ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ವಿಮರ್ಶ್ಯಾ ಲೇಖನ್ - 3
ಬೂಕ್: ಬಾಮುಣಾಂಚೆಂ ಚೆಡುಂ
ಕವಿ: ಎಚ್ಚೆಮ್ ಹಾಚೊ ತಿಸ್ರೊ ಕವಿತಾಜಮೊ.
ಪ್ರಸ್ತಾವನ್: ವಲ್ಲಿ ಕ್ವಾಡ್ರಸ್
ಪ್ರಕಾಶಕ್: ಆಶಾವಾದಿ ಪ್ರಕಾಶನ್
[ಬಾಮುಣಾಂಚೆಂ ಚೆಡುಂ ಬುಕಾಚೆರ್ ಕೆಲ್ಲೆಂ ಸಮೀಕ್ಶಾ ಲೇಖನ್]
ಬಾಮುಣಾಂಚೆಂ ಚೆಡುಂ
ಹ್ಯಾ ಚೆಡ್ವಾನ್ ಮಾತ್ಸಿ ಸೊಡ್-ದೊಡ್ ಕೆಲ್ಯಾ!
ಮೆಲ್ವಿನ್ ಪಿಂಟೊ, ನೀರುಡೆ
ಎಚ್ಚೆಮಾಚೆಂ ’ಬಾಮುಣಾಂಚೆಂ ಚೆಡುಂ’ ತಾಣೆಂ ಸಾಂಗ್ಚೆ ಪ್ರಕಾರ್ ತಾಚ್ಯಾ ’ಕಯ್ದ್ಯಾಚ್ಯೊ ಕವಿತಾ’ ಚೊ ಮುಕ್ಲೊ ವಾಂಟೊ. ಖರೆಂಚ್! ಹಾಂಗಾಚೆ ಚಡ್ತಾವ್ ಪಾತ್ರ್ ಕಯ್ದಿಚ್ ಉರ್ತಾತ್. ಸಾಂಕೇತಿಕ್ ಮ್ಹಳ್ಳ್ಯಾಬರಿ ಸಂಗ್ರಹಾಚ್ಯಾ ಪಯ್ಲ್ಯಾ ಕವಿತೆಚೆಂ ನಾಂವ್ ’ಪಿಂಜ್ರೊ’. ’ಕವಿ’ಕ್ ನಾಗ್ಡೊ ಕರ್ಚಿಂ ಕವನಾಂ!
ಹಾಂಗಾಚ್ಯಾ ಕವಿಕ್ ಮುಲಾಜ್ ನಾ. ತಾಣೆ ’ಕವಿ’ ಮ್ಹಳ್ಳ್ಯಾ ಅಸಂಗತ್ ಪಾತ್ರಾಕ್ ಖರೊಚ್ ನಾಗ್ಡೊ ಕೆಲಾ. ಕವಿ ಜಾಲ್ಲ್ಯಾನ್ ಇಮಾನ್ದಾರೆನ್ ಜಿಯೆಂವ್ಕ್ ಯಾ ಪಯ್ಶ್ಯಾಂ ರಾಶಿಚೆರ್ ಖೆಳೊಂಕ್ ಭಾರಿಚ್ ಕಷ್ಟ್!
ನಿಜಾಕೀ ಪಳೆಲ್ಯಾರ್ ಸಂಹ್ಗ್ರಹಾಂತ್ಲ್ಯಾ ಕವಿಚಿ ಅಸ್ಕತ್ಕಾಯ್ ’ಮಾತ್ಯೆಚೆಂ ರುದಾನ್’ ಕವನಾಂತ್ಲ್ಯಾ ದೊವಾ ಥೆಂಬ್ಯಾಚಿ ಅಸ್ಕತ್ಕಾಯ್ಚ್ ಸಯ್! ದೊವಾ ಥೆಂಬೊ ಮ್ಹಣ್ತಾ:
"ಹಾಂವ್ಗೊ ದುಬ್ಳೊ ಕಿತೆಂ ಕರುಂ?
ತಕ್ಲೆರ್ ಮ್ಹಜ್ಯಾ ಉಮ್ಕಳ್ತಾ ಕೊಯ್ತಿ ಮೊರ್ನಾಚಿ."
