಾರಾಕಡೆನ್ ತಾಂಚಿ ನಾಕಾ ಜಾಲ್ಲಿಂ ದೂರಾಂ ಸಾಂಗೊನ್ ಕಶ್ಟ್ ದಿತಾಲೊ.
ಆನಿ ಹ್ಯಾ ಗಿರಿಧರಾಚಿ ದೀಶ್ಟ್ ಸುಂದರ್ ಆನಿ ಪುಡ್ಪುಡಿತ್ ಮಾಧುಚೆರ್ ಪಡ್ಲಿ. ಆನಿ ಮಾಧುಕ್ ತೊ ನಾಡುಂಕ್ ಸುರು ಜಾಲೊ. ತರೀ ಮಾಧುಕ್ ಹೆಂ ಕಿತೆಂ ಮ್ಹಣೊನೀ ಸಮ್ಜೊಂಕ್ನಾತ್ಲ್ಲ್ಯಾನ್ ತ್ಯಾ ಇರಾದ್ಯಾಕ್ ಕಬೂಲ್ ಜಾಂವ್ಕ್ ನಾ. ಆನಿ ದೆಕುನ್ ಗಿರಿಧರ್ ತ್ಯಾ ಮಾಧುಚೆರ್ ಗುನ್ಯಾಂವ್ ಮಾಂಡುಂಕ್ ಸಂದ್ರಾಪ್ ಪಳೆವ್ನ್ ಆಸ್ತಾ.
ಆನಿ ತೊ ದೀಸ್ ಆಯ್ಲೊಚ್ಚ್.
ತ್ಯಾ ಹೊಟೆಲಾಂತ್ ಬರಿಂ ಬರಿಂ ಪರ್ಮಳಿಕ್ ಆನಿ ರುಚಿಕ್ ಖಾಣಾಂ ತಯಾರ್ ಜಾತೆಲಿಂ. ತರೀ ಕಾಮಾಗಾರಾಂಕ್ ತಿಂ ಮೆಳಾನಾತ್ಲ್ಲಿಂ. ಮಾಧುಯೀ ತಿಂ ಖಾಂವ್ಕ್ ಆಶೆತಾಲೊ. ವೇಳ್ ಮೆಳ್ಲ್ಲ್ಯಾ ವೆಳಾರ್ ತೊ ಆಶೆನ್ ಖಾಣಾಚ್ಯಾ ಕಬಾಟಾಕ್ ಪಳೆತಾಲೊ. ಪುಣ್, ತೆಂ ಖಾಣ್ ಮಾತ್ರ್ ತಾಕಾ ’ಅರ್ಶ್ಯಾ ಭಿತರ್ಲಿ ಗಾಂಟ್’ ಜಾವ್ನ್ಂಚ್ ಉರಲ್ಲೆಂ.
ಗಾಂವಾ ಥಾವ್ನ್ ಯೆತಾನಾ ತಾಚಾ ಆವಯ್ನ್ ತಾಚಾ ಹಾತಾರ್ ಏಕ್ ರುಪ್ಯಾಚಿ ಪಾವ್ಲಿ ಘಾಲ್ಲಿ. ಆನಿ ತಿ ತಾಣೆಂ ಚತ್ರಾಯೆನ್ ಚಡ್ಡೆಚ್ಯಾ ಬೊಲ್ಸಾಂತ್ ದವರ್ನ್ ಸಾಂಬಾಳೆಲ್ಲಿ. ಥೊಡೆ ಪಾವ್ಟಿಂ ತ್ಯಾ ರುಪ್ಯಾನ್ ಕಿತೆಂಯ್ ಖಾಣ್ ಘೆಂವ್ಕ್ ಮ್ಹಣೊನ್ ಚಿಂತ್ತಾಲೊ. ಆನಿ ಏಕ್ ದೀಸಾ ತಾಣೆ ಆನೇಕ್ಲ್ಯಾ ಕಡೆನ್ ವಿಚಾರ್ ಕೆಲೊ. ಆನಿ ಏಕ್ ರುಪ್ಯಾಕ್ ಮೆಳ್ಚೆಂ ಖಾಣ್ ಥಂಯ್ಸರ್ ಕಿತೆಂಚ್ ನಾಂ ಮ್ಹಳ್ಳೆಂ ಸಮ್ಜಲೆಂ. ಉಪ್ರಾಂತ್ ತಿ ಆಶಾಯೀ ತಾಣೆಂ ಸಾಂಡ್ಲ್ಲಿ.
