ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಕಥಾಝರ್ - 12. ಪಾಂತಿ
ಜೆಮ್ಮಾ ಪಡೀಲ್: ಕೊಂಕ್ಣಿ ಸಾಹಿತ್ಯಾಂತ್ ಸಿಂತಿಮೆಂತಾಳ್ ಕಾಣ್ಯಾಂಕ್ ಭೋವ್ ಫಾಮಾದ್ ಜಾಲ್ಲೊ ಕಾಣ್ಯೆಗಾರ್ ಜಾವ್ನಾಸಾ. ಹಾಚ್ಯಾ ಮಟ್ವ್ಯಾ ಕಾಣ್ಯಾಂಚೆ ತೀನ್ ಬೂಕ್, ಆಶಾ ಭಾಗಯ್ಲಿ (1967), ಸಿಂತಿಮೆಂತಾಂ (1991) ಆನಿ ದುಖಾಂ (2001) ಪರ್ಗಟ್ಲ್ಯಾತ್. ಹಾಚ್ಯಾ ಕಾಣ್ಯಾಂಚಿ ವಿಶೇಸ್ ಸೊಭಾಯ್ ಹಿ ಜಾವ್ನಾಸಾ - ವಾಚ್ಪ್ಯಾಕ್ ಹಿ ಕಾಣಿ ವಾಚ್ತಾಂ ವಾಚ್ತಾಂ ಅಪ್ಲ್ಯಾ ದೊಳ್ಯಾಂ ಹುಜಿರ್ ಘಡ್ಚೆಂ ಏಕ್ ಘಡಿತ್ಗಾಯ್ ಮ್ಹಳ್ಳೆಂ ಚಿಂತಾಪ್ ಉಭ್ಜಾಯ್ತಾ ಮಾತ್ರ್ ನ್ಹಂಯ್, ಸಭಾರ್ ಕಾಳ್ ಪರ್ಯಾಂತ್ ಮತಿಂತ್ ಉರಂವ್ಚಿ ಶ್ಯಾಥಿ ಹಾಚಾ ಕಾಣ್ಯಾಂಕ್ ಆಸಾ ಮ್ಹಣ್ಚಾಕ್ ಹಿ ಕಾಣಿ ಅಪುರ್ಭಾಯೆಚಿ ಗೊವಾಯ್ ದಿತಾ.
[’ದುಖಾಂ’ ಬುಕಾಂತ್ ಪರ್ಗಟ್ ಜಾಲ್ಲಿ ಮಟ್ವಿ ಕಾಣಿ]
ಜೆಮ್ಮಾ ಪಡೀಲ್
ಮೆಕ್ಸಿನ್ ಆಪ್ಲ್ಯಾ ಕುಡಾಂತ್ಲ್ಯಾ ತ್ಯಾ ಆರ್ಶ್ಯಾ ಮುಖಾರ್ ಅಪ್ಣಾಕ್ಚ್ಚ್ ಪಳೆಯ್ಲೆಂ. ತಾಕಾ ತಾಚಿಚ್ಚ್ ವಳೊಕ್ ಮೆಳ್ಳಿನಾ. ನಿಳ್ಶ್ಯಾ ರಂಗಾಚ್ಯಾ ಸುಟಾರ್ ಸೊಭ್ತಾಲೊ ತೊ. ದಾವ್ಯಾ ಕುಶಿಚ್ಯಾ ಕೊಟಾಚ್ಯಾ
ಬೊಲ್ಸಾಂತ್ ಧೊವೆಂ ಫುಲ್, ಧೊವೆಂ ನವೆಂ ಶರ್ಟ್. ತಾಕಾ ಒಂಬ್ವೊಚಿ ನಿಳ್ಶಿ ಟಾಯ್. ಕಾಳೆ ಪೊಲಿಶ್ ಕೆಲ್ಲೆ ನವೆ ಮೊಚೆ. ತಾಕಾ ಎಕಾ ಥರಾಚೊ ಗರ್ವ್ ಆಯ್ಲೊ. ಭಾರೀಕ್ ಹಾಸ್ಲೊ ತೊ. ಆರ್ಶ್ಯಾಚ್ಯಾ ಕುಶಿಚ್ಯಾ ಮೆಜಾರ್ ಆಸ್ಚ್ಯಾ ದಾಂತೊಣೆಚೆರ್ ತಾಚೆ ಹಾತ್ ಗೆಲೆ. ಕೆಸಾಂಚೆರ್ ದಾಂತೊಣಿ ಚಲ್ಲಿನಾ.
ತಾಚಿ ಮತ್ ಜಿವಂತ್ ಜಾಲಿ!
ತಾಣೆಂ ಮುಕ್ಲ್ಯಾ ಆರ್ಶ್ಯಾಕ್ ಪಳೆಯ್ಲೆಂ. ಏಕ್ ಊಣ್ ದಿಸ್ಲೊ ತಾಕಾ ತಾಚ್ಯೆ ಥಂಯ್. ತಾಚಿ ದಾಂತೊಣಿ ಕೇಸ್ ಆಸ್ಲ್ಲ್ಯಾ ತಕ್ಲೆರ್ ತಾಣೆಂ ಚಲಯ್ಲಿ. ತಾಕಾ ಝಿಮ್ ಜಾಲೆಂ! ತಾಚಿ ದಾಂತೊಣಿ ತಾಕಾ ಕಳಿತ್ ನಾಸ್ತಾಂ ಸಕಯ್ಲ್ ಗಳ್ಳಿ.
ತಾಚ್ಯಾ ಖಬ್ರೆವಿಣೆಂ ತಾಚೊ ಉಜ್ವೊ ಹಾತ್ ತಾಚ್ಯಾ ತಕ್ಲೆರ್ ಗೆಲೊ. ತಾಚ್ಯಾ ತಾಳ್ವೆರ್ ಹಾತಾಚೆ, ಸ್ಪರ್ಶ್ ಲಾಗ್ತಾನಾ ತಾಕಾ ಜಿವಿ ಕಾತ್ ಮೆಳ್ಳಿ. ಸಾಂಗಾತಾಚ್ಚ್ ಕೆಸಾಂಕ್ ಘಾಲ್ಲ್ಯಾ ತೆಲಾಚಿ ಶೆಳ್!
ತಾಣೆಂ ದುಕಿನ್ ದೊಳೆ ಧಾಂಪ್ಲೆ. ತಾಳ್ವೆರ್ ಕೇಸ್ ನಾಸ್ಲೆಲ್ಯಾ ಮೆಕ್ಸಿಚ್ಯಾ ಖಡ್ಡ್ಯಾ ತಕ್ಲೆಚಿ ತಾಕಾ ವಳೊಕ್ ಜಾಲಿ.
ಕೇಸ್ ನಾತ್ಲೊಲೊ ಖಡ್ಡೊ!
ಜೀವನಾಂತ್ ತಾಚ್ಯಾ ತಾಳ್ವೆರ್ ಕೇಸ್ ನಾಸ್ತಾಂ ಖಡ್ಡೊ ಜಾವ್ನ್ ಆಯಿಲ್ಲ್ಯಾ ದಿಸಾಥಾವ್ನ್ ದುಕಿನ್ ತಾಣೆಂ ರಡ್ಲೆಲೆಂ ಏಕ್ ಉತಾರ್ - "ಹಾಂವ್ ಖಡ್ಡೊ!!" ಹ್ಯಾ ಖಡ್ಡ್ಯಾಪಣಾವರ್ವಿಂ ತಾಕಾ ಭೊಗ್ಲೆಲೆ ಕಶ್ಟ್ ಕಸಲೆ? ಲೊಕಾಥಾವ್ನ್ ಶಾಭಾಸ್ಕಿ ತಾಚ್ಯಾ ಹುಶಾರ್ಪಣಾಖಾತಿರ್ ಮೆಳ್ಳ್ಯಾರೀ, ಉಪ್ರಾಂತ್ ತಾಣೆಂ ತಾಂಚ್ಯೆ ಥಾವ್ನ್ ತಾಚ್ಯಾ ಖಡ್ಡ್ಯಾಪಣಾವಯ್ರ್ ದಾಕಂವ್ಚಿ ಕಾಕುಳ್ತಿಚಿಂ ಉತ್ರಾಂ ತಾಕಾ ಆಯ್ಕೊನ್ ಪುರೊ ಪುರೊ ಜಾಲ್ಲೆಂ.
"ತುಂ ತಾಕಾ ಮೇಳ್. ಬರೊ ತೇಲ್ ಮಾಲಿಶ್ ಕರ್ತಾ. ತಾಚ್ಯಾ ಉಪ್ರಾಂತ್ ತುಕಾ ಕೇಸ್ ಜರೂರ್ ಯೆತೆಲೆ!"
"ತುಂ ತುಜ್ಯಾ ತಾಳ್ವೆಕ್ ನಾರ್ಲೆಲ್ ತೇಲ್ ಘಾಲ್ನ್ ಮಾಲಿಶ್ ಕರ್. ತುಕಾ ಕೇಸ್ ಯೆತೆಲೆ. ಮ್ಹಾಕಾ ಆಯ್ಲ್ಯಾತ್!!"
"ತುಂ ತ್ಯಾ ದಾಕ್ತೆರಾ ಸರ್ಶಿಂ ವಚ್. ತಾಚ್ಯಾ ವಕ್ತಾನ್ ಕಿತ್ಲೆಶೆ ಮನಿಸ್ ಕೆಸಾಂ ಖಾತಿರ್ ರಡ್ಚೆ ಸಂಪೂರ್ಣ್ ಕೆಸಾಂನಿ ಭರೊನ್ ಗೆಲ್ಯಾತ್!" ತಾಕಾ ಆಯ್ಕೊನ್ ಪುರೊ ಜಾಲ್ಲೆಂ. ಅರ್ತ್ ನಾತ್ಲೆಲ್ಯಾ ಉತ್ರಾಂನಿ ತಾಕಾ ಪಿಸೊ ಕರ್ತಾಲೆ. ಪಾವಾನಾತ್ಲ್ಲ್ಯಾಕ್ ತಾಚೆ ಈಶ್ಟ್ ಸದಾಂಯ್ ತಮಾಶೆ ಕರ್ಚೆಂ ತಾಂಕಾಂ ಏಕ್ ಸವಯ್ ಜಾಲ್ಲಿ. "ಬೋರ್ ಮಾಂಡೆ ಸಾಹೇಬ್" - ಅಸಲ್ಯಾ ಆಡ್ ನಾಂವಾಂನಿ ತಾಕಾ ತುಕ್ಲಾಯ್ತಾನಾ ತಾಚೆಂ ಕಾಳಿಜ್ ಹಾತಾಂತ್ ಯೆತಾಲೆಂ.
ತಾಣೆಂ ದೊಳೆ ಸವ್ಕಾಸ್ ಉಗ್ತೆ ಕೆಲೆ. ಎಕಾ ಥರಾನ್ ದೆವಾಚೊ ರಾಗ್ ಆಯ್ಲೊ ತಾಕಾ. ತಾಚ್ಯಾ ಗೊರ್ಯಾ ರಂಗಾಕ್, ಪುಡ್ಪುಡಿತ್ ಕುಡಿಕ್ ತಾಚಿ ಸರ್ವ್ ಸೊಭಾಯ್ ಪಿಸುಡ್ನ್ ಗೆಲ್ಲ್ಯಾಬರಿ ಕಾಡ್ನ್ ಉಡಯಿಲ್ಲೆ ಹ್ಯಾ ತಾಳ್ವೆಂತ್ ಕೇಸ್ ನಾಸ್ಲೆಲ್ಯಾ ತಾಚ್ಯಾ ತಕ್ಲೆನ್, ಶಿಕಾಪ್, ಬರೆಂ ಕಾಮ್ ಆನಿ ಬರಿ ಭಲಾಯ್ಕಿ - ಕೂಡ್ ದಿಲ್ಯಾರೀ, ತಾಚೊ ಖಡ್ಡೊ ತಕ್ಲೊ ಸರ್ವ್ ತಾಚಿ ಉಂಚಾಯ್ ಮಾರ್ನ್ ಕಾಡ್ತಾಲಿ.
ಕೇಸ್ ನಾಸ್ಲೊಲೊ ಖಡ್ಡೊ...
