ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಕಥಾಝರ್ - 15. ನಶಿಬಾಚಿ ರಾತ್
ಕೊಂಕ್ಣಿ ಸಾಹಿತ್ಯಾಂತ್ ಎಚ್ಚೆಮ್ ಏಕ್ ಕವಿ ಮ್ಹಳ್ಳ್ಯಾ ನದ್ರೆಂತ್ ಫಾಮಾದ್ ತರ್ಯೀ ತೊ ಏಕ್ ಅಪುರ್ಭಾಯೆಚೊ ಕಾಣ್ಯೆಗಾರ್ ಸಯ್ತ್. ಹ್ಯಾ ಆಧಿಂಯೀ ಹಾಣೆಂ ಕಾಣ್ಯೊ ಬರಂವ್ಚಾಂತ್ ಜಾಯ್ತಿಂ ಇನಾಮಾಂ ಆಪ್ಣಾಯ್ಲ್ಯಾಂತ್. ’ದೆವಾಕ್ ಸೊಡ್ಲಲೊ ಪಾಡೊ’. ತಾಚಾ ವಿಂಚ್ಣಾರ್ ಕಾಣ್ಯಾಂಚೊ ಬೂಕ್ ’ದೆವಾಕ್ ಸೊಡ್ಲಲೊ ಪಾಡೊ’ ಎದೊಳ್ಚ್ ಪರ್ಗಟ್ಲಾ. ಸಮಾಜೆಚಾ ಪ್ರಸ್ತುತ್ ವಿಶ್ಯಾಂಕ್ ಆಪ್ಲ್ಯಾ ಕಾಣ್ಯೆಂತ್ ಗುಂತುನ್ ಗೂಂಡ್ ಚಿಂತಾಪ್ ಉಟಂವ್ಚಿ ಶ್ಯಾಥಿ ಆಸ್ಚೊ ಎಚ್ಚೆಮ್ ಏಕ್ ಕವಿ, ಏಕ್ ಕಾಣ್ಯೆಗಾರ್ ತಶೆಂಚ್ ಏಕ್ ಚಿಂತ್ಪಿ ಸಯ್ತ್.
[ದಾಯ್ಜ್ ಸಾಹಿತಿಕ್ ಸ್ಪರ್ಧೊ - 2005 ಹಾಂತುಂ ಪಯ್ಲೆಂ ಇನಾಮ್ (5,000 ರುಪಯ್) ಅಪ್ಣಾಯಿಲ್ಲಿ ಕಾಣಿ]
ಎಚ್ಚೆಮ್, ಪೆರ್ನಾಲ್
’ಆಮಾಸೆ ರಾತಿಂ ಜಿಣಿಯೆಫೊರಾರ್
ಸಾಣಾಸ್ ದಿಸ್ಲಿ
ಜಿಣಿಯೆಪಾನಾಂ ಪಿಂಜುನ್ ಗೆಲ್ಲಿಂ’
- ಆಂಡ್ರು ಎಲ್. ಡಿ’ಕುನ್ಹಾ
ಗಂಗೂಚಾ ಸರ್ಕಾರಿ ಸೊರ್ಯಾಚಾ ದುಕಾನಾಚಾ ತಾಂಬ್ಡ್ಯಾ ಬೊರ್ಡಾವಯ್ಲೊ ಶೆಂಬೊರ್ ವೊಲ್ಟಾಂಚೊ ವಿಫ್ರೊ ಬಲ್ಬ್ ಪುಕ್ಕ್ ಕರ್ನ್ ಪಾಲ್ವಾತಾನಾ ಬೊಸ್ಕಾಂಬ್ಯಾಚಾ ಪೆಂಟೆಂತ್ ರಾತ್ ದೆಂವ್ತಾ. ತಾಚೆ ಪಾಟೋಪಾಟ್ ಟಯರಾಚಿ ಆಂಗಡ್, ಖೊಲೆಪಿಟ್ಯಾಂಚಿಂ, ಕೊಂಕ್ಣ್ಯಾಚಿ ಆನಿ ದಾಕ್ತೆರಾಚಿ ಡಿಸ್ಪೆನ್ಸರಿ ಸಯ್ತ್ ಶಟರ್ ವೋಡ್ನ್ ಘೆತಾತ್. ಉರ್ಲೆಂ ಮ್ಹಳ್ಯಾರ್ ಸುಬ್ರಾಯ ಶೆಟ್ಟಿಚೆಂ ಖಾಸ್ಗಿ ಕಂಪ್ಣೆಚೊ ಸೊರೊ ವಿಖ್ಚೆಂ ’ಮದಿರಾ’ ಬಾರ್ ಆನಿ ರೆಸ್ಟೋರೆಂಟ್ ಮಾತ್. ಆನಿ ತಾಚೆ ಆಸ್ಪಾಸ್ ಆಮ್ಲೆಟ್ಪಾವ್ ಅಚ್ರ್ಮುರಿ ವಿಕ್ಚೊ ಪೆಟ್ರೋಮ್ಯಾಕ್ಸ್ ಉಜ್ವಾಡಾಂತ್ಲ್ಯೊ ಹಾತ್ಗಾಡಿಯೊ. ಪೆಂಟೆಂತ್ಲ್ಯಾ ರಸ್ತ್ಯಾಚೆಂ ಪಂಚಾಯ್ತಾಚೆಂ ವಿಜೆಚೆ ದಿವೆ ಕೆನ್ನಾ ಝಳ್ಟಾತ್ ಕೆನ್ನಾ ಝಳಾನಾಂತ್ ದೆಕುನ್ ಗಂಗೂ ಸದಾಂ ಸಾಂಗಾತಾ ಏಕ್ ಚಾರ್ಜರ್ ಲಾಯ್ಟ್ ದವರ್ತಾ. ತೋಯೀ ಕೊಣ್ ಬಾವ್ಡೊ ಪಿಯೆಂವ್ಕ್ ಪಯ್ಶೆ ನಾಂತ್ ಮ್ಹಣ್ ಗಡಂಗಾಂತ್ ಆಡೊವ್ ದವರ್ನ್ ಗೆಲ್ಲೊ ಆಜ್ಪರ್ಯಾಂತ್ ಸೊಡಂವ್ಕ್ ಯೇಂವ್ಕ್ ನಾ. ತೆಂ ತಾಚಾಯೀ ಉಡಾಸಾಂತ್ ಆತಾಂ ಸಾರ್ಕೆಂ ನಾ.
