ಕಾಣ್ಯೊ
ಸಾಹಿತಿಕ್ ಸ್ಪರ್ಧೊ 2004
ಕಥಾಪಾಠ್
ಅಂಕಣಾಂ
ಸಾಹಿತಿಕ್ ಸ್ಪರ್ಧೊ 2005
ಕವಿತಾಂ
ಸಾಹಿತಿಕ್ ಸ್ಪರ್ಧೊ 2006
ದಾಯ್ಜ್ ಶಿಭಿರ್ 2006
ವಿಡಂಬನಾಂ
ದಾಯ್ಜ್ ಶಿಭಿರ್ 2007
ಕಥಾಮೃತ್
ವಿಮರ್ಶೆ
ಕವಿತಾಪಾಠ್ ಮ್ಹಳ್ಯಾರ್ ಕಿತೆಂ ಮ್ಹಳ್ಳ್ಯಾಚಾ ಸವಿಸ್ತಾರ್ ವಿವರಾಂಕ್ ಹ್ಯಾ ಪಾನಾಕ್ ಭೆಟ್ ದಿಯಾ
ಕವಿವಿಶ್ಯಾಂತ್ ಥೊಡೆಂ: ಅನಿಲ್ ಪೆರ್ನಾಲ್ ಕೊಂಕ್ಣೆಂತ್ ಕಾಣ್ಯೆಗಾರ್ ಜಾವ್ನ್ ಉದೆಲ್ಲೊ, ಕವಿ ಜಾವ್ನ್ ಬದಲ್ಲೊ. ಕೊಂಕ್ಣಿ ಭಾಸೆಚೊ ವಿಪ್ರೀತ್ ಮೋಗ್ ಕರ್ಚ್ಯಾ ಭೋವ್ ಥೊಡ್ಯಾಂತ್ಲೊ ಎಕ್ಲೊ. ಸಮ್ಬಾನ್ ಖಾಲ್ತೊ, ಖುಶಾಲಿ, ಮಾಯ್ಪಾಸಿ, ಮಾಯಾಮೊಗಾಳ್ ಆನಿ ಸಾದೊ. ಜಿತ್ಲೊ ಸಾದೊಗೀ ತಿತ್ಲೊಚ್ ಪ್ರತಿಭಾವಂತ್. ಕೊಂಕ್ಣೆಂತ್ ಫುಡ್ಲ್ಯಾ ದಿಸಾಂನಿ ಹೊ ಅನಿಕ್ಯೀ ಜಾಯ್ತಿಂ ನವಾಲಾಂ ಕರುಂಕ್ ಸಕೊಂದಿ ಮ್ಹಣ್ ಆಶೆತಾಂ.
- ವಲ್ಲಿ ಕ್ವಾಡ್ರಸ್
ಅನಿಲ್ ಪೆರ್ನಾಲ್
ಮುಖಾಂ ಪಾಟ್ಲಿಂ ರುಪಾಂ
ಮುಖಾಂಪಾಟ್ಲಿಂ ರುಪಾಂ ಮುಖಾಮುಖಿ ಜಾತಾನಾ
ಅನಿಲ್
ಪೆರ್ನಾಲಾಕ್ ಹಾಂವ್ ಪಯ್ಲೊ ವಳ್ಕತಾಂ ಕಾಣ್ಯೆಗಾರ್ ಜಾವ್ನ್ - ತೇಂಯ್ ಅಜೀಕ್ ಲಗ್ಬಗ್ ಸೊಳಾ - ಸತ್ರಾ ವರ್ಸಾಂಧಿಂ. ಜೆದ್ನಾಂ ಮ್ಹಜ್ಯಾ ಮತಿಕ್ ಕೊಂಕ್ಣೆಚಿಂ ಹುಮೆದಿಚಿಂ ಪಾಕಾಂ ಗುಂತುನ್ ತಾಂಕಾಂ ಪಾಕಾಟೆ ಕರ್ನ್ ಉಭ್ಚ್ಯಾ ವೆಳಿಂ. ಖಂಚ್ಯಾ ಪತ್ರಾಂತ್ ಮ್ಹಜಿ ಫುಡ್ಲದ್ ಕಾಣಿ ’ಸಲ್ವಣ್’ ಪರ್ಗಟ್ ಜಾಲ್ಲಿಗೀ, ತ್ಯಾಚ್ ಪತ್ರಾಂತ್ ಪಾಂಚ್ ವರ್ಸಾಂ ಭಿತರ್ ಸಹ-ಸಂಪಾದಕ್ ಜಾವ್ನ್ ವಾವ್ರ್ ಕರ್ಚೊ ಸುಯೋಗ್ ಮ್ಹಾಕಾ ಲಾಭ್ಲ್ಲೊಚ್ ಮ್ಹಜ್ಯಾ ಹುಮೆದಿಚಿಂ ಪಾಕಾಂ ಫುಲ್ಲ್ಲಿಂ. ಹುಮೆದ್ಯೀ ದೊಡ್ತಿ ಜಾಲ್ಲಿ.
