ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್ ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಕಥಾದಾಯ್ಜ್ - 15
ಮಿಕ್ಮ್ಯಾಕ್ಸ್
ಶನಿ
ನಾಂವ್: ಮೈಕಲ್ ಮ್ಯಾಕ್ಸಿಮ್ ಡಿ’ಸೋಜ್
ಲಿಖ್ಣೆ ನಾಂವಾಂ: ಮಿಕ್ಮ್ಯಾಕ್ಸ್, ಮೂಡ ಮಿಂಗೆಲಿ.
ಜನನ್: 13 ಎಪ್ರಿಲ್ 1950.
ಜಲ್ಮಾಲ್ಲೊ ಗಾಂವ್: ಇಜಯ್.
ಆವಯ್-ಬಾಪಾಯ್ಚೆಂ ನಾಂವ್: ಪಾವ್ಲ್ ಸೋಜ್ ಆನಿ ಫ್ಲೋರಿನ್ ಸೋಜ್.
ಪತಿಣ್: ಜೋಯ್ಸ್ ಡಿ’ಸೋಜ್.
ಮರಣ್: 24 ಎಪ್ರಿಲ್ 2006.
ಮಿಕ್ಮ್ಯಾಕ್ಸಾನ್ ಕಂಗಾಲ್ ಆನಿ ತಾಚಿ ಕುಕ್ಕೆಹಳ್ಳಿ ಬುಕಾಕ್ ಬರಯಿಲ್ಲೆಂ ಪ್ರಸ್ತಾವನ್
ವಳೊಕ್:
ಕಾದಂಬರ್ಯೊ:
ಮ್ಹಜಿ ವಾಟ್ ಮ್ಹಾಕಾ (1984, ಪುನವ್ ಪ್ರಕಾಶನ್)
ಎಕ್ಲ್ಯಾಕ್ ರಚ್ಲೊ ವಾಟೆರ್ ಸೊಡ್ಲೊ (1986, ಪುನವ್ ಪ್ರಕಾಶನ್)
ಭೃಮಿದ್ (1980, ರಾಕ್ಣೊ ಪ್ರಕಾಶನ್)
ನಾಟಕ್ ಆನಿ
ನಾಟ್ಕುಳೆ:
ತೀನ್ ತಿಯಾತ್ರ್ (2001, ಹವ್ಯಾಸಿ ಕೊಂಕಣಿ ರಂಗ್ಭೂಮಿ)ಮಟ್ವ್ಯಾ
ಕಾಣ್ಯಾಂಚೆ ಬೂಕ್:
ಶನಿ (1981)
ಬ್ರಾಹ್ಮಣ್ (2002,
ಮಾಸ್ಟರ್ ಮೀಡಿಯಾ ಪ್ರಕಾಶನ್)
ಲೇಖನಾಂ: 50 ವಯ್ರ್
ಆಪ್ಣಾಯಿಲ್ಲ್ಯೊ
ಪ್ರಶಸ್ತ್ಯೊ:
1.’ಕರ್ನಾಟಕ್ ಕೊಂಕ್ಣಿ ಸಾಹಿತ್ಯ್
ಅಕಾಡೆಮಿ ಪ್ರಶಸ್ಥಿ’
2.’ಕೊಂಕ್ಣಿ
ಕುಟಾಮ್ ಪ್ರಶಸ್ಥಿ’.
ಚಿಂತಾಪ್:
ಮಿಕ್ಮ್ಯಾಕ್ಸ್ ಸಂಯ್ಬಾನ್ ನಾಟಕಿಸ್ತ್, ಕಾಣ್ಯೆಗಾರ್ ಆನಿ ಮ್ಹಜೆಪ್ರಕಾರ್ ದಾವ್ಯಾಪಂಗೀಯ್ (ಲೆಫ್ಟಿಸ್ಟ್). ತಾಂಲೆಂತಾಚೊ ಪುಂಜೊ ತಾಚೆಲಾಗಿಂ ಆಸ್ಲೊ ಮ್ಹಣ್ ಆಯ್ಕಲಾಂ, ನಟನ್, ಕಾರ್ಯೆಂ ನಿರ್ವಾಹಣ್, ಉಲವ್ಕ್, ವಿಮರ್ಸೊ, ಲೇಖನ್, ಕವಿತಾ, ನಾಟಕ್ ಅಶೆಂ ಸಭಾರ್ ಪ್ರಕಾರಾಂನಿ ಹಾಣೆಂ ಪ್ರಯೋಗ್ ಕೆಲ್ಯಾತ್ ಆನಿ ಗರ್ಜೆತೆಕಿದ್ ಜಯ್ತ್ಯೀ ಸೊಡುಂಕ್ ಪಾವ್ಲಾ. ಮ್ಹಾಕಾ ಹಾಚಿ ಸಳಾವಳ್ ಜಾಲ್ಲಿ ಥೊಡೆಚ್ಚ್ ಪಾವ್ಟಿಂ ತರ್ಯೀ, ಹ್ಯಾ ಥೊಡ್ಯಾ ಮುಲಾಗತೆಂನಿ ಹಾವೆಂ ತಾಚೆಥಂಯ್ ಆಸ್ಚಾ ಕೊಂಕ್ಣಿ ಮೊಗಾಕ್, ತಶೆಂಚ್ ಕೊಂಕ್ಣಿ ಹುಸ್ಕೊ ಪಾರ್ಕಿಲ್ಲೊ.
- ವಲ್ಲಿ ಕ್ವಾಡ್ರಸ್
ಕಥಾದಾಯ್ಜ್ - 15 . ಶನಿ
’ಸಹಸ್ರ ದೇವತಾಯ ನಮಃ
ಸುರ್ಯಾ ದೇವಾಯ್ ನಮಃ’
ನೇತ್ರಾವತಿ ನಂಯ್ತ್ ದೊಂಪಾರ್ ಬುಡ್ಚ್ಯಾ ಉದ್ಕಾಂತ್ ರಾವ್ಲ್ಲ್ಯಾ
ಬಾಲನ್ ನಂಬೂರಿನ್ ಆಪ್ಲೆ ದೊನ್ಯೀ ಹಾತ್ ಜೋಡ್ನ್ ಮಾತ್ಯಾರ್ ಚಡಯ್ಲೆ. ದೊಳೆ ಧಾಂಪುನ್
ಸುರ್ಯಾ ದೆವಾಚ್ಯಾ ಸ್ತುತೆರ್ ಮಗ್ನ್ ಜಾಲ್ಲ್ಯಾ ತಾಣೆಂ, ದೋನ್
ಮಿನುಟಾಂ ಉಪ್ರಾಂತ್ ಮಾತ್ಯಾವಯ್ಲೆ ಹಾತ್ ಕಾಡ್ನ್ ಉದ್ಕಾಂತ್
ಬುಡಯ್ಲೆ ಆನಿ ತಾಳ್ವೆರ್ ಉದಾಕ್ ಘೆವ್ನ್ ಆಂಗಾಚ್ಯಾ ಪ್ರಮುಖ್ ಗಾಂಟಿಂಕ್ ಉದ್ಕಾಚೆಂ ಅಬಿಷೇಕ್ ಕರಿಲಾಗ್ಲೊ.
ಹಜಾರ್ ದೇವತಾಂಚೆಂ, ತ್ರಿಮೂರ್ತಿಂಚೆ, ನಿಮಾಣೆ ದುರ್ಗಾ ದೇವಿಚೊ ಉಡಾಸ್ ಕಾಡಿತ್,
ನಂಬೂರಿ ನಂಯ್ ಥಾವ್ನ್ ಯೇವ್ನ್, ಆಪ್ಲ್ಯಾ ಘರಾ ದಿಶಿಂ
ಮೆಟಾಂ ಕಾಡಿಲಾಗ್ಲೊ.
ಹರ್ ದೀಸ್ ಸುರ್ಯೊ ಉದೆತಾ ತಶೆಂ ಬುಡ್ತಾನಾ ಹೆಂ ಸದಾಂಚೆ
ವಂದನ್.
ಬಾಲನ್ ನಂಬೂರಿ ಸಕಾಳಿಂಚ್ಯಾ ಸಾಡೆ-ಪಾಂಚಾಂಕ್ ಉಟ್ತಾ, ತಾಚೆಂ ಘರ್ ಉಳ್ಳಾಲ್
ಪೆಂಟೆ ಥಾವ್ನ್, ಸ ಪರ್ಲಾಂಗಾಂ ಪಯ್ಸ್ ತೆನ್ಕಾಕ್ ಆಸಾ. ಘರಾ
ಮುಕ್ಲ್ಯಾನ್ ಶೆಂಬೊರ್ ಮೆಟಾಂ ಕಾಡ್ಲ್ಯಾರ್, ದರ್ಯಾಕ್ ಮೆಳೊಂಕ್ ಧಾಂವ್ಚ್ಯಾ
ನೇತ್ರಾವತಿ ನಂಯ್ಚಿ ವಿಶಾಲ್ ಸೊಭಾಯ್. ನಂಯ್ಚ್ಯಾ ದೊನ್ಯಿ
ಸುತ್ತುರಾಂತ್ ದರಬಸ್ತ್ ಪಾಚ್ವಿ ಸಮ್ರದ್ಧಿ, ಹ್ಯಾ ಪ್ರಾಕ್ರತಿಕ್
ಸೊಬಾಯೆಕ್ ಪಿಸ್ವೊನ್ಂಚ್; ಬಾಲನ್ ನಂಬೂರಿನ್ ಹಿ ಸುವಾತ್
ಪಂದ್ರಾ ವರ್ಸಾಂ ಆದಿಂ ಮೊಲಾಕ್ ಘೆತ್ಲ್ಲಿ. ಹ್ಯಾ ಸುವಾತೆಕ್ ತಾಣೆ
ಮೋಲ್ ದೀಂವ್ಕ್ ನಾ. ’ಏಕಾ ನಾಯ್ಕಾಕ್ ಮಾಂಕೊಡ್ ಕರ್ನ್ ಬಿತರ್ ಘಾಲ್ಲಿ’ -
ಮ್ಹಣೊನ್ ಸಾಂಗ್ಚೆಯೀ ಆಸಾತ್. ತೆಂ ಕಿತೆಂಯ್ ಆಸೊಂ, ಆತಾಂ -
ಸರ್ಕಾರಿ ದಸ್ತಾವೆಜಾ ಪರ್ಮಾಣೆ ಹಿ ಆಸ್ತ್ ಬಾಲನ್ ನಂಬೂರಿಚಿ.
ಸಕಾಳಿಂ ಸಾಡೆ-ಪಾಂಚಾಂಕ್ ಉಟ್ಲ್ಲೊಚ್, ಬಾಲನ್ ಪಂಚಲೋಹಾಚ್ಯಾ ಚೆಂಬಾಂತ್ ಉದಾಕ್ ಘೆವ್ನ್
ನಂಯ್ ತಡಿಚ್ಯಾ ಪಡ್ಪಾಕ್ ವೆತಾ. ತಾಕಾ ಕಾಕುಸ್ ವರ್ಗಾನಾಂತ್. ತಾಚ್ಯಾ
ಪಯ್ಲ್ಯಾ ಬಾಯ್ಲೆಚ್ಯಾ ಪುತಾನ್, ಬಾಪಯ್ಲಾಗಿಂ ಝಗ್ಡೆಂ ಕರ್ನ್ ಮ್ಹಳ್ಳೆಭಾಶೆನ್, ಘರಾ
ಲಾಗ್ಸಾರ್ ಏಕ್ ಕಾಕುಸ್ ಬಾಂದುನ್ ಘಲ್ಲೊ. ತಾಚೊ ಪೂತ್ ಆತಾಂ ಕೊಡ್ಯಾಳ್ ಏಕ್
ಬೇಕರಿ ದವರ್ನ್ ಆಸಾ. ಪಯ್ಲಿ ಬಾಯ್ಲ್ ಮರಣ್ ಪಾವ್ಲ್ಯಾ ಉಪ್ರಾಂತ್,
ಸುಮಾರ್ ಸಾತ್ ವರ್ಸಾಂ ಜಾಲಿ. ತೊ ಪೂತ್ ಬಾಪಯ್ಚೆ ತೋಂಡ್ ಪಳೆಂವ್ಕ್
ಪುಣಿ ಉಳ್ಳಾಲ್ ಯೇಂವ್ಕ್ ನಾ. ಹಾಕಾ ಕಾರಾಣಾಂ - ದೋನ್ ಆಸಾತ್.