ಬೋರ್ ಮಾಂಡೆ ಸಾಹೆಬ್....
ಹಜಾರ್ ನಾಳಿ ಎಕಾಚ್ ವೆಳಾನ್ ಫುಟೊನ್ ತಾಕಾ ಧರ್ನಿ ಸಮಾ ಕೆಲ್ಲ್ಯಾಬರಿ ಜಾಲೆಂ. ಮುಕಾರ್ ಆಸ್ಲೊಲೊ ಆರ್ಸೊ ಫೊಡ್ನ್ ಉಡವ್ಕ್ ಮನ್ ಜಾಲೆಂ ತಾಕಾ. ಏಕ್ ಕಳಂಕ್ಪಣ್, ಏಕ್ ಲ್ಹಾನ್ಪಣ್ ಆಪ್ಣಾಕ್ ದಣ್ಸಿತಾ ಮ್ಹಳ್ಳೆಂ ಕೊಡು ಸತ್ ತಾಕಾ ಜಿರಂವ್ಕ್ ಜಾಲೆಂನಾ.
ಕೇಸ್ ನಾಸ್ಲೊಲೊ ಖಡ್ಡೊ...
ಬೋರ್ ಮಾಂಡೆ ಸಾಹೆಬ್....
ತಾಣೆಂ ದುಕಿನ್ ಸೊಸುಂಕ್ ಜಾಯ್ನಾಸ್ತಾಂ, ತಾಚ್ಯಾ ದೋನ್ ಹಾತಾಂನಿ ತಾಚೆ ಕಾನ್ ಧಾಂಪ್ಲೆ. ’ಅನಿಕೀ ಆಯ್ಕತಾ’ ಮ್ಹಳ್ಳ್ಯಾ ಭಾವನಾಂನಿ ತಾಣೆ ಕಾನ್ ಚಡ್ ಧಾಂಬುನ್ ಧರ್ಲೆ. ಕಿತ್ಲೊ ವೇಳ್ ತಶೆಂ ಧರ್ನ್ ತೊ ರಾವ್ಲ್ಲೊ ತೆಂ ತಾಕಾ ಕಳಿತ್ ಜಾಲೆಂ ನಾ. ತಾಕಾ ಜ್ಯೊರಾನ್ ಹಾಲಯಿಲ್ಲೊ ಅನ್ಭೋಗ್ ಜಾವ್ನ್ ತಾಣೆಂ ಕುಶಿಕ್ ಪಳೆಲೆಂ.
ತಾಚ್ಯೆಪರಿಂ ಸುಟಾರ್ ಅನ್ಯೇಕ್ಲೊ ಉಬೊ ರಾವೊನ್ ತಾಕಾ ತದೇಕ್ ನದ್ರೆನ್ ಪಳೆತಾಲೊ. ಮೆಕ್ಸಿಕ್ ತಾಚಿ ವಳೊಕ್ ಮೆಳ್ಳಿ.
ರೋಬರ್ಟ್! ರೊಬರ್ಟ್ ತಾಚೊ ಮಿತ್ರ್ ಸುಟಾರ್?
ಮೆಕ್ಸಿನ್ ಸವಾಲಾಂ ರುಪಾರ್ ರೊಬರ್ಟಾಕ್ ಪಳೆಲೆಂ.
"ತುಂ ಕಿತೆಂಯಾ ಹ್ಯಾ ಥರಾನ್ ಆರ್ಶ್ಯಾ ಮುಕಾರ್ ಉಬೊ ರಾವ್ಲಾಯ್ ತುಜೆ ದೊನೀ ಹಾತ್ ತುವೆಂ ಘಟ್ಟ್ ಧಾಂಬುನ್ ಧರ್ಲ್ಯಾಯ್. ತುಕಾ ಉಲೊ ಕರ್ನ್ ಪುರೊ ಜಾಲೆಂ. ಉಪ್ರಾಂತ್ ತುಕಾ ಹಾಲಯಿಲ್ಲ್ಯಾ ಶಿವಾಯ್ ದುಸ್ರೊ ಉಪಾವ್ ಮೆಳ್ಳೊನಾ! ತುಕಾ ಸರ್ವ್ ರಾಕ್ತಾತ್!" ಮೆಕ್ಸಿಚೆಂ ಮನ್ ಜೀವ್ ಜಾಲೆಂ. ತಾಚಿ ಮತ್ ಜಿವಾಳ್ಳಿ. ಯೆದೊಳ್ ಪರ್ಯಾಂತ್ ಚಿಂತುನ್ ಆನಿ ಕರ್ಗೊನ್ ಆಸ್ಲೆಲ್ಯಾ ತಾಕಾ
ಸರ್ವ್ ಉಗ್ಡಾಸಾಕ್ ಆಯ್ಲೆಂ.
"ಆಜ್ ಮ್ಹಜೆಂ ಕಾಜಾರ್!"
"ಆಜ್ ಮ್ಹಜೆಂ ರೆಸ್ಪೆರ್!"
ವಯ್ಲೆಂ ಚಿಂತುನ್ ತಾಚೆಂ ತೋಂಡ್ ರುಂದಾಲೆಂ. ಖಂಯ್ ನಾಸ್ಲೊಲೊ ಹುರುಪ್ ತಾಚ್ಯಾ ಕಾಳ್ಜಾಂತ್ ರಿಗ್ಲೊ. ತಾಚೆ ಶ್ವಾಸ್ಕೋಶ್ ವಾರೆಂ ಸೆವುಂಕ್ ತಯಾರ್ ಜಾಂವ್ಚ್ಯೆಬರಿ ಏಕ್ ಲಾಂಬ್ ಉಸ್ವಾಸ್ ಘೆತ್ಲೊ ತಾಣೆ. ರೊಬರ್ಟಾನ್ ತಾಚ್ಯಾ ಟಾಯೆಚ್ಯಾ ಗಾಂಟ್ಯೆಕ್ ಧರ್ನ್ ಸಮಾ ಕೆಲೆಂ. ಬಾರೀಕ್ ನದರ್ ಮಾರುನ್, ಸುಟಾಚೆರ್ ಚಿರ್ಪುಟ್ ಮಾರ್ಲೆಂ ತಾಣೆಂ. ಉಪ್ರಾಂತ್ ಬಾರೀಕ್ ಹಾಸ್ಲೊ ಆನಂದಾನ್ "ಭಾಯ್ರ್ ತುಕಾ ರಾಕೊನ್ ರಾವ್ಲ್ಯಾತ್ ತುಕಾ ಬೆಸಾಂವ್ ದೀಂವ್ಕ್"
ರೊಬರ್ಟಾಸಂಗಿಂ ಮೆಕ್ಸಿ ಕುಡಾಥಾವ್ನ್ ಭಾಯ್ರ್ ಆಯ್ಲೊ. ತಾಣೆಂ ಹ್ಯಾ ಆಧಿಂ ಧಾಂಪ್ಲೆಲೆಂ ದಾರ್ ಉಗ್ತೆಂ ಆಸ್ಲ್ಲೆಂ. ಚಲೊನ್ ಸಾಲಾಂತ್
ಪಾವ್ಲೊ. ತಾಕಾ ತಾಚಿಂ ಕುಟ್ಮಾದಾರಾಂ ದಿಸ್ಲಿಂ. ತಾಂಚ್ಯಾ ತೊಂಡಾರ್ ತೃಪ್ತಿ ಆಸ್ಲ್ಲಿ. ಗುರ್ಕಾರಾನ್ ಮಾಗ್ಣೆಂ ಮ್ಹಳೆಂ. ಉಪ್ರಾಂತ್ ಬೆಸಾಂವ್ ಘೆಂವ್ಚಿ ಸದ್ರಿ.
ಪಯ್ಲೊ ಬಾಬ್, ಪಿಕ್ಲ್ಲ್ಯೊ ಮಿಶಿಯೊ, ಮಿರಿಯೆಲ್ಲಿ ಕೂಡ್. ಪೂಣ್ ಬೋಳ್ ತಕ್ಲಿ. ಹೆಣೆಂ ತೆಣೆಂ ವಕ್ತಾಕ್ ಮ್ಹಳ್ಳ್ಯಾಬರಿ ದೆವಾನ್ ಸುರಾತೆನ್ ದಿಲ್ಲೆ ಪಿಕ್ಲ್ಲೆ ಕೇಸ್. ಬಾಬಾನ್ ಬೆಸಾಂವ್ ದಿಲೆಂ. ಉಪ್ರಾಂತ್ ವೇಂಗ್ - ಉಭೆಭರಿತ್ ವೇಂಗ್.
ಉಪ್ರಾಂತ್ಲಿ ಸರ್ತಿ ಮಾಂಯ್ಚಿ.
ಏಕ್ದಮ್ ಮೊಗಾಳ್ ಆನಿ ಮಯ್ಪಾಸಾಚೆಂ ಕುಂಡ್ಲೆಂ ತಿ. ಆಪ್ಲ್ಯಾ ಕುಟ್ಮಾಖಾತಿರ್ ರಾತ್-ದೀಸ್ ತಿಣೆ ಸಾಕ್ರಿಫಿಸ್ ಕೆಲ್ಲೊ. ಆವಯ್ಕ್ ಪಳೆವ್ನ್ ಮೆಕ್ಸಿಚೆಂ ಕಾಳಿಜ್ ಉಮಾಳ್ಳೆಂ. ತಾಣೆಂ ಮ್ಹಳೆಂ "ಮಾಂಯ್ ಬೆಸಾಂವ್ ದೀ" ತಾಣೆಂ ಹಾತ್ ಜೊಡ್ಲೆ. ಆವಯ್ನ್ ತಾಕಾ ಬೆಸಾಂವ್ ದಿಲೆಂ. ಏಕ್ ಹುನೊನಿ ದೂಕ್ ತಿಣೆಂ ಉಪ್ರಾಂತ್ ದಿಲ್ಲ್ಯಾ ಉಮ್ಯಾಸವೆಂ ತಾಚ್ಯಾ ಪೊಲ್ಯಾರ್ ಗಳ್ಳೆಂ. ತ್ಯಾ ದುಕಾಚೆಂ ಮೋಲ್ ಕಳಿತ್ ಆಸ್ಲಲೆಂ ತಾಕಾ. ತಾಚೆಂ ಕಾಳಿಜ್ ಭರೊನ್ ಯೆತಾನಾ ತಿ ಮ್ಹಣಾಲಿ "ಯೆದೊಳ್ ಪರ್ಯಾಂತ್ ತುವೆಂ ಆಶೆಲ್ಲೆಂ ದೇವ್ ತುಕಾ ದಿತಾ ತೆಂ ಸದಾಂ ರಾಕೊಂದಿ!"
ಏಕ್ ಘಡ್ಯೆ ಝಿಮ್ ಜಾಲೆಂ ತಾಕಾ. ಪರತ್ ಆವಯ್ಚೆಂ ಉತಾರ್ ಧಾಂವೊನ್ ಆಯ್ಲೆಂ ತಾಚ್ಯಾ ಮತಿಂತ್ "ಯೆದೊಳ್ ಪರ್ಯಾಂತ್ ತುವೆಂ ಆಶೆಲ್ಲೆಂ ದೇವ್ ತುಕಾ ದಿತಾ ತೆಂ ಸದಾಂ ರಾಕೊಂದಿ!" ತ್ಯಾ ಉತ್ರಾಚೊ ಅರ್ತ್ ಕರುನ್ ತಾಣೆ ದೊಳೆ ಧಾಂಪ್ಲೆ. ತಿತ್ಲ್ಯಾರ್ ತಾಚ್ಯಾ ಗಾಲಾಕ್ ಉಮೊ ದಿಲ್ಲೊ ತಾಕಾ ಅನುಭಾವ್ ಜಾಲೊ. ತಾಣೆ ದೊಳೆ ಉಗ್ತೆ ಕೆಲೆ. ಮುಕಾರ್ ವ್ಹಡ್ಲೊ ಭಾವ್ ಆಸ್ಲ್ಲೊ.
