ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ವಿಂಚ್ಣಾರ್ ಕಥಾ: ಅಮಾಯಕ್
ಮೆಲ್ವಿನ್ ಪಿಂಟೊ ನೀರುಡೆ, ಕೊಂಕ್ಣೆಂತ್ ಏಕ್ ಕವಿ ಜಾವ್ನ್, ಕಾಣ್ಯೆಗಾರ್ ಜಾವ್ನ್, ವಿಮರ್ಶಕ್ ಜಾವ್ನ್ ಅಪ್ಲಿ ಪ್ರಭುದ್ದತಾ ಧಾಖಯಿಲ್ಲ್ಯಾ ಹಾಣೆಂ. ದಾಯ್ಜ್ ಸಾಹಿತಿಕ್ ಸ್ಪರ್ಧೊ 2004 ಂತ್ ’ತೇಂಪ್ಲ್’ ಕಾಣ್ಯೆಕ್ ದುಸ್ರೆಂ ಇನಾಮ್, ದಾಯ್ಜ್ ಸಾಹಿತಿಕ್ ಸ್ಪರ್ಧೊ 2005 ಂತ್ ’ಜಾಗೊ’ ಕಾಣ್ಯೆಕ್ ವೊರಾಯ್ಣಾರಾಂಚೆ ಶಿಫಾರಸ್ ಜೊಡ್ಲ್ಯಾ, ತಶೆಂಚ್ ದಾಯ್ಜ್ ಸಾಹಿತಿಕ್ ಸ್ಪರ್ಧೊ 2006 ಂತ್ ’ದಿವೊಡ್’ ಕಾಣ್ಯೆಕ್ ದುಸ್ರೆಂ ಇನಾಮ್ ಲಾಭ್ಲಾಂ. ಕೊಂಕ್ಣಿ ಕಾಣ್ಯಾಂಕ್ ನವೆಂಸಾಂವ್ ಹಾಡ್ಚಾ ಮಿಸಾಂವಾಕ್ ಮೆಲ್ವಿನ್ ಪಿಂಟೊ ಥಾವ್ನ್ ಭರ್ಪೂರ್ ದೇಣ್ಗಿ ಆಶೆವ್ಯೆತ್. [ದುಖಾಂ ದಾಯ್ಜಾಚೆರ್ ಆಸ್ಚಿ ಅನ್ಯೇಕ್ ಕಾಣಿ].
ಮೆಲ್ವಿನ್ ಪಿಂಟೊ
ಸಕ್ಟಾಂಕ್ಯೀ ಹಾಂವ್ ಮುಗ್ದ್ ಕಸೊ ದಿಸ್ತಾಂಗೀ? ತಿತ್ಲೊ ಅಮಾಯಕ್? ಮ್ಹಾಕಾ ಮ್ಹಜೆರ್ಚ್ ದುಬಾವ್ ಯೆತಾಲೆ. ಸಾಕಾಳಿಂ ಥಾವ್ನ್ ಘಡ್ಲ್ಲಿಂ ಘಡಿತಾಂ ಉಡಾಸಾಕ್ ಯೆತಾನಾ ಮ್ಹಾಕಾ ಕಠೀಣ್ ಅಕ್ಮಾನ್ ಭಗ್ಲೊ. ಘಡಿತಾಂ ವ್ಹಡ್ಲಿಂ ನ್ಹಂಯ್. ತರಿಕ್ಯೀ ಸಾದಾರಣ್ ಮ್ಹನ್ಶಾಂನಿ ಮೋಸ್ ಕರ್ತಾನಾ ನಿಜಾಕ್ಯೀ ಕರ್ಕರೆ ಭಗ್ತಾಲೆ.
ಪಯ್ಲ್ಯಾನ್ ಪಯ್ಲೆಂ ರಿಕ್ಶಾವಾಲ್ಯಾನ್ ಮೋಸ್ ಕೆಲ್ಲೊ. ಕುರ್ಲಾ ಬಸ್-ಸ್ಟ್ಯಾಂಡಾ ಥಾವ್ನ್ ಕೊಂಕಣ್ ರೇಲ್ವೆಚ್ಯಾ ಲೋಕಮಾನ್ಯ ತಿಲಕ್ ಸ್ಟೇಶಾನಾಕ್ ವ್ಹರ್ ಮ್ಹಣ್ ಸಾಂಗ್ಲೆಂ. ತಾಚೆಂ ಮೀಟರ್ ಮಾತ್ರ್ ತಾಚ್ಯಾ ರಿಕ್ಶಾಚ್ಯಾಕ್ಯೀ ವೆಗಾನ್ ಧಾಂವ್ತಾಲೆಂ. ಭರ್ತಿ ಸತ್ತರ್ ರುಪಯ್ ಒಂಕಿಜೆ ಪಡ್ಲೆ. ತಾಚ್ಯಾ ಮೀಟಾರಾವಿಶಿಂ ಆಕ್ಶೇಪ್ ಕಾಡಿಜಯ್ ಮ್ಹಳ್ಳೆಂ ಚಿಂತಾಪ್ಯೀ ಮತಿಂತ್ ಉದೆಂವ್ಕ್ ನಾತ್ಲ್ಲೆಂ ಪಳೆವ್ನ್ ಮ್ಹಾಕಾ ಮ್ಹಜಿಚ್ ಭಿರ್ಮತ್ ದಿಸ್ಲ್ಲಿ.
ಉಪ್ರಾಂತ್ಲಿ ಸರ್ತಿ ಟ್ರೇನಾರ್ ಜೆವಾಣ್ ದಿಲ್ಲ್ಯಾಚಿ. ಪನ್ನಾಸ್ ರುಪಯ್ ದೀವ್ನ್ ತಾಚೆಂ ಭಿಕೆಚೆಂ ಜೆವಾಣ್ ಘೆತ್ಲೆಂ. ಪುಣ್ ತಾಣೆಂ ತಾಂತ್ಯಾಚಿ ಬಿರಿಯಾಣಿ ಮ್ಹಣ್ ದಿಲ್ಲ್ಯಾ ಬಿರಿಯಾಣಿಂತ್ ತಾಂತಿಂ ಮಾಯಾಕ್! ವ್ಹಚೊಂ, ತಾಂತ್ಯಾಚೊ ಪರ್ಮಳ್ಯೀ ನಾ. ವೆಜಿಟೇಬಲ್ ಬಿರಿಯಾಣಿ ದೀವ್ನ್ ಗೆಲ್ಲೊ ತೀನ್ ಕಾಸಾಂಚೊ. ತಾಚೆಲಾಗಿಂ ಮಾತ್ರ್ ಆಪ್ಣೆಂ ಆಕ್ಶೇಪ್ ಕಾಡ್ಲೊ. "ದೊನಾಂಯ್ಕೀ ಮೋಲ್ ಎಕ್ಚ್ ಸರ್!" ಮ್ಹಣ್ ಕಿಡಿಯಾರೆ ದಾಂತ್ ದಾಕಯ್ಲಾಗ್ಲೊ ಹಡ್ಬೊ. ಮೋಲ್ ಎಕ್ಚ್ ಸಾರ್ಕೆಂ ದೆಕುನ್ ತುಕಾ ಖುಶಿ ಆಸ್ಲ್ಲೆಂ ದಿಂವ್ಚೆಂಗೀ ಹಾಂವೆಂ ವಿಚಾರ್ಲ್ಲೆಂ ದಿಂವ್ಚೆಂ,’ಮ್ಹಣ್ ತಾಚೆಲಾಗಿಂ ಲಡಾಯೆಕ್ ದೆಂವಾಜೆ ಮ್ಹಣ್ ಚಿಂತ್ಚ್ಯಾ ಪಯ್ಲೆಂ ತೊ ಚಲ್ತಚ್ ರಾವ್ಲೊ. ತಾಚ್ಯಾ ಬಿರಿಯಾನಿಕ್ ಘಡ್ಗಡೊ ಪಡೊಂ,’ಹಾಂವ್ ಮತಿಂತ್ಚ್ ಶಿರಾಪ್ಲೊಂ.
