ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್ ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
’ಜೆದ್ನಾಂ ತುಂ ಹೆರಾಂಚಾ ಬರ್ಯಾಪಣಾವಿಶ್ಯಾಂತ್ ಚಿಂತಾಯ್, ತೆದ್ನಾಂ ತುಜೆಂ ಬರೆಂಪಣ್ ಅಪಾಪಿಂ ಜಾತೆಲೆಂ’ - ಡಯಾನ್ ಡಿ’ಸೋಜ್
ಕೊಂಕ್ಣಿ ಕಾರ್ಭಾರಿ - 23. ಫ್ರಾನ್ಸಿಸ್ ಫೆರ್ನಾಂಡಿಸ್ ಕಾಸ್ಸಿಯಾ
ನಾಂವ್ : ಫ್ರಾನ್ಸಿಸ್ ಫೆರ್ನಾಂಡಿಸ್ ಕಾಸ್ಸಿಯಾ
ಜಲ್ಮಾಲಿ ತಾರಿಕ್ : 14 ಜುಲಾಯ್ 1944
ಜಲ್ಮಾಲ್ಲೊ ಗಾಂವ್ : ಕಾಸ್ಸಿಯಾ
ಆವಯ್ ಬಾಪಾಯ್ಚೆ ನಾಂವ್ : ದೆವಾದೀನ್ ಸಂತಾನ್ ಫೆರ್ನಾಂಡಿಸ್ ಆನಿ ದೆವಾದೀನ್ ಜೋನ್ ಫೆರ್ನಾಂಡಿಸ್
ಶಿಕಾಪ್ : ಹಾಯ್ ಸ್ಕೂಲ್ ಪರ್ಯಾಂತ್ ಭಟ್ಕಳ್ ತ್ಯಾ ನಂತರ್ ಕಾಸ್ಸಿಯಾ ಮಂಗ್ಳುರ್
ಪತಿಣ್ : ಶ್ರೀಮತಿ ಲುವಿಜಾ ಫೆರ್ನಾಂಡಿಸ್ (1968 ಇಸ್ವೆಂತ್ ಕಾಜಾರಿ ಭೆಸಾಂತ್ ಎಕ್ವಟ್ಲಿಂ)
ಭುರ್ಗಿಂ : ಜೋನ್ಸನ್ ಫೆರ್ನಾಂಡಿಸ್ ಅನಿ ಪ್ಲಾವಿಯಾ ಫೆರ್ನಾಂಡಿಸ್
ಬರಯಿಲ್ಲೆ ನಾಟಕ್ : 32 (ಹಾಂತ್ಲೆ 31 ನಾಟಕ್ ಮುಂಬಯ್, ದುಬಾಯ್ ಆನಿ ಮಂಗ್ಳುರಾಂತ್ ಪ್ರದರ್ಶಿತ್ ಜಾಲ್ಯಾತ್)
ನಾಟ್ಕುಳೆ :2 (ಪಿಡೆಸ್ತಾಂಚೊ ಬೊಂಗೊಸ್ತೊಳ್, ಪಾಸ್ಖಾಂಚಿ ಗುಸ್ಪಡ್)
ಕಾದಂಬರಿ :3
ಧುಳಿಂತ್ಲಿಂ ಫುಲಾಂ,
ಮ್ಹಜ್ಯೆ ವಯ್ಲಿ ಕಾಲ್ಸ್ ನಿವಾರ್,
ಕೋಣ್ ಆಯ್ಕಾತಾ ಮ್ಹಜೊ ತಾಳೊ?
ಸನ್ಮಾನ್ : ದೇಶ್ ವಿದೇಶಾಂತ್ 30 ಸಂಸ್ಥ್ಯಾ ಥಾವ್ನ್ ಮಾನ್ ಸಮ್ಮಾನ್
[ಬಾಬ್ ಫ್ರಾನ್ಸಿಸ್ ಫೆರ್ನಾಂಡಿಸಾಸವೆಂ ಸಂವಾದ್ ಕರ್ತಾ ಬಾಯ್ ವಾಯ್ಲೆಟ್ ಜೆ. ಪಿರೇರಾ]
ಕೊಂಕ್ಣೆಂತ್ ಥೊಡೆ ಫಕತ್ತ್ ಸಾಹಿತ್ ಮಾತ್ರ್ ಬರಯ್ತಾತ್, ಆನಿ ಥೊಡೆ ಸಾಹಿತ್ಯ್ ಬರಯ್ತಾತ್ ತಶೆಂಚ್ ಸಾಹಿತ್ಯ್ ಪರ್ಗಟ್ ಕರ್ತಾತ್, ಆನಿ ಕೊಣ್ ಸಾಹಿತ್ಯ್/ನಾಟಕ್ ರಚ್ತಾತ್, ಪರ್ಗಟ್ ಕರ್ತಾತ್/ಖೆಳವ್ನ್ ಧಾಖಯ್ತಾತ್, ತಿತ್ಲೆಂಚ್ ನ್ಹಯ್, ಕೊಂಕ್ಣಿ ವಾವ್ರಾಕ್ ಭಳ್ವಂತ್ ಥೆಂಕೊ ದಿತಾತ್. ಅಶೆಂ ಮ್ಹಣ್ತಾನಾ ಉಟೊನ್ ದಿಸ್ಚೆಂ ನಾಂವ್ ಜಾವ್ನಾಸಾ ಬಾಬ್ ’ಫ್ರಾನ್ಸಿಸ್ ಫೆರ್ನಾಂಡಿಸ್ ಕಾಸ್ಸಿಯಾ’ಚೆಂ. ಭೋವ್ ಕಶ್ಟಾಂನಿ ಆಪ್ಲ್ಯಾ ಭುರ್ಗ್ಯಾಪಣಾಚೆ ದೀಸ್ ಕಾಡ್ನ್ ವ್ಹಡ್ ಜಾಲ್ಲೊ ಹೊ ಕಲಾಕಾರ್, ಕೊಂಕ್ಣೆಚೊ ಮೋಗ್ ಕೆದಿಂಚ್ ಸೊಡ್ನ್ ಧಾಂವ್ಲೊನಾ, ಬಗಾರ್ ಆಪ್ಲ್ಯಾ ತಾಂಕಿಚೊ ವಾವ್ರ್ ಕರ್ತೆಚ್ ರಾವ್ಲೊ. ರಂಗ್ಮಾಂಚಿಯೆರ್ ಚಡೊನ್ ಲೊಕಾಂಕ್ ಹಾಸವ್ನ್, ಹೆರಾಂನಿ ಹಾಸ್ಚೆಂ ಪಳೆವ್ನ್ ಅಪ್ಲೆಂ ದೂಖ್ ವಿಸರ್ಲೊ. ಇತ್ಲೆಂಚ್ ನ್ಹಯ್, ಕೊಂಕ್ಣಿ ಪತ್ರಾಂಕ್ ಪಾಟ್ಲ್ಯಾ ಸಭಾರ್ ವರ್ಸಾಂ ಥಾವ್ನ್ ಭಳ್ವಂತ್ ಆಧಾರ್ ಜಾಲೊ, ಕೊಂಕ್ಣಿ ಸಂಘಟನಾಂಕ್, ಕೊಂಕ್ಣಿ ವಾವ್ರ್ ಕರ್ಚ್ಯಾ ಸರ್ವಾಂಕ್ ಆಪ್ಲ್ಯಾ ತಾಂಕಿಚೊ ಆಧಾರ್ ದೀವ್ನ್ಚ್ ರಾವ್ಲೊ - ಕೆದಿಂಚ್ ’ಕೊಂಕ್ಣೆಕ್ ಆಪ್ಣಾಕ್ ಪಾಟಿಂ ಕಿತೆಂ ದಿಲಾಂ’ ಮ್ಹಳ್ಳೆಂ ಚಿಂತುಂಕ್ ಗೆಲೊನಾ. ತಾಚ್ಯಾ ಹೆಚ್ಚ್ ವ್ಹಡ್ಪಣಾಕ್ ಮಾನ್ ದೀವ್ನ್ ದಾಯ್ಜ್ ಪಂಗಡ್ ತಾಕಾ ಕೊಂಕ್ಣಿ ಕಾರ್ಭಾರಿ ಜಾವ್ನ್ ವಿಂಚ್ತಾ - ಖರೊಚ್ಚ್ ಜಾವ್ನ್ ತಾಕಾ ದಿಂವ್ಚೊ ಹೊ ಮಾನ್, ತಾಚ್ಯಾ ಕೊಂಕ್ಣಿ ಮೊಗಾಕ್.
