ಡೈರಿ
ಮೊಟ್ವಿ ಕಥಾ ವಾಚ್ಪ್ಯಾಚ್ಯಾ ಮತಿಂತ್ ಕಶಿ ಸದಾಂಕಾಳ್ ಧೊಸುನ್ ಆಸ್ತಾ ಮ್ಹಣ್ತಾಸ್ತಾಂ, ಮ್ಹಜ್ಯಾ ಸಾಹಿತ್ಯಿಕ್ ಸುರ್ವಾತೆರ್ ಹಾಂವೆಂ ವಾಚುನ್ ಆಯಿಲ್ಲ್ಯೊ ಕಾಂಯ್ ಕಥಾ ಯಾದಿಂತ್ ಯೆತಾತ್. ಮುನ್ಶಿ ಪ್ರೇಮ್‌ಚಂದಾಚ್ಯೊ, ಶರತ್‌ಚಂದ್ರ ಚಟ್ಟೊಪಾಧ್ಯಾಯಚ್ಯೊ, ಸಾದತ್ ಹಾಸನ್ ಮಾಂಟೊಚ್ಯೊ, ಒ ಹೆನ್ರೊಚ್ಯೊ ಆನಿ ಹೆರ್ ಥೊಡ್ಯಾಂಚ್ಯೊ ಕಥಾ..., ಪುಣ್ ಕೊಂಕಣಿಚ್ಯಾ ಸಂಧರ್ಭಾರ್ ಸಯ್ತ್ ಥೊಡ್ಯೊ ಕಥಾ ಮ್ಹಜ್ಯಾ ಯಾದಿಂತ್ ಆಸಾತ್ ಆನಿ ತ್ಯೊ ತವಳ್ ತವಳ್ ಧೊಸುನ್ ಆಸ್ತಾತ್.
ಮೊಟ್ವಿ ಕಥಾ ಎಕಾ ವಾಚ್ಪ್ಯಾಚ್ಯಾ ಮತಿಂತ್ ಪರತ್ ಪರತ್ ಧೊಸ್ತಾ ತರ್, ತಿ ತ್ಯಾ ಕಥೆಚಿ ತಾಂಕ್ ಮ್ಹಣುನ್ ಹಾಂವ್ ಲೆಕ್ತಾಂ. ದೆಕುನ್ ಅಜೀನ್ ಪಾಂತೀಸ್ ವರ್ಸಾಂ’ಧಿಂ ಹಾಂವೆಂ ವಾಚ್ಲಲಿ ಯಶವಂತ ಚಿತ್ತಾಲಾಚಿ ’ಪಯಣ’ ಕಥಾ, ಕೆದ್ನಾಂಯ್ ಹಾಂವ್ ಪಯ್ಣಾರ್ ಆಸ್ತಾನಾ, ವಾ ಹೊಟೆಲಾಂತ್ ರಾವ್ತಾನಾ ಧೊಸ್ತಾ. ವಿಲ್ಫಿ ರೆಬಿಂಬಸಾಚಿ ’ಪಿಂತ್ರಾಂ’ ಕಥಾ, ಎಡ್ವಿನ್ ಜೆ. ಎಫ್. ಡಿಸೊಜಾಚಿ ’ಕಾಗ್ದಾಚಿ ಸ್ತ್ರೀ’, ಹೆರೊಲ್ಪಿಯುಸಾಚ್ಯೊ ಥೊಡ್ಯೊ ಕಥಾ, ಸಿರಿವಂತ್, ಜೆಮಿ ಬರೊಕ್ಕಾಸ್... ಉಡಾಸ್ ಕಾಡುಂಕ್ ಗೆಲ್ಯಾರ್ ಅಸಲ್ಯೊ ಜಾಯ್ತ್ಯೊ ಕಥಾ ಮತಿಂತ್ ಉದೆತಾತ್. ಸದ್ದ್ಯಾಕ್ ಮ್ಹಾಕಾ ಏಕ್ ವಾಚ್ಪಿ ಜಾವ್ನ್ ಆವಡ್ಲೆಲಿ ಕಥಾ ಜಾವ್ನಾಸಾ ’ಡೈರಿ’, ಸುನಂದ್ ಲಿಖ್ಣೆನಾಂವಾರ್ ಕಥಾ ಬರಂವ್ಚೊ ನಾಮ್ನೆಚೊ ’ಜ್ಯೊ ಡಿಮೆಲ್ಲೊನ್ ಬರಯಿಲ್ಲಿ ಹಿ ಕಥಾ ’ಸೆವಕ್’ ನೆಮಾಳ್ಯಾಚೆರ್ ಫಾಯ್ಸ್ ಜಾಲ್ಲಿ ಹಾಂಗಾಸರ್ ದಿಲ್ಯಾ. ಹಿ ಕಥಾ ವಾಚುನ್ ಹ್ಯಾ ಕಥೆಕ್ ಆಪ್ಣಾಂವ್ಕ್ ತುಮ್ಕಾಂ ಉಲೊ ದಿತಾಂ. ಕಥೆಚೆರ್ ತುಮ್ಚಿ ಅಭಿಪ್ರಾಯ್ ದಿಂವ್ಕ್ ವಿಸರ್ನಾಕಾತ್.
ಡೈರಿ
ರಾಯನಾಕ್‌ ಆಸ್‌ಲ್ಲೆ ತಸಲೆಂ ಉಗ್ಡಾಸಾಚ್ಯೆಂ ದೆಣೆಂ, ತಾಚ್ಯಾ ಭಂವ್ತಿಂ ಕಾಮ್‌ ಕರ್ಚ್ಯಾ ಸಬಾರಾಂಕ್‌ ನಾತ್‌ಲ್ಲೆಂ ಮ್ಹಣ್ಚಿ ಗಜಾಲ್‌ ಕಾಂಯ್ ಅತಿಶಯ್‌ ನ್ಹಯ್.
