ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ವಿಂಚ್ಣಾರ್ ಮಟ್ವಿಕಾಣಿ: ತೆಂ ಆನಿ ಹಾಂವ್
ವಲ್ಲಿ ಕ್ವಾಡ್ರಸ್
ವಲ್ಲಿ ಕ್ವಾಡ್ರಸ್: ಕೊಂಕ್ಣಿ, ಕಾನಡಿ ಭಾಸೆಂತ್ ಪಾಟ್ಲ್ಯಾ ಪಂಚ್ವೀಸ್ ವರ್ಸಾಂ ಥಾವ್ನ್ ಲಗ್ಬಗ್ ದೊನ್ಶಾಂ ವಯ್ರ್ ಮಟ್ವ್ಯೊ ಕಾಣ್ಯೊ ಬರಯ್ಲ್ಯಾತ್. ಸ್ವತಾಚೆ ತೀನ್ ಬೂಕ್ ’ಆಶಾವಾದಿ’, ’ಖಿಳೊ’, ’ಕಂಗಾಲ್ ಆನಿ ತಾಚಿ ಕುಕ್ಕೆಹಳ್ಳಿ’ ಪರ್ಗಟ್ಲ್ಯಾತ್, ಹೆರಾಂಚಾ ಕಾಣ್ಯಾಂಚೊ ಬೂಕ್ ’ಕುಳ್ವಾರ್ಚೆಂ ದಾಯ್ಜ್’, ’ಸರ್ಗಾವಯ್ಲಿ ಮಾಂಯ್’ ಬುಕಾಂಚೆಂ ಸಂಪಾದನ್ ಕೆಲಾಂ, ಕರ್ನಾಟಕ್ ಕೊಂಕ್ಣಿ ಸಾಹಿತ್ಯ್ ಅಕಾಡೆಮಿಚಾ ಶೆಕ್ಡ್ಯಾಚ್ಯೊ ವಿಂಚ್ಣಾರ್ ಕೊಂಕ್ಣಿ ಮಟ್ವ್ಯೊ ಕಾಣ್ಯೊ ಬುಕಾಚೊ ಸಂಗ್ರಹಕ್ ಜಾವ್ನಾಸಾ. ಕೊಂಕ್ಣಿ ಮಟ್ವ್ಯಾ ಕಾಣ್ಯಾಂಚೆಂ ಅಂಕಣ್ ’ಮುಖಾಂ’ ಚಲವ್ನ್ ವೆಲಾಂ ತಶೆಂಚ್ ಪ್ರಸ್ತುತ್ ಚ್ಯಾರ್ ಅಂಕಣಾಂ, ’ಕಥಾಮೃತ್’, ’ಕಥಾದಾಯ್ಜ್’, ’ಕಥಾಝರ್’, ’ಕಥಾಂಕರ್’ ಚಲವ್ನ್ ವರ್ತಾ. ಮಟ್ವ್ಯಾ ಕಾಣ್ಯಾಂಚೆರ್ ಅಧ್ಯಯನ್ ’ಕಥಾಪಾಠ್’ ಚಲವ್ನ್ ವೆಲಾಂ. ರಾಕ್ಣೊ ಸಾಹಿತಿಕ್ ಸ್ಪರ್ಧ್ಯಾಂತ್ ತೀನ್ ಪಾವ್ಟಿಂ ಇನಾಮಾಂ ಜಿಕ್ಲಾ. ಹಾಚ್ಯೊ ತೀನ್ ಮಟ್ವ್ಯೊ ಕಾಣ್ಯೊ ನಾಟ್ಕುಳೆ ಜಾವ್ನ್ ಖೆಳಯ್ಲ್ಯಾತ್. ಧಾಂವ್ಣಿ (ದೆ|ಜೊರ್ಜಿ ಪೀಂತ್), ಖಣ್ (ಸ್ವ), ಗೂಂಡಾ (ಮೆಲ್ವಿನ್ ಜೆ. ವಾಸ್).
ಹೆರ್ ಕಾಣ್ಯೊ: ಏಕ್ ಕ್ರಿಕೆಟ್ ಹೀರೊ, ಬಾಂಯ್, ಖಣ್, ಕುಡ್ಡೊ, ಜಾಂಬ್ಳಾಂಚೊ ರೂಕ್, ಆಶಾವಾದಿ, ಏಕ್ ಮೊಗಾಚಿ ಕಥಾ, ಸಂಬಂಧ್, ಶನಿ, ಖುರ್ಸಾವಾಟ್, ಕಂಟ್ರಿ ಆವಯ್, ಭಾಂದ್, ಸುಟ್ಕಾ, ಅಜ್ಜಿಕುಂಜ, ಜಿಣ್ಯೆ ಸೂತ್ರ್, ಮಾರ್.
ಪಾಟ್ಲ್ಯಾ ಲಗ್ಭಗ್ ಸಾಡೆ ಪಾಂಚ್ ಮಯ್ನ್ಯಾ ಥಾವ್ನ್ ಹಾವೆಂ ಸಮ್ಜಾಲ್ಲೆಪರಿಂ ’ತೆಂ’ ಆನಿ ’ಹಾಂವ್’ ಮಧೆಂ ’ತೊ’ ಆಸ್ಚೊನಾ ಮ್ಹಳ್ಳೆಂ.
