ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ವಿಂಚ್ಣಾರ್ ಮಟ್ವಿಕಾಣಿ - ನಿರಾಸ್
ಸ್ಟೇನ್ ಅಗೇರಾ: ಕೊಂಕ್ಣಿ ಸಾಹಿತ್ಯಾಂತ್ ಏಕ್ ಫಾಮಾದ್ ನಾಂವ್, ಏಕ್ ಭಳ್ವಂತ್ ಕಾಣ್ಯೆಗಾರ್, ಕಾದಂಬರಿಕಾರ್. ಥ್ರಿಲ್ಲರ್ ಕಾಣ್ಯೊ ಬರಂವ್ಚಾಂತ್ ನಾಮ್ಣೆಚೊ ಜಾಲ್ಲೊ ಸ್ಟೇನ್ ಅಗೇರಾನ್ ಅಡೇಯ್ಶಾಂ ವಯ್ರ್ ಮಟ್ವ್ಯೊ ಕಾಣ್ಯೊ ಬರಯ್ಲ್ಯಾತ್. ತಾಚಾ ಕಾಣ್ಯಾಂಚೊ ಜಮೊ ’ತಾಂಬ್ಡಿ ಮಿರ್ಸಾಂಗ್’ ಆಯ್ಲೆವಾರ್ ಪರ್ಗಟ್ ಜಾಲಾ.
ಸ್ಟೇನ್ ಅಗೇರಾಚ್ಯೊ ಹೆರ್ ಕಾಣ್ಯೊ: ಪ್ರೆಶರ್ ಕುಕ್ಕರ್, ಗುಣಾಕಾರ್, ಅಸ್ಥಿರ್ ಮೆಟಾಂ, ಹಿಭಿಸ್ಕಸ್
ಸ್ಟೇನ್ ಅಗೇರಾ
ಸಕಾಳಿಂಚೊ ಕಾಮಾಕ್ ವೆಚೊ ವೇಳ್. ಕುರ್ಲಾ ರೈಲ್ವೆ ಸ್ಟೇಶನಾಂತ್ ಗಾಡಿ ಧರುಂಕ್ ತಯಾರ್ ಜಾಲ್ಲ್ಯಾ ಅರುಣಾನ್ ಉಡಿ ಮಾರುಂಕ್ ಅಪ್ಣಾಕ್ಚ್ ತಯಾರ್ ಕೆಲೊ. ಸದಾಂ ಕಾಮಾಕ್ ವೆತಾನಾ ಟ್ರೇಯ್ನಿರ್ ಚಡ್ಚೆಂ ಮಳ್ಯಾರ್ ಏಕ್ ಸಾಹಸಿಕ್ ಭೊಗಾಪ್. ಗಡ್ದಿ ಶಿಂದುನ್ ಭಿತರ್ ನಿಸ್ರೊನ್ ಬಸ್ಕಾ ಘೆತ್ಲಿ ತರ್ ಮೆಡ್ಲ್ ಫಾವೊ ಜಾಲ್ಲಿ ಆನ್ಭೋಗ್.
ಆಜ್ ಬಸ್ಕಾ ಮೆಳ್ಳಿ ನಾ. ತೊ ನಿರಾಸ್ಲೊ. ಪ್ರಯತ್ನಾಚೊ ಫಳ್ ಜಾವ್ನ್ ಅಪೇಕ್ಷಿಲ್ಲೆಂ ಲಾಭ್ಲೆಂ ನಾ ತರ್ ನಿರಾಸ್ಚಿ ಪ್ರವತ್ತಿ ಮನ್ಶಾಚಿ. ಅರುಣಾನ್ ಥಂಯ್ ಅಸಲ್ಯಾ ವಗ್ತಾಂನಿ ನಿರಾಸ್ಚೆಂ ಸಾಮಾನ್ಯ್ ಮನ್ಶಾಂ ಪ್ರಾಸ್ ಇಲ್ಲೆಶೆಂ ಚಡ್. ದಾದರ್ ಪಾವ್ತಾನಾ ಕೋಣ್ಯಿಂ ಉಡ್ತೊಲೊ ಮಣ್ ತೊ ಭರ್ವಸ್ಲೊ. ಫೆನಾ ಪಂದಾಕ್ ಉಬೊ ಆಸ್ಚಾ ತಾಚೆ ಕಪಲಾರ್ ಉದೆಲ್ಲೊ ಘಾಮ್ ತಾಣೆ ಪುಸ್ಲೊ. ತಕ್ಲಿ ವಯ್ರ್ ಕರ್ತಾನಾ ಫೆನಾಚೊ ಬ್ಲೇಡಿ ತಟಸ್ಥ್ ಅಸ್ಚೆಂ ತಾಚೆ ಗಮನಾಕ್ ಗೆಲೆಂ.
ಸ್ವಿಚ್ ದಾಂಬುಂಕ್ ಚಿಂತಾನಾ ಆನ್ ಅಸ್ಚೆಂ ತಾಣೆ ದೆಕ್ಲೆಂ. ಬೊಲ್ಸಾ ಥಾವ್ನ್ ದಾಂತೊಣಿ ಕಾಡ್ನ್ ತಾಣೆ ಫೇನಾಚಾ ಬ್ಲೇಡಿರ್ ಪ್ರಭಾವ್ ಘಾಲೊ. ಖಿಣಾ ಭಿತರ್ ಯಂತ್ರ್ ಘುಂವೊಂಕ್ ಲಾಗ್ಲೆಂ. ವಾರೆಂ ಅಂಗಾಕ್ ಮಾರ್ತಾನಾ ತೊ ಬಸ್ಕಾ ಮೆಳಾನಾತ್ಲ್ಲಿ ನಿರಾಸಾ ವಿಸ್ರಾಲೊ.
ದಾದರ್ ಪಾವ್ತಾನಾ ತಾಕಾ ಬಸ್ಕಾ ಮೆಳ್ಳಿ. ದಾದರ್ ಥಾವ್ನ್ ಪರೇಲ್ ಪಾವೊಂಕ್ ಟ್ರೇಯ್ನಿನ್ ಜಾಯ್ತೊ ವೇಳ್ ಕಾಡ್ಲೊ. ಸಿಗ್ನಲಾನ್ ಗಳಾಯಿ ಕೆಲಿ. ಅರುಣಾಚಿಂ ಚಿಂತ್ನಾಂ ಖಾಸ್ಗಿ ಪಾನಾಂಚೆರ್ ಚರೊಂಕ್ ಲಾಗ್ಲಿಂ.
ಗಾಂವಾ ಥಾವ್ನ್ ಕಾಮಾಚಾ ಶಿಕಾರೆಚೆರ್ ಮುಂಬೈ ಪಾವೊನ್ ದೇಡ್ ವರ್ಸ್ ಜಾಲ್ಲೆಂ. ಪಾಟ್ಲೆ ಏಕಾ ವರ್ಸಾ ಥಾವ್ನ್ ತೊ ನಾಂವಾಡ್ದಿಕ್ ಶಿಪ್ಪಿಂಗ್ ಕಂಪೆನಿಂತ್ ವಾವ್ರ್ ಕರ್ತಾಲೊ. ರೀಣಾಚೆರ್ ಕುರ್ಲಾಂತ್ ಏಕ್ ಲಾನ್ಶಿ ಕೊಟ್ರಿ ಆನಿ ಹಾತ್ಭರ್ ಮಹಿನ್ಯಾಚೊ ಪಾಗ್. ಹ್ಯಾ ದ್ರಷ್ಟೆನ್ ತಾಕಾ ದುರ್ಸೊಣೆ ನಾತ್ಲ್ಲೆಂ. ಗಾಂವಾಂತ್ ಆಸ್ಚಿಂ ಲಾಗ್ಸಿಲಿಂ ಮಳ್ಯಾರ್ ಮಾಂಯ್. ಹಫ್ತ್ಯಾಕ್ ಏಕ್ ಪಾವ್ಟಿಂ ಫೋನ್ ಕರ್ತಾಲೊ. ತಿಕಾ ಹ್ಯಾ ಗಡ್ದೆಚಾ ಗಾಂವಾಂತ್ ಜಿಣಿ ಸಾರುಂಕ್ ಬಿಲ್ಕುಲ್ ಮನ್ ನಾತ್ಲ್ಲೆಂ. ತಿ ಅಪ್ಲೆ ಫುಲಾಂಚಾ ದಂದ್ಯಾಂತ್ ಖುಶ್ ಆಸ್ಲ್ಲಿ. ಆದ್ಲೆ ವರ್ಸಾ ದೋನ್ ಪಾವ್ಟಿಂ ತಾಣೆ ಮಾಂಯ್ಕ್ ಪಳೆಂವ್ಕ್ ಗಾಂವ್ಚಿ ಭೆಟ್ ಕೆಲ್ಲಿ.