ಆಜ್ ಹೊಟೆಲಾಕ್ ಸಾವ್ಕಾರಾಚಿಂ ಸಯ್ರಿಂ ಆಯಿಲ್ಲಿಂ. ತಾಂಚೆ ಪಯ್ಕಿಂ ಏಕ್ಲೊ ಧಡಂಗ್ ಕುಡಿಚೊ ಆಸ್ಲ್ಲೊ. ತಾಕಾ ಸಾಕರ್ ಖಾಂವ್ಕ್ ಆಡ್ವಾರ್ಲೆಲೆಂ ಆಸ್ತೆಲೆಂ. ತಾಣೆಂ ತಾಚಾ ಪ್ಲೇಟಿಂತ್ ಮೈಸೂರ್ ಪಾಕಾಚೊ ಕುಡ್ಕೊ ಖಾಯ್ನಾಸ್ತಾಂ ಸೊಡ್ಲ್ಲೊ. ಆನಿ ಪ್ಲೇಟಿ ಧುಂವ್ಕ್ ವೊರ್ತಾನಾ ಮಾಧುನ್ ಹೆಂ ಪಳಯಿಲ್ಲೆಂ. ತಾಣೆಂ ಚತ್ರಾಯೆನ್ ತೊ ಕುಡ್ಕೊ ಏಕಾ ಕಾಗ್ದಾಂತ್ ಬಾಂಧುನ್ ಬೊಲ್ಸಾಂತ್ ಚೆಪ್ಲೊ. ಆನಿ ಹಾಚೆರ್ ಗೀದಾಚಿ ನದರ್ ದವರ್ನ್ ಆಸ್ಲ್ಲ್ಯಾ ತ್ಯಾ ಗಿರಿಧರಾಚಿ ದೊಳ್ಯಾಕ್ ಹಿ ಗಜಾಲ್ ಪಡ್ಲಿ. ತಾಕಾ ಆತಾಂ ಭಾಜ್ಲ್ಲೆಂ ಮೆಳ್ಳೆಂ.
ಥೊಡ್ಯಾಚ್ಚ್ ವೇಳಾನ್ ಸಾವ್ಕಾರಾಚಾ ರೂಮಾ ಥಾವ್ನ್ ಮಾಧುಕ್ ಬುಲಾವ್ ಆಯ್ಲೊ. ಮಾಧು ಸಂತೊಸಾನ್ ಸಾವ್ಕಾರಾಚಾ ಕುಡಾಕ್ ಗೆಲೊ.
ಮರ್ಜೆಚೊ ಸಾವ್ಕಾರ್ ತೊ. ತಾಚಿ ಗ್ರೇಸ್ತಾಕಾಯ್ ತ್ಯಾ ಕುಡಾಂತ್ ಹರ್ಯೆಕ್ ಕಡೆ ಉಟೊನ್ ದಿಸ್ತಾಲಿ!
ಮಾಧು ಇಲ್ಲಿ ಬಾ.... ಎಕಾಚ್ಛಾಣೆ ಘಡ್ಗಡ್ಯಾಬರಿ ತಾಳೊ ಮಾಧುಚಾ ಕಾನಾಕ್ ಆಪ್ಟಾಲೊ. ಮಾಧು ಕಾವ್ಜೆವ್ನ್ ತಾಚೆ ಮುಕಾರ್ ಉಬೊ ಜಾಲೊ.
"ಇವತ್ತು ಎಷ್ಟು ತಿಂಡಿ ಕದ್ದಿದ್ದೀಯಾ?" ಸಾವ್ಕಾರ್ ಉದ್ಗಾರ್ಲೊ. ಮಾಧುನ್ ಚೊರುಂಕ್ ನಾತ್ಲ್ಲೆಂ. ದೆಕುನ್ ತೊ ಧಯ್ರಾನ್ ಮ್ಹಣಾಲಾಗ್ಲೊ "ಇಲ್ಲ... ನಾನು..... ತಿಂಡಿ.... ಕದಿಯಲಿಲ್ಲ....". ಸಾವ್ಕಾರಾನ್ ಚಾಕ್ರಾಕಡೆಂ ಮಾಧುಚಿಂ ಬೊಲ್ಸಾಂ ತಪಾಸುಂಕ್ ಸಾಂಗ್ಲಿ. ಆನಿ ತ್ಯಾ ವೆಳಿಂ... ತಾಕಾ ಮೆಳ್ಳೆಂ... ಕಾಗ್ದಾಂತ್ ಗುಟ್ಲಾಯಿಲ್ಲೆಂ ತೆಂಚ್ ಮೈಸೂರ್ಪಾಕ್!
