ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್ ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಕೊಂಕ್ಣಿ ಫುಲಯ್, ಕೊಂಕ್ಣಿ ಪಾಲಯ್, ಕೊಂಕ್ಣಿ ಸದಾಂಚ್ ಬಾಳ್ವೊಂಕ್ ಜಾಯ್.
ಸಾಹಿತಿಲಾಗಿಂ ಸಂವಾದ್
ಸಂವಾದ್ ಚಲಯಿಲ್ಲೆ: ಮೆಲ್ವಿನ್ ಜೆ. ವಾಸ್ ಕೆಲರಾಯ್, ಜೊಮೆಲ್ ಬೊಂದೆಲ್
ರೊನಾಲ್ಡ್ ಒಲಿವೆರಾ
ಜನನ್: 4 ಎಪ್ರಿಲ್ 1968
ಆವಯ್-ಬಾಪಾಯ್ಚೆಂ ನಾಂವ್: ದೆ|ಕ್ಯಾತರಿನ್ ಒಲಿವೆರಾ ಆನಿಂ ದೆ|ಇನೊಕ್ ಒಲಿವೆರಾ
ಶಿಕಾಪ್ : ಬಿ.ಎಸ್ಸಿ, ಎಮ್ಮೆಸ್ಸಿ [Bsc, Msc]
ಸಾಹಿತಿಕ್ ಸುರ್ವಾತ್: 1983 ಇಸ್ವೆಂತ್ ಪಯ್ಲಿ ಮಟ್ವಿ ಕಾಣಿ ’ಆಮ್ಚೊ ಯುವಕ್’ ಪತ್ರಾರ್ ಪರ್ಗಟ್ ಜಾಲಿ.
ಸಾಹಿತಿಕ್ ವಿವರ್:
ಮಟ್ವ್ಯೊ ಕಾಣ್ಯೊ: ಚಡುಣೆಂ 110
ಲೇಖನಾಂ/ಅನುವಾದಾಂ: ಚಡುಣೆಂ 100
ಕವನಾಂ/ಚುಟುಕಾಂ: ಚಡುಣೆಂ 10
ಮಟ್ವಿ ವಳೊಕ್ :
ರೊನಾಲ್ಡ್ ಒಲಿವೆರಾ, ಕೊಂಕಣ್ ಕರಾವಳಿಂತ್ ಉದೆವ್ನ್ ಆಯಿಲ್ಲೊ ತರ್ಯೀ ಅಖ್ಖ್ಯಾ ಕೊಂಕಣ್ ಸಂಸಾರಾಂತ್ ಫುಲ್ಲಾ ಆನಿಂ ಆಪ್ಲ್ಯಾ ತಾಲೆಂತಾಂನಿ ಎದೊಳ್ಚ್ ಕೊಂಕ್ಣೆಂತ್ ಜಾಯ್ತಿಂ ನವಾಲಾಂ ಕರುಂಕ್ ಪಾವ್ಲಾ. ಏಕ್ ಬರೊ ಉಲವ್ಪಿ, ಕಾರ್ಯೆಂ ನಿರ್ವಾಹಕ್, ಸಂಘಟಕ್, ಬರವ್ಪಿ. ಆಪ್ಲ್ಯಾ ಲ್ಹಾನ್ ಪ್ರಾಯೆರ್ಚ್, ಇಸ್ಕೊಲಾಂನಿ ಭಾಶಣ್ ಸ್ಪರ್ದ್ಯಾಂತ್ ಜಾಯ್ತಿಂ ಇನಾಮಾಂ ಜೊಡೆಲ್ಲೊ ಮಾನೆಸ್ತ್ ರೊನಲ್ಡ್ ಆಪ್ಲೊ ವ್ಹಡ್ ಭಾವ್ ವಿಲ್ಸನ್ ಒಲಿವೆರಾಚಾ ಪ್ರೆರಣಾನ್ ಅಪ್ಲ್ಯಾ ಪಂದ್ರಾ ವರ್ಸಾಂಚ್ಯಾ ಪ್ರಾಯೆರ್ ಸಾಹಿತ್ಯಾಚಿ ಸುರ್ವಾತ್ ಕೆಲಿ.
