ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಕಥಾಝರ್ - 51. ಉತ್ತೇಜನ್
ಜೋಯ್ ಪಾಲಡ್ಕಾ: ಎಕಾ ಕಾಣ್ಯೆಗಾರಾಚಿ ಖರಿ ಜವಾಭ್ದಾರಿ ಜಾವ್ನಾಸಾ, ಸಮಾಜೆಚಾ ಸಮಸ್ಯಾಂಚೆರ್ ಆರ್ಸೊ ಧರ್ಚಿ ತಶೆಂಚ್ ತ್ಯಾ ಸಮಸ್ಯಾಚೆರ್ ಜೊಕ್ತೊ ಪರಿಹಾರ್ ದಿಂವ್ಚೊ. ಅಸಲಿಚ್ಚ್ ಜವಾಭ್ದಾರಿ ಹ್ಯಾ ಕಾಣ್ಯೆಂತ್ಯೀ ದಿಸೊನ್ ಯೆತಾ. ಆಮ್ಚಾ ಜಿಣ್ಯೆಂತ್ ಆಮ್ಚೆಲಾಗಿಂ ನಾತ್ಲ್ಲ್ಯಾ ಸಭಾರ್ ಸಂಗ್ತ್ಯಾಂವಿಶಿಂ ಆಮಿಂ ಚಿಂತುನ್ ಆಮ್ಚೆಂ ಸಮಧಾನ್ ವಿಭಾಡ್ ಕರ್ನ್ ಜಿಯೆತಾಂವ್ ತರ್ಯೀ ಆಮ್ಚೆಲಾಗಿಂ ಆಸ್ಚೆಂ ಚಿಂತುಂಕ್ ವಚಾನಾಂವ್. ಜೋಯ್ ಪಾಲಡ್ಕಾನ್ ಕೊಂಕ್ಣೆಂತ್ ಸಭಾರ್ ಮಟ್ವ್ಯೊ ಕಾಣ್ಯೊ ಬರಯ್ಲ್ಯಾತ್. ಚಡ್ತಾವ್ ಸಾಮಾಜಿಕ್ ಕಾಣ್ಯೊ ಬರಂವ್ಚಾ ಹಾಚಿಂ ಬರ್ಪಾಂ ಸಮಾಜಿಕ್ ಲಿಸಾಂವ್ ಜಾತಿತ್.
ಜೋಯ್ ಪಾಲಡ್ಕಾ
ಎಕಾ ಅಸ್ಪತ್ರೆಚ್ಯಾ ತಿಸ್ರ್ಯಾ ಮಾಳಿಯೆರ್ ಎಕಾ ಕುಡಾಂತ್ ದೋಗ್ ಪ್ರಾಯೆಸ್ತ್ ಪಿಡೆಸ್ತ್ ಆಸ್ಲ್ಲೆ. ಎಕ್ಲ್ಯಾಚೆಂ ನಾಂವ್ ಲಾದ್ರು ಆನಿ ದುಸ್ರ್ಯಾಚೆಂ ನಾಂವ್ ಪೆದ್ರು. ತೆ ಆಸ್ಲ್ಲ್ಯಾ ತ್ಯಾ ಕುಡಾಕ್ ಫಕತ್ತ್ ಎಕ್ ಜನೆಲ್ ಮಾತ್ರ್ ಆಸ್ಲ್ಲೆಂ ಆನಿ ಲಾದ್ರುಚೆಂ ಖಟ್ಲೆಂ ತ್ಯಾ ಜನೆಲಾಚ್ಯಾ ಬದ್ಲೆಕ್ಚ್ ಆಸ್ಲ್ಲೆಂ.