ಆನಿ ತ್ಯಾಚ್ ಘಡಿಯೆ... "ಬಡ್ಡಿ ಮಗನೇ.... ಕದ್ದು ತಿಂದು ಆಮೇಲೆ ಸುಳ್ಳು ಹೇಳ್ತಿಯಾ?" ಮ್ಹಳ್ಳ್ಯಾ ಉಲ್ಯಾ ಸಂಗಿಂ ಏಕ್ ಬಳ್ವಂತ್ ಥಾಪಡ್ ಮಾಧುಚಾ ಕಾನ್ಸುಲಾರ್ ಅಂರ್ದಾಲೆಂ. ಮಾಧುಚ್ಯಾ ದೊಳ್ಯಾಂನಿ ಕಿಟಾಳಾಂ ಉಸಾಳ್ಳಿಂ. ಪರತ್ ಸಾವ್ಕಾರಾನ್ ವಿಚಾರ್ಲೆಂ "ಎಷ್ಟು ಸಮಯದಿಂದ್ ಹೀಗೆ ಮಾಡ್ತಿದ್ದೀಯಾ?" "ಇಲ್ಲ್, ನಾನು ಯಾವಾಗಲೂ ಹೀಗೆ ಮಾಡಿಯೇ ಇಲ್ಲ" ಮ್ಹಣಾಲೊ ಮಾಧು ರಡೊನ್. "ಇಲ್ಲ ನೀನು ಸುಳ್ಳು ಹೇಳುತ್ತಿ.... ನಿನ್ನನ್ನು ಹೀಗೆ ಬಿಡುವುದಿಲ್ಲ" ಮ್ಹಣೊನ್ ಸಾವ್ಕಾರ್ ಉಟ್ಲೊ. ತಾಣೆ ಮಾಧುಚ್ಯಾ ಕೊಲರಾಚ್ಯಾ ಪಟ್ಟೆಕ್ ಧರ್ನ್ ಉಬಾರ್ಲೆಂ ಆನಿ ಆನ್ಯೇಕ್ ಬಳ್ವಂತ್ ಥಾಪಡ್ ತ್ಯಾ ತರ್ನ್ಯಾ ಕಾನ್ಸುಲಾರ್ ಬಸಯ್ಲೆಂ..... "ಅಮ್ಮಾ" ಮ್ಹಣಾಲೊ ಮಾಧು. ತಾಣೆ ಜೊರಾನ್ ಹಾತ್ ಪಾಂಯ್ ಬಡಯ್ಲೆ. ಸಾವ್ಕಾರಾನ್ ಉಬಾರ್ನ್ ತಾಕಾ ಧರ್ಣಿರ್ ಉಡಯ್ಲೊ. ಮಾಧುನ್ ಗೊಮ್ಟಿ ಆಡ್ ಘಾಲಿ; ತೊಂಡಾಂತ್ ಫೆಂಡ್ ಯೇಂವ್ಕ್ ಸುರು ಜಾಲ್ಲೊ! ಕೂಡ್ ನಿಳ್ಶಿ ಜಾಯ್ತ್ ಆಯ್ಲಿ. ಚಾಕ್ರಾನ್ ಉದಾಕ್ ಮಾರ್ಲೆಂ. ಕಿತೆಂಚ್ ಪ್ರಯೋಜನ್ ನಾಂ ಜಾಲೆಂ.
ಸಾವ್ಕಾರಾನ್ ಪಾಯಾನ್ ಮಾಧುಚಿ ಕೂಡ್ ಹೆಣೆತೆಣೆಂ ಪರ್ತಿಲಿ. ತೊ ಮೆಲಾ ಮ್ಹಳ್ಳೆಂ ಕಳ್ತಚ್ಚ್ ಘಾಬರ್ಲೊ ತರೀ ಅಸಲ್ಯಾ ಕಾಮಾಂತ್ ತೊ ಫಾಮಾದ್ ಜಾಲ್ಲೊ. ತಾಣೆ ಚಾಕ್ರಾಕ್ ಆಪವ್ನ್ ತ್ಯಾ ಕುಡಿಚೆರ್ ಏಕ್ ವಸ್ತುರ್ ಧಾಂಪುಂಕ್ ಸಾಂಗ್ಲೆಂ.
