ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಪಾಂಚ್ ಲಿಪಿಯಾಂನಿ ಕೊಂಕ್ಣಿ ಬರಯ್ತಾತ್; ರೋಮಿ (ಗೊಯಾಂ), ದೇವ್ನಾಗರಿ (ರತ್ನಗಿರಿ), ಕಾನಡಿ (ಮಂಗ್ಳುರ್), ಉರ್ದು (ಭಟ್ಕಳ್) ಆನಿ ಮಲಯಾಳಂ (ಕೊಚ್ಚಿನ್)
ಆಯ್ಚೊ ಕೊಂಕ್ಣಿ ಲೋಕ್ ಆನಿ ಆಯ್ಚಿ ಕೊಂಕ್ಣಿ ಪರಿಗತ್
- ವಿಲ್ಮಾ ಫೆರ್ನಾಂಡಿಸ್, ಬೆಳ್ಮಣ್
[ದಾಯ್ಜ್ ಸಾಹಿತಿಕ್ ಸ್ಪರ್ಧೊ - 2004 ಹಾಂತುಂ ದುಸ್ರೆಂ ಇನಾಮ್ ಜೊಡ್ಲ್ಲೆಂ ಲೇಖನ್]
ಅಯ್ಚೊ ಕೊಂಕ್ಣಿ ಲೋಕ್ ಸಂಸಾರಾಂತ್ ಜಿಯೆತಾಸ್ತಾನಾ ಎಕಾ ಸಂದಿಗ್ಧ್ ಪರಿಗತೆಂತ್ ಜಿಯೆವ್ನ್ ಆಸಾತ್. ಆಮ್ಚೊ ಚಡಾವತ್ ಕೊಂಕ್ಣಿ ಲೋಕ್ ಆಪ್ಲೊ ದಿಸ್ಪೊಡ್ತೊ ಗ್ರಾಸ್ ಜೊಡುಂಕ್ ಪರ್ಗಾವಾಂತ್ ವಾವ್ರ್ ಕರ್ನ್ ಆಸಾತ್. ಉರ್ಲ್ಲ್ಯಾ ಹೆರ್ ಧರ್ಮಾಚಾಂಕ್ ಆಮಿಂ ವರವ್ನ್ ಪಳೆಯ್ಲ್ಯಾರ್, ಕೊಂಕ್ಣಿ ಸಮಾಜೆಂತ್ ಗಾವಾಂತ್ ವಾವ್ರ್ ಕರ್ನ್ ಆಸ್ಲ್ಲ್ಯಾ ದಾಧ್ಲ್ಯಾಂಚೊ ಸಂಖೊ ಭೋವ್ ಉಣೊ.
ಚಡಾವತ್ ಕೊಂಕ್ಣಿ ಲೋಕ್ ವ್ಹಡ್ಲ್ಯಾ ವ್ಹಡ್ಲ್ಯಾ ಘರಾಂನಿ ಭೋವ್ ಥೊಡಿಂಚ್ ಜಣಾಂ ಜಿಯೆವ್ನ್ ಆಸಾತ್. ಆದಿಂ ಮಾಗಾ ಅಸ್ಲ್ಯಾಬರಿಂ ಘರಾಂನಿ ಮ್ಹಸ್ತ್ ಜಣಾಂ ಆತಾಂ ದಿಸೊನ್ ಯೆನಾಂತ್. ಚಡಾವತ್ ಕೊಂಕ್ಣಿ ಸಮಜಿಚ್ಯಾ ಕುಟ್ಮಾನಿಂ ಅವಯ್-ಬಾಪುಯ್ ದೊಗಾಂಯ್ ಕಾಮಾಕ್ ವೆತಾತ್ ಜಾಲ್ಲ್ಯಾನ್, ಭುರ್ಗಿಂ ಅಯಾಚ್ಯಾ ಹಾತಾಂತ್ಗೀ, ಬೆಬಿಸಿಟ್ಟಿಂಗಾಂತ್ಗೀ ವ್ಹಡ್ ಜಾತಾತ್. ತಶೆಂ ಜಾಲ್ಲ್ಯಾನ್, ಕೊಂಕ್ಣಿ ಸಮಾಜಿಚಿಂ ಲ್ಹಾನ್ ಭುರ್ಗಿಂ ಮ್ಹಸ್ತ್ ಕಸ್ಟತಾತ್.