1983 ಇಸ್ವೆಂತ್ ಹಾಚಿ ಪಯ್ಲಿ ಮಟ್ವಿ ಕಾಣಿ ’ಆಮ್ಚೊ ಯುವಕ್’ ಪತ್ರಾರ್ ಪರ್ಗಟ್ ಜಾಲಿ. ತಾಚೆ ಉಪ್ರಾಂತ್ ಕೊಂಕ್ಣೆಂತ್ಲ್ಯಾ ವಿವಿಧ್ ಪತ್ರಾಂನಿ ಸರಾಗ್ ತಾಚಿಂ ಬರ್ಪಾಂ ಪರ್ಗಟ್ ಜಾವ್ನ್ ಆಯ್ಲಿಂ, ಆಕಾಶ್ವಾಣಿ ಮಂಗ್ಳುರ್ ಹಾಂತುಂಯ್ ದೋನ್ ಕಾರ್ಯಿಂ ಪ್ರಚಾರ್ ಜಾಲ್ಯಾಂತ್. ಶೆಂಭೊರಾಂ ವಯ್ರ್ ಮಟ್ವ್ಯೊ ಕಾಣ್ಯೊ, ಶೆಂಬೊರಾಂ ವಯ್ರ್ ಲೇಖನಾಂ, ಸುಮಾರ್ ಧಾ-ಪಂದ್ರಾ ಕವನಾಂ-ಚುಟುಕಾಂ ಫಾಯ್ಸ್ ಜಾಲ್ಯಾಂತ್. ತಶೆಂಚ್ ’ರಾಕ್ಣೊ’, ’ಸೆವಕ್’ ಅಸಲ್ಯಾ ಸಭಾರ್ ಸಾಹಿತಿಕ್ ಸ್ಪರ್ಧ್ಯಾಂನಿ ಇನಾಮಾಂಯ್ ಹಾಣೆಂ ಜಿಕ್ಲ್ಯಾಂತ್.
೧೯೮೭ ಇಸ್ವೆಂತ್ ಆಂಡ್ರು ಎಲ್. ಡಿ’ ಕುನ್ಹಾಸವೆಂ ಮೆಳುನ್, ತವಳ್ ಬಂಧ್ ಜಾಂವ್ಕ್ ಆಸ್ಚೆಂ ’ಆಮ್ಚೊ ಯುವಕ್’ ಪತ್ರಾಕ್ ಬಂಧ್ ಜಾಯ್ನಾಶೆಂ ಕರ್ಚಾಂತ್ ಜಾಯ್ತೊ ವಾವ್ರ್ ಕೆಲಾ.
ಹಾಚೊ ಕೊಂಕ್ಣಿ ವಾವ್ರ್ ಪರ್ಗಾಂವಾಕ್ ಪಾವ್ಲ್ಯಾರ್ಯೀ ಉಣೊ ಜಾಲೊ ನಾ. ಸೌದಿ ಅರೆಬಿಯಾಂತ್ ತಾಣೆಂ ಕಾಮ್ ಕರುನ್ ಆಸ್ತಾನಾ ಥೊಡ್ಯಾ ಇಶ್ಟಾಂ ಸಾಂಗಾತಾ "ಸೌದಿ ಕೊಂಕಣ್ ಯಂಗ್ಸ್ಟರ್ಸ್" (SKY) ಮಳ್ಳೊ ಪಂಗಡ್ ರಚುನ್ ಸೌದಿ ತಸಲ್ಯಾ ಗಾವಾಂತ್ ಕೊಂಕ್ಣಿ ಕಾರ್ಯೆಂ ಮಾಂಡುನ್ ಹಾಡ್ಲ್ಲಿ ಕಿರ್ತ್ ಕೊಣ್ಂಚ್ ವಿಸ್ರುಂಚಿ ನಾಂತ್.
ಉಪ್ರಾಂತ್ ಬಾಹ್ರೇಯ್ನಾಕ್ ಪಾವ್ತಚ್ಚ್ ಥಂಯ್ಚಾ ಥೊಡ್ಯಾ ಕೊಂಕ್ಣಿ ಮೊಗಿಂಸವೆಂ "ಬಾಹ್ರೈನ್ ಕೊಂಕ್ಣಿ ಕುಟಾಮ್" ಮ್ಹಳ್ಳೊ ಪಗಡ್ ಆಸಾ ಕರ್ಚಾಂತ್ ರೊನಾಲ್ಡ್ಯ್ ಎಕ್ಲೊ. ಆನಿಂ ಆತಾಂ ’ಕೊಂಕ್ಣಿ ಕುಟಾಮ್’ ಪರ್ಗಾಂವಾಂತ್ ಆಸ್ಚಾ ಭೋವ್ ಥೊಡ್ಯಾ ಪ್ರತಿಷ್ಟಿತ್ ಸಂಚಾಲನಾಂ ಪಯ್ಕಿ ಏಕ್ ಮ್ಹಣ್ ನ್ಹಾಂವಾಡ್ಲಾಂ.
ರೊನಾಲ್ಡ್ ಒಲಿವೆರಾ ಏಕ್ ಬರವ್ಪಿ ತರ್ಯಿ, ಸಾರ್ವಜನಿಕ್ ಉಲೊವ್ಣ್ಯಾಂತ್ (Public Speaking) ಕಾರ್ಯೆಂ ನಿರ್ವಾಹಣ್ (Master of Ceromony - M.C.) ಕರ್ಚ್ಯಾಂತ್ ತಾಚೊ ಹೆಳ್ಲ್ಲೊ ಹಾತ್. ಹ್ಯಾ ದೊನ್ ವಿಶಯಂತ್ ತಾಣೆಂ ಅಂತರಾಷ್ಟ್ರಿಯ್ ಹಂತಾರ್ ಜೊಡ್ಲ್ಲಿಂ ಪ್ರಶಸ್ತಿ ಅನಿ ಮಾನ್ ಖಂಚಾಯ್ ಕೊಂಕ್ಣಿ ತಶೆಂಚ್ ಭಾರತೀಯ್ ನಾಗಾರಿಕಾಂಕ್ ವ್ಹಡ್ಪಣ್ ಭೊಗ್ತಾ.