ವೃತ್ತೆನ್‌ ಎಕೌಂಟೆಂಟ್‌ ಜಾವ್ನಾಸ್‌ಲ್ಲ್ಯಾ ತಾಚ್ಯಾ ಮತಿಂತ್, ಅಂಕೆ-ಸಂಖೆ, ತಾರಿಕೊ, ನಾಂವಾಂ ಇತ್ಯಾದಿ ಸಂಗ್ತಿ, ಕಂಪ್ಯೂಟರಾ ಬರಿ ಖಂಚೊನ್‌ ಉರ್ತಾಲ್ಯೊ. ದಫ್ತರಾಂತ್ಲ್ಯಾಂಚೊ ಜಲ್ಮಾದೀಸ್‌ ಮಾತ್ರ್‌ ನ್ಹಯ್, ತಾಂಚ್ಯಾ ಕಾಜಾರಾಚೊ ದೀಸ್ ಸಯ್ತ್ ತಾಕಾ ಉಗ್ಡಾಸಾಂತ್‌ ಆಸ್ತಾಲೊ ಮ್ಹಣ್ತನಾ, ಸಾಂಗಾತಿ ಕಾಮೆಲ್ಯಾಂನಿ ತಾಚ್ಯಾ ಶಾತಿಯೆಕ್‌ ಪಳೆವ್ನ್‌ ಶೆರ್ಮೆಲ್ಲ್ಯಾಂತ್‌ ನವಾಲ್‌ ನಾತ್‌ಲ್ಲೆಂ.
ಪುಣ್ ಏಕ್ ದೀಸ್ ತಾಚ್ಯಾ ಪತಿಣೆನ್‌, ಲಿನಾನ್, ತಾಕಾ ದಾಕ್ತೆರಾಲಾಗಿಂ ಯಾ ಮ್ಹಣ್ತನಾ, ರಾಯನಾಕ್‌ ಖರಿಚ್‌ ಘುಸ್ಪಡ್‌ ಜಾಲ್ಲಿ. ದಾಕ್ತೆರಾಲಾಗಿಂ ಕಸಲೆಂಯ್‌ ಎಪೊಂಯ್ಟ್‌ಮೆಂಟ್‌ ಕೆಲ್ಲೊ ತಾಕಾ ಉಗ್ಡಾಸ್ ಆಯ್ಲೊನಾ.
"ದಾಕ್ತೆರಾಲಾಗಿಂ? ಕಿತ್ಯಾಕ್? ತುಂ ಹುಷಾರ್‌ ನಾಂಯ್‌ ಪುಣಿ?" ತಾಣೆ ವಿಚಾರ್‌ಲ್ಲೆಂ, ಆಕಾಂತೊನ್.
"ರಾಯನ್," ಲಿನಾ ಮ್ಹಣಾಲಿ ಆನಿ ತ್ಯಾ ಬರಾಬರ್‌ ತಿಚ್ಯಾ ದೊಳ್ಯಾಂನಿ ಖಂತಿಚಿ ಸಾಯ್‌ ದಿಸ್ಲಿ ತಾಕಾ. "ತುಕಾ ಕಶೆಂ ಸಾಂಗ್ಚೆಂ ಮ್ಹಳ್ಳೆಂ ಸಮ್ಜೊಂಕ್‌ ನಾ ಮ್ಹಾಕಾ. ಆಜ್-ಕಾಲ್‌ ತುಜೊ ಉಗ್ಡಾಸ್ ಚಿಕ್ಕೆ ಉಣೊ ಜಾಲಾ..."
"ಉಗ್ಡಾಸ್ ಉಣೊ ಜಾಲಾ?" ತೊ ಕುತ್ತ್‌ ಕರುನ್‌ ಹಾಸ್ಲೊ. "ಲಿನಾ ಡಾರ್ಲಿಂಗ್‌, ತುಂ ಮ್ಹಣ್ತಾಯ್‌ ತರೀ ಕಿತೆಂ?"
"ಪೋಯ್ರ್‌ ಮ್ಹಜೊ ಬರ್ಥ್‌ಡೇ ತುಂ ವಿಸ್ರಾಲೊಯ್. ತೆಂ ಆಮಿ ಕಾಜಾರ್‌ ಜಾಲ್ಲ್ಯಾಕ್‌ ಪಯ್ಲೆ ಪಾವ್ಟಿಂ ಘಡ್ಚ್ಯೆಂ. ಆಸೊಂ ತಿ ಕಾಂಯ್ ವ್ಹಡ್ಲಿ ಗಜಾಲ್‌ ನ್ಹಯ್, ಪುಣ್ ಆದ್ಲ್ಯಾ ಮ್ಹಯ್ನ್ಯಾಂತ್‌ ಇನ್‌ಕಮ್‌ ಟ್ಯಾಕ್ಸ್‌ ಒಫಿಸಾ ಥಾವ್ನ್‌ ಲೆಟರ್‌ ಆಯಿಲ್ಲೆಂ - ತುಂವೆಂ ಟ್ಯಾಕ್ಸ್‌ ಫಾರಿಕ್‌ ಕರುಂಕ್‌ ನಾಂಯ್‌ ಮ್ಹಣೊನ್. ಎದೊಳ್‌ ತುಕಾ ತಶೆಂ ಜಾಲ್ಲೆಂ ನಾ. ತ್ಯಾ ಉಪ್ರಾಂತ್‌, ದಫ್ತರಾಚ್ಯೆಂ ʼಝೂಮ್‌ ಮೀಟಿಂಗ್‌ʼ ವಿಸ್ರಾಲೊಯ್ ತುಂ ಮ್ಹಣೊನ್ ತಾಣಿಂ ಮೊಬಾಯ್ಲಾರ್‌ ತುಕಾ ಕೋಲ್‌ ಕೆಲ್ಲೆಂ. ತಿತ್ಲೆಂಚ್‌ ನ್ಹಯ್, ಆದ್ಲ್ಯಾ ಹಪ್ತ್ಯಾಂತ್‌ ಇಗರ್ಜೆಕ್‌ ವೆಚೊ ಸಯ್ತ್ ಉಗ್ಡಾಸ್ ನಾತ್‌ಲ್ಲೊ ತುಕಾ..."
"ಛೆ-ಛೆ, ತಿತ್ಲ್ಯಾ ಚಿಲ್ಲರ್‌ ಕಾರಣಾಂಕ್‌ ದಾಕ್ತೆರಾಲಾಗಿಂ ವೆಚೆಂವೇ ತರ್? ಥೊಡಿ ಚುಕಾಮುಕ್ ಕೊಣಾಕ್‌ ಜಾಯ್ನಾ? ತುಂ ಘಡ್ಬಡ್ನಾಕಾ, ದಫ್ತರಾಂತ್‌ ಇಲ್ಲಿ ರಾಟಾವಳ್‌ ಚಡ್‌ ಜಾಲ್ಯಾ, ತಿತ್ಲೆಂಚ್‌," ರಾಯನ್ ಪರತ್ ಹಾಸ್ಲೊ, ತಿಚೊ ಹುಸ್ಕೊ ಬಗ್ಲ್ಯೆಕ್‌ ವೊಂದಾವ್ನ್.
