ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಕಥಾಝರ್ - 2. ತೇಂಪ್ಲ್
ಮೆಲ್ವಿನ್ ಪಿಂಟೊ ನೀರುಡೆ ಪ್ರಸ್ತುತ್ ಕೊಂಕ್ಣಿ ಸಾಹಿತಿಕ್ ವರ್ತುಲಾಂತ್ ಭರ್ವಶ್ಯಾಚಿಂ ಕಿರ್ಣಾಂ ಫಾಂಕಂವ್ಚೊ ಕಾಣ್ಯೆಗಾರ್. ಭಾಯ್ಲ್ಯಾ ಸಾಹಿತ್ಯಾಚೆಂ ಅಧ್ಯಯನ್ ಕರ್ಚಾ ಹಾಕಾ, ಕೊಂಕ್ಣಿ ಸಾಹಿತ್ಯಾಂತ್ ನವೆಂಸಾಂವ್ ಕರ್ಚೆಂ ಏಕ್ ಭರ್ವಶ್ಯಾಚೆಂ ಕೀರ್ಣ್ ಜಾವ್ನ್ ದೆಖ್ಯೆತ್ ಮ್ಹಳ್ಳಿ ಮ್ಹಜಿ ಪಾತ್ಯೆಣಿ ಜಾವ್ನಾಸಾ. ಬರೆ ವಿಚಾರ್, ನೈತಿಕ್ ಚಿಂತಾಪ್ ಆಸ್ಚಾ ಹಾಚೆಥಾವ್ನ್ ಕೊಂಕ್ಣೆಕ್ ಅನಿಕ್ಯ್ ಬರ್ಯೊ ಕಾಣ್ಯೊಂ ಯೇಂವ್ದಿ ಮ್ಹಳ್ಳೆಂಚ್ ಮ್ಹಜೆಂ ಮಾಗ್ಣೆಂ ಜಾವ್ನಾಸಾ.
(ಹ್ಯಾ ಕಾಣ್ಯೆಕ್ ದಾಯ್ಜ್ ಸಾಹಿತಿಕ್ ಸ್ಪರ್ಧೊ 2004 ಂತ್ ದುಸ್ರೆಂ (ರು. 3000) ಇನಾಮ್ ಲಾಭ್ಲಾಂ)
ಮೆಲ್ವಿನ್ ಪಿಂಟೊ, ನೀರುಡೆ
ರಿತಾಬಾಯೆಚೆಂ ದ್ಯಾನ್ ಮಿಸಾಂತ್ ನಾತ್ಲ್ಲೆಂ "ಮಾಗಾ ತುಮ್ಕಾಂ ಮೆಳ್ತಾಲೆಂ, ಬಡಯಾ ಉಗ್ತೆಂ ಜಾತಾಲೆಂ; ಸೊದಾ ತುಮ್ಕಾ ಮೆಳ್ತಾಲೆಂ..." ವಿಗಾರಾನ್ ವಾಚ್ಲ್ಯಾ ವಾಂಜೆಲಾಂತ್ಲ್ಯಾ ಹ್ಯಾ ಉತ್ರಾಂಚ್ಯಾಕ್ಯೀ ಚಡಿತ್ ತಿಚ್ಯಾ ಮತಿಕ್ ಗೆಲೆಂಚ್ನಾ.
ಮಾಗಾ... ಮಾಗಾ... ಕಿತ್ಲೆಂ ಮಾಗ್ಚೆಂ? ಮಾಗ್ಣೆಂ ಚಡ್ ಜಾವ್ನ್ಂಚ್ ಜಾಯ್ಜಾಯ್ ಆಪ್ಣಾಚ್ಯಾ ಜಿಣ್ಯೆಂತ್ ಹ್ಯಾ ಪರಿಂ ಕಷ್ಟ್, ರಿತಾಬಾಯ್ ಚಿಂತುಂಕ್ ಲಾಗ್ಲಿ. ಮನ್ಶಾಂಕ್ ಸೊಡ್ಯಾಂ; ದೆವಾಕ್ಯೀ ಹ್ಯಾ ದಿಸಾನಿ ಆಪ್ಣಾಚಿ ವಿಸರ್ ಪಡ್ಲ್ಯಾ. ಕಿತ್ಲ್ಯಾ ದೇವ್-ಭಿರಾಂತೆನ್ ಆಪ್ಲೆ ಕುಟಾಮ್ ಚಲ್ಲಂಗಿ, ತಿತ್ಲೆ ಚಡ್ಲ್ಯಾತ್ ಕಷ್ಟ್. ಪಯ್ಲೆಂಚ್ ದುಬ್ಳೆಂ ಘರಾಣೆಂ. ಘೊವಾಚ್ಯಾ ಕೂಲಿ ಕಾಮಾಚ್ಯಾ ಜೊಡಿನ್ಂಚ್ ದೀಸ್ ವಚಾಜೆ. ಚವ್ಗಾಂ ಭುರ್ಗಿಂ. ಅಜೂನ್ ಮಾಸುಮ್.
ವರ್ಸಾಂ ಆದಿಂ ಮ್ಹಣಸಾರ್ ಆಪುಣ್ಯೀ ಬಿಡಿಯೊ ಬಾಂದುನ್, ಘರಾಕ್ ಕಾಂಯ್ ಥೊಡೊ ಆದಾರ್ ಜಾತಾಲಿ. ಪೂನ್ ದುಮ್ಟೆಚ್ಯಾ ಅಲರ್ಜಿ ದರ್ಮಾನ್ ಭಲಾಯ್ಕಿ ಭಿಗಡ್ಲ್ಯಾನ್ ದಾಕ್ತೆರಾನ್ ಬಿದಿಯೊ ಬಾಂದ್ಚೆಂ ರಾವಾಯ್ಜೆ, ನಾಂ ತರ್ ಭಲಾಯ್ಕೆಕ್ ಮಾರೆಕಾರ್ ಮ್ಹಣ್ ಸಾಂಗ್ಲ್ಲ್ಯಾನ್ ನಿರ್ವೊಗ್ ನಾಸ್ತಾಂ ಆಪ್ಣೆಂ ಖೊಲೆ - ಪಿಟ್ಯಾಕ್ ಅಧೇವ್ಸ್ ಮಾಗ್ಲ್ಲೆಂ. ತಾಚೆ ಉಪ್ರಾಂತ್ ಜಿಣಿ ನಿಜಾಕೀ ಕಷ್ಟಾಂಚಿ ಜಾಲ್ಲಿ. ಘೊವಾಕ್ ಸದಾಂ ಕಾಮ್ ಮೆಳ್ತಾ ಮ್ಹಳ್ಳಿ ಗ್ಯಾರಂಟಿ ನಾತ್ಲ್ಲಿ.
ಥೊಡೆ ಪಾವ್ಟಿಂ ಸಬಾರ್ ದೀಸ್ ಕಾಮ್ಂಚ್ ನಾ ಕಾಜಾರ್ ಕರ್ತಾನಾ ಮಾಂಯ್-ಬಾಬಾನ್ ಕರ್ನ್ ಘಾಲ್ಲೆಂ ಕಾಂಯ್ ಥೊಡೆ ಬಾಂಗಾರ್ ವಿಕಿನಾಸ್ತಾಂ ವಾಟ್ ನಾತ್ಲ್ಲಿ. ಭುರ್ಗಿಂ ಥಂಯ್ ಹಾಂಗಾ ತೆಪೆ ಲಾಯಿಲ್ಲ್ಯಾ ಪರ್ನ್ಯಾ ವಸ್ತುರಾಂಚೆರ್ ಇಸ್ಕೊಲಾಕ್ ವೆಚೆಂ ದೆಕ್ತಾನಾ ಕಾಳಿಜ್ ಚಿರ್ಮುಡ್ತಾಲೆಂ ಘರ್ ರಿಪೆರಿ ಕರ್ನಾಸ್ತಾಂ ವರ್ಸಾಂಚ್ ಜಾಲಿಂ. ಹ್ಯಾ ವರ್ಸಾ ವಡ್ಲೊ ಪಾವ್ಸ್ ಆಯ್ಲ್ಯಾರ್ ಉಪ್ರಾಂತ್ ರಾವೊಂಕ್ಯೀ ಥಾರೊ ನಾ ಮ್ಹಣ್ಂಚ್ ಅರ್ಥ್. ಬೊರ್ಯಾ ವಯ್ರ್ ಬೊರ್ಕುಟಿ ಮ್ಹಳ್ಯಾಬರಿ ಪೋರ್ ದಾಕ್ತೆರಾನ್ ಸಾಂಗ್ಲ್ಲಿಂ ಉತ್ರಾಂ... ರಿತಾಬಾಯೆಚಿ ಮತ್ ಪಿಸಾಂತುರ್ ಜಾವ್ನ್ಂಚ್ ಯೆತಾಲಿ. ಎಕಾ ಘಡ್ಯೆ ತಿಕಾ ಆಪುಣ್ ಖಂಯ್ ಆಸಾಂ ಮ್ಹಳ್ಳೆಂಯ್ ವಿಸರ್ನ್ ಗೆಲ್ಲೆಂ.
