ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಕಥಾಝರ್ - 60. ಪಾತಕ್
ಮೆಲ್ವಿನ್ ಪೆರ್ನಾಲ್: ಆಮ್ಚೊ ಯುವಕ್ ಪತ್ರಾಚೊ ಸಂಪಾದಕ್ ಜಾವ್ನ್ ಸೆವಾ ದಿಂವ್ಚೊ ಮೆಲ್ವಿನ್ ಕ್ಯಾಸ್ತಲಿನೊ ಪೆರ್ನಾಲ್ ಫಿರ್ಗಜೆಚ್ಯಾ ಪತ್ರಾಚೊ ಸಂಪಾದಕ್ ಸಯ್ತ್. ಕಾಣ್ಯೊ, ಲೇಕನಾಂ, ನಾಟಕ್, ವಿಡಂಬನಾಂ ತಶೆಂಚ್ ಅಪ್ರೂಪ್ ಕವಿತಾ ಬರಂವ್ಚೊ ಹೊ ಏಕ್ ಉಲವ್ಪಿ ತಶೆಂಚ್ ಕಾರ್ಯೆಂ ನಿರ್ವಾಹಕ್ ಸಯ್ತ್. ಕೊಂಕ್ಣೆಂತ್ ಆಯ್ಲೆವಾರ್ ಉದೆವ್ನ್ ಆಯಿಲ್ಲ್ಯಾ ಥೊಡ್ಯಾ ಭರ್ವಶ್ಯಾಚ್ಯಾ ಕಾಣ್ಯೆಗಾರಾಂ ಪಯ್ಕಿ ಮ್ಹಾಕಾ ಕಿತ್ಯಾಕ್ಗೀ ಉಟೊನ್ ದಿಸ್ಚೊ.
ಮೆಲ್ವಿನ್ ಪೆರ್ನಾಲ್
ಕಿತ್ಯಾಕ್ಗಿ ಆಜ್ ಮತ್ ಮ್ಹಜ್ಯಾ ಸ್ಥಿಮಿತಾರ್ ನಾತ್ಲ್ಲಿ. ಪಿಶ್ಯಾ ಘೊಡ್ಯಾಬರಿಂ ಖಂಯ್ ಖಂಯ್ಗೀ ಧಾಂವೊನ್ ಆಸ್ಲ್ಲಿ. ಆತಾಂಚ್ ಸೊಸ್ಣಿಕಾಯೆಚೊ ಕಾಟ್ ತುಟೊನ್ ಅಣೆಕಟ್ಟಾಂತ್ಲ್ಯಾ ಉದ್ಕಾಬರಿಂ ’ಬಸ್ಸ್..’ ಕರ್ನ್ ನಂಯ್ ಭರೊನ್ ವ್ಹಾಳೊನ್ ವೆತಾ ಕೊಣ್ಣಾ ಮ್ಹಳ್ಳೆಬರಿಂ ಭೊಗ್ತಾಲೆಂ.
ಹಾಂವೆಂ ಕಾಜಾರ್ ಜಾವ್ನ್ ತೀನ್ ಮಯ್ನೆ ಉತ್ರಾಲ್ಲೆ. ಪಯ್ಲೊ ಏಕ್ ಮಯ್ನೊ ಘೊವಾ ಸಾಂಗಾತಾ ಮಜೆನ್ ಸಾರ್ಲೊ ತರ್ ತಾಣೆ ತಾಚಿ ರಜಾ ಮುಗ್ದುನ್ ಪರ್ಗಾಂವಾಕ್ ಉಬ್ತಾನಾ, ಕಾಪ್ಸಾವಯ್ಲೆಂ ಕಾಡ್ನ್ ಕಾಂಟ್ಯಾವಯ್ರ್ ಬಸಯಿಲ್ಲೆಬರಿಂ ಜಾಲ್ಲೆಂ. ಧರ್ನಿಕ್ ಕಾಳೊಕ್ ಪಡೊನ್ ಉಶ್ಯಾರ್ ಮಾತೆಂ ತೆಂಕ್ತಾನಾ ಕಾಳ್ಜಾಂತ್ ಉಟೊನ್ ಯೆತಾಲ್ಯೊ ಉಡಾಸಾಚ್ಯಾ ಗುದಾಂವಾಂತ್ಲ್ಯೊ ಸೊಬಿತ್ ಸುಂದರ್ ಘಡ್ಯೊ, ಆಮಿ ದೊಗಾಂಯ್ನಿ ಸಾಂಗಾತಾ ರಾತಿಂ ಖರ್ಚಿಲ್ಲ್ಯೊ, ಹ್ಯಾಚ್ ಖಾಟಿರ್. ಕಾಜಾರಾ ಪಯ್ಲೆಂ ಎಕ್ಸುರಿಂಚ್ ನಿದ್ತಾಲಿಂ ತರೀ ಅಸಲೆಂ ಎಕ್ಸುರ್ಪಣ್ ಭೊಗಾನಾತ್ಲ್ಲೆಂ. ಆತಾಂ ಕಿತ್ಯಾಕ್ಗೀ ಕುಡಿಂತ್ ಅವೆಕ್ತ್ ಭೊಗ್ಣಾಂ ತಾಂಡ್ತಾಲಿಂ, ದಾದ್ಲ್ಯಾಚೊ ಸಾಂಗಾತ್ ಆಶೆತಾಲಿಂ.