ಘರ್, ಬೊರೆಂ ಕಾಮ್ ಆನಿ ಅಪೇಕ್ಷಿಲ್ಲೊ ಸಾಂಬಳ್. ಸರ್ವ್ ಸಮಾ ಆಸ್ಲ್ಲೆಂ? ಹಾಚಿ ಜಾಪ್ ತಾಣೆ ಸೊಧ್ಲ್ಲಿ. ಎಕ್ಸುರ್ಪೊಣಾಚೊ ಕಾಂಟಾಳೊ ತಾಕಾ ತವಳ್ ತವಳ್ ಧೊಸ್ತಾಲೊ. ತೊ ಸಾಂಗಾತ್ ಆಶೆತಾಲೊ. ದಫ್ತರಾ ಥಾವ್ನ್ ಘರಾ ಪಾವೊನ್ ಮೊಗಾಚಾ ವ್ಯಕ್ತಿ ಲಾಗಿಂ ಮಾಯ್ಪಾಸಿ ಉತ್ರಾಂ ಉಲೊಂಕ್ ಆಶೆತಾಲೊ. ಅಧುನಿಕ್ ಶಹರಾಚಿ ಗಡ್ದಿ, ದಫ್ತರ್, ಕಾಮ್, ಸಕಾಳಿಂ-ಸಾಂಜೆಚೆಂ ಪಯ್ಣ್ ಆನಿ ಪರಿಸರಾ ಥಾವ್ನ್ ಕೆಂಕಾರ್ಚಾ ನಾನಾಂತ್ಯಾ ಆವಾಜಾ ಥಾವ್ನ್ ಅಲಗ್ ಜಾವ್ನ್ ಸಾಂಗಾತ್ಯಾ ಸಂಗಿಂ ಮಿಸ್ಳೊನ್ ಥೊಡೆ ಘಂಟೆ ತರೀ ಸರ್ವ್ ವಿಸ್ರೊಂಕ್ ಲಾಲೆತಾಲೊ.
ಸಾಂಗಾತ್?
ಸಾಂಗಾತ್ ಮಣ್ತಾನಾ ತಾಚೊ ಉಡಾಸ್ ಲವೀನಾಕ್ ಸೊಡುಂಕ್ ತಯಾರ್ ನಾತ್ಲ್ಲೊ.
ಲವೀನಾ?
ತೆ ಆದ್ಲೆ ದೀಸ್. ಉರ್ವಾಚಾ ಪರ್ನ್ಯಾ ಘರಾ ಕೊಲೇಜ್ ಶಿಕ್ತಾನಾ ತಾಂಚೆ ಘರಾ ಬಗ್ಲೆಚೊ ಜಾಗೊ ಮೊಲಾಕ್ ಘೆವ್ನ್ ಘರ್ ಭಾಂದುನ್ ಬೆನ್ನಿ ಆಂಟಿ ಅಪ್ಲಿ ಸುನ್ ಆನಿ ನಾತ್ವಾ ಸಾಂಗಾತಾ ರಾವೊಂಕ್ ಆಯಿಲ್ಲಿಂ. ತಿಚೊ ಪುತ್ ರೊಕಿ ಸೌದಿ ಕಾಮ್ ಕರ್ನ್ ಕುಟ್ಮಾಕ್ ಸಾಂಬಾಳ್ತಾಲೊ. ರೊಕಿಚಿ ಭಾಯ್ಲ್ ರೂಪಾ ಆನಿ ಚೆರ್ಕೊ ರವಿಚಾ ಚಿಲ್ಲರ್ ಗರ್ಜೆಂಕ್ ಪಾವೊನ್ ಅರುಣಾಕ್ ತ್ಯಾ ಕುಟ್ಮಾ ಸಂಗಿಂ ಸಳಾವಳ್ ಜಾಲ್ಲಿ. ಬೆನ್ನಿ ಆಂಟಿಕ್ ವಕ್ತಾಂ ಹಾಡ್ಚೆಂ, ವೀಜ್ ಸಕ್ತೆಚೆಂ ಬಿಲ್ಲ್ ಫಾರಿಕ್ ಕರ್ಚೆಂ, ರವಿ ಸಿಕ್ ಜಾಲ್ಯಾರ್ ದಾಕ್ತೆರಾ ಲಾಗಿಂ ವರ್ಚೆಂ, ಬಜಾರಾ ಥಾವ್ನ್ ರಾಂದ್ಪಾ ಸಮಾನ್, ಪಯ್ಲೆಂತ್ ಶಿಕ್ಚಾ ರವಿಕ್ ಶಿಕ್ಪಾಂತ್ ಮಜತ್ ಕರ್ಚೆಂ, ಆಶೆಂ ತ್ಯಾ ಸೆಜಾರಾಕ್ ತೊ ಮೊಗಾಚೊ ಜಾಲ್ಲೊ.
ರೂಪಾ ಕಾರ್ಕೊಳ್ಚೆಂ. ರೂಪಾಚೆಂ ಭೈಣ್ ಲವೀನಾ ಅಪ್ಲೆಂ ಪಿಯುಸಿ ಕಾರ್ಕಳ್ ಶಿಕೊನ್ ಡಿಗ್ರಿ ಕರುಂಕ್ ಮಂಗ್ಳುರಾಕ್ ಆಯ್ಲೆಂ ಆನಿ ಅಪ್ಲೆ ಬೈಣಿಚಾ ಘರಾ ರಾವೊಂಕ್ ಲಾಗ್ಲೆಂ. ಲವೀನಾಚಾ ಪುಡ್ಪುಡಿತ್ ಸೊಭಾಯೆನ್ ಅರುಣಾಕ್ ಪಿಶ್ಯಾರ್ ಘಾಲೆಂ. ತೊ ಲವೀನಾ ಥಂಯ್ ಆಕರ್ಷಿತ್ ಜಾಲೊ.
ಸಾಂಜೆರ್ ಕ್ಲಾಸ್ ಜಾತಾಚ್ ಘರಾ ಆಯಿಲ್ಲೊಚ್ ತೊ ರೂಪಾಚಾ ಘರಾ ವಚೊಂಕ್ ದರ್ವಡ್ತಾಲೊ. ತಾಚಿಂ ಮೆಟಾಂ ರವಿಕ್ ಭೆಟ್ಚಾ ನೀಬಾನ್ ಬೆನ್ನಿ ಆಂಟಿಚಾ ಘರಾ ವೆತಾಲಿಂ. ’ಸ್ಟೆಟಿಸ್ಟಿಕ್ಸ್’ ವಿಷಯಾಂತ್ ಅರುಣ್ ಬಳ್ವಂತ್. ಪುಣ್ ಲವೀನಾ ಹಾಂತುಂ ಅಸ್ಕತ್. ಲವೀನಾನ್ ಸ್ಟೆಟಿಸ್ಟಿಕ್ಸಾಂತ್ ಅಪ್ಲಿ ಜಾಣ್ವಾಯಿ ವಾಡೊಂಕ್ ಅರುಣಾಚಿ ಮಜತ್ ಘೆಂವ್ಚೆಂ ಸಾಮಾನ್ಯ್ ಜಾಲೆಂ.