ಬಾಲನ್ ನಂಬೂರಿಕ್ ಆಪ್ಲಿ ಪಯ್ಲಿ ಬಾಯ್ಲ್ ಜಿವಂತ್ ಆಸ್ತಾನಾಂಚ್, ತಾಚ್ಯಾ ಘರಾ
ಲಾಗ್ಶಿಲ್ಯಾಚ್ ಆನ್ಯೇಕಾ ಸ್ತ್ರೀಯೆಲಾಗಿಂ ನಿತಿ ಭಾಯ್ಲೊ ಸಂಬಂಧ್ ಆಸ್ಲ್ಲೊ.
ಆಪ್ಲಿ ಆವಯ್ ಮರಣ್ ಪಾವೊಂಕ್ ಹಿ ಘಡಾವಳ್ಚ್ ಕಾರಣ್
ಮ್ಹಣೊನ್ ಬೇಕರಿವಾಲೊ ಪೂತ್ ಮ್ಹಣ್ತಾ. ಬಾಯ್ಲ್ ದೆವಾದಿನ್ ಜಾಲ್ಲಿ.
ಪೂತ್ ಸೊಡ್ನ್ ಗೆಲೊ. ಸೆಜಾರ್ಚ್ಯಾ ಸ್ತ್ರೀಯೆಚೊ ಪತಿ
ಮ್ಹಣ್ತಾ. ಬಾಯ್ಲ್ ದೆವಾದಿನ್ ಜಾಲ್ಲಿ. ಪೂತ್ ಸೊಡ್ನ್ ಗೆಲೊ.
ಸೆಜಾರ್ಚಾ ಸ್ತ್ರಿಯೆಚೊ ಪತಿ ಆದಿಂ ಲೊರಿ ಸೊಡ್ತಾಲೊ. ಖಂಚ್ಯಾಗೀ ಆವ್ಘಡಾಕ್ ಶಿರ್ಕೊನ್ ಆತಾಂ ಘರಾಚ್ ಯೇವ್ನ್
ಪಡ್ಲಾ. ಎಕ್ಸುರ್ಯಾ ನಂಬೂರೀಕ್ ದೀಸ್ ಸಾರ್ಚೆ ಕಶ್ಟ್ ಜಾಲೆ.
ಪ್ರಾಯ್ ಪನ್ನಸಾಂ ವಯ್ರ್ ಪಾಂಚ್ ಜಾಲಿಂ ಜಾಲ್ಯಾರೀ, ತಾಚೆಂ ತರ್ನಾಟ್ಪಣ್ ಅಜೂನ್
’ಜೀವಂತ್’ ಆಸ್ಲ್ಲೆಂ. ಕೆರಾಳಾಚೆ ದಾದ್ಲೆ ದೀಸ್ ವೆತಾಂ-ವೆತಾಂ ತರ್ನಾಟೆ ಜಾವ್ನ್ ಯೆತಾತ್. ಕುಡಿಂತ್
ನ್ಹಯ್ ತರೀ ಜಿಬೆಂತ್ ಪುಣಿ, ಹೆಂ ಉಗ್ತೆಂ ಸತ್!
ಬಾಲನ್ ನಂಬೂರಿ ತೀನ್ ವರ್ಸಾಂ ಆದಿಂ ವೈನಾಡಾಕ್ ವಚೊನ್,
ಬಾತ್ತೀಸ್ ವರ್ಸಾಂ ಪ್ರಾಯೆಚ್ಯಾ ಎಕಾ ಚಲಿಯೆಲಾಗಿಂ ಕಾಜಾರ್ ಜಾವ್ನ್ ಆಯ್ಲೊ. ಆತಾಂ
ಬಾಪುಯ್ ಆನಿಂ ಪುತಾ ಮದ್ಲೊ ಸಂಬಂಧ್ ಆನಿಕೀ ಪಯ್ಸ್ ಜಾಲೊ.
ನಂಬೂರಿಚಿ ನವಿ ಬಾಯ್ಲ್, ಕಾತಿನ್ ಸಾವ್ಳೆಂ ಜಾಲ್ಯಾರೀ, ರುಪಾನ್ ಕಾಳ್ಯಾ ಫಾತ್ರಾಚೆಂ
ಬೊಂಬೆ! ತಾಣೆಂ ಏಕ್ ಪಾವ್ಟಿಂ ತಕ್ಲಿ ಉಕಲ್ನ್ ದೊಳೆ ಉರ್ಕಟಾವ್ನ್ ಪಳೆಲ್ಯಾರ್, ದೆಕ್ತೆಲ್ಯಾಚೆಂ ಕಾಳಿಚ್ ಕಂಚಿಗೀ ಶಿರ್ ತುಟ್ಲ್ಯಾ
ಪರಿಂ, ’ದಸಕ್ಕ್’ ಕರ್ನ್ ತಾತ್ಕಾಲಾಕ್ ಬಂದ್ ಪಡ್ತಾ, ಹೆ ಚಲಿಯೆಕ್ ಪಳೆವ್ನ್,
ನಂಬೂರಿಚ್ಯಾ ನಶಿಬಾಕ್ ಹೊಗೊಳ್ಸಿನಾತ್ಲ್ಲೆಚ್ ಸಗ್ಳ್ಯಾ ಉಳ್ಳಾಲಾಂತ್
ನಾಂತ್!
ಹಾಂವ್ ಮ್ಹಣ್ತಾಲೊಂ - ಬಾಲನ್ ನಂಬೂರಿಕ್ ಕಾಕುಸ್ ವರ್ಗಾನಾಂತ್, ಕಾಕ್ಸಾಚ್ಯಾ ಬಂದ್ ಚ್ಯಾರ್
ವೊಣದಿಂ ಮಧೆಂ ಬಸ್ಲ್ಯಾರ್ ತಾಕಾ ’ಧಮ್’ ಬಾಂಧ್ಲ್ಯಾಪರಿಂ ಭೊಗ್ತಾ ಖಂಯ್.
ಮಾಲ್ಘಡ್ಯಾನಿಂ ವರ್ಣಿಲ್ಲ್ಯ್ ರಿತಿನ್, ಅಸಲಿ ಬಂದಡ್ ಭಲಾಯ್ಕೆಕ್
ಪಾಡ್ ಹಿಂ. ಸಕಾಳಿಚ್ಯಾ ಸಾಡೆ-ಪಾಂಚಾಂಕ್ ಪಂಚಲೊಹಾಚ್ಯಾ ಚೆಂಬಾಂತ್ ಗಂಗೋಧಕ್ ಘೆವ್ನ್
ನೇತ್ರಾವತಿ ನಂಯ್ ತಡಿಚ್ಯಾ ಪಡ್ಪರ್ ಭಗ್ವಂತಾನ್ ದಿಲ್ಲಿ ಆಸ್ತ್
ವಾರ್ಯಾಕ್ ಸೊಡ್ನ್ ಬಸ್ಲ್ಯಾರ್, ನಂಬೂರಿಕ್ ಜಾಂವ್ಚೊ ಆನಂದ್ -
ಪರಮಾನಂದ್!
ಬಾಲನ್ ನಂಬೂರಿ ಕಸಬಾನ್ ವಾಮಾಚಾರಿ. ಮಾಟ್-ಮಂತ್ರಾಂನಿ ಉಕಲ್ನ್ ಧರ್ಲ್ಲೊ
ಹಾತ್. ಮನ್ಶಾಕ್ ಲಾಗ್ಲ್ಲಿ ’ಶನಿ’ ಸುಟೊಂವ್ಚ್ಯಾಂತ್, ತಾಕಾ
ಮಿಕ್ವಾಲ್ಲೊ ಹಾತ್ ಸಗ್ಳ್ಯಾ ತೆನ್ಕಾಂತ್ ನಾ - ಮ್ಹಣೊನ್
ಸಾಂಗ್ಣಿ. ಭುರ್ಗಿಂ ನಾತ್ಲ್ಲ್ಯಾಂಕ್ ಆಪ್ಲ್ಯಾ ಮಂತ್ರಾಚ್ಯಾ
ಬಳಾನ್ಚ್ ಸಂತಾನ್-ಪ್ರಾಪ್ತಿ ಕರ್ತಾ ಮ್ಹಳ್ಳಿ ಪಾತ್ಯೆಣಿ. ಕೊಣ್ಯಿ ದಾದ್ಲೆ, ಆಪ್ಲ್ಯಾ ಗುರ್ವಾರ್
ಪತಿಣೆಕ್ ಸಾಂಗಾತಾ ಘೆವ್ನ್ ’ಜಲ್ಮೊಂಚೆ ಭುರ್ಗೆಂ ಕಸಲೆ?’
ಮ್ಹಣೊನ್ ಪ್ರಶ್ನಾ ವಿಚಾರುಂಕ್ ಆಯ್ಲ್ಯಾರ್, ಸೀದಾ
ಸಾಂಗೊನ್ ಸೊಡ್ತಾ - "ಭಾಗ್ಯವತೀ, ತುಕಾ ಹೆ ಪಾವ್ಟಿಂ ಚೆರ್ಕೊ ಜಾತಾ!" ಉಮಾಳೊನ್ ಯೆಂವ್ಚ್ಯಾ
ಸೊಂತೊಸಾನ್, ಆಯಿಲ್ಲಿಂ ಮೆಟಾಂ ದೆಂವೊನ್ ಗೆಲಿಂ ಮ್ಹಳ್ಳ್ಯಾ ಘರಾ, ಆಪ್ಣೆ
ಬಸ್ಚ್ಯಾ ಬಾಂಕಾ ಪಾಟ್ಲ್ಯಾ ವೊಣದಿಚೆರ್ ತ್ಯಾ ಪತಿ-ಪತಿಣೆಚೆಂ
ನಾಂವ್ ಬರವ್ನ್, ಸಕಯ್ಲ್ "ಭುರ್ಗೆಂ - ಚೆಡುಂ"
ಮ್ಹಣ್ ಬರಯ್ತಾ. ನಂಬೂರಿಚ್ಯಾ ನಶಿಬಾಕ್ ಆನಿ ತ್ಯಾ ಬಿರ್ಮೊತ್ ಜೊಡ್ಯಾಚ್ಯಾ
ಮಾಗ್ಣ್ಯಾನ್, ಬುರ್ಗೆಂ - ಚೆಡೊ ಜಾಲೆಂ ತರ್ ಕಾಂಯ್ಚ್ ಗಡ್ಬಡ್
ನಾ. ಚುಕೊನ್ ಚೆಡುಂ ಜಾಲೆಂ ಆನಿ ಪರತ್ ನಂಬೂರಿಕಡೆನ್ ವಿಚಾರುಂಕ್ ಆಯ್ಲಿಂ,
ನಂಬೂರಿ ಉಲಯ್ನಾ. ಬಗಾರ್ ಆಪ್ಣೆಂ ಬಸೊನ್ ಆಸ್ಲ್ಲ್ಯಾ
ಬಾಂಕಾ ಪಾಟ್ಲ್ಯಾ ವೊಣದಿಕ್ ದಾಕಯ್ತಾ.
"ಪುಣ್ಯವತಿ, ಹಾಂವ್ ಜಾಣಾ ತುಕಾ ಹೆ ಪಾವ್ಟಿಂ ಚೆಡುಂ ಜಾತಾ
ಮ್ಹಣೊನ್. ತುಕಾ ಚೆರ್ಕೊ ಜಾಂವ್ಕ್ ಆಶಾ ಆಸ್ಲ್ಲಿ. ತುಂ ಗುರ್ವಾರ್ ಸ್ತ್ರೀ. ಗುರ್ವಾರ್ ಸ್ತ್ರೀಯೆಚಿ ಆಶಾ ಕಿಮ್ಚುಂಕ್
ನಜೊ ಮ್ಹಣ್ತಾತ್. ತುಜ್ಯಾ ಮತಿಚಾ ತಾತ್ಕಾಲಿಕ್ ಸೊಂತೊಸಾ ಖಾತಿರ್
ಹಾಂವೆಂ ಫಟ್ ಮಾರಿಜಯ್ ಪಡ್ಲಿ. ಗುರ್ವಾರ್ ಸ್ತ್ರೀಯೆಚ್ಯಾ
ಮತಿಂತ್ಲಿ ದೂಕ್, ಖಂತ್, ಪೊಟಾಂತ್ ಆಸ್ಚ್ಯಾ ಭುರ್ಗ್ಯಾಚೆರ್
ಪರಿಣಾಮ್ ಕರುಂಕ್ ಸಕ್ತಾ. ಪಳೆ! ತ್ಯಾಚ್ ದಿಸಾ ಹಾಂವೆಂ ತಾರಿಕೆಸವೆಂ ಬರವ್ನ್ ದವರ್ಲಾಂ - ತುಮ್ಕಾಂ ಜಾಂವ್ಚೆಂ ಭುರ್ಗೆಂ
’ಚೆಡುಂ’ ಮ್ಹಣೊನ್! ಫಟಿ ಮಾರ್ಲ್ಯಾಕ್ ಮಾಫ್ ಕರಾ."