ವಸ್ತುರ್ ಧಾಂಪ್ತಾನಾ ಚಾಕ್ರಾನ್ ಮಾಧುಚಿ ಮೂಟ್ ಬಾಂಧುನ್ ಆಸ್ಲ್ಲಿ ತಿ ಪಳೆವ್ನ್ ಉಸಯ್ಲಿ. ಆನಿ ಥಂಯ್ಸರ್ ಮಾಧುನ್ ಜಾಗ್ರುತ್ ಸಾಂಬಾಳುನ್ ದವರ್ಲೆಲೆಂ ಏಕ್ ರುಪ್ಯಾಚೆಂ ನಾಣೆಂ ಮೆಳ್ಳೆಂ. ಆನಿ ತೆಂ ತಾಣೆಂ ಸಾವ್ಕಾರಾಕ್ ದಾಖಯ್ಲೆಂ. ಸಾವ್ಕಾರ್ ಆಪ್ಲ್ಯಾ ಕೃತ್ಯಾಚೆಂ ಸಮರ್ಥನ್ ಕರ್ನ್ ಮ್ಹಣಾಲೊ " ದರಿದ್ರ ಮುಂಡೇದು... ಹಣ ಕೂಡಾ ಕದೀತಿತ್ತು.
ಆನಿ ತ್ಯಾ ರಾತಿಂ ಮಾಧುಚಿ ಕೂಡ್ ನಿಕೆಪುಂಚಿ ವ್ಯವಸ್ಥ್ ಜಾಲಿ. ಪಾತ್ಯೆಣೆಚ್ಯಾ ಕಾಮೆಲ್ಯಾಕ್ ಹಾಡವ್ನ್; ಹೊಟೆಲಾಚಾ ರಾಂದ್ನಿ ಕುಶಿನಿಂಚ್ ಧರ್ಣಿಂತ್ ಫೊಂಡ್ ಕಾಡ್ನ್; ತಿ ಮಾತಿಯೆಕ್ ಪಾಯ್ಲಿ. ತಾಚೆರ್ ಸಿಮೆಂಟಿಚೊ ಗಾರೊ ಲಾಯ್ಲೊ. ಆನಿ ಸತಾ ಖಾತಿರ್ ಜೀವ್ ದಿಲ್ಲ್ಯಾ ಏಕ್ ಬಾಳಾಚಾ ಕಾಣಿಯೆಚೆಂ ಪ್ರಕರಣ್ ಥಂಯ್ಸರ್ ಧರ್ಣಿ ಪಂದಾ ಲಿಪ್ಲೆಂ!
ಸಬಾರ್ ದಿಸಾಂ ಉಪ್ರಾಂತ್ ಹಿ ಖಬಾರ್ ಗಾಂವಾಕ್ ಗೆಲಿ. ಮಂಜುಕ್ ಎಕ್ಸಿಡೆಂಟ್ ಜಾಲೆಂ; ತಾಚಿ ಕೂಡ್ ಪಿಟೊ ಜಾಲ್ಲಿ; ದೆಕುನ್ ಗಾಂವಾಕ್ ಧಾಡಿನಾಸ್ತಾನಾ ಮಾತಿಯೆಕ್..... ಪೊಲಿಸಾನಿಂಚ್ ಪಾಯ್ಲಿ ಮ್ಹಳ್ಳೆಂ; ಮಂಜುಕ್ ಆನಿ ಚೆನ್ನಿಕ್ ಕಳಿತ್ ಜಾಲೆಂ. ಕಾನೂನಾಚಿ ಝಳಕ್ ನಾತ್ಲ್ಲ್ಯಾ ತಾಣಿ ಕರ್ಚೆಂ ತರೀ ಕಿತೆಂ? ಚೆನ್ನಿ ಹಾಕ್ ಬೋಬ್ ಮಾರಿಲಾಗ್ಲೆಂ. ಆನಿ ತ್ಯಾ ದೀಸ್ ಪಯ್ಲೆ ಪಾವ್ಟಿಂ ಮಂಜು ಎಸ್ಟೇಟಾ ಕುಶಿಚಾ ಗಡಂಗಾಕ್ ಪಾವ್ಲೊ. ಥಂಯ್ ತೊ ಖೂಬ್ ಪಿಯೆಲೊ. ದಿಸಾನ್ ದೀಸ್ ಹಿ ತಾಚಿ ಸವಯ್ ವಾಡೊನ್ ಯೆತಾಲಿ. ಚೆನ್ನಿನ್ ಕಿತ್ಲೆಂ ಸಾಂಗ್ಲ್ಯಾರೀ ಮಂಜು ಥಂಯ್ ಬದ್ಲಾಪ್ ಜಾಂವ್ಕ್ ನಾಂ. ಅಶೆಂ ತ್ಯಾ ಕುಟ್ಮಾಚೆರ್ ಖರ್ಗಾಂ ಯೇಂವ್ಕ್ ಸುರು ಜಾಲಿಂ.
