ಕವಿತಾकविताPoem
ದೇಸ್
This poem is available in its original Kannada only.
ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಉತ್ರಾಂತ್ ಸೂತ್ರಾಂ
ಮಯ್ನ್ಯಾಚೊ ಕವಿ - 8
ಸೂತ್ರ್ 8: ಮ್ಹಜೊ ದೇಸ್ ಮಹಾನ್
ಮಾ|ಜೋರ್ಜ್ ಒಲಿವೆರಾ, ಮೈಸೂರ್
ಸ್ವಾತಂತ್ರ್, ಆಮಿ, ಆಮ್ಚಿ ಸಮಾಜ್ ಆನಿ ಕವಿ
’ಮ್ಹಜೊ ಖುನಿಗಾರ್ಚ್ ಹ್ಯಾ ಕೊಡ್ತಿಚೊ ಮುನ್ಸುಬ್ದಾರ್ ಜಾಲಾ
ಮ್ಹಜ್ಯಾ ಪಾಡ್ತಿಚೆಂ ಪೈಸಲ್ ಮ್ಹಜಾಚ್ಚ್ ಘರ್ಚ್ಯಾ ಅಂಗ್ಣಾಂತ್ ವಿಕುನ್ ಗೆಲಾಂ.’
ಕಾಂಯ್ ಎಕಾ ವರ್ಸಾಧಿಂ ಕವಿ ಬಾಬ್ ಜೊಮೆಲಾನ್ ಬರಯಿಲ್ಲ್ಯಾ ಎಕಾ ಕವಿತೆಂತ್ಲಿಂ ಉತ್ರಾಂ ಹಿಂ. ಜಾಣಾರ್ಯಾಂನಿ ಸಾಂಗ್ಚೆಪರಿಂ ’ಭಾಯ್ಲ್ಯಾ ದುಸ್ಮಾನಾಂಲಾಗಿಂ ಝುಜ್ಯೆತಾ, ಪುಣ್ ಭಿತರ್ಲ್ಯಾ ದುಸ್ಮಾನಾಂಕ್ ಕಿತೆಂ ಕರ್ಚೆಂ?’ ಭೋವ್ಶಾ ಹೆ ವಿಚಾರ್ ಆಯ್ಚಾ ಕಾಳಾರ್ ಆಮ್ಚಾ ದೇಶಾಚೆರ್ ಲಾಗು ಕರ್ಯೆತಾ ಕೊಣ್ಣಾ.
ಅಗೋಸ್ತ್ ಮಯ್ನೊ ಸಬಾರ್ ಕಾರಣಾಂಕ್ ಮಹತ್ವಾಚೊ, ರಾಜಕೀಯ್/ಧಾರ್ಮಿಕ್/ಸಾಮಾಜಿಕ್ ರಿತಿನಿ ಸಯ್ತ್ ಹಾಚೊ ಮಹತ್ವ್ ಆಸಾ, ರಾಜಕೀಯ್ ರಿತಿನ್ ಸ್ವಾತಂತ್ರ್ ಲಾಭೊನ್ 60 ವೆಂ ವರಸ್ ಸಂಪವ್ನ್ 61 ವ್ಯಾ ವರ್ಸಾಕ್ ಪಾಂಯ್ ಥೆಂಕ್ಚೊ ಮಹತ್ವ್, ಸಾಮಾಜಿಕ್ ರಿತಿನ್ ಆಮ್ಕಾಂ ಆಸ್ಚಾ ಸ್ವಾತಂತ್ರಾಚೊ ಉಡಾಸ್ ನಿಯಾಳ್ ಕರ್ಚೊ ತರ್ ಧಾರ್ಮಿಕ್ ರಿತಿನ್ ಅಂಕ್ವಾರ್ ಮರಿಯೆಚೆಂ ಸ್ವರ್ಗಾರೋಹಣಾಚೊ ಸಂಭ್ರಮ್. ಹ್ಯಾ ಸಂಭ್ರಮಾ ಮಧೆಂ ಆಮಿಂ ಆಮ್ಕಾಂ ಆಸ್ಚಾ ಸ್ವಾತಂತ್ರಾಚೆರ್ ಎಕೊಡೊ ನಿಯಾಳ್ ಕರ್ಚೊ ತರ್;
ಆಮ್ಚೆಂ ಸ್ವಾತಂತ್ರ್ ಉಲಂವ್ಚೆಂ ಹಕ್ಕ್ ಕಿತ್ತುನ್ ಪಾವ್ಲಾಂ? ಖಂಚ್ಯಾ ಪಾಂವ್ಡಾರ್ ಆಸಾ? ನಿರ್ಭೀತ್, ನಿಶ್ಟುರ್ ಪತ್ರಿಕೋಧ್ಯಮ್ ಚಲಯ್ತೆಲ್ಯಾಂಕ್ ದಿಸಾ ಉಜ್ವಾಡಾಕ್ ಲಗಾಡ್ ಕಾಡ್ತಾನಾ, ಕಾಯ್ದೆ ಕಾನುನ್ ಹಾತ್ ಭಾಂದುನ್ ವಗೆಚ್ಚ್ ಬೊಸ್ತಾನಾ ಸತ್ ಉಲಯ್ತೆಲೆ ತೊಂಡ್ ಧಾಂಪುನ್ ಬೊಸ್ತಾತ್ ತರ್ ಉಲಯ್ತೆಲ್ಯಾಂಚೆ ಉಲಯಿಲ್ಲೆಂ ಸರ್ವ್ ಸತ್ ಜಾತಾ, ವಾ ತೆಂ ಸತ್ ಕರ್ಚಿ ವಿಧ್ಯಾ ತಾಂಕಾಂ ಕಳಿತ್ ಆಸಾ. ದೆಕುನ್ ಆಜ್ಕಾಲ್ಚೆಂ ಪತ್ರಿಕೋಧ್ಯಮ್ ವ್ಯಭಿಚಾರಾಚೊ ದಂಧೊಚ್ ಶಿವಾಯ್ ಹೆರ್ ಕಿತೆಂಚ್ ನ್ಹಂಯ್. ಹಾಂಗಾ ಕೊಣೆಂಯ್ ದುಡು/ಚೆಡುಂ ವಾ ಹೆರ್ ರಿತಿಚೆಂ ಧನ್-ದಿರ್ವೆಂ ದಿವುನ್ ಮಾನ್-ಸಮ್ಮಾನ್ ಮೊಲಾಕ್ ಘೆವ್ಯೆತಾ. ಪ್ರಶಸ್ಥ್ಯೊ ಬಿರುದೊ ಆಪ್ಣಾವ್ಯೆತಾ - ಹೆಂ ಆಮ್ಚೆಂ ಪತ್ರಿಕೋಧ್ಯಮ್ ಸ್ವಾತಂತ್ರ್. ಆಮ್ಕಾಂ ಉಟ್ಲ್ಯಾರೀ, ಬೊಸ್ಲ್ಯಾರೀ ಹೊಗಳ್ಸಿತೆಲೆಚ್ಚ್ ಜಾಯ್, ಫುಗಾರ್ಚೆ, ಫುಲಾಂ ಘಾಲ್ಚೆಚ್ ಜಾಯ್.
ಪಡ್ಲಾ ಥಾವ್ನ್ ಮುಡ್ಲಾ ಪರ್ಯಾಂತ್, ತೆನ್ಕಾ ಥಾವ್ನ್ ಬಡ್ಗಾ ಪರ್ಯಾಂತ್ ಆಮ್ಚಾ ದೆಶಾಚ್ಯಾ ಗಡಿಚೆರ್ ಸೊಡ್ಯಾಂ, ದೇಶಾ ಭಿತರ್ ಸಯ್ತ್ ಮನಿಸ್ ಮನ್ಶ್ಯಾಕ್ ಜಿವೊಚ್ಚ್ ಖಾಂವ್ಕ್ ಲಾಗ್ಲಾ. ಗರೀಬ್ ಗರೀಬ್ ಜಾತೇಚ್ ವೆತಾನಾ ಗ್ರೇಸ್ತ್ ಗ್ರೇಸ್ತ್ ಜಾತೇಚ್ ವೆತಾ ವಾ ತ್ಯೊ ವಾಟೊ ಸೊಧುನ್ಂಚ್ ಆಸಾ. ದೇಶ್ಭರ್ ರೈತಾಂಚಿ ಮಿನತ್ ಜೆದ್ನಾಂ ದಲಾಲಿ ಅಪ್ಲ್ಯಾ ಫಾಯ್ದ್ಯಾಕ್ ಗಳುಂಕ್ ಧರ್ತಾನಾ ತೊ ರೈತ್ ರಿಣಾಚೊ ಭರೊ ಚಡೊನ್ ಜೀವ್ಘಾತ್ ಕರ್ತಾ. ಪಾಡ್ತ್ ವಿರೋದ್ ಪಾಡ್ತಿಚೆರ್ ಬೊಟಾಂ ಜೊಕ್ತಾ. ಕಾಯ್ದೆ ಕಾನುನ್ ಭಳ್ ಆಸ್ಚಾಂಚ್ಯಾ ಬೊಲ್ಸಾಂನಿ ಬಸ್ತಾ. ಖಂಚೋಯ್ ಧರ್ಮ್ ಕಿತ್ಲೊಯ್ ಬರೊ ಆಸ್ಯೆತಾ, ಪುಣ್ ತ್ಯಾ ತ್ಯಾ ಧರ್ಮಾಕ್ ಪ್ರತಿನಿಧಿತ್ವ್ ಕರ್ಚೆ ಹ್ಯಾ ಧರ್ಮಾಕ್ ಆಯ್ದ್ ಕರುನ್ ಅಪ್ಲೊ ವೆವಸ್ತಿತ್ ದಂದೊ ಚಲಯ್ತೇ ಆಸ್ಚೆಂ ಆಮ್ಚೆಂ ಧಾರ್ಮಿಕ್ ಸ್ವಾತಂತ್ರ್.