- ಸಂ
ಸಂವಾದ್ ಚಲವ್ಪಿಣ್: ವಾಯ್ಲೆಟ್ ಜೆ. ಪಿರೇರಾ.
1. ಲೊಕಾಂಕ್ ಹಾಸಂವ್ಚಿ ಕಲಾ ಸಲೀಸಾಯೆಚಿ ನ್ಹಯ್. ತುಮಿಂ ರಂಗ್ಮಾಂಚಿಯೆಂತ್ಲೆ "ಕೊಮೆಡಿ ಕಿಂಗ್" ಜಾವ್ನಾಸ್ತಾಂ ತುಮ್ಕಾಂ ಲೊಕಾಂಕ್ ಹಾಸಂವ್ಚೆಂ ಕಿತ್ಲೆಂ ಸಲೀಸ್?
ಜಾಪ್: ವ್ಹಯ್, ಕೊಮೆಡಿ ಕರ್ಚೆಂ ತಿತ್ಲೆ ಸಲೀಸ್ ನ್ಹಯ್. ಲೋಕ್ ಪಯ್ಶೆ ದೀವ್ನ್ ರಡೊಂಕ್ ಆಶೆನಾ. ತಾಂಕಾಂ ದಾಧೊಸ್ಕಾಯ್ ಆನಿ ಖುಶಾಲಾಯ್ ಜಾಯ್. ದೆಕುನ್ ಹಾಂವ್ ಚಿಂತಾಂ ಲೊಕಾಲಾಗ್ಚೆ ಪಯ್ಶೆ ಘೆವ್ನ್ ತಾಂಕಾಂ ರಡವ್ನ್ ಘರಾ ದಾಡ್ಚ್ಯಾ ಬದ್ಲಾಕ್ ತಾಂಕಾ ಖುಶಿ ಕರ್ನ್ ಹಾಸವ್ನ್ ಘರಾ ದಾಡ್ಚೆಂ ಬರೆಂ ಮ್ಹಳ್ಳಿಂ ಚಿಂತ್ನಾಂ ಮ್ಹಜಿಂ. ಆನಿ ಹಿ ಚಿಂತ್ನಾಂ ಹೆರಾಂಚಾ ದಿಗ್ದರ್ಶನಾ ಮುಖಾಂತ್ರ್ ದುಸ್ರ್ಯಾ ಕಲಾಕಾರಾಂ ಥಂಯ್ ಘಾಲುಂಕ್ ಜಾಯ್ನಾಂ. ತ್ಯಾ ಖಾತಿರ್ ಹಾಂವೆಂ ಮ್ಹಜ್ಯಾ ನಾಟಕಾಕ್ ಮ್ಹಜೆಚ್ಚ್ ಕೊಮೆಡಿ ಪಾತ್ರ್ ಖೆಳೊನ್ ಉದಾಸ್ ಜಾಲ್ಲ್ಯಾ ತೊಂಡಾಂಚೆರ್ ಹಾಸೊ ಹಾಡಂವ್ಚ್ಯೊ. ಆಶೆಂ ಲೋಕ್ ಮ್ಹಜ್ಯಾ ಪಾತ್ರಾ ಥಾವ್ನ್ ದಾಧೊಶಿ ಜಾತಾನಾ ಹಾಂವ್ ಸಂತುಷ್ಟ್ ಜಾತಾಂ.
2. ತುಮಿಂ ರಂಗ್ಮಾಂಚಿಯೆರ್ ಉಲೊಂವ್ಕ್ ಸುರು ಕರ್ತಾಂನಾಂಚ್ಚ್ ಲೋಕ್ ಹಾಸೊಂಕ್ ಲಾಗ್ತಾ. ಹಾಚೊ ಘುಟ್ ಕಸಲೊ?
