ಕಾಣ್ಯೊ
ಸಾಹಿತಿಕ್ ಸ್ಪರ್ಧೊ 2004
ಕಥಾಪಾಠ್
ಅಂಕಣಾಂ
ಸಾಹಿತಿಕ್ ಸ್ಪರ್ಧೊ 2005
ಕವಿತಾಂ
ಸಾಹಿತಿಕ್ ಸ್ಪರ್ಧೊ 2006
ದಾಯ್ಜ್ ಶಿಭಿರ್ 2006
ವಿಡಂಬನಾಂ
ದಾಯ್ಜ್ ಶಿಭಿರ್ 2007
ಕಥಾಮೃತ್
ವಿಮರ್ಶೆ
ಕೊಂಕ್ಣಿ ಫುಲಯ್, ಕೊಂಕ್ಣಿ ಪಾಲಯ್, ಕೊಂಕ್ಣಿ ಸದಾಂಚ್ ಬಾಳ್ವೊಂಕ್ ಜಾಯ್.
ಕೊಂಕ್ಣಿ ಕಾರ್ಭಾರಿಣ್ಸಂವಾದಕ್
ಕರ್ಪಿಂ: ಗ್ಲೇಡಿಸ್ ರೇಗೊ ಆನಿ ವಲ್ಲಿ ಕ್ವಾಡ್ರಸ್
ಮೀನಾ ರೆಬಿಂಬಸ್
’ವಿಲ್ಫಿ ರೆಬಿಂಬಸ್ ಆಜ್ ಆಮ್ಚೆ ಮಧೆಂ ನಾ’ ಮ್ಹಳ್ಳೆಂ ಅಖ್ಖ್ಯಾ ಕೊಂಕ್ಣಿ ಸಮಾಜೆಕ್ ಪಾತ್ಯೆಂವ್ಕ್ ನಾಕಾ ಜಾಲ್ಲೆಂ ಕೊಡು ಸತ್. ಪುಣ್ ಗೀತ್ಕಾರ್/ಕವಿ ಜಾವ್ನ್, ಸಾಹಿತ್ಕಾರ್/ನಾಟಕಿಸ್ತ್ ಗಾವ್ಪಿ ಜಾವ್ನ್ ತೊ ಅಜೂನ್ ಆಮ್ಚೆ ಮಧೆಂಚ್ ಆಸಾ, ಆಸ್ತಲೊ ತೆಂ ಖಂಡಿತ್.
"ನಾಂವ್ ಮ್ಹಜೆಂ ವಿಶ್ವಾಸ್
ಮ್ಹಜೆರ್ ದವರಾ ಮಯ್ಪಾಸ್
ಕೊಂಕ್ಣಿ ಶ್ಹೆರಾಂತ್ ಮ್ಹಜೊ ನಿವಾಸ್
ಕೊಂಕ್ಣಿ ಮ್ಹಜಿ ಭಾಸ್" ,
ಹಿಂ ಉತ್ರಾಂ ಕಾಂಯ್ ಪಂಚ್ವೀಸ್-ತೀಸ್ ವರ್ಸಾಧಿಂ, ಭುರ್ಗೊ ವಿಶ್ವಾಸಾನ್ ವೆದಿಚೆರ್ ಗಾಯ್ಲೆಲಿಂ ಉತ್ರಾಂ, ಲಾಖೊಂ ಕೊಂಕ್ಣಿ ಲೊಕಾಂನಿ ಆಯ್ಕೊನ್ ತಾಳಿಯೊ ಪೆಟ್ಲ್ಲ್ಯಾ ಹ್ಯಾ ಪದಾಚಿಂ ಉತ್ರಾಂ ಕೊಂಕ್ಣಿ ಕೊಗುಳ್ ವಿಲ್ಫಿಚಿಂ.