"ರಾಯನ್, ಹಿ ಫಕತ್‌ ಮ್ಹಜಿ ಅಭಿಪ್ರಾಯ್ ನ್ಹಯ್, ತುಜ್ಯಾ ಬೊಸಾನ್‌ಯೀ ತುಕಾ ಕಾಮಾಲಾಗಿಂ ಸಂಗ್ತಿ ವಿಸ್ರೊಂಕ್‌ಲಾಗ್ಲ್ಯಾತ್‌ ಮ್ಹಳಾಂ ಆನಿ ದಾಕ್ತೆರಾಲಾಗಿಂ ವೆಚೆಂ ಬರೆಂ ಮ್ಹಣ್‌ ಏಕ್ ಸಲಹಾ ದಿಲ್ಯಾ. ಹಾಂವೆಂ ದಾಕ್ತೆರಾಲಾಗಿಂ ಎಪೊಂಯ್ಟ್‌ಮೆಂಟ್‌ ಕೆಲಾಂ, ಖಂಡಿತ್‌ ವಚಾಜೆಚ್ಚ್‌," ತಿಣೆ ಹಟ್‌ ಧರ್ಲೆಂ. ತ್ಯಾ ಹಟಾಕ್‌ ಲಾಗುನ್‌, ಮನ್‌ ನಾತ್‌ಲ್ಲ್ಯಾ ಮನಾನ್‌, ರಾಯನ್ ದಾಕ್ತೆರಾಲಾಗಿಂ ಪಾವ್‌ಲ್ಲೊ.
ತಾಂಚ್ಯಾ ದಾಕ್ತೆರಾನ್ ಥೊಡ್ಯೊ ತಪಾಸ್ಣ್ಯೊ ಕರವ್ನ್‌, ಎಕಾ ಹಪ್ತ್ಯಾನ್‌ ತಾಕಾ ಪಾಟಿಂ ಆಪಯ್ಲೊ.
"ಮ್ಹಾಕಾ ಮಾಫ್‌ ಕರ್, ಮಿಸ್ಟರ್‌ ಡಿʼ ಕೋಸ್ತಾ, ಖಬರ್‌ ತಿತ್ಲಿ ಬರಿ ನಾ," ದಾಕ್ತೆರ್‌ ಮ್ಹಣಾಲೊ, ಕಪಲಾರ್‌ ಮಿರಿಯ್ಯೊ ಘಾಲುನ್.
"ಖಬರ್‌ ಕಿತೆಂ ತಿ ಸಾಂಗ್, ಡೊಕ್ಟರ್‌," ರಾಯನಾನ್ ಹಾಸೊನ್ ಮ್ಹಳೆಂ ತರೀ, ಲಿನಾಚ್ಯಾ ತೊಂಡಾವಯ್ಲಿ ಗಂಭೀರಾಯ್‌ ಪಳೆವ್ನ್‌, ತಾಚ್ಯೊ ಹಾಸೊ ಮಾಜ್ವಾಲ್ಯೊ ಆನಿ ದೊಳ್ಯಾ ಬೊಂವಾರ‍್ಯೊ ವಯ್ರ್‌ ಗೆಲ್ಯೊ.
"ತುಜ್ಯೆ ಥಂಯ್‌ ಡಿಮೆಂಚ್ಯಾಚಿಂ (Dementia) ಖುಣಾಂ ದಿಸೊನ್‌ ಯೆತಾತ್, ಮಿಸ್ಟರ್‌ ಕೋಸ್ತಾ," ದಾಕ್ತೆರ್‌ ಮ್ಹಣಾಲೊ, ಮೊವಾಳ್‌ ಉತ್ರಾಂನಿ. ತ್ಯಾ ಬರಾಬರ್‌ ತಾಣೆ ಆಪ್ಲೆ ಕೊಂಪೊರ್‌ ಮೆಜಾಚ್ಯೆರ್‌ ತೆಂಕ್ಲೆ. "ಹ್ಯಾ ಪಿಡೆಚಿ ವಾಡಾವಳ್‌ ಜಾತಾಂ-ಜಾತಾನಾ, ತುಕಾ ಉಗ್ಡಾಸ್ ದವರ್ಚ್ಯೆಂ ಕಷ್ಟಾಂಚೆಂ ಜಾತೆಲೆಂ. ಹಿ ಏಕ್ ಗಂಭೀರ್‌ ಸಂಗತ್‌ ಜಾಲ್ಲ್ಯಾನ್, ತುಂವೆಂ ಮ್ಹಜ್ಯಾ ಉತ್ರಾಂಕ್‌ ಮಾತ್ರ್‌ ಪಾತ್ಯೆಂವ್ಚ್ಯೆಂ ನ್ಹಯ್, ಖಂಚೆಂಯ್‌ ಸಾರ್ಕೆಂ ವರವ್ನ್‌ ಪಳೆಂವ್ಕ್‌ ಎಕಾ ನ್ಯೂರೊಲೊಜಿಸ್ಟಾಕ್‌ (Neurologist) ಭೆಟ್‌ ದಿಂವ್ಚಿ ಬರಿ."
** ** **
ನ್ಯೂರೊಲೊಜಿಸ್ಟಾಚ್ಯಾ ಭೆಟೆಂತ್‌, ಚಡಿತ್‌ ಗುಂಡಾಯೆನ್‌ ತಾಚಿ ತಪಾಸಣ್‌ ಚಲ್ಲಿ ತರೀ, ಫಲಿತಾಂಶ್ ಮಾತ್ರ್‌ ತೆಂಚ್‌ ಆಯ್ಲೆಂ.