"ಜೆಜು ತುಂ ಪಿಡಾ-ಶಿಡಾ ಗೂಣ್ ಕರ್ತಾಯ್..." ಗಾಯಾನ್ ಚಲ್ತಾಲೆಂ. ಕರಿತ್ಗೀ ಸೊಮಿ ಪಿಡಾ-ಶಿಡಾ ಪಯ್ಸ್? ರಿತಾಬಾಯೆಕ್ ಭರ್ವೊಸೊ ನಾತ್ಲ್ಲೊ ಭರ್ವೊಸೊ ಸೊಮ್ಯಾಚೆರ್ ಯಾ ದಾಕ್ತೆರಾಂಚೆರ್ ನಾ ಮ್ಹಣ್ ನಂಯ್; ಪೂಣ್ ಆಪ್ಣಾಚೆರ್ಚ್. ಕಶೆಂ ಒಟ್ಟುಕ್ ಕರ್ತೆಲಿ ತಿ ಪಾವಾಣ್ಶೆಂ ಹಜಾರ್ ರುಪಯ್? ದಾಕ್ತೆರಾಚಿಂ ಉತ್ರಾಂ ಪರ್ತುನ್ ಕಾನಾಂತ್ ಶಿಸೆಂ ವೊತ್ಲ್ಲ್ಯಾ ಬರಿಂ ಆಯ್ಕೊಂಕ್ ಲಾಗ್ಲಿಂ ತಿಕಾ!
"ಪಳೆಬಾಯೆ! ತುಜ್ಯಾ ಪತಿಚೆಂ ಕಾಳಿಜ್ ಖರೆಂಚ್ ಅಸ್ಕತ್ ಆಸಾ. ವಯ್ಜಕೀಯ್ ಭಾಶೆನ್ ಸಾಂಗ್ಲ್ಯಾ ತುಕಾ ತೆಂ ಆರ್ಥ್ ಜಾಂವ್ಚೆ ನಾ. ಪುಣ್ ಸಂಪ್ಯಾ ಬಾಶ್ಯೆಂತ್ ಸಾಂಗ್ಚೆಂ ತರ್, ತಾಕಾ ಗಂಬೀರ್ ಕಾಳ್ಜಾ ಪಿಡಾ ಆಸಾ. ಕಾಳ್ಜಾಕ್ ರಗತ್ ಸಪ್ಲಯ್ ಕರ್ಚೆ ನಾಡಿಯೀ ಬೋವ್ಚ್ ಅಸ್ಕತ್ ಜಾಲ್ಯಾತ್. ತುರಂತ್ ತಾಕಾ ಮೇಜರ್ ಅಪರೆಶನ್ ಕರ್ಚೆಂಚ್ ಪಡ್ತಾಲೆಂ. ನಾಂ ತರ್, ಜಿವಾಕ್ ಆಪಾಯ್ ಆಸಾ..."
ರಿತಾ ಬಾಯೆಚೆಂ ಕಾಳಿಜ್ ಖಂಯ್ ನಾತ್ಲ್ಲ್ಯಾಬರಿಂ ದಡ್ದಡ್ತಾಲ್ಲೆಂ ಆಂಗಾಂತ್ ಶೆಳೊ ಘಾಮ್ ಪುತೊನ್ ಆಯಿಲ್ಲೆಂ. ಎಕದಾವೆಳಾ ಘೊವಾಕ್ ಕಾಂಯ್ ಜಾಲೆಂ ತರ್ ಕಿತೆಂ ಗತ್ ಕುಟ್ಮಾಚಿ?
ತಿಕಾ ಚಿಂತುಂಕ್ ನಾಕಾ ಜಾಲೆಂ. "ಖರ್ಚ್ ಕಿತ್ಲೊ ಜಾಯ್ತ್ ದಾಕ್ತೆರಾಬಾ?" ದಡ್ದಡ್ಯಾನಿಂಚ್ ವಿಚಾರ್ಲೆಂ ತಿಣೆಂ.
"ಪಳೆ ಬಾಯೆ, ತುಂವೆ ತಾಕಾ ಜನರಲ್ ವಾರ್ಡಾಂತ್ ಘಾಲ್ಯಾರ್ ದಿರೆಕ್ತೊರ್ ಆಸ್ಪತ್ರೆಚ್ಯಾ ಬಿಲ್ಲಾಂತ್ ಕಾಂಯ್ ಥೊಡಿ ರಿಯಾಯ್ತಿ ದೀಂವ್ಕ್ ಪುರೊ. ಪುಣ್ ಹೆರ್ ಕಸಲಿಯ್ ರಿಯಾಯಿ ಮೆಳಾತ್ ಮ್ಹಣ್ ಹಾಂವ್ ಪಾತ್ಯೆನಾ. ತಶೆಂ ಚಡುಣೆ ಪಾವಾಣ್ಶೆಂ ಹಜಾರ್ ರುಪಾಯ್ ತುಂವೆ ಕಾಡ್ನ್ ದವರಿಜೆಯ್ ಪಡ್ತಾಲೆ!"
ಪಾವಾಣ್ಶೆಂ ಹಜಾರ್!!!
ರಿತಾಬಾಯೆ ಕಾಳಿಜ್ ರಾವಾನಾತ್ಲ್ಲೆ ವ್ಹಡ್! ಘೊವಾಕ್ ಆಸ್ಪತ್ರೆಕ್ ಹಾಡ್ನ್ ಯೆತಾನಾ ಸೆಜಾರಾ ಪಾಂಯ್ಶಿ ರುಪಯ್ ರೀಣ್ ಘೆವ್ನ್ ಆಯಿಲ್ಲಿ ತಿ. ಖಂಯ್ ಥಾವ್ನ್ ಹಾಡ್ತಾಲಿ ಪಾವಾಣ್ಶೆ ಹಾಜಾರ್? ತಿಕಾ ಏಕಾ ಘಡ್ಯೆ ಘೊವಾಚೊ ರಾಗ್ ಆಯ್ಲೊ. ತಾಕಾ ಹರ್ದ್ಯಾಂತ್ ತೆದಾಳಾ ತೆದಾಳಾ ದೂಕ್ ಉಟ್ತಾಲಿ. ತೆಂಯ್ ಭೊರಾಚೆಂ ಕಾಮ್ ಕೆಲ್ಲ್ಯಾ ದಿಸಾನಿ ಘರಾ ಪಾಟಿಂ ಆಯಿಲ್ಲೊ ತೊ ಖರೆಂಚೆ ವಳ್ವಳ್ತಾಲೊ. ವಯ್ಲ್ಯಾನ್ ತಾಕಾ ಸಾಂಜೆಚೆಂ ಥೊಡೆಂ ಶೆಕ್ಚಿ ಸವಯ್ ಆಸ್ಲ್ಲಿ. ಭಲಾಯ್ಕೆಚಿ ತಾಣಿ ಪಿಕಿರ್ ಕೆಲ್ಲಿಚ್ ನಾ. ದಾಕ್ತೆರಾ ಕಡೆ ಯಾ ಮ್ಹಳ್ಳ್ಯಾಕ್ ತೊ ಬಾಯ್ಲೆಕ್ಚ್ ದೆಂಕ್ಣೊ ಘಾಲ್ತಾಲೊ. ತಾಕಾ ಜಬರ್ದಸ್ತೆನ್ ಆಸ್ಪತ್ರೆಕ್ ಹಾಡ್ಲ್ಲೊ. ಆಸ್ಪತ್ರೆಂತ್ ತೀನ್ ದೀಸ್ ರಾವ್ಲ್ಯಾ ಉಪ್ರಾಂತ್ ಕಾಂಯ್ ಥೊಡೆಂ ಬರೆಪಣ್ ದಿಸ್ಲ್ಲ್ಯಾನ್ ತಿಣೆ ತಾಕಾ ಪಾಟಿಂ ಆಪವ್ನ್ ಹಾಡ್ಲ್ಲೆಂ; ಕಿತ್ಯಾಕ್, ಸದ್ದ್ಯಾಕ್ ಅಪರೆಶಾನಾವಿಶಿಂ ಚಿಂತ್ಚೆಂಚ್ ತಿಕಾ ಆಸಾದ್ಯ್ ಜಾಲ್ಲೆಂ.
"ದಯಾ ಕರ್ನ್ ಆಮ್ಕಾ" ವಿಗಾರಾನ್ ಮಿಸಾಚ್ಯಾ ಅಖೆರಿಕ್ ’ಕಳವ್ಣ್ಯೊ’ ಸುರು ಕರ್ತಾನಾ ರಿತಾಬಾಯ್ ಸಿಮಿತಾಕ್ ಆಯ್ಲಿ. "ತುಮ್ಕಾ ಸರ್ವಾಂಕ್ ಕಳಿತ್ ಆಸ್ಲ್ಯಾ ಬರಿಂ ಯೆಂವ್ಚ್ಯಾ ಆಯ್ತಾರಾ ಆಮ್ಚ್ಯಾ ಇಗರ್ಜೆಚ್ಯಾ ನವ್ಯಾ ಬಾಂದ್ಪಾಚೆಂ ಉದ್ಘಾಟನ್.