ಜಾಪ್: ವ್ಹಯ್. ಹಾಂವ್ ಚಿಂತಿನಾಂಗೀ ಲೋಕ್ ಹಾಸ್ತಲೊ ಮ್ಹಣ್, ಲೋಕ್ ಹಾಸ್ತಾನಾ ಮ್ಹಾಕಾ ಖುಶಿ ಜಾತಾ. ತೆದ್ನಾಂ ಮ್ಹಾಕಾ ಭಗ್ತಾ ಹಾಂವೆ ಕೆಲ್ಲಿ ಕೊಮೆಡಿ ಸುಫಳ್ ಜಾಲಿ ಮ್ಹಣ್. ಥೊಡೆ ಪಾವ್ಟಿ ಹಾಂವ್ ಇತ್ಲೆಂ ಫಾಸ್ಟ್ ಉಲಯ್ತಾಂಗೀ ಹಾಂವೆಂ ಉಲಯಿಲ್ಲೆಂ ಪ್ರೇಕ್ಷಕಾಂಕ್ಚ್ಚ್ ನ್ಹಯ್ ಮ್ಹಜ್ಯಾ ಬಾಯ್ಲೆಕ್ಯೀ ಸಮ್ಜಾನಾ. ಜೆದ್ನಾಂ ಲೋಕ್ ಹಾಸಾನಾಂಗೀ ತೆದ್ನಾಂ ಮ್ಹಾಕಾ ಭಗ್ತಾ ಹಾಂವೆ ಕೆಲ್ಲಿ ಕೊಮೆಡಿ ಲೊಕಾಕ್ ಅರ್ಥ್ ಜಾವ್ನಾಂ ಮ್ಹಣ್. ಮ್ಹಜ್ಯಾ ನಟನಾಂತ್ ಮ್ಹಜೊ ಹಾವ್-ಭಾವ್ ಪಳೆಯ್ಲೆಲೆ ಪ್ರೇಕ್ಷಕ್ ಮ್ಹಣ್ತಾತ್; ’ತುಜ್ಯಾ ಉತ್ರಾಂತ್ ತಶೆಂಚ್ಚ್ ನಟನಾಂತ್ ಹಾಸ್ಯ್ ಲಿಪೊನ್ ಆಸಾ’. ಆತಾಂ ಲೊಕಾಂಚ್ಯಾ ಮತಿಂತ್ ರಿಗೊನ್ ಗೆಲಾಂಗೀ ಹಾಂವ್ ಕೊಮೆಡಿ ನಟ್ ಮ್ಹಣ್ ತ್ಯಾ ದೆಕುನ್ ಹಾಂವ್ ಗಂಭೀರ್ ನಟನ್ ಕೆಲ್ಲ್ಯಾಕ್ ಲೋಕ್ ಪಸಂದ್ ಕರ್ಚೊನಾ. ಧಾಖ್ಲೊ ಜಾವ್ನ್ ಮ್ಹಜ್ಯಾ ಬಾಪಾಯ್ಚಾ ಮೊರ್ನಾ ದೀಸ್ ಹಾಂವ್ ರಂಗಮಂಚಾರ್ ಆಸ್ಲ್ಲೊಂ ತ್ಯಾ ಪರಿಸ್ಥಿತೆಂತ್ ಬೊಂಬಯ್ ಥಾವ್ನ್ ಗಾಂವಾಕ್ ಬಾಪಾಯ್ಚಾ ಮೊರ್ನಾಕ್ ಯೇಂವ್ಕ್ ಜಾಲೆಂನಾ. ಬಾಪಾಯ್ ಮ್ಹಜೊ ಆಕಸ್ಮಿಕ್ ಆವ್ಘಡಾಂತ್ ದೆವಾಧೀನ್ ಜಾಲ್ಲೊ ಆನಿಂ ಬೊಂಬಯ್ ತ್ಯಾ ದಿಸಾ ಹಾಂವೆಂ ಮ್ಹಜ್ಯಾ ಸ್ವತಾಚ್ಯಾ ನಾಟಕಾಂತ್ ಪಾತ್ರ್ ಘೆತ್ಲ್ಲೊ. ಆನಿ ತ್ಯಾ ನಾಟಕಾಂತ್ ರಡ್ಚೆಂ ದೃಶ್ಯ್ ಆಸ್ಲ್ಲೆಂ. ತ್ಯಾ ಘಡ್ಯೆ ಹಾಂವ್ ಬಾಪಾಯ್ಚೊ ಉಗ್ಡಾಸ್ ಕಾಡ್ನ್ ಮೊಸ್ತ್ ರಡ್ಲ್ಲೊಂ. ಪುಣ್ ಲೊಕ್ ತಾಳಿಯೊ ಪೆಟುನ್ ನಟನ್ ಭೋವ್ ಬರೆಂ ಜಾಲೆ ಮ್ಹಣ್ ಹಾಸೊಂಕ್ ಲಾಗ್ಲೊ.
3. ತುಮಿಂ ಏಕ್ ಉಧ್ಯಮಿ, ಏಕ್ ಬರವ್ಪಿ, ಏಕ್ ನಟ್ ತಶೆಂಚ್ಚ್ ಏಕ್ ಸಮಾಜ್ ಸೇವಕ್. ಹಾಂತುಂ ಖಂಯ್ಚೆಂ ಕಾಮ್ ತುಮ್ಕಾಂ ಚಡ್ ಸಮಧಾನ್ ಆನಿ ತೃಪ್ತಿ ದಿತಾ?
ಜಾಪ್: ಪಯ್ಲೆಂ ನಟನ್. ದುಸ್ರೆಂ ಸಮಾಜ್ಸೆವಾ. ಕೊಮೆಡಿ ಕಿತ್ಯಾಕ್ಗೀ ಮ್ಹಳ್ಯಾರ್ ಲೋಕ್ ಹಾಚೊ ಉಗ್ಡಾಸ್ ದವರ್ತಾ. ಆನಿಂ ವಾಟೆನ್ ಖಂಯ್ ಭೆಟ್ಲ್ಯಾರ್ ಮ್ಹಾಕಾ ಪಳೆವ್ನ್ ಹಾಸ್ತಾ, ಲೋಕ್ ಹಾಸ್ತಾನಾ ಮ್ಹಾಕಾ ಭಗ್ತಾ ಆನಿಕ್ಯೀ ನಟನ್ ಕರ್ಯಾಂ ಮ್ಹಣ್. ಥೊಡೆ ಮ್ಹಜ್ಯಾ ಸಾದ್ಯಾ ಉತ್ರಾಂಕ್ಂಚ್ಚ್ ಹಾಸ್ತಾತ್ ತೆದ್ನಾಂ ಮ್ಹಾಕಾಚ್ಚ್ ಆಜ್ಯಾಪ್ ಜಾತಾ ಮ್ಹಜ್ಯಾ ಉತ್ರಾಂನಿ ತಸಲೆಂ ಕಿತೆಂ ವ್ಯಂಗ್ಯ್ ಆಸಾ ಮ್ಹಣ್. ಸಮಾಜ್ಸೆವಾ ಆಮಿ ಕರ್ಚಿ ನಾಂವ್ ಜೊಡುಂಕ್ ನ್ಹಯ್. ಪುಣ್ ಥೊಡೆ ಚಿಂತಾತ್ ಫ್ರಾನ್ಸಿಸ್ ಸಮಾಜ್ಸೆವಾ ಕರ್ನ್ ನಾಂವ್ ಜೊಡ್ತಾ ಮ್ಹಣ್. ಮ್ಹಜ್ಯಾಚ್ಚ್ಲಾಗಿಂ ಪೋಶಕ್ಪಣ್ ಘೆತ್ಲ್ಲೆ ಮನಿಸ್ ತೊ ನಾಂವ್ ಜೊಡುಂಕ್ ಕರ್ತಾರೆ ಮ್ಹಣ್ತಾತ್. ಪೋಶಕ್ಪಣ್ ದಿಲ್ಯಾರ್ ಮಾತ್ರ್ ಕಾರ್ಯಾಕ್ ಅಪಯ್ತಾತ್. ನಾಂತರ್ ಕಾರ್ಯೆಂ ಜಾಲ್ಲೆಂಚ್ಚ್ ಕಳ್ನಾ.
