ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಕಥಾಝರ್ - 29. ಹಾಂವ್ ತುಜೊ ಮೋಗ್ ಕರ್ತಾಂ
ಗಿಬ್ಬಾ ಕುಲ್ಶೇಕರ್: ಕೊಂಕ್ಣಿ ಸಾಹಿತ್ಯಾಂತ್ ಪಾಟ್ಲ್ಯಾ ಚಾಳಿಸ್ ವರ್ಸಾಂ ಥಾವ್ನ್ ತವಳ್ ತವಳ್ ಮಟ್ವ್ಯೊ ಕಾಣ್ಯೊ, ನೀಳ್ಗಥಾ, ಮಿನಿ ಕಾದಂಬರಿಯಾಂ ಮುಖಾಂತ್ರ್ ಫಾಮಾದ್. ಪ್ರಸ್ತುತ್ ಕುವೆಯ್ಟಾಂತ್ ವಾವ್ರ್ ಕರುನ್ ಆಸ್ಚಾ ಗಿಬ್ಬಾ ಕುಲ್ಶೇಕರ್ ಹಾಚ್ಯಾ ಕಾಣ್ಯಾಂಚಿ ವಿಶೇಷತಾ ಜಾವ್ನಾಸಾ ಥ್ರಿಲ್ಲರ್, ಸಸ್ಪೆನ್ಸ್. ಹಿಂದಿ ಸಾಹಿತ್ಯಾಕ್ ಚಡ್ ಖಾಯ್ಸ್ ಕರ್ಚಾ ಹಾಚೆಂ ಚಡ್ತಾವ್ ಸಾಹಿತ್ಯ್ ಸಾಮಾಜಿಕ್ ತರ್ಯ್ ತಾಣೆಂ ಕಾಣ್ಯೊ ಬರಂವ್ಚ್ಯೊ ಫಕತ್ತ್ ಮನರಂಜನಾಕ್ ದೆಖುನ್ ವಾಚ್ಪ್ಯಾಕ್ ಮನರಂಜನ್ ದಿಂವ್ಚಾಂತ್ ಭಿಲ್ಕುಲ್ ಸಲ್ವಾನಾಂತ್.
ಗಿಬ್ಬಾ ಕುಲ್ಶೇಕರ್
ಬೆಲ್ಲ್ ವ್ಹಾಜೊಂಕ್ ಲಾಗ್ಲಿ.
ಲೆಕ್ಚರಾನ್ ನಾಕಾ ಪರ್ಯಾಂತ್ ದೆಂವ್ಲ್ಲೆಂ ವೊಕ್ಲ್ ಸಾರ್ಕೆಂ ಕೆಲೆಂ. ಉಗ್ತೆಂ ಆಸ್ಲ್ಲೆಂ ಪುಸ್ತಕ್ ದಾಂಪ್ಲೆಂ ಆನಿಂ ಜಾಗೊ ಖಾಲಿ ಕೆಲೊ. ಎದೊಳ್ ಪರ್ಯಾಂತ್ ಮೌನ್ ಆಸ್ಲ್ಲೆಂ ಪರಿಸರ್ ಉನ್ಮಾದೆನ್ ಬದ್ಲಾಲೆಂ. ಚಲೆಂ-ಚಲಿಯೊ ಆವಾಜ್ ಕರಿತ್ತ್, ಶಿಳೊಣಿ ವ್ಹಾಜಾಯಿತ್ತ್, ಕುಕಾರ್ಯೊ ಮಾರಿತ್ತ್ ಕ್ಲಾಸಿ ಥಾವ್ನ್ ಭಾಯ್ರ್ ವಚೊಂಕ್ ಲಾಗ್ಲಿಂ.
ಮಾರ್ಕ್ ಹೆನ್ರಿನ್ ಹಿಂಡಾ ಬಿತರ್ಲ್ಯಾ ಎಕಾ ಸೊಬಿತ್ ಚಲಿಯೆಕ್ ಲಾಗಿಂ ವೊಡ್ಲೆಂ.
"ತುಂ ಸುದ್ರೊಂಚೊನಾಂಯ್ ಪೊಕ್ರಿ ಚೆಡ್ಯಾ" ವಿಯೊಲಾನ್ ದೊಳೆ ಕಾಡ್ಲೆಂ.
"ರಾಗಾ ವೆಳಾರ್ ತುಜಿ ಸೊಬಾಯ್ ದೊಡ್ತಿ ಜಾತಾ ಹನಿ ಗರ್ಲ್". ವಿಯೊಲಾಚಾ ಪೆಂಕ್ಡಾಂ ಬೊಂವಾರಿಂ ಹಾತ್ ರೆವ್ಡಾಯ್ಲೊ ಮಾರ್ಕ್ ಹೆನ್ರಿನ್. "ಹಾಂವ್ ಸ್ತ್ರೀ ಜಾತಿಚೊ ಖಳನಾಯಕ್ ನ್ಹಂಯ್"
"ಫಿಲ್ಮಾಚೊ ಪ್ರಭಾವ್ ಆಸಾ ತುಜ್ಯಾ ಉತ್ರಾಂನಿ" ವಿಯೊಲಾಚಾ ತಾಳ್ಯಾಂತ್ ಮಧುರತಾ ಉದೆಲ್ಲಿ.
"ಸೊಭಾಯೆ ಸವೆಂ ಸೊಭಿತ್ ಪರ್ಸಾನಾಲಿಟಿ ಆಸಾ ತುಜ್ಯಾ ವ್ಯಕ್ತಿತ್ವಾಂತ್. ಫಿಲ್ಮ್ ಇಂಡಸ್ಟ್ರೀಂತ್ ತೂಫಾನ್ ಹಾಡುಂಕ್ ಸಕ್ತಾಯ್."
"ವಿಂಚವ್ಣ್ ತಾಚಾ ಹಾತಾಂತ್ ಆಸಾ" ಮಾರ್ಕ್ ಹೆನ್ರಿನ್ ದೊಳೆ ವಯ್ರ್ ಉಬಾರ್ಲೆ. "ತಾಚಾ ವಿಂಚೊವ್ಣೆಂತ್ ತೊ ಕೆದಿಂಚ್ ಚುಕೊನ್ ಪಡಾನಾ"
"ಯೂ ಮೀನ್ ಜೀಸಸ್ ಕ್ರೈಸ್ಟ್"?
"ತುವೆಂ ಸತ್ ಉಚಾರ್ಲಾಂಯ್"
ಕೊರಿಡಾರಾಚಾ ಪೊಂತಾರ್ ಆಸ್ಲ್ಲ್ಯಾ ಶಿಡಿಯೆ ತೆವ್ಶಿನ್ ತಿಂ ಚಮ್ಕಾಲಿಂ.
"ವಿಯೊಲಾ..."
"ಕಿತೆಂ ಮಾರ್ಕ್?"
"ತುಜ್ಯಾ ವೊಂಟಾಂಚೊ ಉಮೊ ಮ್ಹಾಕಾ ಜಾಯ್"
"ವ್ಹಾಟ್??" ಜಗ್ಲಣ್ಯಾ ವೆಗಾನ್ ಚೆಡುಂ ಪಾಸ್ಳೆ ಥಾವ್ನ್ ಮೆಕ್ಳೆಂ ಜಾಲೆಂ. "ಚರ್ಬೆಲಾಯ್?"
ಕೊರಿಡಾರಾರ್ ಆನಿಂ ಶಿಡ್ಯೆರ್ ಕೊಣ್ಂಚ್ ನಾತ್ಲ್ಲಿಂ. ಹಿಂಡ್ ಕ್ಯಾಂಪಸಾ ಥಾವ್ನ್ ಭಾಯ್ರ್ ವಚೊನ್ ಆಸ್ಲ್ಲೊ.
