ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್ ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
’ಜೆದ್ನಾಂ ತುಂ ಹೆರಾಂಚಾ ಬರ್ಯಾಪಣಾವಿಶ್ಯಾಂತ್ ಚಿಂತಾಯ್, ತೆದ್ನಾಂ ತುಜೆಂ ಬರೆಂಪಣ್ ಅಪಾಪಿಂ ಜಾತೆಲೆಂ’ - ಡಯಾನ್ ಡಿ’ಸೋಜ್
ಕೊಂಕ್ಣಿ ಕಾರ್ಭಾರಿ - 19.
ನಾಂವ್: ಜೋಸೆಫ್ ಮಥಾಯಸ್.
ಜಲ್ಮಾಲ್ಲಿ ತಾರಿಕ್: 1-05-1965.
ಜಲ್ಮಾಲ್ಲೊ ಗಾಂವ್: ಫೆರಾರ್.
ಆವಯ್ ಬಾಪಾಯ್ಚೆ ನಾಂವ್: ಶ್ರಿಮತಿ ಮೇರಿ ಮಥಾಯಸ್ ಆನಿ ದೆ|ಲಾರೆನ್ಸ್ ಮಥಾಯಸ್.
ಶಿಕಾಪ್: ಸಾಂ|ಲುವಿಸ್ ಕಾಲೇಜ್ ಮಂಗ್ಳುರ್.
ಪತಿಣ್: ಫ್ಲಾವಿಯಾ ಮಥಾಯಸ್ (29-12-1997 ವೆರ್ ಲಗ್ನಾಭೆಸಾಂತ್ ಎಕ್ವಟ್ಲಿಂ).
ಭುರ್ಗೆಂ: ಟಿಶಾ ಮಥಾಯಸ್.
[ಮಾನೆಸ್ತ್ ಜೋಸೆಫ್ ಮಥಾಯಸಾಸವೆಂ ಬಾಯ್ ವಾಯ್ಲೆಟ್ ಜೆ. ಪಿರೇರಾ]
ಏಕ್ ಯುವಉಧ್ಯಮಿ ಜಾವ್ನಾಸೊನ್ ಕೊಂಕ್ಣಿ ಮೊಗಾನ್ ಕೊಂಕ್ಣಿ ವಾವ್ರ್ ಕರ್ಚಾಂಕ್ ಪಾಟಿಂಬೊ ದಿತೆಲೆ ಆಮ್ಚಾ ಸಮಾಜೆಂತ್ ಆಸ್ಚೆ ಭೋವ್ ಥೊಡೆ, ತಾಂತ್ಲೊ ಎಕ್ಲೊ ಮಾನೆಸ್ತ್ ಜೋಸೆಫ್ ಮಥಾಯಸ್ ಮ್ಹಳ್ಳೆಂ ಅಜೂನ್ ಮುಖಾಮುಖಿ ಮೆಳೊಂಕ್ ನಾಂ ತರ್ಯೀ, ಹಾಚೆವಿಶಿಂ ಜಾಯ್ತೆಂ ಆಯ್ಕೊನ್ ಹಾಚೊ ಅಭಿಮಾನಿ ಜಾಲಾಂ. ತಾಚೊ ಖಾಸ್ ಮಿತ್ರ್; ಕೊಂಕ್ಣೆಂತ್ಲೊ ಫಾಮಾದ್ ಗಾವ್ಪಿ ರೊನಿ ಡಿ’ಕುನ್ಹಾಕ್ ಮುಖಾಮುಖಿ ವಳ್ಕೊನ್, ತಾಚೆಂ ಸಾಂದೆಂಪಣ್, ಖಾಲ್ತೆಂಪಣ್ ಆನಿ ಮೊಗಾಳ್ ಮಯ್ಪಾಸಿ ಶೆಗುಣಾಂ ಥಾವ್ನ್ ಹಾಚೆವಿಶಿಂ ಪಾರ್ಕಿಲಾಂ, ಜಶೆಂ ಇಂಗ್ಲಿಶಾಂತ್ ಏಕ್ ಸಾಂಗಾಪ್ ಆಸಾ (You tell me your friends and I tell you who you are). ಮಾನೆಸ್ತ್ ಜೋಸೆಫ್ ಮಥಾಯಸಾಕ್ ಕೊಂಕ್ಣಿ ಕಾರ್ಭಾರಿ ಜಾವ್ನ್ ತುಮ್ಚೆಸಮೊರ್ ಪ್ರಸ್ತುತ್ ಕರುಂಕ್ ಆಮಿಂ ಭೋವ್ ಸಂತೊಸ್ ಪಾವ್ತಾಂವ್. -ಸಂ.
ಸಂವಾದ್ ಚಲವ್ಪಿಣ್: ವಾಯ್ಲೆಟ್ ಜೆ. ಪಿರೇರಾ.
1. ತುಮ್ಕಾಂ ಜೆದ್ನಾಂ ಹಾಂವ್ ವಳ್ಕೊಂಕ್ ಲಾಗ್ಲಿಂ ತುಮ್ಚಾ ಕೊಂಕ್ಣಿ ಮೊಗಾಕ್ ಲಾಗೊನ್. ಕೊಂಕ್ಣೆಚ್ಯಾ ಮೊಗಾನ್ ತೊವ್ಲ್ಲ್ಯಾ ತುಮ್ಕಾಂ ಪಯ್ಲ್ಯಾನ್ ಪಯ್ಲೆ ಅಭಿನಂದನ್. ತುಮ್ಕಾ ಕೊಂಕ್ಣೆ ಥಂಯ್ ಇತ್ಲೊ ಮೋಗ್ ಆನಿ ಹುಸ್ಕೊ ಖಂಯ್ ತಾವ್ನ್ ಉದೆಲೊ??
