ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್ ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಗ್ಲೇಡಿಸ್ ರೇಗೊ ಕೊಂಕ್ಣೆಂತ್ ಫಕತ್ತ್ ಸಾಹಿತ್ಯಾಂತ್ ಮಾತ್ರ್ ನ್ಹಂಯ್, ಕೊಂಕ್ಣಿ ವಾವ್ರಾಂತ್ಯೀ ನಾಂವಾಡ್ಲ್ಯಾ.
ಕಥಾದಾಯ್ಜ್ - 8
ಗ್ಲೇಡಿಸ್ ರೇಗೊ
ಆಂಗವ್ಣೆಚೆಂ ಪಾಳ್ಣೆಂ
ನಾಂವ್ : ಸಿಂಪ್ರೊಸ್ ಫಿಲೊಮಿನಾ ಗ್ಲೇಡಿಸ್ (ಸಿಕ್ವೇರಾ) ರೇಗೊ
ಲಿಖ್ಣೆ ನಾಂವಾಂ : ಗ್ಲ್ಯಾಡಿಸ್ ರೇಗೊ, ಕಲಾವತಿ ಕದ್ರಿ, ಕು! ಗ್ಲೇಡಿಸ್ ಸಿಕ್ವೇರಾ ಕದ್ರಿ, ಕಲಾವತಿ ಕದ್ರಿ, ಗ್ಲೇಡಿಸ್ ರೇಗೊ ಕುಲ್ಶೇಕರ್, ಪ್ರಮೀಳಾದೇವಿ ಕುಲ್ಶೇಕರ್, ಹೇಮಾಮಾಲಿನಿ, ಲೇಡಿಸ್ ಬೊಂಡ್, ಲೇಟೆಸ್ಟ್ ಗ್ಲ್ಯಾಡ್, S.P.G. ಸಿಕ್ವೇರಾ, ಕೊಡೈಲ್ಗಾರ್ನ್, ಕ್ರಾಂತಿಕಾರಿ ಸ್ತ್ರೀ, ಆರ್.ಎಸ್.ಪಿ ಪರೇಲ್
ಜನನ್ : 15 ಫೆಬ್ರೆರ್ 1945.
ಜಲ್ಮಾಲ್ಲೊ ಗಾಂವ್ : ಬೆಂದೂರ್.
ಪತಿ : ಜೋಕಿಮ್ ರೇಗೊ (1932) ಕುಲ್ಶೇಕರ್
ಗ್ಲೇಡಿಸ್ (ಸಿಕ್ವೇರಾ) ರೇಗೊ
ವಳೊಕ್:
ಆಪ್ಣಾಯಿಲ್ಲಿಂ ಇನಾಮಾಂ/ಪ್ರಶಸ್ತ್ಯೊ ;
’ತುಟ್ಲೆಲಿಂ ಕಾಳ್ಜಾಂ’ ಕಥಾ ಸಂಕಲನಾಕ್ 1994 ಇಸ್ವೆಚಿ ಕರ್ನಾಟಕ್ ರಾಜ್ಯ ಸಾಹಿತ್ಯ ಎಕಡೆಮಿ ಪ್ರಶಸ್ತಿ.
’2001-2002 ಇಸ್ವೆಚಿ ’ದಾಯ್ಜಿ ದುಬಾಯ್ ಪ್ರಶಸ್ತಿ’.
ಮಾನ್/ಸನ್ಮಾನ್ :
09-01-1995 ಕೊಂಕಣಿ ಭಾಷಾ ಮಂಡಳ್ ತರ್ಫೆನ್
ಸಚಿವ್ ಶ್ರೀಮತಿ ಮಾರ್ಗರೆಟ್ ಆಳ್ವಾ ಥಾವ್ನ್ ಸನ್ಮಾನ್.
27-11-1995 ಕೊಂಕ್ಣಿ ಲೇಖಕಾಂಚೊ ಎಕ್ತಾರ್, ಮಂಗ್ಳುರ್.
11-02-1996 ಕೊಂಕಣಿ ಕ್ರಿಶ್ಚನ್ ಕಲ್ಚರಲ್ ಸಂಘ್, ಮೈಸೂರ್.
ಕಾರ್ಯಾಗಾರಾಂ :
27-29 ದಸೆಂಬರ್ 1997 -ಕೊಂಕಣಿ ಭಾಶಾಂತರ್ ಕಾರ್ಯಾಗಾರ್ ಮೈಸೂರ್ - ಪ್ರಾಯೋಜಕ್: ಕರ್ನಾಟಕ್ ಕೊಂಕ್ಣಿ ಸಾಹಿತ್ಯ ಅಕಾಡೆಮಿ.
24-10-1999 - 01-11-1999-ಕೊಂಕ್ಣಿ ನಾಟಕ್ ಕಲಾವಿದಾಂಚೆಂ ಕಮ್ಮಟ್-ಸಂದೇಶ್ ಪ್ರತಿಶ್ಥಾನ್ ಆನಿ ಕೊಂಕ್ಣಿ ನಾಟಕ್ ಸಭಾ.
ಬುಕಾರುಪಾರ್ ಪರ್ಗಟ್ ಜಾಲ್ಲೆಂ ಸಾಹಿತ್ಯ್ :
(ಮಟ್ವ್ಯೊ ಕಾಣ್ಯೊ:) ’ಅದುರೊ ಗೊಟೊ’
’ತುಟ್ಲೆಲಿಂ ಕಾಳ್ಜಾಂ’ ’ಕಾಳ್ಜಾಚೊ ರಾಯ್’
’ಕಿಣ್ಕುಳೆ (ಹಾಸ್ಯ್ಕಥಾ)’
’ಕಾಳ್ಜಾಂತ್ಲೊ ಮೋಗ್’
ವಿಂಚ್ಣಾರ್ ಕಥಾ ಪ್ರಗಟಲ್ಲೆ ಬೂಕ್ :
’ಕಳೆ ಆನಿ ಝೆಲೆ’ - ಭುರ್ಗೊ ಮೈಕಲ್ ಕಥಾ-ಆಕಾಶ್ ಪ್ರಕಾಶನಾ ಥಾವ್ನ್ 1986.
’ಸಾಡಿಯೆ ವಯ್ಲಿಂ ಸಾಳ್ಕಾಂ’ - ವಾಲ್ ಕಥಾ ಆನಿ ಲಾರಾಂ ಕಥಾ - ಆಕಾಶ್ ಪ್ರಕಾಶನ್-1989.
’ಶಿರ್ಶಿರೊ ಆನಿ ಹೆರ್ ಕಥಾ’ - ಧರ್ಮ್ ಕಥಾ - ಉಮೆದ್ ಪ್ರಕಾಶನ್-1990
’ತೆರಾ ಪಾಕ್ಳ್ಯೊ’ - ಮುರ್ತೆಲ್ಯಾಚೊ ಪೂತ್ ಕಥಾ - ಕೊಂಕ್ಣಿ ಲೇಖಕಾಂಚೊ ಎಕ್ತಾರ್ (ರಿ) ಕರ್ನಾಟಕ್.
ಕನ್ನಡಾನ್ ಭಾಶಾಂತರ್ ಜಾವ್ನ್ ಪ್ರಗಟ್ ಜಾಲ್ಲ್ಯೊ ಕಥಾ :
’ಸಮಾಧಿ’ ಹೊಸದಿಂಗತ 5, ನವಂಬರ್ 1995
’ಭರವಸೆಯ ಬುನ್ಯಾದಿ’ ಹೊಸದಿಂಗತ 16 ಮಾರ್ಚ್ 1995
’ಕೊನೇ ಶುಕ್ರವಾರ’ ಅಂತರಂಗ 6 ಆಗಸ್ಟ್ 1995
ದೇವ್ನಾಗರಿಂತ್ ಲಿಪ್ಯಂತರ್ ಜಾವ್ನ್ ಪ್ರಗಟಲ್ಲ್ಯೊ ಜಾನಪದ್ ಕಾಣ್ಯೊ :
’ಉಪಾಯ್ ಆಸ್ಲ್ಯಾರ್ ಶಿಪಾಯ್ ಜಾವ್ಯೆತ್’
’ಗರ್ವಿ ಕರೆಂ’
’ಭಟಾಚಿ ಶೆಂಡಿ’
ಹಾಸ್ಯ್ ಕಾಣ್ಯೊ ಸಾಂಕಳ್ ಕಾಣ್ಯೆ ರುಪಾರ್: ’ಪೋಟ್ಭರ್ ಪೊಕ್ಳೆ’
ಕವಿತಾ : 150 ಪ್ರಾಸ್ ಚಡ್ತಿಕ್ ಕವಿತಾಂ ಪ್ರಗಟ್ಲ್ಯಾಂತ್.
ವಿವಿಧ್ ಪತ್ರಾಂ-ಪುಸ್ತಕಾಂನಿ, ಕವಿ ಸಮ್ಮೇಳನಾನಿ ಪಾತ್ರ್ ಘೆವ್ನ್ ಕವಿತಾವಾಚನ್ ಕೆಲಾಂ.
ವಿಂಚ್ಣಾರ್ ಕವಿತಾ ಪ್ರಗಟ್ ಜಾಲ್ಲೆಂ ಪುಸ್ತಕ್ : ’ಸುರ್ಯಾ ಕಿರ್ಣಾಂ’ ಕವಿತಾ ಪುಂಜೊ -ರಾಕ್ಣೊ ಪ್ರಕಾಶನ್, ಮಂಗ್ಳುರ್, 1998
ಎಕೇಕ್ ಕವಿತಾ ಪ್ರಗಟ್ ಜಾಲ್ಲಿಂ ಪುಸ್ತಕಾಂ :
"ರವಿ ಆನಿ ಕವಿ" ಕವಿತ - ’ಪಯ್ಣಾಲಿ ಬೆಟ್’ ಕೆ.ಎಸ್. ಪ್ರಕಾಶನ್ ಬಾಹ್ರೆನ್-1978.
"ಭುರ್ಗ್ಯಾಂಚೊ ಸಂವ್ಸಾರ್" ಕವಿತ - ’ಆಮ್ಚೆಂ ಭುರ್ಗೆಂ’ ವಿ. ಸಿಕ್ವೇರಾ ಬರೋಡಾ-1979.
"ವಳಕ್ ಆನಿ ಝಳಕ್" ಕವಿತ - ’ಪುಲಾಂ ತುಜೆಂ ಜಿವಿತ್ - ಶ್ರೀ ಜೆ.ಎಲ್. ಡಿಸೋಜಾ-1983.
"ಕಳೆ ಆನಿ ಝೆಲೆ" ಕವಿತ - ’ಮಾಂಯ್ ಭಾಸ್ ಕೊಂಕಣಿ’ ಆಕಾಶ್ ಪ್ರಕಾಶನ್-1985.
"ಕಾವ್ಯಾಂ ಪೆಳೊ" ಕವಿತ - ’ಸುಕ್ಣ್ಯಾ ಪುಲಾಂ’ - ಕೊಂಕ್ಣಿ ಸಂಸ್ಥೊ ಸಾಂ. ಲುವಿಸ್ ಕೊಲೆಜ್-1996.
"ಕೊಂಕ್ಣಿ ಪರೀಕ್ಶಾ ಪುಸ್ತಕ್" ಕವಿತ - ’ರೂಕ್ ಬೆಂಡ್ತಾಂ ಭುಮಿ ರಡ್ತಾ’ - ಕೆನರಾ ಹೈಸ್ಕೂಲ್-1997. "
ಆಬೊಲಿಂ" ಕವಿತ - ’ಹಳೂ ಹಳೂ ಯೇ’ - ಮಿಟಾಕಣ್ ಅಕಾಡೆಮಿ, ಮಾಂಡ್ಸೊಭಾಣ್-1998.
"ಕವಿತಾಮೃತ್" ಕವಿತ - ’ಕಾಳ್ಜಾಧಾರ್ ಉಘಡ್’ - ಕರ್ನಾಟಕ್ ಕೊಂಕಣಿ ಸಾಹಿತ್ಯ್ ಎಕಡೆಮಿ-1999.
"ಕುಪಾಂ ಪೊಂದ್ಲಿ ಮುಖಾಂ" ಕವಿತ - ’ಮರಣ್ ಆಯ್ಲಾಂ’ - ಕವಿತಾ ಪಬ್ಲಿಕೇಶನ್ ಮಂಗ್ಳುರ್-2003.
ಜಾನಪದ್ ಕ್ರತಿಯೊ :
’ಕೊಂಕ್ಣಿ ಭಾಶೆಚೆಂ ಮನ್ಶ್ಯಾ ಶಾಸ್ತಿರ್’ - ಆಕಾಶ್ ಪ್ರಕಾಶನ್ -1995.
’ಕುರು ಕುರು ಕಾನಾ’ - ಆಕಾಶ್ ಪ್ರಕಾಶನ್-1997.
’ಗಾದಿಂಚೊ ಹಾಂಡೊ’ - ಕೊಂಕ್ಣಿ 4000 ಗಾದಿ-ಆಕಾಶ್ ಪ್ರಕಾಶನ್-1999.
’ರಾಂದ್ಪಾ ಕುಡಾಂತ್ಲಿ ಸಾಹೆತ್ ಆನಿ ಆಯ್ದಾಂ’ - ಸಂಶೋಧನತ್ಮಕ್ ಪ್ರಬಂಧ್-2000.
ಪ್ರಗಟ್ ಜಾಲ್ಲ್ಯೊ ಲ್ಹಾನ್ ವ್ಹಡ್ ಕಾದಂಬರಿ :
’ತರ್ನೆಂ ನೆಕೆತ್ರ್’ - ಕುರೊವ್ 1992.
’ಜಿವಿತಾಚೆ ಕೊಡ್ತಿಂತ್’ - ಕುರೊವ್ 1992.
’ರಗ್ತಾಳೆಂ ಪಾನ್’ - ಕುರೊವ್ ಮೇ 1995.
’ಭೊಗ್ಸಾಣೆಂ’ ಸೆವಕ್ ಮಯ್ನ್ಯಾಳೆಂ ಅಗೋಸ್ತ್ 1996.- ಜನೆರ್ 1998.
’ಜುಗಾರ್’ ಝೆಲೊ ಮಯ್ನ್ಯಾಳೆಂ 1997-1998.
’ಜುಗಾರ್’ ಪುಸ್ತಕಾ ರುಪಾರ್, ಪುನವ್ ಪ್ರಕಾಶನ್, 1992.
ಜಿಣ್ಯೆ ಚರಿತಾ :
ಮಾ|ಬಾ| ವಲೇರಿಯನ್ ಡಿಸೋಜಾ ಎಸ್. ಜೆ. - ಹಾಚಿ ಜಿಣ್ಯೆ ಚರಿತ್ರಾ.
ಪುಸ್ತಕ ರುಪಾರ್ ಜೀವನ್ ಚರಿತ್ರಾ :
ಲುವಿಸ್ ಮಸ್ಕಾರೆನಾಸ್’ ಜೀವನ್ ಚರಿತ್ರಾ-2000. (ಪ್ರಗಟ್ನಾರ್: ಕರ್ನಾಟಕ್ ಕೊಂಕಣಿ ಸಾಹಿತ್ಯ ಎಕಡೆಮಿ ಮಂಗ್ಳುರ್.)
ಶ್ರೀ ಎ. ಟಿ. ಲೋಬೊ’ ಜೀವನ್ ಚರಿತ್ರಾ-2000. (ಪ್ರಗಟ್ನಾರ್: ಕರ್ನಾಟಕ ಕೊಂಕಣಿ ಸಾಹಿತ್ಯ ಎಕಡೆಮಿ ಮಂಗ್ಳುರ್.) ಪ್ರಕಾಶನ್: ಆಕಾಶ್ ಪ್ರಕಾಶನ್.
ಸಂಪಾದಕಿ ಜಾವ್ನ್ ವಾವ್ರ್ ಕೆಲ್ಲಿಂ ಪುಸ್ತಕಾಂ :
’ಕಳೆ ಆನಿ ಝೆಲೆ’ ಲೇಖಕಿಂಚೆಂ ಸಾಹಿತ್ಯ್ ಸಂಗ್ರಹ್-1986. - ಆಕಾಶ್ ಪ್ರಕಾಶನ್.
’ಸಾಡಿಯೆ ವಯ್ಲಿಂ ಸಾಳ್ಕಾಂ’-ಲೇಖಕಿಂಚ್ಯೊ ಕಥಾ ಸಂಗ್ರಹ್ -1989.-ಆಕಾಶ್ ಪ್ರಕಾಶನ್.
