ಲವ್ಕಿಕ್ತಾಯೆಂತ್ ಪವಿತ್ರತಾಯ್: ಬಾ. ಪ್ರತಾಪಾನಾಂದಾ ನಾಯ್ಕ್-ಚ್ಯೊ ಅಧ್ಯಾತ್ಮಿಕ್ ಕವಿತಾ

ಲವ್ಕಿಕ್ತಾಯೆಂತ್ ಪವಿತ್ರತಾಯ್:  ಬಾ. ಪ್ರತಾಪಾನಾಂದಾ ನಾಯ್ಕ್-ಚ್ಯೊ ಅಧ್ಯಾತ್ಮಿಕ್ ಕವಿತಾ (- ಬಾ.ಜೇಸನ್ ಪಿಂಟೊ)

ಸುರ್ವಾತ್ಣಿ 
ಕೊಂಕಣಿ ಭಾಶೆನ್, ಭಾರತಿಯ್ ಸಂಸ್ಕೃತಾಯೆಕ್ ಆನಿ ಅಧ್ಯಾತ್ಮಿಕ್ತಾಯೆಕ್ ಎಕ್ ಗಿರೆಸ್ತ್ ದೆಣೆಂ ದಿಲಾಂ. ಖುಬ್ ಕಾಳಾ ಥಾವ್ನ್ ಅಧ್ಯಾತ್ಮಿಕ್ ಅಣ್ಭವ್ ಉಕ್ತವ್ಪಾಚೆಂ ಎಕ್ ಸಾಧನ್ ಜಾವ್ನ್ ಕೊಂಕಣಿ ಭಾಸ್ ಫುಲ್ಲ್ಯಾ. ಆದ್ಲ್ಯಾ ಆಮ್ಚ್ಯಾ ಭಾರತಿಯ್ ಸಾಂತ್-ಕವಿಂ ಪಾಸುನ್ ಆಯ್ಚ್ಯಾ ಹ್ಯಾ ಕಾಳಾಚ್ಯಾ ಬರವ್ಪ್ಯಾಂ ಪರ್ಯಾಂತ್, ಕೊಂಕಣಿ ಕವಿತೆನ್ ಮನ್ಶಾಚ್ಯಾ ಆತಮ್ಯಾಚೆ ಖಲ್ ಅಣ್ಭವ್-ಅನ್ಭಗ್ ಮಾಂಡ್ಲ್ಯಾತ್. ಹ್ಯಾಚ್ ಆಧುನಿಕ್ ಕಾಳಾಂತ್, ಬಾ. ಪ್ರಾತಾಪಾನಾಂದಾ ನಾಯ್ಕ್, ಎಕ್ ಮ್ಹತ್ವಾಚೊ ಅಧ್ಯಾತ್ಮಿಕ್ ಆನಿ ಕ್ರಾಂತಿಕಾರಿ ಚಿಂತಕ್ ಜಾವ್ನ್ ಫುಡೆಂ ಯೆತಾ. ತೊ ಎಕ್ ಜೆಜ್ವಿತ್ ಪಾದ್ರಿ, ಶಿಕ್ಶಕ್, ಭಾಶಾಶಾಸ್ತ್ರಿ (ಲಿಂಗ್ವಿಸ್ಟ್) ಆನಿ ಬರವ್ಪಿ. ತಾಚಿ ಕವಿತಾ ಫಕತ್ ಇಗ್ರಜೆಚ್ಯಾ ವರ್ತುಲಾ ಪುರ್ತಿ ಮರ್ಯಾದಿತ್ ನಾಂ. ತಿ ಸೃಶ್ಟಿಚ್ಯಾ ರುಕಾಂಪಾನಾಂನಿ, ಗರಿಬಾಂಚ್ಯಾ ಕಶ್ಟಾಂ-ಅಂವಾರಾಂನಿ ಆನಿ ಮನ್ಶಾಚ್ಯಾ ಕಾಳ್ಜಾಂಮನಾಂನಿ ದೆವಾಕ್ ಸದುನ್ ಆಸಾತ್. ಅಧ್ಯಾತ್ಮಿಕ್ಪಣ್ ಮ್ಹಣ್ಜೆ ಕಿತೆಂ? ವ್ಹಾತ್ ಇಸ್ ಸ್ಪಿರಿಚುವಾಲಿಟಿ? ಹಾಕಾ ಎಕ್ ಜಖ್ತಿ ಜಾಪ್ ಬಾ. ಪ್ರಾತಾಪ್-ಆಲ್ಯೊ ಕವಿತಾ ಮ್ಹಣ್ಲ್ಯಾರ್ ಅತಿತಾಯ್ ಜಾಂವ್ಚಿ ನಾಂ. ತುಕಾ ಸೊಧುನ್ ವೆತಾಲಂ ಹ್ಯೆ ಕವಿತೆಂತ್ ತೊ ಆಮ್ಕಾಂ ಸಾಂಗ್ತಾ:
ತುಕಾ ಸದುನ್ ವೆತಾಲಂ ಮಂದಿರಾಂತಿ,
ತುಜಿ ವಾಟ್ ರಾಕ್ತಾಲಂ ದೊಂಗ್ರಾ ತೆಂಗ್ಶೆರಿ,
ತುಜಿಂ ಪಾವ್ಲಾಂ ಸೊದ್ತಾಲೊಂ ತಿರ್ಥ್ ಸ್ಥಾನಾಂನಿ.