"ಕಿತ್ಯಾಕ್ ಇನ್ಕಾರ್ ಕರ್ತಾಯ್ ಚೆಡ್ವಾ?"
"ಆಯ್ಕ್....." ಮಾರ್ಕ್ ಹೆನ್ರಿಚೊ ಕೊಲರ್ ಆರಾಯ್ಲೊ ವಿಯೊಲಾನ್. " ತುಂ ಮ್ಹಜೊ ಮೋಗ್ ಕರ್ಣಾರ್ ನಹಿಂ. ಆಮಿಂ ಫಕತ್ತ್ ಫ್ರೆಂಡ್ಸ್ ಜಾವ್ನಾಸಾಂವ್. ಸಮ್ಜಾಲೊಯ್? ಮ್ಹಜ್ಯಾ ಉಮ್ಯಾ ವಯ್ರ್ ಫಕತ್ತ್ ಮ್ಹಜ್ಯಾ ಮೋಗ್ ಕರ್ಣಾರಾಕ್ ಹಕ್ಕ್ ಆಸಾ"
ತೊ ಹಾಸ್ಲೊ.
"ಕಿತ್ಯಾಕ್ ಹಾಸ್ತಾಯ್?"
"ಬಲತ್ಕಾರಾನ್ ತುಜೊ ಉಮೊ ಹಾಂವ್ ಘೆಂವ್ಕ್ ಸಕ್ತಾಂ"
"ತರ್ ವೇಳ್ ವಿಬಾಡಿನಾಕಾ ಮಾರ್ಕ್......" ಚೆಡ್ವಾಚಿಂ ದಾಡಾಮಾಂ ಆಡ್ಚಾಲಿಂ. "ಸತ್ಚ್ ಹಾಂವ್ ತುಕಾ ಸಾಂಗ್ತಾಂ. ಹ್ಯಾಚ್ ಘಡಿಯೆ ಆಮ್ಚಿಂ ಇಷ್ಟಾಗತ್ ತುಟೊನ್ ಪಡ್ತೆಲಿ. ಆಮಿಂ ದುಸ್ಮಾನಾಂ ಜಾಂವ್ಕ್ ಪಾವ್ತೆಲ್ಯಾಂವ್"
ತೊ ಪರತ್ತ್ ಹಾಸ್ಲೊ.
"ಕಿತ್ಯಾಕ್ ಹಾಸ್ತಾಯ್ ಪಾಡಾರಿ ಚೆಡ್ಯಾ?"
"ತುಕಾ ಹೊಗ್ಡಾಂವ್ಕ್ ಹಾಂವ್ ತಯಾರ್ ನಾಂ" ನಾಜೂಕಾಯೆನ್ ಚೆಡ್ವಾಚೆ ಹಾತ್ ಮೆಕ್ಳೆ ಕೆಲೆ ಮಾರ್ಕ್ ಹೆನ್ರಿನ್. " ಲಿಲ್ಲಿ ಫುಲಾನ್ ಸದಾಂಚ್ ನಿತಳ್ ಉರೊಂಕ್ ಜಾಯ್"
"ಮ್ಹಜ್ಯಾ ಪೊಕ್ರಿ ಚೆಡ್ಯಾ...." ಮಾರ್ಕ್ ಹೆನ್ರಿಚೆಂ ನಾಕ್ ಚಿರ್ಡಿಲೆಂ ವಿಯೊಲಾನ್. "ಮ್ಹಜ್ಯಾ ಜಿವಿತಾಂತ್ ಎಕ್ಲ್ಯಾನ್ ಪ್ರವೇಶ್ ಕೆಲಾ. ಅರ್ಥರ್ ಫಾಯ್ಸ್ ಏರ್- ಪೊರ್ಸಾಂತ್ ಪಾಯ್ಲೆಟ್ ಜಾವ್ನಾಸಾ. ಕೊಲೆಜಿಚ್ಯಾ ಶಿಕ್ಪಾ ನಂತರ್ ಆಮ್ಚೆಂ ಲಗ್ನ್ ಜಾಂವ್ಚಾರ್ ಆಸಾ. ಮ್ಹಜ್ಯಾ ಪತಿಕ್ ಹಾಂವೆಂ ನಿತಳ್, ನಿಸ್ಕಳ್ ಶರೀರ್ ಒಪ್ಸುಂಕ್ ಆಸಾ. ತುಂ ಮ್ಹಾಕಾ ಅರ್ಥ್ ಕರುಂಕ್ ಸಕ್ತಾಯ್ ನಹಿಂ ಮಾರ್ಕ್?"
"ಝುಜಾರಿ ಆಪ್ಲ್ಯಾ ವಿಂಚವ್ಣೆಂತ್ ಚುಕೊನ್ ಪಡೊಂಕ್ ನಾ. ಖತಾಂ ನಾತ್ಲ್ಲೆಂ ಫುಲ್ ತಾಣೆಂ ವಿಂಚ್ಲಾಂ"
"ಥ್ಯಾಂಕ್ ಯೂ ಮಾರ್ಕ್"
ಮಾರ್ಕ್ ಹೆನ್ರಿನ್ ಫಕತ್ತ್ ನಿರ್ಮಳ್ ಹಾಸೊ ದಿಲ್ಯೊ.
ಶಿಡಿಯೆಚಿಂ ಮೆಟಾಂ ತಿಂ ದೆವೊಂಕ್ ಲಾಗ್ಲಿಂ.
"ಮಾರ್ಕ್..."
"ಕಿತೆಂ ವಿಯೊಲಾ....?"
ತುಜ್ಯಾ ಜಿವಿತಾಂತ್ ತೆಂ ಆಜೂನ್ ಯೇಂವ್ಕ್ ನಾ?"
"ಮ್ಹಜ್ಯಾ ಕಾಳ್ಜಾಚ್ಯಾ ತರಂಗಾನಿ ಮೋಗ್ ಮ್ಹಳ್ಳೆಂ ಸ್ಪಂದನ್ ಜಾಂವ್ಕ್ ನಾ ವಿಯೊಲಾ."
"ಏಕ್ ದೀಸ್ ಉದೆತಾಲೊ ಮಾರ್ಕ್. ತ್ಯಾ ದಿಸಾ ತುಜ್ಯಾ ಕಾಳ್ಜಾಚ್ಯಾ ತರಂಗಾನಿ ಸ್ಪಂದನ್ ಜಾತೆಲೆಂ. ತುಜೆಂ ’ತೆಂ’ ತುಜ್ಯಾ ಗೊಪಾಂತ್ ಯೆತಲೆಂ."
"ವಿಂಚವ್ಣ್ ತೊ ಕರ್ತಾಲೊ" ಮಾರ್ಕ್ ಹೆನ್ರಿನ್ ದೊಳೆ ವಯ್ರ್ ಉಬಾರ್ಲೆ. "ಬ್ರಹ್ಮಂಡ್ ರಚಲ್ಲ್ಯಾಚೊ ಪೂತ್ ವಿಂಚವ್ಣ್ ಕರ್ತಾಲೊ."
"ಹಾಂವ್ ಪಾತ್ಯೆತಾ ಮಾರ್ಕ್"
ಕ್ಯಾಂಪಸ್ ಉತ್ರೊನ್ ತಿಂ ಸದಾಂಚಾ ಸುವಾತೆಕ್ ಪಾವ್ಲಿಂ. ಮಯ್ದಾನಾರ್ ಸಾವ್ಳಿ ಆಸ್ಲ್ಲಿ. ರೂಕಾ ಪಂದ್ಲ್ಯಾ ಫಾತ್ರಾಂಚಾ ಬಾಂಕಾಚೆರ್ ತಾಚೆ ಸಾಂಗಾಂತಿ ಆನಿಂ ಸಾಂಗಾತಿಣ್ಯೊ ಬಸೊನ್ ಆಸ್ಲ್ಲಿಂ.