’ಸಾಡಿಯೆ ವಯ್ಲಿಂ ಸಾಳ್ಕಾಂ’-ಲೆಖಕಿಂಚ್ಯೊ ಕಥಾ ಸಂಗ್ರಹ್-1989.-ಆಕಾಶ್ ಪ್ರಕಾಶನ್.
’ತೆರಾ ಪಾಕ್ಳ್ಯೊ’-ಮಟ್ವ್ಯೊ ಕಥಾ-1997.- ಕೊಂಕ್ಣಿ ಲೇಖಕಾಂಚೊ ಎಕ್ತಾರ್ ಕರ್ನಾಟಕ್(ರಿ)
’ಅಂಜೆಲೊರ್ಚೊ ಆಂಜ್’-ಫಿರ್ಗಜಿಜೆಂ ಮಹಿನ್ಯಾಳೆಂ ಪತ್ರ್ 1997 - 2001.
’ಕನ್ನಡ ಲಿಪಿಯೆಂತ್ ಕೊಂಕ್ಣಿ ಪುಸ್ತಕಾಚಿ ’ಗ್ರಂಥ್ ಸೂಚಿ’ ಕರ್ನಾಟಕ್ ಕೊಂಕಣಿ ಸಾಹಿತ್ಯ್ ಎಕಡೆಮಿ-2003. ಸಂಪಾದಕೀ ಮಂಡಳಿ.
ಪ್ರಕಾಶಕಿ ಜಾವ್ನ್ :(ಆಕಾಶ್ ಪ್ರಕಾಶನಾ ಮುಖಾಂತರ್ ಎದೊಳ್ ಪ್ರಕಾಶಿತ್ ಕೆಲ್ಲಿಂ ಪುಸ್ತಕಾಂ)
ಕಳೆ ಆನಿ ಝೆಲೆ
ಸಾಡಿಯೆ ವಯ್ಲಿಂ ಸಾಳ್ಕಾಂ
ಪುಡಾರಾಚಿ ದೆಸ್ವಾಟ್
ನಿರಾಧಾರಿ ಮೊಲಿ
ಅದುರೊ ಗೊಟೊ (ಮಟ್ವ್ಯೊ ಕಥಾ)
ತುಟ್ಲೆಲಿಂ ಕಾಳ್ಜಾಂ (ಮಟ್ವ್ಯೊ ಕಥಾ)
ಕಿಣ್ಕುಳೆ (ಹಾಸ್ಯ್ ಲೇಖನಾಂ)
ಕೊಂಕ್ಣಿ ಭಾಶೆಚೆಂ ಮನ್ಶ್ಯಾ ಶಾಸ್ತಿರ್ (Anthropogy)
ಪೊಟ್ ಭರ್ ಹಾಸೊ (ಹಾಸ್ಯ್)
ಕುರು ಕುರು ಕಾನಾ (ಜಾನಪದ್-ಭುರ್ಗ್ಯಾಲಿಂ ಗಾನಾಂ)
ಕಾಳ್ಜಾಚೊ ರಾಯ್ (ಮಟ್ವ್ಯೊ ಕಥಾ)
ಪೊಟ್ ಭರ್ ಹಾಸೊ II ಛಾಪೊ.
ಕೊಂಕ್ಣಿ ಕ್ವಿಜ್ (ಕೊಂಕ್ಣೆ ಭಾಶೆಚೆಂ ಚರಿತ್ರ್)
ಕೊಂಕ್ಣಿ ಗಾದಿಂಚೊ ಹಾಂಡೊ (4000 ಗಾದಿ)
ಕಾಳ್ಜಾಂತ್ಲೊ ಮೋಗ್
ಫೊಟ್ ಭರ್ ಪೊಕ್ಳೆ (ಹಾಸ್ಯ್ ಪುಸ್ತಕ್.)
ವೆಕ್ತಿತ್ವ್ :
ಗ್ಲ್ಯಾಡಿಸ್ ರೆಗೊ ಏಕ್ ಬರವ್ಪಿಣ್ ತರ್ಯ್ ತಿಕಾ ಕೊಂಕ್ಣಿ ಲೋಕ್ ಚಡ್ ಮಾನ್ ದಿತಾ ತಿಚಾ ಕೊಂಕ್ಣಿ ವಾವ್ರಾಖಾತಿರ್. ತಿಚೆಲಾಗಿಂ ಆಸ್ಚಾ ಕೊಂಕ್ಣಿ ಮೊಗಾಖಾತಿರ್. ತಿಚೆಂ ವೆಕ್ತಿತ್ವ್ ಸಾದೆಂ, ಮೊಗಾಳಿ, ಮಾಯ್ಪಾಸಿ ಜಿನೊಸ್ ತಿಚೊ, ಕೊಂಕ್ಣೆಚಾ ಲೊಕಾಂಕ್ ಅಪ್ಲ್ಯಾಚ್ ಖಾಸ್ ಮನ್ಶಾಂಪರಿಂ ಲೆಖ್ಚೆಂ ವ್ಹಡ್ಪಣ್ ತಿಚೆಲಾಗಿಂ ಆಸಾ. ಕೊಂಕ್ಣಿ ವಾವ್ರ್ ಕರಿಜೆ ತರ್ ಪ್ರಾಯ್ ಸಯ್ತ್ ಲೆಕಾಕ್ ನಾ ಮ್ಹಳ್ಳೆಂ ಸತ್ ತಿಚೆಥಾವ್ನ್ಂಚ್ ಶಿಕಾಜಯ್.
ಮಟ್ವ್ಯೊ ಕಾಣ್ಯೊ :
ಹಿಚಾ ಲಿಖ್ಣೆ ಥಾವ್ನ್ ಉದೆಲ್ಲ್ಯೊ ಶೆಂಬೊರಾಂ ವಯ್ರ್ ಮಟ್ವ್ಯೊ ಕಾಣ್ಯೊ ಚಡ್ತಾವ್ ಕೊಂಕಣಿ ಪತ್ರಾಂನಿ ಪ್ರಗಟ್ ಜಾಲ್ಯಾತ್. ಥೊಡ್ಯೊ ಆಕಾಶ್ವಾಣಿ ಮಂಗ್ಳುರ್ ಹಾಚೆರ್ ಪ್ರಚಾರ್ ಜಾಲ್ಯಾತ್. ವಿಂಚ್ನಾರ್ ಥೊಡ್ಯೊ ಕಥಾ ಕನ್ನಡಾನ್ ಥೊಡ್ಯೊ ದೇವ್ನಾಗರಿನ್ ಕೇಂದ್ರ ಸಾಹಿತ್ಯ್ ಎಕಾಡೆಮಿ ಡೆಲ್ಲಿ ಹಾಂಗಾ ಥಾವ್ನ್ ಪ್ರಗಟಲ್ಲ್ಯಾ ಜಾನಪದ್ ಪುಸ್ತಕಾರ್, ಜಾನಪದ್ ಕಥಾ ಪ್ರಗಟ್ಲ್ಯಾತ್. ಹಿಚಿ ಭಾಸ್ ಭೋವ್ ಸಾದಿ ಆನಿಂ ಹರ್ಯೆಕಾ ಪ್ರಾಂತ್ಯಾಚಾ ಕೊಂಕ್ಣಿ ಲೊಕಾಂಕ್ ತಿ ಸಲೀಸಾಯೆನ್ ಸಮ್ಜವ್ಯೆತ್ ಜಾಲ್ಲಿ. ಕೊಂಕ್ಣೆಂತ್ ಮಟ್ವ್ಯೊ ಕಾಣ್ಯೊ ಬರಂವ್ಚಾಂತ್ ಅಪ್ಲೊಚ್ ಏಕ್ ಪ್ರಕಾರ್ ರುತಾಂ ಕೆಲ್ಲಿ ಗ್ಲ್ಯಾಡಿಸ್ ರೆಗೊಚಿ ಹಿ ಕಾಣಿ ತಿಚಾ ’ಕಾಳ್ಜಾಚೊ ರಾಯ್’ ಬುಕಾಂತ್ಲಿ ವಿಂಚ್ಲ್ಯಾ.
ಕಥಾದಾಯ್ಜ್ - 8 . ಆಂಗವ್ಣೆಚೆಂ ಪಾಳ್ಣೆಂ
ತಮಿಳ್ನಾಡುಚೆಂ ರಾಜ್ಧಾನಿ ಶಹರ್ ಮೆಡ್ರಾಸ್ ಥಾವ್ನ್ ಪನ್ನಾಸ್ ಮಯ್ಲಾಂ ಪಯ್ಸಿಲಿ ಲ್ಹಾನ್ಶಿ ಹಳ್ಳಿ ತಿ. ರಯ್ಲಾಚೆ ಪಾಟೆ ತ್ಯೆ ಹಳ್ಳೆಕ್ ದೋನ್ ವಾಂಟೆ ಕರ್ನ್ ಕಾಳ್ಯಾ ಕೆಸಾಂಕ್ ಭಾಂಕ್ ಕಾಡ್ಲ್ಲ್ಯೆಬರಿ ನಿದ್ಲ್ಲೆ. ರಯ್ಲಾ ಪಾಟ್ಯಾ ಥಾವ್ನ್ ಫರ್ಲಾಂಗಾ ಬಿತರ್ಚ್ ನಿಮ್ಮಿಗೆಲೆಂ ಘರ್. ಶೆತ್ಕಾರಿ ಮನ್ಶಾಂ ತಿಂ. ಸರ್ಕಾರಿ ನೌಕರಾಂನಿ ವರ್ಸಾಂತ್ ಏಕ್ ಪಾವ್ಟಿಂ ರಜಾ ಕಾಡ್ನ್ ದೆಶಾಚ್ಯಾ ವಿವಿಧ್ ನಾಂವಾಡ್ದಿಕ್ ಪ್ರವಾಸಿ ಜಾಗ್ಯಾಂಕ್ ಭೊಂವೊಂಕ್ ಗೆಲ್ಲ್ಯಾಬರಿ ಹ್ಯಾ ಮಧ್ಯಮ್ ವರ್ಗಾಚಾ ಘರಾಣ್ಯಾಕ್ ಹೊ ಏಕ್ ಸಂಭ್ರಮಿಕ್ ಕಾಳ್. ಆಪ್ಲ್ಯೆ ಜೊಡಿತ್ಲಿಂಚ್ಚ್ ರುವಿ-ತಾರ್ ಉರವ್ನ್ ವರ್ಸಾಕ್ ಏಕ್ ಪಾವ್ಟಿಂ ತಮಿಳ್ನಾಡುಂತ್ಲ್ಯಾ ವೆಲ್ಲಂಕಣಿ ಕ್ಷೇತ್ರಾಕ್ ವ್ಹಚೊನ್ ತಾಂಚಿ ಆಂಗವ್ಣ್ ಫಾರಿಕ್ ಕರ್ಚೊ ಸಂಭ್ರಮ್ ತಾಂಕಾಂ. ಗಾಂವ್ಕಾರಾಂನಿ ಸೆಜಾರ್ಚಾಂನಿ
"ವೆಲ್ಲಂಕಣಿ ಕೆದಾಳಾ ಭಾಯ್ರ್ ಸರ್ಲ್ಯಾತ್?" ಮ್ಹಣ್ ವೆಚಾರ್ಚೊಚ್ ತಡವ್ ನಿಮ್ಮಿಚಿ ಆವಯ್ ಸೀನಿ ತಿಚಾ ಪುರಾಣಾಚಿ ಪೊಟ್ಲಿಚ್ಚ್ ಸುಟಯ್ತಾಲಿ.
ಥೊಡ್ಯಾಂಕ್ ತಿಚಿ ಚರಿತ್ರಾ ಆಯ್ಕೊಂಕ್ ಭಕ್ತಿಪಣ್ ತರ್ ಆನಿ ಥೊಡ್ಯಾಂಕ್ ತಿಚ್ಯಾ ಆಚಾರ್-ವಿಚಾರಾಂಚೊ ತಮಾಸೊ ಹಾಸೊ ಹಾಡಯ್ತಾ. ಪುಣ್ ವೆಲ್ಲಂಕಣಿ ಮಾಯೆಚಾ ಆಜ್ಯಾಪಾಂ ಥಂಯ್ ಉಳ್ಟೆಂ ಚಿಂತಾಪ್ ಚಿಂತ್ಚಾ ತಿತ್ಲೆಂ ಧಯ್ರ್ ಮಾತ್ರ್ ಕೊಣಾಯ್ಚಾಯ್ ಹರ್ದ್ಯಾಂತ್ ನಾತ್ಲ್ಲೆಂ. ನಿಮ್ಮಿಚೊ ಬಾಪುಯ್ ಕ್ರಿಸ್ಟ್ ತೊ ಖಂಡಿತ್ ಏಕ್ ಭಕ್ತಿಕ್ ದಾದ್ಲೊ. ತಾಚ್ಯಾ ಕುಟ್ಮಾಂತ್ ಪ್ರಕಾಸಾಚೆಂ ಫುಲ್ ಫುಲಯಿಲ್ಲೆಂಚ್ ವೆಲ್ಲಂಕಣಿ ಮಾಯೆನ್. ತಿಚೊ ಉಪ್ಕಾರ್ ಕಸೊ ಭಾವುಡ್ಲ್ಯಾರೀ ತಾಕಾ ಉಣೊಂಚ್. ವೆಲ್ಲಂಕಣಿ ವ್ಹೆಚ್ಯಾಕ್ ಕಸೊಲೊ ತ್ಯಾಗ್ ಕರುಂಕೀ ತೊ ತಯಾರ್.
ಆಪ್ಲ್ಯೆ ಬಾಯ್ಲೆನ್ ಸಾಯ್ಬಿಣಿಚಿ ಹೊಗ್ಳಿಕ್ ಕರ್ನ್ ಮಾನ್ ಪಾಚಾರ್ತಾನಾ ತಾಚಿ ಅಂತರ್ಮಳಾ ಭಕ್ತಿನ್ ಫುಲ್ತಾಲಿ. ತ್ಯೆ ವೆಲ್ಲಂಕಣಿ ಮಾಯೆಚಿ ಇತ್ಲಿ ಸೊಬಿತ್ ಇಮಾಜ್-ತಿಚೆ ಥಂಯ್ ಜೀವ್ ಆಸಾ ಮ್ಹಳ್ಳೊಚೊ ತಾಚೊ ಭಾವಾಡ್ತ್. ವೆಲ್ಲಂಕಣಿ ಮಾಯ್ ನಾತ್ಲ್ಲಿ ತರ್ ಆಮ್ಚೆಂ ನಿಮ್ಮಿ ಆಸ್ತೆಂನಾ. ಕಾಜಾರ್ ಜಾವ್ನ್ ಪಂದ್ರಾ ವರ್ಸಾಂ ಆಮ್ಕಾಂ ಭುರ್ಗೆಂ ನಾತ್ಲ್ಲೆಂ ಆಸ್ಲ್ಲ್ಯಾ ದೇವಾಂಕ್ ದೇವಿಂಕ್ ಮೊಗಾಳ್ ಆನಿ ರಾಗಿಷ್ಟ್ ಭುತಾಂಕ್ ಸಯ್ತ್ ಆಮಿ ಆಂಗವ್ಣ್ ಕೆಲ್ಲಿ. ಆಮಿ ಘೆತ್ಲ್ಲ್ಯಾ ಭಟಾಂಚ್ಯಾ ವಕ್ತಾಂಕ್, ವಿಚಾರ್ಲೆಲ್ಯಾ ಬೊಲ್ಮ್ಯಾಂಕ್ ಲೇಖ್ಯೀ ನಾ, ಮೀತ್ಯೀ ನಾ. ಆಖೇರಿಕ್ ತರೀ ಆಮ್ಕಾಂ ಪಾವ್ಲಿ ಆಮ್ಚಿಚ್ಚ್ ಮಾಯ್ ಸಾಯ್ಬಿಣ್. ಉಪ್ರಾಂತ್ ತಿಚ್ಯಾ ಕಾಳ್ಜಾಂತ್ಲೆ ಘುಟ್ ತಿ ಸೊಡಯಿತ್ತ್ ವ್ಹೆತಾ... "
ಫಾದರ್ ತೊಮಸಾನ್ ಆಮ್ಕಾಂ ವೆಲ್ಲಂಕಣಿ ಮಾಯೆಚಾ ನೊವೆನಾಚೊ ಬೂಕ್ ದಿಲ್ಲೊ. ಹಾಂವೆ ಆನಿ ಮೊಜಾ ಘರ್ಕಾರಾನ್ ಸಾಂಗಾತಾ ಮೆಳೊನ್ ತಿಚೆಂ ನೊವೆನ್ ಧರ್ಲೆಂ. ತಿಚೆಂ ದರ್ಶನ್ ಕರ್ಚಿ ಉರ್ಬಾ, ಆಶಾ ಆಮ್ಚೆ ಥಯ್ ಜಿವಾಳ್ಳಿ", ಉಪ್ರಾಂತ್ ತಾಂಚೆಂ ಪಯ್ಣ್ ತಿ ವಿವರ್ಸಿತಾಲಿ.