ಆತ್ತಾಂಚ್ಯಾ ಆತ್ತಾಂ ಆನ್ಯೇಕ್ ಮೋಸ್! ರತ್ನಗಿರಿ ಟ್ರೇನ್ ರಾವ್ತಾನಾ ಪೇಪರ್ ಹಾಡುಂಕ್ ಮ್ಹಣ್ ಸಕಯ್ಲ್ ದೆಂವ್ಲೊಂ. ಮೆಳ್ಕುಟೆಂ ವಸ್ತುರ್ ನೆಸ್ಲ್ಲೊ ಏಕ್ ಪಿಲ್ಕಾಟೊ ತಾಚ್ಯಾ ನಾಕಾ ಮ್ಹಣಾಸರ್ ಪೇಪರಾಂಚೊ ದಾಳೊ ವಾವವ್ನ್, ತ್ಯಾ ಜಡಾಯೆಕ್ ಲಕೊನ್ ಲಕೊನ್,‘ಹಿಂದೂ, ಮಿಡ್ ಡೇ ಪೇಪಾರ್’ಮ್ಹಣ್ ಪೆಂಪಾರೆಂ ವ್ಹಾಜಯ್ತಾಲೊ. ತಾಚೆ ಲಾಗ್ಚೆಂ ಏಕ್ ’ಮಿಡ್ ಡೇ’ ಘೆತ್ಲೆಂ. "ಚಾರ್ ರುಪಯ್ ಸರ್",” ಮ್ಹಣಾಲೊ ತೊ. ಪೊಕೆಟಿಂತ್ಲೆ ಚಾರ್ ರುಪಯ್ ತಾಚ್ಯಾ ಹಾತಾಂತ್ ಘಾಲ್ನ್ ಭಿತರ್ ಆಯ್ಲೊಂ. ಪೇಪರಾರ್ ದೀಶ್ಟ್ ಘಾಲ್ತಾಂ, ಮೋಲ್ ಕೇವಲ್ ಅಡೇಜ್ ರುಪಯ್. ದಳ್ದಿರ್ ಪಿಲ್ಕಾಟ್ಯಾನ್ಯೀ ಮ್ಹಾಕಾ ಸೂಂಬೆ ಕೆಲೆಂ. ತಾಚೊ ಗಳೊ ಅಂರ್ದುಂಚ್ಯಾ ತಿತ್ಲೊ ರಾಗ್ ಆಯ್ಲೊ ತರ್ಯೀ ಟ್ರೇನ್ ರತ್ನಗಿರಿ ಥಾವ್ನ್ ಮಸ್ತು ಮುಕಾರ್ ಪಾವ್ಲ್ಲಿ.
ಚೂಕ್ ಮ್ಹಜಿಚ್ ತೆಂ ಮ್ಹಾಕಾ ಕಳಿತ್ ಆಸಾ. ಪುಣ್ ಆಪ್ಣಾಕ್ ಪಳೆತಾನಾ ಮ್ಹನ್ಶಾಂಕ್ ಹೊ ಮುಗ್ದ್ ಮ್ಹಣ್ ದಿಸ್ತಾಗೀ ಕಶೆಂ? ನಾ ತರ್ ಸಾಕಾಳಿಂ ಥಾವ್ನ್ ಮ್ಹಾಕಾ ಹ್ಯಾ ಪರಿಂ ಮೋಸ್ ಜಾಂವ್ಚೆಂ ಮ್ಹಳ್ಯಾರ್?
ಹಾಂವೆಂ ಪೇಪರ್ ಹಾಡುಂಕ್ ಜಬ್ಬೊರ್ ಕಾರಣ್ ಆಸಾ. ಕುಶಿಚ್ಯಾ ಸಿಟಿರ್ ಲಾಂಬ್ ಪಾಂತಿಯೆಚೆಂ ಚೆಡುಂ ಎಕ್ಲೆಂ ಭಾರಿಚ್ ಶಿಸ್ತೆನ್ ‘ದ ವಿಂಚಿ ಕೋಡ್’ ವಾಚ್ತಾಲೆಂ. ಆಪ್ಣಾಕ್ಯೀ ಇಂಗ್ಲಿಶ್ ಯೆತಾ ಮ್ಹಣ್ ತಾಕಾ ದಾಕಂವ್ಯಾಂ ಮ್ಹಣ್ ಹಾಂವೆಂಯೀ ಪೇಪರ್ ಹಾಡ್ಲ್ಲೆಂ. ತಾಚಿ ದೀಶ್ಟ್ ಮಾತ್ರ್ ಆಜೂನ್ ಚುಕೊನ್ಯೀ ಮ್ಹಜೆರ್ ಪಡೊಂಕ್ ನಾತ್ಲ್ಲಿ. ಆಪ್ಣೆಂಯೀ "ದ ವಿಂಚಿ ಕೋಡ್" ವಾಚ್ಲ್ಯಾ ಮ್ಹಣ್ ತಾಕಾ ಸಂಗೊನ್ ಚರ್ಚೆ ಕರ್ಯಾಂ ಮ್ಹಳ್ಳಿ ತಾಳ್ಣಿ ಹಾಂವೆಂ ಕಶ್ಟಾಂನಿ ತರ್ಯೀ ದಾಂಬುನ್ ಧರ್ಲಿ. ಉಪ್ರಾಂತ್ ಮ್ಹಜೆಂ ಅಮಾಯಕ್ಪಣ್ ತ್ಯಾ ಚೆಡ್ವಾನ್ಯೀ ಪಾರ್ಕುನ್ ಹಾಂವ್ ಪರ್ತುನ್ ವಿರ್ಯಾರ್ ಜಾವ್ನ್ ಮತಿಚೆಂ ಸಮಾದಾನ್ ಹೊಂಗ್ಡಾಂವ್ಚ್ಯಾಕ್ಯೀ "ಮಿಡ್ ಡೇ" ವಾಚುನ್ ಬಸ್ಚೆಂ ಸಂಪೆಂ ಮ್ಹಣ್ ಭಗ್ಲೆಂ.
ಲಾಂಬ್ ಪಾಂತಿಯೆಚ್ಯಾ ಚೆಡ್ವಾ ಸಾಂಗಾತಾ ಹೆರ್ ಪಾಂಚ್ ಜಣಾಂ ಆಸ್ಲ್ಲಿಂ. ಮದ್ಲ್ಯಾ ಬರ್ತಾರ್ ಎಕ್ಲಿ ಮೊಟಿ ಮದಾಮ್ ಬರಿಚ್ ನೀದ್ ಕಾಡ್ತಾಲಿ. ಟ್ರೇನ್ ಧಲ್ಚ್ಯಾ ಬರಿಚ್ ತಿಣೆಂಯೀ ಧಲ್ಚೆಂ ಪಳೆಂವ್ಕ್ ಭಾರಿಚ್ ಮಜಾ ಭಗ್ತಾಲಿ. ತಿ ಕಾಂಯ್ ತ್ಯಾ ಚೆಡ್ವಾಚಿ ಆವಯ್ ಜಾಯ್ಜಯ್. ಮಾಗಿರ್ ಎಕ್ಲಿ ಪ್ರಾಯೆಚಿ ಸ್ತ್ರೀ ಆಸ್ಲ್ಲಿ. ಕಾಂಯ್ ವ್ಹಡ್ಲಿಮಾಂಯ್ ಆಸ್ತೆಲಿ. ಆನಿ ದೊಗಾಂ ದಾಕ್ಟಿಂ ಚೆಡೊ ಆನಿ ಚೆಡುಂ; ಬಹುಶ ಭಾವ್ ಆನಿ ಭಯ್ಣ್. ಮಾಗಿರ್ ಎಕ್ಲಿ ಆಂಟಿ. ತಿ ಕುಂದಾಪುರ್ ಕನ್ನಡ ಉಲಯ್ತಾಲಿ. ತಿ ಹ್ಯಾ ಕುಟ್ಮಾಚಿ ನ್ಹಂಯ್ ತೆಂ ಕಳ್ಳೆಂ ಮ್ಹಾಕಾ. ಕಿತ್ಯಾಕ್ ಹಿಂ ತುಳು, ಇಂಗ್ಲಿಶ್ ಉಲಯ್ತಾಲಿಂ ತರ್ ತಿ ಕೇವಲ್ ಕನ್ನಡ ಉಲಯ್ತಾಲಿ. ಬೊಣ್ಕ್ಯಾಂಚಿ ಆಸೊಂಕ್ಯೀ ಪುರೊ ಮ್ಹಣ್ ಚಿಂತ್ಲೆಂ.
"ದ ವಿಂಚಿ ಕೋಡ್" ಮ್ಹಾಕಾ ಗಿರಿಧರಾನ್ ಹಾಡ್ನ್ ದಿಲ್ಲೊ. ಬರೊ ಈಶ್ಟ್ ತೊ. ಮ್ಹಾಕಾ ಆಸ್ಚೆ ಈಶ್ಟ್ಚ್ ಉಣೆಂ. ತಾಂಚೆ ಪಯ್ಕಿ ಗಿರಿಧರ್ ಭಾರಿ ಮೊಗಾಚೊ. "ವಾಚ್ರೇ ಲಜ್ಮಾಡ್ಯಾ; ತುಜ್ಯಾಚ್ ಧರ್ಮಾಚೆಂ ಕಸ್ತಾಳ್ ಉಸ್ತಿಲಾಂ ಪಳೆ",”ತಾಣೆಂ ಮ್ಹಳ್ಳೆಂ.
