ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್ ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಕೊಂಕ್ಣಿ ಫುಲಯ್, ಕೊಂಕ್ಣಿ ಪಾಲಯ್, ಕೊಂಕ್ಣಿ ಸದಾಂಚ್ ಬಾಳ್ವೊಂಕ್ ಜಾಯ್.
ಸಾಹಿತಿಲಾಗಿಂ ಸಂವಾದ್
ಸಂವಾದ್ ಚಲಯ್ತಾ: ವಾಯ್ಲೆಟ್ ಜೆ. ಪಿರೇರಾ, ದುಭಾಯ್
ಜೆಮ್ಮಾ ಪಡೀಲಾವಿಶಿಂ ಸವಿಸ್ತಾರ್ ಸಮ್ಜೊಂಕ್ ಹೆಂ ಪಾನ್ ಭೆಟ್ ದಿಯಾ.
ಜೆಮ್ಮಾ ಪಡೀಲ್
ಸಾಹಿತಿವಿಶಿಂ ದೋನ್ ಉತ್ರಾಂ:
ಪುರ್ತೆಂ ನಾಂವ್: ಜೆರೊಮ್ ಪೌಲ್ ಪಿರೇರಾ
ಲಿಖ್ಣೆ ನಾಂವ್: ಜೆಮ್ಮಾ ಪಡೀಲ್
ಜಲ್ಮಾಲ್ಲಿ ತಾರಿಕ್: 15 ಜನೆರ್ 1949
ಆವಯ್-ಬಾಪಾಯ್ಚೆಂ ನಾಂವ್: ದೆವಾದೀನ್ ಕ್ರಿಸ್ತಿನ್ ಪಿರೇರಾ ಆನಿ ದೆವಾದೀನ್ ಗಾಬ್ರಿಯೆಲ್ ಪಿರೇರಾ
ಇಸ್ಕೊಲ್: ಪಾಂಚ್ವಿ ಪರ್ಯಾಂತ್ ಆಂಜೆಲೊರ್ ಉಪ್ರಾಂತ್ ಸಾಂತ್ ಆಲೋಶಿಯಸ್ ಕಾಲೇಜಿಂತ್ ಬಿ. ಕಾಮ್ ಸಂಪಯ್ಲೆಂ
ಪಯ್ಲಿ ಕಾಣಿ: ರಾಕ್ಣ್ಯಾರ್ ಫಾಯ್ಸ್ ಜಾಲ್ಲಿ
ಎದೊಳ್ ಬರಯಿಲ್ಲ್ಯೊ ಕಾಣ್ಯೊ: ಸಾರ್ಕೆಂ ಲೇಖ್ ಧರುಂಕ್ ನಾ.
ಲೇಖನಾಂ: 175
ಪರ್ಗಟ್ ಜಾಲ್ಲೆ ಬೂಕ್: 4
ಪ್ರಶಸ್ಥ್ಯೊ: 3
ಸನ್ಮಾನ್: ದಾಯ್ಜಿ ದುಭಾಯ್ ಥಾವ್ನ್.
ಸಂವಾದ್:
1. ದಾಯ್ಜಿದುಭಾಯ್ ಬರವ್ಪ್ಯಾಂಚ್ಯಾ ಎಕ್ತಾರಾಥಾವ್ನ್ ಸನ್ಮಾನಿತ್ ಜಾಲ್ಲ್ಯಾ ತುಮ್ಕಾಂ ಪಯ್ಲ್ಯೆ ಸುವಾತೆರ್ ಅಭಿನಂದನ್, ತುಮ್ಕಾಂ ಫಾವೊ ಜಾಲ್ಲೊ ಮಾನ್ ಲಾಭ್ಲ್ಲ್ಯಾಕ್. ’ಕೊಂಕ್ಣಿ ಸಿಂತಿಮೆಂತಾಳ್ ಸಾಹಿತಿ’ ಮ್ಹಣ್ ಫಾಮಾದ್ ಜಾಲ್ಲ್ಯಾ ತುಮ್ಕಾಂ ಸಿಂತಿಮೆಂತಾಳ್ ಸಾಹಿತ್ಯ್ ರಚುಂಕ್ ಪ್ರೇರಣ್ ಕಶೆಂ ಆನಿ ಕೆದಾಳಾ ಲಾಭ್ಲೆಂ ಮ್ಹಳ್ಳೆಂ ಸಾಂಗ್ಶ್ಯಾತ್ಗಿ?
ಜಾ: ವ್ಹಯ್ ಹಾಂವ್ ಮನಿಸ್ಚ್ಚ್ ಭಗ್ಣಾಳೊ. ಮ್ಹಜ್ಯಾ ಚಿಂತ್ಪಾಪ್ರಕಾರ್, ಕೊಂಕ್ಣೆಂತ್ ಸಿರಿವಂತಾ ಶಿವಾಯ್ ಹೆರ್ ಸಾಹಿತಿಂನಿ ಭಗ್ಣಾಂ ಬರಂವ್ಕ್ ನಾಂತ್. ಕ್ಲೆರೆನ್ಸ್ ಕೈಕಂಬಾನ್ ಥೊಡ್ಯೊ ಸಿಂತಿಮೆಂತಾಳ್ ಕಾಣ್ಯೊ ಬರಯ್ಲ್ಯಾತ್. ಮ್ಹಾಕಾ ಖರೆಂಚ್ ಸಿರಿವಂತಾ ಥಾವ್ನ್ ಸಿಂತಿಮೆಂತಾಳ್ ತಶೆಂಚ್ ಭಾವನಾತ್ಮಕ್ (ದುಖಾಳ್) ಸಾಹಿತ್ಯ್ ರಚುಂಕ್ ಪ್ರೇರಣ್ ಲಾಭ್ಲೆಂ.