ದೊಳ್ಯಾಂಕ್ ದೊಳೊ, ತಾಲ್ವಾರ್ ಧರ್ತೆಲ್ಯಾಂಕ್ ತಾಲ್ವಾರೆಂತ್ ಜಾಪ್ ದಿಂವ್ಚೆಂ ಸದಾಂಚೆಂ ಜಾಲಾಂ. ಪೊಟಾಂತ್ಲ್ಯಾ ಬಾಳ್ಶ್ಯಾಂಚಾ ಜಿವಾಚಿ ವಿಂಚವ್ಣ್ ತೆಂ ಬಾಳ್ ಭುಂಯ್ ಪಡ್ಚ್ಯಾಧಿಂ ಜಾತಾ. ಲ್ಹಾ ಲ್ಹಾನ್ ಭುರ್ಗ್ಯಾಂಚೆರ್ ದಿಸಾ ಉಜ್ವಾಡಾಕ್ ಅತ್ತ್ಯಾಚಾರ್ ಜಾತಾನಾ ಮನಿಸ್ ಅಪ್ಣಾಕ್ ಖಂಚ್ಯಾ ಅರ್ಥನ್ ಮನಿಸ್ ಮ್ಹಣ್ತಾ ಮ್ಹಳ್ಳೆಂ ಸವಾಲ್ ಉಭೆಂ ಜಾತಾ. ಹರ್ಯೆಕಾ ರಾಜ್ಯಾಂತ್ ಎಕಾಪ್ರಾಸ್ ಅಧಿಕ್ ಉಗ್ರ್ವಾದಿ, ಆತಂಕ್ವಾದಿ ಮನಿಸ್ ಚಡೊನ್ ಗೆಲ್ಯಾತ್. ತೆ ಅಪ್ಲ್ಯಾ ಫಾಯ್ದ್ಯಾಕ್ ಕಶೆಂ, ಕೆದಾಳಾ, ಕಿತ್ಲೆಂ ಗಳ್ಸುಂಚೆಂ ಮ್ಹಳ್ಳೆಂ ಜಾಣಾಸ್ಚೆ ಹಾಂಚೊ ಬರೊ ಫಾಯ್ದೊ ಜೊಡ್ತಾತ್. ಜೆದ್ನಾಂ ಅಸಲೆ ಆತಂಕ್ವಾದಿ ಅಪ್ಲ್ಯಾ ಫಾಯ್ದ್ಯಾಕ್ ಪಡಾನಾಂತ್ ತೆದ್ನಾಂ ಹಾಂಕಾಂ ನಕ್ಸಲಿಟ್, ಟೆರರಿಸ್ಟ್ ಮ್ಹಣ್ ಮಾರ್ನ್ ಉಡಯ್ತಾತ್. ಉಪ್ರಾಂತ್ ಹಾಂಕಾಂಚ್ - ಪೊಲಿಸಾಂಚೆರ್ ಗುಳೆ ಘಾಲ್ಲ್ಯಾಕ್ ಹಾಂಕಾಂ ಲಗಾಡ್ ಕಾಡ್ಲೊ ಮ್ಹಣ್ತಾತ್. ಹಾಚೆ ಮಧೆಂ ಚಿರ್ಡೊನ್ ಜಿಯೆಂವ್ಚೆಂ ಸಾದ್ಯಾ ಲೊಕಾನ್ ಶಿವಾಯ್ ಭಳ್ ಆಸ್ಚಾಂಕ್ ಕಾಯ್ದೆ ಕಾನುನ್, ವಶೀಲಾಯ್ ಹರ್ಯೆಕ್ ಮುಟಿಂತ್. ಹೆಂ ಆಮ್ಚೆಂ ರಾಜಕೀಯ್/ಸಾಮಾಜಿಕ್ ಸ್ವಾತಂತ್ರ್.
ಹೆಂಗೀ ಆಮ್ಚೆಂ ಖರೆಂ ಸ್ವಾತಂತ್ರ್?
ಸರ್ವ್ ಧರ್ಮಾಂಕ್ ಸಹನ್ ಕರ್ಚೆಂ ಧರ್ಮ್ ಆಜ್ಕಾಲ್ ಮೂಳ್ಭೂತ್ ಚಿಂತ್ಪಾತೆವ್ಶಿಂ ಮಾಲ್ವಲಾಂ. ಎಕಾಮೆಕಾಚೊ ಮೋಗ್ ಕರುಂಕ್ ಶಿಕಂವ್ಚೆಂ ಧರ್ಮ್ ಆಪ್ಲ್ಯಾ ಖಾಸ್ ರಗ್ತಾ ಸಂಬಂದಾಕ್ ಲೆಕಿನಾ ತರ್ ಹೆರ್ ಮೊಗಾಕ್ ಮಾರ್ ಗುಳೆ. ಲೊಕ್ ಪಯ್ಲೊಚ್ ಧರ್ಮಾ ಥಾವ್ನ್ ಮಯ್ಲಾಂ ಪಯ್ಸ್ ಪೊಳೊನ್ ವೆಚ್ಯಾ ಸಂದರ್ಭಾರ್ ವೆವೆಗ್ಳೆ ಧರ್ಮಾಕ್ ಲೊಕಾಂಚೆರ್ ವಿಖ್ಚೆ, ಥಾಪ್ಚೆ ಭಡ್ವೆಯೀ ಯಥೇಶ್ಟ್. ದೆಕುನ್ ಕೊಣಾಕ್ ಪುಸ್ಲಾವ್ನ್, ಕೊಣಾಕ್ ನಾಗವ್ನ್, ಕೊಣಾಕ್ ಬನಾವ್ನ್ ಧರ್ಮಾಚೊ ದಂದೊ ಚಲ್ತಾ. ಖಂಯ್ ಭಾಂದ್ಪಾಂ ಉಭಾರುನ್, ಖಂಯ್ ಆಸ್ಚಿಂ ಭಾಂದ್ಪಾಂ ಕೊಸ್ಳಾವ್ನ್ ನವಿಂ ಭಾಂದ್ಪಾಂ ಉಭಿಂ ಜಾತಾತ್. ಆಮ್ಚೆಲಾಗಿಂ ಸಂಭ್ರಮಾಂಕ್ ಯಥೇಶ್ಟ್ ನಿಬಾಂ ಆಸಾತ್. ಪುಣ್ ಆಮ್ಕಾಂ ಸಮಾಜೆಂತ್ ಆಸ್ಚಾ ಸ್ವಾತಂತ್ರಾಚೆರ್ ಸಂಭ್ರಮ್ ಪಾಂವ್ಚೆತಸ್ಲೆಂ ಕಾಂಯ್ ಆಮ್ಚೆಲಾಗಿಂ ಆಸಾ?
ಆಮ್ಚೆಂ ಚಿಂತಾಪ್ ದಿಸಾನ್ ದೀಸ್ ಅಶೀರ್ ಜಾತೇಚ್ ವೆತಾ. ’ಬರು ಬರುತ್ತಾ ರಾಯರ ಕುದುರೆ ಕತ್ತೆಯಾಯಿತು’ ಮ್ಹಳ್ಳೆಪರಿಂ. ಹಾಂತುಂ ಸಾದೊ ಲೋಕ್ ಮಾತ್ರ್ ನ್ಹಂಯ್. ಆಮ್ಚೆ ಮಹಾನ್ (?) ಸಾಹಿತಿ, ಕವಿ ಸಯ್ತ್ ಧಾರಾಳ್ ಮಾಪಾಪ್ ಆಸಾತ್. ಉಂಚ್ಲ್ಯೊ ಉಂಚ್ಲ್ಯೊ ಪ್ರಶಸ್ಥ್ಯೊ ಅಪ್ಣಾಯಿಲ್ಲೆ. ಅಪ್ಲ್ಯಾ ಮಹಾನ್ ಕಾರ್ಭಾರಾಂಕ್ ವಿಜಿಟಿಂಗ್ ಕಾರ್ಡಾಂನಿ ಛಾಪುನ್, ಭುರ್ಗ್ಯಾಂಕ್ ಸ್ವಾತಂತ್ರೋತ್ಸವಾಚ್ಯಾ ಸಂದರ್ಭಾರ್ ಇಸ್ಕೊಲಾಂನಿ ಚೊಕ್ಲೆಟಾಂ ವಾಂಟ್ಚೆಪರಿಂ ತಿಂ ವಿಜಿಟಿಂಗ್ ಕಾರ್ಡಾಂ ವಾಂಟ್ಚಾಂಕ್ ಸಯ್ತ್ ಹೊಚ್ಚ್ ಹೊರ್ಭೊಸ್. ದೆಕುನ್ ಹಾಂವ್ ತುಜಿ ಪಾಟ್ ಥಾಫುಡ್ತಾಂ ತುಂ ಮ್ಹಜಿ ಥಾಪುಡ್, ಹಾಂವ್ ತುಕಾ ಮುಖೆಲ್ ಸಯ್ರೊ ಕರ್ತಾಂ, ತುಂ ಮ್ಹಾಕಾ ಮುಖೆಲ್ ಸಯ್ರೊ ಕರ್. ಹಾಂವ್ ತುಕಾ ಪುರಸ್ಕಾರ್ ದಿತಾಂ ತುಂ ಮ್ಹಾಕಾ ಪುರಸ್ಕಾರ್ ದೀ, ಹಾಂವ್ ತುಕಾ ಫುಲಾಂ ಫಳಾಂ ದಿತಾಂ ತುಂ ಮ್ಹಾಕಾ ಫಳಾಂ ದಿ - ಮ್ಹಳ್ಳಿಂ ಸುಪ್ತ್ ಧೋರಣಾಂ. ಹಾಂಗಾಸರ್ ನೈತಿಕ್ ಮೌಲ್ಯಾಂ ವಾ (Ethics) ಕೊಣಾಕ್ ಪಡೊನ್ ಗೆಲಾಂ?. ಆನಿ ಹ್ಯಾ ಸರ್ಕಸಾಕ್ ಹೆರಾಂನಿ ದಿಂಬಿಯೆರ್ ಪಡೊನ್ ಹರ್ಸಿಜಾಯ್, ವ್ಹಾ ವ್ಹಾ ಮ್ಹಣೊನ್ ತಾಳಿಯೊ ಪೆಟಿಜಾಯ್, ಮಹಾನ್ ಸಾಹಿತಿ (?) ಮ್ಹಣ್ ಮಾನ್ ಕರಿಜಾಯ್ - ಪುಣ್ ಕರ್ಚೆಯ್ ಆಸಾತ್!!!
ಆಸೊಂ - ಹೆಂಯ್ ಎಕಾ ರಿತಿಚೆಂ ಸ್ವಾತಂತ್ರ್. ಹಾಗ್ತಾನಾ ಭಾಕ್ರಿ ಖಾತೆಲ್ಯಾ ಭುರ್ಗ್ಯಾಕ್ ಎಕ್ಲ್ಯಾನ್ ಸಾಂಗ್ಲೆಂ ಕಂಯ್ ’ಅಳೆ ಹಾಗ್ತಾನಾ ಭಾಕ್ರಿ ಖಾಯ್ನಾಕಾ’ ಮ್ಹಣ್. ತೆದ್ನಾಂ ಭುರ್ಗೊ ವಿಚಾರಿಲಾಗ್ಲೊ ಕಂಯ್ ’ಹಾಂವ್ ಬುಡವ್ನ್ ಖಾತಾಂ - ಕಿತೆಂ ಕರ್ತಾಯ್?’. ದೆಕುನ್ ಖಾಂವ್ದಿ - ಬುಡೊನ್ ಖಾಂವ್ದಿ ವಾ ಲೊಳೊನ್ ಖಾಂವ್ದಿ. ಆಮಿ ಉಲಯ್ನಾಸ್ತಾಂ ರಾಂವ್ಚೆಂ ಬರೆಂ ನ್ಹಂಯ್ಗಿ?