"ಅಂತರಾಷ್ಟ್ರಿಯ್ ಟೊಸ್ಟ್ ಮಾಸ್ಟರ್ಸ್" ಸಂಸ್ತ್ಯಾನ್ Middle East ಹಂತಾರ್ ಚಲಯ್ಲ್ಯಾ ಭಾಷಾಣ್ ಸ್ಪರ್ದ್ಯಾಂತ್ ಲಗಾತಾರ್ 1993, 1994, 1995 ಆನಿ 1996 ಂತ್ ಪಯ್ಲೆಂ ಸ್ಥಾನ್ ಫಾವೊ ಜಾಲಾಂ. ಆಶೆಂ ಲಗಾತಾರ್ ಚಾರ್ ಪಾವ್ಟಿ Middle East ಹಂತಾರ್ ಯೆದೊಳ್ ಮ್ಹಣಾಸರ್ ಕೊಣೀ ಜಿಕೊನ್ ಯೇಂವ್ಕ್ ನಾ. ಅನಿ ಹಿ ಕೀರ್ತ್ ರೊನಾಲ್ಡ್ ಒಲಿವೆರಾನ್ ಆಪ್ಣಾಚಿ ಕರ್ನ್ ಘೆತ್ಲ್ಯಾ. ಹಿ ಆಮ್ಕಾ ಮಂಗ್ಳುರ್ಗಾರಾಂಕ್ ತಶೆಂಚ್ ಬಾರಾತೀಯಾಂಕ್ ಸಂತೊಸಾಚಿ ಗಜಾಲ್. ಆಮೆರಿಕಾ, ಯುರೊಪ್, ಯುಕೆ ತಸಲ್ಯಾ ರಾಶ್ಟ್ರಾಂತ್ಲ್ಯಾ ಸ್ಪರ್ಧಿಂ ಮುಖಾರ್ ಜಿಕೊನ್ ಯೆತಾನಾ , ಥಂಯ್ಸರ್ ಹಾಜಾರ್ ಆಸ್ಲ್ಲ್ಯಾ ಬಾಹ್ರೈನಾಂತ್ ಬಾರಾತಾಚೊ ರಾಯ್ಭಾರಿ ಸಂತೊಸಾಚಾ ಉಮಾಳ್ಯಾನಿ ಭರೊನ್ ರೊನಾಲ್ದ್ ಒಲಿವೆರಾಚಿ ಶಾಬಾಸ್ಕಿ ಪಾಟಯಿಲ್ಲಿ ತೊ ಕೆದಿಂಚ್ ವಿಸ್ರಾನಾ ಮ್ಹಣ್ ಸಾಂಗುಂಂಕ್ ಖುಶಿ ಪಾವ್ತಾ.
ತಶೆಂಚ್ 1997 ಂತ್ ಚಲ್ಲ್ಲ್ಯಾ "ಅಂತರಾಷ್ಟ್ರೀಯ್ ಧ್ವನಿ ಮುದ್ರಿತ್ ಭಾಷಣ್ ಸ್ಪರ್ದೊ" Recorded speech ತಾಕಾ ದುಸ್ರೆಂ ಸ್ಥಾನ್ ಪಾವೊ ಜಾಲಾಂ. ಆಸ್ಲ್ಯಾ ಮಹಾನ್ ವ್ಯಕ್ತಿಚಿ ವ್ಹಳೊಕ್ ಕರ್ನ್ ತುಮ್ಕಾಂ ದೀಂವ್ಕ್ "ದಾಯ್ಜ್ ಪಂಗಡ್" ಸಂತೊಸ್ ಪಾವ್ತಾ.
ಸ: ತುಮಿಂ ಏಕ್ ಲೇಖಕ್, ಕಾರ್ಯೆಂ ನಿರ್ವಾಹಕ್ ತಶೆಂಚ್ ಫಾಮಾದ್ ಉಲೊವ್ಪಿ (Public Speaker). ಪುಣ್ ಹಾಂಚಿ ಸುರ್ವಾತ್ ಜಾಲ್ಲಿ ಕೆದ್ನಾಂ?