ತುಜಿಂ ಉತ್ರಾಂ ವಿಂಚ್ತಾಲೊಂ ಧರಂ ಗ್ರಂಥಾಂನಿ, 
ತುಜಿ ಖಬರ್ ಕಾಡ್ಟಾಲೊಂ ಆಶ್ರಮಾಂನಿ, 
ತುಜೆಂ ದರ್ಶನ್ ಆಶೆತಾಲೊಂ ಮೊಳ್ಬಾರಿ.

ಹಾಯ್ ದೆವಾ! ವಾಟ್ ಚುಕ್ಲಿ, ಪಾವ್ಲೊಂ ಗಲ್ಲ್ಯಾಂನಿ,
ತುಕಾ ದೆಖ್ಲೊ ಪಾವ್ಸಾನ್ ಪೊಂವ್ಚ್ಯಾ ಖಮ್ಟ್ಯಾಂನಿ.

ಹಾಯ್ ದೆವಾ! ಪಾವ್ಲೊಂ ನಿರಾಶಿತಾಂಗೆರಿ,
ತುಂ ಉಲಯ್ಲೊ ತಾಂಚ್ಯಾ ಮೊನ್ಯಾ ಉತ್ರಾಂನಿ. 
ತಾಂಚ್ಯಾ ಕವಿತಾ ಪುಂಜ್ಯಾಂತ್ಲಿಂ ಹಿಂ ಉತ್ರಾಂ ಆಯ್ಕನ್, ತಾಚ್ಯಾ ಕವಿತಾಂಚ್ಯೊ ಎಕ್ ಮಟ್ವೊ ನಿಯಾಳ್ ತುಮ್ಚೆ ಮುಖಾರ್ ದವರ್ತಾಂ. ಹಾಂವೆಂ ಹಾಚೆ ಚಾರ್ ವಾಂಟೆ ಕೆಲ್ಯಾತ್ -

1. ಅಧ್ಯಾತ್ಮಿಕ್ತಾಯ್ (Spirituality) ಆನಿ ಧರಂ (Religion): ಎಕ್ ಖಾಶೆಲೊ ಫರಕ್
ಬಾ. ಪ್ರಾತಾಪಾನಾಂದಾಚೆಂ ಹೆಂ ಧಾರ್ಮಿಕ್ ಸಾಹಿತ್ಯ್ ಸಮ್ಜುಂಕ್, ಪಯ್ಲೆಂ ಆಮಿ ಧರಂ ಆನಿ ಅಧ್ಯಾತ್ಮಿಕ್ತಾಯ್ ಹಾಂತ್ಲೊ ಫರಕ್ ಸಮ್ಜುಂಕ್ ಖುಬ್ ಗರ್ಜೆಚೆಂ. ಧರಂ ಮ್ಹಣ್ಲ್ಯಾರ್ ಎಕ್ ಸಂಸ್ಥಾ, ನೆಮ್-ಕಾಯ್ದೆ ಆನಿ ಖೆರಿತ್ ರಿತಿರಿವಾಜಿ. ಬಾ. ಪ್ರಾತಾಪ್ ಆಪ್ಲ್ಯಾ ಕವಿತಾಂ ವರ್ವಿಂ ಹಾಂತ್ಲೊ ಆಮ್ಕಾಂ ಭಾಯ್ರ್ ಯೆಂವ್ಕ್ ಉಲೊ ದಿತಾ. ತಾಚಿ ಕವಿತಾ ಸಾಂಗ್ತಾ, ಧರಂ ಮ್ಹಣ್ಲ್ಯಾರ್ ಎಕ್ ’ಆಯ್ದನ್, ಪುಣ್ ಅಧ್ಯಾತ್ಮಿಕ್ತಾಯ್ ಮ್ಹಣ್ಲ್ಯಾರ್ ತಾಂತ್ಲೆಂ ’ಉದಕ್’. ತಾಚೆರ್ ಆಮಿ ಚಡ್ ಭರ್ ದಿಂವ್ಕ್ ಫಾವೊ.
ಫುಟ್ಕೊರ್ ಬುಡ್ಕುಲೊ ಹ್ಯೆ ಕವಿತೆಂತ್ ತೊ ಆಂಕಾಂ ಹಾಚೆ ವಿಶಿಂ ಸಾಂಗ್ತಾ:
ಅಸ್ತಮ್ತೆಚ್ಯೆ ಪಲ್ತಡಿ,
ಸರ್ಗ್ ಮ್ಹಜಿ ವಾಟ್ ರಾಕ್ತಾ,
ಅಸ್ತಮ್ತೆಚ್ಯೆ ಆಲ್ತಡಿ,
ಲೊಕ್ ಮ್ಹಜಿ ಸೆವಾ ಮಾಗ್ತಾ.