ಉತ್ರಾಂತ್ ಸೂತ್ರಾಂಚ್ಯಾ ಆಟ್ವ್ಯಾ ಆಂಕ್ಡ್ಯಾಂತ್ ’ಮ್ಹಜೊ ದೇಸ್ ಮಹಾನ್’ ಮ್ಹಳ್ಳೆಂ ಸೂತ್ರ್ ದಿಲ್ಲೆಂ. ಎಕಾಪ್ರಾಸ್ ಏಕ್ ಅಪುರ್ಭಾಯೆಚಿಂ ಕವಿತಾ ಯೆತಿತ್ ಮ್ಹಣ್ ಅಪೇಕ್ಶಿಲ್ಲೆಂ - ಇಲ್ಲಿ ನಿರಾಸ್ ಜರೂರ್ ಆಸಾ. ಪುಣ್ ಪ್ರೇತನ್ ಕೆಲ್ಲೆ ಸಭಾರ್ ಧಾಖ್ಲೆ ಹಾಂಗಾಸರ್ ದಿವ್ಯೆತಾ.
ಕವಿ ಬಾಬ್ ಆರ್ಯನ್ ತಾಕೊಡೆ ’ಮ್ಹಜೊ ದೇಸ್.. ಬೊಲ್ಪ್ಯಾ ವೇಸ್!’ ಮ್ಹಣೊನ್ ಅಪ್ಲ್ಯಾ ಕವಿತೆಚಿ ಸುರ್ವಾತ್ ಕರ್ಚೊ, ಅಪ್ಲ್ಯಾ ಕವಿತೆಂನಿ ವೆವೆಗ್ಳ್ಯಾ ಇಮಾಜೆಂನಿ ಸಭಾರ್ ಸತಾಂ ಉಸ್ತುನ್ ವೆತಾ.
ಕವಿ ಬಾಬ್ ಫ್ರಾನ್ಸಿಸ್ ಫುಡ್ತಾದೊ ಆಮ್ಚಾ ದೇಸಾಚ್ಯಾ ಸಮಾನತಾವಾದ್ ಪಿಂತ್ರಾಂವ್ಚೆಂ ಕವಿತಾ ಬರಯ್ತಾ
’ಗ್ರೇಸ್ತಾಂಕ್ ಯೇವ್ನ್ ವಚೊಂಕ್ ಮೆಳ್ತಾ ವಿಮಾನ್,
ದುಬ್ಳೆ ಮಾತ್ರ್ ಮೊರ್ತಾತ್ ರೈಲಾರ್ ಉಮ್ಕಾಳೊನ್.’
ಕವಯತ್ರಿ ಬಾಯ್ ವಿಲ್ಮಾ ಕೊರೆಯಾ ಹರ್ಶೆಂಚೆಪರಿಂ ವಿಡಂಬನಾತ್ಮಕ್ ರಿತಿಚೆಂ ಕವಿತಾ ಘೆವುನ್ ಆಯ್ಲ್ಯಾ.
ಬೆಳೆಂ ದಾಸ್ತಾನ್, ಕುಸ್ತಾ ಗುದಾಂವಾಂತ್
ದುಬ್ಳೊ ಬಾವ್ಡೊ ಮೊರ್ತಾ ಭುಕೆನ್
ಮಂತ್ರಿ ಗಾಜವ್ನ್ ಭಂವ್ತಾ ರುಭಾವಾನ್
’ಮೇರಾ ಭಾರತ್ ಮಹಾನ್’.
ಕವಯತ್ರಿ ಬಾಯ್ ವಾಯ್ಲೆಟ್ ಪಿರೇರಾಚಿ ಸಾಮಾಜಿಕ್ ನದರ್ ತೀಕ್ಷ್ಣ್ ಜಾಲ್ಲಿ ಖರಿಚ್ ಜಾವ್ನ್ ಬರಿಂ ಲಕ್ಶಣಾಂ; ತಿಚ್ಯಾ ಕವಿತೆಂನಿ ಸಯ್ತ್ ತಸಲೆಂಚ್ ಸಮಾಜಿಕ್ ಹುಸ್ಕ್ಯಾಚೆಂ ಚಿಂತಾಪ್ ಉಟೊನ್ ದಿಸ್ತಾ;
’ಖಂಯ್ಸರ್ ಪಳೆಯ್ಲ್ಯಾರೀ ಮಾರಾಮಾರಿ
ಹುದ್ದ್ಯಾ ಖಾತಿರ್ ಥೊಡೆ ಘೆತಾತ್ ತಲ್ವಾರಿ.
ಕವಯತ್ರಿ ಬಾಯ್ ಪ್ರಿಯಾ ಸಿಕ್ವೇರಾಚೆಂ ಹೆಂ ಕವಿತಾ ಮ್ಹಾಕಾ ಪರತ್ ವಿಜ್ಮಿತ್ ಕರ್ತಾ, ಕಿತ್ಯಾಕ್ ತಿಚ್ಯಾ ಕವಿತೆಚಿಂ ಸುರ್ವಿಲ್ಲಿಂ ಪಾವ್ಲಾಂ ಹಾವೆಂಚ್ ಪಳೆಲ್ಲಿಂ. ಪುಣ್ ಹರ್ಯೆಕಾ ತಿಚ್ಯಾ ನವ್ಯಾ ನವ್ಯಾ ಕವಿತೆಂನಿ ತಿ ಕವಿತ್ವಾಕ್ ಚಡ್ ಲಾಗಿಂ ಯೆಂವ್ಚೆಂ ಭೋವ್ ಸಮಧಾನೆಚೆಂ. ಆಮಿ ಕಿತ್ಲಿಂ ಕವಿತಾ ಬರಯ್ಲಿಂ ಮ್ಹಳ್ಳೆಂ ಪ್ರಮುಖ್ ನ್ಹಂಯ್, ಆಮಿ ಕವಿತ್ವಾಕ್ ಕಿತ್ಲೆಂ ಸಮ್ಜಲ್ಯಾಂವ್ ತೆಂ ಪ್ರಮುಖ್. ಪುಣ್ ಇತ್ಲ್ಯಾರ್ಚ್ಚ್ ಸಮಧಾನ್ ಪಾಂವ್ಚೆಂ ನ್ಹಂಯ್, ಅನಿಕ್ಯೀ ಜಾಯ್ತೆಂ ಶಿಕೊಂಕ್ ಆಸಾ ಮ್ಹಳ್ಳೆಂ ಸಮ್ಜೊಂವ್ಚೆಂ ಆನಿ ಜೊಕ್ತಿ ಮಿನತ್ ಕರ್ಚಿ ಜರೂರ್ ಗರ್ಜ್ ಆಸಾ.
ಕವಿ ಬಾಬ್ ಆಸ್ಟಿನ್ ಪ್ರಭು ಪಾಟ್ಲ್ಯಾ ಥೊಡ್ಯಾ ವರ್ಸಾಂನಿ ಹರ್ಯೆಕಾ ಪ್ರಕಾರಾಚೆ ವಿಶಯ್ ಘೆವ್ನ್ ಕವಿತಾರುಪಾರ್ ವ್ಹಾಳಂವ್ಕ್ ಲಾಗ್ಲಾ. ಕೊಣಾಕ್ ಬರೆಂ ಲಾಗೊಂ ವಾ ಕೊಣಾಕ್ ಲಾಗಾನಾಂಯ್ ರಾವೊಂ. ಪುಣ್ ಕವಿ ಅಪ್ಲೆಂ ಪ್ರೇತನ್ ಮುಖಾರುನ್ ಆಸ್ಚಿ ಭೋವ್ ಸಮಧಾನೆಚಿ ಗಜಾಲ್. ಕಿತ್ಯಾಕ್ ಮ್ಹಳ್ಯಾರ್ ಜಶೆಂ ಹೆರ್ ಭಾಸಾಂನಿ ಜಾಲ್ಲೆಪರಿಂ ಕೊಂಕ್ಣೆಂತ್ಯೀ ಅಮಾಸೆಕ್ ಏಕ್ ಪಾವ್ಟಿಂ, ಪುನ್ವೆಕ್ ಏಕ್ ಪಾವ್ಟಿಂ ಕೊಂಕ್ಣಿ ಸಾಹಿತ್ಯಾಕ್ ಸಾರೆಂ, ಕಸ್ತಳ್, ಬೂಸ, ಕೂಸ, ಆನಿ ಕಾಲೆಂ ಮಾತ್ತಿ ಗೊಬೊರ್ ಮ್ಹಣೊನ್ ಮಾಗಿರ್ ನಾಂವ್ ನಾಸ್ತಾಂ ಗೆಲ್ಲೆ ಪಂಡಿತ್ ಆಸಾತ್.
ಹಾಂತುಂ ಸತ್ ಸಾಂಗ್ಚೆಂ ತರ್ ಕಾಂಯ್ ಥೊಡ್ಯಾಂಚೆ ಮತ್ಲಬಿ ಇರಾದೆ (Hidden Agenda) ಜ್ಯಾರಿ ಜಾಂವ್ಕ್ ಪುರೊ. ಪುಣ್ ಖಂಚ್ಯಾಯ್ ಭಾಸೆಂತ್ಲೆಂ ಸಾಹಿತ್ಯ್ ಖಿಣಾನ್ ಬದಲ್ನಾ - ವಾ ಬದ್ಲೊಂಕ್ ಅಸಾಧ್ಯ್. ಪುಣ್ ಏಕ್ ಸಂಗತ್ ಭೋವ್ ಗರ್ಜೆಚಿ ಜಾವ್ನಾಸಾ - ಕವಿನ್ ಭೇಜವಭ್ದಾರೆಂತ್ ಅಪ್ಣಾನ್ ಬರಯಿಲ್ಲೆಂ ಕಿತೇಂಯ್ ಕವಿತಾ ಜಾತಾ ದೆಕುನ್ ಕಶೇಂಯ್ ಬರಂವ್ಚೆಂ ರಾವಯ್ಜಾಯ್.
ಕವಿ ಬಾಬ್ ಪ್ರಸನ್ನ್ ನಿಡ್ಡೋಡಿಚೆಂ ಕವಿತಾ ಸಮಾಜೆಂತ್ ದಣ್ಸಲ್ಲ್ಯಾಂಚೆರ್ ಭಿರ್ಮತ್ ಉಚಾರ್ಚೆ ತಸ್ಲೆಂ ಜಾವ್ನಾಸಾ;
’ದುಬ್ಳೊ ಬಾವ್ಡೊ ಕಾಮಾಕ್ ಉರ್ಡಾತಾ
ಜಿಣಿಭರ್ ಕುಲ್ಕಾರ್ ಜಾವ್ನ್ಂಚ್ ಮೊರ್ತಾ..!