ಸಕಾಳಿಂ ಜುಸ್ತ್ ಸಾಡೆ-ಧಾ ವೊರಾಂಕ್ ಪೆಂಟೆಂತ್ಲ್ಯಾ ಸರ್ಕಾರಿ ಮಯ್ದಾನ್ ಥಾವ್ನ್ ಪುರ್ಶಾಂವ್ ಆನಿ ಉಪ್ರಾಂತ್ ಬಿಸ್ಪಾಚೆಂ ಸಂಬ್ರಮಿಕ್ ಮೀಸ್. ಮಿಸಾ ಉಪ್ರಾಂತ್ ಇಂಜಿನಿಯರ್, ಕಾಂಟ್ರೆಕ್ಟರ್ ಆನಿ ಕಾಮಾಗಾರಾಂಕ್ ತಶೆಂಚ್ ವಿಶೆಸ್ ದಾನಿಂಕ್ ಸನ್ಮಾನ್ ಕಾರ್ಯೆಂ ಚಲ್ತಾಲೆಂ. ಪಾಂಚ್ ಲಾಕಾಂ ವಯ್ರ್ ಧಾನ್ ದಿಲ್ಲ್ಯಾಂಕ್ ಆಮಿ ಮಾನ್ ಕರ್ತೆಲ್ಯಾಂವ್. ಆಮ್ಚ್ಯಾಚ್ ಪಿರ್ಗೆಜೆಚೊ, ಶ್ರೀಮಾನ್ ಜೆಕಬ್ ಪಿಂಟ್ ಯಾ ಜಾಕಾ ಮೆಸ್ತ್ರಿನ್ ಪಂಚ್ವೀಸ್ ಲಾಖ್ ದಿಲ್ಯಾತ್ ತೆಂ ತುಮ್ಕಾ ಕಳಿತ್ ಆಸಾ. ತ್ಯಾ ದೀಸ್ ತಾಕಾ ಆಮಿ ದೊಡೊ ಮಾನ್ ಕರ್ತೆಲ್ಯಾಂವ್..."
ವಿಗಾರ್ ಸಾಂಗೊನ್ಂಚ್ ವೆತಾಲೊ. ಪುಣ್ ಪರ್ತ್ಯಾನ್ ರಿತಾ ಬಾಯೆಚೆಂ ಗಿನ್ಯಾನ್ ತೆವ್ಶಿನ್ ನಾತ್ಲ್ಲೆಂ. ಕಾಳ್ಜಾಚ್ಯಾ ಏಕಾ ಪಂತಾರ್ ತಿಕಾ ಆತಾಂ ಅಸ್ಕತ್ ತರ್ಯೀ ಭರ್ವಶ್ಯಾಚೆಂ ಕೀರ್ಣ್ ದಿಸೊಂಕ್ ಲಾಗ್ಲೆಂ. ಮಿಸಾ ಉಪ್ರಾಂತ್ ತಿ ವಿಗಾರಾಕ್ ಮೆಳೊಂಕ್ ಗೆಲಿ. ಪುಣ್ ವಿಗಾರಾಕ್ ಮೆಳ್ಚ್ಯಾಕ್ ಲೊಕಾಂಚಿ ಖೆಟ್ಚ್ ಆಸ್ಲ್ಲಿ. ಹ್ಯಾ ದಿಸಾಂನಿ ತೊ ಖರೆಂಚ್ ಬಿಝಿ ಆಸ್ಲ್ಲೆ. ನವ್ಯಾ ಇಗೆರ್ಜೆಚೆಂ ಬಾಂದಾಪ್ ಆತಾಂ ಸಂಪ್ಣೆನ್ ಆಯಿಲ್ಲೆಂ. ಪುಣ್ ಉದ್ಘಾಟನ್ ಜಾತಾ ಮ್ಹಣಾಸರ್ ಟೆನ್ಶನ್ ಉಣೆಂ ಜಾಂವ್ಚಾ ಬರಿ ನಾತ್ಲ್ಲೆಂ .
ಆಪ್ಣೆಂ ಅಸಲ್ಯಾ ವೆಳಾ ಆಪ್ಲೆ ಕಷ್ಟ್ ಘೆವ್ನ್ ತಾಚೆ ಲಾಗಿಂ ವೆಚೆಂ ಸಾರ್ಕೆಂಗೀ ಮ್ಹಳ್ಳೆ ದುಬಾವ್ ಜಾಲೆಂ ತಿಕಾ. ಕಿತ್ಯಾಕ್ಗೀ ಪಯ್ಲೆಂ ಥಾವ್ನ್ ಹ್ಯಾ ವಿಗಾರಾಕ್ ಪಳೆತಾನಾ ತಿಕಾ ಭ್ಯೆಂ ದಿಸ್ತಾಲೆಂ. ತಾಚೆಂ ತೆ ತಾಂಬ್ಡೆ ದೊಳೆ, ದರಗ್ ಖಾಡ್ ಆನಿಂ ಕಠಿಣ್ ತಾಳೊ ಆಪ್ಲ್ಯಾ ತಸ್ಲ್ಯಾಂಕ್ ಬೆಷ್ಟಾಂವ್ಲ್ ಮ್ಹಣ್ಂಚ್ ಆಸಾತ್ ಕೊಣ್ಣ್ ಮ್ಹಣ್ ತಿ ಚಿಂತಾಲಿ. ತರಿ ಪೂಣ್ ಹಾಂಗಾ ಆಯಿಲ್ಯಾ ವರ್ಸಾಚ್ ತಾಣೆ, ಇಗೆರ್ಜೆಚೆಂ ನವ್ಯಾ ಬಾಂದ್ಪಾಚಿ ಸುರ್ವಾತ್ ಕೆಲ್ಲ್ಯಾನ್ ಫಿರ್ಗೆಜೆಂಚ್ ಲೊಕಾ ತಾಕಾ ಮಾನ್ತಾಲೆ. ರಿತಾಬಾಯ್ ಸುಮಾರ್ ಅರ್ದೆಂ ವೋರ್ ರಾಕ್ಲ್ಯಾ ಉಪ್ರಾಂತ್ ಕಶೆಂಯ್ ವಿಗಾರಾಚ್ಯಾ ಆಫಿಸಾಕ್ ರಿಗ್ಲಿ. ತಿಕಾ ಪಳೆವ್ನ್ ಪಾದ್ರ್ಯಾಬ್ ಆಜಾಪ್ಲೊ.
"ಬಾರಿಚ್ ಆಪ್ರೂಬ್ ರಿತಾಬಾಯ್; ಯೇ ಬಸ್. ಕಿತೆಂ ಪಾವ್ಲಿಯ್?"
"ಫಾದಾರ್" ಕಾಂಪ್ಚ್ಯಾ ತಾಳ್ಯಾನ್ ತಿಣೆಂ ಸುರು ಕೆಲೆಂ.
" ಮ್ಹಜ್ಯಾ ಘೊವಾಕ್ ಕಸಲಿಗೀ ಕಾಳ್ಜಾಚಿ ಪಿಡಾ ಕಂಯ್, ದಾಕ್ತೆರಾನ್ ಸಾಂಗ್ಲೆ. ವ್ಹಡ್ಲೆ ಆಪರೇಶನ್ ಕರಿಜ್ಚ್ ಕಂಯ್. ನಾ ತರ್ ಜಿವಾಕ್ ಆಪಾಯ್ ಮ್ಹಳಾಂ. ಪಾವಾಣ್ಶೆಂ ಹಜಾರ್ ರುಪಯ್ ಜಾಯ್ ಮ್ಹಳಾಂ"
"ಹೆ...ಹೆ...ಕಳ್ಳೆಂ ಕಳ್ಳೆಂ ರಿತಾಬಾಯ್" ವಿಗಾರಾನ್ ಮ್ಹಳೆಂ.
"ತುಮ್ಕಾ ಕಷ್ಟ್ ಆನ್ವಾರ್ ಯೆತಾನಾ ಮಾತ್ರ್ ವಿಗಾರ್ ಜಾಯ್ಜಯ್. ನಾ ತರ್ ತಾಚಿ ಗರ್ಜ್ಚ್ ನಾ. ತೀನ್ ವರ್ಸಾಂ ಥಾವ್ನ್ ತುವೆಂ ಇಗರ್ಜೆಚೊ ಅನ್ವಾಲ್ ದಿಂವ್ಕ್ ನಾಂಯ್. ಪೂಣ್ ಆತಾಂ ತುಜ್ಯಾ ಘೊವಾಕ್ ಕಾಳ್ಜಾಚಿ ಪಿಡಾ ಯೆತಾನಾ ತುಕಾ ವಿಗಾರಾಚೊ ಉಡಾಸ್ ಯೆತಾ. ವಿಗಾರ್ ಕಿತೆಂ ಪಯ್ಶೆ ಉತ್ಪಾದನ್ ಕರ್ತಾ ಮ್ಹಣಿ ಚಿಂತಾಯ್ವೇ ತುಂ. ಫಿರ್ಗಜೆಚ್ಯಾ ಕುಟ್ಮಾನಿ ತಾಂಚೊ ಕಾಯ್ದೊ ದಿತಾನಾ ಮಾತ್ರ್ ವಿಗಾರಾಚೊ ದೀಸ್ ವೆತಾತ್. ಪೂಣ್ ತುಮ್ಕಾಂ ಕಾಯ್ದೊಯ್ ನಾ, ವಾಯ್ದೊಯ್ ನಾ. ತುಕಾ ಕಳಿತ್ ಆಸಾ, ಸಾಡೆ-ತೀನ್ ಕರೊಡಾಂಚಿ ಇಗರ್ಜ್ ವಯ್ರ್ ಆಯ್ಲ್ಯಾ. ಪೂನ್ ಆಜೂನ್ ಮ್ಹಕಾ ಪಾವಾಣ್ಶೆಂ ಲಾಕ್ ರೀಣ್ ಆಸಾ. ಖಂಯ್ ಥಾವ್ನ್ ಹಾಡುಂ ತೆ ಪಯ್ಶೆ ಹಾಂವ್? ವ್ಹಚ್ ವ್ಹಚ್, ಹ್ಯಾ ಪಾವ್ಟಿಂ ತುಕಾ ಮಾತ್ರ್ ನ್ಹಂಯ್ ಕೊಣಾಯ್ಕಿ ಕಾಂಯ್ ಕುಮೊಕ್ ಕರುಂಕ್ ಹಾಂವ್ ಅಸಕ್ತ್..."
