ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಕವಿತಾಪಾಠ್ ಮ್ಹಳ್ಯಾರ್ ಕಿತೆಂ ಮ್ಹಳ್ಳ್ಯಾಚಾ ಸವಿಸ್ತಾರ್ ವಿವರಾಂಕ್ ಹ್ಯಾ ಪಾನಾಕ್ ಭೆಟ್ ದಿಯಾ
ಕವಿವಿಶ್ಯಾಂತ್ ಥೊಡೆಂ: ಕೊಂಕ್ಣಿ ವರ್ತುಲಾಂತ್ ಭೋವ್ ಫಾಮಾದ್ ಹೊ - ಸಂಯ್ಬಾನ್ ಏಕ್ ಮುಖೆಲಿ, ಪತ್ರಿಕೋಧ್ಯಮಿ, ನಾಟಕಿಸ್ತ್, ಕಾಣ್ಯೆಗಾರ್, ಕವಿ ತೆಚ್ಚ್ಪರಿಂ ಏಕ್ ಸಂವೇದನಾಶೀಲ್ ಕೊಂಕ್ಣಿ ಮೋಗಿ ಆನಿ ಗರ್ಜೆವಂತಾಂಕ್ ಕುಮೊಕ್ ಕರ್ಚಾಂತ್ ಎಕಾ ಪಾಂಯಾರ್ ಉಭೊ ರಾಂವ್ಚೊ. ಪಾಟ್ಲ್ಯಾ ಥೊಡ್ಯಾ ವರ್ಸಾಂನಿ ಹಾಚಿ ಸಾಹಿತಿ ಕೃಶಿ ನಿಜಾಯ್ಕ್ಯೀ ಮಾಂಧ್ಚೆ ತಸಲಿ, ಪ್ರತ್ಯೇಕ್ ಜಾವ್ನ್ ಹಾಚಿಂ ಕವಿತಾ.
- ವಲ್ಲಿ ಕ್ವಾಡ್ರಸ್
ಆಸ್ಟಿನ್ ಡಿ’ಸೋಜ್ ಪ್ರಭು
ಆಡೊಸಾಂತ್ಲಿಂ ಫುಲಾಂ
ಹೊ ಕವಿ ಆಡೊಸಾಂತ್ಲೊ
ಮನ್ಶ್ಯಾ ಜಿವಿತ್ ಕ್ಷಣಿಕ್ ದೆಖುನ್ ಮೆಳ್ಲ್ಲ್ಯಾ ಎಕಾ ಜಿಣ್ಯೆಂತ್ ಮನಿಸ್ ಹರ್ಯೆಕ್ ಸಂಗ್ತ್ಯೊ ಆಪ್ಣಾಂವ್ಚೆಂ ಪ್ರೇತನ್ ಕರ್ತಾ. ಹಾಂತ್ಲ್ಯಾ ಥೊಡ್ಯಾಂತ್ ಅಪ್ಲೊಚ್ ಸ್ವಾರ್ಥ್ ಆಸೊಂಕ್ ಪುರೊ ತರ್ಯೀ ಸಭಾರ್ ಪಾವ್ಟಿಂ ಮನಿಸ್ ಅಪ್ಲ್ಯಾ ಮೊಗಾಚ್ಯಾಂಕ್ಯೀ ಅಪ್ಲ್ಯಾಂತ್ಲೆಂ ಜಾಯ್ತೆಂ ದಿತಾ - ಹೆಂ ವಾಜ್ಬಿ ಮನ್ಶಾ ಸಂಯ್ಬ್.