ಅಮ್ಚ್ಯಾ ಸಮಾಜಿಚಾ ಲೊಕಾಕ್ ಪಯ್ಶೆ ಜಾಯ್, ವ್ಹಡ್ ವ್ಹಡ್ ಘರಾಂ ಜಾಯ್, ಪುಣ್ ಅವಯ್ ಬಾಪಯ್ ಭುರ್ಗಿಂ ಸಾಂಗಾತಾ ಜಿಯೆಂವ್ಚೆ ತಿತ್ಲೆಂ ಗರ್ಜ್ ಮ್ಹಣ್ ತಾಂಕಾ ದಿಸಾನಾ. ಕೊಂಕ್ಣಿ ಲೊಕಾನಿ ಕೆಲ್ಲೆ ತಿತ್ಲೆಂ ಧಾನ್ ಧರ್ಮ್ ಅನ್ಯ್ ಧರ್ಮಾಚಿಂ ಕರಿನಾಂತ್. ಕ್ರೀಸ್ತಾಂವ್ ಸಮಾಜಿಚೊ ಚಡಾವತ್ ಲೋಕ್ ಉದಾರಿ ಜಾವ್ನಾಸಾ. ಕೊಂಕ್ಣಿ ಲೋಕ್ ಸೆವೆಚಾ ಮನೋಭಾವಾನ್ ಭರ್ಲ್ಲೊ ಜಾವ್ನಾಸಾ. ಜಾಂವ್ ಅಸ್ಪತ್ರ್ಯಾನಿಂ, ಜಾಂವ್ ಇಸ್ಕೊಲಾಂನಿ, ಜಾಂವ್ ಆನಾಥ್ ಆಶ್ರಾಮಾನಿ ತಾಂಚಿ ಸೆವಾ ಆಮ್ಕಾಂ ಪಳೆಂವ್ಕ್ ಮೆಳ್ತಾ.
ಆಮಿಂ ಶಿಕ್ಪಾಕ್ ಚಡ್ ಮಹತ್ವ್ ದಿತಾಂವ್. ಚಡ್ತಾಂವ್ ಭುರ್ಗ್ಯಾಂಚಿ ಅವಯ್ ಬಾಪಾಯ್ ಪರ್ಗಾವಂತ್ ಅಸ್ಲ್ಲ್ಯಾನ್, ಕಿತ್ಲೊ ದುಡು ಯೆಟುನ್ ತರೀ ಉಂಚ್ಲೆಂ ಶಿಕಾಪ್ ಅಫ್ಣಯ್ತಾಂವ್. ಚಡಾವತ್ ಶಿಕ್ಪಿ ಲೋಕ್, ಶಿಕಾಪ್ ಸಂಪವ್ನ್ ಪರ್ಗಾವಾಚಿ ವಾಟ್ ದರ್ತಾತ್. ಹಾಂಗಾಚೊ ಆದಾಯ್ ತಾಂಕಾ ಪಾವಾನಾ. ಆಪ್ಲ್ಯಾ ಮಾಂಯ್ ಗಾವಾಕ್ ತಾಂಚಿ ಸೆವಾ ಅರ್ಪುಂಕ್ ತಿಂ ತಯಾರ್ ನಾಂತ್. ಪಳೆಯಾ ಆಮ್ಚೆ ಭಂವಾರಿಂ, ಆಮ್ಚ್ಯಾ ಗಾಂವಾಂತ್ ಆಸ್ಲ್ಲೆ ವಯ್ಜ್ ಚಡ್ತಾವ್ ಜಾವ್ನ್ ಆಮ್ಚೆ ಅಕ್ರೀಸ್ತಾಂವ್ ಭಾವ್ ಜಾವ್ನಾಸಾತ್. ಏಕೆಕಾ ಭುರ್ಗ್ಯಾ ಪಾಟ್ಲ್ಯಾನ್ ಸರ್ಕಾರ್ ಹಜಾರೊಂ ದುಡು ಖರ್ಚಿತಾ, ಪುಣ್ ಶಿಕಾಪ್ ಜಾತೆಚ್ಚ್ ಆಮಿಂ ಕೆನಡಾ, ಆಸ್ಟ್ರೇಲಿಯಾಕ್ ವೆತಾಂವ್.