ಲವೀನಾ ಲಾಗಿಂ ಅಪ್ಲೊ ಮೋಗ್ ಉಚಾರ್ಯಾಂ ಮಣ್ ಅರುಣಾಕ್ ಜಾಯ್ತೆ ಪಾವ್ಟಿಂ ಭೊಗ್ಲ್ಲೆಂ ಆಸಾ. ತಾಚೆ ಅಂಗಾಚೊ ಸ್ಪರ್ಶ್ ಘೆಂವ್ಕ್ ತೊ ಪ್ರೇರಿತ್ ಜಾಲ್ಲೊ ಆಸಾ. ಲಿಸಾಂವ್ ಶಿಕಯ್ತಾನಾ ಸರ್ವ್ ವಿಸ್ರೊನ್ ಲವೀನಾಕ್ ಆರಾವ್ನ್ ಉಮೆ ದಿಂವ್ಕ್ ಉಮಾಳೊನ್ ಆಯಿಲ್ಲೆ ಉದ್ರೇಕ್ ತಾಣೆ ಕಷ್ಟಾಂನಿ ನಿಯಂತ್ರಿತ್ ಕೆಲ್ಲೆ ಆಸಾತ್. ಪ್ರಯತ್ನ್ ಪೂರ್ವಕಿಂ ಅಪ್ಲೆ ಸರ್ವ್ ತಳ್ಮಳ್ಯಾಂಚೆರ್ ಅರುಣಾನ್ ಲಗಾಮ್ ಘಾಲ್ಲಿ.
ಕಾರಣ್?
ಬೆನ್ನಿ ಆಂಟಿನ್ ಆನಿ ರೂಪಾನ್ ದಾಕಂವ್ಚೊ ಅಭಿಮಾನ್ ಆನಿ ಪಾತ್ಯೆಣಿ ಹೊಗ್ಡಾಂವ್ಕ್ ತಾಕಾ ಮನ್ ನಾತ್ಲ್ಲೆಂ. ಅರುಣಾಕ್ ಕೊಫಿ ಮೊಗಾಚಿ. ಪ್ರತ್ಯೇಕ್ ಜಾವ್ನ್ ರೂಪಾನ್ ತಯಾರ್ ಕೆಲ್ಲಿ ಕೊಫಿ ಅತ್ಯಂತ್ ಸ್ವಾಧೀಷ್ಟ್.
ಅರುಣಾನ್ ಮಿಟಿಯೊ ಮಾರ್ಲ್ಯೊ. ತಾಣೆ ಪಯ್ಣ್ ಕರ್ಚಾ ಟ್ರೇಯ್ನಿನ್ ಪರೇಲ್ ಥಾವ್ನ್ ಮುಕಾರ್ ಧಾಂವೊಂಕ್ ವೇಗ್ ಆರಾಯ್ಲೊ.
ಸಾಂಜೆಚಾ ಕೊಪಿಯೆಕ್ ಖಾಣ್ ತಯಾರ್ ಕರ್ಚಾಂತ್ ರೂಪಾಚೊ ಉಕಲ್ಲೊ ಹಾತ್. ಗೊಡ್-ನಾರ್ಲ್-ಏಳ್ಯಾಂತ್ ರೆವ್ಡಾಯಿಲ್ಲೆ ಪಾನ್ಪಾಳೆ, ಹೋಳಿಗೆ, ಗೋಳಿ ಬಜೆ, ಬನ್ಸ್, ವಡೆ, ಪಾತೊಳ್ಯೊ, ಪೊಳೆ ಇತ್ಯಾದಿ ರುಚಿಕ್ ಖಾಣಾಂ ತೆಂ ಸಾಂಜೆರ್ ತಯಾರ್ ಕರ್ತಾಲೆಂ ಮಾತ್ರ್ ನಯ್ ತೊ ಸಾಂಜೆಚಾ ಭೆಟೆಕ್ ಯೆತಾನಾ ಏಕ್ ಪ್ಲೇಟ್ ಅರುಣಾಕ್ ದಿಂವ್ಕ್ ವಿಸ್ರಾನಾತ್ಲ್ಲೆಂ. ರೂಪಾಕ್ ಕನ್ನಡ ಪಿಂತುರಾಂಚೆಂ ಪಿಶೆಂ. ವಿಷ್ಣುವರ್ಧನ್ ತಾಕಾ ಭೋವ್ ಮೊಗಾಚೊ. ಕಂಕ್ನಾಡಿ ದಾಕ್ತೆರಾಕ್ ಭೆಟೊಂಕ್ ಮಣೊನ್ ಬೆನ್ನಿ ಆಂಟಿಕ್ ಫಟಿ ಸಾಂಗೊನ್ ಲವೀನಾ ಆನಿ ಅರುಣಾಕ್ ಘೆವ್ನ್ ಜಾಯ್ತೆ ಪಾವ್ಟಿಂ ರೂಪಾನ್ ಕನ್ನಡ ಪಿಕ್ಚರಾಂ ಪಳೆಯಿಲ್ಲಿಂ. ಲವೀನಾ ಕಾರ್ಕಳ್ ಗೆಲ್ಲ್ಯಾ ವೆಳಾರ್ ದೋನ್ ಪಾವ್ಟಿಂ ರೂಪಾನ್ ಅರುಣಾಕ್ ನಾಡುನ್ ಥಿಯೆಟರಾಕ್ ವೆಲ್ಲೆಂ.
ಭೈಣಿಕ್ ದೆಡಿ ಜಾವ್ನ್ ತವಳ್ ಲವೀನಾ ಅರುಣಾ ಸಂಗಿಂ ಸಿನೆಮಾ ಸಾಲಾಂಕ್ ಗೆಲ್ಲೆಂ, ಪುಣ್ ಕನ್ನಡ ಸಿನೆಮಾಂ ತೆಂ ಖಾಯ್ಸ್ ಕರಿನಾತ್ಲ್ಲೆಂ. ಶಿಕ್ಪಾ ಶಿವಾಯಿ ವಾಂಜೆಲ್ ರಜಾರ್ ಮಳ್ಯಾರ್ ಲವೀನಾಕ್ ವಿಶೇಸ್ ಆಸಕ್ತ್. ವಾಚ್ಪಾಂ ವಾಚ್ಚಿಂ, ಕೊಯೆರಾಂತ್ ವಾಂಟೆಲಿ ಆನಿ ಆಯ್ತಾರಾ ಭುರ್ಗ್ಯಾಂಕ್ ಮಾದ್ರಿಂ ಸಂಗಿಂ ದೊತೊರ್ನ್ ಶಿಕಂನ್ಚಿ ಅಸಲ್ಯಾ ಚಟುವಟಿಕೆಂನಿ ಖತ್ಕತಿ ಹುಮೆದ್.