ಜ: ಹಾಂವ್ ಲ್ಹಾನ್ ಥಾವ್ನ್ ಇಸ್ಕಾಲಾಂತ್ ಶಿಕ್ತಾಸ್ತಾನಾ ಹಿಂ ದೆಣಿಂ ಮ್ಹಜಾ ಶಿಕ್ಷಾಕಾನಿ ಮ್ಹಜೆ ಥಂಯ್ ಪಳೆಲ್ಲಿಂ. ತವಳ್ ತವಳ್ ಇಸ್ಕಾಲಾಂತ್ ಜಾಂವ್ಚ್ಯಾ ಭಾಷಣ್ ಸ್ಪ್ರರ್ದ್ಯಾಂನಿ, ಅನಿಂ ಹೆರ್ ರಾಷ್ಟ್ರೀಯ್ ಫೆಸ್ತಾಂ ವೆಳಾರ್ ಮ್ಹಕಾ ವಿದ್ಯಾರ್ಥಿ ಮುಕಾರ್ ರಾವುನ್ ಉಲಂವ್ಕ್ ಅವ್ಕಾಸ್ ಮೆಳ್ಳೆಲೊ ಆಸ್ತಾಂ, ತಿಂಚ್ ದೆಣಿ ಮ್ಹಜೆ ಥಂಯ್ ಗುಂಡಾಯೆಂತ್ ರೊಂಬೊನ್ ಗೆಲಿಂ.
ಹಾಂವ್ ಏಕ್ ಲೇಖಕ್ ತರ್ ಹಾಕಾ ಕಾರಾಣ್ ಮ್ಹಜೊ ವ್ಹಡ್ ಬಾವ್ ವಿಲ್ಸನ್ ಒಲಿವೆರಾ. ತಾಣೆ ಬೊರಯಿಲ್ಲ್ಯೊ ಕಾಣ್ಯೊ ಮ್ಹಾಕಾ ಚಡ್ ಪಸಂದ್ ಜಾತಾನಾ, ತಾಚಾ ಕಾಣಿಯಾಂ ಥಾವ್ನ್ ಪ್ರೆರಣ್ ಜೊಡುನ್ ಹಾಂವೆಂಯ್ ಕಾಣ್ಯೊ ಬರೊಂವ್ಕ್ ಶಿಕ್ಲೊಂ.
ಸ: ತುಮ್ಚೆ ಪ್ರಕಾರ್ ’ಸಾರ್ವಜನಿಕ್ ಉಲವ್ಣೆಂ’ ಆನಿ ’ಸಾಹಿತ್ಯ್ ಬರಂವ್ಚೆಂ’ ಹಾಂಚೆಮಧೆಂ ಖಂಚೆ ಚಡ್ ಮಹತ್ವಚೆಂ ಅನಿಂ ಕಿತ್ಯಾಕ್?
ಜ: ಸತ್ಚ್ ಸಾಂಗ್ಚೆಂ ತರ್ ಹಾಂವೆ ಕಾಣ್ಯೊ ಆನಿ ಹೆರ್ ಲೆಖನಾಂ ಬರಯ್ಲ್ಯಾಂತ್ ತರ್ಯಿ, ಹಾಂವ್ ಮ್ಹಕಾ ಏಕ್ ವ್ಹಡ್ಲೊ ಸಾಹಿತಿ ಮ್ಹಣ್ ಮಾಂದಿನಾ. ಮ್ಹಜ್ಯಾಕಿ ಚಡ್ ಹೆಳ್ಲ್ಲೆ ಬರ್ಯಾ ಆನಿ ಗೂಂಡ್ ಚಿಂತ್ಪಾಚೆ ಬರವ್ಪಿ ಜಾಯ್ತೆ ಆಸಾತ್. ಫುಣ್ ಮ್ಹಕಾ ಸಾರ್ವಜನಿಕ್ ಉಲವ್ಣ್ಯಾಂತ್ ಜಾಯ್ತೊ ಅನ್ಭೊಗ್ ಆಸಾ ಅನಿಂ ಹ್ಯಾ ವಿಶಯಾಚೆರ್ ಮ್ಹಕಾ ಚಡ್ ಆಸಕ್ತ್ ಆಸಾ. ಹ್ಯೊ ದೊನೀಂ ಸಂಗ್ತ್ಯೊ ಎಕಮೆಕಾ ಭೋವ್ ಲಾಗ್ಸಿಲ್ಯಾನ್ ತಾಳ್ ಪಡ್ತಾತ್.
ಪುಣ್ ಏಕ್ ಬರಯ್ಣಾರ್ ಕೊಣೀ ತೊ ಜಾಂವ್ದಿ, ತಾಣೆ ಲೊಕಾ ಮುಕಾರ್ ಯೆಜೆ ಮ್ಹಣ್ ಗರ್ಜ್ ನಾ. ಬರಯ್ಣಾರ್ ತಾಣೆ ಸಾಂಗೊಂಕ್ ಆಶೆಂವ್ಚಿ ವಿಷಯ್ ಸಾರ್ಕಿ ಚಿಂತುನ್ ತಿದ್ವುನ್ ಪರತ್ ಪರತ್ ಎಕಾಮೆಕಾ ತಾಳ್ ಕರುನ್ ಬರೊಂವ್ಕ್ ವೇಳ್ ಕಾಡ್ಯೆತಾ. ತೊ ಬರಂವ್ಚಾ ವಗ್ತಾ ತಾಕಾ ಕೊಣಾಯ್ಚಿಯ್ ಭಿರಾಂತ್ ಆಸ್ತಾ. ಪುಣ್ ಏಕ್ ಸಾರ್ವಜನಿಕ್ ಉಲವ್ಪಿ ಜಾಯ್ತ್ಯಾ ಲೊಕಾ ಮುಕಾರ್ ರಾವೊನ್ ಉಲೈತಾನಾ, ಮ್ಹಸ್ತ್ ಚಿಂತುನ್ ಉಲೈಜೆ ಪಡ್ತಾ. ಥೊಡೆ ಪಾವ್ಟಿಂ ತಾಕಾ ಖಂಚಾಯ್ ವಿಶಯಾಚೆರ್ ಉಲೊಂವ್ಕ್ ತಯಾರ್ ಕರುಂಕ್ ವೇಳ್ ಆಸಾನಾ. ತೆದ್ನಾಂ ತಾಕಾ ಮಸ್ತ್ ಅಲೋಚನ್ ಕರ್ನ್ ಉಲಯ್ಜೆ ಪಡ್ತಾ. ತಶೆಂ ಮ್ಹಕಾ ಸಾರ್ವಜನಿಕ್ ಉಲವ್ಣೆಂ ಚಡ್ ಮಹತ್ವಾಚ್ಚೆಂ ಮ್ಹಣ್ ಭಗ್ತಾ.
