ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ವಿಂಚ್ಣಾರ್ ಮಟ್ವಿಕಾಣಿ: ಕೇಲ್ ಅಮ್ಮಾ
ಕ್ಯಾಥರಿನ್ ರೊಡ್ರಿಗಸ್: ಕೊಂಕ್ಣಿ ತಶೆಂಚ್ ತುಳು ಭಾಸೆಚಾ ಸಾಹಿತ್ಯಾಂತ್ ಫಾಮಾದ್ ಜಾಲ್ಲಿ ಕ್ಯಾಥರಿನ್ ಏಕ್ ಸಮಾಜ್ ಸೆವಕಿ ಮಾತ್ರ್ ನ್ಹಂಯ್, ಸಾದ್ಯಾ ಲೊಕಾಂಚಾ ಕಾಳ್ಜಾಚಾ ಎಕೆಕಾ ಉಡಿಯೆಕ್ ಲಾಗ್ಸಿಲ್ಯಾನ್ ಪಾರ್ಕಿಲ್ಲಿ ಜಾವ್ನಾಸಾ. ದಾಯ್ಜ್ ಸಾಹಿತಿ ಸ್ಪರ್ಧೊ 2004 ಹಾಂತುಂ ಹಿಚಾ ’ಚರುವೊ’ ಮಟ್ವ್ಯಾ ಕಾಣ್ಯೆಕ್ ಪಯ್ಲೆಂ ಇನಾಮ್ ಲಾಭ್ಲಾಂ. ’ಕೇಲ್ ಅಮ್ಮಾ’ ಎಕಾ ಸಮಾಜೆಂತ್ಲ್ಯಾ ಸಭಾರ್ ತೊಂಡಾಂಕ್ ಉಗ್ಡಾಪೆಂ ಕರ್ತಾನಾ, ಮನಿಸ್ ಏಕ್ ಸಾರ್ಕೊ ದಿಸ್ಲ್ಯಾರ್ಯೀ ತೊ ಏಕ್ ಭಿಲ್ಕುಲ್ ನ್ಹಂಯ್ ಮ್ಹಣ್ ಬೊಬಾಟುನ್ ಸಾಂಗ್ತಾ.
[ದಾಯ್ಜ್ ಸಾಹಿತಿಕ್ ಸ್ಪರ್ಧೊ 2005 ಹಾಂತುಂ ವೊರಾಯ್ಣಾರಾಂಚಿ ಶಿಫಾರಾಸ್ ಜೊಡ್ಲೆಲಿ ಕಾಣಿ]
ಕ್ಯಾಥರಿನ್ ರೊಡ್ರಿಗಸ್
ಕಾಲ್ ರಾತಿಂ ಶಿರಾಧಾರಿಚೊ ಪಾವ್ಸ್. ಮ್ಹಾತಾರಿ ಉಜ್ಯಾಚ್ಯಾ ಧಗಿಕ್ ತೇಲಾಚ್ಯಾ ಜಿಡ್ಡಾಂತ್ ಪರ್ಜಳ್ಜಿಂ ಕಾಂಬೊಳ್ ಜಾತಾಂ ತಿತ್ಲಿಂ ರೆಂವ್ಡುನ್, ಹಾತ್ ಪಾಂಯ್ ಉಜ್ಯಾಚ್ಯಾ ಉಬೆಕ್ ಶೆಕುಂಕ್ ಪಳೆತಾಲಿಂ. ಪಾವ್ಸಾಚೊ ಖೆಳ್ ಸಂಪ್ಲ್ಲೊ. ಪುಣ್ ಪಾಟ್ಲೆಂ ಥೊಡೆಂ ದೀಸ್ ಥಾವ್ನ್ ಆಯಿಲ್ಲ್ಯಾ ಪಾವ್ಸಾನ್ ಖಡ್ಪಿ, ಘಟ್ಟ್ ಜಾಗ್ಯಾಂನಿ ರಾವೊನ್ ಶ್ಹೆಳ್ಯಾಕ್ ಜೀವ್ ದಿಲ್ಲೊ. ಪಾಚ್ವೊ ಪಾಚ್ವೊ ಜಾವ್ನ್ ಪಡ್ಲ್ಯಾ ಪಾವ್ಸಾನ್ ನಾಣಯಿಲ್ಲ್ಯಾ ಜಾಗ್ಯಾರ್ ಪಾಂಯ್ ದವರ್ತಾನಾ ನಿಸ್ರಾತೆಲೆಂ. ತಕ್ಲಿ ಬಾಡ್ಯಾಕ್ ದಿಲ್ಯಾರ್......? ಪೆಂಕ್ಟಾರ್ ಭಾರ್!
ಸಬಾರ್ ದಿಸಾಂನಿಂ ಆಜ್ ಸುರ್ಯಾನ್ ಆಪ್ಲೆ ಮುಖಮಳ್ ಪ್ರಥ್ವಿ ಚಲಿಯೆಕ್ ದಾಕೈಲೆಂ. ಪುಣ್........ಆಜ್ ಆಮ್ಚ್ಯಾ ಗಾಂವಾಂತ್ ನವೊ ಚಂದ್ರೆಮ್ ದೀಸಾ ಉಜ್ವಾಡಾಕ್ ದಿಷ್ಟಿಕ್ ಪಡ್ತಾ ಕಿತೆಂ!? ಕಿತೆಂ? ಮ್ಹಳ್ಳ್ಯಾ ಸವಲಾಕ್ "ಕೇಲ್ ಅಮ್ಮಾ" ಆಯ್ಲಾಂ. ತಿಕಾ ಪಳೆಜೆ. ತಿಚ್ಯಾ ಪಾಂಯಾಕ್ ಪಡಾಜೆ. ತಿಚೆಂ ಥಾವ್ನ್ ಆಶೀರ್ವಾದ್ ಮಾಗಾಜೆ. ತಿಣೆಂ ಮಾಗ್ಲ್ಲೆಂ ದೀಜಾಯ್. ಕೆದಳಾ ಏಕ್ ಪಾವ್ಟಿಂ ತಿಚಿಂ ದೀಷ್ಟ್ ಮ್ಹಜೆರ್
ಪಡಾತ್! ದರ್ಶನ್ ಲಾಭಾಕ್! ಕಷ್ಟಾಂಕ್ ಪರಿಹಾರ್ ಮೆಳಾತ್ ಮ್ಹಳ್ಳ್ಯಾ ಆಶೆನ್ ಖರ್ಯಾಚಿಂ ಗೊಂಮ್ಟಿ ಕರ್ನ್ ಭಿನ್ಸಾಂಚೆರ್ ಭೊಳ್ ಘಾಲುನ್ ’ಆಸ್ ಊಸ್’ ಕರ್ತಾಲಿಂ. ತವಳ್.....
"ದೇವಿ ..........ಅಮ್ಮಾ...!....ಕೇಲ್ ಅಮ್ಮಾ! ಆಯ್ಲಿ. ಸ್ವಾಮಿ ಅಮ್ಮಾ! ಮ್ಹಳ್ಳೊ ಪುಸ್ಪುಸೊ ಆಯ್ಕಾಲೊ. ಸರ್ವಾಂ ಥಂಯ್ಚ್ ತ್ಯಾ ಶ್ಹೆಳೊ ಮಾಂಡ್ಲ್ಲ್ಯಾ ಥರ್ಣಿರ್ ವೊಮ್ತಿಂ ಪಡ್ಲಿಂ. ಮ್ಹಜಿ ದೀಷ್ಟ್ ತಿಚೆರ್ ಖಂಚ್ಲಿ. ವ್ಹಾಜಪ್ ಬಾಂದುನ್ ಬಾಂದುನ್ ಫುಂಕ್ಲೆ. ಧರ್ಣ್ ನಿಸ್ರಾತೆಲಿಂ ತಾಚೆರ್ ಅಮ್ಮಾ.....ಘನಾನ್ ಆನಿಂ ಮಾನಾನ್ ತಾಂಬ್ಡೆ ರಶ್ಮಾಚೆಂ ಕಾಪಾಡ್ ನೆಸೊನ್, ಕೇಸ್ ಪಾಟ್ ಭರ್ನ್ ಸೊಡ್ನ್ ಗಳ್ಯಾಂತ್ ಫುಲಾಂಚೊ ಹಾರ್ ಘಾಲುನ್. ಕಪಾಲ್ಭರ್ ಕುಂಕುಮ್ ದವರುನ್ ಖುದ್ವೊನ್...ಯೆತಾನಾ ರಡ್ಚ್ಯಾ ಭುರ್ಗ್ಯಾಂಚೆಂ ತೋಂಡ್ ಉಗ್ತೆಂಚ್ ಉರ್ಲೆಂ. ಆವಾಜ್ ಬಂದ್ ಪಡ್ಲೊ. ಸೊಡಾಂನಿ ಭಿಂಯಾನ್ ದೊಳೆ ದಾಂಪ್ಲೆ. ಧೈರಾಧಿಕ್ ಮ್ಹಣ್ತೆಲ್ಯಾಚಿಯೀ ಲೆಂಡಿ ಘುಡ್ಗುಡ್ಲಿ.