4. ಪರ್ಗಾಂವಾಂತ್ ಕೊಂಕ್ಣೆಚೆಂ ವಾರೆಂ ಭರಾನ್ ವ್ಹಾಳೊನ್ ಆಸಾ. ಎಕಾ ಕಾಲಾರ್ ಕೊಂಕ್ಣಿ ಉಲಂವ್ಕ್ ಲಜೆತೆಲೆ ಆಜ್ ಕೊಂಕ್ಣಿ ಉಲಂವ್ಕ್ ಆಶೆತಾತ್. ಹ್ಯಾ ವಿಶಿಂ ತುಮ್ಕಾಂ ಕಿತೆಂ ಭಗ್ತಾ?
ಜಾಪ್: ಘರ್ಚ್ಯಾ ಕಳ್ಯಾಂಕ್ ಫರ್ಮಳ್ ನಾ ಮ್ಹಣ್ತಾತ್. ಹಿಂದೆಂತ್ ಸಾಂಗ್ಚೆ ತರ್ "ಘರ್ಕಿ ಮುರ್ಗಿ ದಾಲ್ ಕಿ ಬರಾಬರ್" ಮ್ಹಣ್ತಾತ್. ಗಾಂವಾಂತ್ ಆಸ್ತಾನಾ ಕೊಂಕ್ಣಿ ಪತ್ರಾಂ ವಾಚುಂಕ್ ಲಜೆಂವ್ಚಿ ಮ್ಹಜಿಂಚ್ಚ್ ಮನ್ಶ್ಯಾಂ ಕೆನಡಾ, ಯು.ಎಸ್.ಎ ತಶೆಂಚ್ಚ್ ಗಲ್ಫಾಕ್ ಪಾವ್ಲ್ಲ್ಯಾ ಉಪ್ರಾಂತ್ ಮ್ಹಾಕಾ ಕೊಂಕ್ಣಿ ಬೂಕ್ ಆಸ್ಲ್ಯಾರ್ ಧಾಡ್ ಮ್ಹಣ್ತಾತ್. ಧಾಖ್ಲೊ ಜಾವ್ನ್ ಕೊಂಕ್ಣಿ ನಾಟಕ್ ಪಳೈನಾತ್ಲ್ಲ್ಯಾ ಮನ್ಶ್ಯಾನಿಂ ಮ್ಹಜ್ಯಾ "ಮಾಲ್ದಿಸಾಂವ್" ನಾಟಕಾಚೊ 3000 ಕೆಸೆಟ್ಯೊ ಯುರೋಪಾಂತ್ ತಶೆಂಚ್ಚ್ ಗಲ್ಫಾಂತ್ ವಿಕ್ಲ್ಯಾತ್. ಆಜ್ ಕಾಲ್ ಗಾಂವಾಂತ್ ಜಾಂವ್ಚ್ಯಾಕೀ ಚಡ್ ಕೊಂಕ್ಣಿ ಕಾರ್ಯಕ್ರಮಾ ಗಲ್ಫಾಂತ್ ಜಾತಾತ್. ವಿಲ್ಫಿ ರೆಬಿಂಬಸಾಚ್ಯಾ ಗಾಂವಾಂತ್ ಜಾಂವ್ಚ್ಯಾ ಕಾರ್ಯಾಕ್ ಹಾಜರ್ ಜಾಯ್ನಾತ್ಲೆಲೆ ಮನಿಸ್, ಕೊಂಕ್ಣೆಚ್ಯಾ ಮೊಗಾನ್ಗೀ ಯಾ ಮಾಂಯ್ಭಾಶೆಚ್ಯಾ ಹುಸ್ಕ್ಯಾನ್ಗೀ ಕೆನಡಾ ತಶೆಂಚ್ಚ್ ಗಲ್ಫಾಂತ್ಲಿ ಸಾಲಾಂ ವಿಲ್ಫಿ ಆಯ್ಲೊ ಮ್ಹಣ್ತಾನಾ ಭರ್ತಾತ್. ಹ್ಯಾ ದಿಶೆನ್ ಸಾಂಗ್ಚೆಂ ತರ್ ಕೊಂಕ್ಣೆಕ್ ಗಾಂವ್ಚ್ಯಾಕೀ ಚಡ್ ಮಾನ್ ಗಲ್ಫಾಂತ್ ಆಸಾ. ಮ್ಹಜ್ಯಾ ಕೊಮೆಡಿ ಭಾಶೆನ್ ಸಾಂಗ್ಚೆ ತರ್ "ಘರ್ವಾಲಿ ಸೆ ಬಾಜುವಾಲಿ ಆಚ್ಚಿ ಹೆ"
5. ಆಮ್ಚೆ ಚಡಾವತ್ ಮುಖೆಲಿ ಎಕ್ವಟಿತ್ ಥರಾನ್ ಕೊಂಕ್ಣಿ ಸಮಾಜ್ ಬಾಂಧುನ್ ಹಾಡುಂಕ್ ಸಲ್ವತಾತ್. ಹಾಕಾ ಕಾರಾಣ್ ಕಸಲೆಂ?
ಜಾಪ್: ಹಾಚೆಂ ಕಾರಾಣ್ ಹಾಂವ್ ಕಾಂಯ್ ಚಡಿತ್ ಸಾಂಗಿನಾ. ಕಚ್ಚಾಟ್ ಸಗ್ಳ್ಯಾಂನಿ ಆಸಾ. ಹರ್ಯೆಕ್ಲೊ ಹುದ್ದ್ಯಾಕ್ ಆಶೆತಾ, ನಾಂವಾಕ್ ಆಶೆತಾ. ಹಾಂವೆ ಸಾಂಗ್ಚೆ ತರ್ ಸೊಮಿ ಜೆಜು ಕ್ರಿಸ್ತಾಕ್ ಧರ್ಲ್ಲೆ ತೆದಾಳಾ ಅಪೊಸ್ತಲಾಂಚೊ ಎಕ್ವಟ್ ತುಟೊನ್ ಕಶೆ ಪಡ್ಲ್ಲೊಗೀ ತಶೆಂಚ್ಚ್ ಆಜ್ ಪರ್ಯಾಂತ್ ಆಮಿ ಶಿಂಪ್ಡೊನ್ ಆಸಾಂವ್. ಆಮಿ ಆನಿ ಎಕ್ವಟ್ ಜಾಯ್ಜೆ ತರ್ ಸೊಮಿ ಜೆಜು ಕ್ರಿಸ್ತಾಕ್ ಹ್ಯಾ ಸಂಸಾರಿಂ ಯೇವ್ನ್ ತಾಚ್ಯಾ ಅಪೊಸ್ತಾಲಾಂಚೊ ಎಕ್ವಟ್ ಕರಿಜೆ ಕೊಣ್ಣಾ.