ಚಡವತ್ ಜಾವ್ನ್ ಹೆರ್ ಭಾಶೆಂಚಿ ಯಾ ಅನ್ಯ್ ಧರ್ಮಾಂಚಿ ಸಾರ್ವಾಜನಿಕ್ ಉಲೊವ್ಣ್ಯಾಕ್ ಚಡ್ ಮಹತ್ವ್ ದಿತಾತ್. ಪ್ರತ್ಯೇಕ್ ಜಾವ್ನ್ ಆತಾಂಚಾ ಪಿಳ್ಗೆಕ್ ಆನಿ ಪ್ರಮುಕ್ ಜಾವ್ನ್ ಯುವಕನಿ ಸಾರ್ವಜನಿಕ್ ಉಲೊವ್ಣ್ಯಾ ವಿಶ್ಯಾಂತ್ ಚಡ್ ಗುಮಾನ್ ದಿಜೆ. ಪುಣ್ ಆಮ್ಚಾ ಕೊಂಕ್ಣಿ ಸಮಾಜೆಂತ್ ಸಾರ್ವಜನಿಕ್ ಉಲವ್ಣ್ಯಾಕ್ ಚಡ್ ಮಹತ್ವ್ ದೀನಾಂತ್.
ಸ: ಆತಾಂಚಾ ಕೊಂಕ್ಣಿ ಪರಿಗತೆವಿಶಿಂ ತುಮ್ಚಿಂ ಅಭಿಪ್ರಾಯ್ ಕಸಲಿ?
ಜ: ಅಜಿಕ್ ಧಾ ವರ್ಸಾಂಧಿಂ ಹೆಂಚ್ ಸವಲ್ ಮ್ಹಕಾ ಕೊಣೆಂಯ್ ವಿಚಾರ್ಲ್ಲೆಂ ತರ್, ಮ್ಹಕಾ ಕೊಂಕ್ಣಿ ಬಾಸ್ ಆನಿಂ ಕೊಂಕ್ಣಿ ಸಾಹಿತ್ಯಾಚಿ ವಿಶೆಷ್ ಭಿರಾಂತ್ ದಿಸ್ತಾಲಿ. ಖಂಯ್ ತರೀ ಆಮ್ಚಿ ಭಾಸ್ ಆಳ್ವೊನ್ ವೆತಾಗೀ ಮ್ಹಳ್ಳೆಬರಿಂ ದಿಸೊನ್ ಯೆತಾಲೆಂ.
ಪುಣ್ ಪಾಟ್ಲ್ಯಾ ಥೊಡ್ಯಾ ವರ್ಸಾನಿ ಹ್ಯಾ ಖ್ಹಾಡಿ ಗಾವಾಂತ್ ಕೊಂಕ್ಣಿ ಬಾಷೆಚಿ ಏಕ್ ವಿಶೆಷ್ ಕ್ರಾಂತಿಚ್ ಉಟ್ಲ್ಯಾ. ಕೊಂಕ್ಣಿ ಸಾಹಿತ್ಯಾಚಿ ಖರಿ ಗ್ರೇಸ್ತ್ಕಾಯ್ ಹ್ಯಾ ಗಾಂವಾನಿಂ ದಿಸೊನ್ ಯೆತಾ. ವಿವಿಧ್ ಕಾಮಾಸಾಳಾಂ ದುಭಾಯ್, ಕುವೈಟ್, ಬಾಹ್ರೈನಾಂತ್ ಚಲೊನ್ಂಚ್ ಆಸಾತ್. ಭೋವ್ಶಾ ಹಾಂಚಿ ದೇಕ್ ಘೆವ್ನ್ ಆಮ್ಚ್ಯಾ ಮಾಂಯ್ಗಾವಾಂತ್ಯೀ ಕೊಂಕ್ಣಿಚಿ ಅಭಿವೃದ್ಧಿ ದಿಸೊನ್ ಯೆತಾ. ತಶೆಂ ಆಸ್ತಾನಾ ಕೊಂಕ್ಣಿ ಭಾಸ್ ಖರ್ಯಾ ಥರಾನ್ ಜಿವಾಳ್ ಆಸಾ ಮ್ಹಣ್ ಸಾಂಗುಂಕ್ ಖುಶಿ ಭೊಗ್ತಾ.