ದೆವಾ ಥೆಂಬೊ ಅಪುಣ್ ದುಬ್ಳೊ ಮ್ಹಣ್ಚ್ ಲೆಕ್ತಾ. ಸುರ್ಯಾಚಾ ಕೀರ್ಣಾಂನಿ ಅಪುಣ್ ಮೊತಿಯಾಂ ಸಾಂಗ್ಡೊ ಜಾಂವ್ಚಿ ಆಂತರಿಕ್ ಸಕತ್ (Potential) ತೊ ವಿಸರ್ತಾ.
’ವಾಡ್ ಆನಿ ಕವಿತಾ’ ಕವನಾಂತ್ ಕವಿ ಕಿತೆಂ ಸಾಂಗ್ತಾ ಪಳೆಯಾ:
"ಆನಿ ಹಾಂವ್ಗಾ ಕವಿ ಕೊಂಕಣಿಚೊ
ಇಜಾರಾಕ್ ಮ್ಹಜ್ಯಾ ಕುಲ್ಯಾರ್ ಬುರಾಕ್"
ಪಿಸೊ ಜಾಲ್ಯಾ ಶಿವಾಯ್ ಕವಿ ಜಾಂವ್ಕ್ ಸಾಧ್ಯ್ ನಾ ಮ್ಹಳಾಂ ಶೇಕ್ಸ್ಪಿಯರಾನ್. ಇಜಾರಾಕ್ ಕುಲ್ಯಾರ್ ಬುರಾಕ್ ’ಕವಿ-ಸಂಯ್ಬ್’ ಪಾಚಾರ್ಚೊ ಸಂಕೇತ್ ಮ್ಹಳ್ಳೆಂ ಕವಿನ್ ಒಪುನ್ ಘೆತ್ಲ್ಯಾರ್ ಕವಿಕ್ ನಿರಾಸ್ ಜಾಂವ್ಕ್ ಕಾರಣ್ ನಾ.
ಸಾಮಾಜಿಕ್ ಹುಸ್ಕೊ:
ಹಾಂಗಾಚೊ ಕವಿ ಭಗ್ಣಾಂಚೊ, ಸೆನ್ಸಿಟಿವ್ ವ್ಯಕ್ತಿ. ಆಪ್ಲ್ಯಾ ಭಂವ್ತಿಂ ತೊ ತೀಕ್ಷ್ಣ್ ನದರ್ ಘಾಲ್ತಾ ಆನಿ ಥಂಯ್ಚರ್ ಘಡ್ಚಿಂ ಘಡಿತಾಂ ತಾಕಾ ಆವಡ್ತಾತ್. ಆಘಾತ್ ದಿತಾತ್. ಅಶೆಂ ತಾಚ್ಯಾ ದುಕ್ಲ್ಲ್ಯಾ ಭಗ್ಣಾಂಕ್ ಸಬ್ದಾಂಚೆಂ ರೂಪ್ ಮೆಳ್ತಾ. ’ಸಯ್ರೆ’, ’ತುಮಿ ಯೆಯಾ ಫೆಸ್ತ್ ಕರುಯಾಂ’, ’ಮಾಗ್ಣೆಂ’ ಹ್ಯಾ ವರ್ಗಾಂತ್ ಮೆಳ್ಚ್ಯೊ ಕವಿತಾ.
ಚೆಡ್ವಾಕ್ ಕಾಜಾರ್ ಕರುಂಕ್ ಆಸ್ಚ್ಯಾ ದುಬ್ಳ್ಯಾ ಕುಟ್ಮಾಚಿ ದೂಕ್ ಕವಿ ’ಸಯ್ರೆ’ ಕವನಾಂತ್ ಉಚಾರ್ ಕರ್ತಾ: "ಬಾಯ್ ಮಾತ್ರ್ ಅಜೂನ್ ರಡ್ಟಾ.. ಭಿತರ್ಲ್ಯಾ ಕುಡಾಂತ್."
ಫುಡಾರಾವಿಶಿಂ ಭದ್ರತೆವಿಶಿಂ ಖಂತ್ ಕರ್ಚ್ಯಾ ಹರ್ಯೆಕಾ ಚಲಿಯೆಚ್ಯಾ ರಡ್ಣ್ಯಾಕ್ ಬಾಯೆಚೆಂ ರಡ್ಣೆಂ ಸಾಂಕೇತಿಕ್ ಕಶೆಂ.