ದೆವಾ, ಹಾಂವ್ ಕರುಂ ಕಿತೆಂ?
ಥಕ್ಲಲೆಂ ಜಿವಿತ್ ಮ್ಹಜೆಂ,
ವ್ಹರುಂ ಹಾಂವ್ ಫುಡೆಂ ಕಶೆಂ?
ಕಿತ್ಲೆ ದಿಸ್ ಜಿಯೆಂವ್ ಅಶೆಂ?

ವೆರ್ ಆಯ್ಲಲೊ ಬುಡ್ಕುಲೊ?
ಆಸೊನ್ ತೊ ಫಾಯ್ದೊ ಕಸ್ಲೊ?
ಆಜ್ ನಾ ತರ್ ಫಾಲ್ಯಾಂ ಫುಟ್ಚೊ,
ಮಾತಿಯೆಂತ್ ಮಾತಿ ಜಾವ್ನ್ ವೆಚೊ.

ಅಧ್ಯಾತ್ಮಿಕ್ತಾಯ್ ಮ್ಹಣ್ಲ್ಯಾರ್ ಎಕ್ ಖಾಶೆಲೊ ಅಣ್ಭವ್, ಜೊ ಮನ್ಶಾಕ್ ದೆವಾಚ್ಯಾ ರುಪಾಂತ್ ಜಾತಾ. ತಿ ಫಕತ್ ಧರ್ಮಾಚ್ಯಾ ಬಂದನಾಂನಿ ಉರನಾಂ. ಬಾ. ಪ್ರಾತಾಪ್-ಆಚ್ಯಾ ಕವಿತಾಂನಿ ದೆವ್ ಫಕತ್ ಎಕ್ ಫಾತ್ರಾಂಚ್ಯಾ ಮಂದಿರಾಂತ್ ವಾ ಇಗರ್ಜೆಂತ್ ರಾವ್ಪಿ ನ್ಯಾಯಾಧಿಶ್ ನ್ಹಯ್. ತೊ ಆಮ್ಚೊ ಇಶ್ಟ್, ತೊ ಆಮ್ಚೊ ಸಾಂಗಾತಿ. ತೊ ಆಮ್ಚ್ಯಾ ಭಾಶೆಂತ್, ಕೊಂಕಣಿಂತ್, ಆಮ್ಕಾಂ ಹೊ ಎಕ್ ಜಿವೊ ದೆವಾಚೊ ಅಣ್ಭವ್ ದಿಂವ್ಕ್ ಯತ್ನ್ ಕರ್ತಾ. ತಾಚೆಂ ಬರವ್ಪ್ "ಧರಂ ಪಾಳ್ಪಾಚ್ಯಾ" ಪರಸ್ "ಲೊಕಾಚಿ ಸೆವಾ ಕರುನ್ ಎಕ್ ಅಧ್ಯಾತ್ಮಿಕ್ ಜಿವಿತ್ ಜಿಯೆವ್ಪಾಚೆರ್" ಚಡ್ ಭರ್ ಘಾಲ್ತಾ.