6. ಕೊಂಕ್ಣಿ ಸಮಾಜ್ ಏಕ್ ಭಳ್ವಂತ್ ಸಮಾಜ್ ಕರ್ನ್ ಬಾಂಧುನ್ ಹಾಡುಂಕ್ ಕಸಲೊ ವಾವ್ರ್ ಗರ್ಜೆಚೊ?
ಜಾಪ್: ಹೆಂ ಮ್ಹಾಕಾ ಆಸಾಧ್ಯ್ ಮ್ಹಣ್ ದಿಸ್ತಾ, ಪುಣ್ ಸರ್ವ್ ಫಿರ್ಗಜ್ಯೊ ಕೊಂಕ್ಣಿ ಬೊಂದೆರಾಖಾಲ್ ಯೇವ್ನ್ ಸಾಂಗಾತಾ ಮೆಳೊಂಕ್ ಕಾಂಯ್ ಧೋರಣ್ ಕರ್ತಿತ್ ತರ್ ಆನಿಂ ಬರೆಂ ಮೇಟ್ ಕಾಡ್ತಾನಾ ಸಕ್ಕಡ್ ಸಾಂಗಾತ್ ದಿತಿತ್ ತರ್ ಆಮ್ಕಾ ಏಕ್ ಜಾವ್ಯೆತ್ ಮ್ಹಣ್ ಭಗ್ತಾ. ಆಮಿ ಎಕ್ವಟ್ ಬಾಂಧುನ್ ಹಾಡುಂಕ್ ರಂಗಮಂಚಾಚಿ ಕಾರ್ಯಿಂ ವಾ ನಾಟಕ್ಚ್ಚ್ ಕರಿಜಾಯ್ ಮ್ಹಣ್ ನಾ. ಜಾಯ್ತಿಂ ಹೆರ್ ಕಾರ್ಯಿಂ ಮಾಂಡುನ್ ಹಾಡ್ಯೆತ್. ಆಶೆಂ ಕರ್ತಾನಾ ತುಜಿ ಫಿರ್ಗಜ್, ಮ್ಹಜಿ ಫಿರ್ಗಜ್ ಮ್ಹಣ್ ಚಿಂತಿನಾಸ್ತಾ ಸರ್ವ್ ಎಕಾ ದಿಯೆಸಿಜಿಚೆ ಆನಿ ಆಮಿ ಸರ್ವ್ ಮಂಗ್ಳುರ್ಗಾರ್ ಮ್ಹಳ್ಳೆಂ ಮತಿತ್ಂತ್ ದವರ್ಲ್ಯಾರ್ ಭೋವ್ ಬರೆಂ.
7. ಕೊಂಕ್ಣಿ ಸಮಾಜೆಂತ್ ಕಿತೆಂಯ್ ಬರೆಂ ಕರ್ತೆಲೆ ಆಸ್ಲ್ಯಾರ್ ತಾಂಚೆ ಪಾಂಯ್ ವೋಡ್ನ್ ಸಕ್ಲಾ ಘಾಲ್ಚೆ ಸಭಾರ್ ಆಸಾತ್. ಹ್ಯಾ ವಿಶಿಂ ತುಮ್ಚಿ ಅಭಿಪ್ರಾಯ್ ಕಸಲಿ?
ಜಾಪ್: ಎಕಾ ಉತ್ರಾನ್ ಸಾಂಗ್ಚೆ ತರ್ ಮೊಸೊರ್ ಮ್ಹಣ್ಯೆತ್. ಎಕ್ಲ್ಯಾನ್ ಕೆಲ್ಲೆಂ ಆನ್ಯೆಕ್ಲ್ಯಾಕ್ ಪಳೆಂವ್ಕ್ ಜಾಯ್ನಾ. ತಾಚೆ ವರ್ನಿ ಹಾಂವೆ ಮುಕಾರ್ ವಸಾಜೆ, ಮ್ಹಜೆ ವರ್ನಿ ತಾಣೆಂ ಪಾಟಿಂ ಪಡಾಜೆ ಮ್ಹಳ್ಳೊ ಸ್ಮರ್ಧಾತ್ಮಕ್ ಧ್ಯೇಯ್ ಆಸ್ತಾ ಮ್ಹಣಾಸರ್ ಹೆಂ ಆಸಾಧ್ಯ್. ನಿಜಾಯ್ಕಿ ಆಮಿ ಕ್ರೀಸ್ತಾಂವಾಂ ಚಡ್ ಜಾವ್ನ್ ಭಿತರ್ಲ್ಯಾನ್ ಕುಸ್ತಾಂವ್.
8. ತುಮ್ಕಾಂ ಹಾಸ್ಯ್ಮಯ್/ವ್ಯಂಗ್ಯ್ ನಾಟಕ್ ಬರಂವ್ಕ್ ಕಶೆಂ ಮನ್ ಜಾಲೆಂ?
ಜಾಪ್: ಚಡ್ತಾವ್ ಮ್ಹಜ್ಯಾ ನಾಟಕಾಂತ್ ವ್ಯಂಗ್ಯ್ ಆನಿಂ ಸಾಮಾಜಿಕ್ ಜೀವನ್ ಆಸ್ತಾ. ರಡ್ತಾಂ ರಡ್ತಾಂ ರಡೊನ್ಂಚ್ಚ್ ವೆಚೆಂ ನ್ಹಯ್, ಇಲ್ಲೆಂ ಹಾಸಯಾಂ ಮ್ಹಣ್ ಭಗ್ತಾ. ತ್ಯಾ ಖಾತಿರ್ ಲೊಕಾಚಿಂ ಉದಾಸ್ ಜಾಲ್ಲಿ ತೊಂಡಾಂ ಹಾಸ್ಯಮಯ್ ಕರ್ಚೆಖಾತಿರ್ ಹಾಂವೆಂ ಹೊ ವಿಷಯ್ ವಿಂಚ್ಲಾ. ಆನಿಂ ಜಾಯಿತ್ತ್ಯಾನಿ ಮ್ಹಾಕಾ ಮ್ಹಳಾಂ "ತುವೆಂ ಆಮ್ಕಾಂ ರಡಂವ್ಚೆಂ ಸೊಡ್ನ್ ಇಲ್ಲೆಂ ಹಾಸಯ್, ತುಜೆ ಮುಕಾರ್ ರಾವೊನ್ ಘರ್ಚಿ ಬೆಜಾರಾಯ್ ತರೀ ಪಯ್ಸ್ ಕರ್ತಾಂವ್". ಮ್ಹಜ್ಯಾ ರಗ್ತಾಂತ್ ಕೊಮೆಡಿ ಆಸ್ಲ್ಲಿ. ಮ್ಹಜೆಂ ಉಲವ್ಣೆಂ, ಮ್ಹಜೆಂ ನಡ್ತೆಂ ಪಳೆವ್ನ್ ಇಸ್ಕೊಲಾಂತ್ ಜಾಯಿತ್ತ್ಯಾ ಕಾರ್ಯಕ್ರಮಾಂನಿ ಕೊಮೆಡಿಚೆ ಪಾತ್ರ್ ದಿತಾಲೆ. ಮ್ಹಜ್ಯಾ ಇಸ್ಕೊಲಾಚ್ಯಾ ಜಿಣ್ಯೆಂತ್ ಸಗ್ಳ್ಯಾ ಇಸ್ಕೊಲಾಚೆ ಭುರ್ಗೆ ಮ್ಹಾಕಾ ಪಳೆವ್ನ್ ಹಾಸೊಂನ್ಚ್ಚ್ ಆಸ್ತಾಲೆ. ಆನಿ ಜೋಕರ್, ಕಾರ್ಟುನ್ ಮ್ಹಣ್ ಉಲೊ ಕರ್ತಾಲೆ. ಮಾರ್ಗಾರ್ ಚಲ್ತಾನಾ ಗಂಭೀರ್ ಆಸ್ಲ್ಯಾರ್ ಕೊಣೀ ಲೆಕಿನಾತ್ಲ್ಲೆ. ಪುಣ್ ಮ್ಹಾಕಾ ಪಳೆವ್ನ್ ಹಾಸ್ತಾಲೆ. ಆಶೆಂ ಮ್ಹಾಕಾ ಭಗ್ಲೆಂಕೀ ಕೊಮೆಡಿಂತ್ ಫುಡಾರ್ ಆಸಾ. ಆಶೆಂ ಹಾಂವೆ ಕೊಮೆಡಿಚ್ಚ್ ಬರಂಚ್ಕ್ ಸುರು ಕೆಲೆ.