ತ್ಯಾ ಹುಮೆದಿಚ್ಯಾ ದಿಸಾಂನಿ ಮತಿಂತ್ ಅರ್ಥ್ ನಾತ್ಲ್ಲ್ಯೊ ಹಜಾರ್ ಆಶಾ - ಹರ್ಯೆಕಾ ಕಾಣ್ಯೆಗಾರಾಕ್ ಖುದ್ದ್ ಭೆಟ್ಚಿ, ತಾಂಚೆಲಾಗಿಂ ಉಲಂವ್ಚಿ, ತಾಂಚೆ ವಿಚಾರ್ ಆಯ್ಕೊಂವ್ಚಿ ಆಶಾ. ದೆಕುನ್ ಗಾಂವ್ ಸೊಧುನ್, ಘರಾಂ ಸೊಧುನ್ ಕೊಣಾ ಕೊಣಾಕ್ ಖಂಯ್ ಖಂಯ್ ಸೊಧುನ್ ವಚೊನ್ ಭೆಟ್ಲಾಂ. ಬಿಲ್ಕುಲ್ ಅರ್ಥ್ ನಾತ್ಲ್ಲಿ ಪಿಸಾಯ್! ಹಾಕಾ ಹಾಂವ್ ಭಿಲ್ಕುಲ್ ಸೆವಾ ಮ್ಹಣ್ ಜಾಂವ್, ವಾವ್ರ್ ಮ್ಹಣ್ ಜಾಂವ್ ವಾ ಹೆರ್ ಕಿತೆಂಯ್ ನಾಂವ್ ದೀಂವ್ನ್ ವೊಲಾಯ್ನಾ ಪಿಶೆಪಣಾಬಗಾರ್. ಕಸ್ಲೊ ತೊ ಭಾಂದ್ ಆಸ್ಯೆತ್? ಕಾಣ್ಯೆಗಾರಾಕ್ ಅಪ್ಲ್ಯಾ ಕುಟ್ಮಾ ಸಂಬಂಧಾಚೊ ಮ್ಹಣ್ ಲೆಖ್ಚೊ?? ಹಾಂವ್ ನೊಕೊ.. ಹ್ಯಾ ಖಾತಿರ್ ಕೊಣಾಕ್ ಸರ್ಕಸಾಚೊ ಜೋಕರ್ ಜಾವ್ನ್ ದಿಸ್ಲಾಂ ಜಾವ್ಯೆತ್ ಕೊಣಾಕ್ ಪಾಡಾರಿ ಜಾವ್ನ್ ಗಾಂವ್ ಭಂವ್ಚೊ ರೆಡೊ ಜಾವ್ನ್ ದಿಸ್ಲಾಂ ಜಾವ್ಯೆತ್ - ಬಿಲ್ಕುಲ್ ತಾಂತಾಂಚ್ಯಾ ಚಿಂತ್ಪಾಪರಿಂ.