ಆಮೆರಿಕಾ, ಪ್ರಾನ್ಸ್ ವ ಇಂಗ್ಲೆಂಡಾಕ್ ಪಯ್ಣ್ ಧರ್ನ್ ಗೆಲ್ಲ್ಯಾಬರಿ ತಿಂ ರಯ್ಲಾರ್ ಗೆಲ್ಲಿಂ, ಬಸ್ಸಾರ್ ಬಸ್ಲ್ಲಿಂ ಟಾಂಗಚೆರ್ ಘುಂವ್ಲ್ಲಿಂ, ವಿಮಾನಾರ್ ಪಯ್ಣ್ ಕೆಲ್ಲ್ಯೆ ಇತ್ಲ್ಯೆ ಮರ್ಜೆನ್ ತಿ ಅಲಂಕಾರಿಕ್ ಉತ್ರಾಂನಿಂ ವಿವರ್ಸಿತಾಲಿ. ವೆಲ್ಲಂಕಣಿ ಮಾಯೆಚಾ ಭಕ್ತಿವಂತಾಚೊ ಸಂಖೊ, ತಿಚೆ ಥಾವ್ನ್ ಉಪ್ಕಾರ್ ಮೆಳ್ಲ್ಲ್ಯಾಂನಿ ಅಂಗವ್ಣ್ಯೊ ಫಾರಿಕ್ ಕರ್ಚ್ಯಾ ವಾಟೊ, ತ್ಯಾ ಜಳ್ಚಾ ವೊತಾಕ್ ತಾಪ್ಲ್ಲ್ಯೆ ರೆಂವೆರ್ ಲೊಳೊನ್ ಲೊಳೊನ್ ತಿಚಾ ಪಾಂಯಾಂ ಮುಳಿಂ ಯೆಂವ್ಚಿ ರೀತ್, ಥಂಯ್ಸರ್ ಅಂಗವ್ಣೆಕ್ ಆಯಿಲ್ಲ್ಯೊ ವಸ್ತು, ಭಾಂಗಾರಾಚೆ ವಿವಿಧ್ ನಮುನ್ಯಾಂಚೆ ನಗ್, ತ್ಯಾ ನಗಾಂಚೆಂ ವಿನ್ಯಾಸ್, ತಿ ಇತ್ಲ್ಯೆ ಹುಶಾರ್ಗಾಯೆನ್ ಇತ್ಲ್ಯೆ ಭಕ್ತಿನ್ ವಿವರ್ಸಿತಾಲಿಕೀ ಆಯ್ಕಾತೆಲ್ಯಾಂಕ್ ಆತಾಂಚ್ ವೆಲ್ಲಂಕಣಿ ವ್ಹಚೊನ್, ತ್ಯಾ ಸಾಯ್ಬಿಣಿಚ್ಯೆ ಸುಂದರ್ ಪ್ರತಿಮೆಕ್, ತ್ಯಾ ಭಾಂಗಾರಾಚ್ಯಾ ನಗಾಂಕ್, ಆನಿ ತ್ಯಾ ಭಕ್ತಿಕಾಂಚಾ ಚಟುವಟಿಕಾಂಕ್ ಪಳೆವ್ನ್ ಯೆಂವ್ಚಿ ಉರ್ಬಾ ಉಟಯ್ತಾಲಿ. ಸಾತ್ ವರ್ಸಾಂ ಆದಿಂ ಜನೆರ್ ಮಹಿನ್ಯಾಂತ್ ಸೀನಿ ಆನಿ ಕ್ರಿಸ್ಟ್ ವೆಲ್ಲಂಕಣಿ ಮಾಯೆಚ್ಯಾ ಪಾಂಯಾ ಥಳಾಂ ಪಾವ್ಲ್ಲಿಂ, ಸುಮಾರ್ ಬಾರಾ ದೀಸ್ ತಿಂ ಹೊಟೆಲಾಂತ್ ಕೂಡ್ ಬಾಡ್ಯಾಕ್ ಕರ್ನ್ ರಾವ್ಲ್ಲಿಂ. ಸಾಯ್ಬಿಣ್ ಮಾಯೆಚಾ ದರ್ಶನಾತ್ ತಾಂಕಾಂ ಭಕ್ತಿಕ್ ತ್ರಪ್ತಿ ಲಾಭ್ಲ್ಲಿ.
ತಶಿಚ್ಚ್ ಘರ್ಭರ್ ಕುಟ್ಮಾ ಮದ್ಲಿಂ ತಿಂ ವೊರೆವಿಂಗಡ್ ಎಕ್ಸುರಿಂ ಜಾವ್ನ್ ‘ಕಾಜಾರಾಚ್ಯೆ ಪಯ್ಲ್ಯೆ ರಾತಿ’ ಪ್ರಾಸ್ ಮಝೆನ್ ಸ್ವತಂತ್ರ್ ಸುಕ್ಣ್ಯಾಂಬರಿ ತಿ ಉಭ್ಲ್ಲಿ. ನೋವ್ ದಿಸಾಂಚೆಂ ಪ್ರತ್ಯೇಕ್ ಭಕ್ತಿಪಣ್, ಸ್ವತಂತ್ರ್ ಏಕಾಂತಾಚೆಂ ರಾಜ್ವಟ್. ಸಾಯ್ಬಿಣಿ ಥಂಯ್ ತಾಂಚಿ ಬಾವಾಡ್ತ್, ಸಾಯ್ಬಿಣಿಚೆಂ ಬೆಸಾಂವ್ ವೊಂಟಿಯೆಂತ್ ಘೆವ್ನ್ಂಚ್ ತಿ ಗಾಂವಾಕ್ ಪಾಟಿಂ ಗೆಲ್ಲಿಂ.
ನೋವ್ ಮಹಿನ್ಯಾಂನಿಂಚ್ ತಿ ನಿಮ್ಮಿಕ್ ಪ್ರಸೂತ್ ಜಾಲ್ಲಿ. ತಾಣಿ ಸಂತೊಸಾಚಾ ಆವೆಶಾನ್ ಅಂಗಯ್ಲಲಿ ಅಂಗೊವ್ಣ್ ಲ್ಹಾನ್ಶೆಂ ಭಾಂಗರಾಚೆಂ ಪಾಳ್ಣೆ ಆನಿ ತಾಚೆ ಭಿತರ್ ಏಕ್ ಭಾಂಗಾರಾಚೆಂ ಬೊಂಬೆಂ ಘೆವ್ನ್ ನಿಮ್ಮಿಕ್ ವರಸ್ ಜಾಂವ್ಚಾ’ದಿಂಚ್ ತಿಂ ಪರತ್ ವೆಲ್ಲಂಕಣಿ ಗೆಲ್ಲಿಂ, ದೊಗಾಂಯ್ ತ್ಯೆ ತಾಪ್ಲ್ಲ್ಯೆ ರೆಂವೆ ವಯ್ಲ್ಯಾನ್ ದಿಂಬಿಯಾಂನಿ ಚಲೊನ್ ಮರಿಯೆಚಾ ಚರಣಾಂ ಲಾಗಿಂ ಪಾವ್ಲ್ಲಿಂ ಅಂಗವ್ಣ್ ಫಾರಿಕ್ ಕೆಲ್ಲಿ. ತಾಂಕಾಂ ಸಾಂಗಾತಾ ಘೆವ್ನ್ಂಚ್ ಅಂಗವ್ಣ್ ಪ್ರದರ್ಶನಾಚಾ ಹೊಲಾಂತ್ ರಸ್ಮಾಂಚೆಂ ಲುಗಾಟ್ ಹಾಂತುಳ್ಳೆಲ್ಯಾ ಆರ್ಶ್ಯಾಚ್ಯೆ ಪೆಟೆಂತ್ ತಾಂಚಿ ಆಂಗವ್ಣ್, ತೆಗಾಂಯ್ಚಿ ಫೊಟೊ, ತಾಚೆ ಮುಳಾಂತ್ ಘಾಲ್ನ್ ಚಾವಿ ಘೆವ್ನ್ ಚಲ್ಲೊ ಥಂಯ್ಚೊ ಆಡಳ್ತ್ಯಾದಾರ್. ಆಪ್ಲ್ಯಾ ಭುರ್ಗ್ಯಾಕ್ ಮರಿಯೆಚ್ಯಾ ಪಾಯಾಂಥಳಾಂ ದವರ್ನ್ ಮಾಗ್ಣೆ ಕರ್ನ್ ತಿಣೆ ದಿಲ್ಲ್ಯಾ ಬಾಳಾಕ್ ತಿಕಾಚ್ಚ್ ಭೆಟವ್ನ್ ಪರ್ತ್ಯಾನ್ ತಾಣಿ ಏಕ್ ಆಂಗವ್ಣ್ ಕೆಲ್ಲಿ.
"ಹ್ಯಾ ಬಾಳಾಕ್ ಘೆವ್ನ್ ಮಾಯೆ ಹರ್ಯೆಕಾ ವರ್ಸಾ ತುಜಾ ಪಾಂಯಾಂ ಮುಳಾಕ್ ಆಮಿ ಯೆತಲ್ಯಾಂವ್, ಆಮ್ಚೆಂ ಭುರ್ಗೆಂ ಎಕ್ಲೆ ಎಕ್ಸುರೆಂ ಲೊಳೊನ್ ತುಜಾ ಪಾಯಾಂಥಳಾ ಯೇಂವ್ಕ್ ಸಕ್ತಾ ಪರ್ಯಾಂತ್ ಆಮಿಂಯೀ ತಾಚೆ ಸಾಂಗಾತಾ ಲೊಳೊನ್ಂಚ್ ತುಜ್ಯಾ ಚರಣಿಂ ಪಾವ್ತಲ್ಯಾಂವ್ ಮಾತೇ, ತುಂ ಆಮ್ಕಾ ತೆಂ ಭಾಗ್ ದಯಾ ಕರ್."
ಮಾತೆನ್ ಜಾಪ್ ದಿಲ್ಲಿ ವ ನಾ. ತಾಚಿ ತಾಂಕಾ ಗರ್ಜ್ಯೀ ನಾತ್ಲ್ಲಿ. ಮಾತೆಚೊ ಉಪ್ಕಾರ್ ಬಾವುಡ್ನ್ ತಿಣೆ ಕೆಲ್ಲ್ಯಾ ಉಪ್ಕಾರಾಂಕ್ ಪ್ರತ್ಯುಪ್ಕಾರಾಚಿ ತಾಂಚಿ ಆಂಗವ್ಣ್ ಮ್ಹಣ್ ಚಿಂತುನ್ ತಿಂ ತ್ರಪ್ತಿ ಪಾವ್ಲಿಂ ನಿಮ್ಮಿಚೊ ಬಾಪುಯ್ ಕ್ರಿಸ್ಟ್ಕ್ ಬಾಯ್ಲೆಚಿ ಅಂಗವ್ಣ್ ಮ್ಹಾರಗ್ಶಿ ದಿಸ್ಲಿ. ಪುಣ್ ಸಾಯ್ಬಿಣಿ ಮುಖಾರ್ ಬಾಯ್ಲೆಚಾ ಚಿಂತ್ಪಾಕ್ ಆಡ್ ಗೆಲ್ಲ್ಯಾ ತಿತ್ಲಿ ಚೂಕ್ ಜಾಯ್ತ್ ಆನಿ ದಿಲ್ಲ್ಯಾ ಸಾಳ್ಕಾ ತಸ್ಲ್ಯಾ ಫುಲ್ಚಾ ಬಾಳಾಕ್ ತಿ ಪಾಟಿಂ ಘೆತ್ ಮ್ಹಳ್ಳಿ ಬಿರಾಂತ್ ಕಾಳ್ಜಾಂತ್ ಕಾಂತಯಿಲ್ಲ್ಯಾನ್ ತೊ ಭಿತರ್ಲ್ಯಾ ಭಿತರ್ ಖತ್ಕತೊನ್ಂಚ್ ಉರ್ಲೊ. ನೆಣ್ತೆಂ ಬಾಳ್ ನಿಮ್ಮಿ ಫುಲೊನ್ಂಚ್ ಯೆತಾಲೆಂ ಹರ್ಯೆಕಾ ವರ್ಸಾ ನಿಮ್ಮಿಕ್ ಸಾಂಗಾತಾ ಘೆವ್ನ್ ಆವಯ್-ಬಾಪಯ್ ವೆಲ್ಲಂಕಣಿ ವ್ಹೆತಾಲಿಂ.
ನಿಮ್ಮಿಕ್ ಉಕಲ್ನ್ ಘೆವ್ನ್ ತಾಪ್ಲ್ಲೆ ರೆಂವೆರ್ ದಿಂಬಿಯಾನಿ ತಿಚೆ ಪ್ರತಿಮೆಲಾಗಿಂ ತಿ ವ್ಹೆತಾಲಿಂ ನಿಮ್ಮಿಕ್ ತಿಚಾ ಪಾಂಯಾಂ ಮುಳಾಂತ್ ನಿದಾಯ್ತಾಲಿಂ ಥಂಯ್ ಥಾವ್ನ್ ಆಂಗವ್ಣೆಚ್ಯೊ ವಸ್ತು ಪ್ರದರ್ಶನಾಚಾ ಕುಡಾಕ್ ವ್ಹೆತಾಲಿಂ ತಾಣಿ ದಿಲ್ಲಿ ಆಂಗವ್ಣ್, ತಾಚೆ ಸಾಂಗಾತಾ ತಾಮ್ಚಿ ತೆಗಾಂಯ್ಚಿ ಫೊಟೊ ನಾಂವಾಂ ತಿಂ ಪಳೆತಾಲಿ. ಸಮ್ಜಾನಾತ್ಲ್ಲ್ಯಾ ನಿಮ್ಮಿಕ್ಯೀ ತಿಂ ದಾಕಯ್ತಾಲಿಂ. ಹೆರಾಂನಿ ಫಾರಿಕ್ ಕೆಲ್ಲಿ ತಾಣಿ ದಿಲ್ಲೆ ಪ್ರಾಸ್ ಚಡ್ ಕಿಮ್ಮತೆಚಿ ಚಡ್ ಸೊಭಾಯೆಚಿ ಮ್ಹಣ್ ದಿಸ್ಚಿ ಆಂಗವ್ಣ್ ಸೀನಿ ದೆಖ್ತಾಲಿ. ತಿಚಾ ಕಾಳ್ಜಾಂತ್ ತ್ಯಾ ವಸ್ತುಂಚೆರ್ ಬಾರೀಕ್ ಸ್ವಾರ್ಥಾಚೆಂ, ಮೊಸ್ರಾಚೆಂ ಎಕೇಕ್ ಕಿಸರ್ ಉಟ್ತಾಲೆಂ. ಆಮ್ಚೆಂ ಪ್ರಾಸ್ ತಾಂಚೆಂ ಬರೆಮ್ ಪ್ರಾಸ್ ತಾಂಚೆ ಚಡ್, ಆಮ್ಚೆ ಪ್ರಾಸ್ ತಾಂಚೆ ಸೊಭಿತ್. ಆಸಲಿಂ ಚಿಂತ್ನಾ ತಿ ಮತಿಂತ್ ಆಟಯ್ತಾಲಿ. ಥೊಡೆ ಪಾವ್ಟಿಂ ತಿಚೆ ಉದ್ವೇಗ್ ಘೊವಾಕೀ ತಿ ಉತ್ರಾಯ್ತಲಿ. ಹಿಂಚ್ ಚಿಂತ್ನಾ ಮನ್ಶಾ ಸಂಯ್ಬಾಚ್ಯೆ ತಾಚೆ ಮತಿಂತ್ಯೀ ಲ್ಹಾರಾಂ ಉಟಯ್ತಾಲಿಂ.