35 ವರ್ಸಾಂ ಪ್ರಾಯೆಚೊ ಮಾಲ್ಘಡೊ ಭಾವ್-ಕಾಜಾರಿ ದೊಗಾಂ ಭುರ್ಗ್ಯಾಂಚೊ ಬಾಪಯ್. ಕಾಮಾಂತ್ ಮೆಸ್ತ್ರಿ. ಬರೊ ಭಾವ್ ತಾಚೊ. ಲ್ಹಾನ್ ಥಾವ್ನ್ ಮೋಗ್ ಆನಿ ಮಾರ್ಗ್ದರ್ಶನ್ ತಾಣೆ ತಾಕಾ ದಿಲ್ಲೆಂ. ಎಕಾ ಥರಾಚೊ ಭರ್ಮ್ ಆನಿ ಗವ್ರವ್ ಅಪಾಪಿಂಚ್ ತಾಚ್ಯೆ ಥಂಯ್ ಉದೆಲೊ. ಮೆಕ್ಸಿನ್ ದೊಳೆ ರುಂದಾಯ್ಲೆ ಆನಿ ಹಾತ್ ಜೊಡ್ಲೆ. ತಾಕಾ ದಿಸ್ಲೊ ಅನ್ಯೇಕ್ ಖಡ್ಡೊ!
ಮೆಕ್ಸಿಚ್ಯಾ ಬಾಪಾಯ್ಚ್ಯಾ ಕುಟ್ಮಾಂತ್ ಖಡ್ಡೆಪಣ್ ದೆಂವೊನ್ ಆಯಿಲ್ಲಿ ಏಕ್ ಸ್ಥಿತಿ. ಶಿಕ್ಪಿ ಜಾವ್ನಾಸ್ಲೆಲ್ಯಾ ತಾಕಾ ಜೀನ್ಸ್ ಹಾಚೆಂ ಮಹತ್ವ್ ತಶೆಂ ಕಶೆಂ ಜನಾಂಗಾಂತ್ ತೆಂ ರಿಗೊನ್ ಆಸಾ ತೆಂ ಕಳಿತ್ ಆಸ್ಲೆಲೆಂ. ತಾಣೆ ವಾಚುನ್ ತಶೆಂ ಮಿತ್ರ್ ದಾಕ್ತೆರಾಂಗಡೆ ಚಲಯಿಲ್ಲ್ಯಾ ಸಂಭಾಶಣಾಂತ್ ಹೆಂ ಖಡ್ಡೆಪಣ್ ಜನಾಂಗಾಂತ್ ಸದಾಂ ಯೆಂವ್ಚಿ ಸ್ಥಿತಿ. ಚೆಡ್ವಾಂಕ್ ತಶೆಂ ಸ್ತ್ರೀಯಾಂಕ್ ದಾದ್ಲ್ಯಾಬರಿ ಬೋಳ್ ತಕ್ಲಿ ಯೆಂವ್ಚಿ ಸಾಧ್ಯತಾ ನಾ ಮ್ಹಳ್ಳೆಂ ಘೋಶಣ್ ಕೆಲ್ಲೆಂ. ಮೆಕ್ಸಿಕ್ ಹೆಂ ರುಜು ಕರುಂಕ್ ಭಯ್ಣಿಂ ನಾತ್ಲ್ಲ್ಯೊ. ಆಸ್ಲ್ಲೊ ಅನ್ಯೇಕ್ ಭಾವ್. ಪದವೀಧರ್ ಜಾವ್ನ್ ಎಮ್.ಬಿ.ಎ ಶಿಕ್ತಾಲೊ. ತಾಚೇಯ್ ಕೇಸ್ ತಾಳ್ವೇರ್ ಪಾತಳ್ ಜಾಲ್ಲೆ.
"ಕಡ್ಡೆಂ ಕುಟಮ್!"
ಖಂಯ್ಚಾಯ್ ಎಕಾ ಸಂದರ್ಭಾರ್ ಮಿತ್ರಾಂನಿ ಹೆಂ ವಯ್ಲೆಂ ಉತಾರ್ ಸಾಂಗೊನ್ ತಾಚೆ ಪಾಂಯ್ ಒಡ್ಲ್ಲೆ!
ಬೆಸಾಂವ್ ದಿಂವ್ಚಿ ಆನಿ ಘೆಂವ್ಚಿ ಸೆರೆಮನಿ ಸಂಪ್ಲಿ. ಘರಾ ಥಾವ್ನ್ ಮೆಟಾಂ ಭಾಯ್ರ್ ಕಾಡ್ತಾನಾ ತಾಚ್ಯಾ ಮತಿಂತ್ ಏಕ್ ಉತಾರ್
ಉಭೊನ್ ಗೆಲೆಂ. "ಸರ್ವ್ ಸವಾಲಾಂಕ್ ಜವಾಬ್ ಆಸಾ. ಸರ್ವ್ ಕಶ್ಟಾಂಕ್ ಏಕ್ ವಾಟ್ ಆಸಾ" ಖಂಯ್ಗೀ ಎಕಾ ಪುಸ್ತಕಾರ್ ವಾಚ್ಲ್ಲೊ ಉಗ್ಡಾಸ್ ಆಯ್ಲೊ ತಾಕಾ. "ಸರ್ವ್ ಸವಾಲಾಂಕ್ ಏಕ್ ಜವಾಬ್; ಸರ್ವ್ ಕಶ್ಟಾಂಕ್ ಏಕ್ ವಾಟ್"
ತಾಣೆಂ ಮತಿಂತ್ ಆಯಿಲ್ಲೆಂ ಉತಾರ್ ತೊಂಡಾರ್ ಮ್ಹಳೆಂ. ಖಂಯ್ ನಾತ್ಲ್ಲೊ ಸಂತೊಸ್ ಜಾಲೊ ತಾಕಾ. ತಿತ್ಲ್ಯಾರ್ ತಾಚೆಂ ಚಿಂತಾಪ್ ಕಾತ್ರುನ್ ರೊಬರ್ಟ್ ಉಲಯ್ಲೊ. "ಕಿತೆಂ ಚಿಂತಾಯ್, ವೀರಾಕ್
ನಿಯಾಳ್ತಾಯ್?" ಏಕ್ ಸಂತೊಸಾಚಿ ಝರ್ ತಾಚ್ಯಾ ಮತಿಂತ್ ಪಾಶಾರ್ ಜಾಲಿ. ಏಕ್ ಸುಂದರ್ ರುಪ್ಣೆಂ ತಾಚ್ಯಾ ಮತಿಂತ್ ಆಯ್ಲೆಂ.
ಲಾಂಬ್ ನಾಕ್ ಕಿರಾಚೆಂ, ಸುಂದರ್ ದೊಳೆ ಮಾಸ್ಳೆಚೆ. ಬಿಂಡಾಚ್ಯಾ ರಂಗಾಚೆ ವೋಂಟ್.
ಉಭಾರ್ ಹರ್ದೆಂ, ಶಿರ್ಪುಟಿ ರುಕಾಡಾಚ್ಯಾ ಮೆಸ್ತ್ರಿನ್ ಕಿಸುಳ್ ಕಾಡ್ನ್ ತಯಾರ್ ಕೆಲ್ಲ್ಯಾ ಮೆಜಾ ಸಾರ್ಕಿ ಕೂಡ್. ಬಾರೀಕ್
ಹಾತ್ ಲಾಂಬ್ ಆನಿ ತಾಚ್ಯೊ ನಾಕ್ಶ್ಯೊ. ತಾಚ್ಯಾ ಕುಡಿಕ್ ಸೊಭಾಯ್ ದಿಂವ್ಚಿ ಲಾಂಬ್ ಪಾಂತಿ!
"ಪಾಂತಿ" ಅಪ್ಣಾಸ್ತಕಿಂ ಉಲಯ್ಲೊ ಮೆಕ್ಸಿ. ಖಂಯ್ ನಾತ್ಲೊಲೊ ಹುರುಪ್ ಆಯ್ಲೊ ತಾಕಾ. ’ಪಾಂತಿ’ ಹೆಂ ನಾಂವ್ ಉಚಾರ್ತಾನಾ ತಾಚೆ ದೊಳೆ ಉಜಳ್ಳೆ. ತಾಚಿ ಕೂಡ್ ಹಾಲ್ಲಿ ಆನಿ ಕಾಂಪ್ಲಿ. ತಾಚ್ಯಾ ಹಾತಾಂತ್ ವೀಜ್ ಧಾಂವ್ಲಿ. ತೊ ಸಗ್ಳೊ ಪುಳಕಿತ್ ಜಾಲೊ.
"ಪಾಂತಿ" ಪರತ್ ಉಚಾರ್ಲೆಂ ತಾಣೆಂ ತಾಕಾ ಕಳಿತ್ ನಾಸ್ತಾಂ. ತಕ್ಶಣ್ ತಾಕಾ ಕುಟ್ಟಿಲ್ಲೊ ಅನ್ಭೋಗ್ ಜಾಲೊ. ತಾಣೆ ಕುಶಿಕ್ ಪಳೆಲೆಂ. ರೋಬರ್ಟ್! ತಾಣೆ ದೊಳ್ಯಾಂನಿ ಸವಾಲ್ ಕೆಲೆಂ ’ಕಸಲಿ ಗಜಾಲ್?’ ಏಕ್ ಪಾವ್ಟಿಂ ಹಾಸ್ಲೊ ಮೆಕ್ಸಿ "ಹಾಂವ್ ಪಾಂತಿಯೆ
ವಿಶ್ಯಾಂತ್ ನಿಯಾಳ್ತಾಲೊಂ. ತುವೆಂ ವೀರಾಚೆಂ ನಾಂವ್ ಕಾಡ್ತಾನಾ ಮ್ಹಾಕಾ ಮತಿಕ್ ಯೆತಾ ಫಕತ್ತ್ ಪಾಂತ್ಯೆಚೊ!" ವ್ಹಡ್ಲ್ಯಾನ್ ಹಾಸ್ಲೊ ರೋಬರ್ಟ್. ತಾಕಾ ಕಳಿತ್ ಆಸ್ಲೆಲೆಂ ಮೆಕ್ಸಿಚೆಂ ಒಬ್ಶೆಶನ್ - ಖಂತ್ ಆನಿ ಅಸ್ಕತ್ಕಾಯ್.
’ಪಾಂತಿ’ ತಾಣೆ ವ್ಹಡ್ಲ್ಯಾನ್ ಮ್ಹಳೆಂ. ಕಾರ್ ಸೊಡ್ಚೊ ಡ್ರಾಯ್ವರ್ ಸಿಲಾನ್ ಏಕ್ ಘಡಿ ಕಾರ್ ರಾವಯ್ಲೆಂ. "ಕಿತೆಂ ಜಾಲೆಂ?" ತಾಕಾ ಸಮಧಾನ್ ಕರ್ನ್ ಕಾರ್ ಇಗರ್ಜೆ ಮುಕಾರ್ ಪಾವ್ಲೆಂ.