"ಆಮ್ಕಾಂ ಗ್ರೇಸ್ತ್ಕಾಯ್ ನಾಕಾ. ಪಯ್ಶೆ ನಾಕಾತ್. ತುಂ ಆತಾಂಚ್ ಗಾಂವಾಕ್ ಯೆ. ಮ್ಹಾಕಾ ಹಾಂಗಾ ಎಕ್ಸುರ್ಯಾಕ್ ರಾವೊಂಕ್ ಸಾದ್ಯ್ ನಾ" ಗೆಲೆತ್ಯಾ ಸುಕ್ರಾರಾ ತಾಣೆ ಪೋನ್ ಕೆಲ್ಲ್ಯಾ ತೆದ್ನಾಂ ಸಾಂಗೊನ್ ಖೂಬ್ ರಡ್ಲ್ಲಿಂ. ತಾಣೆ ಮ್ಹಾಕಾ ಅರ್ದೆಂ ವೋರ್ ಸಮ್ಜಾಯಿಲ್ಲೆಂ. "ಸುರ್ವೆರ್ ಥೊಡೆ ದೀಸ್ ತಶೆಂ ಭೊಗ್ಚೆಂ ಸಹಜ್. ಮ್ಹಾಕಾ ಕಿತೆಂ ಹಾಂಗಾಂ ರಾವೊಂಕ್ ಮನ್ ಆಸಾಗೀ? ಕಿತೆಂ ಕರ್ಚೆಂ, ಬರೊ ಪುಡಾರ್ ಬಾಂದಿಜೆ ತರೊ ಥೊಡೊ ಸಾಕ್ರಿಫಿಸ್ ಕರಿಜೆ ಪಡ್ತಾ" ತಾಚಿ ಬೂದ್ಬಾಳ್ ಮ್ಹಜ್ಯಾ ಗಿನ್ಯಾನಾಕ್ ಪಾವ್ಲಿಚ್ ನಾ.
ದೀಸ್ ಉಬ್ತಾನಾ ಎಕ್ಸುರ್ಪಣ್ ಚಡೊನ್ಂಚ್ ಗೆಲೆಂ. ಕೂಡ್ ಕಿತೆಂಗೀ ಆಶೆವ್ನ್ ಆಸಾ. ತೆಂಚ್ ತೆಂ ಸುಖ್, ಎಕಾ ದಾದ್ಲ್ಯಾನ್ ಎಕೆ ಸ್ತ್ರೀಯೆಕ್ ದಿಂವ್ಚೆಂ ತಸಲೆಂ. ಘೊವ್-ಬಾಯ್ಲೆ ಮದೆಂ ನೈತಿಕ್ ತರ್ ಪೆಲ್ಯಾಕಡೆ ಅನೈತಿಕ್ ಅಪ್ರಾದ್. ದೆವಾಚ್ಯಾ ಉಪದೆಸಾಂ ಪ್ರಕಾರ್ ಏಕ್ ಮ್ಹಾ-ಪಾತಕ್.