ರಿತಾಬಾಯ್ ಹೆರ್ ಕಿತೆಂಚ್ ಉಲಯ್ನಾಸ್ತಾಂ ಭಾಯ್ರ್ ಆಯ್ಲಿ. ತಿಕಾ ರಡೊಂಕ್ಂಚ್ ಆಯ್ಲೆಂ. ವಿಗಾರಾ ಥಾವ್ನ್ ಪಯ್ಶೆ ಸೊಡ್ಯಾಂ, ಗರ್ಜೆಚಿ ಭುಜಾವಾಣ್ಯಿ ಮೆಳ್ಳಿನಾ ತೆಂ ಚಿಂತುನ್ಂಚ್ ರಿತಾಬಾಯೆಚೆಂ ಮನ್ ಕಠಿಣ್ ದುಖ್ಲೆಂ. ಹ್ಯಾ ದಿಸಾಂನಿ ಪಾದ್ರಿ-ಮಾದ್ರಿಂಕ್ಯೀ ಆಮ್ಚೆಂ ತಸಲ್ಯಾ ಥಂಯ್ ಆಸಕ್ತ್ ಉಣೆ ಜಾಲ್ಯಾ ಕಶೆಂ ಭಗ್ಲೆಂ ತಿಕಾ.
ಫಿಸ್ ವೆಳಾರ್ ಬಾಂದುಂಕ್ ನಾತ್ಲ್ಲ್ಯಾಕ್ ತಿಚ್ಯಾ ಭುರ್ಗ್ಯಾಕ್ ಹೆಡ್-ಸಿಸ್ಟೆರಿನ್ ಹೆರ್ ಭುರ್ಗ್ಯಾಂ ಮುಕಾರ್ ಹಿಣ್ಸಿಲ್ಲೆಂ ಮ್ಹಣ್ ಭುರ್ಗಿಂ ಘರಾ ಯೇವ್ನ್ ಹುಸ್ಕಾರ್ನ್ ಹುಸ್ಕಾರ್ನ್ ಸಾಂಗ್ತಾನಾಂಯ್ ರಿತಾಬಾಯೆಚೆಂ ಕಾಳಿಜ್ ಅಶೆಂಚ್ ತೀರ್-ತಿರ್ಕುಟ್ ಜಾಲ್ಲೆಂ ನಾ! ದುಬ್ಳ್ಯಾಂಕ್ ಸಾಂಗ್ಲ್ಲೊ ಸಂಸಾರ್ ನ್ಹಂಯ್ ಹೊ, ಚಿಂತ್ಲೆ ರಿತಾಬಾಯೆನ್. ತರ್ಯೀ ಭರ್ವಾಶ್ಯಾಚೆಂ ಕೀರ್ಣ್ ಆಜೂನ್ ತಿಚ್ಯಾ ಕಾಳ್ಜಾಂತ್ ಪೆಟೊನ್ ಆಸ್ಲ್ಲೆಂ. ಜಾಕಿ ಮೆಸ್ತ್ರಿ!
ಇಗರ್ಜೆ ಇಸ್ಕೊಲಾಚೊ ಮೆಸ್ತ್ರಿ ಜಾವ್ನ್ ರಿಟಾಯರ್ಡ್ ಜಾಲ್ಯಾ ಉಪ್ರಾಂತ್ ತೊ ಜಾಕಿ ಮೆಸ್ತ್ರಿ ಮ್ಹಣ್ಂಚ್ ಪ್ರಖ್ಯಾತ್. ಧಾ-ಪಂದ್ರಾ ಪಿಂಟೊ ಪಸ್ಸಾಂಚೊ ಮ್ಹಾಲಾಕ್ ತೊ. ಶೆರಾಂತ್ ತಾಚ್ಯಾ ಪುತಾಚೆಂ ಕರೊಡಾಂಚೆ ಕಸಲೆಂಗೀ ವ್ಹಡ್ಲೆಂ ಬಿಸ್ನೆಸ್. ಕರೋಡ್ಪತಿ ಜಾಕಿ ಮೆಸ್ತ್ರಿನ್ ಇಗರ್ಜೆ ಬಾಂದ್ಪಾಕ್ ಪಂಚ್ವೀಸ್ ಲಾಖ್ ದಿಲ್ಯಾಂತ್ ನವಾಲ್ಚ್ ನಾ. ಜಾಕಿ ಮೆಸ್ತ್ರಿ ಆಪ್ಲ್ಯಾ ಹ್ಯಾ ಕಷ್ಟಾಂಚ್ಯಾ ಸ್ಥಿತೆಂತ್ ಕಾಂಯ್ ಥೊಡಿ ಸಸಯ್ ಮಾಗ್ಲ್ಯಾರ್ ಬಹುಷಾ ತೊ ನಾ ಮ್ಹಣ್ಚೊ ನಾ.
ರಿತಾಬಾಯೆಚೊ ಭರ್ವೊಸೊ ವಾಡೊನ್ ಆಯ್ಲೊ. ಕಾಳ್ಜಾ ಮನಾಂತ್ ಕಾವ್ಜೆಣಿ ಭರ್ಲ್ಲಿ ತರ್ಯೀ ತಿಣೆಂ ಜಾಕಿ ಮೆಸ್ತ್ರಿಕ್ ಮೆಳ್ಚೊ ನಿಜೆವ್ ಘಟ್ ಕೆಲೊ. ಪೆಂಟೆಂತ್ ಉಬೊ ಆಸಾ ಜಾಕಿಮೆಸ್ತ್ರಿಚೊ ಜಯ್ತ್ ಬಂಗ್ಲೊ. ಪಿರ್ಗಜೆಂತ್ ವ್ಹಡ್ಲೆಂ ಕುಳ್ವಾರ್ ಮ್ಹಳ್ಯಾರ್ ಜಾಕಿ ಮೆಸ್ತ್ರಿಚೆಂಚ್. ಮೆಸ್ತ್ರಿ ಜಾವ್ನ್ ಕಾಮ್ ಕರ್ತಾನಾಂಚ್ ಏಕ್-ದೋನ್ ಬಸ್ಸಾಂ ಘಾಲ್ಲಿಂ ತಾಣೆ. ಪೂಣ್ ರಿಟಾಯರ್ಡ್ ಜಾಲ್ಲೆಂಚ್ ವರ್ಸಾಂ ವರ್ಸಾಂ ಬಸ್ಸಾಂ ಚಡೊನ್ಂಚ್ ಗೆಲಿಂ ಆನಿ ಜಾಕಿ ಮೆಸ್ತ್ರಿ ಲಾಖಾಂನಿ ಜೊಡುಂಕ್ ಪಾವ್ಲ್ಲೊ.
ಗೇಟ್ ಉಗ್ತಿ ಕರ್ನ್ ಭಿತರ್ ಆಯಿಲ್ಲಿ ರಿತಾಬಾಯ್ ಜಯ್ತ್ ಪೆಟ್ಯಾಂಚ್ಯಾ ಘೊಂಕ್ಣೆಕ್ ಎಕಾ ಘಡ್ಯೆ ಉಡೊನ್ ಪಡ್ಲಿ. ಪುಣ್ಯಾನ್ ಪೆಟ್ಯಾಂಕ್ ಬಾಂದುನ್ ಘಾಲ್ಲೆಂ. ಕಾಮಾಚ್ಯಾನ್ ಪೆಟ್ಯಾಂಕ್ ಥಂಡ್ ಕರ್ನ್ ರಿತಾಬಾಯೆಕ್ ಕಿತೆಂ ಜಾಯ್ ಮ್ಹಣ್ ವಿಚಾರ್ಲೆಂ ತಿಣೆಂ ಆಪ್ಣಾಕ್ ಜಾಕಿ ಮೆಸ್ತ್ರಿಕ್ ಮೆಳಾಜೆ ಆಸ್ಲ್ಲೆಂ ಮ್ಹಣ್ ತಿಳ್ಸಿತಾನಾ ತಾಣೆಂ ತಿಕಾ ಪಾರ್ಲಾರಾಂತ್ ಬಸಯ್ಲೆಂ. ತಿ ಜಾಕಿ ಮೆಸ್ತ್ರಿಚಿ ವಿದ್ಯಾರ್ಥಿಣ್ ತರ್ಯೀ ತಾಚ್ಯಾ ಬಂಗ್ಲ್ಯಾಕ್ ತಿಣೆಂ ಪಾಯ್ ದವರ್ಚೆಂ ಹೆಂಚ್ ಪಯ್ಲೆಂ ಆಫ್ಣಾಚೆಂ ದಳ್ದಿರ್ಪಣ್ ಆಸಲ್ಯಾ ಜಯ್ತ್ ಬಂಗ್ಲ್ಯಾಂತ್ ಉಟೊನ್ ದಿಸ್ತಾ ಮ್ಹಣ್ ಭಗ್ತಾನಾ ತಿಚೊ ಜೀವ್ ಮುಯೊ ತೆದೊ ಜಾಲೆ.