ನಿಮ್ಮಿಕ್ ತೀನ್ ವರ್ಸಾಂ ಭರ್ತಾನಾ ತಾಣಿ ವೆಲ್ಲಂಕಣಿ ಮಾತೆಚ್ಯಾ ಪಾಂಯಾ ಥಳಾಕ್ ಲೊಳೊನ್ ವ್ಹಚೊಂಕ್ ಸುರು ಕೆಲೆಂ ಆನ್ನಪಿಳ್ಳೆ ರಸ್ತ್ಯಾ ವಯ್ಲ್ಯೆ ಮರಿಯೆಚ್ಯೆ ಬಾಂಯ್ ಲಾಗಿಂ ತಾವ್ನ್ ರಸ್ತ್ಯಾ ವಯ್ಲ್ಯಾನ್ ತಿಂ ವೊಮ್ತೆ ಉದಾರೆಂ ಲೊಳೊನ್ಂಚ್ ಗೆಲ್ಯಾರ್ ಬರೆಂ ಆಸ್ಲ್ಲೆಂ ಮ್ಹಣ್ ತಾಕಾ ಭೊಗ್ಲ್ಲ್ಯಾಂತ್ ನವಾಲ್ ನಾತ್ಲ್ಲೆಂ. ಚೊವ್ತೆಂ ವರಸ್ಯೀ ನಿಮ್ಮಿಚ್ಯಾ ಬಾಳ್ ಚಿಂತ್ನಾಂನಿಂಚ್ ಆಂಗವ್ಣ್ ಫಾರಿಕ್ ಜಾತಾ. ಪುಣ್ ಪಾಂಚ್ವ್ಯಾ ವರ್ಸಾ ನಿಮ್ಮಿಚಾ ಸ-ವ್ಯಾ ಜನ್ಮಾ ದಿಸಾ ವೊತಾಚಿ ಧಾವ್ ಆನಿ ಪುರಾಸಣ್ ಮ್ಹಳ್ಯಾರ್ ಕಿತೆಂ ತೆಂ ನಿಮ್ಮಿಕ್ ಸಮ್ಜಾತಾ.
ದೊನೀ ಹಾತ್ ತಕ್ಲೆ ವಯ್ಲ್ಯಾನ್ ಉಭೆ ಧರ್ನ್, ತಾಳ್ವೆ ಜೋಡ್ನ್ ಫಕತ್ತ್ ಪಾಟಿಚಾ ಆನಿ ಪೊಟಾಚಾ ಆಧಾರಾಚೆರ್ ಧರ್ತೆರ್ ಲೊಳೊನ್ ಕೊಪೆಲಾಚ್ಯಾ ಮೆಟಾಂ ಮುಳಾಕ್ ತಿಂ ಪಾವ್ಲಿಂ ಜಾಲ್ಯಾರ್ ನಿಮ್ಮಿ ತಾಂಚೆ ಮಧೆಂ ನಾತ್ಲ್ಲೆಂ ತಾಂಕ್ತಾ ತಿತ್ಲೆಂ ದಿಷ್ಟಿಕ್ ಪಯ್ಸ್ ಲೊಟುನ್ ಚಲುನ್ ಚಲೊನ್, ಲೊಳೊನ್, ದಿಂಬಿಯಾಂನಿ ವ್ಹಾಳ್ಚಾ ಲೊಕಾ ಜಮ್ಯಾ ಇಡಿಂ ಕರ್ನ್ ತಿಳ್ಳ್ಯಾರೀ ನಿಮ್ಮಿ ತಾಂಕಾ ದಿಸಾನಾ. ಸುಮಾರ್ ಏಕ್ ಫರ್ಲಾಂಗ್ಭರ್ ತಿಂ ಲೊಳೊನ್ ಆಯ್ಲ್ಯಾಂತ್. ಆತಾಂ ‘ನಿಮ್ಮಿ ನಾ’ ಮ್ಹಣ್ ಪಾಟಿ ತಿಂ ವ್ಹೆತಿತ್ ತರ್! ಮಾತೆ ಚ್ಯಾ ಚರಣಿಂ ತಾಂಕಾ ಚಲೊನ್ ಯೇಂವ್ಕ್ಚ್ಚ್ ನಾ. ತಸ್ಲ್ಯೆಯ್ ಸಿಸ್ತೆಚಿ ಭಕ್ತಿಕ್ ಆಂಗವ್ಣ್ ತಾಂಚಿ.
ಸಾಯ್ಬಿಣ್ ಶಿಕ್ಷಾ ದೀತ್, ತಿಚೆಂ ಮನ್ ದುಖತ್ ಮ್ಹಳ್ಳಿ ಭಿರಾಂತ್ ವಿಂಗಡ್. ತಿಂ ಥಂಯ್ಚ್ ನಿಮ್ಮಿಕ್ ರಾಕೊನ್ ರಾವ್ತತ್. ನಾ, ಘಡಿಯೊ ಆನಿ ವೊರಾಂ ಉತರ್ಲ್ಯಾರೀ ನಿಮ್ಮಿ ನಾ. ಜಾಲ್ಯಾರೀ ಹ್ಯಾ ಜೊಡ್ಯಾಕ್ ಪಾಟಿಂ ವ್ಹಚೊಂಕ್ ನಾಕಾ. ಥೊಡ್ಯಾ ವೆಳಾಚ ಆಕ್ಲಾಸಾಂಚ ತರ್ಕಾ ಮಧೆಂಯ್ ತಾಂಕಾಂ ಸಾಯ್ಬಿಣಿಚಿ ಆಂಗವ್ಣ್ ಪಯ್ಲಿ ಆನಿ ಮನ್ಶಾ ಸಂಯ್ಬಾಚೆಂ ಆಪ್ಲ್ಯಾಚ್ಚ್ ರಗ್ತಾಳೆಂ ಬಾಳ್ ಮಾಗಿರ್ ಮ್ಹಳ್ಳಿಂ ಚಿಂತ್ನಾ ಜಿಕ್ತಾತ್. ಆನಿ... ಆನಿ ದೆವಾಚ್ಯೆ ಸೆವೆ ಮುಖಾರ್ ಭಾಸಾಯ್ಲೆಲ್ಯಾ ಉತ್ರಾಂ ಮುಕಾರ್ ಮನ್ಶಾಪಣ್ ಪಾಟಿ ಉರ್ತಾ. ಆಪ್ಲೆಂಪಣ್ ಕ್ಷುಲ್ಲಕ್ ದಿಸ್ತಾ. ತಿಂ ಖಾಲಿ ಹಾತಾಂನಿ ಕೊಣಾ ಖಾತಿರ್ ತಾಣಿ ಆಂಗವ್ಣ್ ಭಾಸಾಯಿಲ್ಲಿ ತೆಂ ದಿರ್ವೆಂ ನಾಸ್ತಾನಾಂಚ್ ಸಾಯ್ಬಿಣಿಚ್ಯಾ ಪಾಂಯಾ ಮುಳಾಕ್ ಪಾವೊನ್ ಆಂಗವ್ಣ್ ಫಾರಿಕ್ ಕರ್ನ್ ಸಾಯ್ಬಿಣಿಚೊ ಆಧಾರ್ ಮಾಗೊನ್ಂಚ್ ಪಾಟಿ ಪರ್ತಾತಾತ್. ನಿಮ್ಮಿಚ್ಯೆ ಸೊದ್ನೆಕ್. ಕಿತೆಂ ತಿಂ ಪಳೆತೆಲಿಂ!!
ಮರಿಯೆಚೆ ಬಾಂಯ್ಚಾ ಆನಿ ಕೊಪೆಲಾಚಾ ಮದೆಗಾತ್ತ್ ರಸ್ತ್ಯಾ ದೆಗೆನ್ ಸಾವ್ಳೆಕ್ ಎಕ್ಲಿ ಅಸ್ಕತ್ ಸ್ತ್ರೀ ನಿಮ್ಮಿಕ್ ಉಸ್ಕ್ಯಾರ್ ಘೆವ್ನ್ ಆಪ್ಲ್ಯಾ ಪಾಲ್ವಾನ್ ವಾರೆಂ ಘಾಲ್ತಾ. ಆನಿ ತಿಚೊ ದಾದ್ಲೊ ಲಾನ್ಶಾ ಲೊಟ್ಯಾನ್ ಥೆಂಬೊ ಉದಾಕ್ ನಿಮ್ಮಿಚ್ಯೆ ಸುಕ್ಲ್ಲ್ಯೆ ಜಿಬೆಕ್ ಸೊಡ್ತಾ. ಕಸಲೆಂ ದ್ರಶ್ಯ್ ತೆಂ? ಧರ್ತೆರ್ ಲೊಳೊನ್ ಆಂಗವ್ಣ್ ಫಾರಿಕ್ ಕರ್ಚಿ ಅರ್ದ್ಯಾರ್ ರಾವಯ್ಲಿ. ಆತಾಂ ಪರ್ತ್ಯಾನ್ ಪಾಟಿಂ ವ್ಹಚೊನ್ ನವ್ಯಾನ್ ಆರಂಬ್ ಕರಿಜಾಯ್ ಮ್ಹಳ್ಳೆ ಕರ್ಕರೆ ಆವಯ್ ಮೊಗಾ ಪ್ರಾಸ್, ತಾಂಚೆ ಎಕೆಚ್ಚ್, ಆಂಗವ್ಣೆನ್ ಲಾಭ್ಲ್ಲ್ಯಾ ಬಾಳಾ ಪ್ರಾಸ್ ಮುಖಾರ್ ಧಾಂವ್ತಾಲೆ ತಾಂಚ ಉತ್ರಾಂನಿ, ಆಕ್ಲಾಸಾಂನಿ. ಪುಣ್... ಪುಣ್ ತೆಂ ಜೊಡೆಂಯ್ ಆಂಗವ್ಣ್ ಫಾರಿಕ್ ಕರ್ಚೆಂ ಅರ್ದ್ಯಾರ್ ರಾವವ್ನ್ ಅಸ್ವಸ್ಥ್ ಜಾಲ್ಲ್ಯಾ ನಿಮ್ಮಿಚಿ ಸೆವಾ ಕರುಂಕ್ ಲಾಗ್ಲ್ಲೆಂ. ತಾಚಿಂ ವಾರೆಸ್ದಾರಾಂ ಯೇವ್ನ್ ತಾಂಚಾ ಹಾತಾಂತ್ ತಾಂಚಾ ಬಾಳಾಕ್ ಘೆತಾ ಪರ್ಯಾಂತ್ ತಿಂ ನಿಮ್ಮಿಚಿ ಸೆವಾ ಕರಿತ್ತ್ ರಾಕ್ತಲಿಂ.
ತರ್??? ಆತಾಂ ನಿಮ್ಮಿನ್ ತಾಚಿ ಲೊಳೊನ್ ವ್ಹೆಚಿ ಸೆವಾ ಖಂಯ್ ಥಾವ್ನ್ ಪರ್ತ್ಯಾನ್ ಸುರು ಕರ್ಚಿ? ತಾಂಚ ಬಾಳಾಚೆ ಭಲಾಯ್ಕೆ ಪ್ರಾಸ್ ಆಂಗವ್ಣ್ ತಾಂಕಾ ಪಯ್ಲಿ ದಿಸ್ತಾಲಿ. ಮನ್ಶಾಪಣಾಚ್ಯೊ ರೂಲಿ ಮೊಡ್ನ್ ಜಾಲ್ಯಾರೀ ಆಂಗವ್ಣೆಚೊ ರೂಲಿ ಶಿಸ್ತೆನ್ ಪಾಳುಂಕ್ ಆಶೆತಾಲಿಂ ತಿಂ.
"ತುಮ್ಚೆಂ ಭುರ್ಗೆಂ ಪಿಡೆಸ್ತ್ ಆಸಾ. ತಾಕಾ ಪಯ್ಲಿ ದಾಕೆರಾಚಿ ಗರ್ಜ್ ಆಸಾ. ಆನಿ ತುಮಿ ಆಂಗವ್ಣೆಚೆಂ ಉಲಯ್ತಾತ್." ಮ್ಹಣಾಲೊ ಭೋವ್ ಚಡ್ ಕಳ್ವಳ್ಯಾಂನಿ ನಿಮ್ಮಿಕ್ ಸೆವಾ ದಿಲ್ಲೊ ದಾದ್ಲೊ. ಆಂಗವ್ಣ್ ಫಲ್ಸೊನ್ ನಿಮ್ಮಿ ಜಲ್ಮೊಂಚಾ ಆದಿಂ ಹೆರಾಂ ಕೊಣಾಯ್ಚೆಂಯ್ ಭುರ್ಗೆಂ ಆಂಗವ್ಣ್ ಪಾಳ್ತಾನಾ ಹ್ಯೆ ಸ್ಥಿತೆಕ್ ಪಾವ್ಲ್ಲೆಂ ತರ್ ಸಿನಿ ಆನಿ ಕ್ರಿಸ್ಟ್ಯೀ ತೆಂಚ್ಚ್ ಮ್ಹಣ್ತಿಂ. ಅತಾಂ ತಾಂಚಾಚ್ಚ್ ಬಾಳಾನ್ ಆಂಗನ್ಣ್ ಪಾಳಿನಾಸ್ತಾನಾ ಖರ್ಗ್ ಮಾಗೊನ್ ಘೆಂವ್ಚೆ ಮ್ಹಣ್ತಾನಾ... ಭಿರಾಂತೆಚೊ ಶಿರ್ಶಿರೊ ಧಾಂವ್ಲೊ ತಾಂಚಾ ಕಾಳ್ಜಾಂನಿ.
"ನಾ ತಶೆಂ ಜಾಂವ್ಚೆಂನಾ. ಅರ್ದ್ಯಾರ್ ರಾವ್ಲ್ಲಿ ಆಂಗವ್ಣ್ ಫಾರಿಕ್ ಜಾತನ, ನಿಮ್ಮಿಚಿ ಭಲಾಯ್ಕಿ ಖಂಡಿತ್ ಬರಿ ಜಾತಲಿ. ವೆಲ್ಲಂಕಣಿ ಮಾತಾ ಆಮ್ಕಾಂ ಸಾಂಬಾಳ್ತಾ, ಭುರ್ಗೆಂ ದಿಂವ್ಚೆಂಯೀ ತಿಣೆ, ಭಲಾಯ್ಕಿ ಸಾಂಬಾಳ್ಚಿಯೀ ತಿಣೆಂಚ್." ಸೀನಿನ್ ಏಕ್ ಮಾರ್ ದೋನ್ ಕುಡ್ಕೆ ಮ್ಹಳ್ಳ್ಯಾಬರಿ ಸಾಂಗೊನ್ ಸೊಡ್ಲೆಂ. ಆನಿ ನಿಮ್ಮಿಕ್ ಉಕಲ್ನ್ ತಿಣೆ ರಸ್ತ್ಯಾಚ್ಯೆ ತಾಪ್ಲ್ಲ್ಯೆ ಧರ್ತೆರ್ ನಿದಾಯ್ಲೆಂ.
"ಲೊಳೊಂಕ್ ಸುರು ಕರ್ ನಿಮ್ಮಿ. ಆಮಿ ತುಜೆ ಸಾಂಗತಾಚ್ಚ್ ಆಸಾಂವ್. ತಾಂಕಾನಾ ತರ್ ಸವ್ಕಾಸ್ ಲೊಳೊನ್ ವ್ಹಚ್ ಪುತಾ. ಭಲಾಯ್ಕೆ ಮಾತಾ ತುಕಾ ರಾಕ್ತಲಿ." ಕುಡ್ಸಿಲೆಂ ಕ್ರಿಸ್ಟ್ನ್. "ಮೊಜಿ ತಕ್ಲಿ ಕಠೀಣ್ ದುಖ್ತಾ ಮಾಂಯ್, ಮೊಜೆ ವರ್ವಿಂ ಜಾಯ್ನಾಂ."
ತಾಪ್ಚಾ ವೊತಾಂತ್ಲೆಂ ದಾಂವೊನ್ ಸಾವ್ಳೆಂತ್ ರಿಗೊಂಕ್ ನಿಮ್ಮಿ ದರ್ವಡ್ಲೆಂ. ಆನಿ ತೆಂ ವ್ಹಡ್ಲ್ಯಾನ್ ರಡ್ಲೆಂ ಆಶಾರ್-ಪಾಶಾರ್ ಜಾಂವ್ಚೊ ಭಕ್ತಿಕ್ ಥಂಯ್ ಥಂಯ್ ರಾವೊನ್ ಏಕ್ ಭಕ್ತಿಕ್ ನಾಟಕ್ ದೆಖ್ತೆಲ್ಯಾಬರಿ ಮಗ್ನ್ ಜಾಲ್ಲೊ.
"ನಾ ನಿಮ್ಮಿ, ಆದ್ಲ್ಯಾ ವರ್ಸಾ, ತಾಚಾ’ದ್ಲ್ಯಾ ವರ್ಸಾ ತುಂ ಲೊಳೊನ್ ಮಾತೆಚಾ ಚರಣಿಂ ಗೆಲಾಂಯ್, ತವಳ್ ತುಂ ಲ್ಹಾನ್ಶೆಂ ಬಾಳ್. ಆತಾಂ ತುಂ ಕೆದ್ದೆಂ ಜಾಲಾಂಯ್ ಪಳೆ. ತುಂ ಖಂಡಿತ್ ಲೊಳೊಂಕ್ ಸಕ್ತಾಯ್. ಯೆ ನಿಮ್ಮಿ, ಆಮಿ ತುಜೆ ಸಾಂಗಾತಾ ಆಸಾಂವ್." ನಿಮ್ಮಿ ವ್ಹಡ್ಲ್ಯಾನ್ ಬೊಬಟ್ತಾಲೆಂ.