ತೆಂ ಚಿಂತುಂಕ್ ಪುರೊ ಕುಜ್ನಾಂತ್ ಆಯ್ದಾನಾಂ ಧಣ್ ಧಣ್ ಕರ್ನ್ ಪಡ್ತಾನಾ ಉಟ್ಚಾ ಆವಾಜಾಕ್ ಮ್ಹಜೆ ಕಾನ್ ಮಾತ್ರ್ ಆಯ್ಕತಾತ್ ಮ್ಹಳ್ಳೆಂ, ಪುಣ್ ಮ್ಹಜಾ ಕಾಳ್ಜಾಂತ್ ತ್ಯಾ ಆವಾಜಾಂತ್ ಅಸ್ಪಶ್ಟ್ ರಿತಿಚಿಂ ಭಗ್ಣಾಂ ಫುಟ್ತಾತ್ ಮ್ಹಳ್ಳೆಂ ತೆಂ ಭಿಲ್ಕುಲ್ ನೆಣಾಂ. ಕಸ್ಲೊಗಾಯ್ ಹೊ ಅವ್ಯಕ್ತ್ ಭಾಂದ್ ತಾಚೆ ಆನಿ ಮ್ಹಜೆ ಮಧ್ಲೊ ಮ್ಹಳ್ಳೆಂ ಹಾಂವ್ಯೀ ಅಜೂನ್ ನೆಣಾಂ.
ಕಾಂಯ್ ಮ್ಹಾಕಾ ತಾಚೆರ್ ಮೋಗ್ ಆಸಾ?
ಛೆ! ಕಸಲೆಂ ಪಿಶೆಂ ಸವಾಲ್ ಹೆಂ? ಮೋಗ್? ಮ್ಹಾಕಾ? ತೆಂಯೀ ತಾಚೆರ್??
ಹ್ಯಾ ಮ್ಹಜ್ಯಾ ಚಂಚಲ್ ಮತಿಕ್ಯೀ ಥಿರಾಸಣ್ ಮ್ಹಳ್ಳಿ ನಾ, ಮ್ಹಜ್ಯಾ ಚಿಂತ್ಪಾಕ್ ಗಡ್ ನಾ, ಹಾಂವೆಂ ಚಿಂತ್ಚಾಕ್ ತಡ್ ನಾ?.
ಪುಣ್ ಹಾಂವ್ ನಖ್ಖೆಂ ಸಾಂಗೊಂಕ್ ಸಕ್ತಾಂ; ಮ್ಹಾಕಾ ಮಾತ್ರ್ ತಾಚೆರ್ ಭಿಲ್ಕುಲ್ ಮೋಗ್ ನಾ!.
ಮ್ಹಾಕಾ ತೆಂ ಪಸಂದ್ - ವ್ಹಯ್!
ಮ್ಹಾಕಾ ತಾಚೆರ್ ಭಿರ್ಮತ್ ಆಸಾ - ವ್ಹಯ್!
ಮ್ಹಾಕಾ ತಾಚೆರ್ ಸಹಾನುಭೂತಿ ಆಸಾ - ವ್ಹಯ್!
ಮ್ಹಾಕಾ ತಾಕಾ ಪಳೆತಾನಾ ಮ್ಹಜಾ ಕಾಳ್ಜಾಂತ್ ಭಗ್ಣಾಂ ಉದೆತಾತ್ - ವ್ಹಯ್!
ಮ್ಹಾಕಾ ತಾಕಾ ಮ್ಹಜಾ ವೆಂಗೆಂತ್ ಘೆವ್ನ್ ತಾಚೆಂ ದೂಕ್ ಮ್ಹಜಾ ಜಿಣ್ಯೆಕ್ ಲಗ್ತಿಂ ಕರ್ಚಿ ಚಿಂತ್ನಾಂ ಉದೆತಾತ್? - ನಾ!!!!
ಮ್ಹಾಕಾ ತಾಚಾ ಕುಡಿಚೆರ್, ತಾಚಾ ವಿಸ್ವ್ಯಾಂಚೆರ್ ನದರ್ ಚರಯ್ತಾನಾ ಕಾಳಿಜ್ ಆವಾಜ್ ಕರ್ತಾ? - ನಾ!
ಸತ್ತ್? - ವ್ಹಯ್ ಬಿಲ್ಕುಲ್ ಆವಾಜ್ ಕರಿನಾ!!
ತರ್ ಮ್ಹಾಕಾ ತಾಚೆರ್ ಕಿತೆಂಚ್ ಪಡೊನ್ ವಚೊಂಕ್ ನಾ?! - ಬಿಲ್ಕುಲ್ ಫಟ್!
ಮ್ಹಾಕಾ ತಾಚೆರ್ ಭಿರ್ಮತ್ ಆಸಾ, ಸಹಾನುಭೂತಿ ಆಸಾ, ತೆಂ ಬರೆಂ ಮ್ಹಳ್ಳೆಂ ಚಿಂತಾಪ್ ಆಸಾ, ತಾಕಾ ಕಶ್ಟ್ ಯೆಂವ್ಚೆ ಮ್ಹಜ್ಯಾನ್ ಸೊಸಾನಾ - ಪುಣ್ ಮೊಗಾಚಿ ಬುನ್ಯಾದ್ ಫಕತ್ತ್ ಬಿರ್ಮತೆಚೆರ್ ಜಾಂವ್ ಸೊಭಾಯೆಚೆರ್ ಮಾತ್ರ್ ಆಸಾನಾ ದೆಖುನ್ ಮ್ಹಾಕಾ ತಾಚೆರ್ ಭಿಲ್ಕುಲ್ ಮೋಗ್ ನಾ; ಜೊ ಮೋಗ್ ದೋನ್ ಪ್ರೇಮಿಂ ಮಧ್ಲೊ.
"ಹ್ಯಾ ಸರ್ವ್ ಫುಲಾಂ ಝಡಾಂಕ್ ಸದಾಂಯ್ ಹಾಂವ್ ಚುಕಾನಾಸ್ತಾಂ ಉದಾಕ್ ಘಾಲ್ತಾಂ ತರ್ಯ್ ಹೆಂ ಏಕ್ ಝಡ್ ಕಶೆಂ ಮೊರೊನ್ ಯೆತಾ ತೆಂ ಹಾಂವ್ ನೆಣಾಂ" ಕಾಮಾಚೆಂ ಚೆಡುಂ ಅಪ್ಲೇಸ್ತಕಿಂ ಪುರ್ಪುರ್ಚೆಂ ಮ್ಹಾಕಾ ಆಯ್ಕೊನ್ ಹಾಂವ್ ಜಾಗೊಂ ಜಾಲೊಂ.