ತ್ಯಾಚ್ ರಾತಿಂ ವಾಚುಂಕ್ ಧರ್ಲಿ ಕಾಣಿ ಹಾಂವೆಂ. ಭಾರಿಚ್ ಕುತೂಹಲ್ಭರಿತ್ ಕಶಿ ಭಗ್ಲಿ ಆಸ್ತಾಂ ವಾಚುನ್ಂಚ್ ಗೆಲೊಂ. ಸಕಯ್ಲ್ ದವರುಂಕ್ ಮನ್ ಆಯ್ಲೆಂನಾ. ಸಾಕಾಳಿಂ ಸಾಡೆ-ಸ ಜಾತಾನಾ ಮುಗ್ದಿಲಿ ಆನಿ ಉಪ್ರಾಂತ್ ನಿದೊಂಕ್ ಗೆಲ್ಲೊಂ.
ಡ್ಯಾನ್ ಬ್ರಾವ್ನಾನ್ ಕಾದಂಬರಿಂತ್ ಸಾಂಗ್ಲ್ಲೆಂ ಸರ್ವ್ ಸತ್ಗಾಯ್ ಮ್ಹಳ್ಳಿಂ ಸವಾಲಾಂ ತ್ಯಾ ಘಡಿಯೆ ಉದೆಲ್ಲಿಂ ವ್ಹಯ್. ಜೆಜು ಕ್ರಿಸ್ತಾಕ್ ಕಾಜಾರ್? ಚಿಂತಾನಾ ಆಂಗಾಂತ್ ಮುಯೊ ಚರ್ಲ್ಲೊ ಅನ್ಬೊಗ್ ಜಾಲ್ಲೊ. ತರ್ಯೀ ಕಾಣ್ಯೆಂತ್ಲ್ಯಾ ಸೊಫಿನ್ ವಿಚಾರ್ಚೆಬರಿ ಕಸಲೊ ವ್ಹಡ್ಲೊ ವಿಶಯ್ ತೊ? ಜೆಜು ಕಾಜಾರ್ ಜಾಲ್ಯಾರ್ಯೀ ಕಾಂಯ್ ತಾಚ್ಯಾ ಆದರ್ಶಾಂಕ್ ಮೋಲ್ ಉಣೆಂ ಖಂಡಿತ್ ಜಾತೆಂನಾ. ಕಿತ್ಯಾಕ್ ತಾಚಿ ಜಿಣಿ ಆನಿ ಶಿಕೊವ್ನ್ ಎಕ್ಚ್ ಜಾವ್ನಾಸ್ಲ್ಲಿ ನ್ಹಂಯ್? ಅಸಲೆಂ ರಾಜಾಂವ್ ಉದೆಲ್ಲೆಂ.
ಪುಣ್ ಉಪ್ರಾಂತ್ ಪೇಪರಾಂನಿ ವಾಚ್ಲ್ಲ್ಯಾಬರಿ ಡ್ಯಾನ್ ಬ್ರಾವ್ನಾನ್ ವ್ಹಡ್ ವ್ಹಡ್ ಫಟಿಂಚಿ ಶಿಂಕಳ್ಚ್ ಗುಂತ್ಲ್ಯಾ ಮ್ಹಳ್ಳೆಂ ಕಳ್ತಾನಾ ರಾಗ್ ಆಯಿಲ್ಲೊ. ತಾಣೆಂಯೀ ಅಮಾಯಕ್ ವಾಚ್ಪ್ಯಾಂಕ್ ಫಟಯಿಲ್ಲೆಂ ಆನಿ ತಾಂಚೆ ಮದ್ಲೊ ಹಾಂವ್ಯೀ ಎಕ್ಲೊ. ಥುತ್ತ್! ಕಿತ್ಯಾಕ್ ವಯ್ರ್ ವಯ್ರ್ ಅಸಲಿಂಚ್ ಚಿಂತ್ನಾಂ ಯೆತಾತ್ ತೆಂ ಕಳ್ಳೆಂನಾ. ಲಾಂಬ್ ಪಾಂತಿಯೆಚೆಂ ಚೆಡುಂ ಮಾತ್ರ್ ಕಸಲ್ಯಾಚಿಚ್ ಪರ್ವಾ ನಾಸ್ತಾಂ ಬುಕಾಂತ್ ಬುಡ್ಲ್ಲೆಂ.
ಹಾಂವ್ "ಮಿಡ್ ಡೇ" ವಾಚ್ಚಾರ್ ಪಡ್ಲೊಂ. ಹ್ಯಾ ಪೇಪರಾಂತ್ ಖಬ್ರಾಂಚ್ಯಾಕ್ಯೀ ಚಡ್ ಇಸ್ತಿಹಾರಾಂಚ್ ಆಸಾಜಯ್ಗೀ! ಪಾನಾಂ ಪಾನಾಂನಿ ಇಸ್ತಿಹಾರಾಂಚಿಚ್ ರಾಸ್! ಆತಾಂತಾಂ ಪೇಪಾರಾಂಚೆ ಮಾಲಕ್ಯೀ ಅಮಾಯಕ್ ವಾಚ್ಪ್ಯಾಂಕ್ ಸಸಾರ್ ಕರ್ತಾತ್ ಹ್ಯಾ ಪರಿಂ. ಮ್ಹಾಕಾ ರಾಗ್ ಆಯ್ಲೊ. ಹಾಂವೆಂ ಗಾಂವಾಕ್ ಭಾಯ್ರ್ ಸರ್ಲ್ಲಿ ವೇಳ್-ಘಡಿಚ್ ಸಾರ್ಕಿ ನಾ ಜಾಯ್ಜಯ್. ಜಾಂವ್ಕ್ ಗಿರಿಧರಾನ್ ಸಾಂಗ್ಲ್ಲೆಂ: ತಿತ್ಲೊ ಕಿತೆಂ ಆಮ್ಸೊರ್ರೇ ವಿನ್ಸಿ? ಪೋರ್ಚ್ ಕಾಮಾಕ್ ಸೆರ್ವಾಲಾಯ್. ಆತಾಂ ಗಾಂವಾಕ್ ಸುಟ್ಲಾಯ್. ಫುಡಾರಾಚೆಂ ಪಯ್ಲೆಂ ಚೀಂತ್. ಗಾವಾಂತ್ ತಶೆಂ ಸಂಸಾರ್ ಒಮ್ತೆ ಪಡ್ಚೆ ತಸಲೆಂ ಕಾಂಯ್ ಜಾಂವ್ಚೆಂ ನಾ.”
ಹಾಂವೆಂ ಗಾಂವಾಕ್ ವೆಚೆಂ ನೀಜ್ ಕಾರಣ್ ಗಿರಿಕ್ ಸಾಂಗೊಂಕ್ ನಾತ್ಲ್ಲೆಂ. ಗಾಂವಾಕ್ ವಚಾನಾಸ್ತಾಂ ಸುಮಾರ್ ವರ್ಸಾಂ ಜಾಲ್ಲಿಂ. ಭಾವಾಂಚ್ಯಾ ಕಾಜಾರಾಕ್ಯೀ ವಚೊಂಕ್ ನಾತ್ಲ್ಲೊಂ. ಪುಣ್ ಕಿತ್ಯಾಕ್ಗೀ ಹ್ಯಾ ದಿಸಾಂನಿ ಗಾಂವಾಕ್ ವೆಚಿ ತಾಳ್ಣಿ ಜಬ್ಬೊರ್ ಜಾಲ್ಲಿ. ಆತಾಂ ತರ್ಯೀ ಸಂಸಾರಾಕ್ ಮ್ಹಜಿ ಕಾಂಯ್ ಥೊಡಿ ಶ್ಯಾತಿ ದಾಕಯ್ಜಯ್, ಅಮಾಯಕ್ ಉರೊಂಕ್ ನಜೊ ಮ್ಹಳ್ಳೆಂ ಹಟ್ಯೀ ಕಾಳ್ಜಾ ಕೊನ್ಶಾಂತ್ ಉದೆಲ್ಲೆಂ.
"ಟೀ ... ಕಾಫೀ.." ಕೆಟ್ಲಿ ಆನಿ ಪ್ಲಾಶ್ಟಿಕ್ ಲೊಟೆ ಕಾಣ್ಘೆವ್ನ್ ಎಕ್ಲೊ ಚೆರ್ಕೊ ಅಯ್ಲೊ.
"ಕಿತ್ನಾ.." ವಿಚಾರ್ಲೆಂ ಹಾಂವೆಂ ಪಯ್ಲೆಂಚ್.