ಕೇಲ್ ಅಮ್ಮಾ ನಾಚ್ತಾನಾ ಧರ್ಣ್ ಹಾಲ್ಲಿ, ಸರ್ವಾಂಚಿಂ ತಕ್ಲಿ ತಶಿಚ್ ಧಲ್ಲಿ. ಕಾಪ್ಡಾಚೊ ಪಾಲೊವ್ ನಿಸ್ರಾಲೊ. ಭರ್ಲೆಲೆಂ ಪರ್ದೆ ಅಂಗಲಾಪಾಚ್ಯಾ ಭುಕೆಲ್ಲ್ಯಾ ವಾಗ್ಡಾಂಚೆಂ ಮನ್ ಪಿಸಾಂತುರ್ ಕರುಂಕ್ ಲಾಗ್ಲೆ.
ನಾಚ್.....ನಾಚ್.....ಖುದ್ವಾಲಿ.... ವ ನಾಚ್ಲಿ ಹಾಂವ್ ನೆಣಾಂ ಪಾಂಯ್ ಥಾರ್ಯಾರ್ ನಾತ್ಲ್ಲೆ. ಪತ್ರಾಚೆ ವರ್ದೆಕ್ ಮ್ಹಣೊನ್ ಆಯಿಲ್ಲೆ ಕಶೆಂ ಆನಿಂ ಕಿತೆಂ ಮ್ಹಳ್ಳೆಂ ಸಮ್ಜೊಂಕ್ ಚಡ್ಪಾಡ್ಲೆ. "ಪವಾಡದ ಅಮ್ಮಾ! ’ಕೇಳ್ ಅಮ್ಮಾ’ ಮ್ಹಳ್ಯಾರ್ ಕೋಣ್ ಕಿತೆಂ ಮ್ಹಣೊನ್ ಸೊಧ್ನಾಂ ಕರುಂಕ್ ಪೆಚಾಡ್ಲೆ. ಖಂಯ್ ಥಾವ್ನ್ ತಿ ಆಯ್ಲ್ಯಾ? ಕೋಣ್? ಖಂಯ್ಚಿ? ತಿಚಿಂ ಸಕತ್ ಕಸಲಿ? ಕೋಣಿ ನೆಣಾಂ. ಪುಣ್ ಗಾಂವಾಚೆಂ ಗಾಂವ್ ತಿಚೆಂ ನಾಂವ್ ಗಾಜ್ಲಾ. ತಿಣೆಂ ಆಪ್ಡಿಲ್ಯಾರ್ ಕಸಲಿಯ್ ಪಿಡಾಯಿ ಗೂಣ್ ಜಾತಾ. ಮಾಟ್ ಮಂತ್ರಾ ಕಾಡ್ತಾ. ಭುರ್ಗ್ಯಾಂಕಿ ಆಸಾ ಕರ್ಚಿ ಸಕತ್ಯಿ ತಿಕಾ ಆಸಾ. ಆಶೆಂ ಖಬ್ರೊ ಖಬ್ರೊ. ಪೂಣ್.....ಸು......ಸು......ಮ್ಹಣೊನ್ ಸುಕ್ರುಂಡೆ ಬಾಜ್ತಾಲಿಂ ಸೊಡುನ್ ಕಶೆಂ ತೆಂ ಜಾಲ್ಯಾತ್ ತೆಂ ಕೊಣಿ ನೆಣಾಂ.
ಹಾಂವೆಂ ಪಳೈಲೆಂ ಆನಿಕ್ಯಿ ದೊಳೆ ಸೊಡುನ್ ಪಳೈಲೆಂ. ದೊಳೆ ಘಸ್ಟಿಲೆ. ಸಪ್ಣೆಲಾಂಗಿ? ಲ್ಹಾರಾಂ ವಯ್ರ್ ಲ್ಹಾರಾಂ ಮಾರುಂಕ್ ಲಾಗ್ಲಿ. ವೆಳೆಚಿ ರೇಂವ್ ದರ್ಯಾಚ್ಯಾ ಉದ್ಕಾಂತ್ ಲಿಪ್ಲಿ. ವೆಳೆಕ್ ಜ್ಯೋರಾನ್ ಮಾರ್ಲ್ಲ್ಯಾ ಲ್ಹಾರಾಂ ಸಂಗಿಂ ಆಯಿಲ್ಲ್ಯಾ ಫೆಂಡಾನ್ ಘಡಿಯೆ ಬಿತರ್ ರೆಂವೆಚ್ಯಾ ವೆಂಗೆಂತ್ ಆಸ್ರೊ ಘೆತ್ಲೊ. ಸುಕೆಂ ರೆಂವೆರ್ ಲ್ಹಾನ್ ಲ್ಹಾನ್ ಕೊಚ್ಚರಾಂನಿ ತಕ್ಲಿ ಉರ್ಲೆಲಿ. ತವಳ್ ಮ್ಹಜ್ಯಾ ದೊಳ್ಯಾ ಮುಕ್ಲೊ ಪಡ್ದೊ ಸವ್ಕಾಸ್ ವಯ್ರ್ ಸರೊಂಕ್ ಲಾಗ್ಲೊ.
ತೋಮ ನಲಿಕೆ ಆನಿಂ ಬೀಯಲು ನಲಿಕೆ ಸಗ್ಳ್ಯಾ ಗಾಂವಾಂತ್ ಚಡಿತ್ ಭೂತಾಕಿ ಕೋಲ ಬಾಂದ್ಚ್ಯಾಂತ್ ನಾಂವ್ ವೆಲ್ಲೆಂ ಘರ್. ತೋಮ ನಲಿಕೆ ಭೂತಾಕ್ ಆಂಗಾಂತ್ ಆಪ್ಣಾಂವ್ಕ್ ಕಾಂಯ್ ತರೀ ಸಾಂಗಾಂತ್ ತರ್ ತೆಂ ಚುನ್ಯಾಚೆಂ ಥಿಕ್. ಬೀಯಲು ಆಫ್ಲ್ಯಾ ಧುವೆಕ್ ಮಿಣ್ಕೆಕ್ ಘೆವ್ನ್ ಮಾದಿರ ನಾಚೊಂವ್ಕ್ ಯೆತಾನಾ ಬೀಯಲುಚೆಂ ತೆಂಬರೆಚ್ಯಾ ನಾದಾಕ್ ತಾಚ್ಯಾ ತೋಂಡಾಂ ಥಾವ್ನ್ ಯೆಂವ್ಚ್ಯಾ ಪಾಡ್ದನಾಕ್ ಸರಿ ಜಾವ್ನ್ ಮಿಣ್ಕೆ ಪಾಟಿಂ ಮುಕಾರ್ ವಚೊನ್ ನಾಚ್ತನಾ ಆನಿಂ ತಾಚ್ಯಾ ಆವಯ್ಚಾ ಪಾಡ್ದನಾಚ್ಯಾ ಜಾಪಿಚ್ಯಾ ತಾಳ್ಯಾಕ್ ಜಾಪ್ ದಿತಾನಾ ಆಯ್ಕಾತಾಲೆಂ ತಾಂಚೆಂ ಕಾಮ್ ವಿಸ್ರಾತಾಲೆ. ಮಿಣ್ಕಿಚ್ಯಾ ತ್ಯಾ ಸೊಬಿತ್ತ್ ಕುಡಿ ಬಿತರ್ ದೆವಾನ್ ಏಕ್ ರಂಗೀನ್ ತಾಳೊಯಿ ಆಸಾ ಕೆಲ್ಲೊ. ಮಾದಿರಾಚ್ಯಾ ದಾಲ್ಯಾಂತ್ ಭಾತ್ ಆನಿಂ ಪರ್ನೆಂ ವಸ್ತುರ್ ಭರ್ತಾಲೆಂ. ಥೊಡೆಂ ಪಯ್ಶೆಯಿ ಬೀಯಾಲುಚ್ಯಾ ಪೊತಿಯೆಂತ್ ಪಡ್ಟಾಲೆ.
ಮಿಣ್ಕಿ ಸೊಭಾಯೆಚೆಂ ಮಾಣ್ಕುಲೆಂ. ನಿಳೆಂ ನಿಳೆಂ ದೊಳೆ. ಪಿಟಾ ಮುದ್ಯಾ ತಸಲಿಂ ಗೊರ್ಸಾಣ್. ಲಾಂಬ್ ಕೇಸ್, ವಾಡ್ಕುಳೆ ಗಾಲ್. ಮಿಣ್ಕಿಕ್ ಪಳೈಲೊ ತರ್ ಪರತ್ ಏಕ್ ಪಾವ್ಟಿಂ ಘುಂವೊನ್ ಪಳೈತಾಲೆ. ಘರಾಂ ಘರಾಂನಿಂ ಘೂಲ್ಯಾ ತೇಲಾನ್ ತಾಚೆ ಕೇಸ್ ಉಪ್ಯೆತಾಲೆ. ತೋಮ ನಲಿಕೆಚ್ಯಾ ಮಾತ್ಯಾರಿ ಬರೊ ಕೇಸ್. ತಾಂಚೆ ಕೇಸ್ ಪಂಚ್ವೀಸ್, ಚಾಳೀಸ್ ವರ್ಸಾಂ ಆದಿಂ ಕೆಲ್ಸಿ ಕಾಡುಂಕಿ ಪಾಟಿಂ ಸರ್ತಾಲೊ. ದೆಕುನ್ ತಾಂಚ್ಯಾ ದಾದ್ಲ್ಯಾಕಿ ವ್ಹಡ್ ಶೆಂಡೊ. ತ್ಯಾ ಶೆಂಡಾಂತಿ ಏಕ್ ಅಪೂರ್ವ್ ಸೊಭಾಯ್!
