ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್ ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಕೊಂಕ್ಣಿ ಫುಲಯ್, ಕೊಂಕ್ಣಿ ಪಾಲಯ್, ಕೊಂಕ್ಣಿ ಸದಾಂಚ್ ಬಾಳ್ವೊಂಕ್ ಜಾಯ್.
’ಕೊಂಕ್ಣಿ ಭಾಸೆಚಿ/ಪತ್ರಾಂಚಿ ಆಯ್ಚಿ ಪರಿಗತ್’
ಶರೊ : ಹೆಂ ಲೇಖನ್ ಆಯ್ಕತಾನಾ/ವಾಚ್ತಾನಾ ಇಲ್ಲೆಂ ತಿಕ್ಶೆಂ ಲಾಗೊಂಕ್ ಪುರೊ, ಯಾ ಹ್ಯಾ ಲೇಖನಾಂತ್ಲಿಂ ಮ್ಹಜಿಂ ಭಗ್ಣಾಂ ಕಾಂಯ್ ’ಪಿಸಾಂಟ್’ ಭಗ್ಣಾಂ ಮ್ಹಳ್ಳೆಪರಿಂ ತುಕಾ ಲಾಗೊಂಕ್ ಪುರೊ. ಹಿ ಮ್ಹಜಾ ನದ್ರೆಂತ್ ಆಯ್ಚಿ ಕೊಂಕ್ಣಿ ಪರಿಗತ್ ಮಾತ್ರ್ ಶಿವಾಯ್ ಕೊಣಾಕ್ಯ್ ಸರ್ಗಾಕ್ ಚಡಂವ್ಕ್ ಆನಿಂ ಕೊಣಾಯ್ಕೀ ಯೆಮ್ಕೊಂಡಾಕ್ ಲೊಟ್ಚೊ ಮ್ಹಜೊ ಉದ್ದೇಶ್ ನ್ಹಯ್. ಮ್ಹಜಾ ಹ್ಯಾ ಲೇಖನಾಂಕ್ ಹಾವೆಂ ಹೊ ಸಕಯ್ಲೊ ಆಧಾರ್ ಘೆತ್ಲಾ;
1. ಕೊಂಕ್ಣಿ ಭಾಸ್, ಲೋಕ್, ಪತ್ರಾಂಚಿ ಆಯ್ಚಿ ಪರಿಗತೆವಿಶ್ಯಾಂತ್ಲಿಂ ಮ್ಹಜಿಂ ಭಗ್ಣಾಂ.
2. ’ಆಮ್ಚಿ ಮಾತಿ ಆಮ್ಚಿಂ ಮನ್ಶಾಂ’ ಆಧಾರ್: ಹೇಮಾಚಾರ್ಯಚೆಂ ಲೇಖನ್ (ದಾಯ್ಜಿದುಭಾಯ್).
ಹರ್ಯೆಕಾ ಮನ್ಶಾಚಾ ಜಿಣ್ಯೆಂತ್ ಎಕಾ ಆವಯ್ಚೊ ಮಹತ್ವ್ ಕಸಲೊ ಮ್ಹಳ್ಳೆಂ ಆಮಿಂ ಬರ್ಯಾನ್ ಜಾಣಾಂವ್. ಆವಯ್ ಆಪ್ಲೆಂ ರಗಾತ್ ಆಟವ್ನ್ ಬುರ್ಗ್ಯಾಕ್ ಜೀವ್ ಭರ್ತಾ ಆನಿಂ ಆಪ್ಲ್ಯಾ ಉಸ್ಕ್ಯಾರ್ ಖೆಳವ್ನ್ ’ಮಾಯ್’ ಮ್ಹಣೊನ್ ಉಲೊ ಕರುಂಕ್ ಶಿಕಯ್ತಾ. ಮನಿಸ್ ವಡ್ ಜಾತೆಚ್ ತಾಕಾ ಹೆರ್ ಈಶ್ಟ್ ಮಂತ್ರ್ ಮೆಳ್ತಾತ್ ಆನಿ ಹೆರ್ ಸಂಬಂಧ್ ಗಳ್ಸುಂಕ್ ಸಕ್ತಾ ಆನಿಂ ಹಳ್ತಾರ್ ಆಪ್ಲ್ಯಾ ಆವಯ್ಚೊ ಉಡಾಸ್ ಉಣೊ ಜಾಂವ್ಕ್ ಸಕ್ತಾ. ತರ್ ಹ್ಯಾ ಪ್ರಕ್ರಿಯೆಂತ್ ಏಕ್ ಖರೊ ಪೂತ್/ಧುವ್ ಜಾವ್ನ್ ಹಾಂವೆಂ ಕಿತೆಂ ಕರ್ಯೆತ್? ಹ್ಯಾ ಎಕಾ ಸವಾಲಾಕ್ ಜಾಪ್ ಸೊಧ್ಚಾಕ್ ಜಮೊ ಜಾಲ್ಲ್ಯಾ ಸರ್ವ್ ಕೊಂಕ್ಣಿ ಮೊಗಿಂಕ್ ಪಯ್ಲ್ಯಾ ಸುವಾತೆರ್ ’ಕೊಂಕ್ಣಿ ಅಭಿಯಾನ್ ಸಮಿತಿ’ಚಾ ಹ್ಯಾ ಕಾರ್ಯಾಕ್ ಏಕ್ ಮುಖೆಲಿ/ಸಾಂದೊ ಜಾವ್ನ್ ಹಾಜರ್ ಜಾಲ್ಲ್ಯಾಂಕ್ ಹಾಂವ್ ಬರೊ ಯೆವ್ಕಾರ್ ಮಾಗ್ತಾಂ ಆನಿಂ ಉಲ್ಲಾಸ್ ಪಾಟಯ್ತಾಂ.
ಆಯ್ಚಾ ಕಾಳಾರ್ ಕೊಂಕ್ಣಿ ಭಾಸೆವಿಶ್ಯಾಂತ್, ಕೊಂಕ್ಣಿ ಪತ್ರಾಂ ವಿಶ್ಯಾಂತ್ ಏಕ್ ಘಡಿ ನಿಹಾಳ್ ಕರುಂಕ್ ಹಾವೆಂ ಲಿಖ್ಲೆಲ್ಯಾ ಹ್ಯಾ ಲೇಕನಾಕ್ ಥೊಡೊ ವೇಳ್ ತರೀ ಚೀತ್ ದೀಂವ್ನ್ ಆಯ್ಕೊಂಕ್ ಹಾಂವ್ ಖಾಲ್ತೊ ಉಲೊ ದಿತಾಂ.
ಆಮ್ಕಾಂ ವೇಳ್ ನಾ?;
ದೆವಾನ್ ಕಶೆಂ ಸುರ್ಯಾ/ಚಂದ್ರಾಕ್ ರಚ್ಲೆಂಕೀ ತಶೆಂಚ್ ಮನ್ಶಾಂಕ್ಯ್ ರಚ್ಲೆಂ ಆನಿಂ ಮನ್ಶಾನ್ ತ್ಯಾ ರಚ್ನೆಚಾ ವೆಳಾಕ್ ದೀಸ್ ಆನಿಂ ರಾತ್ ಮ್ಹಳ್ಳೊ ಪ್ರಕಾರ್ ಕೆಲೊ. ಆನಿಂ ಎಕಾ ದಿಸಾಕ್ ಚೊವೀಸ್ ವ್ಹೊರಾಂ ಮ್ಹಣ್ ಕೆಲಿಂ. ಹೆಂ ಸಂಸಾರಾಂತ್ ಜಿಯೆಂವ್ಚಾ ಹರ್ಯೆಕಾ ಜೀವಿಂಕ್ ಲಘು ಜಾತಾ. ಅಶೆಂ ಮ್ಹಣೊನ್ ಕೊಣಾಯ್ಚಾಯ್ ದಿಸಾಕ್ ವೀಸ್ ವ್ಹೊರಾಂ ಯಾ ಕೊಣಾಯ್ಚಾಯ್ ದಿಸಾಕ್ ತೀಸ್ ವ್ಹೊರಾಂ ಮ್ಹಣೊನ್ ನಾಂತ್. ತರ್ ’ಮ್ಹಾಕಾ ವೇಳ್ ನಾ’ ಮ್ಹಳ್ಳಿ ಲದಿನ್ ಹರ್ಶೆಂ ಗಾಂವ್ಚಾ ಮನ್ಶಾಂಕ್ ಆತಾಂ ಕಿತೆಂ ಸಮ್ಜಾಂವ್?