ಸಂಸಾರಾಂತ್ ಜಿಯೆತೆಲ್ಯಾ ಹರ್ಯೆಕಾ ಮನ್ಶ್ಯಾಕ್ ಏಕ್ ನ್ಹಂಯ್ ಏಕ್ ದೆಣೆಂ ಆಸಾ ತರ್ಯೀ ಭೊವ್ ಥೊಡೆ ಆಸಾತ್ ತಾಂಕಾಂ ಸಭಾರ್ ದೆಣಿಂ ಆಸಾತ್ ಆನಿ ಹರ್ಯೆಕಾ ವಾಟೆನ್ ಮನಿಸ್ ತಿಂ ದೆಣಿಂ ಆಪ್ಲ್ಯಾ ತಾಂಕಿಭಿತರ್ ವೃದ್ದಿ ಕರುಂಕ್ ಆಶೆತಾ. ಹಾಂವ್
ಅಜೂನ್ ಮುಖಾಮುಖಿ ಭೆಟೊಂಕ್ ನಾತ್ಲ್ಲೊ ತರ್ಯೀ ಕೊಂಕ್ಣಿ ವರ್ತುಲಾಂತ್ ಭೋವ್ ಫಾಮಾದ್, ಸರ್ವಾಂಕ್ ಮೊಗಾಚೊ, ಖಾಲ್ತೊ ಬಾಬ್ ಆಸ್ಟಿನ್ ಪ್ರಭುವಿಶಿಂ ಹಾಂವ್ ಆಯ್ಕೊನ್ ಆಯ್ಲಾಂ ದಾಕ್ಡ್ಯಾಂ ಥಾವ್ನ್. ಜಾಂವ್ ತಾಚೆಂ ಮುಖೇಲ್ಪಣ್, ಜಾಂವ್ ತಾಚೆಂ ಪತ್ರಿಕೋಧ್ಯಮ್, ಜಾಂವ್ ತಾಚೊ ಕೊಂಕ್ಣಿ ಮೋಗ್, ಜಾಂವ್ ತಾಣೆಂ ಹೆರಾಂಕ್ ದಿಂವ್ಚೊ ಆಧಾರ್. ಜಾಂವ್ ಏಕ್ ಕಾಣ್ಯೆಗಾರ್ ಜಾವ್ನ್, ಜಾಂವ್ ಏಕ್ ಕವಿ ಜಾವ್ನ್.. ಹ್ಯಾ ಬಾಬ್ ಆಸ್ಟಿನಾಚಿಂ ರುಪಾಂ ವೆವೆಗ್ಳಿಂ, ಪಾತ್ರ್ ವೆವೆಗ್ಳೆ ತರ್ಯೀ ಕಾಳಿಜ್ ಏಕ್ಚ್ ಆನಿ ತ್ಯಾ ಕಾಳ್ಜಾಂತ್ ಸದಾಂಚ್ ಝಳ್ಚೊ ದಿವೊ ಕೊಂಕ್ಣೆಚೊಚ್. ಕೊಣಾಕ್ ಹೆಂ ಸೊಸುಂ ಕೊಣಾಕ್ ಸೊಸಾನಾಂ ಜಾಂವ್! ಬಾಬ್ ಆಸ್ಟಿನ್ ಮಾತ್ರ್ ತಾಲೆಂತಾಂಚೊ ಪುಂಜೊ ಮ್ಹಳ್ಳೆಂ ಮಾತ್ರ್ ಸತ್!
ಪಾಟ್ಲ್ಯಾ ಥೊಡ್ಯಾ ವರ್ಸಾಂನಿ ಕೊಂಕ್ಣೆಂತ್ ಉಟ್ಲ್ಲ್ಯಾ ಸಾಹಿತಿಕ್ ವಾದಾಳಾಂತ್ ವೆಳಾಕಾಳಾಚಾ ವೊಜ್ಯಾಪಂದಾ ಪಡ್ಲ್ಲೆ ಎಕೆಕ್ಚ್ ಕವಿ ವಯ್ರ್ ಪಡ್ಲೆ ಆನಿ ಎಕಾನೇಕ್ ಕವಿ ಅಶೇಯ್ ಉದೆಲೆ ಮ್ಹಳ್ಯಾರ್, ಥೊಡೆಪಾವ್ಟಿಂ ಹ್ಯಾ ಸರ್ವಾಂನಿ ಬರಯಿಲ್ಲ್ಯೊ ನಿಜಾಯ್ಕ್ಯೀ ’ಕವಿತಾ’ ಗಿ ವಾ ಹೆರ್ ಕಿತೆಂಗೀ? ಮ್ಹಳ್ಳೊ ದುಭಾವ್ಯೀ ಉಟ್ಲೊ. ಹೆಂ ವಾಜ್ಬಿ!! ಕಿತ್ಯಾಕ್ ದಾಕ್ಡ್ಯಾಧಿಂ ಉಸ್ವಾಸ್-ಜೀವ್-ಕೂಡ್ ಆಸ್ಲ್ಲೆ, ಹೆಚ್ಚ್ ತವಳ್ ಕವಿ ಜಾವ್ನ್ ಕಿತ್ಯಾಕ್ ಉದೆಲ್ಲೆನಾಂತ್ ಮ್ಹಳ್ಳೆಂ ಅಧುರೆಂ ಸವಾಲ್. ಪುಣ್ ತ್ಯಾ ಅಧುರ್ಯಾ ಸವಾಲಾಕ್ ಜಾಪ್ ಸೊಧ್ಚಿ ಹಾಂಗಾಸರ್ ಗರ್ಜ್ ನಾ - ಹೆಂ ವಾದಾಳ್ ಅಶೆಂಚ್ ಉರೊಂ ಆನಿ ಫುಡ್ಲ್ಯಾ ದಿಸಾಂನಿ ಜಾಯ್ತೆ ಕವಿ ಯೇಂವ್ ಮ್ಹಳ್ಳೆಂ ಮ್ಹಜೆಂ ಮಾಗ್ಣೆಂ.