ಜೆಜುಕ್ರಿಸ್ತ್ ಎಕ್ಲ್ಯಾಕ್ ಸೊಡ್ಲ್ಯಾರ್ ಹ್ಯಾ ಸಂಸಾರಾಂತ್ ಜಲ್ಮ್ ಘೆತ್ಲ್ಲೆ ಸರ್ವ್ ಪಾತ್ಕಿಚ್. ಕೋಣ್ ಪಾತಕ್ ಕರಿನಾತ್ಲೊ ಆಸಾ? ಫಟಿ ಮಾರ್ತಾಂವ್, ಮೀಸ್ ಖಳ್ತಾಂವ್, ಹೆರಾಂಕ್ ಅಕ್ಮಾನ್ ಕರ್ತಾಂವ್, ದೆವಾಕ್ ಮಾನ್ ದೀನಾಂವ್ ಆನಿ ಆಕ್ರೇಕ್ ಪಾದ್ರಿಲಾಗಿಂ ಕುಮ್ಸಾರ್ ಜಾವ್ನ್ ಸರ್ವ್ ಪಾತ್ಕಾಂ ಭೊಗ್ಸಾಲಿಂ ಮ್ಹಣ್ ಸಂತೊಸ್ ಪಾವ್ತಾಂವ್. ತರ್ ದುಸ್ರ್ಯಾ ಪಾತ್ಕಾಂ ಸಾಂಗಾತಾ ಹೆಂಯಿ ಏಕ್ ಪಾತಕ್ ಹಾಂವೆಂ ಆದಾರ್ಲ್ಯಾರ್ ತೆಂ ಭೊಗ್ಸೊಂಚೆಂನಾಂಗೀ?
ಮ್ಹಜ್ಯಾ ಮತಿಂತ್ ಚಲ್ಚ್ಯಾ ಹ್ಯಾ ದ್ವಂದ್ವಾಕ್ ಎಕ್ಲೊ ಕಾರಣ್ ಆಸ್ಲ್ಲೊ. ತೊಚ್ ಮ್ಹಜ್ಯಾ ವಟಾರಾಚ್ಯಾ ಆಕ್ರೇಚ್ಯಾ ಘರ್ಚೊ ನಜೀರ್. ಅಮಿರ್ಖಾನಾಚೆಂ ಆಕರ್ಶಣ್, ಸಲ್ಮಾನ್ಖಾನಾಚಿ ಸೊಬಾಯ್, ಶಾರುಕಾಚೆ ಗಾಲ್ಯಿ ಮಿಕ್ವೊಂಚೆ ತಸಲೊ. ಸದಾಂ ಸಕಾಳಿಂ ತೊ ಆಮ್ಚ್ಯಾ ಘರಾ ಮುಕ್ಲ್ಯಾನ್ ಬೈಕಾರ್ ವೆತಾನಾ ಮ್ಹಾಕಾ ಪಳೆವ್ನ್ ಹಾಸೊ ದಿತಾಲೊ. ಪಯ್ಲ್ಯಾ ದಿಸಾ ಅಜಾನಕ್ ತಾಚ್ಯೊ ಹಾಸೊ ಮೆಳ್ಲ್ಲ್ಯೊ. ಪುಣ್ ಉಪ್ರಾಂತ್ಲ್ಯಾ ದಿಸಾಂನಿ ತಾಚ್ಯಾ ಬೈಕಾಚೊ ಅವಾಜ್ ಮ್ಹಾಕಾ ಘರಾ ಭಾಯ್ರ್ ವೋಡ್ನ್ ಹಾಡ್ತಾಲೊ. ಕುಡಿಂತ್ ಅತ್ರೆಗ್ ಉಟ್ಲ್ಲೆ. ತಾಚೆ ವೆಂಗೆಂತ್ ಖರ್ಗೊಂಚಿಂ ಗೊಡ್ಶಿಂ-ಮಧುರ್ ಸ್ವಪ್ಣಾಂ ಮ್ಹಾಕಾಚ್ ಸಂಪೂರ್ಣ್ ತಾಕಾ ಸಮರ್ಪುಂಕ್ ಅತ್ರೆಗ್ತಾಲಿಂ.