ಮಾರ್ಕ್ ಹೆನ್ರಿಚೆ ದೊಳೆ ಪರಿಸರಾ ವಯ್ರ್ ಚರೊಂಕ್ ಲಾಗ್ಲೆ.
"ಆನೂಶಾ ಖಂಯ್ ಆಸಾ ರಂಜೀತ್?"
"ಆಜ್ ತೆಂ ಕೊಲೆಜಿಕ್ ಯೇಂವ್ಕ್ ನಾಂ"
"ಕಿತ್ಯಾಕ್?"
"ಹಾಂವ್ ನೆಣಾಂ ಮಾರ್ಕ್"
ತಿತ್ಲ್ಯಾರ್ ಮಾರ್ಕ್ ಹೆನ್ರಿಚೆಂ ಮೊಬಾಯ್ಲ್ ಆವಾಜ್ ಕರುಂಕ್ ಲಾಗ್ಲೆಂ.
"ಹಲೋ ಮಾರ್ಕ್.."
"ಕೋಣ್?"
"ಅನೂಶಾ"
"ಖಂಯ್ ಆಸಾಯ್ ತುಂ ಲಗಾಮ್ ನಾತ್ಲ್ಲ್ಯಾ ಚೆಡ್ವಾ?"
"ಹಾಂವ್ ಆಪಾಯಾಂತ್ ಆಸಾ ಮಾರ್ಕ್"
"ವ್ಹಾಟ್?"
"ಮ್ಹಾಕಾ ತೊ ಸ್ವೀಕಾರ್ ಕರಿನಾ ಮಾರ್ಕ್"
"ಕೋಣ್?"
"ಮೇಯರ್ ದೀನ್ ದಯಾಳ್ ರಾಥೋಡ್"
"ಅಜಯ್ ಖಂಯ್ ಆಸಾ?"
"ಆಮಿಂ ಸುರಕ್ಶಿತ್ ಜಾಗ್ಯಾರ್ ಆಸಾಂವ್ ಮಾರ್ಕ್. ಅಜಯಾಕ್ ಜಬರ್ದಸ್ತೆನ್ ದುಸ್ರ್ಯಾ ಚಲಿಯೆ ಸವೆಂ ಕರಾರ್ ಕರುಂಕ್ ಭಾಯ್ರ್ ಸರ್ಲಾ ತಾಚೊ ವ್ಹಡಿಲ್"
"ತುಂ ಕಿತೆಂ ಆಶೆತಾಯ್ ಆನೂಶಾ?"
"ಆಜಯಾಚೊ ಹಾಂವ್ ಮೋಗ್ ಕರ್ತಾಂ ಮಾರ್ಕ್, ತೊ ಮ್ಹಾಕಾ ಜಾಯ್. ಅಜಯ್ ಮ್ಹಾಕಾ ಮೆಳನಾತ್ಲ್ಯಾರ್ ..... ಆತ್ಮ್ಹತ್ತ್ಯಾ ಹಾಂವ್ ಕರ್ತೆಲಿಂ."
"ಆಯ್ಕ್ ಮ್ಹಜ್ಯಾ ನಾದಾನ್ ಚೆಡ್ವಾ.." ಮಾರ್ಕ್ ಹೆನ್ರಿ ಕಿಳಂಚ್ಲೊ. "ತುಜೊ ಅಜಯ್ ತುಕಾ ಮಳ್ತಾಲೊ. ಆಯ್ಚಿ ರಾತ್ ಸಮಾಪ್ತ್ ಜಾಂವ್ಚಾ ಫುಡೆಂ ಮಾನೆಸ್ತ್ ದೀನ್ ದಯಾಳ್ ರಾಥೋಡ್ ತುಕಾ ಸ್ವೀಕಾರ್ ಕರ್ತಾಲೊ." ತೊ ಖರ್ಶೆಂವ್ಕ್ ಲಾಗ್ಲೊ. " ಮಾರ್ಕ್ ಹೆನ್ರಿ ವಯ್ರ್ ತುಕಾ ಭರ್ವಸೊ ಆಸಾಮೂ ಆನೂಶಾ?"
"ವ್ಹಯ್ ಮಾರ್ಕ್"
"ಐ ವಿಲ್ ಕೊಲ್ ಯೂ ಬ್ಯಾಕ್ ಅನೂಶಾ"
"ಥ್ಯಾಂಕ್ ಯೂ ಮಾರ್ಕ್"
ಮಾರ್ಕ್ ಹೆನ್ರಿನ್ ಮೊಬಾಯ್ಲ್ ಬಂದ್ ಕೆಲೆಂ. ತಾಚಾ ಸಾಂಗಾತ್ಯಾನಿ ತಾಕಾ ಘೆರಾವೊ ಘಾಲ್ಲೊ.
"ಕಿತೆಂ ಜಾಲಾಂ ಅನೂಶಾಕ್? ನಂದಿನ್ ಆಂವ್ಸಾರ್ಲೆಂ.
"ಆನಾರ್ ಕಲಿ ಅಪಾಯಾಂತ್ ಆಸಾ ಸಾಂಗತ್ಯಾನೊ"
"ಅನಾರ್ ಕಲಿ..?"
"ಕಸಲೊ ಆಪಾಯ್?"
"ಚಕ್ರವರ್ತಿ ಅಕ್ಬರ್ ಬಾದ್ಶಾ ಅನಾರ್ ಕಲಿಕ್ ಸುನ್ ಜಾವ್ನ್ ಕರುಂಕ್ ತಯಾರ್ ನಾಂ"
"ಕೋಣ್ ಚಕ್ರವರ್ತಿ?"
"ಮೇಯರ್ ದೀನ್ ದಯಾಳ್ ರಾಥೋಡ್"
"ಅಜಯ್ ಖಂಯ್ ಆಸಾ?"
"ಆಜಯ್ ನಹಿಂ! ಹ್ಯಾ ವೆಳಿಂ ಸಲೀಂ ಖಂಯ್ ಆಸಾ ಮ್ಹಣ್ ವಿಚಾರ್ ಜ್ಯೂಲಿ."
"ಹಾಂ....ಹಾಂ........ ಸಲೀಂ ಖಂಯ್ ಆಸಾ ಮಾರ್ಕ್?"
"ಸಲೀಂ ಆನಿಂ ಅನಾರ್ ಕಲಿ ಸುರಕ್ಶಿತ್ ಜಾಗ್ಯಾರ್ ಆಸಾತ್. ಹಾತೆರಾಂಚಿ ಬಂದೊಬಸ್ತ್ ಕರಾ ಸಾಂಗಾತ್ಯಾಂನೊ. ಚಕ್ರವರ್ತಿ ಅಕ್ಬರ್ ಬಾದ್ಶಾ ಸವೆಂ ಝುಜಾಕ್ ಆಮಿಂ ದೆಂವೊಂಕ್ ಆಸಾ."
ಕ್ಷಣಾ ಬಿತರ್ ಮಯ್ದಾನ್ ಖಾಲಿ ಜಾಲೆಂ.
"ಹ್ಯಾ ಝುಜಾಂತ್ ರಗ್ತಾಪಾತ್ ಜಾತಲೊ ಮಾರ್ಕ್?" ದುಸ್ರ್ಯಾಚಿಂ ಭುಜಾಂ ಆರಾಯ್ಲಿಂ ವಿಯೊಲಾನ್. "ಅನಾರ್ ಕಲಿಕ್ ನೀತ್ ದಿಂವ್ಚಾ ಖಾತಿರ್ ತುಂ ತುಜ್ಯಾ ಜೀವಾಚಿ ಬಲಿ ದಿತಲೊಯ್?"