"ಕೊಂಕ್ಣಿ ಭಾಸೆಖಾತಿರ್ ಆಮಿಂ ಪರ್ದೆಸ್ಯಾಂತ್ ಆಸ್ಚಾಂನಿ ಕಿತೆಂ ಕರ್ಯೆತಾ? ಕೊಂಕ್ಣಿ ಪತ್ರಾಂ ಹರ್ಯೆಕಾ ಕೊಂಕ್ಣಿ ಲೊಕಾಕ್ ಪಾವಂವ್ಚಾಕ್ ಆಮಿಂ ಏಕ್ ಕೊಂಕ್ಣಿ ಭಾಸೆಚೊ ಮೊಗಿ ಜಾವ್ನ್ ಕಿತೆಂ ಕರ್ಯೆತಾ?" ಹ್ಯಾ ಮ್ಹಜಾ ಸವಾಲಾಂಕ್ ಮ್ಹಜೊ ಎಕ್ಲೊ ಸಾಂಗಾತಿ ಮ್ಹಾಕಾ ಸವಾಲ್ ಕರಿಲಾಗ್ಲೊ "ಕಿತ್ತುನ್ ಪರ್ಯಾಂತ್ ತುಮಿಂ ಯಾಂ ಕೊಣೀಂ ಕಿತೇಂಯ್ ಕರ್ತಿತ್? ಕಾಳೊಕಾಕ್ ದುರ್ಸೊಂಚೆಪ್ರಾಸ್ ವಾತ್ ಪೆಟಂವ್ಚೆಂ ತತ್ವ್ ಆಯ್ಕೊಂಕ್ ಭೋವ್ ಸಂಪೆಂ ಆನಿ ಸಲೀಸ್ ದಿಸ್ತಾ ಪುಣ್ ಕಾರ್ಯಾನ್ ತಿ ವಾತ್ ಕಿತ್ತುನ್ ಪರ್ಯಾಂತ್ ಪೆಟವ್ನ್ ದವರ್ಯೆತಾ?" ಖಂಡಿತ್ ಜಾವ್ನ್ ತಾಚೆ ವಿಚಾರ್ ಮಾಂದ್ಚೆತಸಲೆಚ್. ತರ್ಯ್ ಆಮ್ಚೆಂ ಹೆಂ ಮೇಟ್ ಖಂಡಿತ್ ಪೆಟಯಿಲ್ಲಿ ಲ್ಹಾನ್ ವಾತ್ ಸಂಸಾರ್ ಸರಾಸರ್ ಪೆಟೊನ್ಂಚ್ ಉರಾಜಯ್ ಮ್ಹಳ್ಳಿ ನ್ಹಯ್. ತೊ ಉದ್ದೇಶ್ಯ್ ಆಮ್ಕಾಂ ನ್ಹಾ. ಹ್ಯಾ ವಿಚಾರಾಂಕ್ ಜಾಪ್ ಜಾವ್ನ್ ಏಕ್ ಲ್ಹಾನ್ ಕಾಣಿಂ ಮ್ಹಜಾ ಉಡಾಸಾಕ್ ಯೆತಾ.
ಕೊಂಕ್ಣಿ ಭಾಸೆಖಾತಿರ್ ವಾವ್ರ್:
ಹೆಂ ಸವಾಲ್ ಫ಼ಕತ್ ಎಕಾ ಬರವ್ಪ್ಯಾನ್ ಮಾತ್ರ್ ವಿಚಾರುಂಕ್ ಮ್ಹಳ್ಳೆಂ ನ್ಹಯ್. ಏಕ್ ವಾಚ್ಪಿ ಜಾವ್ನ್, ಏಕ್ ಕೊಂಕ್ಣಿ ಮಾಯೆಚೊ ಪೂತ್ ಜಾವ್ನ್ ಕಿತೆಂ ಕರ್ಯೆತ್ ಮ್ಹಳ್ಳೆಂ ಹರ್ಯೆಕ್ಲ್ಯಾನ್ ಚಿಂತ್ಚೆಂ ಗರ್ಜ್ ಆಸಾ. ಎದೊಳ್ ಹೆಂ ಸವಾಲ್ ಕರುನ್ ಕೊಂಕ್ಣಿ ಭಾಸೆಖಾತಿರ್ ಜಾಯ್ತೊ ವಾವ್ರ್ ಕೆಲ್ಲೆ ಜಾಯ್ತೆ ಆಸಾತ್. ತಾಣಿಂ ಜಾಯ್ತೊ ವಾವ್ರ್ ಕೆಲಾ ಆನಿಂ ಖಬಾರ್ ನಾಸ್ತಾಂಚ್ ಸಂಪೊನ್ ಗೆಲ್ಯಾತ್. ಆಮ್ಕಾಂ ಪೊಟಾಚಿ ಖಂತ್ ಆಸಾ, ಪೊಟಾಚಿ ಜೋಡ್ ಹರ್ಯೆಕಾ ಜವಾಬ್ಧಾರೆಪ್ರಾಸ್ ವರ್ತಿ. ’ಪೊಟಾಚಿ ಜೋಡ್ಚ್ ಸರ್ವಸ್ವ್’ ಮ್ಹಳ್ಳೆಂ ಚಿಂತಾಪ್ ಖಂಡಿತ್ ಜಾವ್ನ್ ’ಆಮಿಂ ಆಮ್ಕಾಂ ಆನಿಂ ದೇವ್ ಸಮೇಸ್ತಾಂಕ್’ ಮ್ಹಳ್ಳ್ಯಾ ವಿಚಾರಾಕ್ ಸರಿ ಕರ್ಯೆತ್. ಹೆಂ ಉಲಂವ್ಚೊಂ ಹಾಂವ್ ಕಾಲ್ ಖೈಂಗೀ ಆಸ್ಲ್ಲೊಂ ಕಿತೆಂಗೀ ಕರ್ತಾಲೊಂ. ಆಜ್ ಇಲ್ಲೊ ಕೊಂಕ್ಣಿ ವಾವ್ರ್ ಕರುಂಕ್ ಪ್ರೇತನ್ ಕರ್ತಾಂ, ಫ಼ಾಲ್ಯಾಂಚಾ ದಿಸಾಕ್ ಹಾಂವ್ ಪಾತ್ಯೆನಾ. ಕೊಂಕ್ಣಿ ಆಮ್ಚಿ ಭಾಸ್, ಆಮ್ಚಾ ದೆವಾಚಿ ಭಾಸ್, ದೆಖುನ್ ಮಾಲ್ಘಡೊ ಎಕ್ಲೊ ಸಾಂಗ್ತಾ ’ದೇವ್ ಬರೊ ದೀವ್ ದೀಂವ್, ದೇವ್ ಬರಿ ಸಾಂಜ್ ದೀಂವ್, ದೇವ್ ಬರೆಂ ಕರುಂ’ ಹಿಂ ಸೊಭಿತ್ ಚಾಲ್ತಿಂ ಉತ್ರಾಂ ಫ಼ಕತ್ ಕೊಂಕ್ಣೆಂತ್ ನ್ಹಯ್ ಆಸ್ತಾಂ ಆನಿಂ ಖಂಯ್ಚಾ ಭಾಸೆಂತ್ ಆಸಾತ್?
ಕೊಂಕ್ಣೆಕ್ ಹಾವೆಂ ಜಾಯ್ತೆಂ ಕೆಲಾಂ, ಕೊಂಕ್ಣೆನ್ ಆಮ್ಕಾಂ ಕಿತೆಂ ಕೆಲಾಂ?
’ಹಾವೆಂ ಎದೊಳ್ ಜಾಯ್ತೊ ಕೊಂಕ್ಣಿ ವಾವ್ರ್ ಕೆಲಾ, ಪುಣ್ ಕೊಂಕ್ಣೆನ್ ಮ್ಹಾಕಾ ಕಿತೆಂ ಕೆಲಾಂ?’ ಮ್ಹಳ್ಳೆಂ ಚಿಂತಾಪ್ ಕೆದಿಂಕ್ಚ್ ಕೊಣಾಯ್ಚಾಯ್ ಮತಿಂತ್ ಯೆಂವ್ಚೆಂ ನಾಕಾ. ಕೊಂಕ್ಣಿ ಮ್ಹಜಿ ಮ್ಹಾಯ್ಭಾಸ್, ಮ್ಹಜಾ ಆವಯ್ಚಿ ಜತನ್ ಹಾವೆಂ ಕರಿನಾಸ್ತಾಂ ಕೊಣೆ ಕರ್ಚಿ? ದೆಖುನ್ ಹಾವೆಂ ಎದೊಳ್ ಕೆಲ್ಲ್ಯಾ ವಾವ್ರಾಂತ್ ತುಕಾ ಧಾದೊಸ್ಕಾಯ್ ಆಸ್ಲ್ಯಾರ್ಯ್ ಹಾಚಾಕೀ ಬರೊ ವಾವ್ರ್ ಕರುಂಕ್ ಅನಿಕ್ಯ್ ಆಪ್ಣಾಥಂಯ್ ಶ್ಯಾಥಿ ಆಸಾಗೀ ಮ್ಹಳ್ಳೆಂ ಸವಾಲ್ ಕರ್ ಆನಿಂ ಹ್ಯಾ ಸವಾಲಾಕ್ ’ವ್ಹಯ್’ ಮ್ಹಳ್ಳಿ ಜಾಪ್ ಮೆಳ್ತಾ ತರ್ ಖಂಡಿತ್ ಪಾಟಿಂ ಪಳೆನಾಕಾ. ಹೊ ವಾವ್ರ್ ಕರ್ಚೊ ಹಾಂವ್ ಎಕ್ಲೊಂಚ್ ನ್ಹಯ್, ಮ್ಹಜಾಕೀ ಪಯ್ಲೆಂ ಜಾಯ್ತ್ಯಾಂನಿ ಹೊ ವಾವ್ರ್ ಕೆಲಾ, ತಶೆಂಚ್ ಹೊ ವಾವ್ರ್ ಕರ್ಚೊ ನಿಮಾಣೊಯ್ ಹಾಂವ್ ನ್ಹಯ್, ಫ಼ುಡೆಂಯ್ ಹೊ ವಾವ್ರ್ ಕರ್ಚೆ ಜಾಯ್ತೆ ಉದೆತೆಲೆ. ದೆಖುನ್ ಇತ್ಲೆಂಚ್ ಆಮ್ಚಾ ಮತಿಂತ್ ಆಸೊಂದಿ ’ಕಾಲ್ ಪರ್ಯಾಂತ್ ಹಾಂವ್ ಜೆಮೆತಾಲೊಂ, ಆತಾಂ ಜಾಗೊ ಜಾಲಾಂ, ಫ಼ಾಲ್ಯಾಂಚೊ ದೀಸ್ ಹಾಂವ್ ಪಾತ್ಯೆನಾ, ದೆಖುನ್ ಆಜ್, ಆತಾಂಚ್ ಕಾಂಯ್ ಇಲ್ಲೆಂ ಕಾಮ್ ಕರ್ಯಾಂ’. ಕೊಂಕ್ಣೆನ್ ಮ್ಹಾಕಾ ಕಿತೆಂ ಕೆಲಾಂ ಮ್ಹಳ್ಳೆಂ ಸವಾಲ್ ವಿಚಾರ್ಚೆಂ ನ್ಹಾಕಾ, ಕೊಂಕ್ಣೆಕ್ ಹಾವೆಂ ಕಿತೆಂ ಕೆಲಾಂ ಮ್ಹಳ್ಳೆಂ ಸವಾಲ್ ಮಾತ್ರ್ ವಿಚಾರ್ಯಾಂ. ಕಿತ್ಯಾಕ್ ಮ್ಹಳ್ಯಾರ್ ಆಮ್ಕಾಂ ಫ಼ಾರಿಜೆವಾಂಚಿ ದೇಕ್ ಘೆಂವ್ಕ್ ನ್ಹಾಕಾ.