ಆಮ್ಚ್ಯಾ ಕೊಂಕ್ಣಿ ಸಮಾಜಿಚಾ ಲೊಕಾಂಕ್ ಕುಟ್ಮಾಂತ್ ಆಧಾರ್ಸುನ್ ಸುಧಾರ್ಸುನ್ ಜಿಯೆಂವ್ಕ್ ಇಲ್ಲೆ ಕಶ್ಟ್ ಭಗ್ತಾತ್. ದೆಕುನ್ ಆಜ್ ಚಡಾವತ್ ವ್ಹಡ್ ವ್ಹಡ್ ಭಾಂದ್ಪಾಂನಿ ಎಕ್ಸುರಿಂ ದೀಸ್ ಸಾರ್ತಾತ್. ಪಳೆಯಾ ಅನ್ಭಾವಾರ್ಥಿ ಲೋಕ್, ತಾಂಕಾ, ಕೊಂಕ್ಣಿ ಲೊಕಾಂಕ್ ಆಸ್ಲ್ಲೆ ತಿತ್ಲ್ಯೊ ರೆತಿರ್ಯೊ ನಾಂತ್, ಶೆರ್ಮಾಂವ್ ನಾಂತ್, ಪುಣ್ ವ್ಹಡ್ ವ್ಹಡ್ ಕುಟ್ಮಾಂನಿ ತಿಂ ಸೊಡ್ದೊಡಿನ್ ಆಪ್ಲೆಂ ಜೀವನ್ ಸಾರ್ತಾತ್.
ಥೊಡೊ ಕೊಂಕ್ಣಿ ಲೋಕ್ ಜೆಯತಾ ಅಪುಣ್ ಅಪ್ಣಾಂಕ್ ದೇವ್ ಸಮೇಸ್ತಾಂಕ್ ಮ್ಹಳ್ಳೆಬರಿಂ. ಆಮಿ ಘರಾಂ ಭಾಂದ್ತಾಂವ್, ಚ್ಯಾರ್ಯೀ ಭಂವಾರಿಂ ಉಭಾರ್ ದೊರೊ ಭಾಂದ್ತಾಂವ್. ಹೆರಾಂಚೆಂ ಆಮ್ಕಾಂ ಪಡೊನ್ ವಚೊಂಕ್ ನಾಂ. ಆಮ್ಚೊ ಚಡ್ತಾವ್ ಕೊಂಕ್ಣಿ ಲೋಕ್ ರೆತಿರೆಕ್ ಪಯ್ಸ್ ಪಯ್ಸ್ ವೆತಾಂವ್, ನೊವೆನಾಂಕ್ ವೆತಾಂವ್. ಲಾಂಬ್ ಲಾಂಬ್ ಖುರ್ಸಾವಾಟೆಕ್ ವೆತಾಂವ್, ಪುಣ್ ಅಮ್ಚ್ಯಾಚ್ ಸೆಜಾರ್ ಆಸ್ಚ್ಯಾ, ಏಕಾ ಪಿಡೆಸ್ತಾಕ್ ಜಾಂವ್, ಗರ್ಜೆವಂತಾಕ್ ಜಾಂವ್, ಎಕ್ಸುರ್ಯಾಂಕ್ ಜಾಂವ್, ಏಕ್ ದೀಷ್ಟ್ ಘಾಲುಂಕ್ ಸಯ್ತ್ ಆಮ್ಕಾಂ ವೇಳ್ ನಾಂ ಮ್ಹಣ್ತಾಂವ್ ಆಮಿಂ. ರೆತಿರ್ಯೊ, ಮಾಗ್ಣೆಂ ಆಮಿಂ ಕರಿಜೆ, ಪೂಣ್ ಥಂಯ್ಸರ್ ಆಯ್ಕಾಲ್ಲೆಂ ಆಮಿಂ ಆಮ್ಚ್ಯಾ ಜಿಣ್ಯೆಂತ್ ಕಾರ್ಯಾರುಪಾರ್ ಹಾಡಿಜೆ. ಆಮ್ಚೆ ಥಂಯ್ ಸೆವೆಚೊ ಮನೋಭಾವ್ ಆಸಾಜೆ. ಆಮಿ ಆಮ್ಚ್ಯಾ ಸಮಾಜಿಚ್ಯಾ ವ್ಯಾಪಾರಿಸ್ತಾಂಕ್ ಪ್ರೊತ್ಸಾಹ್ ದಿಜೆ, ತವಳ್ ತಾಂಕಾಂ ಜಿಣ್ಯೆಂತ್ ತಶೆಂಚ್ ಆರ್ಥಿಕ್ ಸ್ಥಿತೆಂತ್ ಉದರ್ಗತಿಕ್ ವಚೊಂಕ್ ಸಹಕಾರ್ ಜಾತಾ. ಪುಣ್ ಆಮಿಂ ಆಮ್ಚ್ಯಾ ದೀಸ್ಪಡ್ತ್ಯಾ ಜೀವನಾಂತ್, ಹೆರ್ ಧರ್ಮಾಂಚಾ ಲೋಕಾಂಸಂಗಿ ಚಲಯಿಲ್ಯಾ ತಿತ್ಲೊ ವ್ಯವಹಾರ್, ಆಮ್ಚ್ಯಾ ಲೊಕಾ ಸಂಗಿ ಆಮಿ ಕರಿನಾಂವ್.
ಸಭಾರ್ ಕಾರಾಣಾಂ ಆಸುಂಕ್ ಪುರೊ, ಕೊಂಕ್ಣಿ ವ್ಯಾಪಾರಿಸ್ತಾಂಚೊ ಸಂಖೊ, ಭೊವ್ ಉಣೊ ಜಾವ್ನಾಸಾ. ಆಸ್ಲ್ಲೆ ಥೊಡೆ ಜಣ್ ವ್ಯವಹಾರಾಂತ್ ತಿತ್ಲೆ ಚುರುಕ್ ನಾಂತ್ ಜಾಂವ್ಕ್ ಪುರೊ. ರಾಜಕೀಯ್ ಕ್ಷೆತ್ರಾಂತ್ ಆಮಿಂ ಆಮ್ಚೊ ಮೊಲಾಧಿಕ್ ವೋಟ್ ಘಾಲ್ತಾನಾ ಆಮ್ಚ್ಯಾ ಲೊಕಾಂಕ್ ಆಮಿ ವಿಂಚುನ್ ಕಾಡಿಜೆ. ಆಯ್ಚ್ಯಾ ಕೊಂಕ್ಣೆಚಿ ಪರಿಗತ್ ಸಾಧಾರ್ಣ್ ಬರಿ ಆಸಾ. ಕೊಂಕ್ಣೆಕ್ ಸರ್ಕಾರಾರಾನ್ ಮಾನ್ಯಾತಾಯ್ ದಿಲ್ಯಾ. ಚಾಲ್ತೆರ್ ಆಸ್ಚಿಂ ಚಡಾವತ್ ಕೊಂಕ್ಣಿ ಪತ್ರಾಂ ಜಿವಾಳ್ ಆಸಾತ್.
ಗಲ್ಫ್ ರಾಶ್ಟ್ರಾನಿ ಕೊಂಕ್ಣಿಚೆಂ ವಾದಾಳ್ಚ್ ಉಟ್ಲಾಂ ಮ್ಹಣ್ಯೆತ್. ತವಳ್ ತವಳ್ ಕೊಂಕ್ಣಿ ಬಾಶೆಚಿಂ ಕಾರ್ಯಾಕ್ರಮಾಂ, ಕೊಂಕ್ಣಿ ನಾಯ್ಟಾಂ ಜಾತೇ ಆಸಾತ್.
