ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್ ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಬೂಕ್ ಸಮೀಕ್ಶಾ - 11
ಪಿಂತುರಾಂ
ಬೂಕ್: ಪಿಂತುರಾಂ
ಕವಿ: ಮಾ|ಆಲ್ವಿ ಕಾರ್ಮೆಲಿತ್
ಪ್ರಸ್ತಾವನ್: ಎಲ್ಯೆರ್, ತಾಕೊಡೆ
ಛಾಪ್ಲ್ಲಿ ಲಿಪಿ: ಕಾನಡಿ.
ಪಾನಾಂ: 82
ಮೋಲ್: ರು. 30
ಪ್ರಕಾಶಕ್: ಸಾಂಗಾತಿ ಮೀಡಿಯಾ
ಪರ್ಗಟ್ ಜಾಲ್ಲಿ ಇಸ್ವಿ: 2005
ಸಮೀಕ್ಶಾ ಚಲಯ್ಣಾರ್: ಜೊಮೆಲ್, ಬೊಂದೆಲ್
ತಾರಿಕ್: 10 ಫೆಬ್ರೆರ್ 2006
ಜಾಗೊ: ಸಾಲ್ಮಿಯಾ, ಕುವೇಯ್ಟ್
ಜೊಮೆಲ್, ಬೊಂದೆಲ್
ಮಾ|ಆಲ್ವಿ ಕಾರ್ಮೆಲಿತ್
ಕವಿಂಚಿ ವ್ಹಳೊಕ್:
ಕೊಂಕ್ಣಿ ಕವಿತಾಶೆತಾಂತ್ ’ಆಲ್ವಿ ಕಾರ್ಮೆಲಿತ್’ ನಾಂವ್ ಆಯ್ಲೆವಾರ್ ವಳ್ಕಿಚೆಂ ಜಾಲ್ಲೆಂ ತರ್ಯ್ ಹಾಚಾ ಕವಿತಾಂತ್ ಆಸ್ಚಿ ಪರಿಪಕ್ವತಾ, ಖಂಚಾಯ್ ವಾಚ್ಪ್ಯಾಕ್ ಹಾಚಿಂ ಕವಿತಾ ನವಿಂ ಜಾವ್ನ್ ದಿಸಾನಾಸ್ತಾಂ ಲಿಸಾಂವಾಭರಿತ್ ಜಾವ್ನ್ ದಿಸ್ತಾತ್. ಹಾಕಾ ಕವಿನ್ ಅಪ್ಲ್ಯಾ ಜಿಣ್ಯೆಂತ್ ಎದೊಳ್ ಭಗ್ಲ್ಲೊ ಜಿಣ್ಯೆ ಅನ್ಭೋಗ್ಯ್ ಏಕ್ ಕಾರಾಣ್. ಹಾಚೆಂ ಕವಿತಾ ’ಕವಿತಾಝರ್’ ಚೆರ್ ಪರ್ಗಟ್ಲಾಂ. ಕೊಂಕ್ಣಿ ಕವಿತಾಶೆತಾಂತ್ ಅಪ್ಲೊಚ್ ಮ್ಹಳ್ಳೊ ಪ್ರಕಾರ್ ಆಸೊನ್ ತೊ ಪ್ರಕಾರ್ ಕೊಂಕ್ಣೆಂತ್ ಲೊಕಾಮೊಗಾಳ್ ಕರ್ಚಿ ಶ್ಯಾಥಿ ಹಾಚಾ ಕವಿತಾಂನಿ ಯೇತ್ ಮ್ಹಳ್ಳೆಂ ಆಮ್ಚೆಂ ಚಿಂತಾಪ್.
ಸಮೀಕ್ಶಾ ಲೇಖನ್
ಉತ್ರಾಂನಿ ಪಿಂತುರಾಂ [ - ಜೊಮೆಲ್ ಬೊಂದೆಲ್]
’ಕವಿತಾ’ ಸಾಹಿತ್ಯ್ ಮ್ಹಳ್ಳ್ಯಾ ದರ್ಯಾಂತ್ಲೊ ಏಕ್ ಥೆಂಬೊ. ಜೆದ್ನಾಂ ಕವಿ ಹ್ಯಾ ಥೆಂಬ್ಯಾ ವಿಶ್ಯಾಂತ್ ಚಿಂತಾ, ತಿಳ್ತಾ, ನಿಯಾಳ್ತಾ ತೆದ್ನಾ ತೊ ಹ್ಯಾ ಥೆಂಬ್ಯಾಕ್ಚ್ ಸಾಗೊರಾಚೆಂ ರೂಪ್ ದೀಂವ್ಕ್ ಸಕ್ತಾ. ಹಿ ಕವಿಚಿ ಶ್ಯಾತಿ ಮ್ಹಣ್ಯೆತ್. ಪುಣ್ ಥೆಂಬ್ಯಾಚಿ ರೂಚ್ ಪಾರ್ಕುಂಕ್ ಜಾಣಾ ಆಸ್ಲೆಲ್ಯಾಂಕ್, ಥೆಂಬ್ಯಾಂತ್ ರೆವ್ಡೊನ್ ಆಸ್ಚಿಂ ಗುಪಿತ್ ವಿವಿಧ್ ರುಪಾಂ, ವಿವಿಧ್ ಚಿತ್ರಾಂ ಆನಿಂ ಪಿಂತುರಾಂ ದಿಸ್ತಾತ್. ಹೆಂ ಸಾಂಗುಂಕ್ ಸಾಕ್ಸ್ ದಿಂವ್ಚಿ ತರ್ ಆಮ್ಚಿಚ್ ಹಿ ಕವಿತಾಪಾಠ್ ಕಾಮಾಸಾಳ್. ಆಮಿಂಚ್ ಎಕಾ ಕವಿಚಿ ಕವಿತಾ ಗೂಂಡ್ ರಿತಿನ್ ಶಿಂದ್ತಾನಾ ಆಮ್ಕಾ ತಾಂತುಂ ದಿಸ್ಚ್ಯೊ ಜಾಯ್ತ್ಯೊ ಇಮಾಜ್ಯೊ, ವಿವಿದ್ ಸನ್ನಿವೇಶ್ ಹರ್ಯೆಕ್ಲ್ಯಾಕ್ ವೆವೆಗ್ಳ್ಯಾ ರಿತಿಂನಿ ದಿಸೊನ್ ಯೆತಾತ್. ಆಶೆಂ ಎಕಾ ಕವಿತಾಂತ್ ಜಾಯ್ತಿ ರುಪಾಂ ಪಿಂತುರಾಂ ದಿಸೊನ್ ಯೆತಾತ್ ಜಾಲ್ಲ್ಯಾನ್ ತೆಂ ರಚ್ಲೊಲೊ ಕವಿ ಏಕ್ ಕಲಾಕಾರ್ ಮ್ಹಣ್ ಸಾಂಗ್ಯೆತ್. ದೆವಾನ್ ರಚಿನಾತ್ಲ್ಲೊ ಸಂಗ್ತ್ಯೊ ಕವಿ ರಚ್ತಾ ಮಾತ್ರ್ ನ್ಹಯ್, ಕವಿ ಸೊಭಿತ್ತ್ ಥರಾನ್ ಪಿಂತ್ರಾಯ್ತಾ. ಆನ್ಯೆಕಾ ಉತ್ರಾನ್ ಸಾಂಗ್ಚೆಂ ತರ್, ಕವಿನ್ ರಸ್ಚ್ಯೊ ಕವಿತಾ ಪಿಂತುರಾಂ ಜಾವ್ನ್ ನಿರ್ಮಿತ್ ಜಾತಾತ್.