ಉಂದಿರಾ ಖಾತಿರ್ ತೇರ್ಸ್?
ಎಕ್ಲೊ ಕೃಶಿಕ್ ಆಪ್ಲ್ಯಾ ಮಾಡಾಂನಿ ಉಂದಿರ್ ಚಡೊನ್ ಸದಾಂ ಬೊಂಡುಲಾಂ ಸಕ್ಲಾ ಗಳಯ್ತಾ ಮ್ಹಣೊನ್ ಸದಾಂ ಮಾಡಾಂಉಖಾರ್ ದಿಂಬಿ ಘಾಲುನ್ ತೇರ್ಸ್ ಕರಿಲಾಗ್ಲೊ ಖೈಂ. ದೀಸ್ ಪಾಶಾರ್ ಜಾಲೆ ತರ್ಯ್ ಉಂದಿರಾಂನಿ ದಿಂವ್ಚೆ ತ್ರಾಸ್ ಮಾತ್ ಉಣೆಂ ಜಾಲೆನಾಂತ್. ಆನಿಂ ಅಖ್ರೇಕ್ ಎಕ್ಲೊ ವಾಟ್ಸುರಿ, ಸದಾ ಮಾಡಾ ಮುಕಾರ್ ದಿಂಬಿ ಘಾಲ್ಚಾ ಹ್ಯಾ ಕೃಶಿಕಾಕ್ ಸವಾಲ್ ಕರಿಲಾಗ್ಲೊ "ಕಿತೆಂ ತುಂ ಸದಾಂಯ್ ಮಾಡಾ ಮುಖಾರ್ ದಿಂಬ್ಯೆರ್ ಆಸ್ತಾಯ್?" ಮ್ಹಣೊನ್. ಕೃಶಿಕಾನ್ ತಾಕಾ ಜಾಪ್ ದೀವ್ನ್ ಮ್ಹಳೆಂ "ಕಿತೆಂ ಕರ್ಚೆಂ ಸಾಯ್ಬಾ? ಹೆ ಉಂದಿರ್ ಪಳೆ ಮ್ಹಜಾ ಮಿನತೆನ್ ಲಾಯಿಲ್ಲ್ಯಾ ಮಾಡಾಂನಿ ಏಕ್ ಬೊಂಡೊ ಸಯ್ತ್ ಜಾಂವ್ಕ್ ದೀನಾಂತ್. ದೆಕುನ್ ಹಾಂವ್ ತೇರ್ಸ್ ರಜಾರ್ ಕರ್ತಾಂ" ಹಾಸೊನ್ಶೆಂ ವಾಟ್ಸುರಿ ಜಾಪ್ ದೀಲಾಗ್ಲೊ "ಕಿತ್ಯಾಕ್ ತುಂ ತ್ಯಾ ಮಾಡಾಕ್ ಏಕ್ ತಗಡ್ ಬಾಂದಿನಾಂಯ್? ಕಿತ್ಯಾಕ್ ಮ್ಹಳ್ಯಾರ್ ತಗ್ಡಾಕ್ ಧರ್ನ್ ಚಡೊಂಕ್ ಉಂದಿರಾಂಕ್ ಜಾಂವ್ಚೆಂನಾ" ಮ್ಹಣ್. ಕೃಶಿಕಾಕ್ ಹಿ ಸಲಹಾ ರುಚ್ಲಿ ಆನಿಂ ತಾಣೆಂ ತಶೆಂಚ್ ಕೆಲೆಂ. ಉಂದಿರ್ ಅಪಾಪಿಂಚ್ ರಾವ್ಲೆ. ಹಾಂಗಾಸರ್ ಹಾಂವ್ ಮಾಗ್ಣ್ಯಾಂತ್ ಕಾಂಯ್ ಸಾರ್ ನಾ ಮ್ಹಣೊನ್ ಸಾಂಗೊಂಕ್ ಆಶೆನಾ, ದೆಕುನ್ ದೇವ್ಭಕ್ತ್ ಮನಿಸ್ ತಾಪಾನಾಕಾತ್. ಸಂಸಾರ್ ಬಾಗ್ವತಾ, ಪುಣ್ ಬಾಗ್ಶಿತಲೊ ಜಾಯ್ಜಯ್ ಮ್ಹಳ್ಳ್ಯಾ ಅರ್ಥಾರ್ ಹಿಂದಿಚಿ ಏಕ್ ಗಾದ್ ಅಶಿ ಆಸಾ; "ದುನಿಯಾ ಜುಕ್ತಿ ಹೆ ಲೇಕಿನ್ ಜುಕಾನೆವಾಲ ಚಾಹಿಯೆ" ಅಶೆಂ ಆಸ್ತಾಂ ಆಮಿಂಯ್ ಹೆರಾಂಪರಿಂ ಹಾತ್ ಬಾಂದುನ್ ವಗೊಚ್ ಬೊಸ್ಲ್ಯಾಂವ್ ತರ್ ಕಿತೇಂಯ್ ಜಾಯ್ತ್?
ಅಭಿಯಾನ್ ಸಮಿತಿಕ್ ಪ್ರೇರಣ್;
ಹಾಂವ್ ಪಾಟ್ಲ್ಯಾ ಚಡುಣೆಂ ದೋನ್ ವರ್ಸಾಂ ಥಾವ್ನ್ ಕುವೆಯ್ಟಾಂತ್ ದೆಖೊನ್ ಆಸಾಂ ಎಕ್ಲೊ ಕೊಂಕ್ಣಿ ಮೋಗಿ ಜೊ ಸರ್ವಾಂಕ್ ಮೊಗಾಚೊ ಆನಿ ವಳ್ಕಿಚೊ, ಹರ್ಯೆಕಾ ಆಯ್ತಾರಾ ಸಾಂಜೆರ್ ಪಾಂಚ್ ವೊರಾಶೆಂ ಪರ್ನ್ಯಾ ರಾಜಾ ಸ್ಟೋರ್ಲಾಗಿಂ ಆಸ್ಚ್ಯಾ ಕೊಂಕ್ಣಿ ಕೊನ್ಶಾರ್ (ರಸ್ತ್ಯಾ ದೆಗೆನ್) ರಾವೊನ್ ಕೊಂಕ್ಣಿ ಪತ್ರಾಂ ವಾಚಾ ಮ್ಹಣೊನ್ ಉಲೊ ದಿತಾ, ಕೊಂಕ್ಣಿ ಲೊಕಾಂಚೆಂ ಸುಕ್-ದೂಕ್ ಆಯ್ಕತಾ, ಕೊಂಕ್ಣಿ ಪತ್ರಾಂಚಿ ವರ್ಗಣಿ ಜಮೊ ಕರ್ತಾ ಆನಿಂ ಆಪ್ಲ್ಯಾ ಬೊಲ್ಸಾಂತ್ಲೆ ಪೊಯ್ಶೆ ಘಾಲ್ನ್ ಡಿಡಿ ಕರುನ್ ಪತ್ರಾಂಕ್ ದಾಡ್ತಾ. ವರ್ಗಣ್ದಾರಾಂಕ್ ಪತ್ರಾಂ ಪಾವಾನಾತ್ಲ್ಯಾರ್ ತಿಂ ಹಾಚೆಲಾಗಿಂ ವಿಚಾರ್ತಾತ್, ಹೊ ಭೋವ್ ಶಾಂತ್ಪಣಿಂ ಸಮಧಾನ್ ಕರ್ತಾ.