"ಮಿಸ್ಟರ್‌, ಡಿʼ ಕೋಸ್ತಾ," ಸ್ಪೆಶಲಿಸ್ಟ್‌ ದಾಕ್ತೆರ್‌ ಮ್ಹಣಾಲೊ, ಆಪ್ಲಿ ಅಭಿಪ್ರಾಯ್ ದೀವ್ನ್. "ವ್ಹಯ್‌, ತುಜ್ಯಾ ದಾಕ್ತೆರಾನ್ ಸಾಂಗ್‌ಲ್ಲಿ ಸಂಗತ್‌ ಸಾರ್ಕಿ. ತುಕಾ ಡಿಮೆಂಚ್ಯಾ ಸುರು ಜಾಲ್ಯಾ. ಹ್ಯಾ ಪಿಡೆಕ್‌ ಒಕತ್‌ ನಾ ಮ್ಹಣ್ಚಿ ಸಂಗತ್‌ ಬೆಜಾರಾಯೆಚಿ ತರೀ, ತುಂವೆಂ ಹ್ಯಾ ಉಪ್ರಾಂತ್‌ ಎಕಾ ಡೈರಿಂತ್‌ ಸಧಾಂಚ್ಯೊ ಸಂಗ್ತಿ ಬರವ್ನ್‌ ದವರ್ಚಿ ಸವಯ್‌ ಕೆಲ್ಯಾರ್‌, ಗರ್ಜೆಕ್‌ ಕೊಣಾಯ್‌ಲಾಗಿಂ ವಿಚಾರ್ಚ್ಯೆ ಬಾಂದ್ಪಾಸ್‌ ನಿವಾರ‍್ಯೆತ್. ಐ ಎಮ್‌ ಸೊರ್ರಿ, ಪಾಡ್‌ ಖಬರ್‌ ದೀಂವ್ಕ್‌ ಬೆಜಾರ್‌ ಜಾತಾ ತರೀ, ಗಜಾಲ್‌ ಆಸಾತಶಿ ಸಾಂಗ್ಚ್ಯೆಂ ಕಾಮ್‌ ಕೊಣೆ ಪುಣಿ ಕರಿಜೆಚ್‌ ನ್ಹಯ್?"
ರಾಯನಾಕ್‌ ಎದೊಳೀ ಡಿಮೆಂಚ್ಯಾಚೊ ಪ್ರಭಾವ್‌ ಅರ್ಥ್‌ ಜಾಂವ್ಕ್‌ ನಾತ್‌ಲ್ಲೊ ಜಾಲ್ಲ್ಯಾನ್, ತೊ ಹಾಸ್ಲೊ. ʼಸಂಗ್ತಿ ಬರವ್ನ್‌ ದವರ್ಚ್ಯೊ?ʼ ತೊ ಕಂಪ್ಯೂಟರಾರ್‌ ಅಂಕೆ-ಸಂಖೆ ಬರಂವ್ಚೊ ಮನಿಸ್. ಸಾಧ್ಯಾ ಜಿಣಿಯೆಂತ್ಲ್ಯೊ ಸಂಗ್ತಿ ಬರವ್ನ್‌ ದವರ್ಚಿ ಗರ್ಜ್‌ ಎದೊಳ್‌ ಪಡೊಂಕ್‌ ನಾತ್‌ಲ್ಲಿ ತಾಕಾ. ಪುಣ್ ದಾಕ್ತೆರ್‌ ಆನಿ ಲಿನಾಚಿಂ ಸಾವ್ಳೆಲ್ಲಿಂ ತೊಂಡಾಂ ಪಳೆವ್ನ್‌, ತಾಚ್ಯಾ ಹಾಸ್ಯಾಂಕ್‌ ಖಾಡುಂ ಪಡ್ಲೆಂ.
** ** **
ಮಾರ್ಚ್‌ 3, 2026.
ದಾಕ್ತೆರ್‌ ಮ್ಹಣ್ತಾ, ಹಾಂವೆಂ ಡೈರಿ ಬರಯ್ಜೆ ಕಂಯ್! ದಾಕ್ತೆರಾಂಕ್‌ ಎಕ್‌ಚ್‌ ಕಾಮ್‌, ಪಿಡೆಸ್ತಾಂಕ್‌ ಭೆಷ್ಟಾಂವ್ಚೆಂ! ಆಸೊಂ, ಲಿನಾಕ್‌ ಸಂತೊಸ್‌ ಕರ್ಚ್ಯಾ ಖಾತಿರ್‌ ಪುಣಿ ಹಾಂವೆಂ ಡೈರಿಂತ್‌ ಬರಂವ್ಚೆಂ ಬರೆಂ. ಆಜ್ ಕಿತೆಂ ಬರಂವ್? ವ್ಹಯ್‌, ಆಜ್ ಲಿನಾನ್ ರುಚಿಚ್ಯೆಂ ದುಕ್ರಾ ಮಾಸ್‌ ರಾಂದ್‌ಲ್ಲೆಂ. ಕೊಣೆ ರಾಂದ್‌ಲ್ಲೆಂ ಖೆಲ್ಯಾರೀ, ಲಿನಾನ್ ರಾಂದ್‌ಲ್ಲ್ಯಾ ಮಾಸಾಬರಿ ಜಾಯ್ನಾ. ಆಪಾಂಯೀ ಕೆಲ್ಲಿಂ. ಬಿಯರಿ ಬರಾಬರ್‌, ಪೋಟ್‌ಬರ್‌ ಜೆವ್‌ಲ್ಲ್ಯಾನ್‌ ಕೊಣ್ಣಾಂ, ಸಾಂಜೆರ್‌ ಭುಕ್‌ಚ್ ಲಾಗೊಂಕ್‌ ನಾ! ಎಮಿಲಿನ್‌ ಅಮೆರಿಕಾ ಥಾವ್ನ್‌ ಫೊನ್‌ ಕೆಲ್ಲೆಂ. ಲೀನಾನ್‌, ತಾಕಾ ಸಾಂಗ್‌ಲ್ಲೆಂ ಆಸ್ತೆಲೆಂ. ಹಿಂ ಕಿತ್ಯಾಕ್ ಹಿ ಗಜಾಲ್‌ ತಿತ್ಲಿ ವ್ಹಡ್ಲಿ ಕರ್ತಾತ್‌ ಮ್ಹಳ್ಳೆಂ ಸಮ್ಜನಾ ಮ್ಹಾಕಾ!
** ** **
ಆರಂಭಾರ್‌, ಡೈರಿಂತ್‌ ಬರಂವ್ಚ್ಯೊ ಸಂಗ್ತಿ ಮಟ್ವ್ಯೊ ಆಸ್‌ಲ್ಲ್ಯೊ. ಲಿನಾ ಆಪ್ಲಿ ಡೈರಿ ವಾಚುಂಕ್‌ ಪುರೊ ಮ್ಹಣ್‌ ದುಬಾವ್ ಆಸ್‌ಲ್ಲ್ಯಾ ತಾಣೆ, ಲಿನಾಕ್‌ ಖುಶ್‌ ಕರ್ಚ್ಯೆ ತಸಲ್ಯೊ ಸಂಗ್ತಿ ಮಾತ್ರ್‌ ಬರಯ್ಲ್ಯೊ. ಹಾತಾನ್ ಬರಂವ್ಚಿ ಸವಯ್‌ ವಿಸ್ರೊನ್‌ ಆಯಿಲ್ಲ್ಯಾ ತಾಕಾ, ಹಾತಾನ್ ಬರಂವ್ಕ್‌ ಬರೆಂ ಲಾಗ್ಲೆಂ ಜಾಲ್ಲ್ಯಾನ್, ಉಪ್ರಾಂತ್ಲ್ಯಾ ದಿಸಾಂನಿ ತಾಚ್ಯಾ ಡೈರಿಂತ್‌ ಚಡ್‌ ಸಂಗ್ತಿ ಝಳ್ಕೊಂಕ್‌ಲಾಗ್ಲ್ಯೊ.