ಕನ್ನಡ ಪಿಕ್ಚರಾಂ ತಾಚೆಯಿ ಪಸಂದೆಚಿಂ ನಯ್ ತರೀ ರೂಪಾಕ್ ಖುಶ್ ಕರುಂಕ್ ಹ್ಯಾ ಘುಟ್ಮಳೆಂತ್ ತೊ ವಾಂಟೆಲಿ ಜಾಲ್ಲೊ. ಖಂಚಾಯಿ ಏಕಾ ದೀಸಾ ಭವಿಶ್ಯಾಂತ್ ರೂಪಾಚಾ ಮತಿಕ್ ಲವೀನಾಚಿ ಸಯ್ರಿಕ್ ಅಪ್ಣಾಕ್ ದೀಂವ್ಕ್ ಐಡಿಯಾ ಯೆತೆಲಿ ಮಣ್ ತೊ ಸಪ್ಣೆಲ್ಲೊ. ಅಪುಣ್ ಲವೀನಾಚೊ ಮೋಗ್ ಕರ್ತಾಂ ಮಣ್ ರೂಪಾ ಲಾಗಿಂ ಸಾಂಗ್ಚೆಂ ಧೈರ್ ತಾಚೆ ಲಾಗಿಂ ನಾತ್ಲ್ಲೆಂ. ಸಾಂಗಾತಾಚ್ ಆಚಾನಕ್ ಸಯ್ರಿಕ್ ಜಾವ್ನ್ ಲವೀನಾ ಪಯ್ಸ್ ವೆತೆಲೆಂ ಮಣ್ಚೆಂ ಭೆಂ ತಾಕಾ ಧೊಸ್ತಾಲೆಂ.
ಭೆಂ!
ಅಪ್ಣೆ ಸಯ್ರಿಕ್ ವಿಚಾರ್ನ್ ಯಾ ಮೋಗ್ ವ್ಯಕ್ತ್ ಕರ್ನ್ ತಾಣಿ ನಿರಾಕರ್ಸಿಲೆಂ ತರ್? ಅಂತಸ್ಠಾಚಿ ಆಡ್ಕಳ್ ಉಬ್ಜೊಂಕ್ ಸಾಧ್ಯ್ ಆಸಾ. ಅಪುನ್ ಸಾದ್ಯಾ ಫುಲ್ಕರ್ನಿಚೊ ಪುತ್. ಹೆಂ ಘರಾಣೆ ತಾಂಕಾಂ ಪಸಂದ್ ಜಾಂವ್ಚೆಂ ನಾ. ಪಸಂದ್ ಜಾಲ್ಯಾರೀ ಕಿತೆಂ ಆಸ್ತ್ ಆನಿ ಕಾಮ್ ಆಸಾ ಮಣ್ ತಿಂ ಲವೀನಾಕ್ ಅಪ್ಣಾಕ್ ದಿತೆಲಿಂ? ಕಾರ್ಕಳ್ ಗಾಂವಾಂತ್ ರೂಪಾ ಆನಿ ಲವೀನಾಚೊ ಬಾಪಯಿ ನಾಂವಾಡ್ದಿಕ್ ಸಾವ್ಕಾರ್.
ಸಕಾಳ್ ಉದೆತಾನಾ ಲವೀನಾಚೆಂ ತೋಂಡ್ ಪಳೆಂವ್ಕ್ ತೊ ಅತ್ರೆಗ್ತಾಲೊ. ತಾಚಾ ಅತ್ರೆಗಾಂತ್ ಕುರಾಡ್ ಪಡ್ತಾಲಿ ಸೌದಿ ಥಾವ್ನ್ ವರ್ಸಾಕ್ ಏಕ್ ಪಾವ್ಟಿಂ ರಜೆರ್ ರೊಕಿ ಗಾಂವಾಂಕ್ ಆಯಿಲ್ಲ್ಯಾ ತವಳ್. ಕಾರಣ್ ಕಿತೆಂ ಮಣ್ ನೆಣಾ, ರೊಕಿಚೆಂ ಮನ್ ಜಿಕ್ಚಾಂತ್ ತೊ ವಿಫಲ್ ಜಾಲ್ಲೊ. ರೊಕಿ ಗಾಂವಾಂಕ್ ಯೆತಾ ಮಣ್ಚಿ ಖಬರ್ ಅರುಣಾಕ್ ವೀಕ್ ಪಿಯೆಲ್ಲ್ಯಾ ಪರಿಂ. ಆಶೆಂ ಕಿತ್ಯಾಕ್ ಮಣ್ ತೊ ನೆಣಾ. ಅಪ್ಣೆ ಕಿತೆಂ ಲುಕ್ಸಾಣ್ ಕೆಲ್ಯಾ ಮಣ್ ರೊಕಿ ಅಪ್ಣಾಕ್ ಕಾಂಟಾಳ್ತಾ?
ಅರುಣಾಕ್ ದೆಕ್ತಾನಾ ರೊಕಿಚೆಂ ತೋಂಡ್ ಫಾತ್ರೆತೆಲೆಂ. ದಾರಾ ಲಾಗಿಂ ಗೆಲ್ಯಾರ್ ತೊ ಭಿತರ್ ಅಪಯ್ನಾತ್ಲ್ಲೊ. ದೋಸ್ತಿ ಕರುಂಕ್ ಇಡೆಂ ದೀನಾತ್ಲ್ಲೊ. ರವಿಕ್ ಅಪ್ಣಾ ಲಾಗಿಂ ಖೆಳೊಂಕ್ ಸೊಡಿನಾತ್ಲ್ಲೊ. ತಾಣೆ ಪಾಠಂವ್ಚೊ ’ತುಂ ಪರ್ಕಿ’ ಮಣ್ಚೊ ಸಂದೇಶ್ ಸ್ವೀಕಾರ್ ಕರುಂಕ್ ಅರುಣಾಕ್ ಕೊಡ್ಸಾಣ್ ಭೊಗ್ತಾಲಿ.
ಅಪುಣ್ ಫುಲ್ಕರ್ನಿಚೊ ಪುತ್ ಮಣೊನ್ ರೊಕಿಚಾ ತಿರಾಸ್ಕರಾಚೆಂ ಕಾರಣ್? ಯಾ ಅಪುಣ್ ಲವೀನಾಕ್ ಲಾಯ್ನ್ ಮಾರ್ತಾಂ ಮಣೊನ್ ಸುರಕ್ಷಾ ರೇಖಾ??
ರೊಕಿ ಪಾಟಿಂ ಸೌದಿ ವೆತಾ ಪರ್ಯಾಂತ್ ಅರುಣ್ ಪಯ್ಸಾ ಪಯ್ಸ್ ರಾವ್ತಾಲೊ. ತಾಚೆಂ ವಿಮಾನ್ ಗಗನಾಕ್ ಉಮೊ ದಿತಾನಾ ಹೆಣೆ ಅರುಣಾಚಿ ಜಿಣಿ ಸಾಮಾನ್ಯ್ ಜಾತೆಲಿ. ಬೆನ್ನಿ ಆಂಟಿ, ರೂಪಾ, ರವಿ ಆನಿ ಲವೀನಾ ಸಂಗಿಂ ತಾಚೆಂ ಪಾಂಪಾಳೆಂ ರುತಾ ಜಾತಾಲೆಂ. ರೊಕಿ ಪಾಟಿಂ ಘೆಲ್ಲ್ಯಾ ಫರಾ ತಾಚೆ ವಾಂಟ್ಯಾಚಿಂ ವಿದೇಶಿ ಚೊಕ್ಲೆಟಾಂ, ಸುಗಂಧ್ ದ್ರವ್ಯ್, ಬೆಲ್ಟ್, ಬ್ಲೇಡ್ಸ್, ಸಾಬು ಇತ್ಯಾದಿ ತಾಕಾ ರೂಪಾ ಥಾವ್ನ್ ಇನಾಮ್ ಜಾವ್ನ್ ಮೆಳ್ತಾಲೆಂ. ಥೊಡೆ ಪಾವ್ಟಿಂ ಶರ್ಟಾಂ ಆನಿ ಪ್ಯಾಂಟಾಚೆಂ ಲುಗಾಟ್ ತಾಕಾ ರೂಪಾನ್ ದಿಲ್ಲೆಂ ಆಸಾ.