ಗ್ರೇಸ್ತ್ ತಾಚಿ ಸೊಭಾಯ್ ಚಾಕ್ತಾ
ಭಾವ್ ಭಾವಾಕ್ಂಚ್ ಮಾರ್ತಾ’
ಕವಿ ಬಾಬ್ ರಾಯನ್ ಲೋಬೊ ಜೊಕ್ತಿ ಮಿನತ್ ಘೆಂವ್ಕ್ ಸಕ್ಲೊ ತರ್ ಫುಡಾರಾಚೊ ಬರೊ ಕವಿ ಜಾಂವ್ಚಿಂ ಭಳ್ವಂತ್ ಲಕ್ಶಣಾಂ ದಿಸೊನ್ ಯೆತಾತ್;
ಪಯ್ಲೆಂ ವಿಜ್ಮಿತ್, ತಾಜ್ಮಹಲ್,
ಜೊಪ್ಡ್ಯಾಂನಿ ಲೊಕಾಚೆಂ ಕಸಲೆ ಹಾಲ್
ಉಂಚ್ಲ್ಯಾ ಪಾಂವ್ಡಾರ್, ಸ್ತ್ರೀಯೆಕ್ ಅಧಿಕಾರ್,
ದಗ್ಧವ್ಣ್ ದೊತಿಕ್, ಗರ್ಭಾಂತ್ ಸಂಹಾರ್’
ಹ್ಯೊ ವೊಳಿ ಕಾಂಯ್ ಚಿಲ್ಲರ್ ನ್ಹಂಯ್, ಹಾಚೆ ಪಾಟ್ಲ್ಯಾನ್ ಜಾಯ್ತೊ ಆಟೊವ್ ಚಲ್ಲ್ಲೊ ದಿಸೊನ್ ಯೆತಾ.
ಕವಿ ಬಾಬ್ ವಿನ್ಸಿ ಮೆಲ್ಕಾರ್ ಮಾತ್ಶೆಂ ವೆಗ್ಳೆಂ ಚಿಂತಾಪ್ ಚಿಂತುಂಕ್ ಸಕ್ಲಾ ಮ್ಹಳ್ಳೆಂ ತಾಚಿ ಕವಿತಾ ವಾಚ್ತಾಂ ಸುಸ್ತಾತಾ;
’ಸ್ವಾತಂತ್ರ್ ಮ್ಹಳ್ಳೆಂ ನಾಂವ್ ಆಸೊನ್
ಶಾಂತ್, ನೀತ್, ತ್ಯಾಗಾಚೊ ಅರ್ಥ್ ನಾತ್ಲ್ಲೊ
ಆಪ್ಣಾಚ್ಯಾ ಫಾಯ್ದ್ಯಾಕ್ ರಾಜ್ವಟ್ಕಿ ಚಲಂವ್ಚೊ
ಬಹುತ್: ಹೊ ಮಹಾನ್ ದೇಶ್ ಆಮ್ಚೊ’
ಕವಿ ಬಾಬ್ ಸ್ಟ್ಯಾನಿ ಮೆಂಡೊನ್ಸಾ ಉಗ್ತ್ಯಾನ್ ಅಭಿವ್ಯಕ್ತ್ ಕರ್ಚೊ ಕವಿ - ಉಲಂವ್ಕ್ ಧರಿತ್ ತರ್ ಹೆರಾಂನ್ಕ್ ತೋಂಡ್ ಉಘಡ್ನ್ ಪಳೆಜೆ ಮಾತ್ರ್ ಶಿವಾಯ್ ಕಿತೆಂಚ್ ಜಾಪಿ ದೀಂವ್ಕ್ ಆವ್ಕಾಸ್ ನಾ.
ಕವಿ ಬಾಬ್ ಮೆಲ್ವಿನ್ ಜೆ. ವಾಸ್ ಹರ್ಶೆಂಚೆಪರಿಂ ಸಂಕೀರ್ಣ್ ಕವಿತಾ ಘೆವ್ನ್ ಆಯ್ಲಾ. ಎಚ್ಚೆಮಾಚಿ ಹರ್ ಕವಿತಾ ವಾಚುನ್ ತಾಚೊ ಭಕ್ತ್ ಜಾಲ್ಲೊ ಕವಿ ಬಾಬ್ ಮೆಲ್ವಿನ್ ವಾಸ್ ಅಪ್ಲ್ಯಾ ಕವಿತೆಂನಿ ಸಯ್ತ್ ತಸಲಿಚ್ ಸಂಕೀರ್ಣತಾ ಹಾಡ್ಚೆಂ ಪ್ರೇತನ್ ಕರ್ತಾ. ಇತ್ಲಿ ಸಂಕೀರ್ಣತಾ ಕಿತ್ಯಾಕ್? ಕೊಣ್ ವಾಚ್ತಾ ಮ್ಹಣ್ ದುರ್ಸತೆಲೆಯ್ ಆಸಾತ್ - ಕಿತೆಂ ಕರ್ಚೆಂ? ಆಮ್ಚಾ ಸಮಾಜೆಂತ್ಲ್ಯಾ ಹರ್ಯೆಕ್ಲ್ಯಾಕ್ ಸುಖಿ ಕರುಂಕ್ ದೆವಾಕ್ಚ್ ಸಾಧ್ಯ್ ನಾಂ ತರ್ ಮನಿಸ್ ಏಕ್ ಕಿರ್ಕೊಳ್ ಕಿಡೊ ಮಾತ್ರ್.
’ಸೆವಕ್’ ಮಯ್ನ್ಯಾಳ್ಯಾಚೊ ಎಕಾ ತೆಂಪಾಚೊ ಸಂಪಾದಕ್ ಜಾವ್ನ್ ವಾವ್ರ್ ಕೆಲ್ಲೊ ಕವಿ ಮಾ|ಜೋರ್ಜ್ ಒಲಿವೆರಾ ಅಪ್ರೂಪಾಯೆನ್ ಕವಿತಾ ಘೆವ್ನ್ ಆಯ್ಲಾ ಪುಣ್ ಅಪುರ್ಭಾಯೆಚೆ ವಿಚಾರ್ ಘೆವ್ನ್ ಆಯ್ಲಾ ಆನಿ ಹೆಚ್ಚ್ ಖಾತಿರ್ ’ಮಯ್ನ್ಯಾಚೊ ಕವಿ’ ಜಾವ್ನ್ ತಾಕಾ ವಿಂಚುಂಕ್ ಆಮಿ ಭೋವ್ ಸಂತೊಸ್ ಪಾವ್ತಾಂವ್. ಉಲ್ಲಾಸ್ ತುಮ್ಕಾಂ ಮಾ|ಜೋರ್ಜ್ ಒಲಿವೆರಾ.
ಉತ್ರಾಂತ್ ಸೂತ್ರಾಂ - 8: ಮ್ಹಜೊ ದೇಸ್ ಮಹಾನ್
[ವಾಂಟೆಲಿ ಜಾಲ್ಲಿಂ]
4. ಫ್ರಾನ್ಸಿಸ್ ಫುಡ್ತಾದೊ, ಕಲೀನಾ.
5. ಮೆಲ್ವಿನ್ ಜೆ. ವಾಸ್, ಕೆಲರಾಯ್.
6. ಆಸ್ಟಿನ್ ಡಿ’ಸೋಜ್ ಪ್ರಭು, ನಂತೂರ್.
7. ರಾಯನ್ ಲೋಬೊ, ಬೆಳ್ತಂಗಡಿ/ಕುವೇಯ್ಟ್.
8. ಪ್ರಿಯಾ ಸಿಕ್ವೇರಾ, ಫೆರಾರ್/ಕುವೇಯ್ಟ್.
11. ವಾಯ್ಲೆಟ್ ಜೆ. ಪಿರೇರಾ, ಕುಲ್ಶೇಕರ್.
12. ಸ್ಟ್ಯಾನಿ ಮೆಂಡೊನ್ಸಾ, ಯು.ಕೆ.
ಮ್ಹಜೊ ದೇಸ್ ಮಹಾನ್ [ಮಯ್ನಾಚೆಂ ಕವಿತಾ]-
ಮಾ|ಜೋರ್ಜ್ ಒಲಿವೆರಾ, ಮೈಸೂರ್
ಸಾಠ್ ಸಾಳಾ೦ ಪಯ್ಲೆ೦ ಅಹಿ೦ಸಾವಾದಿ ಗಾ೦ಧಿನ್
ಸತ್ಯಗ್ರಹ ಸಾಧನಾರ್ ದೇಸಾಕ್ ಸ್ವತ೦ತ್ರ್ ದಿತಾನಾ..
ಮ್ಹಜೆ ಭಾರತ್ ಮಹಾನ್ ಜಾವ್ನಾಸ್ಲ್ಲೆ೦..
ಪುಣ್ ಅಜ್ ಮ್ಹಜೊ ದೇಸ್ ತಿತ್ಲೊ ಮಹಾನ್ ನ್ಹಂಯ್!
ಸಾಠ್ ಸಾಳಾ೦ ಪಯ್ಲೆ೦ ನೆಹರು ಲೊಕಾ ತರ್ಫೆನ್
ಮುಕ್ಲ್ಯಾ ಪುಡಾರಾವಿಶಿ೦ ಬಾಸ್ ದಿತಾನಾ..
ಮ್ಹಜೆ ಭಾರತ್ ಮಹಾನ್ ಜಾವ್ನಾಸ್ಲ್ಲೆ೦..
ಪುಣ್ ಅಜ್ ಮ್ಹಜೊ ದೇಸ್ ತಿತ್ಲೊ ಮಹಾನ್ ನ್ಹಂಯ್!
ಸಾಠ್ ಸಾಳಾ೦ ಪಯ್ಲೆ೦ ಸತ್ಯಗ್ರಹಿ ಸಾ೦ಗಾತಾ ಮೆಳೊನ್
ಬಾರತಾ ತರ್ಫೆನ್ ಸ್ವಪಾಣ್ ದೆಕ್ತಾನಾ..
ನಿಸ್ವಾರ್ಥ್ ಮನಾನ್, ಬರ್ಯಾ ದೆಕಿನ್, ಸೆವೆನ್ ಸಮರ್ಪಿತಾನಾ..
ಮ್ಹಜೆ ಭಾರತ್ ಮಹಾನ್ ಜಾವ್ನಾಸ್ಲ್ಲೆ೦..
ಆಜ್ಕಾಲ್ ಮ್ಹಜೊ ದೇಸ್ ಮಹಾನ್ ಜಾ೦ವ್ಕ್ ಸಕಾತ್..
ಹಿ೦ದು-ಮುಸ್ಲಿಮ್-ಕ್ರಿಸ್ತಾ೦ವ್ ಎಕಾಮೆಕಾಕ್ ಭಾರತೀಯ್
ಮ್ಹಣ್ ವಳೊಕ್ ಧರ್ತಾನಾ..ಹಾತಾಕ್-ಹಾತ್ ದಿತಾನಾ..
ಸತ್ ಉಲಯ್ ಅನಿ ಧರ್ಮ್ ಚಲಯ್ ತತ್ವ್ ಪಾಳ್ತಾನಾ.
ಸ್ವಾರ್ಥ್-ಲೊ೦ಚ್ ದಿ೦ವ್ಕ್-ಘೆ೦ವ್ಕ್ ಪಾಟಿ ಕರ್ತಾನಾ.
ಭುಕ್-ತಾನ್-ವಸ್ತಿ ಸಮಸ್ಯ್ ಸರ್ವ್ ಭಾರತೀಯಾ೦ಕ್-
ಪರಿಹಾರ್ ಲಾಬ್ತಾನಾ.. ಮಜೊ ದೇಸ್ ಮಹಾನ್ ಜಾ೦ವ್ಕ್ ಸಕಾತ್..