ರಾಗಾನ್ ಆಯಿಲ್ಲೆಂ ಜೊಡೆಂ ನಂಬೂರಿಚೆಂ ಉತ್ರಾಂ ಆಯ್ಕೊನ್ ಪ್ರಸನ್ನ್ ಜಾತಾ,
ಹಾತ್ಬೊರ್ ’ದಕ್ಷಿಣಾ’ ದೀವ್ನ್ ಮೆಟಾಂ ದೆಂವ್ತಾ.
ಹಾಂವ್ ಮ್ಹಣ್ತಾಲೊಂ - ಬಾಲನ್ ನಂಬೂರಿ ಶನಿ ಸುಟೊಂವ್ಚ್ಯಾಂತ್
ನಾಂವಾಡ್ದಿಕ್ ಹಾತ್ ಮ್ಹಣೊನ್. ಕೊಣೆ ಪುನೆಗೆಲ್ಲ್ಯಾಚ್ಯಾ ಕೊಲ್ವಾಚ್ಯಾ ಘರಾಕ್ ಖರ್ಕಟ್ಯಾ ಗರ್ಮೆ ವೆಳಾರ್ ಉಜೊ
ಪಡ್ಲೊ, ಯಾ ಕೊಣಾಯ್ಚಿ ಗಾಯ್ ಚರೊಂಕ್ ಗೆಲ್ಲಿ ಬಸ್ಸಾ
ಪಂದಾ ಪಡ್ಲಿ, ಯಾ ಬರ್ಯಾ ಕಾರ್ಯಾಕ್ ಭಾಯ್ರ್ ಸರ್ಲ್ಲ್ಯಾ ಕೊಣಾಯ್ಚೊ ದಾವೊ
ಪಾಂಯ್ ದಾಂಟೊನ್ ಕೊಂಬಾ ಬೊಟಾಚಿ ನಾಕ್ಷಿ ಗೆಲಿ, ನಂಬೂರಿ
ಪಂಚಾಂಗ್ ಉಸ್ತುನ್ ನಾತ್ಲ್ಲಿ ’ಶನಿ’ ಸೊದುನ್ ಕಾಡ್ನ್ ದಾಕಯ್ತಾ.
ಲಾಗ್ಲ್ಲ್ಯಾ ಶನಿಯೆಚ್ಯಾ ಬಳಾಕ್ ಸರಿ ಜಾವ್ನ್ ’ಶನಿ ನಿವಾರಾಣ್’ ಕಾರ್ಯಾಚೊ ಖರ್ಚ್. ಖರ್ಚ್ ಚಡ್ ಜಾಲೊಗಿ ಯಾ
ನಂಬೂರಿನ್ ಧಾಂವ್ಡಾಯಿಲ್ಲಿ ರೀತ್ ಬಳಾದಿಕ್ ಜಾಲಿಗೀ, ಏಕ್ ಪಾವ್ಟಿ
ಶನಿ ಲಾಗ್ಲ್ಲೊ ಮನಿಸ್ ಪರತ್ ಶನಿಚೆಂ ನಾಂವ್ ಸಾಂಗೊನ್
ನಂಬೂರಿ ಸರ್ಶಿನ್ ಪಾಟಿ ಆಯಿಲ್ಲೊನಾ. ಆನಿ ತಾಕಾ ’ಶನಿ’ ಪರತ್
ಲಾಗ್ಲ್ಲಿ ನಾ!
"ಸುರ್ಯೊ ಸಗ್ಳ್ಯಾ ಬ್ರಹ್ಮಾಂಡಾಚೊ ರಾಯ್-ದೇವ್. ತಾಚ್ಯಾ ಭೊಂವ್ತಿ ಘುಂವ್ಚಿ
ಸರ್ವ್ ಗ್ರಹಾಂ ತಾಚಿಂ ಭುರ್ಗಿಂ. ಹ್ಯಾ ಗ್ರಹಾಂ ಪಯ್ಕಿ ’ಶನಿ’, ಆಪ್ಲ್ಯಾ
ಬಾಪಾಯ್ಚೆರ್ ಉಪ್ರಾಟ್ತಾ. ಹ್ಯಾ ಕಾರ್ಯಾಕ್ ಶನಿಚೊ ಅನ್ಯೇಕ್ ಭಾವ್ ’ಮಂಗಳಾ’ ತಾಕಾ
ಪಾಟಿಂಬೊ ದಿತಾ. ಸುರ್ಯಾಕ್ ಬ್ರಹ್ಮಾಂಡಾಚ್ಯಾ ಸಿಂಯಾಸಣಾ ಥಾವ್ನ್ ಉಸ್ಳಾವ್ನ್, ಅಖ್ಖ್ಯಾ
ಪ್ರಥ್ವೆಚೊ ಅಧಿಪತಿ ಜಾಂವ್ಚಿ ಖೊಟಿ ಆಶಾ ಶನಿಯೆಚಿ. ಸುರ್ಯಾಕ್ ಆತಾಂ ಧರ್ಮ್
ಸಂಕಟ್. ಪುತಾಂಚೊ ಮೋಗ್. ರಾಗಾನ್ ದೊಳೆ ಉಗ್ತೆ ಕೆಲ್ಯಾರ್
ಲಾಸೊನ್ ನಾಸ್ ಜಾವ್ನ್ ವೆತಿತ್ ಮ್ಹಳ್ಳಿ ಭಿರಾಂತ್.
ಹನುಮಾನ್ - ವಾರ್ಯಾಚೊ ಪುತ್. ಸುರ್ಯಾಚೊ ಶಿಷ್ಯ್.
ಹನುಮಾನಾಕ್ ಸರ್ವ್ ರಿತಿಚಿ ವಿಧ್ಯಾ ಶಿಕಯಿಲ್ಲಿ ಸುರ್ಯಾನ್. ಆಪ್ಲೆಂ ಶಿಕಾಪ್
ಸಂಪ್ಲ್ಲೆಂಚ್ ತೊ ಸುರ್ಯಾಲಾಗಿಂ ವಚೊನ್ ವಿಚಾರ್ತಾ
"ಗುರೂ, ತುಕಾ ಗುರು ದಕ್ಷಿಣ್ ಜಾವ್ನ್ ಕಿತೆಂ ದೀಂವ್?"
ಸುರ್ಯಾಚೆ ದೊಳೆ ಉಜಳ್ತಾತ್. ಕಾಂಟ್ಯಾನ್ ಕಾಂಟೊ ಕಾಡುಂಕ್ ಜಾಯ್, ದಾಂಟ್ಯಾನ್
ನ್ಹಯ್. "ಹನುಮಾನ್, ಮ್ಹಕಾ ದೋಗ್ ಜಣ್ ಅನುಪ್ಕಾರಿ
ಪುತ್ ಆಸಾತ್. ತಾಂಕಾಂ ಸಾರ್ಕ್ಯಾ ವಾಟೆಕ್ ಪರ್ತಿಶಿ, ತಿಚ್ ತುವೆಂ
ಮ್ಹಕಾ ದಿಂವ್ಚಿ ವೊರ್ತಿ ಗುರುದಕ್ಷಿಣಾ".
ಮುಕ್ಲ್ಯಾ ಥೊಡ್ಯಾಂ ದಿಸಾಂ ಮ್ಹಣಾಸರ್, ಭುಮಿ ಥಾವ್ನ್
ಬೋವ್ ಪಯ್ಸ್ ಭಾಯ್ಲ್ಯಾ ಬ್ರಹ್ಮಾಂಡಾಂತ್ ಭಯಾನಾಕ್ ಝಜ್ ಚಲ್ತಾ.
ಹನುಮಾನ್ ಜಯ್ತೆವಂತ್ ಜಾವ್ನ್, ಶನಿ ತಶೆಂ ಮಂಗಳಾಕ್
ಬಾಂದುನ್ ಹಾಡ್ನ್ ಸುರ್ಯಾಚ್ಯಾ ಪಾಯಾಂಥಾಳಾ ಉಡಯ್ತಾ.
"ಜೈ... ಹನುಮಾನ್! ಹೆ ಫುಡೆ ಸಂಸಾರಾಂತ್ ಖಂಚ್ಯಾ
ಮನ್ಶ್ಯಾಂಕ್ ಶನಿ ಆನಿ ಮಂಗಳಾಚೆ ಉಪದ್ರ್ ಆಸಾತ್, ತಾಣಿಂ ತುಜಿ
ಸ್ತುತಿ ಕೆಲ್ಯಾರ್ ತಾಂಕಾಂ ಮುಕ್ತಿ ಲಾಬ್ತೆಲಿ" ಸುಪ್ರೀತ್ ಜಾಲ್ಲೊ
ಸುರ್ಯೊ ದೇವ್ ಬೆಸಾಂವ್ ದಿತಾ.
ಜೆಂ - ಕೊಣಾಕ್ ಶನಿ ಆನಿ ಮಂಗಳಾಚೆ ಉಪದ್ರ್ ಆಸಾತ್ - ತೆ
ಹನುಮಾನಾಚಿ ಸ್ತುತಿ ಕರ್ತಾತ್. ಶನಿಚೆ ಧೊಸ್ ಆಸ್ಲ್ಯಾಂನಿ,
ಸನ್ವಾರಾ ದಿಸಾ ಉಜ್ವಾಡ್ಚ್ಯಾ ಆಧಿಂ ಉಟೊನ್ ನ್ಹಾಣ್ ಕರ್ನ್,
ಶನಿಚಿ ಸ್ತುತಿ ಕರುನ್ ದೀಸ್ಬರ್ ಜಿಂಜ್ವಾರ್ ಆಧಾರಿಜೆ. ಹನುಮಾನ್
ಬ್ರಹ್ಮಚಾರಿ. ತಾಕಾ ಪ್ರಸನ್ನ ಕರ್ಚ್ಯಾಕ್, ಸ್ತ್ರೀಯೆಚ್ಯಾ
ಸುತ್ತುರಾಕ್ ಲೆಗುನ್ ವಚೊಂಕ್ ನಜೊ. ಹನುಮಾನಾಕ್ ಸ್ತ್ರೀಯಾಂಕ್ ದೆಕ್ಲ್ಯಾರ್ ಜಾಯ್ನಾ. ತಶೆಂಚ್ ಮಂಗಳಾಚೆ ಧೊಸ್ ಆಸ್ಲ್ಲ್ಯಾಂನಿ
ಮಂಗ್ಳಾರಾ ದಿಸಾ... ನೆಣಾರಿ ಲೊಕಾಕ್ ಸಾಂಗ್ತಾಲೊ. ಆನಿ ಲೋಕ್ ಕಾನ್-ದೊಳೆ-ಚೀತ್ ಉಗ್ತೆಂ ದವರ್ನ್ ತಾಕಾ ಆಯ್ಕಾತಾಲೊ.
****
ಆಶೆಂ ಮನಿಸ್ ಆಸ್ತಾನಾ ಏಕ್ ದೀಸ್ ಬಾಲನ್ ನಂಬೂರಿಕ್ ಶನಿ
ಸುರು ಜಾಲಿ! ಶನಿ - ಮನಿಸ್ ಮ್ಹಳ್ಳ್ಯಾಕ್ ಕೊಣಾಕ್
ಸೊಡಿನಾ? ತಾಚ್ಯಾ ಮಾರಾಕ್ ವ್ಹಡ್-ವ್ಹಡ್ ರಾಯ್ಚ್
ನಿಸ್ಸಾಂತಾನ್ ಜಾವ್ನ್ ಗೆಲ್ಯಾತ್ ಆಸ್ತಾನಾ, ಬಾಲನ್ ನಂಬೂರಿಕ್ ತ್ರಾಸ್
ದೀಂವ್ಕ್ ’ಶನಿ’ಯೆಕ್ ಚಡಿತ್ ದೀಸ್ ಲಾಗ್ಲೆನಾಂತ್.