ಹ್ಯಾ ದಿಸಾಂನಿಂ ಕೊಂಕ್ಣೀ ಪದಾಂಚೆ ನವಿ ನವಿ ಕೊವ್ಳ್ಯೊ ಬಾಯ್ರ್ ಪಡ್ತೆ ಆಸಾತ್. ಸಭಾರ್ ತರ್ನ್ಯಾ ಬರೊವ್ಪ್ಯಾಂಚೆ ನವೆ ಬೂಕ್ ಛಾಪುನ್ ಬಾಯ್ರ್ ಪಡ್ತಾತ್. ಕೊಂಕ್ಣಿ ಸಾಹಿತ್ಯಾಂತ್ ಹೆಳೊನ್ ಆಪ್ಲೆಂ ಸಕ್ಕಡ್ ಸಾಂಡುನ್, ಕಶ್ಟಾಂತ್ ಆಸ್ಲ್ಲ್ಯಾ ಮಲ್ಘಡ್ಯಾ ಬರೊವ್ಪ್ಯಾಂಕ್ ಆರ್ಥಿಕ್ ಕುಮೊಕ್ ದಿಂವ್ಚಿಂ ಯೊಜನಾಂ ಆತಾತಾಂ ಚಾಲ್ತೆರ್ ಆಸಾತ್. ಹಾಚೊ ಉದ್ದೇಶ್ ಕಿತೆಂಗಿ ಮ್ಹಳ್ಯಾರ್ ತಾಂಚ್ಯಾ ಗರ್ಜಾಂತ್ ಇಲ್ಲೊ ತರೀ ಆಧಾರ್ ಜಾಂವ್ದಿತ್ ಮ್ಹಣೊನ್. ಬರ್ಯಾ ಬರ್ಪಾಂಕ್ ಸಾಹಿತಿಕ್ ಪುರಸ್ಕಾರ್ ದಿಂವ್ಚಿ ಯೊಜನ್ಯೀ ಚಾಲ್ತೆರ್ ಆಸಾ. ತಶೆಂ ಜಾಲ್ಲ್ಯಾನ್ ತರ್ನ್ಯಾ ತಶೆಂಚ್ ಪರ್ನ್ಯಾ ಬರೊವ್ಪ್ಯಾಂಕ್ ಬರ್ಯೊ ಕಾಣ್ಯೊ, ಸಾಂಕಳ್ ಕಾಣ್ಯೊ ಬರೊಂವ್ಕ್ ಪ್ರೊತ್ಸಾಹ್ ದಿಲ್ಲೆಪರಿಂ ಜಾತಾ. ಫಿರ್ಗಜ್ ಹಂತಾರ್ ತಶೆಂ ವಾರಾಡ್ಯಾ ಹಂತಾರ್ ಚಲ್ಚ್ಯಾ ವಿವಿಧ್ ಸ್ಪರ್ದ್ಯಾಂ ವರ್ವಿಂ ಕೊಂಕ್ಣೆಕ್ ಬರೊ ಪಾಟಿಂಬೊ ದಿಲ್ಲೆಪರಿಂ ಜಾತಾ. ಆಮಿ ಘರ್ಚ್ಯಾ ವ್ಹಡಾನಿಂ ಬುರ್ಗ್ಯಾಂ ಲಾಗಿಂ ಜಾತಾತಿತ್ಲಿ ಕೊಂಕ್ಣಿ ಭಾಸ್ ಉಲೊಂವ್ಕ್ ಪ್ರಯತ್ನ್ ಕರಿಜೆ. ಆಮಿ ಆಮ್ಚ್ಯಾ ಭುರ್ಗ್ಯಾಂಕ್ ಕೊಂಕ್ಣೆಚೆ ಬೂಕ್ ವಾಚುಂಕ್ ಉತ್ತೇಜನ್ ದೀಜೆ. ಟೆಲಿವಿಜನಚೆರ್ ತಶೆಂಚ್ ರೇಡಿಯೊಚೆರ್ ಆಮ್ಚಿಂ ಕೊಂಕ್ಣಿ ಭಾಶೆಂಚಿ ಕಾರ್ಯಾಕ್ರಮಾಂ ಚಡಯ್ಜೆ.