ಗಡಂಗಾ ಥಾವ್ನ್ ಗಂಗೂಚಾ ತೊಟಾಚಾ ಘರಾಕ್ ಪಾಂಯಾವಾಟೆನ್ ಅರ್ಧ್ಯಾ ವೊರಾಚಿ ವಾಟ್. ರಿಕ್ಷಾ ವಾ ಕಾರಾರ್ ವೆಚೆಪರಿಂ ನಾ. ಗಾದೆಮೆರೊ ಉತ್ರೊನ್, ಸಾಯ್ಕಲಾರ್ ಜಾಲ್ಯಾರ್ ಧಾ ಮಿನುಟಾಂನಿಂ ಪಾವ್ಯೆತ್. ಸರ್ಕಾರಿ ಸೊರ್ಯಾಚೊ ಹೊ ವ್ಯಾರ್ ಗಂಗೂಚಾ ಬಾಪಾಯ್ಚೊ. ತಾಣೆಂ ಹ್ಯಾಚ್ ವ್ಯಾರಾಂತ್ ಗಾದೆ ತೋಟ್ ಕೆಲ್ಲೆಂ. ದೊಗಾಂ ಚೆಡ್ವಾಂಕ್ ಬರೆಕಡೆ ಅನ್ಕೂಲ್ವಂತಾಂಕ್ ದೀವ್ನ್ ಕಾಜಾರ್ ಕೆಲ್ಲೆಂ. ಘರಾ ಜೋತ್ ಭಾಂದ್ಲ್ಲೆಂ. ಏಕ್ ಮ್ಹಾರಾಂಚೆಂ ವೊಕಾಲ್ ಘಾಲ್ನ್ ಸಾಗೊಳೆಚಾ ಕಾಮಾಕ್ ನಮ್ಯಾರ್ಲ್ಲೆಂ. ಪುಣ್ ದಳ್ದಿರ್ ಸೊರೊಪ್ ಆಸಲ್ಯಾಚ್ ಆಮಾಸೆರಾತಿಂ ಎಕಾ ಸೊರ್ಯಾಚೆಂ ದುಕಾನ್ ಬಂದ್ ಕರ್ನ್ ಗಾದ್ಯಾಮೆರೆಂತ್ಲ್ಯಾನ್ ಘರಾ ಯೆತಾನಾ ಪಾರೊತ್ ಕರುನ್ ಬಸ್ಲ್ಲೆಪರಿಂ ಬಸೊನ್ ದಾವ್ಯಾ ಪಾಂಯಾಕ್ ಚಾಬೊನ್ ವಿಕಾಚೊ ಫಾತೊರ್ ಘಾಯಾಕ್ ಲಾಂವ್ಚೆ ಆಧಿಂಚ್ಚ್ ತಾಚೊ ಪಿರಾಣ್ ಉಭ್ಲೊ. ಬಾಪಾಯ್ನ್ ದೊಳೆ ಧಾಂಪ್ತಾನಾ ಗಂಗೂ ಧಾವೆಚಾ ಬೊರ್ಡಾಚಾ ಪರೀಕ್ಶೆಕ್ ಬಸ್ಲಾ ಮಾತ್ರ್. ಕಿತೆಂ ಕರ್ಚೆಂ? ಎಕ್ಲೊಚ್ ಪೂತ್. ಮಾತ್ಯಾರ್ ದುಸ್ರೊ ಹಾತ್ ನಾ. ಕುಟ್ಮಾ ಜವಾಬ್ಧಾರಿ ಸಾಂಬಾಳಿಜೆ ಪಡ್ಲಿ.
’ಏ.. ಗಂಗೂ...’ ಅಸಲೊ ಮಾದಕ್ ತಾಳೊ ಬೊಸ್ಕಾಂಬ್ಯಾಚಾ ಪೆಂಟೆಂತ್ ಆಸ್ಚೊ ರೀತುಬಾಯೆಕ್ ಮಾತ್. ಭೋವ್ಶಾ ಕೊಡಿಯಾಳ್ ಗೆಲ್ಲಿ ಆಸ್ತೆಲಿ ವೇಳ್ ಜಾಲೊ. ಆಮಾಸೆಚಿ ಕಾಳೊಕಿ ರಾಟ್ ವೆಗ್ಳಿ ಮಾಟ್. ಆತಾಂ ಹಿಕಾ ಘರಾ ಪರ್ಯಾಂತ್ ಪಾವಯ್ಜಾಯ್ ಪಡ್ತಾಲೆಂ. ತಾಲೂಕ್ ಪಂಚಾಯ್ತಚೊ ಸಾಂದೊ ರೀತೂಬಾಯೆಕ್ ಪಳಯಿಲ್ಲೆಂ ಇತ್ಲೆ ಪಾವ್ಟಿಂ ಗಂಗೂಕ್ ತರೀ ಕವಿ ಲಂಕೇಶಾಚಿ ಕವಿತಾ ’ಆವಯ್’ ಜಬರ್ದಸ್ತೆನ್ ಉಡಾಸಾಕ್ ಯೆತಾ. ತಾಕಾ ತಿ ನೊವೆ ಕ್ಲಾಶಿಂತ್ ಹರಿದಾಸ್ ಮಾಸ್ಟ್ರಾನ್ ಅಶಿ ಶಿಕಯಿಲ್ಲಿಗೀ, ತಿ ತಾಚಾ ಕುಡಿಚಾ ಶಿರಾಶಿರಾಂನಿ ಕಿರ್ಲೊನ್ ಪಾಲೆವ್ನ್ ಗೆಲ್ಲಿ. ಭಾಪಯ್ಚ್ಯಾ ನಿರ್ಜೀವ್ ಕುಡಿಕ್ ಉಜೊ ಲಾವ್ನ್ ಘರಾ ಪಾಟಿಂ ಆಯಿಲ್ಲೊಚ್ಚ್, ಆವಯ್ಕ್ ಪೊಟ್ಲುನ್ ಧರ್ನ್ ರಡ್ತಾನಾಂಯೀ ತಾಕಾ ಹಿ ಕವಿತಾ ಯಾದ್ ಆಯಿಲ್ಲಿ.