ಲವೀನಾಕ್ ಅಪ್ಲೆಂ ಜಿಣ್ಯೆ ಸಾಂಗಾತಿಣ್ ಜಾಂವ್ಕ್ ಆಶಾ ಆಸಾ ಯಾ ನಾ, ಹೆಂ ಕಶೆಂ ಪಾರ್ಕುಂಚೆಂ ಮಣ್ಚಿ ಸಮಸ್ಯಾ ನಿವಾರುಂಕ್ ತೊ ಸಂಪೂರ್ಣ್ ಸಲ್ವಲೊ. ಲವೀನಾ ತಾಚೆ ಲಾಗಿಂ ಹಾಸೊನ್ ಗಜಾಲಿ ಕರ್ತಾಲೆಂ, ಲಿಸಾಂವಾಂತ್ ಕುಮೊಕ್ ಘೆತಾಲೆಂ ಆನಿ ರೂಪಾ ಸಂಗಿಂ ಕನ್ನಡಾ ಪಿಕ್ಚರಾಂತ್ ಸಾಂಗಾತ್ ದಿತಾಲೆಂ. ಪುಣ್ ತಾಚೆ ಕಾಳ್ಜಾಂತ್ ಆನಿ ಮನಾಂತ್ ಅಪ್ಣಾ ಥಂಯ್ ಮೊಗಾಚಿ ಊಬ್ ಆಸಾ ಯಾ ನಾ, ತೆಂ ಕಶೆಂ ಜಾಣಾ ಜಾಂವ್ಚೆಂ?
ತೊ ಜಾಣಾ ಜಾಂವ್ಕ್ ಸಕ್ಲೊ ನಾ. ಲವೀನಾ ಲಾಗಿಂ ವಿಚಾರ್ಯಾಂ ಮಣ್ ನಿರ್ಧಾರ್ ಘೆತಾನಾ ತಾಣೆ ಉಪಾವ್ ನಾಸ್ತಾನಾ ಏಕ್ ವರ್ತೊ ಆಘಾತ್ ಸ್ವೀಕಾರ್ ಕರಿಜಾಯಿ ಜಾಲೊ. ಉತ್ತರ್ ಭಾರತೀಯಿ ಪ್ರಾಂತಾಂತ್ ವಾವುರ್ಚಾ ಮಾದ್ರಿಚಾ ಮೆಳಾಂತ್ ಲವೀನಾನ್ ಪ್ರವೇಶ್ ಘೆತ್ಲೊ. ತೆಂ ಖಿಣಾ ಭಿತರ್ ನಪಂಯ್ಚ್ ಜಾಲೆಂ. ದೆವಸ್ಪಾಣಾಚಿ ಖ್ಹುರ್ ತಾಚೆ ಥಂಯ್ ಆಸ್ಲ್ಲಿ ತರೀ ತೆಂ ಮಾದ್ರ್ ಜಾಂವ್ಕ್ ವೆತೆಲೆಂ ಮಣ್ ಅರುಣಾಕ್ ಖಂಚಾಯಿ ವಗ್ತಾ ಭೊಗುಂಕ್ ನಾತ್ಲ್ಲೆಂ.
ಅರುಣಾಚಿಂ ಸಪ್ಣಾಂ ಆವ್ಚಿತ್ ಹುಲ್ಪೊನ್ ಗೊಬೊರ್ ಜಾಲಿಂ. ಭಿತರ್ಲ್ಯಾ ಭಿತರ್ ತೊ ಜಾಯ್ತೊ ಕರ್ಗಾಲೊ. ಖಂತಿನ್ ವಳ್ವಳ್ಳೊ.
ನಿರಾಸ್!
ಹ್ಯಾ ನಿರಾಶೆ ಥಾವ್ನ್ ತೊ ಭಾಯ್ರ್ ಯೆಂವ್ಕ್ ಪೆಚಾಡ್ತಾನಾ ಹೆರ್ ಥೊಡಿಂ ಘಟನಾಂ ಅಪ್ಶೆಂಚ್ ಘಡೊನ್ ಗೆಲಿಂ. ಹ್ಯಾ ಘಟನಾಂಚೆರ್ ಅರುಣಾಕ್ ನಿಯಂತ್ರಣ್ ನಾತ್ಲ್ಲೆಂ..... ಬೆನ್ನಿ ಆಂಟಿ ಧೆವಾದಿನ್ ಜಾಲಿ. ಆವಯ್ಚಾ ಮರ್ಣಾ ಉಪ್ರಾಂತ್ ರೊಕಿ ಅಪ್ಲೆಂ ಸೌದಿಚೆಂ ಕಾಮ್ ಸೊಡ್ನ್ ಗಾಂವಾಂಕ್ ಆಯ್ಲೊ. ತಾಣಿಂ ಉರ್ವಾಚೆಂ ಘರ್ ವಿಕ್ಲೆಂ. ರೂಪಾಕ್ ಆನಿ ರವಿಕ್ ಘೆವ್ನ್ ರೊಕಿ ಮುಂಬೈ ಗೆಲೊ ಆನಿ ಥಂಯ್ಸರ್ ತಾಣೆ ಏಕ್ ಲಾನ್ಶೆಂ ರೆಸ್ಟೊರೆಂಟ್ ಚಾಲು ಕೆಲಾಂ ಮಣ್ ಉಪ್ರಾಂತ್ ಕಳೊನ್ ಆಯ್ಲೆಂ.
ಲವೀನಾಚಾ ಜಿಣ್ಯೆಚೆರ್ ಚಡಿತ್ ಜಾಣಾ ಜಾಂವ್ಚಿ ಖಿಳ್ ಚುಕ್ಲ್ಲಿ. ನಿರಾಸ್ ಸ್ಥಿತೆ ಥಾವ್ನ್ ತಡಿಕ್ ಯೆತಾನಾ ವಿಶೇಸ್ ಪ್ರಯಾಸ್ ತಾಕಾ ಭೊಗ್ಲೆ. ಕ್ರಮೇಣ್ ಶಿಕ್ಪಾಚೆರ್ ಚಡಿತ್ ಧ್ಯಾನ್ ದೀವ್ನ್ ತಾಣೆ ಲವೀನಾಚೊ ಉಡಾಸ್ ಧಾಂಪ್ಲೊ. ಶಿಕಾಪ್ ತಿರ್ಸುನ್ ತೊ ಮುಂಬೈ ಆಯ್ಲೊ. ಲಾನ್ಶೆಂ ಕಾಮ್ ಮೆಳೊಂಕ್ ತ್ರಾಸ್ ಜಾಲೆ ನಾಂತ್. ಪುಣ್ ಬೊರೆಂ ಕಾಮ್ ಮೆಳೊಂಕ್ ಸ ಮಹಿನೆ ಲಾಗ್ಲೆ. ಘರಾಚಿ ವ್ಯವಸ್ಥಾ ಸಂಪ್ಲಿ. ಆತಾಂ ಎಕ್ಸುರ್ಪೊಣಾ ಮುಕ್ತ್ ಜಾಂವ್ಕ್ ಆಲೋಚನ್ ಕರ್ತಾನಾ ಆದ್ಲೆ ಮಹಿನ್ಯಾಂತ್ ಮುಂಬೈ ವಿಟಿ ಸ್ಟೇಶನಾಂತ್ ಲವೀನಾಚೊ ಏಕ್ಲೊ ಕಾರ್ಕಳ್ಚೊ ಸಯ್ರೊ ತಾಕಾ ಆಚಾನಕ್ ಭೆಟ್ಲೊ. ಹ್ಯಾ ಸಯ್ರ್ಯಾಕ್ ಆದಿಂ ಗಾಂವಾಂತ್ ತೊ ವಳ್ಕಾತಾಲೊ.
ತ್ಯಾ ಸಯ್ರ್ಯಾನ್ ಮಟ್ವ್ಯಾ ಭೆಟೆಂತ್ ಅರುಣಾಕ್ ಏಕ್ ಕುರ್ಕುರಿತ್ ಖಬರ್ ದಿಲಿ.