ಜಾ: ಕೊಂಕ್ಣಿ ಆಮ್ಚಿ ಮಾಯ್ಭಾಸ್. ಕೊಂಕ್ಣಿ ಸುರು ಜಾತಾ ಆಮ್ಚ್ಯಾ ಘರಾ ಥಾವ್ನ್. ಹಾಂವೆಂ ಕೊಂಕ್ಣಿ ಖಾತಿರ್ ವಾವ್ರುಂಕ್ ಸುರು ಕೆಲ್ಲೆ ಮ್ಹಜ್ಯಾ ಕಾಲೆಜಿಚಾ ವೆಳಾರ್. ಮುಖ್ಯ್ ಜಾವ್ನ್ ಹರ್ಯೆಕಾ ಮ್ಹಜ್ಯಾ ಚಟುವಟಿಕೆಂನಿ ಕೊಂಕ್ಣೆಕ್ ಹಾಂವೆ ಪಯ್ಲೊ ಮಾನ್ ದಿಲಾ. ಮ್ಹಜೆಂ ಶಿಕಾಪ್ ಸಂಪ್ಲ್ಲ್ಯಾ ಉಪ್ರಾಂತ್ ಹಾಂವ್ ಪರ್ಗಾಂವಾಕ್ ಆಯ್ಲೊಂ. ಹ್ಯಾ ಸಗ್ಳ್ಯಾ ಮ್ಹಜ್ಯಾ ಕಾಮಾಚ್ಯಾ ರಾಟಾವಳಿ ಮಧೆಂಯ್ ಹಾಂವ್ ಕೊಂಕ್ಣೆಕ್ ಚಡ್ ಆನಿ ಚಡ್ ಪ್ರೋತ್ಸಾಹ್ ದೀವ್ನ್ ಆಸಾ, ಕಿತ್ಯಾಕ್ ಕೊಂಕ್ಣಿ ಮಾಂಯೆಚ್ಯಾ ಉದರಿಂ ಜಲ್ಮೊನ್ ಕೊಂಕ್ಣಿ ಮಾಂಯ್ಚಾ ಉಸ್ಕ್ಯಾರ್ ಖೆಳೊನ್ ವ್ಹಡ್ ಜಾಲ್ಲ್ಯಾ ಮ್ಹಾಕಾ ಕೊಂಕ್ಣಿ ಮಾಂಯೆಚೊ ಮಾನ್ ಕಿತೆಂಚ್ಚ್ ಉಣೆಂ ಜಾಂವ್ಕ್ ಸೊಡುಂಕ್ ನ್ಹಜೊ ಮ್ಹಳ್ಳೊ ಮ್ಹಜೊ ಇರಾದೊ ಜಾವ್ನಾಸಾ.
2. ತುಮಿ ಕೊಂಕ್ಣೆ ಖಾತಿರ್ ವಾವ್ರ್ ಕರ್ಚ್ಯಾಂಕ್ ಸದಾಂಚ್ಚ್ ತುಮ್ಚ್ಯಾ ಕುಮ್ಕೆಚೊ ಹಾತ್ ದೀವ್ನ್ಂಚ್ಚ್ ಆಸಾತ್? ಹ್ಯೇವಿಶಿಂ ತುಮ್ಚೆ ವಿಚಾರ್ ಕಸ್ಲೆ?
ಜಾ: ಕೊಂಕ್ಣಿ ಮ್ಹಜಿ ಮಾಯ್ಭಾಸ್ ಜಾಲ್ಲೆ ವರ್ವಿಂ ಕೊಂಕ್ಣೆಚ್ಯಾ ಉದರ್ಗತೆಕ್ ವಾವುರ್ಚೊ ಮ್ಹಜೊ ಕಾಯ್ದೊ ಜಾವ್ನಾಸಾ. ಆಮ್ಚ್ಯಾ ಕೊಂಕ್ಣೆಂತ್ ಸಭಾರ್ ಪರ್ನೆಂ ತಶೆಂ ನವೆಂ ಸಾಹಿತಿ ತಶೆಂಚ್ಚ್ ಕಲಾಕಾರ್ ಆಸಾತ್. ತಾಣಿಂ ಕೊಂಕ್ಣೆ ಖಾತಿರ್ ಕರ್ಚಿಂ ಕಾಮಾಂ ಪಳೆವ್ನ್ ಖಂಡಿತ್ ಜಾವ್ನ್ ಮ್ಹಜೆ ಕಾಳಿಜ್ ಉಮಾಳೊನ್ ಯೆತಾ. ಹ್ಯಾ ಸರ್ವ್ ಜಾಣಾರ್ಯಾಂನಿ ತಾಂಚಿ ಸೆವಾ ಕೊಂಕ್ಣೆಕ್ ಅರ್ಪಿತಾನಾ ಮ್ಹಜ್ಯಾ ಕಾಳ್ಜಾಂತ್ ಕೊಂಕ್ಣೆಚೊ ಮೋಗ್ ಚಡ್ ಆನಿ ಚಡ್ ಉದೆವ್ನ್ ಆಯ್ಲೊ. ಮ್ಹಜೆ ತಾವ್ನ್ ಕಿತೆಂಯ್ ತರೀ ಫುಲ್ ಯಾ ಫುಲಾಚಿ ಪಾಕ್ಳಿ ದೀವ್ನ್ ಕೊಂಕ್ಣೆಕ್ ಫ್ರೋತ್ಸಾಹ್ ದಿಂವ್ಚೆ ಮನ್ ಮ್ಹಜೆ ಥಂಯ್ ಉದೆಲೆಂ. ಆನಿ ಹೆಂ ಆಜೂನ್ ಪರ್ಯಾಂತ್ ಹಾಂವ್ ಮುಕಾರುನ್ ಆಯ್ಲಾಂ.