ಚಡುಣೆಂ ಸರ್ಕಾರಿ ಸೊರ್ಯಾಚಾ ಗಡಂಗಾಂತ್ ವ್ಯಾರ್ ಕರುಂಕ್ ಧರ್ತಾನಾ ತಾಕಾ ಹೊ ಲಂಕೇಶ್ ಮ್ಹಳ್ಳೊ ಕವಿಬೆಂಗ್ಳುರ್ ಥಾವ್ನ್ ಏಕ್ ಪೇಪರ್ಯೀ ಛಾಫುನ್ ಕಾಡ್ಟಾ ಮ್ಹಳ್ಳೆಂ ಕಳ್ಳೆಂ. ತೇ ದೀಸ್ ಥಾವ್ನ್ ಲಂಕೇಶ್ ಸರ್ತಾ ಪರ್ಯಾಂತ್ ತೊ ತೆಂ ಖಳನಾಸ್ತಾನಾ ಹರ್ ಹಾಫ್ತೊ ರಾಖೊನ್ ಮ್ಹಳ್ಳೆಪರಿಂ ರಾವೊನ್ ವಾಚುನ್ ಆಯ್ಲಾ. ಲಂಕೇಶ್ ಮೆಲ್ಯಾರೀ ತಾಚೊ ’ವಿಚರ್ಚೇ ಆದಿಂ’ ಕೊಲಮ್ ಹಾಫ್ತ್ಯಾನ್ ಹಾಫ್ತೊ ತಾಚಾ ಭುರ್ಗ್ಯಾಂಚಾ ಪೇಪರಾಂನಿ ವಾಚ್ತಾ. ಲಂಕೇಶಾಚ್ಯಾ ಕವಿತೆಂತ್ಲ್ಯಾ ಆವಯ್ಕ್ ಆನಿ ರೀತೂಬಾಯೆಕ್ ಆಮಾಸ್ ಪುನ್ವೆಚೊ ಫರಕ್ ಆಸಾ. ಕವಿತೆಂತ್ಲ್ಯಾ ಆವಯ್ಕ್ ಆನಿ ರೀತೂಬಾಯೆಕ್ ಆಮಾಸ್ ಪುನ್ವೆಚೊ ಫರಕ್ ಆಸಾ. ಕವಿತೆಂತ್ಲ್ಯಾ ಆವಯ್ಕ್ ಚಿಂತೂನ್ ಆಪ್ಲಿ ಆವಯ್ ಯಾದ್ ಯೇವ್ನ್ ಗಂಗೂ ರಡ್ಲಾ ತರ್ ಹರಿದಾಸ್ ಮಾಸ್ಟ್ರಾಚಾ ವರ್ಗಾಂತ್, ರೀತೂಬಾಯೆಕ್ ಪಳಯ್ತಾನಾ ತಿಚಾ ಭುರ್ಗ್ಯಾಂಚೇರ್ ಚಿಂತೂನ್ ದೂಕ್ ಯೆತಾ. ಏಕ್ ಕವಿತಾ ಅಪ್ಲೇಸ್ತಕಿಂ ಹಜಾರ್ ವೈರುಧ್ಯಾಂ ಮಧೇಂಯೀಎಕೀನ್ ಕಸೆಂ ಜಾವ್ಯೆತಾ - ಹೆಂ ಗಂಗೂಕ್ ಪಾತ್ಯೆಶೆಂ ಕೆಲ್ಲೆಂ ಹರಿದಾಸ್ ಮಾಸ್ಟ್ರಾನ್.
ಅಜೀಕ್ ದೋನ್ ವರ್ಸಾಂ ಆದಿಂ ಹಳ್ದುವೊ ರೋಗ್ ಮಿರ್ವೊನ್ ಸರ್ಲ್ಲೊ ಹರಿದಾಸ್ ಮಾಸ್ಟೆರ್ ಕಾಜಾರ್ ಜಾಯ್ನಾಸ್ತಾನಾ ಆಮ್ಕ್ವಾರ್ಚ್ ಕಿತ್ಯಾಕ್ ಉರ್ಲೊ ತಾಚಿ ಅಂದಾಜ್ ಕಾಡುಂಕ್ ಗಂಗೂಕ್ ಸಯ್ತ್ ಜಾಂವ್ಕ್ ನಾ. ಕೊಣ್ ಭುರ್ಗಿಂ ಮ್ಹಣ್ತಾಲಿಂ ತಾಚೊ ಬಾಪುಯ್ ಕೊಣ್ ಕಳಿತ್ ನಾ, ಆವಯ್ ಪಿಡೇಸ್ತ್ ಮತಿಚಿ ಇತ್ಯಾದಿ. ಕನ್ನಡಾಚೊ ಮೇಸ್ತ್ರಿ ತರ್ಯೀ ತೋ ಶೆಲ್ಲಿ, ಕೀಟ್ಸ್ ತಸಲ್ಯಾ ಕವಿಂಚಿಂ, ಖುದ್ದ್ ತಾಣೆಂಚ್ ಕನ್ನಡಾಕ್ ತರ್ಜಿಲ್ಲಿಂ ಖಾಸ್ಗಿ ಸಂಗ್ರಹಾಂತ್ಲೊ ಬಿ.ಎಮ್.ಶ್ರೀಚೊ ’ಇಂಗ್ಲಿಶ್ ಗೀತೆಗಳು’ ಬೂಕ್ ವಾಚುಂಕ್ ದಿಲ್ಲೊ. ತಾಂತ್ಲೆಂ ಕಾಂಯ್ ಕವಿತಾ ಗಂಗೂಕ್ ಸಮ್ಜಾಲೆಂ ಕಾಂಯ್ ನಾಂತ್. ಪುಣ್ ತೊ ಬೂಕ್ ಅಜೂನ್ ತಾಚೆ ತಾಬೆನ್ ಆಸಾ. ಪ್ರಿತುಮೆಚಿ ಸೊಭಾಯ್ ವರ್ಣುಂಚೊ ಕವಿ ಪಿ.ಬಿ.ಶೆಲ್ಲಿ ಕೆನ್ನಾಂ ಮನ್ಶಾಜಿಣೆಂ ನೆಗಾರ್ತಾ ಮ್ಹಣ್ ಭೊಗ್ಲ್ಯಾರ್ ಕೆನ್ನಾಂ ತಾಚೆ ವ್ಹಡ್ ದಾರ್ಶನಿಕ್ ಕವಿ ದುಸ್ರೊ ನಾ ಅಶೆಂ ಗಂಗೂಕ್ ಭೊಗ್ತಾ.
ಗಂಗೂನ್ ಮಾತ್ ನ್ಹಯ್, ಬೋರ್ಡ್ ಇಸ್ಕೊಲಾಚಾ ಖಂಯ್ಚ್ಯಾ ಭುರ್ಗ್ಯಾನ್ಯೀ ಹರಿದಾಸ್ ಮಾಸ್ಟ್ರಾನ್ ದೆವಾ ವಿಶ್ಯಾಂತ್ ವರ್ಗಾಂತ್ ಉಲಯಿಲ್ಲೆಂ ಆಯ್ಕೊಂಕ್ ನಾ. ಬಾಮುಣಾಂಚೊ ತರೀ ಆಸ್ಪಾಸ್ಚ್ಯಾ ಗಾಂವಾಂನಿ ಖಂಯ್ ಭುತಾಚೊ ಕೋಲ ವ ಕೊಂಬ್ಯಾಕಾಟ್ ಆಸ್ಲ್ಯಾರ್ ಚುಕಯ್ನಾಸ್ತಾನಾ ವೆತಾಲೊ. ದುಸ್ರ್ಯಾ ದಿಸಾ ವರ್ಗಾಂತ್ ಮನ್ಶಾನ್ ಧಮ್ಕವ್ಣೆ ವಿರೋಧ್ ಆವಾಜ್ ಉಟಂವ್ಕ್ ಕಿತ್ಲೆಶೆ ವಾಟೊ ಸ್ವಾಭಾವಿಕ್ಪಣಿಂ ಸೊಧುನ್ ಕಡ್ಲ್ಯಾಟ್ ತೆಂ ಮಾರ್ಮಿಕಾಯೆನ್ ವಿವರಿತಾಲೊ. ಇಸ್ಕೊಲಾಚೊ ಬಾವ್ಟೊ ಆರ್ಧ್ಯಾಕ್ ದೆಂವವ್ನ್ ಶೋಕ್ಸಭಾ ಆಪಯಿಲ್ಲಿ ಮೊರ್ನಾ ದಿಸಾ ತಾಚಾ ಪಿಡೇಸ್ತ್ ಆವಯ್ಕ್ ಪಳೆವ್ನ್ ಗಂಗೂಕ್ ಮಾತ್ ತಾಣೆಂಚ್ ವರ್ಗಾಂತ್ ಶಿಕಯಿಲ್ಲ್ಯಿ ಲಂಕೇಶಾಚಿ ಕವಿತಾ ’ಆವಯ್’ ಯಾದ್ ಜಾವ್ನ್ ದೊಳೆ ಬಿಜ್ಲೆ.