ಕುವೆಯ್ಟಾಂತ್ ಎದೊಳ್ ಜಾಯ್ತೊ ಕೊಂಕ್ಣಿ ವಾವ್ರ್ ಜಾಲಾ ಸಭಾರ್ ರಿತಿಂನಿ. ಆನಿಂ ತೊ ವಾವ್ರ್ ಕೆಲ್ಲೆಚ್ ಅಜೂನ್ ಕರುನ್ ಆಸಾತ್. ತಾಂಕಾ ಪುರಾಸಣ್ ಜಾಂವ್ಚಾಧಿಂ ತಾಂಚೆಂ ಹೆಂ ಮಿಸಾಂವ್ ಮುಕಾರ್ ವರ್ಚಿ ಜವಾಬ್ಧಾರಿ ಆಮ್ಚಿಂ ಯುವಜಣಾಂಚಿ. ಆಮ್ಚಾ ಕುಡಿಂತ್ ವಾಳ್ಚೆಂಯ್ ತೆಂಚ್ ತಾಂಬ್ಡೆಂ ರಗಾತ್ ಜ್ಯೆಂ ತ್ಯಾ ಎಕ್ಲ್ಯಾಚಾ ಆಂಗಾರ್ ವಾಳ್ಚೆಂ. ಆಮ್ಚಾ ಕುಡಿನ್ ಸೆಂವ್ಚೆಂ ವಾರೆಂಯ್ ತೆಂಚ್ ತ್ಯಾ ಎಕ್ಲ್ಯಾನ್ ಸೆಂವ್ಚೆಂ. ತರ್ ಆತಾಂ ತರ್ಯ್ ಆಮಿಂ ತ್ಯಾ ಎಕ್ಲ್ಯಾಪರಿಂ ಕೊಂಕ್ಣಿ ಕಾರ್ಯಾಂನಿ ತಾಚಾ ವ್ಹೊಜ್ಯಾಕ್ ಖಾಂದ್ ಮಾರ್ಯಾಂಗೀ? ಕೊಂಕ್ಣೆಂತ್ ತೊ ಕೋಣ್ಯ್ ನ್ಹಯ್, ಮ್ಹಜೆಪರಿಂ, ತುಜೆಪರಿಂ ಎಕ್ಲೊ ಕೊಂಕ್ಣಿ ಮನಿಸ್, ತಾಕಾಯ್ ಬಾಯ್ಲ್ ಬುರ್ಗಿಂ ಆಸಾತ್, ತಾಕಾಯ್ ಘರ್-ದಾರ್ ಆಸಾ, ತಾಕಾಯ್ ಪಿಡಾ ಶಿಡಾ ಆಸಾ, ತಾಕಾಯ್ ರಗ್ತಾಮಾಸಾಚಿ ಕೂಡ್ ಆಸಾ, ತಾಚಾಯ್ ದೊಳ್ಯಾಂನಿ ದೆಂವ್ಚಿಂ ದುಖಾಂಚ್. ತರ್ ಆತಾಂ ಘಳಾಯ್ ಕಿತ್ಯಾಕ್?
ಹೊಚ್ ಆಮ್ಚೊ ಆಶಾವಾದ್, ಸುರ್ವಾತ್ ಆತಾಂಚ್ ಜಾಂವ್ ಆನಿಂ ಹಿ ಸುರ್ವಾತ್ ಸಂಸಾರಾಚಾ ಕೊನ್ಶಾಂನಿ ವಿಸ್ತಾರೊಂ, ಆಜ್ ತ್ಯಾ ಎಕ್ಲ್ಯಾ ಮನ್ಶಾಚಿ ದೇಕ್ ಘೆವ್ನ್ ಸುರು ಜಾಲಾಂ ಕುಳ್ವಾರಾಚಿ ಕೊಂಕ್ಣಿ ಅಭಿಯಾನ್, ಫ಼ಾಲ್ಯಾಂ ಹೆರ್ ಗಾಂವಾರ್ ಗಾಂವ್ ಕೊಂಕ್ಣಿ ಭಾಸೆಚೊ ಹುಸ್ಕೊ ಆಸ್ಚೆ ತರ್ನಾಟೆ ಮುಖಾರ್ ಯೇಂವ್ದಿತ್, ಸಂಘ್ ಸಂಸ್ಥೆ, ಸಂಚಾಲನಾಂ ಆಪ್ಲ್ಯಾ ಅಜೆಂಡಾಂನಿ ಕೊಂಕ್ಣಿ ವಾವ್ರಾಕ್ಯ್ ಸ್ಥಾನ್ ದೀಂವ್ದಿ, ನಾಂವಾಚೊ ಅಂಗಲಾಪ್ ಆಮ್ಕಾಂ ನಾಕಾ. ಆಮ್ಚೆಮಧೆಂ ವಡ್ಲೊ ಕೋಣ್೦ಚ್ ನ್ಹಯ್, ಲ್ಹಾನ್ ಕೋಣ್೦ಚ್ ನ್ಹಯ್. ಆಮಿಂ ಸಗ್ಳಿಂ ಎಕಾ ಮನಾನ್ ಎಕಾ ಉದ್ದೇಶಾನ್ ಮುಕಾರ್ ಸರ್ಯಾಂ. ಜರೀ ತರೀ ಲ್ಹಾನ್ ಕೋಣ್ ಮ್ಹಣೊನ್ ವಿಚಾರ್ತಿತ್ ತರ್ ತೊ ಹಾಂವ್೦ಚ್ ಮ್ಹಣೊನ್ ಸಮ್ಜೊನ್ ಘೆಯಾ.
ಆಮ್ಚಿ ಆಯ್ಚಿ ಪ್ರಗತಿ;
ಆತಾಂ ಏಕ್ ಘಡಿ ಪಯ್ಲೆಂಚಿ ಆನಿಂ ಆಯ್ಚಿ ಪರಿಗತ್ ಪಳೆಯಾ, ಮೈಲಾಂಚೆಂ ಪಯ್ಣ್ ಚಲೊನ್ ಇಸ್ಕೊಲಾಂತ್ ಶಿಕ್ಚಾ ಎಕಾ ತೆಂಪಾಧ್ಲ್ಯಾ ಬುರ್ಗ್ಯಾಂಕ್ ಆನಿಂ ಘರಾ ಮುಖಾರ್ ರಾಂವ್ಚಾ ಬಸ್ಸಾಂನಿ, ಯಾ ಆಪ್ಲ್ಯಾ ಕಾರಾಂ, ಬಾಯ್ಕಾಂನಿ, ಇಸ್ಕೊಲಾಕ್ ವೆಚಾ ಬುರ್ಗ್ಯಾಂಕ್. ತಫ಼ಾವತ್ ಆಸಾ? ಪಳೆಯಾ ಎಕಾ ತೆಂಪಾರ್ ’ಬೆಸಾಂವ್ ದೀ ಮಾಯ್, ಬೆಸಾಂವ್ ದೀ ಪಪ್ಪಾ’ ಮ್ಹಣ್ಚಾ ಬುರ್ಗ್ಯಾಂಕ್ ಆನಿ ’ಹಾಯ್ ಡಾಡಾ, ಹಾಯ್ ಮೋಮ್’ ಮ್ಹಣ್ಚಾ ಬುರ್ಗ್ಯಾಂಕ್. ಹಾಂತುಂ ಖಂಯ್ಚೆಂ ಬರೆಂ ಖಂಯ್ಚೆಂ ವಾಯ್ಟ್ ಮ್ಹಳ್ಳೊ ಭೇಧ್ ಕರ್ಚೊ ಮ್ಹಜೊ ಶೆವೊಟ್ ನ್ಹಂಯ್. ಹಾಕಾ ಆಮಿಂ ಪ್ರಗತಿ ಮ್ಹಣ್ತಾಂವ್. ’ಭಾಗಿ ಜಲ್ಮಾದೀಸ್’ ಆಸ್ಚೊ ’ಹೆಪ್ಪಿ ಬಡ್ಡೆ’ ಜಾಲ್ಯಾರ್ಚ್ ಆಮ್ಕಾಂ ಧಾದೊಸ್ಕಾಯ್. ಆಮ್ಕಾಂ ಆಮ್ಚಾ ಬುರ್ಗ್ಯಾಂನಿ ’ಪಪ್ಪಾ’ ಯಾ ’ಆನಾ’ ಮ್ಹಣೊನ್ ಉಲೊ ಕೆಲ್ಯಾರ್ ಕಿತೆಂಗೀ ಉಣೆಂಪಣ್. ಸಮಾಜೆ ಮುಖಾರ್ ಆಮಿಂ ಉಣಿಂ ಮ್ಹಳ್ಳೆಂ ಭೊಗಾಪ್. ತ್ಯಾ ಬದ್ಲಾಕ್ ’ಡಾಡಾ’ ಮ್ಹಳ್ಯಾರ್ ಕಿತೆಂಗೀ ವ್ಹಡ್ಪಣ್. ಅಶೆಂ ಹಿ ಪ್ರಗತಿ ಮುಖಾರ್ ವಚೊನ್ ’ಮಾಂಡ್ ಕುರ್ಪೊಣ್’ ಆಸ್ಲ್ಲಿ ಆತಾಂ ಕುಸೊನ್ ವೆಚಾರ್ ಆಸಾ. ತಶೆಂಚ್ ಆಮ್ಕಾಂ ’ಆಜ್ ಆಮ್ಗೆರ್ ಕುಂಕಾಡ್ ನಿಸ್ತೆಂ ಕೆಲಾಂ’ ಮ್ಹಳ್ಯಾರ್ ಕಿತೆಂಗೀ ಉಣೆಂಪಣ್, ತಾಚೆಬದ್ಲಾಕ್ ’ಆಮ್ಗೆರ್ ಚಿಕನ್ ಡಿಶ್ ಕೆಲಾಂ’ ಮ್ಹಳ್ಯಾರ್ ಸರ್ಗಾಕ್ ಗೆಲ್ಲೊ ಅನ್ಭೋಗ್. ಪುಣ್ ಏಕ್ ಸಂಗತ್ ಆಮಿಂ ವಿಸ್ರತಾಂವ್ ಖಂಯ್ಚಿಗೀ ಮ್ಹಳ್ಯಾರ್ ಹ್ಯಾ ಪ್ರಗತೆನಿಮ್ತಿಂ ಕೊಣಾಚೆಂ ಲುಕ್ಸಾಣ್ ಮ್ಹಳ್ಳೆಂ. ಆಮಿಂ ಪ್ರಗತೆಚಿಂ ಪಾವ್ಲಾಂ ದವ್ರುಂಕ್ ಆಸಾತ್, ಖಂಡಿತ್ ಜಾವ್ನ್ ಆಸಾತ್, ಪುಣ್ ತಿಂ ಪ್ರಗತೆಚಿಂ ಪಾವ್ಲಾಂ ಆಮಿಂ ಆತಾಂ ದವರ್ಲ್ಯಾಂತ್ ಕಶಿಂ? ಆಮ್ಕಾಂ ಪ್ರಗತೆಚಿ ನಿಸಣ್ ಚಡೊಂಕ್ ಆಸಾತ್. ಆತಾಂ ತಿ ನಿಸಣ್ ಆಮಿಂ ದವರ್ಲ್ಯಾ ಖೈಂ? ಆಮ್ಚಾ ಆವಯ್ಚಾಚ್ ಹರ್ಧ್ಯಾರ್ ನ್ಹಯ್ಗೀ? ಎಕಾ ತೆಂಪಾಚಿ ಆಮ್ಚಿ ’ಮೀಟ್ ಮಿರ್ಸಾಂಗ್’ ಸೊಡ್ನ್ ’ಪಿಜ಼್ಜಾ’ ಪಾಟ್ಲ್ಯಾನ್ ಆಸಾಂವ್, ಬರೆಂ! ಪುಣ್ ಎಕಾ ತೆಂಪಾಚೆ ಆಮ್ಚಾಚ್ ಘರ್ಚೆ ಭುಂಯಾಂವ್ ರಿತೆ ಪಡ್ಲ್ಯಾತ್ ನ್ಹಯ್ಗೀ?
