ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಹಾಡ್ ಚೆಡ್ವಾ ಬುಡ್ಕುಲೊ
ಹ್ಯಾ ವಿಮರ್ಶ್ಯಾವಿಶಿಂ: ಚಾ.ಫ್ರಾ.ದೆ’ಕೋಸ್ತಾಚ್ಯಾ ಸಾಹಿತ್ಯಾಚೆರ್, ಪ್ರತ್ಯೇಕ್ ಜಾವ್ನ್ ಕವಿತೆಂಚೆರ್ ಮಂಗ್ಳುರಾಂತ್, ಬೊಂಬೊಯಾಂತ್, ಗೊಯಾಂತ್ ತಶೆಂ ಪರ್ಗಾಂವಾಂತ್ ಸಯ್ತ್ ಸಭಾರಾಂನಿ ಅಧ್ಯಯನ್ ಕೆಲಾಂ, ವಿಮರ್ಸೊ ಕೆಲಾ. ಪುಣ್ ಚಾ.ಫ್ರಾ.ದೆ’ಕೋಸ್ತಾಕ್ ವೆಕ್ತಿಗತ್ ಜಾವ್ನ್ ಜಿತ್ಲಿ ತಾಚಿಚ್ಚ್ ಪತಿಣ್ ವಳ್ಕತಾ/ಸಮ್ಜತಾ ತಿತ್ಲೆಂ ಹೆರ್ ಕೊಣ್ಯೀ ಸಮ್ಜೊಂಕ್ ಕಶ್ಟ್. ಆತಾಂ ನಂದಿನಿನ್ ಚಾ.ಫ್ರಾ.ದೆ’ಕೋಸ್ತಾಚ್ಯಾ ಎಕೆಕಾ ಕವಿತೆಚೆರ್ ಕೆಲ್ಲೊ ವಿಮರ್ಸೊ ಹಾಂಗಾಸರ್ ಆಮಿ ದಿತೆಲ್ಯಾಂವ್. ಎಕೆಕಾ ಆಂಕ್ಡ್ಯಾಂತ್ ಏಕ್ ಕವಿತಾ ತಶೆಂಚ್ ತ್ಯಾ ಕವಿತೆಚೆರ್ ಕೆಲ್ಲೊ ವಿಮರ್ಸೊ ಪರ್ಗಟ್ತಲೊ. ಕವಿತಾ ಸಮ್ಜೊಂಕ್ ತಶೆಂಚ್ ಬರಿಂ ಕವಿತಾ ರಚುಂಕ್ ಹೊ ವಿಮರ್ಸೊ ದಿಶ್ಟಾವೊ ಜಾತಲೊ ಮ್ಹಳ್ಳೊ ಆಮ್ಚೊ ಭರ್ವಸೊ. - ಸಂ.
ನಂದಿನಿ
ಚಾ.ಫ್ರಾ.ದೆ’ಕೋಸ್ತಾಚ್ಯಾ ’ದರ್ಯಾಕ್ ಉಜೊ ಪೆಟ್ಲಾ’ ಕವಿತೆಂಚೆರ್ ’ಕವಿತಾಪಾಠಾಚೆರ್ ಕೆಲ್ಲೆಂ ಅಧ್ಯಯನ್’
ಚಾ.ಫ್ರಾ.ದೆ’ಕೋಸ್ತಾಚ್ಯಾ ’ಪಣ್ತೆಚಿ ಪೆಲಿ’ ಬುಕಾಚೆರ್ ಕೆಲ್ಲೆಂ ಅಧ್ಯಯನ್
ವಿಮರ್ಸೊ ಬರಂವ್ಚೆ ಪಯ್ಲೆಂ
ಕವಿಚ್ಯಾ ಖಾಸ್ಅನ್ಭವ್
ಸಂಸಾರಾಚಿ ಆನಿ ಜಿಣಿಯೆಥಂಯ್ ತಾಚಾ ಸ್ಪಂದನಾಚಿ ಅಭಿವ್ಯಕ್ತಿಚ್ ಕವಿತಾ. ಕವಿತಾ ಕವಿಚೊ ಪಯ್ಲೊ ಅನ್ಭವ್ ಆನಿ ತೆ ಕವಿತೆಚೆರ್