ವಿಚಿತ್ರ್ ಕಿತೆಂಗಿ ಮ್ಹಳ್ಯಾರ್ - ಹಿ ’ಶನಿ’ ಬಾಲನ್ ನಂಬೂರಿಕ್ ಧೊಸುಂಕ್ ಆಯಿಲ್ಲಿ, ಎಕಾ ಕಿರಿಸ್ತಾಂವ್
ಪಾದ್ರಿಚ್ಯಾ ರುಪಾರ್!
ಉಳ್ಳಾಲ್ ಇಗರ್ಜೆಚೊ ಆದ್ಲೊ ವಿಗಾರ್, ಉತರ್ ಪ್ರಾಯೆಕ್ ಲಾಗೊನ್
ನಿವ್ರತ್ತ್ ಜಾತಾನಾ, ದಿಯೆಸೆಜಿನ್ ತ್ಯಾಚ್ಯಾ ಜಾಗ್ಯಾರ್ ಎಕಾ ತರ್ನ್ಯಾ
ಪಾದ್ರಿಕ್ ನೆಮ್ಲ್ಲೊ. ಹೊ ನವೊ ವಿಗಾರ್ ಜಾಲ್ಯಾರೀ ಚೌಕ್ ಭುಜ್,
ಲಾಂಬ್ ದೀಗ್ ಬಾವ್ಳೆ, ಗೊರ್ಸಿ ನಂಯ್ ಜಾಲ್ಯಾರೀ ಆಕರ್ಷಿಕ್ ಕಾತ್. ತಾಚೆಂ ಉಲವ್ಣೆಂ ಕಿತೆಂ
ಮ್ಹಣ್ತಾತ್? ಚ್ಯಾರ್ - ಪಾಂಚ್ ಭಾಸಾಂನಿ ತೊ ತೊವ್ಲ್ಲ್ಯಾ
ಸಿಸ್ಯಾಪರಿಂ ನಿರರ್ಗಳ್ ಉಲಯ್ತಾ. ವಯ್ಲ್ಯಾನ್ ಸೊರೊಪ್ ಧರ್ಚ್ಯಾಂತ್,
ಮಾತ್-ಮಂತ್ರಾ ಕಾಡ್ಚ್ಯಾಂತ್, ಭೋವ್ ಹುಶಾರ್ ಹಿಂ!
ಲೋಕ್ ಪಿಸ್ವಾಲೊ. ನಂಬೂರಿಚ್ಯಾ ಘರಾ ವೆಚ್ಯಾ ಲೊಕಾನ್ ಇಗರ್ಜೆಚಿ
ವಾಟ್ ಧರ್ಲಿ.
ತೊ ಪಾದ್ರಿ ಮ್ಹಣ್ತಾಲೊ.- "ಹಿ ಮಾಟ್-ಮಂತ್ರಾಂ- ಹಾಂತು ಕಸಲೆಂಚ್
ಸತ್ ನಾ. ಕೋಣ್ ಜರೀ ಹೆಂ ಪಾತ್ಯೆತಾ, ತಾಚ್ಯಾ ಪಾತ್ಯೆಣೆಕ್
ಹಾಂವ್ ಆಡ್ ವಚಾನಾ. ಕಿತ್ಯಾಕ್ ಪಾತ್ಯೆಣಿ ಹರ್ಯಾಕಾ ಜಿವಿಚೊ ಖಾಸ್ಗಿ ವಿಚಾರ್. ಖಂಚ್ಯಾಯ್
ವೆಕ್ತಿಚ್ಯಾ ಖಾಸ್ಗಿ ವಿಚಾರಾಂನಿ ಮೆತೆರ್ ಜಾಂವ್ಚೆಂ ಹಕ್ಕ್ ಮ್ಹಕಾ
ನಾ ಪುಣ್ ಇತ್ಲೆಂಚ್ ಸಾಂಗ್ತಾಂ - ಹಿ ಎಕಾ ಥರಾಚಿ ’ಭ್ರಮಾ’. ಎಕಾ ರಿತಿಚಿ
ಭಿರಾಂತ್. ಜೆದ್ನಾ ಭಿರಾಂತ್ ಉಬ್ಜಾತಾ, ಕೆದ್ನಾ ಮತ್ ಕಾಮ್ ಕರಿನಾ, ತ್ಯಾ
ಸುವಾತೆರ್ ಉರ್ತಾ ಫಕತ್ತ್ ಭಿರಾಂತ್.
ಹಾಂವ್ ವರ್ಸಾಂ-ವರ್ಸಾಂ ಮೆಲ್ಲ್ಯಾಂಚ್ಯಾ ಸಿಮಿತೆರಿಂತ್ ಜಿಯೆಲಾಂ, ಖೆಳ್ಳಾಂ. ಎದೊಳ್
ಹಾಂವೆಂ ’ಮೆಲ್ಲೆಂ’ ಪಳೆಂವ್ಕ್ ನಾ. ತುಮಿ ಪಳೆಲಾಂ?"
ಹಾಜಾರ್ ಆಸ್ಲ್ಲೊ ಲೋಕ್ ’ನಾ’ ಮ್ಹಣ್ತಾ ತಶೆಂ ತಕ್ಲಿ ಹಾಲಯ್ತಾ. ಧಯ್ರ್ ಘೆವ್ನ್ ಪಾದ್ರಿ ಮುಂದಾರಿತಾ -
"ಹಾಂವ್ ತುಮ್ಚ್ಯಾ ಭಿರಾಂತೆಕ್ ವೊಕಾತ್ ದಿತಾಂ. ತುಮಿ ಕೊಣಾಯ್ಕಿ
ವಾಯ್ಟ್ ಕೆಲಾಂ ಜಾಲ್ಯಾರ್, ಸುಟಾವೆಂ ಹ್ಯಾ ದೇವ್ ಮಂದಿರಾಂತ್ ಕುಮ್ಸಾರ್ ಜಾಯಾ. ದೇವ್ ತುಮ್ಕಾಂ ಕುರ್ಪಾ ದಿತಲೊ. ಕುರ್ಪಾ ಖಂಯರ್ ಆಸಾ, ಥಂಯ್ಸರ್
ಭಿರಾಂತೆಕ್ ರೀಗ್ ನಾ. ಕೆದಿಂಚ್ ಕೊಶೆಡ್ಡಾ ಭಿತರ್ ದುಸ್ರ್ಯಾಂಚೆಂ
ವಾಯ್ಟ್ ಪುಂಜಾವ್ನ್ ದವರಿನಾಕಾತ್. ಭಿರಾಂತ್ ತುಮ್ಕಾಂ
ಸೊಡ್ನ್ ವೆಚಿನಾ. ಧಯ್ರ್ ಘೆಯಾ ಆನಿ ಚಲಾ ತುಮ್ಚ್ಯಾ ತುಮ್ಚ್ಯಾ ಘರಾ. ಕೋಣ್ಚ್ ತುಮ್ಕಾಂ ಭಾದಕ್ ಕರ್ಚೊನಾ.
ಆಗ್ಮೆಂತ್ ಪ್ರೊಶಣ್ ಕರ್ನ್, ಹಾತಿಂ ನಿತ್ಯಾಧಾರ್ ಮಾಯೆಚಿ ಅರ್ಲುಕ್
ದೀವ್ನ್ ದಾಡ್ತಾಲೊ ಹೊ ಪಾದ್ರಿ. ಲೊಕಾಂಕ್ ಮಾತ್ರ್ ತಾಣೆ
ಸಾಂಗ್ಲೆಲ್ಲ್ಯಾ ಉತ್ರಾಂಚ್ಯಾಕೀ, ಪ್ರೋಶನ್ ಕೆಲ್ಲ್ಯಾ ಆಗ್ಮೆಂತಾಚೆರ್,
ಹಾತಿಂ ಆಸ್ಲ್ಲ್ಯಾ ಅರ್ಲುಕೆಚೆರ್ ಉಂಚ್ಲೊ ಭರ್ವಸೊ!
ಇತ್ಲ್ಯಾರ್ಚ್ ತ್ರಪ್ತಿ ಜಾವ್ನ್ ಚಡಾವತ್ ಲೋಕ್ ಪಾಟಿಂ ವೆತಾಲೊ ಜಾಲ್ಯಾರೀ ಥೊಡ್ಯಾಂಕ್
ಮಾತ್ರ್ ಘರಾ ವಚೊಂಕ್ ಆನಿಕ್ಯೀ ದುಬಾವ್. ಇತ್ಲ್ಯಾ
ಸುಲಭಾಯೆನ್ ’ಶನಿ’ ಸುಟೊನ್ ವಚಾತ್?
ಅಸಲ್ಯಾ ಭಿಂವ್ಕುರ್ಯಾಂಕೀ ಪಾದ್ರಿಕಡೆನ್ ವೊಕಾತ್ ಆಸ್ಲ್ಲೆಂ.
ಭಿತರ್ ವಚೊನ್ ಬಿ ಕೊಂಪ್ಲೆಕ್ಸಾಚ್ಯೊ ಭಾರಾ ಗುಳಿಯೊ
ಬಾಂಧುನ್ ಹಾಡ್ತಾಲೊ. ’ದಿಸಾಕ್ ತೀನ್ ಖಾಯಾ’ ಮ್ಹಣ್ತಾಲೊ. ತಾಂಬ್ಟ್ಯಾ ಕರ್ನಾ ಕುಡ್ಕೆ ಕರ್ನ್
ಹಾಡಯಿಲ್ಲೆ, ದೋನ್ ತಾಂಬ್ಯಾಚೆ ಕುಡ್ಕೆ ದೀವ್ನ್, "ಘರಾ
ಮುಕ್ಲ್ಯಾನ್ ತಶೆ ಪಾಟ್ಲ್ಯಾನ್ ಫೊಂಡ್ ಕಾಡ್ನ್ ಪುರಾ"
ಮ್ಹಣ್ತಾಲೊ.
ಲೋಕ್ ಖುಶಿ!
ಯೆದಿಂ ವ್ಹಡ್-ವ್ಹಡ್ ಮಾಟ್-ಮಂತ್ರಾ, ಅಸಲ್ಯಾ ಚಿಲ್ಲರ್ ರಿತಿನ್
ಪರಿಹಾರ್ ಕರ್ಚೊ ಮನಿಸ್ ಖಂಡಿತ್ ತರೀ ವ್ಹಡ್ ನ್ಹಂಯ್ಗೀ? ತಾಣೆ ತೆಂ ಉದಾಕ್ ಫಕತ್
ಮಾತ್ಯಾರ್ ಶೆಣಾಯ್ಲೆಂ. ಮತಿಕ್ ಕಸಲೆಂ ಸಮಾಧಾನ್! ಫಾಲ್ಯಾಂ
ಬಾಯ್ಲೆಕ್ ಆನಿ ಭುರ್ಗ್ಯಾಂಕೀ ಆಪವ್ನ್ ವೊರ್ನ್, ತೆಂ ಉದಾಕ್
ಶೆಣಾಂವ್ಕ್ ಸಾಂಗಿಜೆ... ತೆಂ ಗಂಗಾ ನಂಯ್ಚೆ ಉದಾಕ್ ಕಂಯ್ ತೆಂ ಘರಾ ಆಸ್ಲ್ಯಾರ್ ಕಸಲೆಂ
ಮೆಲ್ಲೆಂಯೀ ಘರಾ ಸುತ್ತುರಾಕ್ ಯೆನಾ ಖಂಯ್. ಸಕ್ಕಡ್
ಸೊಡ್, ಕಸಲೆಂ ಮಾಟ್ ನಿವಾರಣ್ ಕೆಲ್ಯಾರೀ ದೆಡ್ಕಿ ಸ್ವೀಕಾರ್ ಕರಿನಾ ಖಂಯ್.