"ಪಾಂಚ್ ರುಪ್ಯಾ.." ತೊ ಮ್ಹಣಾಲೊ. ಹ್ಯಾ ಟ್ರೇನಾರ್ ಹರ್ಎಕ್ಯೀ ಮ್ಹಾರಗ್, ಗಲೀಜ್ ಕಾಕ್ಸಾಂಚಿ ಮೂರ್ ಆನಿ ಪರ್ನ್ಯಾ ಡಬ್ಬ್ಯಾಂಚೊ ಕರ್ಕ್ಯಾರ್ಯಾಂಚೊ ಆವಾಜ್ ಸೊಡ್ಲ್ಯಾರ್. ಆನಿ ಕಾಂಯ್ ತಾಂಕಾಂಯೀ ಮೋಲ್ ಬಾಂದ್ತಾತ್ ಕೊಣ್ಣಾ!
ನಿರ್ವೊಗ್ ನಾಸ್ತಾಂ ಚಾ ಕಾಣ್ಘೆಲಿ. ದೋನ್ ಘೊಟ್ಯೀ ನಾ. ಚಾಕೊನ್ ಚಾಕೊನ್ ಪಿಯೆಂವ್ಕ್ ಲಾಗ್ಲೊಂ. ಗಿರಿಧರ್ ಬರಿ ಚಾ ಕರ್ತಾ ರೂಮಾಂತ್. ಬಾವ್ಡೊ ಚಡ್ತಾವ್ ತೊಚ್ ರಾಂದಾಪ್ ಕರ್ತಾ. ಹಾಂವ್ ಆಳ್ಶಿ ರೆಡೊ, ಉಟ್ತಾಂ ಸಾತ್-ಆಟಾಂಕ್. ಸಾಕಾಳಿಂ ಸಾಡೆ-ಪಾಂಚಾಂಕ್ಚ್ ಉಟ್ಚೊ ಗಿರಿ ಉಪ್ಮಾ, ಪಾವ್ಭಾಜಿ, ಮಿಸಳ್ ಇತ್ಯಾದಿ ಸಾದೊ ನಾಸ್ಟೊ ಕರ್ತಾ. ಪುಣ್ ತಾಚಿ ಪರ್ಮಳಿಕ್ ಕಡಕ್ ಚಾ ಮಾತ್ರ್ ಭಾರಿಚ್ ರುಚಿಕ್. “ಇತ್ಲಿ ಬರಿ ಚಾ ಹಾಂವ್ ಖಂಯ್ಸರ್ಯೀ ಪಿಯೆಂವ್ಕ್ ನಾ ಪಳೆ ಗಿರಿ..” ಹಾಂವ್ ತೆದಾಳಾ ತೆದಾಳಾ ತಾಚಿ ತಾರಿಫೊ ಕರ್ತಾನಾ ತೊ ಲಜೆನ್ ದೊಡ್ತಾ.
ಮ್ಹಾಕಾ ಎದೊಳ್ ಜಿಣ್ಯೆಂತ್ ಮೋಸ್ ಕರುಂಕ್ ನಾ ಮ್ಹಳ್ಯಾರ್ ಬಹುಶ ಗಿರಿನ್ ಮಾತ್ರ್ಗೀ ಮ್ಹಣ್. ತಾಣೆಂ ಮೋಸ್ ಕರ್ಚೊ ತರ್ಯೀ ಕಸೊ? ತಾಕಾ ಮೋಸ್, ಫಟಂವ್ಚೆಂ, ಬನಾವಟಿ ಕಾಮಾಂ ಮ್ಹಳ್ಯಾರ್ ಕಿತೆಂ ಮ್ಹಣ್ ಕಳಿತ್ ನಾ. ಕಿತ್ಲೊ ಸಾದೊಗೀ ತಿತ್ಲೊಚ್ ಸತ್ತಿ ಮ್ಹನಿಸ್ ಗಿರಿ. ತೊ ಅಹಮದ್ನಗರಾ ಥಾವ್ನ್ ಫುಡಾರ್ ಸೊದುನ್ ಮುಂಬಯ್ ಪಾವ್ಲ್ಲೊ. ಮ್ಹಜೆ ಬರಿ ತೊಯೀ ದಿಸಾಚೆಂ ಕಾಮ್ ಕರ್ನ್ ಸಾಂಜೆಚೆಂ ಕೊಲೆಜಿಕ್ ವೆತಾಲೊ. ಅಶೆಂ ಎಕಾಚ್ ಕ್ಲಾಶಿಂತ್ ಶಿಕ್ತಾಲ್ಯಾಂವ್ ಜಾಲ್ಲ್ಯಾನ್ ಆಮಿ ಬರೆ ಈಶ್ಟ್ ಜಾಲ್ಯಾಂವ್. ಮಾಗಿರ್ ಆಮ್ಚೆಂ ರೂಮ್ಯೀ ಎಕ್ಚ್ ಜಾಲೆಂ. ಪೊರ್ಚ್ಯಾ ಪೋರ್ ದೊಗ್ಯೀ ಸಾದಾರಣ್ ಬರ್ಯಾ ಸಾಂಬಾಳಾಚ್ಯಾ ನವ್ಯಾ ನವ್ಕರೆಕ್ ಸೆರ್ವಾಲ್ಯಾಂವ್, ಪುಣ್ ವೆವೆಗ್ಳ್ಯಾ ಕಂಪ್ಣೆಂನಿ.
ಗಿರಿಧರ್ ಮ್ಹಜ್ಯಾಕ್ಯೀ ಚಡಿತ್ ಮುಗ್ದ್ ಆನಿ ಸಾದೊ. ದೆಕುನ್ಂಚ್ ಜಾಯ್ಜಯ್ ಕೊಣಾಯ್ಕೀ ಫಟಂವ್ಕ್, ಮೋಸ್ ಕರುಂಕ್ ತಾಚ್ಯಾನ್ ಅಸಾದ್ಯ್. ಮುಂಬಯ್ಚ್ಯಾ ರಸ್ತಾಂನಿ ಚೆಡ್ವಾಂ ಅರ್ದೆಂಕುರೆಂ ನೆಸೊನ್ ಕೂಡ್ ಪ್ರದರ್ಶನ್ ಕರುನ್ ಆಟ್ ನೇಟ್ ಕರ್ನ್ ಚಲ್ಚೆಂ ಪಳೆವ್ನ್ ತೊ "ಹಾ ಕಸಲೊ ಸಂಸಾರ್" ಮ್ಹಣ್ ಉದ್ಗಾರ್ ಕಾಡ್ತಾಲೊ. ಏಕ್ ದೀಸ್ ಸಾಂಜೆರ್ ಕಾಮಾ ಥಾವ್ನ್ ಪಾಟಿಂ ಯೆತಾನಾ ವಿಚಿತ್ರ್ ಮೇಕಪ್ ಕೆಲ್ಲ್ಯಾ ಎಕಾ ಚಲಿಯೆನ್ ಆಪ್ಣಾಕ್ ದೊಳೊ ಮೊಡ್ಲೊ; ಆಪ್ಣಾಕ್ ತಾಚೆ ಸರ್ಶಿಂ ವೆಚಿ ತಾಳ್ಣಿ ಆಯ್ಲಿ ತರ್ಯೀ ಸಾಂಬಾಳ್ನ್ ಪಾಟಿಂ ಆಯ್ಲೊಂ, ಅಶೆಂ ಭಾರಿಚ್ ಆತುರಾಯೆನ್ ಸಾಂಗಾಲಾಗ್ಲೊ. ತಾಕಾ ದೊಳೆ ಮೊಡ್ಲ್ಲಿ ಚಲಿ ಏಕ್ ವೇಶ್ಯಾ ತೆಂ ಹಾಂವೆಂ ಸಾಂಗ್ತಾನಾ ಮಾತ್ರ್ ತಾಕಾ ಚಡಿತ್ ಅಘಾತ್ ಜಾಲ್ಲೊ.
"ಚಡ್ ದೀಸ್ ರಾವಾನಾಕಾರೇ ಗಾಂವಾಂತ್ ಕಾಡ್ನ್ ಘಾಲ್ಲ್ಯಾ. ಮ್ಹಾಕಾ ಹಾಂಗಾ ದೀಸ್ ಕಾಡುಂಕ್ ಕಶ್ಟಾಂಚೆಂ ಜಾತಲೆಂ", ಭಾಯ್ರ್ ಸರ್ತಾನಾ ಗಿರಿನ್ ಸಾಂಗ್ಲ್ಲೆಂ.