ವೊಂದೊನ್ ದಿಲ್ಲೊ ವಿಮರ್ಸೊ ಪಯ್ಲ್ಯಾ ಅನ್ಭವಾಂಚ್ಯಾ ಆದಾರಾಚೆರ್ ಉದೆಲ್ಲೊ ದುಸ್ರೊ ಅನ್ಭವ್
ಮ್ಹಣ್ಯೆತ್. ಜಿಣಿ ನಾಸ್ತಾನಾ ಕವಿತಾ ನಾ ಆನಿ ಕವಿತಾ
ನಾಸ್ತಾನಾ ವಿಮರ್ಸೊ ನಾ. ಕವಿತಾ ಜಿಣಿಯೆಥಂಯ್ ಕವಿಸ್ಪಂದನಾಚೆಂ
ಪ್ರತಿರೂಪ್ ತರ್, ವಿಮರ್ಸೊ ಕವಿತೆ ಥಂಯ್
ವಾಚ್ಪ್ಯಾಚ್ಯಾ ಸ್ಪಂದನಾಚೆಂ ಪ್ರತಿರೂಪ್. ಕವಿಸ್ಪಂದನ್ ಕಶೆಂ ಎಕಾ ಕವಿಥಾವ್ನ್ ಅನ್ಯೆಕಾ ಕವಿಥಂಯ್ ಥರಾವಳ್ ಥರಾಂನಿ ಆಸ್ತಾ ತಶೆಂ ವಿವಿಧ್
ವಾಚ್ಪ್ಯಾಂಚೊ ವಿಮರ್ಸೊಯ್ ಥರಾವಳ್ ಥರಾಂನಿ ಆಸ್ತಾ. ಕವಿಚ್ಯಾ ಅಭಿವ್ಯಕ್ತೆಂತ್ ಆಟಾಪುನ್ ಆಸ್ಚೆಂ
ಸತ್ ಆನಿ ಸೊಬಾಯ್ ವಿಮರ್ಸೊ ಸೊದುನ್ ಕಾಡ್ತಾ.
ಕವಿಚಿ ಜಾಣ್ವಾಯ್, ತಾಚೆಂ ವೆಕ್ತಿತ್ವ್ ಆನಿ ತಾಚಿ ಜಿಣಿ ಕವಿತೆಚೆರ್
ಪ್ರಭಾವ್ ಘಾಲ್ತಾ ವ್ಹಯ್ ತರ್ಯಿ ವಿಮರ್ಶಾಂತ್ ಕವಿತೆಚಿ ಫೊಡ್ನಿಶಿ ಚಲಜೆ ಶಿವಾಯ್ ಕವಿಚೆರ್
ವ್ಯಕ್ತಿಗತ್ ಆಕ್ರಮಣ್, ತಾಚಾ ಜಾಣ್ವಾಯೆಚಿ ಆನಿ ಖಾಸ್ಗಿ ಜಿಣಿಯೆಚಿ ಖೊಡ್ ಆನಿ ನಿಂದಾ ನ್ಹಯ್.
ವಿಮರ್ಸೊ ಕವಿತೆಕ್ ಸೊಡ್ನ್ ಕವಿಕ್ ಧರಿತ್ ತರ್ ತೊ
ವಿಮರ್ಸೊ ಎಕ್ಚ್ ಕೀಳ್ ಮಟ್ಟಾಚೊ ಜಾತಾ
ವಾ ವಿಮರ್ಸೊಚ್ ನ್ಹಯ್ ಜಾತಾ. ದೆಕುನ್ಚ್ ಆಸ್ಯೆತ್ ಆಯ್.ಎ. ರಿಚರ್ಡ್ ಆಪ್ಲ್ಯಾ
Practical criticism A study of literary judgement
ಪುಸ್ತಕಾಂತ್ ಧಾ ಆನಿ ತೀನ್ ಕವಿತಾ
ದೀವ್ನ್ ವಿಮರ್ಸೊ ಶಿಕಯ್ತಾನಾ ಕವಿಂಚಿ ನಾಂವಾಂ
ಸಾಂಗಚ್ ನಾ.
ಜಾಣ್ವಾಯ್ ಆನಿ ಸನದ್ಯೊ ಬರಯ್ಣಾರಾಚಾ ಬರ್ಪಾಚಿ ಧಾರ್ ಯಾ ಕವಿಚಾ ಕವಿತೆಚೊ ತೇಜ್ ಚಡಯ್ತ್,
ಪುಣ್ ಬರಯ್ಣಾರಾಕ್ ಯಾ ಕವಿಕ್ ಘಡುಂಕ್ ಶಿಕಪ್ ಯಾ
ಸನದ್ಯಾ ವರ್ವಿಂ ಸಾಧ್ಯ್ ಜಾಯ್ನಾ. ತೆಂ ಆಸಾ ದೆಣೆಂ ದೆವಾಚೆಂ. ತಶೆಂ
ವಿಮರ್ಶ್ಯಾಚಿ ಶಾಸ್ತ್ರೀಯ್ ರೀತ್ ಆಸಾ-ವಿಮರ್ಸೊ ಅಸೊ ಅಸೊ ಕರ್ಯೆತ್, ಕರ್ಚೆಂ ಬರೆಂ, ಕರಿಜೆಚ್ ಮ್ಹಳ್ಳೆ
ನೇಮ್ ಆಸಾತ್ ಆನಿ ತ್ಯಾ ಪ್ರಕಾರ್ ವಿಮರ್ಶೆ ಜಾಲ್ಯಾತ್. ತರ್ಯಿ ಏಕ್ ಖರೊ
ವಾಚ್ಪಿ ಆಪ್ಲ್ಯಾ ವಾಚ್ಪಾಚೊ ವಿಮರ್ಸೊ ಆಪ್ಲ್ಯಾಚ್ ಖಾಸ್ ರಿತಿನ್ ಕರುಂಕ್
ಸಕ್ತಾ ಆನಿ ಕರ್ತಾ. ಹಾಂವ್ ತಸಲ್ಯಾ ಆಮ್
ವಾಚ್ಪ್ಯಾಚ್ಯಾ ಬಗ್ಲೆನ್ ರಾವೊನ್ ಜಶೆಂ ಮಾಕಾ ಭೊಗ್ಲೆಂ ಆನಿ
ಸಮ್ಜಲೆಂ ತಶೆಂ ವಿಮರ್ಸೊ ದಿತಾಂ. ಹಿ ಎಕಾ
ವಾಚ್ಪ್ಯಾನ್ ಕರ್ಚ್ಯಾ ವಿಮರ್ಶಾಚಿ ಖಾಸ್ ರೀತ್, ಏಕ್
ಸುಟಾವಿ ಆನಿ ಉಗ್ತಿ ರೀತ್. ಶಾಸ್ತ್ರೀಯ್ ವಿಮರ್ಶ್ಯಾ ರಿತಿಚೊ
ಪ್ರಭಾವ್ ಆಸ್ಯೆತ್ ಯಾ ನಾ ಆಸ್ಯೆತ್ ಪುಣ್
ಹಾಂಗಾಸರ್ ವಾಚ್ಪ್ಯಾಚ್ಯಾ ಭೊಗ್ಣಾಂಕ್ ಚಡ್
ಮೊಲ್. ಶಾಸ್ತ್ರ್ ಆನಿ ಭಾಶಾ ಗಿನ್ಯಾನಾಚ್ಯಾ ವಯ್ಭವಿಕ್ ಭಿಯಾಥಾವ್ನ್ ಪಯ್ಸ್
ಸರೊನ್ ಆಮಿ ಆನಿ ತುಮಿ ಕವಿತಾ ಸಮ್ಜೊನ್ ತ್ಯಾ ಕವಿತೆಚ್ಯಾ
ಸಂಸಾರಾಚೊ ಆನಂದ್ ಜೊಡ್ಚೊ ಮ್ಹಜೊ ಇರಾದೊ.
ಕವಿನ್ ಆಪ್ಲಿಂ ಭೊಗ್ಣಾಂ ಸುಟಾವಿಂ ಆನಿ ಉಗ್ತ್ಯಾನ್ ಅಭಿವ್ಯಕ್ತ್ ಕೆಲ್ಲೆಬರಿ, ವಾಚ್ಪಿ ಜಾವ್ನ್ ತಾಚಾ ಕವಿತೆಂಚೆರ್ ಮ್ಹಜ್ಯಾ ಭೊಗ್ಣಾಂಚಿ ಸುಟಾವಿ ಅಭಿವ್ಯಕ್ತಿಚ್ “ಹಾಡ್ ಚೆಡ್ವಾ ಬುಡ್ಕುಲೊ" ಕವಿತಾ ಸಂಗ್ರಹಾಚೊ ವಿಮರ್ಸೊ ಜಾವ್ನಾಸಾ.
About us | Feedback | Contact us
Copyright ©
2005 DAAIZ.COM All rights reserved.
Page concept, designed and maintained by Ashawadi Publications