ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್ ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಎಚ್ಚೆಮ್ ಮ್ಹಳ್ಳ್ಯಾ ಲಿಖ್ಣೆನಾಂವಾರ್ ಕವಿತಾ ಬರಂವ್ಚೊ ಹೆನ್ರಿ ಮೆಂದೊಸ್ ಕೊಂಕ್ಣಿ ಕವಿತಾ ಶೆತಾಂತ್ ಪ್ರಸ್ತುತ್ ಕಾಳಾಚೊ ಉಂಚ್ಲೊ ಕವಿ, ವಿಮರ್ಶಕ್ ಆನಿ ಚಿಂತ್ಪಿ. ಎದೊಳ್ಚ್ ರಾಕ್ಣೊ ಸಾಹಿತಿಕ್ ಸ್ಪರ್ದೊ, ಕಾಣಿಕ್ ಕವಿ ಸ್ಪರ್ಧೊ, ದಾಯ್ಜ್ ಸಾಹಿತಿಕ್ ಸ್ಪರ್ಧೊ ಅಶೆಂ ಸಭಾರ್ ಸ್ಪರ್ಧ್ಯಾಂನಿ ಪಯ್ಲಿಂ ಇನಾಮಾಂ ಜೊಡ್ಲ್ಲ್ಯಾ ಹಾಚೆ ತೀನ್ ಕವಿತಾಜಮೆ ’ಚಲ್ಯಾಂಕ್ ಚತ್ರಾಯ್’, ’ಕಯ್ದ್ಯಾಚ್ಯೊ ಕವಿತಾ’ ಆನಿ ’ಬಾಮುಣಾಚೆಂ ಚೆಡುಂ’ ಪರ್ಗಟ್ ಜಾಲ್ಯಾತ್. ಕೊಂಕ್ಣಿ ಕವಿತಾಂಚೆರ್ ಜಾಯ್ತಿಂ ಲೇಖನಾಂ ಬರಯ್ಲ್ಯಾಂತ್. ಹೊ ಏಕ್ ಕಾಣ್ಯೆಗಾರ್, ಅಂಕಣ್ಕಾರ್ ಸಯ್ತ್. ಆಮ್ಕಾಂ ಸಭಾರ್ ವಾಚ್ಪ್ಯಾಂನಿ ಆಮ್ಕಾಂ ಎಚ್ಚೆಮಾಚಾ ಬರ್ಪಾಂ ಪರ್ಗಟ್ ಕರುಂಕ್ ವತ್ತಾಯ್ ಕೆಲ್ಲ್ಯಾನ್ ಹೊ ಕೊಂಕ್ಣಿ ಸಾಹಿತ್ಯಾಕ್ ಲಗ್ತಿ ಜಾಲ್ಲ್ಯಾ ಸಂಗ್ತೆಚೆರ್ ಹೊ ತವಳ್ತವಳ್ ದಾಯ್ಜ್.ಕೊಮ್ಚೆರ್ ಅಪ್ಲಿಂ ಬರ್ಪಾಂ ಬರಯ್ತಲೊ.
5. ಆಧುನಿಕ್ ಕೊಂಕ್ಣಿ ಕಾವ್ಯಾಚೊ ಮಾಂತ್ರಿಕ್ ಕವಿ
ನವೊ ಕವಿ ಮ್ಹಳ್ಯಾರ್ ಕೋಣ್? ವಿಚಾರ್ತಾ ಕಾಂದ್ಡೆಚೊ ಲೊಕಾಮೊಗಾಳ್ ಕವಿ ಜಯಂತ ಕಾಯ್ಕಿಣಿ. ’ಜಿವಿ ಬಾಳಾಂತ್’ ಮ್ಹಣಾನಾಂತ್ವೇ ತ್ಯಾ ಕಾಸ್ತಾಚೊ ತೋ. ಹರ್ ಕವಿ ಹರ್ ಕವಿತೆಂತ್ ನವೊ ಕವಿ ಜಾತಾ. ಪರ್ನೊ ರೂಕ್ಯೀ ಆಯ್ಚೊ ಹವೊ, ಆಯ್ಚಿ ಉದ್ಕಾ ಶೆಳ್ ಆನಿ ಆಯ್ಚಿಂ ಕಿರ್ಣಾಂ ಸೆವುನ್ಚ್ ಫುಲಾಂ ಫುಲಯ್ತಾ. ತೆಚ್ಚ್ಪರಿಂ ಹರ್ ಕವಿತಾ ಆಯ್ಚೊ ಜೀವ್...