2. ಕೊಂಕ್ಣೆಂತ್ ಸಾಹಿತ್ಯ್ ರಚುಂಕ್ ತುಮ್ಕಾಂ ಕಶೆಂ ಪ್ರೇರಣ್ ಆನಿ ದೇಕ್ ಲಾಭ್ಲಿ? ತುಮ್ಕಾಂ ಕಸಲೊ ಸಹಕಾರ್ ತುಮ್ಚ್ಯಾ ಸುರ್ವಿಲ್ಲ್ಯಾ ಸಾಹಿತಿಕ್ ದಿಸಾಂನಿ ಲಾಭ್ಲೊ?
ಜಾ: ಮ್ಹಾಕಾ ವಾಚ್ಚೆ ಪಿಶೆಂ ಆಸ್ಲ್ಲೆಂ ತರ್ಯೀ ಆಮ್ಚಾ ಘರ್ಚಿ ಆರ್ಥಿಕ್ ಪರಿಗತ್ ಬರಿ ನಾತ್ಲ್ಲ್ಯಾನ್, ಮ್ಹಾಕಾ ಕಾಣ್ಯೆ ಬೂಕ್ ವಾಚುಂಕ್ ಸೊಡಿನಾತ್ಲ್ಲಿಂ. ಹಾಂವ್ ಎಲೋಶಿಯಸ್ ಕಾಲೇಜಿ ಥಾವ್ನ್ ಪಡಿಲ್ಚಾ ಘರಾ ಪಾಟಿಂ ಯೆತಾಂ ಮ್ಹಣಾಸರ್ ಬೂಕ್ ವಾಚುನ್ ಯೆತಾಲೊಂ. ಆಜ್ಯೀ ಮ್ಹಾಕಾ ವಾಟೆರ್ ಚಲೊನ್ ವೆತಾಸ್ತಾಂ ವಾಚುಂಕ್ ಜಾತಾ.
3. ತುಮಿ ಉಲವ್ಣ್ಯಾಂತ್ ಶೀದಾ, ಜೀಣ್ಯೆಂತ್ ಸಾದಾ ಪುಣ್ ತುಮ್ಚೆ ಥೊಡೆ ಅಥ್ವೆ ವಿಚಾರ್ ಮ್ಹಣ್ಜೆ ತುಮ್ಕಾಂ ಫುಲಾಂ ಪಸಂದ್ ನಾಂತ್ - ಕೊಣೆಂಯ್ ತುಮ್ಕಾಂ ಫುಲಾಂ ದಿಲ್ಯಾರ್ ತುಮಿಂ ತಿಂ ಘೆನಾಂತ್ - ಅಶೆಂ ಕಿತ್ಯಾಕ್?
ಜಾ: ಮ್ಹಾಕಾ ಫುಲಾಂ ಪಸಂದ್ ನಾಂತ್. ಹಾಂವ್ ಸಗ್ಳ್ಯಾ ಬರಿಂ ನ್ಹಂಯ್, 99% ಹೆರಾಂ ಕರ್ತಾತ್ ಮ್ಹಣೊನ್ ಹಾಂವ್ಯೀ ತಶೆಂ ಕರುಂಕ್ ವಚಾನಾ. ಹಿ ಮ್ಹಜಿ ಭುರ್ಗ್ಯಾಪಣಾ ಥಾವ್ನ್ ಸವಯ್. ಫುಲಾಂವಿಶಿಂ ಲೊಕಾಂನಿ ಉಲಂವ್ಚೆಂ ಆಯ್ಕತಾನಾ ಮ್ಹಾಕಾ ರಾಗ್ ಯೆತಾ. ಅಸಲೊಚ್ಚ್ ಏಕ್ ದಾಖ್ಲೊ ದಿಂವ್ಚೊ ತರ್, 1995 ಂತ್ ಜನೆರಾಚ್ಯಾ ಪಯ್ಲ್ಯಾ ತಾರಿಕೆರ್ ವಿಲ್ಫಿ ನಾಯ್ಟ್ ಆಸಾ ಕೆಲ್ಲೊ. ಆನಿ ವಿಲ್ಫಿ ಮ್ಹಾಕಾ ಮುಖೆಲ್ ಸಯ್ರೊ ಜಾವ್ನ್ ಆಪಂವ್ಚೆವಿಶಿಂ ಆಯ್ಕೊನ್ ಹಾಂವೆ ತಾಕಾ ಮ್ಹಳ್ಳೆಂ ’ತುಂ ಮ್ಹಾಕಾ ಆಂಬೆ ದೀ, ಪೊಣೊಸ್ ದೀ, ವಾ ಕೆಳ್ಯಾಂಚೊ ಘಡಾಯ್ ದಿ ಪುಣ್ ಮ್ಹಾಕಾ ಫುಲಾಂ ದೀನಾಕಾ’.