’ಯೆಯಾ ಫೆಸ್ತ್ ಕರುಯಾಂ’ ವಾಚ್ತಾನಾ ಚಾರ್ ವರ್ಸಾಂ ಆದಿಂ ಗುಜರಾತಾಂತ್ ಚಲ್ಲ್ಲ್ಯಾ ದೊಂಬೆಚೊ, ಮನ್ಶಾ ಸಂಹಾರಾಚೊ ಉಡಾಸ್ ಯೆತಾ. "ವಾಟೆರ್ ಕೊಣ್ ಮೆಳ್ಟಾ ತಾಕಾ ಚಿರುಯಾಂ..’ ಕವಿ ಮನ್ಶಾಂ ರಗ್ತಾಕ್ ತಾನೆಲ್ಲ್ಯಾಂಚ್ಯಾ ಕುಡಿ ಭಿತರ್ ಪ್ರವೇಶ್ ಕರ್ತಾ. ’ಮಾಗ್ಣೆಂ’ ಕವನಾಂತ್ಲ್ಯೊ ಹ್ಯೊ ಪಂಕ್ತಿ ಆಜ್ ಮನ್ಶಾ ಜಿವಾಕ್ ಕಸಲೆಂ ಮೋಲ್ ಮೆಳ್ತಾ ಮ್ಹಳ್ಳೆಂ ಸಾಂಗ್ತಾತ್:
"ಹಾವೆಂ ಕಾಕ್ಸಾಕ್ ವೆಚೆಕಡೆ ಬೊಂಬ್ ಫುಟ್ತಾತ್
ಹಾವೆಂ ಮುತ್ಚೆಕಡೆ ಎಸಿಡಾಂ ವೊತ್ತಾತ್."
ಕವಿ ಮನ್ಶಾಂ ಮನ್ಶಾಂ ಮಧ್ಲ್ಯಾ ಗರ್ಜೆಭಯ್ಲ್ಯಾ ಸಂಘರ್ಷಾ ನಿಮ್ತಿಂ ಖರೊಚ್ ಘಡ್ಬಡ್ಲಾ. ಹ್ಯಾ ಸರ್ವ್ ಅತರ್ವಣಾಂತ್ ಕಾಂಯ್ ತರ್ಯೀ ಪರ್ಯಾರ್ ಆಸಾ?
’ವೋಂಯ್’ ಕವಿತಾ ಆಧುನಿಕ್ ಪಿಳ್ಗೆ ಆನಿ ಮಾಲ್ಘಡ್ಯಾಂ ಮದೆಂ ಜಾಮ್ವ್ಚೆಂ ಸಂಘರ್ಷ್ ಪಿಂತ್ರಾಯ್ತಾ. ಹಾಂಗಾ ’ಆಂಗಾಣ್’ ಏಕ್ ಮಜ್ಬೂತ್ ಸಂಕೇತ್.
"ತುಜ್ಯಾ ಮ್ಹಜ್ಯಾ ಘರಾಕ್ ಆಂಗಾಣ್ ಏಕ್ಚ್
ಹಾಸೊನ್ ಖೆಳೊನ್ ತಾಂತುಂ ಆಮ್ಚಿಂ ಭುರ್ಗಿಂ ವಾಡ್ಲಿಂ"
ಆಜ್ ಮಜ್ಬೂತ್ ಕಟ್ಟೊಣಾಂನಿ ರಾಂವ್ಚ್ಯಾ ಆಧುನಿಕ್ ಪಿಳ್ಗೆಕ್ ’ಆಂಗಾಣ್’ ಮ್ಹಳ್ಯಾರ್ ಕಳ್ಚೆಂ ಕಶೆಂ? ಯಾ ಆಂಗಾಣ್ ಆಸ್ಲ್ಯಾರ್ಯೀ ಆಂಗ್ಣಾಂತ್ ಖೆಳ್ಚೆ ಖೆಳ್ ತಾಂಕಾಂ ಕಳಿತ್ ಆಸ್ಚೆ ತರ್ಯೀ ಕಶ್? ತಾಂಣಿ ಫುಟ್ಬೊಲ್, ಕ್ರಿಕೆಟ್ ಖೆಳ್ಚೆಂ ಆಂಗ್ಣಾಂತ್ ನ್ಹಂಯ್, ಕಂಪ್ಯೂಟರ್ ಮೊನಿಟರಾರ್!