ಆಜ್ ಪಂಚಾತ್ಕಿ, ಆಜ್ ವೋಟ್, ಆಜ್ ಚಳ್ವಳ್ ಮ್ಹಣ್ ಸಗ್ಳೊ ದೀಸ್ ಪೆಂಟೆಂತ್ ಭಂವ್ಚ್ಯಾ ರೀತೂಬಾಯೆಚೊ ದಾದ್ಲೊ ಗಲ್ಫಾಂತ್ ತೆಲಾ ಕಂಪ್ಣೆಂತ್ ಘೊಳ್ಟಾ. ತಾಕಾ ತರ್ಯೀ ಬಾಲೆ ಭುರ್ಗ್ಯಾಂಖಾತಿರ್ ಪುರ್ಸತ್ ಮೆಳ್ಚಿ ದೋನ್ ವರ್ಸಾಂಕ್ ಏಕ್ ಪಾವ್ಟಿಂ, ತೇಂಯೀ ಮಯ್ನೊ ದೇಡ್ ಮಯ್ನೊ. ಧಾವೆಚಾ ಬೊರ್ಡಾಚಾ ಪರಿಕ್ಶೆಂತ್ ನಾಪಾಸ್ ಜಾವ್ನ್ ಗಳ್ಯಾಂತ್ ಭಾಂಗಾರಾಚಿ ಸರ್ಪಳಿ ಘಾಲ್ನ್ ಭಂವ್ಚೊ ಚೆರ್ಕೊ ಏಖ್ ಪಾವ್ಟಿಂ ಗಂಧಾ ರುಕಾಸಾಂಗಾತಾ ಸಾಂಪ್ಡೊನ್ ಖಬ್ರೆಪತ್ರಾಂನಿ ಫೊಟೊ ಜಾತಾ ತರ್, ಚೆಡುಂ ಬಿಎಸ್ಸಿ ನರ್ಸಿಂಗ್ ಕರ್ತಾಂ ಮ್ಹಣ್ ಬೆಂಗ್ಳುರ್ ಗೆಲ್ಲೆಂ ಮಲ್ಬಾರಿ ಚೆರ್ಕ್ಯಾಸಾಂಗಾತಾ ರಾವ್ತಾ. ರೀತೂಬಾಯ್ ಮಾತ್ ರೂಂದ್ ದೆಗೆಚೆಂ ತಾಂಬ್ಡೆಂ ಕಾಪಾಡ್ ನೆಸೊನ್ ಮಾತೆಂಭರ್ ಜಾಯ್ ಮೊಗ್ರಿಂ ಫುಲಾಂ ಮಾಳುನ್ ಏಕ್ ಪಾವ್ಟಿಂ ಪೆಂಟೆಕ್ ಪಾವ್ಲಿ ತರ್, ಮಾಗಿರ್ ’ಮದಿರಾ’ ಬಾರಾಚಾ ಸುಬ್ರಾಯ ಶೆಟ್ಟಿಚಾ ಕಾರಾಥಾವ್ನ್ ಸಕಯ್ಲ್ ಪಾಂಯ್ ದವರಿನಾ. ಮದಿರಾ ಬಾರಾಚೊ ಸುಬ್ರಾಯ ಶೆಟ್ಟಿ ಬ್ಲೋಕ್ ಕೊಂಗ್ರೆಸಾಚೊ ಅಧ್ಯಕ್ಶ್ ಆನಿ ರೀತೂಬಾಯ್ ತಾಲೂಕ್ ಪಂಚಾಯ್ತೆಚಿ ಮೆಂಬರ್. ಪುಣ್ ಗಂಗೂಚಾ ಘರಾ ಕಶೆಂ ತಶೆಂ ರೀತೂಬಾಯೆಚಾ ಘರಾಯೀ ಸುಬ್ರಾಯ ಶೆಟ್ಟಿಚೆಂ ಮಾರುತಿ ಝೆನ್ ಕಾರ್ ವಚೊಂಕ್ ಆಯ್ಕಾನಾ. ವಾಟೆರ್ ಕಿತ್ಲೆ ಗಾದೆ ಮೆರೊ, ತೆಂಯೀ ಗುಜರಿಚೊ ಮಾಪ್ಳಿ ಹಸನಬ್ಬಚೆ. ಹೇ ಗರಾ ಪೇಂಟೆಂತ್ ಪಾಲೆಲ್ಯಾ ಮುಸ್ಲೀಮ್ ಲೀಗ್ ಪಾಡ್ತೆಕ್ ಹೊ ಗುಜರಿಚೊ ಹಸನಬ್ಬ - ತೊಚ್ಚ್ ಅಧ್ಯಕ್ಡ್, ತೊಚ್ಚ್ ಕಾರ್ಯದರ್ಶಿ, ತೊಚ್ಚ್ ಸಾಂದೊ. ಎಕಾ ತೆಂಪಾರ್ ಖಾಂದ್ಯಾರ್ ಪರ್ನಿ ಸಿಮೆಟಿಚಿ ಗೊಣಿ ಘಾಲ್ನ್ ಪಾಂಯಾಂಕ್ ವ್ಹಾಣೊ ಸಯ್ತ್ ನಾಸ್ತಾನಾ ಗಲ್ಲಿ ಗಲ್ಲಿ ಭಂವ್ಚ್ಯಾ ಹಸನಬ್ಬಕಡೆ ಎಕಾಣೆಂ ಇತ್ಲೊ ದುಡು ಖಂಯ್ ಥಾವ್ನ್ ಆಯ್ಲೊ ಆನಿ ತಾಣೆಮ್ ಪೆಂಟೆಂತ್ ಇತ್ಲೆಂ ವ್ಹಡ್ ದುಕಾನ್ ಕಶೆಂ ಮೊಲಾಖ್ ಘೆತ್ಲೆಂ ದೇವ್ ಜಾಣಾ. ಕೋಣ್ ಮ್ಹಣ್ಟಾತ್ ತಾಕಾ ಗುಜರಿಂತ್ ಭಾಂಗಾರಾಚಿ ಸಮೊಯ್ ಮೆಳ್ಳಿ ಆನಿ ಕೊಣ್ ತಾಕಾ ಆರ್ಬಿ ಗಾಂವಾಥಾನ್ ದುಡು ಯೆತಾ.