ಆಪ್ಣ್ಯಾ ತಸಲ್ಯಾ ಗರಿಬಾಂಕ್ ಹ್ಯಾ ಬಂಗ್ಲ್ಯಾಂತ್ ರೀಗ್ ಆಸಾಗೀ? ತಿಕಾ ದುಬಾವ್ ಜಾಲೆಂ. ಪಾಂಚ್ ಮಿನುಟಾನಿಂ ಜಾಕಿ ಮೆಸ್ತ್ರಿ ಪಾರ್ಲಾರಾಕ್ ಪಾವ್ಲೊ. ಪ್ರಾಯ್ ಸತ್ತರ್ ಉತರ್ಲ್ಯಾಂತ್ ತರ್ಯೀ ಅಜೂನ್ ಘಟ್ ಮೂಟ್ ದಿಸ್ತಾಲೊ ಮೆಸ್ತ್ರಿ. ತಾಕಾ ಪಳೆವ್ನ್ ಉಬಿ ಜಾಲಿ ರಿತಾಬಾಯ್.
"ಹೊ, ಹೊ ರಿತಾ! ಕಿತೊಂಗೊ, ಕಿತೆಂ ಪಾವ್ಲೆಂಯ್ ಹೆವ್ಶಿನ್ ಬಸ್-ಬಸ್" ತೊ ಬಸ್ಲೊ. ರಿತಾಬಾಯೆನ್ಯೀ ಕಷ್ಟಾನಿ ಬಸ್ಚೆಂ ಪ್ರೇತನ್ ಕೆಲೆಂ.
"ಮೆಸ್ತ್ರಿ, ಏಕಾ ಗರ್ಜೆನ್ ಪಾವ್ಲಿಂ" ರಿತಾಬಾಯೆಚೆಂ ಸರ್ವಾಂಗ್ ಬಾರೀಕ್ ಕಾಂಪ್ತಾಲೆಂ.
"ಸಾಂಗ್ ಸಾಂಗ್ ಕಿತೆಂ ಗರ್ಜ್?"
"ಮೆಸ್ತ್ರಿ ಮ್ಹಜ್ಯಾ ಘೊವಾಕ್ ಕಾಳ್ಜಾಚಿ ಪಿಡಾ! ತುರಂತ್ ಅಪರೇಶನ್ ಕರಿಜೆ ಮ್ಹಳ್ಳಾಂ ದಾಕ್ತೆರಾನ್. ನಾಂ ತರ್ ಜಿವಾಕ್ ಸಂಚಿಕಾರ್ ಕಂಯ್! ಖರ್ಚ್ ಸುಮಾರ್ ಪಾವಾಣ್ಶೆಂ ಹಜಾರ್ ಬಸಾತ್ ಮ್ಹಳಾಂ..." ತಿಚೊ ತಾಳೊ ಭರೊನ್ ಆಯ್ಲೊ.
"ಹಾಂ ತರ್ ಹಾಂವೆಂ ಕಿತೆಂ ಕರಿಜೆ ಮ್ಹಣ್ಚೆಂ ತುಂವೆಂ? ಓಕ್ಲ್ ಮಾತ್ಸೆಂ ನಾಕಾರ್ ನಿಸ್ರಾವ್ನ್ ವಿಚಾರ್ಲೆಂ ಜಾಕಿ ಮೆಸ್ತ್ರಿನ್.
"ಮೆಸ್ತ್ರಿ, ಮ್ಹಜಿ ಪರಿಸ್ಥಿತಿ ತುಮ್ಕಾಂ ಕಳಿತ್ ಆಸಾ, ತಾಚ್ಯಾ ಏಕ್ಲ್ಯಾಚ್ಯಾ ಜೊಡಿನ್ ದೀಸ್ ವಚಾಜೆ. ಆತಾಂ ತೊಚ್ ಪಿಡೆಸ್ತ್. ತಾಚೆಂ ಅಪರೇಶನ್ ಕರ್ಚ್ಯಾಕ್ ಆಮ್ಚೆಲಾಗಿ ಧಮ್ಡಿನಾ ದೆಕುನ್ ತುಮಿ ಕಾಂಯ್ ಥೊಡಿ ಕುಮೊಕ್ ಕೆಲ್ಲ್ಯಾರ್ ವ್ಹಡ್ ಉಪ್ಕಾರ್ ಜಾತೊ..."
ಕಾಳಿಜ್ ದಡ್ದಡ್ತಾಲೆಂ ತರ್ಯೀ ಸಾಂಗ್ಚೆಂ ಸಾಂಗುನ್ ಸೊಡ್ಲೆಂ ರಿತಾಬಾಯೆನ್. "ಕಿತ್ಲ್ಯಾ ಸುಲಾಬಾಯೆನ್ ಸಾಂಗ್ತಾಯ್ ನ್ಹಂಯ್ವೆ ರಿತಾ ತುಂ?" ಜಾಕಿ ಮೆಸ್ತ್ರಿ ಮ್ಹಣಾಲೊ.
"ಕಿತೆಂ, ಪಯ್ಶೆ ಸರ್ಗಾರ್ ಥಾವ್ನ್ ಪಡ್ತಾತ್ ಮ್ಹಣ್ ಚಿಂತಾಯ್ವೇ ತುಂ? ಮ್ಹಜೆ ಕಷ್ಟ್ ಜರ್ ಹಾಂವ್ ತುಕಾ ಸಾಂಗೊ, ತುಂ ಪಾತ್ಯೆಂವ್ಚೆನಾಂಯ್. ಪುತಾಚೆಂ ಬಿಸ್ನೆಸ್, ಸಾರ್ಕೆಂ ಚಲ್ನಾಂ. ಬಸ್ಸಾಂಚೆಂ ಕಲೆಕ್ಶನ್ಯೀ ಹ್ಯಾ ದಿಸಾನಿ ಮ್ಹಸ್ತ್ ಉಣೆ ಜಾಲಾಂ. ಪೊರ್ಚ್ಯಾ ಪಯ್ರ್ ಏಕಾ ಬಸ್ಸಾಚೆಂ ಆಕ್ಸಿಡೆಂಟ್ ಜಾವ್ನ್ ತೆಂ ಸ್ಟೆಶಾನಾ ಥಾವ್ನ್ ಸುಟವ್ನ್ ಹಾಡುಂಕ್, ರಿಪೆರಿಕ್, ಆನಿ ಘಾಯೆಲ್ಲ್ಯಾಂಕ್ ಪರಿಹಾರ್ ಮ್ಹಣ್ ಲಾಖಾನಿಂ ಪಿಟೊ ಜಾಲೊ. ಆನಿಂ ಆತಾಂ ತುಂ ಕುಮೊಕ್ ಕರ್ ಮ್ಹಣ್ತಾಯ್. ತುಜ್ಯಾ ಘೊವಾಕ್ ಹಾಂವ್ ಬೊರ್ಯಾನ್ ಜಾಣಾಂ. ಹಾತಾಂತ್ ಪಯ್ಶೆ ಘುವಾನಾತ್ಲ್ಯಾರ್ಈ ತಾಣೆಂ ಪಿಯೆಂವ್ಚೆಂ ಉಣೆಂ ಕರುಂಕ್ ನಾ; ಆನಿ ಕಾಳ್ಜಾಚಿ ಪಿಡಾ ಯೆನಾಸ್ತಾಂ ರಾವ್ತಾವೇ? ತುಜ್ಯಾ ಘೊವಾಕ್ ಬೂದ್-ಬಾಳ್ ಸಾಂಗಜಾಯ್ ಜಾಲ್ಲ್ಯಾ ತೆದಾಳಾ ಕಂಯ್ ಗೆಲ್ಲೆಂಯ್ ತುಂ? ಆತಾಂ ಶಿತ್ ವಚೊನ್ ಪೇಜ್ ಜಾತಾನಾ ಕುಮೊಕ್ ವಿಚಾರ್ತಾಯ್ಗೀ?"