ವ್ಹಯ್ ಸಂಸಾರಾಕ್ ಪ್ರಗತಿ ಜಾಯ್! ಫ಼ಕತ್ ಕೊಂಕ್ಣಿ ಉಲಂವ್ಕ್ ಶಿಕ್ಲ್ಯಾರ್ ತಾಂಚಿ ಗತ್ ಫ಼ಕತ್ ಕೊನ್ಶಾರ್ ಬಸೊನ್ ’ಮಾಂಡ್ ಕುರ್ಪೊಣ್’ ಮ್ಹಣ್ಚಾ ಮ್ಹಾತಾರೆಪರಿಂ ನ್ಹಯ್ಗೀ ಮ್ಹಳ್ಳ್ಯಾ ವಿಚಾರಾಂತ್ ಖಂಡಿತ್ ಸಾರ್ ಆಸ್ಯೆತ್. ಹಾಂಗಾಸರ್ ವಿಚಾರ್ ಆಸ್ಚೊ ಫ಼ಕತ್ತ್ ಕೊಂಕ್ಣಿ ಭಾಸ್ ಮಾತ್ರ್ ಶಿಕಾ ಮ್ಹಣೊನ್ ನ್ಹಯ್. ಶಿಕ್ಲ್ಲಿ ಕೊಂಕ್ಣಿ ಭಾಸ್ ಉರಯಾ ಮ್ಹಳ್ಳೊ.
ಆಮ್ಚಿಂ ಬುರ್ಗಿಂ;
ಆಮ್ಚಾ ಬುರ್ಗ್ಯಾಂಕ್ ಆಮಿಂ ಮುಖಾರ್ ಹಾಡುಂಕ್ ಆಸಾ, ತಾಣೆಂ ಇಂಗ್ಲಿಶ್ ಶಿಕೊಂಕ್ ಆಸಾ, ಆನಿಂ ಇಂಗ್ಲಿಶ್ ಶಿಕ್ಲ್ಯಾರ್ ಮಾತ್ರ್ ತಾಕಾ ಆಮಿಂ ದೊತೊರ್ ಯಾ ಇಜ್ನೆರ್ ಕರ್ಯೆತಾ. ಅಶೆಂ ಆಮ್ಚಿ ಮತ್ ಪರತ್ ವ್ಯವಹಾರಿಕ್ ಜಾತಾ (ಇಂಗ್ಲಿಶಾಂತ್ ಹಾಕಾ ಬಿಜ್ನೆಸ್ ಮಾಂಯ್ಡ್ ಮ್ಹಣ್ತಾಂವ್). ಆಮ್ಕಾ ಬುರ್ಗಿಂ ಜಾಯ್ ಕಿತ್ಯಾಕ್ ಮ್ಹಳ್ಯಾರ್ ಆಮ್ಕಾಂ ಕಾಜಾರ್ ಮ್ಹಳ್ಳೆಂ ಏಕ್ ಭಂಡ್ವಾಳ್ (ಇನ್ವೆಸ್ಟ್ಮೆಂಟ್) ಆನಿಂ ಬುರ್ಗಿಂ ಜಾವ್ನಾಸಾತ್ ತಾಚಿ ವಾಡ್ (ಇಂಟ್ರೆಸ್ಟ್). ಆತಾಂ ಆಮಿಂ ಆಮ್ಚಾ ಬುರ್ಗ್ಯಾಂಕ್ ಕಶೆಂಯ್ ತರೀ ಪೊಯ್ಶೆ ಕರ್ಚಿಂ ಯಂತ್ರಾಂ ಕರುಂಕ್ ಶಿಕಯ್ಲ್ಯಾರ್ ಜಾಲೆಂ. ತಿಂ ಕೊಣಾಯ್ಕೀ ನಾಗಂವ್ದಿತ್ ಯಾ ಕೊಣಾಯ್ಕೀಯ್ ಚೊರುಂದಿತ್. ಮಾಫ಼್ ಕರಾ ಹಾಂಗಾಸರ್ ಆಮ್ಚಾ ಪ್ರಗತೆಂತ್ ಫ಼ಕತ್ ಲ್ಹಾನ್ ಲ್ಹಾನ್ ಚೊರಿ ಕರ್ಚೆ ಮಾತ್ರ್ ಫ಼ಟ್ಟಿಂಗಾಚಾ ಪಂಗ್ಡಾರ್ ಆಸಾತ್. ದಾಖ್ಲೊ ದಿಂವ್ಚೊ ತರ್ ತೆ ಘರಾಂನಿ ಚೊರಿ ಕರ್ಚೆ, ಕೊಣಾಚಿ ಪೊಕೆಟ್ ಮಾರ್ಚೆ, ಆನಿಂ ಹೆರಾಂಚೊ ವಸ್ತು ಚೊರ್ಚೆ ಮಾತ್ರ್ ಶಿವಾಯ್ ಹೆರ್ ನ್ಹಯ್. ಹೆರ್ ಮ್ಹಳ್ಯಾರ್ ದೇಸಾಚೆ ಫ಼ುಡಾರಿ ಜಾವ್ನ್ ಲೊಕಾಂಚೆಂ ಉಗ್ತ್ಯಾನ್ ಲುಟ್ಚೆ, ಎಕಾ ಸಾದ್ಯಾ ತಕ್ಲಿ ಫ಼ಡಾಫ಼ಡೆಕ್ಯ್ ಬ್ರೇನ್ ಟ್ಯೂಮರ್ ಮ್ಹಳ್ಳಿಂ ನಾಂವಾ ದೀಂವ್ ತಾಂಚೆಂ ಮಾತೆಂ ಚಿರ್ಚೆ, ಯಾ ಸಾದ್ಯಾ ಪೊಟಾಂತ್ ದೂಹ್ಖೆಕ್ ಸಯ್ತ್ ಕಿಡ್ನೆಚಿ ಪಿಡಾ ಮ್ಹಣೊನ್ ವ್ಹೊಲಾವ್ನ್ ಲೊಕಾಂಚೆ ಲಾಖಾಂನಿ ಲುಟ್ಚೆ ಖಂಡಿತ್ ಜಾವ್ನ್ ಹ್ಯಾ ವರ್ಗಾಂತ್ ನಾಂತ್. ತೆ ಮಾನ್ ಬಸ್ಕೆರ್ ಆಸಾತ್, ಕಾನುನಾಂ ವಿಕ್ಚೆ ವಕೀಲ್ ಜಾಂವ್, ಕಾನುನಾಕ್ ಅಪ್ಲ್ಯಾ ಫ಼ಾಯ್ದ್ಯಾಖಾತಿರ್ ಗಳ್ಸುಂಚೆ ಪೊಲಿಸ್ ಜಾಂವ್ ಮಾನ್ ಬಸ್ಕೆರ್ ಆಸಾತ್. ಏಕ್ ಘಡಿ ಆಮಿಂ ಕಾನ್ ಧಾಂಪ್ಯಾಂ ಆಮ್ಕಾಂ ಅಸಲೆಂ ಆಯ್ಕೊಂಕ್ ನಾಕಾ. ಆಮ್ಕಾಂ ಸಂಸಾರಾಂತ್ ಜಾಯ್ತಿ ರಾಟಾವಳ್ ಆಸಾ, ಕ್ಲಬ್ಬಾಂ ಆಸಾತ್, ಪಾರ್ಟ್ಯೊ ಆಸಾತ್, ಪಿಕ್ನಿಕಾಂ ಆಸಾತ್, ಆಮ್ಕಾಂ ವೇಳ್ ನಾ, ಆಮ್ಕಾಂ ಜೆಮ್ ಆಯ್ಲ್ಯಾ ಆನಿಂ ಆಮ್ಕಾಂ ಹಳ್ತಾಚಿ ನೀದ್ ಜಾಯ್, ಆಮಿಂ ನಿದ್ಯಾಂ? ನ್ಹಯ್ಗೀ?