ರೆಸ್ಪೆರ್ ಜಾಲೆಂ. "ಆಜ್ ಥಾವ್ನ್ ತುಮಿ ಏಕ್ ಜಾವ್ನಾಸಾತ್" ಹೆಂ ಉತಾರ್ ಆಯ್ಕೊನ್ ಖಂಯ್ ನಾತ್ಲೊಲೊ ಸಂತೊಸ್ ಜಾಲೊ ಮೆಕ್ಸಿಕ್. ಆಜ್ ಥಾವ್ನ್ ವೀರಾ ಮ್ಹಜೆಂ. ಆಜ್ ಥಾವ್ನ್ ತಾಚಿ ಪಾಂತಿ ಮ್ಹಾಕಾ. ರೆಸ್ಪೆರಾ ಉಪ್ರಾಂತ್ಲಿ ಸೆರೆಮನಿ ಸಂಪ್ಲಿ. ಹೊಕಾಲ್-ನೊವ್ರ್ಯಾಕ್ ಭಲಾಯ್ಕಿ ಮಾಗ್ಲೆಲ್ಯಾ ಆಪ್ಲೊ
ಭಾವ್ ಶಿಕಂವ್ಚ್ಯಾ ಇಸ್ಕೊಲಾಚಾ ಮುಕೆಲ್ ಮೆಸ್ತ್ರಿನ್ ದಿಲ್ಲ್ಯಾ
ಭಲಾಯ್ಕೆಂತ್ ಮೆಕ್ಸಿಚ್ಯಾ ಅಸ್ಕತ್ಕಾಯೆಕ್ ಏಕ್ ವಕಾತ್
ಜಾವ್ನ್ ಲಾಂಬ್ ಲಾಂಬ್ ಪಾಂತಿಯೆಚೆಂ ವೀರಾ ಫಾವೊ ಜಾಲ್ಲ್ಯಾಕ್ ದೆವಾಕ್ ಅರ್ಗಾಂ ದಿತಾನಾ, ತಾಂಕಾಂ ಜಾಂವ್ಚಿಂ ಭುರ್ಗಿಂ ಕೆಸಾಂನಿ ಪಿಕೊಂದಿತ್ ಮ್ಹಳ್ಳೆಂ ಭವಿಶ್ಯ್ವಾಣಿ ತಶೆಂ ದೆವಾಲಾಗಿಂ ಉಪ್ಕಾರ್ ಮಾಗ್ಲ್ಲೊ ತಾಣೆ. ಮೆಕ್ಸಿ
ಆನಿ ವೀರಾ ಘರಾ ಪಾವ್ಲಿಂ. ತಾಣಿಂ ತಾಂಚಿ ಪಯ್ಲಿ ರಾತ್ ಪಾಶಾರ್ ಕರುಂಕ್ ಮೋತಿಮಹಲ್ ಹೊಟೆಲಾಂತ್ ಕೂಡ್ ಅಮಾನತ್ ಕೆಲ್ಲೆಂ. ಘರ್ಚ್ಯಾ ಲೊಕಾಕ್ ಬರೆಂ ಮಾಗೊನ್ ಹೊಟೆಲಾಕ್ ಭಾಯ್ರ್ ಸರ್ತಾನಾ, ರೊಬರ್ಟ್ ವ್ಹಡ್ಲ್ಯಾನ್ ಉಲಯ್ಲೊ: "ರೆಸ್ಪೆರಾಕ್ ವೆತಾನಾ ಪಾಂತ್ಯೆಚೆಂ ನಾಂವ್ ಕಾಡ್ನ್ ಚಿಂತುನ್ ಆಸ್ಲ್ಲೊಯ್. ಆತಾಂ ಹೊಟೆಲಾಂತ್ ಪಾಂತ್ಯೆಕಡೆ ರಾತ್ ಪಾಶಾರ್ ಕರ್ತಾಯ್ಗಿ ಹ್ಯಾ ಲಾಂಬ್ ಪಾಂತ್ಯೆಚ್ಯಾ ವೀರಾಲಾಗಿಂ?"
ಸರ್ವಾಂ ತಾಳಿಯೊ ಪೆಟುನ್ ವ್ಹಡ್ಲ್ಯಾನ್ ಹಾಸ್ಲಿಂ. "ಗೆಟ್ ಲೋಸ್ಟ್" ಜ್ಯೊರಾನ್ ಪಾಟಿಂ ಜವಾಬ್ ದಿಲಿ ತಾಣೆಂ ರೊಬರ್ಟಾಕ್. ಮೆಕ್ಸಿಚ್ಯಾ ಆಪ್ತ್ ಮಿತ್ರಾಕ್ ಕಾಂಯ್ ತಾಚ್ಯಾ ಉತ್ರಾಂನಿ ರಾಗ್ ಆಯ್ಲೊನಾ. ತಿಂ ಮೋತಿಮಹಲಾಕ್ ಪಾವ್ಲಿಂ. ಅಮಾನತ್ ಕೆಲ್ಲ್ಯಾ
ಕುಡಾಕ್ ರಿಗ್ಲಿಂ.
ಕಾಜಾರಾಚಿ ಪಯ್ಲಿ ರಾತ್. ಹಜಾರೊಂ ಭಗ್ಣಾಂ, ಉದ್ವೇಗ್ ತಶೆಂ ಉದ್ರೇಕಾಚಿಂ ಲ್ಹಾರಾಂ ಬಾಂದುನ್ ಹಾಡ್ಲೆಲಿಂ ಪಿಸುಡ್ನ್ ತಶೆಂ ಪಿಂದುನ್ ಉಡಂವ್ಚಿ ರಾತ್ ತಿ. ದೆಕುನ್ ಜಾವ್ಯೆತ್ ಹಿಂದಿ ಪಿಂತುರಾಂತ್ ಕಾಜಾರಿ ನೊವ್ರ್ಯಾ ಹೊಕ್ಲೆಚ್ಯಾ ಖಟ್ಲ್ಯಾ ಭೊಂವ್ತಿಂ ತಶೆಂ ಖಟ್ಲ್ಯಾರ್ ಫುಲಾಂನಿ ಸುಂರ್ಗಾರಾಯ್ತಾತ್. ಫುಲ್ ಪಿಸುಡ್ತಾ. ಸ್ವಪಾಣ್ ಘಡಿತ್ ಜಾತಾ. ಭೊಗ್ಣಾಂಕ್ ಏಕ್ ರೂಪ್ ಯೆತಾ. ಉದ್ವೇಗಾಕ್ ಏಕ್ ಧ್ಯಾನ್ ಮೆಳ್ತಾ. ಉದ್ರೇಕಾಕ್ ಏಕ್ ವಾಟ್ ಮೆಳ್ತಾ.
ಕಾಜಾರಾಚಿ ಪಯ್ಲಿ ರಾತ್.
ತಿಂ ಖಟ್ಲ್ಯಾರ್ ಬಸ್ಲಿಂ. ಮೆಕ್ಸಿ ತಾಚ್ಯಾ ಹಾತಾಂತ್ ವೀರಾಚಿ ಪಾಂತಿ ಘೆತ್ತ್ ರಾವ್ಲೊ. ತಾಣೆ ತಿ
ಪೊಶೆಲಿ. ಫುಲಾಂನಿ ತಿ ಭರ್ಲ್ಲಿ. ಶೆಂಡೊ ಕಾಡ್ನ್ ಮೆಕ್ಸಿನ್
ವೀರಾಕ್ ಪಾಂತಿ ಘಾಲುಂಕ್ ಸಾಂಗ್ಲೆಂ. ತಾಣೆಂ ಪಾಂತಿ ಘಾಲಿ.
ಪಾಂತಿ ಘಾಲ್ತಾನಾ ಪಳಯಿತ್ತ್ ರಾವ್ಲೊ ತೊ. ಕನ್ನಡಾಂತ್ಲ್ಯಾ ಫಾಮಾದ್
ಲೇಖಕಿ ದೆವಾಧಿನ್ ತ್ರಿವೇಣಿ ವಿಶ್ಯಾಂತ್ ತಾಣೆಂ ತಾಚ್ಯಾ ಶಿಕ್ಪಾ
ಸಂಸಾರಾಂತ್ ಆಸ್ತಾನಾ ವಾಚ್ಲೆಲೆಂ. ತಿಚ್ಯಾ ಕೆಸಾಂಚ್ಯಾ ಪಾಂತಿಯೆಂತ್ ತೀನ್
ವೇಣ್ಯೊ ಕೆಲ್ಲ್ಯಾಕ್ ತಿಣೆಂ ನಾಂವ್ ಘೆತ್ಲೆಂ ’ತ್ರಿವೇಣಿ’.
ಪಾಂತಿ ಘಾಲ್ಚ್ಯಾ ವೀರಾಕ್ ಪಳೆಯಿತ್ತ್ ರಾವ್ಲೊ ತೊ. ಉಪ್ರಾಂತ್ ತಾಣೆಂ
ವೀರಾಚ್ಯಾ ಪಾಂತ್ಯೆರ್ ಹಾತ್ ಭಂವ್ಡಾಯ್ಲೊ. ತಾಣೆಂ ತಿ ಪಾಂತಿ ಫಾಸ್ಳಾಯ್ಲಿ.
"ಕಹಲೆಂ ಕರ್ತಾಯ್ ತುಂ?" ಕೃತಕ್ ರಾಗಾನ್ ಘುಂವೊನ್ ಉಲಯ್ಲೆಂ
ವೀರಾ. ತಾಕಾ ಮೆಕ್ಸಿಚೆಂ ಕೃತ್ಯೆಂ ಏಕ್ ಸವಾಲ್ ಜಾಲ್ಲೆಂ. "ಹಾಂವ್ ತುಕಾ
ಪಾಂತಿ ಘಾಲ್ತಾಂ" ಮ್ಹಣೊನ್ ತಾಣೆಂ ವೀರಾಚ್ಯಾ ಲಾಂಬ್ ಕೆಸಾಂಚ್ಯೊ ತೀನ್
ವೇಣ್ಯೊ ಕೆಲ್ಯೊ. ವೀರಾನ್ ಪಾಂತಿ ಘಾಲ್ತಾನಾ ಪಳಯಿಲ್ಲೊ ಉಗ್ಡಾಸ್
ಮತಿಂತ್ ದವರುನ್ ತಾಣೆಂ ಪಾಂತಿ ವೊಳುಂಕ್ ಸುರು ಕೆಲಿ.
"ಡೋಂಟ್ ಬಿ ಸಿಲ್ಲಿ ಮೆಕ್ಸಿ" ಭಾರೀಕ್ ತಾಳ್ಯಾನ್ ಉಲಯ್ಲೆಂ ತೆಂ. ತಾಕಾ ಕಳಿತ್ ಆಸ್ಲೆಂ ಕೆಸಾಂಚೆರ್ ಆಸ್ಚೊ
ಮೋಗ್ ಅಭಿಮಾನ್ ತಶೆಂ ಸಂಸ್ಕಾರ್ ಕೇಸ್ ನಾತ್ಲೆಲ್ಯಾ
ಮೆಕ್ಸಿಚಿ ಎಕ್ಚ್ ಏಕ್ ಆಶಾ ಮ್ಹಳ್ಯಾರ್ "ಲಾಂಬ್ ಕೇಸ್ ಆನಿ
ಪಾಂತಿ". ಮೆಕ್ಸಿನ್ ಪಾಂತಿ ವೊಳ್ಳಿ. ಸುರ್ವೆರ್ ಗುಸ್ಪಡ್ಲೊ. ತೆದ್ನಾಂ
ವೀರಾನ್ ತಾಕಾ ಶಿಕಯ್ಲೆಂ.
ಮೆಕ್ಸಿನ್ ಪಾಂತಿ ವೊಳ್ಳಿ. ವೊಳ್ಲ್ಲ್ಯಾ ತ್ಯಾ ಪಾಂತ್ಯೆಚೊ ಉಮೊ ಘೆತ್ಲೊ ತಾಣೆಂ. ತಾಚ್ಯಾ ದೊಳ್ಯಾಂಕ್ ಧಾಂಬುನ್ ಧರ್ಲೆಂ ತಾಣೆಂ.
ಪರ್ಮಳ್ ತಾಚ್ಯಾ ನಾಕಾಕ್ ಆದಾಳ್ಳೊ. ಉಪ್ರಾಂತ್ ತಾಣೆಂ ತ್ಯಾ
ಪಾಂತ್ಯೆಕ್ ಹರ್ದ್ಯಾರ್ ದಾಂಬುನ್ ದವರ್ಲೆಂ.
"ವೀರಾ ತುವೆಂ ಮ್ಹಜ್ಯೆ ತಸಲ್ಯಾ ಬಾಲ್ಡ್ ಮನ್ಶಾಲಾಗಿಂ ಕಾಜಾರ್ ಜಾಲ್ಲ್ಯಾಕ್ ತುಕಾ
ಹಾವೆಂ ’ಥ್ಯಾಂಕ್ಸ್’ ಕಶೆಂ ಮ್ಹಣ್ಚೆಂ ತೆಂ ಕಳಾನಾ. ತುವೆಂ
ಮ್ಹಾಕಾ ಏಕ್ ಸಂತೊಸ್ ದಿಲ್ಲ್ಯಾಖಾತಿರ್ ಹಾಂವ್ ತುಕಾ ಎವರ್ ಗ್ರೇಟ್ಫುಲ್. ತುಕಾ
ಹಾಂವ್ ಸದಾಂ ಖುಶಿ ದವರ್ತಲೊಂ. ತುಜೆ ಕೇಸ್ ಹಾಂವ್
ಮಾಕುನ್, ಸದಾಂ ಪಾಂತಿ ವೊಳ್ತಲೊಂ. ತುವೆಂ ಇತ್ಲೆಂ ಕರುಂಕ್
ಸೊಡ್ಲ್ಯಾರ್ ಹಾಂವ್ ಹ್ಯಾ ಸಂಸಾರಾಂತ್ ದುಸ್ರೆಂ ಕಿತೆಂಯ್
ಮಾಗ್ಚೊಂನಾ. ಹೆಂ ಸತ್. ಮಾರ್ಕ್ ಮೈ ವರ್ಡ್ಸ್" ಮೆಕ್ಸಿಚ್ಯಾ ಕಾಳ್ಜಾಥಾವ್ನ್ ಆಯಿಲ್ಲಿಂ ಉದ್ವೇಗಾಚಿಂ ಉತ್ರಾಂ. ತಾಕಾ ಕಳಿತ್
ನಾಸ್ತಾಂ ತಾಚೊ ತಾಳೊ ಗದ್ಗದಿತ್ ಜಾಲೊ. ದೋನ್ ದುಕಾಂ ತಿಂ
ವೀರಾಚ್ಯಾ ಕೆಸಾಂನಿ ಲಿಪೊನ್ ಗೆಲಿಂ.