ಮ೦ತ್ರಿ ಆನಿ ಶಾಸಕ್ ಅಪ್ಲೆ೦ ಸ್ವ೦ತ್-ಅದಾಯ್ ಸೊದಿನಾಸ್ತಾನಾ..
ಸರ್ಕಾರಿ ಸೇವಕ್ ಲೋಕಾ-ಸೆವೆನ್ ಸ೦ಪೂರ್ಣ್ ಮೆತೆರ್ ಜಾತಾನಾ..
ವಿವಿಧ್ ಬಾಸೆಚೊ, ವಿವಿಧ್ ಧರ್ಮಾಚೊ, ವಿವಿಧ್ ಸ೦ಸ್ಕ್ರತೆಚೊ ಜಣ್..
ರಾಷ್ಠ್ ಬಾವ್ಟೊ ಉಬೊವ್ನ್, ಮಾನ್ ಬಾಗವ್ನ್, ರಾಷ್ಟ್ರ್ ಗೀತ್ ಗಾಯ್ತಾನಾ..
ಮ್ಹಜೊ ದೇಸ್ ಮಹಾನ್ ಜಾ೦ವ್ಕ್ ಸಕಾತ್..
ಮೇರಾ ಭಾರತ್ ಮಹಾನ್! [ - ವಿಲ್ಮಾ ಕೊರೆಯಾ]
ಬೆಳೆಂ ದಾಸ್ತಾನ್, ಕುಸ್ತಾ ಗುದಾಂವಾಂತ್
ದುಬ್ಳೊ ಬಾವ್ಡೊ ಮೊರ್ತಾ ಭುಕೆನ್
ಮಂತ್ರಿ ಗಾಜವ್ನ್ ಭಂವ್ತಾ ರುಭಾವಾನ್
’ಮೇರಾ ಭಾರತ್ ಮಹಾನ್’
ಕೃಷಿಕ್ ಬುಡ್ಲಾ ಸಗ್ಳೊ ರಿಣಾನ್
ಕೆಲಾಂ ಕಂಗಾಲ್ ಸುಕ್ಲೆಲ್ಯಾ ಕೃಷೆನ್
ಗಳ್ಪಾಸ್ ಘೆತಾನಾಂಯ್ ಬರಯ್ತಾ ಘನಾನ್
’ಮೇರಾ ಭಾರತ್ ಮಹಾನ್’
ರಾಜ್ಕಾರಣಿ ಶಿರ್ಕಾಲ್ಯಾರೀ ನವ್ಯಾ ಘೊಟಾಳ್ಯಾಂತ್
ಶಹೀದ್ ಜಾಲ್ಲೊ ಸೈನಿಕ್ ಕಾರ್ಗಿಲ್ ಝುಜಾಂತ್
ದುಸ್ಮಾನಾಂಕ್ ಮ್ಹಣ್ತಾ ವ್ಹಡಾ ಭರ್ಮಾನ್
’ಮೇರಾ ಭಾರತ್ ಮಹಾನ್’
ಜಾಲೆಂ ಗಾಂಧಿಚೆಂ ಸ್ವಪಾಣ್ ಪುರ್ತೆಂ, ಜಾತ್ಯತೀತ್ ರಾಷ್ಟ್ರ್ ಘಡುನ್
ಆಜ್ ಸಗ್ಳೆಂ ಭಿಗಡ್ಲಾಂ ಜಾತಿ, ಕಾತಿಚಾ ನಿಬಾನ್
ಅಸ್ಕತ್ ವಾಜಪೇಯಿ ಲಿಖ್ತಾ ಆಪ್ಲ್ಯಾ ತಿಂತೆರಾಂತ್
’ಮೇರಾ ಭಾರತ್ ಮಹಾನ್’
ಸಂಪ್ಲೊ ಶೆಕ್ಡೊ ಅರ್ಧೊ ಸ್ವಾತಂತ್ರ್ ಮೆಳೊನ್
ಸ್ತ್ರೀಯಾಂಕ್ ಸ್ವಾತಂತ್ರ್ ಖಂಯ್ ಆಸಾ ಅಜೂನ್?
ತಿಚ್ಚ್ ಬಂಧಡ್, ತೆಚ್ಚ್ ಕಾಯ್ದೆ ತರೀ
ಲತಾ ಮಂಗೇಶ್ಕರ್ ಗಾಯ್ತಾ ಮಧುರ್ ತಾಳ್ಯಾನ್
’ಮೇರಾ ಭಾರತ್ ಮಹಾನ್’
ಮ್ಹಜೊ ದೇಸ್ ಮಹಾನ್? [- ಪ್ರಸನ್ನ್, ನಿಡ್ಡೋಡಿ]
ದೇಸಾಂತ್ ಮ್ಹಜ್ಯಾ ಆಜ್ ಕಿತೆಂ ಘಡ್ತಾ..?
ದುಭಾವ್ ಮಾರ್ತಾ ವ್ಹಡ್ ಮಿಸ್ತೆರ್ ದಿಸ್ತಾ
ರಾಜ್ಕಾರಣಿ ಪಳೆ ಪಾಂಯ್ ವೊಡ್ತಾ
ನಿರಾಪ್ರಾದಿ ಲೊಕಾಚೆ ಖೆಳ್ ಕರ್ತಾ
ವೋಟ್ ಆಪ್ಣಾಂವ್ಕ್ ಹಾತ್ ಜೊಡುನ್ ತೊ
ಲೊಕಾಂ ಹುಜ್ರಿಂ ಮಾನ್ ಭಾಗಯ್ತಾ
ಜಿಕೊನ್ ಉಪ್ರಾಂತ್ ಖಂಯ್ಚರ್ ಲಿಪ್ತಾ..?
ವ್ಹಾಳ್ಚ್ಯಾ ವ್ಹಾಳಾಂತ್ಲಿ ಮಾಸ್ಳಿ ಧರುನ್
ಉಗ್ತ್ಯಾ ವಾರ್ಯಾಕ್ ಧಡ್ಬಡೊಂಕ್ ಲಾಯ್ತಾ
ಮಾಸೊ ಜಾವುನ್ ಗಿಳುನ್ ಸೊಡ್ತಾ
ಆನಿ ಪಳೆ ನಂಜಿ ಹಾಸ್ತಾ..!
ಗಾಂವ್ಚೊ ತೊ ಲೋಕ್ ಪಳೆ
ಅಪ್ಲೆಂ ಧೊಲ್ಕೆಂ ಅಪುಣ್ ಭರ್ತಾ
ದುಸ್ರೊ ಪೆಲೊ ಖಚ್ರೊ ವಾಡ್ತಾ
ದುಬ್ಳೊ ಬಾವ್ಡೊ ಕಾಮಾಕ್ ಉರ್ಡಾತಾ
ಜಿಣಿಭರ್ ಕುಲ್ಕಾರ್ ಜಾವ್ನ್ಂಚ್ ಮೊರ್ತಾ..!
ಗ್ರೇಸ್ತ್ ತಾಚಿ ಸೊಭಾಯ್ ಚಾಕ್ತಾ
ಭಾವ್ ಭಾವಾಕ್ಂಚ್ ಮಾರ್ತಾ
ಧರ್ಮಾಚ್ಯಾ ನಾಂವಿಂ ಹಾಂಗಾ ಕಿತೆಂ ಉಭ್ಜಾತಾ..
ಶಿಕಾಪ್ ಚಡ್ತಾ ತರೀ ಜನಸಂಖೊ ವಾಡ್ತಾ
’ನೀಚ್ ಕುಳಿ’ ಪಯ್ಲೆಂ ಯೆಟ್ತಾಲೊ ಹಾಂವ್
ಆತಾಂ ’ಕಿರ್ಕೊಳ್’ ಜಾಂವ್ಕ್ ಲಾಲೆತಾಂ
ಡುಪ್ಲಿಕೇಟ್ ಸರ್ಟಿಫಿಕೆಟ್ ಕರುನ್ ತರೀ
ಸರ್ಕಾರಿ ಸವ್ಲತಾಯ್ ಆಶೆತಾಂ..!
ಹಾಯ್.. ಮಹಾತ್ಮಾ ತೂಂಯೀ ರಾಜ್ಕಾರಣಿ
ತುಜಿ ಶಿಕವ್ಣ್ ಜಾಂವ್ಕ್ ಖರೊ ನಾಯಕ್
ಆತಾಂ ನ್ಹಂಯ್ಗಿ ಜಾಲ್ಯಾ ಮಾಯಾಗ್
ಆನಿ ಉರ್ಲಾಂ ಪಳೆಂ ಹಾಂವ್ ಲಾಚಾರ್ ಸೆವಕ್
ಹರ್ದೆಂ ಬಡವ್ನ್ ಸದಾಂ ಬೊಬಾಟ್ ಮಾರುಂಕ್
ಹೊ ’ಮ್ಹಜೊ ದೇಸ್ ಮಹಾನ್..’
ಮ್ಹಜೊ ದೇಸ್ ಮಹಾನ್! [- ಫ್ರಾನ್ಸಿಸ್ ಫುಡ್ತಾದೊ, ಕಲೀನಾ]
ಲ್ಹಾನಾಥಾವ್ನ್ ಜಾಲಾ ಮಹಾನ್,
ಮ್ಹಜೊ ದೇಶ್, ಸಗ್ಳ್ಯಾವರ್ನ್ ಮಹಾನ್,
ಬರೊ ಗೊಂವ್ ವೆತಾ ಬಾಯ್ಲ್ಯಾ ಗಾಂವಾನ್,
ಬಾಕ್ರಿ ನಾಸ್ತಾಂ ಜಾತಾ ದುಬ್ಳೊ ದೆವಾಧೀನ್.
ಗ್ರೇಸ್ತಾಂಕ್ ಯೇವ್ನ್ ವಚೊಂಕ್ ಮೆಳ್ತಾ ವಿಮಾನ್,
ದುಬ್ಳೆ ಮಾತ್ರ್ ಮೊರ್ತಾತ್ ರೈಲಾರ್ ಉಮ್ಕಾಳೊನ್.
ವ್ಹಡ್ಲ್ಯಾ ಶ್ಹೆರಾಂತ್ ವ್ಹಡ್ಲಿಂ ಭಾಂದ್ಪಾಂ,
ತಾಂಚ್ಯಾ ದೆಗಿನ್ ಪಳಯ್ಜೆ ತಿಂ ಗುಡ್ಸುಲಾಂ.
ವಯ್ರ್ ಹಿಮಾಲಯ್, ಮಾಗಿರ್ ದರ್ಯೊ ತೀನ್ ಕುಸಿನ್,
ನಂಯೊಂ ಸಭಾರ್, ಉದಾಕ್ಚ್ ಉದಾಕ್ ಸಗ್ಳ್ಯಾನ್,
ರುಪಯ್ ಯೇಟ್ ಧಾ ಪಿಯೆಂವ್ಕ್ ಲಾಗ್ಲ್ಯಾರ್ ತಾನ್,
ವಯ್ಲ್ಯಾನ್ ದುಕೊಳ್ ಪಡ್ಲಾ, ಮ್ಹಜೊ ದೇಶ್ ಮಹಾನ್.