ತೆಚ್ಚ್ಪರಿಂ ಮ್ಹಜ್ಯಾ ಘರ್ಚ್ಯಾಂಕ್ ಸಯ್ತ್ ವಿಲ್ಫಿ ಸಮೊರ್ ಸಾಂಗ್ಲೆಂ ’ಮ್ಹಜ್ಯಾ ಮೊಡ್ಯಾರ್ ಸಯ್ತ್ ಫುಲಾಂ ಘಾಲುಂಕ್ ನ್ಹಜೊ’ ಮ್ಹಜಿ ಭಯ್ಣ್ ಹೆಂ ಆಯ್ಕೊನ್ ಮ್ಹಾಕಾ ಸವಾಲ್ ಕರಿಲಾಗ್ಲಿ ’ತುಂ ತುಜ್ಯಾ ಮೊಡ್ಯಾಚೆರ್ ಫುಲಾ ಘಾಲ್ತಾನಾ ಕಶೆಂ ಅಡಾಯ್ತಾಯ್ರೇ?’ ತೆದ್ನಾಂ ಹಾಂವೆಂ ತಿಕಾ ಮ್ಹಳ್ಳೆಂ ’ಮೆಲ್ಲ್ಯಾ ಮನ್ಶ್ಯಾಚಿ ನಿಮಾಣಿ ಇಚ್ಚಾ ಕೊಣೆಂಯೀ ನೆಗಾರ್ ಕರುಂಕ್ ಜಾಯ್ನಾ. ಮ್ಹಜೆ ಮಿತ್ರ್ ಖಂಡಿತ್ ಜಾವ್ನ್ ಹಿ ಮ್ಹಜಿ ಅಖ್ರೇಚಿ ಆಶಾ ಮ್ಹಣೊನ್ ಚಿಂತುನ್ ಹಿ ಮ್ಹಜಿ ಆಶಾ ಜ್ಯಾರಿ ಕರ್ತಿತ್’.
4. ಕೊಂಕ್ಣಿ ಸಾಹಿತ್ಯಾಚಿ ಪರಿಗತ್ ಆದಿಂ ಆಸ್ಚೆಪರಿಂ ಆತಾಂ ಆಸಾ? ಜೆರಾಲ್ ರಿತಿನ್ ಹ್ಯೇವಿಶಿಂ ತುಮ್ಚಿ ಅಭಿಪ್ರಾಯ್ ಕಸಲಿ?
ಜಾ: ಕೊಂಕ್ಣಿ ಆಮ್ಚಿ ಮಾಂಯ್ಭಾಸ್, ಪುಣ್ ಕೊಂಕ್ಣೆಚ್ಯಾ ವಾವ್ರಾಕ್ ಲಾಗ್ಚ್ಯಾಧಿಂ ಆಮ್ಚಿಂ ಭಲಾಯ್ಕಿ ಸಾಂಭಾಳ್ಚಿ ಗರ್ಜೆಚಿ. ಎಕಾ ಫಾಂತ್ಯಾರ್ ಆಮ್ಚಾ ಎಕಾ ಸಯ್ರ್ಯಾಗೆರ್ ಆಯಿಲ್ಲ್ಯಾ ಚಾ.ಫ್ರಾ.ನ್ ಮ್ಹಳ್ಳೆಂ ’ಕೊಂಕ್ಣೆ ಖಾತಿರ್ ಕಾಮ್ ಕರ್ಚಾ ಬದ್ಲಾಕ್ ದೋನ್ ಕೊಂಬ್ಯೊ ಪೊಸ್ಲ್ಲ್ಯೊ ತರ್ ಚಾರ್ ತಾಂತ್ಯಾಂ ಪುಣೀಂ ಮೆಳ್ತಿಂ ಆಸ್ಲ್ಲಿಂ. ಕೊಂಕ್ಣಿ ಮ್ಹಣೊನ್ ಮ್ಹಾಕಾ ಕೊಂಕ್ಣೆನ್ ದಿಲ್ಲಿ ’ಖೊಂಕ್ಲಿ’. ಆತಾಂ ಮ್ಹಜೆಲಾಗಿಂ ಧಾ ರುಪಯ್ ನಾಂತ್. ವೀಕ್ ಕಾಣ್ಘೆಂವ್ಕ್ ಪಯ್ಶ್ಯೆ ದೀ’. ಮ್ಹಜಿ ಸಾಂಗ್ಣಿಂ ಕಿತೆಂಗೀ ಮ್ಹಳ್ಯಾರ್ ಜೆಣ್ಯೆಂತ್ ಚಡ್ ಪಿಸಾಯ್ (obsession)ಆಸ್ಚೆಂ ಭಾರೀ ಪಾಡ್. ಕೊಂಕ್ಣಿ ಜಾಯ್, ಕೊಂಕ್ಣೆಚೊ ಮೋಗ್ ಕರಿಜಯ್ - ತಶೆಂ ಮ್ಹಣ್ ಜಿವಾ ವರ್ತೊ ಕೊಂಕ್ಣೆಚೊ ಮೋಗ್ ಕರ್ಚೊ ನ್ಹಂಯ್. ಹೆಂ ಉತಾರ್ ಹಾಂವೆ ವಿಲ್ಫಿಕ್, ಮೌರಿಸ್ ಡೆಸಾಕ್, ಸಿರಿವಂತಾಕ್ ಹ್ಯಾ ಆಧಿಂ ಸಾಂಗ್ಲ್ಲೆಂ.
ಜೆರಾಲ್ ರಿತಿನ್ ಕೊಂಕ್ಣೆಚಿ ಪರಿಗತ್ ಬರಿ ದಿಸೊಂಕ್ ಪುರೊ ತರ್ಯೀ, ಹಕೀಗತೆಂತ್ ಕೊಂಕ್ಣಿ ವಾಚ್ಪಿ ದಿಸಾನ್ ದೀಸ್ ಉಣೊ ಜಾಯಿತ್ತ್ ವೆತಾ - ಹಿ ಸತಾಚಿ ಆನಿ ನಿರಾಶೆಚಿ ಗಜಾಲ್.