ಸ : ಕೊಂಕ್ಣೆಚಾ ಫುಡಾರಾವಿಶಿಂ ತುಮ್ಚಿಂ ಅಭಿಪ್ರಾಯ್ ಕಸಲಿ?
ಜ: ಕೊಂಕ್ಣೆಕ್ ಬರೊ ಫುಡಾರ್ ಆಸೊಂಕ್ ಖಂಡಿತ್ ಜಾವ್ನ್ ಸಾಧ್ಯ್ ಆಸಾ...ಆತಾಂ ಕೊಂಕ್ಣಿಂ ಭಾಸ್ ಕರ್ನಾಟಕಾಂತ್ಲ್ಯಾ ಪಾಠ್ ಪುಸ್ತಕಂತ್ ಸೆರ್ವತಾನಾ ಹೆಂ ಅಮ್ಕಾಂ ದಾಧೊಸ್ಕಾಯೆಚಿ ಗಜಾಲ್. ಹಾಂಗಾಸರ್ ಆಮಿ ಸರ್ವಾಂನಿಂ ಸರ್ವಾನುಮತ್ ಜಾವ್ನ್ ಬರೊ ಪಾಟಿಂಬೊ ದಿಲ್ಯಾರ್ ಕೊಂಕ್ಣಿ ಭಾಷೆಚೆಂ ವ್ಹಡ್ಪಣ್ ಗಾಜಾವ್ಯೆತ್.
ಕೊಂಕ್ಣಿ ಭಾಸ್ ಸಂವಿಧಾನಾಚಾ ಆಟ್ವ್ಯಾ ವೊಳೆರಿಂತ್ ಸೆರ್ವಾಲ್ಲ್ಯಾ ಉಪ್ರಾಂತ್ ಕೊಂಕ್ಣಿಚಿ ಅಭಿವೃದ್ದಿ ಸ್ಪಷ್ಟ್ ಥರಾನ್ ದಿಸ್ತಾ. ಪುಣ್ ಆಮಿ ಆಧಿಂ ಥಾವ್ನ್ ಝರೊವ್ನ್ ಆಯಿಲ್ಲೆಂ ಲಿಪಿ/ಬೊಲಿಚೊ ಸ್ಪರ್ಧೊ ಪರತ್ ಆಸಾಕೆಲ್ಯಾರ್ ಖಂಡಿತ್ ಜಾವ್ನ್ ಕೊಂಕ್ಣಿ ಭಾಸ್ ಆಳ್ವೊನ್ ವೆತೆಲಿ. ಕಿತ್ಯಾಕ್ ಮ್ಹಳ್ಯಾರ್ ಸಂಸಾರಾಚಿ ನಾಂವಾಡ್ದಿಕ್ ಬಾಸಾಂ ಪಯ್ಕಿ ಲಾತಿನ್, ಸಂಸ್ಕ್ರತ್ ಆಳೊವ್ನ್ ಗೆಲ್ಯಾ ಥರ್ ಕೊಕ್ಣಿ ಬಾಶೆಕ್ ತಸಲೊ ಕಾಳ್ ಯೆಂವ್ಚ್ಯಾಕ್ ವೇಳ್ಚ್ ಲಾಗ್ಚೊನಾ.
ಸ: ಕೊಂಕ್ಣಿ ಬಾಷೆ ಖಾತಿರ್ ಆಮ್ಚೊ ಹರ್ಯೆಕ್ಲ್ಯಾಂಚೊ ಧ್ಯೇಯ್ ಕಸಲೊ ಆಸೊಂಕ್ ಜಾಯ್?
ಜ: ಕೊಂಕ್ಣೆಚಾ ಅಭಿವೃದ್ದೆಕ್ ಮಿನತ್ ಕರ್ಚಾ ಆಮಿ ಸರ್ವಾಂನಿ, ಲ್ಹಾನ್ ಲ್ಹಾನ್ ಪಂಗಡ್ ಜಾವ್ನ್ ವಾವುರ್ಚ್ಯಾಕಿ ಸಾಂಗಾತಾ ಮೆಳೊನ್ ಕೊಂಕ್ಣಿಚ್ಯಾ ಅಭಿವೃದ್ದೆ ಖಾತಿರ್ ವಾವ್ರ್ ಕೆಲ್ಯಾರ್ ಖಂಡಿತ್ ಜಾವ್ನ್ ಕೊಂಕ್ಣಿ ಭಾಸ್ ಜಿವಾಳ್ ಉರ್ತೆಲಿಚ್ಚ್. ಹಾಕಾ ಆಮಿ ಆಮ್ಚ್ಯಾ ಘರಾನಿಂಚ್ ಸುರ್ವಾತ್ ಕರಿಜಯ್. ಪೂನ್ ಹೆಂ ಕಿತ್ತುನ್ ಪರ್ಯಾಂತ್ ಸಾಧ್ಯ್ ಆಸಾ ಮ್ಹಣ್ ಸಾಂಗುಂಕ್ ಕಸ್ಟ್ ಜಾತಾತ್. ಕಾಂಯ್ ನ್ಹಯ್ ತರೀ, ಹರ್ಯೆಕಾ ಕೊಂಕ್ಣಿ ಅಭಿವೃದ್ದೆಚಾ ಪಂಗ್ಡಾಚಾ ಸಾಂದ್ಯಾನಿ, ತಾಂಚೆ ನಾಂವ್ ಆನಿ ಸ್ವಂತ್ ಫಾಯ್ದೊ ಪಳೆನಾಸ್ತಾಂ, ಪಕತ್ತ್ ಕೊಂಕ್ಣಿ ಬಾಶೆಚ್ಯಾ ಅಭಿವೃದ್ದೆ ಖಾತಿರ್ ವಾವ್ರ್ ಕರಿಜಯ್.