"ಹಾಂವ್ ಸರ್ವಾಕ್ ತಯಾರ್ ಆಸಾಂ" ವಾರ್ಯಾರ್ ಮೂಟ್ ಮಾರ್ಲಿ ಮಾರ್ಕ್ ಹೆನ್ರಿನ್. "ಮೆಯರಾಚಾ ಗುಳ್ಯಾಂಕ್ ಹರ್ದೆಂ ದೀಂವ್ಕ್ ಹಾಂವ್ ತಯಾರ್ ಆಸಾಂ"
ಕರ್ಡಾಕ್ ಉಜೊ ಪೆಟ್ಲ್ಲ್ಯಾ ಭಾಶೆನ್ ಖಬಾರ್ ಸಗ್ಳ್ಯಾ ಕೊಲೆಜಿಂತ್ ವಿಸ್ತಾರ್ಲಿ. ಪಂದ್ರಾ ಮಿನುಟಾಂ ಬಿತರ್ ಮಯ್ದಾನಾರ್ ಹಾತೆರಾಂ ಜಮೊಂ ಜಾಲಿಂ. ವಿದ್ಯಾರ್ಥಿಂ ವಿದ್ಯಾರ್ಥಿಣಿಂಚೊ ವ್ಹಡ್ ಜಮೊ ಮಯ್ದಾನಾರ್ ಜಮೊಂಕ್ ಲಾಗ್ಲೊ. ಹೊಕಿಸ್ಟಿಕ್, ಸೈಕಲ್ ಚೈನಿ ತಾಂಚಿ ಹಾತೆರಾಂ ಜಾವ್ನಾಸ್ಲ್ಲಿಂ.
ಮಾರ್ಕ್ ಹೆನ್ರಿ ಬಾಂಕಾ ವಯ್ರ್ ಉಬೊ ಜಾಲೊಂ.
"ಅನಾರ್ ಕಲಿಕ್ ನೀತ್ ದಿಂವ್ಚಾ ಖಾತಿರ್ ಝುಜಾಕ್ ತುಮಿಂ ತಯಾರ್ ಆಸಾತ್ ಸೊಜೆರಾಂನೊ?"
"ಯಸ್ ಕರ್ನಲ್"
"ಗರ್ಜ್ ಪಡ್ಲ್ಯಾರ್ ಗುಳ್ಯಾಂಕ್ ಹರ್ದೆಂ ದೀಂವ್ಕ್ ತುಮಿಂ ತಯಾರ್ ಆಸಾತ್ ಸಾಂಗಾತ್ಯಾಂನೊ?"
"ಯಸ್ ಕರ್ನಲ್"
"ಆಮ್ಚಾ ಆನುಶಾ ಖಾತಿರ್ ಜೀವಾಚಿ ಬಲಿ ದೀಂವ್ಕ್ ತುಮಿಂ ತಯಾರ್ ಆಸಾತ್ ಮೊಗಾಚಾಂನೊ?"
"ಯಸ್ ಕರ್ನಲ್"
"ಚಕ್ರವರ್ತಿ ಅಕ್ಬರ್ ಬಾದ್ಶಾಹ್.."
"ದಿಕ್ಕಾರ್....ದಿಕ್ಕಾರ್.."
"ಸಲೀಂ - ಅನಾರ್ ಕಲಿ.."
"ಜಿಂದಾಬಾದ್...ಜಿಂದಾಬಾದ್.."
"ಚಕ್ರವರ್ತಿ ಬಾದ್ಶಾ...."
"ಮುರ್ದಾಬಾದ್.....ಮುರ್ದಾಬಾದ್..."
"ಸಲೀಂ-ಅನಾರ್ಕಲಿಕಿ ಜೊಡಿ.."
"ಸಲಾಮತ್ ರಹೇಂ...ಸಲಾಮತ್ ರಹೇಂ,,"
ವಿದ್ಯಾರ್ಥಿಂಚೊಂ ಆವಾಜ್ ಮೊಳ್ಬಾಕ್ ಉಮೊ ದೀಂವ್ಕ್ ಲಾಗ್ಲೊ.
ಮಾರ್ಕ್ ಹೆನ್ರಿನ್ ಮೊಬಾಯ್ಲಾ ವಯ್ಲಿಂ ನಂಬ್ರಾಂ ದಾಂಬ್ಲಿಂ.
ಲಾಯ್ನಿರ್ ಮೇಯರ್ ಆಸ್ಲ್ಲೊ.
"ಮಾನೆಸ್ತ್ ಮೇಯರ್?"
"ಕೋಣ್?"
"ಮಾರ್ಕ್ ಹೆನ್ರಿ"
"ಕೋಣ್ ಮಾರ್ಕ್ ಹೆನ್ರಿ?"
"ಆನೂಶಾಚೊ ಕೊಲೆಜ್ ಸಾಂಗಾಂತಿ"
"ಕಿತೆಂ ಜಾಯ್ ತರ್ನಾಟ್ಯಾ?"
"ಆನೂಶಾಕ್ ಸುನ್ ಜಾವ್ನ್ ಸ್ವೀಕಾರ್ ಕರ್ತಾಯ್ ವ ನಾ?"
"ತರ್ನಾಟ್ಯಾ.." ಮೇಯರಾಚೊ ತಾಳೊ ಸಾಮಾನ್ಯ್ ಆಸ್ಲ್ಲೊ. "ಮ್ಹಜ್ಯಾ ಖಾಸ್ಗಿ ವಿಶಯಾಂತ್ ನಾಕ್ ತುಂ ರಿಗಯ್ತಾಯ್"
"ಆಯ್ಕ್ ಮಾನೆಸ್ತಾ...." ಮಾರ್ಕ್ ಹೆನ್ರಿಚೊ ತಾಳೊ ದೊರಗ್ ಜಾಲೊ". ಝುಜ್ ಝುಜೊಂಕ್ ತಯಾರ್ ಆಸಾಯ್?"
"ಕಸಲೆಂ ಝುಜ್?"
"ಕರ್ನೆಲ್ ಮಾರ್ಕ್ ಹೆನ್ರಿ ಆನಿಂ ತಾಚಿ ಪಾಟ್ಲಾಮ್ ಥೊಡ್ಯಾಚ್ ವೆಳಾನ್ ತುಕಾ ಜಾಪ್ ದಿತಲೆ ಚಕ್ರವರ್ತಿ ಅಕ್ಬರ್ ಬಾದ್ಶಾ"
"ಕೋಣ್ ಚಕ್ರವರ್ತಿ?"
"ಹ್ಯಾ ವೆಳಾ ತುಂ ಚಕ್ರವರ್ತಿ ಅಕ್ಬರ್ ಬಾದ್ಶಾ ಜಾವ್ನಾಸಾಯ್ ಮಾನೆಸ್ತಾ"
ಮೇಯರಾಚೊ ಹಾಸೊ ಸುಟ್ಲ್ಯೊ.
"ಆಮ್ಚಾ ಅನಾರ್ ಕಲಿಚೊ ತುಜ್ಯಾ ಪುತಾನ್ ಸಲೀಮಾನ್ ಮೋಗ್ ಕೆಲಾ ಚಕ್ರವರ್ತಿ ಅಕ್ಬರ್ ಬಾದ್ಶಾ"
"ಫೊಕಣಾಂ ಉಲಂವ್ಕ್ ತುಜೆಲಾಗಿಂ ವೇಳ್ ಆಸೊಂಕ್ ಪುರೊ ತರ್ನಾಟ್ಯಾ. ಪುಣ್ ...ಆಯ್ಕೊಂಕ್ ಮ್ಹಜೆ ಲಾಗಿಂ ವೆಳಾಚೊ ಅಬಾವ್ ಆಸಾ."