** ** **
ಎಪ್ರಿಲ್‌ 19.
ಆಜ್ ಆಯ್ತಾರ್. ವಿಲ್ಫಿ ಆನಿ ದೆಲ್ಫಿನಾನ್‌ ಆಮ್ಕಾಂ ಜೆವ್ಣಾಕ್‌ ಆಪಯಿಲ್ಲೆಂ. ಲೀನಾ ಆನಿ ದೆಲ್ಫಿನ್‌ ತಾಂಚ್ಯೊ ರಾಟಾವಳಿ ಉಲಯ್ತನಾ, ಹಾಂವ್, ವಿಲ್ಫಿ ಆನಿ ಆಮ್ಚಿಂ ಭುರ್ಗಿಂ ಇಂಡಿಯಾ ಆನಿ ಇಂಗ್ಲೆಂಡಾ ಮಧ್ಲೆಂ ಕ್ರಿಕೆಟ್‌ ಮ್ಯಾಚ್‌ ಪಳೆಂವ್ಕ್‌ ಬಸ್ಲ್ಯಾಂವ್. ವಿಲ್ಫಿ ಕ್ರಿಕೆಟಾಚೊ ಪಿಸೊ. ಇಂಡಿಯಾಚ್ಯಾ ಟೀಮಾನ್‌ ಮಾತ್ರ್‌ ಜಿಕಜೆ ಮ್ಹಣ್‌ ಆಶೆಂವ್ಚೊ ಆಶಾವಾದಿ. ಪಾಂಚ್ ದಿಸಾಂಚ್ಯಾ ಮ್ಯಾಚಾಚೊ ಆಜ್ ಆಕ್ರೇಚೊ ದೀಸ್. ತಾಚ್ಯಾ ನಶಿಬಾಕ್‌, ಇಂಡಿಯಾ ಸಲ್ವಲೆಂ ಆನಿ ವಿಲ್ಫಿಚ್ಯೆಂ ಕರ್ಪಾಲ್ಲೆಂ ತೋಂಡ್ ಪಳೆವ್ನ್‌ ಆಮ್ಚಿಂ ಬಾಯ್ಲಾಂ ಬರಿಂಚ್‌ ಹಾಸ್ಲಿಂ!
** ** **
ಮೇ 8.
ಆಜ್ ಲಿನಾನ್ ಮ್ಹಾಕಾ ಕಿತೆಂಗೀ ವಿಸರ್ಲೆಲ್ಯಾ ವೆಳಾರ್‌, "ವ್ಹಡ್ ನಾ ರಾಯನ್ ಡಿಯರ್‌, ಉಗ್ಡಾಸ್ ಕರುಂಕ್‌ ಹಾಂವ್ ಆಸಾಂನೇ," ಮ್ಹಳೆಂ. ತೆಂ ಆಸ್ಲ್ಯಾರ್‌ ದೇವ್‌ ಆಸ್‌ಲ್ಲೆಬರಿ ಮ್ಹಾಕಾ.
** ** **
ಜೂನಾಯಿತ್ಲ್ಯಾಕ್‌, ಡೈರಿ ಮ್ಹಳ್ಯಾರ್‌, ವ್ಹಾಳಾಂತ್‌ ವ್ಹಾಳೊನ್‌ ವೆಚ್ಯಾ ವೆಳಾರ್‌ ನಶಿಬಾನ್‌ ಧರುಂಕ್‌ ಮೆಳ್ಚ್ಯಾ ಫಾಂಟ್ಯಾ ತಿತ್ಲಿ ಆಧಾರಾಚಿ ಜಾಲ್ಲಿ ತಾಕಾ. ತಾಣೆ ಜಾತಾ ತಿತ್ಲೆಂ ತ್ಯಾ ಡೈರಿಂತ್‌ ಸೊಂಬಯ್ಲೆಂ. ಪುಣ್ ಬರಯ್ತಾಂ-ಬರಯ್ತಾನಾ, ತಾಕಾ ಗರ್ಜೆಚ್ಯಾ ಉತ್ರಾಂಚಿ, ಫಾವೊತ್ಯಾ ಸಬ್ದಾಂಚಿ ವಿಸರ್‌ ಪಡೊಂಕ್‌ ಸುರು ಜಾಲಿ. ಡೈರಿಚ್ಯಾ ಪಾಟ್ಲ್ಯಾ ಪಾನಾಂನಿ ಸೊಧ್ತಾನಾ, ಥಂಯ್ಸರ್‌ ಬರಯಿಲ್ಲ್ಯಾ ನಾಂವಾಂಕ್‌ ಲಗ್ತಿ ಜಾಲ್ಲಿಂ ಮುಖಮಳಾಂ, ತಾಚ್ಯಾ ಮತಿಂತ್ ಘಯ್ರ್ಯಾ ರಿತಿರ್‌ ಉದೆಲಿಂ.
** ** **
ಜೂನ್‌ 21.
ದಫ್ತರಾಂತ್ಲ್ಯಾ ಜೊನಿ ಸಂಗಿಂ ಕಾಫಿ ಪಿಯೆಲ್ಲೊ ಉಗ್ಡಾಸ್. ತಾಚ್ಯಾ ನವ್ಯಾ ಕಾರಾ ವಿಶ್ಯಾಂತ್‌ ಉಲಯ್ತಾಲೊ ತೊ. ಪುಣ್ ತಾಚ್ಯೆಂ ನವೆಂ ಕಾರ್‌ ಖಂಚ್ಯೆಂ ಬ್ರಾಂಡ್‌ ಮ್ಹಳ್ಳೊ ಉಗ್ಡಾಸಾಕ್‌ ಯೇನಾ.