ರಿತಾಬಾಯ್ ಸಂಪೂರ್ಣ್ ಗಳೊನ್ ಗೆಲಿ. ಜಾಕಿ ಮೆಸ್ತ್ರಿ ತಿಕಾ ಅಸಲೊ ಸನ್ಮಾನ್ ದೀತ್ ಮ್ಹಣ್ ತಿಣೆಂ ಲೆಕ್ಲ್ಲೆಂ ನಾ. ದಾನ್-ದರ್ಮಾಕ್ ನಾಂವ್ ವೆಲ್ಲೆ ವ್ಯಕ್ತಿ ತೆ. ಸೆಜಾರ್ಚ್ಯಾ ಪಿರ್ಗೆಜೆಚ್ಯಾ ಇಸ್ಕೊಲಾಚ್ಯಾ ಬಾಂದ್ಪಾಕ್ಯೀ ತಾಣೆಂ ಪಾಂಚ್ ಲಾಖ್ ದಿಲ್ಲೆಂ ತೆಂ ತಿಕಾ ಕಳಿತ್ ಆಸ್ಲ್ಲೆಂ. ಸಂಗ್ -ಸಂಸ್ಥ್ಯಾಂಕ್ ತಾಣೆ ಕೆದ್ನಾಂಚ್ ನಾ ಮ್ಹಳ್ಳೆಂ ನಾ. ತಶೆಂ ಆಪ್ಣಾಕ್ಯೀ ಕಾಂಯ್ ತರ್ಯೀ ಸಸಾಯ್ ಮೆಳಾತ್ ಮ್ಹಣಿ ಆಯಿಲ್ಲ್ಯಾ ರಿತಾಬಾಯೆಕ್ ನಿರಾಶಾ ಮಾತ್ರ್ ನ್ಹಂಯ್, ಆಸ್ಲ್ಲೆಂ ಭರ್ವಾಸ್ಯಾಚೆಂ ಕೀರ್ಣ್ ನಾಸ್ ಜಾಲ್ಲೆಂ. "ಮೆಸ್ತ್ರಿ" ತಿಣೆಂ ಪರ್ತುನ್ ಧಯ್ರ್ ಆರಾಯ್ಲೆ.
" ತುಮಿ ಮ್ಹಕಾ ದಾನ್ ದಿಂವ್ಚೆ ನಾಕಾ, ರೀಣ್ ದಿಯಾ. ಕಶೆಂ ಪುಣ್ಯೀ ಕರ್ನ್ ಹಾಂವ್ ತೆಂ ವರ್ಸ್-ದೇಡ್ ವರ್ಸಾ ಬಿತರ್ ಪಾರಿಕ್ ಕರ್ತಾಂ..."
"ಕಿತೆಂ ನವಾಲ್ ಉಲಯ್ತಾಯ್ ತುಂ ರಿತಾ? ಎಕಾ ದೋನ್ ಹಜಾರಾಚೆಂ ಸವಾಲ್ವೇ ಹೆಂ? ಕಸಲ್ಯಾ ಧಯ್ರಾರ್ ತುಕಾ ಹಾಂವ್ ರೀಣ್ ದೀಂವ್. ವರ್ಸ್ ದೇಡ್ ವರ್ಸಾನ್ ಪಾರಿಕ್ ಕರ್ತಾ ಮ್ಹಣ್ತಾಯ್; ತಿಂ ಕಿತೆಂ ಸರ್ಕಾರಿ ನವ್ಕರೆಂತ್ ಆಸಾಯ್ವೇ? ಕಾಂಯ್ ಥೊಡಿಂ ಕುಮೊಕ್ ಹಾಂವ್ ದೀನ್. ಪೂಣ್ ತುಂವೆಂ ವಿಗಾರಾಕಡೆಂ ವೆಚೆಂ ಬರೆಂ. ತೆ ಕಾಂಯ್ ತರೀಯೀ ವೆವಸ್ಥಾ ಕರ್ತಾಲೆ. ತಶೆಂ ಫಿರ್ಗಜೆಚ್ಯಾ ಲೆಕಾಚಿ ದೇಕ್-ಬಾಲ್ ಕರ್ಚೆಂ ಕಾಯ್ದೊಯ್ ತಾಕಾ ಆಸಾ. ದೆಕುನ್ ಇಗರ್ಜೆಚೆಂ ಇನೊಗ್ರೇಶನ್ ಜಾಲ್ಲೆಂಚ್ ತಾಕಾ ಮೇಳ್..."
ಆಪ್ಣೆ ಏದೋಳ್ಚ್ ವಿಗಾರಾಕ್ ಮೆಳುನ್ ಮಾನ್-ಮರ್ಯಾದ್ ಆಪ್ಣಯ್ಲ್ಯಾ ಮ್ಹಣ್ ಸಾಂಗ್ಚೆಂ ಮನ್ ತಿಕಾ ಆಯ್ಲೆಂ. ತರ್ಯೀ ತಾಂತು ಕಸಲೆಂಚ್ ಪ್ರಯೊಜನ್ ಜಾಂವ್ಚೆಂನಾ ಮ್ಹಳ್ಳೆಂ ತಿಕಾ ಕಳಿತ್ ಆಸ್ಲ್ಲೆಂ. ಜಾಕಿ ಮೆಸ್ತ್ರಿ ಥಾವ್ನ್ ರುವಿಯೀ ಸುಟ್ಚಿ ಲಕ್ಶಾಣಾಂ ನಾತ್ಲ್ಲಿಂ. ಅದೀರ್ ಜಾಲ್ಲಿ ರಿತಾಬಾಯ್ ಜಡಾಯೆಚಿಂ ಮೆಟಾಂ ಕಾಡ್ನ್ ಭಾಯ್ರ್ ಆಯಿಲ್ಲಿ. ಸಂಸಾರ್ ಸಗ್ಳೊ ಆಪ್ಣಾಕ್ ಉಲ್ಟೆ ರಾವ್ಲಾ ಕಶೆಂ ಭಗ್ಲೆಂ ತಿಕಾ. ಘೊವಾಚೆಂ ಅಪರೇಶನ್ ಆನಿ ಸ್ವಪ್ಣಾಂತ್ಂಚ್ ಕೊಣ್ಣಾ! ದೆವಾ ತುಂಚ್ ರಾಕ್ ಮ್ಹಜ್ಯಾ ಘೊವಾಕ್. ದೊಳೆ ಭರೊನ್ ಆಯಿಲ್ಲ್ಯಾ ಬರಿಂಚ್ ತಿಣೆಂ ಮನಾಂತ್ ಮಾಗ್ಲೆಂ.
ತೇಂಪ್ಲ್!
ಉದ್ಘಾಟಾನಾಕ್ ಆಯ್ತೆಂ ರಾವ್ಲ್ಲೆಂ ನವೆಂ ದೇವ್-ತೆಂಪ್ಲ್ ಖರೆಂಚ್ ಸೊಬ್ತಾಲೆಂ ಸಾಡೆ ತೀನ್ ಕರೊಡಾಚೆಂ ಜರ್ಮಾನ್ ಗಾಥಿಕ್ ವಿನ್ಯಾಸಾಚೆಂ ಬಾಂದಾಪ್! ಆಲ್ತಾರಿರ್ ಜಯ್ತ್ ಖುರ್ಸಾರ್ ಉಮ್ಕಾಳ್ಚೊ ಇಟಲಿ ಥಾವ್ನ್ ಹಾಡಯ್ಲೊ ಜೆಜು ಕ್ರೀಸ್ತ್! ತಶೆಂಚ್ ಉಜ್ವ್ಯಾಕ್ ಪಾತ್ರೊನ್ ಸಾಂತ್ ಅಂತೊನಿಚಿ ಮಜ್ಬೂತ್ ಇಮಾಜ್; ತಿಯೀ ಇಟಲಿಚಿ. ಉದ್ಘಾಟನಾಕ್ ಹಜಾರಾಂನಿ ಆಯಿಲ್ಲೊ ಲೋಕ್. ಶೆಂಬರಾಂ ವಯ್ರ್ ಪಾದ್ರಿ; ರೆಲಿಜಿಯೊಸ್ ಭಯ್ಣಿ. ಮಯ್ದಾನಾ ಥಾವ್ ಜುಸ್ತ್ ಸಾಡೆ-ಧಾ ವೊರಾಂಕ್ ಬಿಸ್ಪಾ ಸವೆಂ ಪುರ್ಶ್ಯಾಂವ್ ಭಾಯ್ರ್ ಸರ್ಲೆ. ಬಿಸ್ಪಾನ್ ಇಗರ್ಜೆ ದಾರ್ವಟ್ಯಾರ್ ಬಾಂದ್ಲ್ಲೆಂ ಫಿಂತ್ ಕಾತಾರ್ಲೆಂ ಅನಿ ದೇವ್-ತೇಂಪ್ಲ್ ಮೆಂಜಾರ್ ಕೆಲೆಂ. ಉಪ್ರಾಂತ್ ಆರಂಬ್ ಜಾಲೆಂ ಮಿಸಾಚೆಂ ಸಾಂಬ್ರಾಮಿಕ್ ಬಲಿದಾನ್. ರಿತಾಬಾಯೆಕ್ ಮಾತ್ ಆಯ್ಚ್ಯಾ ಕಾರ್ಯಾಕ್ ಯೆಂವ್ಚೆಂ ಆಸಾದ್ಯ್ಚ್ ಜಾಲೆಂ. ತಿಚ್ಯಾ ಘೊವಾಚಿ ಹರ್ದ್ಯಾಂತ್ಲಿ ದೂಕ್ ವಿಪ್ರೀತ್ ಜಾಲಿ. ಸಗ್ಳಿ ರಾತ್ ತೊ ವಳ್ವಳ್ಳೊ.