ಪುಣ್ ಫಕತ್ತ್ ಮಾಗ್ಣ್ಯಾಂತ್ ವಾಲಿರ್ ಗೊಂಯ್ಟಾಂ ಜಾಯ್ನಾಂತ್, ರುಕಾರ್ ಆಂಬೆ ಪಿಕಾನಾಂತ್, ವಾ ತೊರಾಂ ಉದೆನಾಂತ್, ಆನಿ ಮೊರಾಂ ನಾಚಾನಾಂತ್. ಆಮ್ಚೆಂ ಪ್ರೇತನ್ ಮುಖಾರುನ್ ವರ್ಚಿ ಗರ್ಜ್ ಆಸಾ - ಕವಿತಾಶೆತಾಂತ್.
’ಭಾತ್ ಕಾಂಡ್ಲ್ಯಾರ್ ತಾಂದುಳ್ ಜಾತಾ’ ಮ್ಹಳ್ಳೆಂ ಕವಿತಾ ಜಾತಾ?
ಹಾಂವ್ ಚಿಂತಿನಾ ಹೆಂ ಕವಿತಾ ಜಾತಾ ಮ್ಹಣ್. ಜಾತೆಂ ತರ್ ಹಾಂಗಾಸರ್ ಹಾವೆಂ ಬರಯಿಲ್ಲೆ ಹರ್ಯೆಕ್ ಸಬ್ಧ್ ಕವಿತಾ ಜಾತೆ ನ್ಹಂಯ್ಗೀ? ಕವಿ ಎಚ್ಚೆಮ್ ಸಾಂಗ್ಚೆಪ್ರಕಾರ್ ಖಬ್ರೆಪತ್ರಾಪರಿಂ ಏಕ್ ಗಜಾಲ್ ಸವಿಸ್ತಾರ್ ಸಾಂಗೊನ್ ವೆಚೆಂ ಕವಿತಾ ಜಾಯ್ನಾಂ. ತರ್ ಕವಿತಾ ಮ್ಹಳ್ಯಾರ್ ಕಿತೆಂ?
ಕೊಣಾಕ್ ಕವಿತಾ ಸಬ್ಧಾಂಚಿ ರಾಸ್ ಆನಿ ಕೊಣಾಕ್ ಇಮಾಜೆಂಚಿ ರಾಸ್.
ಕೊಣಾಕ್ ಕವಿತಾ ಜಿಣ್ಯೆ ಲಿಸಾಂವ್ ತರ್ ಆನಿ ಕೊಣಾಕ್ ಕವಿತಾ ಏಕ್ ಉಗ್ತೆಂ ಮಿಸಾಂವ್.
ಕವಿತಾ ಮ್ಹಳ್ಯಾರ್ ಕೊಣ್ ಕಿತೆಂಯೀ ಮ್ಹಣೊಂದಿ, ಪುಣ್ ಹಾಂವ್ ಸತ್ ಮಾಂಧ್ತಾಂ ಹೆಂ - ಕವಿತಾಕ್ ಏಕ್ ರೂಪ್ ಆಸಾಜಯ್ ಮ್ಹಣ್ ನಾ, ಏಕ್ ಮಾಪ್ ಆಸಾಜಯ್ ಮ್ಹಣ್ ನಾ, ಪುಣ್ ಏಕ್ ಜೀವ್ ಜರೂರ್ ಆಸಾಜಯ್. ಕವಿತಾ ಮ್ಹಳ್ಯಾರ್ ಕಾಳ್ಜಾಚಿ ಅಭಿವ್ಯಕ್ತಿ ಆಸ್ಯೆತಾ ಪುಣ್ ಕವಿತೆಚಾ ಸಬ್ಧಾ ಸಭ್ದಾಂನಿ ಜೀವ್ ಆಸ್ಚೊ ಭೋವ್ ಗರ್ಜೆಚೊ.