ಪೆದ್ರು ಆಸ್ಪತ್ರೆಕ್ ಭರ್ತಿ ಜಾವ್ನ್ ಏಕ್ ಮಹಿನೊ ಜಾಲ್ಲೊ. ಆವ್ಘಡಾಂತ್ ಜಕ್ಮಿ ಜಾಲ್ಲ್ಯಾನ್ ತಾಕಾ ಉಡೊಂಕ್ ವಾ ಬಸೊಂಕ್ ಜಾಯ್ನಾತ್ಲ್ಲೆಂ. ದೂಕ್ ಸೊದುನ್ ಆನಿ ವಕ್ತಾಂ ಗೀಳ್ನ್ ತೊ ಸಲ್ವಾಲ್ಲೊ. ಗರ್ಮೆಚೆ ದೀಸ್ ಜಾಲ್ಲ್ಯಾ ಪಾಟ್ ತಾಚಿ ಉಬೆತಾಲಿ. ನರ್ಸ್ ಯೇವ್ನ್ ಕೂಸ್ ಪರ್ತಿತಾ ಪರ್ಯಾಂತ್ ತೊ ಎಕಾ ರುಕಾ ಕುಡ್ಕ್ಯಾಪರಿಂ ಪಡೊನ್ ಆಸ್ತಾಲೊ.
ಲಾದ್ರು ಆಸ್ಪತ್ರೆಕ್ ಭರ್ತಿ ಜಾವ್ನ್ ಧಾ ಭಾರಾ ದೀಸ್ ಜಾಲ್ಲೆ ಮಾತ್ರ್. ಲಾದ್ರುಚಿ ಕೂಡ್ಯ್ ಆವ್ಘಡಾಂತ್ ಜಕ್ಮಿ ಜಾಲಿ ತರ್ಯ್ ಬಸಯ್ಲ್ಯಾರ್ ಥೊಡೊ ವೇಳ್ ತೊ ಬಸೊಂಕ್ ಸಕ್ತಾಲೊ. ನರ್ಸ್ ಸದಾಂಯ್ ಸಾಂಜೆರ್ ಪಾಂಚ್ ವೊರಾರ್ ಯೇವ್ನ್ ಲಾದ್ರುಕ್ ಬಸಯ್ತಾಲಿ ಆನಿ ಸ ವೊರಾರ್ ನಿದಾಯ್ತಾಲಿ.
ಪೆದ್ರು ನಿದ್ಲೆಲ್ಯಾ ಕಡೆ ಥಾವ್ನ್ "ಮ್ಹಾಕಾ ಮರಣ್ ದಾಡ್ ದೆವಾ" ಮ್ಹಣ್ ಮಾಗ್ಚೆಂ ಪಳವ್ನ್ ಲಾದ್ರುಕ್ ತಾಚಿ ಭಿರ್ಮತ್ ದಿಸ್ತಾಲಿ. ಜಾಯ್ತೆ ದೀಸ್ ಥಾವ್ನ್ ಬಾಯ್ಲೊ ಸಂಸಾರ್ ಪಳೆನಾತ್ಲ್ಲೊ ಪೆದ್ರು ಪಿಸಾಂತುರ್ ಜಾಲ್ಲೊ, ಜೀವನಾಂತ್ ತಾಚ್ಯಾ ಅಂದ್ಕಾರ್ ಭರ್ಲ್ಲೊ.
ಪೆದ್ರುಚಿ ಪರಿಸ್ಥಿತಿ ಸಮ್ಜಾಲ್ಲ್ಯಾ ಲಾದ್ರುಕ್ ಏಕ್ ಉಪಾಯ್ ಝಳ್ಕಾಲೊ. ಭಲಾಯ್ಕಿ ಬರಿ ನಾತ್ಲ್ಯರ್ಯ್ ಸಾಂಜೆಚೊ ಎಕ್ ಘಂಟೊ ತಾಣೆ ಪೆದ್ರುಖಾತಿರ್ ಖರ್ಚುಂಚೊ ನಿರ್ಣಯ್ ಕೆಲೊ. ಪಾಂಚ್ ವೊರಾರ್ ನರ್ಸಾನ್ ತಾಕಾ ಬಸಯಿಲ್ಲೆಂಚ್ ಜನೆಲಾಂತ್ಲ್ಯಾನ್ ಭಾಯ್ರ್ ಪಳವ್ನ್ ಪ್ರಕೃತೆಚಿ ಸೊಭಾಯ್ ತಾಣೆ ಪೆದ್ರುಕ್ ವಿವರ್ಸುನ್ ಸಾಂಗೊಂಕ್ ಸುರು ಕೆಲೆಂ.