ವಿಲ್ಫಿ ರೆಬಿಂಬಸ್ ಕೊಂಕ್ಣಿ ಸಮಾಜೆಂತ್ ಅಮರ್ ಜಾಲಾ ತರ್, ಏಕ್ ಸಾಹಿತ್ಕಾರ್/ಗೀತ್ಕಾರ್/ಗಾವ್ಪಿ/ನಾಟಕಿಸ್ತ್ ಜಾವ್ನ್ ಮಾತ್ರ್ ನ್ಹಯ್. ಬಗಾರ್ ಅಪ್ಲ್ಯಾ ಖಾಲ್ತ್ಯಾ ಶೆಗುಣಾಕ್ ಲಾಗೊನ್. ಕೆದ್ನಾಂಯ್, ಮಂಗ್ಳುರ್ ಗೆಲ್ಲ್ಯಾ ವೆಳಾರ್ ತಾಚ್ಯಾ ಘರಾಕ್ ಏಕ್ ಭೆಟ್ ದಿಲ್ಲ್ಯಾ/ದಿಂವ್ಚ್ಯಾ ಹರ್ಯೆಕ್ಲ್ಯಾ ಕೊಂಕ್ಣಿ ಅಭಿಮಾನಿಕ್ ಹೆಂ ಕಳಿತ್ ಆಸಾ. ಹಾಂವ್ಯೀ ತಾಂತ್ಲೊಂ ಎಕ್ಲೊ. ಪುಣ್ ಹ್ಯೇ ಪಾವ್ಟಿಂ ಫರಕ್ ಇತ್ಲೊಚ್ಚ್: ದೋನ್ ಅಡೇಜ್ ವರ್ಸಾಧಿಂ ರಿಚ್ಚಿ ಕವ್ತಾರಾಸವೆಂ ಆಯಿಲ್ಲ್ಯಾ ಮ್ಹಾಕಾ ಮೆಳೊನ್, ಮ್ಹಾಕಾ ಆಯ್ಕೊನ್, ಸಮ್ಜೊನ್, ಮೊಗಾನ್ ಉಲಯಿಲ್ಲೊ ವಿಲ್ಫಿಯಾಬ್ ಹ್ಯೇ ಪಾವ್ಟಿಂ ನಾತ್ಲ್ಲೊ, ಪುಣ್ ಗ್ಲೇಡಿಸ್ ರೇಗೊಸವೆಂ ತಾಚ್ಯಾ ಘರಾ ಗೆಲ್ಲ್ಯಾ ಆಮ್ಕಾಂ ಮನ್ಶಾಪಣ್/ಮಾಯಾಮೋಗ್ ತಾಚ್ಯಾ ಘರಾಂತ್ ಭರ್ಪೂರ್ ಆಸ್ಲ್ಲೊ. (ಗ್ಲೇಡಿಸ್ ಬಾಯೆಸವೆಂ ಥೊಡೊ ವೇಳ್ ಕೊಂಕ್ಣಿ ವಾವ್ರ್ ಕರ್ಚೆಂ ಭಾಗ್ ಮ್ಹಾಕಾ ದೆವಾನ್ ಫಾವೊ ಕೆಲ್ಲ್ಯಾಕ್ ತಾಕಾ ಧಿನ್ವಾಸ್)
ಹೆಚ್ಚ್ ಮುಲಾಗತೆಂತ್ ಜಾಲ್ಲ್ಯಾ ಉಲವ್ಣ್ಯಾಚೊ ಸಾರ್ ಹೊ:
1. ಕೊಂಕ್ಣಿ ಲೊಕಾಕ್ ಆಜ್ ಪಾಸೊನ್ ವಿಲ್ಫಿ ರೆಬಿಂಬಸ್ ನಾ ಮ್ಹಳ್ಳೆಂ ಸತ್ ಜಿರಂವ್ಕ್ ಕಶ್ಟಾಂಚೆಂ ಜಾಲಾಂಸ್ತಾಂ, ತಾಚ್ಯೊ ವಿಲ್ಫಿ ನಾಯ್ಟ್ ಮುಖಾರ್ಸುನ್ ವರ್ಚೆಂ ಮಿಸಾಂವ್ ಮುಖಾರುಂಕ್ ತುಮ್ಕಾಂ ಕಸಲೆಂ ಪ್ರೇರಣ್ ಮೆಳ್ಳೆಂ?
ಜಾಪ್: ಕೊಂಕ್ಣಿ ಲೊಕಾಂನಿ ದಿಲ್ಲೊ, ತಶೆಂಚ್ ದೀವ್ನ್ ಆಸ್ಚೊ ಮೋಗ್ ಆಮ್ಕಾಂ ಹೆಂ ಮಿಸಾಂವ್ ಮುಖಾರುನ್ ವ್ಹರುಂಕ್ ಪ್ರೇರಿತ್ ಕರುಂಕ್ ಸಕ್ಲೆಂ.