3. ಥೊಡೆ ಪಾವ್ಟಿಂ ತುಮ್ಚೆ ಥಾವ್ನ್ ಆಧಾರ್ ಮಾಗ್ಲ್ಲ್ಯಾ ಸಂಸ್ಥ್ಯಾಂ ಥಾವ್ನ್ ತುಮ್ಕಾಂ ಜೊಕ್ತೊ ಮಾನ್ ಮೆಳಾನಾ. ತೆದ್ನಾಂ ತುಮ್ಕಾಂ ಕಶೆಂ ಭಗ್ತಾ?
ಜಾ: ಹಾಂವ್ ಕೆದಾಳಾಯ್ ಮಾನ್ ಮೆಳಾಜಾಯ್ ಮ್ಹಳ್ಳ್ಯಾ ಖಾತಿರ್ ವಾವ್ರುಂಕ್ ನಾ ವಾ ಕೊಣಾಯ್ಕ್ಯೀ ಕುಮೊಕ್ ಕರುಂಕ್ ನಾ. ಅನಿ ಮ್ಹಾಕಾ ಮಾನ್ ಮೆಳಾಜಯ್ ಮ್ಹಳ್ಳಿ ಆಶಾಯೀ ನಾಂ. ಆಮ್ಕಾಂ ಕೊಣೆಂಯೀ ಮಾಂಚಿಯೆರ್ ಅಪವ್ನ್ ಸನ್ಮಾನ್ ಕರಿಜಾಯ್ ಮ್ಹಳ್ಳಿ ಆಶಾಯೀ ಮ್ಹಾಕಾ ನಾ. ಜ್ಯೆಂ ಕಿತೆಂ ಹಾಂವ್ ಕೊಂಕ್ಣೆಖಾತಿರ್ ಕರ್ತಾಂ ತೆಂ ಮ್ಹಜ್ಯಾ ಸ್ವಂತ್ ಖುಶೆನ್ ಕರ್ತಾಂ, ನಾ ಕೊಣಾಯ್ಚಾ ದಭಾವಾನ್ ವಾ ಭಿಂಯಾನ್.
4. ಮ್ಹಜ್ಯಾ ಚಿಂತ್ಪಾ ಪ್ರಕಾರ್ ತುಮಿಂ ಸಭಾರ್ ಕಲಾಕರಾಂಕ್ ತಶೆಂಚ್ಚ್ ಸಾಹಿತಿಂಕ್ ಮುಖಾಮುಖಿ ಭೆಟ್ಲ್ಯಾತ್. ಹ್ಯಾ ಪಯ್ಕಿ ತುಮ್ಕಾ ಪಸಂದ್ ಜಾಲ್ಲೆ ಸಾಹಿತಿ/ಕಲಾಕಾರ್ ಕೋಣ್?
ಜಾ: ಹಾಂವ್ ಮ್ಹಜ್ಯಾ ಲ್ಹಾನ್ ಪ್ರಾಯೆರ್ ಥಾವ್ನ್ಂಚ್ಚ್ ಸಬಾರ್ ಪರ್ನ್ಯಾ ತಶೆಂಚ್ಚ್ ತರ್ನ್ಯಾ ಸಾಹಿತಿಂಕ್ ತಶೆಂಚ್ಚ್ ಕಲಾಕಾರಾಂಕ್ ಮುಖಾಮುಖಿ ಭೆಟ್ಲಾಂ. ಗಜಾಲಿ ಕೆಲ್ಯಾತ್, ಹಾಸ್ಲಾಂ, ಖೆಳ್ಳಾಂ ಪುಣ್ ಸರ್ವ್ ಕಲಾಕಾರ್ ಆನಿ ಸಾಹಿತಿ ಮ್ಹಾಕಾ ಏಕ್ ಸಮಾನ್ ಜಾವ್ನಾಸಾತ್. ಹಾಂವ್ ಕೊಣಾಯ್ಕಿ ವಯ್ರ್ ದವರಿನಾ, ವಾ ಕೊಣಾಯ್ಕಿ ಸಕ್ಲಾ ದವ್ರುಂಕೀ ಚಿಂತಿನಾ. ಜೊ ಕೋಣ್ ಕೊಂಕ್ಣೆಖಾತಿರ್ ವಾವುರ್ತಾ ತೊ ಕೊಂಕ್ಣೆಕ್ ಮಾನ್ ದಿತಾ. ತಾಂಕಾಂ ಹಾಂವ್ ಮಾನ್ ಕರ್ತಾ.
5. ಆಮ್ಚಾ ಕ್ರೀಸ್ತಿ ಸಮಾಜೆಕ್ ಆನಿಂ ಹೆರ್ ಜಾತಿಚ್ಯಾಂಕ್ ತುಲನ್ ಕರ್ತಾನಾ ಆಮ್ಚಾ ಕ್ರೀಸ್ತಿ ಸಮಾಜೆಂತ್ "ಎಕ್ವಟ್" ಮ್ಹಳ್ಳೊ ಚಡ್ ಮಾಪಾನ್ ದಿಸೊನ್ ಯೇನಾ. ಹಾಕಾ ಕಾರಾಣ್ ಕಿತೆಂ?
ಜಾ: ಹೆಂ ಏಕ್ ಬರೆಂ ಸವಾಲ್ ತುಮ್ಚೆ ಥಾವ್ನ್. ಪುಣ್ ಹ್ಯಾ ಸವಾಲಾಕ್ ಜಾಪ್ ಆಜೂನೀ ಮೆಳೊಂಕ್ ನಾ. ಹಾಂವ್ ಹ್ಯಾ ವಿಶ್ಯಾಂತ್ ಮೊಸ್ತ್ ಆಟೊವ್ ಕರ್ನ್ ಆಸಾಂ. ಹ್ಯಾ ಸವಾಲಾಕ್ ಜಾಪ್ ಮೆಳಾತ್ ತರ್ ಖಂಡಿತ್ ಹಾಂವ್ ಪಯ್ಲೆಂ ದಾಯ್ಜಾಚೆರ್ ಪರ್ಗಟ್ ಕರುಂಕ್ ಆಶೆತಾಂ.