5. ’ಸತಾಂತ್ಲಿಂ ವಿಚಿತ್ರಾಂ’ಂತ್ಲಿಂ ತುಮ್ಚಿಂ ಆಯ್ಲೆವಾರ್ಚಿಂ ಲೇಖನಾಂ ಬಂಡಾಯಾಚ್ಯಾ ವಾಟೆರ್ ಆಸಾತ್ ಮ್ಹಳ್ಳೆಂ ಥೊಡ್ಯಾ ವಾಚ್ಪ್ಯಾಂ ಥಾವ್ನ್ ಹಾಂವೆಂ ಆಯ್ಕಲಾಂ - ಹ್ಯೇವಿಶಿಂ ತುಮ್ಚೆ ವಿಚಾರ್ ಕಸ್ಲೆ?
ಜಾ: ಸಗ್ಳಿಂ ಮೊಗಾಚ್ಯೊ ಕಾಣ್ಯೊ ಬರಯ್ತಾತ್. ಮ್ಹಜೊ ಕಾಣ್ಯೊ ದುಸ್ರಾಚ್ಚ್ ರಿತಿಚ್ಯೊ. ಹಾಂವ್ 1% ವರ್ಗಾಂತ್ಲೊಂ ಶಿವಾಯ್ 99% ವರ್ಗಾಂತ್ಲೊ ನ್ಹಂಯ್. ಮ್ಹಜಿ ಲಿಖ್ಣಿ ವೆಗ್ಳ್ಯಾಚ್ಚ್ ರಿತಿಚಿ. ಮ್ಹಾಕಾ ಉಲೊಂವ್ಚೆಂ ಪಿಶೆಂ ಚಡ್. ಕಾಳ್ಜಾಂತ್ ಕಿತೆಂ ಆಸಾ ತೆಂ ಉಗ್ತ್ಯಾನ್ ಸಾಂಗ್ಚೆ. ಹಾಂವ್ ಜಿಣ್ಯೆಂತ್ ಏಕ್ ವೆಗ್ಳ್ಯಾಚ್ಚ್ ರಿತೆಚೊ ಮನಿಸ್. ತಶೆಂ ಮ್ಹಳ್ಯಾರ್ ಲೊಕಾಕ್ ಆನಿ ಗಾಂವಾಕ್ ಪಾಡ್ ಕರ್ಚೊಂ ನ್ಹಂಯ್, ಪುಣ್ ವೆಗ್ಳ್ಯಾ ರಿತಿನ್ ಜೆಯೆಂವ್ಚೆಂ. ಹಾವೆಂ ವೆಳಾವಿಶಿಂ ಬರಯಿಲ್ಲೆಂ ವಾಚ್ಲೆಂ ತರ್ ತುಕಾಚ್ಚ್ ಕಳೊಂಕ್ ಆಸಾ, ಕಿತ್ಯಾಕ್ ಹ್ಯಾ ಪರಿಂ ಎದೊಳ್ ಕೊಣೆಂಯ್ ಬರಂವ್ಕ್ ನಾ. ಹಾವೆಂ ಮ್ಹಜಿ ಬಡಾಯ್ ಉಲಂವ್ಚಿ ನ್ಹಂಯ್ - ಬಗಾರ್ ಸತ್ ಉಲಂವ್ಚೆಂ.
ಸತ್ ಕೆದ್ನಾಂಯ್ ಕೊಡುಚ್ ನ್ಹಂಯ್ಗಿ? ದೆಕುನ್ ಸತ್ ಉಚಾರ್ಲ್ಲೆಂ ಕಾಂಯ್ ಥೊಡ್ಯಾಂಕ್ ಅಡ್ಹೂಕ್ ಲಾಗ್ಲಾಂ ಆಸ್ಯೆತಾ.
6. ಕೊಂಕ್ಣೆಂತ್ಲ್ಯಾ ಸಭಾರ್ ಕಲಾಕಾರಾಂಕ್, ಲೇಖಕಾಂಕ್ ತುಮಿ ಪರ್ಧ್ಯಾ ಪಾಟ್ಲ್ಯಾನ್ ತ್ರಾಣ್ ದಿಲಾಂ, ತಶೆಂಚ್ ಪಾಟಿಂಬೊ ದಿಲಾ ಆನಿ ದಿತೇಚ್ ಆಸಾತ್. ಹ್ಯೇವಿಶಿಂ ತುಮ್ಚೆ ವಿಚಾರ್ ಕಸ್ಲೆ?
