ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ವಿಂಚ್ಣಾರ್ ಮಟ್ವಿಕಾಣಿ: ರೆತಿರ್
ವಲ್ಲಿ ಕ್ವಾಡ್ರಸ್
ವಲ್ಲಿ ಕ್ವಾಡ್ರಸ್: ಕೊಂಕ್ಣಿ, ಕಾನಡಿ ಭಾಸೆಂತ್ ಪಾಟ್ಲ್ಯಾ ಪಂಚ್ವೀಸ್ ವರ್ಸಾಂ ಥಾವ್ನ್ ಲಗ್ಬಗ್ ದೊನ್ಶಾಂ ವಯ್ರ್ ಮಟ್ವ್ಯೊ ಕಾಣ್ಯೊ ಬರಯ್ಲ್ಯಾತ್. ಸ್ವತಾಚೆ ತೀನ್ ಬೂಕ್ ’ಆಶಾವಾದಿ’, ’ಖಿಳೊ’, ’ಕಂಗಾಲ್ ಆನಿ ತಾಚಿ ಕುಕ್ಕೆಹಳ್ಳಿ’ ಪರ್ಗಟ್ಲ್ಯಾತ್, ಹೆರಾಂಚಾ ಕಾಣ್ಯಾಂಚೊ ಬೂಕ್ ’ಕುಳ್ವಾರ್ಚೆಂ ದಾಯ್ಜ್’, ’ಸರ್ಗಾವಯ್ಲಿ ಮಾಂಯ್’ ಬುಕಾಂಚೆಂ ಸಂಪಾದನ್ ಕೆಲಾಂ, ಕರ್ನಾಟಕ್ ಕೊಂಕ್ಣಿ ಸಾಹಿತ್ಯ್ ಅಕಾಡೆಮಿಚಾ ಶೆಕ್ಡ್ಯಾಚ್ಯೊ ವಿಂಚ್ಣಾರ್ ಕೊಂಕ್ಣಿ ಮಟ್ವ್ಯೊ ಕಾಣ್ಯೊ ಬುಕಾಚೊ ಸಂಗ್ರಹಕ್ ಜಾವ್ನಾಸಾ. ಕೊಂಕ್ಣಿ ಮಟ್ವ್ಯಾ ಕಾಣ್ಯಾಂಚೆಂ ಅಂಕಣ್ ’ಮುಖಾಂ’ ಚಲವ್ನ್ ವೆಲಾಂ ತಶೆಂಚ್ ಪ್ರಸ್ತುತ್ ಚ್ಯಾರ್ ಅಂಕಣಾಂ, ’ಕಥಾಮೃತ್’, ’ಕಥಾದಾಯ್ಜ್’, ’ಕಥಾಝರ್’, ’ಕಥಾಂಕರ್’ ಚಲವ್ನ್ ವರ್ತಾ. ಮಟ್ವ್ಯಾ ಕಾಣ್ಯಾಂಚೆರ್ ಅಧ್ಯಯನ್ ’ಕಥಾಪಾಠ್’ ಚಲವ್ನ್ ವೆಲಾಂ. ರಾಕ್ಣೊ ಸಾಹಿತಿಕ್ ಸ್ಪರ್ಧ್ಯಾಂತ್ ತೀನ್ ಪಾವ್ಟಿಂ ಇನಾಮಾಂ ಜಿಕ್ಲಾ. ಹಾಚ್ಯೊ ತೀನ್ ಮಟ್ವ್ಯೊ ಕಾಣ್ಯೊ ನಾಟ್ಕುಳೆ ಜಾವ್ನ್ ಖೆಳಯ್ಲ್ಯಾತ್. ಧಾಂವ್ಣಿ (ದೆ|ಜೊರ್ಜಿ ಪೀಂತ್), ಖಣ್ (ಸ್ವ), ಗೂಂಡಾ (ಮೆಲ್ವಿನ್ ಜೆ. ವಾಸ್).
ಹೆರ್ ಕಾಣ್ಯೊ: ಏಕ್ ಕ್ರಿಕೆಟ್ ಹೀರೊ, ಬಾಂಯ್, ಖಣ್, ಕುಡ್ಡೊ, ಜಾಂಬ್ಳಾಂಚೊ ರೂಕ್, ಆಶಾವಾದಿ, ಏಕ್ ಮೊಗಾಚಿ ಕಥಾ, ಸಂಬಂಧ್, ಶನಿ, ಖುರ್ಸಾವಾಟ್, ಕಂಟ್ರಿ ಆವಯ್, ಭಾಂದ್, ಸುಟ್ಕಾ, ಅಜ್ಜಿಕುಂಜ, ಜಿಣ್ಯೆ ಸೂತ್ರ್, ಮಾರ್, ತೆಂ ಆನಿ ಹಾಂವ್, ಅನಾವರಣ್, ಮತಾಂತರ್, ಸೊಲ್ಲೊ, ಜಿಣ್ಯೆ ಸಾಂಗಾತಿ, ಮಾಪ್
ಪ್ರಸ್ತುತ್:
ಪಾಟ್ಲ್ಯಾ ಕಿತ್ಲೆಶ್ಯಾ ಮಹಿನ್ಯಾ ಥಾವುನ್ ಮ್ಹಜ್ಯಾ ಮತಿಚ್ಯಾ ದರ್ಯಾಂತ್ ಉಚಾಂಬಳ್
ಜಾಂವ್ಚಾ ಚಿಂತ್ಪಾಚಿಂ
ಲ್ಹಾರಾಂ ಮ್ಹಜ್ಯಾ ಜಿವಿತಾಚೆರ್ ಸವಾಲ್ ಕರ್ತಾಲಿಂ ಹಾಂವ್ ನೆಣಾ. ಹೆಂ ಅಶೆಂ ಮ್ಹಕಾಚ್ಚ್ ಆನಿ
ಮ್ಹಜ್ಯಾಚ್ ಜಿಣ್ಯೆಂತ್ ಕಿತ್ಯಾಕ್ ಘಡ್ತಾ ಮ್ಹಳ್ಳೆಂ ಮ್ಹಜ್ಯಾ
ಚಿಂತ್ಪಾ-ಪರಿಧಿ ಭಾಯ್ಲೆಂ. ಸಂಸಾರಾಂತ್
ಜರ್ ಪಾತಾಕ್ ಮ್ಹಳ್ಳೆಂ ನಾತ್ಲೆಲೆಂ ತರ್ ಯೆಮ್ಕೊಂಡಾಚೆಂ ರಚನ್
ಜಾತೆಂನಾ ಆನಿ ದೇವ್ ವಿಶೆವ್ ಘೆತೊನಾ ಮ್ಹಣ್ ಏಕ್ ಘಡಿ ಚಿಂತ್ಲೆಂ. ತಶೆಂ ಆಸ್ತಾಂ ಹರ್ಯೆಕ್ ಮನಿಸ್ ಏಕ್ ನಾ ಏಕ್ ರಿತಿರ್ ಪಾತ್ಕಿ
ಜಾವ್ನಾಸ್ತಾಂ ಹಾಂವೆಂಯೀ ಜರ್ ಪಾತಾಕ್/ಚೂಕ್/ಗುನ್ಯಾಂವ್ ಯಾ ಕಿತೆಂಯ್ ಕೆಲಾಂ ತರ್ ಮ್ಹಾಕಾ
ಮೆಳ್ಲ್ಲಿ ಶಿಕ್ಶಾ ಕಿತ್ಲಿ ಧಾರುಣ್ ಆನಿ ಕ್ರೂರ್? ಕಾಳೀಜ್ ಆಸ್ಲೆಲ್ಯಾಂಚೆಂ
ಕಾಳೀಜ್ ದೋನ್ ಧಾರೆಚ್ಯಾ ತಾಲ್ವಾರೆನ್ ಶಿಂದ್ಲೆಲೆಪರಿಂ ಭೊಗ್ಚಿ ದೂಖ್ ಆನಿ
ಅಕ್ಮಾನ್? ಮ್ಹಜ್ಯಾ ಅಂತಸ್ಕರ್ನಾಚಾ ತಾಳ್ಯಾ ಪ್ರಕಾರ್ ಹಾಂವೆ ಕಿತೆಂಯ್ ಚೂಕ್ ಕೆಲ್ಲಿನಾ. ಜ್ಯೆಂ ಕಿತೆಂ ಹಾಂವೆಂ ಕೆಲಾಂ
ಮ್ಹಜ್ಯಾ ಜಿಣ್ಯೆಚಾ ತತ್ವಾಂಕ್ ಸರಿ ಜಾವ್ನ್ ಕೆಲಾಂ ಶಿವಾಯ್ ಹೆರ್ ಕಿತೆಂಚ್ಚ್
ನ್ಹಂಯ್. ಪುಣ್ ಮ್ಹಜ್ಯಾ ಜಿಣ್ಯೆಚಿಂ ತತ್ವಾಂ ಮ್ಹಾಕಾ ಬರೆಂ ಖಂಚೆ ಆನಿ ವಾಯ್ಟ್ ಖಂಚೆ ತೆಂ ದಾಖಂವ್ಕ್ ಸಕ್ತಾ ಮ್ಹಳ್ಳಿ
ಧೃಡ್ ಪಾತ್ಯೆಣಿ ಆಸ್ಲ್ಲಿ.
ಭೂತ್:
ಲ್ಹಾನ್ಪಣಾಚಾ ಮ್ಹಜ್ಯಾ ಮತಿರ್ ಹೆಂ ಬೆಬ್ದೆಪಣ್, ಕುಟ್ಮಾಂತ್ ಜಾಲ್ಲಿಂ ಝಗ್ಡಿಂ, ಮಾರ್-ಫಾರ್, ಎಕಾಮೆಕಾ ಹಗೆಂ-ಮೊಸೊರ್ ಭರೊನ್ ಗೆಲ್ಲೆಂ ಶಿವಾಯ್ ಹೆರ್ ಖಂಚೆಯ್ ನ್ಹಂಯ್. ಕುಟ್ಮಾಚೊ ಎಕ್ಲೊಚ್ಚ್ ಚೆಡೊ ಜಾವುನ್ ಜಲ್ಮಾಲ್ಲೊಂ ತರೀ ಆಬಾಚಾ ಗುರ್ಕಾರ್ಪಣಾಕಾಲ್ ಆಸ್ಚಾ ತೀನ್ ಕುಟ್ಮಾಚಾ ಘರಾಣ್ಯಾಚೊ ಎಕ್ಲೊಚ್ಚ್ ನಾತು ನ್ಹಂಯ್. ಕ್ರೀಸ್ತಿ ಘರಾಣೆ ಆಮ್ಚೆಂ. ಸದಾಂ ಮಾಗ್ಣೆಂ/ತೇರ್ಸ್/ವೊರೆಸಾಂವ್ ಆಮ್ಚಾ ಘರಾ ಚುಕುಲ್ಲೆಂ ನಾ. ಆಮೊರಿಚಿ ಘಾಂಟ್ ಜಾತೆಚ್ಚ್ ಬುರ್ಗಿಂ ಸಗ್ಳಿಂ ಮೆಳೊನ್ ಕಂತಾರ್ ಸುರು ಕರ್ತಾನಾ ಗಾದ್ಯಾ-ಮ್ಹಧ್ಲ್ಯಾ ತೆಂಡ್ಲೆ ಮಾಟ್ವಾಭಿತರ್ಲ್ಯಾ ನಾಣಿಯೆಂತ್ ನ್ಹಾಂವ್ಕ್ ಗೆಲ್ಲೊ ಆಬ್ ಸಯ್ತ್ ತಾಚೊ ಮೊಟೊ ತಾಳೊ ಮೆಳಯ್ತಾಲೊ. ಉಪ್ರಾಂತ್ ಆಮ್ಚಿಂ ಹೆರ್ ಕಂತಾರಾಂ ಜಾತಾಸ್ತಾನಾ ಆಬ್ ಸದಾಂಚೆಪರಿಂ ಇಲ್ಲೆಂ ಶೆಕುನ್ ಆಂಗ್ಣಾಚಾ ಕೊನ್ಶಾರ್ ಆಸ್ಚಾ ಮಾತ್ಯೆಚಾ ಸೊಪ್ಯಾರ್ ಬೊಸೊನ್ ಪಾನ್-ಪೊಡ್ ಚಾಬ್ತಾಲೊ. ದೀಸ್ಬರ್ ವೊತಾಂತ್ ಕಾಮ್ ಕೆಲ್ಲಿ ಮ್ಹಾಂಯ್ ಕುಜ್ನಾಂತ್ ಕುಂಡ್ಲಿಂ-ಮಾಲ್ತ್ಯೊ ಆದ್ಳಾಯ್ತಾಲಿ ತರ್ ದೀಸ್ಬರ್ ಬಸ್ವಾಪರಿಂ ಬೊಂವ್ಚೊ ಮ್ಹಜೊ ಬಾಬ್ ಮ್ಹಾತ್ಯಾರ್ ಸಾತ್-ಶಿಂಗಾಚೊ ದೆಂವ್ಚಾರ್ ಘೆವುನ್ ಲಕೊನ್ ಲಕೊನ್ ಭಿತರ್ ಯೆತಾಲೊ. ಉಪ್ರಾಂತ್ ಕಿತೆಂ ಘಡ್ತಾ ತೆಂ ಹಾಂವೆಂ ದೊಳೆ ದಾಂಪುನ್ ಸಯ್ತ್ ನಿಹಾಳ್ಯೆತ್.
ಮ್ಹಜ್ಯಾ ಮ್ಹಾಂಯ್ಕ್ ಪೊಜ್ಡ್ಯಾ ಉತ್ರಾಂಚೊ ಗಾಳಿ, ಶೆಂಡೊ ಧರ್ನ್ ವೊಣೊದಿಕ್ ಮ್ಹಾರ್ಚೆಂ, ಮ್ಹಾಂಯ್ಚೆಂ ಅಸಹಾಯಕ್ ರಡ್ಣೆ, ಪರತ್ ಫ಼ುಟ್ಚೊ ವೋಂಟ್ ಆನಿ ತ್ಯಾ ಕಾಳ್ಕ್ಯಾ ರಾತಿಯ್ ಉಟೊನ್ ದಿಸ್ಚೆಂ ತಾಬ್ಶೆಂ ರಗಾತ್
ಮ್ಹಜ್ಯಾ ಬಾಬಾಚಾ ದಾದ್ಲ್ಯಾಪಣಾಚೆರ್ ಸವಾಲ್
ಕರ್ತಾಲೆಂ. ತರೀ ಹ್ಯಾ ಖಂಚಾಚಿಯಿ ಪರ್ವಾ ಕರ್ಚೊ ಮ್ಹಜೊ ಬಾಬ್ ನ್ಹಂಯ್. ತೊ ಜಾಣಾ ತೊ ಕಾಳ್ಜಾಂತ್ ಬರೊ ಮ್ಹನಿಸ್, ಮೊಸ್ತ್ ಸಾದೊ ಬೊಳೊ. ಪುಣ್ ಹೆಂ ಸಯ್ತಾನ್ಪಣ್ ಘಡ್ತಾ ತರ್ ಹ್ಯಾ ಸೊರ್ಯಾ ಥಾವುನ್ ತರೀ ಆಜ್ ಅಖ್ರೇಚೊ ಸೊರೊ ಮ್ಹಳ್ಳೆಂ ಚಿಂತಾಪ್ ತಾಕಾ ಸದಾಂಚೆ ಜಾಲ್ಲೆಂ. ಆನಿ
ಮ್ಹಜ್ಯಾ ಮತಿಂತ್ ಹೆಂ ಏಕ್ ಕೆದಿಂಕ್ಚ್ಚ್ ಸೊಡ್ನ್ ವಚಾನಾತ್ಲ್ಲೆಂ ಖತ್ ಜಾವುನ್ ಗೆಲ್ಲೆಂ.
ಚೂಕ್:
ಬುರ್ಗೆಂಪಣ್ ಮ್ಹಜೆಂ ಮ್ಹಜ್ಯಾ ಮ್ಹಾಂಯ್-ಬಾಬಾಚಾ
ಮೊರ್ಣಾಂತ್ ಧಾಂವ್ಲೆಂ, ಆನಿಂ ತರ್ನಾಟ್ಪಣಾರ್ ಹಾಂವ್ ಬೊಂಬೊಯ್ಚಾ
ಮ್ಹಜ್ಯಾ ಆಕಯ್ಚಾ ಪುತಾಸವೆಂ (ಲ್ಹಾನ್-ಬಾಬ್) ರಾವ್ಲೊಂ. ಲ್ಹಾನ್-ಬಾಬ್ ಎಕಾ ಕಂಪೆನಿಂತ್ ಕಾಮ್ ಕರ್ತಾಲೊ ಆನಿ ತ್ಯಾ ಕುಡಾಂತ್ ತಾಚೆಸವೆಂ ಹಾಂವ್ ರಾವ್ತಾಲೊಂ. ಅಶೆಚ್ಚ್ ದೀಸ್ ಪಾಶಾರ್ ಜಾಲೆ ಆನಿ
ಲ್ಹಾನ್-ಬಾಬ್ ಕಾಜಾರ್ ಜಾಲೊ ಎಕಾ ಪೆಂಟೆಂತ್ಲ್ಯಾ ಮ್ಹಾಣ್ಕಾಲಾಗಿಂ. ಮಧುರ್ ತಾಳ್ಯಾಚೆಂ, ನಿಳ್ಶಾ ದೊಳ್ಯಾಚೆಂ, ಮೊರಾ ಚಾಲಿಚೆಂ ಚೆಡುಂ
ಮ್ಹಜ್ಯಾ ಲ್ಹಾನ್-ಬಾಬಾಕ್ ಪಸಂದ್ ಜಾವ್ನ್ ಗಡ್ದಾಯೆನ್ ತಾಂಚೆಂ
ಕಾಜಾರ್ ಜಾಲೆಂ. ಶೆರಾಚಾ ರಿವಾಜಿ ಪ್ರಕಾರ್ ಶೆರಾಂತ್ ಕಾಜಾರ್ ಜಾಲೆಂ ಆನಿಂ ಆಮ್ಚಾ ಹಳ್ಳೆಚಿಂ ಸಗ್ಳಿಂ ತಿ ಸೊಭಾಯ್ ಪಳೆಂವ್ಕ್ ಗೆಲ್ಲಿಂ. ಕಿತೆಂ ನಾಚ್, ಕಿತೆಂ ಪದಾಂ, ಕಸ್ಲೊ
ಆವಾಜ್, ಕಿತೆಂ ದಭಾಜ಼ೊ? ಸಗ್ಳೊ ಖರ್ಚ್ ಚೆಡ್ವಾಚಾ ಬಾಪಾಯ್ಚೊ. ಆನಿ
ಬೊಸ್ಲ್ಲೆಕಡೆಚ್ಚ್ ಅಯಿಲ್ಲ್ಯೊ ಜೆವ್ಣಾಚೊ ಬೊಶಿಯೊ. ಥೊಡ್ಯಾನಿ ಕಡಿ ಖಲ್ಸಾಂವಾಚೆರ್ ಶಿಂಪುನ್ ಘೆತ್ಲ್ಯಾರೀ ಧಾದೊಸ್ಕಾಯೆನ್ ಜೆವ್ಲಿಂ ಪುಣ್ ತಾಂಕಾ ಏಕ್ ಮಿಸ್ತೆರ್ ಸಮ್ಜಾಲ್ಲೊನಾ; ಘರಾಂತ್ ಮಾಲ್ತಿಭರ್
ಪೇಜ್ ಜೇವ್ನ್೦ಯ್ ಭರಾನಾತ್ಲೆಲೆಂ ಪೋಟ್ ಹಿಂ ದೋನ್ ಸನ್ನಾ ಖಾವ್ನ್ ಕಶೆಂ ಭರ್ಲೆಂ ಮ್ಹಣ್.