"ಡೋಂಟ್ ಬಿ ಸಿಲ್ಲಿ ಮೆಕ್ಸಿ. ಹಾಂವ್ ತುಜೆರ್ ಮೊಗಾನ್ ಕಾಜಾರ್ ಜಾಲ್ಲಿಂ. ತುವೆಂ ತುಜೆಂ
ಫೀಲಿಂಗ್ಸ್ ರೊಬರ್ಟಾಕ್ ಸಾಂಗ್ಲ್ಲೆಂ ತೆಂ ತಾಣೆಂ ಕಳಯಿಲ್ಲೆಂ ಕಾಗ್ದಾಂತ್. ಸೋಶಿಯಲ್
ವರ್ಕ್ಸ್ ಹೆಂ ಮ್ಹಜೆಂ ಶಿಕಾಪ್ ಘೆತ್ಲೆಲ್ಯಾ ಮ್ಹಾಕಾ ತುಕಾ ಏಕ್
ಸಂತೊಸ್ ದೀಂವ್ಕ್ ಮನ್ ಕೆಲೆಂ. ರೋಶನಿ ನಿಲಯಥಾವ್ನ್
ಶಿಕಯಿಲ್ಲೆಂ ತುಕಾ ತೆಂ
ಪಾವಿತ್ ಕರುಂಕ್ ಸಕ್ಲಿಂ ತೆಂಚ್ಚ್ ಮ್ಹಜೆಂ ದೆವಾಕ್ ಅರ್ಗಾಂ. ತುಕಾ
ಹಾಂವ್ ಸಂತೊಸಾನ್ ದವರ್ತೆಲಿಂ. ಮ್ಹಜೆ ಕೇಸ್ ಮ್ಹಜ್ಯಾ ಜಿವಾಚ್ಯಾಕೀ ಚಡ್
ಮೊಗಾನ್ ಸಾಂಬಾಳ್ತೆಲಿಂ. ಹೆಂ ತುಂ ಪಾತ್ಯೆ" ತಾಕಾ ಪೊಟ್ಲುನ್ ಧರ್ಲೆಂ
ವೀರಾನ್ ಆಪ್ಲ್ಯಾ ದೊನೀ ಹಾತಾಂನಿ. "ಯಾ ವೇಳ್ ಜಾಲೊ.
ಪುರಾಸಣ್ ಜಾಲ್ಯಾ. ನಿದ್ಯಾಂ ಆಮಿ" ವೀರಾನ್ ಸಾಂಗ್ಲೆಲ್ಯಾ ಉತ್ರಾಂಕ್
ಸಮ್ಮತಿ ದಿಲ್ಲ್ಯಾಬರಿ ಮೆಕ್ಸಿನ್ ತಾಚಿ ತಕ್ಲಿ ಉಶ್ಯಾರ್ ದವರ್ಲಿ.
ವೀರಾಚೆ ಲಾಂಬ್ ಕೇಸ್ ತಾಣೆಂ ಆರಾವ್ನ್ ತಾಚ್ಯಾ ಮಾತ್ಯಾರ್ ಘಲೆ.
ಖಂಯ್
ನಾತ್ಲೊಲೊ ಸಂತೊಸ್ ಜಾಲೊ ತಾಕಾ.
ತಾಕಾ ನೀದ್ ಆಯ್ಲಿನಾ.
ಗಾಂವಾಂತ್ ಎಮ್.ಕೊಮ್ ಕರ್ನ್ ಬೆಂಗ್ಳುರಾಂತ್ ಕಾಮಾಕ್
ಸೆರ್ವಲ್ಲ್ಯಾ ಮೆಕ್ಸಿನ್ ಸಾಂಜೆಚ್ಯಾ ಕೊಲೆಜಿಕ್ ವಚೊನ್ ಕಾನೂನ್
ಪದವಿ ಕೆಲಿ. ವಿಡೇಶಿ ಕಂಪೆನಿಂಕ್ ಕಾನೂನ್ ವಿಭಾಗಾಂತ್ ಬರೆಂ ಕಾಮ್ ಮೆಳ್ಳೆಂ ತಾಕಾ.
ಕಾಜಾರಾಚಿ ಪ್ರಾಯ್ ಜಾತಾನಾ, ತಾಕಾ ಸಯ್ರಿಕೊ ಆಯ್ಲ್ಯಾರೀ,
ಮೆಕ್ಸಿಕ್ ಪಳೇವ್ನ್ ಥೋಡ್ಯಾ ಚಲಿಯಾಂನಿ ನೆಗಾರ್ ಕೆಲ್ಲೆಂ.
"ಕಾಮ್ ಬರೆಂ ಆಸಾ, ವ್ಹಯ್, ಭುರ್ಗೊ ಬರೊ ವ್ಹಯ್.
ಪುಣ್ ಕೇಸ್ ನಾತ್ಲೆಲ್ಯಾ ಚೆಡ್ಯಾಕ್ ಮಾತೆಂಬರ್ ಕೇಸ್ ಆಸ್ಲೆಲೆಂ ಚೆಡುಂ ಪಳೆಂವ್ಕ್ ಕಶ್ಟ್. ಆಜ್ಕಾಲ್ಚಿಂ ಚೆಡ್ವಾಂ
ಸೊಭಾಯ್ ಪಳೆತಾತ್ ದೆಕುನ್..."ಸಯ್ರಿಕೊ ಪಳೆವ್ನ್ ತಂಗ್ ಜಾಲ್ಲ್ಯಾ
ಮೆಕ್ಸಿಕ್, ಕಳಿತ್ ಜಾಲ್ಲಿ ಸಂಗತ್. ತೆದ್ನಾಂ ತಾಣೆ ಗಾಂವಾಕ್ ಗೆಲ್ಲ್ಯಾ ವೆಳಾರ್ ತಾಕಾ ಮೆಳ್ಳ್ಯಾ ದುಕಿ ಅನುಭವಾಚೆಂ ರೂಪ್ ತಿಳ್ಸಿತಾನಾ ರೊಬರ್ಟಾನ್ ತಾಚ್ಯಾ
ಮೊಗಾಚ್ಯಾ ಭಾಚ್ಯೆಕ್ ಬರವ್ನ್, ಮೆಕ್ಸಿ ವಿಶ್ಯಾಂತ್, ಮೆಕ್ಸಿಚ್ಯಾ ಜಿವಿತಾಚ್ಯಾ
ಸ್ವಪ್ಣಾವಿಶ್ಯಾಂತ್ ಬರವ್ನ್, ತಾಂತುಂ ತಾಕಾ ಆಸಕ್ತ್ ಉಭ್ಜೊನ್,
ಮೆಕ್ಸಿಕಡೆ ಕಾಜಾರ್ ಜಾಂವ್ಕ್ ಪಾವ್ಲ್ಲೆಂ. ತ್ಯಾ ಎಕಾ ಕಾರಾಣಾನ್ ಆಪ್ಲ್ಯಾ ದಾಕ್ಟ್ಯಾ ಭಾವಾಚೊ ’ಬೆಸ್ಟ್ಮೆನಾ’ಚೊ ಗೌರವ್ ರೊಬರ್ಟಾಕ್
ದಿಲ್ಲೊ.
ನವೊ ದೀಸ್ ಉದೆಲೊ. ಮೆಕ್ಸಿಚ್ಯಾ ಜೀವನಾಂತ್ ಏಕ್ ನವಿ ಕಾಣಿ
ದಿನಚರಿ ಉದೆಲಿ. ವೀರಾಚ್ಯಾ ಕೆಸಾಂಕ್ ಮಾಲಿಶ್ ಕರ್ನ್, ಕೇಸ್ ಉಗವ್ನ್
ಪಾಂತಿ ಘಾಲುಂಕ್ ಸುರು ಕೆಲಿ ತಾಣೆ. ತಾಚ್ಯಾ ಲಾಂಬ್ ಕೆಸಾಂಕ್
ಪೊಶೆವ್ನ್, ತಾಕಾ ಎಕಾ ಭುರ್ಗ್ಯಾಕ್ ಪಳಯಿಲ್ಲ್ಯಾಪರಿಂ ಪಳಂವ್ಚಿ ಚತ್ರಾಯ್ ಕೆಲಿ ತಾಣೆಂ. ಕಾಂಯ್ ಕೇಸ್ ಝಡ್ಲ್ಲೊ ಮೆಳ್ಳ್ಯಾರ್ ಯಾ ದಾಂತೊಣಿಂತ್ ಶಿರ್ಕಾಲ್ಯಾರ್ ತಾಚೆ ಚುರ್ಚುರೆ ಪಳವ್ನ್
ವೀರಾನ್ ಸಾಂಗ್ಚೆಂ ಆಸ್ಲ್ಲೆಂ "ಎಕಾ ದಿಸಾಕ್ ಶೆಂಬೊರ್ ಕೇಸ್
ಝಡ್ಲ್ಯಾರ್ ತೆಂ
ನೆಚುರಲ್ ಮೆಕ್ಸಿ. ಡೋಂಟ್ ಬಿ ಸೆನ್ಸಿಟಿವ್!".
ತಾಚ್ಯಾ ಹಾಸ್ಯಾಂತ್ ಮೆಕ್ಸಿನ್ ಚಂದ್ರ್ ಪಳಯ್ಲೊ. ತಾಚ್ಯಾ
ಮೊಗಾನ್ ಮೆಕ್ಸಿನ್ ನವೊ ಸಂಸಾರ್ ದೆಕ್ಲೊ. ವೀರಾಚ್ಯಾ ಕೆಸಾಂತ್ ಖೆಳೊನ್
ಮೆಕ್ಸಿ ತಾಕಾಚ್ಚ್ ವಿಸರ್ಲೊ. ಎಕಾ ಉತ್ರಾನ್ ಕಾಜಾರಿ ಜಿವಿತಾಂತ್
ವೀರಾ ಆನಿ ತಾಚೆ ಕೇಸ್ ತಾಕಾ ನವ್ಯಾ ಜೀವನಾಚಿ ದಿವ್ಟಿ ಜಾಂವ್ಕ್
ಪಾವ್ಲಿ. ’ಬೋರ್ ಮಂಡೆ ಸಾಹೇಬ್’ ಆಡ್ ನಾಂವಾನ್ ಪಿಸೊ ಕೆಲ್ಲ್ಯಾ
ಮೆಕ್ಸಿಕ್, ವೀರಾಚ್ಯಾ ಪಾಂತಿಯೆನ್ ಸರ್ವ್ ಸಂತುಶ್ಟಿ ವಾಟೊ ಅಪ್ಣಾಂವ್ಕ್ ಶಿಕಯ್ಲ್ಯೊ.