ಜಾ: ಮ್ಹಾಕಾ ಹ್ಯಾ ವಿಶಿಂ ಕಾಂಯ್ ಸಾಂಗೊಂಕ್ ನಾಕಾ. ಮ್ಹಾಕಾ ಕುಟ್ಮಾಚೊ ಹುಸ್ಕೊ ಆಸಾ. ಹೆಂ ಚಿಂತಾಪ್ ಆಖೇರ್ ಪರ್ಯಾಂತ್ ಆಸ್ತೆಲೆ. ಹವ್ಯಾಸ್ (Hobby) ಆಸ್ಲ್ಲೆಂ ಒಬ್ಸೆಸ್ಸನ್ (obsession) ಜಾಂವ್ಕ್ ನ್ಹಜೊ. ಜಿಣ್ಯೆಂತ್ ಹಾಂವೆ ನಾಂವಾ ಖಾತಿರ್ ಕಾಮ್ ಕೆಲ್ಲೆಂ ನಾ. ಆನಿಂ ನಾಂವಾ ಖಾತಿರ್ ಕಾಮ್ ಕರ್ತೆಲ್ಯಾಂ ಪಾಟ್ಲ್ಯಾನ್ಯೀ ಹಾಂವ್ ನಾ. ಕಾಮ್ ಗರ್ಜೆಚೆ, ನಾಂವ್ ನ್ಹಂಯ್. ದೆಕುನ್ ಮ್ಹಾಕಾ ಕಾಮ್ ಕರ್ತೆಲೆ ಪಸಂದ್ ಶಿವಾಯ್ ನಾಂವಾಖಾತಿರ್ ಕಾಮ್ ಕರ್ತೆಲೆ ಭಿಲ್ಕುಲ್ ನ್ಹಂಯ್.
7. ತುಮ್ಕಾಂ ಸಾಹಿತ್ಯಾಂತ್ ಚಡ್ ಪಸಂದೆಚೊ ಪ್ರಕಾರ್ ಖಂಚೊ ಆನಿ ಕಿತ್ಯಾಕ್?
ಜಾ: ಟ್ರಾಜೆಡಿ ಮ್ಹಾಕಾ ಚಡ್ ಪಸಂದ್. ದುಖಾಚ್ಯೊ ಕಾಣ್ಯೊ, ಕಿತ್ಯಾಕ್ ಮ್ಹಳ್ಯಾರ್ ವಾಚ್ಲ್ಯಾ ಉಪ್ರಾಂತ್ ಭಗಾಜೆ. ಎಡ್ವಿನ್, ಐರಿನ್ ಪಿಂಟೊ, ಸಿರಿವಂತ್, ಸ್ಟೇನ್ ಆಗೇರಾ (ಥೊಡ್ಯೊ ಕಾಣ್ಯೊ), ಸ್ಟೇನಿ ನೀರುಡೆ (ತಾಚ್ಯಾ ಕಾಣ್ಯಾಂನಿ ತಾಣೆಂ ರಸ್ಚೆ ಮೊಗಾಚೆ ಪಾತ್ರ್ ಮ್ಹಾಕಾ ಪಸಂದ್), ವಲ್ಲಿ ವಗ್ಗ, ಕ್ಲೆರೆನ್ಸ್ ಕೈಕಂಬ. ಭಗ್ಣಾಂ ಮ್ಹಳ್ಯಾರ್ ಸಾಂಗಾತ್, ಜಾಂವ್ಕ್ ಪುರೊ ತೊ ಆವಯ್ ಬಾಪಾಯ್ಚೊ ತೊ ಆಮಿ ಭಗೊಂಕ್ ಜಾಯ್.
8. ಕೊಂಕ್ಣೆಚಾ ಪ್ರಸ್ತುತ್ ವಾವ್ರಾಚೆರ್ ವಾ ವಾವ್ರಾಡ್ಯಾಂಚೆರ್ ತುಮ್ಚೆ ವಿಚಾರ್ ಕಸ್ಲೆ?
ಜಾ: ಕೊಂಕ್ಣೆಚೊ ವಾವ್ರ್ ಕರ್ತೆಲ್ಯಾಂಕ್ ಪಯ್ಲೆಂ ಮ್ಹಜಿಂ ದೋಣ್ ಉತ್ರಾಂ ಹಿಂ: ಕೊಂಕ್ಣೆಚಿ ವಾವ್ರ್/ಸೆವಾ ಕರಾ, ಕಿತೆಂಯ್ ಕರಾ, ಪುಣ್ ಕುಟ್ಮಾಚೊ ಪಯ್ಲೆ ಮೋಗ್ ಕರಾ ಮಾಗಿರ್ ಕೊಂಕ್ಣೆಚೊ. ಜೆಜುನ್ ಮ್ಹಳಾಂ ’ತುಮಿಂ ಎಕಾಚ್ ವೆಳಾರ್ ದೊಗಾಂ ಧನ್ಯಾಂಚಿ ಸೆವಾ ಕರುಂಕ್ ಸಾಧ್ಯ್ ನಾ’. ಆಜ್ ಆಮ್ಚ್ಯಾ ಕೊಂಕ್ಣೆಂತ್ ಹಿ ಸ್ಥಿತಿ ಯೇಜೆ ತರ್ ಆಮಿ ಕೆಲ್ಲೆಂ ಪಿಶೆಂಪಣ್ ಕಾರಾಣ್. ತ್ಯಾ ಖಾತಿರ್ ಕೊಂಕ್ಣೆಂತ್ ಆಜ್ ಬರೆಯ್ಣಾರ್ ಮಾಯಾಗ್ ಜಾತಾತ್. ಆಜ್ಕಾಲ್ ಥೊಡೆ ಕೊಂಕ್ಣೆಚೆಂ ನಾಂವ್ ಕಾಡ್ತಾನಾ ಧಾಂವ್ತಾತ್. ಆಜ್ಕಾಲ್ ಬೂಕ್ ಯಾ ಪೇಪಾರಾಂ ಪರ್ಗಟ್ ಕರಿಜಯ್ ತರ್ ಸರ್ವಾಂಕ್ಯೀ ಫುಲಾಂ ಘಾಲಿಜಯ್ ಪಡ್ತಾ.