ಪೊಯ್ರ್ ಎಕ್ಲೊ, ಆಪ್ಣಾಕ್ ಮಾಟ್ ಕೆಲ್ಲ್ಯಾಕ್ ’ಪಾಟಿಂ ಕರಿಜೆ’
ಮ್ಹಣೊನ್ ಹಟ್ ಧರಿಲಾಗ್ಲೊ ಕಂಯ್. ಪಾದ್ರಿ ರಾಗಾನ್ ತಾಂಬ್ಡೊ ಜಾಲೊ ಖಂಯ್. ತಸಲೆಂ
ಮನೋಧರ್ಮ್ ಘೆವ್ನ್ ಹಾಂಗಾಸರ್ ಯೆಂವ್ಚೆಂಚ್ನಾಕಾ. ಕೋಣ್ ತುಕಾ
ವಾಯ್ಟ್ ಚಿಂತಾ, ತಾಕಾ ದೇವ್ ಪಳೆತಾ. ಪಾರಿಕ್ಪಣ್ ಘೆಂವ್ಚೆಂ ತುಜೆಂ ಕಾಮ್
ನ್ಹಯ್ ಮ್ಹಣಾಲೊ ಖಂಯ್. ಖಂಡಿತ್ ಜಾವ್ನ್. ಸರ್ವಾಂ
ವರ್ತೊ ದೇವ್ ಪಳೆ. ಫಾರಿಕ್ಪಣ್ ಘೆಂವ್ಚೆಂ ಕಾಮ್ ತಾಚೆಂ.
ಅಖ್ಖ್ಯಾ ಉಳ್ಳಾಲಾಂತ್ ಹಿಚ್ ಖಬಾರ್. ದೀಸ್ ಉದೆಜೆ ಜಾಲ್ಯಾರ್,
ನಾಕ್ಯಾಲಾಗಿಂ ಹೊಟ್ಲಾ ಭಿತರ್, ಅಂಗ್ಡಿ ಮುಕಾರ್ ಪಾದ್ರಿಚಿಂ ಉತ್ರಾಂ -
ಹೊಗ್ಳಾಪ್!
ಥೊಡ್ಯಾಚ್ ದಿಸಾಂನಿ ಹೊ ನವೊ ಯಾಜಾಕ್, ಉಳ್ಳಾಲ್ಚೊ
ನವೊ ’ಹೀರೊ’ ಜಾಲ್ಲೊ!
ಹೆಣೆ ಬಾಲನ್ ನಂಬೂರಿಚ್ಯಾ ದಂದ್ಯಾಕ್ ನೀಜ್ ಜಾವ್ನ್ ’ಶನಿ’
ಲಾಗ್ಲ್ಲಿ. ದೀಸ್ ವೆತಾಂ-ವೆತಾಂ ಉಣೆ ಜಾಲ್ಲೆ ಗಿರಾಯ್ಕ್, ಉಣೆ ಜಾವ್ನ್
ನಪಂಯ್ಚ್ ಜಾಲೆ ಶಿವಾಯ್, ಪರತ್ ತಾಚ್ಯಾ ದಾರಾರ್ ಉದೆಲೆನಾಂತ್. ಎಕಾ
ದಿಸಾ ಪಂಚಲೊಹಾಚೊ ಚೆಂಬು ಘೆವ್ನ್, ಸಕಾಳಿಂಚ್ಯಾ ಆದೇಸಾಕ್
ನೇತ್ರಾವತಿ ನಂಯ್ ತಡಿಕ್ ಗೆಲ್ಲೊ ಬಾಲನ್ ನಂಬೂರಿ,
ಸುರ್ಯೊ ಉದೆಂತಿಚ್ಯಾ ಮಳ್ಬಾರ್ ಭರ್ತಿ ವಯ್ರ್ ಚಡ್ಲ್ಲೊ ಜಾಲ್ಯಾರಿ
ಪಾಟಿಂ ಯೇಂವ್ಕ್ ನಾ. ತಾಚಿ ಬಾಯ್ಲ್ ಅಕಾಂತಾನ್ ಅಂಗ್ಣಾಕ್ ದೆಂವ್ತಾನಾ,
ಪಯ್ಸಿಲ್ಯಾನ್ ನಂಬೂರಿ ಚಲೊನ್ ಯೆಂವ್ಚೊ ದಿಸ್ಲೊ ತಿಕಾ.
ನಂಬೂರಿ ಸಂಪೂರ್ಣ್ ಥಕೊನ್ ಗೆಲ್ಲೊ. ಚಲೊಂಕ್ ತ್ರಾಣ್
ನಾತ್ಲ್ಲೆಂ ಪೆಂಕ್ಟಾಕ್ ಬಾಂದ್ಲ್ಲೆಂ ಪುಡ್ವೆಂ ಹಾತಿಂ ಆಸ್ಲ್ಲೆಂ !
ವ್ಹಯ್, ಬಾಲನ್ ನಂಬೂರಿಕ್ ಜಿಲಾಬ್ ಸುರು ಜಾಲ್ಲೆಂ!
***
ಬಾಲನ್ ನಂಬೂರಿ ರಾಗಾನ್ ತಾಂಬ್ದೊ ಜಾಲ್ಲೊ. ಮೊಸ್ರಾ ಕಾಳೊ ಜಾಲ್ಲೊ. ಆನಿ
ಹಟ್ಟಾನ್ ನಿಳ್ಸೊ ಜಾಲ್ಲೊ. ತೀನ್ಯಿ ವರ್ಣ್ ಏಕ್ ಜಾತಾನಾ
ನಂಬೂರಿಚ್ಯಾ ತೊಂಡಾಚೊ ಛಾರೊಚ್ ಬದ್ಲಾಲ್ಲೊ. ತಾಣೆ ಗಳ್ಸಿಲ್ಲಿ ವಿದ್ಯಾ, ಎದೊಳ್
ಪರ್ಯಾಂತ್ ತಾಣೆ ದುಸ್ರ್ಯಾ ಪಾಸತ್ ವಾಪರ್ಲ್ಲಿ. ಥೊಡೆ
ಪಾವ್ಟಿಂ ಖುಶೆನ್ ಥೊಡೆ ಪಾವ್ಟಿಂ ಪೊಟಾ ಖಾತಿರ್. ಆತಾಂ ಹಿ ವಿದ್ಯಾ ಆಪ್ಣಾಚ್ಯಾ
ಸ್ವಂತ್ ಪೊಟಾ ಕಾತಿರ್ ವಾಪಾರ್ಚೆ ದೀಸ್ ಉದೆತಾನಾ, ತ್ಯಾ ಪಾದ್ರಿನ್,
ಬಾಲನ್ ನಂಬೂರಿಚ್ಯಾ ಮಂತ್ರಾ ಸಕ್ತೆಚೆರ್ ಸವಾಲ್ ಉಡಯಿಲ್ಲೆಂ.
"ಹಾಂವ್ ತಾಕಾ ಪಾಂಗ್ಳೊ ಕರ್ತೊಲೊಂ, ನಾಸ್ ಕರ್ತೊಲೊಂ.
ಹೊ ದೊನೀ ಸಾದ್ಯ್ ನಾ ಜಾಲ್ಯಾರ್ ಪಿಸಾಂತುರ್ ಕರ್ನ್ ದೇಸಾಂತರ್ಪುಣಿ ದಾಡ್ತಲೊಂ!" ನಿಚೆವಾಸಂಗಿಂ ದಾಂತ್ ಚಾಬ್ಲೆ -
ಬಾಲನ್ ನಂಬೂರಿನ್.
ಲಕ್ಕದೀವಿಚೆ ಮನಿಸ್ ಮಾಟ್ ಕರ್ಚ್ಯಾಂತ್ ನಾಂವಾಡಿಕ್ ಖಂಯ್. ಛೆ!... ಆಪುಣ್ ಇತ್ಲೊ
ವ್ಹಡ್ ವಾಮಾಚಾರಿ ಮ್ಹಣೊನ್ ನಾಂವ್ ಆಸ್ತಾನಾ, ಭಾಯ್ಲ್ಯಾಂಕ್
ಹಾಡ್ಲ್ಯಾರ್ ಮ್ಹಜಿ ಮರ್ಯಾದ್!? ಹೆಂ ಕಾಮ್ ಹ್ಯಾಚ್
ಬಾಲನ್ ನಂಬೂರಿನ್ ಕರ್ಚೆಂ. ಹಿ ತ್ಯಾ ದುರ್ಗಾಮಾಯೆಚಿ, ಕಾಳಿಕಾಂಬೆಚಿ ಇಚ್ಛಾ.
ಮಾಣ್ಕೆ ಧರ್ತೆಲ್ಯಾಂಕ್ ಸಾಂಗೊಂಕ್ ಧಾಡ್ನ್ ಬರೊಸೊ ಏಕ್ ಖಡ್ಪಾ
ಮಾಣ್ಕೊ ಧರ್ನ್ ಹಾಡಯ್ಲೊ. ಮಾಣ್ಕೊ ಉದಾರೊ ನಿದಾವ್ನ್, ಎಕಾ
ಬಾರಿಕ್ ಕಾಡಿಯೆನ್ ಮಾಣ್ಕ್ಯಾಚಾ ಪೊಟಾಚೆರ್ ಕಸಲಿಂಗೀ ಅಕ್ಷಾರಾ ಬರಯ್ಲಿಂ. ಕಾಡಿ
ಪೊಟಾರ್ ದಾಂವ್ತಾನಾ, ಮಾಣ್ಕ್ಯಾಕ್ ಕುಚುಲ್ಯೊ ಜಾಲ್ಯೊ ಜಾಯ್ಜಯ್. ಚುಳ್ಳ್!...
ಮ್ಹಣೊನ್ ಬರೊಂವ್ಚ್ಯಾ ಹಾತಾಚೆರ್ಚ್!... ಉದಾಕ್ ಪಾಪ್ಡುನ್, ಬರೊಂವ್ಚಿ ಆಕ್ಷಾರಾಂ
ಮುಂದರಿಲಿಂ ನಂಬೂರಿನ್. ಸಾಂಗಾತಾ ಮಂತ್ರಾಂಯೀ. ಸರ್ವ್
ಸಂಪ್ತಚ್ ಮಾಣ್ಕೊ ಪೊತ್ಯಾಂತ್ ಘಾಲ್ನ್, ನಂಬೂರಿ ಇಗರ್ಜೆಚ್ಯಾ
ವಾಟೆಕ್ ಮೆಟಾಂ ಕಾಡಿಲಾಗ್ಲೊ.
ಆತಾಂ ಮಾಣ್ಕೊ ಖಂಯ್ಸರ್ ಸೊಡ್ಚೊ?
ಖಂಚ್ಯಾ ಸುವಾತೆರ್ ಸೊಡ್ಲ್ಯಾರೀ ಹೊ ಮಾಣ್ಕೊ ಪಾದ್ರಿಚ್ಯಾ ಘರಾ
ಪಾವಾಚೆ. ಆಪ್ಣೆ ಲಿಖ್ಲ್ಲ್ಯಾ ಪ್ರಕಾರ್ ಮಾಣ್ಕೊ ಪಾದ್ರಿಕ್
ಸೊಧುನ್ ವೆತಾ ಖಂಡಿತ್. ಮಾರ್ಗಾಚ್ಯಾ ಹೆಣೆ ಸೊಡ್ಲ್ಯಾರ್,
ಮಾರ್ಗಾ ದೆಗೆರ್ ತೋಡ್ ಆಸಾ. ತೊಡಾಂತ್ ಕಿಚಡ್ ಆಸಾ. ಆನಿ ಕಿಚಡ್ ಮ್ಹಳ್ಯಾರ್
ಹ್ಯಾ ದಳಿದ್ರ್ ಮಾಣ್ಕ್ಯಾಕ್ ಸರ್ಗಾಚೆಂ ಸುಖ್. ಆಪ್ಣೆ ಬರಯಿಲ್ಲೆಂ
ಸರ್ವ್ ವಿಸರ್ನ್, ಕಿಚಡಿಂತ್ ಲೊಳೊನ್ ಪಡಾತ್ ಜಾಲ್ಯಾರ್?
ಹಾಕಾ ಆತಾಂ ಇಗರ್ಜೆಚ್ಯಾ ದೊರ್ಯಾ ಭಿತರ್ ಸೊಡ್ಚೆಂ. ವ್ಹಡ್ಲೆಂ
ಮಯ್ದಾನ್. ಹೆಣೆ ತೆಣೆ ವೆತಾ ಮ್ಹಣೊನ್ ನಾ. ಸುಖಾನ್ ನಿದೊಂಕ್ ಕಿಚಡ್
ನಾ. ಸೀದಾ ಪಾದ್ರಿಚ್ಯಾ ಘರಾ.
ಪೊತೆಂ ಉಜ್ವ್ಯಾ ಹಾತಿಂ ಘೆವ್ನ್ ನಂಬೂರಿನ್ ದೊರ್ಯಾ ಭಿತರ್ ತಿಳ್ಳೆಂ
ಪಯ್ಸ್ ಥೊಡೆನ್ ಭುರ್ಗೆ ಬೊಲ್ ಖೆಳೊನ್ ಆಸ್ಲ್ಲೆ.