ಇತ್ಲೆಂ ಆಯ್ಕತಾನಾ ಆಮಿ ಪರ್ನೊ ಆನಿ ನವೊ ಕೊಂಕ್ಣಿ ಮಧೆಂ ಭೇಧ್ ಕರ್ಚೆಂಯೀ ಭೆಷ್ಟೆಂ ಮ್ಹಣೊಂ? ಪುಣ್ ಕೊಂಕ್ಣಿ ಕಾವ್ಯಾ ಸಂದರ್ಭಾರ್ ಪರ್ನೊ ಮ್ಹಣ್ತೆಲ್ಯಾ ಕೋಣ್ ಕವಿನ್ ಆಯ್ಚೆಂ ಫುಲ್ ಫುಲಯಿಲ್ಲೆಂ ಹಾಂವೆಂ ಪಳೆಯಿಲ್ಲೆಂ ನಾ. ಕಾಮ್ ದಂಧೊ ಸೊಧುನ್ ಬೊಂಬಯ್, ಅಮೇರಿಕಾ ಗೆಲ್ಯಾರೀ ತಾಂಚ್ಯಾ ಕಾವ್ಯಾಂತ್ ತೇಚ್ಚ್ ಕೊಡ್ಯಾಳ್ಚ್ಯಾ ಇಜಾಬೆಲ್ಲಾಚೆ ದೊಳೆ ಆನಿ ಪಾಂಗ್ಳಾಚೆ ಕಳೆ. ಯುರೋಪಾಚ್ಯಾ ವೊಡ್ತಾಂತ್ಲಿಂ ಕೆಕ್ಟಾಸಾಚಿಂ ಫುಲಾಂ ವಾ ಫಿಲಿಪೀನ್ಸಾಚ್ಯಾ ಚೆಡ್ವಾಚಿಂ ಮುಕಮಳಾಂ ಆಯಿಲ್ಲಿಂ ನಾಂತ್.
ಪುಣ್ ಗೆಲ್ಲ್ಯಾ ಶೆಕ್ಡ್ಯಾಚೆ ಅಖೆರಿ ಥಾವ್ನ್ ಹಾಂಗಾ ಪದ್ವಿ ವ ಪದ್ಯುತ್ತರ್ ಶಿಕಾಪ್ ಮುಗ್ದುನ್ ಗಲ್ಫಾಕ್ ಪಾವ್ಲ್ಲ್ಯಾ ಮ್ಹಜ್ಯಾ ಕಾಂಯ್ ಸಾಂಗೊಡ್ಯಾಂನಿ ಥಂಯ್ಚೆಂ ಜಿವಿತ್ ಭೊಗ್ಲೆಂ ಮಾತ್ರ್ ನ್ಹಂಯ್ ತೆಂ ಕೊಂಕ್ಣಿ ಕಾವ್ಯಾಂತೀ ಹಾಡ್ಲೆಂ. ಆಧುನಿಕ್ ಕೊಂಕ್ಣಿ ಕಾವ್ಯಚ್ಯಾ ಹ್ಯಾ ವಾಡಾವಳೆಕ್ ಹಾಂವ್ ಮಹತ್ವಾಚಿ ’ಉತ್ರೊಣ್’ ಮ್ಹಣ್ತಾಂ. ಆನಿ ಹ್ಯಾ ಉತ್ರೊಣೆಚಿ ಫುಡ್ಕಾಯ್ ಘೆತ್ಲ್ಲೊ ಕವಿ ಮೆಲ್ವಿನ್ ರೊಡ್ರಿಗಸಾನ್, ಆಂಡ್ರು, ಕಿಶೂ, ವಲ್ಲಿ, ದಿನೇಶ್ ಕೊರೆಯಾನ್ ಮೆಳೊನ್ ಹ್ಯಾ ಉತ್ರೊಣೆಕ್ ಚಳ್ವಳೆಚೆಂ ರೂಪ್ಚ್ ದಿಲೆಂ.