** ** **
ಪಿಡೆನ್‌ ದಿಸ್ಪಡ್ತ್ಯಾ ಜಿಣ್ಯೆಂತ್‌, ಖಬ್ರೆವಿಣೆಂಚ್ ಪಾಳಾಂ ವಿಸ್ತಾರಾಯ್ಲಿಂ. ದಫ್ತರಾಕ್‌ ವಚೊಂಕ್‌ ಭಾಯ್ರ್‌ ಸರ್‌ಲ್ಲೊ ರಾಯನ್, ಟೋಸ್ಟರಾಂತ್‌ ಉಂಡ್ಯಾ ಕಾಪಾಂ ಚೆಪಿಲಾಗ್ಲೊ.
"ತುಂವೆಂ ಬ್ರೇಕ್‌ಫಾಸ್ಟ್‌ ಕೆಲಾಯ್‌ನೇ, ಪರ್ತುನ್‌ ಭುಕ್‌ ಲಾಗ್ಲಿಗೀ ಕಿತೆಂ?" ಲಿನಾ ಮ್ಹಣಾಲಿ, ತಾಚ್ಯಾ ಭುಜಾಚ್ಯೆರ್‌ ಹಾತ್‌ ದವರುನ್.
"ತುಂ ಏಕ್ ಕಾಲೆಂ ಮ್ಹಣ್ತಾಯ್‌ ಲಿನಾ, ಹಾಂವ್ ಆತ್ತಾಂ ಭಾಯ್ರ್‌ ಸರೊನ್‌ ಆಯ್ಲೊಂ ಮಾತ್ರ್‌, ಏಕ್ ಗ್ಲಾಸ್‌ ಕೊಫಿ ದೀ ಪಳೆವ್ಯಾಂ."
ಕಾಫಿಯೆಚೊ ಗ್ಲಾಸ್‌ ತಾಚ್ಯಾ ಮುಕಾರ್‌ ದವರ್‌ಲ್ಲ್ಯಾ ಲಿನಾಚ್ಯಾ ದೊಳ್ಯಾಂನಿ ದುಕಾಂಚಿ ಸಾಯ್‌ ಪಳೆವ್ನ್‌, ರಾಯನಾಕ್‌ ಕಿತೆಂಗೀ ಚೂಕ್‌ ಜಾಲ್ಯಾ ತೆಂ ಸಮ್ಜಲೆಂ ತರೀ, ಚೂಕ್‌ ಕಸಲಿ ತೆಂ ಮತಿಕ್‌ ಆಯ್ಲೆಂನಾ.
** ** **
ಜುಲೈ 6.
ಹಾಂವೆಂ ಆಜ್ ದೋನ್‌ ಪಾವ್ಟಿಂ ಬ್ರೇಕ್‌ಫಾಸ್ಟ್‌ ಕೆಲೊ ಮ್ಹಳೆಂ ಲಿನಾನ್. ಪುಣ್ ಮ್ಹಾಕಾ ಉಗ್ಡಾಸ್ ನಾ. ತೆಂ ಕಾಂಯ್ ಫಟಿ ಮಾರ್ಚ್ಯೆಂ ನ್ಹಯ್. ಪುಣ್...
** ** **
ಆನ್ಯೇಕಾ ದಿಸಾ, ರಾಯನಾಕ್‌ ನ್ಹಾಣಿ ಖಂಯ್‌ ಆಸಾ ಮ್ಹಳ್ಳೊ ಉಗ್ಡಾಸ್ ವಿಸರ್ಲೊ. ಘುಸ್ಪಡ್ಚ್ಯಾ ತಾಕಾ, ಲಿನಾನ್ ನ್ಹಾಣಿಯೆಕ್‌ ವ್ಹರುನ್‌ ಪಾವಯ್ತಾನಾ, ರಾಯನಾಚ್ಯಾ ದೊಳ್ಯಾಂನಿ ದುಕಾಂ ಭರ್‌ಲ್ಲ್ಯಾನ್‌, ಲಿನಾಚಿಂ ದುಕಾಂ ತಾಕಾ ದಿಸ್ಲಿಂನಾಂತ್.
** ** **
ಜುಲೈ 14.
ಮ್ಹಜೆಂ ವೊಕ್ಲ್‌ ಮೆಳನಾತ್‌ಲ್ಲ್ಯಾಕ್‌, ಲಿನಾಕ್‌ ದುರ್ಸಾಲೊಂ ಹಾಂವ್. ಪುಣ್ ಪಾಟಿಂ ಉಲಂವ್ಚ್ಯಾ ಬದ್ಲೆಕ್‌, ತಾಣೆ ಮ್ಹಜ್ಯಾ ಮಾತ್ಯಾವಯ್ರ್‌ ಆಸ್‌ಲ್ಲೆಂ ವೊಕ್ಲ್‌ ಕಾಡುನ್‌ ದಿಲೆಂ ಮ್ಹಾಕಾ. ಹಾಸ್ಚೆಂಗೀ ರಡ್ಚೆಂ? ಆಸೊಂ, ಪ್ರಾಯ್‌ ಜಾತಾನಾ ಅಶೆಂಚ್‌ ಜಾತಾ ಜಾಯ್ಜೆ.
** ** **
ದೀಸ್ ವೆತಾಂ-ವೆತಾಂ, ರಾಯನಾಚ್ಯೆಂ ಸ್ವತಂತ್ರ್‌ ತಾಚ್ಯಾ ಮುಟಿಂತ್ಲೆಂ ಚುಕೊನ್‌ ವೆತಾಲೆಂ. ತಾಚ್ಯಾ ಉಗ್ಡಾಸಾಕ್‌ ಲಾಗೊನ್‌, ತಾಣೆ ಕಾರ್‌ ಚಲಂವ್ಚೆಂ ರಾವಂವ್ಕ್‌ ಪಡ್‌ಲ್ಲೆಂ. ಏಕ್ ದೀಸ್ ಇಗರ್ಜೆಕ್‌ ವೆತಾನಾ, ತಾಕಾ ವಾಟ್‌ ಚುಕ್‌ಲ್ಲೆಂಚ್‌ ಹಾಕಾ ಕಾರಣ್.
ತ್ಯಾ ಸಾಂಜೆರ್‌, ಕಾರಾಂತ್‌ ಬಸೊನ್‌ ಕಾರಾಚ್ಯೆಂ ಅಟ್ಟೆಂ ಹಾತಾಂತ್‌ ಧರುನ್‌, ತೊ ಚಿಂತುನ್‌ಂಚ್‌ ಬಸ್ಲೊ - ಆಪುಣ್‌ ಕಿತೆಂ ಚಿಂತ್ತಾಂ ತೆಂ ಕಳಿತ್‌ ನಾಸ್ತಾಂ. ತ್ಯಾ ರಾತಿಂ ಡೈರಿಂತ್‌ ತಾಣೆ ಬರಯ್ಲೆಂ:
ಅಗಸ್ತ್‌ 2.