ದೀಪಾವಳಿಚಾ ರಜೆಕ್ ಕಾಮೆಲಿ ಪೂರಾ ಗಾಂವಾಕ್ ಗೆಲ್ಲೆ. ಥಂಯ್ ಉರ್ಲ್ಲೆಂ ಮ್ಹಳ್ಯಾರ್ ಮಂಜುಚೆಂ ಕುಟಾಂಬ್ ಮಾತ್ರ್. ವೊರಾಂ ರಾತಿಚಿಂ ಇಕ್ರಾ ಜಾವ್ನ್ ಯೆತಾಲಿಂ. ಚೆನ್ನಿಚಾ ಘರಾಂತ್ ಚಿಮ್ಟಿ ಆನಿಕೀ ಪೆಟೊನ್ ಆಸ್ಲ್ಲಿ. ತಾಚಾ ಮಂಜುಕ್ ಘರಾ ಯೇಂವ್ಕ್ ಆನಿಕೀ ವೇಳ್ ಜಾವ್ನಾಸ್ಲೊ. ಚೆನ್ನಿಕ್ ತಶೀಚ್ಚ್ ಜೆಮ್ ಯೆಂವ್ಕ್ ಸುರು ಜಾಲ್ಲಿ. ತೆಂ ಬಸ್ಲ್ಲೆ ಕಡೆನ್ಂಚ್ ಝೆಮೆಂವ್ಕ್ ಲಾಗ್ಲೆಂ. ತಿತ್ಲ್ಯಾರ್ ಏಕ್ ಕಾಳೆಂ ಪಾಂಗೊರ್ನ್ ಆಯಿಲ್ಲಿ ವ್ಯಕ್ತಿ ಭಿತರ್ ಪಾವ್ಲಿ! ತಾಚೆ ಸಂಗಿಂ ಆನಿಕೀ ದೋಗ್ ತೇಗ್ ವ್ಯಕ್ತಿ ಆಸ್ಲ್ಲೆ. ತೆ ಭಾಯ್ಲ್ಯಾನ್ ಪುಸ್ಪುಸ್ತಾಲೆ.
ಆನಿ ಚೆನ್ನಿಕ್ ಜಾಗ್ ಜಾತಾನಾ; ತಾಣೆ ಬೋಬ್ ಮಾರುಂಕ್ ತಯಾರ್ ಜಾತಾನಾ; ತ್ಯಾ ವ್ಯಕ್ತಿಚೊ ಬಳ್ವಂತ್ ಹಾತ್ ತಾಚಾ ತೊಂಡಾರ್ ಬಸ್ತಾ; ಆವಾಜ್ ಥಾಂಬ್ತಾ. ಚೆನ್ನಿ ವಾಗಾಂಚಾ ಹಾತಿಂ ಸಾಂಪಡ್ಲ್ಯಾ ಚಿತ್ಳಾ ಪರಿಂ ವಳ್ವಳ್ಳೆಂ ತರೀ ಆಯಿಲ್ಲೆ ಹರ್ಯೆಕ್ ವಾಗ್ಯೀ ತಾಚಾ ಕುಡಿರ್ ಆಕ್ರಮ್ ಕರ್ನ್; ಭುಕ್ ಥಾಂಬವ್ನ್ ರಾತ್ಚ್ಯಾ ಕಾಳೊಕಾಂತ್ಲ್ಯಾನ್ ಮಾಯಾಗ್ ಜಾತಾತ್!