9. ಕೊಂಕ್ಣಿ ಭಾಸ್-ಸಾಹಿತ್ಯ್, ಅಂತರ್ಜಾಳಿಂ ಮುಖಾಂತ್ರ್ ವ್ಹಾಡಂವ್ಕ್ ಸಾಧ್ಯ್ ಆಸಾಗಿ? ತುಮ್ಚೆ ವಿಚಾರ್ ಕಸಲೆ?
ಜಾ: ಸಾಧ್ಯ್ ಆಸಾ. ವಾಚ್ಚೆ ಮನಿಸ್ ಆಸ್ಲ್ಯಾರ್ ಹೆಂ ಸಾಧ್ಯ್ ಆಸಾ. ಮಾರ್ಕೆಟಿಂತ್ ವ್ಯಾರ್ ದವರ್ನ್ ಲೋಕ್ ಯೇನಾ ತರ್ ಮಾರ್ಕೆಟ್ ಆಸೊನ್ ಕಿತೆಂ ಫಾಯ್ದೊ. ಪಯ್ಲೆ ಸುವಾತೆರ್ ಮಾರ್ಕೆಟ್ ಆಸ್ಲ್ಲೊ ಉದ್ದೇಶ್ ಜಾಣಾ ಜಾಯ್ಜಯ್. ಮೂಳ್ ಉದ್ದೇಶ್ ಜಾಣಾಂ ಜಾಂವ್ಚೆ ಭೋವ್ ಗರ್ಜೆಚೆಂ. ತೆಂ ದೆಗೆನ್ ದವರ್ಲೆಂ ತರ್ ಕಶ್ಟ್ ಮಾರ್ತೆಲೆ. ಶಿತ್ ಆಸ್ಲ್ಲೆ ಪೇಜ್ ಜಾಲ್ಯಾ ಉಪ್ರಾಂತ್ ಚಿಂತುನ್ ಕಾಂಯ್ ಫಾಯ್ದೊ ನಾ.
10. ಕೊಂಕ್ಣಿ ಭಾಸೆಚಾ ವಾಡಾವಳೆಕ್ ಕೊಣೆಂ ಕಸಲಿಂ ಕಾಮಾಂ ಕರ್ಚಿ ಗರ್ಜ್ ಆಸಾ?
ಜಾ: ಕೊಂಕ್ಣೆ ಖಾತಿರ್ ಕೊಂಕ್ಣೆಚೊ ಮೂಳ್ ಉದ್ದೇಶ್ ಬೊಲ್ಸಾಂತ್ ದವರ್ನ್ ಘುಂವಾಜಯ್. ತಶೆಂ ಕರ್ತಾನಾ ಕುಟ್ಮಾಚೊ ಮೋಗ್ ಕರ್ಚೊ ಗರ್ಜೆಚೊ. ಕಿತ್ಯಾಕ್ ತುಜೆರ್ ತುಜೆಂ ಕುಟಾಮ್ ಹೊಂದ್ವೊನ್ ಆಸಾ. ಜರ್ ತುಂ ಕುಟಾಮ್ ಹೊಗ್ಡಾವ್ನ್ ಕೊಂಕ್ಣೆಕ್ ವೆಂಗ್ಶಿ ತರ್ ಕಿತೆಂ ಫಾಯ್ದೊ. ಕೊಂಕ್ಣಿ ಆಮ್ಚಿ ಮಾಂಯ್ಭಾಸ್, ಜರ್ ತುಂ ಕೊಂಕ್ಣೆಚೊ ವಾವ್ರ್ ಕರ್ತಾಯ್ ತುಜ್ಯಾ ಕುಟ್ಮಾಚೊ ಪಯ್ಲೊ ಮೋಗ್ ಕರ್, ಉಪ್ರಾಂತ್ ಕೊಂಕ್ಣೆಚೊ ವಾವ್ರ್ ಕರ್.
11. ತುಮಿಂ ಸಾಂಗ್ಚೆಪ್ರಕಾರ್ ಕೊಂಕ್ಣಿ ವಾವ್ರ್ ಫಕತ್ತ್ ಅಂಕ್ವಾರ್ಯಾಂನಿ ಮಾತ್ರ್ ಕರಿಜಾಯ್ ಮ್ಹಣ್ಗೀ?
ಜಾ: ಸಾಧ್ಯ್ ಆಸಾ, ಪುಣ್ ಆಮ್ಚಾ ಕೊಂಕ್ಣೆಂತ್ ಕಿತ್ಲೆ ಅಂಕ್ವಾರಿ ಕೊಂಕ್ಣಿ ವಾವ್ರ್ ಕರ್ನ್ ಆಸಾತ್? ಕಾಂಯ್ ಸನ್ನಿ ಡಿ’ಸೋಜ್ ಎಕ್ಲೊ ಮ್ಹಜ್ಯಾ ಗಮನಾಕ್ ಯೆತಾ.
12. ಕೊಂಕ್ಣೆಂತ್ ತುಮ್ಚಿ ಮಹತ್ವಾಕಾಂಕ್ಷಾ ಕಸಲಿ?
ಜಾ: ಕೊಂಕ್ಣಿ ಪಾಲೆಜಾಯ್, ಕೊಂಕ್ಣಿ ಫುಲಾಜಯ್, ಆನಿ ಕೊಂಕ್ಣಿ ವಾಡಾಜಯ್ - ಹಿಚ್ಚ್ ಮ್ಹಜಿ ಮಹತ್ವಾಕಾಂಕ್ಷಾ.