2. ಭಕ್ತಿಮಾರ್ಗ್: ಲೊಕ್-ಮಾರ್ಗ್ ಆನಿ ತತ್ವ್-ಗಿನ್ಯಾನ್ ಹಾಂತ್ಲೊ ಫರಕ್
ಬಾ. ಪ್ರಾತಾಪ್-ಆಚ್ಯಾ ಕವಿತೆಚಿ ಮುಳ್-ಖುಣಾ ಮ್ಹಣ್ಲ್ಯಾರ್ ಭಕ್ತಿ. ಭಾರತಿಯ್ ಅಧ್ಯಾತ್ಮಿಕ್ ಪರಂಪರೆಂತ್, ’ಭಕ್ತಿ’ ಮ್ಹಣ್ಲ್ಯಾರ್ ದೆವಾ ಲಾಗಿಂ ಆಮಿ ಜೊಡ್ಚೆಂ ಎಕ್ ಮೊಗಾಚೆಂ ನಾತೆಂ. ಹೆಂ ಗಿನ್ಯಾನ್ (Knowledge) ವಾ ತತ್ವ್-ಗಿನ್ಯಾನಾ (ಫಿಲಾಸೊಫಿ) ಪರಸ್ ವೆಗ್ಳೆಂ. ತತ್ವ್-ಗಿನ್ಯಾನ್ ದೆವಾಕ್ ಸಮ್ಜೊಂಕ್ ಪ್ರಯ್ತ್ನ್ ಕರ್ತಾ, ಪುಣ್ ಭಕ್ತಿ ದೆವಾಕ್ ಅಣ್ಭವುಂಕ್ ಪ್ರಯತ್ನ್ ಕರ್ತಾ. ವಾಟ್ ಚುಕೊನ್ ಹ್ಯೆ ಕವಿತೆಂತ್ ಆಮ್ಕಾಂ ತೆಂ ದಿಸ್ತಾ.
ವಾಟ್ ಚುಕೊನ್ ತುಜ್ಯಾ ಮಂದಿರಾಂತ್ ಪಾವ್ಲಾಂ,
ಆಯ್ಲಾಂ ದೆಖುನ್ ಚಾರ್ ಗಜಾಲಿ ಸಾಂಗ್ತಾಂ.
ಚೆಪ್ಲಲ್ಯಾಂ ಲೊಕಾಚಿಂ ರುದಾನಾಂ,
ಜಾಲ್ಯಾಂತ್ ಮ್ಹಾಕಾ ತುಜಿಂ ಭಜನಾಂ.
ದುಬ್ಳ್ಯಾ ಲೊಕಾನ್ ಸೊಸ್ಚಿ ದಗ್ದವ್ಣಿ,
ಹಿಚ್ ತುಕಾ ಮ್ಹಗೆಲಿ ಭೆಟವ್ಣಿ.

ಬಾ. ಪ್ರಾತಾಪ್-ಆಚ್ಯೊ ಕವಿತಾ ಮ್ಹಣ್ಲ್ಯಾರ್ ಎಕೆ ತರೆಚಿಂ ಆಯ್ಚ್ಯಾ ಕಾಳಾಚಿಂ ’ಭಜನಾಂ.’ ತಾಂತುಂ ದೆವಾಕ್ ಸಮ್ಜೊಂಕ್ ಕಠಿನ್ ಅಸೊ ವಿಶಯ್ ನ್ಹಯ್. ತೊ ಎಕ್ ಗುರು, ಇಶ್ಟ್ ವಾ ಮೊಗಿ ಜಾವ್ನ್ ಫುಡೆಂ ಯೆತಾ. ಭಕ್ತಿ ಆಮ್ಚ್ಯಾ ಕಾಳ್ಜಾಚಿ ಅಧ್ಯಾತ್ಮಿಕ್ತಾಯ್. ತಾಂತುಂ ಭಕ್ತ್ (ಡಿವೋಶನ್) ಭಟಾಕ್ ವಾ ಪಾದ್ರಿಕ್ ಮೆಳನಾಸ್ತಾನಾಂ, ಫಕತ್ ಲೊಕಾಚಿ ಸೆವಾ ಕರುಂಕ್ ವೆತಾ. 
ದೇವ್ ಮ್ಹಜೊ ಗುರು, ದಿತಾ ಮ್ಹಾಕಾ ಕುರು,
ಆಪಯ್ತಾ ಖುಣಾಂನಿ, ಉಲಯ್ತಾ ಕುರ್ವಾಂನಿ,
ಹಾಸಯ್ತಾ ಉಲ್ಲಾಸಾಂನಿ, ರಡಯ್ತಾ ಉಮಾಳ್ಯಾಂನಿ,
ಶಿಕಯ್ತಾ ಘಡಿತಾಂನಿ, ಜಾಗಯ್ತಾ ಆಕಾಂತಾಂನಿ