ಹಾಂವ್ ಎಕಾ ತಾಂದ್ಳಾಚಾ ಆಂಗ್ಡೆಂತ್ ಕಾಮ್ ಕರ್ತಾಲೊಂ. ಧನಿ ಬರೊ ಮನಿಸ್ ತರೀ ಸಾಂಬಾಳ್ ದಿತಾನಾ ಮಾತ್ ತಾಚಿ ಪರಿಗತ್ ತೊಚ್ ಕೊಣಾಕ್ಗೀ ಧರ್ನ್ ಉಮ್ಕಾಳ್ತಾ ಆನಿ ತಾಕಾ ಧರ್ನ್ ಹಾಂವ್ ಉಮ್ಕಾಳ್ತಾಂ ತಶೆಂ ಭೊಗ್ತಾಲೆಂ ಮ್ಹಾಕಾ.
ದೀಸ್ ಪಾಶಾರ್ ಜಾಲೆ ಆನಿಂ ಘರಾಕ್ ಯೆಂವ್ಚಿ ಸಯ್ರಿಂ ಚಡ್ ಜಾವ್ನ್ ಆಯ್ಲಿಂ ಅನಿ ಘರಾಂತ್ ದಭಾಜೊ ಚಡೊನ್ ಆಯ್ಲೊ. ಹರ್ಯೆಕಾ ಸನ್ವಾರಾ ಘರಾಂತ್ ಪಿಯೊಣೆ, ಡೆನ್ಸ್ ಅನಿ ಘರ್-ಭರ್ ಚುರುಟಾಂಚೊ ಧುಂವರ್ ಭರೊನ್ ಘರ್ ಯೆಮ್ಕೊಂಡಾಬರಿಂ ಭೊಗ್ಲೆಂ. ತರೀ ಹೊ ಪರ್ಕಿ ಗಾಂವ್, ಹೆರ್ ವಾಟ್ ಮ್ಹಾಕಾ ನಾ. ಲ್ಹಾನ್-ಬಾಬ್ ಮ್ಹಜೊ ಸಂಸಾರಿಂ ಬಾಪ್ ಜಾವ್ನಾಸ್ಲಲೊ ಆಸ್ತಾಂ ವಗೋ ರಾವ್ಲೆಲೆ ಶಿವಾಯ್ ದುಸ್ರಿ ವಾಟ್ ಮೆಳ್ಳಿನಾ.
ಅಶೆಂ ಹರ್ಯೆಕಾ ಸನ್ವಾರಾ ರಾತಿಂ ಹಾಂವೆಂ ಆಂಗ್ಡಿಂತ್ ನಿದೊಂಕ್ ಸುರು ಕೆಲೆಂ. ತ್ಯಾ ಆಂಗ್ಡಿಕ್ ಯೇವ್ನ್ ರಾತಿಂ ಕರ್ಚಾ ಉಂದ್ರಾಂಚೊ ಆವಾಜ್ ಲ್ಹಾನ್-ಬಾಬಾಚಾ ಘರಾಂತ್ ಜಾಂವ್ಚಾ ಆವಾಜಾಪ್ರಾಸ್ ಬರೊ ಲಾಗ್ಲೊ. ಲ್ಹಾನ್-ಬಾಬ್ ಮ್ಹಜ್ಯಾ ಮತಿಚೆ ಕಳ್ವಳೆ ಸಮ್ಜೊನ್ ಮ್ಹಕಾ ತಾಚಾ ತತ್ವಾಂನಿ ಭರಿಲಾಗ್ಲೊ "ಪಳೆರೆ ಆಮಿ ಅಮೇರಿಕಾಂತ್ ಆಸ್ತಾನಾ ಅಮೆರಿಕಾಚಾ ಭಾಸೆಂತ್ ಉಲಯ್ಜಾಯ್, ಜರ್ಮನಿಂತ್ ಜರ್ಮನಿ ಭಾಸೆಂತ್ ಉಲಯ್ಜಾಯ್. ಆಮಿ ಅಸಲ್ಯೊ ಪಾರ್ಟ್ಯೊ ಎದೊಳ್ ಪಳೆಂವ್ಕ್ ನಾಂತ್ ಕಿತ್ಯಾಕ್ ಮ್ಹಳ್ಯಾರ್ ಆಮಿ ಹಳ್ಳೆಚೆ ಕಂಟ್ರಿ ಮನಿಸ್ ಆನಿಂ ಅಶೆಂಚ್ ಹಳ್ತಾರ್ ಸವಯ್ ಜಾತಾ"
ತಾಚಾ ತತ್ವಾಂಚೊ ದಾಳೊ ಮ್ಹಜ್ಯಾ ಮ್ಹತಿಚಾ ತತ್ವಾಂಕ್ ಉಚಾಂಬಳ್ ಕರಿಲಾಗ್ಲೊ. ಲ್ಹಾನ್-ಬಾಬಾಚಿ ಶೆರಾಚಿ ಬಾಯ್ಲ್ ತಾಕಾ ಬಾಯ್ಲ್ ಮಾತ್ರ್ ಜಾಲಿ ಶಿವಾಯ್ ಮ್ಹಜ್ಯಾ ವಾಂಟ್ಯಾಚಿ ಲ್ಹಾನ್-ಮ್ಹಾಂಯ್ ನ್ಹಂಯ್. ಎಕಾ ಭಾಗಿ ದಿಸಾ ಘರ್ಚಾ ಭಾಡ್ಯಾಚೆಂ ಅರ್ಧೆಂ ಭಾಡೆಂ ದೀಂವ್ಕ್ ವಿಚಾರ್ತಾನಾ ಪಯ್ಲೆಪಾವ್ಟಿಂ ಮ್ಹಜೊ ಲ್ಹಾನ್-ಬಾಬ್ ಮ್ಹಾಕಾ ಪರ್ಕೊ ಮ್ಹಣೊನ್ ಭೊಗ್ಲೆಂ. ಲ್ಹಾನ್_ಬಾಬಾಚಿಂ ವಸ್ತ್ರಾಂ ತಿ ಕಶ್ಟಾನ್ ಧುತಾಲಿ ತರೀ ಮ್ಹಜಿಂ ವಸ್ತ್ರಾಂ ಹಾಂವೆಂಚ್ಚ್ ಮ್ಹಧ್ಯಾನೆ ರಾತಿಂ ಯೇವ್ನ್ ಧುಂವ್ಚಿ, ತಿಚಾ ನಿದೆಕ್ ಅಡ್ಕಳ್ ಹಾಡ್ಚೆಂ ಪಳೆವ್ನ್ ತಿಂ ಸಕಾಳಿಂ ಫಾಂತ್ಯಾರ್ ಉಂಬ್ಳೊಂಕ್ ಪಡ್ಲೆಂ. ಆನಿ ತ್ಯಾಸವೆಂ ಸಕಾಳಿಂಚೆಂ ಉಟೊನ್ ಆದ್ಲ್ಯಾ ರಾತಿಚಿಂ ಆಯ್ದಾನಾ ಧುಂವ್ನ್, ಉದಾಕ್ ಭರ್ನ್, ಚಾ ಕರ್ನ್-ಪಿಯೆವ್ನ್ ಕಾಮಾಕ್ ವೆಚಿ ಜವಾಬ್ದಾರಿ ಮ್ಹಜೆರ್ ಪಡ್ಲಿ.