ಬೋರ್ಡ್ ಇಸ್ಕೊಲಾಂತ್ ಯುರೋಪಾಚಿ ಚರಿತ್ರಾ ಶಿಕ್ತಾನಾ ಗಂಗೂಕ್ ತರೀ ಕಾರ್ಲ್ಮಾರ್ಕ್ಸ್ ಆನಿ ಫ್ರೆಡರಿಕ್ ಎಂಗಲ್ಸ್ ಆನಿ ತಾಂಚಾ ವಿಚಾರಾಂಚೆರ್ ವಿಶೇಸ್ ಗವ್ರವ್. ಪುಣ್ ಜ್ಯಾ ದಿಸಾ, ಹರಿದಾಸ್ ಮಾಸ್ಟ್ರಾನ್ ಸಾಮ್ಗೊನ್ ತಾಣೆಂ ಲಂಕೇಶಾಕ್ ವಾಚುಂಕ್ ಸುರು ಕೆಲೆಂ ತೇ ದಿಸಾಥಾವ್ನ್ ತಾಕಾ ಡೊ.ಲೋಹಿಯಾಚೊ ಸಮಾಜ್ವಾದ್ ಆವ್ಡೊಂಕ್ ಲಾಗ್ಲೊ. ಇತ್ಲ್ಯಾಕ್ ಕಾಂಯ್ ನಿರ್ದಿಶ್ಟ್ ಕಾರಣಾಂ ನಾತ್ಲಿಂ. ಹ್ಯಾ ದೇಶಾಂತ್ಲೆ ಕೊಮುನಿಸ್ತ್ ಪಾಡ್ತಿ ಸರ್ವ್ ಕಾಮೆಲ್ಯಾಂಚಿಂ ಸಂಘಟನಾಂ ಜಾವ್ನ್ ಮಾತ್ ಉರ್ಲ್ಯೊ ಶಿವಾ ಏಕ್ ಭಳ್ವಂತ್ ಪರ್ಯಾಯ್ ರಾಜಕೀಯ್ ಸಕತ್ ಜಾವ್ನ್ ವ್ಹಾಡೊನ್ ಆಯ್ಲೆನಾಂತ್ ಮ್ಹಣ್ ಲಂಕೇಶಾನ್ ಬರಯಿಲ್ಲೆಂ ಸತ್ಚ್ ಮ್ಹಣ್ ತೊವೀ ಪಾತಿಯೆಲೊ.
ರೀತೂಬಾಯ್ ಕಶೆಂ ಆನಿ ಕೆನ್ನಾಂ ರಾಜಕೀಯಾಂತ್ ರಿಗ್ಲಿ ತಾಚಿ ನಖ್ಖಿ ಖಬರ್ ಗಂಗೂಕೀ ನಾ. ಸರ್ಕಾರಾಚಾ ಬಾಯ್ಲಾಂಚಾ ರಾಕಣಿಚಾ ವೆವಸ್ತೆಂತ್ ತಿಕಾ ಕಾಂಯ್ ಫಾಯ್ದೊ ಜಾಲೊ ವ ಸುಬ್ರಾಯ ಶೆಟ್ಟಿಚಾ ಸಳಾವಳೆಂತ್ ಸಾಂಗೊಂಕ್ಯೀ ಕಶ್ಟ್. ಪುಣ್ ಜೆದ್ನಾಂ ಗಂಗೂನ್ ಖಾಯ್ಸ್ ಕರ್ಚ್ಯಾ ಎಕಾ ಚಿಂತ್ಪ್ಯಾನ್ ಪೆಪರಾಚಾ ಕೊಲಮಾಂತ್ ಹ್ಯಾ ದೇಶಾಂತ್ ರಾಜಕೀಯಾಂತ್ ಬಾಯ್ಲೊ ದೋನ್ಂಚ್ ಕಾರಾಣಾಂಕ್ ಲಾಗೊನ್ ಮುಕಾರ್ ಯೆತಾತ್. ಏಕ್ ತಾಂಚೆಂ ಬಾಫುಯ್, ಭಾವ್, ಘೊವ್ ವಾಕುಟ್ಮಾಚೆ ಪಾಡ್ತೆಂತ್ ಆಸ್ಲ್ಯಾರ್ ವಾ ಅಧಿಕಾರಾರ್ ಆಸ್ಚ್ಯಾ ದಾದ್ಲ್ಯಾಂ ಸಾಂಗಾತಾ ನಿದೊನ್’ ಮ್ಹಣ್ ಬರಯ್ಲೆಂ. ತೆನ್ನಾಂ ತಾಕಾಯೀ ರಿತೂಬಾಯೆಚೆರ್ ಆನಿ ತಿಚಾ ರಾಜಕೀಯಾಚೆರ್ ಎಕಾನಮುನೆಚೊ ಅವ್ಯಕ್ತ್ ಕಾಂಠಾಳೊ ಪಾಲೆಂವ್ಕ್ ಸುರು ಜಾಲೊ.