ಕವಿ ಬಾಪ್ ಆಲ್ವಿ ಕಾರ್ಮೆಲಿತ್ ಹಾಣಿಂ ರಚ್ಲೊಲ್ಯೊ ಅಸಲ್ಯೊಚ್ ಕವಿತಾ ಸಾಂಗಾತಾ ಹಾಡುನ್ ಹ್ಯಾ ಕವಿತಾ ಘೊಸಾಕ್ "ಪಿಂತುರಾಂ" ಮ್ಹಳ್ಳೆ ನಾಂವ್ ದಿಲ್ಲೆಂ ಖಂಡಿತ್ ಸಾರ್ಕೆಂ ಜಾವ್ನಾಸಾ. ಹ್ಯಾ ಕವಿತಾ ಪುಂಜ್ಯಾಂತ್ಲಿ ಕವಿತಾ, ವಿವಿದ್ ವರ್ಣಾಂಚಿ, ವಿವಿಧ್ ರುಪಾಚಿಂ ಆನಿಂ ವಿವಿಧ್ ಶೈಲಿಚಿಂ ಪಿಂತುರಾಂ ಜಾವ್ನ್ ದಿಸ್ತಾತ್. ಪ್ರಸ್ತಾವನಾಂತ್ ಕೊಂಕ್ಣೆಚೊ ಪ್ರಸ್ತುತ್ ತೆಂಪಾಚೊ ಕವಿ ಎಲ್ಯೆರ್ ತಾಕೊಡೆ ಆಶೆಂ ಸಾಂಗ್ತಾ "ಹ್ಯಾ ಪಿಂತುರಾಂನಿ, ತುಕ್ಲಾವ್ಣ್ಯೊಂ ಆಸಾತ್, ರಡ್ಣಿಂ ಆಸಾತ್, ಅತ್ರೆಗ್ ಆಸಾತ್, ಉಮಾಳೆ ಆಸಾತ್, ಧಾರುಣಾಯ್ ಆಸಾ, ಕರುಣಾಯ್ ಆಸಾ, ಸವಾಲಾಂ ಆಸಾತ್, ಜಾಪಿ ಆಸಾತ್, ಶಿಣ್ ಆಸಾ, ಆಭಿಮಾನ್ ಆಸಾ"
ಪಿಂತುರಾಂ ಪಳೆಂವ್ಕ್ ದೊಳ್ಯಾಂಚಿ ಗರ್ಜ್ ಆಸಾ, ಪುಣ್ ತಿಂ ಪಾರ್ಕುಂಕ್ ದೀಶ್ಟ್ ಜಾಯ್. ತಿ ಕಸಲಿ ದೀಶ್ಟ್ ಜಾಯ್ ಮ್ಹಣ್ ಕವಿ ’ಪಿಂತುರಾಂ’ ಮ್ಹಳ್ಳ್ಯಾ ಕವಿತೆಧ್ವಾರಿಂ ಸುರ್ವಾತ್ ಕರ್ತಾ.