2. ಕೊಂಕ್ಣಿ ಸಮಾಜೆಕ್ ವಿಲ್ಫಿನ್ ಏಕ್ ಸಾಹಿತ್ಕಾರ್ ಜಾವ್ನ್, ಏಕ್ ನಾಟಕಿಸ್ತ್ ಜಾವ್ನ್, ಏಕ್ ಗಾವ್ಪಿ ಜಾವ್ನ್ ಜಾಯ್ತೆಂ ದಿಲಾಂ. ಇತ್ಲೆಂಚ್ ನ್ಹಯ್, ತಾಚ್ಯಾ ನಾಯ್ಟಾಂ ಧ್ವಾರಿಂ ಗಾಂವ್ಚ್ಯಾ ತಶೆಂಚ್ ಪರ್ಗಾಂವ್ಚ್ಯಾ ಜಾಯ್ತ್ಯಾಂಕ್ ಫಾಯ್ದೊ ಜಾಲಾ. ತುಮಿಂ ಸಯ್ತ್ ಹ್ಯಾ ದಿಶೆನ್ ಚಿಂತಾಪ್ ವ್ಹಾಳಯ್ಲಾಂ?
ಜಾಪ್: ಕೊಂಕ್ಣಿ ಸಮಾಜೆನ್ ಆಮ್ಕಾಂ ದಿಲ್ಲ್ಯಾ ಮೊಗಾಕ್ ಆಮಿ ಸದಾಂ ಋಣಿಂ ಜಾವ್ನಾಸಾಂವ್, ಕೊಂಕ್ಣಿ ಸಮಾಜೆಕ್ ಜರ್ ವಿಲ್ಫಿ ನಾಯ್ಟಿಂ ಥಾವ್ನ್ ಮಜತ್ ಮೆಳ್ತಾ ತರ್ ಆಮಿ ತ್ಯಾ ಪಾಸತ್ ಕೆದಿಂಚ್ ಪಾಟಿಂ ಸರ್ಚಿಂ ನಾಂವ್. ಜ್ಯೆಂ ಮಿಸಾಂವ್ ವಿಲ್ಫಿನ್ ಸುರು ಕೆಲ್ಲೆಂ, ಜ್ಯಾ ಮಿಸಾಂವಾ ಖಾತಿರ್ ವಿಲ್ಫಿನ್ ಅಪ್ಲೆಂ ಆವ್ಕ್ ಝರಯಿಲ್ಲೆಂ, ಹ್ಯೆಂ ಮಿಸಾಂವ್ ಸರ್ವ್ ಕೊಂಕ್ಣಿ ಲೊಕಾಂನಿ ಖಾಯ್ಸ್ ಕೆಲ್ಲೆಂ, ತೆಂ ಮಿಸಾಂವ್ ಮುಖಾರುನ್ ವ್ಹರ್ಚೆಂ ಅಮ್ಚೆಂ ಕರ್ತವ್ಯ್ ಮಾತ್ರ್ ನ್ಹಯ್, ಏಕ್ ಜವಾಭ್ದಾರಿ ಮ್ಹಣ್ ಆಮ್ಕಾಂ ಭಗ್ತಾ.
3. ವಿಲ್ಫಿಯಾಬಾಚೆಂ ಸರ್ವ್ ರಿತಿಚೆಂ ಸಾಹಿತ್ (ಜಾಂವ್ ಮಟ್ವ್ಯೊ ಕಾಣ್ಯೊ, ಜಾಂವ್ ನಾಟಕ್, ಜಾಂವ್ ಪದಾಂ) ಅಜೂನ್ ಮ್ಹಣಾಸರ್, ಜಾಯ್ತೊ ತರ್ನೊ ತಸೊಚ್ ಪರ್ನೊ ಲೋಕ್ ಅಜೂನ್ ಪಸಂದ್ ಕರ್ನ್ ಆಸಾ. ಆತಾಂ ವಿಲ್ಫಿಯಾಬಾಚೆಂ ಚಿಂತಾಪ್ ಭಂದ್ ಪಡ್ಲೆಂ ಮ್ಹಣ್ ತುಮ್ಕಾಂ ಭಗ್ತಾಗೀ?