9. ಕೊಂಕ್ಣಿ ಸಂಸರಾಂತ್ ಪತ್ರಿಕೋದ್ಯಮಾಚೊ ಮಹತ್ವ್ ಕಸಲೊ? ಆಜ್ಕಾಲ್ ಪತ್ರಿಕೋಧ್ಯಾಚಿ ದಿಶಾ ಖಂಚೆ ತೆವ್ಶಿನ್ ಆಸಾ?
ಜಾಪ್: ಪತ್ರಿಕೋಧ್ಯಮ್ ಮ್ಹಳ್ಯಾರ್ ಏಕ್ ಧಂದೊ ಮ್ಹಣ್ ಆಮಿ ಲೆಕ್ಚೆ ನ್ಹಯ್. ಹಾಂತುಂ ಸಂಪಾದಕಾಚೊ ವಾ ನಿರ್ಮಾಪಕಾಚೊ ಧ್ಯೇಯ್ ಆಸಾ ಜಾವ್ಯೆತ್. ಪುಣ್ ಆಮ್ಕಾಂ ಉದಯವಾಣಿ ಆನಿ ಟೈಮ್ಸ್ ಆಫ್ ಇಂಡಿಯಾಬರಿಂ ಜಾಂವ್ಕ್ ಜಾಂವ್ಚೆಂ ನಾ. ಕಿತ್ಯಾಕ್ ತಾಂಚಿ ಸಮಾಜ್ ವ್ಹಡ್ಲಿ ಆಸಾ. ಆನಿಂ ವಾಚ್ತೆಲೆ ಸಭಾರ್ ಆಸಾತ್. ಆಮ್ಚೆ ದಿಯೆಸಿಜಿಚ್ಯಾ ತೀನ್ ಲ್ಹಾಕ್ ಕೊಂಕ್ಣಿ ಉಲೊಂವ್ಚಾ ಲೊಕಾಂ ಮಧೆಂ ತೀನ್ ಹಜಾರ್ ಲೋಕ್ ಸಯ್ತ್ ಕೊಂಕ್ಣಿ ಪತ್ರಾಂ ವಾಚಿನಾಂತ್. ಆಮ್ಚಾ ದಿಯೆಸಿಜಿನ್ ಮನ್ ಕೆಲ್ಲೆಂ ತರ್, ಸಗ್ಳ್ಯಾ ಫಿರ್ಗಜೆಂತ್ ತಶೆಂಚ್ಚ್ ಘರಾಂ ಘರಾಂನಿ ರಾಕ್ಣೊ ದಿಸಾಳೊ ಕರ್ನ್ ದಿವ್ಯೆತೊ ಆಸ್ಲ್ಲೊ. ಆನಿ ಹೆಂ ಸುಚನ್ ಹಾಂವೆಂ ದಿಲ್ಲೆಂ ತರ್ಯೀ ನಿರ್ಫಳ್. ಹಾಂವೆ 3000 ವರ್ಗಣಿ ಎಕಾ ವರ್ಸಾಕ್ ಸಯ್ತ್ ಭಾಸಯಿಲ್ಲಿ. ಹಿ ಮ್ಹಜಿ ಆಲೋಚನ್ ಖಡ್ಪಾಚೆರ್ ವೊತ್ಲ್ಲ್ಯಾ ಉದ್ಕಾಬರಿಂ ಜಾಲಿ. ಜನವಾಹಿನಿ ಕಾಡ್ನ್ ಜಾಯ್ತ್ಯಾ ಲೊಕಾಕ್ ಬುಡಂವ್ಚಿ ಗರ್ಜ್ ನಾತ್ಲ್ಲಿ.
10. ತುಮ್ಚ್ಯಾ ಜಿಣ್ಯೆಂತ್ ತುಮ್ಚ್ಯಾ ಹ್ಯಾ ಸಾಧನಾನ್ ಕೊಂಕ್ಣಿ ಶೆತಾಂತ್ ಬರೆಂ ನಾಂವ್ ತುಮಿ ಜೊಡ್ಲಾಂ. ತುಮ್ಚ್ಚಾ ಜಿಣ್ಯೆಚೊ ಪ್ರಮುಖ್ ಉದ್ದೇಶ್ ಕಸಲೊ? ಆನಿ ಮುಕಾರಿಂ ಕಿತೆಂ ಆಶೆತಾತ್?