ದೆವಾಕ್ ಸೊಧುನ್ ಭಂವ್ತಾಯ್ ಕಿತ್ಯಾಕ್ ಗುಡ್ಯಾ ವಯ್ಲ್ಯಾ ದಿವ್ಳಾಂನಿ
ದಿಸಾತ್ಗಿ ತೊ ಬಸ್ಚೆಂ ವೆಳಿಂ ಫಿಚಾರ್ ಕರುನ್ ಗೊವ್ಳಾಂನಿ
ತಾಚೆಂ ಪಿಂತುರ್ ಪಳೆಂವ್ಕ್ ತುಜೆ ದೊಳೆ ಭರ್ಲ್ಯಾತ್ ಖೊವ್ಳಾಂನಿ
ದೀಶ್ಟ್ ನಿತ್ಳಾವ್ನ್ ಸೊಧ್ ತಾಣೆಂ ಚಲೊನ್ ಗೆಲ್ಲ್ಯಾ ಪಾವ್ಲಾಂನಿ [ "ಪಿಂತುರಾಂ", ಪಾನ್
13]
ಹ್ಯಾ ಕವಿತೆಂತ್ಲಿ ಇಮಾಜ್ಯೊ ಪಳೆಯಾ ’ಗುಡ್ಯಾ ವಯ್ಲ್ಯಾ ದಿವ್ಳಾಂನಿ, ಪಿಚಾರ್ ಕರುನ್ ಗೊವ್ಳಾಂನಿ, ದೊಳೆ ಭರ್ಲ್ಯಾತ್ ಖೊವ್ಳಾಂನಿ, ದೀಶ್ಟ್ ನಿತ್ಳಾವ್ನ್ ಸೊಧ್’
ಪವಿತ್ರ್ ಪುಸ್ತಾಕಾಂತ್ ತಶೆಂಚ್ ಹೆರ್ ಧರ್ಮಾಚಾ ಗ್ರಂಥಾಂತ್ ದೊಂಗ್ರಾಕ್ ಪ್ರಮುಕ್ ಸ್ಥಾನ್ ಯಾ ದೊಂಗ್ರಾಕ್ ಏಕ್ ಪವಿತ್ರ್ ಜಾಗೊ ಜಾವ್ನ್ ಆಮ್ಕಾಂ ವಾಚುಂಕ್ ಮೆಳ್ತಾ ಆನಿಂ ಆಸ್ಲ್ಯಾಚ್ ಜಾಗ್ಯಾಂನಿ ದೆವಾನ್ ದಿಸೊನ್ ಯೆಂವ್ಚೆ ದೃಷ್ಟಾಂತ್ ಆಮ್ಕಾ ತವಳ್ ತವಳ್ ಮೆಳ್ತಾ. ಗುಡೊ ಆನಿ ದೊಂಗೊರ್ ಏಕಾಚ್ ರಿತಿಚೊ ಅರ್ಥ್ ದಿತಾ ತರಿಕ್ಯೀ ’ಗುಡೊ’ ಮ್ಹಣ್ತಾನಾ ಆಮ್ಕಾಂ ಪವಿತ್ರ್ಪಣಾಚಿಂ ಭಗ್ಣಾಂ ಯೇನಾಂತ್. ತರ್ ಹಾಂಗಾಸರ್ ಕವಿನ್ ಸಾಂಗ್ಚೆಬರಿಂ ಗುಡ್ಯಾವಯ್ಲಿಂ ದಿವ್ಳಾಂ ಖಂಚಿ? ಮ್ಹನಿಸ್ ದೆವಾಕ್ ಸೊಧುಂಕ್ ಖಂಚ್ಯಾ ಗುಡ್ಯಾವಯ್ಲ್ಯಾ ದಿವ್ಳಾಂನಿ ಭಂವ್ತಾತ್? ಮ್ಹನ್ಶಾಚ್ಯಾ ಪಯ್ಶ್ಯಾಚಾ ಬಳಾನ್ ಉಭೆಂ ಜಾಲ್ಲಿಂ ವ್ಹಡ್ ವ್ಹಡ್ ಬಾಂದ್ಪಾಂ ಜಾವ್ನಾಸಾತ್ ಹಿಂ ಗುಡ್ಯಾ ವಯ್ಲಿಂ ದಿವ್ಳಾಂ. ಹ್ಯಾ ದಿವ್ಳಾಂನಿಂ ಸಗ್ಳೆಂ ಆಸಾ ಪೂಣ್ ದೇವ್ ಮಾತ್ರ್ ಖಂಯ್ಸರ್ಯೀ ದಿಸೊನ್ ಯೇನಾ. ದೆವಾಕ್ ಪಳೆಂವ್ಕ್ ಕುಡಿಚ್ಯಾ ದೊಳ್ಯಾಂನಿ ಸಾಯ್ ಯಾ ಖೊವ್ಳಾಂ ಉದೆವ್ನ್ ಆಯಿಲ್ಲ್ಯಾನ್ ದೇವ್ ಆಮ್ಕಾಂ ದಿಸೊನ್ ಯೆನಾ. ಜೆದ್ನಾ ಆಮಿ ಆಮ್ಚಿ ಅಂತಸ್ಕರ್ನಾಚಿ ದೀಶ್ಟ್ ಉಗ್ತೆಂ ಕರ್ನ್ ತಾಕಾ ಸೊಧುನ್ ವೆತಾಂವ್ ತಾಣೆಂ ರುತಾಂ ಕೆಲ್ಲ್ಯಾ ವಾಟೆರ್ ಆಮಿ ಪುಡೆಂ ಚಲ್ತಾಂವ್, ತೆದ್ನಾಂ ದೇವ್ ಆಮ್ಕಾಂ ದಿಶ್ಟೆಕ್ ಪಡ್ತಾ. ದೆವಾಕ್ ಮೆಳೊಂಕ್ ಕಸಲಿಚ್ ಪರಿದಿ ರಚಿಜಾಯ್ ಮ್ಹಣ್ ನಾ. ಕಸಲಿಚ್ ನಕ್ಷಾ, ಆಕಾರಾಚಿ ಗರ್ಜ್ ನಾ ಮ್ಹಣ್ ಕವಿ ಸಾಂಗ್ತಾ. ದೆವಾಚೆಂ ಪಿಂತುರ್ ತಾಣೆ ರಚ್ಲ್ಲ್ಯಾ ರಚ್ನೆಂತ್ ಶಿಂಪ್ಡೊನ್ ಗೆಲಾಂ ತಾಕಾ ಪಳೊಂವ್ಕ್ ವೆಚಿ ಯಾ ಸೊಧುನ್ ವೆಚಿ ತಾನ್ ಆಮ್ಚಿ.
ಹಾವೆಂ ವಯ್ರ್ ಸಾಂಗ್ಲ್ಲೆಬರಿಂ ಪಿಂತುರಾಂ ಪಳೆಂವ್ಕ್ ದೊಳೆ ಜಾಯ್, ಪುಣ್ ತಿಂ ಸಮ್ಜೊಂಕ್ ದೀಶ್ಟ್ ಜಾಯ್. ಪ್ರತ್ಯ್ಯೇಕ್ ಜಾವ್ಯಾ ಹ್ಯಾ ಕವಿತಾಜಮ್ಯಾಂತ್ಲಿಂ ಪಿಂತುರಾಂ ಪಕತ್ತ್ ವಯ್ಲ್ಯಾ ವಯ್ರ್ ವಾಚುನ್ ಚೊಯ್ಶಿ ತರ್ ಖಂಡಿತ್ ಜಾವ್ನ್ ತುಕಾ ತಿಂ ಮಿಸ್ತೆರ್ ಜಾವ್ನ್ ದಿಸ್ತಿತ್. ಕಾಳ್ಜಾ ದಿಶ್ಟೆನ್ ನದರ್ ಭಂವ್ಡಾಯ್ತಾನಾ ವಿವಿಧ್ ರಿತಿಚಿಂ ಪಿಂತುರಾಂ ದಿಸೊನ್ ಯೆಂವ್ಚೆಂ ಮ್ಹಾಕಾ ಝಳ್ಕಾತಾ. ದಾಕ್ಲ್ಯಾಕ್ ಕವಿಚಿಂ ಹಿಂ ಉತ್ರಾಂ ಪಳೆಯಾ.