ಮಾದ್ರ್ ಜಾಂವ್ಕ್ ಗೆಲ್ಲೆಂ ಲವೀನಾ ಮಾದ್ರಿಚಾ ಪಂಗ್ಡಾ ಥಾವ್ನ್ ಭಾಯ್ರ್ ಆಯಿಲ್ಲೆಂ. ವರ್ಲಿ ಕಾಮ್ ಕರ್ತಾ, ಎದೊಳ್ ಕಾಜಾರ್ ಜಾಂವ್ಕ್ ನಾ ಆನಿ ಬೊರಿವ್ಲಿ ಅಪ್ಲೆ ಭೈಣಿ ರೂಪಾ ಸಂಗಿಂ ರಾವ್ತಾ ಮಣ್ಚಿ ವರ್ದಿ ಆಯ್ಕೊನ್ ಅರುಣಾಚಾ ಮತಿಚೊ ಧಾಂಪ್ಲ್ಲೊ ಕೊನ್ಸೊ ಏಕಾಚ್ ಫರಾ ಉಗ್ತೊ ಜಾಲೊ. ನವಿ ಹುಮೆದ್ ಜಾಗ್ರತ್ ಜಾಲಿ. ಹುರುಪ್ ಉಮಾಳೊನ್ ಶಿರಾಂ ಶಿರಾಂನಿ ಪ್ರೇರಿತ್ ಜಾಲೊ. ಸಯ್ರ್ಯಾನ್ ರೊಕಿಚೆಂ ಬೊರಿವ್ಲಿ ಟೆಲಿಫೋನ್ ನಂಬರ್ ತಾಕಾ ದಿಲೆಂ.
ಲವೀನಾಕ್ ಅಪ್ಣಾಂವ್ಕ್ ಏಕ್ ಖರೊ ಆವ್ಕಾಸ್ ದೀಷ್ಟಿಕ್ ಪಡ್ಲಾ? ನಿರಾಸ್ ಧುವ್ನ್ ಕಾಡ್ನ್ ಯಶಸ್ವಿ ಅಪ್ಣಾಂವ್ಚಿ ಘಡಿ ಉದೆಲ್ಯಾ?
ಟ್ರೇಯ್ನ್ ವಿಟಿ ಪಾವ್ಲಿ. ಸದಾಂಚೆ ಪರಿಂ ಆನಿ ಸರ್ವಾಂ ಪರಿಂ ತೊ ಆಮ್ಸೊರಾನ್ ಸಕ್ಲಾ ದೆಂವ್ಲೊ. ರೈಲ್ವೆ ಸ್ಟೇಶನಾ ಥಾವ್ನ್ ತಾಚೆಂ ದಫ್ತರ್ ಚಡ್ ಪಯ್ಸ್ ನಾತ್ಲ್ಲೆಂ.
ರೂಪಾ ಆನಿ ರವಿ ಥಂಯ್ ತಾಕಾ ಮಾಯ್ಪಾಸ್ ಆನಿ ಆಭಿಮಾನ್ ಆಸ್ಲ್ಲೊ ತರೀ ತಿಂ ಖಂಯ್ಸರ್ ರಾವ್ತಾತ್ ಯಾ ತಾಂಚಿ ಭೆಟ್ ಕರಿಜಾಯಿ ಮಣ್ಚೆ ಅತ್ರೇಗಾಂಚೊ ಅನ್ಬೋಗ್ ತಾಣೆ ಪಾಟ್ಲ್ಯಾ ದೇಡ್ ವರ್ಸಾಂತ್ ಕೆಲ್ಲೊ ನಾ. ಕಾರಣ್ ಆಸ್ಲ್ಲೆಂ.
ರೊಕಿ!
ರೊಕಿ ಅಪ್ಣಾಕ್ ಪಸಂದ್ ಕರಿನಾ ಮಣ್ಚೆಂ ಸತ್ ತೊ ವಿಸ್ರಾಲ್ಲೊ ನಾ. ತೊ ಅಪ್ಣಾಕ್ ಕಿತ್ಯಾಕ್ ಕಾಂಟಾಳ್ತಾ ಮಣ್ಚೆಂ ಸವಾಲ್ ತಾಕಾ ಮಿಸ್ತೆರಾಭರಿತ್ ತರೀ ತಾಚೆ ಮನ್ ಜಿಕ್ಚಿ ಗರ್ಜ್ ತಾಕಾ ದಿಸ್ಲಿ ನಾ. ತ್ಯಾ ತಿರಾಸ್ಕರಾ ಥಾವ್ನ್ ಪಯ್ಸ್ ರಾಂವ್ಚೆಂ ಉಚಿತ್ ಮಣ್ ತೊ ಸಮ್ಜಾಲೊ.
ರೊಕಿಕ್ ಸಾಂಬಾಳ್ಚೆಂ ಉಪ್ರಾಂತ್ ಪಳೆವ್ಯೆತ್. ಪಯ್ಲೆಂ ಲವೀನಾನ್ ಏಕ್ ಪಾವ್ಟಿಂ ಭೆಟಾಜಾಯಿ. ಆಯ್ಚಾ ಪರಿಸ್ಥಿತೆಂತ್ ಭಿಯೆಂವ್ಚಿ ಗರ್ಜ್ ನಾ. ಅಪ್ಣಾಲಾಗಿಂ ತ್ರಪ್ತೆಭರಿತ್ ಕಾಮ್ ಆಸಾ. ಖರ್ಚಾ ಮಿಕ್ವೊನ್ ಪಾಗ್ ಮೆಳ್ತಾ. ಘರಾಚೆಂ ಸಮಸ್ಯೆಂ ನಾ. ಫಕತ್ ಥೊಡೆ ದುಬಾವ್ ಪರಿಹಾರ್ ಜಾಯ್ಜಾಯಿ. ಲವೀನಾಕ್ ಕಾಜಾರಾಂತ್ ಆಸಕ್ತ್ ಆಸಾ, ಹೆರ್ ಕೋಣ್ಯಿಂ ದಾದ್ಲೊ ನಾ ಆನಿ ಪ್ರತ್ಯೇಕ್ ಜಾವ್ನ್ ಅಪ್ಣಾಚಿ ಸಾಂಗಾತಿಣ್ ಜಾಂವ್ಚಾಂತ್ ಆಡ್ಕಳ್ ನಾ, ತಿತ್ಲೆಂ ಸ್ಪಷ್ಟ್ ಜಾಲೆಂ ತರ್ ವೇಳ್ ವ್ಯರ್ಥ್ ಕರಿನಾಸ್ತಾನಾ ಕಾಜಾರಾಚಿ ಮಾಂಡ್ಣಿ ಕರ್ಯೆತ್. ವರ್ಸಾಚಿ ರಜಾ ಕಶಿಯಿ ಆಸಾ.
ರೊಕಿನ್ ಆಡ್ಕಳ್ ಹಾಡ್ಲಿ ತರ್? ರೊಕಿಚೆಂ ಸಮಸ್ಯೆಂ ಕಿತೆಂ?
ಮೊಸೊರ್? ಲವೀನಾ ತಸಲಿ ಸೊಭಾಯಿ ಅಪ್ಣಾಕ್ ಫಾವೊ ಜಾಂವ್ಕ್ ನಜೊ ಮಣ್ಚೊ ಹುಲೊಪ್? ಲವೀನಾ ಅಪ್ಣಾಚೆಂ ಜಾಲೆಂ ತರ್ ತಾಕಾ ಕಿತೆಂ ಲುಕ್ಸಾಣ್?