ಅನ್ಯೇಕೆ ವಾಟೆನ್ ಕಾಳ್ಜಾಂತ್ ಭಿಂಯಾಚೆ ದಡ್ದಡೆಯಿ ಉಟ್ತಾಲೆ. ಹಾಂವ್ ಕ್ಶಣಿಕ್ ಸುಖಾಖಾತಿರ್ ಪಾಯ್ ನಿಸ್ರೊನ್, ಪರ್ಗಾಂವಾಂತ್ ಘೊಳ್ಚ್ಯಾ ಮ್ಹಜ್ಯಾ ಪತಿಕ್ ಘಾತ್ ಕರ್ತಾಂ? ಕುಡಿಚೆ ಅತ್ರೆಗ್ ಥಾಂಬಂವ್ಚೆಖಾತಿರ್ ಹಾಂವೆಂ ಪಾತಕ್ ಆದಾರ್ಲ್ಲೆಪರಿಂ ತೊಯಿ ತಸೊಚ್ ಕರಿತ್ ಜಾಲ್ಯಾರ್ ಹಾಂವ್ ತೆಂ ಸೊಸುಂಕ್ ತಯಾರ್ ಆಸಾಂ? ಮ್ಹಜೊ ನೊವ್ರೊ ಪೆಲ್ಯಾ ಚೆಡ್ವಾಸವೆಂ..., ಶೀ ಶೀ.... ಮತಿಂತ್ ಚಿಂತುಂಕ್ಯಿ ಸಾದ್ಯ್ ನಾ. ತೊ ತಶೆಂ ಕರ್ಚೊ ನಾ. ತರ್ ಹಾಂವೆಂಯಿ ತಾಚೆಥಂಯ್ ಪ್ರಾಮಾಣಿಕ್ಪಣ್ ಸಾಂಬಾಳಿಜೆ. ಸಿಸ್ಕಳ್ಪಣ್ ಹೊಗ್ಡಾವ್ನ್ ವ್ಯಾಭಿಚಾರಿಣ್ ಜಾಂವ್ಕ್ ನಜೊ, ಅಂತಸ್ಕರ್ನ್ ಘಡ್ಯೆ ಘಡ್ಯೆ ಜಾಗಯ್ತಾಲೆಂ.
****
ಆಮ್ಚ್ಯಾ ವಟಾರಾಚ್ಯಾ ಆಕ್ರೇಚೆಂ ಘರ್ ನಜೀರಾಚೆಂ ಮ್ಹಣ್ ಹಾಂವೆಂ ಸೊದುನ್ ಕಾಡ್ಲ್ಲೆಂ. ಹಾಂವೆಂ ಘರಾ ಭಾಯ್ರ್ ವೆಚೆಂ ಅಪ್ರೂಪ್. ಹಪ್ತ್ಯಾಂತ್ ಏಕ್ ಪಾವ್ಟಿಂ ಆಯ್ತಾರಾಚೆಂ ಇಗರ್ಜೆಕ್ ಮಿಸಾಕ್ ವೆಚೆಂ ಸೊಡ್ಲ್ಯಾರ್ ಖಂಯ್ ದೋನ್ ಹಪ್ತ್ಯಾಂಕ್ ಏಕ್ ಪಾವ್ಟಿಂ ಕಾಂಯ್ ಗರ್ಜೆಚ್ಯೊ ವಸ್ತು ಹಾಡುಂಕ್ ಪೆಂಟೆಕ್ ವೆತಾಲಿಂ. ಪೋಯ್ರ್ ಪೆಂಟೆಕ್ ಗೆಲ್ಲೆತವಳ್ ಜಾಣಾ ಜಾಲ್ಲಿಂಗೀ ನಜೀರಾಕ್ ಪೆಂಟೆಂತ್ ಏಕ್ ವ್ಹಾಣಾಂಚೆಂ ದುಕಾನ್ ಆಸಾ.
ಹಾಂವೆಂ ಏಕ್ ಜೊಡಿ ವ್ಹಾಣೊ ಘೆತ್ಲ್ಯೊ. ನಜೀರ್ ಪಯ್ಶೆ ಘೆಂವ್ಕ್ ವೊಪ್ಲೊಚ್ ನಾ. ಅಕ್ರೇಕ್ ಹಾಂವ್ ತಾಚ್ಯಾ ಗಲ್ಲ್ಯಾರ್ ದವರ್ನ್ ಶೀದಾ ಆಯಿಲ್ಲಿಂ.