ಪೆಲೊ ಮ್ಹಜೊ ಬರೊ ಜಾತಾ
ಪೊಟಾಕಾ ಕಿತ್ಯಾಕ್ ತಡ್ವನಾ?
ಭುಕೆನ್ ಪೆಲ್ಯಾನ್ ಮುರ್ಯೊ ದಿತಾಂ
ಕಾನಾಂಕ್ ಕಿತ್ಯಾಕ್ ಆಯ್ಕಾನಾ?
ಮೊಗೊರ್ಲ್ಯಾಚ್ಯಾ ನಾಕಾಂತ್ ಕಿತ್ಯಾಕ್
ಗಂಧಾ ಪರ್ಮಳ್ ಅಪ್ಟಾನಾಂ
ಕಾಳ್ಕಾಯ್ ಜಾಲ್ಲ್ಯಾ ದೊಳ್ಯಾಂಕ್ ಕಿತ್ಯಾಕ್
ದುಸ್ರೊ ರಂಗ್ ಝಳ್ಕಾನಾ? [ಮಿಸ್ತೆರ್]
ಮ್ಹಜೊ ಭಾವ್ ವ ಪೆಲೊ ಬರೊ ಜಾತಾನಾ ಮ್ಹಜೊ ಸ್ವಾರ್ಥ್ ಆನಿಂ ಮೊಸೊರ್ ಮ್ಹಜ್ಯಾ ದೊಳ್ಯಾಂಚೆರ್ ಸಾಯ್ ಮಾಂಡ್ತಾ. ತಶೆಂಚ್ ಸೆಜಾರ್ಚಿ ಶಿತಾ ಮೊಡ್ಕಿ ಖಾಲಿ ಉರ್ತಾನಾ ಥಂಯ್ ಥಾವ್ನ್ ಬಾಯ್ರ್ ಯೆಂವ್ಚಿ ಪಿಂರ್ಗೊವ್ಣ್ ದಾಡ್ಡ್ಯಾ ಕಾನಾಂಕ್ ಆಯ್ಕಾನಾ. ಹೆ ಕಾಳ್ಕಾಯ್ ಜಾಲ್ಲೆ ದೊಳೆ ಕಸಲೆ? ಹಿಂ ಸಮಾಜೆಚಿ ಪಿಂತುರಾ. ಹೆಂ ಸಮ್ಜೊಂಕ್, ಪಾರ್ಕುಂಕ್ ಆಮಿ ಗಾಂವ್ಗಾಂವ್ ಭವೊಂಕ್ ವಚಾಜಯ್ ಮ್ಹಣ್ ನಾ. ಪಕತ್ತ್ ಅಮ್ಚ್ಯಾ ಕಾಳ್ಜಾಚ್ಯಾ ದೊಳ್ಯಾಂ ಭಂವಾರಿಂ ನದರ್ ಚರಯ್ಲ್ಯಾರ್ ಜಾಲೆಂ.
ಮ್ಹನ್ಸ್ಯಾ-ಪಿಂಪ್ರೆ ಕಿರ್ಲಾವ್ನ್ ನಳಾಂತ್
ಮ್ಹನ್ಯಾಕ್ ಹಾಂಗಾ ವೆಗ್ಯಾನ್ ಆಸ್ರೊ
ಕ್ಲೊನಿಂಗಾಚ್ಯಾ ನವ್ಯಾ ಶಾಳಾಂತ್
ನಿಯಾಮಾಂಚೊ ಜಾತಾ ಕಸ್ರೊ
ದೆವಾ ದೆವಾ ಶಿಣಾನಾಕಾ,
ಆಮ್ಕಾಂ ಪಳೆವ್ನ್ ಹಾಸಾನಾಕಾ
ತುಂಚ್ ರಚ್ನಾ ನಂಯ್ಗಿ ದೆವಾ
ತುಕಾಚ್ಚ್ ರಚುಂಕ್ ಸ್ಪರ್ಧೊ ಹಾಂಗಾ...[ತುಜೆವಿಣೆ]
’ತುಜೆವಿಣೆ’ ಕವಿತಾಂತ್ ಉತ್ರಾಂಚ್ಯಾಕೀ ಚಡ್ ಮ್ಹನ್ಶ್ಯಾಂಚೆ ಸ್ವಾರ್ಥಾಚೆ ಪಿಂತುರ್ ಸೊಡಯ್ಲಾಂ. ದಾಕ್ಲ್ಯಾಕ್ ವಯ್ಲ್ಯಾ ಉತ್ರಾಂತ್ಚ್ ಪಳೆಯಾ. "ಮನ್ಶ್ಯಾಕ್ ಹಾಂಗಾ ವಿಗ್ಯಾನ್ ಆಸ್ರೊ, ನಿಯಾಮಾಂಚೊ ಜಾತಾ ಕಸ್ರೊ". ಮನ್ಶ್ಯಾಖಾತಿರ್ ದೆವಾನ್ ರಚ್ಲ್ಲೊ ಹೊ ಸೊಭಿತ್ತ್ ಸಂಸಾರ್ ಆನಿ ತಾಚಿ ಸೊಭಿತ್ತ್ ರಚ್ನಾ, ದೆವಾ ವಿರೊಧ್ ಸ್ಪರ್ದ್ಯಾಕ್ ರಾಂವ್ಚೆ ಹೆಂ ಪಿಂತುರ್. ಮ್ಹನ್ಶ್ಯಾಕ್ ಮೆಳ್ಲ್ಲಿ ಬುಕಾಚಿ ಜಾಣ್ವಾಯ್ ಯಾ ಶಿಕಾಪ್ ತಾಕಾ ದೆವಾಚಿ ವಳೊಕ್ಚ್ ವಿಸ್ರುನ್ ಗೆಲಾ. ಅನಿ ನವಿ ಬದ್ಲಾವಣ್, ಸಂಸೊಧನ್, ತಾಂತ್ರೀಕ್ ವಡಾವಳ್ ಆನಿಂ ವಿಗ್ಯಾನ್ ಮನ್ಶ್ಯಾಕ್ ಆಸ್ರೊ ಜಾಲಾ. ದೇವ್ಚ್ ಹ್ಯಾ ಜಾಣ್ವಾಯೆಚಿ ಝರ್ ಯಾ ಆರಂಭ್ ತರ್ ಮನಿಸ್ ಹಿ ಜಾಣ್ವಾಯ್ ಉರ್ಜಿತ್ ಕರುನ್ ಹ್ಯಾಚ್ ನಶ್ವರ್ ಜಾಣ್ವಾಯೆಚೊ ಗುಲಾಮ್ ಜಾಲಾ. ನಿಯಾಮಾಂಚೊ ಖಸ್ರೊ ತರ್, ಕೊಣಾಚಿಂ ಹಿಂ ನಿಯಾಮಾಂ? ಖಂಯ್ ಥಾವ್ನ್ ಉದೆಲ್ಲಿಂ ಹಿ ನಿಯಾಮಾಂ? ದೆವಾನ್ ತಾಚ್ಯಾ ಸ್ವರೂಪಾಚೊ ಆಮ್ಕಾಂ ರಚ್ಲಾ ಮ್ಹಣ್ ಧ್ರಡ್ ಪಾತ್ಯೆತಾಂವ್ ವ್ಹಯ್ ತರ್ ಖಂಡಿತ್ ಜಾವ್ನ್ ಕ್ಲೊನಿಂಗ್ ಮ್ಹಳ್ಳಿ ಹಿ ನಾಡ್ ಉಗ್ತ್ಯಾನ್ ಭಂವ್ತಾ ಜಾಲ್ಲ್ಯಾನ್ ದೆವಾನ್ ರಚ್ಲ್ಲ್ಯಾ ನಿಯಾಮಾಂಚೊ ಖಸ್ರೊಚ್ ಜಾಲಾ. ಮ್ಹಣ್ಜೆ ಮ್ಹನಿಸ್ ದೆವಾಕ್ಚ್ ರಚುಂಕ್ ಪುಡೆಂ ಸರ್ಲಾ. ಹ್ಯಾಚ್ ಕವಿತೆಂತ್ಲಿ ಥೊಡಿಂ ವ್ಯಂಗ್ ಉತ್ರಾಂ ಪಳೆಯಾ :
... ನೀದ್ ದಿಂವ್ಚಿ ತುಂವೆಂ ದೆವಾ
ತುಕಾಚ್ ವಿಸ್ರೊನ್ ನಿದ್ಲ್ಯಾತ್ ಹಾಂಗಾ...!"
"... ವಯ್ಜಾಂಚೊ ತುಂ ವಯ್ಜ್ ದೆವಾ
ತುಜೆವಿಣೆಂಚ್ ವಕ್ತಾಂ ಹಾಂಗಾ...!"
"...ತುಂಚ್ ನಂಯ್ಗಿ ಜಿಣ್ಯೆ ಝರ್
ತುಕಾಚ್ ವಿಸ್ರುನ್ ಖೊಂಡ್ತಾತ್ ಹಾಂಗಾ...!"
ಹಿಂ ವಯ್ಲಿಂ ಉತ್ರಾಂ ವಿವಿಧ್ ರಂಗಾಚಿ ಆನಿಂ ಅಸಲಿಂ ಉತ್ರಾಂ ಏಕಾ ಕಾವ್ಯಾ ರುಪಾರ್ ಯೆಜಾಯ್ ತರ್ ಕವಿ ಏಕ್ ಕಲಾಕರ್ ಮ್ಹಣ್ ಸಾಂಗೊಂಕ್ ದುಭಾವ್ ನಾ.
ಪಾಯ್ ಝರವ್ನ್ ವಾಟ್ ಕೆಲ್ಲೆ
ವಾಟೆ ಪಂದ್ಲಿ ಧುಳ್ ಜಾಲೆ
ತ್ಯಾಚ್ ವಾಟೆರ್ ಚಲೊನ್ ಗೆಲ್ಲೆ
ವಾಟ್ ಕೆಲ್ಲ್ಯಾಂಕ್ ವಿಸರ್ಲೆ
ಧುಳ್ ಕೆಲ್ಲ್ಯಾಂಕ್ ಪುರ್ಪ್ರ್ಲೆ [ಅನುಪ್ಕಾರ್ಪಣ್]
ಹಿ ಏಕ್ ಮಟ್ವಿ ಕವಿತಾ, ಪುಣ್ ಹಾಂಗಾಸರ್ ಸೊಡಯಿಲ್ಲೆಂ ಪಿಂತುರ್ ಕಾಳ್ಜಾ ಗುಂಡಾಯೆಂತ್ ರೊಂಬ್ಚೆ ತಸಲೆಂ. ಏಕೆಕಾ ಪಂಗ್ತೆರ್ ಏಕೇಕ್ ಇಮಾಜ್ಯೊ ಯಾ ಪಿಂತುರಾಂ ದಿಸೊನ್ ಯೆತಾತ್. ಹಾಂಗಾಸರ್ ವಾಟ್ ಜಾಂವ್ಕ್ ಪುರು ದೆಕಿಚೊ, ವಾಟ್ ಜಾಂವ್ಕ್ ಪುರೊ ಸಮಾಜ್ ಯಾ ಸಮುದಾಯ್ ಬಾಂದುನ್ ಹಾಡ್ಚೆಂ, ಯಾ ವಾಟ್ ಜಾಂವ್ಕ್ ಪುರೊ ಮಲ್ಘಡ್ಯಾಂ ಥಾವ್ನ್ ವಾಳೊನ್ ಆಯಿಲ್ಲಿ ಸಂಸ್ಕ್ರತಿ ಚಲವ್ನ್ ವರ್ಚಿ ಯಾ ಕಸಲಿಯ್ ತಿ ವಾಟ್ ಬಾಂಧುನ್ ಹಾಡಿಜಯ್ ತರ್ ರಗ್ತಾ ಘಾಮಾಚೊ ಲೇಪ್ ದಿಜಯ್ ಪಡ್ತಾ. ಆನಿಂ ತಸಲಿ ತಿ ವಾಟ್ ’ಬೇಫಿಕಿರ್’ ಮನ್ಶ್ಯಾಂಕ್ ತ್ಯಾ ವಾಟೆಚೊ ಶೆವೊಟ್ ಸೊಡ್ಯಾಂ, ವಾಟೆ ವಯ್ಲಿ ಧುಳ್ ಮಾತ್ರ್ ದಿಸ್ತಾ. ಮಲ್ಘಡ್ಯಾಂನಿ ಭೊಗ್ಲ್ಲೊ ಕಾಂಟ್ಯಾ ಕುಂಟ್ಯಾಚೊ ಹುಲೊಪ್, ತಾಚೊ ಖರೊ ಅರ್ಥ್ ನೆಣಾಸ್ಲ್ಯಾಂಕ್ ವಾಟೆ ವಯ್ಲೊ ಕಾಂಟೊ ಜಾಂವ್ಕ್ ಪಾವ್ತಾ. ಆಶೆಂ ತಾಂಕಾ ಆಮಿ ವಿಸ್ರೊನ್ ವೆಚೆಂ ಸ್ವಾಭಾವಿಕ್. ಕಿತ್ಯಾಕ್ ಮ್ಹಳ್ಯಾರ್, ಆತಾಂಚ್ಯಾ ಇನ್ಸಟಂಟ್ ಯಾ ರೆಡಿಮೇಡ್ ವೇಳಾರ್, ಶೊರ್ಟ್ಕಟ್ ವಾಟೊ ಜಾಯ್ತ್ಯೊ ದಿಸ್ತಾತ್. ಪುಣ್ ಹ್ಯೊ ಶೊರ್ಟ್ಕಟ್ ವಾಟೊ ಶೆವೊಟಾಕ್ ಪಾವಯ್ತಾತ್ಗಿ ನಾ ಮ್ಹಣ್ ಮಾತ್ರ್ ಜಾಯ್ತೆಂ ಚಿಂತುನ್ ಪಳೆಯ್ಜಾಯ್ ಪಡ್ತಾ.
ಕೊಡು ಕೊಡು ಕಾರಾತೆಂ
ಪಾವ್ಲೆಂ ಸಗ್ಳ್ಯಾ ಪೂನ್ ಶೆತಾಂಕ್
ಪವಿತ್ರ್ ನ್ಹಂಯ್ತ್ ಬುಡ್ಲೆಂ ತರ್ಯೀ
ಕೊಡ್ಸಾಣ್ ತಾಚಿ ಗೆಲಿನಾ [ವೊಜೆಲಿ]
ಹ್ಯಾ ಕವಿತೆಂತ್ಲಿ ಸಾದಿಂ ಉತ್ರಾಂ ಮಾಜ್ವಾನಾತ್ಲ್ಲಿಂ ಬಳಾಧಿಕ್ ಚಿತ್ರಾಂ. ಜಾಯ್ತಿಂ ಮಿಸಾಂ, ನೊವೆನಾಂ, ರೆತಿರ್ಯೊ ಆನಿಂ ವಿವಿಧ್ ಭಕ್ತಿಕ್ ವಿಧಾನಾ ಮನ್ಶ್ಯಾ ಸಂಬಂಧ್ ಗೊಡ್ಸಾಣೆನ್ ವಾಡಾಜಯ್ ಶಿವಾಯ್ ಕೊಡ್ಸಾಣೆಚೊ ಮುದೊ ಜಾಂವ್ಚೆಂಚ್ ನ್ಹಯ್. ಮ್ಹಾಕಾ ಹೆರಾನಿಂ ಪಳಯ್ಜಾಯ್ ಮಳ್ಳ್ಯಾ ಚಿಂತ್ನಾನ್, ವಿವಿಧ್ ಧಾರ್ಮಿಕ್ ಸಂಗ್ತೆಂತ್ ಮೆತೆರ್ ಜಾಲ್ಯಾರೀ ಕಾಳ್ಜಾಂತ್ಲಿ ಕೊಡ್ಸಾಣ್ ಬದ್ಲಾನಾತ್ಲ್ಯಾರ್ ಫಾಯ್ದೊ ಕಿತೆಂ? ಉತ್ರಾಂಕ್ ಆನಿಂ ಕರ್ನ್ಯಾಂಕ್ ಜಾಯ್ತೊ ಫರಕ್ ಆಸಾ ಮ್ಹಣ್ ಜಾಣಾ ಆಸ್ಚೊ ಕವಿ ಬಾಪ್ ಆಲ್ವಿ ತಾಚ್ಯಾ ಶೆರ್ಮಾಂವ್ ಕವಿತಾಂತ್ ಆಶೆಂ ಸಾಂಗ್ತಾ.