6. ಕೊಂಕ್ಣಿ ಭಾಸ್ ಭಳ್ವಂತ್ ಕರುಂಕ್ ಆಜ್ಕಾಲ್ ವರ್ತ್ಯಾ ಹುಮೆದಿನ್ ವಾವ್ರ್ ಚಲೊನ್ ಆಸಾ. ಆನಿ ಕೊಂಕ್ಣೆಚಿ ಬರಿ ವಾಡಾವಳ್ ಜಾವ್ನ್ ಆಸಾ. ಹಿಚ್ಚ್ ಹುಮೆದ್ ಆಮ್ಚಿ ಮುಕ್ಲಿ ಪಿಳ್ಗಿ ಸಾಂಬಾಳ್ನ್ ವ್ಹರಾತ್ಗೀ?
ಜಾ: ಮ್ಹಜ್ಯಾ ಅಭಿಪ್ರಾಯೆ ಫರ್ಮಾಣೆ ಆನಿ ಆತಾಂಚ್ಯಾ ಸಾಹಿತಿಂಕ್ ಆನಿ ಕಲಾಕರಾಂಚ್ಯಾ ಬಳಾನ್ ಪುಣಿ ಸಗ್ಳಿ ನ್ಹಂಯ್ ತರೀ ಥೊಡಿಂ ತರೀ ಕೊಂಕ್ಣಿ ಬಾಸ್, ಅಮ್ಚಾ ಮುಖ್ಲ್ಯಾ ಪಿಳ್ಗೆಚ್ಯಾ ಮನಾಂತ್ ಖಂಚಾಯ್ತೆಲಿ ಮ್ಹಣ್ ಹಾಂವ್ ಚಿಂತ್ತಾಂ. ತಶೆಂಚ್ಚ್ ಆಮಿಂ ವ್ಹಡಿಲಾಂನಿ ಅಮ್ಚ್ಯಾ ಭುರ್ಗ್ಯಾಂಕ್ ಫಿಂರ್ಗಿ ಭಾಶೆಚಿ ಜಾಣ್ವಾಯ್ ದಿತಾಸ್ತಾನಾ ಆಮ್ಚಿ ಮಾಯ್ಭಾಸ್ ಕೊಂಕ್ಣೆಕ್ ಇಲ್ಲೊಸೊ ಮಾನ್ ದಿಲ್ಯಾರ್ ಖಂಡಿತ್ ಆಮ್ಚಿ ಕೊಂಕ್ಣಿ ಭಾಸ್ ಮುಕಾರಿಂ ಬಾಳ್ವತೆಲಿ. ಆನಿಂ ಆಮ್ಚಾ ಮುಖ್ಲಾ ಪಿಳ್ಗೆಚ್ಯಾ ತೊಂಡಾಂ ಥಾವ್ನ್ ವಾಳ್ತೆಲಿ.
7. ತುಮ್ಚಾ ಮುಖೇಲ್ಪಣಾಖಾಲ್ ತುಮ್ಚಾ ಫಿರ್ಗಜೆಂತ್ ತುಮ್ಚಾ ತರ್ನಾಟ್ಪಣಾರ್ ಕೆಲ್ಲ್ಯಾ ವಾವ್ರಾವಿಶಿಂ ಇಲ್ಲೆಂ ಸಾಂಗ್ಶ್ಯಾತ್ಗೀ?
ಜಾ: ಹಾಂವ್ ಲ್ಹಾನ್ ಥಾವ್ನ್ ಹರ್ಯೆಕಾಂತ್ ಮುಕಾರ್ ವಚೊಂಕ್ ಪ್ರಯತ್ನ್ ಕರ್ತಾಲೊಂ. ಹಾಂವ್ ಹಾಯ್ಸ್ಕೂಲಾಂತ್ ಆಸ್ತಾನಾ ಹಾಯ್ಸ್ಕೂಲಾಚ್ಯಾ ಚಟುವಟಿಕೆಂನಿ ಮ್ಹಜೊ ವಾಂಟೊ ಆಸ್ಲ್ಲೊ. ತಶೆಂಚ್ಚ್ ಆಮ್ಚಾ ಇಗರ್ಜೆಂತ್ ಕೊಯಾರಾಂತ್ ತಶೆಂಚ್ಚ್ ಕಥೊಲಿಕ್ ಸಂಘ್ ಸಂಸ್ಥಾಂನಿ ಹಾಂವ್ ವಾವ್ರುನ್ ಆಸ್ಲ್ಲೊ. ಮ್ಹಜ್ಯಾ ಕಾಲೆಜಿಚ್ಯಾ ವೆಳಾರ್ ಫಿರ್ಗಜೆಂತ್ ಗಾಯಾನಾಂತ್, ಖೆಳಾಂತ್, ನಾಟಕಾಂನಿ, ವಾಚ್ಪಾನಿ ಮುಖೆಲ್ಪಣ್ ಘೆತ್ಲಾ. ಕಾಲೆಜಿಂತ್ ಶಿಕ್ತಾಸ್ತಾನಾ ಕಾಲೆಜಿಚ್ಯಾ ಚುನಾವಾಂತ್ ಭಾಗ್ ಘೆತ್ಲ್ಲೊ. ಆಶೆಂ ಹರ್ಯೆಕಾ ರಿತಿನ್ ಎಕಾ ನಂತರ್ ಎಕಾ ವಾಟೆನ್ ಹಾಂವ್ ಮುಕಾರ್ ವಾಟ್ ಚಮ್ಕೊನ್ ಜಯ್ತಾಚಿಂ ಮೆಟಾ ಚಡ್ಲಾಂ.