ಗಿರಿಧರಾಬರಿ ಸಾದೆ, ಸತ್ತಿ ಮನಿಸ್ ಕಿತ್ಯಾಕ್ ಉಣೆಂ ಸಂಸಾರಾಂತ್? ಹಾಂವ್ ಚಿಂತಾಲೊಂ. ಆತಾಂ ಹ್ಯಾಚ್ ಟ್ರೇನಾರ್ ಮ್ಹಜಿ ಸೀಟ್ ಸೊಡ್ನ್ ಕಾಕ್ಸಾಕ್ ವ್ಹಚೊಂಕ್ಯೀ ಭಿರಾಂತ್, ಕೋಣ್ ಮ್ಹಜೆಂ ಬ್ಯಾಗ್ ಉಕಲ್ನ್ ವರ್ತಾ ಕೊಣ್ಣಾ ಮ್ಹಣ್. ವಿಶ್ವಾಸ್, ಪಾತ್ಯೆಣಿ, ಭರ್ವಸೊ ಹ್ಯಾ ಸರ್ವ್ ಸಂಗ್ತಿಂಕ್ ಆಜ್ ಮೋಲ್ ದಿತಾ ತರ್ಯೀ ಕೋಣ್? ಸಾದ್ಯ್ ಜಾಲ್ಲೆಂ ತರ್ ಮ್ಹನಿಸ್ ಪಾಜೆ ಫಾತೊರ್ಯೀ ಬೊಕೊರ್ನ್ ಖಾತೊ ಕೊಣ್ಣಾ!
ಕುಶಿಚಿಂ ಪಯ್ಣಾರಿ ಮುಂಬಯ್ ಥಾವ್ನ್ ಹಾಡ್ಲ್ಲಿಂ ಖಾಣಾಂ ಖಾತಾಲಿಂ. ಲಾಂಬ್ ಪಾಂತಿಯೆಚೆಂ ಚೆಡುಂ ಬುಕಾಂತ್ಲಿ ದೀಶ್ಟ್ ಕಾಡಿನಾಸ್ತಾಂ ಖಾತಾಲೆಂ. ಹಾಬ್ಬಾ! ಜಾವ್ಯೆತ್ ತಾಚೊ ದೊಡೊ ಹೊರ್ಬೊಸ್. ವಯ್ರ್ ನಿದ್ಲ್ಲಿ ಮೊಟಿ ಮದಾಮ್ ಆತಾಂ ಉಟ್ಲ್ಲಿ ಆನಿ ವ್ಹಡ್ಲ್ಯಾನ್ ಉಲಯ್ತಾಲಿ. ಕುಂದಾಪುರ್ ಕನ್ನಡ ಉಲಂವ್ಹಿ ಬಾಯ್ಲ್ ಆಪುಣ್ ಸಗ್ಳೊ ಸಂಸಾರ್ ಭಂವೊನ್ ಜಾಣಾಂ ಮ್ಹಳ್ಳ್ಯಾಬರಿ ಕಾನೂನಾಂ ಕಾತರ್ತಾಲಿ.
ಗಾವಾಂತ್ ಪ್ರೈಮರಿ ಶಿಕ್ತಾನಾ ಲಾಂಬ್ ಪಾಂತಿಯೆಚ್ಯಾ ಸುಹಾಸಿನಿ ಟೀಚೆರಿಚೆರ್ ಮ್ಹಾಕಾ ಚಡಿತ್ ಮೋಗ್ ಆಸ್ಲ್ಲೊ. ತಿ ಚಲ್ತಾನಾ ತಿಚ್ಯಾ ಕುಲ್ಯಾರ್ ಥಾವ್ನ್ ಸಕಯ್ಲ್ ಪೊಟ್ರ್ಯಾಂಚೆರ್ ಖೆಳ್ಚಿ ದಿವ್ಡಾ ಸಾರ್ಕಿ ಪಾಂತಿ ಕುಸಾಳಾಂನಿ ಕುಚುಲ್ಯೊ ಕರ್ತಾಲಿ. ತಿ ಆಮ್ಕಾಂ ಲೆಕ್ಕಾ ಶಿಕಯ್ತಾಲಿ. ತಿ ಬೋರ್ಡಾರ್ ಲೆಕ್ಕಾ ಶಿಕಯ್ತಾನಾ ಹಾಂವ್ ತಿಚ್ಯಾ ಪಾಂತಿಯೆಚಿ ಲಾಂಬಾಯ್ ಮೆಜ್ತಾಲೊಂ. ಉಣೆಂ ಮ್ಹಳ್ಯಾರ್ಯೀ ಕಾಂಯ್ ಏಕ್ ಮೀಟರ್ ಆಸ್ಲ್ಲಿ ಕೊಣ್ಣಾ ತಿ ಪಾಂತಿ. ತಿಚ್ಯಾ ಲಾಂಬ್ ಪಾಂತಿಯೆಚಿ ಸೊಬಾಯ್ ಮ್ಹಜೆ ಮತಿಕ್ ಗೆಲ್ಲೆ ತಿತ್ಲಿ ತಿಚಿಂ ಲೆಕ್ಕಾಂ ವ್ಹಚಾನಾತ್ಲಿಂ. ದೆಕುನ್ಂಚ್ ಮ್ಹಾಕಾ ತಿಚೆ ಮಾರ್ ಸರಾಗ್ ಮೆಳ್ತಾಲೆ. ತರಿಕ್ಯೀ ಕಾಂಯ್ ಬೆಜಾರ್ ನಾತ್ಲ್ಲೆಂ. ತಿಚೆ ಮಾರ್ ಖಾಂವ್ಕ್ಯೀ ಭಾಗ್ ಆಸಾಜೆ ಮ್ಹಣ್ ಹಾಂವೆಂ ಲೆಕುನ್ ಜಾಲ್ಲೆಂ.
ಮಾಂಯ್ಕ್ ಬಹುಶ ಮ್ಹಜೆರ್ ತಿತ್ಲೊ ಮೋಗ್ ನಾತ್ಲ್ಲೊ; ಯಾ ತಿ ತಶೆಂ ದಾಕಯ್ನಾತ್ಲ್ಲಿ. ಹ್ಯಾಚ್ ಖಾತಿರ್ ಜಾಯ್ಜಯ್ ಮ್ಹಾಕಾ ಮಾಂಯ್ಚ್ಯಾಕ್ಯೀ ಸುಹಾಸಿನಿ ಟೀಚೆರ್ ಚಡಿತ್ ಪಸಂದ್ ಜಾತಾಲಿ. ತಿಣೆಂ ಕಸಲೆಂ ಕಾಮ್ ವಿಚಾರ್ಲ್ಯಾರ್ಯೀ ಕರುಂಕ್ ಹಾಂವ್ ತಯಾರ್ ಆಸ್ತಾಲೊಂ. ಸುಹಾಸಿನಿ ಟೀಚೆರಿಕ್ ಬಿಂಡಾಂಚೆರ್ ಚಡಿತ್ ಮೋಗ್ ಮ್ಹಣ್ ಮ್ಹಾಕಾ ಕಳ್ಲ್ಲೆಂ. ದೆಕುನ್ಂಚ್ ಏಕ್ ದೀಸ್ ಎಕಾ ಥಯ್ಲೆಂತ್ ಭರ್ನ್ ಬಿಂಡಾಂ ವರ್ನ್ ತಿಕಾ ದಿಲ್ಲಿಂ. ತಿಕಾ ಅಜ್ಯಾಪ್ ಆನಿ ಸಂತೊಸ್ ಸಾಸಾಂಗಾತಾ ಜಾಲ್ಲೊ. ತ್ಯಾ ಉಪ್ರಾಂತ್ ತಿಕಾ ಮ್ಹಜೆರ್ ಮೋಗ್ ಮಾತ್ಸೊ ಚಡ್ಲ್ಲೊ. ತಶೆಂ ಹಾಂವ್ಯೀ ತಿಚಿಂ ಲೆಕ್ಕಾಂ ಚಡಿತ್ ಧ್ಯಾನ್ ದೀವ್ನ್ ಶಿಕೊಂಕ್ ಲಾಗ್ಲೊಂ.
ಧಾವೆ ಉಪ್ರಾಂತ್ ವಿವಿದ್ ಕಾರಾಣಾಂಕ್ ಲಾಗೊನ್ ಹಾಂವೆಂ ಘರ್ ಸೊಡ್ಲೆಂ ಆನಿ ಹಾಂವ್ ಮುಂಬಯಿ ಆಯ್ಲೊಂ. ಮತಿಚಿ ಇಜಾ ಚಡ್ ಜಾಲ್ಲಿ ಆನಿ ಘರಾ ಉರ್ಚೆಂ ಅಸಾದ್ಯ್ ಜಾಲ್ಲೆಂ. ಮ್ಹಜೆ ಧರ್ಮಾನ್ಂಚ್ ಜಾಯ್ಜಯ್ ಆನಾನ್ ಮಾಂಯ್ಕ್ ಇಜಾ ದಿಂವ್ಚಿ ಆಸ್ಲ್ಲಿ.
"ತುಂ ಬಾಜಾರಿಗೋ ತೀನ್ ಕಾಸಾಂಚ್ಯಾ!" ಕೆದಾಳಾಯೀ ನಾಕ್-ಭರ್ ಪಿಯೆವ್ನ್ ತೊ ಮಾಂಯ್ಕ್ ಸೊವ್ತಾಲೊ, ಮಾರ್ತಾಲೊ ಸಯ್ತ್. ಭಾರಿ ಸಳಾವಳ್ ತುಜಿ ತ್ಯಾ ಹುಸೇನಾ ಬ್ಯಾರಿ ಲಾಗಿಂ...”