"ಹಾಂಗಾಸರ್ ಸಕಯ್ಲ್ ಎಕ್ ಸೊಭಿತ್ ತಳೆಂ ಆಸಾ, ತ್ಯಾ ತಳ್ಯಾಚಾ ಭಂವ್ತೊಣಿಂ ಸೊಭಿತ್ ಫುಲಾಂ ಫುಲ್ಲ್ಯಾಂತ್. ರಂಗ್ ರಂಗಾಳ್ ಪಿಸೊಳ್ಯಾಂಚೊ ಹಿಂಡ್ ತ್ಯಾ ಫುಲಾಂಚ್ಯಾ ಭಂವ್ತಣಿ ಉಭ್ತಾನಾ ಪಳೆಂವ್ಕ್ ಸೊಭಿತ್ ದಿಸ್ತಾ. ತಳ್ಯಾಂತ್ ಬಾದ್ಕಾಂ ಉಪ್ಯೆತಾತ್, ಲ್ಹಾನ್ ಭುರ್ಗಿಂ ಕಾಗ್ದಚ್ಯೊ ದೊಣಿ ಕರ್ನ್ ಉದ್ಕಾಂತ್ ಖೆಳ್ತಾತ್. ತಾಂಚಿಂ ವ್ಹಡಿಲಾಂ ತಳ್ಯಾಚಾ ಬಾಗ್ಲೆನ್ ಆಸ್ಚಾ ಬಾಂಕಾರ್ ಬಸೊನ್ ಗಜಾಲಿ ಕರ್ತಾತ್. ಮೊಳಾಬ್ ತಾಂಬ್ಶೆಂ ಜಾವ್ನ್ ಯೆತಾ, ಸಗ್ಳೊ ದೀಸ್ ವಾವ್ರ್ ಕರುನ್ ಥಕ್ಲ್ಲೊ ಸುರ್ಯೊ ವಿಶೆವ್ ಘೆಂವ್ಚ್ಯಾಕ್ ಆಪ್ಲ್ಯಾ ಠಿಕಾಣ್ಯಾಕ್ ವಚೊಂಕ್ ಭಾಯ್ರ್ ಸರ್ಲಾ. ಮೋಗ್ ಕರ್ಣಾರಾಂ ಹಾತಾಕ್ ಹಾತ್ ಧರ್ನ್ ಮೊಗಾಚ್ಯೊ ಗಜಾಲಿ ಕರ್ತಾತ್. ಆನಿ ಕಾಳೊಕ್ ದಾಟ್ ಜಾಂವ್ಕ್ ರಾಕ್ತಾತ್. ತಳ್ಯಾಚಾ ಬಗ್ಲೆನ್ ಎಕ್ ಸಾಂಖೊವ್ ಆಸಾ ಆನಿ ತಾಚೆ ವಯ್ಲ್ಯಾನ್ ಕಾರಾಂ ಬಸ್ಸಾಂ ಆಶಾರ್ ಪಾಶಾರ್ ಜಾತಾತ್ ತೆಂ ಪಳಂವ್ಕ್ ಬರೆಂ ಲಾಗ್ತಾ. ತಳ್ಯಾಚಾ ಪಲ್ತೊಡಿ ಎಕ್ ರೂಕ್ ಆಸಾ, ತಾಚೆರ್ ಸುಕ್ಣ್ಯಾಂನಿ ಘೊಂಟೆರಾಂ ಭಾದ್ಲ್ಯಾಂತ್. ಭಾಯ್ರ್ ಗೆಲ್ಲಿಂ ಸುಕ್ಣಿಂ ಯೆಂವ್ಚೊ ವೇಳ್ ಜಾಲೊ ಜಾಲ್ಲ್ಯಾನ್ ತಾಂಚಿಂ ಪಿಲಾಂ ಗೊಮ್ಟಿ ಲಾಂಬ್ ಕರುನ್ ’ಚಿಲಿ ಪಿಲಿ’ ಆವಾಜ್ ಕರ್ತಾತ್. ಗರ್ಮೆಚೆ ದೀಸ್ ತರ್ಯ್ ವಾತಾವರಣ್ ಥಂಡ್ ಆಸಾ. ತಸ್ಶೆಂ ಜಾಲ್ಲ್ಯಾನ್ ಲೊಕಾಚಿ ಹಾಂಗಾ ಖೆಟ್ ಜಾಲ್ಯಾ. ಬೇಲ್ಪುರಿ ವಿಕ್ತಾ, ಮಾಂಕೊಡ್ವಾಲಾ ಮಾಂಕೊಡ್ ನಾಚಯ್ತಾ. ವ್ಹಡಾಂ ತಶೆಂ ಲ್ಹಾನಾಂ ಮಸ್ತ್ ಮಜಾ ಭಗ್ತಾತ್" ಲಾದ್ರುನ್ ಪ್ರಕೃತೆಚಿ ಸೊಭಾಯ್ ವರ್ಣುನ್ ಸಾಂಗ್ತಾನಾ ಪೆದ್ರುಕ್ ಆಯ್ಕೊಂಕ್ ಬರೆಂ ಲಾಗ್ತಾಲೆಂ.
ಪೆದ್ರುಚ್ಯಾ ಜಿವಿತಾಂತ್ ಉಜ್ವಾಡಾಚಿಂ ಕೀರ್ಣಾಂ ಪೆಟೊಂಕ್ ಲಾಗ್ಲಿಂ. ಆಂದ್ಕಾರ್ ಪಯ್ಸ್ ಸರ್ಲೊ. ಲಾದ್ರುನ್ ಎಕಾ ವೊರಾನ್ ವಿವರ್ಸಿಲ್ಲಿ ಘಡಿತಾಂ ತಾಚ್ಯಾ ಮತಿಚ್ಯಾ ಪಡ್ದ್ಯಾರ್ ಘುಂವ್ತಾನಾ ದುಸ್ರೊ ದೀಸ್ ಉದೆಲೊ.
ಸಾಂಜೆಚಿಂ ಪಾಂಚ್ ವೊರಾಂ ಕೆದಾಳಾ ಜಾತಾತ್ಗೀ ಮ್ಹಣ್ ಪೆದ್ರು ರಾಕೊನ್ ರಾವ್ತಾಲೊ ಆನಿ ತ್ಯಾಎಕಾ ವೊರಾ ಖಾತಿರ್ ತಾಣೆ ಜಿಯೆಂವ್ಕ್ ಸುರು ಕೆಲೆಂ. ಮಾಯಾಗ್ ಜಾಲ್ಲೊ ತಾಚೊ ಸಂತೊಸ್ ಪಾಟಿಂ ಆಯ್ಲೊ.
ಥೊಡ್ಯಾಚ್ ದಿಸಾಂನಿ ತಾಣೆಂ ದೆವಾಕ್ ದುರ್ಸೊಂಚೆಂ ಆನಿ ಮರಣ್ ಮಾಗ್ಚೆಂ ಭಂಧ್ ಕೆಲೆಂ.