ಅನ್ಬಾವಾರ್ಥಿ ಲೊಕಾನಿಂ ಆಮ್ಚ್ಯಾ ಸಾಂತ್ ಸಾಂತಿಣಿಚೊ ಉಗ್ತ್ಯಾನ್ ಮಾನಿ ನಶ್ಟ್ ಕರ್ತಾನಾ, ಆಮಿ ಸಕ್ಕಡ್ ಸಾಂಗಾತಾ ಮೆಳೊನ್ ತಾಚೊ ವಿರೊಧ್ ಕರಿಜೆ. ದಾಕ್ಲ್ಯಾಕ್ ಆಮಿಂ ಪಳೊವ್ಚೆಂ ಜಾಲ್ಯಾರ್, ಪ್ರೆಂಚ್ ಬಿಯರ್ ಇಸ್ತಿಹಾರಾಂತ್ ಮದರ್ ತೆರೆಸಾಚಿ ತಸ್ವೀರ್ ದಾಖಯ್ಲ್ಯಾ. ತಸಲೆ ಸಂದರ್ಭ್ ಯೆತಾನಾ ಆಮಿಂ ತಾಚೆ ಖಂಡನ್ ಕರಿಜೆ.
ಹ್ಯಾ ದಿಸಾನಿ ಕೊಂಕ್ಣೆಚಿ ಪರಿಗತ್ ಬರಿಚ್ ಮ್ಹಣ್ಚ್ಯಾಕ್ ಕೊಂಕ್ಣೆಚಿ ಸಭಾರ್ ನವ್ಯೊ ವೆಬ್ಸಾಯ್ಟಿ ಉದೆಲ್ಯಾಂತ್. ಹ್ಯಾ ವೆಬ್ಸಾಯ್ಟಿಚೊ ಸದುಪಯೋಗ್ ಚಡಾವತ್ ವ್ಹಡ್ ವ್ಹಡ್ ಶಹರಾನಿಂ ಜಿಯೆತೆಲ್ಯಾಂಕ್ ಮಾತ್ರ್ ಫಾವೊ ಜಾತಾ, ಕಿತ್ಯಾಕ್ಗೀ ಮ್ಹಳ್ಯಾರ್ ಹಳ್ಳ್ಯಾನಿಂ ಅಂತರ್ಜಾಳ್ ವ್ಯವಸ್ತಾ ತಿತ್ಲಿ ಸಾರ್ಕಿ ನಾಂ. ದೆಕುನ್ ಸಮಾಜಿಚ್ಯಾ ಉಂಚ್ಲ್ಯಾ ವರ್ಗಾಚಾ ಲೊಕಾಂಕ್ ಮಾತ್ರ್ ಫಾವೊ ಜಾತಾ. ಪೂನ್ ಕೊಂಕ್ಣಿ ಭಾಶೆಕ್ ಹಳ್ಳ್ಯಾನಿಂ ಆಸ್ಚೊ ತಿತ್ಲೊ ಮಾನ್ ಆನಿಂ ಗೌರವ್ ಶಹರಾನಿಂ ನಾಂ. ಚಡಾವತ್ ಲೊಕಾಂಕ್ ಜಾಯ್ ಆಸ್ಲ್ಲೆಂ ಮಾಧ್ಯಮ್ ಮ್ಹಳ್ಯಾರ್ ಆಮ್ಚಿಂ ಕೊಂಕ್ಣಿ ಪತ್ರಾಂ ಜಾವ್ನಾಸಾತ್, ದಾಖ್ಲ್ಯಾಕ್ ರಾಕ್ಣೊ, ಕಾಣಿಕ್, ಸೆವಕ್, ಮಿತ್ರ್, ಪಯ್ಣಾರಿ ಜಾವ್ನಾಸಾತ್.
ಆಜ್ಕಾಲ್ ಸಭಾರ್ ಆನಿಂ ಸಭಾರ್ ಕೊಂಕ್ಣಿ ವೆಬ್ಸಾಯ್ಟಿ ಉದೆಲ್ಯಾಂತ್. ಹಾಂಚೆ ಮಧೆಂ ವ್ಹಡ್ ಏಕ್ ಸ್ಪರ್ಧೊಚ್ ಚಲೊನ್ ಆಸಾ. ಭಲಯ್ಕೆಬರಿತ್ ಸ್ಪರ್ದೊ ಗರ್ಜೆಚೊ. ವೆಬ್ಸಾಯ್ಟ್ ತಯಾರ್ ಕರ್ತಾಸ್ತಾನಾ, ವೈಯ್ಯುಕ್ತಿಕ್ ಫಾಯ್ದೊ ಲೆಕಿನಾಸ್ತಾನಾ, ಸಮಾಜಿಚೆಂ ಬರೆಂಪಣ್ ಲೆಕಿಜೆ. ತವಳ್ ಲೊಕಾಚಾ ಮತಿಂತ್ ವೆಬ್ಸಾಯ್ಟಿ ವಿಶ್ಯಾಂತ್ ಬರ್ಯೊ ಅಭಿಪ್ರಾಯೊ ಉದೆತಿತ್.