ಆಧುನಿಕ್ ಕೊಂಕ್ಣಿ ಕಾವ್ಯಾಂತ್ಲಿ ಹಿ ಮಹತ್ವಾಚಿ ಉತ್ರೊಣ್ ಪರಿಣಾಮ್ಕಾರಿ ರಿತಿನ್ ದಾಖಲ್ ಜಾಲ್ಲಿ, ಹಾಂವೆಂ ಕಾಂಯ್ ಶೆಂಭರ್ ಪಾವ್ಟಿಂ ವಾಚುನ್ ಕಾಡ್ಲ್ಲಿ ಮೆಲ್ವಿನ್ ರೊಡ್ರಿಗಸಾಚಿ ಕವಿತಾ ’ಹ್ಯೆ ರೆಂವೆನ್’ (ವಾಟ್-ಕವಿತಾ ಪಬ್ಲಿಕೇಶನ್ಸ್ ೨೦೦೩) ಕವಿ ಆಂಡ್ರು ಎಲ್. ಡಿ’ಕುನ್ಹಾಚ್ಯಾ ಬಾಂಯ್ ಕವಿತೆಪರಿಂ (ವ್ಹಳೂ ವ್ಹಳೂ ವ್ಹಾಳ್ ವ್ಹಾಳ್ಯಾ, ಆಶಾವಾದಿ ಪ್ರಕಾಶನ್ ೨೦೦೪) ಹ್ಯಾ ಕವಿತೆಂತೀ ಏಕ್ ಬಾಂಯ್ ಆಸಾ. ತಾಚ್ಯಾ ಕವಿತೆಂತ್ಲಿ ಬಾಂಯ್ ದೊಳ್ಯಾಂಕ್ ದಿಸ್ತಾ. ಮೆಲ್ವಿನಾಚ್ಯಾ ಕವಿತೆಂತ್ಲಿ ಬಾಂಯ್ ವಾಚ್ತಾನಾ ಮೆಳ್ಟಾ. ಏಕ್ ಉದ್ಕಾ ಝರಿಚಿ, ಅನ್ಯೇಕ್ ತೆಲಾ ಝರಿಚಿ. ಪುಣ್ ದೋನ್ಯೀ ಜಿವಿತ್ ದಿಂವ್ಚ್ಯೊ. ತೆಲಾಚಿ ಬಾಂಯ್ ಮಾತ್ ಜಿವಿತ್ ದಿತಾ. ದಿತಾನಾ..
ಹ್ಯೆ ಭುಂಯ್ಚ್ಯಾ ಆಂಗಾಂತ್ ಮುಂಗಾ
ತೆಲಾ ಝರಿ ವ್ಹಾಳ್ತಾತ್
ತಾಂತ್ಲೆ ಥೆಂಬೆ ಪುಂಜಾಂವ್ಕ್ ಗೆಲ್ಲ್ಯಾನ್
ಗಾಂವಾಂತ್ ಗುಲೊಬ್ ಫುಲ್ತಾತ್
ಹೆಂ ನಿಷ್ಟುರ್ ಸತ್ ದೊಳ್ಯಾಂ ಸಮೊರ್ಚೆಂ, ಮ್ಹಜ್ಯಾಯಿ ತುಜ್ಯಾಯಿ. ತೆಂ ಪಳೆಂವ್ಕ್ ವೊಕ್ಲಾಂ ಖಂಡಿತ್ ನಾಕಾತ್. ದಾದ್ಲೊ ಸೊಡ್ಯಾಂ ಆಮ್ಚ್ಯಾ ಮಂಗ್ಳುರಿ ಕಿರಿಸ್ತಾಂವ್ ಸಮಾಜೆಂತ್ಲ್ಯೊ ಜಾಯ್ತ್ಯೊ ಆಂಕ್ವಾರ್ ಚಲಿಯೊ ಸಯ್ತ್ ಹ್ಯಾ ರೆಂವೆಂತ್ಲ್ಯಾ ಗಾಂವಾಂತ್ಲೆ ತೆಲಾಚ್ಯಾ ಬಾಂಯ್ತ್ಲೆ ಥೆಂಬೆ ಪುಂಜಾಂವ್ಕ್ ಗೆಲ್ಲ್ಯಾನ್ ಕಿತ್ಲೆಶ್ಯಾ ಕೊಲು ಸಯ್ತ್ ನಾತ್ಲ್ಲ್ಯಾ ಘರಾಂಕ್ ನಳೆ ಪಡ್ಲ್ಯಾತ್, ಕಿತ್ಲೆಶ್ಯಾ ಭಾವಾ ಭಯ್ಣಿಂನಿ ಚಾರ್ ಅಕ್ಷರಾಂ ಶಿಕ್ಲ್ಯಾಂತ್ ತೆಂ ಕಶೆಂ ವಿವರುನ್ ಸಾಂಗ್ಚೆಂ? ತರ್ಯೀ ನಾ ಹಾಂಗಾ ಥೆಂಬೆ ಪುಂಜಾಂವ್ಕ್ ಆಯಿಲ್ಲೊ ತರ್ನೊ ಹೊರೆತ್, ನಾ ಥಂಯ್ ಕಾಂಟ್ಯಾಚ್ಯಾ ಗಜ್ಡೆರ್ ನಿದ್ಲ್ಲಿ ತಾಚಿ ತರ್ನಿ ಹೊಕಾಲ್-ಸುಕಾನ್ ಆಸಾತ್. ಆತಾಂ ಪರಿಗತ್ ಬದಲ್ಲ್ಯಾ ಜಾಂವ್ಕ್ ಪುರೊ (ಕವಿತಾ ಬರಯಿಲ್ಲಿ ತಾರಿಕ್ ಮಾರ್ಚ್
2000) ತರ್ಯೀ ಹರ್ ತರ್ನ್ಯಾ ಹೊರೆತಾಕ್ ಆಪ್ಲ್ಯಾ ಆಪ್ಲ್ಯಾ ತರ್ನ್ಯಾ ಹೊಕ್ಲೆಕ್ ಕುಶಿನ್ ಘೆವ್ನ್ ರೆಂವೆಂತ್ ಸಾಸ್ಪೊಂಚೆಂ ಸುಲಭಾಯೆಚೆಂ ನ್ಹಂಯ್.
ತರ್ನೊ ಹೊರೆತ್ ಹೊಕ್ಲೆಕ್ ಸಾಂಡುನ್
ರೆಂವೆಂತ್ ಫುಡಾರ್ ಉಸ್ಪಿತಾ
ಗಾಂವಾಂತ್ ಪಾಲಂವ್ ಉಬತ್ ಕಸೊ
ಮೆಂದು ಸಾಣ್ಯಾಕ್ ಸಾಣ್ಶಿತಾ
ಆಯ್ಲೆವಾರ್ ಬುಕಾರುಪಾರ್ ಆಯಿಲ್ಲಿ ಪಯ್ಲಿ ಕೊಂಕ್ಣಿ ಇ-ಕಾದಂಬರಿಯೆಂತ್ ಕವಿಯೀ ಜಾವ್ನಾಸ್ಚಾ ವಲ್ಲಿ ಕ್ವಾಡ್ರಸ್ ಅಜೆಕಾರಾನ್ ಹೆಂ ಸವಿಸ್ತಾರ್ ಪಿಂತ್ರಾಯ್ಲಾಂ (ಪಾಟಿಂ ಗಾಂವಾಕ್ - ಆಶಾವಾದಿ ಪ್ರಕಾಶನ್
2006)
ರೆಂವೆಂಚ್ಯಾ ಗಾಮ್ವಾಂತ್ ಅರ್ಭಿ ಬಾಳಾಂತ್ ಕುಲಾಂವ್ ಶಿಜವ್ನ್ ಖಾವ್ಯತಾನಾ ಗಾಮ್ವ್ಚ್ಯಾ ಆವಯ್ಕ್ ಆಪ್ಲ್ಯಾ ಬಾಳಾಚೊ ಯಾದ್ ಪೊಕೊರ್ನ್ ಯೇನಾಸ್ತಾನಾ ರಾವಾತ್? ತಶೆಂ ಕಾಸಾಕ್ ಉಪ್ಕಾರಾಕ್ ಪಡಾನಾತ್ಲ್ಲ್ಯಾ ನಾಂವಾ ಪುರ್ತ್ಯಾ ಭರ್ತಾರಾಚೊ? ಖಂಯ್ ಥೊಟೊ ಪಿಯೆವ್ನ್ ಖಣ್ಯೆಂತ್ ಪಡ್ಲಾಗೀ ಆನಿ ಬಾಳಾಂ ಘರಾ ಉಪಾಶಿಂಗೀ?