ಕೊಂಕ್ಣೆಂತ್ ಎಕೆಕಾ ಕವಿಕ್ ವಿಂಚುನ್ ತಾಂಚಾ ಕವಿತಾಂಚೆರ್ ಅವಲೋಕನ್ ಚಲಂವ್ಚೆಂ ತರ್ ಹಾವೆಂ ಪಾನಾರ್ ಪಾನಾಂ ಬರಂವ್ಕ್ ಪಡ್ತೆಲೆಂ - ಪುಣ್ ಮಟ್ವ್ಯಾನ್ ಥೊಡ್ಯಾಂಚೊ ಉಲ್ಲೇಕ್ ತರ್ಯೀ ಹಾಂಗಾ ಭೋವ್ ಗರ್ಜೆಚೊ
ಮ್ಹಣ್ ಹಾಂವ್ ಮಾಂಧ್ತಾಂ;
ಕವಿತೆಚಾ ಶಿರಾಂ ಶಿರಾಂನಿ ವಾಚ್ಪ್ಯಾಕ್ ಮನ್ಶ್ಯಾ ಭಗ್ಣಾಂಚೊ ಅನ್ಭೋಗ್ ದಿಂವ್ಚಿ ಕಲಾ ಆಂಡ್ರು ಡಿ’ಕುನ್ಹಾ ಶಿವಾಯ್ ಹೆರ್ ಕೊಣ್ ಜಾಣಾ?
ಕವಿತೆಚಾ ಎಕೆಕಾ ಸಬ್ಧಾಂನಿ ಹಸ್ತಿಚ್ಯಾಕೀ ವ್ಹಡ್ಲ್ಯೊ ಇಮಾಜ್ಯೊ ಲಿಪಂವ್ಚಿ ಶ್ಯಾಥಿ ಎಚ್ಚೆಮಾ ಶಿವಾಯ್ ಹೆರ್ ಕೊಣ್ ಜಾಣಾ?
ಕವಿತೆಧ್ವಾರಿಂ ಮೊರಾಕ್ ನಾಚಂವ್ಚಿ ಕಲಾ ಎಲ್ಯೆರಾಶಿವಾಯ್ ಹೆರ್ ಕೊಣ್ ಜಾಣಾ?
ಇತ್ಲೆ ಸರ್ವ್ ಉಲ್ಲೇಕ್ ಕರ್ತಾನಾ ಮ್ಹಾಕಾ ಹಾಂಚಾಕೀ ವೆಗ್ಳೆ ಥೊಡೆ ಪ್ರಕಾರ್ ದಿಸ್ತಾತ್, ಆನಿ ತ್ಯಾ ಪ್ರಕಾರಾಂನಿ ಆಸ್ಚೆ ಕವಿಯ್ ಭೋವ್ ವಿರಳ್;
ಕವಿತೆಂತ್ ಹಾಸವ್ನ್ ಹಾಸವ್ನ್ ಮಾರ್ಚಿ ಕಲಾ ಸಿಜ್ಯೆಸಾ ಶಿವಾಯ್ ಹೆರ್ ಕೊಣ್ ಜಾಣಾ?
ಕವಿತೆಚಾ ಎಕೆಕಾ ವೊಳಿಂನಿ ವಿಚಾರ್ಧಾರಾ ಪಾಜಾರ್ಚಿ ಕಲಾ ಜೊರ್ಜಿ ಪೀಂತ್ ಆಯ್ಕೊಳ್ ಶಿವಾಯ್ ಹೆರ್ ಕೊಣ್ ಜಾಣಾ?