ದೀಸ್ ಉದೆಲೊ. ಹರ್ಶೆಂಚಾ ಬರೀ ಮಂಜು ಚೆನ್ನಿಚಾ ಚಾಯೆಕ್ ರಾಕ್ತಾ. ಕುಶಿಕ್ ದೆಖ್ತಾ ಚೆನ್ನಿಚಿ ಕೂಡ್ ಧರ್ಣಿರ್ ಪಡ್ಲ್ಯಾ. ವಸ್ತುರ್ ಅಸ್ತವ್ಯಸ್ತ್ ಜಾಲಾಂ. ಥಂಯ್ ಥಂಯ್ ರಗ್ತಾಚಿಂ ಖತಾಂ. ಕಿತೆಂ ಜಾಲೆಂ ಮ್ಹಜಾ ಚೆನ್ನಿಕ್ ಮ್ಹಣೊನ್ ಲಾಗಿಂ ಸರ್ತಾ. ಥಂಡ್ ಜಾಲ್ಲಿ ತಿ ಕೂಡ್ ಆಪಡ್ತಾ. ತಿ ಚೆನ್ನಿಚಿ; ಆಪ್ಣಾ ಖಾತಿರ್ ಸರ್ವ್ ತ್ಯಾಗ್ ಕರ್ನ್; ಆಪ್ಲೊ ಪಾಟ್ಲಾವ್ ಕರ್ನ್; ಆಪ್ಣಾಚೆರ್ಚ್ಚ್ ಪಾತಿಯೆಲ್ಲ್ಯಾ ಚೆನ್ನಿಚಿ; ತಿ ನಿರ್ಜೀವ್ ಕೂಡ್.... ತೊ ದೆಖ್ತಾ.... ಪಶ್ಚಾತ್ತಾಪಾ ಸಂಗಿಂ ತೊ ಆಕ್ಲಾಸ್ತಾ. ತರೀ ಕಿತೆಂ ಫಾಯ್ದೊ?
ತಿತ್ಲ್ಯಾರ್ ತೊಟಾಚೊ ರಾಯ್ಟರ್ ಥಂಯ್ಸರ್ ಸಾಂಗಾತ್ಯಾಂ ಸಂಗಿಂ ಯೆತಾ. ಗಜಾಲ್ ಸಮ್ಚೊವ್ನ್ ಚುರ್ಚುತಾ. ಆನಿ ತೊ ಮಂಜುಕ್ ಏಕ್ ಬರೀ ಸಲಹಾ ದಿತಾ. ಹಿ ಗಜಾಲ್ ಪೊಲಿಸಾಂಕ್ ಕಳಂವ್ಚಿ ನಾಕಾ ಮ್ಹಣ್ತಾ. ಮಂಜುಯೀ ಪಿಯೆತಾಲೊ ಜಾಲ್ಲ್ಯಾನ್ ತಾಚೆರ್ಚ್ಚ್ ಖುನಿಯೆಚೊ ಬದ್ಲಾಮ್ ಯೇಂವ್ಕ್ ಸಾಧ್ಯ್ ಆಸಾ ಮ್ಹಣ್ತಾ. ಮಂಜುಯೀ ಹೆಂ ಆಯ್ಕೊನ್ ಕಾವ್ಜೆತಾ! ಬರಿ ಸಲಹಾ ದೀವ್ನ್ ಆಪ್ಣಾಕ್ ಆಪಾಯಾಂತ್ಲೆಂ ರಾಕೊನ್ ವ್ಹೆಲ್ಲ್ಯಾ ರಾಯ್ಟರಾಚೆರ್ ತಾಕಾ ಭಾರಿಚ್ಚ್ ಅಭಿಮಾನ್ ಭಗ್ತಾ. ಹ್ಯಾ ಸಲಹೆಕ್ ಸಯ್ ಮ್ಹಣ್ತಾ. ಆನಿ ಆಬ್ಳೆ ಚೆನ್ನಿಚಿ ತಿ ನಿರ್ಜೀವ್ ಕೂಡ್; ಎಸ್ಟೇಟಾಚಾ ಎಕಾ ಮುಲ್ಯಾಂತ್ ಮಾತಿಯೆ ಪಂದಾ ಲಿಪ್ತಾ. ಆನಿ ಕಾಣೆಯೆಚೆಂ ದುಸ್ರೆಂ ಪ್ರಕರಣ್ಯೀ ಖಬ್ರೆವಿಣೆಂ ಧಾಂಪೊನ್ ವೆತಾ.