ಆತಾಂ ಆಮ್ಚಿ ಸಳಾವಳ್ ತಿಕ್ಕೆ ಮುಕಾರ್ ಪಾವ್ಲ್ಲಿ. ಪೆಂಟೆಂಕ್ ಗೆಲ್ಲ್ಯಾತೆದ್ವಾಂ ಹಾಂವ್ ತಾಚ್ಯಾ ದುಕಾನಾ ತೆವ್ಶಿಂ ವೆತಾಲಿಂ ಆನಿ ತೊಯಿ ಮ್ಹಾಕಾ ರಾಕೊನ್ಚ್ ಆಸ್ಲ್ಲೊ ಮ್ಹಳ್ಳೆಬರಿಂ ಭಾಯ್ರ್ ಯೇವ್ನ್ ಉಲಯ್ತಾಲೊ. ತಾಚ್ಯಾ ಉತ್ರಾಂನಿ ಆಸ್ಚಿ ಮಾಣ್ಸುಗಿ ಮ್ಹಾಕಾ ಆನಿಕೀ ತಾಚೆ ಕುಶಿನ್ ವೊಡ್ತಾಲಿ. ಆಮಿ ಘರಾ ದೊಗಾಂಚ್. ಮಾಂವ್ ಸರ್ಲ್ಲೊ ಆನಿ ಮ್ಹಜೊ ನೊವ್ರೊ ಎಕ್ಲೊಚ್ ಪೂತ್.
ಆಜ್ ಮಾಂಯ್ ಸೆಜಾರ್ಚ್ಯಾ ಮೆರ್ಸಿನ್ಬಾಯೆ ಸಾಂಗಾತಾ ಮುಲ್ಕಿ ರೆತಿರೆಕ್ ಗೆಲ್ಲಿ ಆನಿ ತಿಣೆ ಯೆಂವ್ಚೆಂ ಸಾಂಜೆರ್ಚ್. ತಶೆಂ ಘರಾಂತ್ ಹಾಂವ್ ಎಕ್ಲಿಂಚ್. ಎಕ್ಸುರ್ಯಾಕ್ ಉಬ್ಗೊಣ್ ಭೊಗ್ತಾಲಿ ಜಾಲ್ಲ್ಯಾನ್ ಸೊಫಾರ್ ಆಡ್ ಪಡೊನ್ ಟಿವಿ ಪಳೆವ್ನ್ ಆಸ್ಲ್ಲಿಂ. ಟಿವಿಚ್ಯಾ ಪಡ್ದ್ಯಾರ್ ಪ್ರೇಮಾಳ್ ದ್ರಶ್ಯಾಂ ದೆಕ್ತಾನಾ ಕುಡಿಂತ್ ಆಟೆವಿಟೆ ಭೊಗ್ತಾಲೆ. ಆನಿ ತವಳ್ ಘರಾ ಭಾಯ್ರ್ ಬೈಕಾಚೊ ಆವಾಜ್ ಆಯ್ಕಾಲೊ. ವ್ಹಯ್, ಬೈಕ್ ಘರಾ ಮುಕಾರ್ ರಾವ್ಲೆಂ. ತ್ಯಾ ಬೈಕಾಚೊ ಆವಾಜ್ ಮ್ಹಾಕಾ ಒಳ್ಕಿಚೊ. ನಜೀರ್...!? ಥೊಡ್ಯಾ ವೆಳಾನ್ ಘರ್ಚಿ ಕಾಂಪಿಣ್ ವ್ಹಾಜ್ಲಿ. ’ಪಿಡೆಸ್ತಾನ್ ಆಶೆಲ್ಲೆಂ ದಾಕ್ತೆರಾನ್ ದಿಲೆಂ’ ಮ್ಹಳ್ಳೆಬರಿಂ ಜಾಲ್ಲಿ ಮ್ಹಜಿ ಗತ್. ಕೂಡ್ ಬಾರಿಕಾಯೆನ್ ಕಾಂಪಾಲಾಗ್ಲಿ. ಹಾಂವ್ ಘರಾಂತ್ ಎಕ್ಸುರಿಂ. ಸೆಜಾರ್ಚಿ ಮೆರ್ಸಿನ್ಬಾಯ್ ನಾ. ಹೆಂ ಕಳಿತ್ ಜಾವ್ನ್ ಕಾಂಯ್ ನಜೀರ್ ಹೆವ್ಶಿನ್ ಯೇಂವ್ಕ್ ನಾಂಮೂ? ಕುಡಿಂತ್ ಎಕಾ ಥರಾಚೊ ಹುರುಪ್, ಉಲ್ಲಾಸ್ ಭರ್ಲೊ. ಕಿತ್ಯಾಕ್ಗೀ ಮ್ಹಾಕಾ ಸದಾಂ ಜಾಗಾಂವ್ಚೆಂ ಅಂತಸ್ಕರ್ನ್ ಆತಾಂ ಸಲ್ವಾಲಾಗ್ಲೆಂ. ಪಾಂಯ್ ದಾರಾಸರ್ಶಿಂ ವೋಡ್ನ್ ವ್ಹರಿಲಾಗ್ಲೆಂ. ಖಂಯ್ ನಜೀರ್ ಮ್ಹಾಕಾ ನೆಗಾರ್ ಕರಿತ್ ತರ್...? ಹಾಂವೆಂ ತಾಕಾ ಘರಾ ಭಿತರ್ ಆಪವ್ನ್ ಒತ್ತಾಯ್ ಕೆಲಿ ಮ್ಹಣ್ ಕೊಣಾಯ್ಕಿ ಸಾಂಗಾತ್ ತರ್...? ’ಹಾಂವ್ ತುವೆಂ ಚಿಂತ್ಲ್ಲೆ ತಸಲೊ ಚೆಡೊ ನ್ಹಂಯ್, ತುಂ ಏಕ್ ಕಾಜಾರಿ ಸ್ತ್ರೀ, ಆನಿ ಹಾಂವ್ ಏಕ್ ಪೆಲೊ ದಾದ್ಲೊ, ತೆಂಯಿ ಪರ್ಕ್ಯಾ ಜಾತಿಚೊ’ ಮ್ಹಣಾತ್ ತರ್...?
ಛೇ ತಶೆಂ ಸಾಂಗ್ಚೊ ನಾ. ಎಕಾ ಚೆಡ್ವಾನ್ ತಾಣೆ ಜಾವ್ನ್ ಆಪಯ್ತಾನಾ ಯೇನಾತ್ಲ್ಲೊ ಚೆಡೊ ಕಸಲೊ ತೊ? ಹಾತಾಂಕ್ ಕಾಂಕ್ಣಾಂ ಘಾಲ್ಲೊ?
"ಟಿಂಗ್-ಟೊಂಗ್" ಪರತ್ ಏಕ್ ಪಾವ್ಟಿಂ ಘರ್ಚಿ ಕಾಂಪಿಣ್ ವಾಜ್ತಾನಾ, ಭ್ರಮಿದೆಂತ್ಲಿಂ ಭಾಯ್ರ್ ಆಯ್ಲಿಂ ಆನಿ ದಾರ್ ಉಗಡ್ಲೆಂ. ವ್ಹಯ್! ಥಂಯ್ ನಜೀರ್ ಉಬೊ ಆಸ್ಲ್ಲೊ. ಲಜೆನ್ ಮ್ಹಜಿ ದೀಶ್ಟ್ ಧರ್ಣಿಕ್ ಶೆವ್ಟಾಲಿ. ಎಕಾ ಘಡ್ಯೆಕ್ ದೊಗಾಂಯ್ಕಿ ಕಿತೆಂ ಕರ್ಚೆಂ ಮ್ಹಣ್ ಕಳ್ಳೆಂನಾ.
"ಭಿತರ್ ಆಪಯ್ನಾಂತ್ಗೀ?" ತಾಣೆ ಮರ್ಯಾದಿನ್ ವಿಚಾರ್ಲೆಂ. "ಯೇ, ಯೇ ಭಿತರ್ ಯೇ" ಹಾಂವ್ ಸೊಫಾ ತೆವ್ಶಿನ್ ಘುಂವ್ಲಿಂ. ಮ್ಹಜೆ ಪಾಟಾಪಾಟ್ ತಾಣೆ ಯೆತಾನಾ ತಾಣೇ ಅಂಗಾಕ್ ಶಿಂಪ್ಡ್ಯಾಯಿಲ್ಲ್ಯಾ ಸುಗಂಧ್ ದ್ರವ್ಯಾಚೊ ಪರ್ಮಳ್ ಮ್ಹಾಕಾ ಅಮಾಲ್ ಕರ್ತಾಶೆಂ ಭೊಗ್ಲೆಂ.