ಕಾಣಿಕ್ ದಫ್ತರಾಂತ್ ಅನಿಲ್ ಪೆರ್ನಾಲಾಚಿ ಮಟ್ವಿ ಕಾಣಿ ಮ್ಹಾಕಾ ವಾಚುಂಕ್ ಮೆಳ್ತಾನಾ ರಾತಿಚಿಂ ಸಾಡೆ ನೋವ್ ವೊರಾಂ. ವಾಚುನ್ ತಕ್ಶಣ್ ಎಕಾ ಪಂದ್ರಾ ಪೊಯ್ಶ್ಯಾಂಚ್ಯಾ ಕಾರ್ಡಾಂತ್ ಏಕ್ ಲ್ಹಾನ್ ಕಾಗಾದ್ ಬರಯ್ಲೆಂ ಆನಿ ದುಸ್ರೆ ದಿಸಾ ಸಕಾಳಿಂ ತೆಂ ತಪ್ಪಾಲಾರ್ ಧಾಡ್ಲೆಂ. ಹೆಂ ಕಾಗಾದ್ ಅಜೂನ್ ಅನಿಲ್ ಪೆರ್ನಾಲಾನ್ ಜೊಗಾಸಣೆನ್ ದವರ್ಲಾಂ ಮ್ಹಣ್ ಆಯ್ಲೆವಾರ್ ತಾಣೆಂಚ್ ಮ್ಹಾಕಾ ಸಾಂಗ್ತಾನಾ ಮ್ಹಾಕಾಚ್ ಅಜ್ಯಾಪ್ - ಹೆಂ ತಾಚ್ಯಾ ಕಾಳ್ಜಾಚೆಂ ವ್ಹಡ್ಪಣ್ ಪಾಚಾರ್ತಾ ಶಿವಾಯ್ ಹೆರ್ ಕಿತೆಂಚ್ ನ್ಹಂಯ್.
ಉಪ್ರಾಂತ್ಲಿಂ ಸಭಾರ್ ವರ್ಸಾಂ ಜಾಯ್ತೆಂ ಉಲಯ್ತಾನಾ ಹಾಂವ್ ಮೊನೊ ಜಾಲ್ಲೊಂ. ಪೊಟಾಚ್ಯಾ ವ್ಯಾಪ್ತೆನ್ ಮ್ಹಜಿ ಲಿಖ್ಣಿ ಸುಕ್ಲ್ಲಿ. ಬೊಂಬೊಯ್ಚಾ ಖೆಟಿಂತ್, ಆವಾಜಾಂತ್, ಹಾಂವ್ ದಿಸಾನ್ ದೀಸ್ ಮ್ಹಾಕಾಚ್ ವಿಸ್ರೊಂಕ್ ಲಾಗ್ಲೊಂ. ತರ್ಯ್ ಆವ್ಕಾಸ್ ಮೆಳ್ತಾನಾ ತವಳ್ ತವಳ್ ಕೊಂಕ್ಣಿ ಪತ್ರಾಂ ವಾಚ್ತಾಲೊಂ. ಸಭಾರಾಂಕ್ ನಾಂವಾರ್ ತರ್ಯ್ ವಳ್ಕಾತಾಲೊಂ ತರ್ಯ್ ಥೊಡ್ಯಾಂಚಿಂ ಬರ್ಪಾಂ ಖಂಡಿತ್ ವಾಚ್ತಾಲೊಂ. ತಾಂತ್ಲೊ ಎಕ್ಲೊ ಅನಿಲ್ ಪೆರ್ನಾಲ್..