8. ನಾಂವಾಡ್ದಿಕ್ ಗಾವ್ಪಿ ರೋನಿ ಡಿಕುನ್ಹಾ ತುಮ್ಚೊ ಆಪ್ತ್ ಮಿತ್ರ್ ಆನಿ ಕ್ಲಾಸ್ಮೇಟ್. ತುಮಿ ಕಾಲೆಜಿಂತ್ ದೊಗೀ ಸಾಂಗಾತಾ ಶಿಕ್ತಾಲ್ಯಾತ್ ಆನಿ ಎಕಾಚ್ಚ್ ಬಾಂಕಾರ್ ಬಸ್ತಾಲ್ಯಾತ್ ಮ್ಹಣ್ ಆಯ್ಕಾಲಾಂ. ತುಮಿ ಕಶೆಂ ಎಕಾಮೆಕಾಚ್ಯೊ ಚುಕಿ ದಾಂಪ್ತಾಲ್ಯಾತ್ ಮ್ಹಣ್ ಸಾಂಗ್ಶ್ಯಾತ್ಗೀ?
ಜಾ: ವ್ಹಯ್, ರೋನಿ ಡಿಕುನ್ಹಾ ಮ್ಹಜೊ ಆಪ್ತ್ ಮಿತ್ರ್ ಆಮಿ ಸಾಂಗಾತಾ ಎಕಾಚ್ಚ್ ಬಾಂಕಾರ್ ಬಸ್ತಾಲ್ಯಾಂವ್. ಕಾಲೆಜಿಚೆ ದೀಸ್ ತೆ ಮಜೆಚೆ, ಸುಖಾಚೆ ಆನಿ ಸಂತೊಸಾಚೆ ತಶೆಂಚ್ಚ್ ಮುಖ್ಲ್ಯಾ ಜಿಣ್ಯೆಚೊ ಹುಸ್ಕೊ ದವರ್ಚೆ ತಸಲೆಂ. ಸಾಂಗಾತಾ ಎಕಾಚ್ಚ್ ಬಾಂಕಾರ್ ಬಸ್ತಲ್ಯಾಂವ್ ಅನಿ ಅಮ್ಕಾಂ ಥೊಡೆ ಪಾವ್ಟಿ ಕ್ಲಾಸ್ ಬಂಕ್ ಕರ್ಚಿ ಸವಯ್ ಆಸ್ಲ್ಲಿ. ಕ್ಲಾಸಿಂತ್ ಹಾಜರಿ ಘಾಲುಂಕ್ ಆಸ್ತಾಲಿ. ಆಶೆಂ ಹಾಂವ್ ಕ್ಲಾಸ್ ಬಂಕ್ ಕರ್ತಾನಾ ರೋನಿ ಮ್ಹಜಿ ಹಾಜರಿ ಸಾಂಗ್ತಾಲೊ, ಆನಿ ರೋನಿನ್ ಕ್ಲಾಸ್ ಬಂಕ್ ಕರ್ತಾನಾ ಹಾಂವ್ ತಾಚಿ ಹಾಜರಿ ಸಾಂಗ್ತಾಲೊಂ. ಆಶೆಂ ಎಕಾಮೆಕಾ ಚುಕಾರಿ ಮಾರ್ತಾನಾ ಕ್ಲಾಸಿಂತ್ ಆಸ್ಲ್ಲೆ ಬರಿಂ ಕರ್ನ್ ಹಾಜರಿ ಘಾಲ್ತಾಲ್ಯಾಂವ್.
9. ಹಾಂವೆ ಪಳೆಲ್ಯಾ ಪ್ರಕಾರ್ ಸಭಾರ್ ಜಣಾಂ ಗಲ್ಫಾಚಿಂ ಮೆಟಾ ಚಡ್ತಾನಾಂಚ್ಚ್ ಕೊಂಕ್ಣಿ ವಿಸ್ರಾತಾತ್. ಪುಣ್ ತುಮಿಂ ಆಜೂನ್ ಅಪುಟ್ ಕೊಂಕ್ಣಿ ಉಲಯ್ತಾತ್. ಹ್ಯಾ ವಿಶಿಂ ತುಮ್ಚಿ ಅಭಿಪ್ರಾಯ್ ಕಸಲಿ?
ಜಾ: ಏಕ್ ಕೊಂಕ್ಣೆಚೊ ಸುಪುತ್ರ್ ಜಾವ್ನ್ ಕೊಂಕ್ಣಿ ವಾಡೊಂದಿ ಯಾ ಜಿವಾಳ್ ಉರೊಂದಿ ಮ್ಹಳ್ಳಿಚ್ಚ್ ಮ್ಹಜಿ ಆಶಾ. ಹಾಂವ್ ಕೊಡ್ಯಾಳ್ ಶಿಕ್ಲ್ಲೊಂ. ಥೊಡೊ ತೇಂಪ್ ಬೊಂಬಯ್ ಆಸ್ಲ್ಲೊಂ. ಪುಣ್ ಕೆದಿಂಕ್ಚ್ಚ್ ಕೊಂಕ್ಣಿ ಉಲಂವ್ಕ್ ಲಜೆಂವ್ಕ್ ನಾ. ಕೊಣಾಯ್ಕಿ ಹಾಂವ್ ಸಾಂಗಾನಾಂಗಿ born and brought up in Bombay and I can only understand konkani ತ್ಯಾ ಪಾಸ್ವತ್ ಆಮಿಂ ಕೆದಿಂಕ್ಚ್ಚ್ ಕೊಂಕ್ಣಿ ಉಲಂವ್ಕ್ ಲಜೆನಾಸ್ತಾಂ ಕೊಣಿ ಜಾಂವ್ದಿ ತೊ ವ್ಹಡ್ ಯಾ ಲ್ಹಾನ್ ಶಿಕ್ಪಿ ವಾ ಆಶಿಕ್ಪಿ, ಜಾಣಾರಿ ವಾ ನೆಣಾರಿ ಲಜೆನಾಸ್ತಾಂ ಮ್ಹಜಿ ಮೂಟ್ ಘಟ್ಟ್ ಧರ್ನ್ ಹಾಂವ್ ಕೊಂಕ್ಣಿ ಉಲೈತಾಂ ಅನಿಂ ಹಿಂ ಮ್ಹಜಿ ಭಾಸ್ ಮ್ಹಣ್ ದಾಕಯ್ತಾಂ.