13. ಕೊಂಕ್ಣಿ ಭಾಸೆಕ್ ಫುಡಾರ್ ಆಸಾಗಿ? ತುಮ್ಚೆ ವಿಚಾರ್ ಕಸ್ಲೆ?
ಜಾ: ಕೊಂಕ್ಣೆಕ್ ಬರೊ ಫುಡಾರ್ ಆಸಾ. ಆಮಿ ಕೊಂಕ್ಣಿ ಉಲೈಜಯ್, ತಿ ಸಾಂಬಾಳಿಜಯ್, ರಾಕಾಜಯ್. ಪುಣ್ ಕೊಂಕ್ಣಿ ಮ್ಹಣ್ ಬಸ್ಲ್ಯಾರ್ ಪಾವಾನಾ ಆಮಿ ದುಸ್ರ್ಯಾ ಭಾಶೆಕ್ಯೀ ವೆಂಗಿಜಯ್. ಪೊಟಾಚ್ಯಾ ಭುಕೆಕ್ ಆಮಿಂ ದುಸ್ರ್ಯಾ ಭಾಶೆಚೊ ಮೋಗ್ ಕರ್ಯಾಂ, ಆನಿಂ ಕೊಂಕ್ಣಿ ಆಮ್ಚಿ ಮಾಂಯ್ಭಾಸ್ ದೆಕುನ್ ಆಮಿ ಘರಾಂತ್ ಉಲವ್ಯಾಂ. ಹೆಂ ಮನ್ಶ್ಯಾಂಚೆರ್ ಹೊಂದ್ವೊನ್ ಆಸಾ.
14. ಹೆರ್ ಪ್ರಾಂತೀಯ್ ಭಾಸಾಂಚಾ ಸಾಹಿತ್ಯಾಮುಖಾರ್ ಕೊಂಕ್ಣಿ ಸಾಹಿತ್ಯ್ ಆಜ್ ಖಂಚ್ಯಾ ಪಾಂವ್ಡಾರ್ ಆಸಾ?
ಜಾ: ತೆಂ ಸಾಹಿತ್ಯಾಚೆರ್ ಹೊಂದೊನ್ ಆಸಾ. ದೆ| ಎ. ಟಿ. ಲೋಬೊ, ವಾಸು ವಾಲೆನ್ಸಿಯಾ, ಐರಿನ್ ಪಿಂಟೊಚೆ ಸಾಹಿತ್ಯ್ ಮೊಸ್ತು ಬರೆಂ ಆಸಾ. ಆಮಿಂ ಖಂಚ್ಯಾಯ್ ಭಾಸೆಚ್ಯಾ ಸಾಹಿತ್ಯಾಸವೆಂ ಕೊಂಕ್ಣೆಕ್ ತುಲನ್ ಕರುಂಕ್ ಜಾಯ್ನಾ, ನಂಯ್ಕ್ ಆನಿ ದರ್ಯಾಕ್ ತುಕುಂಕ್ ಜಾಯ್ನಾ. ತಶೆಂಚ್ಚ್ ಇಂಗ್ಲೀಶಾಚ್ಯಾ ಆನಿ ಕೊಂಕ್ಣೆಚ್ಯಾ ಸಾಹಿತ್ಯಾಕ್ ತುಲನ್ ಕರುಂಕ್ ಜಾಯ್ನಾ. ಆಪ್ಪಲಾಕ್ ಆಪ್ಪಲಾ ಸಂಗಿಂ ತುಲನ್ ಕರಿಜಯ್ ಶಿವಾಯ್ ಆಂಬ್ಯಾ ಸಾಂಗಾತಾ ತುಲನ್ ಕರ್ಚೆಂ ನ್ಹಂಯ್. ಕೊಂಕ್ಣಿ ಭಾಸ್ ವಾಪಾರ್ಚೆ ಕಿತ್ಲೆ ಜಣ್ ಆಸಾತ್ ತೆಂ ಪಳೆವ್ನ್ ಆಮಿ ಸಮಾಸಮ್ ಕರಿಜಯ್ ಪಡ್ತಾ. ಆಬಾಕ್ ಆನಿ ನಾತ್ವಾಕ್ ತುಲನ್ ಕರುಂಕ್ ಜಾಯ್ನಾ ತಶೆಂಚ್ಚ್ ಹೆರ್ ಭಾಸಾಂಚ್ಯಾ ಸಾಹಿತ್ಯಾಕ್ ಆಮಿ ಕೊಂಕ್ಣಿ ಸಾಹಿತ್ಯ್ ತುಲನ್ ಕರುಂಕ್ ಜಾಯ್ನಾಂ. ಕೊಂಕ್ಣೆಂತ್ ಭಾಸಾಂಚ್ಯಾ ಅಂತರಾರ್ ತ್ಯಾ ಸಾಹಿತ್ಯಾಕ್ ಆಮಿ ತುಲನ್ ಕರ್ನ್ ಕೊಂಕ್ಣಿ ಖಂಚ್ಯಾ ಪಾಂವ್ಡಾರ್ ಆಸಾ ಮ್ಹಣ್ ಪಳೆಂವ್ಚಿ ಗರ್ಜೆಚೆಂ.
15. ದಾಯ್ಜ್.ಕೊಮ್ಚೆ ಸಲ್ಹಾ ಮಂಡಳಿಚೆ ಸಾಂದೆ ತುಮಿ - ದಾಯ್ಜಾಚಾ ಮಿಸಾಂವಾಂನಿ ತುಮ್ಚೆ ಪ್ರಾಮಾಣಿಕ್ ವಿಚಾರ್ ಕಸ್ಲೆ?