ವೆಳಾಚಿಂ ರೊದಾಂ ಘುಂವ್ಲಿಂ ಆನಿ ಮ್ಹಜೊ ಸಾಂಬಾಳ್ ಘರ್ಚಾ ಭಾಡ್ಯಾಕ್ ವೆತಾಲೊ ಆನಿ ಎಕಾ ಭಾಗಿ ದಿಸಾ ಲ್ಹಾನ್-ಬಾಬಾಚಾ ಬಾಯ್ಲೆನ್ ಮ್ಹಜೆಲಾಗಿಂ ಜೆವ್ಣಾಚೆ ಪೊಯ್ಶೆ ವಿಚಾರ್ತಾನಾ ಮ್ಹಾಕಾ ಮ್ಹಜೆರ್ ಕಾಂಠಾಳೊ ಆಯ್ಲೊ. ಎದೊಳ್ ಪರ್ಯಾಂತ್ ಹ್ಯಾ ಪರ್ಕ್ಯಾಂಗೆರ್ ರಾವೊನ್ ಪುಕಟ್ಯಾಕ್ ಜೆವ್ತಾಲೊಂ ಮ್ಹಳ್ಳೆಂ ಚಿಂತಾಪ್ ಮ್ಹತಿಂತ್ ಕರ್ಕರ್ಯಾಚೆಂ ಜಾಲೆಂ. ಲ್ಹಾನ್-ಬಾಬ್ ಹೆಂ ಸರ್ವ್ ಜಾಣಾ ಆಸೊನ್೦ಯಿ ನೆಣಾರ್ಯಾಪರಿಂ ಕರಿಲಾಗ್ಲೊ. ಪುಣ್ ಜೆವ್ಣಾಕ್ ದಿಂವ್ಚಾಕ್ ಮ್ಹಾಕಾ ಸಯ್ತ್ ಸಾಂಬಾಳ್ ವೆಳಾರ್
ಮೆಳಾನಾತ್ಲ್ಲೊ.
ಸಾಂಬಾಳಾಖಾತಿರ್ ಕಾಮ್ ಸೊಡ್ನ್ ದುಸ್ರೆಂ ಕಾಮ್ ಸೊಧ್ಚೆಂ ಧಯ್ರ್ ದಿತೆಲಿಂ ಮ್ಹಜೆಲಾಗಿಂ ಕೊಣೀಂ ನಾತ್ಲೆಲಿಂ. ತಶೆಂ ಆಸ್ತಾಂ ಏಕ್ ದೀಸ್ ಅಸ್ಲೊಯ್ ಉದೆಲೊ. ರಾತಿಂ ಘರಾ ಯೆತಾನಾ ಜೇಂವ್ಕ್ ಕಿತೆಂಚ್ಚ್ ಮ್ಹಾಕಾ ನಾತ್ಲೆಲೆಂ. ಭಾಯ್ರ್ ವಚೊನ್ ಕಿತೆಂ ತರೀ ಖಾವ್ಯಾಂ ಮ್ಹಣೊನ್ ಚಿಂತ್ಲೆಂ ತರೀ ಬೊಲ್ಸಾಂತ್ ದುಮ್ಡಿ ನಾತ್ಲೆಲ್ಯಾನ್ ಫ಼ಕತ್ತ್ ಉದಾಕ್ ಪಿಯೆವ್ನ್ ನಿದ್ಲೊ.
ಮತಿಂತ್ ಏಕ್ ಚಿಂತಾಪ್ ಘೆವುನ್ ’ಇತ್ಲೊ ಹಜಾರ್ ಲೋಕ್ ದೀಸ್ ಭರ್ ಖಾಂವ್ಕ್ ನಾಸ್ತಾಂ ಉಪಾಶಿಂ ಮೊರ್ತಾನಾ ಹಾಂವೆಂ ಏಕ್ ಜೆವಾಣ್ ಸೊಡುಲ್ಲ್ಯಾಂತ್ ಕಿತೆಂ ಜಾಯ್ತ್?’
ದುಸ್ರೊ ದೀಸೀ ತಿಚ್ಚ್ ಗತ್ ಉಪಾಶಿಂ. ತಶೆಂ ಆಸ್ತಾಂ ತಿಸ್ರೆ ದೀಸ್ ಹಾಂವ್ ರಾಂದುಂಕ್ ಮ್ಹಣ್ ಗ್ಯಾಸ್ ಪೆಟವ್ನ್ ಶಿತ್ ರಾಂದ್ಣಿರ್ ದವರ್ತಾನಾ ’ಗೇಸಾಚೆಂ ಮೋಲ್ ವಾಡ್ಲಾಂ. ಆಜ್ ವೊಡ್ ನ್ಹಂಯ್ ಪುಣ್ ಫಾಲ್ಯಾಂ ಥಾವ್ನ್ ತುಂ ಏಕ್ ಸ್ಟೋವ್ ಹಾಡ್’ ಲ್ಹಾನ್-ಬಾಬಾಚಾ ಬಾಯ್ಲೆನ್ ಸಾಂಗ್ಲೆಂ. ಲ್ಹಾನ್-ಬಾಬ್ ಮ್ಹಜೊ ವರ್ಸಾಚಿ ನೀದ್ ಆಜ್ಚ್ಚ್ ಕಾಡ್ನ್ ಘೊರೆತಾಲೊ. ತಾಚಾ ಘೊರೊವ್ಣೆಂತ್ ಮ್ಹಜಿ ಭುಕ್ ಧಾಂವ್ಲಿ ಆನಿ ತಿ ಪೇಜ್ ತಶಿಚ್ಚ್ ದವರ್ನ್ ನಿದ್ಲೊಂ.
ಪರತ್ ಏಕ್ ದೀಸ್ ಉದೆಲೊ ಆನಿ ತ್ಯೇ ರಾತಿಂ ಹಾಂವ್ ಏಕ್ ಸ್ಟೋವ್ ಆನಿ ಇಲ್ಲೆಂ ತೇಲ್ ಆನಿ ಗರ್ಜೆಚಿ ಥೊಡಿಂ ಆಯ್ದಾನಾ ಹಾಡುನ್ ಆಯ್ಲೊ. ಕಾಲ್ಚೆ ರಾತಿಚಿ ಪೇಜ್ ಆಜೂನ್ ಮ್ಹಜಿ ವಾಟ್ ರಾಕ್ತಾಲಿ. ಇಲ್ಲಿ ಬೆಳ್ಶೆವ್ನ್ ಆಯಿಲ್ಲಿ ತರೀ ಉಡಂವ್ಕ್ ಮ್ಹಜ್ಯಾನ್ ಜಾಲೆಂನಾ. ಕಿತ್ಯಾಕ್ ಮ್ಹಳ್ಯಾರ್ ಅನಿ ಕಿತೆಂಯ್ ಮೊಲಾಕ್ ಹಾಡುಂಕ್ ಮ್ಹಜೆಲಾಗಿಂ ಸಾಧ್ಯ್ ನಾತ್ಲೆಲೆಂ.
ಅಶೆಂ ಸುರು ಜಾಲಿಂ ದೋನ್ ರಾಂದ್ಪಾಂ ಎಕಾ ಘರಾಂತ್. ಎಕಾ ಕುಡಾಚೆಂ ಘರ್ ತೆಂ. ಆಸ್ಚಿಂ ಮ್ಹನ್ಶಾಂ ತೆಗಾಂ. ದೋನ್ ರಾಂದ್ಣ್ಯೊ ಆನಿ ತೀನ್ ಕಾಳ್ಜಾಂ ಫ಼ಕತ್ತ್ ಏಕ್ ಅಬ್ಲೇಸ್ಪಣಾಂತ್ ಗುಪ್ತಿಂ ಲಾಸ್ತಾಲಿಂ. ಸನ್ವಾರಾಚೆ ಪಾರ್ಟೆಕ್ ಹಾಂವೆ ರಾವಾಜಯಿಚ್ಚ್ ಮ್ಹಳ್ಳೊ ದೆಂಖ್ಣೊ ಲ್ಹಾನ್-ಬಾಬಾಚಾ ಬಾಯ್ಲೆನ್ ಘಾಲ್ಲೊ. ತಿಚಾ ಸ್ವಾಭಿಮಾನಾಕ್ ಕೊಣೆಂಗೀ ಸವಾಲ್ ಕೆಲ್ಲೆಂ ಜಾಯ್ಜಯ್. ಹಾಂವ್ ರಾವ್ಲೊಂ ಹೆ ಕರ್ಕರೆ, ಹೊ ಸೊರೊ ಮ್ಹಜ್ಯಾ ಮೊರೊನ್ ಘೆಲ್ಲ್ಯಾ ಬಾಬಾಚೊ ಉಡಾಸ್ ಹಾಡಯ್ತಾಲೊ. ತೆಂ ಮ್ಹಾಂಯ್ಚೆಂ ರಡ್ಚೆಂ ಉಲೊಣೆ, ತ್ಯಾ ವೊಣೊದಿಕ್ ಮಾರ್ನ್ ಫ಼ುಟ್ಚೆ ಮ್ಹಾಂಯ್ಚೆ ವೋಟ್ ಆನಿ ತ್ಯಾ ಮ್ಹಧೆಂ ಭಿಂಯಾನ್ ಕಾಂಪ್ಚಿ ಮ್ಹಜಿ ನೆಣ್ತಿ ಕೂಡ್ ಹರ್ಯೆಕ್ ಮ್ಹಜ್ಯಾ ಉಡಾಸಾಕ್ ಯೇವ್ನ್ ಹಾಂವ್ ಧಾಂವ್ಲೊ. ಹಿ ನಾಲಿಸಾಯ್, ಬೆಬ್ದೆಂಪಣ್ ಮ್ಹಜ್ಯಾನ್ ಸೊಸಾನಾ, ಹಾಂವೆಂ ಮತಿಂತ್ ನಿಚೆವ್ ಧ್ರಡ್ ಕೆಲೊ.