ಹುಸೇನಾ ಬ್ಯಾರಿ ಬೀಡಿಯೆಚ್ಯಾ ಬ್ರಾಂಚಾಂತ್ ಗಾಂವ್ಚಿ ಬೀಡಿ ಕಾಡ್ಚೊ ಮಾಪ್ಳಿ. ಮ್ಹಜಿ ಮಾಂಯ್ಯೀ ಬೀಡಿ ಥಂಯ್ಚ್ ವರ್ತಾಲಿ. ಜಾಂವ್ಕ್ ಹುಸೇನಾ ಬ್ಯಾರಿಕ್ ಬೀಡಿಯೆಚ್ಯಾ ಬಾಯ್ಲಾಂಲಾಗಿಂ ಚಳಾವಳ್ ಚಡ್ ತೆಂ ಹಾಂವೆಂಯ್ಯೀ ಆಯ್ಕಾಲ್ಲೆಂ. ಪುಣ್ ಮಾಂಯ್ಕ್ಯೀ ತಸಲಿ ಸಳಾವಳ್ ಆಸ್ಲ್ಲಿಗೀ ಕಳಿತ್ ನಾತ್ಲ್ಲೆಂ.
ಆನ್ ಮ್ಹಾಕಾಯೀ ಕಠೀಣ್ ಹಿಣ್ಸಿತಾಲೊ, ಆಪುಣ್ ತುಜೊ ಬಾಪಯ್ ನ್ಹಂಯ್; ತುಜ್ಯಾ ಆವಯ್ನ್ ಮ್ಹಾಕಾ ಫಟಯ್ಲಾಂ, ಮೋಸ್ ಕೆಲಾ ಅಶೆಂ ಸಾಂಗ್ತಾಲೊ. ಮಾಂಯ್ನ್ ಮ್ಹಾಕಾ ಖರೆಂಚ್ ಫಟಯ್ಲಾಂಗೀ? ತರ್ ಮ್ಹಜೊ ಬಾಪಯ್ ಕೋಣ್? ಲ್ಹಾನ್ ಪ್ರಾಯೆರ್ಚ್ ಕಠೀಣ್ ಸವಾಲಾಂ ಉಬ್ಜಾಲ್ಲಿಂ. ಪುಣ್ ಮಾಂಯ್ಕಡೆ ವಿಚಾರುಂಕ್ ಧಯ್ರ್ ಪಾವಾನಾತ್ಲ್ಲೆಂ. ಹ್ಯಾಚ್ ಕಾರಣಾಕ್ಗಾಯ್ ಹಾಂವ್ ಇತ್ಲೊ ಅಮಾಯಕ್ ಜಾಲೊಂ?
ಎಕಾ ತೆಂಪಾರ್ ಪಿಯೆವ್ನ್ ವಾಗಾಬರಿ ಚಾಳ್ವಂಚೊ ಆನ್ ಆಜ್ ಮಾತ್ರ್ ಆರ್ ಮಾರ್ನ್ ಕೊನ್ಶಾಕ್ ಪಡ್ಲಾ. ತಾಚಿ ಚಾಕ್ರಿ ಕರುಂಕ್ ತಾಣೆಂ ಮಾರ್ನ್, ಬಡವ್ನ್ ಅಸ್ಕತ್ ಕೆಲ್ಲಿ ತಾಚಿ ಬಾಯ್ಲ್ಚ್ ಜಾಯ್ಜಯ್ ತಾಕಾ ಆಜ್. ಸಂಪೂರ್ಣ್ ಅಸಹಾಯಕ್ ಜಾಲಾ ತೊ. ತಾಣೆಂ ಚಿಂತ್ಚೆಬರಿ ತಾಚೆ ಮ್ಹಳ್ಳೆ ದೋಗ್ ಪೂತ್ ಕಾಜಾರ್ ಜಾವ್ನ್ ವೊರೆವಿಂಗಡ್ ರಾವ್ಲ್ಯಾತ್. ಆವಯ್ ಬಾಪಯ್ಚೆಂ ಕಿತೆಂಚ್ ಪಡೊನ್ ವಚೊಂಕ್ ನಾ ತಾಂಕಾಂ. ಜಲ್ಮ್ ದಿಲ್ಲ್ಯಾ ಖಾತಿರ್ ಪುಣ್ಯೀ ಆವಯ್ ಬಾಪಯ್ಕ್ ಮೊಗಾನ್ ಲೆಕಿಜಯ್ ಮ್ಹಣ್ ಲ್ಹಾನ್ ಆಸ್ತಾನಾ ಆಮ್ಕಾಂ ಇಸ್ಕೊಲಾಂತ್ ಶಿಕಯ್ತಾಲಿಂ. ತ್ಯಾ ದೊಗಾಂಕ್ ಕಿತ್ಯಾಕ್ ಆವಯ್ ಬಾಪಯ್ಚೊ ಕುಸ್ಕುಟ್ ಹುಸ್ಕೊ ನಾ ತೆಂ ಮ್ಹಾಕಾ ಆರ್ತ್ ಜಾಯ್ನಾ. ಮ್ಹಜ್ಯಾ ವಾಂಟ್ಯಾಕ್ ಬಾಪಯ್ ಮ್ಹಳ್ಳ್ಯಾ ಅಸಂಗತ್ ವ್ಯಕ್ತಿ ಆನಿ ಸದಾಂ ನಿರ್ಲಿಪ್ತ್ ಕಶಿ ಆಸ್ಲ್ಲ್ಯಾ ಆವಯ್ ಸಾಂಗಾತಾ ರಾಂವ್ಚೆಂ ಅಸಾದ್ಯ್ ಜಾಲ್ಲ್ಯಾನ್ ಆನಿ ರಾವ್ಲ್ಯಾರ್ಯೀ ಚಡಿತ್ ಕುದೊಳೆಕ್ ಕಾರಣ್ ಜಾಯ್ನ್ ಮ್ಹಳ್ಳ್ಯಾ ಭಿಂಯಾನ್ ಹಾಂವೆಂ ಘರ್ ಸೊಡ್ಲ್ಲೆಂ - ಪಾಟಿಂ ಕೆದಿಂಚ್ ಯೆಂವ್ಚೊನಾ ಮ್ಹಳ್ಳ್ಯಾ ನಿರ್ದಾರಾನ್. ಪುಣ್ ಕಿತ್ಯಾಕ್ಗೀ ನಿರ್ದಾರ್ ಹಾಂವೆಂಚ್ ಬದ್ಲಿಜಯ್ ಪಡ್ಲೊ - ನ್ಹಂಯ್ ಬಾಪಯ್ ಮ್ಹಳ್ಳ್ಯಾ ಅಸಹಾಯಕ್ ಬೆಬ್ದ್ಯಾಚ್ಯಾ ಯಾ ಆವಯ್ ಮ್ಹಳ್ಳ್ಯಾ ಅಸ್ಕತ್ ಜೀವಿಚ್ಯಾ ಮೊಗಾನ್. ಪುಣ್ ಮ್ಹಾಕಾ ಮ್ಹಜೆಚ್ ವಿಶಿಂ ಸಮ್ಜೊಂಕ್ ಆಸ್ಲ್ಲೆಂ; ಸಬಾರ್ ಸವಲಾಂಕ್ ಜಾಪಿ ಸೊದುಂಕ್ ಆಸ್ಲ್ಲ್ಯೊ.
ಕಾಳೊಕ್ ಪಡೊನ್ ಆಯಿಲ್ಲೊಚ್ ಮ್ಹಜ್ಯಾ ಕುಶಿಚಿಂ - ಲಾಂಬ್ ಪಾತಿಯೆಚ್ಯಾ ಚೆಡ್ವಾಚ್ಯಾ ಕುಟ್ಮಾಚಿಂ – ಜೆವ್ಣಾಚಿ ತಯಾರಾಯ್ ಕರುಂಕ್ಲಾಗ್ಲಿಂ. ಮುಂಬಯಿ ಥಾವ್ನ್ ಯೆತಾನಾ ಬಾಂದುನ್ ಹಾಡ್ಲ್ಲೆಂ ಪೂರಾ ಸುಟಂವ್ಕ್ ಲಾಗ್ಲಿಂ ತಿಂ. ಬೋಗಿ ಸಗ್ಳಿ ತಾಂಚ್ಯಾ ಜೆವ್ಣಾಚ್ಯಾ ಪರ್ಮಳಾನ್ ಭರ್ಲಿ. ಲಾಂಬ್ ಪಾಂತಿಯೆಚ್ಯಾ ಚೆಡ್ವಾಚೊ "ದ ವಿಂಚಿ ಕೋಡ್" ಆಜೂನ್ ಸಂಪೊಂಕ್ ನಾತ್ಲ್ಲೊ.