ಜಾಪ್: ನಾ. ವಿಲ್ಫಿಚೆಂ ಚಿಂತಾಪ್ ಮುಖಾರುನ್ ವ್ಹರುಂಕ್ ವೀಣಾ ತಶೆಂಚ್ ವಿಶೂ ಪ್ರೇತನ್ ಕರ್ನ್ ಆಸಾತ್. ಆಯ್ಲೆವಾರ್ ತಾಣಿಂ ಥೊಡಿಂ ಪದಾಂ ಘಡ್ಲ್ಯಾಂತ್ ಆನಿ ತಾಂಕಾ ತಾಳೆ ಬಸವ್ನ್ ಲೊಕಾಂ ಮುಖಾರ್ ಹಾಡ್ನ್ ಯೆಂವ್ಚಿಂ ಯೋಜನಾಂ ಮನಾಂತ್ ಆಸಾತ್. ವಿಲ್ಫಿಕ್ ಲೊಕಾನ್ ದಿಲೆಲ್ಯಾ ಭರ್ಪೂರ್ ಮಾಯ್ಪಾಸಾಪರಿಂ ವೀಣಾ/ವಿಶೂಕ್ ಸಯ್ತ್ ಕೊಂಕ್ಣಿ ಲೋಕ್ ತೊಚ್ಚ್ ಮಯ್ಪಾಸ್ ದಿತಲೊ ಮ್ಹಳ್ಳೊ ಆಮ್ಚೊ ಭರ್ವಸೊ.
4. ವಿಲ್ಫಿಯಾಬ್ ಆಪ್ಲ್ಯಾ ಪದಾಂಚ್ಯಾ ಉತ್ರಾಂಕ್ ವ ಅಖೇರ್ ಕರ್ಚ್ಯಾ ಸಬ್ಜೆಕ್ಟಾಕ್ ಲಾಗೊನ್ ಇತ್ಲೊ ಸೂಕ್ಶ್ಮ್ ಆಸ್ಲೊ ಮ್ಹಳ್ಯಾರ್ ಥೊಡೆ ಪಾವ್ಟಿಂ ರಾತ್ಭರ್ ನಿದಾನಾಸ್ತಾಂ ಭಾಯ್ರ್-ಭಿತರ್ ಅಪ್ಲ್ಯಾಚ್ ಸಂಸಾರಾಂತ್ ಮಗ್ನ್ ಜಾತಾಲೊ ಮ್ಹಣ್ ಖತಾರಾಂತ್ ಎಡ್ಡಿ ಸಿಕೇರಿ ಥಾವ್ನ್ ಆಯ್ಕಾಲ್ಲೆಂ ಹ್ಯೇ ವಿಶಿಂ ತುಮ್ಚೆ ವಿಚಾರ್ ಕಸ್ಲೆ?
ಜಾಪ್: ಖರೆಂಚ್ ತೆಂ. ವಿಲ್ಫಿಕ್ ಜೊಕ್ತಿಂ ಉತ್ರಾಂ ಮೆಳಾನಾಂತ್ ತರ್, ಹೆಚ್ಚ್ಪರಿಂ ಜಾಯ್ತೆಂ ಚಿಂತಾಲೊ, ವಾಚ್ತಾಲೊ ಆನಿ ಆಪ್ಲ್ಯಾಚ್ಚ್ ಸಂಸಾರಾಂತ್ ಮಗ್ನ್ ಜಾತಾಲೊ. ಕೆದ್ನಾಂಯ್ ಜೊಕ್ತಿಂ ಉತ್ರಾಂ ನಾಸ್ತಾಂ, ಜೊಕ್ತೊ ವಿಶಯ್ ನಾಸ್ತಾಂ ತೊ ಪದಾಂ/ನಾಟಕ್ ಬರಂವ್ಕ್ ಮುಖಾರ್ ಸರಾನಾತ್ಲ್ಲೊ. ಹಿ ಶಿಸ್ತ್ಚ್ ತಾಚ್ಯಾ ಹರ್ಯೆಕಾ ಪದಾಂಕ್ ಆಜ್ ಪಾಸತ್ ಲೊಕಾಮೊಗಾಳ್ ದವ್ರುಂಕ್ ಕಾರಣ್.