3. ಬಾ. ಪ್ರಾತಾಪ್-ಆಚಿ ಅಧ್ಯಾತ್ಮಿಕ್ತಾಯ್: ಮನಿಸ್ ಆನಿ ಸೃಶ್ಟಿಕೆಂದ್ರಿತ್ (ಸಂಯ್ಬ್)
ಬಾ. ಪ್ರಾತಾಪ್-ಆಚಿ ಅಧ್ಯಾತ್ಮಿಕ್ತಾಯ್ ಮನ್ಶಾಪಣಾಂತ್ ದಿಸೊನ್ ಯೆತಾ. ತಾಚ್ಯಾ ಮತಾನ್, ದೆವಾಚೆಂ ಭಜನ್ ಕರಪ್ ಮ್ಹಣ್ಜೆ ಮನ್ಶಾಚೊ ಆನಿ ಸಂಯ್ಬಚೊ ಮೊಗ್ ಕರಪ್, ವಾ ಸೃಶ್ಟಿಚೊ ಸಾಂಬಾಳ್ ಕರಪ್. ತಾಚ್ಯಾ ಭಕ್ತಿ ಸೊಭಾಣ್ ಕವಿತಾ ಪುಂಜ್ಯಾಂತ್ ಆಸ್ಚ್ಯಾ 85 ಕವಿತಾಂಚ್ಯಾ ರುಪಾನ್ ಆಮಿ ತಾಚ್ಯಾ ಹ್ಯಾ ಅಧ್ಯಾತ್ಮಿಕ್ ಪ್ರವಾಸಾಚೆಂ ಅಶೆಂ ವರ್ಗಿಕರಣ್ ಕರುಂ ಯೆತಾ:

1. ದೆವಾಚೊ ಉಲೊ 
ವಂದಿತಾಂ, ಆಯ್ಲಾಂ ಹಾಂವ್, ಪ್ರಾರ್ಥನಾಂ ಮ್ಹಜಿ ದೆವಾ ಹಾಂತುಂ ಮನಿಸ್ ದೆವಾಕ್ ಸೊಧುನ್ ಆಸಾ ಮ್ಹಣ್ಲೊ ಸಂದೆಶ್ ಆಮ್ಕಾಂ ಮೆಳ್ಟಾ. ಹಾಂಗಾ ಮನಿಸ್ ಆಪ್ಲೆಂ ಹಾಂವ್ಪಣ್ ವಾ ಅಹಂಕಾರ್ ಸೊಡುನ್ ದೆವಾಚೆ ಫುಡೆಂ ಯೆತಾ. ದೆಖಿಕ್, ಪ್ರಾರ್ಥನಾಂ ಮ್ಹಜಿಂ ದೆವಾ ಕವಿತೆಂತ್ಲ್ಯೊ ಹ್ಯೊ ವಳಿ: 
ಪ್ರಾರ್ಥನಾಂ ಮ್ಹಜಿಂ ದೆವಾ, ಸಾಧನಾಂ ತುಜಿ ಸೆವಾ,
ವಂದನಾಂ ಮ್ಹಜಿಂ ತುಕಾ, ಬಂದನಾಂ ತುಜಿಂ ಮ್ಹಾಕಾ.
ಕಾಡ್ ಮ್ಹಜೊ ರೊಗ್, ದಿವ್ನ್ ತುಜೊ ಮೊಗ್,
ಕಾಡ್ ಮ್ಹಜೊ ರಾಗ್, ದಿವ್ನ್ ತುಜೊ ದಾಗ್.

ಕಾಡ್ ಮ್ಹಜೆಂ ಗರ್ವ್, ಹಾಡ್ ತುಜೆಂ ಸರ್ವ್,
ಕಾಡ್ ಮ್ಹಜೆಂ ಸಳ್, ಹಾಡ್ ತುಜೆಂ ಬಳ್.

2. ಮನಿಸ್ ದೆವಾಚೆಂ ಮಂದಿರ್
ಮನ್ಶಾಚಿ ಕುಡ್ ಆನಿ ಅತ್ಮೊ ಹೆಂ ದೆವಾಚೆಂ ಖರೆಂ ಘರ್ ಮ್ಹಣ್ ‘ಆಮಿ ದೆವ್‌ಮಂದಿರ್’ ಹ್ಯೆ ಕವಿತೆಂತ್ ತೊ ಸಾಂಗ್ತಾ. ದೆವ್ ಮ್ಹಜೊ ಗುರು ಆನಿ ಮ್ಹಜ್ಯಾ ದೆವಾ ಹಾಂತುಂ ತೊ ದೆವಾ ಲಾಗಿಂ ಎಕ್ ಇಶ್ಟಾಗತಿಚೊ ಸಂಬಂದ್ ದಾಖಯ್ತಾ. ತುಜೆಂ ಭಜನ್ ಹಾಂತುಂತ್ ತೊ ದೆವಸ್ಪಣ್ (Sacredness) ಆಮಿ ಮನ್ಶಾಚಿ ಸೆವಾ ಕರುನ್ ಆನಿ ಸಂಯ್ಬಾಚಿ ರಾಖಣ್ ಕರುನ್, ಆಮ್ಚ್ಯಾ ಜಿವಿತಾಂತ್ ದೆವಾಕ್ ಸುವಾತ್ ದಿಂವ್ ಯೆತಾ ಮ್ಹಣ್ ತೊ ಸಾಂಗ್ತಾ. ‘ಆಮಿ ದೆವ್ ಮಂದಿರ್’ ಹಾಂತ್ಲ್ಯೊ ಹ್ಯೊ ವಳಿ ಪಳೆಂವ್ಯಾ: 
ಆಮಿ ದೆವ್ ಮಂದಿರ್, ತಾಂತುಂ ದೆವ್ ಹಾಜಿರ್.
ಆಮ್ಚಿ ಜಿಣಿ, ಖಾಲ್ತಿ ನೆಣ್ತಿ, ಮಂದಿರಾಂತ್ಲಿ ಜಳ್ತಿ ಪಣ್ಟಿ.
ಮೊಗಾಳ್ ಉತ್ರಾಂ, ಮೊವಾಳ್ ಸುತ್ರಾಂ, ಮಂದಿರಾಂತ್ಲಿಂ