ಪೊತೆಂ ವೊಮ್ತೆಂ ಘಾಲ್ನ್ ಮಾಣ್ಕ್ಯಾಕ್ ಇಗರ್ಜೆಚ್ಯಾ ದೊರ್ಯಾ
ಭಿತರ್ ಘಾಲ್ನ್ ಸೊಡ್ಲೆಂ. ಸುಟ್ಕಾ ಲಾಬ್ಲ್ಲ್ಯಾ ಸಂತೊಸಾನ್
ಮಾಣ್ಕೊ ಉಡ್ಕಾಣಾ ಘಾಲಿತ್ತ್ ಇಗರ್ಜೆದಿಶಿಂ ದಾಂವಾಲಾಗ್ಲೊ.
ನಂಬೂರಿಕ್ ಆನಂದ್-ಪರಮಾನಂದ್! ತಾಚ್ಯಾ ಇಡ್ಯಾಂತ್ಯಿ ರಾಕೊನ್ ರಾವೊನ್
ಮಾಣ್ಕೊ ’ಖಂಯ್ ವೆತಾ’ ಮ್ಹಣೊನ್ ಪಳೆಂವ್ಚಿ ಆತುರಾಯ್.
ಪುಡ್ವೆಂ ಉಕಲ್ನ್ ಧರ್ನ್ ಉದಕ್ ವಿಸರ್ಜನ್ ಕರ್ಚ್ಯಾ ನಿಬಾ
ಸಂಗಿಂ, ದೊರ್ಯಾಕ್ ವೊಣ್ಕೊನ್ ರಾವೊನ್, ಉಡ್ಕಾಣಾ ಘಾಲ್ಚ್ಯಾ
ಮಾಣ್ಕ್ಯಾಕ್ ಪಳೆತ್ತ್ ರಾವ್ಲೊ.
ನಂಬೂರಿಚಿ ’ಶನಿ’ ಇತ್ಲಿ ಜಬ್ಬೊರ್ ಆಸ್ಲ್ಲಿ... ಪಯ್ಸ್ ಖೆಳೊನ್ ಆಸ್ಲ್ಲ್ಯಾ ಭುರ್ಗ್ಯಾಂನಿ ಉಡಯಿಲ್ಲೊ
ಬೋಲ್, ನಂಬೂರಿ ರಾವೊನ್ ಆಸ್ಲೆಲ್ಯಾ ದೊರ್ಯಾ ಲಾಗಿಂಚ್
ಪಡಾಜೆಗೀ! ಬೊಲಾ ಪಾಟ್ಲ್ಯಾನ್ ದಾಂವೊನ್ ಆಯಿಲ್ಲ್ಯಾ ಭುರ್ಗ್ಯಾನಿ
ಮಯ್ದಾನಾರ್ ಉಡ್ಕಾಣಾಂ ಘಾಲ್ಚ್ಯಾ ಮಾಣ್ಕ್ಯಾಕ್ ಪಳೆಲೆಂ.
ಮಾಣ್ಕ್ಯಾಕ್ ಪಳೆಲ್ಲೆ ಭುರ್ಗೆ, ತಾತ್ಕಾಲಾಕ್ ಆಸ್ಚ್ಯಾ ತೊರಾಂಕ್ ಎಕಾ ಫಾತ್ರಾನ್ ಝಡೊಂವ್ಚೆ ಭುರ್ಗೆ ತೆ. ಎಕಾಚ್ ಫಾತ್ರಾನ್
ಮಾಣ್ಕೊ ಮಾಂಡೊ ಫುಟೊನ್ ಉದಾರೆಂ ಪಡ್ತಾನಾ, ದೊರ್ಯಾ ಭಾಯ್ರ್ ರಾವ್ಲ್ಲ್ಯಾ
ಬಾಲನ್ ನಂಬೂರಿಚ್ಯಾ ಮಾಂಡ್ಯಾಕ್ ತೊಣ್ಕ್ಯಾನ್ ಮಾರ್ಲ್ಲ್ಯಾ
ಪರಿಂ ಜಾಲೆಂ!
ಹಾತಿಂ ಧರ್ಲ್ಲೆಂ ಪುಡ್ವೆಂ ಆಪ್ಶೆಂಚ್ ಸಕಯ್ಲ್ ನಿಸಾರ್ಲೆಂ!
ಬಾಕ್ಕಾರಾಂ ಕಾಡಿತ್ತ್ ಘರಾ ಪಾವ್ಲ್ಲ್ಯಾ ತಾಣೆ ಪಯ್ಲೆಂ ಪಂಚಾಂಗ್ ಉಸಯ್ಲೆಂ. ಆಪ್ಲಿ ರಾಶಿ,
ನೆಕೆತ್ರಾ ಸಂಗಿ ತಾಳ್ ಕರ್ನ್ ಪಳೆತಾನಾ, ತಾಕಾ ಲಾಗ್ಲ್ಲಿ ’ಶನಿ’ ಚಿಲ್ಲರ್
ನ್ಹಂಯ್. ಬಗಾರ್ "ಏಳಾರಾಷ್ಟ್ರಾ’ ಮ್ಹಣೊನ್ ಮನನ್ ಜಾಲೆಂ.
ಹಾಕಾ ಮಾಣ್ಕೊ ಚಲಾನಾ, ಕಾಸೊವ್ ಜಾಯ್ಜೆ!
ಕಾಸೊವ್ ಹಾಡ್ಲೊ. ಕಾಸೊವ್ ದಾಡ್ಲೊ. ಧಾ ದೀಸ್ ಉತರ್ಲೆ ಜಾಲ್ಯಾರೀ ಫಳ್
ನಾ. ಕಾಸೊವ್ ಧರ್ನ್ ಕೊಣೆ ಪುನೆವಂತಾನ್ ನಿಸ್ತೆಂ ಕರ್ನ್
ಸುರೆ ಸಾಂಗಾತಾ ಆಂಬುಡ್ಲಾ ಆಸ್ತಲೊ... ಪಿಶೆಂ ಚಿಂತ್ನಾಂ.
"ಹ್ಯಾ ದಳ್ದಿರ್ ಕಿರಿಸ್ತಾಂವ್ ಜಾತಿಕ್ ಮಾಟ್ಯಿ ಲಾಗಾನಾಂಗಿ ದೆವಾ!!" ಉಸ್ವಾಸ್
ಸೊಡ್ಲೊ - ಬಾಲನ್ ನಂಬೂರಿನ್.
ಪರತ್ ಪಂಚಾಂಗ್ ಉಸ್ತಿಲೆಂ. ’ಶನಿ’ ಅಜೂನ್ ಆಸಾತಶಿ ಆಸ್ಲ್ಲಿ, ’ನೆಕೆತ್ರ್’ ಕುಸ್ಕುಟ್ ತರೀ
ಹೆಣೆ-ತೆಣೆ ಹಾಲೊಂಕ್ ನಾತ್ಲ್ಲೆಂ. ರಾಗ್ ತಕ್ಲೆರ್ ಚಡ್ತಾನಾ ಫಾತೊರ್
ಮಾರ್ನ್ ’ನೆಕೆತ್ರ್’ ಝಡಯಾಂ ತಶೆಂ ಭೊಗ್ಲೆಂ ನಂಬೂರಿಕ್.
ನಿಮಾಣೆ ಏಕ್ ವಾಟ್ ಉರ್ಲ್ಲಿ.
ಮಾಟ್ ಕರ್ನ್ ಮಾಂಕೊಡ್ ಧಾಡ್ಚಿ.
ಮಾಂಕೊಡ್ ಧಾಡ್ನ್ ಜಾಲೊ. ದೋನ್ ದಿಸಾಂನಿ ಖಬಾರ್ ಆಯ್ಲಿ.
"ಎಕಾ ಮಾಂಕ್ಡಾಕ್ ಪಾದ್ರಿನ್ ಬಾಂದುನ್ ಘಾಲ್. ಪೆಟ್ಯಾಚಿ ಸಾಂಕಳ್ ಕಾಡ್ನ್
ಮಾಂಕ್ಡಾಚ್ಯಾ ಪೆಂಕ್ಟಾಕ್ ಬಾಂದ್ಲ್ಯಾ. ಆನಿ ತಾಕಾ ಪಾದ್ರಿಚ್ಯಾ ಘರಾ
ಮುಕ್ಲ್ಯಾ ಪೆರಾಂಚ್ಯಾ ರುಕಾ ಭಾಂದುನ್ ಘಾಲಾ" ಖಬರ್
ಹಾಡ್ಲೆಲ್ಯಾನ್ ಹೆಂವೀ ಸಾಂಗ್ಲೆಂ - ಮಾಂಕೊಡ್ ಪಾದ್ರಿಕ್ ಉಮೆ ದಿತಾ!
ಹಾಯ್...ದೆವಾ!
ದುರ್ಗಾ ದೇವ್... ಕಾಳಿಕಾಂಬಾ... ಆನಿ ತುಂ ಹನುಮಾನ್!?
ಹನುಮಾನ್!
ಬಾಲಾನ್ ನಂಬೂರಿಕ್ ದುಸ್ರಿ ವಾಟ್ ನಾತ್ಲ್ಲಿ. ಆತಾಂ ಫಕತ್
ಹನುಮಾನಾನ್ ರಾಕಾಜೆ ಆಸ್ಲ್ಲೆಂ. ಶನಿ ಆನಿ ಮಂಗಳಾ
ವಯ್ರ್ ಜಯ್ತೆವಂತ್ ಜಾಲ್ಲೊ ವೀರಾಗ್ರಣಿ ತೊ. ಸುರ್ಯಾ ದೆವಾಚೊ ಶಿಷ್ಯ್.
ವಾರ್ಯಾಚ್ಯೊ ಸುಪುತ್ರ್. ಇತ್ಲಿಂ ವರ್ಸಾಂ ತುಮ್ಚಿ ಸೆವಾ ಕೆಲ್ಲ್ಯಾ
ಹ್ಯಾ ಕಿರ್ಕೊಳ್ ರಚ್ನೆಚೆರ್ ದಯೆಚಿ ದೀಶ್ಟ್ ಘಾಲ್!
ಸಂಪ್ಲೆಲ್ಯಾ ವರ್ಸಾಂನಿ ಬಾಲನ್ ನಂಬೂರಿನ್ ಹೆರಾಂಕ್ ಸಾಂಗ್ಲಾಂ. ’ಶನಿಚೆ ಉಪದ್ರ್ ಅಸ್ಲೆಲ್ಯಾನಿ, ಸಕಾಳಿಂಚ್ಯಾ ಆದೇಸಾಕ್ ಉಟೊನ್
ನಾಯ್ಚೆ. ದೀಸ್ ಬುಡ್ತಾ ಪರ್ಯಾಂತ್ ಉಪಾಶಿಂ ರಾವಾಜೆ. ಸ್ತ್ರೀಯೆಚೊ
ಸಂಗ್ ಕರ್ಚ್ಯಾಕ್ ನಜೊ’.
ಪುಣ್ ಹೊ ಜಿಂಜ್ವಾರ್ ನಂಬೂರಿನ್ ಅಜೂನ್ ಕೆಲ್ಲೊನಾ. ಆನಿ ತಾಕಾ ಕರ್ಚಿ ಗರ್ಜ್ಯೀ
ಪಡ್ಲ್ಲಿ ನಾ.
ಆತಾಂ ತರೀ...
ಯೆತಾತ್ಯಾ ಸನ್ವಾರಾ, ಜಿಂಜ್ವಾರ್ ಕರ್ನ್, ಹನುಮಾನ್ ತಶೆಂ ಶನಿ ದೆವಾಚಿ ಸ್ತುತಿ ಕರ್ಚೊ ನಿರ್ದಾರ್ ಘೆತಾ ಬಾಲನ್ ನಂಬೂರಿ.