ಬಾಮುಣಾಂಚೆಂ ಚೆಡುಂ:
ಸಂಗ್ರಹಾಂತ್ಲಿ ಪ್ರಮುಕ್ ಆನಿ ಚಡಿತ್ ಚಿಂತ್ಪಾಕ್ ಇಡೆಂ ಕರ್ನ್ ದಿಂವ್ಚಿ ಕವಿತಾ ಹಿ:
"ಬಾಮುಣಾಂಚೆಂ ಚೆಡುಂ ತೀನ್ ಮಯ್ನ್ಯಾಂಚೆಂ ಗುರ್ವಾರ್
ಗಾಮ್ವಾಕ್ ಏಕ್ಚ್ ಗಾಬ್ ಕೊಣಾಚೆಂಗಾ ಹೆಂ ಕಾರ್ಭಾರ್?"
ಬಾಮುಣಾಂಚೆಂ ಚೆಡುಂ ಖಬ್ರೆವಿಣೆಚ್ ಗುರ್ವಾರ್ ಜಾಲಾಂ. ಪುಣ್ ಸಗ್ಳೊ ಗಾಂವ್ ತ್ಯಾ ವಿಶಿಂ ಘಾಬರ್ತಾ! ಕಿತ್ಯಾಕ್? ಕಾಜಾರಾವಿನೆಂ ತಾಕಾ ಗುರ್ವಾದಾರ್ ಆಯ್ಲಾ ಮ್ಹಣ್? ಕೊಣಾಚ್ಯಾಚ್ ಖಬ್ರೆವಿಣೆ ತೆಂ ಮೆರೊ ಉತ್ರೊನ್ ವಚೊನ್ ಪ್ರದುವಾರಾಕ್ ಲಾಗ್ಲೆಂ ಮ್ಹಣ್? ಯಾ ಉಂಚ್ಲ್ಯಾ ವರ್ಗಾಚ್ಯಾ ಎಕಾ ಚೆಡ್ವಾಚೊ ಗರ್ಬ್ ಭರ್ಚೆಂ ಧಯ್ರ್ ಕೊಣೆಂಗೀ ಎಕಾ ಹಡ್ಬ್ಯಾನ್ ಘೆತ್ಲೆಂ ಮ್ಹಣ್?
ಭೋವ್ಶಾ ತಿಸ್ರೆಂ ಕಾರಣ್ಚ್ ಆಸ್ಯೆತ್ ಮ್ಹಣ್ ಮ್ಹಾಕಾ ಭಗ್ತಾ. ಚೆಡುಂ ಗುರ್ವಾರ್ ಜಾಲಾಂ ಮ್ಹಳ್ಳೊ ಹುಸ್ಕೊ ಸಗ್ಳ್ಯಾ ಗಾಂವಾಕ್ ವ್ಹಡ್ ಏಕ್ ವಿಷಯ್ ಜಾಯ್ಜಯ್ ಮ್ಹಣ್ ನಾ. ಪುಣ್ ಹೆಂ ಚೆಡುಂ ಪುರೋಹಿತ್ಶಾಹಿ ವರ್ಗಾಕ್ ಸೆರ್ವಲಾಂ. ತೆಂ ಅಚಾನಕ್ ಗುರ್ವಾರ್ ಜಾಲ್ಲ್ಯಾನ್ ಸಬಾರ್ ಸವಲಾಂ ಉಟೊನ್ ಆಯ್ಲ್ಯಾಂತ್. ಹ್ಯಾ ವರ್ಗಾನ್ ಸ್ತ್ರೀಯೆಕ್ ದಿಂವ್ಚೆಂ ಸ್ಥಾನ್-ಮಾನ್, ತಿಚೆಂ ಸ್ವಾತಂತ್ರ್, ಗಾಮ್ವಾರ್ ಲೊಕಾಕ್ ಬೂದ್ಬಾಳ್ ಸಾಮ್ಗೊನ್ ಆಪ್ಲ್ಯಾ ಘರಾಣ್ಯಾಚೆಂ ಅಸ್ತಿತ್ವ್ ಸುರ್ಯೆಲಾಂ ತೆಂ ವೊಪುನ್ ಘೆಂವ್ಕ್ ತಯಾರ್ ನಾತ್ಲ್ಲ್ಯಾ ಹ್ಯಾ ಹಿಪೊಕ್ರಿತ್ ವರ್ಗಾಚೆಂ ಹಿಜ್ಡೆಂಪಣ್!