10. ಥೊಡ್ಯಾಲಾಗಿಂ ಅಪುಟ್ ಕೊಂಕ್ಣಿ ಉಲೈಲ್ಯಾರೀ ಫಿಂರ್ಗಿ ಭಾಶೆನ್ ಜಾಪ್ ಮೆಳ್ತಾ? ಆಶೆಂ ಕಿತ್ಯಾಕ್?
ಜಾ: ಮ್ಹಜ್ಯಾ ಆಭಿಪ್ರಾಯೆ ಪ್ರಕಾರ್ ಥೊಡ್ಯಾಂಕ್ ಕೊಂಕ್ಣಿ ಉಲಂವ್ಕ್ ಲಜ್ ವಾ ಕಾವ್ಜೆಣಿ. ಥೊಡ್ಯಾಂನಿ ಚಿಂತ್ಚೆಂ ಆಸಾ ಅಪುಣ್ ಪಾಶ್ಚ್ಯಾತ್ ಗಾಂವಾಂತ್ ಜಲ್ಮೊನ್ ಫಿಂರ್ಗಿ ಶಿಕೊನ್ ಆಯ್ಲ್ಯಾಂವ್, ಆಪ್ಲಿ ಮಾಯ್ಭಾಸ್ ಜಾಣಾಂ ಆಸೊನ್ಯೀ ಫಿಂರ್ಗಿ ಉಲೊಂವ್ಚಿ ಜಬ್ಬೊರ್ ಆಶಾ ಅಸ್ತಾ. ಆನಿ ಕೊಂಕ್ಣಿ ಉಲಂವ್ಚಿ ಹೆರಾಂ ಮುಕಾರ್ ಸಸರಾಯೆಚೆ ಮ್ಹಣ್ ತಾಂಕಾಂ ಭಗ್ತಾ. ಹಿ ಚಿಂತ್ಪಾಚಿ ಉತಳಾಯ್ ಆನಿ ಉಣ್ಯಾ ಶಿಕ್ಪಾಚಿ ರುಜ್ವಾತ್. ತ್ಯಾ ದೆಕುನ್ ಕೊಂಕ್ಣೆನ್ ಉಲೈಲ್ಯಾರ್ ಫಿಂರ್ಗಿ ಭಾಸೆಂತ್ ಜವಾಬ್ ದಿಂವ್ಚಿ ಅಸಲ್ಯಾಂನಿ.
11. ಕೊಂಕ್ಣೆ ಖಾತಿರ್ ವಾವ್ರ್ ಕರ್ತಾನಾ ತುಮ್ಕಾಂ ಕೊಣಾಯ್ಥಾವ್ನ್ ಕಸಲೇಂಯ್ ದುರ್ಸೊಣೆಂ ಆಯ್ಕೊಂಕ್ ಮೆಳ್ಳಾಂಗಿ?
ಜಾ: ಮ್ಹಜ್ಯಾ ಆಭಿಪ್ರಾಯೆ ಫರ್ಮಾಣೆ ಎದೊಳ್ ಪರ್ಯಾಂತ್ ಹ್ಯಾ ವಿಶಿಂ ಕಾಂಯ್ ಆಯ್ಕಾಲ್ಲೆಂ ನಾ. ಕಿತ್ಯಾಕ್ ಮ್ಹಳ್ಯಾರ್ ಕೊಂಕ್ಣೆ ಖಾತಿರ್ ವಾವುರ್ಚೆ ಹಾಂವೆಂ. ಆಶೆಂ ಆಸ್ತಾಂ ಹೆರಾಂನಿ ಮ್ಹಜೆ ವಯ್ರ್ ಬೋಟ್ ಕಿತ್ಯಾಕ್ ಜೊಕ್ಚೆಂ?
12. ತುಮಿಂ ಪಯ್ಲೆಂ ಬರಯ್ತೆಲ್ಯಾತ್ ಆನಿ ವಾಸ್ಚಿ ಪಿಶಾಯ್ ಆಸ್ಲ್ಲಿ ಮ್ಹಣ್ ಹಾಂವೆಂ ಆಯ್ಕಾಲಾಂ. ಆತಾಂ ತುಮಿಂ ಕಿತ್ಯಾಕ್ ಲಿಖ್ಣಿ ವಿಸ್ರಾಲ್ಯಾತ್?