ಪೆದ್ರುಚಿ ಬಲಾಯ್ಕಿ ಸುದ್ರೊನ್ ಯೆತಾಲಿ. ಆನಿ ಹೆಂ ಸಮ್ಜಲ್ಲ್ಯಾ ಲಾದ್ರುಕ್ ಖುಶಿ ಜಾಲಿ. ಪಾಂಚ್ ವೊರಾಂ ಕೆದಾಳಾ ಜಾತಾತ್ಗೀ ಮ್ಹಣ್ ಲಾದ್ರುಯ್ ರಾಕೊನ್ ರಾವ್ತಾಲೊ ಆನಿ ಚಡ್ ಉರ್ಭೆನ್ ಆಪ್ಲೆಂ ಕಾಮ್ ಕರ್ತಾಲೊ. ಆಸ್ಪತ್ರೆಚ್ಯಾ ಖಟ್ಲ್ಯಾರ್ ಬಸೊನ್ ಭಾಯ್ಲಿ ಸೊಭಾಯ್ ಲಾದ್ರು ವಿವರ್ಸಿತಾನಾ, ತೆಂ ಆಅಯ್ಕಾಲ್ಲ್ಯಾ ಪೆದ್ರುಕ್ ಭಾಯ್ರ್ ವಚೊನ್ ಭಂವೊನ್ ಆಯಿಲ್ಲ್ಯಾ ಪರಿಂ ಭಗ್ತಾಲೆಂ.
ತ್ಯಾ ಎಕಾ ಸಾಮ್ಜೆರ್ ಲಾದ್ರುಚಿ ಭಲಾಯ್ಕ್ ಭಿಗಡ್ಲಿ. ನರ್ಸಾನ್ ತಾಕಾ ಬಸ್ಚೆಂ ನಾಕಾ ಮ್ಹಣ್ ಸಂಗ್ಲ್ಯಾರ್ಯ್ ತೊ ಆಯ್ಕಾಲೊ ನಾ. ನರ್ಸ್ ತಾಕಾ ಬಸವ್ನ್ ಗೆಲಿ. ಆನಿ ಹರ್ಶೆಂಚಾ ಪರಿಂ ತ್ಯಾ ದಿಸಾಯ್ ಎಕ್ ವೋರ್ ಲಾದ್ರುನ್ ಭಾಯ್ರ್ ಕಿತೆಂ ಘಡ್ತಾ ತೆಂ ಪೆದ್ರುನ್ ವಿಚರ್ಸುನ್ ಸಾಂಗ್ಲೆಂ.
ದುಸ್ರೆ ದಿಸಾ ಸಾಕಾಳಿಂ ವಕ್ತಾಂ ದಿಂವ್ಚಾಕ್ ನರ್ಸ್ ಆಯ್ಲಿ. ಪೆದ್ರುಕ್ ಇಂಜಕ್ಷನ್ ಆನಿ ಗುಳಿಯೊ ದೀವ್ನ್ ತಿ ಲಾದ್ರು ಸರ್ಶಿನ್ ಪಾವ್ಲಿ. ಸದಾಂಯ್ "ದೇವ್ ಬರೊ ದೀಸ್ ದೀಂವ್" ಮ್ಹಣ್ಚೊ ಲಾದ್ರು ತ್ಯಾ ದೀಸ್ ಉಟೊಂಕ್ ನಾತ್ಲ್ಲೊ. ನರ್ಸಾನ್ ಲಾದ್ರುಕ್ ತಪಾಸ್ಲೆಂ. ತೊ ನಿದೆಂತ್ಚ್ ಅಂತರ್ಲ್ಲೊ.
ಪೆದ್ರು ನರ್ಸಾಚಿಂ ಉತ್ರಾಂ ಪಾತ್ಯೆಲೊ ನಾ. ತೊ ಗಳ್ಗಳ್ಯಾಂ ರಡ್ಲೊ. ಥೊಡ್ಯಾಚ್ ಮಿನುಟಾಂನಿ ಚರ್ಸ್ ಆನಿ ವಾರ್ಡ್ ಬಾಯ್ ಯೇವ್ನ್ ಲಾದ್ರುಚಿ ನಿರ್ಜೀವ್ ಕೂಡ್ ಧವ್ಯಾ ಲುಗ್ಟಾನ್ ಗುಟ್ಲಾವ್ನ್ ವ್ಹರುನ್ ಗೆಲಿಂ.