ಹ್ಯಾ ಪರಿಗತೆಂತ್ ಎಕಾ ಕೊನ್ಶಾರ್ ಆಮ್ಚಿ ಕೊಂಕ್ಣಿ ಸಂಸ್ಕ್ರತಿ ಕುರ್ವೊನ್ ಯೆತಾ, ಆಮ್ಚಿ ಭಾಸ್ ಆಳ್ವೊನ್ ಯೆತಾ, ಆಮ್ಚಿಂ ಕೊಂಕ್ಣಿ ಪತ್ರಾಂ ದೀಸ್ ಮೆಜುನ್ ಆಸಾತ್. ತರ್ ಹ್ಯಾ ಪರಿಗತೆಕ್ ಕಿತೆಂ ಕಾರಣ್? ಹಾಚಿಂ ಸೊಧ್ನಾಂ ಕರುಂಕ್ ಗೆಲ್ಯಾರ್ ಅಕ್ರೇಕ್ ಉರ್ತೆಲ್ಯಾಂವ್ ಹಾಂವ್ ಆನಿಂ ತುಂ ಮಾತ್ರ್. ಜಿಂ ಸೊಧ್ನಾಂ ಕರುನ್ ಎಕಾ ಶೆವೊಟಾಕ್ ಪಾವೊಂಕ್ ರಾಕ್ತೆಲಿಂ. ಕಿತೇಂಯ್ ಆಸೊಂ, ಪುಣ್ ಹಿ ಪರಿಗತ್ ಅಶಿಚ್ ಮುಖಾರ್ ವೆಚಿ ಖಂಡಿತ್ ಜಾವ್ನ್ ಬರಿ ನ್ಹಯ್. ತರ್ ಆತಾಂ ಆಮಿಂ (ಖಂಯ್ಚಾಯ್ ಪರಿಗತೆಕ್ ಮ್ಹಜೆವರ್ವಿಂ ಕಿತೇಂಯ್ ಬರೆಂ ಜಾತಾ ತರ್, ಥಂಯ್ ಆಸ್ಚೊ ಆಮಿ ಮ್ಹಳ್ಳೊ ಸಬ್ಧ್ ಸುರು ಜಾತಾ ಹಾಂವ್ ಆನಿ ತುಂ ಥಾವ್ನ್) ಕಿತೆಂ ಕರ್ಯೆತಾ ಮ್ಹಳ್ಳೆಂ ಸವಾಲ್ ಅಪಾಪಿಂಚ್ ಉದೆತಾ.
ಆಮ್ಚೆಂ ಫ಼ಾಲೆಂ ಕಸಲೆಂ?
ಕೊಂಕ್ಣಿ ಭಾಸೆಚಿ ಸೊಭಾಯ್ ಆನಿ ಗ್ರೇಸ್ತ್ಕಾಯ್ ಎದೊಳ್ ಜಾಯ್ತ್ಯಾ ಪದಾಂ ಘಡ್ಪ್ಯಾಂನಿ ಗಾಜಯ್ಲ್ಯಾ ಆನಿಂ ಜಾಯ್ತ್ಯಾಂನಿ ತಿ ಆಯ್ಕಲ್ಯಾ. ಆತಾಂ ಹಾಂವ್ ತಿಚ್ ವಡ್ವಿಕ್, ಪದ್ವಿ ಆನಿ ಮಹಿಮಾ ಗಾಂವ್ಕ್ ವಚಾನಾ, ಆತಾಂ ಕಾರ್ಯಾನ್ ಕಿತೇಂಯ್ ಕರ್ಚೊ ವೇಲ್ ಉದೆಲಾ. ದೆಕುನ್ ಪೊಕೊಳ್ ಉತ್ರಾಂನಿ ಎಕಾಮೆಕಾ ಫ಼ಟಂವ್ಚೆಂ ಆತಾಂ ರಾವಯಾಂ ಆನಿಂ ಆತಾಂ ತರ್ಯ್ ಕಾಂಯ್ ಇಲ್ಲೆಂ ಕಾರ್ಯಾಂನಿ ಕರುಂಕ್ ಸುರ್ವಾತ್ ಕರ್ಯಾಂ.
ಖಂಚೋಯ್ ಮನಿಸ್ ಆಪ್ಲ್ಯಾ ಫ಼ಾಲ್ಯಾಕ್ ದೆಖ್ಲ್ಲೊ ಯಾ ಸಮ್ಜಲ್ಲೊ ನ್ಹಯ್. ಕಾಲ್ಚೊ ದೀಸ್ ಏಕ್ ಚರಿತ್ರಾ ಜಾಲಾ, ಫ಼ಾಲೆಂ ಹಾವೆಂ ಪಳೆಂವ್ಕ್ನಾ. ತರ್ ಆತಾಂ ಉರ್ಲಾ ಫ಼ಕತ್ ’ಆಜ್’ ತರ್ ಘಳಾಯ್ ಕರಿನಾಸ್ತಾಂ ಜ್ಯೇ ಕಿತೆಂ ಮ್ಹಜಾನ್ ಕರುಂಕ್ ಆಸಾ, ತೆಂ ಆಜ್ಚ್ ಕರಿಜಯ್. ಫ಼ಾಲ್ಯಾಂಚಿ ಮ್ಹಜಿ ಗತ್ ಕಸಲಿ ಮ್ಹಳ್ಳೆಂ ಹಾಂವ್ ನೆಣಾಂ. ಆಯ್ಚೆಪರಿಂ ಫ಼ಾಲ್ಯಾಂಯ್ ಕರುಂಕ್ ಸಕ್ತಲೊಂಗೀ ಮ್ಹಳ್ಳೆಂಯ್ ಹಾಂವ್ ನೆಣಾಂ. ದೆಖುನ್ ಆಜ್ ಹಾವೆಂ ಕರುಂಕ್ ಆಸ್ಚೆಂ ಫ಼ಾಲ್ಯಾಂಕ್ ದವರ್ಚೆಂ ನಾಕಾ, ಆಯ್ಚೆಂ ಆತಾಂಚ್ ಕರ್ಯಾಂ. ಹೆ ವಿಚಾರ್ ಆಂವ್ಸರಿ ನ್ಹಯ್ ಮ್ಹಣ್ ಚಿಂತಾಂ.
ಕೊಂಕ್ಣೆಚೊ ಪೋಸ್ ಕರ್ಚೆ ಕೋಣ್?
ಆಯ್ಚಿ ಎದೊಳ್ಚಿ ಕೊಂಕ್ಣಿ ಪರಿಗತ್ ಪಳೆವ್ನ್ ಕೊಂಕ್ಣೆಂತ್ಲೊ ನಾಂವಾಡ್ದಿಕ್ ಅಂಕಣ್ಗಾರ್ ಹೇಮಾಚಾರ್ಯಾ, ದಾಯ್ಜಿದುಭಾಯ್೦ತ್ ಆಪ್ಲ್ಯಾ ’ಆಮ್ಚಿ ಮಾತಿ ಆಮ್ಚಿ ಮನ್ಶಾಂ’ ಅಂಕಣಾಂತ್ ಅಶೆಂ ಸಾಂಗ್ತಾಂ; "ಕೊಂಕಣಿಚ್ಯಾ ಸಾಹಿತ್ಯಾಕ್ ಜಲ್ಮ್ ದಿಲ್ಲಿ ಸಾತ್ವಿಪರ್ಯಾಂತ್ ಶಿಕಪ್ ನಾತ್ಲಲ್ಯಾಂನಿ, ವಾಹನ್ ಚಾಲಕಾಂನಿ, ಕುಜ್ನೆರಾಂನಿ, ಕಾರ್ಖಾನ್ಯಾಂನಿ ಘೊಳ್ಚ್ಯಾ ಕಾಮೆಲ್ಯಾಂನಿ, ಕಾಮ್ ದಂದೊ ನಾಸ್ತಾನಾ ಬೆಕಾರ್ ಭೊಂವ್ಚ್ಯಾ ನಿರಾಧಾರ್ಯಾಂನಿ. ಕೊಂಕಣಿ ವಾಚ್ಚಿ ಸವಯ್ ಜಾಗಿ ದವರ್ಲ್ಲಿ ಕೊಣೆ? ಪಾದ್ರಿ ಮಾದ್ರಿಂನಿ ನ್ಹಯ್, ದಫ಼್ತರಾಂನಿ ಧವ್ಯಾ ನ್ಹೆಸ್ಣಾರ್ ಸೊಭ್ತೆಲ್ಯಾಂನಿ ನ್ಹಯ್, ಬಗಾರ್ ಕೊಂಕಣಿ ಸಾಹಿತ್ಯಾಕ್ ಜಲ್ಮ್ ದಿಲ್ಲ್ಯಾಚ್ ವಯ್ಲ್ಯಾ ಗರಿಬಾಂನಿ, ಆನಿ ಪೆಲ್ಯಾಚ್ಯಾ ಘರಾಂನಿ ಘೊಳ್ಚ್ಯಾ ಆಯಾ-ಬೊಯಾಂನಿ. ತರ್ ಕೊಂಕ್ಣೆಕ್ ಮಾನ್-ಸನ್ಮಾನ್ ಮೆಳ್ಚೊ ಕಸಲೊ? ಕೊಣಾಕ್ ಫ಼ುಟ್ವತೆಲೆಂ ಗರೀಬ್ ಭಾಶೆಂತ್ ಬರಯ್ತೆಲ್ಯಾಂಕ್ ಮಾನ್ ಕರುಂಕ್, ಮರ್ಯಾದೆನ್ ಪಳೆಂವ್ಕ್? ತ್ಯಾ ದೆಖುನ್ ದಿಸ್ತಾ ಕೊಂಕಣಿ ಬರವ್ಪಿ ಜಲ್ಮತೆಲೆ ಗರೀಬ್ಪಣಾಂತ್. ಜೀವ್ ಆಸ್ತಾನಾ ತಾಂಚ್ಯೆ ಜಿಣಿಯೆಭರ್ ಪನ್ವತಿ. ಮೊರ್ತಾನಾ ಸಕ್ಡಾಂ ಸಾಂಗಾತಾ, ಥೊಡಿಂ ಮಾಗ್ಣಿಂ, ಥೊಡ್ಯೊ ವಾತಿ ಆನಿ ದೋನ್ ಮೂಟ್ ಮಾತಿ! ಜಶೆಂ ಜಿಣಿಯೆಂತ್ ತಶೆಂ ಮೊರ್ನಾಂತ್. ನಾ ಸಾರ್ಕೆಂ ಶಿಕಪ್, ನಾ ತರ್ಭೆತಿ. ನಾ ತಾಂಚ್ಯೆ ಮ್ಹಿನತೆಕ್ ಎಕಾ ಕಾಸಾಚೊ ಪ್ರತಿಫ಼ಳ್. ಬರಯ್ತಲೊಚ್ ಪ್ರಕಟ್ತಾಲೊ, ವಿಕ್ತಾಲೊ, ವಾಂಟ್ತಾಲೊ ಆನಿ ಕೋಣ್ಯ್ ವಾಚ್ಪಿ ಮೆಳನಾಸ್ಚ್ಯಾ ವಗ್ತಾ ತೊಚ್ ವಾಚ್ತಾಲೊ."