ಶಿಕ್ಪಿ ಚಡ್ಲ್ಯಾತ್ ಅನಿಂ ಶಿಕಾಪ್ಯೀ ವಾಡ್ಲಾಂ,
ಕಾಮಾಂ ಮೆಳಾನಾಂತ್, ಬೊಲ್ಸಾಂ ಕಾತರ್ಜೆ ಪಡ್ಲಾಂ,
ಚಡ್ತಿಕ್ ಶಿಕೊಂಕ್ ಅಮ್ಚ್ಯಾ ತಸಲ್ಯಾಂಕ್ ಸೀಟ್ ಮೆಳಾನಾಂ,
ಖೊಟಾ ಸಿಸ್ಟಮ್! ಹಾಚೆ ಮುಕಾರ್ ಆಮ್ಚಿ ದಾಳ್ ಶಿಜಾನಾ.
ಲೊಂಚ್ ಘೆಂವ್ಚೆಂ-ದಿಂವ್ಚೆಂ ಚೂಕ್ - ಮ್ಹಣ್ತಾ ಕಾನುನ್,
ಪೊಲಿಸ್, ಮುನಿಸಿಪಲಿಟಿ, ಟೇಕ್ಸ್ - ವಚನಾಕಾ ಚುಕೊನ್,
ತುಕಾ ಲುಟ್ತೆಲೆ, ತುಜೆಂ ಬೊಲ್ಸ್ ಸಗ್ಳೆಂ ಸಾಪ್ ಕರುನ್,
ದೆವಾ ಹಾಂಕಾಂ ಬೊಗೊಸ್! ಕಿತ್ಯಾಕ್ ಮ್ಹಜೊ ದೇಶ್ ಮಹಾನ್.
ವಿನತಿ! [- ಮೆಲ್ವಿನ್ ಜೆ. ವಾಸ್, ಕೆಲರಾಯ್]
ಕಾವ್ಯಘರಿಂ ಕಾಳ್ಕ್ಯಾ ರಾತಿಂ ಉತ್ರಾಂ ಫುಲ್ಲಿಂ
ಮೊತಿಯಾಂ ರುಪಾಚಿಂ;
ಪಿಂತುರಾವಿಣೆಂ ತಿಂತೆರಾ ವ್ಹಾಳ್ಯಾಂತ್
ಮ್ಹಜ್ಯಾ ದೇಶಾಚ್ಯಾ ಮಹಾನತೆಕ್
ತುಜ್ಯಾ ಸೊಭಾಯೆಂತ್ಮುಂಗೊ ವರ್ಣುನ್ಚ್ ರಾವ್ಲಿಂ.
ತುಜ್ಯಾ ಘರಿಂ ದಿಸಾ ಉಜ್ವಾಡಿ ಪಿಂತ್ರಾಂ ದೆಂವ್ಲಿಂ
ದಿವೊಡಾ ಸಾರ್ಕ್ಯಾಚಿಂ;
ಮಾಯ್ಪಾಸಾವಿಣೆಂ ಗಳ್ಪಸಾ ಜಾಳಾಂತ್
ಮ್ಹಜ್ಯಾ ದೇಸಾಚ್ಯಾ ಮಾನಾಕ್
ತುಜ್ಯಾ ಸಂದಾ ಸಂದಾಂತ್ಮುಗೊ ಕೊಚಾಂವ್ಕ್ಚ್ ಲಾಗ್ಲಿಂ.
ದೆಕುನ್ ವಿನತಿ ಆತಾಂ ಮ್ಹಜಿ:
ಕಾವ್ಯಘರಿಂ ರಾತ್ಚಾ ವೆಳಾರ್ ಉತ್ರಾಂ ಫುಲಯ್ತಾನಾ
ಆಬೊಲ್ಯಾಂ ಉಸ್ಕ್ಯಾರ್ ಮೊತಿಯಾಂ ದಾಳಿನಾಕಾತ್
ಮ್ಹಜ್ಯಾ ದೇಸಾಚಾ ಮಹಾನತೆಕ್ ತಿಚ್ಯಾ ಸೊಭಾಯೆಂತ್ ವರ್ಣಿತಾನಾ
ಗಳ್ಪಾನಾ ಜಾಳಾಂತ್ ತಿಚ್ಯಾ ಮಾನಾಕ್ ಅಂರ್ದಿನಾಕಾತ್.
ಭಾರತ್ ದೇಸ್ ಮಹಾನ್ [- ಆಸ್ಟಿನ್ ಪ್ರಭು, ನಂತೂರ್]
ಭಾರತ್ ಮಾತೆಚಿ ಸಂಸ್ಕೃತಿ ತಿ
ಭಾರಿಚ್ ಪ್ರಾಚೀನ್ ಆಪುರ್ಬಾಯೆಚಿ
ಹಾಕಾಚ್ ಲಾಗೊನ್ ವಿದೇಶ್ಯಾಂಚಿ
ಪಿಳ್ಗಿ ಅಯ್ಲಿ ಹ್ಯಾ ದೇಶಾರಿ
ಹಿಂದು-ಮುಸ್ಲಿಮ್ ರಾಯ್ ಹಾಂಗಾ
ದರ್ಭಾರ್ ದಾಖವ್ನ್ ಕಾರ್ಭಾರಿ ಜಾಲೆ
ಶಿವಾಜಿ-ಮೊಗಲ್ ಝಗ್ಡಿಂ ಜಾಲಿಂ
ಹಾರಿಂ-ಹಾರಿಂನಿ ಲೋಕ್ ಮೆಲೆ
ಹ್ಯಾ ವೆಳಿಂ ಬ್ರಿಟಿಶ್ ಚೋರ್
ವ್ಯಾಪಾರ್ ಮ್ಹಣೊನ್ ಹಾಂಗಾ ಆಯ್ಲೆ
ಹಾತಾಕ್ ಮೆಳ್ಲ್ಲೆಂ ಆಪ್ಲೆಂಚ್ ಮ್ಹಣ್
ಚೊರುನ್ ಇಂಗ್ಲೆಂಡಾಕ್ ವ್ಹಾವಯ್ಲಾಗ್ಲೆ
ಭಾರತೀಯಾಂಕ್ ತಾಂಚೆ ಗುಲಾಮ್ ಕೆಲೆ
ಥೊಡೆ ಝಗ್ಡೊನ್ ವೀರ್ಪಣ್ ಮೆಲೆ
ಸಾಂ| ತೋಮಸ್ ಕೇರಳ ಆಯ್ಲೊ
ಕಿರಿಸ್ತಾಂವ್ ಪ್ರಚಾರ್ ಕರಿಲಾಗ್ಲೊ
ಸಾಂಫ್ರಾ ಸಾವೆರ್ ಗೊಂಯಾಂ ದೆಂವ್ಲೊ
ಹಿಂದು ಥೊಡೊ ಕ್ರೀಸ್ತಾಂವ್ ಜಾಲೊ
ದಿವ್ಳಾಂ ಪಡ್ಲಿಂ, ಇಗರ್ಜೊ ಬಾಂದ್ಲ್ಯೊ
ಕೊಂಕ್ಣ್ಯಾಂಕ್ ಧರುನ್ ಶೆಂಡ್ಯೊ ಕಾಪ್ಲ್ಯೊ
ಮೈಸೂರಾಂತ್ ಹೈದರಾಲಿ ರಾಯ್ ಜಾಲೊ
ಬ್ರಿಟಿಷಾಂ ವಿರೋಧ್ ಝುಜಾಲಾಗ್ಲೊ
ತಾಚೊ ಪೂತ್ ಟಿಪ್ಪು ಸುಲ್ತಾನ್
ಕ್ರೀಸ್ತಾಂವಾಂಕ್ ವಿರೋಧ್ ರಾವ್ಲೊ
ಮಂಗ್ಳುರಾಕ್ ತಾಣೆಂ ಧಾಡ್ ಘಾಲಿ
ವ್ಹಡಿಲಾಂ ಆಮ್ಚಿಂ ವಳ್ವಳೊನ್ ಮೆಲಿಂ
ಪಯ್ಲ್ಯಾ ಶೆಕ್ಡ್ಯಾಂತ್ ಕ್ರೀಸ್ತಾಂವ್ ಆಯ್ಲೆ ತರೀ
ಕ್ರೀಸ್ತಾಂವ್ ಆಜೂನ್ ೨.೩ ಠಕ್ಕ್ಯಾರ್ಚ್ ರಾವ್ಲೆ
ಭಾರತೀಯ್ ಭಾರಿಚ್ ಬುಧ್ವಂತ್ ಮನಿಸ್
ಶೂನ್ಯ್ ಹಾಂಗಾಚ್ ಸೊಧುನ್ ಕಾಡ್ಲೆಂ
ಮಹಾತ್ಮ ಗಾಂಧಿನ್ ಸತ್ಯಾಗ್ರಹ್ ಕರುನ್
ಬ್ರಿಟಿಷಾಂಚೆಂ ಪೆಂಕಾಡ್ ಮೊಡ್ಲೆಂ
ಭಾರತಾಚೆಂ ತಾಜ್ಮಹಾಲ್ ಬರೆಂಚ್ ಸೊಭ್ಲೆಂ
ಸಗ್ಳ್ಯಾ ಸಂಸ್ರಾರ್ ನಾಂವಾಡುನ್ ರಾವ್ಲೆಂ
ಇಂದಿರಾ ತಸಲ್ಯಾ ಲೊಂಕ್ಡಾ ಸ್ತ್ರೀಯೆನ್
ಅಧಿಕ್ ಲಾಂಬಾಯೆಚೆಂ ರಾಜ್ವಟ್ ಕೆಲೆಂ
ಪರ್ದೇಶಿ ಸ್ತ್ರೀ ಕೊಂಗ್ರೆಸ್ ಮುಖೆಲಿ ಜಾಲಿ
ಭಾರತಾಚಿ ವಿದ್ಯಾ ಸಂಸಾರಾರ್ ಗಾಜ್ಲಿ
ಗಲ್ಲ್ಯಾಂ ಗಲ್ಲ್ಯಾಂನಿ ವಿವಿಧ್ ಭಾಸ್
ತರೀ ಲೋಕ್ ಮಾಯಾಮೊಗಾನ್ ರಾವ್ಲೆ
ಏಕ್ ಬಿಲಿಯಾಪ್ರಾಸ್ ಚಡಿತ್ ಲೊಕಾನ್
ಭಾರತ್ ಆಪ್ಲೆಂ ರಾಷ್ಟ್ರ್ ಮ್ಹಳೆಂ
ಇತ್ಲೆಂ ಆಸ್ತಾಂ ಮ್ಹಜೊ ದೇಸ್ ಮಹಾನ್
ಮ್ಹಣ್ಚ್ಯಾಂತ್ ಕೊಣಾಕೀ ದುಬಾವ್ ಕಸ್ಲೆ?