ಅನಿಲ್ ಪೆರ್ನಾಲ್ ತ್ಯಾ ದಿಸಾಂನಿ ಸರಾಗ್ ಬರಯ್ತಾಲೊ - ಚುಟುಕಾಂ, ಕವಿತಾಂ..... ವೆವೆಗ್ಳ್ಯಾ ಪತ್ರಾಂನಿ. ಪುಣ್ ಆಮ್ಚೆಮಧೆಂ ಸಂಪರ್ಕ್ ನಾತ್ಲ್ಲೊ. ಕೊಣಾಯ್ಲಾಗಿಂ ಸಂಪರ್ಕ್ ದವರ್ಚೆತಸಲೆಂ ಮ್ಹಜೆಲಾಗಿಂಯ್ ಕಿತೆಂಚ್ ನಾತ್ಲ್ಲ್ಯಾನ್ ಹಾಂವ್ಯ್ ದಿಸಾನ್ ದೀಸ್ ವನ್ವಾಸಾಂತ್ ಧಾಕ್ಡ್ಯಾಧ್ಲ್ಯಾ ಮ್ಹಾಕಾ ಸೊಧ್ತಾಲೊಂ. ತ್ಯಾ ವೆಳಾರ್ ಜರ್ ಸಾಹಿತ್ಯ್ ಜಿಣ್ಯೆಚೊ ಏಕ್ ವಾಂಟೊ ಮ್ಹಳ್ಳೆಂ ಮ್ಹಜ್ಯಾ ಮತಿಂತ್ ಕಾರ್ಯಗತ್ ಜಾವ್ನ್ ರಿಗಂವ್ಕ್ ಕಾರಣ್ ಜಾಲ್ಲ್ಯಾ ತೆಗಾಂ ಮಿತ್ರಾಂಚೊ ಉಲ್ಲೇಕ್ ಕರ್ಚೊ ತರ್ ಎಕ್ಲೊ ಕೆವಿನ್ ಡಿ’ಮೆಲ್ಲೊ, ದುಸ್ರೊ ಮೌರಿಸ್ ಶಾಂತಿಪುರ್ ಆನಿ ತಿಸ್ರೊ ಬೊಂಬೊಯಾಂತ್ ಮ್ಹಜೆಪರಿಂಚ್ ಸೊಧ್ನಾಂ ಕರ್ಚೊ ಎಚ್ಚೆಮ್.
ಪೆರ್ನಾಲಾಂತ್ ಉದೆಲ್ಲೆ ಕವಿ ವೆವೆಗ್ಳೆ ತರ್ಯ್ ಅಪುರ್ಭಾಯೆಚೆಚ್. ಎಚ್ಚೆಮಾಕ್ ಹೆರಾಂಕ್ ಪ್ರೇರಿತ್ ಕರ್ಚಿ ಸಕತ್ ತರ್ಯ್ ಕಿತ್ಲಿ ಪಳೆಯಾ. ಭೋವ್ಶಾ ಅನಿಲ್ ಪೆರ್ನಾಲಾಕ್ ಕವಿತಾಂಚೆರ್ ವೋಡ್ ಯೇಂವ್ಕ್ಯ್ ಹೊಚ್ ಕಾರಾಣ್ ಜಾಂವ್ಕ್ಯ್ ಪುರೊ.
ಅನಿಲ್ ಪೆರ್ನಾಲಾಚೊ ಫುಡ್ಲದ್ ಕವಿತಾಜಮೊ ’ಪಿಸೊಳಿಂ’ ಅಜೀಕ್ ಧಾ ವರ್ಸಾಧಿಂ ಪರ್ಗಟ್ ಜಾಲ್ಲೊ ತರ್ಯ್ ಅಜೀಕ್ ಧಾ ವರ್ಸಾಧಿಂ ಜಶೆಂ ಹೆರ್ ಕವಿತಾಜಮ್ಯಾಂಕ್ ಜಾಲ್ಲೆಪರಿಂಚ್ ಹಾಕಾಯ್ ಜಾಲೆಂ. ಕೊಣೆಂಯ್ ಪುನೆಗೆಲ್ಲ್ಯಾನ್ ತೊ ವಾಚುನ್ ಏಕ್ ಮರ್ಯಾದೆಚೊ ವಿಮರ್ಸೊ ಸಯ್ತ್ ಕೆಲೊನಾ. ವಿಮರ್ಸೊ ಸೊಡ್ಯಾಂ - ಹ್ಯಾ ಕವಿತಾಜಮ್ಯಾಚೆಂ ನಾಂವ್ ಕಿತ್ಲೆಶ್ಯಾಂತ್ ಉಡಾಸ್ ಆಸಾ ಮ್ಹಳ್ಳೆಂ ಸರ್ವೆಸ್ಪರ್ ದೇವ್ ಮಾತ್ರ್ ಜಾಣಾಂ. ಅಶೆಂ ಉದೆಲ್ಲಿಂ ’ಪಿಸೊಳಿಂ’ ಖಂಚ್ಯಾ ಭಾಗಿಂತ್ ಘುಸ್ಲಿಂ ವಾ ಖಂಚ್ಯಾ ರಾನಾಂತ್ ರಿಗ್ಲಿಂ ಮ್ಹಳ್ಳೆಂ ಹಾಂವ್ಯ್ ನೊಕೊ.