ಎಕಾ ದಿಶ್ಟಿನ್ ಪಳೆಂವ್ಕ್ ಗೆಲ್ಯಾರ್ ಭೋವ್ಶಾ ಹಿ ಕವಿತಾ ಆಮ್ಚ್ಯಾ ಸಗ್ಳ್ಯಾ ದೇಶಾಕ್ಚ್ ವೊಂಬೊಂಚೆ ತಸಲಿ. ’ಬಾಮುಣಾಂಚೆಂ ಚೆಡುಂ’ ಭಾರತ್ ಮಾತೆಕ್ ಸಂಕೇತ್ ಕಸೊ ಜಾವ್ನ್ ಘೆತ್ಲ್ಯಾರ್ಯೀ ಹಿ ಕವಿತಾ ವಿವಿಧ್ ಅರ್ಥ್ ಉಭ್ಜಾಯ್ತಾ!
ಪರಕಾಯ್ ಪ್ರವೇಶ್:
ಕವಿ ಜಾಲ್ಲ್ಯಾನ್ ಪರಕಾಯ್ (ಅನ್ಯೇಕ್ಲ್ಯಾಚ್ಯಾ ವ್ಯಕ್ತಿತ್ವಾಂತ್, ಭಗ್ಣಾಂತ್) ಪ್ರವೇಶ್ ಕೆಲ್ಲ್ಯಾ ಶಿವಾಯ್ ಏಕ್ ನೈಜ್ ಕವಿ ಜಾಂವ್ಕ್ ಕಷ್ಟ್. ಹಾಂಗಾಚೊ ಕವಿ ಖಂಡಿತ್ ಪರಕಾಮ್ ಪ್ರವೇಶ್ ಕರ್ಚ್ಯಾಂತ್ ಅವ್ವಲ್.
’ದಾರ್ ಉಘಡ್ ಮಾಂಯ್’ ಕವನಾಂತ್ ತೊ ಮಾಸೂಮ್ ಭುರ್ಗ್ಯಾಚೆ ಕುಡಿ ಭಿತರ್ ಥಾವ್ನ್ ಉಲಯ್ತಾ; ’ಸಯ್ರೆ’ ಕವನಾಂತ್ ಬಾಯೆಚ್ಯಾ ಕಾಳ್ಜಾಂತ್ ತೊ ಘುಸ್ಲಾ; ’ಯೆಯಾ ಫೆಸ್ತ್ ಕರುಯಾಂ’ ಕವನಾಂತ್ ಅತೃಪ್ತ್ ಚಲಿಯೆಚೊ ಉಮಾಳೊ ಕಸೊ ವರ್ತವ್ತಾ.
ಪೆಲ್ಯಾ ಅತ್ಮ್ಯಾಂತ್ ಪ್ರವೇಶ್ ಕರ್ಚೆಂ ಎಕಾ ಕವಿಕ್ ಮೆಳ್ಚೊ ಆವ್ಕಾಸ್. ಹೊ ಆವ್ಕಾಸ್ ಏಕ್ ಸವಾಲ್ಯೀ ಜಾತಾ. ಪೆಲ್ಯಾಚೆ ದಿಷ್ಟಿ ಥಾವ್ನ್ ತಾಣೆಂ ಚೊಯ್ಜಯ್, ಚಿಂತಿಜಾ, ಭಗ್ಸಿಜಾಯ್.
ಸೊಡ್ದೊಡ್ ಕಿತ್ಯಾಕ್?
ಕವಿ ಆಪ್ಲ್ಯಾ ಪ್ರಸ್ತಾವನಾಂತ್ ಲಿಕ್ತಾ" :ಹಾಮ್ತ್ಲ್ಯೊ ಚಡಾವತ್ ಕವಿತಾ ಸುಲಭಾಯೆನ್ ವಾಚ್ಪ್ಯಾಕ್ ಆನಿ ಅನ್ಭೋಗಾಕ್ ಮೆಳ್ಚ್ಯೊ ತಸಲ್ಯೊ. ಸಂಕೀರ್ಣ್ ಇನಾಮಿ ಆನಿ ಕಠಿಣ್ ಭಾಶೆ ಥಾವ್ನ್ ಜಾತಾ ತಿತ್ಲೆಂ ಪಯ್ಸ್ ರಾಂವ್ಚೆಂ ಏಕ್ ಪ್ರಾಮಾಣಿಕ್ ಪ್ರೇತನ್ ಹಾಂಗಾಸರ್ ಕೆಲಾಂ."