"ಫೊಕಣಾಂ ಹಾಂವ್ ಉಲಯ್ನಾಂ ಚಕ್ರವರ್ತಿ ಅಕ್ಬರ್ ಬಾದ್ಶಾ. ಮ್ಹಜಿಂ ಫೌಜ್ ಲ್ಹಾನ್ ಗಾತ್ರಾಚಿ ಮ್ಹಣ್ ಚಿಂತಿನಾಕಾ. ಆಮ್ಚೆಂಲಾಗಿಂ ಹಾತೆರಾಂ ಆಸಾತ್. ರಗ್ತಾಪಾತ್ ಆಮಿಂ ಆಶೆನಾಂವ್. ಏಕಾ ವೆಳಾ ತುಂವೆಂ ವ ತುಜ್ಯಾ ಸರ್ಕಾರಿ ಚಮ್ಚ್ಯಾನಿಂ ಆಮ್ಚೆಂ ವಯ್ರ್ ಹಲ್ಲೊ ಕೆಲ್ಯಾರ್...ಮ್ಹಜ್ಯಾ ಸೊಜೆರಾಂಕ್ ಹಾಂವ್ ಆಡಾಂವ್ಕ್ ಸಕ್ಚೊನಾಂ. ಸಮ್ಜಾಲೊಯ್?"
"ದಮ್ಕಿ ದಿತಾಯ್ ತರ್ನಾಟ್ಯಾ?"
"ತಶೆಂ ತುಂವೆಂ ಚಿಂತ್ಯೆತ್"
"ಆನೂಶಾಕ್ ಹಾಂವ್ ಸ್ವೀಕಾರ್ ಕರ್ಚೊನಾ. ದ್ಯಾಟ್ಸ್ ಫಾಯ್ನಲ್."
"ಅನಾರ್ ಕಲಿಕ್ ತುಂ ಸ್ವೀಕಾರ್ ಕರ್ತಲೊಯ್ ಚಕ್ರವರ್ತಿ ಅಕ್ಬರ್ ಬಾದ್ಶಾ. ಸಲೀಮಾಚಾ ಮೋಗ್ ಕರ್ಣಾರಾಕ್ ನೀತ್ ಮೆಳನಾತ್ಲ್ಯಾರ್.."
"ಕಿತೆಂ ಕರ್ತಲ್ಯಾತ್ ತುಂಮಿಂ?"
"ಫಕತ್ತ್ ವೇಳ್ ಜಾಪ್ ದಿತಲೊ" ಮಾರ್ಕ್ ಹೆನ್ರಿನ್ ಮೊಬಾಯ್ಲ್ ಬಂದ್ ಕೆಲೆಂ.
"ಸೊಜೆರಾಂನೊ..." ಮಾರ್ಕ್ ಹೆನ್ರಿಚಾ ತಾಳ್ಯಾಂತ್ ಆವೇಶ್ ಆಸ್ಲ್ಲೊ. "ಸಲೀಂ - ಅನಾರ್ ಕಲಿಕ್ ನೀತ್ ದಿಂವ್ಚಾ ಖಾತಿರ್ ಝುಜಾಕ್ ಆಮಿಂ ಭಾಯ್ರ್ ಸರ್ಯಾಂ"
"ಆಮಿಂ ತಯಾರ್ ಆಸಾಂವ್ ಕರ್ನೆಲ್" ಜಮ್ಯಾನ್ ಆವಾಜ್ ಕೆಲೊ.
ಮಾರ್ಕ್ ಹೆನ್ರಿನ್ ಫುಡಾರ್ಪಣ್ ಘೆತ್ಲೆಂ.
"ಚಕ್ರವರ್ತಿ ಅಕ್ಬರ್ ಬಾದ್ಶಾ..."
"ಮುರ್ದಾಬಾದ್...ಮರ್ದಾಬಾದ್.."
"ಸಲೀಂ - ಅನಾರ್ಕಲಿಕಿ ಜೊಡಿ.."
"ಸಲಾಮತ್ ರಹೇ....ಸಲಾಮತ್ ರಹೇ.."
ಸ್ಲೊಗನಾ ಸವೆಂ ವಿದ್ಯಾರ್ಥಿಂಚೊ ಜಮೊ ಮೇಯರಾಚಾ ಬಂಗ್ಲ್ಯಾ ತೆವ್ಶಿನ್ ಚಮ್ಕೊಂಕ್ ಲಾಗ್ಲೊಂ.
*********
ಜಮೊ ಬಂಗ್ಲ್ಯಾ ಲಾಗಿಂ ಪಾವ್ಲೊ. ಪೊಲಿಸಾಂನಿ ಮೊರ್ಚಾ ಸಾಂಬಾಳ್ಲ್ಲೊ.
"ಮಾರ್ಕ್ ಹೆನ್ರಿ.." ಪೊಲಿಸ್ ಅಧಿಕಾರಿ ಫುಡೆಂ ಆಯ್ಲೊ. "ಕಾನೂನ್ ಮೊಡ್ಲ್ಯಾರ್ ತುಂ ಆನಿಂ ತುಜೆ ಸಾಂಗಾಂತಿ ಸರಳಾಂ ಪಾಟ್ಲ್ಯಾನ್ ಪಾವ್ತೆಲ್ಯಾತ್. ಚತ್ರಾಯ್"
"ಆಮಿಂ ಕಾನೂನ್ ಮೊಡುಂಕ್ ಯೇಂವ್ಕ್ನಾಂವ್ ಸರ್. ಆಮ್ಚಾ ಸಾಂಗಾತಿಣಿಕ್ ನೀತ್ ಮೆಳೊಂಕ್ ಜಾಯ್"
"ತುಜ್ಯಾ ಪಾಟ್ಲಾಮೆಕ್ ಶಾಂತ್ ರಾವೊಂಕ್ ಸಾಂಗ್. ಮಾನೆಸ್ತ್ ಮೇಯರಾ ಸವೆಂ ತುಕಾ ಉಲಂವ್ಕ್ ಆವ್ಕಾಸ್ ಮೆಳ್ತಾಲೊ"
ಮಾರ್ಕ್ ಹೆನ್ರಿನ್ ಹಾತಾನ್ ಇಶಾರ್ ಕೆಲೊ.
ಕ್ಷಣಾ ಬಿತರ್ ಪರಿಸರ್ ಶಾಂತ್ ಜಾಲೆಂ.
"ಸಾಂಗಾತ್ಯಾಂನೊ.." ಮಾರ್ಕ್ ಹೆನ್ರಿಚಾ ತಾಳ್ಯಾಂತ್ ದೊಮೊಸಾಚಿ ಧಾರ್ ಆಸ್ಲ್ಲಿ. "ಚಕ್ರವರ್ತಿ ಅಕ್ಬರ್ ಬಾದ್ಶಾನ್ ಉಲವ್ಣ್ಯಾಕ್ ಮ್ಹಾಕಾ ಆಪವ್ಣೆಂ ದಾಡ್ಲಾಂ. ಪಂದ್ರಾ ಮಿನುಟಾಂ ಬಿತರ್ ಶಾಭಿತಾಯೆನ್ ಹಾಂವ್ ಭಾಯ್ರ್ ಯೇನಾ ತರ್...ಝುಜಾಕ್ ತುಮಿಂ ದೆವ್ಯೆತ್. ರಗ್ತಾಪಾತ್ ತುಮಿಂ ಕರ್ಯೆತ್. ಕಾರಾಂ, ಜೀಪಾಂ ಸವೆಂ ಸಗ್ಳ್ಯಾ ಬಂಗ್ಲ್ಯಾಚಿ ದೆಸ್ವಾಟ್ ತುಮಿಂ ಕರ್ಯೆತ್. ಜೀವ್ ಕಾಡ್ತೆಲ್ಯಾಂಚೊ ಜೀಪ್ ತುಮಿಂ ಕಾಡ್ಯೆತ್. ಆಜ್ ಏಕ್ ಕೊಲೆಜ್ ಝುಜಾಕ್ ದೆಂವ್ಲ್ಯಾ. ಉಪ್ರಾಂತ್ ಸಗ್ಳ್ಯಾ ರಾಜ್ಯಾಚ್ಯೊ, ಸಗ್ಳ್ಯಾ ದೇಶಾಚ್ಯೊ ಕೊಲೆಜಿ ಝುಜಾಕ್ ದೆಂವ್ತೆಲ್ಯೊ. ರಗ್ತಾಪಾತ್ ಜಾತಲೊ. ಹ್ಯಾ ಸರ್ವಾಕ್ ಕಾರಣ್ ಅಕ್ಬರ್ ಬಾದ್ಶಾ ಜಾತಲೊ."