’ಗಂಗೂ...’ ಕೊಡ್ಯಾಳ್ ವಚೊನ್ ಪೆಂಟೆಂತ್ ರಾತ್ ದೆಂವ್ಲ್ಯಾ ಉಪ್ರಾಂತ್ ಆಯ್ಲ್ಯಾ ಮ್ಹಳ್ಯಾರ್ ರೀತೂಬಾಯ್ ಪಿಯೆವ್ನ್ಂಚ್ ಯೆತಾ. ದೆಕುನ್ ತಿಚೊ ತಾಳೊ ಬಾರೀಕ್ ಕಾಂಪ್ತಾ. ಪೆಂಟೆಚಾ ರಸ್ತ್ಯಾಂನಿ ಪಂಚಾಯ್ತೆಚೆ ವಿಜೆಚೆ ದಿವೆ ಆಸೊಂದಿ ನಾ ಆಸೊಂದಿ, ಹಸನಬ್ಬಚಾ ಗಾದ್ಯಾಚಾ ಮೆರಾಂ ಪರ್ಯಾಂತ್ ತಿಕಾ ಚಾರ್ಜರ್ ಲಾಯ್ಟಾಚೊ ಉಜ್ವಾಡ್ ಆನಿ ಥಂಯ್ ಥಾವ್ನ್ ಕೊಣ್ ಮ್ಹಾರಾಚೊ ಪೂತ್ ವಾಟ್ಸುರೊ ಮೆಳ್ಳ್ಯಾರೀ ತಾಚೊ ಹಾತ್ ಸಸಾಯೆಕ್ ಜಾಯ್ ಪಡ್ಟಾ. ತಿಚೆಂ ತೊಟಾಚೆಂ ಗರ್ ಉತ್ರೊನ್ ಗಂಗೂಚೆಂ ಘರ್. ಉಪ್ರಾಂತ್ ಭೊಟಾಂಗೆಲೆಂ ಬೇಟ್. ಪುಣ್ ಜಿಣ್ಯೆಂತ್ ಕೆನ್ನಾಂಯೀ ಭೊಟಾಂಗೆಲ್ಯಾಂನಿ ಪಿಯೆಲ್ಲ್ಯಾ ರೀತೂಬಾಯೆಕ್ ಹಾತ್ ದೀವ್ನ್ ಆಪವ್ನ್ ಹಾಡ್ಲ್ಲೆಂ ನಾ ವಾ ಗಂಗೂನ್ ತೆಂ ಪಳಯಿಲ್ಲೆಂ ನಾ. ’ಆಜ್ ಆಮಿ ಡಿ.ಸಿ. ಆಫಿಸಾ ಮುಖಾರ್ ಉಪಾಸ್ ಬಸ್ಲ್ಲ್ಯಾಂಚ್... ಹೊ ತರ್ನೊ ಹರಾಮಿ ಡಿ.ಸಿ, ಆಮ್ಚಿಂ ಎಕೀ ಕಾಮಾಂ ಕರಿನಾ..’ ಲೋಹಿಯಾ ಆನಿ ಲಂಕೇಶಾಕ್ ವಾಚ್ಲ್ಲ್ಯಾ ಗಂಗೂಕ್ ಜಾಂವ್ ರೀತೂಬಾಯೆಚೆಂ ಉಲೊಣೆಂ ಕಸೆಂ ಕಸೆಂ ಸಮ್ಜೊಂಕ್ ಪ್ರೇತನ್ ಕೆಲ್ಯಾರೀ ಸಮ್ಜಾನಾ. ಪ್ರೊ.ಯೆಚೂರಿ ಶಿಕೊನೀ ರೀತೂಬಾಯೆ ಶಿಕಾನಾಸ್ತಾನಾಂಯೀ ಸಮಾಜೆಚಾ ಸಮಸ್ಸ್ಯಾಂವಯ್ರ್ ಜೆದ್ನಾಂ ಉಲಂಕ್ ಲಾಗ್ತಾತ್ ತೆದ್ನಾಂ ಸಗ್ಳಿಂ ಸಾರ್ಕಿಂಚ್ ದಿಸ್ತಾತ್. ಹೆಂ ಹ್ಯಾ ದೆಸಾಚಾ ವೆವಸ್ತೆಚೆಂ ದುರಂತ್ಗೀ ವಾ ಆಪ್ಲ್ಯಾ ಸಮ್ಜಣೆಭಾಯ್ಲೆಂ ಸತ್ಗೀ ಸಮ್ಜಾನಾಸ್ತಾನಾ ಗಂಗೂ ಘುಸ್ಪಡ್ಲ್ಲೊ ಆಸಾ.
ಪಿಯೆಲ್ಯಾರೀ ಪಿಯೆನಾತ್ಲ್ಯಾರೀ ರೀತೂಬಾಯೆಕ್ ಉಲಂವ್ಚ್ಯಾಕ್ ಮುಲಾಜ್ ನಾ. ಪಾಡ್ತೆಚಾ ಅಸಲ್ಯಾಚ್ ಮಿಟಿಂಗಾವೆಳಾರ್ ಕೊಡ್ಯಾಳ್ ಗೆಲ್ಲೆತವಳ್ ಸುಭ್ರಾಯ ಶೆಟ್ಟಿ ಸಾಂಗಾತಾ ’ವೈನ್ ಎಂಡ್ ವುಮೆನ್’ ಮ್ಹಳ್ಳೆಂ ಇಂಗ್ಲಿಶ್ ಪಿಂತುರ್ ಪಳೆಂವ್ಕ್ ಗೆಲ್ಲಿ. ಟಾಕಿಸಾಂತ್ ತಿಣೆಂ ತಾಚಿ ಮಿರ್ಸಾಂಗ್ ಚಿಡ್ಡಿಲ್ಲಿ ಗಜಾಲ್ ಪೆಂಟೆಂತ್ ತಿಣೆಂ ಚಾರ್ ಚೊವ್ಗಾಂ ಮುಖಾರ್ ಸಾಂಗ್ಲ್ಲಿ ಆಯ್ಕೊನ್ ಸುಭ್ರಾಯ ಶೆಟ್ಟಿ ಲಜೇನ್ ಮುದೊ ಜಾಲ್ಲೊ. ಪಾಡ್ತಿಚೆ ಹೆರ್ ರೀತೂಬಾಯೆ ಪಿಯೆವ್ನ್ ಉಲಯ್ತಾಗೀ ವಾ ಹಕೀಗತ್ ಸಾಂಗ್ತಾ ಕಳಾನಾಸ್ತಾನಾ ಘುಸ್ಪಡ್ಲ್ಲೆ.