ಪುಣ್! ಆಯ್ಲೆವಾರ್ ಅನಿಲ್ ಪೆರ್ನಾಲಾನ್ ಮಿತ್ರ್ ಪತ್ರಾಂತ್ ಪಾನ್ಪಾಳೆ ಭಾಜುಂಕ್ ಧರ್ಲೆ. ಆನಿ ತವಳ್ ತವಳ್ ವೆವೆಗ್ಳ್ಯಾ ಪತ್ರಾಂನಿ ಸರಾಗ್ ಕವಿತಾ ಬರಂವ್ಕ್ ಧರ್ಲಿಂ ಮ್ಹಣ್ತಾನಾ ಮ್ಹಜೆಂ ಗಮನ್ಯ್ ತಾಚೆರ್ ವೊಡ್ಲೆಂ. ತೀನ್ ವರ್ಸಾಧಿಂ ಆಮಿ ಮುಖಾಮುಖಿ ಜಾಲ್ಯಾಂವ್. ಮ್ಹಜ್ಯಾ ಮಾತ್ಯಾರ್ಯ್ ಹಜಾರ್ ರಾಟಾವಳ್ಯೊ, ತಾಚ್ಯಾ ಮಾತ್ಯಾರ್ಯ್ ಹಜಾರ್ ರಾಟಾವಳ್ಯೊ. ತರ್ಯ್ ಆಮಿ ಅರ್ಧೆಂ ಅರ್ಧೆಂ ಉಲಯ್ಲ್ಯಾಂವ್. ತಾಂತ್ಲೆಂ ಏಕ್ ಉತಾರ್ ಜಾವ್ನಾಸ್ಲ್ಲೆಂ ತಾಚ್ಯಾ ಹ್ಯಾ ಕವಿತಾಜಮ್ಯಾವಿಶ್ಯಾಂತ್ಲೆಂ.
ಪುಣ್ ವೆಳಾಚಿ ಬಂದಡ್ ಹೊ ಅಂತರ್ ಲಾಂಭಾವ್ನ್ ವೆತಾನಾ ಆಬ್ಳೆ ಘಡಿ ಉದೆಲಿಚ್ಚ್ - ತಾಣೆಂ ಅಪ್ಲಿಂ ಸರ್ವ್ ಕವಿತಾ ಮ್ಹಾಕಾ ಧಾಡ್ನ್ ದಿಲಿಂ. ಹಿಂ ಸರ್ವ್ ಕವಿತಾ ಎಕೆಕ್ ವಾಚುಂಕ್ ಲಾಗ್ಲೊಂ - ಭುರ್ಗ್ಯಾಂನಿ ಪರಿಕ್ಶೆಕ್ ವಾಸ್ಚೆಪರಿಂ. ಚೀತ್ ದೀವ್ನ್, ಮತ್ ದೀವ್ನ್ ವಾಚ್ಲಿಂ.