ಆಯ್ಕೊಂಕ್ ಮೆಳ್ಚೊ ನ್ಹಯ್ ತೊ ಪುರ್ತೊ
ಕಾನಾಂಕ್ ಮಾತ್ ಆಯ್ಕೊವ್ಯೆತ್
ಕರ್ನೆನ್ ದಿಂವ್ಚೊ ಶೆರ್ಮಾಂವ್ ವ್ಹರ್ತೊ
ದೊಳ್ಯಾನಿಂಚ್ ಪಳೆವ್ಯೆತ್... [ಶೆರ್ಮಾಂವ್]
ಹ್ಯಾ ಪಿಂತುರಾಂ ಬುಕಾಂತ್ ಮನ್ಶ್ಯಾಕ್ ಜಾಗ್ರುತ್ ಕರ್ಚಿ ಕವಿತಾ ಜಾಯ್ತಿಂ ಆಸಾತ್. ಕವಿ ಪಾದ್ರಿಗಾರ್ ಜಾಲ್ಲ್ಯಾನ್ಗೀ ತೆಂ ಹಾಂವ್ ನೆಣಾ, ಪುಣ್ ತಾಚೊ ಯಾಜಾಕ್ಪಣಾಚೊ ಪ್ರಬಾವ್ ತಾಚ್ಯಾ ಜಾಯ್ತ್ಯಾ ಕವಿತಾಂಚೆರ್ ದಿಸೊನ್ ಯೆತಾ. ಕವಿನ್ ವಿಂಚ್ಲ್ಲ್ಯಾ ಬೆಸಾಚೊ ಪ್ರಕಾಸ್ ಯಾ ಝಳಕ್ ಹಾಂಗಾಸರ್ ಪಳೆಯಾ
ಪಾತ್ಕಾ ವೊಡ್ಣಿ ಪೆಟ್ಚೆಂ ಪಯ್ಲೆಂ
ಕರುಂಕ್ ಜಾಯ್ ಪಾರೊತ್
ಪೆಟ್ಚೆಂ ಪಳೆವ್ನ್ ರಾವ್ಶಿ ತರ್
ಇಂಗ್ಳ್ಯಾಂತ್ ಜಿವಿತ್ ಮೊರಾತ್ [ಜಾಗ್ರುತ್]
ಜಿವಿತ್ ಮೊರ್ಚೆಂ ತಸಲೊ ಇಂಗ್ಳೊ ಕಿತೆಂ ಮ್ಹಣ್ ತುಮಿಂಚ್ ವೊರಾವ್ನ್ ಪಳೆಯಾ. ಹಿ ಕವಿತಾ ವಾಚ್ತಾನಾಂಚ್ ಕಾಳ್ಜಾಕ್ ಆನಿಂ ಆತ್ಮ್ಯಾಕ್ ಜಾಗ್ವಣ್ ದಿಂವ್ಚೆ ಪಿಂತುರ್
ದಿಸಾನಾಂಗಿ?
...ಕುಂಕ್ಡಾ ಗಣಾಂತ್ ಜಿಣೆಂ ತುಜೆಂ
ಉಭೊಂಕ್ ದೀನಾ ಕುಡಿ ವೊಜೆಂ
ಬರ್ಯಾಂತ್ಲೆ ಬರೆಂ ಕುಂಕಾಡ್ ಜಾಗೊ
ತೆಂಚ್ ದಿತಾ ಸೊಭಾಯ್ [ಆಪವ್ಣೆ]
ಕವಿತಾಂತ್ ಕವಿ ಏಕ್ ನಾಯಕ್ ಜಾವ್ನ್ ಆಸ್ಚೆಂ ತಾಚ್ಯಾ ಚಡವತ್ ಕವಿತಾನಿ ದಿಸೊನ್ ಯೆತಾ. ಕವಿತಾಂತ್ ಲಿಪೊನ್ ಆಸ್ಚೆಂ ಮಿಸಾಂವ್ ಜಾರಿ ಕರ್ಚಿ ಆಶಾ ಆನಿ ಅತ್ರೆಗ್ ಜಾಯ್ತ್ಯಾ ಕವಿತಾಂನಿ ದಿಸೊನ್ ಯೆತಾತ್. ಕವಿಚಿ ತೀಕ್ಷ್ಣ್ ನದರ್ ವಾಚ್ಪ್ಯಾಕ್, ಪರತ್ ಪರತ್ ಹಿಂ ಕವಿತಾ ವಾಚುಂಕ್ ಪ್ರೇರಿತ್ ಕರ್ತಾ.
ದೊಳೆ ಮ್ಹಜೆ ಮೊಳ್ಬಾ ವಯ್ಲೆ
ಜೊವ್ಳೆ
ಸುರ್ಯೊ ಜಾಲ್ಲೆ
ಕೊನ್ಶ್ಯಾಂ ಕೊನ್ಶ್ಯಾಂತ್ ಉಜ್ವಾಡಾಯ್ತೊಂ
ರಾತಿಕ್ ಪಾರುನ್ ದಾವ್ಲೆಂತ್.
ಮೋಗ್ ಮ್ಹಜೊ ಉದ್ಕಾಬರಿಂ
ವ್ಹಾಳೊಂಕ್ ಪೊಳೊಂಕ್ ಸಕ್ತೊ
ಮೊಗಾ ದುಕೊಳ್ ಭಗ್ಚ್ಯಾ ಕಾಳ್ಜಾಂಕ್
ದೊವಾ ಧಾಂಪ್ಣೆ ಧಾಂಪ್ತೊ [ಆಶಾ]
ಜೆದ್ನಾಂ ಮೆಜಾ ಪಂದ್ಲೊ ದುಡು
ಜಾತಾ ಸತಾಕ್ ಕಾಪ್ಚೊ ಮೊಡು
ವೇಗ್ ಆರಾವ್ನ್ ಮಾರ್ ಝಾಡು
ಮ್ಹೆಳ್ಯಾ
ಹಾತಾಂಕ್ ಕಾಂಡ್ಗಾ
ಖಂಯ್ಸರ್ ವ್ಹಾಳ್ತಾ ರಗ್ತಾವ್ಹಾಳೊ
ಥಂಯ್ಸರ್ ದವರ್ ಜತ್ನೆ ದೊಳೊ
ಜೆದ್ನಾ ಮನಿಸ್ ಪುಸ್ತಾ ತಿಳೊ
ಸಗ್ಳೊಚ್ ಕೊಂಕುನ್ ಕಾಡ್ಗಾ [ಗೀದಾಕ್ ಉಲೊ]
ಹಾಂಗಾಸರ್ ಮೆಜಾ ಪಂದ್ಲೊ ದುಡು ಮ್ಹಳ್ಯಾರ್ ಪಕತ್ತ್ ಪಯ್ಶೆ ದೀವ್ನ್ ಲೋಂಚ್ ದಿಂವ್ಚೆಂಚ್ ಮ್ಹಣ್ ಸಾಂಗೊಂಕ್ ಜಾಯ್ನಾ. ಸಗ್ಳೆಂ ಆಮ್ಚೆ ಜಿವಿತಾಚೆಂ ಭ್ರಷ್ಟ್ ನಿಯಾಮ್ ಮ್ಹಣ್ ಸಾಂಗ್ಯೆತ್. ಹಾಂತ್ಲ್ಯೊ ಇಮಾಜ್ಯೊ ’ಮೆಜಾ ಪಂದ್ಲೊ ದುಡು’, ’ಕಾಪ್ಚೆಂ’, ’ಮೊಡು’, ’ವೇಗ್’, ’ಆರಾಂವ್ಚೆ’, ’ಝಾಡು’, ಆನಿಂ ’ಕಾಂಡ್ಚೆಂ’. ಹ್ಯಾ ಉತ್ರಾಂಚೆರ್ ಆಮಿ ಗೂಂಡ್ ರಿತಿರ್ ಅಧ್ಯಯನ್ ಕರ್ಚೆಂ ಜಾಲ್ಯಾರ್ ಆಮ್ಕಾ ವಿವಿಧ್ ವಿಶಯ್ ದಿಸೊನ್ ಯೆತಾಲೆಂ ತೆಂ ಖಂಡಿತ್.