ಜಾಪ್: ಮ್ಹಜ್ಯಾ ಜಿಣ್ಯೆಚೊ ಮುಖ್ಯ್ ಉದ್ದೇಶ್ ಜಾವ್ನಾಸ್ಲ್ಲೊ ಹ್ಯಾ ಸಮಾಜೆಂತ್ ವಾ ಕಲಾಕಾರಾಂ ಮಧೆಂ ಏಕ್ ಬರೆಂ ನಾಂವ್ ಜೊಡ್ನ್ ಹೊ ಸಂಸಾರ್ ಸಾಂಡ್ಯಾಂ ಮ್ಹಣ್. ಜಿಯೆಂವ್ಕ್ ಸಗ್ಳೆ ಜಿಯೆತಾತ್. ಮುಕಾರ್ಯೀ ಸಮಾಜೆಕ್ ಬರೆಂ ಲಿಸಾಂವಾಭರಿತ್ ನಾಟಕ್, ಕೊಂಕ್ಣಿ ಕಲೆಚಿ ಸೆವಾ, ಉದೆವ್ನ್ ಯೆಂವ್ಚ್ಯಾ ತರ್ನ್ಯಾ ಕಲಾಕರಾಂಕ್ ಪ್ರೋತ್ಸಾಹ್ ಆನಿಂ ಮೊರೊನ್ ಯೆಂವ್ಚ್ಯಾ ಕೊಂಕ್ಣೆಕ್, ಸಾಲಾಂ ಥಾವ್ನ್ ಕುಜ್ನಾಕ್ ಗೆಲ್ಲ್ಯಾ ಆಮ್ಚಾ ಕೊಂಕ್ಣಿ ಭಾಶೆಕ್ ಪರತ್ ಅಂಗ್ಣಾಂತ್ ಹಾಡ್ನ್ ನಾಚಯಾಂ ಮ್ಹಳ್ಳಿ ಆಶಾ.
11. ತುಮ್ಚಾ ಜಿಣ್ಯೆಂತ್ ಆಜೂನ್ಯೀ ಉಡಾಸಾಂತ್ ಉರ್ಚೆಂ ಖಂಚೆಂಯೀ ಘಡಿತ್ ಸಾಂಗೊಂಕ್ ಆಶೆತಾತ್?
ಜಾಪ್: ವ್ಹಯ್, ಹಾಂವೆ ಸಾಸ್ಣಾಕ್ ವಿಸ್ರೊಂಕ್ ಸಕನಾತ್ಲ್ಲೆ ಘಡಿತ್ ತೆಂ. ಮ್ಹಜ್ಯಾ ಎಕ್ಕೀಸಾವ್ಯಾ ನಾಟಕಾದಿಸಾ ಮ್ಹಜೊ ಬಾಪಯ್ ದೆವಾದೀನ್ ಜಾಲೊ. ಬೊಂಬಯ್ ಥಾವ್ನ್ ಕೊಡ್ಯಾಳ್ ಯೇಂವ್ಕ್ ಮ್ಹಾಕಾ ತಾಂಕ್ ನಾತ್ಲ್ಲಿ. ಬೊಂಬಯ್ಚಾ ಸೈಂಟ್ ಮೆರೀಸ್ ರಂಗಮಂಚಾರ್ ಮ್ಹಜೊ ನಾಟಕ್ ಪ್ರದರ್ಶನ್ ಆಸ್ಲ್ಲೊ. ಆನಿ ಬಾಪಾಯ್ಚಿ ಕೂಡ್ ಗಾಂವಾಂತ್ ಪೆಟೆಂತ್ ನಿದಾಯಿಲ್ಲಿ. ನಾಟಕ್ ಸಾಂಜೆಚಾ ಸ ವೊರಾರ್ ಆಸ್ಲ್ಲೊ ಅನಿ ಮ್ಹಜ್ಯಾ ಬಾಪಾಯ್ಕ್ ಸ ವೊರಾರ್ ನಿಕೆಪುಂಕ್ ವೇಳ್ ನಿರ್ದಾರ್ ಕೆಲ್ಲೊ. ಆನಿ ತ್ಯಾ ವೆಳಾ ಹಾಂವೆ ರಂಗಮಂಚಾರ್ ಎಕಾ ಕೊನ್ಶ್ಯಾಕ್ ರಾವೊನ್ ಮ್ಹಜ್ಯಾ ಬಾಪಾಯ್ಚ್ಯಾ ಆತ್ಮ್ಯಾಕ್ ಶಾಂತಿ ಮಾಗೊನ್ ಅಂತಿಮ್ ವಿದಾಯ್ ಕೆಲೊ. ಹೆಂ ಹಾಂವ್ ಕೆದಿಂಕ್ಚ್ಚ್ ವಿಸ್ರೊಂವ್ಚೊನಾ, ಆನಿ ವಿಸ್ರೊಂಕ್ ಮ್ಹಜ್ಯಾನ್ ಆಸಾಧ್ಯ್. ಆಸಲೆ ಘಡಿತ್ ಮ್ಹಜ್ಯಾ ಜಿಣ್ಯೆಂತ್ ಘಡ್ಚೆಂಯ್ ನಾ.
12. ಕೊಂಕ್ಣೆಂತ್ ಕುವೇಯ್ಟ್ಚಿ ಕೊಂಕ್ಣಿ, ಗೊಂಯ್ಚಿ ಕೊಂಕ್ಣಿ ಆನಿಂ ದುಬಾಯ್ಚಿ ಕೊಂಕ್ಣಿ ಮ್ಹಣ್ ವೆವೆಗ್ಳೆ ಪ್ರಕಾರ್ ಆಸಾತ್ಗೀ?
ಜಾಪ್: ನಾ, ಎಕಾ ಆವಯ್ಕ್ ತಿಚ್ಯಾ ಭುರ್ಗ್ಯಾ ಮಧೆಂ ಭೇದ್ ನಾ. ತಿಕಾ ಸಗ್ಳಿಂ ಭುರ್ಗಿಂ ಏಕ್ಚ್ಚ್. ಕೊಂಕ್ಣಿ ಭಾಸ್ ಕುವೇಯ್ಟ್, ದುಬಾಯ್ ವಾ ಕೆನಡಾಚಿ ನ್ಹಯ್. ತಿ ಆಮ್ಚಿ ಮಾಂಯ್ಭಾಸ್ ಕೊಂಕ್ಣಿ ಶಿರೂರ್ಚಾ ಗಡಿ ಥಾವ್ನ್ ಉಳ್ಳಾಲ್ಚ್ಯಾ ತಡಿ ಪರ್ಯಾಂತ್ ವಿಸ್ತಾರ್ಲ್ಯಾ. ಶಿಂಪಡ್ಲ್ಲಿಂ ಭುರ್ಗಿಂ ಅಪ್ಲ್ಯಾ ಫಾಯ್ದ್ಯಾಕ್ ಕಿತ್ಲೆಂಯೀ ವಾಂಟೆ ಕರುಂದಿತ್, ಪುಣ್ ಆವಯ್ ತಿ ಆವಯ್. ಕೊಂಕ್ಣಿ ತಿ ಕೊಂಕ್ಣಿ.