ಹಾಂವೆಂ ಲ್ಹಾನ್ ಥಾವ್ನ್ ಏಕ್ ಸವಾಲ್ ಕರ್ಚೆಂ ಆಸ್ಲ್ಲೆಂ. ತೆಂ ಕಿತ್ಯಾಕ್ ಕೇಸ್ ಕಾಡಿನಾಂತ್. ಸಗ್ಳ್ಯಾ ಕೇರಿಂತ್ಲಿಂ ಶೆಂಡೊ ಬಾಂದ್ತಾಲಿಂ. ಭುರ್ಗ್ಯಾಂಕಿ ಕೆಳಿಚ್ಯಾ ದೊರಾನಿ ಪಾಂತಿಯೊ ಬಾಂದುನ್ ಸೊಡ್ತಾಲಿಂ. ಏಕಾ ದೀಸಾ ರಾನಾಂತ್ಲೊ ಏಕ್ ಸೊಸೊ ಆಮ್ಚ್ಯಾ ಹಿತ್ಲಾಂತ್ ದೆಂವ್ಲೊ, ಆಮ್ಚ್ಯಾ ಚೋಮಿನ್ ಧಾಂವ್ಡೊನ್ ವ್ಹರ್ತಾನಾ ತೊ ತೋಮ ನಲ್ಕೆಚ್ಯಾ ಗುಡ್ಸಿಲಾಕ್ ರಿಗ್ಲೊ. ಹಾಂವ್ಯಿ ಪಾಟ್ಲ್ಯಾನ್ ಧಾಂವುಲ್ಲೊಂ. ಥಂಯ್ ಪಾವ್ಲೊ. ಚೋಮಿ ಬಿತರ್ ಪಳೆವ್ನ್ ಘುಂವ್ತಾನಾಂ ಹಾಂವೆಂ ಬಿತರ್ ತಿಳ್ಳೆಂ. ತೋಮ ಆಪ್ಲ್ಯಾ ಕೇಲ್ ಕೊಯ್ತಾನಾ ಪುತಾಚೆ ಕೇಸ್ ಧರುನ್ ತಣ್ ಲುಂವ್ಚ್ಯಾ ಪರಿಂ ಲುಂವ್ತಾಲೊ. ತೆಂ ಪಳೈಲ್ಯಾ ಮಾಕಾ ಕುತ್ತ್ ಕರ್ನ್ ಹಾಸೊಂಕ್ ಆಯ್ಲೆ.
ನಾಗೆರೇ......ಕಿತ್ಯಾಕ್ ಹಾಸ್ತಾತ್? ಆಮ್ಕಾಂ ಹಿಚ್ಚ್ ಗತ್! ಕೇಸ್ ಕಾತ್ರುಂಕ್ ಆಡ್ವರ್ಲಾಂ. ಪುಣ್...ಏಕ್ ರಾಸ್ ವುವೊ ಜಾಲ್ಯಾತ್ ವಯ್ಲ್ಯಾನ್ ರುಂವಾಂ ಭರ್ಲ್ಯಾಂತ್. ಬೊಡಿ ದವರ್ಲ್ಯಾರ್ ಚರೊನ್ ವೆತಾತ್ ಸೊಡ್ಲ್ಯಾರ್ ಹಾಕಾ ದರ್ಯಾಕ್ ವೋಡ್ನ್ ವರುಂಕ್ ಆಸಾತ್. ದೆಕುನ್ ....ಕಶೆಂ ಪುಣಿ ಕರ್ನ್ ಮೊಂಶಿಚೊ ಏಕ್ ತಾಪೊ ಶೆಣ್ ಘೆವ್ನ್ ಆಯ್ಲಾಂ. ತೆಂ ಘಾಲ್ನ್ ವಾಳಾಂತ್ ನಾಣೈತಾ. ನಾಂ ತರ್ ಕುಸೊನ್ ವಚಾತ್! ತೋಮಾನ್ ಸಾಂಗ್ತಾನಾ ರಡ್ಕುರೊ ಜಾವ್ನ್ ಬಸುಲ್ಲೊ ಬೊಗ್ಗುರಾ ಪೆಂಕ್ಟಾಚೊ ಕುಡ್ಕೊ ಸಾರ್ಕೊ ಕರುಂಕ್ ಲಾಗ್ಲೊ.
ಹಾಂವೆಂ ಬಿತರ್ ಬೋಟ್ ದಾಕೈಲೆಂ. ’ತೊ ಸೊಸೊ.....! ಮ್ಹಣ್ತಾನಾ ತೋಮಾಚಿ ದೀಷ್ಟ್ ಸೊಸ್ಯಾಚೆರ್ ಪಡ್ಲಿ. ’ಹೊ ದೇವೆರ್!’ ಉದ್ಗಾರ್ಲೊ. ಹಾತ್ ಜೊಡುನ್ ನಮಸ್ಕಾರ್ ಕರ್ತಾನಾ ಪುತಾನಿ ಧರ್ಣಿಕ್ ತಕ್ಲಿ ಲಾಗಯ್ಲಿ. ಸೊಸೊ ದೊಳೆ ಧಾಂಪುನ್ ’ರಾಕ್ ದೆವಾ’ ಮ್ಹಳ್ಳ್ಯಾ ಪರಿಂ ಮಾಗ್ಣೆ ಕರ್ತಾ ತಸೊ ಬಸಲ್ಲೊ. ಸೊಸೊ ಹಾಲನಾ. ತೋಮಾಚ್ಯಾ ಕೋಲಾ ಬಾಂದ್ಚ್ಯಾ ವಸ್ತುರಾಚ್ಯಾ ಪೆಟುಳ್ಯಾರ್ ದವರ್ಲ್ಲ್ಯಾ ಭೂತಾಚ್ಯಾ ಗಗ್ಗರಾಚೆರ್ ಬೊಸ್ಲಾ.
’ನಾಗೆರೇ ತುಂಮ್ಚ್ಯಾ ಚೋಮಿಕ್ ಘೆವ್ನ್ ಘರಾ ವಚಾ. ತಾಕಾ ಕಾಂಯ್ ಕರುಂಕ್ ಜಾಯ್ನಾ. ಆಮ್ಚ್ಯಾ ದೈವನ್ಂಚ್ ತಾಕಾ ಆಸ್ರೊ ದಿಲಾ. ತಾಕಾ ರಾಕೊನ್ ತಾಚ್ಯಾ ಥಣ್ಯಾರ್ ಸೊಡುನ್ ಯೆಂವ್ಚೊ ಮ್ಹಜೊ ಕಾಯ್ದೊ. ಪೆಟ್ಯಾಕ್ ದಾಂವ್ಡಾಯ್ಲೆಂ. ತೋಮಾನ್ ತಾಕಾ ಭುರ್ಗ್ಯಾ ಪರಿಂ ಉಕ್ಲುನ್ ರಾನಾಂ ಕುಶಿನ್ ಮೆಟಾಂ ಕಾಡ್ತಾನಾ ಮಾಸ್ ಮ್ಹಳ್ಯಾರ್ ಮೆಲ್ಲೊ ಜೀವ್ ಜಾಂವ್ಚೊ ತೋಮ ನಲಿಕೆ ಹೊಗೀ ಮ್ಹಳ್ಳೆಂ ಸವಾಲ್ ಉಟ್ಲೆಂ.
’ಮಿಣ್ಕಿ’, ಬೊಗ್ಗುರಾ ಆನಿಂ ಲ್ಹಾನ್ ಏಕ್ ಚೆಡುಂ ಇತ್ಲಿ ತೋಮಚಿಂ ಭುರ್ಗಿಂ. ಫೆಸ್ತಾ ಪರ್ಬೆಕ್ ಗಾಂವಾರ್ ಯೆತಾಲಿಂ. ಪೂಣ್......ತಾಂಚೆಂ ಕಾಮ್ ಮಾಗ್ಚೆಂ ನ್ಹಂಯ್. ಜಾತಿಚೊ ವಾವ್ರ್ ಆಸ್ತಾನಾ ಜೊಡ್ತಾಲಿಂ. ಉಪ್ರಾಂತ್ ಬೊಣ್ಕಿಚಿಂ ಕಾಂಟಿ ಕಾಡ್ನ್ ತಾಂತು ಮಾಂದ್ರ್ಯೊ ವೊಳ್ತೆಲಿಂ. ವ ಕೂಲಿಚ್ಯಾ ಕಾಮಾಕ್ ವೆತಾಲಿಂ. ತಾಂಚ್ಯಾ ಘರಾಂ ಮುಖಾರ್ ಏಕಾಚ್ಚ್ ಮಾಡಾ ಕವಾತೊ. ಮಿಣ್ಕಿ ತಾಣೆಂ ವಾಪ್ರುಂಚೆಂ ಹರ್ಯೇಕ್ ಥೆಂಬೊ ಉದಾಕ್ ತಾಚ್ಯಾ ಮುಳಾಕ್ ವೊತ್ತಾಲೆಂ. "ಕೇದಗ" ಮಿಣ್ಕಿನ್ ಮಾಡಾಕ್ ವೊಲಾಯ್ಲೆಂ. ತೆಂ ವಾಡ್ಚ್ಯಾಪರಿಂ ಮಾಡ್ಯಿ ವಾಡ್ಲೊ. ಶಿಂಮ್ಟಿ ದೆಂವ್ಲಿ ಕುಬ್ಯಾಕ್ ಏಕ್! ಕೊಣಿ ಸೈರೊ ಆಯ್ಲ್ಯಾರಿ ಏಕ್ ಬೊಂಡೊ ಕಾಡ್ಚಿನಾಂತ್. ವರ್ಸಾಕ್ ಏಕ್ ಪಾವ್ಟಿಂ ಜಾಂವ್ಚ್ಯಾ ದೈವಚ್ಯಾ ಭಾರ್ಣೆಕ್ ಮಾತ್ರ್ ಏಕ್ ಶಿಂಮ್ಟೆಂ ಬೊಂಡೊ. ನಾಂ ತರ್ ನಾರ್ಲ್ ಸುಕೊನ್ ಪಡಾಜೆ. ತೆಂ ವಾಪ್ರಿಜೆ.