"ಸುನೀಲಾಚೆಂ ಪೋನ್ ಪುಣೀ ಆಯಿಲ್ಲೆಂಗೀ? ಮ್ಹಜೆಶಿಂ ಕಾಂಯ್ ಸಾಂಗ್ಲಾಗೀ?" ಸೊಫಾರ್ ಕುಲೊ ತೆಂಕ್ತಾನಾ ತಾಣೆ ವಿಚಾರ್ಲೆಂ.
ತರ್ ಹೊ ಮ್ಹಚ್ಯಾ ನೊವ್ರ್ಯಾಕ್ ಬರ್ಯಾನ್ ಒಳ್ಕಾತಾ. "ತಾಂಚೆಂ ಪೋನ್ ಆಯಿಲ್ಲೆಂ, ಪುಣ್ ತುಜೆವಿಶಿಂ ತಾಣೆ ಕಾಂಯ್ ಸಾಂಗೊಂಕ್ ನಾ" ಹಾಂವೆಂ ಜಾಪ್ ದಿಲಿ.
"ಹಾಂವೆಂ ಪೆಂಟೆಂತ್ ಅಗಂಡ್ ಘಾಲ್ತಾನಾ ಥೊಡೆ ಪಯ್ಶೆ ತಾಚೆ ಥಾವ್ನ್ ರೀಣ್ ಘೆತ್ಲ್ಲೆ. ಆನಿ ತೆ ತುಜೆಲಾಗಿಂ ದೀಂವ್ಕ್ ಸಾಂಗ್ಲ್ಲೆ, ದೆಕುನ್ ಮಾಂಯ್ ಘರಾ ನಾತ್ಲ್ಲ್ಯಾವೆಳಾರ್ ದೀವ್ನ್ ಯಾ ಮ್ಹಣ್ ಆಯ್ಲೊಂ. ದಯಾಕರ್ನ್ ಬೆಜಾರ್ ಕರಿನಾಕಾ" ತಾಣೆ ಹಾತ್ ಜೊಡ್ಲೆ.
ತಾಚ್ಯಾ ಹಾತಾಂತ್ಲೊ ಪಯ್ಶಾಂಚೊ ಕಾಟ್ ಹಾಂವೆಂ ಘೆತ್ಲೊ. "ತುಮ್ಚೊ ಮಸ್ತ್ ಉಪ್ಕಾರ್, ಹಾಂವ್ ಆನಿ ವೆತಾಂ" ತೊ ಉಟ್ಲೊ.
"ರಾವ್, ಕಾಂಯ್ ಥಂಡ್ ಪಿಯೆವ್ನ್ ವಚ್" ಮ್ಹಣ್ ಹಾಂವೆಂ ಸಾಂಗಾಜೆ ತರ್ ತೊ ಬಾಗ್ಲಾ ಕಡೆ ಪಾವ್ಲ್ಲೊ.
"ಆಜ್ ನಾಕಾ, ಥಂಡ್ ಪಿಯೆಂವ್ಕ್ ಆನಿ ಕೆದ್ನಾಂ ತರೀ ಯೆತಾಂ" ವೊಂಟಾರ್ ಮಾದಕ್ ಹಾಸೊ ಪರ್ಜಳಾವ್ನ್ ದಾರ್ ಉಗಡ್ನ್ ಚಲ್ತಚ್ ರಾವ್ಲೊ ತೊ.
’ಮತಿಂತ್ಲಿಂ ಚಿಂತ್ನಾಂ ಕಿತೆಂಯಿ ಆಸೊಂದಿತ್. ಕರ್ನೆನ್ ಕೆಲ್ಯಾರ್ ಮಾತ್ರ್ ತೆಂ ಪಾತಕ್ ಜಾತಾ’ ಆದ್ಲ್ಯಾ ಆಯ್ತಾರಾ ಪಾದ್ರ್ಯಾಬಾನ್ ಸಾಂಗ್ಲ್ಲೊ ಶೆರ್ಮಾಂವ್ ಮ್ಹಾಕಾ ಉಡಾಸಾಕ್ ಆಯ್ಲೊ.
About us | Feedback | Contact us
Copyright © 2005
DAAIZ.COM All rights reserved.
Page concept, designed and maintained by Ashawadi
Publications