"ನಾ ಮೊಜೆ ವರ್ವಿ ಸಾಧ್ಯ್ ನಾ. ಮೊಜಿ ತಕ್ಲಿ ದುಖ್ತಾ, ಮ್ಹಕಾ ತಾಂಕಾನಾ, ಆಮಿ ಘರಾ ಯಾ." ತೆಂ ರಡ್ತಾಲೆಂ, ಪರತ್ತಾಲೆಂ. ಕುಡ್ಸಾಲ್ಲೆ ಭಕ್ತಿಕ್ ಎಕೆಕಾ ನಮುನ್ಯಾರ್ ಉಲಯ್ತಾಲೆ.
’ಕಸಲಿಂ ಮನ್ಶಾಂ ಹಾಬಾ ಹಿಂ, ತ್ಯಾ ಬಾಳಾಕ್ ತಾಂಕಾನಾ. ಹಿ ಲೊಳೊಂಕ್ ಸಾಂಗ್ತಾತ್. ಹಾಂಚ ದೊಳ್ಯಾಂನಿ ರಗಾತ್ ನಾ.’ ಆನಿ ಥೊಡಿಂ ಫಿತಿಸ್ಪಣಾಚಿ ಮ್ಹಣ್ತಾಲಿಂ, ‘ತೆ ಚಲಿಯೆಚ್ಯೆ ಆಂಗಾರ್ ಸಯ್ತಾನ್ ಆಯ್ಲಾ ಆಸ್ತಲೊ. ಸಾಯ್ಬಿಣ್ ಮಾಯೆನ್ ತಾಚೆಂ ಮಾಂಡ್ಡೆಂ ಚೆಂಚ್ಲ್ಲೆಂ. ಆತಾಂ ಹ್ಯೆ ನೆಣ್ತ್ಯೆ ಚಲಿಯೆಚೊ ಬೊಂಗೊಸ್ತಳ್ ಕರುಂಕ್ ಆಯ್ಲಾ.
ಸಾಯ್ಬಿಣಿಚ್ಯೆ ಕ್ರಪೆನ್ ಜಾಲ್ಲೆಂ ಬಾಳ್ ತೆಂ ಆಂಗವ್ಣ್ ಫಾರಿಕ್ ಕರಿನಾಸ್ತಾನಾ ಶಿರಾಪ್ ಮಾಗೊನ್ ಘೆತ್ಲ್ಯಾರ್ ಸಯ್ತಾನಾಕ್ಚ್ಚ್ ಬೊರೆಂ ನ್ಹಯ್ಗೀ?’ ಸೀನಿ ಆನಿ ಕ್ರಿಸ್ಟ್ ಲೊಕಾಚೆಂ ವಿವಿಧ್ ನಮುನ್ಯಾಂಚೆ ಉಲೊಣೆ ಆಯ್ಕೊನ್ ಲಜೆನ್ ಮುದೊ ಜಾಲಿಂ.
"ಆಮಿ ದಿಂಬಿಯಾಂನಿ ಯಾ" ಮ್ಹಣಾಲೊ ತೊ. ವೊಂದಾಲ್ಲ್ಯಾ ಲೊಕಾಚೆಂ ಗಣ್ಣೆ ಕರಿನಾಸ್ತಾನಾ ನಿಮ್ಮಿಕ್ ಉಕಲ್ನ್ ತಾಣೆ ಆಪ್ಲ್ಯಾ ಖಾಂದರ್ ನಿದಾಯ್ಲೆಂ. ಆನಿ ದಿಂಬಿಯಾಂನಿ ಚಲೊಂಕ್ ಲಾಗ್ಲೊ. ಸೀನಿ ಘೊವಾಚ್ಯಾ ಪಾಟ್ಲ್ಯಾನ್ಂಚ್ ದಿಂಬಿಯಾಂನಿ ಸಾಯ್ಬಿಣಿಚೆಂ ಬೊಗ್ಸಾಣೆ ಮಾಗಾತ್ತ್ ಗೆಲಿ. ಮಾತೆಚ್ಯಾ ಪಾಯಾಂ ಮುಳಾಂನ್ ನಿಮ್ಮಿಕ್ ಪರ್ತ್ಯಾನ್ ಅರ್ಪಿಲೆಂ ತಾಣಿ. ಆಂಗವ್ಣ್ ಪಾರಿಕ್ ಕರ್ನ್ ಘಡ್ಲ್ಲ್ಯಾ ಆಕಸ್ಮಿಕಾ ಥಂಯ್ ಪಶ್ಚಾತ್ತಾಪ್ ಉಚಾರ್ನ್ ಭೊಗ್ಸಾಣೆ ಮಾಗ್ಲೆಂ ಉಪ್ರಾಂತ್ಮ್, ಹ್ಯೆ ಚುಕಿಕ್ ಕಸಲಿಯೀ ಶಿಕ್ಷಾ ದೀನಾತ್ಲ್ಯಾ ಬರಿ ಪರಾತ್ಲೆಂ ತಾಣಿ ಸಾಯ್ಬಿಣಿ ಲಾಗಿಂ ಆನಿ ತಿಂ ಆಂಗವ್ಣ್ಯೊ ಪ್ರದರ್ಶನಾಚಾ ಹೊಲಾಕ್ ಗೆಲಿಂ. ನಿಮ್ಮಿ ಬಾಪಾಯ್ಚ ಖಾಂದಾರ್ ನಿದೊನ್ಂಚ್ ಆಸ್ಲ್ಲೆಂ. ಸಕಯ್ಲ್ ದೆಂವೊಂಕೀ ಆಯ್ಕಾಲೆಂನಾ ಲೊಕಾ ಗಡ್ದೆ ಆನಿ ವೊತಾಚೆ ಧಾವೆ ಥಾವ್ನ್ ಕುಶಿಕ್ ಸರ್ತಾನಾ ನಿಮ್ಮಿಚ್ಯಾ ಜಿವಾಕ್ ಮಾತ್ಸೆಂ ಸಮಧಾನ್, ಸುಡಾಳಾಯ್, ಶಾಂತತಾ ಭಗ್ಲಿ. ಹ್ಯೆ ಫುಲವ್ಣೆಕ್ ಸೀನಿನ್ ದುಸ್ರೊಚ್ಚ್ ಅರ್ಥ ದಿಲೊ.
"ಹಾಂವೆ ಸಾಂಗೊಂಕ್ ನಾ? ಸಾಯ್ಬಿಣ್ ಮಾತಾ ರಾಕ್ತಾ ಮ್ಹಣ್. ಆಮ್ಚಾ ನಿಮ್ಮಿಕ್ ಕಾಂಯ್ಚ್ ಪಿಡಾ ನಾ. ಫಕತ್ತ್ ಬಾಳ್ಪಣಾಚೆಂ ಹಟ್ಟ್, ತಾಚೆರ್ ಮಾತೆನ್ ಬೆಸಾಂವ್ ಘಾಲಾಂ. ತೆಂ ಬರೆಂ ಜಾಲಾಂ. ಕ್ರಿಸ್ಟ್ಕ್ ಹೆಂ ಸತ್ ಮ್ಹಣ್ ದಿಸ್ಲೆಂ ಆವಯ್ಕ್ ಭುರ್ಗ್ಯಾಚಿ ಭಾಯ್ಲಿ-ಭಿತರ್ಲಿ ನಾಡ್ ಪಾರ್ಕುಂಕ್ ದಾಕ್ತೆರ್ಗಿ ಶಿಕ್ಲ್ಲ್ಯಾ ನಕ್ಲಿ ಆವಯಾಂ ಪ್ರಾಸ್ ಬರಿ ಕಳ್ಟಾ ಮ್ಹಣ್ ಆಪ್ಲೆ ಪತಿಣೆ ಥಂಯ್ ಗೌರವ್ ಭಗ್ಲೊ ತಾಕಾ. ಹಾಚಾ’ದ್ಲ್ಯಾ ವರ್ಸಾಂಬರಿಚ್ ವೆಲ್ಲಂಕಣಿಂತ್ಲೆ ದಾ ದಿಸ್ ತಾಣಿ ಪಾಶಾರ್ ಕೆಲೆ. ಗಾಂವಾಕ್ ಪಾಟಿಂ ಗೆಲಿಂ ತಿಂ.
ಹಳ್ಳೆ ಥಾವ್ನ್ ದೊನ್ಶಿಂ ಮಯ್ಲಾಂ ಪಯ್ಶಿಲ್ಯಾ ವೆಲ್ಲಂಕಣಿಕ್ ವ್ಹಚೊನ್ ಭಂವೊನ್ ಘುಂವೊನ್ ಯೆತಾನಾ ಘರ್ಚಾ ಹರ್ಯೆಕಾ ಸಾಂದ್ಯಾಂಕ್ ಲ್ಹಾನ್ ವ್ಹಡ್ ಬಹುಮಾನಾಂ, ಖಾಂವ್ಕ್, ವ್ಹರೊನ್ ವ್ಹೆಚ್ಯಾ ಹ್ಯಾ ಜೊಡ್ಯಾಚೆರ್ ತಾತ್ಕಾಲಿಕ್ ಮೋಗ್ ಆನಿ ಅಭಿಮಾನ್ ಘರ್ಚ್ಯಾಂಕ್. ಪುಣ್... ಭಿತರ್ಲ್ಯಾ ಭಿತರ್ ಮುಸ್ಮೊಸೊನ್ ಉದೆವ್ನ್ ಯೆಂವ್ಚೊ ತೊ ಮೊಸೊರ್ ಘರಾಂತ್ ಭಾಭಾವಾಂಚೊ ಬಾಯ್ಲ್ಯೊ, ಭುರ್ಗಿಂ, ವರ್ಸಾಂತ್ಲೆ ಭಾರಾಯಿ ಮಹಿನೆ ಕುಟ್ಮಾ ಖಾತಿರ್ ಶ್ಹೆತಾಂನಿ ಘೊಳ್ಚೆಂ.
ಖಂಯ್ಸರೀ ಭೊಂವೊಂಕ್ ವ್ಹಚನಾಸ್ತಾನಾ ಕೊಂಕ್ರೆಟಾಚೆ ಧರ್ತೆಂತ್ ಪೂರ್ನ್ ಬಸಯಿಲ್ಲ್ಯಾ ಲೊಂಕ್ಡಾಚಾ ಮಿಶಿನಾಬರಿ ಘೊಳಾತ್ತ್ ಆಸ್ಚಿಂ, ಆಂಗೊವ್ಣೆಚ್ಯಾ ನಿಬಾನ್ ಮಾಲ್ಗಡ್ಯಾ ಭಾವ್ಯಾ-ಜಾವೆಚೆಂ ಆನಿ ತಾಂಚ ಎಕಾಚ್ಚ್ ಪಿಲ್ಕಾಟ್ಯಾಚೆಂ ಭಾಗ್ ದೆಖೊನ್. ಕೊಣಾ ಎಕ್ಲ್ಯಾಚ್ಯಾ ಹರ್ದ್ಯಾಂತ್ ಉಸ್ಕಾಲ್ಲೆಂ ಮೊಸ್ರಾ ಉಜ್ಯಾಚೆಂ ಕಿಟಾಳ್ ಸವ್ಕಾಸ್ ಪೆಟೊನ್ ಲಾಗ್ಶಿಲ್ಯಾಂಚಾ ಕಡ್ವಳಾಂನಿ ತಾಚಿ ಧಾವ್ ಲಾಗೊಂಕ್ ವೇಳ್ ಲಾಗಾನಾ. ಸಂದ್ರಾಪಾ ಆನಿ ವೆಳಾ ಪರ್ಮಾಣೆ ಅವ್ಕಾಸ್ ಲಾಭ್ತಾನಾ ಬಾರೀಕ್ ಕಾಡಿಯೆನ್ ಸೊರ್ಮೊಣ್ ರಾಶಿಕ್ ಕಿಡಾವ್ನ್ ತಾಂತ್ಲಿ ಉಜ್ಯಾ ಕಿಸಳಾಂ ಸೀನಿ ಕುಟ್ಮಾಚೆರ್ ಉಸ್ಳೊಂಕ್ ಲಾಗ್ತಾನಾ ರಾಂದ್ಣಿಂತ್ಲೊ ಉಜೊ ತರೀ ವಾರ್ಯಾಕ್ ಪಾಲ್ವೊನ್ ಜಳೊನ್ ಕಾಬಾರ್ ಜಾಯ್ತ್.
ಪುಣ್ ಹರ್ದ್ಯಾಂತ್ ರಿಗ್ಲ್ಲ್ಯಾ ಮೊಸ್ರಾ ಉಜ್ಯಾಕ್ ಪಾಲೊವ್ಂಕ್ ಖಂಚೆ ವಾರೆಂ ಸಕತ್? ಸೀನಿ-ಕ್ರಿಸ್ಟ್ ಸಾಕ್ರಿಫಿಸ್ ಕರ್ನ್ ಆಪ್ಲ್ಯೊ ಆಶಾ ವೊಡ್ನ್ಯೊ ಕುಶಿನ್ ವೊಂದಾವ್ನ್ ರುವಿ-ತಾರ್ ಜಗವ್ನ್ ಸಗ್ಳ್ಯಾ ವರ್ಸಾಂತ್ಲಿ ಜೋಡ್ ಆಂಗವ್ಣೆಚಾ ಜಾಗ್ಯಾಕ್ ವ್ಹೆಚ್ಯಾಕ್ ಘರ್ಚಾಂಕ್ಯಿ ಸಂತೊಸ್ ದಿಂವ್ಚಾಕ್, ಖರ್ಚುಂಚ್ಯಾಂತ್ ಸಂತೊಸ್ ತ್ರಪ್ತಿ ಪಾವ್ತಾನಾ... ಹೆರಾಂ ಪಯ್ಶಾಕ್ ಚ್ಯಾರ್ ಘಾಂಟಿ ಘಾಲ್ತ್ ಜಗವ್ನ್, ತುಪೆಂ ಉಬಾರುಂಕ್, ಗ್ರೇಸ್ತ್ ಜಾಂವ್ಕ್ ತಯಾರ್ ಜಾತಾಲಿಂ. ಭಲಾಯ್ಕೆ ಮಾತೆಚ್ಯಾ ಆಜ್ಯಾಪಾನ್ ಕಾಜಾರ್ ಜಾವ್ನ್ ಪಂದ್ರಾ ವರ್ಸಾಂನಿ ತಾಂಕಾಂ ಲಾಭ್ಲಾ ಏಕ್ ಮಾಣಿಕ್ ತರ್ ಹೆರ್ ಭಾಭಾವಾಂಕ್ ತೆಗಾಂ-ಚೊವ್ಗಾಂ ಭುರ್ಗಿಂ ಬಾಳಾಂ. ಹ್ಯಾ ವರ್ಸಾ ವೆಲ್ಲಂಕನಿಕ್ ವ್ಹೆಚೊ ವೇಳ್ ಲಾಗಿಂ ಲಾಗಿಂ ಲಾಗಿಂ ಯೆತಾನಾ ನಿಮ್ಮಿಕ್ ತಕ್ಲಿ ಫಡಾಫಡ್ ಆನಿ ತಾಪ್. ಆವಯ್ನ್ ಧುವೆಚಿ ಪಿಡಾ ಪಾರ್ಕಿಲ್ಲಿ ನಿಬಾಕ್ ಏಕ್ ನಿವ್ಣೆ. ತಾಕಾ ಮಾತೆಚಾ ಪಾಯಾಂಥಳಾ ವ್ಹಚೊಂಕ್ ನಾಕಾ, ಲೊಳೊನ್ ವ್ಹೆಚಿ ಸೆವಾ ಕರುಂಕ್ ನಾಕಾ. ಎದೆಶೆಂ ಆಸಾ, ಏಕ್ದಮ್ ಹಟ್ಟಿ ತೆಂ.
"ತುಂವೆ ಕಿತ್ಲಿಂ ನಿಬಾಂ ದಿಲ್ಯಾರೀ ಆಮ್ಕಾಂ ವೆಲ್ಲಂಕಣಿ ವ್ಹೆಚೆ ಆಡಾಂವ್ಕ್ ಸಾಧ್ಯ್ ನಾ ನಿಮ್ಮಿ. ಆಮಿ ಖಂಡಿತ್ ಜಾವ್ನ್ ವ್ಹಚೊಂಕ್ಚ್ಚ್ ಜಾಯ್."