ಅಪುಣ್ ಆಜೂನ್ ಆದ್ಲೆ ಚಿಂತ್ಪಾಚೆರ್ ಜಿಯೆವ್ನ್ ಆಸಾಂ. ರೊಕಿಚೊ ಮನೋಭಾವ್ ಬದ್ಲೊಂಕ್ ಸಾಧ್ಯ್ ಆಸ್ಲ್ಲೊ. ಮನ್ಶಾಚೆಂ ಮನ್ ಆನಿ ಚಿಂತ್ಚಿ ಧಾರ್ ವೇಳಾ ಸಂಗಿಂ ಬದ್ಲಾತಾ. ಹ್ಯಾ ವಾದಾಕ್ ದಿಗೊ ದೀವ್ನ್ ವೀಸ್ ದೀಸಾಂ ಆದಿಂ ತಾಣೆ ಪ್ರಥಮ್ ಪಾವ್ಟಿಂ ರೊಕಿಚೆಂ ಘರ್ಚೆಂ ನಂಬರ್ ಡಯಾಲ್ ಕೆಲ್ಲೆಂ.
ಅರುಣ್ ದಫ್ತರಾಚೆ ಭಾಂದ್ಪಾಂತ್ ರಿಗೊನ್ ಲಿಫ್ಟಾ ಭಿತರ್ ಪ್ರವೇಶ್ ಜಾಲೊ. ದುಸ್ರ್ಯಾ ಮಾಳಿಯೆರ್ ಆಸ್ಚಾ ಆಫೀಸಾಕ್ ಪಾವೊನ್ ತಾಣೆ ಅಪ್ಲಿ ಬಸ್ಕಾ ಘೆತ್ಲಿ. ಪಯ್ಲಿ ಚಾ ಪಿಯೆತಾಚ್ ತಾಣೆ ಅಪ್ಲೆ ಕಾಮಾಚೆರ್ ಗಮನ್ ದಿಲೆಂ. ಇಕ್ರಾ ವೊರಾಂ ಉಪ್ರಾಂತ್ ಕಾಮಾಚೊ ವತ್ತದ್ ಇಲ್ಲೊಸೊ ಉಣೆ ಜಾತಾನಾ ಲವೀನಾ ಲಾಗಿಂ ಆಜ್ ಪರತ್ ಸಂಪರ್ಕ್ ಕರ್ಚೆಂ ಪ್ರಯತನ್ ಕರುಂಕ್ ತೊ ಆಂವ್ಡೆಲೊ. ವಿಳಾಸ್ ಮೆಳ್ಳೊ ತರ್ ರೊಕಿಚಿ ಪರ್ವಾ ಕರಿನಾಸ್ತಾನಾ ಭೆಟ್ ಕರುಂಕ್ ತಾಣೆ ಪ್ಲಾನ್ ಕೆಲೆಂ.
ವೀಸ್ ದೀಸಾಂ ಆದಿಂ ರೊಕಿಚೆಂ ನಂಬರ್ ಡಯಾಲ್ ಕೆಲ್ಲ್ಯಾ ತವಳ್ ಏಕಾ ಕರ್ಕಸ್ ಸ್ವರಾಚಾ ದಾದ್ಲ್ಯಾನ್ ಲಾಯ್ಯ್ನ್ ಘೆತ್ಲ್ಲಿ. ಬಹುಶಾ ರೊಕಿ ಜಾಯ್ಜಾಯಿ. ಅಪ್ಣಾಚಿ ವಳಕ್ ಸಾಂಗ್ಲ್ಲಿ ತರೀ ಆಪ್ತ್ಪಣಾಕ್ ರೊಕಿನ್ ಇಡೆಂ ದೀಂವ್ಕ್ ನಾತ್ಲ್ಲೆಂ.
"ಹಾಂವ್ ಬಿಝಿ ಆಸಾಂ. ಆನ್ಯೇಕ್ ಪಾವ್ಟಿಂ ಉಲೊವ್ಯಾಂ." ಮಣೊನ್ ರೊಕಿನ್ ರಿಸೀವರ್ ಸಕ್ಲಾ ದವರ್ಲ್ಲೆಂ.
ದೋನ್ ದೀಸಾಂ ಉಪ್ರಾಂತ್ ತಾಣೆ ಪರತ್ ಡಯಾಲ್ ಕರ್ತಾನಾ ಬಹುಶಾ ರವಿನ್ ರಿಸೀವರ್ ಕಾಡ್ಲ್ಲೆಂ. ರವಿ ತಾಚಿ ವಳಕ್ ವಿಸ್ರಾಲ್ಲೊ. "ಏಕ್ ಮಿನುಟ್, ಮಾಮ್ಮಿಕ್ ದಿತಾಂ." ಮಣ್ ಗೆಲ್ಲ್ಯಾ ರವಿಚಿ ಖಬರ್ ನಾತ್ಲ್ಲಿ. ಮಾಮ್ಮಿಕ್ ಸಾಂಗೊಂಕ್ ರವಿ ವಿಸ್ರಾಲ್ಲೊ ಜಾಯ್ಜಾಯಿ. ರಾಕೊನ್ ಶಿರಿ ಸುಕೊನ್ ಅಕ್ರೇಕ್ ಅರುಣಾನ್ ಖುಧ್ಧ್ ಲಾಯ್ನ್ ಮೆಕ್ಳಿ ಕೆಲ್ಲಿ.
ದೋನ್ ಹಫ್ತ್ಯಾಂ ಆದಿಂ ಏಕಾ ದನ್ಪರಾಂ ತಾಣೆ ರೊಕಿಚಾ ಘರಾ ಸಂಪರ್ಕ್ ಕೆಲ್ಲೊ. ಏಕಾ ಸ್ತ್ರೀಯೆಚೊ ಪರಿಚಿತ್ ತಾಳೊ. ಖಂಡಿತ್ ಜಾವ್ನ್ ರೂಪಾ.
"ರೂಪಾ ಬಾಯ್.... ಹಾಂವ್ ಅರುಣ್. ಉರ್ವಾಚೊ ಸೆಜಾರಿ." ಅರುಣಾಚೊ ಸಂತೊಸ್ ಸಾಂಗ್ಚೊ ನಯ್. "ಹಾಂವ್... ಮಾಕಾ.... ಹ್ಯಾ ಕುರ್ಲಾ ವಸ್ತಿ ಕರ್ತಾಂ. ಕಶಿಂ ಆಸಾತ್ ತುಮಿ?"
"ಆತಾಂ ಉಲೊಂಕ್ ವೇಳ್ ನಾ ಅರುಣ್. ಹಾಂವೆ ದನ್ಪರಾಂ ನಿದ್ಚೊ ವೇಳ್" ಖಡ್ಪ್ ಜಾಪ್ ರೂಪಾಚಿ.
ರೂಪಾಯಿ ಬದ್ಲಾಲಾಂ? ತೆಂ ಆಶೆಂ ನಾತ್ಲ್ಲೆಂ. ತೆ ಗೊಡ್-ನಾರ್ಲಾಚೆ ಪಾನ್ಪಾಳೆ, ಬನ್ಸ್... ಘುಟಾನ್ ಪಾಶಾರ್ ಕೆಲ್ಲ್ಯೊ ಗಲ್ಫಾಚೊ ವಸ್ತು, ಚೊಕ್ಲೆಟಾಂ, ಪರ್ಫ಼್ಯೂಮ್ಸ್, ಪ್ಯಾಂಟ್ ಪೀಸ್... ಕನ್ನಡಾ ಪಿಕ್ಚರಾಂ....!
ರೂಪಾ ಸರ್ವ್ ವಿಸ್ರಾಲೆಂ?
"ತುಮಿ ಖಂಯ್ಸರ್ ರಾವ್ತಾತ್? ಬೊರಿವ್ಲಿಚೊ ವಿಳಾಸ್? ಲವೀನಾ ಕಶೆಂ ಆಸಾ?..." ಮಣ್ಚಿಂ ಸವಲಾಂ ಘಾಲುಂಕ್ ತೊ ದರ್ವಡ್ಲೊ.