ಮನಿಸ್ ಕವಿತಾ ಲಿಖುಂಕ್ ಹಾತ್ ವಾಪಾರ್ತಾ ತರ್ಯ್ ತಾಕಾ ಕವಿತಾ ಬರಂವ್ಚ್ಯಾಕ್ ತಾಚೆ ಸರ್ವ್ ಇಂದ್ರಿಯ್ ಪ್ರೀರಿತ್ ಕರುಂಕ್ ಸಕ್ತಾತ್ ಮ್ಹಳ್ಳೆಂ ಉತಾರ್ ಕೊಣೆಂಗೀ, ಕೆದ್ನಾಂಗೀ ಸಾಂಗ್ಲ್ಲೆಂ ಮ್ಹಜ್ಯಾ ಖಟ್ಟ್ಯಾಂತ್ ಆಸಾ. ಅಶೆಂ ವಾಚ್ತಾಂ ವಾಚ್ತಾಂ ಮ್ಹಾಕಾ ಅಶೆಂ ಗೊಮ್ಲೆಂ - ಕವಿತೆಂತ್ಲೊ ಕವಿ ಖರೆಂಪಣಿಂ ’ಮುಖಾಮುಖಿ’ ಜಾತಾ. ಕೆದ್ನಾಂ ವಾಚ್ಪ್ಯಾಲಾಗಿಂ ಮುಖಾಮುಖಿ ಜಾತಾ, ಕೆದ್ನಾಂ
ಸಮಾಜೆಲಾಗಿಂ ಮುಖಾಮುಖಿ ಜಾತಾ ಆನಿ ಕೆದ್ನಾಂ ದೆವಾಲಾಗಿಂ ಮುಖಾಮುಖಿ ಜಾತಾ ತರ್ ಕೆದ್ನಾಂ ಅಪ್ಲ್ಯಾ ಭಿತರ್ಲ್ಯಾ ಕವಿಲಾಗಿಂ ಮುಖಾಮುಖಿ ಜಾತಾ ಮ್ಹಳ್ಳೆಂ ಚಿಂತಾಪ್ ಮ್ಹಾಕಾ ದಿಸ್ಲೆಂ. ಆನಿ ಹಿ ಮುಖಾಮುಖಿ ಥೊಡೆಪಾವ್ಟಿಂ ಸಂವಾದಾಕ್ ಲಾಗ್ತಾತ್ ತರ್ ಥೊಡೆಕಡೆ ವಾರ್ಜಿಕ್ ಕರ್ತಾತ್, ಥೊಡಿಂ ರಾಗಾನ್ ಕಡ್ತಾತ್ ತರ್ ಥೊಡಿಂ ಮೊಗಾನ್ ವೆಂಗ್ತಾತ್ - ಜಿಣ್ಯೆಚ್ಯಾ ಹರ್ ರಂಗಾಚಿಂ ಸುತಾಂ ಹಾಂತುಂ ದಿಸ್ತಾತ್ ತರ್ಯ್ ಏಕ್ ಪರೋಕ್ಶ್ ಥರಾನ್ ಅಸ್ಪಷ್ಟ್ ರಿತಿಚಿ ಪಿಂರ್ಗೊಣ್ ಆಯ್ಕತಾನಾ ವಾಚ್ಪ್ಯಾಚೆ ಕಾನ್-ದೊಳೆ ನೀಟ್ ಜಾತಾತ್. ಉಪ್ರಾಂತ್ ತೆಂಚ್ ಮೌನ್...
ಖರೆಂಚ್ ಹಿ ಮುಖಾಮುಖಿ ಸ್ವಾದಿಕ್. ಅನಿಲ್ ಪೆರ್ನಾಲ್ ’ಅಂತರ್ರಾಷ್ಟ್ರೀಯ್’ ವೆಕ್ತಿ ಮ್ಹಣ್ತಾ ಹ್ಯಾ ಜಮ್ಯಾಚೆಂ ಪ್ರಸ್ತಾವನ್ ಬರಯಿಲ್ಲೊ ಕವಿ ಕ್ಲೆರೆನ್ಸ್ ಕೈಕಂಬ. ಜಾವ್ಯೆತಾ. ಪುಣ್ ಕವಿನ್ ಹ್ಯಾ ಮುಖಾಮುಖಿಂತ್ ಫಕತ್ತ್ ಆಪಡ್ಲಾಂ ಶಿವಾಯ್ ಇಲ್ಲ್ಯಾ ಗುಂಡಾಯೆಕ್ ದೆಂವೊಂಕ್ ಸಕೊಂಕ್ ನಾ ಮ್ಹಳ್ಳೆಪರಿಂ ಭಗ್ತಾ - ಹೆಂ ಮ್ಹಜೆಂ ಖಾಸ್ಗಿ ಚಿಂತಾಪ್. ಮಾತ್ಸೊ ದರ್ವೊಡ್, ಮಾತ್ಸಿ ಚಿಂತ್ಪಾಚಿ ಆಳ್ಸಾಯ್ ಹಾಂತುಂ ಉಟೊನ್ ದಿಸ್ತಾ ತರ್ಯ್ ವಾಚ್ಪ್ಯಾಕ್ ಧರ್ನ್ ದವರ್ಚ್ಯಾಂತ್ ಜರೂರ್ ಜಿಕ್ತಾ. ಹೆಂ ಅನಿಲ್ ಪೆರ್ನಾಲಾಚ್ಯಾ ಕವಿತಾಂಚಿ ವಿಶೇಷತಾ.