ಮ್ಹಜೊ ಮಹಾನ್ ದೇಸ್! [- ರಾಯನ್ ಲೋಬೊ, ಬೆಳ್ತಂಗಡಿ]
ಮಿಲಿಯನ್ ಸೊಜೆರ್, ಮಿಸಾಯ್ಲಾಂ ಹಾತೆರ್,
ಮ್ಹಜೊ ದೇಶ್ ಮಹಾನ್!
ಶೆಜಾರಿ ಹಾಸ್ತಾ, ಖೆಳ್ಕುಳಾಂ ಕರ್ತಾ
ಮ್ಹಜೊ ದೇಶ್ ಮಹಾನ್?
ಉಂಚ್ಲ್ಯಾ ಪಾಂವ್ಡಾರ್, ಸ್ತ್ರೀಯೆಕ್ ಅಧಿಕಾರ್,
ಮ್ಹಜೊ ದೇಶ್ ಮಹಾನ್!
ದಗ್ಧವ್ಣ್ ದೊತಿಕ್, ಗರ್ಭಾಂತ್ ಸಂಹಾರ್,
ಮ್ಹಜೊ ದೇಶ್ ಮಹಾನ್?
ಪಯ್ಲೆಂ ವಿಜ್ಮಿತ್, ತಾಜ್ಮಹಲ್,
ಮ್ಹಜೊ ದೇಶ್ ಮಹಾನ್!
ಜೊಪ್ಡ್ಯಾಂನಿ ಲೊಕಾಚೆಂ ಕಸಲೆ ಹಾಲ್
ಮ್ಹಜೊ ದೇಶ್ ಮಹಾನ್?
ವಿಗ್ಯಾನಿ, ದೊತೊರ್, ಆಮ್ಚೆ ಥಾವ್ನ್,
ಮ್ಹಜೊ ದೇಶ್ ಮಹಾನ್!
ಆತಂಕ್ವಾದಿ ನವೆಂ ಹಾತೆರ್,
ಮ್ಹಜೊ ದೇಶ್ ಮಹಾನ್?
ಮ್ಹಜೊ ದೇಸ್ ಮಹಾನ್? [- ಪ್ರಿಯಾ ಸಿಕ್ವೇರಾ, ಫೆರಾರ್]
ರಾನಾಂತ್ಲ್ಯಾ ಕ್ರೂರ್ ಮನ್ಜಾತಿಂಕ್
ಭುಕ್ ಥಾಂಬಂವ್ಕ್
ಸಲೀಸಾಯೆನ್ ಮೆಳ್ತಾತ್ ಸಾದಿ ಮನ್ಜಾತ್
ಮ್ಹಾಕಾ ಮನಿಸ್ ಜಾವ್ನ್ ಭುಕ್ ಥಾಂಬಂವ್ಕ್
ಏಕ್ ಮೂಯ್ ಸಯ್ತ್ ಮೆಳಾನಾ
ಅಗಾಸಾರ್ ಉಬ್ಚ್ಯಾ ಘೊಣಿಂಕ್
ಖೆಳ್ ಖೆಳೊಂಕ್
ಸವಾಯೆರ್ ಲಾಭ್ತಾತ್ ಕುಂಕ್ಡಾಚಿಂ ಪಿಲಾಂ
ಪುಣ್ ಮ್ಹಾಕಾ ಖೆಳೊಂಕ್
ತಾಂಚಿಂ ಹಾಡಾಂಯಿ ದಿಷ್ಟಿಕ್ ಪಡನಾಂತ್
ರಗಾತ್ ಚಿಂವ್ಚ್ಯಾ ಪಿಸೊಳ್ಯಾಂಕ್
ಉದ್ಕಾಬರಿ ಮೊಂವ್ ವೊಡುಂಕ್
ಫುಲ್ತಾತ್ ಫುಲಾಂ ಮೆಟಾಂ ಮೆಟಾಂಕ್
ಪುಣ್ ಮ್ಹಾಕಾ ತಾಚೊ
ಫರ್ಮಳ್ ಘೆಂವ್ಚೆಂ ಭಾಗ್ ನಾ
ತ್ಯಾ ನಿರ್ಜೀವ್ ಖಚ್ರ್ಯಾ ಡಬ್ಬ್ಯಾಕ್
ಭುಕ್ ನಾಂ ತರೀ
ಭರ್ತಾ ತಾಚೆಂ ಪೊಟ್ ಸ್ವಾದಿಷ್ಟ್ ಖಾಣಾನ್
ಪುಣ್ ಮ್ಹಜಿ ಭುಕ್ ಥಾಂಬಂವ್ಕ್
ಸುಕೊ ಕುಂಡೊಯಿ ಮೆಳಾನಾ
ವಿಶಾಲ್ ಧರ್ತೆಕ್
ತಾನ್ ಲಾಗಾನಾ ತರೀ
ಜಿರಯ್ತಾ ರುಚಿಕ್ ಉದಾಕ್
ಪುಣ್ ಮ್ಹಜಿ ತಾನ್ ಭಾಗಂವ್ಕ್
ಉದಾಕ್ಯೀ ಲಾಭಾನಾ
ಮೆಲ್ಲ್ಯಾ ಕುಡಿಕ್
ನೆಸಂವ್ಕ್ ಆನಿಂ ಸೊಭಂವ್ಕ್
ಮೊಲಾಧಿಕ್ ಮುಸ್ತಾಯ್ಕಿ ಆಸಾ
ಪುಣ್ ಮ್ಹಜೊ ಮಾನ್ ಲಿಪಂವ್ಕ್
ಭಾಣ್ಶಿರ್ಯಾಚಿಯೀ ಗತ್ ನಾ
ತರ್ ಖಂಯ್ಚಾ ಖಾತಿರ್
ಮ್ಹಜೊ ದೇಶ್ ಮಹಾನ್ ಮ್ಹಣ್ ಸಾಂಗೊಂ?
ಹಾಂವ್ ಥಂಯ್ಸ್ರ್ ಆಸಾ ಮ್ಹಣೊನ್ಗಿ
ಯಾ
ತ್ಯಾ ಕ್ರೂರ್ ಮನ್ಜಾತಿಂಕ್
ಘೊಣಿಂಕ್
ಪಿಸೊಳ್ಯಾಂಕ್
ಖರ್ಚ್ಯಾ ಡಬ್ಬ್ಯಾಕ್
ಧರ್ತೆಕ್
ಮೊಡ್ಯಾಕ್
ಸರ್ವ್ ಮೆಳ್ತಾ ಮ್ಹಣ್!!!!!
ಆಮ್ಚೊ ದೇಸ್ ಮಹಾನ್! [- ವಿನ್ಸಿ ಮೆಲ್ಕಾರ್]
ಆಧಿಕಾರಿ೦ಚೊ ಸ್ಥಾನ್ ಭರೊನ್ ಗೆಲ್ಲೊ
ದುಬ್ಳಿಕಾಯೆನ್ ಪೊಟಾಕ್ ನಾಸ್ತಾ೦
ಆತಾ೦ಕ್ವಾದ್- ಚೊರಾ೦ನಿ ಭರ್ಲ್ಲೊ
ಹೊ ಮಹಾನ್ ದೇಶ್ ಆಮ್ಚೊ
ಫುಡಾರಾಚಿ ಆಶಾ ದವ್ರುನ್ ಕಾಮಾ೦ ನಾಸ್ತಾ೦
ಜಿವ್ಗಾತ್ಚ್ಚ್ ಮ್ಹಳ್ಳೆ೦ ಪೊ೦ತ್ ದವ್ರುನ್
ಸಾಕಾಳಿ೦ ಉದೆವ್ನ್ - ಸಾ೦ಜ್ ಜಾತಾ೦
ಮನಾ೦ ಸಗ್ಳಿ೦ ಕಾತ೦ವ್ಚೊ
ಹೊ ಮಹಾನ್ ದೇಶ್ ಆಮ್ಚೊ
ಆನ್ಯಾಯ್ ವಿರೋಧ್ ಝಜೊ೦ಕ್ ತಾ೦ಕ್ ನಾಸ್ತಾ೦
ದೊಳ್ಯಾ೦ತ್ಲ್ಯಾ೦ನ್ ದುಖಾ೦ ಸಯ್ತ್ ದೆವಯ್ಲೊ
ಹಾತಾ೦ತ್ ಬ೦ದೂಕ್ಯೊ ಆಧಾರ್ ಜಾಲ್ಲೊ
ಆತಾ೦ಕ್ವಾದ್ ಮ್ಹಳ್ಳೆ೦ ನಾ೦ವ್ ಕಾಣ್ಘೆ೦ವ್ನ್ ಭ೦ವ್ತಾಲ್ಯಾ೦ಚೊ
ಹೊ ಮಹಾನ್ ದೇಶ್ ಆಮ್ಚೊ
ಸ್ವಾತ೦ತ್ರ್ ಮ್ಹಳ್ಳೆ೦ ನಾ೦ವ್ ಆಸೊನ್
ಶಾ೦ತ್, ನೀತ್, ತ್ಯಾಗಾಚೊ ಅರ್ಥ್ ನಾತ್ಲ್ಲೊ
ಆಪ್ಣಾಚ್ಯಾ ಫಾಯ್ದ್ಯಾಕ್ ರಾಜ್ವಟ್ಕಿ ಚಲ೦ವ್ಚೊ
ಬಹುತ್: ಹೊ ಮಹಾನ್ ದೇಶ್ ಆಮ್ಚೊ
ರಾಕೊನ್ ರಾವ್ಲ್ಯಾ೦ವ್ ಫಕ್ತ್ ನವ್ಯಾ ಸ್ವಾತ೦ತ್ರ್ಯಾಕ್
ಮೆಳ್ತೆಲೆ೦ ಮ್ಹಣ್ ಸರ್ವಾ೦ಕ್ ಸ್ವಾತ೦ತ್ರ್
ಫರತ್ ಜಾ೦ವ್ದಿ ಆಮ್ಚೊ ದೇಶ್ ಮಹಾನ್
ತೀನ್ ರ೦ಗಾಚ್ಯಾ ಬಾವ್ಟ್ಯಾಕ್ ಮೆಳೊ೦ದಿ ಸಲಾಮ್
ಮ್ಹಜೊ ದೇಸ್? [- ಆರ್ಯನ್ ತಾಕೊಡೆ]
ಮ್ಹಜೊ ದೇಸ್..
ಬೊಲ್ಪ್ಯಾ ವೇಸ್!
ಶೆಕ್ಡ್ಯಾಂಚೊ ಪಾಸ್..
ಉರ್ಲೊ ತರ್ ಕಾಶ್ಟೆ ಲೇಸ್!
ಮ್ಹಜೊ ದೇಸ್..!
ಭರ್ಪೂರ್ ವಿಶ್ವಾಸ್!
ಫುಡಾರಿ ಧಾದೊಸ್..
ಉರ್ಲಾಂ ತರ್ ಫಕತ್ ಆಮಾಸ್!
ಮ್ಹಜೊ ದೇಸ್...
ವ್ಹಡ್ಲೆಂ ಫೆಸ್ತ್!