ಶಿಂಮ್ಟಿ ಕಾತ್ರುನ್ ಪಡಾಜೆ. ಏಕಾಂತ್ ತೀಸ್-ಚಾಳಿಸ್ ನಾರ್ಲ್. ವೊಣೊಕ್ ಕರುಂಕ್ ಜೊಕ್ತೆ. ಏಕ್ ಬೊಂಡಿ ಜಡ್ಲ್ಯಾರಿ ಚೆಡ್ವಾಕ್ ಖಂತ್. ’ಅಪ್ಪಾ ನಮ ತಾಕಿ ಕೇದಗಕ್ಕೆ ಉಲ್ಲಾಲ್ದಿ! ಮ್ಹಣ್ತಾನಾ ವಾಡ್ಕುಳೆ ಗಾಲ್ ಆನಿಕಿ ಫುಲ್ತಾಲೆ.
ಮಾಡ್ ವ್ಹಡ್ ಜಾಲೊ. ಮಿಣ್ಕಿಯಿ ವಾಡ್ಲೆಂ. ಪಿಂದ್ಲ್ಲೊ ಗಾಗ್ರೊ ಆನಿಂ ಬಾಜು ಕುಡಿಕ್ ಸೊಬ್ಲಿ. ಪರ್ನೊ ಕಾಪ್ಡಾ ಕುಡ್ಕೊ ಹರ್ದ್ಯಾಕ್ ಧಾಂಪ್ಲೊ. ಹಾಂವ್ಯಿ ವಾಡ್ಲೊ. ವೋಂಟಾರ್ ಮಿಶಿ ಪುಟ್ತಾನಾ ಕಾಲೇಜಿಚ್ಯಾ ಶಿಕ್ಪಾಕ್ ಶಹರಾಕ್ ಪಾವ್ಲೊಂ. ಏಕಾ ದೀಸಾ ಯೆತಾನಾ.....?
ತೋಮ ನಲಿಕೆಚ್ಯಾ ಕೊಡ್ಕ್ಯಾ ಭಂವಾರಿಂ ಲೋಕ್ ಜಮ್ಲಾ. ಸಾಂಕೊಳ್ ವೊಡ್ತಾಲೆ. ಜಾಗೊ ಮೆಜ್ತಾಲೆ. ತೋಮ ಆಯಿಲ್ಯಾಂಚ್ಯಾ ಪಾಯಾಂಕ್ ಪಡ್ತಾಲೊ. ಬೀಯಲು ಆನಿಂ ಮಿಣ್ಕಿ ಕೊನ್ಶಾಕ್ ಕೊವ್ಳೊನ್ ದುಕಾಂ ಗಳೈತಾಲಿಂ. ಸಾಂಕಳ್ ವೊಡ್ಲಿಂ. ಖಂಯ್ ಪರ್ಯಾಂತ್ ತೋಮಚ್ಯಾ ತಟ್ಟೆ ಪರ್ಯಾಂತ್. ಫಾಟ್ಲ್ಯಾನ್ ಉಬಾರ್ ಗುಡೊ. ಖುಂಟೆಂ ಪುರ್ಲೆ. ಮಿಣ್ಕಿಚ್ಯಾ ಕೇದಗಾಕ್ ಭಾಯ್ರ್ ಘಾಲುನ್ ಮಿಣ್ಕಿ ಕೇದಗಾಕ್ ಪೊಟ್ಲುನ್ ರಡ್ಲೆ. ’ಮ್ಹಜ್ಯಾ ಕೇದಗಾಕ್ ಹಾಂವ್ ದೀನಾಂ.....ದೀನಾಂ....... ಮ್ಹಣ್ತಾನಾ....
’ಆಳೆಗೋ....ಮಿಣ್ಕಿ ....ತುಕಾ ಜಾಯ್ ಜಾತನಾ ಆಮ್ಚ್ಯಾ ತೋಟಾಂತ್ಲೊ ಮೆಲ್ಲೊ ಮಾಡ್ ದಿತಾಂ. ಚಾರ್ ದಡೆ ಘಾಲುಂಕ್ ಪುರೊ. ಉಪ್ರಾಂತ್ ಲಾಂಕುಡಿ ಹಾಂವ್ಚ್ ದಿತಾ. ಮ್ಹಣೊನ್ ಭುಜಂಗ ನಂಜಿಯೊ ವೊಂಕ್ತಾನಾಂ ತೆಂ ಆನಿಕಿ ಜೋರಾನ್ ರಡ್ತಾನಾ ’ತೋಮ......ಪಳೆತಾಯ್ ಕಿತೆಂ? ವೋಡ್ನ್ ವ್ಹರ್ ನಾಂ ತರ್ .....’ತೆಂಬೆರೆ’ ಫುಟಾತ್!?
ಮಾಡಾ ವಯ್ರ್ ಆಸ್ಲ್ಲೊ ಹಾಸ್ತಾನಾ ತೋಮನ್ ಧುವೆಕ್ ಬೊಳಾವ್ನ್ ಪಾಟಿಂ ಹಾಡ್ಲೆಂ. ಚಡ್ಲ್ಲ್ಯಾನ್ ನಾರ್ಲ್, ಅಡ್ಸರಾಂ ಬೊಂಡೆಂ ಆನಿಂ ಕರ್ಕು ಲೆಗುನ್ ಕಾತ್ರುನ್ ಸಕ್ಲಾ ಘಾಲೆ. ಲ್ಹಾನ್ ಭುರ್ಗ್ಯಾ ಪರಿಂ ವಾಡೈಲೊ ರೂಕ್ ರಿತೊ ಜಾತನಾ ಪೋಸ್ ಕೆಲ್ಲೆಂ ಜೀವ್ ಖಳ್ವಳ್ಳೆ.
ದೆಂವೊನ್ ಆಯಿಲ್ಲೊಚ್ಚ್ ಬೊಂಡೆ ಪಿಯೆಂವ್ಚ್ಯಾಂತ್ ಪಂದ್ಯಾಟ್ ಆರಂಭ್ ಜಾಲೊ. ಅರ್ದೆ ಪಿಯೊವ್ನ್ ಅರ್ದೆ ಉಡೈತಾನಾ ಮಿಣ್ಕಿ ರೂಕ್ ಜಾಲೆಂ. ದೊಳ್ಯಾಂತ್ಲೆಂ ದೂಕ್ ಸುಕೊನ್ ರಗಾತ್ ದೆಂವೊಂಕ್ ಆಯ್ತೆಂ ಜಾಲೆಂ.
ಮಿಣ್ಕಿಚಿ ಭರ್ಲ್ಲಿ ಕೂಡ್ ತ್ಯಾ ರಾನ್ವಾಟ್ ಮನ್ಜಾತಿಚೆಂ ಕ್ರೂರ್ಪಣ್ ಅನಿಕೀ ಉಂಚಾಬಳ್ ಕರುಂಕ್ ಲಾಗ್ತಾನಾ.... ಮರ್ಯಾದ್ವಂತಾನಿ ತಕ್ಲಿ ಸಕ್ಲಾ ಘಾಲ್ಚ್ಯಾ ತಸಲೆಂ ಉಲವ್ಣೆಂ, ಹಾಸೊ ಆಯ್ಕಾತಾನಾ ಅನಾಥ್ ಕುಟಾಮ್ ದಿಸಾನಾತ್ಲ್ಯಾ ದೆವಾಕ್ ದೆವಾಕ್ ಹಾಕ್ಬೋಬ್ ಮಾರ್ತಾಲೆಂ.
ಸಮಾಜೆಚಿಂ ನೀತ್ ಖಂಯ್ ಪಾವ್ಲಾ!? ಅಸಲ್ಯಾ ಅನ್ನಾಡ್ಪಣಾಕ್ ಕೆದಳಾ ಅಂತ್ಯ್!? ಗಾಂವಾಂತ್ ಎಕ್ಲೊಯೀ ನಿತಿವಂತ್ನಾಂಗಿ? ದುಬ್ಳ್ಯಾಂಕ್ ಉದ್ಧಾರ್ ಕರ್ತಾಂವ್ ಮ್ಹಣೊನ್ ಥೊಲ್ಕೆಂ ವಾಡಂವ್ಚೆಂ ಫುಡಾರಿ ಖಂಯ್ ನಿದ್ಲ್ಯಾತ್!? ಸವಲಾಂಚಿಂ ಲ್ಹಾರಾಂ ಉಟ್ಲಿಂ. ಉಚಾಂಬಳ್ ಜಾಲಿಂ. ಪುಣ್.......ತಾಂಕಾಂ ಸಾಕ್ಸ್ ದೀವ್ನ್ ರಾವಂವ್ಚಿಂ ಏಕ್ ಸಾವ್ಳಿ ಲೆಗುನ್ ದಿಸೊಂಕ್ನಾಂ.