’ಗಂಗೂ...’ ತುಂ ಚಾರ್ ಬೂಕ್ ಪೆಪರಾಂ ವಾಚ್ತಾಯ್. ತುಕಾ ಗೊತ್ತಾಸಾಯೆ, ಆಜ್ ಹ್ಯಾ ದೇಸಾಮ್ತ್ ಕಸಲ್ಯಾ ಖಾಸ್ತಾಚೆಂ ಪೊಲಿಟಿಕ್ಸ್ ಚಲ್ತಾ ತೆಂ.. ಮ್ಹಜೆತಸಲ್ಯಾ ಎಕಾ ಬಾಯ್ಲೆನ್ ಇತ್ಲೆಂ ಸಗ್ಳೆಂ ಕೆಲಾಂ ಮ್ಹಳ್ಯಾರ್... ’ ಆತಾಂ ಹಾತ್ ದೀ..’ ಹಸನಬ್ಬಾಚಾ ಗಾದ್ಯಾಚಿ ಮೇರ್ ಚಡ್ತಾನಾ ಚಡುಣೆಂ ರೀತೂಬಾಯ್ ಗಂಗೂಚ್ಯಾ ಖಾಂದ್ಯಾರ್ ತೆಂಕ್ಲ್ಲಿ. ರೀತೂಬಾಯೆಚಿ ಹಿ ವಜನ್ ಗಂಗೂಕ್ ಕಾಂಯ್ ನವಿ ನ್ಹಯ್. ಜಾಯ್ತೆಪಾವ್ಟಿಂ ತಿ ಕೊಡ್ಯಾಳ್ ವಚೊನ್ ರಾತ್ ತೆಂಕ್ಲ್ಯಾ ಉಪ್ರಾಂತ್ ಯೆತಾನಾ ತಿಕಾ ತಾಣೆಂ ಘರಾ ಪಾಯ್ಲಾಂ. ’ಪಂಚಾಯ್ತೆಚೆಂ ಇಲೆಕ್ಶನ್ ಏಕ್ ಜಾಂವ್ದಿ’ ಹಾಂವ್ ಆಮ್ಚ್ಯಾ ಚಾರಾಂಯೀ ವಾಂಟ್ಯಾಕ್ ಹ್ಯಾ ಪಡ್ಪಶಿ ಮಾಪ್ಳ್ಯಾಚಾ ಜಾಗ್ಯಾಂತ್ಲ್ಯಾನ್ ವಾಟ್ ಮಂಜೂರ್ ಕರ್ನ್ ಘೆತಾಂಗೀ ನಾ ಪಳೆ’ ಮಾಪ್ಳಿ ಹಸನಬ್ಬಕ್ ಆನಿ ರೀತೂಬಾಯೆಕ್ ಪೆಂಟೆಂತ್ ತೊ ಮುಸ್ಲೀಮ್ ಲೀಗ್ ಪಾಡ್ತ್ ಭಾಂದ್ತಾವರೇಗ್ ಬರೆಂಚ್ ಆಸ್ಲ್ಲೆಂ. ಜಾಯ್ತೆಪಾವ್ಟಿಂ ರಾತ್ಚ್ಯಾ ಅಸಲೆ ಘಡ್ಯೆ ತಿಕಾ ತಿಚಾ ಘರಾ ಪರ್ಯಾಂತ್ ಹಸನಬ್ಬಾನ್ ಆಪ್ಲ್ಯಾ ಗಾದ್ಯಾಮೆರೆಂತ್ಲ್ಯಾನ್ ಪಾಯ್ಲಾಂ. ತಸೆಂ ಬಾರೀಕಾಯೆನ್ ಪಳೆಂವ್ಕ್ ಗೆಲ್ಯಾರ್ ಹಸನಬ್ಬಚಾ ನವೀಚ್ ಉದೆಲ್ಲ್ಯಾ ಮುಸ್ಲೀಮ್ ಲೀಗ್ ಪಾಡ್ತೆಥಾವ್ನ್ ರೀತೂಬಾಯೆಕ್ ಜಾಂವ್ ಸುಭ್ರಾಯ ಶೆಟ್ಟಿಕ್ ವಾ ತಾಂಚಾ ಪಾಡ್ತೆಕ್ ಕಸಲೊಚ್ ಲುಕ್ಸಾಣ್ ನಾ.
’ಪುಣ್ ಬಾಯೆ, ಆಮಿ ಮಧ್ಯಮ್ ವರ್ಗಾಚೆ ರಯ್ತ್, ಲಾಕೊಂ ರುಪಯಾಂಚಿಂ ಕಾರಾಂ ಧಾಂವ್ಚಿಂ ಅಸಲ್ಯಾ ಎಕಾ ವಾಟೆಚಿ ಆಮ್ಕಾಂ ತೇಂಯೀ ಬರೆಂ ಬೆಳೆಂ ದಿಂವ್ಚ್ಯಾ ಹ್ಯಾ ಬೊಯ್ಲಾಂತ್ ಗರ್ಜ್ ತರೀ ಕಿತೆಂ?’ ಕರ್ಚೊ ಸೊರ್ಯಾಚೊ ದಂದೊ ತರ್ಯೀ, ಗಂಗೂನ್ ಉಲಂವ್ಚೆಂ ಲೆಕಾಚೆಂ. ರೀತೂಬಾಯ್ ’ಮದಿರಾ’ ಬಾರಾಚೊ ಖಾಸ್ಗಿ ಕಂಪ್ಣೆಚೊ ಸೊರೊ ಪಿಯೆತಾ ತರೀ ನಶೆಂತ್ ಆಸ್ಚೆಪರಿಂ ದಿಸ್ಲ್ಯಾರೀ ರಾತಿಕ್ ಉಲಯಿಲ್ಲೆಂ ದಿಸಾಕ್ ವಿಸ್ರಾನಾ, ಪಿಯೊಂವ್ಚೆಂ ಆನಿ ಪಾಡ್ತೆಚ್ಯಾ ದಾದ್ಲ್ಯಾಂ ಸಾಂಗಾತಾ ಸಡಿಳಾಯೆನ್ ಆಸ್ಚೆಂ ತಿಚೊ ಸಭಾವ್ ತರೀ ಅಸ್ಕತ್ಕಾಯ್ ನ್ಹಯ್. ಅಶೆಂ ಪೆಂಟೆಂತ್ಲ್ಯಾ ಸಭಾರ್ ತರ್ನಾಟ್ಯಾಂಪರಿಂ ಗಂಗೂಯೀ ಪಾತಿಯೆಲಾ.
’ಗಂಗೂ... ಚಾರ್ ಬೂಕ್ ವಾಚುನ್ ತುಮಿಂ ರಾಜಾಂವ್ ಉಲಯ್ತಾತ್. ಶಿವಾಯ್ ಜಿವಿತ್ ಭೊಗಿನಾಂತ್.. ತುಕಾ ಹಾಂವ್ ಏಕ್ ಗಜಾಲ್ ಸಾಂಗ್ತಾಂ..’ ರೀತೂಬಾಯೆನ್ ಗಂಗೂಚ್ಯಾ ಖಾಂದ್ಯಾವಯ್ಲೊ ಹಾತ್ ಕಾಡ್ಲೊ ಆನಿ ತಾಚಾ ಹಾತಾಂತ್ಲೊ ಚಾರ್ಜರ್ ಲಾಯ್ಟ್ ಘೆವ್ನ್ ತಾಚಾ ಮುಸ್ಕರಾಕ್ ಮಾರ್ನ್ ಘಡಿಭರ್ ತಾಚ್ಯಾ ತರ್ನಾಟ್ಯಾ ದೊಳ್ಯಾಂಕ್ ದೊಳೆ ಮೆಳವ್ನ್ ಪಳೆಲೆಂ. ಲಗ್ಬಗ್ ದೊಗಾಂಯೀ ಆತಾಂ ರೀತೂಬಾಯೆಚಾ ಘರಾಚಾ ಆಂಗ್ಣಾಕ್ ಯೇವ್ನ್ ಪಾವ್ಲ್ಲಿಂ. ’..ಪೂತ್ ಮ್ಹಜೊ ಬೆಂಗ್ಳುರ್ ಧುವೆಲಾಗಿಂ ಗೆಲಾ.. ತುಂ ಭಿತರ್ ಯೇ..’ ರೀತೂಬಾಯೆನ್ ಗಂಗೂಚೊ ಹಾತ್ ಧರ್ಲೊ.
’.. ಹಸನಬ್ಬಾಕಡೆ ಎಕಾಣೆಂ ಪಯ್ಸೊ ಖಂಯ್ ಥಾವ್ನ್ ಆಯ್ಲೊ? ತುಜೆಕಡೆ ಕಿತ್ಯಾಕ್ ನಾಂತ್? ದಾಟೆಮೊಟೆ ಬೂಕ್ ವಾಚ್ಚೆಂ ಆನಿ ಸರ್ಕಾರಿ ಪೆಕೆಟಿಚೊ ಸೊರೊ ವಿಕ್ಚೆಂ ಸೊಡ್ನ್ ಹೇವಿಶಿಂ ತುವೆಂ ಕೆನ್ನಾಂಯೀ ಚಿಂತ್ಲ್ಲೆಮ್ ಆಸಾ?