3. ಖಂತ್ ಆನಿ ದಯಾ (Empathy)
ತಾಚಿ ಅಧ್ಯಾತ್ಮಿಕ್ತಾಯ್ ಸಂವ್ಸಾರಾಂತ್ ಆಸ್ಚ್ಯಾ ದುಖಾಂಕ್ ವೆಂಗಯ್ತಾ. ಮ್ಹಜೊ ದೆವ್ ರಡ್ಲಾ ಹಿ ಎಕ್ ಖಲ್ ಕವಿತಾ, ಜಿ ದಾಖವ್ನ್ ದಿತಾ ಕಿ ಮನಿಸ್ ದುಖಿ ಆಸ್ತಾನಾಂ ದೆವುಯ್ ದುಖಿ ಜಾತಾ. ಮನ್ಶಾ ಕಿತ್ಯಾಕ್ ಭಿಯೆತಾಯ್? ಹಾಂತುಂತ್ ಮನ್ಶಾಚ್ಯಾ ಭಿರಾಂತಿಚೊ ಪರಿಣಾಮ್ ತಾಣೆಂ ಸಾಂಗ್ಲಾ ಆನಿ ವಾಚ್ಪ್ಯಾಕ್ ಆತ್ಮಿಕ್ ಬಳ್ ದಿಲಾಂ. ಮ್ಹಜೊ ದೆವ್ ರಡ್ಲಾ ಹ್ಯೆ ಕವಿತೆಂತ್ ತೊ ಅಶೆಂ ಮ್ಹಣ್ಟಾ:
ಮ್ಹಜ್ಯಾ ದೆವಾಕ್ ಕೆದ್ನಾಂ ತರಿ ತುಮಿ ದೆಖ್ಲಾ? ಮ್ಹಜೊ ದೆವ್ ರಡ್ತಾನಾಂ ತಾಕಾ ತುಮಿ ಚೊಯ್ಲಾ?
ಸಿತಾ ಅಪಹರಣಾ ವೆಳಾರ್ ತೊ ರಡ್ಲಾ, ದ್ರಾವ್ಪಾದಿಚೆಂ ವಸ್ತ್ರಹರಣ್ ಜಾತಾನಾಂ ತೊ ರಡ್ಲಾ, ಖುರ್ಸಾರ್ ಉಮ್ಕಳ್ಟಾನಾ ಆಮ್ಚೆ ಪಾಸತ್ ತೊ ರಡ್ಲಾ

4. ಸಂಯ್ಬ್ ಆನಿ ಜಿವಿತಾಂತ್ ದಿಶ್ಟಾವೊ 
ದೆವ್, ಮನಿಸ್ ಆನಿ ಸಂಯ್ಬಾಚೆಂ ನಾತೆಂ, ಸಾಳ್ಕಾಚೆಂ ರುಪ್ ತುಗೆಲೆಂ ಹಾಂತುಂ ಭವ್ ಬರೆ ರಿತಿನ್ ವರ್ಣಿಲಾಂ. ದೆಖುನ್ ಸಂಯ್ಬಾಚಿ ಜತನ್ ಖುಬ್ ಮ್ಹತ್ವಾಚಿ ಹೆಂ ಆಮಿ ಆಮ್ಚ್ಯಾ ಮನಾಂತ್ ದವ್ರುಂಕ್ ಜಾಯ್. 
ಸಾಳ್ಕಾಚೆಂ ರುಪ್ ತುಗೆಲೆಂ, ದೆಖುಂಕ್ ದೆವಾ ಅತ್ರೆಕ್ತಾಂ
ಮೆರುಂ ಉದ್ಕಾಕ್ ತಾನೆತಾ, ವಾಸ್ರುಂ ದುದಾಕ್ ಭುಕೆತಾ,
ಭುಮಿ ಪಾವ್ಸಾಕ್ ಲಾಲೆತಾ, ಗಾವ್ಪಿ ಗಿತಾಕ್ ಆಶೆತಾ.