ಕಿತ್ಲೊಸೊ ವೇಳ್ ಹಾಂವ್ ಮ್ಹಜೆಲಾಗಿಂಚ್ ಸಂವಾದ್ ಕರುನ್ ಆಸ್ಲ್ಲ್ಯಾ ಮ್ಹಾಕಾ ಹೆಂ ಸವಾಲ್ ಭೋವ್ಶಾ ಖೊಂಕಿಲಾಗ್ಲೆಂ.
’ಭೋವ್ಶಾ ತ್ಯಾ ಝಡಾಕ್ ಉದಾಕ್ ಮಾತ್ರ್ ನ್ಹಂಯ್.. ದುಸ್ರೆಂ ಕಿತೆಂಗೀ ಜಾಯ್!!!’
ಮತಿನ್ ಎದೊಳ್ಚ್ ಅವ್ಯಕ್ತ್ ರಿತಿಚೆಂ ಗುಣಾಕಾರ್ ಕರ್ನ್ ಜಾಲ್ಲೆಂ.
ಹಾಂವ್ ಮ್ಹಜೆಂ ವೀಲ್ಚೇರ್ ಲೊಟೀತ್ ಭಾಯ್ಲ್ಯಾ ಬಾಲ್ಕನಿಂತ್ಲೊ ಭಿತರ್ ಆಯ್ಲೊಂ.
**********
ತೆಂ
ಜೆದ್ನಾಂ ಹಾಂವ್ ಹ್ಯಾ ಶ್ಹೆರಾಕ್ ಯೇವ್ನ್ ಹಿ ಕೊಟ್ರಿ ಘೆತ್ಲಿಗೀ, ತೆದ್ನಾಂ ಸೆಜಾರಾ ಜಾಲ್ಲೆಂ ಏಕ್ ಗಡ್ದಾಯೆಚೆಂ ಕಾಜಾರ್ ಮ್ಹಳ್ಯಾರ್ ತ್ಯೇ ಚೆಡ್ವಾಚೆಂಚ್..
ತೆಂ ಎಕ್ಲೆಂಚ್ ಧುವ್ ದೊಗಾಂ ಭಾವಾಂಕ್. ತಾಚೊ ಬಾಪುಯ್ ಶ್ಹೆರಾಂತ್ ಏಕ್ ವ್ಹಡ್ಲೆಂ ಭಾಂಗಾರಾಚೆಂ ದುಕಾನ್ ಚಲಯ್ತಾ ತರ್ ದೋಗ್ ಪೂತ್ ತೆಚ್ಚ್ ಆಂಗ್ಡಿಂತ್ ಕಾಮ್ ಕರ್ನ್ ಆಸಾತ್. ಎಕ್ಲೆಂಚ್ ಚೆಡುಂ ದೆಖುನ್ ಬರೆಂ ಶಿಕೊಂದಿ ಮ್ಹಣ್ ಬಾಪುಯ್ ಆಶೆತಾಲೊ ತರ್ಯೀ ಕೊಲೆಜಿಚ್ಯಾ ದಿಸಾಂನಿ ಆವಯ್ಚಾ ಅವ್ಚಿತ್ತ್ ಮೊರ್ನಾನಿಮ್ತಿಂ ಚೆಡ್ವಾಚೆಂ ಶಿಕಾಪ್ ಥಂಯ್ಚ್ ರಾವ್ಲೆಂ ಆನಿ ಖುದ್ದ್ ತೆಂ ಘರ್ಚೊ ಹಾರ್ಭಾರ್ ಸಾಂಭಾಳುಂಕ್ ಲಾಗ್ಲೆಂ.
ಬಾಪುಯ್ ಜಾಣಾಂ - ಅಪ್ಲಿ ಧುವ್ ಕಿತ್ಲಿ ತರ್ಯ್ ಎಕಾ ದಿಸಾ ಪರ್ಕಿ ಜಾತೆಲಿಚ್ಚ್ ಮ್ಹಣೊನ್. ದೆಖುನ್ ಹ್ಯಾವಿಶಿಂ ಚಡ್ ಗುಮಾನ್ ಕರುಂಕ್ ತೊ ಗೆಲೊನಾ. ತಿತ್ಲೊ ವೇಳ್ಯ್ ತಾಚೆಲಾಗಿಂ ಖೈಂ ಆಸಾ? ಘರಾಂತ್ ಜಾಯ್ ಆಸ್ಚೆಂ ಸರ್ವ್ ಆಸ್ಲ್ಲೆಂ. ಗ್ರೇಸ್ತ್ ಘರ್ ಆನಿ ಉಂಚ್ಲೆಂ ಘರಾಣೆಂ..