ಪುಣ್ ಮ್ಹಜೆಪ್ರಕಾರ್ ಆಸ್ಚಿ ಹಿ ಮುಖಾಮುಖಿ (ಸಂವಾದ್) - ಕವಿ ಅನಿಲ್ ಪೆರ್ನಾಲಾಕ್ ವೆಗ್ಳ್ಯಾಚ್ ರಿತಿನ್ ಸುಸ್ತಾತಾ - ಹ್ಯಾ ಕವಿತಾಂಚೊ ಕರ್ತ್ ತೊ ಮ್ಹಣ್ತಾತಾ ತಾಚೆಂ ವಾಘ್ಮೂಲ್ ಚಡ್ ಮೊಲಾಚೆಂ. ತಾಕಾ ಹಿಂ ಕವಿತಾ ಉಲಯ್ನಾಂತ್ ಬಗಾರ್ ದಿಸ್ತಾತ್ (ಮುಖಾಂ ಪಾಟ್ಲಿಂ ರುಪಾಂ). ಆತಾಂ ಬುಧ್ವಾಂತ್ ವಾಚ್ಪಿ ಖರೆಂಚ್ ವಾಚುನ್ ಪೈಸಲ್ ದಿತೆಲೆ - ಹಿಂ ಕವಿತಾ ಉಲಯ್ತಾತ್ ವಾ ಫಕತ್ತ್ ದಿಸ್ತಾತ್ ಮ್ಹಳ್ಳೆಂ. ಪುಣ್ ಏಕ್ ಮಾತ್ರ್ ಹಾಂವ್ ಸಾಂಗ್ಚೆಂ ಧಯ್ರ್ ಘೆತಾಂ...
ಹಿಂ ರುಪಾಂ ಮುಖಾಂ ಪಾಟ್ಲ್ಯಾನ್ ಲಿಪ್ಲ್ಯಾಂತ್ ಜಾವ್ಯೆತ್ - ಪುಣ್ ವಳ್ಕೆಚಿಂ.
ಹಿಂ ರುಪಾಂ ಉಲಯ್ನಾಂತ್ ಜಾವ್ಯೆತ್ - ಪುಣ್ ವಾಚ್ಪ್ಯಾಂಕ್ ಆಯ್ಕೊಂಕ್ ಕರ್ತಾತ್..
ಭೋವ್ಶಾ ಹಿಚ್ಚ್ ಹಾಚ್ಯಾ ಕವಿತಾಂಚಿ ಸೊಭಾಯ್ ಜಾವ್ಯೆತಾ.
- ವಲ್ಲಿ ಕ್ವಾಡ್ರಸ್
[ಹೊ ಅನಿಲ್ ಪೆರ್ನಾಲಾಚೊ ದುಸ್ರೊ ಕವಿತಾಜಮೊ ತಶೆಂಚ್ ಆಶಾವಾದಿ ಪ್ರಕಾಶನಾಚೊ ಬಾವಿಸಾವೊ ಬೂಕ್]
About us | Feedback | Contact us
Copyright ©
2005 DAAIZ.COM All rights reserved.
Page concept, designed and maintained by Ashawadi Publications