ಪುಣ್ ದುಸ್ರೊ ದೀಸ್ ಮ್ಹಜ್ಯಾ ವಾಂಟ್ಯಾಕ್ ಮಾರೆಕಾರ್ ಜಾವ್ನ್ ಉದೆಲ್ಲೊ. ಮ್ಹಜ್ಯಾ ಲ್ಹಾನ್-ಬಾಬಾನ್ ಮ್ಹಾಕಾ ಘರಾಂತ್ಲೊ ಭಾಯ್ರ್ ಲೊಟುಲ್ಲೊ. ಮೊಗಾನ್ ಉಲವ್ನ್, ಬಲಿಯೆಕ್ ವೆಚಾ ಶೆಳಿಯೆಕ್ ಮೊಗಾನ್ ಆರಾವ್ನ್ ಗಳೊ ಕಾಪ್ಲೆಲೆಪರಿಂ ಮೊಗಾನ್ ಪುಸ್ಲಾವ್ನ್ ಘರಾಂತ್ಲೊ ಭಾಯ್ರ್ ಘಾಲ್ಲೊ.
ಲ್ಹಾನ್-ಬಾಬ್ ಮ್ಹಜೊ ಸಂಸಾರಾಚೊ ದುಸ್ರೊ ಬಾಬ್ ಮ್ಹಜೊ, ಆಪ್ಲ್ಯಾ ಶೆರಾಚೇ ಭಾಯ್ಲೆ ಪಾಸತ್, ತಿಚಾ ಮೊಗಾಚಾ ಇಶ್ಟಿಣೆಚಾ ಹಿಶಾರ್ಯಾಂಪಾಸತ್ ಮ್ಹಾಕಾ ಭಾಯ್ರ್ ಘಾಲೊ.
ಮ್ಹಜ್ಯಾ ದೊಳ್ಯಾಂತ್ ದುಖಾಂ ಉದೆಲಿಂನಾಂತ್. ಪ್ರತಿಭಟನ್ ಕರ್ಚೆಂ ಹಕ್ಕ್ ಮ್ಹಜೆ ಥಾವುನ್ ಕೆದ್ನಾಂಗೀ ಪೊಳುಲ್ಲೆಂ. ಹಾಂವ್ ಉಗ್ತ್ಯಾ ರಸ್ತ್ಯಾರ್ ಚಲ್ತಾಲೊಂ ಏಕ್ ಸವಾಲ್ ಘೆವ್ನ್ ’ಹಾಂವೆಂ ಕಿತೆಂ ಗುನ್ಯಾಂವ್ ಕೆಲೊ?’ ಪುಣ್ ಖಂಚಾಯ್ ರಿತಿಂನಿ ಚಿಂತ್ಲ್ಯಾರೀ
ಜಾಪ್ ಬಿಲ್ಕುಲ್ ಮೆಳ್ಳಿನಾ.
ಅಶೆಂಚ್ಚ್ ಮಹಿನೆ ಉತ್ರೊನ್ ವರ್ಸಾಂ ಪಾಶಾರ್ ಜಾಲಿಂ. ಪುಣ್
ಮ್ಹಜ್ಯಾ ಸವಾಲಾಂಕ್ ಜಾಪಿ ನಾತ್ಲ್ಲ್ಯೊ.
ಹಾಂವೆಂ ಏಕ್ ಪಾವ್ಟಿಂ ಸಾತ್ ದಿಸಾಂಚಾ ರೆತಿರೆಕ್ ವೆಚೊ ನಿರ್ಧಾರ್ ಘೆವ್ನ್ ತ್ಯಾ ರೆತಿರೆಂತ್ ಕಾಂಯ್ ಪುಣಿಂ ಮೆಳ್ತಾಗಾಯ್ ಮ್ಹಳ್ಳೆ ಆಶೆನ್ ಗೆಲೊಂ.
ಪಯ್ಲೊ ದೀಸ್:
"ಹಾಂವ್ ಬಿಡಿ-ಸಿಗ್ರೇಟ್ ವೊಡಿನಾ, ಸುರ್-ಸುರ್ ಪಿಯೆನಾ, ಕಸ್ಲಿಚ್ ವಾಯ್ಟ್ ಸವಯ್ ಮ್ಹಾಕಾ ನಾ ತರ್ ಹಾಂವೆಂ ರೆತಿರೆಕ್ ಕಿತ್ಯಾಕ್
ವೆಚೆಂ?" ಮ್ಹಜ್ಯಾಯ್ ಮ್ಹತಿಂತ್ ಹಿಂ ಚಿಂತ್ನಾಂ ತವಳ್ತವಳ್ ಯೆತಾಲಿಂ. ತರ್ ವಾಯ್ಟ್ ಮ್ಹಳ್ಳ್ಯಾ ಸಬ್ಧಾಚೆಂ ವ್ಯಾಖ್ಯಾನ್ ಫ಼ಕತ್ತ್ ಸುರ್-ಸೊರೊ ಪಿಯೆಂವ್ಚೆ, ಬಿಡಿ-ಸಿಗ್ರೆಟ್ ವೊಡ್ಚೆ ಮಾತ್ರ್? ತರ್ ಮ್ಹನ್ಶಾಸಂಯ್ಬಾಚೊ ವಾಯ್ಟ್ ಸವಯೊ ದವರ್ನ್ ಆಸ್ಚಾಂಕ್? ರಾಗ್, ಮೊಸೊರ್, ಹಗೆಂ, ದುರಾಶಾ, ಕಾಮುಕ್ಪಣ್ ಆನಿ ಹೆ ಸರ್ವ್ ರಿತಿಚೆ ಆವ್ಗುಣ್ ಆಸ್ಚೆ ಮನಿಸ್ ಜರ್ ಸುರ್-ಸೊರೊ ಪಿಯೆನಾ ತರ್ ತೊ
ಸಮಾಜೆಚಾ ನದ್ರೆಂತ್ ಬರೊಗೀ? ಮ್ಹಜ್ಯಾ ಮತಿಂತ್ ಫ಼ಕತ್ತ್
ಸವಾಲಾಂ ಮಾತ್ರ್ ಆಸ್ಲ್ಲಿಂ.
"ಸದಾಂಚೆಂ ಮ್ಹಜಿಂ ಮಾಗ್ಣಿಂ ಆಯ್ಕೊಂಚಾ ದೆವಾ. ಮ್ಹಜೆಂ ಏಕ್ ಮಾಗ್ಣೆಂ ಆಯ್ಕ್ ಆನಿಂ ಮ್ಹಾಕಾ ಸಾಂಗ್ ಹಾಂವೆಂ ಕಿತೆಂ ಕೆಲ್ಲೆಂ? ಆನಿಂ ಕಿತ್ಯಾಕ್ ಮ್ಹಾಕಾ ಹಿ ಶಿಕ್ಶಾ?" ಹಾಂವ್ ತ್ಯಾ ರೆತಿರೆವೆಳಾರ್ ದಿಂಬ್ಯೆರ್ ಗಳೊನ್ ಮತಿಭಿತರ್ ಮಾಗೊನ್೦ಚ್ ಆಸ್ಲ್ಲೊಂ. ಮ್ಹಜ್ಯಾ ಮತಿಚೊ ಚಿಂತ್ಪಾ ಘೊಡೊ ಎದೊಳ್ಚ್ಚ್ ಪೊಳ್ನ್ ಧಾಂವ್ಲ್ಲೊ.
ಪುಣ್ ಕಿತೆಂ ಕೆಲ್ಯಾರೀ ಮ್ಹಜ್ಯಾ
ಮತಿಕ್ ಜಾಪ್ ಮೆಳ್ಳಿನಾ. ದೀಶ್ಟ್ ಮ್ಹಜಿ ಲೊಕಾಂಚೆರ್ ಗೆಲಿ,
ಭಕ್ತೆಚೊ ಡೋಂಗ್ ಪಾಂಗುರ್ಚಾ ಭಕ್ತಾಂಚೆರ್ ಗೆಲಿ, ಉಡೊನ್, ಪಡೊನ್, ಹಾಸೊನ್,ನಾಸೊನ್ ಮಾಗ್ಚಾ ಲೊಕಾಂಚೆರ್ ಗೆಲಿ. ದೊಳೆ ದಾಂಪುನ್,ಉಘಡ್ನ್ ಪೆಂಕಾಟ್ ಹಾಲವ್ನ್,ಧಲವ್ನ್ ಮಾಗ್ಣೆಂ ಕರ್ಚಾ ವಿಶೇಷ್ ಭಕ್ತಾಂಚೆರ್ ಗೆಲಿ. ಹಾಂವ್ ಮಾತ್ರ್ ಮತಿಂತ್ ಸವಾಲಾಚೊ ದಾಳೊ ಘೆವ್ನ್ ದೆವಾಲಾಗಿಂ ಉಲಯ್ತಾಲೊ.