"ಕರ್ನೆಲ್ ಮಾರ್ಕ್ ಹೆನ್ರಿ..." ವಿಯೊಲಾ ಕಿಳಂಚ್ಲೆಂ.
"ಜಿಂದಾಬಾದ್....ಜಿಂದಾಬಾದ್"
"ಚಕ್ರವರ್ತಿ ಅಕ್ಬರ್ ಬಾದ್ಶಾ..."
"ಮುರ್ದಾಬಾದ್....ಮುರ್ದಾಬಾದ್.."
"ಸಲೀಂ-ಅನಾರ್ ಕಲಿಕೀ ಜೊಡಿ.."
"ಸಲಾಮತ್ ರಹೇ.....ಸಲಾಮತ್ ರಹೇ.."
ಬೊಟಾಂನಿ ಮೆಜ್ಯೆತ್ ತಿತ್ಲ್ಯಾ ಪೊಲಿಸಾಂನಿ ಅಧಿಕಾರಿಂಕ್ ಬಿರಾಂತೆಚ್ಯಾ ದೊಳ್ಯಾಂನಿ ಪಳೆಯ್ಲೆಂ. ಉಜ್ಯಾ ಲಾಗಿಂ ಖೆಳ್ಚೆಂ ಧಯ್ರ್ ತಾಚೆಂ ಲಾಗಿಂ ನಾತ್ಲ್ಲೆಂ.
***************
ಮೇಯರಾಚಾ ದೊಳ್ಯಾಂನಿ ಖಂತ್ ಆಸ್ಲ್ಲಿ.
ಪೊಲಿಸ್ ಅಧಿಕಾರಿ ಸವೆಂ ಮಾರ್ಕ್ ಹೆನ್ರಿ ಹೊಲಾಂತ್ ಪ್ರವೇಶ್ ಜಾಲೊ.
"ತರ್ನಾಟ್ಯಾ.." ಮೇಯರಾನ್ ಚಿರುಟಾಚೊ ಧಮ್ಮ್ ಮಾರ್ಲೊ. "ತುಜ್ಯಾ ಹುಕ್ಮೆನ್ ಆನಿಂ ಥೊಡಾಚ್ ವೆಳಾನ್ ಕಿತೆಂ ಸರ್ವ್ ಘಡೊಂಕ್ ಸಾಧ್ಯ್ ಆಸಾ ಮ್ಹಣ್ ತುಂ ಜಾಣಾ ಆಸಾಯ್?"
ಮಾರ್ಕ್ ಹೆನ್ರಿನ್ ಫಕತ್ತ್ ಭುಜಾಂ ಉಡಯ್ಲಿಂ.
"ತುಂವೆಂ ಜಾಪ್ ದಿಲಿನಾಂಯ್ ಮಾರ್ಕ್ ಹೆನ್ರಿ"
"ಅನಾರ್ಕಲಿಕ್ ನೀತ್ ಮೆಳಾತ್ ತರ್....ರಗ್ತಾಪಾತ್ ಜಾಂವೊಂ ನಾಂ".
"ತುಕಾ ಆನಿಂ ತುಜ್ಯಾ ಸಾಂಗಾತ್ಯಾಂಕ್ ಜಯ್ಲಾಂತ್ ಹಾಂವ್ ಪಿಚಾರ್ ಕರುಂಕ್ ಸಕ್ತಾಂ. ಹೆಂ ತುವೆಂ ವಿಸ್ರೊಂಚೆಂ ನಹಿಂ."
"ತ್ಯಾ ಫುಡೆಂ.." ಮಾರ್ಕ್ ಹೆನ್ರಿ ಪಾಂಯಾಚೆರ್ ಧಲ್ಲೊ. "ರಗ್ತಾಪಾತ್ ಆನಿಂ ದೆಸ್ವಾಟ್ ಜಾತೆಲಿ."
ಮೇಯರ್ ಉಟೊನ್ ಉಬೊ ಜಾಲೊ. ತಾಚಿ ನದರ್ ಪೊಲಿಸ್ ಅಧಿಕಾರಿಚಾ ದೊಳ್ಯಾಂಕ್ ಆದಾಳ್ಳಿ.
"ಕಿತೆಂ ಮ್ಹಣ್ತಾಯ್ ಒಫಿಸರ್?"
"ಹಾಂವ್ ತುಂಮ್ಚ್ಯಾ ಹುಕ್ಮೆಕ್ ರಾಕೊನ್ ಆಸಾಂ ಸರ್"
"ನಾದಾನ್ ಭುರ್ಗೊ.." ಮೇಯರಾನ್ ಚಿರುಟಾಚೊ ಲಾಂಬ್ ಧಮ್ಮ್ ಮಾರ್ಲೊ. "ತರ್ನಟ್ಪಾಣಾಚೊ ಸ್ಪಿರಿತ್ ಶಿರಾಂನಿ ಉಡ್ಕಾಣಾಂ ಘಾಲ್ತಾ" ಮಾನೆಸ್ತಾನ್ ಫರತ್ ಬಸ್ಕಾ ಆಪ್ಣಾಯ್ಲಿ. " ಆನೂಶಾಕ್ ಹಾಂವ್ ಸ್ವೀಕಾರ್ ಕರ್ಚೊನಾಂ"
"ಕಿತ್ಯಾಕ್ ಸ್ವೀಕಾರ್ ಕರಿನಾಂಯ್? ಸೊಭಾಯ್ ತಾಚೆ ಲಾಗಿಂ ನಾ? ಬರೆಂ ಗೂಣ್ ತಾಚೆಲಾಗಿಂ ನಾಂತ್? ಶಿಕಾಪ್ ತಾಚೆ ಲಾಗಿಂ ನಾಂ? ವ್ಹಡಿಲಾಂ ಲಾಗಿಂ ದುಡು ನಾಂ? ಕಸಲ್ಯಾ ಕಾರಣಾ ಖಾತಿರ್ ತುಂ ತಾಕಾ ಸ್ವೀಕಾರ್ ಕರಿನಾಂಯ್?"
ಮೇಯರಾನ್ ಮೌನ್ ಸಾಂಬಾಳ್ಳೆಂ.
"ಹರ್ ಏಕಾ ಸವಲಾಕ್ ಜವಾಬಿ ಆಸ್ತಾತ್"
"ತೆಂ ಮ್ಹಜ್ಯಾ ದುಸ್ಮಾನಾಚೆಂ ಧುವ್ ಜಾವ್ನಾಸಾ"
"ತುಜೊ ದುಸ್ಮಾನ್ ತಾಚೊ ವ್ಹಡೀಲ್ ಜಾವ್ನಾಸಾ. ಆನೂಶಾ ತುಜೆಂ ದುಸ್ಮಾನ್ ಕಶೆಂ ಜಾತೆಲೆಂ? ವ್ಹಡಿಲಾಚೊ ರಾಗ್ ಭುರ್ಗ್ಯಾಚೆರ್ ಕಾಡ್ತಾಯ್?"