ದೀಸ್ ಧಾಂವ್ಲೆ. ದೀಸ್ ಗೆಲ್ಯಾರೀ, ಮೆಕ್ಸಿ- ವೀರಾಚೊ ಸಂಬಂದ್ ಏಕ್ ಭದ್ರ್ ಕೊಟೆಂ ತಶೆಂ ಕೆಸಾಂ ಭಂವ್ತಿಂ
ವಾಡ್ಲೆಂ. ರೊಬರ್ಟ್ ತಾಂಕಾಂ ತವಳ್ ತವಳ್ ಭೆಟ್ ದಿತಾಲೊ. ಕೇಸ್
ನಾಸ್ತಾಂ ಖಳ್ವಳ್ಚಾ ಎಕಾ ದುಕಿ ಮನ್ಶ್ಯಾಕ್ ಲಾಂಬ್ ಕೆಸಾಂಚಿ ಚಲಿ ಫಾವೊ ಕರುನ್
’ಕಸಲೆಂ ವ್ಹಡ್ಲೆಂ ಕಾಮ್ ಕೆಲೆಂ’ ಮ್ಹಳ್ಳೆಂ ಚಿಂತಾಪ್
ಮತಿಕ್ ಯೇವ್ನ್ ಸಂತೊಸ್ ಪಾವ್ತಾಲೊ. ಸಾರ್ಕಿ ಸಯ್ರಿಕ್
ಮೆಳಾನಾಸ್ತಾಂ, ಆಪ್ಣಾ ಭಿತರ್ ಕಳ್ವಳ್ಚಾ ತಶೆಂ ರಡ್ಚ್ಯಾ
ಮೆಕ್ಸಿಕ್ ಸದಾಂ ಸುಖಿ ದವರುಂಕ್ ಅಪ್ಣೆಂ ಕೆಲ್ಲ್ಯಾ ’ಕಾಮಾಕ್’ ದೆವಾಕ್ ಅರ್ಗಾಂ ದಿಲಿಂ.
ಮೆಕ್ಸಿ ಸದಾಂನೀತ್ ಕೇಸ್ ಉಗಯ್ತಾಲೊ. ತೀನ್ ವೇಣ್ಯಾಚಿ
ಪಾಂತಿ ಯಾ ಚಾರ್ ವೇಣ್ಯಾಂಚಿ ಪಾಂತಿ ವೊಳ್ತಾಲೊ ತೊ. ವೀರಾಚೆ ಕೇಸ್ ಮ್ಹಳ್ಯಾರ್ ತಾಕಾ ಜೀವ್. ತೆಂ ತಾಚೆಂ ಒಬ್ಸೆಶನ್ ಯಾ
ಭಿರಾಂತ್ ಪಳೆವ್ನ್ ಸಭಾರ್ ಪಾವ್ಟಿಂ ವೀರಾನ್ ತಾಕಾ ಹಾಸೊನ್ಶೆಂ ಮ್ಹಳ್ಳೆಂ ಆಸಾ.
"ತುಂ ಮ್ಹಜೊ ಮೋಗ್ ಕರ್ತಾಯ್ಗಿ ಯಾ ಕೆಸಾಂಚೊ.
ಮ್ಹಾಕಾ ದಿಸ್ತಾ ಮ್ಹಜೆ ಕೇಸ್ ಪಾತಾಳ್ ಜಾಲ್ಲ್ಯಾ ದಿಸಾ ತುವೆಂ
ಮ್ಹಾಕಾ ಪಳಂವ್ಚೆಂ ಬಂಧ್ ಕರ್ತಾಯ್ ಮ್ಹಣ್ ದಿಸ್ತಾ"
"ಡೋಂಟ್ ಬಿ ಸಿಲ್ಲಿ" ವೀರಾನ್ ತವಳ್ ತವಳ್ ಉಲಂವ್ಚೆಂ ಉತಾರ್
ಮೆಕ್ಸಿನ್ ಉಲಯ್ಜೆ ಪಡ್ಲೆಂ. "ತುಕಾ ಹಾವೆಂ ಕಾಜಾರಾ ರಾತಿಂ
ಸಾಂಗ್ಲಾಂ ಹಾಂವ್ ತುಕಾ ಸದಾಂ ರಿಣ್ಕಾರಿ. ಹ್ಯಾ ಕೇಸ್ ನಾತ್ಲೆಲ್ಯಾ
ಮನ್ಶಾಲಾಗಿಂ ಕಾಜಾರ್ ಜಾವ್ನ್ ತುವೆಂ ಮ್ಹಾಕಾ ನವೊ
ಸಂತೊಸ್ ದಿಲಾಯ್. ತುಜಿ ಲಾಂಬ್ ಪಾಂತಿ ಹಾವೆಂ ಹಾತಿಂ ಖೆಳೊನ್
ಮ್ಹಾಕಾ ಮ್ಹಜ್ಯಾ ಲ್ಹಾನ್ಪಣಾವಿಶ್ಯಾಂತ್ ವಿಸ್ರೊಂಕ್ ಸಕ್ಲಾಂ.
ಹಾಂವ್ ತುಕಾ ರಿಣ್ಕಾರಿ. ತುಜಿ ಪಾಂತಿ ನಾತ್ಲೆಲಿ ತರ್..?
"ತರ್ ಹಾಂವ್ ನ್ಹಯ್ ಮ್ಹಜಿ ಪಾಂತಿ"
"ತಶೆಂ ಸಾಂಗಾನಾಕಾ ವೀರಾ" ಸಮ್ಜವ್ನ್ ಮ್ಹಳ್ಳ್ಯಾಬರಿ ಉಲಯ್ಲೊ
ಮೆಕ್ಸಿ. "ಮ್ಹಜೆಥಂಯ್ ಆಸ್ಲೆಲೆ ಊಣ್ ತುಜೆಥಾವ್ನ್ ಗೆಲೆಂ.
ಹಾಂವ್ ಖಡ್ಡೊ ತರೀ ತುಕಾ ದೆವಾನ್ ಲಾಂಬ್ ಕೇಸ್ ದಿಲ್ಯಾತ್. ತುಜ್ಯಾ
ಲಾಂಬ್ ಕೆಸಾರ್ ಹಾಂವ್ ಮ್ಹಜಿ ದೂಕ್ ವಿಸ್ರೊಂಕ್ ಸಕ್ಲಾಂ. ತುಂ ಆನಿ ತುಜಿ
ಪಾಂತಿ ಏಕ್ ಅವಿಭಾಜ್ಯ್ ಅಂಗ್ ಜಾವ್ನಾಸಾತ್. ತುಂ ನಾಂ ತರ್ ತುಜಿ
ಪಾಂತಿ ನಾ. ಪಾಂತಿ ನಾತ್ಲೆಲೆಂ ವೀರಾ ನ್ಹಯ್"
ವೀರಾಕ್ ಹಾಚೊ ಅರ್ಥ್ ಜಾಲೊನಾ. ತತ್ವ್ಜ್ನಾನ್ ತೆಂ ಶಿಕೊಂಕ್ನಾ ತರೀ,
ಮೆಕ್ಸಿಚೆಂ ಚಿಂತಪ್ ಆಪ್ಲ್ಯಾ ಪಾಂತ್ಯೆರ್ ಹೊಂದೊನ್ ಆಸಾ ಮ್ಹಳ್ಳೆಂ ಏಕ್ ಭ್ಯೆಂ, ಏಕ್ ಚಿಂತಾಪ್ ಖಂಯ್ ಥಾವ್ನ್ ತಾಚ್ಯಾ
ಮತಿಕ್ ಗೆಲೆಂ. ಮೆಕ್ಸಿಕ್ ವೀರಾಚೆರ್ ಮೋಗ್ಗಿ ಯಾ ವೀರಾಚ್ಯಾ
ಪಾಂತಿಯೆವರ್ವಿಂ ವೀರಾಚೊ ಮೋಗ್ಗಿ ಮ್ಹಳ್ಳೆಂ ಏಕ್ ಸವಾಲ್
ಭಿತರ್ಲ್ಯಾ ಭಿತರ್ ಧೊಸುಂಕ್ ಲಾಗ್ಲೆಂ.
ಆಯ್ಲೆವಾರ್ ವೀರಾಚಿ ಭಲಾಯ್ಕಿ ತಿತ್ಲಿ ಬರಿ ನಾತ್ಲಿ. ಕಾಕ್ಯೆಂತ್ ತಾಚ್ಯಾ ಗುಳೊ ಆಯಿಲ್ಲೊ.
ಮಹಿನ್ಯಾಚ್ಯಾ ರಗ್ತಾಸ್ರಾವಾಂತ್ ಬದ್ಲಾವಣ್ ಆಯಿಲ್ಲಿ. ಕುಡಿಂತ್ ಅಸ್ಕತ್ ತಶೆಂ ಚಟುವಟಿಕೆಂತ್
ನಿಸ್ತೇಜ್ ಜಾಲ್ಲ್ಯಾ ವೀರಾಕ್ ಪಳೆವ್ನ್ ದಾಕ್ತೆರಾಸರ್ಶಿಂ
ವೆಲೆಂ. ಸರ್ವ್ ಥರಾನ್ ತಾಚಿ ಪರೀಕ್ಶಾ ಕರ್ನ್, ಇತರ್ ತಪಾಸಣ್ ಕರ್ನ್ ಎಕಾ
ದಿಸಾ ದಾಕ್ತೆರಾನ್ ಮೆಕ್ಸಿಕ್ ಘುಟಾನ್ ಸಾಂಗ್ಲೆಂ: "ವೀರಾಕ್ ಕೆನ್ಸರ್-ಸ್ತನಾಚೆಂ"
ಸಗ್ಳೊ ಸಂಸಾರ್ ವಯ್ರ್ ಸಕಯ್ಲ್ ಜಾಲ್ಲ್ಯಾಬರಿ ಜಾಲೆಂ
ಮೆಕ್ಸಿಕ್. ಕಾಜಾರ್ ಜಾವ್ನ್ ಪಯಿಲ್ಲೆ ಪಾವ್ಟಿಂ ದುಕಿಚಿ ದೀಶ್ಟ್ ತಾಚ್ಯಾ ಆಂಗಾರ್ ಚರ್ಲಿ. ತಾಚ್ಯೆಖಾತಿರ್
ತಾಕಾ ಏಕ್ ಜೀವ್
ದೀಂವ್ಕ್ ಮುಕಾರ್ ಯೇವ್ನ್ ಕಾಜಾರ್ ಜಾವ್ನ್ ತಾಚ್ಯಾ ಸುಕ್ಲೆಲ್ಯಾ ಜೀವನಾಂತ್ ಭರ್ತಿ ಆನಿ
ಸೊಂತೊಸ್ ದೀಂವ್ಕ್ ಕಾರಾಣ್ ಜಾಲ್ಲ್ಯಾ ವೀರಾಕ್ "ಕೇನ್ಸರ್?" ತಾಕಾ ಚಿಂತುಂಕ್ ಜಾಲೆಂ
ನಾ. ತಾಣೆಂ ದಾಕ್ತೆರಾಕಡೆ ಪರಾತಿಲೆಂ. ವಿನಂತಿ ಕೆಲಿ. "ಪರ್ತುನ್
ಪರಿಕ್ಶಾ ಕರ್. ಚುಕೊನ್ ಕಾಂಯ್ ಫರಾಮಸೆನ್ ಸಾಂಗೊನ್
ಸೊಡ್ಲಾಂ ಆಸ್ತೆಲೆಂ" ಮ್ಹಳ್ಳೆಂ ಚಿಂತಾಪ್ ಮುಕಾರ್
ದಿಲ್ಯಾರೀ, ದಾಕ್ತೆರಾಕಡೆ ಬಾಯೊಪ್ಸಿ ಪರಿಕ್ಶಾ ಕೆಲ್ಲ್ಯಾಚೊ ರಿಪೋರ್ಟ್
ಮುಕಾರ್ ಮುಕಾರ್ ಸತ್ ಸಾಂಗ್ತಾಲೊ. ಕೊಡು ಸತ್
ಮಾಂದಿನಾಸ್ತಾಂ ಉಪಾವ್ ನಾತ್ಲೊ.