ದೀಸ್ ಗೆಲ್ಲೆಪರಿಂ ಎಕಾದಿಸಾ ತಾಂಚ್ಯಾಚ್ ಕುಟ್ಮಾಭಿತರ್ಲೊ ಎಕ್ಲೊ ಅಮೆರಿಕಾಂತ್ ಕಾಮ್ ಕರ್ನ್ ಆಸ್ಚೊ ಸೊಭಿತ್ ತರ್ನಾಟೊ ಸಯ್ರೊ ಜಾವ್ನ್ ಉದೆಲೊ ತಾಂಗೆರ್. ಯೆತಾನಾ ಸಯ್ರೊ ಜಾವ್ನ್ ಉದೆಲ್ಲೊ ತರ್ಯ್ ವೆತಾನಾ ಘರ್ಚೊ ಜಾಂವಯ್ ಜಾಂವ್ಚಿ ಆಶಾ ಉಚಾರ್ನ್ ಗೆಲೊ. ಥೊಡ್ಯಾಚ್ ದಿಸಾಂನಿ ಭಾರಿ ಗಡ್ದಾಯೆಚೆಂ ಕಾಜಾರ್ ಜಾಲೆಂ. ಎಕ್ಲೆಂಚ್ ಚೆಡುಂ ದೆಖುನ್ ಪನ್ನಾಸ್ ಪೌಂಡ್ ಭಾಂಗಾರ್, ಏಕ್ ವಜ್ರಾಚೆಂ ನೆಕ್ಲೆಸ್, ಪಾಂಚ್ ಲಾಖ್ ರುಪಯ್ ದೋತ್ ಮ್ಹಣೊನ್ ಅಮೆರಿಕಾಚಾ ನವ್ರ್ಯಾಕ್ ಅಪ್ಲಿ ಅರ್ಧಿ ಆಸ್ತ್ಚ್ ದೊತಿರುಪಾರ್ ಮೆಳ್ಳಿ. ಕಾಜಾರ್ ಜಾವ್ನ್ ಥೊಡೆ ಮಯ್ನೆ ಹನಿಮೂನಾಕ್ ಮ್ಹಣೊನ್ ಊಟಿ, ಶಿಮ್ಲಾ, ಕಾಶ್ಮಿರ್ ಭಂವ್ಲಿಂ ಆನಿ ತೊ ಪಾಟಿಂ ಅಮೆರಿಕಾ ಗೆಲೊ...
ಥೊಡ್ಯಾಚ್ ಮಯ್ನ್ಯಾಂನಿ ವಿಜಾಚಿ ಬಂದೊಬಸ್ತ್ ಕರುನ್ ಚೆಡ್ವಾಕ್ಯೀ ವ್ಹರ್ನ್ ಗೆಲೊ...
*********
ವೆಳಾಚಿಂ ರೊದಾಂ ಅಶಿಂಚ್ ಘುಂವ್ತಾಲಿಂ..
ಥೊಡಿಂ ವರ್ಸಾಂ ಪಾಶಾರ್ ಜಾಲಿಂ.. ಘರಾಂತ್ ಬಾಯ್ಲ್ ನಾ ದೆಖುನ್ ದೊಗೀ ಪೂತ್ ಕಾಜಾರ್ ಜಾಲೆ ಆನಿ ಆಪಾಪ್ಲ್ಯಾ ಬಾಯ್ಲಾಂಕ್ ಘರ್ಚ್ಯೊ ಸುನೊ ಕರುನ್ ಹಾಡ್ಲೆಂಚ್. ಪುಣ್ ಕಾಜಾರಾಕ್ ಸಯ್ತ್ ಯೇನಾತ್ಲ್ಲ್ಯಾ ಚೆಡ್ವಾಚಿ ಕೊಣಾಕ್ಯ್ ತಿತ್ಲಿ ಫಿಕಿರ್ ಆಸ್ಚೆಪರಿಂ ದಿಸ್ಲೆಂ ನಾ. ಫಿಕಿರ್ ಆಸ್ಲ್ಲಿ ತರ್ಯ್ ಸೆಜಾರ್ಚ್ಯಾ ಮ್ಹಾಕಾ ತರ್ಯ್ ಕಶೆಂ ಕಳ್ಚೆಂ?
ಏಕ್ ಹಾಂವ್ ಜಾತಿನ್ ಪರ್ಕಿ, ದುಸ್ರೊಂ ಹಾಂವ್ ಹ್ಯಾ ಶ್ಹೆರಾಕ್ ನವೊ ಆನಿ ಮ್ಹಾಕಾ ಮ್ಹಜೊಚ್ ಸಂಸಾರ್... ಮ್ಹಾಕಾ ದಿಸಾಚೊ ಸುರ್ಯೊ ಕಿತ್ಲ್ಯಾ ವೊರಾಂಚಾ ಕಿತ್ಲ್ಯಾ ಮಿನುಟಾಂಚ್ಯಾ ಖಂಚ್ಯಾ ಸೆಕುಂಡಾಂತ್ ಉದೆತಾ ಆನಿ ಖಂಚ್ಯಾ ಸೆಕುಂಡಾಂತ್ ಬುಡ್ತಾ ಮ್ಹಳ್ಳೆಂ ಮಾತ್ರ್ ಕಳಿತ್ ಶಿವಾಯ್ ’ಕೊಣಾಕ್ ಕೊಣಾಚಿ ಫಿಕಿರ್ ಆಸಾ’ ಮ್ಹಳ್ಳೆಂ ಚಿಂತಾಪ್ ಮ್ಹಜ್ಯಾ ನದ್ರೆ ಥಾವ್ನ್ ಭೋವ್ ಪಯ್ಸಿಲೆಂ..
ಹೆರಾಂಚೆ ದೀಸ್ ಧಾಂವ್ತಾಲೆ ತರ್ ಮ್ಹಜೆ ಸದ್ದ್ಯಾಚೆ ದೀಸ್ ಹಾಂವ್ ಲೊಟ್ತಾಲೊಂ...
ಎಕಾ ಅವ್ಚಿತ್ತ್ ದಿತಾ ಸಕಾಳಿಂ ಫುಡೆಂಚ್ ಏಕ್ ಭಾಡ್ಯಾಚೆಂ ಕಾರ್ ಸೆಜಾರಾ ಯೇವ್ನ್ ರಾವ್ಲೆಂ.. ಆನಿ ಏಕ್ ಸೂಟ್ಕೇಜ್ ಘೆವ್ನ್ ಏಕ್ ಅಸ್ಕತ್ ಬಾಯ್ಲ್ ಮನಿಸ್ ದೆಂವ್ಲಿ...