ಅನ್ಯೇಕ್ ಗಜಾಲ್ - ಆಮಿಂ ಕ್ರಿಯಾತ್ಮಕ್ (Practical) ಜಾಯ್ಜಾಯ್. ಕೊಂಕ್ಣಿ ಅಭಿವೃದ್ದಿಚಿ ಪಯ್ಲಿ ಸುರ್ವಾತ್ ಆಮಿ ಆಮ್ಚ್ಯಾ ಘರಾನಿಂಚ್ ಕರಿಜಯ್. ಜಾಯ್ತೆ ವ್ಹಡ್ ವ್ಹಡ್ ಕೊಂಕ್ಣಿ ಬರೊವ್ಪಿ, ಗಾವ್ಪಿ, ಸಂಗೀತ್ಕಾರ್ ಉಗ್ತ್ಯಾನ್ ಕೊಂಕ್ಣಿಚಿ ಜೈ ಜೈಕಾರ್ ಕರ್ತಾತ್, ಬರಯ್ತಾತ್, ಗಾಯ್ತಾತ್ ಜಾಲ್ಯಾರ್ಯಿ ತಾಂಚ್ಯಾ ಘರಾಂತ್ ತಾಂಚಿಂ ಭುರ್ಗಿಂ ಕೊಂಕ್ಣಿ ಭಾಶೆ ಥಾವ್ನ್ ಮ್ಹಸ್ತ್ ಪಯ್ಸ್ ಆಸಾತ್. ಕೊಂಕ್ಣಿ ಖಾತಿರ್ ಏಕಾ ಥರಾಚಿ ಏಲರ್ಜಿ ತಾಂಚೆ ಥಂಯ್ ಆಸಾ. ತಶೆಂ ಏಕ್ ಸಾಮಾನ್ಯ್ ಮ್ಹನಿಸ್ ಕೊಂಕ್ಣಿ ಭಾಸೆಖಾತಿರ್ ಕಸೊಲೊಚ್ ವಾವ್ರ್ ಕರಿನಾತ್ಲ್ಲೊ, ಕೊಂಕ್ಣಿ ಪತ್ರಾಂ ವಾಚಿನಾತ್ಲ್ಲೊ ತಾಚ್ಯಾ ಘರಾಂತ್ ಸದಾಂಚ್ ಕೊಂಕ್ಣಿ ವ್ಹಾಳ್ತಾ.
ಮ್ಹಜೊ ಏಕ್ ಆಪ್ತ್ ಮಿತ್ರ್ ಬೊಂಬೊಯ್ಂತ್ ಜಲ್ಮೊನ್, ಲ್ಹಾನ್ ವ್ಹಡ್ ಜಾವ್ನ್ ತೊ ತಾಚ್ಯಾ ಘರಾಂತ್ ಫಕತ್ತ್ ಕೊಂಕ್ಣಿಂಚ್ ಉಲೈತಾ ಆನಿಂ ತಾಚಿಂಯ್ ಭುರ್ಗಿಂ ಕೊಂಕ್ಣಿ ಉಲೈತಾತ್. ಅಸಲಿಂಯ್ ಕುಟ್ಮಾ ಆಸಾತ್. ತಶೆಂ ಮ್ಹಣ್ತಾನಾ, ಕೊಂಕ್ಣಿ ಭಾಷೆಚಿ ಜವಬ್ದಾರಿ ಸರ್ವಾಂಚಿ ಜಾವ್ನಾಸಾ. ತಶೆಂಚ್ ಕೊಂಕ್ಣಿ ಪತ್ರಾಂಕ್ ಚಡ್ ಆನಿಂ ಚಡ್ ರಿತಿನ್ ಪಾಟಿಂಬೊ ದಿಜಯ್. ನವ್ಯಾ ಲೇಖಕಾಂಕ್, ಸಂಸ್ತ್ಯಾಂಕ್ ಆರ್ಥಿಕ್ ಸಹಕಾರ್ ದಿಜಯ್.