ರಿತಾಬಾಯೆಚಿ ತಕ್ಲಿ ಕಾಮ್ ಕರಿನಾತ್ಲಿ. ಕಿತೆಂ ಕರ್ಚೆಂ ತೆಂ ತಿಕಾ ಕಳ್ಳೆಂನಾ. ಘೊವಾಕ್ ಆಸ್ಪತ್ರೆಕ್ ವರ್ಚೆಂ ಧಯ್ರ್ ತಿಕಾ ಜಾಲೆಂನಾ. ಮೆಜುನ್ ಪಾವಾಣ್ಶೆಂ ರುಪಯ್ ನಾತ್ಲ್ಲೆ ತಿಚೆಲಾಗಿ. ದೆಕುನ್ ತಿ ಘೊವಾಚೆಂ ಹರ್ದೆಂ ಪುಸುನ್ , ಹುನ್ ಉದ್ಕಾಚೊ ಶೆಖ್ ದೀವ್ನ್ಂಚ್ ರಾವ್ಲಿ. ಕಿತೆಂ ಕೆಲ್ಯಾರ್ಯೀ ತಾಚೆ ವಳ್ವಳೆ ಉಣೆಂ ಜಾಲೆನಾಂತ್. ಮಿಸಾಚೆಂ ಸಾಂಬ್ರಾಮಿಕ್ ಬಲಿದಾನ್ ಸಂಪ್ತಾನಾ ವೊರಾಂ ಸಾಡೆ ಬಾರಾ ಜಾಲ್ಲಿಂ. ಮಿಸಾ ಉಪ್ರಾಂತೆಲ್ ಕಾರ್ಯೆಂ ಸುರು ಜಾಂವ್ಕ್ ವೇಳ್ ಗೆಲೊನಾ.
ಇಗರ್ಜೆ ಸಾಮ್ಕಾರ್ಚ್ ಸಜಯಿಲ್ಲ್ಯಾ ವೆದಿರ್ ಬಿಸ್ಪ್, ಗಾಂವ್ಚೆ ಪುಡಾರಿ, ವಿಗಾರ್ ಜೆರಾಲ್, ವಾರಾಡ್ಯಾಚೊ ವಿಗಾರ್ ವಾರ್, ಆನಿಂ ಫಿರ್ಗಜ್ ವಿಗಾರ್ ಚಡ್ಲೆ. ಜಾಕಿ ಮೆಸ್ತ್ರಿಕ್ಯೀ ವೆದಿರ್ ಮಾನಾಚೆಂ ಕದೆಲ್ ಮೆಳ್ಲ್ಲೆಂ. ಜಾಕಿ ಮೆಸ್ತ್ರಿ ಆಜ್ ಹರ್ಶೆಂಚ್ಯಾಕ್ಯೀ ಚಡಿತ್ ತರ್ನೊ ದಿಸ್ತಾಲೊ. ಪುತಾನ್ ಆಯ್ಚ್ಯಾ ಕಾರ್ಯಾಕ್ಚ್ ಮ್ಹಣ್ ಹಾಡಯ್ಲ್ಯಾ ನವ್ಯಾ ಸುಟಾರ್ ಖರೊಚ್ ಸೊಬ್ತಾಲೊ ತೊ. ಜಮ್ಲ್ಲ್ಯಾ ಲೊಕಾಂಕ್ ಹಾತ್ ಜೊಡುನ್ ವಂದನ್ ಕರುನ್ ತಾಣೆಂ ಬಸ್ಕಾ ಘೆತ್ಲಿ.
ಕಾರ್ಯೆಂ ಸುಸೂತ್ರ್ ರಿತಿನ್ ಚಲ್ಲೆಂ. ಉಲಯಿಲ್ಲ್ಯಾ ಹರ್ಯೆಕ್ ಪುಡಾರ್ಯಾನ್ ಗಾಂವ್ಚಿ, ವಿಗಾರಾಚಿ, ಕ್ರೀಸ್ತಿ ದೇವ್ ಪ್ರಜೆಚಿ ಆನಿ ವಿಶೇಸ್ ಕರ್ಣ್ ಪ್ರಮುಕ್ ದಾನಿ ಜಾಕಿ ಮೆಸ್ತ್ರಿಚಿ ವಿಶೇಸ್ ತಾರಿಪೊ ಕೆಲಿ. ಆಜ್ ಹಾಂಗಾಸರ್ ಹೆಂ ಮಜ್ಬೂತ್ ದೇವ್ ಭಕ್ತೆಕ್ ಸಹಜ್ ಜಾಲ್ಲೆಂ ದೇವ್-ತೇಂಪ್ಲ್ ಉಬೆಂ ಜಾಲಾಂ ತರ್ ದೇವಾನ್ ಆಪ್ಲಿಂ ವಿಂಚ್ಣಾರ್ ಬೆಸಾಂವಾಂ ಹ್ಯಾ ಗಾಂವಾಚೆರ್ ವೊತ್ಲ್ಯಾಂತ್ ಮ್ಹಣ್ ಅರ್ಥ್ ಮ್ಹಳ್ಳೆಂ.
ಭಿಸ್ಪಾನ್ ವಿಗಾರಾಚಿ ಬೋವ್ ಚಡ್ ಹೊಗ್ಳಿಕ್ ಉಚಾರ್ಲಿ: " ತುಮ್ಚೊ ವಿಗಾರ್ ವ್ಹಡ್ ಕಾರ್ಬಾರಿ. ಹ್ಯಾ ಫಿರ್ಗಜೆಕ್ ಯೆಂವ್ಚ್ಯಾ ಪಯ್ಲೆಂ ತೊ ಆಸ್ಲ್ಲ್ಯಾ ಫಿರ್ಗೆಜೆಂತ್ಯೀ ತಾಣೆಂ ಮ್ಹಸ್ತ್ ಕಾಮ್ ಕೆಲಾಂ. ದಿಯೆಸೆಜಿಂತ್ ಆಜ್ ತುಮ್ಚ್ಯಾ ವಿಗಾರಾ ಚಡ್ತಾವ್ ಕಥೊಲಿಕ್ ತಶೆಂಚ್ ಹಿಂದೂ ಲೋಕ್ಯೀ ವೊಳ್ಕಾತಾ. ಅಸಲ್ಯಾ ತಾಲೆಂತ್ವಂತ್, ದೇವೊತ್ ವಿಗಾರಾಕ್ ಜೊಡ್ಲ್ಲಿಂ ತುಮಿ ನಿಜಾಕೀ ಭಾಗಿ. ಆಜ್ ಹಾಂಗಾಸರ್ ಮಜ್ಬೂತ್ ದೇವ್-ತೇಂಪ್ಲ್ ವಯ್ರ್ ಆಯ್ಲಾಂ ತರ್ ತೊಚ್ ಹಾಕಾ ಪ್ರಮುಕ್ ಕಾರಾಣ್. ತ್ಯಾ ದೆಕುನ್ ದಿಯೆಸೆಜಿ ತರ್ಪೆನ್ ಹಾಂವ್ ತಾಕಾ ಉಲ್ಲಸಿತಾಂ ಆನಿ ಅಸಲಿಂಚ್ ಬೊರಿಂ ಕಾಮಾಂ ತೊ ಕರ್ನ್ಂಚ್ ವಚೊಂ ಮ್ಹಣ್ ಮಾಗ್ತಾಂ.
"ತಶೆಂ ಹ್ಯಾ ದೇವ್-ತೇಂಪ್ಲಾಕ್ ಆಧಾರ್ ಜಾಲ್ಲ್ಯಾ ದಾನಿಂಚೊಯೀ ಉಡಾಸ್ ಕಾದುನ್ ಹಾಂವ್ ತಾಂಚೆ ಪಾಸತ್ ಮಾಗ್ತಾಂ. ವಿಶೇಸ್ ಕರ್ನ್ ತುಮ್ಚ್ಯ್ಚ್ ಗಾಂವ್ಚೊ ಶ್ರಿಮಾನ್ ಜೇಕಬ್ ಪಿಂಟೊ. ಉದ್ಯಮಿ ತೊ; ಮ್ಹಕಾ ಆದಿಂ ಥಾವ್ನ್ ವೊಳ್ಕಿಚೊ. ತಾಚೆಂ ಉದಾರಿ ಮ್ಹನ್, ದುಬ್ಳ್ಯಾಂ- ದಾಕ್ಟ್ಯಾಂ ಥಂಯ್ ತಾಚೊ ಹುಸ್ಕೊ, ಆನಿ ಚಡ್ ಕರ್ನ್ ತಾಚಿ ತಿ ಚಾಲ್ತಿ ಜಿಣಿ ಸರ್ವಾಂಕ್ ದೆಕಿಭರಿತ್ಚ್ ಸಯ್. ತಾಕಾಯೀ ಹಾಂವ್ ಶಾಬಾಸ್ಕಿ ಪಾಟಯ್ತಾಂ ಆನಿ ದೆವಾಚಿಂ ವಿಚ್ಣಾರ್ ಆಶಿರ್ವಾದಾಂ ಮಾಗ್ತಾಂ..." ಹೆಣೆಂ ರಿತಾಬಾಯ್ ಆತಾಂ ಖರಿಚ್ ಭಿಯೆವ್ನ್ ಗೆಲಿ.