ದುಸ್ರೆ ದಿಸಾ ಕಾಮಾಚೆಂ ಚೆಡುಂ ಸಾಂಗ್ತಾನಾಂಚ್ ಕಳ್ಳೆಂ ತಿ ಅಸ್ಕತ್ ಬಾಯ್ಲ್ ತೆಂಚ್ಚ್ ಅಮೆರಿಕಾಚಾ ಚೆಡ್ಯಾಲಾಗಿಂ ಕಾಜಾರ್ ಜಾವ್ನ್ ಗೆಲ್ಲೆಂ ಸೆಜಾರ್ಚೆಂ ಚೆಡುಂ ಮ್ಹಣೊನ್. ತೊ ಅಮೆರಿಕಾಚೊ ಚೆಡೊ ಪಯ್ಲೊಚ್ಚ್ ಕಾಜಾರಿ ಜಾವ್ನ್ ಆಸೊನ್ ಏಕ್ ಬುರ್ಗೊ ಆಸೊನ್ಯೀ ಗಾಂವಾಕ್ ಯೇವ್ನ್ ಕಾಜಾರ್ ಜಾಲ್ಲೊ ಖೈಂ. ಹ್ಯಾ ಚೆಡ್ವಾಕ್ ಥಂಯ್ ವರ್ನ್ ಮೊಸ್ತ್ ಕಶ್ಟಿಲೆಂ ಖೈಂ.. ಹಾಚೆಂ ಭಾಂಗಾರ್, ಪೊಯ್ಶೆ ಸಗ್ಳೆ ಲುಟ್ಲೆ ಆನಿ ಹಾಕಾ ವಾಟೆರ್ ಘಾಲೆಂ ಖೈಂ.. ಉಪ್ರಾಂತ್ ಹಾಣೆಂಚ್ ಕೊಣಾ ಎಕಾ ಬಾವ್ಡ್ಯಾಚೆ ಹಾತ್ ಪಾಂಯ್ ಧರುನ್ ಕಶೆಂಯ್ ವರ್ಸಾಂ ಉಪ್ರಾಂತ್ ಆಪ್ಲ್ಯಾ ಘೊವಾಥಾವ್ನ್ ಡೈವೋರ್ಸ್ ಘೆವ್ನ್ ಅಪ್ಲ್ಯಾ ಗಾಂವಾಕ್ ಪಾಟಿಂ ಆಯ್ಲೆಂ ಖೈಂ.. ಎಕಾಚ್ಚ್ ಧಮ್ಮಾನ್ ಕಾಮಾಚ್ಯಾ ಚೆಡ್ವಾನ್ ಕುಮ್ಸಾರ್ ಜಾಲ್ಲೆಪರಿಂ ಅಪ್ಲಿ ಖಬ್ರಾಂಚಿ ಪೊಟ್ಲಿ ಉಸಾಯ್ಲಿ..
ಸುರ್ವಿಲ್ಲೆ ಥೊಡೆ ದೀಸ್ ಭೋವ್ಶಾ ಸಮಧಾನೆನ್ ಗೆಲೆ ಜಾಯ್ಜಯ್, ಎಕಾಮೆಕಾಚಿಂ ದುಃಖಾಂ ಪುಸುನ್ ಪರತ್ ಪಯ್ಲೆಂಚ್ಯಾ ಭಾಶೆನ್ ದೀಸ್ ಪಾಶಾರ್ ಜಾಂವ್ಕ್ ಪಾವ್ಲೆ..
ಘರ್ಚೆಂ ಚೆಡುಂ ತರ್ಯೀ ವೇಳಾಚಿ ಪದ್ವಿ ವೆಗ್ಳಿಚ್ಚ್. ವೇಳ್ ಘುಂವ್ತಚ್ಚ್ ’ಕಾಜು ಆಸ್ಚೊ ಪಾಜು ಜಾತಾ ಆನಿ ಪಾಜು ಆಸ್ಚೊ ಕಾಜು’ ಜಾತಾ.. ಅಶೆಂಚ್ ಘರಾಂತ್ಲ್ಯೊ ಸುನೊಂ ಜೆದ್ನಾಂ ಭಾಯ್ಲೆಂ ಚೆಡುಂ ಘರಾಂತ್ ಯೆತಾನಾ ಅಪ್ಲಿ ರಾಜ್ವಟ್ಕಿ ತಿತ್ಲ್ಯಾ ಸುಲಭಾಯೆನ್ ದೀಂವ್ಕ್ ಆಯ್ಕನಾ. ತೆಚ್ಚ್ಪರಿಂ ಘರ್ಚೆಂ ಚೆಡುಂ ಥೊಡ್ಯಾಚ್ ದಿಸಾಂನಿ ಘರ್ಚಿ ಆಯಾ ಜಾಲೆಂ.. ಎಕಾ ಸಕಾಳಿಂ ಘರ್ ಸೊಡ್ನ್ ವೆಚ್ಯಾ ಆನಿ ರಾತಿಚ್ಯಾ ಮಧ್ಯಾನೆರ್ ಪಾಟಿಂ ಯೆಂವ್ಚಾ ಧಾದ್ಲ್ಯಾಂಕ್ ಕಿತೆಂ ಕಳಿತ್ ಘರಾಂತ್ ಕಿತೆಂ ಶಿಜ್ತಾ ಆನಿ ಕಿತೆಂ ಲಾಸ್ತಾ ಮ್ಹಳ್ಳೆಂ?
ದೀಸ್ ಗೆಲ್ಲೆಪರಿಂಚ್ ಚೆಡ್ವಾಚೆ ದೀಸ್ ಸಂಕಶ್ಟಾಂಚೆ ಜಾವ್ನ್ ಆಯ್ಲೆ.. ಕೆದ್ನಾಂ ಕುಜ್ನಾಂತ್ ಆವಾಜ್, ಕೆದ್ನಾಂ ನಾಣ್ಯೆಂತ್ ಆವಾಜ್, ಕೆದ್ನಾಂ ಚೊವ್ಕೆಂತ್. ಆನಿ ಕೆದ್ನಾಂ ಮ್ಹಜಿ ನದರ್ ತ್ಯಾ ಘರ್ಚೆರ್ ಪಡ್ತಾ ತೆದ್ನಾಂ ಮ್ಹಾಕಾ ಕಿತ್ಯಾಕ್ಗಿ ಥಂಯ್ಸರ್ ಫಕತ್ತ್ ಉದಾಕ್ ಪಿಯೆಂವ್ಚಾ ಅಪ್ಲ್ಯಾ ಮೊರೊನ್ ವೆಚ್ಯಾ ಝಡಾಪರಿಂ ಆಸ್ಚೆಂ ಅನ್ಯೇಕ್ ಝಡ್ ದಿಸ್ತಾ..