"ವೆಲ್ಲಂಕಣಿ ವ್ಹೆಚಾಕ್ ವ್ಹಡ್ನಾ ಮಾಂಯ್. ಮ್ಹಾಕಾ ತ್ಯೆ ತಾಪ್ಲ್ಲ್ಯ್ ರೆಂವೆ ವಯ್ಲ್ಯಾನ್ ಲೊಳೊಂಕ್ ಸಾಂಗಾನಾಕಾತ್. ಮ್ಹಾಕಾ ವೋತ್ ಪಳೆಂವ್ಕ್ ಸೊಸನಾ. ತೆಂ ವೊಮ್ತೆ ಉದಾರೆಂ ಲೊಳ್ತಾನಾ ಮೊಜ್ಯೆ ತಕ್ಲೆ ಭಿತರ್ ಕಿತೆಂಗೀ ಹಾಲ್ತಾ. ಮ್ಹಾಕಾ ಕಠಿಣ್ ದುಖ್ತಾ. ಆಮಿ ವೊತಾಕ್ಚ್ಚ್ ಕಿತ್ಯಾಕ್ ಲೊಳೊಂಕ್ ಜಾಯ್ ಮಾಂಯ್. ಸಕಾಳಿಂ ಸುರ್ಯೊ ಉದೆಂವ್ಚಾ ಆದಿಂ ವ್ವ್ ಸಾಂಜೆರ್ ಸುರ್ಯೊ ಬುಡ್ಲ್ಲ್ಯಾ ಉಪ್ರಾಂತ್ ಲೊಳೊಂಕ್ ನಜೊಗೀ?" ಪ್ರಾಯೆ ವ್ಹರ್ತೆಂ ಸವಾಲ್ ತಾಚೆ.
"ನಾ, ನಾ, ತಿ ಚೂಕ್, ಆಮಿ ಆಂಗವ್ಣ್ ಕೆಲ್ಲ್ಯಾ ವೆಳಾರ್ಚ್ ತಿ ಚಲಯ್ಜಾಯ್. ಆನಿ ಸಕಾಳಿಂ ಫುಡೆಂ ಆನಿ ದೀಸ್ ಬುಡ್ತಚ್ಚ್ ಆಮಿ ಲೊಳ್ತಾನಾ ಪಳೆತಾ ಕೊಣ್? ತುಂ ನಿಬಾಂ ದೀನಾಕಾ ನಿಮ್ಮಿ. ದೆವಾ ಮಾತೆಕ್ ರಾಗ್ ಆಯ್ಲ್ಯಾರ್ ಕಸಲಿ ಶಿಕ್ಷಾ ಮೆಳ್ತಾ ಜಾಣಾಂಯ್?" ಉಪ್ರಾಂತ್ ಕಿತೆಂಯೀ ಉಲಂವ್ಕ್ ನಿಮ್ಮಿಕ್ ಕಳ್ಲ್ನಾ ವ ಬಳ್ ಪಾವ್ಲ್ನಾ. ಲ್ಹಾನಾಂಕ್ ಧರ್ಲೆಂ ವ್ಹಡಾಂಕ್ ಕಸಲಿಯೀ ಪ್ರಾಣಾಂತಿಕ್ ಪಿಡಾ ಜಾಲ್ಯಾರೀ ದಾಕ್ತ್ರೆಆ ಸರ್ಶಿಂ ವರ್ಚೆಂ ನಿಯಮ್ಂಚ್ ನಾ. ಗಾಂವ್ಚಾ ವಕ್ತಾಂಚಾ ಪಂಡಿತಾಂನಿ ದಿಲ್ಲೆಂ ವಕಾತ್. ತಾಂತು ಆವ್ಕ್ ಆಸ್ಲ್ಲಿಂ ವಯ್ರ್ ಪಡ್ತಾತ್, ನಾತ್ಲ್ಲಿಂ ವಯ್ರ್ ವ್ಹೆತಾತ್.
ಮೊರೊಂಕ್ ಎಕಾ ದಿಸಾ ಸಖ್ಡಾಂಕೀ ಆಸ್ತಾನಾ, ತೆಂ ಏಕ್ ವ್ಹಡ್ ಚಿಂತ್ಪಾಚೆಂ ಸವಲ್ಚ್ ನ್ಹಯ್, ಥೊಡ್ಯಾಂಕ್ ಪಯ್ಲೆಂ ಥೊಡ್ಯಾಂಕ್ ಉಪ್ರಾಂತ್. ನಿಮ್ಮಿಚೊ ತಾಪ್ ಗಾಂವ್ಚಾ ವಕ್ತಾನ್ ಸುಟ್ಲೊ. ಥೊಡೆ ದೀಸ್ ತೆಂ ಬರೇ ಖೆಳ್ಳೆಂ. ಪರ್ತ್ಯಾನ್ ತಾಪ್, ತಕ್ಲಿ ಫಡಾಫಡ್. ತಾಪ್ ಯೆತಾ, ವ್ಹೆತಾ, ಸದಾಂಚೊ ಸಯೊ ಕಸೊ. ತಾಪ್ ಯೆತಾನಾ ಸೀನಿ ಆನಿ ಕ್ರಿಸ್ಟ್ ಥೊಡ್ಯಾ ದುಡುವಾಚೆ ನೋಟ್ ನಿಮ್ಮಿಚ್ಯೆ ತಕ್ಲೆ ಆನಿ ಅಮ್ಗಾ ಭಂವಾರಿಂ ಘುಂವ್ಡಾವ್ನ್ ಸಾಯ್ಬಿಣಿಲಾಗಿಂ ಮಾಗೊನ್ ತಿಚ್ಯಾ ಆಲ್ತಾರಾ ಭಿತರ್ ದವರ್ತಾತ್. ಪಂಡಿತಾಚೆಂ ವಕತ್ ಹಾಡ್ತಾತ್. ತಾಪ್ ರಾವ್ತ. ಪಂಡಿತಾಚ್ಯೆ ಆನಿ ವೆಲ್ಲಂಕಣಿ ಮಾತೆಚ್ಯೆ ಕ್ರಪೆನ್ ನಿಮ್ಮಿಚೊ ತಾಪ್ ರಾವ್ತಾ. ತೆಂ ಬರೆಂ ಜಾತಾ. ಪರ್ತ್ಯಾನ್ ವೆಲ್ಲಂಕಣಿ ವ್ಹೆಚೊ ವೇಲ್ ಯೆತಾ. ನಿಮ್ಮಿಕ್ ವ್ಹಚೊಂಕ್ ಖುಶಿ ನಾ.
ಘರ್ಚಾ ಸಾಂದ್ಯಾಂಕೀ ಮೊಸೊರ್. ಆತಾಂ ತಿಂ ಆಂಗವ್ಣ್ ಫಾರಿಕ್ ಕರುಂಕ್ ನ್ಹಯ್ ಭಂವೊಂಕ್ ವ್ಹೆತಾತ್ ಮ್ಹಳ್ಳ್ಯಾ ತಿತ್ಲೊ ತಾತ್ಸಾರ್. ಸೀನಿಚಾ ಉತ್ರಾಂನಿ ಆತಾಂ ರಂಗವ್ಣ್ ನಾ. ಅನಿವಾರ್ಯ್ ಜಾವ್ನ್ ವ್ಹಚಾಜಾಯ್ಚ್ಚ್ ಮ್ಹಳ್ಳ್ಯಾ ಖಾತಿರ್ ವ್ಹೆಚೆಂ ಮ್ಹಳ್ಳ್ಯಾಬರಿ. ಕ್ರಿಸ್ಟ್ಯೀ ತಿತ್ಲ್ಯಾರ್ ತಿತ್ಲೊಚ್ಚ್. ಮಾತೆಕ್ ರಾಗ್ ಯೇತ್, ದಿಲ್ಲೆಂ ಪಾಟಿಂ ಘೆತ್ ಮ್ಹಳ್ಳ್ ಭಿರಾಂತ್. ಮಾತೆಲಾಗಿಂ ಮಾಗೊನ್ ಭುರ್ಗೆಂ ದಿಲ್ಯಾ ಉಪ್ರಾಂತ್ ಪರ್ತ್ಯಾನ್ ಆಂಗವ್ಣ್ ಕೆಲ್ಲ್ಯೆ ಬಾಯ್ಲೆಚೆರ್ ಎಕಾ ನಮುನ್ಯಾಚೊ ಮುಸ್ಮುಸೊ. ತರೀ ತೊಂಡ್ ಉಘಡ್ನ್ ಸಾಂಗ್ಚೆ ಧಯ್ರ್ ನಾ. ಸಾಯ್ಬಿಣ್ ರಾಗ್ ಕರಿತ್, ಶಿರಾಪ್ ಭೆಜಾತ್, ಹಾತಾಕ್ ಆಯಿಲ್ಲೆಂ ತೋಂಡಾಕ್ ಪಾಂವ್ಚೆ ನಾ ಮ್ಹಳ್ಳೆ ದುಭಾವಾಚೆ ಕಳ್ವಳೆ. ತರೀ ತಿಂ ನಿಮ್ಮಿಕ್ ಘೆವ್ನ್ ವೆಲ್ಲಂಕಣಿ ಭಾಯ್ರ್ ಸರ್ತಾತ್.
"ಮ್ಹಾಕಾ ಮೊಜ್ಯಾ ಜಿವಾಂತ್ ಖೊಚಾಯಿಲ್ಲ್ಯಾಬರಿ ಭಗ್ತಾ ಮಾಂಯ್." ಮ್ಹಣಾಲೆಂ ನಿಮ್ಮಿ ಪಯ್ಣಾರ್ ಆಸ್ತಾನಾ,
"ಹೆ ಪಾವ್ಟಿ ಮಾತೆಲಾಗಿಂ ಬರೆಂ ಕರ್ನ್ ಮಾಗ್ ಪುತಾ, ತುಜಿ ಪಿಡಾ ಗೂಣ್ ಕರುಂಕ್. ಆಮಿಂಯ್ ಮಾಗ್ತಾಂವ್." ಆವಯ್ನ್ ಧುವೆಕ್ ಸಮಧಾನ್ ಕೆಲೆಂ. ಬಾಪಾಯ್ನ್ ಆಪ್ಲ್ಯಾ ಕಾಳ್ಜಾಲಾಗಿಂಚ್ ನಿಮ್ಮಿಕ್ ಧಾಂಬುನ್ ದರ್ಲೆಂ. "ತುಮ್ಕಾಂ ತೆಂ ಕಳಿತ್ ನಾ." ಮ್ಹಣಾಲಿ ಸೀನಿ ಆಪ್ಲ್ಯಾ ಘರ್ಕಾರಾ ಲಾಗಿಂ.
"ಆಂಗವ್ಣೆಚಿ ಭ್ಹುರ್ಗಿಂ ತಶಿಂಚ್, ನಾಜೂಕ್. ತಿಂ ಸಾಯ್ಬಿಣಿನ್ ದಿಲ್ಲಿಂ ಭುರ್ಗಿಂ." ವ್ಹಯ್ ಮ್ಹಣ್ ಭಗ್ಲೆಂ ಕ್ರಿಸ್ಟ್ಕ್ಯೀ. ಆಪ್ಲ್ಯಾ ಹರ್ದ್ಯಾರ್ ನಿದ್ಲ್ಯಾ ನಿಮ್ಮಿಕ್ ಜಾಗ್ ಜಾಯ್ತ್ ಮ್ಹಳ್ಳ್ಯಾಕ್ ತಾಣೆ ತಕ್ಲಿ ಮಾತ್ರ್ ಹಾಲಯ್ಲಿ. "ತುಜ್ಯಾ ಭಾವಾಂಚ್ಯಾ ಇತ್ಲ್ಯಾ ಭುರ್ಗ್ಯಾಂ ಪ್ರಾಸ್ ಆಮ್ಚೆಂ ನಿಮ್ಮಿಂಚ್ ಬುದ್ವಂತ್" ಮ್ಹಣಾಲಿ ತಿ ಪರ್ತ್ಯಾನ್. ಆತಾಂಯ್ ಕ್ರಿಸ್ಟ್ನ್ ತಕ್ಲಿ ಮಾತ್ರ್ ಹಾಲಯ್ಲಿ. ತಾಚೆ ಮತಿಂತ್ ಏಕ್ ಝುಜ್ ಚಲ್ತಾಲೆಂ.
"ಪುಣ್ ಸಾಯ್ಬಿಣಿಚೆಂ ಭುರ್ಗೆಂ ಇತ್ಲೆಂ ಹಟ್ಟ್ ಕಿತ್ಯಾ ಮ್ಹಳ್ಳೆಂ ಮಾತ್ರ್ ಮ್ಹಕಾ ಸಮ್ಜಾನಾ." ಮ್ಹಣಾಲಿ ತಿ, ಪತಿಚಾ ಚಡ್ ಲಾಗಿಂ ಸೆರ್ವೊನ್. ಆತಾಂ ಕ್ರಿಸ್ಟ್ನ್ ತಿಕಾ ಅಸಹಾಯಕ್ ದೊಳ್ಯಾಂನಿ ಪಳೆಲೆ ಮಾತ್ರ್. ಘರಾಂತ್ ಫುಟ್ಲ್ಲೆಂ ಸಮಧಾನ್, ಆಂಗವ್ಣೆಚ್ಯಾ ನಿಬಾನ್ ಕರ್ಚಾ ಪಯ್ಣಾಚೆ ಕರ್ಕರೆ ಉಬ್ಜಾಯ್ತಲೆ ತಾಕಾ. ಆಪುನ್ ಜಾಗಿಂಚ್ ಆಸಾಂ ಆನಿ ತುಮ್ಚೆಂ ಉಲೊಣೆ ಸರ್ವ್ ಮ್ಹಕಾ ಸಮ್ಜಾತಾ ಮ್ಹಳ್ಳೆಬರಿ ಏಕ್ ಕರುಣಾಭರಿತ್ ದೀಷ್ಟ್ ಖಂಚಯ್ಲಿ ನಿಮ್ಮಿನ್ ಬಾಪಾಯ್ಚೆರ್ ಆನಿಂ ತೆಂ ಪಿಂರ್ಗಾಲೆಂ. ತವಳ್ ಕಿತ್ಯಾಕ್ಗೀ ಕ್ರಿಸ್ಟಾಚ್ಯಾ ಕಾಳ್ಜಾ ಥಾವ್ನ್ ಕಡ್ವಳಾ ಪರ್ಯಾಂತ್ ವೊಳಾಯಿಲ್ಲ್ಯೆ ದುಖಿಚಿ ಏಕ್ ಪಿಂರ್ಗೊಣಿ ಉಸಾಳ್ಳಿ. ನಿಮ್ಮಿ ದೊಳೆ ಉರ್ಕುಟಾವ್ನ್ ಆವಯ್ಕ್ ಪಳೆತಾಲೆಂ
"ಮಾಂಯ್" ಆಪಯ್ಲೆಂ ತಾಣೆ ಬಾರಿಚ್ಚ್ ಕಷ್ಟಾಂನಿ. ಆವಯ್ನ್ ಆನಿಂ ಬಾಪಾಯ್ನ್ ದೊಗಾಂಯ್ನಿ ಏಕ್ಚ್ಚ್ ಪಾವ್ಟಿ ಜಾಪಿ ದಿಲಿ, "ಕಿತೆಂ ಪುತಾ?"
"ಆಮಿ ವೆಲ್ಲಂಕಣಿ ಖಂಡಿತ್ ವ್ಹಚಜಾಯ್ಗಿ?"
"ವ್ಹಯ್ ಬಾಳಾ."
"ತಿಚೊ ತುಮ್ಕಾಂ ಮೊಸ್ತ್ ಮೋಗ್ಗೀ?"
"ವ್ಹಯ್ ಪುತಾ" ಭಲಾಯ್ಕೆಮಾತೆಚ್ಯಾ ಮೊಗಾನ್ ತುಮಿ ವ್ಹೆಚೆಂಗೀ?"
"ವ್ಹಯ್ ಪುತಾ"
"ತಿಚೆಂ ಉತಾರ್ ತುಮಿ ಆಯ್ಕಾತಾತ್ಗೀ?"
"ವ್ಹಯ್ ಮೊಜ್ಯಾ ಬಾಳಾ." ಮ್ಹಣಾಲಿಂ ತಿಂ ಸಾಂಗಾತಾಚ್ಚ್ ಎಕಾಚ್ಚ್ ತಾಳ್ಯಾನ್.
"ತರ್, ಮೊಜೊ ತುಮ್ಕಾಂ ಮೋಗ್ ನಾಂಗೀ ಮಾಂಯ್?"