ಹಿಂ ಉತ್ರಾಂ ಆಯ್ಕಾತಾನಾ ಆತಾಂ ಏಕ್ ಘಡಿ ಕಾಳಿಜ್ ಆಸಾಗೀ ಮ್ಹಣೊನ್ ಪಾರ್ಕಿಯಾಂಗೀ? ಆಸಾ ತರ್ ತ್ಯಾ ಕಾಳ್ಜಾಕ್ ಹಿಂ ಉತ್ರಾಂ ಲಾಗಾನಾಂತ್? ತೊಪಾನಾಂತ್? ದುಖಾನಾಂತ್? ಶಿಜಾನಾಂತ್? ತರ್ ಹೆ ವಳ್ವಳೆ, ಕಳ್ವಳೆ, ರಚ್ಲ್ಲೆ ಕೊಣೆಂ? ಆತಾಂ ಪರತ್ ಹೇಮಾಚಾರ್ಯಾಚಿಂ ಫ಼ುಡ್ಲಿಂ ಉತ್ರಾಂ ಆಯ್ಕವ್ಯಾಂ;
"ಆಮಿಂ ತಿತ್ಲ್ಯಾವೆಗಿಂ ನೆಕೆತ್ರಾಂ ಪಳೆಂವ್ಚಿ ನಾಕಾತ್. ಹೆಂ ಗ್ರಹಣ್ ಅಜೂನ್ ಸುಟೊಂಕ್ ನಾ. ಆಮ್ಚೆ ಕಾಂಯ್ ಫ಼ಾಂಕಿವಂತ್ ಬರವ್ಪಿ ಅಜೂನ್ ಅಂಧ್ಕಾರಾಚ್ಯಾ ಖಂದ್ಕಾಂತ್ ಆಸಾತ್, ತಾಂಚ್ಯೆ ಮ್ಹಿನತೆಕ್ ಫ಼ಳ್ ಮೆಳನಾ, ತಾಂಚ್ಯಾ ಭುರ್ಗ್ಯಾಂಕ್ ಫ಼ಾವೊತೆಂ ಶಿಕಪ್ ಮೆಳನಾ, ತಾಂಚ್ಯೆ ಪಿಡೆಕ್ ಫ಼ಾವೊತೆಂ ವಕತ್ ಮೆಳನಾ. ಆಜ್ ಆಮಿ ಜಾಗೆ ಜಾಯ್ನಾತ್ಲ್ಯಾರ್ ಕೆದ್ನಾಂಚ್ ಜಾಂವ್ಚೆನಾಂವ್, ಆಮ್ಚ್ಯಾ ಖಾಂದಾಂವಯ್ರ್ ಜವಾಬ್ದಾರೆಚೆಂ ವೊಜೆಂ ಆಸಾ. ತೆಂ ವ್ಹಾವಯ್ಜೆ ತರ್ ಆಮಿಂ ನವ್ಯೊ ವಾಟೊ ಸೊಧುನ್ ಕಾಡುಂಕ್ಜಾಯ್."
ಸಂಸಾರ್ ಕಸೊ ಚಲ್ತಾ ಆನಿಂ ಹೆರಾಂ ಕಿತೆಂ ಕರ್ತಾತ್ ಮ್ಹಳ್ಳೆಂ ಹಾವೆಂ ಕಿತೆಂ ಕರಿಜಯ್ ಮ್ಹಳ್ಳ್ಯಾಚೆರ್ ಪ್ರಭಾವ್ ಘಾಲುಂಕ್ ಸಕ್ತಿತ್ ತರ್ಯ್ ಆಮಿಂ ಕಿತೆಂ ಕರಿಜಯ್ ಮ್ಹಳ್ಳೆಂ ಆಮ್ಚಾಚ್ ಹಾತಾಂತ್ ಆಸಾ. ತರ್ ಆತಾಂ ಆಮಿಂ ಕೊನ್ಶಾಂತ್ ಬಸೊನ್ ಕಾಳೊಕಾಕ್ ದುರ್ಸೊಂವ್ಚೆಂ ನಾಕಾ, ಖಂಡಿತ್ ನಾಕಾ, ವಾತ್ ಪೆಟವ್ಯಾಂ, ತಿ ಪೆಟ್ಲ್ಲಿ ವಾತ್ ಕಿತ್ಲೊ ತೇಂಪ್ ಪೆಟೊನ್ ಆಸ್ತೆಲಿ ಮ್ಹಳ್ಳಿ ಗಜಾಲ್ ವೆಗ್ಳಿ ತರ್ಯ್ ಅಸಲ್ಯೊ ವಾತಿ ಸಂಸಾರಾಚಾ ಕೊನ್ಶಾನ್ ಕೊನ್ಶಾನಿ ಪೆಟ್ಚಿ ಗರ್ಜ್ ಆಸಾ, ಆಮ್ಕಾಂ ದೀಸ್ ರಾತ್ ಹೊ ವಾವ್ರ್ ಕರುಂಕ್ ಸಾಧ್ಯ್ ಆಸ್ಚೆಂನಾ ತರ್ಯ್ ಏಕ್ ಸಂಗತ್ ಕಾರ್ಯಾರೂಪಿಂ ಕರುಂಕ್ ಸಾಧ್ಯ್ ಆಸಾ ತಿ ಖಂಯ್ಚಿಗೀ ಮ್ಹಳ್ಯಾರ್; ಕೊಂಕ್ಣಿ ಕಾರ್ಯಾಂಕ್ ಕಿತ್ತುನ್ ಪರ್ಯಾಂತ್ ಸಾಧ್ಯ್ ಆಸಾಗೀ ತಿತ್ತುನ್ ಪರ್ಯಾಂತ್ ಆಮಿಂ ವೆತೆಲ್ಯಾಂವ್. ಕೊಂಕ್ಣಿ ಪತ್ರಾಂ ಕಿತ್ತುನ್ ಪರ್ಯಾಂತ್ ಆಸ್ತೆಲಿಂಗೀ ತಿತ್ತುನ್ ಪರ್ಯಾಂತ್ ಆಮಿಂ, ಆಮ್ಚಿಂ ಸಯ್ರಿಂ, ಮೊಗಾಚಿಂ ವಾಚ್ತೆಲ್ಯಾಂವ್. ಆನಿಂ ಅಖ್ರೇಕ್ ಆನಿ ಹೆಂ ಸರ್ವಾಂಚಾಕೀ ಪಯ್ಲೆ ಜಾವ್ನ್ ಆಮಿಂ ಕೊಂಕ್ಣಿ ಭಾಸ್ ಉಲಯ್ತೆಲ್ಯಾಂವ್. ಆಮ್ಚಿ ವೆವಹಾರಿಕ್ ಭಾಸ್ ಖಂಯ್ಚೀಯ್ ಆಸೊಂ ಪುಣ್ ಕೊಂಕ್ಣಿ ಭಾಸ್ ಆಮ್ಚಿ ಮಾಯ್ಭಾಸ್ ಆನಿಂ ಆಮ್ಚಾ ಮಾಂಯ್ಕ್ ಆಮಿಂ ಜಿವಂತ್ ಆಸ್ತಾಸರ್ ಜೀವ್ ದವರುಂಕ್ ಕಮರ್ ಬಾಂಧ್ತೆಲ್ಯಾಂವ್ ಆನಿಂ ತಿಚಾ ದುದಾಚೆಂ ಋಣ್ ಫ಼ಾರಿಕ್ ಕರುಂಕ್ ಪೆಚಾಡ್ತೆಲ್ಯಾಂವ್.