5. ಎಕ್ಚಾರ್ ಆನಿ ಮುಕ್ತಿಸುಟ್ಕಾ 
ಪ್ರವಾಸಾಚೊ ಶೆವೊಟ್ ಮ್ಹಣ್ಜೆ ದೆವಾಚ್ಯಾ ತ್ಯಾ ರುಪಾಂತ್ ಎಕ್ ಜಾವಪ್. “ಆಮಿ ಎಕ್” ಆನಿ “ಹಾಂವ್ ಆಲ್ತಡಿ ತುಂ ಪಲ್ತಡಿ” ಹಾಂತುಂ ಮನಿಸ್ ಆನಿ ದೆವಾ ಮದ್ಲೊ ಫರಕ್ ಕಸೊ ಉಣೊ ಜಾತಾ ತೆಂ ದಾಖಯ್ಲಾಂ. ತುಜ್ಯಾ ರಿಣಾಂತ್ಲಿ ಸುಟ್ಕಾ ಮ್ಹಣ್ಜೆ ಆತ್ಮ್ಯಾಚಿ ಖರಿ ಸುಟ್ಕಾ ವಾ ಮುಕ್ತಿ. ಹಾಂವ್ ಆಲ್ತಡಿ, ತುಂ ಪಲ್ತಡಿ, ಹ್ಯೆ ಕವಿತೆಂತ್ಲಿಂ ಹಿಂ ಉತ್ರಾಂ ಹಾಂಗಾ ಮಲಾದಿಕ್:
ಹಾಂವ್ ಆಲ್ತಡಿ, ತುಂ ಪಲ್ತಡಿ, ಬಸೊನ್ ಉಲಂವ್ಯಾ ಎಕ್ ಘಡಿ.
ಉತರ್ ತುಜೆಂ ಅಂರುತಾಚಿ ಧಾರ್, ನದರ್ ತುಜಿ ಖಾಲ್ತಿಕಾಯೆ ಲ್ಹಾರ್.
ಸೃಶ್ಟಿ ತುಜಿ ಗಾಜಯ್ತಾ ಪ್ರಿತಿ, ಪೃಥ್ವಿ ತುಜಿ ಜಾಗಯ್ತಾ ಭಕ್ತಿ.

ಬಾ. ಪ್ರಾತಾಪ್-ಚೆಂ ಕೊಂಕಣಿ ಭಾಶೆಕ್ ಆನಿ ಸಾಹಿತ್ಯಾಕ್ ಯೊಗ್‍ದಾನ್
ಬಾ. ಪ್ರಾತಾಪಾನಾಂದಾ ನಾಯ್ಕ್-ಆಚೆಂ ಯಗ್‍ದಾನ್ ಫಕತ್ ಅಧ್ಯಾತ್ಮಿಕ್ ನ್ಹಯ್, ತೊ ಭಾಶೆಚ್ಯಾ ವಾವ್ರಾಂತ್ ಲೆಗುನ್ ದಿಸನ್ ಯೆತಾ. ಥೊಮಾಸ್ ಸ್ತೆಫನ್ಸ್ ಕೊಂಕಣಿ ಕೆಂದ್ರ್ (TSKK)-ಚೊ ದಿರೆಕ್ತರ್ ಜಾವ್ನ್ ತಾಣೆಂ ಕೊಂಕಣಿ ಭಾಶೆಚಿ ಸೆವಾ ಕೆಲ್ಯಾ. ಭಾಶೆಚೆರ್ ಅನಿತ್ ಜಾತಾನಾಂ ತೊ ತಿತ್ಲೆಚ್ ನೆಟಾನ್ ಉಲಯ್ಲಾ. ಕೊಂಕಣಿ ಭಾಸ್ ಶಾಳಾಂನಿ ಆನಿ ಇಗ್ರಜಾಂನಿ ವಾಪ್ರುಂಕ್ ತಾಣೆಂ ಮ್ಹತ್ವಾಚೊ ವಾವ್ರ್ ಕೆಲಾ ಆನಿ ಪುಸ್ತಕಾಂ ಲೆಗುನ್ ಛಾಪ್ಲ್ಯಾಂತ್. ಎಕ್ದಮ್ ಸರಳ್ ಸಭಾವಾಚೊ ಬಾ. ಪ್ರಾತಾಪ್ ನಾಯ್ಕ್, ಆಪ್ಲಿಂ ಮೊಲಾದಿಕ್ ಜಾಣ್ವಾಯೆಚಿಂ ಉತ್ರಾಂ ದಿವ್ನ್ “ಶಿಂಪಿಯೆಂತ್ಲಿಂ ಮೊತಿಯಾಂ” ವರ್ವಿಂ ಯೂಟ್ಯೂಬ್-ಆಚೆರ್ ಆಪ್ಲ್ಯಾ ಪಳೆವ್ಪ್ಯಾಂ ಮುಖಾರ್ ಆಜುನ್, ಹ್ಯೆ ಪಿರಾಯೆರ್ ಲೆಗುನ್ ಸತತ್ ದವ್ರುನ್ ಆಸಾ. ಹ್ಯಾ ಸಗ್ಳ್ಯಾ ತಾಚ್ಯಾ ಕೊಂಕಣಿ ವಾವ್ರಾಂತ್ ತಾಚಿ ಫಕತ್ ದೆವಾಕ್ ಆನಿ ಮನ್ಶಾಕುಚ್ ನ್ಹಯ್, ಪುಣ್ ಕೊಂಕಣಿ ಥಂಯ್ ಆಸ್ಚಿ ತಾಚಿ ಭಕ್ತಿ ಲೆಗುನ್ ತಾಣೆಂ ದಾಖವ್ನ್ ದಿಲ್ಯಾ.