ಜಾ: ಎದೊಳ್ ಹಾಂವೆ ಕಾಂಯ್ ವಿಶೇಸ್ ಕರುಂಕ್ ನಾ. ಮ್ಹಜಿ ಸಲ್ಹಾ ದಾಯ್ಜಾಕ್ ನ್ಹಂಯ್, ದಾಯ್ಜ್ ಸಾಂಬಾಳ್ಚ್ಯಾ ವಲ್ಲಿಕ್. ಪಯ್ಲೆಂ ತುಜಿ ಭಲಾಯ್ಕಿ ಸಾಂಬಾಳ್ ಅನಿ ತುಜ್ಯಾ ಕುಟ್ಮಾಕ್ ಸಾಂಬಾಳ್.
16. ತುಮಿ ಪರತ್ ಪರತ್ ಭಲಾಯ್ಕಿ ಸಾಂಭಾಳ್ ಮ್ಹಣ್ಚೆಂ ಕಿತ್ಯಾಕ್?
ಜಾ: ಜಿಣ್ಯೆಂತ್ ಬರಿ ಭಲಾಯ್ಕಿ ಆಸತ್ ತರ್ ಮಾತ್ರ್ ಆಮ್ಚ್ಯಾನ್ ಬರಿಂ ಕಾಮಾಂ ಕರುಂಕ್ ಸಾಧ್ಯ್. ಇಂಗ್ಲಿಶಾಂತ್ ಏಕ್ ಸಾಂಗ್ಣಿ ಆಸಾ ’ಆಸ್ತ್ ಬದಿಕ್ ಗೆಲ್ಯಾರ್ ಇಲ್ಲೆಂ ಗೆಲೆಂ, ಪುಣ್ ಭಲಾಯ್ಕಿ ಗೆಲ್ಯಾರ್ ಸರ್ವ್ ಗೆಲೆಂ’. ಹಾಂವ್ ಹ್ಯಾ ವಿಚಾರಾಂಚೊ ಪಾಟ್ಲಾವ್ದಾರ್.
17. ದಾಯ್ಜ್.ಕೊಮ್ ವಾಚ್ಪ್ಯಾಂಕ್ ತುಮ್ಚೆ ಸಂದೇಶ್ ಕಸ್ಲೆ?
ಜಾ: ದಾಯ್ಜ್ ಬರೆಂ ಕಾಮ್ ಕರ್ತಾ. ಆಪ್ಣಾಚೆಂ ಚಿಂತಿನಾಸ್ತಾಂ ಕೊಂಕ್ಣೆ ಖಾತಿರ್ ಕಾಮ್ ಕರ್ನ್ ಆಸಾ, ಭಲಾಯ್ಕೆನ್ ತಾಂಚೊ ಮೋಗ್ ಕೆಲ್ಯಾರ್ ಪುರೊ, ಪ್ರಾಯ್ ಜಾತಾನಾ ಉಮೆದ್ ನಿವ್ತಾನಾ ದಾಯ್ಜ್ ಎಕಾ ಬರ್ಯಾ ಪಂಗ್ಡಾಚಾ ಹಾತಾಕ್ ಮೆಳೊನ್, ಎದೊಳ್ ಸಭಾರ್ ನಿದೊನ್ ಪಡ್ಲ್ಲೆ ವಾ ಲಿಂಬಾಂತ್ ಗೆಲ್ಲೆ ಸಭಾರ್ ಸಂಸ್ಥ್ಯಾಬರಿಂ ಯಾ ಆಮ್ಚ್ಯಾ ಕೊಂಕ್ಣಿ ಪತ್ರಾಂಬರಿಂ ಜಾಂವ್ಚೆಂ ನಾಕಾ ಮ್ಹಣ್ ಮ್ಹಜಿ ಆಶಾ. ಹೆಂ ಘಡ್ಚೆಂ ನಾಕಾ ಮ್ಹಣ್ ಆಶೆತಾಂ ಆನಿ ವಲ್ಲಿಕ್ ಮುಗಂಡ್ ಹಿಶಾರೊ ದಿತಾ.
18. ದೇವ್ ಬರೆಂ ಕರುಂ ಜೆಮ್ಮಾಬ್ ತುಮ್ಕಾಂ, ತುಮಿಂ ಆಮ್ಕಾಂ ದಿಲ್ಲ್ಯಾ ಅಮೊಲಿಕ್ ವೆಳಾಖಾತಿರ್.
ಜಾ: ತುಕಾಯ್ ದೇವ್ ಬರೆಂ ಕರುಂ ವಾಯ್ಲೆಟ್, ತುಂ ತುಜ್ಯಾ ಕುಟ್ಮಾಸಮೇತ್ ತಿತ್ಲೆ ಪಯ್ಸ್ ಥಾವ್ನ್ ಯೇವ್ನ್ ಮ್ಹಜೆಂ ಸಂದರ್ಶನ್ ಘೆವ್ನ್ ಮ್ಹಾಕಾ ಸಂತೊಸ್ ದಿಲ್ಲ್ಯಾಕ್. ದೇವ್ ತುಮ್ಚಾ ಕುಟ್ಮಾಕ್ ಸರ್ವ್ ಸಂತೊಸ್ ದೀಂವ್.
About us | Feedback | Contact us
Copyright ©
2005 DAAIZ.COM All rights reserved.
Page concept, designed and maintained by Ashawadi Publications