ಪೆದ್ರುಚ್ಯಾ ಜೀವನಾಂತ್ ಪರತ್ ಗ್ರಹಣ್ ಆಯ್ಲೆಂ. ತಾಚ್ಯಾ ಜೀವನಾಂತ್ ನವಿಂ ಕೀರ್ಣಾಂ ಫಾಂಕಯಿಲ್ಲೊ ದಿವೊ ಪಾಲ್ವಾಲ್ಲೊ.
ಪೆದ್ರುನ್ ನರ್ಸಾಲಾಗಿಂ ವಿನಂತಿ ಕೆಲಿ ಆನಿ ತಾಚ್ಯಾ ವಿನಂತೆಕ್ ಲಾಗೊನ್ ನರ್ಸಾನ್ ತಾಕಾ ಲಾದ್ರುಚ್ಯಾ ಖಟ್ಲ್ಯಾರ್ ನಿದಾಯ್ಲೆಂ.
ದೊನ್ಪಾರಾಂ ದೋನ್ ಥಾವ್ನ್ ಪಾಂಚ್ ವೊರಾಂ ಮಧೆಂ ಪಿಡೆಸ್ತಾಂಕ್ ವಿಶೆವ್ ಘೆಂವ್ಚೊ ವೇಳ್. ಹ್ಯಾ ವೆಳಾರ್ ಕುಡಾಕ್ ಕೊಣ್ಯ್ ಯೆನಾತ್ಲ್ಲೆಂ. ಲಾದ್ರುನ್ ವಿವರ್ಸಿಲ್ಲಿಂ ದೃಶ್ಯಾಂ ಆಪ್ಲ್ಯಾಚ್ ದೊಳ್ಯಾಂನಿ ಪಳೆಜಾಯ್ ಅನಿ ತಾಚಿ ರೂಚ್ ಚಾಕಾಜಯ್ ಮ್ಹಳ್ಳಿ ಆತುರಾಯ್ ತಾಚೆ ಥಂಯ್ ಉಭ್ಜಾಲಿ.
ಪೆದ್ರುನ್ ಉಟ್ಚೆಂ ಪ್ರಯತ್ನ್ ಕೆಲೆಂ. ತಾಚ್ಯಾನ್ ಸಾಧ್ಯ್ ಜಾಲೆಂ ನಾ, ಹಾತಾಂಚ್ಯೊ ಮುಂಗಾಯೊ ತೆಂಕುನ್, ದಿಂಬಿಯೆರ್ ಪಡೊನ್, ಆಸ್ಲ್ಲೆಂ ಸರ್ವ್ ಭಳ್ ಎಕ್ಟಾಂಯ್ ಕರುನ್ ತೊ ಉಟ್ಲೊ. ಜನೆಲಾಚ್ಯಾ ಬಾಯ್ರ್ ತಾಣೆಂ ತಿಳ್ಳೆಂ, ತಾಕಾ ಬಗ್ಲೆಚ್ಯಾ ಬಿಲ್ಡಿಂಗಾಚ್ಯೊ ವೊಣೊದಿ ಶಿವಾಯ್ ದುಸ್ರೆಂ ಕಿತೆಂಚ್ ದಿಸ್ಲೆಂ ನಾ. ದೊಳೆ ತಾನೆ ಘೆಶ್ಟಿಲೆ. ಗೊಮ್ಟಿ ಲಾಂಬ್ ಕಾಡ್ನ್ ಪರ್ತ್ಯಾನ್ ಪಳೆಲೆಂ....... ವೊಣೊದಿ ಶಿವಾಯ್ ದುಸ್ರೆಂ ಕಿತೆಂಚ್ ತಾಕಾ ದಿಸ್ಲೆಂ ನಾಂ.
ಬಸೊಂಕ್ ಪರ್ವಣ್ಗಿ ನಾತ್ಲೆಲ್ಯಾನ್ ತೊ ತೊ ನಿದ್ಲೊ ಆನಿ ಪಾಂಚ್ ವೊರಾಂ ಜಾಂವ್ಕ್ ರಾಕ್ಲೊ. ಪಾಂಚ್ ವೊರಾಂ ಜಾತಾನಾ ನರ್ಸ್ ಆಯ್ಲಿ.