5. ವಿಲ್ಫಿಯಾಬಾಕ್ ಕೊಂಕ್ಣಿ ಸಮಾಜೆಚೊ ಹುಸ್ಕೊ ಭರ್ಪೂರ್ ಆಸ್ಲೊ. ಸಮಾಜೆಂತ್/ಫಿರ್ಗಜೆಂತ್ ತಾಣೆಂ ಜಾಯ್ತೊ ವಾವ್ರ್ ಕೆಲಾಸ್ತಾಂ, ಜೆಪ್ಪು ಫಿರ್ಗಜೆಂತ್ ವಿಲ್ಫಿಯಾಬಾಚೊ ಉಡಾಸ್ ಕಸೊ ಕಾಡ್ತಾತ್?
ಜಾಪ್: ಸಾಂ|ಜುಜೆ ಫಿರ್ಗಜೆಚ್ಯಾ ಹರ್ಯೆಕ್ಲ್ಯಾಚಾ ಮಾನಾಚೊ ವೆಕ್ತಿ ಜಾವ್ನಾಸ್ಲೊ ’ವಿಲ್ಫಿ’. ಹೆಚ್ಚ್ ಪಾಸತ್ ಹ್ಯಾ ವರ್ಸಾಚ್ಯಾ ನವೆಂಬ್ರಾಚ್ಯಾ 27 ತಾರಿಕೆರ್, ಜೆಪ್ಪು ಫಿರ್ಗಜೆಚೊ ದೀಸ್ ಮ್ಹಣ್ ನಮ್ಯಾರ್ಲಾ, ಹ್ಯಾ ದಿಸಾಚ್ಯಾ ತಯಾರಾಯೆನ್, ಫಿರ್ಗಜೆವಾರ್ ಕೊಂಕ್ಣಿ ಗಾಯನ್ ಸ್ಪರ್ಧೆ ಆಸಾ ಕೆಲ್ಯಾತ್, ವಿಲ್ಫಿಚಿಂ ಏಕ್ ಮಟ್ವಿ ಕಾಣಿ ’ಪಿಂತ್ರಾಂ’, ನಾಟ್ಕುಳೊ ಜಾವ್ನ್ ಖೆಳಯ್ತಾತ್. ತಾಚಿಂ ಪದಾಂ ಗಾವ್ನ್ ತಾಚೊ ಉಡಾಸ್ ಕಾಡ್ತಾತ್, ಆನಿ ಹ್ಯಾ ಮುಖಾಂತ್ರ್ ಎಕ್ಟಾಂಯ್ ಜಾಲ್ಲೊ ಐವಜ್, ಪ್ರಾಯ್ವಂತಾಂಚ್ಯಾ ಆಶ್ರ್ಯಾಕ್ ದಿಂವ್ಚಿ ಯೆವ್ಜಣ್ ಫಿರ್ಗಜೆನ್ ಘಾಲ್ಯಾ. ಹೊ ಫಿರ್ಗಜ್ ದಿವಸ್ ವರ್ಸಾನ್ ವರಸ್ ಆಚರಣ್ ಕರ್ಚೆಂ ಮಿಸಾಂವ್ ಜೆಪ್ಪು ಫಿರ್ಗಜೆನ್ ಘಾಲಾಂ. ಜೆಪ್ಪು ಫಿರ್ಗಜೆಕ್ ವಿಲ್ಫಿಚೊ ಉಡಾಸ್ ಸದಾಂಚ್ ಆಸ್ತಲೊ ಮ್ಹಳ್ಳೆಂ ಖಂಡಿತ್.
6. ಆಯ್ಚಿ ಕೊಂಕ್ಣಿ ಪರಿಗತ್ ಪಳೆತಾನಾ ’ಕೊಂಕ್ಣಿ ಸಂಗೀತಾಖಾತಿರ್, ಅಪ್ಲೊ ಫುಡಾರ್ ಅರ್ಪಿತಾಂ’ ಮ್ಹಳ್ಳೆಂ ಚಿಂತಾಪ್ ಮುಖಾರುಂಕ್ ತುಕಾ ವಿಶ್ವಾಸ್ ಧಯ್ರ್ ಭಗ್ತಾ?