ಫಟಿ ಮಾರ್ಚಿಯೀ ಏಕ್ ಕಲಾ. ಫಟಿ ಮಾರ್ತೆಲ್ಯಾಂಕ್ ವಿಶಿಶ್ಟ್ ಕಾಲ್ಪನಿಕ್ ಸಕತ್ ಆಸಾ ದೆಕುನ್ ಅಯ್ಕಾತೆಲ್ಯಾಂಕ್ ಮಾಯಾವಿ ಸಂಸ್ರಾಕ್ ಪಾವೊಂಕ್ ಸಕ್ತಾತ್ ತೆ ಆನಿ ಆಪ್ಲೆಂಶಿಂ ವೊಡುನ್ ಧರ್ತಾತ್ ಜಶೆಂ ಡ್ಯಾನ್ ಬ್ರಾವ್ನಾನ್ ಕೆಲಾಂ. ಮ್ಹಜೆ ತಸಲ್ಯಾ ಪಾಪಿಯಾಕ್ ಮೋಸ್ ಕರುಂಕ್, ಫಟಿ ಮಾರುಂಕ್ ಕಳಾನಾಂತ್ ದೆಕುನ್ಂಚ್ ಜಾಯ್ಜಯ್ ಹೆರಾಂಕ್ ‘ಇಂಪ್ರೆಸ್’ ಕರುಂಕ್ ಅಶಕ್ತ್ ಜಾಲಾಂ ಹಾಂವ್. ಎಕಾ ರಿತಿಚೆಂ "ಇನ್ಫಿರಿಯೋರಿಟಿ ಕಾಂಪ್ಲೆಕ್ಸ್" ಹೆಂ ಜಾಂವ್ಕ್ಯೀ ಪುರೊ. ಎದೊಳ್ ಜಿಣ್ಯೆಂತ್ ಮ್ಹಜೆಂ ಸಾದನ್ ಕಸಲೆಂ? ಸಾಂಗ್ಚ್ಯಾ ತಸಲೆಂ ಕಾಂಯ್ ನಾ. ಪೋರ್ ಪೋರ್ ಕಾಮಾಕ್ ಸೆರ್ವಾಲ್ಲೊಂ ಜಾಲ್ಲ್ಯಾನ್ ಬ್ಯಾಂಕ್ ಬ್ಯಾಲೆನ್ಸ್ ಎದೊಳ್ ಕಾಂಯ್ ನಾ. ಮುಂಬಯಿ ತಸಲ್ಯಾ ಆಮ್ಸೊರಿ ಆನಿ ಕ್ರೂರಿ ಗಾವಾಂತ್ ಮ್ಹಜೆ ತಸಲ್ಯಾಂಕ್ ಜಿಣಿ ಬಾಂದುನ್ ಹಾಡ್ಚೆಂ ತಿತ್ಲೆಂ ಸಲೀಸ್ ನ್ಹಂಯ್ ತೆಂ ಮ್ಹಾಕಾ ಆಯ್ಲೆವಾರ್ ಕಳ್ಳಾಂ.
ಭುಕ್ ಲಾಗ್ತಾಲಿ ಜಾಲ್ಲ್ಯಾನ್ ಹಾಂವೆಂಯೀ ಜೆವಾಣ್ ಕಾಣ್ಘೆಲೆಂ. ಹ್ಯಾ ಪಾವ್ಟಿಂ ಮಾತ್ರ್ ಮೊಸಾಕ್ ಬಲಿ ಜಾಯ್ನಾತ್ಲ್ಲ್ಯಾಬರಿ ಚತ್ರಾಯ್ ಸಾಂಬಾಳ್ಳಿ. ಜೆವಾಣ್ ಸೊಡೊವ್ನ್ ಪಳೆಲ್ಯಾ ಉಪ್ರಾಂಚ್ಚ್ ಪಯ್ಶೆ ದಿಲೆ.
ಪ್ರಶಾಂತ್ ಹವ್ಯಾಂತ್, ಎಕ್ಸುರ್ಯಾ
ಸುವಾತೆರ್ ಟ್ರೇನ್ ಶಿಳೊನಿ ಮಾರ್ನ್ ಹಾಲೊನ್ ಧಲೊನ್ ಧಾಂವ್ತಾಲಿ. ಗಿರಿಚೊ ಉಡಾಸ್ ಆಯ್ಲೊ.
"ಮಂಗ್ಳುರ್ಚೆಂ ಲೊಣ್ಚೆಂ, ದುಕ್ರಾ ಮಾಸ್ ಮ್ಹಾಕಾ ಭಾರಿ
ಪಸಂದ್ರೇ ವಿನ್ಸಿ. ಸಾದ್ಯ್ ತರ್ ಘೆವ್ನ್ ಯೇ..." ತಾಣೆಂ ಮ್ಹಳ್ಳೆಂ. ಜಾಂವ್ಕ್ ಗಿರಿಧರ್
ಮರಾಠಿ ಬ್ರಾಹ್ಮಣ್. ಪುಣ್ ಮ್ಹಜೆ ಸಾಂಗಾತಾ ಮೆಳೊನ್ ದುಕ್ರಾಮಾಸ್ ಬರೆಂ ಆಂಬುಡ್ತಾಲೊ,
ಮಾತ್ರ್ ನ್ಹಂಯ್ ಇಲ್ಲೆಂ ಇಲ್ಲೆಂ ಶೆಕುಂಕ್ಯೀ ಶಿಕ್ಲ್ಲೊ. ಜಿಣ್ಯೆ ರೀತ್ ಎಕೆಕ್ಲ್ಯಾಚ್ಯಾ ಮತಿ-ಸ್ಥಿತೆಚೆರ್
ಹೊಂದೊನ್ ಆಸಾ ಶಿವಾಯ್ ಜಾತ್, ಕಾತ್, ಧರ್ಮಾಚೆರ್ ನ್ಹಂಯ್ ಮ್ಹಳ್ಳ್ಯಾಕ್ ಗಿರಿಚ್
ಸಾಕ್ಸ್. ಅಶೆಂ ತಾಚ್ಯಾ ಸಾಂಗಾತಾ ಪಾಟ್ಲ್ಯಾ ವರ್ಸಾ ಜಿಣಿ ನಿಜಾಕ್ಯೀ ಕುಶಾಲ್ಭರಿತ್ ಕಶಿ ಭಗ್ಲ್ಲಿ
ಮ್ಹಾಕಾ.
ಲಾಂಬ್ ಪಾಂತಿಯೆಚ್ಯಾ ಚೆಡ್ವಾನ್ ಜೆವ್ಣಾ ಉಪ್ರಾಂತ್ ಬೂಕ್ ಪರ್ತುನ್
ಹಾತಿಂ ಘೆತ್ಲ್ಲೊ. ನಿದ್ಚ್ಯಾ ಪಯ್ಲೆಂ ವಾಚುನ್ ಸಂಪಯ್ಜಯ್ ಮ್ಹಳ್ಳೆಂ
ಹಟ್ ತಾಚೆಂ ಆಸ್ಲ್ಲೆಂ ಜಾಂವ್ಕ್ ಪುರೊ. ತಾಚ್ಯಾ ಕುಟ್ಮಾಚಿಂ ಆನಿ ತಿ ಕುಂದಾಪುರ್ ಕನ್ನಡ ಉಲೊಂವ್ಚಿ ಬಾಯ್ಲ್ ನಿದೊಂಕ್ ತಯಾರಾಯ್ ಕರ್ತಾಲಿಂ.
ಸಾಕಾಳಿಂ ಥಾವ್ನ್ ಸಾಂಗಾತಾ ಪಯ್ಣ್ ಕರ್ತಾಲ್ಯಾಂವ್ ತರೀ ತಾಂಚೆಲಾಗಿಂ ಉಲಯಾಂ ಮ್ಹಣ್ ಮ್ಹಾಕಾ ಭಗ್ಲ್ಲೆಂಚ್ ನಾ. ತಾಂಕಾಂಯೀ ತಶೆಂಚ್ ಭಗ್ಲ್ಲೆಂ ಜಾಂವ್ಕ್ ಪುರೊ. ಆಯ್ಚ್ಯಾ ವಿಶಾಲ್ ಪುಣ್ ಕಠೀಣ್ ಸಂಸ್ರಾಂತ್, ಸಂಪರ್ಕಾ ದ್ವಾರಿಂ ಸಗ್ಳೊ ಸಂಸಾರ್ ಲಾಗಿಂ ಆಯಿಲ್ಲ್ಯಾ ತಿತ್ಲೊಚ್ ಮ್ಹನಿಸ್ ಎಕಾಮೆಕಾ ಪಯ್ಸಾನ್-ಪಯ್ಸ್ ವ್ಹಚೊನ್ ಆಸಾ ತೆಂಚ್ ದುರಂತ್.