ಚೊವುನ್ ದೊಳೆ ನಿಸ್ತೇಜ್..
ಉರ್ಲಿ ತರ್ ಫಕತ್ತ್ ಪೇಜ್!
ಮ್ಹಜೊ ದೇಸ್..
ವ್ಹಡ್ ಉಪಾದೆಸ್!
ಖೊಡ್ಯಾ ಸಾಂಕ್ಳಿಚೊ ಭಾಂದ್ಪಾಸ್..
ಉರ್ಲಾಂ ತರ್ ಫರಾಮಸ್..!
ಮ್ಹಜೊ ದೇಸ್..
ಸೊಭಾಯೆ ಕಣಸ್!
ದುರಂತಾಚೆ ದಸ್ತಾವೆಜ್..
ಉರ್ಲಾಂ ತರ್ ತೆಂ ಪಡ್ವಾಜ್!
ಮ್ಹಜೊ ದೇಸ್..
ಮೊಗ್ರ್ಯಾಂ ಸುವಾಸ್!
ಧಾಪ್ಲಾಂ ವೊಂಕಾರೆ ಖ್ಯಾಸ್ತ್..
ಉರ್ಲಾಂ ತರ್ ವ್ಹಡ್ ಕಥಾವಸ್ತ್!
ಮ್ಹಜೊ ದೇಸ್..
ಅಡ್ಹೂಕ್ ಕಾಲ್ಸ್!
ಆತಾಂ ಉರ್ಲಾಂ ತರ್..
ಫಕತ್ ಮಹಾನ್ ತಕ್ಲೆನಾಂವ್!
ಮ್ಹಜೊ ದೇಸ್ ಮಹಾನ್ [- ವಾಯ್ಲೆಟ್ ಪಿರೇರಾ]
ಹೊ ಕಸಲೊ ದೇಸ್ ಸಾಯ್ಬಾ
ದುಬ್ಳಿಕಾಯ್ ಭರ್ಲ್ಯಾ ಸಗ್ಳಾನ್
ಆತ್ಯಾಚಾರ್ ಭ್ರಷ್ಟಾಚಾರ್ ಗೆಲಾ ವಿಸ್ತಾರುನ್
ಕಿತ್ಲ್ಯಾ ಮನ್ಶ್ಯಾಂಚೆ ಜಾಲಾಂ ಕಾಳಿಜ್ ಧಾರುಣ್
ದಯಾಮಾಯಾ ವಿಸ್ರೊನ್ ಗೆಲ್ಲೊ, ಕಸಲೊ ದೇಸ್ ಸಾಯ್ಬಾ
ಹೆ ಕಸಲೆ ರಸ್ತೆ ಸಾಯ್ಬಾ
ಎಕಾ ಪಾವ್ಸಾಕ್ ಪೊಡ್ತಾತ್ ಫೊಂಡ್ಕುಲಾ ಮಾರ್ಗಾರ್
ಬಾರಾಯ್ ಮಯ್ನೆ ರಸ್ತ್ಯಾಚೆಂ ದುರಸ್ತಿ ಕಾರ್ಬಾರ್
ಫುಟ್ಪಾತಿ ವ್ಹಯ್ಲ್ಯಾನ್ ವಾಹನಾಂಚೆಚ್ಚ್ ಜಾಲಾಂ ರಾಜ್
ಸುಂಕ್ ಮಾತ್ರ್ ಚುಕಾನಾಸ್ತಾಂ ಘೆಂವ್ಚೊ ಕಸಲೊ ದೇಸ್ ಸಾಯ್ಬಾ
ಹೆಂ ಕಸಲೆಂ ರಾಜಕೀಯ್ ಸಾಯ್ಬಾ
ಖಂಯ್ಸರ್ ಪಳೆಯ್ಲ್ಯಾರೀ ಮಾರಾಮಾರಿ
ಹುದ್ದ್ಯಾ ಖಾತಿರ್ ಥೊಡೆ ಘೆತಾತ್ ತಲ್ವಾರಿ
ಚುನಾವಾವೆಳಾರ್ ಲೊಕಾಮುಕಾರ್ ಮಂತ್ರಿ ಜಾತಾತ್ ಭಿಕಾರಿ
ಪರ್ಜೆಚಿ ಖಂತ್ ನಾತ್ಲ್ಯಾ ಮಂತ್ರಿಂಚೊ ಕಸಲೊ ದೇಸ್ ಸಾಯ್ಬಾ
ಹೆಂ ಕಸಲೆ ವ್ಯಾಟ್ ಸಾಯ್ಬಾ
ಉಜ್ಯಾಕೀ ವ್ಯಾಟ್, ಉದ್ಕಾಕೀ ವ್ಯಾಟ್
ಖೆಲ್ಯಾರೀ ವ್ಯಾಟ್, ವೊಂಕ್ಲ್ಯಾರೀ ವ್ಯಾಟ್
ಝಳಾರೆಂಚ್ಯಾ ಮಾರಾಂನಿ ಗತ್ ಜಾಲ್ಯಾ ಪಾಡ್
ದಿಸಾಂನ್ದೀಸ್ ಮಾರ್ಗಾಯ್ ಚಡ್ಚೊ ಕಸಲೊ ದೇಸ್ ಸಾಯ್ಬಾ
ಹೊ ಕಸಲೊ ದೇಸ್ ಸಾಯ್ಬಾ
ವರ್ಸಾಂತ್ ಏಕ್ ಪಾವ್ಟಿ ಮಾಡ್ತಿರಾಂಚೆ ಕರ್ತಾತ್ ಗಾಯನ್
ದೆಶಾ ಖಾತಿರ್ ಝುಜ್ಲ್ಲೆ ಕಿತ್ಲೆಶೆ ಸಿಪಾಯ್ ಗೆಲೆ ಮೊರೊನ್
ಸತಾ ನಿತಿಕ್ ಝುಜ್ತೆಲ್ಯಾಂಚೊ ರಿಸ್ಕೆರ್ ಆಸಾ ಪ್ರಾಣ್
ಕಾನೂನ್ ಬಳಿಷ್ಟ್ ಜಾಯ್ತ್ ತರ್ ಮ್ಹಜೊ ದೇಸ್ ಮಹಾನ್
ಮ್ಹಜೊ ದೇಸ್ ಮಹಾನ್? [- ಸ್ಟ್ಯಾನಿ ಮೆಂಡೊನ್ಸಾ, ಯು.ಕೆ.]
ಮ್ಹಜಾ ಸ್ವತಂತ್ರ್ ದೆಸಾಂತ್ ಕಿತೆಂ ಆಸಾ ಕಿತೆಂ ನಾ!!!
ಹಿಂ ಪರ್ವತ್, ಗುಡೆ ದೊಂಗೊರ್
ನಂಯೊ ಬಾಂಯೊ, ದರ್ಯೊ ಸಾಗೊರ್
ರೂಕ್ ಝಡಾಂ ಫುಲಾಂ ಫಳಾಂ
ರಾನ್ವಟ್ ಮನ್ಜಾತಿ ಸುಕ್ಣಿಂ ಸಾವ್ಜಾಂ,
ಪಾವ್ಸಾಳೊ, ಉದ್ಕಾ ಝರ್
ಶೆತಾಂ ಭುಂಯ್ಭಾಟಾಂ
ಖಾಣಾ ವೊರ್ವಿ ರೈತ್ ಖಾರ್ವಿ
ಮನ್ಶ್ಯಾ ಜಾಣ್ವಾಯ್, ವೀರ್ ಧೀರ್ಪಣ್
ಸುರ್ಯಾ ಪ್ರಕಾಸ್ ಚಾಂದ್ನ್ಯಾ ಉಜ್ವಾಡ್
ನೈಸರ್ಗಿಕ್ ಸವ್ಲತ್ಯೊ ಆನಿ ಕಿತೆಂ...
ಪೂಣ್..
ಯೆಯಾ ಮನ್ಶ್ಯಾಕ್ ಜಿವಾಚೆಂ ಮೋಲ್ ಸಮ್ಜವ್ಯಾಂ
ಜಾತಿಕಾತಿಂಚಾ ನಿಬಾನ್ ರಗಾತ್ ವ್ಹಾಳಂವ್ಚೆಂ ರಾವಯಾಂ
ಆಮಾಸೆಚಾ ರಾತಿಂ ಚೆಡ್ವಾಂ ಭುರ್ಗ್ಯಾಂಕ್ ಭಿರಾಂತ್ ನಾಸ್ತಾಂ ಚಲವ್ಯಾಂ
ನೆಣ್ತ್ಯಾ ಬಾಳಾಂಕ್ ಉಗ್ತ್ಯಾ ರಸ್ತ್ಯಾರ್ ಖೆಳೊಂಕ್ ಸೊಡ್ಯಾಂ
ರಕ್ಷಕಾನಿಂ ಭಕ್ಷಕ್ ಜಾಂವ್ಚೆಂ ಆಡವ್ಯಾಂ
ಸರ್ಕಾರಿ ಅಧಿಕಾರಿಂನಿಂ ಲೋಚ್ ಘೆಂವ್ಚೊ ರಾವಯಾಂ
ಅಬ್ಲೆಶಿ, ಮತ್ಲಬಿಪಣ್ ರಾಜಕೀಯ್ ಫುಡಾರಿಂ ಥಾವ್ನ್ ಪಯ್ಸ್ ಕರವ್ಯಾಂ
ಮನ್ಶ್ಯಾ ಜೀವಿಚಾ ತೊಂಡಾರ್ ಮಾಯಾಮೊಗಾಚಿಂ
ಭಾವ್-ಭಾಂದ್ಪಣಾಚಿಂ ಖುಣಾಂ ದಿಸಾಶಿಂ ಕರವ್ಯಾಂ
ಆನಿ..
ಆಮ್ಚಾ ದೇಸಾಚಾ ಶಿಖರಾ ಥಾವ್ನ್
ಥಳಾ ಪರ್ಯಾಂತ್ ವ್ಹಾಳೊನ್ ಯೆಂವ್ಚಾ ಝರಿ ಉದ್ಕಾಕ್
ತಕ್ಲಿ ಬಾಗಾವ್ನ್ ನ್ಹಾಂವ್ಯಾಂ
ಘೊಟ್ಭರ್ ಉದಾಕ್ ಪಿಯೆವ್ನ್ ಮಾನಾನ್ ಎಕಾ ತಾಳ್ಯಾನ್ ಸಾಂಗೊಯಾಂ
ಅಳೆರೆ ಬಾಬಾ ಮ್ಹಜೊ ದೇಸ್ ಮಹಾನ್
ಅಳೆಗೊ ಬಾಯೆ ಮ್ಹಜೊ ದೇಸ್ ಮಹಾನ್
About
us | Feedback | Contact us
Copyright
© 2005 DAAIZ.COM All rights reserved.
Page concept, designed and maintained by Ashawadi
Publications
More in Daaiz
Send your comments to author on this writing
This is not a comment box. Nothing you write here appears on the site or is shown to any other reader: it is sent to him by email, privately, and he replies to you directly if a reply is called for.