13. ತುಮಿಂ ಚಡ್ತಾವ್ ಜಾವ್ನ್ ಹರ್ಯೇಕಾ ಕೊಂಕ್ಣಿ ಕಾರ್ಯಾಂಕ್ ಪೋಷಕ್ ಜಾವ್ನ್ ಮುಕಾರ್ ಆಯ್ಲ್ಯಾತ್ ತರೀ ತುಮಿ ನಾಂವ್ ಜೊಡುಂಕ್ ಕರ್ತಾ ಮ್ಹಣ್ತಾನಾ ತುಮ್ಕಾಂ ಕಿತೆಂ ಭಗ್ತಾ?
ಜಾಪ್: ಹಾಂವೆ ಜಾಯಿತ್ತ್ಯಾಂಕ್ ದಾನ್ ದಿಲಾ. ಆನಿಂ ಪೋಶಕ್ ಜಾಲಾ, ದುಬ್ಳ್ಯಾಂಕ್ ಕುಮಕ್ ದಿಲ್ಯಾ. ಹೆಂ ನಾಂವ್ ಜೊಡುಂಕ್ ನ್ಹಯ್ ಬಗಾರ್ ಲ್ಹಾನ್ಪಣಾರ್ ಕಾಡ್ಲ್ಲೆ ಕಷ್ಟ್ ಚಿಂತುನ್ ಹಾಂವೆಂ ತೆಂ ದಾನ್ ದಿಲಾಂ. ನೆಂಟೊ ಆಸ್ತಾನಾ ಪಾಂಗ್ರುಕ್ ವೋಲ್ ನಾತ್ಲ್ಲ್ಯಾ ಮಾಕಾ ಆಜ್ ತೀಸ್ ಸಂಸ್ಥಾನಿ ತೀಸ್ ಶೊಲಾಂ ಪಾಂಗ್ರುನ್ ಮಾನಾಚ್ಯೊ ವೊಲಿ (ಶಾಲಾಂ) ದಿಲ್ಯಾತ್. ತರೀ ಪುಣ್ ಲೊಕಾಂನಿ "ಹೊ ನಾಂವಾ ಖಾತಿರ್ ಕರ್ತಾ" ಮ್ಹಣ್ತಾನಾ ಮ್ಹಾಕಾ ದುಕ್ತಾ. ಹಾಂವ್ ಕುಮೊಕ್ ಮಾಗ್ಲ್ಲ್ಯಾಂಕ್ ಮ್ಹಜ್ಯಾ ತಾಂಕಿ ಭಿತರ್ಲಿ ಕುಮೊಕ್ ದಿತಾಂ. ದೀನಾತ್ಲ್ಲ್ಯಾ ವೆಳಾರ್ ಹಾಂವೆಂ ಕುಮೊಕ್ ದೀವ್ನಾ ಮ್ಹಣ್ ಥೊಡ್ಯಾ ಕಾರ್ಯಾಂಕ್ ಮ್ಹಾಕಾ ಆಪವ್ಣೆಂ ದೀನಾಂತ್. ದೆಕುನ್ "ಮಾತಾರೊ ಚರ್ಬೆಲಾ" ಮ್ಹಳ್ಳೊ ನಾಟಕ್ ಜಾಲ್ಯಾ ಉಪ್ರಾಂತ್ ಆನ್ಯೇಕ್ ನಾಟಕ್ ಬರಂವ್ಕ್ ಚಿಂತ್ಲಾ. ತೊ ಜಾವ್ನಾಸಾ "ದಿತೆಲ್ಯಾಂಕ್ ಲಜ್ ದಿಸ್ತಾ, ಮಾಗ್ತೆಲ್ಯಾಕ್ ಲಜ್ ನಾ".
14. ದಾಯ್ಜ್ ಡೊಟ್ ಕೊಮಾಕ್ ತುಮಿ ಭೆಟ್ ದಿಲ್ಯಾಗೀ? ಹ್ಯಾ ವೆಬ್ ಅಂತರ್ಜಾಳಿಕ್ ತುಮ್ಚಿ ಸಲ್ಹಾ-ಸುಚನಾಂ ಕಸಲಿಂ?
ಜಾಪ್: ವ್ಹಯ್, ದಾಯ್ಜ್ ಏಕ್ ಕೊಂಕ್ಣೆಕ್ ಸಮರ್ಪುನ್ ದಿಲ್ಲಿ ವೆಬ್ ಸಾಯ್ಟ್ ಜಾವ್ನಾಸಾ. ಹಾಚೆ ಮುಖಾಂತ್ರ್ ಕೊಂಕ್ಣೆಚೊ ಖರೊ ವಾವ್ರ್ ಚಲೊನ್ ಆಸಾ. ಹಿಂ ವೆಬ್ಸಾಯ್ಟ್ ಆನಿಕೀ ಚಡ್ ಕೊಂಕ್ಣೆಚೊ ವಾವ್ರ್ ಕರುಂ, ಸರ್ವ್ ವೆಬ್ಸಾಯ್ಟಾಚ್ಯಾಂನಿ ವರ್ಸಾಕ್ ಏಕ್ ಪಾವ್ಟಿಂ ತರ್ಯೀ ಸಾಂಗಾತಾ ಮೆಳೊನ್ ವಿಚಾರ್ ವಿನಿಮಯ್ ಅದಲ್-ಬದಲ್ ಕರ್ನ್ ಎಕ್ವಟ್ ಬಾಂಧುನ್ ಹಾಡುಂಕ್ ಪ್ರಯತನ್ ಕೆಲ್ಯಾರ್ ಕೊಂಕ್ಣೆಚ್ಯ ನದ್ರೆನ್ ಭೋವ್ ಬರೆಂ.
15. ದೇವ್ ಬರೆಂ ಕರುಂ ತುಮ್ಕಾಂ ಫ್ರಾನ್ಸಿಸಾಬಾ ತುಮ್ಚೊ ಆಮೊಲಿಕ್ ವೇಳ್ ಮ್ಹಜೆ ಸವೆಂ ಸಂದರ್ಶನಾಂತ್ ಖರ್ಚಿಲ್ಲ್ಯಾಕ್.
ಜಾಪ್: ತುಕಾಯ್ ದೇವ್ ಬರೆಂ ಕರುಂ ವಾಯ್ಲೆಟ್. ಇತ್ಲ್ಯಾ ಪಯ್ಸ್ ಥಾವ್ನ್ ಯೇವ್ನ್ ಮ್ಹಜೆಂ ಸಂದರ್ಶನ್ ಘೆತ್ಲ್ಲ್ಯಾಕ್. ತುಕಾ ಸರ್ವ್ ಬರೆಂ ಮಾಗ್ತಾಂ.
ಹ್ಯಾ ಆಧ್ಲೆ ಕಾರ್ಭಾರಿ: 1, 2, 3, 4, 5, 6, 7, 8, 9, 10, 11, 12, 13, 14, 15, 16, 17, 18, 19, 20, 21, 22
About us | Feedback | Contact us
Copyright ©
2005 DAAIZ.COM All rights reserved.
Page concept, designed and maintained by Ashawadi Publications