"ಸಿಸ್ಟರ್ ಹಿ ವೊಣೊದ್ ಆನಿ ಹೆಂ ಬಿಲ್ಡಿಂಗ್ ಕೆದಾಳಾ ಬಾಂದ್ಲೆಂ?" ಪೆದ್ರುನ್ ಸವಾಲ್ ಕೆಲೆಂ.
"ಹೆಂ ಬಿಲ್ಡಿಂಗ್ ಆಮ್ಚ್ಯಾ ಆಸ್ಪತ್ರೆಚ್ಯಾಕ್ಯೀ ಪರ್ನೆಂ, ಹೆಂ ಬಿಲ್ಡಿಂಗ್ ಬಾಂದುನ್ ಸುಮಾರ್ ಧಾ ವರ್ಸಾಂ ತರ್ಯ್ ಜಾತಿತ್!" ನರ್ಸಾಚಿಂ ಉತ್ರಾಂ ಆಯ್ಕೊನ್ ಪೆದ್ರು ಕಾಲುಬುಲೊ ಜಾಲೊ.
"ಪುಣ್ ಸಿಸ್ಟರ್ ಲಾದ್ರು ಸಾಂಗ್ತಾಲೊ ಹಾಂಗಾಸರ್ ಏಕ್ ತಳೆಂ ಆಸಾ ಆನಿ ತಾಚ್ಯಾ ಭಂವ್ತಣಿಂ ಸೊಭಿತ್ ಗಾರ್ಡನ್ ಆಸಾ ಮ್ಹಣ್ ಆನಿ....." ಲಾದ್ರುನ್ ವಿವರ್ಸಿಲ್ಲೆಂ ಪೆದ್ರುನ್ ನರ್ಸಾಕ್ ಸಾಂಗ್ಲೆಂ.
"ಹಾಂಗಾಸರ್ ಕಾಂಯ್ ನಾತ್ಲ್ಲೆಂ. ಹಾಂಗಾಚರ್ ವೊಣದ್ ಮಾತ್ರ್ ಆಸ್ಲ್ಲಿ!"
"ತರ್ ಸಿಸ್ಟರ್.... ಹ್ಯಾ ದೊರಗ್ ವೊಣೊದಿಚೆರ್ ಇತ್ಲಿಂ ಸೊಭಿತ್ ರಂಗಾಳ್ ದೃಶ್ಯಾಂ ಲಾದ್ರುಕ್ ದಿಸ್ಲಿಂ ಮ್ಹಣ್ಚೆಂಗೀ ತುವೆಂ....?"
"ಲಾದ್ರುಕ್ ಹಿ ವೊಣೊದ್ಯ್ ದಿಸೊಂಕ್ ನಾ! ಕಿತ್ಯಾಕ್....., ತಾಕಾ ದೊಳೆ ದಿಸಾನಾತ್ಲ್ಲೆ. ತಾಣೆಂ ಬೋವ್ಶಾ ತುಕಾ ಉತ್ತೇಜನ್ ದಿಂವ್ಚ್ಯಾ ಖಾತಿರ್ ತಶೆಂ ಮ್ಹಳ್ಳೆಂ ಜಾವ್ಯೆತ್!" ಇತ್ಲೆಂ ಸಾಂಗೊನ್ ನರ್ಸ್ ಚಲ್ತಚ್ ರಾವ್ಲೆಂ. ಪೆದ್ರು ಮಾತ್ರ್ "ಲಾದ್ರುಚ್ಯಾ ಆತ್ಮ್ಯಾಕ್ ಸಾಸ್ಣಾಚೊ ವಿಶೆವ್ ದೀ ದೆವಾ" ಮ್ಹಣ್ ಮಾಗಾಲಾಗ್ಲೊ.
***********
About us | Feedback | Contact us
Copyright © 2005
DAAIZ.COM All rights reserved.
Page concept, designed and maintained by Ashawadi
Publications