ಹ್ಯೆ ರೆಂವೆನ್ ಸ್ವಾಸ್ ದಿಲಾ
ದಿತಾಂ ಗಳ್ಯಾ ಪಾಸ್ ಘಾಲಾ
ಹ್ಯೆ ರೆಂವೆನ್ ಮಾಸ್ ದಿಲಾಂ
ದಿತಾಂ ಕಾಳ್ಜಾ ಘಾಸ್ ಘಾಲಾ
ನವ್ಯಾ ಹೊರೆತಾಕ್ ಗಾಂವಾಂತ್ ಹೊಕ್ಲೆಚ್ಯಾ ಉಭ್ಚಾ ಪಂವಾಚಿ ಖಂತ್! ಖಂಯ್ಯೀ ಮಾಪ್ಳಿ ಚೊಟ್ಟೊ ಬೊಕುಲ್ ದುದಾಕ್ ತೋಂಡ್ ಘಾಲಿತ್ ತರ್? ಆವಯ್ಕ್ ಭರ್ತಾರಾಚಿ ಖಂತ್! ಪಿಯೆವ್ನ್ ಖಣ್ಯೆಂತ್ ಪಡೊನ್ ಪಾಟಿಚೊ ಖಣೊ ಮೊಡಾತ್ ತರ್, ಭುರ್ಗಿಂ ಉಪಾಶಿಂ? ದಾದ್ಲ್ಯಾಕ್ ಕುಟ್ಮಾಚಿ, ಸಂಸ್ಕೃತೆಕ್ ಭಾಶೆಚಿ ಕಂತ್!
ಹ್ಯಾ ಭುಂಯ್ಚ್ಯಾ ಆಂಗಾಂತ್ ಮುಂಗಾ
ತೆಲಾ ಝರಿ ವ್ಹಾಳ್ತಾತ್
ತಾಂತ್ಲೆ ಥೆಂಬೆ ಪುಂಜಾಂವ್ಕ್ ಗೆಲ್ಲ್ಯಾನ್
ಸದಾಂಚ್ ಕಾಂಟೆ ತೊಪ್ತಾತ್
ಕಾಂಟೆ ಆಸಾತ್ ಮ್ಹಣ್ ಕಳಿತ್ ಆಸೊನೀ ಕೋಣ್ ಗುಲೊಬ್ ಖುಂಟಿನಾಸ್ತಾಂ ರಾವ್ತಾ? ತೆಲಾಚೆ ಥೆಂಬೆ ಪುಂಜಾಂವ್ಕ್ ವೆತಾನಾಂಯೀ ತಿತ್ಲೆಂಚ್.. ಕಾಂಟೆ ಸಾಂಭಾಳ್ನ್ ಗುಲೊಬ್ ಮಾತ್ ವಿಂಚ್ಚೆಂ ಬುಧ್ವಂತ್ಕಾಯ್.
ಕವಿ ಮೆಲ್ವಿನ್ ರೊಡ್ರಿಗಸ್ ಸಬ್ಧಾಂಚೊ ಜಾದೂಗಾರ್. ಭಗ್ಣಾಂಕ್ ಸಬ್ಧಾಂನಿ ಕಲ್ಸುನ್ ತೊ ಅಶೆಂ ಅಳೆನ್ ವಾಟ್ತಾಗೀ ಜಶೆಂ -
’ತಾರ್ಲ್ಯಾಚಿ ಕಡಿ ಮಾತ್ಯೆಚ್ಯಾ ಕುಂಡ್ಲ್ಯಾಂತ್ ಆಟಂವ್ಕ್ ಸೊಡ್ನ್ ದುಸ್ರ್ಯಾ ವಾ ತಿಸ್ರ್ಯಾ ದಿಸಾ ಖೊಳಾಚ್ಯಾ ಆಂಬ್ಯಾ ಸಾಂಗಾತಾ ಪೆಜೆಕ್ ತೊಂಡ್ಲಾಂವ್ಕ್ ದಿಲಿ ತರ್..’ ತಾಚ್ಯಾ ಕವಿತೆಚಿ ರೂಚ್ಯೀ ತಶಿಚ್ಚ್ - ಕಿತ್ಯಾಕ್ ತೊ ಆಧುನಿಕ್ ಕೊಂಕ್ಣಿ ಕಾವ್ಯಾಚೊ ಮಾಂತ್ರಿಕ್.
’ತಿಸ್ರೊ ದೊಳೊ’ಚೆ ಆಧ್ಲೆ ಆಂಕ್ಡೆ: 1, 2, 3, 4
About us | Feedback | Contact us
Copyright ©
2005 DAAIZ.COM All rights reserved.
Page concept, designed and maintained by Ashawadi Publications