ಆವಯ್ ಬಾಪಾಯ್ ಭುರ್ಗ್ಯಾಂಕ್ ಉಲೊಂವ್ಕ್ ಶಿಕಯ್ತಾನಾ, ಇಂಗ್ಲೀಶ್ ಭಾಸ್ ತಾಂಕಾ ಶಿಕಯ್ತಾತ್, ತವಳ್ ಭುರ್ಗ್ಯಾಂಕ್ ಕೊಂಕ್ಣಿ ಭಾಸ್ ಯೆನಾಂ. ಘರ್ಚ್ ತಾಂಚೆ ಪಯ್ಲೆಂ ಇಸ್ಕೊಲ್ ಜಾಲ್ಲ್ಯಾನ್ ಘರಾನಿಂ ಕೊಂಕ್ಣಿ ಭಾಸ್ ಶಿಕಯ್ಜೆ. ಕೊಂಕ್ಣಿ ಸಮಾಜಿಂತ್ ಥೊಡೆ ಜುದಾಸ್ ಆಸಾತ್, ತಾಣಿಂ ಕೊಂಕ್ಣಿ ಭಾಶೆಚಿಂ ಕಾರ್ಯಕ್ರಮಾಂ ಮ್ಹಣ್ಜೆ ಸಮ್ಮೆಳಾನಾಂ ಚಲ್ತಾಚ್ತಾನಾಂ ತಾಂಚೆ ವಿಷ್ಯಾಂತ್ ಖಬ್ರೆ ಪತ್ರಾಂನಿ ನಾಕಾ ಜಾಲ್ಲೆಂ, ನ್ಹಯ್ ಅಸ್ಲ್ಲೆಂ ಛಾಪುಂಕ್ ಸಹಕಾರ್ ದಿತಾತ್. ಅಸಲೆಂ ಸರ್ವ್ ರಾವಯ್ಜೆ. ಆನಿಂ ಆಮ್ಚೊ ಬರೊಚ್ ಸಹಕಾರ್ ದೀಜಯ್.
ಆಶೆಂ ಕೊಂಕ್ಣಿ ಲೋಕ್ ಆನಿಂ ಕೊಂಕ್ಣಿ ಭಾಸ್ ಏಕಾ ನಾಣ್ಯಾಚಿಂ ದೋನ್ ಮುಕಾಂ ಮ್ಹಳ್ಯಾಬರಿಂ ಸಾಂಗಾತಾ ಚಮ್ಕತಾತ್. ಪರ್ಗಾವಂತ್ ಆಸ್ಲ್ಲೊ ಕೊಂಕ್ಣಿ ಲೋಕ್ ಕೊಂಕ್ಣಿ ಭಾಸ್ ಯೆನಾತ್ಲ್ಲೊ ಕೊಂಕ್ಣಿ ಭಾಸ್ ಶಿಕೊಂಕ್ ಅತ್ರೆಗ್ತಾತ್. ಆಶೆಂ ಕೊಂಕ್ಣಿ ಲೋಕ್ ಎಕಾ ಬರ್ಯಾ ತಶೆಂಚ್ ಸಂಧಿಗ್ಧ್ ಪರಿಗತೆಂತ್ ಜಿಯೆವ್ನ್ ಆಸಾ. ತಶೆಂ ಕೊಂಕ್ಣಿ ಭಾಸ್ ಸಾಧಾರ್ಣ್ ಜಾವ್ನ್ ಏಕಾ ಬರ್ಯಾ ಪರಿಗತೆಂತ್ ಆಸಾ ಮ್ಹಣ್ಯೆತ್.
About us | Feedback | Contact us
Copyright © 2005
DAAIZ.COM All rights reserved.
Page concept, designed and maintained by Ashawadi
Publications