ಹೆರ್ ಕಿತೆಂಚ್ ಕರುಂಕ್ ನಾತ್ಲ್ಲ್ಯಾನ್ ಹಾಂವ್ಯೀ ನಿದೊಂಕ್ ಗೆಲೊಂ. ಕೆದಾಳಾ ನೀದ್ ಪಡ್ಲಿ ತೆಂ ಕಳಿತ್ ನಾ.
ಟ್ರೇನ್ ಸಾಕಾಳಿಂ ಸಾಡೆ-ಚಾರಾಂಕ್ ಕುಂದಾಪುರ್ ಪಾವ್ತಾನಾಂಚ್ ಜಾಗ್ ಜಾಲಿ. ತಿ ಕುಂದಾಪುರ್ಚಿ ಸ್ತ್ರೀ ವ್ಹಡ್ ಆವಾಜ್ ಕರ್ನ್ ಸಗ್ಳ್ಯಾಂಕ್ ಉಟವ್ನ್ ದೆಂವೊನ್ ಗೆಲಿ. ಉಪ್ರಾಂತ್ ಟ್ರೇನ್ ಉಡುಪಿ ಪಾವ್ತಾನಾ ಲಾಂಬ್ ಪಾಂತಿಯೆಚ್ಯಾ ಚಲಿಯೆಚಿ ಪಾಟ್ಲಾಮ್ಯೀ ದೆಂವ್ಲಿ. ದುರಂತ್ ಮ್ಹಳ್ಯಾರ್ ಚೆಡ್ವಾನ್ ‘ದ ವಿಂಚಿ ಕೋಡ್’ ಆಪ್ಲ್ಯಾ ಸಿಟಿರ್ಚ್ ಸೊಡ್ಲ್ಲೊ. ತೆಂ ವಿಸ್ರಾಲಾಂ ಮ್ಹಣ್ ಮ್ಹಾಕಾ ಭಗ್ಲೆಂನಾ. ಫಟಿಂಚ್ಯಾ ಶಿಂಕ್ಳೆಂತ್ ಜಿಣ್ಯೆಕ್ ಘೆಂವ್ಚ್ಯಾ ತಸಲೆಂ ಕಾಂಯ್ ನಾ ತೆಂ ಸಮ್ಜಾಲ್ಲೆಂ ಬುದ್ವಂತ್ ಚೆಡುಂ ತೆಂ. ಎಟ್ ಲೀಸ್ಟ್ ಆತಾಂ ಪುಣ್ಯೀ ಡ್ಯಾನ್ ಬ್ರಾವ್ನ್ ಖರೊಚ್ ಸಲ್ವಾಲಾ ಮ್ಹಣ್ ಭಗ್ಲೆಂ ಮ್ಹಾಕಾ.
* * *
ಮೆಜೂನ್ ಬಾರಾ ದಿಸಾಂನಿ ಪರ್ತುನ್ ಹಾಂವ್ ತ್ಯಾಚ್ ಟ್ರೇನಾರ್ ಆಸಾಂ; ಬೋಗಿಯೀ ತಿಚ್. ಪುಣ್ ಹ್ಯಾ ಫರಾ ಹಾಂವ್ ಪಾಟಿಂ ಮುಂಬಯಿ ವಚೊನ್ ಆಸಾಂ, ಆನಿ ಆತಾಂ ಮ್ಹಜೆ ಸಾಂಗಾತಾ ಮಾಂಯ್ ಆಸಾ.
ಹಾಂವ್ ಘರಾ ಪಾವ್ಲ್ಲ್ಯಾ ತಿಸ್ರ್ಯಾ ದಿಸಾ ಆನ್ ಸರ್ಲೊ. ಮಾಂಯ್ ರುದಾನ್ ಕರ್ತಾಲಿ. ಮ್ಹಜ್ಯಾ ಭಾವಾಂಚ್ಯಾ ದೊಳ್ಯಾಂನಿ ಜಾಯ್ ಮ್ಹಳ್ಯಾರ್ಯೀ ದೂಕ್ ದಿಸೊಂಕ್ ನಾತ್ಲ್ಲೆಂ ಮ್ಹಾಕಾ. ಮ್ಹಜೆ ವಿಶಿಂ ಸಾಂಗ್ಚೆಂ ತರ್, ಬಾಪಯ್ ಮ್ಹಳ್ಳ್ಯಾಚ್ಯಾ ಮರಣಾಕ್ ದುಕಾಂ ಗಳಯ್ಜಯ್ ಮ್ಹಳ್ಳೆಂ ಭಗಾಪ್ಯೀ ಉದೆಂವ್ಕ್ ನಾತ್ಲ್ಲೆಂ ಮ್ಹಜೆ ಥಂಯ್.
ಮಾಂಯ್ಕ್ ಮ್ಹಜೆ ಭಾವ್ ಲೆಕಿನಾಂತ್ ತೆಂ ಕಳಿತ್ ಆಸ್ಲ್ಲ್ಯಾನ್ ತಿಕಾ ಹಾಂವೆಂ ಆಪವ್ನ್ ಹಾಡ್ಲಾಂ. ಕಾಲ್ ಗಿರಿಕ್ ಫೊನ್ ಕರ್ನ್ ಮಾಂಯ್ಕ್ ಆಪವ್ನ್ ಹಾಡ್ಚೆ ವಿಶಿಂ ಸಾಂಗೊನ್ ರುಮಾಂತ್ ಮಾತ್ಸೊ ಜಾಗೊ ಕರುಂಕ್ ಸಾಂಗ್ಲೆಂ. ಹಾಂ, ತಾಚ್ಯಾ ಮೊಗಾಚೆಂ ದುಕ್ರಾ ಮಾಸ್, ಲೊಣ್ಚೆಂ ಇತ್ಯಾದಿ ಘೆಂವ್ಕ್ ವಿಸರ್ಲೊಂನಾ.
ಗಾಂವಾಕ್ ಯೆತಾನಾ ಮತಿಂತ್ ಹಜಾರ್ ಸವಾಲಾಂಕ್ ಜಾಪಿ ಸೊದುನ್ ಆಯಿಲ್ಲೊಂ ಹಾಂವ್. ಜಾಪ್ ಎಕಾಕ್ಯೀ ಮೆಳೊಂಕ್ ನಾ. ಆತಾಂ ತಿಂ ಸವಾಲಾಂಚ್ ಅಸಂಗತ್ ಕಶಿಂ ದಿಸ್ತಾತ್ ಜಾಲ್ಲ್ಯಾನ್ ತಾಂಕಾಂ ವಿಸರ್ಚೆಂ ಪ್ರೇತನ್ ಕರ್ನ್ ಆಸಾಂ.
ಸಾಂಗ್ಲ್ಲ್ಯಾಬರಿ ಸುಹಾಸಿನಿ ಟಿಚೆರ್ ಮೆಳ್ಳಿ. ಮ್ಹಜಿ ತಿಕಾ ಒಳೊಕ್ ಮೆಳ್ಳಿನಾ. ಹಾಂವೆಂಚ್ ಒಳೊಕ್ ಸಾಂಗ್ಲಿ. ತಿ ಜಿವಾಂತ್ ಪುರಾ ಭಾಗೊನ್ ಗೆಲ್ಲಿ. ವಿಶೇಸ್ ಬೆಜಾರಾಯೆಚಿ ಸಂಗತ್ ಮ್ಹಳ್ಯಾರ್ ತಿಚ್ಯಾ ಪಾಟಿರ್, ಕುಲ್ಯಾರ್ ಖೆಳ್ಚಿ ತಿ ಲಾಂಬ್ ಪಾಂತಿ ಮಾಯಾಕ್ ಜಾಲ್ಲಿ ಆನಿ ಥಂಯ್ಸರ್ ಮಟ್ವ್ಯಾ ಕೆಸಾಂಚಿ ಶೆಂಡಿ ಆಯಿಲ್ಲಿ. ಹಾಂವ್ ಮಸ್ತು ನಿರಾಸ್ ಜಾಲ್ಲೊಂ.
ಹ್ಯಾ ಸರ್ವ್ ಬದ್ಲಾವಣೆಚೆಂ ಕಾರಣ್ ಮ್ಹಾಕಾ ಉಪ್ರಾಂತ್ ಮಾಂಯ್ನ್ ಸಾಂಗ್ಲೆಂ. ಸುಹಾಸಿನಿ ಟೀಚೆರಿಕ್ ಮೆಳ್ಳಾ ತೊ ನವ್ರೊ ಅಟ್ಟಾಂಗ್ ಪಿಂವ್ಡೊ ಕಂಯ್! ಹಾಯ್ ಕಟಾ!!
About us | Feedback | Contact us
Copyright © 2005
DAAIZ.COM All rights reserved.
Page concept, designed and maintained by Ashawadi
Publications