************
ಹಾಂವ್
ಹ್ಯೂಮನ್ ರಿಸೋರ್ಸಾಂತ್ ಎಮ್.ಬಿ.ಯೆ ಕರ್ನ್ ಗಲ್ಫಾಂತ್ಲ್ಯಾ ಎಕಾ ಪ್ರತಿಶ್ಟಿತ್ ಕಂಪ್ಣೆಂತ್ ಎಚ್.ಆರ್ ಮ್ಯಾನೆಜರಾಚೆಂ ಕಾಮ್ ಕರ್ನ್ ಆಸ್ಲ್ಲೊಂ.. ಬರೊ ಸಾಂಭಾಳ್, ಬರಿ ಕಂಪ್ಣಿ ಮ್ಹಣ್ತಾನಾ ಮ್ಹಜಾ ತರ್ನಾಟ್ಪಣಾರ್ ಮ್ಹಾಕಾ ಸಗ್ಳೆಂ ಮೆಳ್ಲ್ಲೆಂ. ಕಾರ್ ಬಂಗ್ಲೊ.. ಮ್ಹಜೊ ವ್ಹಡ್ ಭಾವ್ ಬಯೋಕೆಮಿಸ್ಟ್ರಿಂತ್ ಎಮ್.ಎಸ್ಸಿ ಕರುನ್ ಲಂಡನಾಂತ್ ಎಕಾ ವಖ್ತಾಂಚಾ ಕಂಪ್ಣೆಂತ್ ಬರ್ಯಾ ಹುದ್ದ್ಯಾರ್ ಆಸೊನ್ ಥಂಯ್ಚ್ ಕಾಜಾರ್ ಜಾವ್ನ್ ರಾವ್ಲ್ಲೊ.
ದುಸ್ರೊ ಬಿಜ್ನೆಸ್ ಮ್ಯಾನೆಜ್ಮೆಂಟಾಂತ್ ಸನದ್ ಆಪ್ಣಾವ್ನ್ ಗಾಂವಾಂತ್ಂಚ್ ಎಕಾ ಕಂಪ್ಣೆಂತ್ ಬರ್ಯಾ ಕಾಮಾರ್ ಆಸ್ಲ್ಲೊ ಆನಿ ಆಪ್ಲ್ಯಾ ಕುಟ್ಮಾಸವೆಂ ಪ್ರಾಯೆಸ್ತ್ ಆವಯ್ ಬಾಪಾಯ್ಚಿ ಜತನ್ ತೊಚ್ಚ್ ಸಾಂಭಾಳ್ತಾಲೊ.
ತಿಸ್ರೊಂ ಹಾಂವ್ ಸುಮಾರ್ ವರ್ಸಾಂ ಕಾಮ್ ಕರುನ್, ಸದ್ದ್ಯಾಕ್ ಗಾಂವಾಕ್ ವಚೊನ್ ಕಾಜಾರ್ ಜಾಂವ್ಕ್ ಚಿಂತುನ್ ಅಸ್ತಾನಾ ಅವ್ಚಿತ್ತ್ ಎಕಾ ದಿಸಾ ರಸ್ತ್ಯಾ ಅವ್ಘಡಾಂತ್ ಸಾಂಪ್ಡೊನ್ ಮ್ಹಜ್ಯಾ ದೊನೀಂ ಪಾಂಯಾಂಕ್ ಹೊಗ್ಡಾಂವ್ಕ್ ಪಾವ್ಲೊಂ.. ಗಲ್ಫಾಂತ್ಲಿ ಬರಿ ಕಂಪ್ಣಿ, ಬರಿ ಸವ್ಲತಾಯ್ ಆಸ್ಲ್ಲಿ - ವಖ್ತಾಕ್ ಮ್ಹಣೊನ್ ಲಾಖಾಂನಿ ದುಡು ಮೆಳ್ಳೊ ಆನಿ ಮ್ಹಾಕಾ ಮ್ಹಜ್ಯಾ ದೇಶಾಕ್ ಧಾಡ್ಲೊ. ಪುಣ್ ತ್ಯಾ ದುಡ್ವಾಂನಿ ಮ್ಹಜ್ಯಾ ವಖ್ತಾಂ ಮಾತ್ರ್ ಮೊಲಾಂವ್ಕ್ ಜಾಲೆಂ ಶಿವಾಯ್ ಭಲಾಯ್ಕಿ ನ್ಹಂಯ್. ಕೃತಕ್ ಪಾಂಯ್ ಬಸಂವ್ಕ್ ಸಕ್ಲೊಂ ಪುಣ್ ಚಲ್ಚೆಂ ತ್ರಾಣ್ ನ್ಹಂಯ್..
ಹಾಂವ್ಯ್ ಸ್ವಾಭಿಮಾನಿ.. ಕೊಣಾಯ್ಚಾಯ್ ಹಂಗಾರ್, ಕೊಣಾಯ್ಚ್ಯಾಯ್ ಹುಸ್ಕ್ಯಾರ್, ಕೊಣಾಚ್ಯಾ ಭಿರ್ಮತೆನ್ ದೀಸ್ ಕಾಡ್ಚೆಂ ಮ್ಹಾಕಾ ಭಿಲ್ಕುಲ್ ನಾಕಾಸ್ಲ್ಲೆಂ.