ರೂಪಾನ್ ಆವ್ಕಾಸ್ ದಿಲೊನಾ. ಲಾಯ್ನ್ ತುಟ್ಲ್ಲಿ.
ಆಘಾತ್ ಜಾಲ್ಲೊ ಅರುಣಾಕ್. ನಿರಾಶೆಚಿ ಕೊಡ್ಸಾಣ್ ಕಾಳ್ಜಾಂತ್ ದೆಂವ್ಲ್ಲಿ. ರೊಕಿ ತಾಕಾ ಭೆಟೊಂಕ್ ಆಶೆನಾ ತರ್ ಬೆಜಾರಾಯೆಚೆಂ ಸವಾಲ್ ನಾತ್ಲ್ಲೆಂ. ಪುಣ್ ರೂಪಾ ಥಾವ್ನ್ ಕಿತ್ಯಾಕ್ ಹೊ ತಿರಾಸ್ಕರ್? ರೂಪಾಚಾ ಮಾಯ್ಪಸ್ ಆನಿ ಅಭಿಮಾನಾಚೆರ್ ಮಾನ್ ದೀವ್ನ್ ತೊ ಏಕಾ ಕಾಳಾರ್ ತ್ಯಾ ಘರ್ಚಾ ಗರ್ಜೆಂಕ್ ಪಾವ್ಲ್ಲೊ. ಗರ್ಜ್ ತಿರ್ಸಾಲಿ, ವಯ್ಜ್ ಮೆಲೊ?
ಲವೀನಾ ಲಾಗಿಂ ಸಂಪರ್ಕ್ ಜಾತಾ ಪರ್ಯಾಂತ್ ಅಪ್ಲೆಂ ಪ್ರಯತನ್ ಚಾಲು ದವರುಂಕ್ ತಾಣೆ ಸೊಪುತ್ ಘಾಲ್ಲೊ. ಧೈರ್ ಆರಾವ್ನ್ ಪಾಂಚ್-ಸ ಪಾವ್ಟಿಂ ಲವೀನಾ ಲಾಯ್ನಿರ್ ಯೆತೆಲೆಂ ಮಣ್ ಸಾಂಜೆರ್ ಪಬ್ಲಿಕ್ ಬೂತಾ ಥಾವ್ನ್ ತಾಣೆ ಫೋನ್ ಕೆಲ್ಲೆಂ. ಖೊಟೆಂ ನಶೀಬ್. ಲವೀನಾಚೊ ತಾಳೊ ಆಯ್ಕೊಂಕ್ ಮೆಳ್ಳೊನಾ. ರೊಕಿ ಯಾ ರೂಪಾಚೊ ಸ್ವರ್ ಆಯ್ಕಾತಾನಾ ತಾಣೆ ಉಲಯ್ನಾಸ್ತಾನಾ ರಿಸೀವರ್ ಸಕ್ಲಾ ದವರ್ಲ್ಲೆಂ.
ಆಶೆಂಚ್ ಕೆದೊಳ್ ಪರ್ಯಾಂತ್? ಲವೀನಾನ್ ಭೆಟಾನಾಸ್ತಾನಾ ಮತಿಂತ್ ಆಶಾಂತಿ ರಾಜ್ ಕರ್ತಾಲಿ. ಆಜ್ ದನ್ಪರಾಂ ರೂಪಾ ಲಾಗಿಂ ಸುಟಾವೆಂ ಉಲೊನ್ ಕಿತೆಂಯಿ ಮನಸ್ತಾಪ್ ಆಸಾ ತರ್ ಪುಸುನ್ ಕಾಡುಂಕ್ ತೊ ಆಶೆಲೊ. ದನ್ಪರಾಂ ರೊಕಿ ಅಪ್ಲೆ ರೆಸ್ಟೊರೆಂಟಾಂತ್ ಆಸ್ತೊಲೊ ಮಣ್ ಅರುಣಾಚೆಂ ಚಿಂತಾಪ್.
ಆಜ್ ದನ್ಪರಾಂ ಜೆವ್ಣಾ ಉಪ್ರಾಂತ್ ಅರುಣಾನ್ ಅಪ್ಣೆ ಕಿತೆಂ ಉಲಯ್ಜಾಯಿ ಮಣ್ ತಯಾರಾಯಿ ಕೆಲಿ. ಡಯಾಲ್ ಕರ್ಚಾ ಪಯ್ಲೆಂ ರಿಹರ್ಸಲ್ ಕೆಲೆಂ. ಲವೀನಾ ಪರ್ಯಾಂತ್ ಪಾವೊಂಕ್ ರೂಪಾಚೊ ಖೊಲೊ ಸಾರ್ಕೆ ರೀತಿನ್ ಖೆಳ್ಚೆಂ ಆನಿರ್ವಾಯಿ ಜಾಲ್ಲೆಂ.
ರೂಪಾಚಿ ಲಾಯ್ನ್ ಉಗ್ತೆಂ ಜಾಲಿ.
"ಹಾಂವ್ ಅರುಣ್. ತುಮಿ ಕಶಿಂ ಆಸಾತ್ ಬಾಯೆ?" ಅರುಣಾಚೊ ಸ್ವರ್ ಕಾಂಪ್ಲೊ. " ಧೊಸುಲ್ಲ್ಯಾಕ್ ಮಾಫ್ ಕರ್. ಮಾಕಾ ತುಜೆ ಲಾಗಿಂ ಗರ್ಜೆಚೆಂ ಉಲೊಂಕ್ ಆಸ್ಲ್ಲೆಂ."
"ಕಿತ್ಯಾಕ್ ತವಳ್ ತವಳ್ ಫೋನ್ ಕರ್ನ್ ಆಮ್ಕಾಂ ಧೊಸ್ತಾಯಿ ತುಂ?" ರೂಪಾಚಾ ಉತ್ರಾಂನಿ ದಾಕ್ಷೇಣ್ ನಾತ್ಲ್ಲಿ. "ಆದಿಂ ಗಾಂವಾಂತ್ ತುಜೆ ಆಕರ್ಷಣಾಕ್ ಸಾಂಪ್ಡೊನ್ ಹಾಂವ್ ಕುಡಿಂತ್ ಆನಿ ಮನಾಂತ್ ಜಾಯ್ತೆಂ ಕಷ್ಟಲ್ಯಾಂ. ಜಿಣ್ಯೆಂತ್ ತೊ ನಿರಾಸ್ ಪರತ್ ಆನ್ಭೋಗ್ ಕರ್ಚಿ ಸೊಸ್ಣಿಕಾಯಿ ಮಜೆಲಾಗಿಂ ನಾ. ಮಾಕಾ ತಾಳ್ನೆಂತ್ ಪಡೊಂಕ್ ನಾಕಾ. ದಯಾ ಕರ್ನ್ ಹ್ಯಾ ಫುಡೆಂ ಫೋನ್ ಕರಿನಾಕಾ!"
ಕಿತೆಂಗಿ ಸಾಂಗೊಂಕ್ ತೋಂಡ್ ಉಗ್ತೆಂ ಕೆಲ್ಲ್ಯಾ ಅರುಣಾಚಾ ತೋಂಡಾ ಥಾವ್ನ್ ಉತ್ರಾಂ ನಿಕಾಳ್ಳಿಂನಾಂತ್. ತೊ ಪರಿಸ್ಥಿತಿ ಅರ್ಥ್ ಕರುಂಕ್ ಉಡ್ಡಾಲೊ. ಘುಸ್ಪಡೆಂತ್ ಸಾಸ್ಪಾಲೊ.
ರೂಪಾನ್ ರಿಸೀವರ್ ಸಕ್ಲಾ ಧಾಡಯ್ಲೆಂ.
About us | Feedback | Contact us
Copyright © 2005
DAAIZ.COM All rights reserved.
Page concept, designed and maintained by Ashawadi
Publications