ಡ್ರೈವಿಂಗ್‌ ಕರುಂಕ್‌ ನಜೊ ಮ್ಹಣ್‌ ದಾಕ್ತೆರಾನ್ ಮ್ಹಳಾಂ. ತಾಣೆ ಸಾಂಗ್ಚೆಂ ಹಾಂವ್ ನ್ಹಯ್ ಮ್ಹಣಾನಾ, ಪುಣ್ ದಫ್ತರಾಕ್‌ ಕಶೆಂ ವೆಚ್ಯೆಂ?
** ** **
ಕಾಮಾಕ್‌ ರಾಜಿನಾಮ್‌ ದಿಂವ್ಚಿ ಗರ್ಜ್‌ ಉದೆಲ್ಲಿ ಆನಿ ರಾಯನಾನ್ ಪ್ರತಿಭಟನ್‌ ಕೆಲ್ಲೆಂ. ಪುಣ್ ಆತಾಂ, ಆಪ್ಣೆಂ ಕಾಮಾಕ್‌ ವೆಚ್ಯೆಂ ರಾವಯ್ಲಾಂ ಮ್ಹಳ್ಳೆಂ ಸಯ್ತ್ ತಾಕಾ ವಿಸ್ರೊನ್‌ ಗೆಲ್ಲೆಂ.
ಇಗರ್ಜೆಕ್‌ ಗೆಲ್ಲ್ಯಾ ರಾಯನಾನ್, ಮಿಸಾ ಉಪ್ರಾಂತ್‌ ಒಳ್ಕಿಚ್ಯಾ ಸಕ್ಡಾಂಚ್ಯೆ ಹಾತ್‌ ಹಾಲಯ್ಲೆ ತರೀ, ತಾಂಚಿಂ ಎಕ್ಲ್ಯಾಚಿಂಯೀ ನಾಂವಾಂ ತಾಚ್ಯಾ ಮತಿಕ್‌ ಆಯ್ಲಿಂನಾಂತ್. ತ್ಯಾಚ್‌ ದಿಸಾ, ತಾಚ್ಯಾ ಯುನಿವರ್ಸಿಟಿಂತ್‌ ಶಿಕ್ಚ್ಯಾ ಪುತಾನ್‌, ರೊನಿನ್‌, ಆಪ್ಲ್ಯಾ ಪ್ರೊಜೆಕ್ಟಾ ವಿಶ್ಯಾಂತ್‌ ಹರ್ಶೆಂಚ್ಯೆಬರಿ ವಿವರ್‌ ದಿಲೊ ಪುಣ್ ರಾಯನಾಕ್‌ ಸಗ್ಳ್ಯೊ ಸಂಗ್ತಿ ಸಮ್ಜಜೆ ತರ್, ದೊದೋನ್‌ ಪಾವ್ಟಿಂ ಸಾಂಗಾಜೆ ಪಡ್ಲೆಂ. ಅಮೆರಿಕಾಂತ್ ಆಸ್ಚ್ಯಾ ಧುವೆನ್‌, ಎಮಿಲಿನ್‌, ಫೊನ್‌ ಕೆಲ್ಲೆಂ. ಪುಣ್ ತಾಚ್ಯೆಂ ನಾಂವ್‌ ಡೈರಿಂತ್‌ ಬರಯ್ತಾನಾ, ತೆಂ ನಾಂವ್‌ ಪಯ್ಲೆ ಪಾವ್ಟಿಂ ಬರಂವ್ಚ್ಯೆಬರಿ ಭೊಗ್ಲೆಂ ತಾಕಾ.
** ** **
ಲಿನಾಚಿ ಸೊಸ್ಣಿಕಾಯ್‌ ಪಾರ್ಕುಂಚ್ಯೆ ದೀಸ್ ತೆ. ಎದೊಳ್‌ ಹಾಸೊನ್-ಹಾಸೊನ್ ತಾಕಾ ಕುಮಕ್‌ ಕರ್ಚ್ಯಾ ಲಿನಾಚ್ಯಾ ವೊಂಟಾವಯ್ಲ್ಯೊ ಹಾಸೊ ಸಾವ್ಳೆವ್ನ್‌ ಆಯಿಲ್ಲ್ಯೊ. ತವಳ್-ತವಳ್ ತೆಂ ತಸ್ವಿರ‍್ಯೊ ದಾಕವ್ನ್‌, ತಾಚ್ಯಾ ಭಂವ್ತಿಂಚ್ಯಾಂಚಿ ವೊಳೊಕ್‌ ಉರಾಶೆಂ ಕುಮಕ್‌ ಕರ್ತಾಲೆಂ ತರೀ, ಕರಾಳ್‌ ದೀಸ್ ಉದೆಲೊಚ್.
ಆಪ್ಲ್ಯಾ ಮೆಜಾರ್‌ ಕಾಫಿಯೆಚೊ ಗ್ಲಾಸ್‌ ದವರ್ನ್‌, ರಾಯನಾನ್ ಡೈರಿ ಉಗ್ತಿ ಕೆಲಿ. ಡೈರಿಂತ್ಲಿಂ ಪಾನಾಂ ಪರ್ತುನ್‌, ಉಗ್ಡಾಸ್ ಉರ್ಚ್ಯಾ ಖಾತಿರ್‌ ಪಂದಾಕ್‌ ಗೀಟ್‌ ವೊಡ್‌ಲ್ಲಿಂ ನಾಂವಾಂ, ಪರತ್-ಪರತ್ ವಾಚ್ಲಿಂ ತಾಣೆ - ಪೀಟರ್‌, ಜೊನಿ, ಎಮಿಲಿ, ರೊನಿ, ಧೆಲ್ಫಿನ್‌, ವಿಲ್ಫಿ, ಫಾದರ್‌ ಫಿಲಿಪ್.
ಹರ‍್ಯೇಕ್‌ ನಾಂವ್‌ ತಾಕಾ ಅತ್ವೆಂಚ್‌ ಮ್ಹಣ್‌ ಭೊಗ್ಲೆಂ. ಸುಕ್ಷಿಮಾಯೆನ್‌ ಬರಯಿಲ್ಲಿಂ ವಾಕ್ಯಾಂ ತಾಚಿಂಚ್‌ ತರೀ, ತಿಂ ತಾಣೆಂಚ್‌ ಬರಯಿಲ್ಲಿಂ ಮ್ಹಳ್ಳೆಂ ಸಯ್ತ್ ತಾಕಾ ವಿಸರ್‌ಲ್ಲೆಂ. ಆಪ್ಲ್ಯಾ ಬೊಟಾಂನಿ ಕಪಾಲ್‌ ಘಸ್ಟುನ್‌, ತಾಣೆ ಏಕ್ ಪುಣಿ ಮುಖಮಳ್‌ ಉಗ್ಡಾಸಾಕ್‌ ಹಾಡುಂಕ್‌ ಹರ್‌ ಪ್ರೇತನ್‌ ಕೆಲೆಂ.