ದುಸ್ರೊ ದೀಸ್:
ಪರತ್ ತಿಂಚ್ಚ್ ಚಿತ್ನಾಂ, ಕೋಣ್ ಖಂಚೆ ವಸ್ತುರ್ ನೆಸ್ಲಾ, ಕೋಣ್ ಚೆಡೊ ಖಂಚಾ ಚೆಡ್ವಾ ಪಾಟ್ಲ್ಯಾನ್ ಭಂವ್ತಾ, ಕೋಣ್ ಮಾಗ್ತಾ ತರ್ ಕೋಣ್ ಬೊಸ್ತಾ. ಆನಿ ಕೋಣ್ ಹಾಸ್ತಾ ತರ್ ಕೋಣ್ ನಾಸ್ತಾ. ಹಾಂವ್ ಮಾತ್ರ್ ಕೊಪೆಲಾಚಾ ಕೊನ್ಶಾರ್ ಬೊಸೊನ್ ಲಾಸ್ತಾಂ. ವೆಳಾಕಾಳಾಚಿಂ ಮಾಗ್ಣಿಂ, ತೆಸಾಂವಾಂ ಜಾವ್ನ್
ಆಸ್ಲ್ಲಿಂ. ವಾಂಜೆಲಾಚಿಂ ವಾಚ್ಪಾಂ, ಜಿಂ ಹಾಂವ್ ಲ್ಹಾನ್ಪಣಾಥಾವುನ್ ವಾಚುನ್ ಆಯಿಲ್ಲಿಂ, ಆಯ್ಕೊನ್ ಆಯಿಲ್ಲಿಂ, ಎಕಾ ಕಾನಾಂತ್ ಆಯ್ಕೊನ್ ಅನ್ಯೇಕಾ ಕಾನಾಂತ್ ಸೊಡುಲ್ಲಿಂ. ತರೀ
ಮ್ಹಜ್ಯಾ ಮತಿಕ್ ಸುಶೆಗ್ ನಾತ್ಲ್ಲೊ.
ವಾಂಜೆಲಾಚಿಂ ಉತ್ರಾಂ "ದುಸ್ಮನಾಂಕ್ ಬೊಗ್ಶಿಯಾ, ಎಕಾಮೆಕಾಚೊ ಮೋಗ್ ಕರಾ, ತುಮ್ಕಾಂ ವಾಯ್ಟ್ ಕೆಲ್ಲ್ಯಾಂಕ್ ಬರೆಂ ಕರಾ" ವಾಚ್ತಾನಾ ಬರಿಂ ಲಾಗ್ತಾತ್. ಹಾಂವೆಂಯ್ ತಶೆಂಚ್ಚ್ ಕೆಲ್ಲೆಂ. ಪುಣ್ ಆತಾಂ ಮ್ಹಜೇಸ್ತಕಿಂ ಹ್ಯಾ ವಾಚ್ಪಾಚೊ ನಿಹಾಳ್ ಕರೀತ್ತ್ ಹಿಂ ಉತ್ರಾಂ ಮ್ಹಜ್ಯಾ ಜಿಣ್ಯೆಕ್ ಕಿತ್ಲಿಂ ಲಗು ಜಾತಾತ್ ಮ್ಹಣೊನ್ ನಿಹಾಳ್ಳ್ಯಾರ್ ಮ್ಹಾಕಾ ಮ್ಹಜ್ಯಾ ಜಿಣ್ಯೆಂತ್ ಹಾಂವ್ ಕಿತ್ಲೊಂ ಪಾಟಿಂ ಉರ್ಲಾಂ ತೆಂ ದಾಖಯ್ತಾ.
ಮತಿ ಭಿತರ್ ಅನ್ಯೇಕ್ ಚಿಂತಾಪ್ ಉದೆಲೆಂ ’ಹಿಂ ಚಿಂತ್ನಾಂ
ಮ್ಹಜ್ಯಾ ಮತಿಂತ್ ಮಾತ್ರ್ ಕಿತ್ಯಾಕ್ ಉದೆತಾತ್? ಮ್ಹಜ್ಯಾ
ಪೆಲ್ಯಾಚಾ ಮತಿಂತ್ಯೀ ಹಿಂ ಉತ್ರಾಂ ಕಿತ್ಯಾಕ್ ಉದೆನಾಂತ್? ಚೂಕ್ ತಾಣಿ ಕೆಲ್ಯಾ ಆನಿ ಪ್ರಾಚಿತ್ ಹಾಂವೆ ಭೊಗಿಜಯ್? ಹೆಂ ಕಸಲೆಂ
ನಿಯಮ್?’ ಮ್ಹಜ್ಯಾ ಮತಿಂತ್ ಜಾಪಿ ನಾತ್ಲ್ಲ್ಯೊ. ಫ಼ಕತ್ತ್ ಎಕಾ ವಯ್ರ್ ಏಕ್ ಸವಾಲಾಂ ಮಾತ್ರ್ ಉದೆಲಿಂ. ನಾ. ಹಾಂವ್ ಎಕಾ ನಿರ್ಧಾರಾಕ್ ಪಾವ್ಲೊಂ. ಹ್ಯೇ ಪಾವ್ಟಿಂ ಸೊಡುನ್ ದೀಂವ್ಕ್ ನ್ಹಜ಼ೊ. ಎದೊಳ್ಚ್ಚ್ ಜಾಹಿತ್ತೆಂ ಸೊಸ್ಲಾಂ ಆನಿಂ ಭೊಗ್ಲಾಂ. ಆನಿ ಆತಾಂ ಪುಣಿಂ ಮ್ಹಾಕಾ ನ್ಯಾಯ್ ಜಾಯ್. ಮ್ಹಜೆ ಥೈಂಯೀ ವಾಳ್ಚೆಂ ರಗಾತ್ ಹುನ್ ಆಸಾ. ಹಾಂವೀ ಸ್ವಶ್ಟ್ ಚಿಂತುಂಕ್ ಸಕ್ತಾಂ. ಆನಿಂ ಹಾಂವೆ ಕಿತೆಂಚ್ಚ್ ಚೂಕ್ ಕರುಂಕ್ನಾ ಆನಿ ಶಿಕ್ಶಾ ಸಯ್ತ್ ಕಿತ್ಯಾಕ್ ಭೊಗುಂ? ಎಕಾ ನಿರ್ಧಾರಾಕ್ ಯೆತಚ್ಚ್ ಮ್ಹತ್ ಮ್ಹಜಿ ಇಲ್ಲಿ ಹಗುರ್ ಜಾಲಿ.
ತಿಸ್ರೊ ದೀಸ್:
ಬ್ರದರಾಂಚೊ ಎಕೇಕ್ ಕಾಣ್ಯೊ ಮ್ಹಾಕಾ ಮತಿಂತ್ ಹಜಾರ್
ಸವಾಲಾಂ ಉಟಯ್ತಾಲಿಂ. ಪುಣ್ ಸಾತ್ ದೀಸ್ ಹಾಂಗಾಸರ್
ರಾವಾಜಯಿಚ್. ಆನಿಂ ರಾವೊನ್ ಕಿತೆಂ ಸಾಧನ್ ಕರುಂಕ್ ಆಸಾ ತೆಂ ಹಾಂವ್ ನೆಣಾ ತರೀ ವಚೊನ್ ಕಿತೆಂ ಸಾಧನ್ ಕರುಂಕ್ ಉರ್ಲಾಂ ಮ್ಹಳ್ಳೆಂ ಚಿಂತುನ್ ಉರ್ಲಾಂ. ರೆತಿರ್ ಚಲ್ತಾಲಿ. ಉಟ್ತಾಲಿಂ ತೊಡಿಂ ಬೊಸ್ತಾಲಿಂ, ಹಾಸ್ತಾಲಿಂ ತೊಡಿಂ ರಡ್ತಾಲಿಂ.ಹಾಂವ್ ಮಾತ್ರ್ ಕೊನ್ಶಾರ್ ಕಾಳ್ಜಾ-ಮನಾಂ ಭಿತರ್ ರಡ್ತಾಲೊಂ.
ಚೊವ್ತೊ ದೀಸ್:
ವಾಂಜೆಲಾಚಿಂ ಉತ್ರಾಂ ವಾಚ್ತಾನಾ, ಆಯ್ಕಾತಾನಾ ಸೊಭಿತ್ ದಿಸ್ತಾತ್. "ತುಂ ಕಾಣಿಕ್ ಭೆಟಯ್ತಾನಾ ಏಕ್ ಘಡಿಂ
ತುಜ್ಯಾ ಭಾವಾಕ್ ದುಕಯಿಲ್ಲ್ಯಾಚೊ ನಿಯಾಳ್ ಕರ್. ಆನಿ ತಿ ಕಾಣಿಕ್
ಥಂಯ್ಚ್ ದವರ್ ಆನಿ ಪಯ್ಲೆಂ ವಚೊನ್ ತುಜ್ಯಾ ಭಾವಾಲಾಗಿಂ ರಾಜಿ ಜಾ ಆನಿ ಯೇವ್ನ್ ತುಜಿ ಕಾಣಿಕ್ ಭೆಟಯ್". ಹಾಂವ್ ಹಾಂಗಾ ರೆತಿರೆಕ್ ಆಯ್ಲಾಂ ಏಕ್ ಕಾಣಿಕ್ ಭೆಟಂವ್ಕ್. ಹ್ಯಾ ಬಾಂದ್ಪಾಸಾಂತ್ಲಿ ಸುಟ್ಕಾ. ಆನಿಂ ಹೆಂ ಸವಾಲ್ ಹಾಂವ್ಚ್ ಮ್ಹಾಕಾ ಕಿತ್ಯಾಕ್ ಕರ್ತಾಂ?
ಹೆರಾಂ ಕಿತ್ಯಾಕ್ ಕರಿನಾಂತ್? ಮ್ಹಾಕಾ ಮಾತ್ರ್ ಕೊಶೆಡ್ದ್
ಆಸಾ? ತಾಂಕಾಂ ನಾ? ಮ್ಹಜೆಲಾಗಿಂ ರಾಜಿ ಜಾಂವ್ಕ್ ಮ್ಹಜ್ಯಾ ಲ್ಹಾನ್-ಬಾಬಾನ್ ಆನಿ ತಾಚಾ ಬಾಯ್ಲೆನ್ ಯೇಂವ್ಕ್ ಜಾಯ್ ತವಳ್ ಮಾತ್ರ್ ಹಾಂವ್ ರಾಜಿ ಜಾತಲೊಂ. ಹೆಂ ಸಂಸಾರಿ ಚಿಂತಾಪ್ ಮ್ಹಾಕಾ ಸಾರ್ಕೆಂ ಮ್ಹಣೊನ್ ದಿಸ್ಲೆಂ ಆನಿಂ ಮತಿಭಿತರ್ಲೆಂ ಹಟ್ ಅನಿಕೀ ಬಳ್ ಜಾಲೆಂ.