ತಿಚೊ ಘೊವ್ ಆತಾಂ ಉಸ್ವಾಸ್ ಕಾಡುಂಕ್ಯೀ ಕಷ್ಟಾತಾಲೊ. ಸೆಜಾರ್ಚ್ಯಾ ಕೊಣಾಕ್ ಪುಣ್ಯಿ ಆಪಯಾಂ ಮ್ಹಳ್ಯಾರ್ ಸರ್ವಾಂ ಇಗರ್ಜೆಚ್ಯಾ ಉದ್ಘಾಟಾನಾಕ್ ಗೆಲ್ಲಿಂ. ಭುರ್ಗ್ಯಾಂಕ್ಯೀ ತಿಣೆ ಇಗರ್ಜೆಕ್ ಧಾಡ್ಲ್ಲೆಂ ಕಿತೆಂ ಕರ್ಚೆಂ ಕಳ್ನಾಸ್ತಾಂ ತಿಣೆ ಅಂಕ್ವಾರ್ ಸಾಯ್ಬಿಣಿಚೆಂ ಕೋಂತ್ ಘೊವಾಚ್ಯಾ ಗಳ್ಯಾಕ್ ಘಾಲೆಂ. ಆನಿಂ ಸಿಸ್ಲೆಂತ್ಲೆ ಆಗ್ಮೆಂತ್ ತಾಚೆರ್ ಶೆಣಾಯ್ಲೆಂ. ಮಾತ್ರ್ ನಾಂಯ್ ಏಕ್ ಘೊಟ್ ಪಿಯೆಂವ್ಕ್ಯೀ ದಿಲೆಂ. ಮನ್ ತಿಚೆಂ ದೆವಾಕ್ ಹಾಕ್-ಬೋಬ್ ಮಾರ್ತಾಲೆಂ...
ಭಿಸ್ಪ್ ಆತಾಂ ದೇವ್-ತೇಂಪ್ಲ್ ನವ್ಯಾ ಬಾಂದ್ಪಾಕ್ ಕಾರಾಣ್ಕರ್ತ್ ಜಾಲ್ಲ್ಯಾ ಇಂಜಿನಿಯರ್, ಕಂಟ್ರಾಕ್ಟರ್, ಪ್ರಮುಕ್ ಕಾಮೆಲ್ಯಾಂಕ್ ಆನಿ ದಾನಿಂಕ್ ಮಾನ್ ಕರ್ತಾಲೆ. "ಆತಾಂ ಆಮ್ಚ್ಯಾ ನವ್ಯಾ ದೇವ್-ತೇಂಪ್ಲಾಕ್ ಪ್ರಮುಕ್ ದಾನಿ ರಾವ್ಲ್ಲ್ಯಾ ಆಮ್ಚ್ಯಾಚ್ ಗಾಂವ್ಚ್ಯಾ ಶ್ರಿಮಾನ್ ಜೇಕಬ್ ಪಿಂಟೊಕ್ ಆಮ್ಚೊ ಗೊವ್ಳಿಬಾಪ್ ಮಾನ್ ಕರ್ತಾಲೆ" ಎಂ.ಸಿ. ನ್ ಸಾಂಗ್ತಾನಾ ಜಾಕಿ ಮೆಸ್ತ್ರಿ ಉಬೊ ಜಾಲೊ.
ಭಿಸ್ಪಾನ್ ಜಾಕಿ ಮೆಸ್ತ್ರಿಕ್ ಶಾಲ್ ಪಾಂಗುರ್ಲೊ ಆನಿ ಪಳ್ವಸ್ತುಂಚೆಂ ಹರ್ವಾಣ್ ದಿಲೆ; ಸಾಂಗಾತಾಚ್ ಆಮ್ಚ್ಯಾಚ್ ಕಾರ್ಯಾಕ್ ಮ್ಹಣ್ ತಯಾರ್ ಕೆಲ್ಲಿ ಇಗರ್ಜೆಚಿ ಪ್ರತಿರೂಪ್ ಆಟಾಪ್ಚಿ ವಿಶೆಸ್ ’ಯಾದಿಷ್ಟಿಕಾ’ ದೀವ್ನ್ ಜಯ್ತ್ ಫುಲಾಂ ಝೆಲೊಯಿ ಗಾಲೆ. ಜಮ್ಲ್ಲ್ಯಾ ಸಗ್ಳ್ಯಾ ಲೊಕಾನ್ ಉಬೆ ರಾವೊನ್ ತಾಳಿಯಾಂಚ್ಯಾ ಶಿಂವೊರಾ ಸವೆಂ ಜಾಕಿ ಮೆಸ್ತ್ರಿಕ್ ಆಪ್ಲೊ ಅಭಿಮಾನ್ ಆನಿ ಗೌರವ್ ದಾಕಯ್ಲೊ. ಜಾಕಿಮೆಸ್ತ್ರಿನ್ ದೋನ್ ಉತ್ರಾಂ ಉಲಯ್ಜಯ್ ಮ್ಹಣ್ ಎಂ.ಸಿ.ನ್ ಸಾಂಗ್ತಾನಾ ತೊ ಮಾಯ್ಕಾ ಸರ್ಶಿನ್ ಆಯಿಲ್ಲೊ.
"ಅಧಿಕ್ ಮಾನಾದಿಕ್ ಭಿಸ್ಪ್ ಸಾಯ್ಬಾನೊ, ಫುಡಾರ್ಯಾಂನೊ ಆನಿ ಮೊಗಾಚ್ಯಾನೊ, ಮ್ಹಜೆಂ ಕಾಳಿಜ್ ಆಜ್ ಭರೊನ್ ಯೆತಾ. ವ್ಹಡ್ ಮಾನ್ ತುಮಿ ಮ್ಹಕಾ ದಿಲಾ. ಹ್ಯಾ ಫಿರ್ಗೆಜೆಂತ್ಚ್ ಜಲ್ಮೊನ್, ಹಾಂಗಾಚ್ ಶಿಕೊನ್, ಉಪ್ರಾಂತ್ ಹ್ಯಾಚ್ ಇಗರ್ಜೆ ಇಸ್ಕಲಾಂತ್ ಏಕ್ ಶಿಕ್ಷಕ್ ಜಾವ್ನ್ ಹಾಂವ್ ನಿವ್ರತ್ತ್ ಜಾಲ್ಲೊಂ. ಹಾಂವೆ ನವ್ಯಾ ಬಾಂದ್ಪಾಕ್ ಕಾಂಯ್ ಥೊಡಿಂ ಕುಮೊಕ್ ದೀವ್ನ್ ತೆಂ ದೆವೆಂ ಫುರ್ತೆಂ ಫರಿಕ್ ಕೆಲಾಂ ಮ್ಹಣ್ ಹಾಂವ್ ಚಿಂತಿನಾ. ತರಿಕಿಯೀ, ಮ್ಹಜ್ಯಾ ತಾಂಕಿ ಪುರ್ತಿ ಕುಮೊಕ್ ಖಂಡಿತ್ ಹಾಂವ್ ಮೊರ್ತಾಂ ಮ್ಹಣಾಸರ್ ಚಾಲು ದವರ್ತೊಲೊಂ.
ದೆವಾನ್ ಮ್ಹಕಾ ಕಾಂಯ್ ಥೊಡೆಂ ದಿಲಾಂ ತರ್, ಹಾಂವೆ ತೆಂ ವಾಂಟುನ್ ಘೆಂವ್ಚೆಂ ಸಹಜ್," ಅಶೆಂ ಸಾಂಗ್ತಾನಾ ಜಾಕಿ ಮೆಸ್ತ್ರಿಚೊ ತಾಳೊ ಭರೊನ್ ಆಯ್ಲೊ. ಜಮ್ಲ್ಲೊ ಲೋಕ್ಯೀ ಸಂಪೂರ್ಣ್ ನಿಶ್ಶಬ್ದ್ ಜಾಲೊ. ಜಾಕಿ ಮೆಸ್ತ್ರಿನ್ ಗದ್ಗದಿತ್ ತಾಳ್ಯಾನ್ ಮುಕಾರ್ಸಿಲೆಂ:
"ನಿವ್ರತ್ತ್ ಜಾಲ್ಲ್ಯಾ ಉಪ್ರಾಂತ್ ಮ್ಹಜ್ಯಾ ತಾಂಕಿ ಪುರ್ತಿ ಸಮಾಜ್ ಸೆವಾ ಹಾಂವ್ ದೀವ್ನ್ಂಚ್ ಆಯ್ಲಾಂ; ಅನಿ ಗರ್ಜೆವಂತಾಂ ಖಾತಿರ್ ತಸಲಿ ಸೆವಾ ಹಾಂವ್ ಮೊರ್ತಾ ಮ್ಹಣಾಸರ್ಯೀ ದೀವ್ನ್ಂಚ್ ಆಸ್ತಲೊಂ..."
ಹೆಣೆ ಜಾಕಿ ಮೆಸ್ತ್ರಿ ಭಗ್ಣಾನಿಂ, ಉಮಾಳ್ಯಾನಿ ಭರೊನ್ ಉಲವ್ನ್ ಆಸ್ಲ್ಲೆಬರಿಂಚ್ ತೆಣೆಂ ರಿತಾಬಾಯೆಚ್ಯಾ ಘೊವಾಕ್ ಕಠೀಣ್ ವಳ್ವಳಾಯಿಲ್ಲೊ ಪ್ರಾಣ್ ಆಕ್ರೇಕ್ ತರ್ಯೀ ತುಟ್ಲೊ.
About
us | Feedback | Contact us
Copyright
© 2005 DAAIZ.COM All rights reserved.
Page concept, designed and maintained by Ashawadi
Publications