ಮೆಕ್ಸಿಚಿ ಏಕ್ದಂ ಬದ್ಲಾಲ್ಲಿ ಜಾಪ್ ತಶೆಂ ನಿಸ್ತೇಜ್ ಜೀವನ್ ಪಳೆವ್ನ್ ಕಸಲ್ಯಾಗೀ
ಮಾರೆಕಾರ್ ಪಿಡೆನ್ ’ಅಪ್ಣಾಕ್ ಗ್ರಾಸಿಲಾಂ’ ಮ್ಹಳ್ಳೆಂ ಚಿಂತಾಪ್ ಆರ್ವಿಲ್ಲ್ಯಾ
ದಿಸಾಂನಿ ಮೆಕ್ಸಿಚ್ಯಾ ಚಲನೆನ್ ವೀರಾನ್ ಪಾರ್ಕಿಲ್ಲೆಂ. ಪಾಂತ್ಯೆಚೊ
ಮೋಗ್ ಕರ್ಚೊ ತೊ ತಾಚಿ ದೀಶ್ಟ್ ಆನಿ ಉಲವ್ಣೆಂ ಅಪ್ಣಾಚ್ಯಾ ಭಲಾಯ್ಕೆಥಂಯ್
ವೆಚೆಂ ಪಳೆವ್ನ್ ’ಪಾಂತಿಯೆವಯ್ಲಿ ಕೇಂದ್ರೀಕೃತಾ ಅಪ್ಣಾಚೆರ್
ಪಡೊಂಕ್ ಕಸಲೆಂಯ್ ಕಾರಾಣ್ ಆಸಾ’ ತೆಂ ವೀರಾನ್ ಪಾರ್ಕಿಲೆಂ. ದಾಕ್ತೆರಾಕ್ ಮೆಳ್ಳೆಂ. ದಾಕ್ತೆರ್
’ತಸೆಂ ಕಾಂಯ್ ನಾ ತುಂ ಕಾಂಯ್ ಭಿಯೆನಾಕಾ. ತುಂ ಹುಶಾರ್ ಆಸಾಯ್’ ಮ್ಹಳ್ಳೆಂ ಆಶ್ವಾಸನ್
ಹಾಸೊನ್ ದಿಲ್ಯಾರೀ ತೆಂ ಪಾತ್ಯೆಲೆಂ ನಾ. ಕಡೇಕ್ ತಾಣೆಂ
ಮೆಕ್ಸಿಲಾಗಿಂ ವಿನಂತಿ ಕೆಲಿ.
ತೊ ಮ್ಹಣಾಲೊ, "ಡೋಂಟ್ ಬಿ ಸಿಲ್ಲಿ" ವೀರಾಚೆಂ ಸದಾಂಚೆಂ ಉತಾರ್
ಪಾಟಿಂ ಮಾರ್ಲ್ಯಾರೀ ವೀರಾ ಅಚಲ್ ರಾವ್ಲೆಂ. "ತುಂ ಹುಶಾರ್ ಆಸಾಯ್. ತುಕಾ ಕಾಂಯ್ ಜಾಂವ್ಕ್
ನಾ." ಅಸಲೆಂ ನಾಂ ನಾಂ ತೆಂ ಉತಾರ್ ವೀರಾಚೆರ್ ಉಪ್ಕಾರಾಕ್ ಪಡ್ಲೆಂನಾ. ಅಕ್ರೇಕ್ ತಾಣೆಂ
ಸತ್ ಸಾಂಗಾಜೆ ಪಡ್ಲೆಂ. ತೊ ಸಾಂಗೊನ್ ರಡ್ಲೊ. ಕಾಳಿಜ್ ಹಾಳು ಜಾತಾಸರ್ ರಡ್ಲೊ.
ಪಯಿಲ್ಲೆಪಾವ್ಟಿಂ ಮ್ಹಳ್ಳ್ಯಾಬರಿಂ ಪೊಟ್ಲುನ್ ಧರ್ಲೆಂ
ವೀರಾಕ್. ಖಂಯ್ ನಾತ್ಲೊಲೊ ಉದ್ವೇಗ್ ಪಾರ್ಕಿಲ್ಲೆಂ ವೀರಾನ್. ಉಪ್ರಾಂತ್ ತಿಂ ದಾಕ್ತೆರಾ
ಸರ್ಶಿಂ ಗೆಲಿಂ. ವಕಾತ್ ಕರ್ಚ್ಯಾ ವಿಶ್ಯಾಂತ್ ಉಲಯ್ಲಿಂ.
"ಕಾಂಯ್ ಭಿಯೆನಾಕಾ ವೀರಾ. ತುವೆಂ ಕಾಂಯ್ ಭಿಯೆಂವ್ಚಿ
ನಾಕಾ. ತುಕಾ ವಕಾತ್ ದಿತಾಂವ್. ಹಾಂತುಂ ಸುದ್ರಾಪ್ ಆಸ್ತೆಲೆಂ.."
ಕಿತ್ಲೊ ತೇಂಪ್ ದಾಕ್ತೆರ್, ಕಿತ್ಲಿಂ ವರ್ಸಾಂ? ವಕ್ತಾವರ್ವಿಂ ಕಸಲೊಯ್
ಸಾಯ್ಡ್ ಇಫೆಕ್ಟ್ ಆಸತ್ಗಿ? ದಯಕರ್ನ್ ಮ್ಹಾಕಾ ತಿಳ್ಸಿ"
ವೀರಾನ್ ದಾಕ್ತೆರಾಕ್ ಸವಾಲ್ ಕೆಲೆಂ.
"ತುಜಿ ಮುಕ್ಲಿ ಬಾಳ್ವಿ ದೆವಾಚ್ಯಾ ಹಾತಾಂತ್ ಆಸಾ. ತುವೆಂ
ವಕಾತ್ ಘೆವ್ನ್ ಆತಾಂಚ್ಯೆಬರಿ ಜೀವನ್ ಸಾರ್ಯೆತ್. ತುಕಾ ಕಿತ್ಲಿಂ
ವರ್ಸಾಂ ವರ್ಸಾಂ ವಾಂಚ್ಯೆತ್ ತೆಂ ಹಾಂವ್ ಸಾಂಗೊಂಕ್ ಸಕಾನಾ ಕಾಂಯ್ ತರೀ ಥೊಡಿಂ
ವರ್ಸಾಂ ದೆವಾನ್ ತುಕಾ ಜರೂರ್ ದೀಂವ್ಕ್ ಪಡ್ತೆಲೆಂ"
"ದೀಂವ್ಕ್ ಪಡ್ತೆಲೆಂ? ಕಸಲೆಂ ಸವಾಲ್?"
"ದೀಂವ್ಕ್ ಪಡ್ತೆಲೆಂ ಮ್ಹಳ್ಯಾರ್, ತುಜಿ ಸ್ವ-ಪಾತ್ಯೆಣಿ ಅಶಿಚ್ಚ್ ಆಸಾ ತರ್, ತುಕಾ ಜರೂರ್ ಕಾಂಯ್ ಉಪಾದ್ರ್ ಯೆಂವ್ಚೆನಾಂತ್. ಹರ್ಯೆಕಾ ವ್ಯಕ್ತಿಗಡೆ ’ಸೆಲ್ಫ್ ಕೊನ್ಪಿಡೆನ್ಸ್’ ನಾ ತರ್ ಪಿಡಾ ಗೂಣ್ ಜಾಯ್ನಾ" "ಸಾಯ್ಡ್ ಇಫೆಕ್ಟ್?" ಪರತ್ ವಿಚಾರ್ಲೆಂ ವೀರಾನ್. ಏಕ್ ಪಾವ್ಟಿಂ ಮೆಕ್ಸಿಕ್ ಪಳೆವ್ನ್ ದಾಕ್ತೆರ್ ಥಿಂಪಿ ಗಿಳುನ್ ಮ್ಹಣಾಲೊ "ತುಜೆ ಕೇಸ್ ಝಡ್ತೆಲೆ!"
"ಕೇಸ್ ಝಡ್ತೆಲೆ?"
ಎಕಾ ವ್ಹಡ್ ಆವಾಜಾನ್ ಬೋಬ್ ಘಾಲಿ ವೀರಾನ್. ತಾಚೆ ದೊಳೆ ವ್ಹಡ್ ಜಾಲೆ. ಮೆಕ್ಸಿಕ್ ಪಳಯ್ಲೆಂ ತಾಣೆಂ. ತಾಣೆಂ ದೀಶ್ಟ್ ಪಳೆಂವ್ಕ್ ಜಾಯ್ನಾಸ್ತಾಂ ಕುಶಿಕ್ ಪಳಯ್ಲೆಂ. ಅಪ್ಲಿ ದಾಟ್
ಲಾಂಬ್ ಪಾಂತಿ ಆಪ್ಲ್ಯಾ ಹರ್ಧ್ಯಾರ್ ಹಾಡ್ನ್ ಉಲಯ್ಲೆಂ ವೀರಾ "ಮೆಕ್ಸಿನ್ ಮ್ಹಜೊ ಮೋಗ್ ಕರ್ಚ್ಯಾಕೀ ಮ್ಹಜಾ ಲಾಂಬ್ ಪಾಂತಿಯೆಚೊ ಮೋಗ್ ಕೆಲೊ. ಸೋಶಿಯಲ್ ವರ್ಕ್ ಶಿಕ್ಲೆಲಿಂ ಹಾಂವ್ ರೊಬರ್ಟ್ ಅಂಕಲಾಚ್ಯಾ ಕಾಗ್ದಾಚ್ಯಾ ಪ್ರಭಾವಾನ್ ಹಾಚೆಲಾಗಿಂ ಕಾಜಾರ್ ಜಾಲಿಂ. ಕಾಜಾರ್ ಜಾವ್ನ್ ಮೆಕ್ಸಿನ್ ಮ್ಹಜಾ ಕುಡಿಚೊ ಮೋಗ್ ಕರಿನಾಸ್ತಾಂ ಫಕತ್ತ್ ಕೆಲಾ ಕೆಸಾಂಚೊ. ಕೆಸಾವಿಣೆಂ ಹಾಂವ್ ನ್ಹಯ್! ನೊ. ನೊ.. ಮ್ಹಾಕಾ ನಾಕಾ ವ್ಹಕಾತ್. ನಾಕಾ
ಮ್ಹಾಕಾ ಕೆಮಿಯೊಥೆರಫಿ ಬೋಬ್ ಘಾಲ್ನ್ ಉಲಯ್ಲೆಂ
ವೀರಾ. ತಾಚೆಂ ಮುಕಮಳ್ ಬದ್ಲಾಲೆಂ ಪಯಿಲ್ಲ್ಯಾ ಪಾವ್ಟಿಂ ಪಳೆವ್ನ್ ಮೆಕ್ಸಿ ಘಡ್ಬಡ್ಲೊ. ತಾಚೊ ಹಾತ್ ಹಾತಿಂ ಘೆವ್ನ್ ರಡ್ಚಿಂ ದುಕಾಂ ಆಡಾಂವ್ಕ್ ಸಕಾನಾಸ್ತಾಂ ಉಲಯ್ಲೊ ಮೆಕ್ಸಿ.