ಸಂಪವ್ಣಿ 
ಅಧ್ಯಾತ್ಮಿಕ್ ಸತಾಂ, ಮನ್ಶಾ ಜಿವಿತಾಚಿ ಮೊಲಾಂ ಆಮ್ಚ್ಯಾ ಆವಯ್-ಭಾಶೆಂತ್ಲ್ಯಾನ್ ಆಮ್ಕಾಂ ಸರಳ್ತಾಯೆನ್ ವ್ಯಕ್ತ್ ಕರುಂಕ್ ಜಾತಾತ್ ಮ್ಹಣ್ ಬಾ. ಪ್ರಾತಾಪಾನಾಂದಾ ನಾಯ್ಕ್-ಆಚ್ಯೊ ಕವಿತಾ ಆಮ್ಕಾಂ ಹೆಂ ದಾಖವ್ನ್ ದಿತಾ. ಜಿವಿತಾಚೊ ಸಂತಸ್, ಸಂಯ್ಬಾಚಿ ರಾಖಣ್ ಆನಿ ದೆವಾಕ್ ಮೆಳ್ಪಾಚಿ ಆಶಾ, ಹ್ಯೊ ಸಗ್ಳ್ಯೊ ಗಜಾಲಿ ಎಕ್ಟಾಂಯ್ ಹಾಡುನ್ ತಾಣೆಂ ಎಕ್ ಮೊಲಾದಿಕ್ ಸಾಹಿತ್ಯಾ ಘಡ್ಲಾಂ. ತಾಚಿ ಕವಿತಾ ಆಮ್ಕಾಂ ಶಿಕಯ್ತಾ ಕಿ ಅಧ್ಯಾತ್ಮಿಕತಾಯ್ ಮ್ಹಣ್ಜೆ ಸಂವ್ಸಾರ್ ಸೊಡುನ್ ವಚಪ್ ನ್ಹಯ್, ಪುಣ್ ಸಂಸಾರಾಂತ್ ಆಸೊನ್ ದೆವಾಚೊ ಅಣ್ಭವ್ ಘೆವಪ್. ದೆವ್ ಮನ್ಶಾ ಸವೆಂ ವೊಸ್ತಾ. ಕೊಂಕಣಿ ಸಾಹಿತ್ಯಾಚ್ಯಾ ಮಳಾರ್ ತಾಚೊ ತಾಳೊ ಎಕ್ ಉಜ್ವಾಡ್ ಜಾವ್ನ್ ಕೊಂಕಣಿ ಮನ್ಶಾಕ್ ಸದಾಂಚ್ ವಾಟ್ ದಾಖಯ್ತ್ ರಾವ್ತಲೊ. ಸಾಳಕ್ ಕವಿತೆಚಿಂ ಉತ್ರಾಂ ಸಾಂಗೊನ್ ಸಂಪಯ್ತಾಂ:
ಸಾಳಕ್ ಚಿಕ್ಲಾಂತ್ ಜಲ್ಮತಾ, ಪುಣ್ ಉದ್ಕಾರ್ ತೆಂ ಫುಲ್ತಾ, ದೆವಾ ಪಾನ್ಯಾಶಿಂ ಸೊಬ್ತಾ.
ದೆವಾ ಕರ್ ಮ್ಹಾಕಾ ಸಾಳಕ್, ದಿ ತುಜಿ ಆತ್ಮಿಕ್ ಝಳಕ್, ಪಾರ್ಕುಂಚಿ ದಯ್ವಿಕ್ ವಳಖ್.