ಅಶೆಂ ಮುಖಾರುನ್ ವೆತಾನಾಂಚ್ ಮ್ಹಜ್ಯಾ ನದ್ರೆಕ್ ಸಾಂಪಡ್ಲಿಂ ಥೊಡಿಂ ಫುಲಾಂ - ’ಆಡೊಸಾಂತ್ಲಿಂ ಫುಲಾಂ’. ಹಾಂಚೆರ್ ಕೊಣಾಚೆಂಚ್ ಗುಮಾನ್ ಆಸ್ಚೆಂ ಮ್ಹಾಕಾ ದಿಸಾನಾ. ಮನ್ ಕೆಲ್ಯಾರ್ ತ್ಯಾ ದೆವಾಚಾ ಗಳ್ಯಾಚೆರ್ ಜಾಂವ್ ವ್ಹೊಕ್ಲೆಚ್ಯಾ ಶೆಂಡ್ಯಾರ್ ಜಾಂವ್ ಸೊಭ್ಚಿ ತಾಂಕ್ ಆಸೊನ್ಯೀ ಫಕತ್ತ್ ಆಡೊಸಾಂತ್ ತಿಂ ಫುಲ್ತಾತ್. ಪಯ್ಶಿಲಿಂ ಫುಲಾಂ ತಿಂ - ತಾಂಕಾಂಯೀ ಸೊಭಾಯ್ ಆಸಾ, ರೂಪ್ ಆಸಾ, ಮತ್ಲಬ್ ಆಸಾ ಪುಣ್ ಕಿತ್ಯಾಕ್ಗೀ ಮ್ಹಾಕಾ ತಿಂ ಫುಲಾಂ ಫಕತ್ತ್ ಬೆವಾ ಪಾಲ್ಯಾಪರಿಂ ದಿಸ್ತಾತ್ - ಗರ್ಜ್ ಆಸ್ತಾನಾ ಕಾಡ್ಲಿಂ, ಗಳ್ಸಿಲಿಂ, ಉಪ್ಯೋಗ್ ಕರ್ನ್ ಚಿಲ್ಲಿಲಿಂ. ತರ್ಯೀ ತಿಂ ಫುಲಾಂ ಪರತ್ ಪರತ್ ಫುಲ್ತಾತ್ ಆನಿ ಕೋಣ್ ಪಳೆಂವ್ ವಾ ಕೊಣ್ ಪಳೆನಾಯೆಂ ರಾವೊಂ - ಅಪ್ಲೊ ಸುವಾಧ್ ತಿಂ ಸಂಸಾರ್ಭರ್ ಪಾಚಾರ್ತಾತ್ ಆನಿ ಅಪ್ಲಿ ಜಿಣಿಂಚ್ ಅರ್ಪಿತಾತ್.
ಕಸಲೆಂಚ್ ಅತಿಶಯೋಕ್ತಿ ನಾಸ್ತಾನಾ - ಕಾಳ್ಜಾ ಥಾವ್ನ್ ಸಾಂಗ್ಚೆಂ ತರ್ ಬಾಬ್ ಆಸ್ಟಿನ್ ಜಸೊ ವ್ಯಕ್ತಿ ತಶೆಂ ತಾಚಿಂ ಕವಿತಾ. ಹಾಂಚ್ ಸಾಂಗಾನಾ ತಾಚಾ ಕವಿತೆಂನಿ ಪರಿಪೂರ್ಣತಾ ಆಸಾ ಮ್ಹಣ್. ತಾಣೆಂ ಆಮ್ಸೊರ್ ಸಾಂಡುನ್ ಕಾಂಯ್ ತಿಂ ತಾಚಿಂ ಎಕೇಕ್ ಕವಿತಾ ಅನಿಕ್ಯೀ ಸೊಭಂವ್ಕ್ ಪ್ರೇತನ್ ಕೆಲ್ಲೆಂ ತರ್ ತಾಚಿಂ ಚಡ್ತಾವ್ ಕವಿತಾ ’ಭಾತ್ ಕಾಂಡ್ಲ್ಯಾರ್ ತಾಂದು ಜಾತಾ’ ಮ್ಹಳ್ಳ್ಯಾ ವರ್ಗಾಕ್ ಭಿಲ್ಕುಲ್ ವೆತಿಂ ನಾಂತ್. ಪುಣ್ ಅನ್ಯೇಕ್ ಸೊಭಾಯ್ ಹಾಚ್ಯಾ ಕವಿತಾಂಚಿ ಖಂಚೀಗೀ ಮ್ಹಳ್ಯಾರ್ ತೊ ಕಸಲೊಚ್ ಶ್ರಂಗಾರ್ ಕರುಂಕ್ ವಚಾನಾ, ಸರ್ವ್ ಎಕಾಚ್ ಧಮ್ಮಾನ್, ಪ್ರಾಮಾಣಿಕ್ ರಿತಿನ್ ಅಭಿವ್ಯಕ್ತ್ ಕರ್ತಾ. ಶೀದಾ ಕಾಳ್ಜಾ ಥಾವ್ನ್ ವಾಚ್ಪ್ಯಾಕ್. ತಾಣೆಂ ಇತ್ಲ್ಯಾ ಥೊಡ್ಯಾ ಆವ್ದೆಂತ್ ಬರಯಿಲ್ಲಿಂ ಕವಿತಾ ಕಾಂಯ್ ತಿನ್ಶಾಂಕ್ ಮಿಕ್ವತಿತ್ ತರ್ಯೀ ತಿಂ ಸಗ್ಳಿಂ ಕವಿತಾ ವರ್ಗಾಕ್ ಭಿಲ್ಕುಲ್ ವೆಚಿನಾಂತ್ ತರ್ಯೀ ತಾಂತ್ಲಿಂ ಥೊಡಿಂ ತರ್ಯೀ ಅಪುರ್ಭಾಯೆಚಿಂ ಕವಿತಾ ಮ್ಹಳ್ಳೆಂ ಸತ್ ಕೊಣ್ಯೀ ನೆಗಾರ್ ಕರ್ಚೆನಾಂತ್.