"ಆಸಾ ಮೊಜ್ಯಾ ಭಾಂಗಾರಾ. ಕಿತ್ಯಾಕ್ ಹಿಂ ಸವಾಲಾಂ ಪುತಾ?"
"ತರ್, ಹಾಂವೆ ಸಾಂಗ್ಲ್ಲೆಂ ಕಿತ್ಯಾಕ್ ತುಮಿ ಆಯ್ಕಾನಾಂತ್?"
ಕಿತೆಂ ಜಾಪ್ ತಿಂ ದಿತೆಲಿಂ? ದೊಗಾಂಯ್ಚಿ ವಾಚ್ಯಾಚ್ ಬಂದ್ ಪಡ್ಲಿ. ನಿಮ್ಮಿನ್ ರಾಕೊನ್ ರಾಕೊನ್ ಬಾಪಾಯ್ಚಾ ಹರ್ದ್ಯಾರ್ ತಕ್ಲಿ ತೆಂಕ್ಲಿ, ತಿಂ ಪರ್ತ್ಯಾನ್ ಮಾತೆಚ್ಯಾ ಚರಣಿಂ ಲೊಳೊನ್ ಭಚೊಂಕ್ ತಯಾರ್ ಜಾಲ್ಲಿಂ ವೋತ್ ಧಗ ಧಗಾ ತಾಪ್ತಾಲೆಂ ಲೊಕಾಚಿ ಖಟ್ ಅಶಿ ಭರ್ಲ್ಲಿಕೀ ತಾಂಚೆ ಮಧೆಂ ಘುಂವ್ಚೆ ವಾರೆಂ ಸಯ್ತ್ ಸಳ್ಸಳ್ತಾಲೆಂ. ಧರಣ್ ತಾಪ್ಲ್ಲಿ, ಪುಣ್ ನಿಮ್ಮಿ... ವೊತಾಚೆ ಧಾವೆಕ್ ಬಾವ್ಲ್ಲಿ ವಾಳ್ಚೆಬಾಚಿ ಜಾಲಿ ತಾಚಿ ಕೂಡ್.
"ದವರ್, ದವ್ರ್ ತಾಕಾ ಸಕಯ್ಲ್" ಫೊರ್ಮಾಯ್ಲೆಂ ಸೀನಿನ್ ಘೊವಾಕ್. ಪುಣ್ ತಾಪ್ಲ್ಲಿ ಕಾಯ್ಲ್ ಜಾಲ್ಲೆಂ ನಿಮ್ಮಿಚೆಂ ಆಂಗ್ ಕ್ರಿಸ್ಟ್ನ್ ಬಾಯ್ಲೆಚೊ ಹಾತ್ ಧರ್ಲೊ. ಆನಿ ತೊ ಉಕಲ್ನ್ ನಿಮ್ಮಿಚಾ ಕಪಾಲಾರ್ ದವರ್ಲೊ. ಘೊವಾಚ್ಯೆ ಮತಿಂತ್ಲೆ ಸವಾಲ್ ವಾಚ್ಲ್ಲೆಬರಿಂ ತಿಣೆ ಜಾಪ್ ದಿಲಿ.
"ತೆಂ ವೊತಾಕ್ ತಾಪ್ಲಾಂ" ತುಂ ಕಿತ್ಯಾಕ್ ಭಿಯೆತಾಯ್? ದವರ್ ತಾಕ ಸಕಯ್ಲ್."
ಸಭಾರ್ ಜೊಡಿಂ ಆನಿ ಎಕ್ಸುರಿಂ ಸಯ್ತ್ ತಾಂಚೆ ಸಾಮ್ಕಾರ್ ಲೊಳೊಂಕ್ ಸುರು ಕರ್ನ್ ಮುಖಾರ್ ಮುಖಾರ್ ಪಾವ್ತಾಲಿಂ. ಕಿಸ್ಟ್ನ್ ದಿಂಬಿ ಮೊಡ್ಲಿ. ಆನಿ ನಿರ್ಜೀವ್ ಮೊಡೆಂ ಪೆಟೆಂತ್ ನಿದಾಯ್ಲ್ಯಾಬರಿಂ ಹಳ್ವಾಯೆನ್ ದೊನೀ ಹಾತಾಂನಿ ನಿಮ್ಮಿಕ್ ಧರ್ತೆಕ್ ನಿದಾಯ್ಲೆಂ. ಸುರ್ಯಾಚಿ ಕಿರ್ಣಾಂ ತಾಪ್ಲ್ಲ್ಯಾ ಸರಳಾಂಬರಿ ನಿಮ್ಮಿಚ್ಯಾ ಮುಕಮಳಾರ್ ತೊಪೊನ್ ಪ್ರತಿಫಲಿತ್ ಜತಾಲಿಂ. ನಿಮ್ಮಿ ಸಗ್ಳೆಂ ಆಮ್ಗ್ ವೊಳಾವ್ನ್ ಪಿಂರ್ಗಾತಾಲೆಂ.
"ನಿಮ್ಮಿ ನಿಮ್ಮಿ ಬಾಳಾ ಬಾಳಾ" ಆವಯ್ ಆಂಗವ್ಣ್ ಪಾರಿಕ್ ಕರುಂಕ್ ಆಪಯ್ತಾಲಿ. ಕ್ರಿಸ್ಟ್ಚಾ ದೊಳ್ಯಾಂನಿ ಭರ್ಲ್ಯಾ ಉದ್ಕಾಚೆ ಪಾವ್ಳೆ ನಿಮ್ಮಿಚೆ ಕುಡಿರ್ ಜಡ್ತಾಲೆ. ನಿಮ್ಮಿ ಮಾತ್ರ್ ಹಾಲ್ಲೆಂಚ್ ನಾ. ಲೋಕ್ ತಾಂಚೆ ಭಂವ್ತಿಂ ಜಮೊಂಕ್ ಲಾಗ್ಲೊ.
ಚಲ್ಚೆ ಖೆಟಿಂತ್ಲೊ ಲೋಕ್ ಸಾಕ್ರಿ ರಾಶಿಕ್ ಮುಯೊ ಜಮೊನ್ ಯೆಂವ್ಚೆ ಬರಿಂ ಜಮೊ ವ್ಹಡ್ ವ್ಹಡ್ ಜಾಲೊ. ಪಯ್ಲೆ ಕಾನ್ ದೊಳೆ ಸೊಡ್ನ್ ಪಳಯಿತ್ತ್ ರಾವ್ಲೆಲ್ಯಾಂನಿ ತಾಚಿ ತೋಡಾಂ ಉಘ್ಡುಂಕ್ ಸುರು ಕೆಲಿಂ.
"ಭುರ್ಗ್ಯಾಕ್ ದಾಕ್ತೆರಾಕ್ ದಾಕಂವ್ಚೆ ಬೊರೆಂ." "ತಾಂಕಾನಾತ್ಲ್ಲ್ಯಾ ಭುರ್ಗ್ಯಾಕ್ ವಾಟೆರ್ ಕಿತ್ಯಾಕ್ ನಿದಾಯ್ಲಾಂ?" "ತುಮಿ ಕಾಂಯ್ ಭಿಕಾರ್ಯಾಂ ಬರಿಂ ದಿಸಾನಾಂತ್."
"ತುಮ್ಕಾಂ ಕಿತೆಂ ತಕ್ಲಿ ಸಮಾನಾ?" ಎಕೆಕ್ಲೊ ಎಕೇಕ್ ಥರ್ ತಾ’ತಾಂಚ್ಯಾ ತೋಂಡಾಕ್ ಆಯಿಲ್ಲೆಂ, ಮತಿಕ್ ಖಂಚ್ಲ್ಲೆ ಉಲಯ್ತಾಲೊ. ವೊತಾಚಿ ಧಾವ್ ದಡಾತ್ತ್ ವ್ಹೆತಾಲಿ. ಸಕ್ಡಾಂಚಿ ಸಾವ್ಳಿ ಸಯ್ತ್ ತಾ’ತಾಂಚ್ಯಾ ಪಾಂಯಾಂ ಪಂದಾಚ್ಚ್ ಆಸ್ಲ್ಲ್ಯಾನಿ ನಿಮ್ಮಿಕ್ ಕಾಂಯ್ಚ್ ಉಪ್ಕಾರಾಕ್ ಪಡಾನಾತ್ಲ್ಲಿಂ. ಫಕತ್ತ್ ನಿಮ್ಮಿಕ್ ಪಡ್ಚೆಂ ಥೊಡೆಂ ವಾರೆಂ ಸಯ್ತ್ ಆಡಾವ್ನ್ ರಾವ್ಲ್ಲೊ ತೊ ಜಮೊ ನಿರ್ವೊಗ್ ನಾಸ್ತಾನ್ ಕ್ರಿಸ್ಟ್ನ್ ನಿಮ್ಮಿಕ್ ಉಕಲ್ನ್ ಖಾಂದಾರ್ ಘಾಲೆಂ. ಖಂಯ್ ವೆಚೆಂ? ಸೀನಿಯೀ ತಾಚೆ ಪಾಟ್ಲ್ಯಾನ್ಂಚ್ ಉಟ್ಲಿ.
ಲೊಕಾಚೆ ಕೆಟ್ಕ್ ಶಿಂದೊನ್ ರಿಗೊನ್ ರಿಗೊನ್ ಚಲ್ತಾಲೊ ಕ್ರಿಸ್ಟ್. ಸೀನಿಯೀ ತಾಚಿ ಪಾಟ್ ಧರುಂಕ್ ದಾಂವ್ತಾಲಿ. ಸವಾಲಾಂಚೊ ಭಾಲಿಯೊ ತಿಚ್ಯಾ ತೋಂಡಾ ಥಾವ್ನ್ ಉಸಾಳ್ತೇ ಆಸ್ಲ್ಲೊ. ಲೊಕಾಚ್ಯಾ ಗುಜುಜ್ಯಾ ಮದ್ಲ್ಯಾನ್ ಕ್ರಿಸ್ಟ್ಚ್ಯಾ ಕಾನಾಂಕ್ ತ್ಯೊ ಆಪ್ಟಾತಲ್ಯೊ. ಬಾಗ್ಲಾಂಕ್ ಘಟ್ಟ್ ಫಿಚಾರ್ ಕರ್ನ್ ಥಾಲೆಂ ಮಾರ್ಲ್ಲ್ಯಾಬರಿಂ ಕ್ರಿಸ್ಟ್ಚೆ ವೊಂಟ್ ಬಂದ್ ಜಾಲ್ಲೆ. ಇಗರ್ಜ್ ಆನ್ ಕೊಪೆಲಾಂಚಾ ಆವರಣಾಂ ಥಾವ್ನ್ ಭಾಯ್ರ್ ತಿಂ ಪಾವ್ಲ್ಯಾರೀ ಲೊಕಾಚಿ ಖಟ್ ಉಣಿ ಜಾಯ್ನಾತ್ಲಿ. ಸಂಗಾತಾ ಹ್ಯಾ ರಸ್ತ್ಯಾರ್ ಮೊಟಾರಾಂಯ್ ದಾಂವ್ತಾಲಿ. ಟೂರಿಸ್ಟ್ ಬಸ್ಸಾಂ ಕಾರಾಂ, ಟೆಂಪೆ, ಆನಿ ವ್ಯಾನಾಂಚ್ ಚಡ್. ತಾಂತ್ಲ್ಯಾನ್ ರಿಗೊನ್ ರಿಗೊನ್ ಆಂಗ್ಡ್ ಶೊಪಾಚೆ ಬೋರ್ಡ್ ವಾಚುನ್ಂಚ್ ವ್ಹೆತಾಲಿಂ ತಿಂ. ಹ್ಯಾಚ್ ಗಾಂವ್ಚೊ ಕಸೊ ದಿಸ್ಚ್ಯಾ ಎಕಾ ಮ್ಹಾತಾರ್ಯಾಕ್ ರಾವವ್ನ್ ವಿಚಾರ್ಲೆ ಕ್ರಿಸ್ಟ್ನ್. "ಹಾಂಗಾ ಲಾಗಿಂ ದಾಕ್ತೆರ್ ಮೆಳಾತ್ಗೀ?"
ಮ್ಹಾತಾರ್ಯಾನ್ ಹ್ಯಾ ತೆಗಾಂಯ್ಚೆರ್ ವಯ್ರ್ ಥಾವ್ನ್ ಸಕಯ್ಲ್ ಏಕ್ ದೀಷ್ಟ್ ಚರಯ್ಲಿ. ಆಂಗವ್ಣ್ ಫಾರಿಕ್ ಕರುಂಕ್ ವಾ ಮಾಗೊಂಕ್ ಆಯಿಲ್ಲಿ ಪಯ್ಣಾರಿಂ ಖಂಡಿತ್ ಮ್ಹಣ್ ಬಗ್ಲೆಂ ಆಸ್ತಾಲೆಂ ಮ್ಹತ್ಯಾರ್ಯಾಕ್. ಭಲಾಯ್ಕೆ ಮಾತಾ ಆಸ್ತಾನಾ ದಾಕೆರ್ ಕಿತ್ಯಾಕ್ ಮ್ಹಳ್ಳೆಂ ಸವಾಲ್ ವ್ಹಡ್ಲ್ಯಾ ಅಕ್ಷಾರಾಂನಿ ದಿಸ್ತಾಲೆಂ ತಾಚ್ಯಾ ದೊಳ್ಯಾಂನಿ.
"ಭುರ್ಗೆಂ ಹುಶ್ಯಾರ್ ನಾಂಗೀ?" ವಿಚಾರ್ಲೆಂ ತಾಣೆ.
"ವ್ಹಯ್, ವೆಗಿಂ ಸಾಂಗ್ ದಾಕ್ತೆರ್ ಮೆಳಾತ್?" ಅಳೆ! ವೊ ತ್ಯಾ ರಸ್ತ್ಯಾನ್ ವ್ಹಚಾ. ಮಿಖಾರ್ ವ್ಹೆತಾನಾ ವೆಲ್ಲಂಕಣಿ ಮತೆಚೊ ಸೊಭಿತ್ತ್ ಇಮಾಜ್ ಆರ್ಶ್ಯಾ ಭಿತರ್ ದವರ್ಲೆಲಿ ದಿಸ್ತಾ. ತಿಚೆ ಮುಳಾಂತ್ ಉಜ್ವ್ಯಾಕ್ ಘುಂವ್ಲ್ಯಾರ್ ಸರ್ಕಾರಿ ಆಸ್ಪತ್ರ್ ಆಸಾ. ಥಂಯ್ಸರ್ ದಾಕ್ತೆರ್ ಮಾತ್ರ್ ಕೆದಾಳಾ ಮೆಳ್ತಾತ್ ಮ್ಹಣ್ ಸಾಂಗೊಂಕ್ ಸಾಧ್ಯ್ ನಾ. ತುಮಿ ಪ್ರವಾಸಿ ಜಾಲ್ಯಾನಿ ಮೆಳೊಂಕೀ ಪುರೊ. ಆಮಿ ಗಾಂವ್ಕಾರಾಂನಿ ಥೊಡೆ ಪಾವ್ಟಿ ವ್ಹಚೊನ್ ದಾಕ್ತೆರಾಂಕ್ ರಾಕೊನ್ ರಾಕೊನ್ ಪಿಡಾಚ್ಚ್ ಚಡ್ ಕರ್ನ್ ಘೆವ್ನ್ ಪಾಟಿ ಯೇಜಾಯ್ ಪಡ್ತಾ."
ಆನಿ ಕಿತೆಂ ಕಿತೆಂ ಉಲಯ್ತ್ ಆಸ್ಲ್ಲೊ ಮ್ಹಾತಾರೊ. ಕ್ರಿಸ್ಟ್ ಆನಿ ಸೀನಿ ನಿಮ್ಮಿಕ್ ಘೆವ್ನ್ ಪಯ್ಸ್ ಪಾವ್ಲ್ಲಿಂ. ತಾಂಚ ನಶಿಬಾನ್ ಸರ್ಕಾರಿ ಆಸ್ಪತ್ರೆಂತ್ ದಾಕ್ತೆರ್ ಆಸ್ಲ್ಲೊ. ತೊವೀ ಬರೊ ಆನಿ ಖರೊ ಮೊವಾಳ್ ದಾಕ್ತೆರ್ ತೊ.