ಕಾಯ್ಲೆ ಮದ್ಲೊ ಪಾನ್ಪಾಳೊ
ಪಿಂರ್ಗೊನ್ ಗಾಯಾನ್ ಕರ್ತಾನಾ
ತಾಳ್ ದಿಂವ್ಚ್ಯಾ ಕಾಂಕ್ಣಾನಿ
ವಳೊಕ್ ತುಜಿ ಧರ್ತಲೊಂ
ದೊಳ್ಯಾ ಪಂದ್ಲೊ ಸಳ್ಸಳೊ
ಗಳೊನ್ ಪೊಲೊ ಭಿಜ್ತಾನಾ
ಕಿರ್ಲೊನ್ ಯೆಂವ್ಚ್ಯಾ ಉಡಾಸಾನಿ
ರುಪ್ಣೆ ತುಜೆಂ ದೆಕ್ತಾಲೊ. [ಜೋಪ್]
ಹೆಂ ಅನ್ಯೇಕ್ ಕವಿ ’ವಿಲ್ಸನ್ ಕಟಿಲ್’ ಹಾಚಾ ಉತ್ರಾಂನಿ ಸಾಂಗೊಂ ತರ್; "ಹಿ ಏಕ್ ಆಫುರ್ಬಾಯೆಚಿ ಮೊಗಾ ಕವಿತಾ. ಆಸಲಿ ಮೊಗಾ ವೊಳಿ ಕೊಂಕ್ಣಿ ಬಾಶೆಕ್ ಉಂಚ್ಲ್ಯಾ ಪಾಂವ್ಡ್ಯಾಕ್ ಪಾವಾಯ್ನಾಂತ್ಗಿ? ಧಣ್ಸಲ್ಯಾಂಕ್ ದುಬ್ಳ್ಯಾಂಕ್ ಸುಶೆಗ್ ದೀಂವ್ಕ್ ಹ್ಯೊ ವೊಳಿ ಪಾವಾನಾಂತ್ಗೀ ಪಾನ್ಪಾಳೊ ಭಾಜ್ಚೆಂ ರಾಂದ್ಚೆಂ ಕೂಡ್ ಆನಿ ಜಳ್ಚೊ ಮೋಗ್ ದೊನಾಂಯ್ಕಿ ಆಯ್ಚ್ಯಾ ಕಾಳಾರ್ ಕಿರ್ಕೊಳ್ ಮ್ಹಣ್ ಲೆಕ್ಚೆಂ ಏಕ್ ವ್ಹಡ್ ವಿಪರ್ಯಾಸ್".
ಹ್ಯಾಚ್ ಕವಿತಾ ಪುಂಜಾಂತ್ಲಿ ಹೆರ್ ಕವಿತಾ ಜಶಿಂ ’ದುಭ್ಳೊ’ ’ಕಾಕಾಮಾಯ್’ ’ಮೆಟ್ಟಿ ಮಿಸಾಕ್ ಪಾವ್ಲೆಂನಾ’ ’ಬೊಲ್ಕಾವಾಂತ್ಲೊ ತರ್ನಾಟೊ’ ’ಮೋಲ್’ ’ಬಾಂದಾಪ್’ ತಸಲಿಂ ಕವಿತಾ ಸಮಾಜೆಚಿ ಅಸ್ತಿತ್ವ್ ದಾಕೊಂವ್ಚಿ ಪಿಂತುರಾಂ ಜಾವ್ನಾಸಾತ್. ತಶೆಂಚ್ ’ಕೆದ್ನಾಂ ಧನ್ಯಾ ಪಾಂತೆಂ ಜಾಯ್ತ್...?’ ’ಅಪವ್ಣೆ’ ’ಸ್ವತಂತ್ರ್’ ’ತಾನ್’ ’ಉತ್ರಾಂ’ ’ವ್ಹಾಳ್ಚೆ ಝರಿಕ್ ವಿನತಿ’ ’ಗಿದಾಕ್ ಉಲೊ’ ’ಮರ್ಯಾದ್’ ’ಸಯ್ರಾಣ್’ ಆನಿಂ ’ದರ್ಯಾಕ್ ಧಾಂವ್ ಉದ್ಕಾ’ ತಸಲಿಂ ಕವಿತಾ ಪರತ್ ಪರತ್ ವಾಚುನ್ ವಾಚ್ಪ್ಯಾಕ್ ದಾಧೊಸ್ ಕರ್ಚೆ ತಸಲಿಂ ಜಾವ್ನಾಸಾತ್.
ಎಕಾಚ್ಚ್ ಉತ್ರಾನ್ ’ಪಿಂತುರಾಂ’ ಬುಕಾಂತ್ ಮ್ಹಾಕಾ ಉತ್ರಾಂ ಉತ್ರಾಂನಿ ಪಿಂತುರಾಂ ದಿಶ್ಟಿಕ್ ಪಡ್ತಾತ್.
ದೇವ್ ಬರೆಂ ಕರುಂ!
[2006 ಇಸ್ವೆಚಾ ಫೆಬ್ರೆರ್ 10 ತಾರಿಕೆರ್ ಕುವೆಯ್ಟಾಂತ್
ಚಲ್ಲ್ಲ್ಯಾ ಭಾರಾವ್ಯಾ ಕವಿತಾಪಾಠಾಂತ್ ಹೆಂ ಲೇಖನ್ ವಾಚುನ್
ಸಾಂಗ್ಲಾಂ]
About us | Feedback | Contact us
Copyright ©
2005 DAAIZ.COM All rights reserved.
Page concept, designed and maintained by Ashawadi Publications