ಕೊಂಕ್ಣಿ ಪತ್ರಿಕೋಧ್ಯಮಾಂತ್ ಜರ್ ಬಾಬ್ ಆಸ್ಟಿನ್ ತಸಲ್ಯಾಕ್ ಅಪ್ಲೊ ಫುಡ್ಲದ್ ಕವಿತಾಜಮೊ ಪರ್ಗಟ್ ಕರುಂಕ್ ಇತ್ಲಿಂ ವರ್ಸಾಂ ಲಾಗ್ಲಿಂ ತರ್ ಹೆರಾಂಕ್ ಕಿತ್ಲಿಂ ಆವ್ಕಾಂ ಝರಂವ್ಕ್ ಪಡ್ತಿತ್? ಪುಣ್ ಹ್ಯಾ ಇತ್ಲ್ಯಾ ವರ್ಸಾಂಚಾ ಜಿಣ್ಯೆ ಅನ್ಭೋಗಾಂತ್ ಮ್ಹಾಕಾ ಬಾಬ್ ಆಸ್ಟಿನ್ ಏಕ್ ಪ್ರಭುದ್ದ್ ಸಾಹಿತಿಪರಿಂ ಭಗ್ತಾ. ತಾಚಿ ನದರ್ ವಿಸ್ತಾರ್, ತಾಚೆಂ ಚಿಂತಾಪ್ ಗುಂಡಾಯೆಚೆಂ ಆನಿ ತಾಚೆಂ ಕಾಳಿಜ್ ಸದಾಂಚ್ ಗರ್ಜೆವಂತಾಂಚಾ ಮೊಗಾಂತ್ ತೊವೊನ್ ಆಸ್ತಾ. ಏಕಾ ಕವಿಕ್ ಕವಿತಾ ಬರಂವ್ಕ್ ಮನ್ಶ್ಯಾ ಮೊಗಾವರ್ತೆಂ ಹೆರ್ ಕಸಲೆಂ ದೆಣೆಂ ಜಾಯ್?
ಹಿಂ ಫುಲಾಂ ಎದೊಳ್ ಆಡೊಸಾಂತ್ ಆಸ್ಲ್ಲಿಂ ಜಾವ್ಯೆತಾ, ಪುಡೆಂ ತರ್ಯೀ ಹ್ಯಾ ಅಡೊಸಾಕ್ ಇಲ್ಲೊ ಉಜ್ವಾಡ್ ಫಾಂಕೊಂದಿ, ಆನಿ ಹ್ಯಾ ಫುಲಾಂಕ್ ಜೊಕ್ತೊ ಮಾನ್ ಮೆಳೊಂದಿ ಮ್ಹಳ್ಳೊ ಮ್ಹಜೊ ಆಶಾವಾದ್ ಜಾವ್ನಾಸಾ.
- ವಲ್ಲಿ ಕ್ವಾಡ್ರಸ್
[ಹಾಚೊ ಫುಡ್ಲದ್ ಕವಿತಾಜಮೊ ’ಆಡೊಸಾಂತ್ಲಿಂ ಫುಲಾಂ’ ವೆಗಿಂಚ್ ಪರ್ಗಟೊನ್ ಯೆಂವ್ಚಾರ್ ಆಸಾ - ಹೊ ಆಶಾವಾದಿ ಪ್ರಕಾಶನಾಚೊ ಎಕುಣಿಸಾವೊ ಬೂಕ್]
About us | Feedback | Contact us
Copyright ©
2005 DAAIZ.COM All rights reserved.
Page concept, designed and maintained by Ashawadi Publications