ಸ: ವಿಲ್ಸನ್ ಒಲಿವೆರಾ ಕೊಂಕ್ಣಿ ಸಂಗೀತ್ ಶೆತಾಂತ್ ಏಕ್ ನಾಂವಾಡ್ದಿಕ್ ನಾಂವ್, ತೊ ತುಮ್ಚೊ ವ್ಹಡ್ ಭಾವ್ ಜಾವ್ನ್ ತುಮೆರ್ ಕಸಲೆಂ ಪ್ರೇರಣ್ ಘಾಲಾಂ?
ಜ: ತೊ ಮ್ಹಾಕಾ ಖರೊ ಪ್ರೇರಣ್ ಮ್ಹಣ್ಯೆತಾ, ತೊ ಮ್ಹಾಕಾ ಸದಾಂಚ್ ಪಾಟಿಂಬೊ ದಿತಾ. ಹಾಂವೆ ಸುರ್ವೆರ್ ಸಾಂಗ್ಲೆ ಬರಿಂ ಹಾಂವ್ ಏಕ್ ಬರೊವ್ಪಿ ಜಾಂವ್ಕ್ ತೊಚ್ಚ್ ಪ್ರೇರಣ್. ತಾಚಿ ಠಿಕಾ ಆನಿಂ ಸಲಹಾ ಮ್ಹಕಾ ಸದಾಂಚ್ ಕ್ರಿಯಾತ್ಮಕ್ ಜಾತಾತ್.
ಸ: "ದಾಯ್ಜ್ ಡೊಟ್ ಕೊಮ್" ವೀಶ್ಯಾಂತ್ ತುಮ್ಚಿ ಅಭಿಪ್ರಾಯ್ ಕಸಲಿ?
ಜ: ದಾಯ್ಜ್ ಪಂಗ್ಡಾಕ್ ಪಯ್ಲೆಂ ವರ್ತಿ ಶಾಭಾಸ್ಕಿ ದಿತಾಂ ಆನಿಂ ದೆವಾಚಿಂ ವಿಂಚ್ಣಾರ್ ಆಶಿರ್ವಾದಾಂ ಮಾಗ್ತಾಂ. ತುಮಿ ಸುರು ಕೆಲ್ಲೆಂ ತೆ ಮೆಟ್, ಖಂಡಿತ್ ಜಾವ್ನ್ ಕೊಂಕ್ಣೆಂತ್ ಏಕ್ ನವೆಸಾಂವ್ ಆನಿಂ ಏಕ್ ಮೈಲಾ ಪಾತಾರ್ ಜಾವ್ನ್ ಉರ್ತೆಲೆಂ. ತುಮಿಂ ಸಂಪೂರ್ಣ್ ಥರಾನ್ ಕೊಂಕ್ಣಿ ಸಾಹಿತ್ಯಾಕ್ಚ್ ಮಹತ್ವ್ ದಿಲಾಂ.
ತಶೆಂಚ್ ತುಮಿಂ ಇಂಟರ್ನೆಟಾಚೆರ್ ಛಾಪ್ಲ್ಲೆಂ ದಿವೊ ಪತ್ರಾಂಸಂಗಿ ಪ್ರಸಾರ್ ಕರ್ಚೆಂ ಕಾಮ್ ಆನಿಕೀ ಸಂತೊಸಾಚಿ ಗಜಾಲ್. ಕಿತ್ಯಾಕ್ ಮ್ಹಳ್ಯಾರ್ ಇಂಟರ್ನೆಟ್ ಸರ್ವಾಂಕಿ ಫಾವೊ ಜಾಯ್ನಾ ತರಿ, ದಿವೊ ಪತ್ರ್ ಸಾದ್ಯಾ ವಾಚ್ಪ್ಯಾಂಕ್ಯೀ ಪಾವ್ತಾ ದೆಕುನ್ ದಾಯ್ಜ್ ಕೊಂಕ್ಣಿ ಸಂಸಾರ್ಭರ್ ಪಾವ್ತಾ. ಪರತ್ ತುಮ್ಕಾಂ ಶಾಭಾಸ್ಕಿ ಪಾಟಯ್ತಾಂ.
ಸ: ದೇವ್ ಬರೆಂ ಕರುಂ ತುಮಿಂ ಆಮ್ಕಾಂ ದಿಲ್ಲ್ಯಾ ಅಮೊಲಿಲ್ಕ್ ವೆಳಾಖಾತಿರ್. ತುಮ್ಚಾ ವಾವ್ರಾಕ್ಯ್ ಸರ್ವ್ ರಿತಿಚೆಂ ಜಯ್ತ್ ಆನಿಂ ಬರೆಂ ಮಾಗ್ತಾಂವ್, ದೇವ್ ಬರೆಂ ಕರುಂ.
ಜಾ: ದೇವ್ ಬರೆಂ ಕರುಂ ತುಮ್ಕಾಂಯ್.
About us | Feedback | Contact us
Copyright ©
2005 DAAIZ.COM All rights reserved.
Page concept, designed and maintained by Ashawadi Publications