ವಯ್ಲ್ಯಾನ್ ಮಂಜುಕ್ ತಾಚ್ಯಾ ಬರ್ಯಾಪಣಾ ಖಾತಿರ್ ಎಸ್ಟೇಟ್ ಸೊಡ್ನ್ ವಚೊಂಕೀ ಸಲಹಾ ಮೆಳ್ತಾ. ಮಂಜು ಹಾಕಾಯೀ ಕಬೂಲ್ ಜಾತಾ.
ಆತಾಂ ರಾಯ್ಟರ್ ಮಂಜುಕ್ ಭೋವ್ಚ್ಚ್ ಮೆಚ್ವಾತಾ. "ಪಾಪ ಮಂಜು ತುಂಬಾ ಒಳ್ಳೆ ಮನುಷ್ಯ್; ಅವನಿಗೆ ಈ ಕಷ್ಟ್ ಬರಬಾರದಿತ್ತು" ತೊ ಮ್ಹಣ್ತಾ ಆನಿ ಆಪ್ಲ್ಯಾ ಸಾಂಗಾತ್ಯಾಂಕ್ ವಕ್ಲಾ ಭಿತರ್ಲ್ಯಾನ್ ಪಳೆವ್ನ್ ದೊಳೆ ಮೊಡ್ತಾ ಆನಿ ಆಮ್ರುಕೊ ಹಾಸ್ತಾ. ಮಿಶ್ಯಾಂ ಭಿತರ್ ಹಾಸ್ಲ್ಲೆಂ ತೆಂ ಮಂಜುಕ್ ಕಳಾನಾ ಜಾತಾ.
ಪಯ್ಲೆ ಪಾವ್ಟಿಂ ಮಂಜು ಸರ್ವ್ ಆಪ್ಲೆಂ ಮ್ಹಳ್ಳೆಂ ಹೊಗ್ಡಾವ್ನ್ ಗಾಂವಾಕ್ ಯೇಂವ್ಕ್ ಬಸ್ಸಾರ್ ಬಸ್ತಾ. ಬಸ್ಸ್ ಧಾಂವ್ತಾನಾ ತಾಚ್ಯಾ ದೊಳ್ಯಾಂ ಮುಕಾರೀ ಆದ್ಲಿಂ ಘಡಿತಾಂ ಧಾಂವ್ತಾತ್. ಸರ್ವ್ ಏಕ್ ಸ್ವಪಾಣ್ ತಶೆಂ ತಾಕಾ ಭಗ್ತಾ.
ಗಾಂವಾಕ್ ಪಾವ್ತಾನಾ ಕಾಳೊಕ್ ಜಾಲಾ. ಗಾಂವಾಂತ್ ವಿಶೇಸ್ ಬದ್ಲಾವಣ್ ಜಾಲ್ಯಾ ತರೀ ಸವಯೆ ಪ್ರಮಾಣೆ ತಾಚೆ ಪಾಯ್ ತಾಕಾ ತಾಚ್ಯಾ ಘರಾ ಕುಶಿನ್ ವೋಡ್ನ್ ವರ್ತಾತ್ ತರೀ ಥಂಯ್ಸರ್ ಪಾವ್ತಾನಾ ತಾಚೆಂ ಘರ್ಚ್ಚ್ ನಪಂಯ್ಚ್ ಜಾಲ್ಲೆಂ ದಿಸೊನ್ ಯೆತಾ! ಆಪ್ಲಿ ಆವಯ್ಯೀ ಮೆಳಾನಾ.
ಭಾರಾದೀಕ್ ಕಾಳ್ಜಾನ್ ತೊ ಮೆಟಾಂ ಕಾಡ್ನ್ ಪಾಟಿಂ ಘುಂವ್ತಾ. ಆಪ್ಣೆಂ ಖಂಯ್ಸರ್ ಆತಾಂ ವೆಚೆಂ? ಮ್ಹಜಿಂ ಮ್ಹಳ್ಳಿಂ ಹ್ಯಾ ಸಂಸಾರಾಂತ್ ಕೋಣ್ ಆಸಾತ್? ತೊ ಚಿಂತ್ತಾ. ಶೀದಾ ತೊ ಗಡಂಗಾಚಿ ವಾಟ್ ಧರ್ತಾ. ಕಿತ್ಯಾಕ್ ಹರ್ಯೆಕಾ ಗಾಂವಾಂತ್ ಗೆಲ್ಯಾರ್; ಏಕ್ ಘಡಿ ತರೀ ’ಯೆ ಬಸ್’ ಮ್ಹಣೊನ್ ಒಳ್ಕಾತೆಲೆಂ ತೆಂ ಮಾತ್ರ್!