ದೆಸ್ವಾಟ್! ಸುಸ್ಕಾರ್! ರುದಾನ್! ಪಾಂಚ್ ಜಿವಿ ಮನ್ಶ್ಯಾ ಶ್ವಾಸ್ ಮಾತ್ರ್ ಸೊಡ್ಚ್ಯಾ ಮೊಡ್ಯಾಪರಿಂ ಆಕಾಶಿಂ ದೀಷ್ಟ್ ಉಬಾರ್ನ್ ರಾವುಲ್ಲಿ. ಸೊಬಿತ್ತ್ ವೊಕ್ಲೆಚೆಂ ಆಯಾಪಣ್ ಭಲತ್ಕಾರಾನ್ ಕಾಡೂನ್ ಘುಲ್ಯಾಪರಿಂ ವಿದ್ರೂಪ್ ವಿಶ್ವ್ಯಾನಿಂ ಕೇದಗ ಉಭೆಂ ಆಸಲ್ಲೆಂ. ಅಣ್ಣಿ ಮಾಡಾಂ ಸರ್ಶಿನ್ ಧಾಂವ್ಲೆಂ. ತಾಕಾ ಪೊಶೆವ್ನ್ ......’ಕೇದಗ................ತುಕಾ ದುಕ್ಲೆಂಗಿ? ವಿಚಾರ್ತಾನಾ ಎಕಾಚ್ಛಾಣೆಂ ಆಯಿಲ್ಲ್ಯಾ ವಾರ್ಯಾಕ್ ಮಾಡ್ ಹಾಲ್ಲೊ!.
’ತುಜೆಂ ಭರ್ಲ್ಲೆಂ ತುಫೆಂ ಉಟ್ಲೆಂ. ಅಪ್ಪಾ ಕೊಡಮಸ್ತಾಯಕ್ ರಾಗ್ ಆಯ್ಲೊ ಕೊಣ್ಣಾ? ತಾಚ್ಯಾ ತಾನೆಕ್ ಏಕ್ ಬೊಂಡೊ ಕಾಡ್ತಾನಾಂಯಿ ಹಾಂವ್ ಆಡೈತಾಲಿಂ. ತಾಕಾ ಮ್ಹಜ್ಯೊ ವೀದ್ವಾವ್ಳಿಂ ಸೊಸುಂಕ್ ಜಾವ್ನಾಂ ಕೊಣ್ಣಾ? ದೆಕುನ್ಂಚ್ ಆಮ್ಚೆಂ ಮುಖಾರ್ ತಾಕಾ ವಿಣ್ಗೆ ಕೆಲೆಂ. ತಾಚೆಂ ಕಾಪಾಡ್ ಪಿಂದ್ಲೆಗಿ ಅಪ್ಪಾ? ಮಿಣ್ಕಿಚ್ಯಾ ಸವಲಾಕ್ ತಿಂ ಮೊನಿಂ ಜಾಲಿಂ. ಏಕ್ ಭಯಾನಕ್ ನಾಟಕ್ ಸಂಪ್ಲೊಂ. ಅರ್ದೆಂ ಪಿಯೆಲ್ಲ್ಯಾ ಬೊಂಬ ತಟ್ಟ್ಯಾಂಚಿ ರಾಸ್ ಪಳೆತಾನಾ ಮಿಣ್ಕಿಚ್ಯಾ ಕೂಡಿಕ್ ಸುವಿಯಾಂನಿಂ ಕೊಂಕ್ಲ್ಲ್ಯಾಪರಿಂ ಭೊಗ್ಲೆಂ.
ದೀಸಾಚೊ ದಿವೊ ಪಾಲ್ವಲೊ. ರಾತ್ಚೊ ಚೋರ್ ಜಾಗೊ ಜಾಲೊ. ಕಾಳ್ಕೆ ಮಾಮಿಯೆನ್ ಧುಂವ್ರಿ ಘಾಲ್ತಾನಾ ತೋಮಚ್ಯಾ ರಾಂದ್ಣಿಂತ್ ನಿದಲ್ಲೆಂ ಮಾಜಾರ್ ಜಾಂಬಾಯೊ ಕಾಡುನ್ ಪೊಸುಲ್ಲ್ಯಾಂಕ್ ಆಪಯ್ತಾಲೆಂ ತರೀ ಘರ್ಚ್ಯಾಂಕಿ ಖಬಾರ್ ನಾ. ಮಿಣ್ಕಿ ಆಪ್ಲ್ಯಾ ಕೇದಗಚಿ ಗತ್ ಪಳೆವ್ನ್ ರಡ್ತಾನಾ ಮನ್ಶ್ಯಾ ಮನ್ಶ್ಯಾ ಮದ್ಲ್ಯಾ ಉಜ್ವಾಡಾಕ್ ಕಾಳ್ಕ್ಯಾ ರಕ್ಕೊಸಾನ್ ಗಿಳುನ್ ಸೊಡುಲ್ಲೆಂ.
*************
ರಾತಿಚೊ ಭಾರ್ ಜಾತನಾ ಭೂತಚ್ಯಾ ಕೊಡ್ಕ್ಯಾ ಲಾಗಿಂ ಪಿಸಿ ಪಿಸಿ ಉಲವ್ಣೆಂ! ಬಸ್ಲ್ಲ್ಯಾ ಲಾಗಿಂಚ್ಚ್ ಸರ್ವ್ ನಾಸ್ ಜಾಲ್ಲ್ಯಾ ಘರ್ಚ್ಯಾಂನಿ ಶೆಣ್ ಕಾಡ್ಲ್ಲ್ಯಾ ಧರ್ಣಿರ್ಚ್ ಪಾಟ್ ತೆಂಕ್ಲ್ಲಿ. ತೋಮಚೆಂ ನೆಂಟುಳೆ ಬಾಳ್ ಭೂಮಿ ಆವೈಚಾ ಸುಕ್ಲ್ಲ್ಯಾ ಚಿಂವೆಂತ್ಲೆಂ ದುದಾ ಥೆಂಬೆ ಪಿಯೆವ್ನ್ ಕಷ್ಟಾತಾಲೆಂ. ಆವಾಜ್ ಲಾಗಿಂ ಜಾತಾನಾ ಕಿತೆಂ ಜಾತಾಂ ಮ್ಹಣೊನ್ ಚಿಂತ್ಚ್ಯಾ ಫುಡೆಂ ಸರ್ವ್ ಸಂಪದ್ಲೆಂ.
’ಅಪ್ಪಾ!? ಅಮ್ಮಾ.........!? ಮಿಣ್ಕಿಚ್ಯಾ ಬೊಬಾಟೆಕ್ ಧರ್ಣ್ ಹಾಲ್ಲಿ! ವಾರೆಂ ರಾವ್ಲೆಂ! ತಟ್ಟ್ಯೊ ಪಡ್ಲ್ಯೊ. ತೋಮಚೊ ಅವಾಜ್ ನಾಂ ವ ಕೊಣೀ ತಾಚ್ಯಾ ಉಲ್ಯಾಕ್ ಕಾನ್ ದೀನಾಂತ್ ಖಂಯ್.....ಖಂಯ್ ಗೆಲಿ? ಬಿರ್ಮತ್ ಶೆಳಿಯೆಕ್ ಸೊಡುನ್ ಖಂಯ್ ಮಾಯಾಕ್ ಜಾಲಿಂ. ಮಿಣ್ಕಿ ......ಆವೈ ಬಾಪಾಯ್ಕ್ ಆಪೈತಾ ಪೂಣ್...ತಾಚ್ಯಾ ಉತ್ರಾಕ್ ಜವಾಬ್ ದಿತಾಲೊ ನಾಂ.
ನೆಂಟೆ! ಸಂಸರಾಚೆಂ ಕಪಟ್, ಅನ್ನ್ಯಾಯ್ ಮೋಸ್ ನೆಣಾಂತ್ಲೆ ವ ಕಾಮುಕ್ಪಣಾಚಿ ಝಳಕ್ ಆನಿಂ ವಳಕ್ ನಾತ್ಲ್ಲೆಂ. ಉಬ್ರಾಂತ್ ಫುಲುಲ್ಲೆ ಸಾಳಕ್ ವೀಕಾಳ್ ದಾವ್ಲ್ಯಾಂಕ್ ಶಿರ್ಕಾಲೆಂ. ಕಾಂಯ್ಚ್ ಆಯ್ಬ್ ನಾತ್ಲ್ಲಿ ಶೆಳಿ ಹ್ಯಾ ಉಸ್ಟ್ಯಾಂಚ್ಯಾ ಹಂಕರಾನ್ ಬಲಿ ಜಾವ್ನ್ ವೆತಾನಾ ಮೂಕ್ ಸಾಕ್ಸ್ ದೀಂವ್ಕ್ ಆಸ್ಲ್ಲೆಂ ಮಾಜಾರ್ ಹ್ಯಾ ಹರಾಮಿ ಮನ್ಶಾಂಚ್ಯಾ ಕ್ರೂರ್ಪಣಾಕ್ ಲಜೆವ್ನ್ ಥಂಯ್ಚೆ ಧಾಂವ್ಲೆಂ.