ಗಂಗೂ..;
’ನಾ... ಬಾಯೆ, ತಾಚಿ ಮ್ಹಾಕಾ ಗರ್ಜ್ ನಾ. ಮ್ಹಾಕಾ ವೇಳ್ ಜಾಲೊ.. ಹಾಂವ್
ಚಲ್ತಾಂ.. ಹಾಂವ್ ಘರಾ ಪಾವ್ಲ್ಯಾ ಶಿವಾಯ್ ಜೆವಿನಾಂತ್’
’ತರ್ ಗಂಗೂ, ತುಕಾ ಆತಾಂ ಹಾಂವ್ ತುಕಾ ಗರ್ಜ್ ಪಡ್ಚಿ ತುಜೀಚ್ ಗಜಾಲ್ ಸಾಂಗ್ತಾಂ, ತುಜ್ಯಾಚ್ ಬಾಪಾಯ್ಚಿ, ತಾಂಣಿಂ ಕಶೆಂ ಪಯ್ಶೆ ಕೆಲೆ?..’
ಹಾತಾಂತ್ಲೊ ಚಾಚ್ರಜ್ ಲಾಯ್ಟ್ ಬಂಧ್ ಕೆಲೊ ಆನಿ ಗಂಗೂ ಹಳೂ ರೀತೂಬಾಯೆಚಾ ಸಾಲಾಂತ್ಲ್ಯಾ ಬಾಂಕಾರ್ ಬಸ್ಲೊ. ’ಬಾಯೆ.. ತೆಂಯೀ ಸಮ್ಜೊಂಚಾ ಗವ್ಜೇಕ್ ಹಾಂವ್ ವಚಾನಾ.. ವಾ ತಾಚೀಯೀ ಗರ್ಜ್ ಮ್ಹಾಕಾ ನಾ.. ಹಾಂವ್ ಸದ್ದ್ಯಾಂತ್ ಜಿಯೆಂಚೊ ಮನಿಸ್ ಆನಿ ಹಾಂವ್ ಮ್ಹಜ್ಯಾ ಅಸ್ತಿತ್ವಾಕ್ ಪಾತಿಯೆತಾಂ ಶಿವಾಯ್ ಮ್ಹಜ್ಯಾ ಬಾಪಾಯ್ಚ್ಯಾ ವ ಹಸನಬ್ಬಾಚಾ ನಶಿಬಾಕ್ ನ್ಹಯ್’
ದೆಕುನ್ಂಚ್ ತುಜೆ ’ಫೀಚರ್ಸ್’ ಮ್ಹಾಕಾ ಬರೆ ಲಾಗ್ತಾತ್ ಗಂಗೂ.. ತುಂ ಶಿರಾಂನಿ ಕುಸ್ಕುಟಾಚೆಂ ತರ್ನಾಟ್ಪಣ್ ನಾ ತರ್ಯೀ ಸುಭ್ರಾಯ ಶೆಟ್ಟಿಪರಿಂ ಕಾಮುಕಿ ನ್ಹಯ್. ಅರ್ಬಿ ಗಾಂವಾಂತ್ ತೆಲಾಂತ್ಲೆ ಥೆಂಬೆ ಪುಂಜಾಂವ್ಕ್ ವಚೊನ್ ತರ್ನಾಟ್ಪಣಾ ಝರ್ ಚುಕೊನ್ ಮ್ಹಜ್ಯಾ ದಾದ್ಲ್ಯಾಪರಿಂ ಆಬ್ಲೆಶಿ ನ್ಹಯ್, ವಾ ಸಾಗೊಳೆಚಾ ನಿಬಾನ್ ಮ್ಹಾರಾಂಕ್ ಕೊಡ್ಕ್ಯಾಂತ್ ವೊಕಾಲ್ ಘಾಲ್ನ್ ತಾಂಚೆ ದಾದ್ಲೆ ಘರಾ ನಾತ್ಲೆ ತವಳ್ ವಚೊನ್ ತಾಂಚಾ ಬಾಯ್ಲಾಂ ಸಾಂಗಾತಾ ನಿದೊನ್ ಆಯಿಲ್ಲ್ಯಾ ತುಜ್ಯಾ ಬಾಪಾಯ್ಪರಿಂ ಬಿಕ್ಣೆಶಿಯೀ ನ್ಹಯ್..
ಗಂಗೂನ್ ಚಿಂತಿನಾತ್ಲ್ಲೆಪ್ರಾಸ್ ವೇಗಾನ್ ರೀತೂಬಾಯ್ ತಾಚಾ ಆಂಗಾರ್ ಆಯಿಲ್ಲಿ. ಆಪ್ಣೆಂ ಶಿಕ್ಲ್ಲೆ ಲೋಹಿಯಾ, ಲಂಕೇಶ್ ಆನಿ ತಾಂಚೊ ಸಮಾಜ್ವಾದ್ ಸಗ್ಳೊ ಅಪ್ಲೆಂ ವಿಕ್ಚ್ಯಾ ಸರ್ಕಾರಿ ಸೊರ್ಯಾಂತ್ ಖಿರೊನ್, ರೀತೂಬಾಯೆನ್ ಉಗ್ಡಾಪೆಂ ಕೆಲ್ಲ್ಯಾ ಸತಾಂತ್ ಮೆಳೊನ್, ಸಳ್ಸಳ್ಯಾ ತಿಚ್ಯಾ ವೆಂಗೆಂತ್ ಆಟೊನ್ ವೆತಾಶೆಂ ಭಗೊನ್ ಗಂಗೂ ಲಾಛಾರ್ ಜಾವ್ನ್ ಬಾಂಕಾರ್ಚ್ ಕೊಸಾಳ್ಳೊ.
ಜಿಣ್ಯೆಂತ್ಚ್ ಪಯಿಲ್ಲೆಪಾವ್ಟಿಂ ರಾಕೊನ್ ರಾಕೊನ್ ಗಂಗೂಕ್ - ಘರ್ಚಿಂ ರಾತ್ ಬಳ್ ಜಾಲಿ ಆನಿ ಯೇನಾ ಮ್ಹಣ್ ಖಾತ್ರಿ ಕರ್ನ್ ಜೇವ್ನ್ ಬಾಗ್ಲಾಕ್ ಖಿಳ್ ವೋಡ್ನ್ ನಿದ್ಲಿಂ.
ಕಥಾಝರ್
About us | Feedback | Contact us
Copyright © 2005
DAAIZ.COM All rights reserved.
Page concept, designed and maintained by Ashawadi
Publications