** ** **
ಸೆಪ್ಟೆಂಬರ್‌ 14.
ಹಿಂ ನಾಂವಾಂ ಮ್ಹಾಕಾ ಕಳಿತ್‌ ನಾಂತ್. ಕೋಣ್‌ ಹಿಂ ಮನ್ಶ್ಯಾಂ? ಹಿಂ ಕಿತ್ಯಾಕ್ ಹ್ಯಾ ಡೈರಿಂತ್‌ ಆಸಾತ್?
** ** **
ಲಿನಾ ಭಿತರ್‌ ಆಯ್ಲಿ. ತಿಚೊ ಹಾತ್‌ ರಾಯನಾಚ್ಯಾ ಭುಜಾರ್‌ ಥಾಂಬ್ಲೊ. ತಾಣೆ ಮುಖಮಳ್‌ ಉಬಾರ್ನ್. ಲಿನಾಚ್ಯಾ ದೊಳ್ಯಾಂಕ್‌ ಪಳೆಲೆಂ. ತ್ಯಾ ದೊಳ್ಯಾಂನಿ ಮೊವಾಳಾಯ್‌ ಆನಿ ಬಿರ್ಮತ್ ಆಸ್‌ಲ್ಲಿ ಮ್ಹಣ್ಚ್ಯಾಕ್‌ ಖಂಡಿತ್‌ ದುಭಾವ್‌ ನಾತ್‌ಲ್ಲೊ. ತಿಚ್ಯಾ ಹಾತಾಚ್ಯಾ ಉಬೆಂತ್‌, ಸಮ್ಜಣಿ ಆಸ್‌ಲ್ಲಿ ಆನಿ ತಿಚೊ ಸಾಂಗಾತ್‌ ತಾಕಾ ಬರೊ ಲಾಗ್ಲೊ.
"ಕಿತೆಂ ವಾಚುನ್ ಆಸ್‌ಲ್ಲೊಯ್?" ಲಿನಾನ್ ವಿಚಾರ್ಲೆಂ.
"ಹಾಂವ್ ನೆಣಾಂ," ರಾಯನ್ ಮ್ಹಣಾಲೊ ಭುಜಾಂ ಹಾಲವ್ನ್. "ಕೊಣಾಚ್ಯಾಗೀ ಜಿಣಿಯೆ ವಿಶ್ಯಾಂತ್‌ ಹ್ಯಾ ಬುಕಾಂತ್‌ ಬರಯ್ಲಾಂ."
ಲಿನಾ ತಾಚ್ಯಾ ಬಗ್ಲೆನ್‌ ಕದೆಲ್‌ ವೊಡುನ್‌ ಬಸ್ಲಿ. ತಿ ದೊಳ್ಯಾಂತ್ಲಿಂ ದುಕಾಂ ಪುಸುಂಕ್‌ ಗೆಲಿನಾ. ತಾಕಾ ಡೈರಿ ವಿಶ್ಯಾಂತ್‌ ವಿವರುಂಚ್ಯೆಂ ಪ್ರೇತನ್‌ಯೀ ತಿಣೆ ಕೆಲೆಂನಾ. ಫಕತ್‌ ತಾಚೊ ಏಕ್ ಹಾತ್‌ ಆಪ್ಲ್ಯಾ ದೊನೀ ಹಾತಾಂ ಮಧೆಂ ತಿಣೆ ಧರ್ಲೊ. ಆನ್ಯೇಕಾ ಹಾತಾನ್ ರಾಯನಾನ್ ಡೈರಿ ಧಾಂಪ್ಲಿ.
** ** **
ಸೆಪ್ತೆಂಬರ್‌ 30.
ʼಮ್ಹಜೆಂ ನಾಂವ್‌ ರಾಯನ್. ಆಜ್ ಮಾಸ್ಳೆ ಕಡಿಯೆಚ್ಯೆಂ ಜೆವಣ್‌ ಬರೆಂ ಆಸ್‌ಲ್ಲೆಂ. ಹಾಂವೆಂ ಪಯ್ಲೆಂ ತಿ ಮಾಸ್ಳಿ ಸಬಾರ್‌ ಪಾವ್ಟಿಂ ಖೆಲ್ಯಾ ಮ್ಹಣ್‌, ಜೆವಣ್‌ ವಾಡ್‌ಲ್ಲಿ ಸ್ತ್ರೀ ಮ್ಹಣಾಲಿ. ಉಗ್ಡಾಸಾಕ್‌ ಯೇನಾ. ಮ್ಹಾಕಾ ವಾಡ್‌ಲ್ಲ್ಯಾ ಸ್ತ್ರೀಯೆಚ್ಯೆಂ ನಾಂವ್‌ ವಿಸ್ರಾಲೊಂ. ತಿ ಆತಾಂ ನಿದ್ಲ್ಯಾ, ಫಾಲ್ಯಾಂ ವಿಚಾರಿಜೆ.ʼ
ತಾಣೆ ಆಪ್ಣೆ ಬರಯಿಲ್ಲ್ಯಾ ವಾಕ್ಯಾಂಕ್‌ ದೊಳೆ ವ್ಹಡ್ ಕರುನ್‌ ಪಳೆಲೆಂ. ತಿಂ ಆಪ್ಣೆಂಚ್‌ ಬರಯಿಲ್ಲಿಂ ಉತ್ರಾಂ ಮ್ಹಳ್ಳೊ ಉಗ್ಡಾಸ್ ಆಸ್‌ಲ್ಲೊ ತಾಕಾ. ಪುಣ್ ತೊ ಉಗ್ಡಾಸ್ ಕಿತ್ಲೊ ವೇಳ್‌ ಉರಾತ್‌ ಮ್ಹಳ್ಳೆಂ ಮಾತ್ರ್‌ ತೊ ನೆಣಾಸ್‌ಲ್ಲೊ.
(ಕುರ್ಪಾ: ಕುಟ್ಮಾಚೊ ಸೆವಕ್)
Comments
No comments yet. Be the first to say what you thought of it.
Leave a comment