ತಾಣೆ ಸಾಂಗ್ಲ್ಲೆಬರಿಚ್ ಹಾಂಗಾಚ್ಯೊ ಚಡ್ತಾವ್ ಕವಿತಾ ಸಲೀಸಾಯೆನ್ ವಾಚ್ಪ್ಯಾಕ್ ಅರ್ಥ್ ಜಾಂವ್ಚ್ಯಾ ತಸಲ್ಯೊ. ಕವಿಚಿ ತೀಕ್ಷ್ಣ್ ನದರ್ ಅಜೂನ್ ಭಲಾಯ್ಕೆಂತ್ ಆಸಾ ಣಾಇ ಚಿಂತ್ಪಾಧಾರ್ಯೀ ಅಬಲ್ ಜಾಂವ್ಕ್ ನಾ. ಪುಣ್ ಕವಿ ತಾಚ್ಯಾ ’ಕಯ್ದ್ಯಾಚ್ಯೊ ಕವಿತಾ’ ಸಂಗಿಂ ಹೊ ಸಂಗ್ರಹ್ ತುಲನ್ ಕರ್ನ್ ಪಳಂವ್?
ನೀಜ್ ಜಾವ್ನ್ ತಶೆಂ ತುಲನ್ ಕರ್ಚೆಂ ಖಂಡಿತ್ ಎಕಾ ವಿಮರ್ಶಕಾಕ್ ಸೊಭ್ಚೆಂ ನ್ಹಂಯ್ ತರೀ ಕವಿ ಹ್ಯಾ ಸಂಗ್ರಹಾಕ್ ’ಕಯ್ದ್ಯಾಚ್ಯೊ ಕವಿತಾ’ಚೊ ಮುಕ್ಲೊ ವಾಂಟೊ ಮ್ಹಣ್ ಸಾಂಗ್ತಾ ದೆಕುನ್ ಕಾಂಯ್ ಹಾಂವೆಂ ತುಲನ್ ಕರ್ಚೆಂ ಸ್ವಾತಂತ್ರ್ಯ್ ಘೆವ್ಯೆತ್ ಕೊಣ್ಣಾ!
’ಕಯ್ದ್ಯಾಚ್ಯೊ ಕವಿತಾ’ ಥಾವ್ನ್ ಹ್ಯಾ ಸಂಗ್ರಹಾಂತ್ ಕವಿನ್ ಅಪ್ಲೆಂ ಕೆಲ್ಲ್ಯಾ ಸೊಡ್ದೊಡಾ ನಿಮ್ತಿಂ ಏಕ್ ಮೇಟ್ ಪಾಟಿಂ ಕಾಡ್ಲಾಂ ಮ್ಹಣ್ ಭಗ್ತಾ ಮ್ಹಾಕಾ! ಎಚ್ಚೆಮ್ ಅಸ್ತಿತ್ವ್ವಾದ್, ನವ್ಯ್, ನವ್ಯೋತ್ತರ್ ವ್ಹಾಳ್ಯಾಂಚೊ ಪ್ರಭಾವಿತ್ ಮ್ಹಳ್ಳೆಂ ’ಕಯ್ದ್ಯಾಚ್ಯೊ ಕವಿತಾ’ ಸಂಗ್ರಹಾಂತ್ ಖರೆಂಚ್ ನಕ್ಕಿ ಜಾತಾ. ಕೊಂಕ್ಣೆಚ್ಯಾ ಮಟ್ಟಾಕ್ ತಿ ವಾಡಾವಳ್ ಖರಿಚ್ ದಾದೊಸ್ಕಾಯೆಚಿ ಆಸ್ಲ್ಲಿ.