"ತರ್ ಆಯ್ಕ್.." ಮೇಯರಾನ್ ಚಿರುಟ್ ಏಶ್-ಟ್ರೇಂತ್ ಗಳಯ್ಲೆಂ. "ಮ್ಹಜ್ಯಾ ಭಯ್ಣಿಕ್ ಘಾತ್ ಕರುನ್ ದುಸ್ರ್ಯಾ ಚಲಿಯೆ ಸವೆಂ ತಾಚೊ ವ್ಹಡಿಲ್ ಲಗ್ನ್ ಜಾಲ್ಲೊ. ಮ್ಹಜೆಂ ಭಯ್ಣ್ ಯಶೋದಾ ಆಜೂನ್ ಅಂಕ್ವಾರ್ ಆಸಾ"
"ದುಸ್ಮಾನಾಕ್ ಮಾಫ್ ಕಿತ್ಯಾಕ್ ಕರಿನಾಂಯ್?"
"ಹಾಂವ್ ಈಶ್ವರ್ ನ್ಹಂಯ್"
ಮಾರ್ಕ್ ಹೆನ್ರಿ ಲಾಗಿಂ ಉತ್ರಾಂ ನಾತ್ಲ್ಲಿಂ.
ತಿತ್ಲ್ಯಾರ್.........
ಲಾಗ್ಶಿಲೆಂ ಬಾಗಿಲ್ ಉಗ್ತೆಂ ಕರುನ್ ಮೇಯರಾಚಿ ಭಯ್ಣ್ ಯಶೋದಾ ಹೊಲಾಂತ್ ಪ್ರವೇಶ್ ಜಾಲಿ.
"ಅಣ್ಣಾ...." ತಿಚೊ ತಾಳೊ ಕಾಂಪೊನ್ ಆಸ್ಲ್ಲೊ. "ಅನೂಶಾಕ್ ಸ್ವೀಕಾರ್ ಕರ್ ಮ್ಹಜ್ಯಾ ಬಾವಾ. ತ್ಯಾ ಚೆಡ್ವಾನ್ ಕಸಲಿ ಚೂಕ್ ಕೆಲ್ಯಾ? ತಾಚಾ ವ್ಹಡಿಲಾನ್ ಮ್ಹಾಕಾ ಘಾತ್ ಕೆಲ್ಲೊ. ತೊ ಖಂಯ್ಯಿ ಆಸೊಂ, ಕಸೊಯಿ ಆಸೊಂ, ಸದಾಂಚ್ ಸುಖಿ ಆಸೊಂ. ಮ್ಹಜ್ಯಾ ಧುವೆಕ್ ಸ್ವೀಕಾರ್ ಕರ್ ಅಣ್ಣಾ". ತಿ ದಳ್ದಳ್ಯಾ ರಡ್ಲಿ. "ಸ್ತ್ರೀ ಸಂತತ್ ಫಕತ್ತ್ ತ್ಯಾಗ್ ಕರುಂಕ್ ಜಲ್ಮಾಲ್ಯಾ. ಫಾರಿಕ್ಪಣ್ ಘೆಂವ್ಚಾ ಖಾತಿರ್ ನ್ಹಂಯ್"
"ಮ್ಹಜ್ಯಾ ಭಯ್ಣಿ..." ಯಶೋದಾಚೆ ಬಾವ್ಳೆ ಆರಾಯ್ಲೆ ಮೇಯರಾನ್. "ಆಸಲೆ ಸಾಕ್ರಿಫಿಸ್ ಕಿತ್ಯಾ ಖಾತಿರ್ ತುಂ ಕರುನ್ ಆಸಾಯ್?"
"ತ್ಯಾಗಾಂತ್ ಸ್ವರ್ಗ್ ಆಸಾ ಆಣ್ಣಾ..." ಮೇಯರಾಚಾ ವೆಂಗೆಂತ್ ತಿ ವಿಲೀನ್ ಜಾಲಿ. "ಮ್ಹಜ್ಯಾ ಧುವೆಕ್ ಸ್ವೀಕಾರ್ ಕರ್ ಮ್ಹಜ್ಯಾ ಭಾವಾ"
ಭಯ್ಣಿಚೆಂ ಮಾತೆಂ ಪೊಶೆಲೆಂ ಮೇಯರಾನ್.
"ದುಸ್ರಿ ವಿಂಚವ್ಣ್ ನಾಂ...." ಮೇಯರಾನ್ ಭಯ್ಣಿಕ್ ವೆಂಗೆ ಥಾವ್ನ್ ವಿಂಗಡ್ ಕೆಲಿ. " ಭಯ್ಣಿಚಾ ಸಾಕ್ರಿಫಿಸಾ ಮುಖಾರ್ ರಗ್ತಾಪಾತ್ ಸಲ್ವಾಲಾ".
ಯಶೋದಾಚಾ ವದನಾರ್ ನೆಕೆತ್ರಾಂ ಉಜಾಳ್ಳಿಂ.
"ಥ್ಯಾಂಕ್ ಯೂ ಸರ್...." ಮಾರ್ಕ್ ಹೆನ್ರಿನ್ ಮಾನ್ ಬಾಗಾಯ್ಲೊ. "ಇತಿಹಾಸಾಂತ್ ಯೇವ್ನ್ ಗೆಲ್ಲ್ಯಾ ಅಕ್ಬರ್ ಬಾದ್ಶಾನ್ ಅನಾರ್ಕಲಿಕ್ ಸ್ವೀಕಾರ್ ಕೆಲೆಂನಾಂ. ಪುಣ್ ತುವೆಂ ದುಸ್ರೊ ಇತಿಹಾಸ್ ಚರಿತ್ರೆಚಾ ಪಾನಾಂನಿ ಬರಂವ್ಚೊ ಅವ್ಕಾಸ್ ದಿಲೊನಾಂಯ್. ತುಜ್ಯಾ ಸಲ್ವಣೆಂತ್ ತುಂ ಜಿಕ್ಲಾಯ್ ಸರ್. ಮ್ಹಜ್ಯಾ ಉತ್ರಾಂನಿ ತುಕಾ ದುಕ್ಲಾಂ ತರ್...ತುಜ್ಯಾ ದುಸ್ರ್ಯಾ ಪುತಾಕ್ ಮಾರ್ಕ್ ಹೆನ್ರಿಕ್ ತುವೆಂ ಬೊಗ್ಸುಂಕ್ ಜಾಯ್"
"ಯಸ್ ಕರ್ನಲ್" ತರ್ನಾಟ್ಯಾಚೆಂ ಮಾತೆಂ ಪೊಶೆಲೆಂ ಮೇಯರಾನ್.
*************
ವಿದ್ಯಾರ್ಥಿಂಚೊ ಜಮೊ ಫಾಸಾಳ್ಳೊ.
ಮಾರ್ಕ್ ಹೆನ್ರಿ ಆನಿಂ ವಿಯೊಲಾ ಚಲೊನ್ ಆಸ್ಲ್ಲಿಂ.
ಕಾಳೊಕಾಚೆಂ ಯೆಣೆಂ ಜಾಲ್ಲೆಂ.
"ಆತಾಂ ವೇಳ್ ಉದೆಲಾ ಮಾರ್ಕ್.." ವಿಯೊಲಾನ್ ಚಾಲ್ ಸವ್ಕಾಸ್ ಕೆಲಿ. "ಸತಾ ವಯ್ಲೊ ಪಡ್ದೊ ಕಾಡ್ನ್ ಉಡಂವ್ಚೊ ವೇಳ್ ಉದೆಲಾ"
ಮಾರ್ಕ್ ರಾವ್ಲೊ.