ವಿಶೂಚಿ ಜಾಪ್: ’ವಿಲ್ಫಿ ಕ್ರಿಯೇಶನ್ಸ್’ ಮ್ಹಳ್ಳೆಂ ಸ್ಟೋರ್ ಹಾಂವ್ ಚಲವ್ನ್ ಆಸಾಂ, ಪುಣ್ ಕೊಂಕ್ಣಿ ಮ್ಹಜಿ ಪಯ್ಲಿ ವಿಂಚವ್ಣ್, ಕಿತ್ಯಾಕ್ ಮ್ಹಳ್ಯಾರ್ ಮ್ಹಾಕಾ ಕೊಂಕ್ಣಿ ಸಮಾಜೆಚೆರ್ ವರ್ತೊ ಭರ್ವಸೊ ಆಸಾ, ಜ್ಯಾ ಮಟ್ಟಾಕ್ ಮ್ಹಜ್ಯಾ ಆವಯ್-ಬಾಪಾಯ್ಕ್ ತಶೆಂಚ್ ಆಮ್ಕಾಂ ದಿಲ್ಲೊ ಮಾಯ್ಪಾಸ್ ಪಳೆತಾನಾ, ಮ್ಹಾಕಾ ಭಗ್ತಾ; ಆಮಿ ಕೊಂಕ್ಣಿ ಸಮಾಜೆಚೊ ವರ್ತೊ ಮೋಗ್ ಕೆಲೊ ತರ್, ತೆಚ್ಚ್ ಮಾಪಾನ್ ಆಮ್ಕಾಂ ತೊ ಮೋಗ್ ಪಾಟಿಂ ಮೆಳ್ತಲೊ. ಆನಿ ಮೋಗ್-ಮಯ್ಪಾಸ್ ಆಮಿ ದುಡ್ವಾನ್ ವಾ ಆಸ್ತ್-ಬದ್ಕಾಂತ್ ಮೆಜುಂಕ್ ಸಕ್ಚೆಂನಾಂವ್. ಹ್ಯಾ ಸಂಸಾರಾಂತ್ ಮೋಗ್-ಮಾಯ್ಪಾಸಾಕ್ ಕಸ್ಲೆಂಚ್ ಸರ್ ನಾ.
7. ವಿಲ್ಫಿನ್ ಬರಯಿಲ್ಲಿಂ ಪುಣ್ ಗಾಯ್ನಾತ್ಲ್ಲಿಂ ಪದಾಂವಿಶಿಂ ತುಮ್ಚಿಂ ಯೋಜನಾಂ ಕಸಲಿಂ?
ಜಾಪ್: ವಿಲ್ಫಿನ್ ಬರಯಿಲ್ಲಿಂ ಕಾಂಯ್ ದೋನ್ ಹಜಾರಾಂವಯ್ರ್ ಪದಾಂ ಅಜೂನ್ ಆಸಾತ್. ತಾಕಾ ಫುಡೆಂ ಜೊಕ್ತೆ ತಾಳೆ ಬಸವ್ನ್, ಕೊಂಕ್ಣಿ ಲೊಕಾಂಕ್ ಅರ್ಪಿತ್ ಕರ್ಚೆಂ ಯೋಜನ್ ಆಮ್ಚ್ಯಾ ಮತಿಂತ್ ಆಸಾ.
8. ಕಾಳ್ ಬದಲ್ಲಾ ತರ್ಯೀ, ಕೊಂಕ್ಣಿ ಸಮಾಜೆಕ್ ಆಸ್ ಪಾಸೊನ್ ವಿಲ್ಫಿ ನಾಯ್ಟ್ ಪಳೆಂವ್ಚಿ ಆಶಾ ಉಣಿಂ ಜಾಂವ್ಕ್ ನಾ. ದೆಕುನ್ ’ವಿಲ್ಫಿ ನಾಯ್ಟ್’ ಪರತ್ ಮುಖಾರುನ್ ವರ್ಚ್ಯಾ ತುಮ್ಚ್ಯಾ ಯೋಜನಾಂಕ್ ಕೊಣಾಥಾವ್ನ್ ಪಾಟಿಂಬೊ ಲಾಭ್ಲಾ?