ಪುಣ್ ಹ್ಯಾ ಸಂಗ್ರಹಾಂತ್ ಕವಿ ಜಾಯ್ ಮ್ಹಣ್ಚ್ ಸೊಡ್ದೊಡ್ ಕರ್ತಾ ಆನಿ ಆಪ್ಣಾಕ್ ಸಹಜ್ ರಿತಿಂ ಜಮ್ಚ್ಯಾ ಅಸಲ್ಯಾ ಪ್ರಭಾವಾ ಥಾವ್ನ್ ಮೆಕ್ಳೊ ಜಾಂವ್ಚೆಂ ಕೃತಕ್ ಪ್ರೇತನ್ ಕರ್ತಾ. ಥಂಯ್ ಹಾಮ್ಗಾ ಸೊಡ್ಲ್ಯಾರ್ (ಬೊದಿಲೇರ್, ಸನ್ನೇಶಿ, ಸಾಳಿಯೊ ಆನಿ ರಾಯ್, ಮಾತ್ಯೆಚೆಂ ರುದಾನ್) ನವ್ಯ್, ನವ್ಯೋತ್ತರ್ ಶಯ್ಲೆಚಿಂ ಯಾ ಪ್ರಭಾವಾಚಿಂ ಕವನಾಂ ಚಡಿತ್ ನಾಮ್ತ್. ಪುಣ್ ಸಂಗ್ರಹಾಂತ್ ಸ್ವಾರಸ್ಯ್ ಚಡ್ಲಾ ಆನಿ ಕವಿಚೊ ಒಟ್ಟಾರೆ ನಿರಾಸ್ ಮಾತ್ಸೊ ಹಳೂ ಜಾಲಾ ಕಂಡಿತ್.
ಚಡಿತ್ ವಾಚ್ಪ್ಯಾಂಕ್ ಆಪ್ಲ್ಯಾ ಕವಿತಾ ಅರ್ಥ್ ಜಾಯ್ಜಯ್, ಪಾವಾಜಯ್ ಮ್ಹಳ್ಳೊ ಕವಿಚೊ ಅತ್ರೆಗ್ ವಾಜ್ಬಿ. ತಶೆಂ ಮ್ಹಣ್ ಉಂಚ್ಲೆಂ, ಚಡಿತ್ ಚಿಂತ್ಪಾಕ್ ಗ್ರಾಸ್ ಕರ್ಚೆಂ ಸಾಹಿತ್ಯ್ ಜಿರವ್ನ್ ಘೆಂವ್ಕ್ ಶಿಕ್ಷಿತ್ ಜಾಂವ್ಚ್ಯ್ ಕಾಯ್ದೊಯೀ ಎಕಾ ಬುದ್ವಂತ್ ವಾಚ್ಪ್ಯಾಕ್ ಆಸಾ. ನಾ ತರ್ ಆಮಿ ಅಜೂನ್ ಸರ್ವ್ ಸುಖಾಂತ್ಯ್ಚ್ ಆಸ್ಚೆಂ, ರೊಮ್ಯಾಂಟಿಕ್ ಸಾಹಿತ್ಯ್ಚ್ ಪಸಂದ್ ಕರ್ತೆಲ್ಯಾಂವ್ ಆನಿ ಬಾಂಯ್ತ್ಲೆ ಮಾಣ್ಕೆಚ್ ಜಾವ್ನ್ ಉರ್ತೆಲ್ಯಾಂವ್. ತಸಲಿ ಗತ್ ನಾಕಾ!
ಏಕ್ ಮಾತ್ರ್ ಸತ್! ಜಲ್ಮಾನ್ ಕವಿ ಜಾಲ್ಲ್ಯಾಚೆ ಹರ್ ಏಕ್ ಸಂಬಂಧ್, ವಿಚಾರ್, ಬಗ್ಣಾಂ ಉಚಾರ್, ಕಾಳ್ಜಾ ರಜಾರ್ ಕಾವ್ಯಾಳ್ಚ್ ಜಾಲ್ಲ್ಯಾನ್ ಕವಿತಾ ತಾಚ್ಯಾ ಚಾಲ್ತ್ಯಾ ಜಿಣಿಯೆಚಿ ಸ್ವಾಭಾವಿಕ್ ಸ್ಥಿತಿ ಜಾತಾ. ತಶೆಂ ತಾಚ್ಯೊ ಚಡ್ತಾವ್ ಕವಿತಾ ಸಲ್ವಾನಾಂತ್. ತಸಲ್ಯಾ ಪಯ್ಕಿಂತ್ಲೊ ’ಎಚ್ಚೆಮ್’ ಮ್ಹಳ್ಳೊ ಎಕ್ಲೊ!
[ಹೆಂ ವಿಮರ್ಶ್ಯಾ ಲೇಖನ್ ’ಮಿತ್ರ್’ ಹಾಫ್ತ್ಯಾಳ್ಯಾಚೆರ್ ಪರ್ಗಟ್ಲಾಂ]
About us | Feedback | Contact us
Copyright ©
2005 DAAIZ.COM All rights reserved.
Page concept, designed and maintained by Ashawadi Publications