ಎದೊಳ್ ಘೊಳ್ಲ್ಲೆ ತಶೆಂಚ್ ಅಪ್ಲ್ಯಾ ಆವ್ಘಡಾಕ್ ಕಂಪ್ಣೆ ಥಾವ್ನ್ ಮೆಳ್ಲ್ಲೊ ವ್ಹಡ್ಲೊ ದುಡು ಎದೊಳ್ಚ್ ಹಾವೆಂ ಮ್ಹಜ್ಯಾ ನಾಂವಾರ್ ಬೆಂಕಾಂತ್ ದವರ್ಲಲೊ. ಶ್ಹೆರಾಂತ್ ಏಕ್ ಹಳ್ತಾಚಿ ಕೊಟ್ರಿ ಮೊಲಾಕ್ ಘೆತ್ಲಿ ಆನಿ ಗರ್ಜೆಚ್ಯೊ ವಸ್ತು ತಾಂತುಂ ಗರ್ಜೆಚ್ಯೊ ಹಾಡ್ಲ್ಯೊ. ಸದಾಂಯ್ ಮ್ಹಜಿ ಚಾಕ್ರಿ ಕರುಂಕ್ ಕಾಮಾಚ್ಯಾ ಎಕಾ ಚೆಡ್ವಾಕ್ ಸಕಾಳಿಂ ಥಾವ್ನ್ ಸಾಂಜೆ ಪರ್ಯಾಂತ್ ಕಾಮ್ ಕರುಂಕ್ ನಮ್ಯಾರ್ಲೊ. ಮ್ಹಾಕಾ ಕೃತಕ್ ಪಾಂಯಾಂನಿ ಇಲ್ಲೆಂ ಚಲೊಂಕ್ ಜಾತಾಲೆಂ ತರ್ಯ್ ದಿಸಾಚೊ ಚಡ್ತಾವ್ ವೇಳ್ ಹಾಂವ್ ವೀಲ್ಚೆರಾಚೆರ್ಚ್ ಆಸ್ತಾಲೊಂ.
ಜೆದ್ನಾಂ ಹಾಂವ್ ಕದೆಲಾರ್ ಬೊಸೊನ್ ಆಸ್ತಾನಾ ಕೊಣೀಂ ಸಾಂಗ್ತಿತ್ಗಿ ಹಾಂವ್ ಥೊಂಟೊ ಮ್ಹಣೊನ್? ಗೊರ್ಶಿ ಭರ್ಲ್ಲಿ ಕೂಡ್, ರೂಂದ್ ತೋಂಡ್, ಮುದ್ಯಾಳೆ ಕೇಸ್.. ಕೊಣ್ಂಚ್ ಸಾಂಗ್ಚೆನಾಂತ್...
***********
ಮ್ಹಾಕಾ ಕಿತ್ಯಾಕ್ಗಿ ಹ್ಯಾ ’ಸಂಭಂಧಾಚೆರ್’ ಎಕಾ ಥರಾಚೊ ಕಾಂಠಾಳೊ ಯೆತಾಲೊ. ’ಸಂಭಂದ್’ ಮ್ಹಳ್ಯಾರ್ ಫಕತ್ತ್ ಮತ್ಲಾಬಿ ಜಿನೊಸ್. ಪೊಯ್ಶೆ ಆಸ್ಲ್ಯಾರ್ ಸಗ್ಳೆಂ ಆಸಾ. ಸಂಭಂದ್ ಆಸಾತ್, ಸಯ್ರಿಂ ಆಸಾತ್, ಈಶ್ಟ್ ಮಂತ್ರಾಂ ಆಸಾತ್. ಪೊಯ್ಶೆ ನಾಂತ್ ತರ್ ಕೊಣಾಕ್ ಕೊಣ್ಂಚ್ ನಾ.. ಹೆಂ ಸಂಸಾರಾಚೆಂ ಕೊಡು ಸತ್...
ಮ್ಹಾಕಾ ಪಳೆಂವ್ಕ್ ಮಯ್ನ್ಯಾಕ್ ಏಕ್ ಪಾವ್ಟಿಂ ಮ್ಹಜೆ ಭಾವ್, ವೊನಿಂ, ಭುರ್ಗಿಂ, ಆವಯ್, ಬಾಪುಯ್ ಯೆತಾಲಿಂ.. ದುಃಖಾಂ ಗಳಯ್ತಾಲಿಂ.. ಘರಾ ಆಪಯ್ತಾಲಿಂ..
ಮ್ಹಾಕಾ ಕಿತ್ಯಾಕ್ಗಿ ಕರ್ಕರೆ ಭಗ್ತಾಲೆಂ.. ತಶೆಂ ಮ್ಹಣ್ ಏಕ್ ದೋನ್ ಕಂಪ್ಣೆಂನಿ ಮ್ಹಾಕಾ ಕಾಮ್ ದಿಂವ್ಚಿ ಭಾಸ್ಯ್ ದಿಲ್ಲಿ. ತರ್ಯೀ ಮ್ಹಾಕಾ ಕಿತ್ಯಾಕ್ಗಿ ಮ್ಹಜ್ಯಾ ಜಿಣ್ಯೆಚೊ ಶೆವೊಟ್ ಕಾಳೊಚ್ ದಿಸ್ತಾಲೊ. ಹಾಂವ್ ಅಸೊಚ್ಚ್ ಕಿತ್ಲೊ ತೇಂಪ್ ಉರ್ತಲೊಂ ಮ್ಹಳ್ಳೆಂ ನಿಘಂಟ್ ಹಾಂವ್ಂಚ್ ನೆಣಾಸ್ಲ್ಲೊಂ. ಪುಣ್ ಸದ್ದ್ಯಾಕ್ ಮ್ಹಾಕಾ ಎಕ್ಸುರ್ಪಣ್ ಜಾಯ್ ಆಸ್ಲ್ಲೆಂ.. ಸಮಧಾನ್ ಜಾಯ್ ಆಸ್ಲ್ಲೆಂ.. ದೆಖುನ್ ಹಾಂವ್ ಹ್ಯಾ ಸಂಸಾರಾ ಥಾವ್ನ್ ಭೋವ್ ಪಯ್ಸ್ ರಾವೊಂಕ್ ಆಶೆತಾಲೊಂ..