ಪಾಂಚ್ವೊ ದೀಸ್:
ಸಗ್ಳಿಂ ಭಕ್ತಾಂ ಎಕಾಚ್ಚ್ ಹೊಲಾಂತ್ ರಾವ್ಲ್ಲಿಂ. ಬಾಯ್ಲಾಂ ವಿಂಗಡ್ ಆನಿಂ ದಾದ್ಲೆ ವಿಂಗಡ್.
ಫಾಂತ್ಯಾರ್
ನ್ಹಾಣಿಯೆಂತ್ ಝಗ್ಡೆಂ ಸುರು ಜಾಲ್ಲೆಂ. ಎಕ್ಲೊ ಕಾಕ್ಸಾಂತ್ ಚಡ್ ವೇಳ್ ಬೊಸ್ಲೊ ಮ್ಹಣೊನ್ ದುಸ್ರೊ ಬೊಸ್ಲೊ ಆನಿ ಅಶೊ ಗಲಾಟೊ ಸುರು
ಜಾಲೊ. ಪಯ್ಲ್ಯಾ ಚ್ಯಾರ್ ದಿಸಾಂನಿ ಮೆಳಾನಾತ್ಲೆಲಿ ಜಾಪ್ ಆಜ್ ಕಶಿ ಮೆಳ್ತೆಲಿ? ಮತಿ ಭಿತರ್ಲ್ಯಾ ಸವಾಲಾಂಚಿ ರಾಸ್ ಚಡೊನ್೦ಚ್ ವೆತಾಲಿ. ಹಿಂ ಗಳ್ಯಾರ್ ಬೆಂತಿಣ್ಯೊ ಘಾಲುನ್, ಮೊಟಿಂ ಕೊಂತಾಂ ಘಾಲುನ್, ಲೊಕಾಂ ಹುಜಿರ್ ದಿಂಭಿ ಘಾಲುನ್ ಹಾಂವೆ ಕರ್ಚೆಂ ಮಾಗ್ಣೆಂ ಏಕ್ ಮಾಗ್ಣೆಂಗೀ ಯಾ ಡೋಂಗ್ಗೀ? ಮ್ಹಳ್ಳೆಂ ಮ್ಹತಿಕ್ ಗೆಲೆಂನಾ.
ಸವೊ ದೀಸ್:
ಮಾಗ್ಣೆಂ ಆನಿ ಉಪಾಸಾಚೊ, ಬೊಗ್ಸಾಣ್ಯಾಚೊ, ದುಸ್ಮಾನಾಂಕ್ ಭೊಗ್ಶಿಯಾ ಮ್ಹಳ್ಳೊ ಸಂಧೇಶ್ ಪಾಚಾರ್ಚೊ ದೀಸ್ ತೊ. ದೇವ್ ಆಮ್ಚಿಂ ಮಾಗ್ಣಿಂ ಆಮಿ ಉಪಾಶಿಂ ರಾವೊನ್ ಕೆಲ್ಯಾರ್ ಆಯ್ಕತಾ ಮ್ಹಣೊನ್ ಬ್ರದರ್ ಸಾಂಗ್ತಾಲೆ. ಪುಣ್ ಹೊ ಫ಼ಕತ್ತ್ ಏಕ್ ಬಾಯ್ಲೊ ಘುರ್ತ್ ಶಿವಾಯ್ ಭಿತರ್ಲೆಂ ಆಮ್ಚೆಂ
ಕಾಳಿಜ್ ನಿತಳ್ ಕರ್ನ್ ದವರ್ನಾತ್ಲ್ಯಾರ್, ಬರಿಂ ಚಿಂತ್ನಾಂ ನಾತ್ಲ್ಯಾರ್ ಹೆಂ ಸಗ್ಳೆಂ ಪೊಕೊಳ್ಪಣ್ ಶಿವಾಯ್ ಹೆರ್ ಕಿತೆಂಚ್ ನ್ಹಂಯ್. ಹಾಂವೆಂ ಉಪಾಸ್ ಕೆಲೊ. ಮಾಗ್ಣಿಂ ಕೆಲಿಂ ತರೀ
ಮ್ಹಜ್ಯಾ ಮತಿಂತ್ ಆಸ್ಚಾ ಸವಾಲಾಂಕ್ ಜಾಪಿ ನಾತ್ಲ್ಲ್ಯೊ.
ಹಾಂವೆ ಕೊಣಾಯ್ಕೀ
ವಾಯ್ಟ್ ಕರುಂಕ್ನಾ. ಹಾಂವೆಂ ಮ್ಹಜ್ಯಾ ಲ್ಹಾನ್-ಬಾಬಾಕ್ ಯಾ ತಾಚಾ ಬಾಯ್ಲೆಕ್ ಕಿತೆಂಚ್ಚ್ ವಾಯ್ಟ್ ಕರುಂಕ್ನಾ. ಪುಣ್ ತಾಣಿಂ ಮ್ಹಜೆಥಂಯ್ ಅಶೆಂ ಕಿತ್ಯಾಕ್ ಕೆಲೆಂ? ಚೂಕ್ ಕೆಲ್ಯಾ ತಾಣಿಂ ಆನಿಂ ಹಾಂವೆ ತಾಂಕಾ
ಕಶೆಂ ಭಗ್ಸುಂಚೆಂ? ಮ್ಹಜ್ಯಾ ಮತಿಂತ್ ರಾಗ್ ಚಡ್ತಾಲೊ ಶಿವಾಯ್
ದೆಂವಾನಾತ್ಲ್ಲೊ.
ಆರ್ಧೊ ದೀಸ್ ಕಸೊಯ್ ಪಾಶಾರ್ ಜಾಲೊ ಕಸ್ಲಿಯ್ ಬದ್ಲಾವಣ್ ನಾಸ್ತಾಂ ಆನಿ ಸಾಂಜೆರ್ ಕುಮ್ಸಾರ್, ಮೀಸ್ ಜಾಲೆಂ ಆನಿಂ ಹಾಂವೆಂಯ್ ತಿಂಚ್ಚ್ ಮಾಗ್ಣಿಂ ಜಿಂ ಹಾಂವ್ ಲ್ಹಾನ್ಪಣಾ ಥಾವುನ್ ಮ್ಹಣೊನ್ ಆಯ್ಲಾಂ ತಿಂ ಮ್ಹಳಿಂ ತರೀ ಮ್ಹಜ್ಯಾ ಕಾಳ್ಜಾಭಿತರ್ ತೀಳ್ನ್ ಪಳೆತಾನಾ ಹಾಂವೆ ಸರ್ವಾಂಕ್ ಭೊಗ್ಶಿಲ್ಲೆಂ ಆನಿಂ ಮ್ಹಜ್ಯಾ ಲ್ಹಾನ್-ಬಾಬಾಕ್ ಆನಿ ತಾಚಾ ಬಾಯ್ಲೆಕೀ ಬೊಗ್ಶಿಲಾಂ ಮ್ಹಣೊನ್ ಉಚಾರ್ಲೆಲ್ಲೆಂ ತರೀ ಭೊಗ್ಸುಂಕ್ನಾತ್ಲ್ಲೆಂ.
ಮೀಸ್ ಜಾತೆಚ್ಚ್ ಹಾಂವ್ ಕೊಪೆಲಾಂತ್ ಎಕ್ಸುರೊ ಬೊಸೊನ್ ಜೆಜುಲಾಗಿಂ ಉಲಂವ್ಕ್ ಲಾಗ್ಲೊಂ ’ಜೆಜು.. ತಿಂ ಯೇಂವ್ದಿತ್ ಅನಿ ಮ್ಹಜೆಲಾಗ್ಗಿಂ ಭಗ್ಸಾಣೆ ಮಾಗೊಂದಿತ್ ಆನಿ ತವಳ್ ಹಾಂವ್ ತಾಂಕಾ ಭಗ್ಸುಂಕ್ ತಯಾರ್. ಪುಣ್ ತಿಂ ಯೇನಾತ್ಲ್ಯಾರ್ ಹಾಂವೆ ಕಿತೆಂ ಕರ್ಯೆತ್?’
ಕೊಪೆಲಾಂತ್ಲೊ ಭಾಯ್ರ್ ಯೆತಾನಾ ಏಕ್ ಪಾದ್ರ್ಯಾಬ್ ಆಪ್ಲ್ಯಾ ಲೊಬಾಚಾ ಬೊಲ್ಸಾಂಕ್ ಹಾತ್ ಘಾಲ್ನ್ ಯೆಂವ್ಚೊ ದಿಸ್ಲೊ ಆನಿ ಮ್ಹಾಕಾ ವಿಚಾರಿಲಾಗ್ಲೊ "ಯೆದೊಳ್ ಪರ್ಯಾಂತ್ ಕಿತೆಂ ಕರ್ನ್ ಆಸ್ಲ್ಲೊಯ್?"