ಜಾ: ಹಾಂವ್ ಕೊಂಕ್ಣಿ ಬೂಕ್ ವಾಚ್ಚೊ ಪಿಸೊಂ. ಕೊಂಕ್ಣೆಂತ್ಲ್ಯಾ ಸಭಾರ್ ನಾಮ್ಣೆಚ್ಯಾ ಕಾಣ್ಯೆಗಾರಾಂಚ್ಯೊ ಜಾಯ್ತ್ಯೊ ಕಾಣ್ಯೊ ಹಾವೆಂ ವಾಚ್ಲ್ಯಾತ್. ಹಾಂವ್ ಲ್ಹಾನ್ ಆಸ್ತಾನಾ ಬರಯ್ತಾಲೊಂ. ಆನಿ ಹಾಂವೆ ಪಾಂಚ್ ಪಾನಾಂಚಿ ಕಾಲ್ಪನಿಕ್ ಕಾಣಿಂ ಬರವ್ನ್ ರಾಕ್ಣ್ಯಾಚ್ಯಾ ಸಂಪಾದಕಾಕ್ ದಾಡ್ಲ್ಲಿ. ಪೂಣ್ ಥೊಡ್ಯಾ ದಿಸಾಂನಿ ಮ್ಹಾಕಾ ಆಶಿಂ ಜಾಪ್ ಆಯ್ಲಿಗೀ "ತುಜಿ ಕಾಣಿ ವಾಚುಂಕ್ ಬರಿ ಲಾಗ್ಲಿ ಪೂಣ್ ಪತ್ರಾಚೆರ್ ಫಾಯ್ಸ್ ಕರ್ಚೆ ತಿತ್ಲಿ ಖಾಸ್ ನಾ. ತ್ಯಾ ದೆಕುನ್ ತುಂ ಪ್ರಯತ್ನ್ ಕರ್, ತುಜ್ಯಾ ಮುಖ್ಲ್ಯಾ ಲೇಕನಾಂಕ್ ಆಮಿಂ ವೊರಯ್ತಾಂವ್". ತ್ಯಾ ನಂತರ್ ಹಾಂವೆ ಬರಂವ್ಕ್ ಚಡ್ ಪ್ರಯತ್ನ್ ಕರುಂಕ್ ನಾ. ಪುಣ್ ಆಜೂನ್ಯೀ ಮ್ಹಾಕಾ ಮತಿಂತ್ "ಬರವ್ಯಾಂ" ಮ್ಹಳ್ಳೆ ಚಿಂತಾಪ್ ಉದೆತಾ ಪುಣ್ ವೆಳಾಚ್ಯಾ ಆಭಾವಾನ್ ಹಾಂವ್ ಮೊಸ್ತ್ ಪಾಟಿಂ ಪಡ್ಲಾಂ.
13. ದಾಯ್ಜ್.ಕೊಮ್ ವೆಬ್ಸಾಯ್ಟಾವಿಶಿಂ ತುಮಿಂ ಆಯ್ಕಲಾಂ/ಪಳೆಲಾಂ ವಾ ಸಾಯ್ಟಾವಿಶಿಂ ತುಮ್ಚೆಂ ವಿಚಾರ್ ಕಸಲೆ?
ಜಾ: ದಾಯ್ಜ್.ಕೊಮ್ ಹೆಂ ಅಂತರ್ಜಾಳ್ ಖಂಡಿತ್ ಜಾವ್ನ್ ಆಮ್ಕಾಂ ಕೊಂಕ್ಣಿ ಉಲಂವ್ಚ್ಯಾಂಕ್ ಏಕ್ ಸಾಹಿತ್ಯಾಚೆ ಆದರ್ಶ್ ದೇಕ್. ಜೆ ಕೋಣ್ ಕೊಂಕ್ಣೆ ಖಾತಿರ್ ವಾವುರ್ತಾ ತಾಂಚೊ ನೀಜ್ ಘುಟ್ ಜೆಂ ಬರೆಂ ವಾ ವಾಯ್ಟ್, ಕಷ್ಟ್ ವಾ ಸುಖ್ ಹ್ಯಾ ಅಂತರ್ಜಾಳಿರ್ ಆಮ್ಕಾಂ ವಾಚುಂಕ್ ಮೆಳ್ತಾ. ತಶೆಂಚ್ಚ್ ಕೊಂಕ್ಣೆಂತ್ಲೊ ಹರ್ಯೆಕ್ಲೊ ಕಲಾಕಾರ್, ಸಾಹಿತಿ, ಬರವ್ಪಿ ಹ್ಯಾ ಆಂತರ್ಜಾಳಿರ್ ತಾಂಚಾ ಬರ್ಪಾಂ ಮುಖಾಂತ್ರ್ ವಾಚ್ಪ್ಯಾಂಕ್ ವಳ್ಕಿಚೆ ಜಾತಾತ್. ಆನಿ ಹ್ಯಾ ಅಂತರ್ಜಾಳಿರ್ ನವೆಂ ನವೆಂ ಬರವ್ಪ್ಯಾಂಕ್ ತಾಂಚಿ ಬರ್ಪಾಂ ಪರ್ಗಟ್ ಕರುಂಕ್ ಆವ್ಕಾಸ್ ಮೆಳ್ತಾ. ದಾಯ್ಜ್ ತರ್ನ್ಯಾ ತಶೆಂ ಪರ್ನ್ಯಾಂ ಬರವ್ಪ್ಯಾಂಕ್ ಬರೊ ಪಾಟಿಂಬೊ ದೀವ್ನ್ ಆಸಾ ಆನಿ ಹಾಂಚ್ಯಾ ಹ್ಯಾ ವಾವ್ರಾಂತ್ ಮ್ಹಜೊ ಕೆದಾಳಾಯ್ ಪಾಟಿಂಬೊ ಆಸ್ತಲೊ.
14. ದಾಯ್ಜ್ ವಾಚ್ಪ್ಯಾಂಕ್ ತುಮ್ಚೆ ಸಂದೇಶ್ ಕಸಲೆ?
ಜಾ: ಸರ್ವ್ ದಾಯ್ಜ್ ವಾಚ್ಪ್ಯಾಂಕ್ ಮ್ಹಜೊ ಸಂದೇಶ್ ಜಾವ್ನಾಸಾ "ಕೊಂಕ್ಣಿ ಉಲವ್ಯಾಂ, ಕೊಂಕ್ಣಿ ಉರವ್ಯಾಂ. ಘರಾಂತ್ ತಶೆಂ ಸೆಜಾರಾ ತಶೆಂಚ್ಚ್ ವಾಡ್ಯಾಂತ್, ಫಿರ್ಗಜೆಂತ್ ತಶೆಂಚ್ಚ್ ಗಾಂವಾರ್ ಆನಿ ಸಗ್ಳ್ಯಾ ಸಂಸಾರಾರ್ ಕೊಂಕ್ಣಿ ಗಾಜವ್ಯಾಂ".