***
ಸಕಾಳಿಂಚ್ಯಾ ಸಾಡೆ-ಪಾಂಚಾಂಕ್ ಉಟ್ಲ್ಲೊ, ಬಾಲನ್ ನಂಬೂರಿ ಹಾತಿಂ ಚೆಂಬು ಘೆವ್ನ್, ನೇತ್ರಾವತಿ ನಂಯ್ ತಡಿಚ್ಯಾ ಪಡ್ಪಾಕ್ ವೆತಾ. ಭರ್ಲ್ಲೆ ಪೋಟ್ ಹಾಳು ಜಾಲೆಂ ಮ್ಹಣೊನ್ ಅನುಭವ್ ಜಾತಾಚ್, ಪಡ್ಪಾರ್ ಥಾವ್ನ್ ದೆಂವೊನ್ ನಂಯ್ತ್ ಬುಡ್ತಾ. ಉದೆಂತಿ ಮಳ್ಬಾರ್ ತಾಂಬ್ಸೊ ಸುರ್ಯೊ ಉದೆತಾ. ತೊ ಉದೆಂವ್ಚ್ಯಾ ಆದಿಂ ನ್ಹಾಣ್ ತಿರ್ಸುಂಕ್ ಜಾಯ್. ಘರಾ ಪಾವೊನ್ ಪೊಟಾಕ್ ಇಲ್ಲೆಂ ಸೆಂವ್ಕ್ ಜಾಯ್. ಉಪ್ರಾಂತ್ ಅಖ್ಖೊ ದೀಸ್ ಜಿಂಜ್ವಾರ್. ’ಭುಳ್ಕ್’ ಕರ್ನ್ ಉದ್ಕಾಂತ್ ಬುಡ್ತಾ. ಸುರ್ಯಾಕ್, ವಾರ್ಯಾಕ್ ಹನುಮಾನಾಕ್, ಸಮೇಸ್ತ್ ದೇವತಾಂಕ್, ದೇವಿಂಕ್ ಅರ್ಘ್ಯ್ ಅರ್ಪಿತ್ ಕರ್ನ್, ಭಿಜ್ಲ್ಲೆಂ ಪುಡ್ವೆಂ ಪೀಳ್ನ್, ಪೆಂಕ್ಟಾಕ್ ಬಾಂದುನ್, ವಯ್ರ್ ಯೆತಾನಾ ಸುರ್ಯೊ ಉದೆಲಾ.
ಶನಿ! ಅನಿ ಜೆವಾಣ್ ನಾ. ಸುರ್ಯೊ ಬುಡ್ತಾ ವರೇಗ್ ಜಿಂಜ್ವಾರ್. ಚಿಂತಾನಾ ಪೊಟಾಂತ್ ’ಕುಳ್ಕ್’ ಜಾತಾ.
ಸಗ್ಳೊ ದೀಸ್ ಜಿಂಜ್ವಾರ್!
ಘರಾ ಯೆತಾನಾ ತರ್ನ್ಯಾ ವಾಸ್ಯಾಚಾ ನಳಿಯೆಂತ್ ಉಕಡ್ಲೆಲೆಂ
ಪುಟ್ಟು ಆನಿ ನಾರ್ಲಾಚಿ ಚೆಟ್ನಿ ತಯಾರ್ ಆಸಾ. ದುದಾಂತ್ ಉಕಡ್ಲೆಲಿ ಚಾ, ಪರ್ಮಳ್ ಫಾಂಕಯ್ತಾ.
ಬಾಯ್ಲ್ ನೆಣಾ, ತಿಚೊ ಪತಿರಾಯ್ ಆಜ್ ಜಿಂಜ್ವಾರಾಚೆರ್ ಆಸಾ
ಮ್ಹಣೊನ್.
"ಆಜ್ ಮ್ಹಕಾ ಜಿಂಜ್ವಾರ್. ತುಂಚ್ ಖಾ" ಮ್ಹಣ್ತಾ. ತಿ ಆಸ್ಡ್ಯೊ
ವಯ್ರ್ ಕರ್ತಾ ಮಾತ್ರ್. ವೊತ್ತಾಯ್ ಕರಿನಾ. ಮಾನ್
ಬಾಗಾವ್ನ್ ಪುಟ್ಟು ಖಾಂವ್ಚ್ಯಾರ್ ಪಡ್ತಾ. ತ್ಯಾ ಸ್ವಾದಿಕ್ ಚೆಟ್ನೆಂತ್
ಪುಟ್ಟು ಬುಡವ್ನ್ ಖಾತಾನಾ, ನಂಬೂರಿಚ್ಯಾ ತೊಂಡಾಂತ್ ಲಾಳ್ ಗಳ್ತಾ. ಗಳ್ಲ್ಲಿ ಲಾಳ್ ಜಿಬೆ ಇಡ್ಯಾಂತ್ ಚಿಂವೊನ್, ಚಿಂವೊನ್ ಗಿಳ್ತಾನಾ,
ನಂಬೂರಿಕ್ ಆಪ್ಣಾಚೆರ್ಚ್ ರಾಗ್ ಯೆತಾ. ಪೋತ್, ಮತಿಕ್ ಶಿರಾಪ್ ಘಾಲ್ತಾ. ಏಕ್ ಕುಡ್ಕೊ ಖಾಂವ್ಯಾ
ಮ್ಹಣೊನ್ ಆಶಾ ಉದೆತಾ.
ನಾ! ಹಾಂವ್ ಜಿಂಜ್ವಾರಾಚೆರ್ ಆಸಾಂ. ಹಿ ದಳ್ದಿರ್ ’ಶನಿ’ ದಾಂವ್ಡಾಂವ್ಕ್ ಜಾಯ್.
ಮನ್ ಘಟ್ ಕರ್ತಾ.
***
ಸಾಂಜೆಚೊ ಸುರ್ಯೊ ಬುಡ್ಚ್ಯಾ ಪಯ್ಲೆಂ ನೇತ್ರಾವತಿ
ನಂಯ್ಕ್, ನಾಂವ್ಕ್ ವೆಚೆಂ ನಂಬೂರಿಚ್ಯಾ ಬಾಯ್ಲೆಚಿ ಆದ್ಲಿ
ಸವಾಯ್. ತಿ ನಾಂವ್ಕ್ ಗೆಲ್ಯಾ. ಹೆಣೆಂ ಸುರ್ಯೊ ಬುಡ್ತಾ.
ಸುರ್ಯೊ ಬುಡೊಂಕ್ಚ್ ರಾಕೊನ್ ರಾವ್ಲ್ಲೊ ನಂಬೂರಿ, ದರ್ವಾಡ್ಯಾಂ ರಾಂದ್ಚ್ಯಾ ಕುಡಾಕ್ ರಿಗೊನ್
ಪಾನಕ್ ಪಿಯೆತಾ, ಭುಕೆನ್ ಚುರ್ಚುಚ್ಯಾ ಪೊಟಾಕ್ ಹೆಂ ಕಿರ್ಕೊಳ್
ಪಾನ್ ಖಂಚಿ ಸರ್? ಹಾಂಡಿಯೊ ಸೊದುನ್ ಇಲ್ಲೆಂ ಜೆವ್ತಾ, ದೂದ್ ಪಿಯೆತಾ. ಥೊಡೆಂ ಆರಾಮ್...
ಹಾಯ್ ದೆವಾ... ಜಿಂಜ್ವಾರ್ ಕರಿನಾಸ್ತಾನಾ ಕಿತ್ಲಿಂ ವರ್ಸಾಂ ಜಾಲಿಂ
ಸುರ್ಯೊ ಉದೆಲ್ಲ್ಯಾ ತವಳ್ ಥಾವ್ನ್, ಬುಡ್ತಾವರೆಗ್ ಅನ್-ಉದಾಕ್
ನಾ! ಹಾಂವ್ ಸಾಂಗ್ತಾಲೊಂ ಆನಿ ತೆ ಕರ್ತಾಲೆ. ಸಾಂಗ್ಚ್ಯಾಕ್ ಆನಿ ಕರ್ಚ್ಯಾಕ್ ಕಿತ್ಲೊ
ವೆತ್ಯಾಸ್!?
ಬಾಪ್ರೆ! ಪೋಟ್ ಘಟ್ ಜಾತಚ್ ಭಾಯ್ರ್ ಸೊಪ್ಯಾರ್ ಆಸ್ಚ್ಯಾ ಇಜಿಚೆರಾಚೆರ್ ದಡ್ಡ್ ಕರ್ನ್
ಪರ್ತಾತಾ. ತಿತ್ಲ್ಯಾರ್..
ನಾಂವ್ಕ್ ಗೆಲ್ಲಿ ಪತಿಣ್, ಪೆಂಕ್ಟಾರ್ ಉದ್ಕಾಚೊ ಬುಡ್ಕುಲೊ ಕಾಣ್ಗೆವ್ನ್
ಪಾಟಿಂ ಯೇವ್ನ್ ಆಸಾ.. ಆಹಾ.. ಕಿತೆಂ ತಿಚಿ ಚಾಲ್. ಕಾತಿನ್ ಚಿಕ್ಕೆಶೆಂ
ಸಾವ್ಳೆಂ ಮ್ಹಣೊನ್ ಮಾತ್ರ್. ತೊಂಡಾ ವಯ್ಲೆಂ ಲಕ್ಷಣ್ ಕಿತೆಂ...?
ನಾವ್ನ್ ಭಿಜ್ಲ್ಲೆಂ ಕಾಪಾಡ್, ಆಸಾ ತಶೆಂಚ್ ಕುಡಿಕ್ ರೆವ್ಡಾವ್ನ್ ಚಲ್ತಾನಾ, ಬಂದಡೆ ಥಾವ್ನ್
ಸುಟೊನ್ ದಾಂವೊಂಕ್ ಆಯ್ತೆ ಜಾಲ್ಲ್ಯಾಪರಿಂ ದಿಸ್ಚೆ ಶ್ರಿಮಂತ್
ವಿಶ್ವೆ. ವೈನಾಡಾಂತ್ಲ್ಯಾ ರಾನಾ ಮದ್ಲೆಂ ಚೆಡುಂ ತೆಂ ತುಜ್ಯಾ
ಶ್ಹೆರಾಚ್ಯಾ, ಅಪಡ್ಲ್ಯಾರ್ ದೊಡ್ಚ್ಯಾ ಚಲಿಯಾಂಪರಿಂ ನ್ಹಯ್.
ವಿಶಾಲ್ ಹರ್ದೆಂ... ಮಟ್ವೆಂ ನಾಕ್...? ದಾಟ್ ವೊಂಟ್.. .ಆಹಾ...ಆಹಾ...
ಬಾಲನ್ ನಂಬೂರಿಚಿ ವಿಂಚವ್ಣ್ ಮ್ಹಳ್ಯಾರೀ ಕಿತೆಂ...? ಸಗ್ಳ್ಯಾ ಉಳ್ಳಾಲಾಂತ್ಚ್ ಲಾಳ್ ಗಳಯ್ಜಯ್! ಆನಿ ತ್ಯಾ
ಮ್ಹಜ್ಯಾ ಪುತಾಕ್ ಅಕ್ಕಲ್ ನಾ. ಮನ್ಶಾಕ್ ಖಾಣ್ ಕಿತ್ಲೆಂ ಗರ್ಜೆಚೆಂ, ತಿತ್ಲೆಂಚ್ ಅಸಲಿ
ವಸ್ತ್ಯೀ ಗರ್ಜೆಚಿ. ಕಾರಾಣ್ ನಾಸ್ತಾನಾ ಮ್ಹಜೆಕಡೆನ್ ರಾಗ್ ಕರ್ನ್ ಗೆಲೊ.
ವಚೊಂಚಿ. ಹಾಂವೆ ಜೊಡ್ಲ್ಲೆಂ ಆಸಾ. ಹಾಂವ್ ಆತಾಂ ಕಾಜಾರ್ ಜಾವ್ನ್ ತೀನ್
ವರ್ಸಾಂ ಜಾಲಿ. ಹಾಚೆ ಥಾವ್ನ್ ಏಕ್ ಭುರ್ಗೆಂ...
ಆಂಗ್ಣಾಕ್ ಪಾವ್ಲ್ಲೆಂ ಬಾಯ್ಲ್. ಕದೆಲಾರ್ ಬಸ್ಲೆಲ್ಯಾ ಪತಿಕ್ ಏಕ್
ಹಾಸೊ ದಿತಾ. ದಸ್ಸ್... ಬಾಲನ್ ನಂಬೂರಿಚೆಂ ಕಾಳಿಜ್ ಖಂಚಿಗೀ ಏಕ್ ಶಿರ್
ಚುಕ್ಲ್ಲ್ಯಾಪರಿಂ...
ನಾ!
ಆಯ್ಚ್ಯಾ ದಿಸಾ ಹಾಂವೆಂ ಆಶೆಂ ಚಿಂತುಂಕ್ ನ್ಹಜೊ. ಹಾಂವ್
ವ್ರತಾಚೆರ್ ಆಸಾಂ. ಜಿಂಜ್ವಾರ್ ಕಸೋಯೀ ಸಂಪ್ಲೊ ತೊ ’ಶನಿ’ ದೆವಾಕ್
ಪ್ರಸನ್ನ್ ಕರುಂಕ್. ಆತಾಂ ’ಕುಡಿಚೊ ಜಿಂಜ್ವಾರ್’ ಬಾಕಿ ಉರ್ಲಾ.
ಹನುಮಾನ್ ದೆವಾಕ್ ಖುಶಿ ಕರುಂಕ್ ಹ್ಯಾ ದೊನಾಂತ್ಲೆಂ ಖಂಚೆಂ ಏಕ್ ಚುಕ್ಲ್ಯಾರೀ
ಹೊ ಜಿಂಜ್ವಾರ್ ಅಧುರೊ. ’ಶನಿ’ ಮ್ಹಜಿ ಪಾಟ್ ಸೊಡ್ಚೊ
ನಾ.
ವೊಡ್ನಿ ದಾಂಬುನ್ ಧರ್ತಾ.
ರಾತಿಂ ಬಾಯ್ಲ್ ಲಾಗಿಂ ಬಸೊನ್, ತೊಪ್ಲ್ಯಾಂತ್ಲೆಂ ಶಿತ್ ದೊಯ್ ಭರ್ನ್
ವಾಡ್ನ್ ಆಸಾ. ತೊರಿದಾಳಿಚೊ ಸಾರ್ "ನಾಕಾ’ ಮ್ಹಳ್ಯಾರೀ ವೊತುನ್ ಆಸಾ.
ನಂಬೂರಿಚಿ ದೀಶ್ಟ್ ಶಿತಾಚೆರೀ ನಾ. ದಾಳಿಚೆರೀ ನಾ. ತೊ ತಿಕಾಚ್ ಪಳೆವ್ನ್ ಆಸಾ.
"ಆಜ್ ಉಪ್ವಾಸ್ ಕರ್ಚೊಗೀ ನಾಕಾ" ಮ್ಹಣೊನ್ ತೊ ಆದ್ಲ್ಯಾ
ಸಾತ್ ದಿಸಾಂ ಥಾವ್ನ್ ಚಿಂತುನ್ಚ್ ಆಸ್ಲ್ಲೊ. ನಿಮಾಣೆಂ ಉಪ್ವಾಸ್ ಕರ್ಚೊ ನಿರ್ದಾರ್ ಆಯ್ಚ್ಯಾ ಸಕಾಳಿಂ
ನಾಂವ್ಕ್ ವೆತಾನಾ ’ದಿಡೀರ್’ ಘೆತ್ಲ್ಲೊ. ತಶೆಂ ಜಾಲ್ಲ್ಯಾನ್ ಆಯ್ಚ್ಯಾ
ದಿಸಾ ಜಿಂಜ್ವಾರ್ ನಾ ಮ್ಹಳ್ಳ್ಯಾ ಚಿಂತ್ನಾನಿ, ಆದ್ಲೊ ತೀನ್ ರಾತಿಂ ತೊ ’ಶನಿ’ಚ್ಯಾ ಚಿಂತ್ನಾನಿ ರೆವ್ಡೊನ್
ಬಾಯ್ಲೆ ಥಾಬ್ ಪಯ್ಸ್ ’ಉಪ್ವಾಶಿಂ’ ನಿದ್ಲ್ಲೊ. ಹ್ಯಾ ಪಾದ್ರಿವರ್ವಿಂ ಆಯಿಲ್ಲೆಂ ಖರ್ಗ್ ನಿಯಾಳ್ನ್ ಘರಾಚೆ
ಪಕ್ಕಾಸ್ ಮೆಜಿತ್ತ್ ಉದಾರೊ ಪಡ್ಲ್ಲೊ. ದೋನ್ ದಿಸಾಂ ಆದಿಂ ತಿಣೆಂಚ್ ಜಾವ್ನ್
’ಕಿತೆಂ ಚಿಂತ್ತಾಯ್?’ ಮ್ಹಣೊನ್ ಸವಾಲ್ ಕರ್ನ್, ಆಪ್ಣಾ ಕುಶಿಕ್ ತೋಂಡ್ ಕರ್ನ್, ಆಂಗಾರ್
ಹಾತ್ ಘಾಲ್ತಾನಾ, ತಿಚೊ ಹಾತ್ ತಾಣೆ ರಾಗಾನ್ ಕಾಡ್ನ್ ಉಡಯಿಲ್ಲೊ.
ರಾಗ್ ಕೊಣಾಚೊ...? ತಿಚೊ ಯಾ ಪಾದ್ರಿಚೊ?
ಆಜ್ ರಾಗ್ ನಿವ್ಲಾ. ಬಾಲನ್ ನಂಬೂರಿ ಪಕ್ಕಾಸ್ ಮೆಜಿತ್ತ್ ಉದಾರೊ ನಿದ್ಲಾ. ಬಗ್ಲೆಕ್
ಪತಿಣ್. ತಿಕಾ ಎದೊಳ್ಚ್ ನೀದ್ ಆಯ್ಲ್ಯಾ ಬಾರಿಕ್ ಘೊರೆತಾ.
ಸಾಂಜೆರ್ ನ್ಹಾಣ್ ತಿರ್ಸುನ್ ತಿ ಚಲೊನ್ ಆಯ್ಲಿ. ಚಾಲ್... ಛೆ...
ಹಾಂವ್ ಆತಾಂ ’ಕುಡಿಚ್ಯಾ ಜಿಜ್ವಾರಾಚೆರ್ ಆಸಾಂ. ಅಸಲಿ ಚಿಂತ್ನಾ... ಉತೊನ್
ವ್ಹಚೊನ್ ಭಾಯ್ರ್ ಸೊಪ್ಯಾರ್ ನಿದ್ಯಾಂ ಮ್ಹಣೊನ್ ಭೊಗ್ತಾ.
ಪುಣ್ ಉಟಾನಾ. ಕಸಲಿಗೀ ವೊಡ್ನ್. ಉಚಾಂಬಳ್ ಜಾವ್ನ್ ಯೆಂವ್ಚಿ ಪಿಶಿಂ ಚಿಂತ್ನಾ... ಏಕ್
ಪಾವ್ಟಿಂ ವೊಮ್ತೆಂ ಉದಾರೆಂ ಲೊಳ್ತಾ.
ಜಿಂಜ್ವಾರ್... ಪಿಶ್ಯಾಂಚೊ ’ಶನಿ’ ಲಾಗ್ಲ್ಯಾರ್ ಕಿತೆಂ ಜಾಲೆಂ? ಹೊ
ದೀಸ್ ಕಾಂಯ್ ಆಪ್ಣಾಚೊ ನಿಮಾಣೊ ನ್ಹಂಯ್. ಹಿ ’ಶನಿ’ ಕಾಂಯ್
ಮ್ಹಜಿ ಪಾಟ್ ಸೊಡ್ನ್ ವೆಚ್ಯಾಪರಿಂ ದಿಸಾನಾ. ಮ್ಹಜ್ಯಾ ’ಶನಿ’ಕ್ ತ್ಯಾ
ಪಾದ್ರಿಕ್ ಕಿತ್ಯಾ ದುರ್ಸಾಜಾಯ್? ಹ್ಯಾ ದಂದ್ಯಾಂತ್ ತೊ ಮ್ಹಜ್ಯಾಕೀ
ಹುಶಾರ್ ಆಸೊಂಕ್ ಪುರೊ. ತ್ಯಾ ದೆಕುನ್ ತಾಚೆ ದೀಸ್ ಉದೆಲ್ಯಾತ್.
ನೀಜ್ ಜಾವ್ನ್ ಮ್ಹಕಾ ’ಶನಿ’ ಲಾಗ್ಲ್ಯಾ ಜಾಲ್ಯಾರೀ, ಜಿಂಜ್ವಾರ್ ಕರುಂಕ್ ಅನಿಕೀ
ಹಜಾರ್ ಸನ್ವಾರ್ ಆಸೊಂಕ್ ಪುರೊ... ಆಜ್ ಮಾತ್ರ್ ಮ್ಹಕಾ ಜಾಯ್... ಜಿಂಜ್ವಾರ್ ಆನ್ಯೇಕ್
ಸನ್ವಾರ್...
ನಿರ್ಧಾರಾಸವೆಂ ನಂಬೂರಿ ಕುಶಿಕ್ ಪರ್ತಾತಾ. ಬಾಯ್ಲ್ ಘೊರೆವ್ನ್ ಆಸಾ. ತಿಚೆ
ಬಾವ್ಳೆ ಹಳ್ವಾಯೆನ್ ಧರ್ನ್ ದಾಂಬ್ತಾ. ತಿಕಾ ಜಾಗ್ ನಾ. ದಾಂಬುನ್
ವೊಡ್ತಾ. ತಿಕಾ ಜಾಗ್ ಜಾತಾ. ನಂಬೂರಿಚ್ಯಾ ದೊಳ್ಯಾಂನಿ ಅತ್ರೆಗ್ ಆಸಾ.
ಮೋಗ್ ಆಸಾ... ತಿಕಾ ಸಮ್ಜಾತಾ. ತಿ ಹಾಸ್ತಾ!
"ಆಜ್ ನಾಕಾ... ಆಜ್ ಮಹಿನ್ಯಾಚೆಂ"
ತಿ ಪರತ್ ವೊಮ್ತೆಂ ನಿದ್ತಾ!
ಶನಿ! ಶನಿ!! ಹಿ ’ಶನಿ’ ಹಾಂಗಾ ಮ್ಹಣಾಸರ್ ಪಾವ್ಲ್ಯಾ.
ಸಂತೊಸಾಚ್ಯಾ ವ್ಹಾಳ್ಯಾಕ್ ಕಾಟ್ ಬಾಂದ್ಲ್ಲಿ ಬಂದಡ್. ಅತ್ರೆಗಾಚ್ಯಾ
ಬೊಂದೆರಾಕ್ ಉಜೊ ದಿಲ್ಲೆಂ ಸಂಕಟ್...
ಬಾಲನ್ ನಂಬೂರಿ ನಿರಾಶಿ ಚಿಂತ್ನಾನ್, ಮಾಂದ್ರೆರ್ಚ್ ಲೊಳ್ತಾ...
ಲೊಳ್ತಾನಾ ಹಾತಾಕ್ ಕಸಲೆಂಗೀ ಲಾಗ್ಲ್ಲ್ಯಾ ಪರಿಂ ಜಾತಾಂ...
ಪಂಚಾಂಗ್!
ದೀಸ್ ರಾತ್ ಸಾಂಗಾತ್ ದಿಂವ್ಚೆಂ. ನಿದ್ತಾನಾ ಉಶ್ಯಾ ಪಂದಾ ದವರ್ಚೆಂ,
ಹಜಾರೊಂ ಮನ್ಶಾಂಚೆಂ ಹಣೆಬರಾಪ್ ಆಟಾಪ್ಲೆಲೆಂ ಗ್ರಂಥ್!
ಮಾತ್ಯಾ ಕಡೆನ್ ದವರ್ಲೆಲ್ಯಾ, ಚಿಮ್ಣೆಚ್ಯಾ ಉಜ್ವಾಡಾಕ್
ಪಂಚಾಂಗ್ ಉಗ್ತೆಂ ಕರ್ತಾ. ಆಪ್ಲಿ ರಾಶಿ ನೆಕೆತ್ರಾ ಸಾಂಗಾತಾ ಸರಿ ಕರ್ನ್
ಸೊದ್ತಾ. ’ಶನಿ’ ಖಂಯ್ಸರ್ ಪಾವ್ಲ್ಯಾ ಮ್ಹಣೊನ್ ಸೊಧಿತ್ತ್ ರಾವ್ತಾ.
ಅಬ್ಳೆ ಥಂಯ್ಸರ್ ತಾಕಾ ಮನನ್ ಜಾತಾ.
"ಬಾಲನ್ ನಂಬೂರಿಚಿ ’ಶನಿ’ ಸುಟೊಂಕ್ ಅನಿಕೀ ತೀನ್ ದೀಸ್
ಬಾಕಿ ಉರ್ಲ್ಯಾತ್!"
***
About us | Feedback | Contact us
Copyright ©
2005 DAAIZ.COM All rights reserved.
Page concept, designed and maintained by Ashawadi Publications