"ಹಾಂವ್ ಒಪ್ವತಾಂ ಹಾವೆಂ ತುಜ್ಯಾ ಕೆಸಾಂಚೊ ಮೋಗ್ ಕೆಲೊ. ತುಜ್ಯಾ ಕುಡಿಚ್ಯಾ ಮೊಗಾಚೊ ಮಹಾ ಪಾತ್ರ್ ತುಜ್ಯಾ ಕೆಸಾಂಕ್ ಘೆಲಾ. ತುಕಾ ಕಳಿತ್ ಆಸಾ ಕಸಲ್ಯಾ ಒಬ್ಸೆಶನಾಂತ್ ಹಾಂವ್ ಜಿಯೆವ್ನ್ ಆಸ್ಲ್ಲೊಂ. ’ಬೋರ್ ಮಂಡೆ ಸಾಹೇಬ್’ ಹೆಂ ನಾಂವ್ - ಹೆಂ ಆಡ್ ನಾಂವ್ ಆಯ್ಕೊನ್ ಮ್ಹಜೆ ಕಾನ್ ಕೆಪ್ಪೆ ಜಾಲ್ಲೆ. ಕೇಸ್ ನಾತ್ಲೆಲ್ಯಾ ಲೊಕಾಚೆಂ ಉಣೆಂಪಣ್ ಕೇಸ್ ಆಸ್ಲ್ಲ್ಯಾಂಕ್ ಕಳಿತ್ ನಾ. ಹಾವೆಂ ಆಶೆಲ್ಲೆಂ ಚೆಡುಂ ಜಾವ್ನ್ ಮ್ಹಜಿ ಹೊಕಾಲ್ ಜಾವ್ನ್ ಮ್ಹಜೆಸಂಗಿಂ ಎಕ್ವಟ್ಲೆಂಯ್. ತುಜೆ ಲಾಂಬ್ ಕೇಸ್ ಮ್ಹಜ್ಯಾ ಜಿವಿತಾಚೊ ಅರ್ಸೊ ಜಾಲೊ. ತುಜ್ಯಾ ಕೆಸಾಂಕ್ ಪೊಶೆವ್ನ್ ಮ್ಹಜ್ಯಾ ಮಾತ್ಯಾವಯ್ಲೆ ಕೇಸ್ ನಾತ್ಲೆಲೆ ವಿಸ್ರಲೊಂ ಹಾಂವ್. ತುಜಿ ಲಾಂಬ್ ಪಾಂತಿ ವೊಳುನ್ ಹಾವೆಂ ಮ್ಹಜಾ ಕೆಸಾಂಕಡೆ ಖೆಳ್ಲ್ಲೊ ಅನ್ಭೋಗ್ ಜೊಡ್ಲೊ. ತುಜ್ಯಾ ಪಾಂತಿಯೆವರ್ವಿಂ ಹಾಂವ್ ಮ್ಹಾಕಾ ಕಾಜಾರಿ ಜಿಣ್ಯೆಂತ್ಲ್ಯಾ ಉಭೆಚಿ ವಿಸರ್ ಪಡ್ಲಿ. ತುಜ್ಯಾ ಪಾಂತಿಯೆವರ್ವಿಂ ಹಾಂವ್ ಮ್ಹಾಕಾ ವಿಸ್ರಲೊಂ"
ಖರಸ್ ಆಯಿಲ್ಲಿ ತಾಕಾ. ತಾಚಿ ಖರಸ್ ಪಳೆವ್ನ್ ದಾಕ್ತೆರಾನ್ ಉದಾಕ್ ಹಾಡ್ನ್ ದಿಲೆಂ. ದಿಲ್ಲೆಂ ಉದಾಖ್ ಎಕಾ ಧಮ್ಮಾನ್ ಪಿಯೆಲೊ. ಏಕ್ ನೀಳ್ ಉಸ್ವಾಸ್ ಘೆತ್ಲೊ ಮೆಕ್ಸಿನ್. ಉಪ್ರಾಂತ್ ವೀರಾಚ್ಯಾ ಹರ್ಧ್ಯಾವಯ್ರ್ ಪಡ್ನ್ ಆಸ್ಲೆಲೆ ಕೇಸ್ ತಾಣೆ ಆರಾವ್ನ್ ಪಾಟಿರ್ ಸೊಡ್ಲೆ. ಉಪ್ರಾಂತ್ ದೊನೀ ಹಾತ್ ವೀರಾಚ್ಯಾ ಹಾತಾಂತ್ ಧರುನ್ ತಾಣೆ ಉಲವ್ಣೆಂ ಮುಕಾರ್ಸಿಲೆಂ. "ವೀರಾ ಹಾಂವ್ ಒಪ್ವತಾಂ. ತುಜ್ಯಾಕೀ ಹಾವೆಂ ತುಜ್ಯಾ ಕೆಸಾಂಚೊ ಮೋಗ್ ಕೆಲಾ. ಹಿ ಮ್ಹಜಿ ಅಸ್ಕತ್ಕಾಯ್ ತುವೆಂ ಮ್ಹಜ್ಯಾ ಅಸ್ಕತ್ಕಾಯೆವಯ್ರ್ ಕಸಲಿಯ್ ಬಂದಡ್ ಹಾಡ್ಲಿನಾಂಯ್. ತುಜ್ಯಾ ಕೆಸಾಂ ಮುಕಾರ್ ಇತ್ಲಿ ಸುಂದರ್ ಹೊಕಾಲ್ ದೆವಾನ್ ಫಾವೊ ಕೆಲ್ಯಾ ತೆಂ ಹಾಂವ್ ವಿಸ್ರಾಲೊಂ. ತುಜ್ಯಾ ಕುಡಿಚಿ ಹಾವೆಂ ಊಬ್ ಘೆಂವ್ಕ್ ನಾ. ಮ್ಹಜ್ಯಾ ಪಿಶ್ಯಾಪಣಾನ್ ಹಾವೆಂ ತುಕಾ ದಣ್ಸಿಲೆಂ. ತುಂ ’ಬರೊ
ಬರೆಂ’ ನ್ಹಯ್ ಆಸ್ಲ್ಲೆಂ ತರ್ ’ನೊನ್ ಕನ್ಸಮೇಶನ್ ಆಫ್ ಮ್ಯಾರೆಜ್’ ಹ್ಯಾ ಕಾರಾಣಾನ್ ಆಮ್ಚೆಂ ಕಾಜಾರ್ ನಲ್ಲ್ ಕರ್ಯೆತೆಂ ತುಕಾ. ಹಾಂವ್ ಕಸಲೊಂ ಪಿಸೊ. ಕೆಸಾಂಚ್ಯಾಕೀ ಭಾಯ್ರ್ ಸಂಸಾರ್ ಆಸಾ ಹಾವೆಂ ಹೆಂ ಚಿಂತುಂಕ್ನಾ"
ಏಕ್ ಘಡಿ ರಾವ್ಲೊ ತೊ. ಉಪ್ರಾಂತ್ ತೊ ಉಲಯ್ಲೊ "ವೀರಾ ತುವೆಂ ಕೆಮಿಯೋಥೆರಫಿ ಕರುಂಕ್ ಜಾಯ್. ತುವೆಂ
ತುಜ್ಯಾ ಮೊಗಾನ್ ’ತುಜೆಂಪಣ್’ ವಿಸ್ರೊನ್ ಮ್ಹಾಕಾ ಅರ್ಪಿಲ್ಲ್ಯಾಬರಿ ಹಾಂವ್ ಆಜ್ ಥಾವ್ನ್ ಹ್ಯಾ ಘಡಿಯೆಥಾವ್ನ್ ತುಜೊ ಮೋಗ್ ಕರ್ತಲೊಂ. ಯೆದೊಳ್ ಪರ್ಯಾಂತ್ ಹಾವೆಂ ತುಕಾ ಕಶ್ಟಿಲೆಂ. ತುವೆಂ ಸ್ವಮನಾನ್ ಮ್ಹಜಿ ಖುಶಿ ತುಜೆರ್ ಚಲಯ್ಲಿ. ತುಜೆಂ ಚಿಂತಾಪ್, ಭೊಗ್ಣಾಂ, ಉದ್ವೇಗ್ ಆನಿ ಸ್ವಪಾಣ್ ಹಾವೆಂ ಸರ್ವ್ ಕರ್ಗಿಲೆಂ.
ತುಂ ವಕಾತ್ ಕರ್. ಹಾಂವ್ ಕಳಿತ್ ಕರ್ನ್ ದಾಕಯ್ತಲೊಂ ಮೋಗ್ ಮ್ಹಳ್ಯಾರ್ ಕಿತೆಂ? ದಯಕರ್ನ್ ಪ್ಲೀಜ್ ವೀರಾ.." ತಾಣೆಂ ತಾಚೆ ದೊನೀ ಹಾತ್ ಧರುನ್ ಧಾಂಬ್ಲೆ.
ದಾಕ್ತೆರ್ ಹೊ ನಾಟಕ್ ಪಳೆವ್ನ್ ಥಂಡ್ಗಾರ್ ಜಾಲ್ಲೊ. ತಾಕಾ ಹೆಂ ಸರ್ವ್ ಅಜಾಪ್ಶೆಂ ಜಾಲ್ಲೆಂ. ಮೆಕ್ಸಿಖಾತಿರ್ ಕಸಲೊ ಸಾಕ್ರಿಫಿಸ್ ಹ್ಯಾ ವೀರಾನ್ ಕೆಲಾ, ಹೆಂ ಚಿಂತುಂಕ್ ತಾಕಾ ಜಾಲೆಂನಾ. ತಿತ್ಲ್ಯಾರ್ ತಾಚಿ ಮತ್ ವೀರಾಚ್ಯಾ ಸವಾಲಾನ್ ಜಾಗಿ ಜಾಲಿ.
"ಮ್ಹಜೆ ಕೇಸ್, ಮ್ಹಜಿ ಪಾಂತಿ"
"ತುಂ ಕಾಂಯ್ ಖಂತ್ ಕರಿನಾಕಾ ವೀರಾ, ಯೆದೊಳ್ ಪರ್ಯಾಂತ್ ಹಾವೆಂ ತುಜೆ ಕೇಸ್ ಪೊಶೆಲೆ. ಉಗಯ್ಲೆ, ಪಾಂತಿ
ಘಾಲಿ, ತೀನ್ ಯಾ ಚಾರ್ ವೇಣ್ಯೊ ಕರ್ನ್ ಪಾಂತಿ ಘಾಲಿ. ತುಜ್ಯಾ ಕೆಸಾಂಖಾತಿರ್ ಹಾವೆಂ ಸರ್ವ್ ಕೆಲೆಂ. ತುವೆಂ ಮ್ಹಜ್ಯಾ ಕೆಸಾಂವರ್ವಿಂ ಮ್ಹಜ್ಯಾ ತಸಲ್ಯಾ ಖಡ್ಡ್ಯಾಕಡೆ ಕಾಜಾರ್ ಜಾವ್ನ್ ಮ್ಹಜಿ ಆಶಾ ಕಳಿತ್ ಜಾವ್ನ್ ಮ್ಹಾಕಾ ಸಂತೊಸ್ ದಿಲೊಯ್. ತಸಲ್ಯಾ ಕೆಸಾಂಕ್
ಹಾಂವ್ ವಿಚರ್ಚೊನಾಂ ಕೆಮಿಯೊಥೆರಫಿ ಕರ್ನ್ ಹೊಗ್ಡಾಂವ್ಚ್ಯಾ
ತುಜಾ ಕೆಸಾಂಕ್ ಹಾಂವ್ ಸಾಂಭಾಳ್ನ್ ದವರ್ತೊಲೊಂ. ತುಜ್ಯಾ ಕೆಸಾಂನಿ ಮ್ಹಾಕಾ ಜೀವನ್ ದಿಲಾಂ. ತುಜ್ಯಾ
ಕೆಸಾಂ ನಿಮ್ತಿಂ ಹಾಂವ್ ಪರತ್ ನವೆಂ ಜಿವಿತ್ ಸಾರ್ತೊಲೊಂ. ಎಕಾದಾವೆಳಾ ತುಂ ದೆವಾಕ್ ಲಾಗಿಂ ಜಾಲ್ಯಾರ್, ತುಜೆ ಕೇಸ್ ಮ್ಹಾಕಾ ತುಜ್ಯಾ ನಂತರ್ ಸಾಂಗಾತ್ ದಿತೆಲೆ. ಹೆಂ ಸತ್ ವೀರಾ. ತುಂ ಮ್ಹಾಕಾ ಪಾತ್ಯೆ. ತೆದೊಳ್ ಪರ್ಯಾಂತ್ ಹಾಂವ್ ತುಜೊ ಮೋಗ್ ಕರ್ತಲೊ"
ಮೆಕ್ಸಿನ್ ಪಯಿಲ್ಲ್ಯಾ ಪಾವ್ಟಿಂ ಮೊಗಾನ್ ವೇಂಗ್ ಮಾರ್ಲಿ. ತಾಚೆ ಹಾತ್ ವೀರಾಚ್ಯಾ ಪಾಟಿರ್ ಚರ್ಲೆ. ಹಾತ್ ಪಾಟಿಂ ಹಾಡುನ್ ದೊನೀ ಹಾತಾಂನಿ ವೀರಾಚ್ಯಾ ಗಾಲಾಂಕ್ ಧರ್ಲೆಂ ತಾಣೆಂ. ಮೆಕ್ಸಿಚ್ಯಾ ಉಭೆಚೊ ಶ್ವಾಸ್ ವೀರಾಕ್ ಲಾಗ್ಲೊ.
ವೀರಾನ್ ಮೆಕ್ಸಿಚ್ಯಾ ದೊಳ್ಯಾಂತ್ಲಿಂ ದುಕಾಂ ಆಪ್ಲ್ಯಾ ವೊಂಟಾಂನಿ ಪುಸ್ಲಿಂ.
About us | Feedback | Contact us
Copyright © 2005
DAAIZ.COM All rights reserved.
Page concept, designed and maintained by Ashawadi
Publications