15. ದೇವ್ ಬರೆಂ ಕರುಂ ಜೊಸ್ಸಿಯಾಬ್, ತುಮ್ಚೊ ಆಮೊಲಿಕ್ ವೇಳ್ ಮ್ಹಜೆ ಸವೆಂ ಸಂದರ್ಶನಾಕ್ ಖರ್ಚಿಲ್ಲ್ಯಾಕ್.
ಜಾ: ದೇವ್ ಬರೆಂ ಕರುಂ ತುಕಾಯ್ ವಾಯ್ಲೆಟ್ ತುಜ್ಯಾ ಹ್ಯಾ ಮೊಲಾಧಿಕ್ ವೆಳಾಖಾತಿರ್. ಎಕಾ ಬರ್ಯಾ ಮನಾನ್, ಮೊಗಾನ್ ಕೊಂಕ್ಣಿ ಉರೊಂವ್ಚಾ ಖಾತಿರ್ ಮ್ಹಜೆ ಸಾಂಗಾತಾ ತುಜೊ ವೇಳ್ ಖರ್ಚಿಲ್ಲ್ಯಾಕ್ ತುಕಾ ದೇವ್ ಬರೆಂ ಕರುಂ. ತುಜ್ಯಾ ಮುಖ್ಲ್ಯಾ ಸಾಹಿತಿಕ್ ವಾವ್ರಾಂತ್ ಹಾಂವ್ ಪಾಟಿಂಬೊ ದಿತಾ ಆನಿ ತುಕಾ ತಶೆಂಚ್ಚ್ ದಾಯ್ಜ್ ಪಂಗ್ಡಾಕ್ ಸರ್ವ್ ಬರೆಂ ಮಾಗ್ತಾಂ. ದೆವಾಚೆಂ ಬೆಸಾಂವ್ ಸದಾಂಚ್ಚ್ ತುಮ್ಚೆರ್ ಆಸೊಂ.
ಕೊಂಕ್ಣೆಚೊ ಖರೊ ಮೊಗಿ - ಜೊಸ್ಸಿ.
ತಾಚೊ ತೊ ಕೊಂಕ್ಣೆಚೊ ಹುಸ್ಕೊ, ಕೊಂಕ್ಣಿ ಲೊಕಾಕ್ ತಶೆಂಚ್ಚ್ ಕಲಾಕಾರಾಂಕ್ ತಾಣೆ ದಿಂವ್ಚೊ ಪಾಟಿಂಬೊ ಪಳೆತಾನಾ ಮ್ಹಾಕಾ ನಿಜಾಯ್ಕಿ ಸಂತೊಸ್ ಭಗ್ತಾ. ಹೆಂ ತಾಚೆ ಥಂಯ್ ಆಸ್ಚೆ ವರ್ತೆಂ ದೆಣೆಂ ಮ್ಹಣ್ಯೆತ್. ಆನಿ ಹಾಂವ್ ತಾಚ್ಯಾ ಹ್ಯಾ ನಿಸ್ವಾರ್ಥಿ ಸೆವೆಕ್ ಮಾನ್ ಕರ್ತಾಂ. ತಾಚೆಂ ತೆಂ ಉದಾರ್ ಕಾಳಿಜ್, ಕೊಂಕ್ಣಿ ಶೆತಾಂತ್ ತಾಣೆಂ ಕರ್ಚೊ ತೊ ವಾವ್ರ್, ತಶೆಂಚ್ ತಾಚೆಂ ತೆಂ ದೆವಾಸ್ಪಣ್ ವರ್ಣುಂಕ್ ಆಸಾಧ್ಯ್. ಹ್ಯಾ ಮ್ಹಜ್ಯಾ ಇಷ್ಟಾಕ್ ಹಾಂವ್ ಸರ್ವ್ ಬರೆಂ ಮಾಗ್ತಾ. ತೊ ’ಆಪುಣ್ ಆಪ್ಣಾಕ್ ದೇವ್ ಸಮೆಸ್ತಾಂಕ್’ ಮ್ಹಣ್ ಘರಾ ವೊಗೆಚ್ಚ್ ಬೊಸಾನಾಸ್ತಾಂ ಸರ್ವ್ ಕೊಂಕ್ಣಿ ಕಾರ್ಯಾಂಕ್ ತಶೆಂಚ್ಚ್ ಕೊಂಕ್ಣಿ ಕಲಾಕಾರಾಂಕ್ ಆಪ್ಣಾಚ್ಯಾ ತಾಂಕಿ ಪುರ್ತೊ ಸಹಕಾರ್ ದೀವ್ನ್ ಆಸಾ. ಆಸಲ್ಯಾ ಏಕಾ ಕೊಂಕ್ಣಿ ಪ್ರೇಮಿಕ್ ಏಕಾ ತಾಲೆಂತ್ವಂತ್ ಮಾನೆಸ್ತಾಂಕ್ ಕೊಂಕ್ಣಿ ಕಾರ್ಬಾರಿ ಮ್ಹಣ್ ವೊಲಾವ್ನ್ ದಾಯ್ಜಾರ್ ತಾಚಿ ವಳಕ್ ಕೊಂಕ್ಣಿ ಪರ್ಜೆಕ್ ಕರ್ನ್ ದಿಲ್ಲ್ಯಾ ವಾಯ್ಲೆಟಾಕ್ ದೇವ್ ಬರೆಂ ಕರುಂ.
- ರೋನಿ ಡಿ’ಕುನ್ಹಾ (ಫಾಮಾದ್ ಗಾವ್ಪಿ, ಜೋಸೆಫ್ ಮಥಾಯಸಾಚೊ ಖಾಸ್ ಮಿತ್ರ್)
ಹ್ಯಾ ಆಧ್ಲೆ ಕಾರ್ಭಾರಿ: 1, 2, 3, 4, 5, 6, 7, 8, 9, 10, 11, 12, 13, 14, 15, 16, 17, 18
About us | Feedback | Contact us
Copyright ©
2005 DAAIZ.COM All rights reserved.
Page concept, designed and maintained by Ashawadi Publications