ಉರುಲ್ಲಿ ಖಂಯ್? ತಾಂಕಾಂ ನಾಂ ಕೆಲೆಂ? ವ ತಿಂ ಧಾಂವೊನ್ ಗೆಲಿಂ. ಝಗ್ಲಾಣೆಂ, ಘಡ್ಗಡೊ ಬಿರಾಂಕುಳ್ ಉಜ್ಯಾ ಅಗ್ಟೆ ಜಳ್ಳೆಂ. ಉಜ್ಯಾ ಜಿಬೊ ಮೊಳ್ಬಾಕ್ ತೆಂಕ್ಲ್ಯೊ. ನೆಂಟುಳೊ ಫುಲೊಂಕ್ ಆಯ್ತೊ ಜಾಲ್ಲೊ ಬೊಂಗೊ ಏಕ್......ದೋನ್.........ತೀ........ಲೇಖ್ ಕರುಂಕ್ ಲಜ್. ಹರಾಮಿ ಪಾಡ್ಯಾಚ್ಯಾ ಮಸ್ತೆಕ್ ಪಿಸ್ಡುನ್ ವೆತಾನಾ ಮೊಡ್ಕುರ್ ಖೊಮ್ಟಾನ್ ಸಾಕ್ಸ್ ದಿಲಿ.
ಮಸ್ತೆಚೊ ಕಾಳ್ ಸಂಪ್ಲೊ, ಎದೊಳ್ ........ತಾಣೆಂ ಹ್ಯಾಚ್ಚ್ ಮಾತ್ಯೆಚ್ಯಾ ಧರ್ಣೆರ್ ಭುಂಯ್ಚೊ ಉಜ್ವಾಡ್ ದೆಕ್ಲ್ಲೊ. ವ್ಹಡ್ ಜಾತಾನಾ ತ್ಯಾ ಮಾತ್ಯೆಕ್ ಸಾರ್ಕಿ ಕರುನ್ ಶೆಣ್ ಕಾಡುನ್ ಸಜೈಲೆಂ. ಮೊಗಾ ಮಯ್ಪಾಸಾನ್ ಆಸಾ ಕೆಲ್ಲ್ಯಾ ತ್ಯಾಚ್ಚ್ ಜಾಗ್ಯಾರ್ ದಾಕ್ಟುಲ್ಯಾ ಮಿಣ್ಕಿಚೊ ಸತ್ತ್ಯಾನಾಸ್ ಜಾಲ್ಲೊ. ಕುಡಿ ಥಾವ್ನ್ ರಗಾತ್ ಥೆಂಬೆ ಥೆಂಬೆ ದೆಂವೊನ್ ಮಾತ್ಯೆಂತ್ ಜಿರ್ಲೆಂ. ಸಂಸರಾಕ್ ಕಾಳೊಕ್ ಮಿಣ್ಕಿಚೊ ಜೀವ್ ತಾಂಚ್ಯಾ ಹಾತಾಂತ್ ಸಾಕ್ರಿಫಿಸ್ ಬೆಟೈಲೊ.
ತೋಮ ನಲಿಕೆ ಯೆತಾನಾ ಸರ್ವ್ ಮುಗ್ದಾಲಾಂ. ಧುವೆಚಿಂ ವಿಣ್ಗಿ ಕೂಡ್ ಪಳೆತಾನಾ ದೂಕ್ ಉಮಾಳೊನ್ ಆಯ್ಲೆ. ಕಾಳ್ಕಾಕ್ ಪಳೆತಾನಾ ಬಾಯ್ಲೆ ಆನಿಂ ಉರುಲ್ಲ್ಯಾ ಭುರ್ಗ್ಯಾಂಕ್ ಗ್ರಾಸುಂಕ್ ಬೊಲ್ಪೆಂ ಉಬೆಂ ಜಾಲ್ಯಾತ್. ದೈವಾಚೊ ಫಾತರ್ ತಾಚ್ಯೊ ವಸ್ತು ಮಸ್ತುನ್ ಸೊಡ್ಲ್ಯಾತ್.....
ತಾಣೆಂ ಚಿಂತ್ಲೆಂ........ವ್ಹಯ್ ಮ್ಹಜ್ಯಾ ಧುವೆಕ್ ಬಲಿ ದಿಲ್ಲ್ಯಾ ಹ್ಯಾ ಗಾಂವಾಂತ್ ಕಿತೆಂ ಕರುಂ!? ಗಾಂವ್ಚೆಂ ಉದಾಕ್ ನಂಜಿ ಜಾಲಾಂ! ಗಾಂವ್ ವೀಕ್ ಜಾಲಾ. ಮಜೊ ದೈವ ಆಸ್ಲ್ಯಾರ್ ಮ್ಹಜ್ಯಾ ದುವೆಚ್ಯಾ ಜಿವಾಚೆಂ ಲೇಕ್ ಘೆಂವ್ದಿಂ. ತೊಯೀ ದುಡ್ವಾ ಆನಿಂ ಖರ್ಯಾಮಸ್ತೆಚೊ ಗುಲಾಮ್ ಜಾಲ್ಯಾರ್ ತೇಂಯಿ ಕರುಂದಿ. ಮ್ಹಜ್ಯಾ ಪಾಪಾಚ್ಯಾ ಭುರ್ಗ್ಯಾಂಚಿ ಬಲಿ ಘೆತ್ಲ್ಲ್ಯಾ ಹರ್ಯೇಕ್ಲ್ಯಾಕಿ ದೇವ್ ಶಿಕ್ಶಾ ದೀಂವ್! ತೋಮ ಉಟ್ಲೊ ಆನಿಂ ಪಾಟ್ ಘಾಲುನ್ ಆಪ್ಲ್ಯಾ ಕುಟ್ಮಾ ಸಂಗಿಂ ಚಲ್ತಾಚ್ಚ್ ರಾವ್ಲೊಂ!
ಘಡಿತಾಂ ಪಾಟ್ಲಿ ಖಬಾರ್ ಕೋಣಾಕ್ ಆಸಾ? ದೋನ್ ದೀಸ್ ಜಾಲೆಂ. ಏಕಾ ದೀಸಾ ಸಕಾಳೀಂ ಥಾವ್ನ್ ತೋಮ ನಲಿಕೆಚ್ಯಾ ಘರಾ ವಯ್ರ್ ಗೀದ್ ಘುಂವ್ತಾತ್. ಸಗ್ಳೊ ಗಾಂವ್ ಘಾಣ್ತಾ. ಏಕಾ ರೀತಿನ್ ಗುಡ್ಯಾ ಸಾಮ್ಕಾರ್ ವಯ್ಲ್ಯಾ ಸಂಸರಾಚೆಂ ದೆಂವೊನ್ ಆಯಿಲ್ಲ್ಯಾ ಪರಿಂ ವ್ಹಡ್ಲೆಂ ವ್ಹಡ್ಲೆಂ ಗೀದ್!! ಕಾವ್ಳೆ, ಘೊಣಿ......ಸಾಂಗಾತಾಚ್ಚ್ ಸುಣಿಂ. ಮೊಳ್ಬಾಕ್ ದಾಂಪಾಣ್ ಪಡ್ಲಾಂ. ವಯ್ಲ್ಯಾ ಮನ್ಜಾತಿಚ್ಯಾ ಅವಾಜಾಕ್ ಕಾನಾಚೆಂ ಕಾನ್ಪೆ ಬೊಸ್ತಾತ್. ಕಿತೆಂ ಗಜಾಲ್!?
ಉಲಂವ್ಕ್ ಕೊಣಾಕಿ ಜೀಬ್ ನಾಂ ಲೋವ್ ಲೋವ್ ವಿಚಾರ್ತಾಲೆಂ. ತೋಮ ನಲಿಕೆ ಖಂಯ್ ಗೆಲಾಂ? ಕೋಣಿ ನೆಣಾಂತ್....ಲಾಗಿಂ ವಚೊಂಕ್ ಧೈರಿ ನಾಂ. ಕಾಳಾಜಿ ನಾಂ. ಪುಣ್......ವಯ್ಲ್ಯಾ ಗಿದಾಂ ಥಾವ್ನ್ ಸುಟ್ಕಾ ಮೆಳಾಜೆ. ಕಿತೆಂ ತೆಂ ಪಳೆಯಾಂ ಮ್ಹಳ್ಳ್ಯಾ ಧೈರಾನ್ ಅಪ್ಪು ಸ್ವಾಮಿ, ಭೈರಪ್ಪ, ಲಾದ್ರಾಮ್, ಹುಸೇನ ಬ್ಯಾರಿ ಮುಖಾರ್ ಆಯ್ಲೆ. ತಾಂಚ್ಯಾ ಪಾಟ್ಲ್ಯಾನ್ ಗಾಂವ್ಚೊ ಗಾಂವ್ಚ್ಚ್ ಪೈಶಿಲ್ಯಾನ್ ಪಾಟ್ಲಾವ್ ಕರುಂಕ್ ಲಾಗ್ಲೊ. ಹಾಂವ್ಯಿ ಲೋವ್ ತಾಂಚ್ಯಾ ಪಾಟ್ಲ್ಯಾನ್ ಗೆಲೊಂ.