ಜಾಪ್: ಖರೆಂಚ್ ಜಾವ್ನ್ ಕೊಂಕ್ಣಿ ಸಮಾಜೆಚ್ಯಾ ಹ್ಯಾ ಮೊಗಾ ಖಾತಿರ್ ಆಮಿ ಋಣಿಂ ಆಸಾಂವ್. ಸದ್ದ್ಯಾಕ್ ಖತಾರಾಂತ್, ತಶೆಂಚ್ ಮುಂಬಯಾಂತ್ಲ್ಯಾ ಮಿರಾರೋಡಾಂತ್ ವಿಲ್ಫಿ ನಾಯ್ಟ್ ಆಮಿ ಕರ್ತೆಲ್ಯಾಂವ್, ತೆಚ್ಚ್ ಪರಿಂ ಹೆರಾಂನಿ ಸಯ್ತ್ ವಿಲ್ಫಿ ನಾಯ್ಟ್ ಕರಂವ್ಚಿ ಉರ್ಭಾ ಆನಿ ಆಸಕ್ತ್ ವೆಕ್ತ್ ಕೆಲ್ಯಾ. ಕೊಂಕ್ಣಿ ಸಮಾಜೆಕ್ ವಿಲ್ಫಿ ಕುಟ್ಮಾಥಾವ್ನ್ ಸದಾಂಚ್ ಪಾಟಿಂಬೊ ಆಸ್ತಲೊ. ಆನಿ ತೆಚ್ಚ್ಪರಿಂ ಆಮ್ಕಾಂ ಕೊಂಕ್ಣಿ ಸಮಾಜೆಥಾವ್ನ್ ಪಾಟಿಂಭೊ ಮೆಳ್ಚೊ ಭರ್ವಸೊ ಆಮ್ಚೊ.
9. ವಿಲ್ಫಿಯಾಬಾಚ್ಯಾ ಸಾಹಿತ್ಯಾಕ್ ಬುಕಾರುಪಾರ್ ಪರ್ಗಟ್ಚೆವಿಶಿಂ ತುಮ್ಚೆ ವಿಚಾರ್ ಕಸ್ಲೆ?
ಜಾಪ್: ಸಾಂ|ಜುಜೆ ನಾಟಕ್ ಸಂಘಾನ್ ಎದೊಳ್ಚ್ಚ್ ತಾಚ್ಯಾ ಮಟ್ವ್ಯಾ ಕಾಣ್ಯಾಂಚೊ ಬೂಕ್ ’ಕೊಗುಳ್ ಉಲಯ್ತಾ’ ಪರ್ಗಟ್ಲಾ. ತಾಚ್ಯಾ ಹೆರ್ ಸಾಹಿತಾಕ್; ನಾಟಕ್, ನೀಳ್ಗಥಾಂಕ್ ಫುಡ್ಲ್ಯಾ ದಿಸಾಂನಿ ಬುಕಾರುಪಾರ್ ಪರ್ಗಟ್ಚೆಂ ಚಿಂತಾಪ್ ಆಸಾ. ತೆಚ್ಚ್ಪರಿಂ ವಿಲ್ಫಿನ್ ಬರಯಿಲ್ಲಿಂ ಪುಣ್ ತಾಳೆ ಬಸಯ್ನಾತ್ಲ್ಲಿಂ ಪದಾಂಕ್ ಫುಡೆಂ ಸಿಡಿ ರುಪಾರ್ ಹಾಡ್ಚಿ ಆಲೋಚನ್ ಆಸಾ.
10. ಪಳೆಂವ್ಕ್ ತಶೆಂಚ್ ಖಾಲ್ತೆಪಣಾಕ್ ವಿಲ್ಫಿಯಾಬಾಪರಿಂಚ್ ದಿಸ್ಚ್ಯಾ ವಿಶು ತುಕಾ ಆನಿ ತುಜ್ಯಾ ಮಿಸಾಂವಾಕ್ ಸರ್ವ್ ಬರೆಂ ಮಾಗ್ತಾಂವ್, ಮೀನಾಬಾಯ್ - ತುಕಾ ಸದಾಂಚ್ ಬರಿ ಭಲಾಯ್ಕಿ ಮಾಗ್ತಾಂವ್, ತುಜ್ಯಾ ತೊಂಡಾರ್ ಸ್ವಾದಿಕ್ ಹಾಸೊ ಸದಾಂಚ್ ಉರೊಂದಿ ಮ್ಹಣ್ ಮಾಗ್ತಾಂವ್, ತಶೆಂಚ್ ತುಮ್ಚ್ಯಾ ಕುಟ್ಮಾಕ್ ಬರೆಂಚ್ ಮಾಗ್ತಾಂವ್.
ಜಾಪ್: ದೇವ್ ಬರೆಂ ಕರುಂ ಗ್ಲ್ಯಾಡಿಸ್ ಬಾಯ್ ಆನಿ ವಲ್ಲಿ.
About us | Feedback | Contact us
Copyright ©
2005 DAAIZ.COM All rights reserved.
Page concept, designed and maintained by Ashawadi Publications