ಥಂಯ್ಸರ್ ತೊ ಖೂಬ್ ಪಿಯೆತಾ.... ಆನಿ ಆಜ್ ತಾಕಾ ಜೆವಾಣ್ಯೀ ನಾಕಾ. ಧಾ ವರ್ಸಾಂ ಉಪ್ರಾಂತ್ ತೊ ಆಪ್ಲ್ಯಾ ಮಾಂಯ್ ಗಾಂವಾಂಕ್ ಪಾವ್ಲಾ! ಆತಾಂ ಬರೀ ನೀದ್ ಕಾಡಿಜಾಯ್. ಖಂಯ್ ವೆಚೆಂ? ತೊ ಚಿಂತ್ತಾ. ಆನಿ ನಿಮಾಣೆಂ ತಾಚ್ಯಾ ಗಾಂವ್ಚ್ಯಾ ತಳ್ಯಾ ತಡಿರ್ ಆಸ್ಚ್ಯಾ ತ್ಯಾ ಆಂಬ್ಯಾ ಕಾಟ್ಯಾರ್ ನಿದೊಂಕ್ ನಿಶ್ಚಯ್ಸಿತಾ. ಆನಿಕೀ ಥಂಯ್ಸರ್ ಪಾವ್ತಾ. ಕಾಟ್ಯಾರ್ ಏಕ್ ಘಡಿ ಬಸ್ತಾ.
ಪಯ್ಶಿಲ್ಯಾ ಮೊಳ್ಬಾರ್ ಪುನ್ವೆಚೊ ಚಂದ್ರೆಮ್ ದಿಸ್ತಾ. ಏಕ್ ಘಡಿ ಬರ್ ತೊ ತಾಕಾಚ್ಚ್ ಪಳೆತಾ. ವ್ಹಯ್ ತೊ ಚಂದ್ರೆಮ್ ತಸೊಚ್ಚ್ ಆಸಾ; ತೊ ಬದ್ಲೊಂಕ್ನಾ. ಚಿಂತ್ತಾಂ ಚಿಂತ್ತಾಂ ತಾಂತು ತಾಕಾ ಚೆನ್ನಿ ಆನಿ ಮಾಧು ದಿಸ್ತಾತ್! ತಿಂ ಸಂತೊಸಾನ್ ಆಸಾತ್ ತಶಿಂ ದಿಸ್ತಾತ್. ಮಾಧು ತಾಕಾ ಆಪಯ್ತಾ "ಅಪ್ಪಾ ಬನ್ನಿಯಪ್ಪಾ....’ ಚೆನ್ನಿ ಮ್ಹಣ್ತಾ "ಬನ್ನಿ...... ಇಲ್ಲಿ ಯಾವ ಕಷ್ಟವೂ ಇಲ್ಲ; ನಾವಿಲ್ಲಿ ಹಾಯಾಗಿ ಇರೋಣಾ...."
ಆನಿ ತ್ಯಾ ಘಡಿಯೆ ತೊ ಥಂಯ್ ಪಾವೊಂಕ್ ಚಿಂತ್ತಾ. ಆನಿ ತ್ಯಾ ತಳಾಚಾ ಉದ್ಕಾ ಭಿತರ್ ಉಡಿ ಮಾರ್ತಾ. ತಾಚಿ ಧಣ್ಸಾಲ್ಲೆಂ ಮನ್ ಆನಿ ಕೂಡ್ ಥಂಡ್ ವಿಶೆವ್ ಘೆತಾ ಆನಿ ಆತ್ಮೊ ಉಬೊನ್ ಚಲ್ತಾ; ಆಪ್ಲ್ಯಾ ಮಾಧು ಆನಿ ಚೆನ್ನಿ ಸರ್ಶಿನ್; ಸಂಸಾರಾಚಾ ಬಂಧನಾ ಥಾವ್ನ್ ’ಸುಟ್ಕೆಚಾ’ ಕುಶಿನ್.
ಆದ್ಲ್ಯಾ ಕಥಾಂಕರ್ ಪಾನಾಕ್: 1, 2, 3, 4, 5, 6, 7, 8
About us | Feedback | Contact us
Copyright © 2005
DAAIZ.COM All rights reserved.
Page concept, designed and maintained by Ashawadi
Publications