ಹಾಂವೆ ಜಾಪ್ ದಿಲಿ "ಜೆಜುಲಾಗಿಂ
ಉಲಯ್ತಾಲೊ". ಪಾದ್ರ್ಯಾಬ್ ಮ್ಹಜೆರ್ ಹಾಸ್ಲೊ ಆನಿಂ
ಜೆಜು ತಾಚಿ ಆಸ್ತ್ ಆನಿ ತಾಕಾ ತಾಣೆ ಆಪ್ಲ್ಯಾ ಬೊಲ್ಸಾಂತ್ ಚೆಪ್ಲಾ ಮ್ಹಳ್ಳೆ ಜೀನ್ಸಾರ್ ತಕ್ಲಿ ಹಾಲವ್ನ್ ಗೆಲೊ.
ಸಾತ್ವೊ ದೀಸ್:
ಅಖೇರಿಚೊ ದೀಸ್, ಮ್ಹಜಿಂ ವಸ್ತ್ರಾಂ ಬಾಂಧುನ್ ಹಾಂವ್ ತಯಾರ್ ಆಸ್ಲಲೊ ದೀಸ್. ಎದೊಳ್ಚಾ ಸ ದಿಸಾಂನಿ ಮೆಳಾನಾತ್ಲೆಲಿ ಜಾಪ್ ಮ್ಹಕಾ
ಆಜ್ ಕಶಿ ಮೆಳ್ಚಿ ಮ್ಹಳ್ಳೆಂ ಚಿಂತುನ್ ಹಾಂವ್ ಕೊಪೆಲಾಕ್ ರಿಗ್ಲೊಂ ಆನಿಂ ಲೋಕ್ ಗೀತ್ ಗಾಯ್ತಾಲೊ "ಮ್ಹಜೆ ಪಾಸತ್ ಖುರಿಸ್
ವ್ಹಾವಯಿಲ್ಲ್ಯಾ ಜೆಜು.. ತುಜೆ ಪಾಸತ್ ಹಾಂವೆಂ ಖುರಿಸ್ ವಾವಂವ್ಕ್ ಮನ್ ದೀ"
- ಹೆಂ ಆಯ್ಕೊನ್ ಕೆದಾಳಾಗೀ ಮೊರೊನ್ ಪಡ್ಲೆಲಿ ಮತ್ ಮ್ಹಜಿ ಘಡ್ಯೆನ್ ಜಾಗಿ ಜಾಲಿ.
ಹಾಂವ್ ದೊನೀ ಹಾತಾಂನಿ ತೋಂಡ್ ಮ್ಹಜೆಂ ದಾಂಪುನ್ ಏಕ್ ಘಡಿ ಥಂಯ್ಚ್ ಗಳ್ಳೊಂ ಆನಿಂ
ಮ್ಹಜ್ಯಾ ದೊಳ್ಯಾಂನಿ ದುಃಖಾಂ ಉದೆಲಿಂ. ಮ್ಹಜ್ಯಾ ಸವಾಲಾಂಕ್
ಹಾಂವೆಂ ಜಾಪ್ ಸೊಧ್ಲ್ಲಿ. ಆನಿ
ಜೆಜು ಖಾತಿರ್ ಹಾಂವೆ ಹೊ ಖುರಿಸ್ ಮ್ಹಣೊನ್ ಲೆಕ್ಲೊ ಆನಿ ರೆತಿರೆ ಥಾವುನ್ ಭಾಯ್ರ್ ಆಯ್ಲೊಂ.
ಅಂತಿಮ್:
ಹಾಂವ್ ರೆತಿರೆಕ್ ವಚೊನ್ ಆಯಿಲ್ಲಿ ಗಜಾಲ್ ಹಾಂವೆಂ ಸಾಂಗ್ತಚ್ಚ್
ಲ್ಹಾನ್ ಬಾಬಾಚಾ ಬಾಯ್ಲೆನ್ ತಾಳೊ ಅನಿಕೀ ಘಟ್ ಕೆಲೊ ಆನಿ ಹಾಂವ್ ಕಸ್ಲೆಂಚ್ಚ್ ಪ್ರತಿಭಟನ್ ದಿಂವ್ಚೊನಾ ಮ್ಹಳ್ಳಿ ಖಾತ್ರಿ ಘೆವುನ್ ಮ್ಹಜೆರ್ ಸಗ್ಳೊ ಅಕ್ಮಾನ್ ಘಾಲೊ "ತುಕಾ ಎಕಾ ಪುತಾಪರಿಂ ಸಾಂಭಾಳ್ಳೆಂ ಆನಿ ತುಂವೆಂ ಮ್ಹಾಕಾ ವೊನಿ ಮ್ಹಣ್ ಸಯ್ತ್ ಆಪಯ್ಲೆಂನಾಂಯ್. ತುಕಾ ಇತ್ಲೊ ತೇಂಪ್ ಆಮಿ ಸಾಂಬಾಳ್ಳೆಂ ಆನಿಂ ತುಂ ಮ್ಹಜಿಂ ಸಯ್ರಿಂ ಯೆತಾನಾ ತಾಂಚೆಲಾಗಿಂ ಉಲಯ್ಲೊನಾಂಯ್. ತಿಂ ಪಿಯೆಲ್ಯಾರ್ ಕಿತೆಂ ಜಾಲೆಂ? ತುಜೊ ಬಾಪುಯ್
ಪಿಯೆನಾತ್ಲ್ಲೊಗಿ?"
ತಿಚಾ ಖಂಚ್ಯಾಯ್ ಸವಾಲಾಂನಿ ಹಾಂವ್ ಖುಭಾಳ್ಳೊಂನಾ. ಬಗಾರ್ ಹಿ ಏಕ್ ಪರಿಕ್ಶಾ ಮ್ಹಣೊನ್ ಲೆಕ್ಲೆಂ ಹಾಂವೆ ಆನಿಂ ಅಖ್ರೇಕ್ ಸಾಂಗ್ಲೆಂ "ವ್ಹಯ್ ವೊನಿಯೆ ಹಾಂವ್ ಚುಕ್ಲೊಂ.
ಮ್ಹಜಿಚ್ಚ್ ಚೂಕ್ ಜಾಲಿ ದೆಖುನ್ ಮ್ಹಾಕಾ ಮಾಫ಼್ ಕರ್.. ಹೊ ರಾಗ್ ಸಗ್ಳೊ ಕಾಡ್ನ್ ಉಡಯ್.. ಆನಿಂ ತುಮ್ಚಾ ಮಾಗ್ಣ್ಯಾಂತ್ ಮ್ಹಜೊ ಉಡಾಸ್ ಕಾಡ್ ಆನಿಂ
ಮ್ಹಜ್ಯಾ ಮಾಗ್ಣ್ಯಾಂತ್ ತುಮ್ಚೊ ಸದಾಂ ಉಡಾಸ್ ಹಾಂವ್ ದವರ್ತಲೊಂ".
ಸಂದೇಶ್:
ಜಿಣ್ಯೆಂತ್ ಆಮ್ಕಾಂ ಮೆಳಾನಾತ್ಲೆಲ್ಯೊ ಮೊಸ್ತ್ ಜಾಪಿ ಆಮ್ಚೆ ಭಂವಾರಿಂ ಆಸಾತ್. ಪುಣ್ ತ್ಯೊ ಸೊಧುಂಕ್ ಆಮ್ಕಾ ಕಳಾಜಯ್. ದೊಳೆ ಉಗ್ತೆ ಆಸ್ಲ್ಯಾರ್ ಮಾತ್ರ್ ಪಾವಾನಾ ಪಳೆವ್ನ್ ತಾಚಿ ಪರಿಕ್ಶಾ ಕೆಲ್ಯಾರ್ ಮಾತ್ರ್ ಸಮ್ಜತಾ.
ಎಕಾ ಬರ್ಯಾ ಉತ್ರಾ ಥಾವುನ್, ಎಕಾ ಬರ್ಯಾ ಕರ್ನೆ ಥಾವುನ್,
ಎಕಾ ಬರ್ಯಾ ಚಿಂತ್ಪಾ ಥಾವುನ್ ಕೋಣ್ ಕಿತ್ಲೆಂ ಬರೆಂಪಣ್ ಜೊಡ್ತಾ ಮ್ಹಳ್ಳೆಚೆರ್ ಮ್ಹಜಿಂ ಚಿಂತ್ನಾ ಹೊಂದ್ವೊನ್ ಅಸಾನಾಯೆ.
ಅಖೇರ್:
ಖುರಿಸ್ ಮ್ಹಜೊ ತಸೊಚ್ಚ್ ಆಸಾ. ಹಾಂವ್ ವ್ಹಾವವ್ನ್ ಆಸಾಂ, ಪಡ್ತಾಂ ಆನಿಂ
ಪಡ್ಲ್ಯಾರ್ ಉಟ್ತಾಂ ಪುಣ್ ಖುರ್ಸಾಕ್ ಸದಾಂ ವೇಂಗ್ ಮಾರ್ತಾಂ.
*************
[2003 ಇಸ್ವೆಂತ್ ’ರಾಕ್ಣೊ ಸಾಹಿತಿಕ್ ಸ್ಪರ್ದೊ’ ಹಾಂತುಂ ಇನಾಮ್ ಜೊಡ್ಲೆಲಿ ಕಾಣಿ]
About us | Feedback | Contact us
Copyright © 2005
DAAIZ.COM All rights reserved.
Page concept, designed and maintained by Ashawadi
Publications