"ಭುರ್ಗೆಂ ಮತ್ ಚುಕೊನ್ ಪಡ್ತಾಲೆಂಗೀ? ತಾಕಾ ತಕ್ಲಿ ಫಡಾಫಡ್ ಆಸ್ಲ್ಲಿಗೀ? ಆಂಗ್ ವೊಳಾವ್ನ್ ದುಖ್ತಾ ಮ್ಹಣ್ತಾಲೆಂಗೀ? ಕಿತ್ಲೊ ತೇಂಪ್ ಥಾವ್ನ್?" ಆನಿಕೀ ಧಾರಾಳ್ ಲೇಖ್ ಮೀತ್ ನಾತ್ಲ್ಲ್ಯಾ ಸವಲಾಂ ಬರಾಬರ್ ನಿಮ್ಮಿಚಿ ಪರೀಕ್ಷಾ ಚಲ್ತಾಲಿ. ರಗತ್ ಪ ಪರೀಕ್ಷಾ, ಸ್ಕ್ಯಾನಿಂಗ್ ಅನಿ ಕಿತೆಂ ಕಿತೆಂ ಪೂರಾ ಚಿಕಿತ್ಸಾ ಚಲ್ಲ್ಯೊ. ಪಿಡೆಸ್ತಾಕ್ ರಗ್ತಾಚಿ ಗರ್ಜ್ ಆಸ್ಲ್ಲಿ. ಬಾಪುಯ್ಚ್ ರಗಾತ್ ದಿಂವ್ಕ್ ವೊಪ್ಲೊ. ಪುಣ್ ತಿ ಚಿಕಿತ್ಸಾ ಹ್ಯಾ ಆಸ್ಪೆತ್ರೆಂತ್ ಸಾಧ್ಯ್ ನಾತ್ಲ್ಲಿ. ನಿಮ್ಮಿಚೆಂ ರಗಾತ್ ಬದ್ಲುಂಕ್ ಆಸ್ಲ್ಲೆಂ.
ನಿಮ್ಮಿಚೊ ಗಾಂವ್ ಮೆಡ್ರಾಸ್ ಥಾವ್ನ್ ಪನ್ನಾಸ್ ಪಯ್ಸ್. ಆನಿಂ ಆತಾಂ ತಿಂ ಮೆಡ್ರಾಸ್ ಥಾವ್ನ್ ಅಡೆಶಿಂ ಮಯ್ಲಾಂ ಪಯ್ಸ್ ಆಸ್ಲ್ಲಿಂ ದಾಕ್ತೆರಾಚಾ ಸೂಚನಾ ಪ್ರಕಾರ್ ತಾಣಿ ಮೆಡ್ರಾಸ್ ವ್ಹೆಚೆ ಬರೆಂ ಆಸ್ಲ್ಲೆಂ ಪುಣ್ ಬಸ್ಸಾಚೆಂ ಪಯ್ಣ್ ಅಪಾಯಾಚೆಂ. ಪಿಡಾ ಅಖ್ರೇಚಾ ಮೆಟಾರ್ ಪಾವ್ಲ್ಲಿ. ಪಿಡಾ ಆನಿ ಪರಿಸ್ಥಿತೆ ವಿಶಿಂ ಏಕ್ ರಿಪೊರ್ಟ್ ಬರವ್ನ್ ದಾಕ್ತೆರಾನ್ ಕ್ರಿಸ್ಟ್ಲಾಗಿಂ ದಿಲೊ. ತೊ ಸಗ್ಳೊ ದೀಸ್ ಆನಿ ರಾತ್ ತಾಣಿ ತಾಪಾಸ್ಣೆ ಖಾತಿರ್ ಆಸ್ಪತ್ರೆಂತ್ ಖರ್ಚಿಲ್ಲೊ. ದಾಕ್ತೆರಾಕ್ ನಿಮ್ಮಿ ಮೆಡ್ರಾಸ್ ಪಾವಾತ್ ಮ್ಹಳ್ಳೆಂ ಧಯ್ರ್ ನಾತ್ಲ್ಲೆಂ ಪಾವ್ಲ್ಯಾರೀ ಅವಯ್-ಬಾಪಯ್ಚೆ ತ್ರಪ್ತೆ ಖಾತಿರ್ ಮಾತ್ರ್ ಥೊಡೊ ದುಡು ಖರ್ಚಿಜಾಯ್ ಶಿವಾಯ್ ಚಲಿ ವಾಂಚನ್ ಮ್ಹಳ್ಳಿ ಖಾತ್ರಿ ಜಾಲ್ಲಿ ತಾಕಾ.
"ಭ್ಹುರ್ಗ್ಯಾಕ್ ಘೆವ್ನ್ ಪಯ್ಲೆಂ ತುಮ್ಚಾ ಘರಾ ವ್ಹಚಾ. ಆನಿ ಮಾಲ್ಗಡ್ಯಾಂಕ್ ಘೆವ್ನ್ ಆಸ್ಪತ್ರೆಕ್ ವ್ಹಚಾ" ಮ್ಹಣಾಲೊ ದಾಕ್ತೆರ್ ಕ್ರಿಸ್ಟ್ಚಾ ಕಾನಾಂತ್. ಆನಿ ಆಪ್ಣಾಲಾಗಿಂ ಸೆಂಪಾಲಾ ಖಾತಿರ್ ಆಯಿಲ್ಲಿಂ ಥೊಡಿಂ ವಕ್ತಾ ದಿಲಿಂ ಸೀನಿಕ್ ಆಂಗವ್ಣ್ ಫಾರಿಕ್ ಕರಿನಾಸ್ತಾನಾ ಪಾಟಿಂ ವ್ಹಚೊಂಕ್ ಕಿಂಚಿತ್ ಮನ್ ನಾತ್ಲ್ಲೆಂ. ವಕ್ತಂಚ ಪ್ರಭಾವಾನ್ ನಿಮ್ಮಿ ಜಾಗೆವ್ನ್ ಫುಲೊನ್ ಯೇಂವ್ಕ್ ಲಾಗ್ತಾನ... ಸೀನಿನ್ ಪುರ್ಪುರೊಂಕ್ ಸುರ್ ಕೆಲ್ಲೆಂ.
"ಸಾಯ್ಬಿಣಿಕ್ ರಾಗ್ ಯೆತಾ. ಆಮಿ ಚೂಕ್ ಕೆಲ್ಯಾ." ಸಭಾರ್ ಸಭಾರ್ ದುಭಾವಾಚೆ ಕರ್ಕರೆ ತೆ. ತಾಚೆ ಸಾಂಗಾತಾ ಆದ್ಲ್ಯಾ ವರ್ಸಾ ಅಂಗವ್ಣೆ ಖಾತಿರ್ ಆಯಿಲ್ಲ್ಯಾ ನವ್ಯಾ ನವ್ಯಾ ನಗಾಂಕ್ ಪಳೆಂವ್ಚೊ ಅಬ್ಲೆಸ್ಯಿ ನಿಶೆತಾಲೊ ತಿಚ್ಯೆ ಮತಿಂತ್. ಸಗ್ಳೊ ಚುಕಿ ನಿಮ್ಮಿಚ್ಯೊಚ್ ದಿಸ್ತಾಲ್ಯೊ ತಿಕಾ. ತೆಂ ನೆಂಟೆಂ ಮ್ಹಳ್ಳೆಂ ತಿಕಾ ಭೊಗಾಚ್ಚ್ ನಾತ್ಲ್ಲೆ. ಹ್ಯಾ ಚೆಡ್ವಾಕ್ ಅಶೆಂ ಕಿತ್ಯಾ? ತಶೆಂ ಕಿತ್ಯಾ? ಜವಾಬಿ ಲಾಭಾನಾತ್ಲ್ಲಿಂ ಸವಾಲಾಂ.
"ಮಾಂಯ್" ಮ್ಹಣ್ ನಿಮ್ಮಿ ಪಿಂರ್ಗಾತಾನಾ ಚಿಂತ್ನಾ ಧಾಡಿಂತ್ಲಿ ಸೀನಿ ಉಡೊನ್ ಪಡ್ಲಿ. ತರೀ ಜಾಪ್ ದೀಂವ್ಕ್ ತಿಚೆ ವೋಂಟ್ ಉಸಾಲೆ ನಾಂತ್. ಬಾಪುಯ್ಚ್ಚ್ "ಕಿತೆಂ ಪುತಾ" ಮ್ಹಣಾಲೊ. ಕಾರ್ ನಿಯಂತ್ರಣ್ ಚುಕ್ಲ್ಲೆಬರಿ ಧಾಂವ್ತಾಲೆ.
"ಆತಾಂ ಬೊರೆಂ ಜಾಲೆಂಯ್ಗೀ ನಿಮ್ಮಿ ತುಂ? ಆಮ್ಕಾ ಕಷ್ಟಾಂಕ್ ಘಾಲೆಂಯ್ ತುಂವೆ. ಹಿ ಪೂರಾ ದೆಂವ್ಚಾರಾಚಿ ಕಾಮಾಂ. ಆನಿಂ ದೆಂವ್ಚಾರಾಚ್ಯೊ ನಾಡಿ. ತುಕಾ ಮಾತೆಕ್ ಭಾಸಾಯಿಲ್ಲಿ ಆಂಗವ್ಣ್ ಫಾರಿಕ್ ಕರುಂಕ್ ನಾಕಾ, ದೆಕುನ್ ಹ್ಯೊ ಪೂರಾ ನಾಡ್." ಸೀನಿ ಪುರ್ಪುರಾತ್ತ್ ಆಸ್ಲ್ಲಿ.
"ತೋಂಡ್ ಧಾಂಪ್."
ಕ್ರಿಸ್ಟ್ಚ್ಯಾ ದೆಂಖ್ಣ್ಯಾಕ್ ಡ್ರೈವರ್ಯೀ ಉಡೊನ್ ಪಡ್ಲೊ. ತುಕಾ ಮನ್ಶಾಚೊ ಜೀವ್, ತುಜೆಂ ಬಾಳ್ ವ್ಹರ್ತೆಂ ನ್ಹಯ್. ಆಂಗವ್ಣ್ ವ್ಹರ್ತಿ. ಆನಿ ಮುಖಾರ್ ಆಂಗವ್ಣೆಂವಿಶಿಂ ಏಕ್ಚ್ಚ್ ಸಬ್ದ್ ತುಜ್ಯಾ ತೋಂಡಾತ್ಲ್ಯಾನ್ ಆಯಿಲ್ಲೊ ನಾಕಾ ಮ್ಹಾಕಾ."
ನಿಮ್ಮಿಚಾ ದೊಳ್ಯಾಂನಿ ದು:ಖಾಂ ಭರೊನ್ ವೊಮ್ತಾತಾಲಿಂ. ತಿಂ ಉದ್ಕಾಚಿಂ ನ್ಹಯ್ ಬಗಾರ್ ರಗ್ತಾಚಿಂ ತಶಿ ದಿಸ್ಲಿಂ ಕ್ರಿಸ್ಟ್ಕ್. ವ್ಹಯ್, ನಿಮ್ಮಿಚೆ ತೋಂಡ್ ತಾಂಬ್ಶ್ಯಾ ವರ್ಣಾಕ್ ಬದ್ಲೊನ್ ಯೆತಾಲೆಂ. ಕ್ರಿಸ್ಟ್ ಕಾಂಪ್ತಾಲೊ. ತರೀ "ಕಾರ್ ರಾವಯ್" ಏಕ್ ಧೆಂಖ್ಣೊ ಮಾರ್ಲೊ ತಾಣೆ.
ಕಾರ್ ಮಾರ್ಗಾ ದೆಗೆರ್ ಆಸ್ಲ್ಲ್ಯಾ ಎಕ ಫೊಂಡಾಂತ್ಲ್ಯಾನ್ ಧಾಂವೊನ್ ಗರ್ರ್ರ್ರ್ ಕರ್ನ್ ಥಾಂಬ್ತಾನಾ ಕಾರಾ ಭಿತರ್ಲ್ಯಾ ಮನ್ಶಾಂಕ್ ವಯ್ರ್ ಕಾಡ್ನ್ ಉಡಯಿಲ್ಲ್ಯಾಬರಿ ಜಾಲೆಂ. ಕ್ರಿಸ್ಟ್ನ್ ನಿಮ್ಮಿಕ್ ಆರಾವ್ನ್ ಆಪ್ಲ್ಯಾ ಹರ್ದ್ಯಾಕ್ ಭೊವ್ ಚಡ್ ಲಾಗಿಂ ಧಾಂಬುನ್ ಧರ್ಲೆಂ.
"ತುಜೆ ಖಾತಿರ್ ಹಾಂವ್ ಕಿತೆಂಯ್ ಕರುಂಕ್ ತಯಾರ್ ಬಾಳಾ. ಮೊಜ್ಯೆ ಕುಡಿಂತ್ಲೆ ಪೂರಾ ರಗಾತ್ ಜಾಲ್ಯಾರೀ ಹಾಂವ್ ತುಕಾ ದಿತಾಂ."
ತೊ ಕಿತೆಂಗೀ ಉಲೊವ್ನ್ಂಚ್ ವ್ಹೆತಾಲೊ. ಆಪ್ಲ್ಯಾ ಹರ್ದ್ಯಾರ್ ಹುನೊನಿ ದ್ರವ್ಯ್ ವೊಮ್ತೊನ್ ದೆಂವೊನ್ ವ್ಹೆಚೊ, ಅನುಭವ್ ಜಾತಾನಾ ತಾಣಿ ನಿಮ್ಮಿಕ್ ಪಾಟಿಂ ಕಾಡ್ಲೆಂ. ನಿಮ್ಮಿಚ್ಯಾ ನಾಕಾಂತ್ಲ್ಯಾನ್ ರಗ್ತಾಚಿ ಬಾರೀಕ್ ಝರ್ ದೆಂವ್ತಾಲಿ. ಪುಲೊನ್ ಪರ್ಮಳ್ಚ್ಯ ಎಕಾ ಹಗುರ್ ಫುಲಾಬರಿ ನಿಮ್ಮಿಕ್ ತಾಣೆ ಉಸ್ಕ್ಯಾರ್ ನಿದಾಯ್ಲೆಂ. ವೆಲ್ಲಂಕಣಿ ಮಾತೆಕ್ ಹಾಕ್ ಮಾರುನ್ ರಡ್ತಾಲಿ ಸೀನಿ. ಕಾರಾಚಾ ಡ್ರೈವರಾಕ್ ಕಿತೆಂಗೀ ಅನಾಹುತ್ ಘಡ್ತೇ ಆಸಾ ಮ್ಹಣ್ ಕಳಿತ್ ಜಾಲ್ಲೆಂ. ರಸ್ತ್ಯಾಚ್ಯಾ ದೊನೀ ದೆಗಾಂನಿ ಫಕತ್ತ್ ರಾನ್ ನಿದ್ಲ್ಲೆಂ.
"ದೋನ್ ಮಯ್ಲಾಂ ಮುಕಾರ್ ಆಮ್ಕಾಂ ದಾಕ್ತೆರ್ ಮೆಳೊಂಕ್ ಪುರೊ. ಹಾಂವ್ ಕಾರ್ ಧಾಂವ್ಡಾಯ್ತಾ." ಮ್ಹಣಾಲೊ ಡ್ರಾಯ್ವರ್.
"ನಾಕಾ" ಮ್ಹಣಾಲೊ ಕ್ರಿಸ್ಟ್ ರಡೊನ್ಂಚ್ಚ್. " ಹ್ಯಾ ವೆಳಾರ್ ಮೊಜಾ ಬಾಳಾಕ್ ಧೊಸ್ಚೆಂ ನಾಕಾ."
ನಿಮ್ಮಿಚ್ಯಾ ವೊಂಟಾಂ ಇಡ್ಯಾಂನಿಂಯೀ ರಗ್ತಾ ಝರಿ ದೆಂವೊಂಕ್ ಆರಂಭ್ ಜಾಲ್ಲ್ಯೊ. ತೆಂ ಏಕ್ ಪಾವ್ಟಿ ಬಾಪಾಯ್ಚಾ ಆನ್ಯೆಕ್ ಪಾವ್ಟಿ ಆವಯ್ಚಾ ಮುಖಮಳಾಕ್ ಪಳೆವ್ನ್ ಅಸಹಾಯಕ್ ಹಾಸೊ ಫಾಂಕಂವ್ಕ್ ಪ್ರಯತನ್ ಕರಿಲಾಗ್ಲೆಂ ಉಪ್ರಾಂತ್ ದೊಳ್ಯಾಂ ಬಿತರ್ಲೆ ಕಾಳಿಂ ವರ್ತುಲಾಂ ಸ್ಥಬ್ದ್ ಜಾಲಿಂ. ನಿಮ್ಮಿಚಿ ಗೊಮ್ಟಿ ಕುಶಿಕ್ ವೊಳಾಲಿ.
About us | Feedback | Contact us
Copyright ©
2005 DAAIZ.COM All rights reserved.
Page concept, designed and maintained by Ashawadi Publications