ಅಖ್ರೇಕ್ ಮೊರ್ಚಾ ಘಡಿಯೆ ಪರ್ಯಾಂತ್ ಆಮ್ಚೊ ಉಸ್ವಾಸ್ ಅಸೊ ಆಸೊಂ ’ಕೊಂಕ್ಣಿ ಉಲಯ್, ಕೊಂಕ್ಣಿ ಉರಯ್, ಆಬ್ಳೆ ಕೊಂಕ್ಣಿ ಆಮ್ಚಿ ಆವಯ್ ’. ತಶೆಂ ಮ್ಹಣೊನ್ ಹಾಂವ್ ಕಾಂಯ್ ಕೊಂಕ್ಣೆಚೊ ಅತಿರೇಕ್ವಾದಿ (Extremist) ನ್ಹಯ್, ’ಖಾವೊ ಕೊಂಕಣಿ, ಪಿವೊ ಕೊಂಕಣಿ, ಜೀಯೊ ಕೊಂಕಣಿ’ ಮ್ಹಳ್ಳೊ ಧ್ಯೇಯ್ ದವ್ರುನ್ ಸಕಾಳಿಂ ಥಾವ್ನ್ ಸಾಂಜೆರ್ ಪರ್ಯಾಂತ್ ಕೊಂಕ್ಣಿ ಕೊಂಕ್ಣಿ ಮ್ಹಳ್ಳಿ ಲದಿನ್ ಕರ್ ಮ್ಹಳ್ಳೊ ವಿಚಾರ್ಯ್ ಮ್ಹಜೊ ನ್ಹಯ್. ಹಾಂವ್ಯ್ ಹೆರ್ ಭಾಸೆಚೆಂ ಸಾಹಿತ್ಯ್ ವಾಚ್ತಾಂ, ಹೆರ್ ಭಾಸೊ ಜಾಣಾಂ, ತರ್ಯ್ ಕೊಂಕ್ಣಿ ಭಾಸೆಕ್ ಲ್ಹಾನ್ ಭಾಸ್ ಮ್ಹಣೊನ್ ಲೆಕಿನಾ ಆನಿಂ ಹೆಂಚ್ ಹಾಂವ್ ಸಾಂಗೊಂಕ್ ಆಶೆತಾಂ ಕೊಂಕ್ಣಿ ಕೆದಿಂಕ್ಚ್ ಲ್ಹಾನ್ ಭಾಸ್ ಮ್ಹಣೊನ್ ಕೊಣೇಂಯ್ ಚಿಂತಿನಾಯೆ.
ಇತ್ಲೆಂ ಆಯ್ಕೊಂವ್ಚೆಂ ಸಯ್ರಣ್ ತುವೆಂ ಘೆತ್ಲ್ಯಾಯ್ ತರ್ ಫ಼ುಡ್ಲಿಂ ಉತ್ರಾಂ ತುಕಾ ಖಂಡಿತ್ ಜಾವ್ನ್ ಸಮ್ಜಾತೆಲಿಂಚ್. ತುಮಿಂ ಜಾಣಾಂ ಆಸ್ಚೆಪ್ರಕಾರ್ ಕೊಂಕ್ಣಿ ಪತ್ರಾಂ, ಕೊಂಕ್ಣಿ ಭಾಸ್ ಉಲಂವ್ಚಾ ಹರ್ಯೆಕಾ ಮನ್ಶಾನ್ ವಾಚಿಜಯ್. ಹ್ಯಾ ವರ್ಸಾಚಾ ಕೊಂಕ್ಣಿ ಅಭಿಯಾನಾಕ್ ಆಮಿಂ ’ದಿವೊ’ ಪತ್ರ್ ವಿಂಚ್ಲಾಂ. ಪುಣ್ ಹೆರ್ ಖಂಚಾಯ್ ಪತ್ರಾಂಕ್ ವರ್ಗಣಿ ಮೆಳ್ಳಿ ತರ್ ಆಮಿಂ ತಿ ಘೆತೆಲ್ಯಾಂವ್. ತ್ಯಾ ಶಿವಾಯ್ ’ದಿವೊ’ ಪತ್ರಾಚಿ ಪಾಂಚ್ ವರ್ಸಾಂಚಾ ಎಕಾ ವರ್ಗಣೆಕ್ ಫ಼ಕತ್ ರು.800 ಆಸ್ತೆಲೆ. (ಆಟ್ಶಿಂ ರುಪಯ್ ಮಾತ್ರ್). ದೆಕುನ್ ತುಮ್ಚಾ ಮೊಗಾಚಾಂಕ್, ಇಶ್ಟಾಂಕ್, ಕುಟ್ಮಾಚಾಂಕ್, ಸೆಜಾರ್ಯಾಂಕ್, ಎಕ್ಲ್ಯಾ ಥಾವ್ನ್ ಎಕ್ಲ್ಯಾಕ್ ಹಿ ಖಬಾರ್ ದಿಯಾ ಆನಿಂ ಹೊ ಅಗೋಸ್ತ್ ಆನಿ ಸಪ್ತೆಂಬರ್ ಮಯ್ನೊ ಆಮ್ಚಾ ಮಾಯ್ಭಾಸೆಖಾತಿರ್ ಖರ್ಚುಯಾಂ. ಆನಿಂ ಹರ್ಯೆಕಾ ಮುಖೆಲ್ಯಾನ್ ಉಣ್ಯಾರ್ ಉಣೆಂ ಧಾ ವರ್ಗಣ್ಯೊ ಜಮೊ ಕರ್ಚಿ ಜವಾಬ್ಧಾರಿ ಘೆಜೈ ಆನಿಂ ಹರ್ಯೆಕಾ ಸಾಂದ್ಯಾನ್ ಪಾಂಚ್ ವರ್ಗಣ್ಯೊ ಘೆಂವ್ಚಿ ಜವಾಬ್ಧಾರಿ ಘೆಂವ್ಕ್ ಹಾಂವ್ ಉಲೊ ದಿತಾಂ.
ಹ್ಯಾ ಭಾಗಿ ಕಾಮಾಂತ್ ಆಮಿಂ ವರ್ತಿ ಮಿನತ್ ಕರುಂಕ್ ಆಸಾ ತರ್ಯ್ ಆಮಿಂ ಯುವಜಣ್, ಯುವ ಬರವ್ಪಿ, ಯುವ ವಾಚ್ಪಿ ಆತಾಂ ಎಕಾ ಬೊಂದೆರಾಖಾಲ್ ಎಕ್ಟಾಂಯ್ ಜಾಲ್ಯಾಂವ್ ಆಸ್ತಾಂ ಹೆಂ ಕಾಮ್ ಆಮ್ಚಾಂ ಪೊಂತಾಕ್ ಪಾವಂವ್ಕ್ ಖಂಡಿತ್ ಜಾವ್ನ್ ಸಾಧ್ಯ್ ಆಸಾ. ಇತ್ಲೆಂ ಸಾಂಗೊನ್ ಮ್ಹಜಿಂ ಸದ್ದ್ಯಾಚಿಂ ದೋನ್ ಉತ್ರಾಂ ಸಂಪಯ್ತಾಂ,
ಮಾಯಾಮೊಗಾಸವೆಂ,
ವಲ್ಲಿ ಕ್ವಾಡ್ರಸ್, ಅಜೆಕಾರ್
ಏಕ್ ಕೊಂಕ್ಣಿ ಸೆವಕ್,
[ಹೆಂ ಲೇಖನ್ 2003 ಅಗೋಸ್ತಾಚಾ 8 ತಾರಿಕೆರ್ ಕುವೆಯ್ಟಾಂತ್ ಜಾಲ್ಲ್ಯಾ ಕೊಂಕ್ಣಿ ಅಭಿಯಾನ್ ಸಮಿತಿಚಾ ಉಗ್ತಾವಣ್ ಕಾರ್ಯಾಂತ್ ವಾಚುನ್ ಸಾಂಗ್ಲಾಂ]
ಕೊಂಕ್ಣಿ ಅಭಿಯಾನ್ ಸಮಿತಿಚಾ ವಾವ್ರಾಕ್ ಲಗ್ತಿ ಜಾಲ್ಲಿಂ ಲೇಖನಾಂ
ಕೊಂಕ್ಣಿ ಅಭಿಯಾನ್ ಸಮಿತಿಕ್ ಆಯಿಲ್ಲೆ ಸಂದೇಶ್-ಅಭಿಪ್ರಾಯ್
ಕೊಂಕ್ಣಿ ಅಭಿಯಾನ್ ಸಮಿತಿ ಮ್ಹಳ್ಯಾರ್ ಕಿತೆಂ? - ಲೇಖನ್
ಸ್ಪಿರಿತಾಚೊ ವಾವ್ರ್ ಖಂಡಿತ್ ಫಳ್ ದಿತಾ - ಲೇಖನ್
ಕೊಂಕ್ಣಿ ಅಭಿಯಾನ್ ಸಮಿತಿಚೊ ಎದೊಳ್ಚೊ ವಾವ್ರ್
About us | Feedback | Contact us
Copyright ©
2005 DAAIZ.COM All rights reserved.
Page concept, designed and maintained by Ashawadi Publications