ತಾಚ್ಯಾ ದೊಳ್ಯಾಂನಿ ಸವಾಲಾಚೆ ಅಂಕ್ಡೆ ಉದೆಲ್ಲೆ.
"ಮಾರ್ಕ್....."
"ಉಗ್ತ್ಯಾನ್ ಉಲಯ್"
"ಮ್ಹಜ್ಯಾ ವೊಂಟಾಚೊ ಉಮೊ ಘೆ ಮಾರ್ಕ್"
"ವಾಟ್!!?" ಏಕ್ ಮೇಟ್ ಪಾಟಿಂ ಸರ್ಲೊ ಮಾರ್ಕ್. "ಚರ್ಬೆಲಾಂಯ್?"
"ಹಾಂವ್ ತುಜೊ ಮೋಗ್ ಕರ್ತಾಂ ಮಾರ್ಕ್"
"ಪಿಶೆಂ ಜಾಲಾಂಯ್?"
"ಮ್ಹಾಕಾ ಸ್ವೀಕಾರ್ ಕರ್ ಮಾಕ್"
"ಮತಿಭ್ರಷ್ಟ್ ಜಾಲಾಯ್?"
"ಥೊಡ್ಯಾಚ್ ವೊರಾಂ ಪಯ್ಲೆಂ ಹಾಂವೆಂ ಉಚಾರ್ಲ್ಲಿಂ ಉತ್ರಾಂ ಸತ್ ಜಾಂವ್ದಿತ್ ಮಾರ್ಕ್. ತುಜ್ಯಾ ಗೊಪಾಂತ್ ಮ್ಹಾಕಾ ಘೆ ಮಾರ್ಕ್"
"ಆರ್ಥರ್ ಫಾಯ್ಸಾಕ್ ಖುರ್ಸಾರ್ ಮಾರ್ತಾಯ್?"
ತೆಂ ಹಾಸ್ಲೆಂ
"ಕಿತ್ಯಾಕ್ ಹಾಸ್ತಾಯ್ ಪಾಡಾರಿ ಚೆಡ್ವಾ?" ವಿಯೊಲಾಚಿಂ ಭುಜಾಂ ಆರಾಯ್ಲಿಂ ಮಾರ್ಕ್ ಹೆನ್ರಿನ್. "ಮೊಗಾಕ್ ಘಾತ್ ಕರ್ತಾಯ್?"
"ಕರ್ನೆಲ್ ಮಾರ್ಕ್ ಹೆನ್ರಿಚಾ ವ್ಯಕ್ತಿತ್ವಾ ಮುಖಾರ್ ಅರ್ಥರ್ ಫಾಯ್ಸ್ ಶೂನ್ಯ್ ಜಾವ್ನಾಸಾ". ಚೆಡ್ವಾಚೆ ದೊಳೆ ಫಳ್ಪಳ್ಳೆ. "ಅರ್ಥರ್ ಫಾಯ್ಸಾಕ್ ಹಾಂವೆಂ ದಫನ್ ಕೆಲಾ. ಮ್ಹಜ್ಯಾ ನಿಸ್ಕಳ್ ಜಿವಿತಾಂತ್ಲೊ ಪ್ರಥಮ್ ಮೋಗ್ ತುಂ ಜಾವ್ನಾಸಾಯ್"
"ಫಟಿ ಮಾರ್ತಾಯ್ ತುಂ". ಕಿಳಂಚ್ಲೊ ಮಾರ್ಕ್. "ಮೋಗ್ ಖೆಳ್ ಮ್ಹಣ್ ಚಿಂತಾಯ್?"
"ಅರ್ಥರ್ ಫಾಯ್ಸ್ ಏಕ್ ಕಾಲ್ಪನಿಕ್ ಪಾತ್ರ್ ಜಾವ್ನಾಸ್ಲ್ಲೊ ಮಾರ್ಕ್". ವಿಯೊಲಾಚೆ ದೊಳೆ ತೇವಾಭರಿತ್ ಜಾಲೆ. "ಕುಡಿ ಅತ್ಮ್ಯಾನ್ ಹಾಂವ್ ತುಜಿಂ ಜಾವ್ನಾಸಾ ಮೊಗಾ"
ಮಾರ್ಕ್ ಹೆನ್ರಿ ವಾಟಾರ್ಲ್ಲ್ಯಾ ದೊಳ್ಯಾಂನಿ ವಿಯೊಲಾಕ್ ಪಳೆಂವ್ಚಾರ್ ಪಡ್ಲೊ.
"ಎಕಾಚ್ ವಾಡ್ಯಾಂತ್ ಆಮ್ಚೊಂ ಜಲ್ಮ್ ಜಾಲ್ಲೊ. ಭುರ್ಗ್ಯಾಪಣಾ ಥಾವ್ನ್ ತುಕಾ ಹಾಂವ್ ಆಶೆಲಿಂ. ಪುಣ್ ಮೋಗ್ ಉಚಾರುಂಕ್ ಸಕ್ಲಿಂನಾಂ. ತುಜ್ಯಾ ಕಾಳ್ಜಾಚ್ಯಾ ತರಂಗಾಂನಿಂ ಮೊಗಾಚೆಂ ಸ್ಪಂದನ್ ಜಾಂವ್ಕ್ ನಾ ಮ್ಹಣ್ ಫಟ್ ತುವೆಂ ಉಚಾರ್ಲಿಯ್. ಕಿತ್ಯಾಕ್? ಜಾಪ್ ದೀ ಮ್ಹಾಕಾ. ಫಕತ್ತ್ ದುಸ್ರ್ಯಾಂ ಖಾತಿರ್ ಸಾಕ್ರಿಫಿಸ್ ಬೆಟಂವ್ಕ್ ಜಲ್ಮಾಲಾಯ್? ಅರ್ಥರ್ ಫಾಯ್ಸಾಚೆಂ ನಾಂವ್ ಆಯ್ಕೊನ್ ಕಾಳಿಜ್ ತುಜೆಂ ಫಾಪ್ಸಲೆಂನಾಂ? ವಿಯೊಲಾಚಾ ಮೊಗಾ ಖಾತಿರ್, ವಿಯೊಲಾಚಾ ಸುಖಾ ಖಾತಿರ್ ಸಾಕ್ರಿಫಿಸಾಚಾ ಸರಿಯೆರ್ ಜೀವಾಚಿ ಬಲಿ ದೀಂವ್ಕ್ ತಯಾರ್ ಜಾಲ್ಲೊಯ್?"
ಮಾರ್ಕ್ ಹೆನ್ರಿ ಮೊನೊ ಜಾಲ್ಲೊ.
"ಮ್ಹಾಕಾ ಗೊಪಾಂತ್ ಘೆ ಮ್ಹಜ್ಯಾ ಮೊಗಾ" ವಿಯೊಲಾ ರಡ್ಲೆಂಚ್.
"ಮ್ಹಜ್ಯಾ ಪೊಕ್ರಿ ಚೆಡ್ವಾ..." ಮಾರ್ಕ್ ಹೆನ್ರಿನ್ ಹಾತ್ ವಿಸ್ತಾರಾಯ್ಲೆ. "ದುಸ್ರ್ಯಾ ಪಾವ್ಟಿಂ ಮ್ಹಜಿ ಪರೀಕ್ಶಾ ಘೆನಾಕಾ"
"ಯಸ್ ಮೈ ಲವ್" ಉತ್ರಾಂ ಸವೆಂ ವಿಯೊಲಾ, ಮಾರ್ಕ್
ಹೆನ್ರಿಚ್ಯಾ ಗೊಪಾಂತ್ ವಿಲೀನ್ ಜಾಲೆಂ.
ಕಥಾಝರ್
About us | Feedback | Contact us
Copyright © 2005
DAAIZ.COM All rights reserved.
Page concept, designed and maintained by Ashawadi
Publications