ವ್ಹಡ್ ವ್ಹಡ್ ಮೂಸ್ ಪೈಶಿಲ್ಯಾನ್ ದಿಸನಾತ್ಲ್ಲೆಂ ಲಾಗಿಂ ಯೆತಾನಾ ತಾಂಚ್ಯಾ ಗಾಯನಾಂನ್ ಆಮಿಂಯಿ ಆಸಾಂವ್ ಮ್ಹಣ್ತಾನಾ ಕಠೀಣ್ ಆಸ್ಲ್ಲ್ಯಾ ವಾಸಾಂತ್ ನಾಕಾಕ್ ಹಾತ್ ಬಸ್ಲೊ. ಥೊಡಿಂ ವೊಂಕಾರೆಂ ಕಾಡುನ್ ಥಂಯ್ಚೆಂ ಪಾಟಿಂ ವೆತನಾ ಕಾಳ್ಜಾಚ್ಯಾ ಗೂಡಾಂತ್ ಥೊಡಿಂ ಶೆಳ್ ಆಸ್ಲ್ಲೆಂ ಲಾಗಿಂ ಆಯ್ಲೆ.
ಕಿತೆಂ ಪಳೆತಾಲೆ......ಕೋಣ್ ಕಿತೆಂ ಮ್ಹಳ್ಳಿಂ ವಳಕ್ ನಾತ್ಲ್ಲಿ. ಸಗ್ಳಿಚ್ಚ್ ವಿದ್ರೂಪ್ ಜಾಲ್ಲಿ! ಹಾತ್ ಪಾಂಯ್ ನಾತ್ಲ್ಲಿ ಕೂಡ್ ಆಮ್ಕಾಂಚ್ಚ್ ’ಯೆಯಾ........ಸ್ವಾಗತ್ ತುಮ್ಕಾಂ. ಮನ್ಶ್ಯಾಚಿ ಸೊಭಾಯ್? ಕುಡಿಚೊ ದೆಸ್ವಾಟ್ ಪಳೆಯಾ? ಆಸಾಂಗಿ ತುಂಮ್ಕಾಂ ಖರೆಂ ಕಾಳಿಜ್ ತರ್...? ದಿಯಾ ಹ್ಯಾ ನಿರಪ್ರಾಧಿ ಜೀವಾಕ್ ನ್ಯಾಯ್?
ತೋಮ ನಲಿಕೆಚೆಂ ತಟ್ಟೆಚೆಂ ಕೊಡ್ಕೆಂ ಸಗ್ಳೆಚ್ಚ್ ಮೊಡೊನ್ ಗೆಲ್ಲೆಂ. ತಾಚ್ಯಾ ಜಾತಿ ಕಸ್ಬಾಚಿ ವಸ್ತ್ ಥಂಯ್ ಹಾಂಗಾಂ ಪಡ್ಲ್ಲಿ. ಕಲ್ಕುಡಾಚ್ಯಾ ಕೋಲಾಕ್ ನೆಸ್ಚೆಂ ತಾಂಬ್ಡೆಂ ವಸ್ತುರ್ ಸಕ್ಕಡ್ ಏಕಾಚ್ಚ್ ರಂಗಾಚೆಂ ದಿಸ್ತಾಲೆಂ. ತಾಚೆಂ ಗಗ್ಗರ, ಪಾಪೆ, ಪುರ್ಪ ಸಗ್ಳೆಂ ಆಮಿಂಯಿ ಹ್ಯಾ ಪರಿಂ ಅನಾಥ್ ಮ್ಹಣೊನ್ ರಡ್ತಾಲಿಂ. ಗಾಂವ್ಚ್ಯಾ ಮುಖೆಲಾಚೆಂ ತೋಂಡ್ ಬಾವ್ಲೆಂ. ಗಾಂವಾಕ್ ಏಕ್ ಅನಿಷ್ಟ್ ಉದೆಲಾಂ ತಶೆಂ ಕಾಂಪ್ಲೆ. ತೋಮ ನಲಿಕೆಚಿ ಜಳಕ್ ನಾಂ. ಅಸಲ್ಯಾ ಪರಿಸ್ಥಿತೆಂತ್ ಕೂಡ್ ಕಾಡ್ತೆಲಿಂ ನಾಂತ್. ಥೊಡೆಂ ಘಟ್ಟ್ ಕಾಳ್ಜಾಚೆ ಮುಖಾರ್ ಆಯ್ಲೆ. ಸಕ್ಕಡ್ ಲಾಗಿಂ ಕೆಲೆಂ. ಕೊಣೆಂಗಿ ಉಜೊ ಹಾಡ್ಲೊ. ಥೊಡೆಂ ಲಾಂಕುಡ್ ಆಯ್ಲೆ. ದೋನ್ ದಿಸಾ ಪಯ್ಲೆಂ ಚಾರ್ ಮಾಡಾಚೆಂ ಕುಡ್ಕೆ ದಿತಾಂ ಮ್ಹಳ್ಳ್ಯಾಚೊ ಪತ್ತೊ ನಾಂ. ತೋಮ ನಲಿಕೆಚ್ಯಾ ದೈವಚ್ಯಾ ವಸ್ತು ಸಂಗಿಂ ಜಿವ್ಯಾ ಮನ್ಶ್ಯಾಕ್ ಬಿರಾಂತೆಕ್ ಘಾಲ್ಚಿ ತಾಚ್ಯಾ ದುವೆಚಿ ಪಿಡ್ಡಾರ್ ಜಾಲ್ಲಿ ಕೂಡ್ ಲಾಸುನ್ ಗೊಬೊರ್ ಜಾಲಿಂ. ಮಿಣ್ಕಿ ಖಾತಿರ್ ರಡ್ತಾಲೆಂ ತಾಚೆಂ ಮಾಜಾರ್ ಆನಿಂ ತೊ ಮಾಡ್!
*****************
ವರ್ಸಾಂ ಧಾಂವ್ಲಿಂ ಮಿಣ್ಕಿ, ತೋಮ ನಲಿಕೆ ಗಾಂವ್ಚ್ಯಾ ಥಾವ್ನ್ ಮಾಯಾಕ್ ಜಾಲಿಂ. ತ್ಯಾ ಜಾಗ್ಯಾಕ್ ನವಿಂ ನವಿಂ ಮನ್ಶ್ಯಾ ಆಯ್ಲಿಂ. ಜಾಗೊ ತೀನ್ ವಾಂಟೆಂ ಕರುನ್ ವಿಕ್ಲೊ. ವ್ಹಡ್ಲೆ ವ್ಹಡ್ಲೆ ಪಾಗೊರ್ ಉಬೆ ಜಾಲೆಂ. ’ಕೇದಗ’ ಆಸ್ಲ್ಲೆಂ. ಪೂಣ್...ಕೇದಗಚ್ಯಾ ಖುಬ್ಯಾರ್ ಏಕಾಚ್ಚ್ ಏಕ್ ಕೋಬ್ ಉದ್ಯೆಂವ್ಕ್ ನಾಂ. ರಿತ್ಯಾ ಮೊಡ್ಲಾಂನಿ ತಾಚ್ಯಾ ಧನಿನೆಕ್ ಶಾಂತಿ ಮಾಗ್ತಾಲೆಂ.
ಘರ್ ಉಬೆಂ ಜಾಲೆಂ. ಪೂಣ್............. ಘರಾಂತ್ ವಕಾಲ್ ಜಾವ್ನ್ ದೋನ್ಚ್ಚ್ ದೀಸಾಂತ್ ಘರ್ಚೊ ಭುರ್ಗೊ ಏಕ್ ಮಾಡಾಂ ಮುಳಾಂತ್ ಖೆಳೊನ್ ಆಸ್ತಾನಾ ತಕ್ಲೆರ್ ಮೋಡ್ಲ್ ಪಡೊನ್ ಉಕ್ಲುಂಚ್ಯಾ ಫುಡೆಂಚ್ಚ್ ಮೆಲೊ. ಏಕ್ಚ್ಚ್ ಭುರ್ಗೊ. ಘರ್ಚಿಂ ಜ್ಯೋತಿಶಿ ಲಾಗಿಂ ವಿಚಾರುಂಕ್ ಧಾಂವ್ಲಿಂ. ’ಜಾಗೊ ಬರೊ ನಂಯ್ ನಾಡ್ ಘುಂವ್ತಾ ಮ್ಹಣ್ತಾನಾ ಘರ್ಚಿಂ ಜಾಗೊ ವಿಕುಂಕ್ ತಯಾರ್ ಜಾಲಿಂ. ಫುಂಕ್ಯಾ ಸವಾಯೆಕ್ ವಿಕ್ತಾ ಮ್ಹಳ್ಯಾರಿ ಗಾಂವಾಂತ್ ನಾಂ ನಾಂತಿ ಖಬಾರ್ ಪಡ್ಲಿ. ದುಸ್ರಿಂ ಘರ್ ಬಾಂದುಂಕ್ ಬಿಯೆಲಿಂ.
ಥೊಡ್ಯಾ ದಿಸಾಂನಿ ತ್ಯಾ ಘರಾಂತ್ ಏಕಾ ದೀಸಾ ಏಕ್ ಸರೊಪ್ ದಿಷ್ಟಿಕ್ ಪಡ್ಲೊ. ಸಗ್ಳೊ ದೀಸ್ ಘರಾಂತ್ ಆಪ್ಲೆಂಚ್ಚ್ ಮ್ಹಳ್ಳ್ಯಾ ಪರಿಂ ಖಾಟಿಯೆರ್. ರಾಂದ್ಚ್ಯಾ ಕೂಡಾಂತ್, ಜೆವ್ಣಾಚ್ಯಾ ಮೆಜಾರ್ ಆಪ್ಲೆಂ ದರ್ಬಾರ್ ಚಲಂವ್ಕ್ ಲಾಗ್ಲೊ. ಸರೊಪ್ ಧರ್ತಾಲೊ ಆಯ್ಲೊ ಪೂಣ್ ತೊ ಚುಕ್ತಾಲೊ. ಆಂಗೊವ್ಣೆ ಜಾಲ್ಯೊ. ಆಡ್ ಉಬಿಂ ಪಡ್ಲಿಂ. ಫರತ್ ಭಟಾ ಸರ್ಶಿನ್ ಧಾಂವ್ಲಿ. ತೊ ಜಾಗೊ ’ನಾಗಬನ’. ಥಂಯ್ ರಾವ್ಲ್ಯಾರ್ ತುಮ್ಕಾಂ ಬರ್ಕತ್ ನಾಂ. ತ್ಯಾ ಜಾಗ್ಯಾರ್ ದೈವಾಚೊ ಶಿರಾಪ್ ಆಸಾ ಮ್ಹಣ್ತಾನಾ.....ಘರ್ಚಿಂ ಸಾಟ್ಲಿ ಪೊಟ್ಲಿ ಘೆವ್ನ್ ನಪಂಯ್ಚ್ ಜಾಲಿಂ.
ಕೋಣ್ ಸಾಂಗ್ತಾಲೆಂ ರಾತಿಕ್ ಮಿಣ್ಕಿಚಿ ನಾಡ್ ಘುಂವ್ತಾಂ. ಪಳೈಲೊ! ವ ಪಳೈನಾತ್ಲ್ಲೊ ಕೋಣ್?
ಜಾಗೊ ಪಣ್ಗಿಲ್ ಪಡ್ಲೊ. ಹಾಂವ್ ಕಾಮಾಂ ಖಾತಿರ್ ಪರ್ಗಾಂವಿ ಪಾವ್ಲೊಂ. ಸಬಾರ್ ವರ್ಸಾಂ ಉಪ್ರಾಂತ್ ಯೆತಾನಾ ತ್ಯಾ ಜಾಗ್ಯಾರ್ ಲೊಕಾಚಿಂ ಖೆಟ್ ಪಳೆವ್ನ್ ತಟಕ್ಕ್ ಜಾಲೊಂ.
ಲಾಗಿಂ ಲಾಗಿಂ ಗೆಲೊಂ. ಮ್ಹಾಕಾ ದಿಸ್ತಾಲೆಂ ಮಿಣ್ಕಿ. ವ್ಹಯ್ ಕೇಲ್ ಅಮ್ಮಾಕ್ ಆನಿಂ ಮಿಣ್ಕಿಕ್ ಕಿತೆಂಗಿ ವೊಡ್ತಾಲೆಂ. ತಾಕಾಚ್ಚ್ ಪಳೆತಾಲೊ. ಸಾಂಗತಾ ಆಸ್ಲ್ಲೊ ತರ್ನಾಟೊಯಿ ಮ್ಹಾಕಾ ವಳ್ಕಿಚೊ ತಸೊ ಭೊಗ್ತಾಲೆಂ. ಲೋಕ್ ಆಪ್ಲಿಂ ಪ್ರಾರ್ಥಾನಾಂ ದವರ್ತಾಲೆ. ಪರಿಹಾರ್ ಘೆತಾಲೆ. ಪ್ರಸಾದ್ ಘೆವ್ನ್ ವೆತಾನಾ ಸಂತುಷ್ಟ್ ದಿಸ್ತಾಲಿಂ. ಕೇಲ್ ಅಮ್ಮಾ ಹಾಂಗಾಂ ಯೇವ್ನ್ ತೀನ್ ಮಹಿನೆಂ ಉತ್ರಾಲೆ ಖಂಯ್. ತಾಚ್ಯಾ ಉಪ್ರಾಂತ್ ಗಾಂವಾಂತ್ ಬರೆಪಣ್ ವಾಳ್ತಾಲೆ. ಕಷ್ಟ್ ಪೈಸ್ ಜಾಲ್ಲೆಂ. ಲೋಕ್ ತಿಕಾ ಏಕ್ ಮಂದಿರ್ ಬಾಂದುಂಕ್ ಆಯ್ತೆಂ ಜಾಲ್ಲೊ. ದೆಕುನ್ ಪಾಗೊರ್ ಫುಟ್ಲೆ. ಮಂದಿರಾಕ್ ಬುನ್ಯಾದ್ ಪಡ್ಲಿ. ಮಾಂಡ್ಲ್ಲೊ ಶೆಳೊ ನಿಸ್ರಾತಾಲೊ...........ದೆಕುನ್ ಮ್ಹಾಕಾ ಕಿತೆಂಗಿ ದುಬಾವ್. ದೆಕುನ್ ಪಾರೊತ್ ಕೆಲೆಂ. ಏಕಾ ರಾತಿಂ ತಾಂಕಾಂ ವಚೊನ್ ಮೆಳ್ಳೊ. ತಾಂಚಿ ವಳಕ್ ಸಾಂಗ್ತಾನಾಂ ತಿಂ ಮ್ಹಾಕಾಚ್ಚ್ ಪಳೆಂವ್ಕ್ ಲಾಗ್ಲಿಂ. ಹಾಂವೆಂ ತುಂಮ್ಕಾಂ ಮ್ಹಜೆಂ ಥಾವ್ನ್ ಅಪಾಯ್ ನಾಂ ಮ್ಹಣ್ತಾನಾ.........
’ನಾಗೆರೇ.......’ ಮ್ಹಾಕಾ ತೋಮ ನಲಿಕೆಚ್ಯೊ ತಾಳೊ ಉಗ್ಡಾಸಾಕ್ ಆಯ್ಲೊಂ. ಆಮಿಂ ತೋಮ ನಲಿಕೆಚಿಂ ಭುರ್ಗಿಂ. ಆಮ್ಚ್ಯಾ ಕುಟ್ಮಾಕ್ ಜಾಲ್ಲೊ ಅನ್ನ್ಯಾಯ್ ಸಾರ್ಕೊ ಕರುಂಕ್ ಹಾಚ್ಯಾಕಿ ದುಸ್ರಿಂ ಪಾಟ್ ನಾತ್ಲ್ಲಿಂ. ದಯಾಕರುನ್ ಘುಟ್ ಸಾಂಬಾಳಾ. ಕಾಂಟ್ಯಾನ್ ಕಾಂಟೊ ಕಾಡಾ ಮ್ಹಣೊನ್ ಅಪ್ಪಾನ್ ದಿಲ್ಲೆಂ ಲಿಸಾಂವ್ ಪೂರ್ಣ್ ಕರ್ತಾಂವ್. ದಯಾಕರುನ್ ಆಮ್ಚ್ಯಾ ವಾಟೆಕ್ ಆಡ್ ಯೇನಾಕಾತ್. ಆಮ್ಚ್ಯಾ ಅಕ್ಕಾಚೆ ಮೆಲ್ಲೆಂ ಅಜೂನ್ ರಡ್ತಾ. ತಾಕಾ ಸುಟ್ಕಾ ದೀಂವ್ಕ್ ಅವ್ಕಾಸ್ ದಿಯಾ. ತಾಕಾ ನಾಡ್ ಮ್ಹಣ್ತಾತ್ ನಾಂ ಮ್ಹಜೆಂ ಅಕ್ಕಾ ಕೇಲ್ ಅಮ್ಮಾ ಮ್ಹಣ್ತಾನಾ ವ್ಹಯ್ ಅಸಲ್ಯಾ ಲೊಕಾಕ್ ಹೆಂಚ್ಚ್ ಸಾರ್ಕೆಂ ಮ್ಹಣ್ ಬೊಗ್ತಾನಾ ಹಾಂವ್ ಪಾಟಿಂ ಘುಂವ್ಲೊಂ. ತೋಮ ನಲಿಕೆಚ್ಯಾ ಖೊಮ್ಟ್ಯಾ ಲಾಗಿಂ ಯೆತಾನಾ ಕಸಲೊಗಿ ಏಕ್ ಮೋತಿಕ್ ಸಮಧಾನ್ ದಿಂವ್ಚೊ ಪರ್ಮಳ್ ವಾರ್ಯಾ ಸಂಗಿಂ ವಾಳೊನ್ ಆಯ್ಲೊ. ಮ್ಹಜಿಂ ದೀಷ್ಟ್ ಚಾಂದ್ನ್ಯಾಚ್ಯಾ ಉಜ್ವಾಡಾಕ್ ಕೇದಗಾರ್ ಪಡ್ಲಿ. ಕೋಂಬು ದಿಸ್ತಾಲೆಂ. ರೂಕ್ ಧಲ್ತಾಲೊ! ಪಯ್ಲೊ ಚಂದ್ರೆಮ್ ತಿಳ್ತಾಲೊ! ಕೇಲ್ ಅಮ್ಮಾ ಖುದ್ವೊಂಕ್ ತಯರಾಯ್ ಕರ್ತಾಲಿಂ. ಗಗ್ಗರಾಚೊ ಆವಾಜ್
ಗಾಜ್ತಾಲೊ!!! ಪುಣ್ ಮಿಣ್ಕಿಚಿಂ ನಾಡ್ ಮಾತ್ರ್ ಮ್ಹಾಕಾ
ದಿಸೊಂಕ್ ನಾಂ.
About us | Feedback | Contact us
Copyright © 2005
DAAIZ.COM All rights reserved.
Page concept, designed and maintained by Ashawadi
Publications