ಎಕಾ ದಿಸಾ ಕಾಮಾಚೆಂ ಚೆಡುಂ ಪಿಶೆಂ ಸವಾಲ್ ಕರ್ತಾ "ಸರ್ ತುಂ ಕಾಜಾರ್ ಕಿತ್ಯಾಕ್ ಜಾಯ್ನಾಂಯ್? ತುಜಿ ಬಾಯ್ಲ್ ತುಜಿ ಬರಿ ಚಾಕ್ರಿ ಕರಿತ್, ತುಜಾ ಘರ್ಚಿ, ತುಜಾ ಫುಲಾಂಚಾ ಝಡಾಂಚಿ ಜತನ್ ಘೆತ್, ತುಜಿಂ ವಸ್ತ್ರಾಂ ಧುಯ್ತ್, ತುಕಾ ರಾಂದುನ್ ವ್ಹಾಡಿತ್..."
ಪಿಶೆಂ ಚೆಡುಂ.. ಸಾಂಗೊನ್ಂಚ್ ವೆತಾಲೆಂ.
ಹಾಂವ್ ವಗೊ ರಾವ್ಲೊಂ ದೆಖುನ್ ಪರತ್ ತೆಂಚ್ ಸವಾಲ್ ವಿಚಾರ್ತಾನಾ ಹಾವೆಂಯ್ ಸವಾಲಾಂತ್ಚ್ ತಾಕಾ ಜಾಪ್ ದಿಲಿ; "ಹೆಂ ಸರ್ವ್ ಕಾಮ್ ತುಂ ಕರ್ತಾನಾ ಮ್ಹಾಕಾ ಬಾಯ್ಲೆಚಿ ಗರ್ಜ್ ಕಸಲಿ? ತುಂಚ್ ಮ್ಹಜಿ ಬಾಯ್ಲ್ ಮ್ಹಣ್ ಚೀಂತ್"
ತೆಂ ಸಗ್ಳೆಂ ಲಜೆಲೆಂ ಆನಿ ಸವಾಲಾಂ ವಿಚಾರ್ಚೆಂಚ್ ವಿಸರ್ಲೆಂ..
ಹಾಂವ್ ವೀಲ್ಚೇರ್ ಲೊಟುನ್ ಬಾಲ್ಕನಿಕ್ ಪಾವ್ಲೊಂ..
ಸೆಜಾರ್ಚೆಂ ಸದಾಂಚೆಂ ಸಂಗೀತ್ ಸುರು ಜಾಲ್ಲೆಂ ಜಾಯ್ಜಯ್.. ಹ್ಯಾ ಚೆಡ್ವಾಂಕ್ಯ್ ದೊಂಪ್ರಾ ಸಕಯ್ಲಿಚ್ಚ್ ಬೂದ್.. ಅಪುಣ್ ಅಸ್ಕತ್, ಅಪುಣ್ ಅಬಲ್ ಮ್ಹಣ್ ಕಿತ್ಯಾಕ್ ಚಿಂತ್ಚೆಂ? ಜರ್ ತ್ಯಾ ಅಮೆರಿಕಾಚ್ಯಾಕ್ ಡೈವೋರ್ಸ್ ದೀವ್ನ್ ಅಪ್ಲಿ ಜಿಣಿ ಮುಖಾರ್ಸುಂಕ್ ಜಾತಾನಾ ಹ್ಯಾ ಚೆಡ್ವಾಕ್ ಕಿತ್ಯಾಕ್ ಅಪ್ಲಿ ಜಿಣಿ ಸಂಪ್ಲಿ ಮ್ಹಳ್ಳೆಂ ಚಿಂತಾಪ್?? ಸಂಬಂಧ್ ಸಂಪ್ತಚ್ಚ್ ಜಿಣಿ ಸಂಪ್ತಾ? ಜಿಣಿ ಸಂಪಾನಾ.. ದೆಖುನ್ ಚಡ್ಣಿಂ ದೆಂವ್ಣಿ ಯೆತಾನಾ ಭಿಂಯೆನಾಸ್ತಾಂ ಜಿಣ್ಯೆಂತ್ ಮುಖಾರ್ ಸರೊಂಕ್ ಆಸಾ. ಹೆಂಚ್ ಖರೆಂ ಜಿವಿತ್..
ಅಸ್ವಶ್ಟ್ ರಿತಿರ್ ಮಾತ್ಸೊ ರಾಗ್ ಯೆತಾಲೊ ಮ್ಹಾಕಾ.
ಬರೆಂ - ಅರ್ದಿ ಆಸ್ತ್ ಘೆವ್ನ್ ಭಾಯ್ರ್ ಗೆಲ್ಲೆಂ ತೆಂ ಚೆಡುಂ ಆತಾಂ ರಿತ್ಯಾ ಹಾತಾಂತ್ ಪಾಟಿಂ ಆಯ್ಲಾಂ ದೆಖುನ್ ಅಪ್ಲ್ಯಾ ವೊನಿಯಾಂಚಿ ಗುಲಾಮ್ಗಿರಿ ಕರ್ತಾ. ಪುಣ್ ಕಿತ್ಲೊ ತೇಂಪ್? ಕಿತ್ಲೊ ತೇಂಪ್!? ಹ್ಯಾ ಮನ್ಶಾಕ್ ಕಿತ್ಲೊ ಕಾಳ್ ಪರ್ಯಾಂತ್ ಧಾಂಬುನ್ ಧರ್ಚೆಂ? ಕೆದ್ನಾಂ ಸುಟ್ಕಾ ಲಾಭ್ಚಿ??
ಸುಟ್ಕಾ ಲಾಭ್ತಾ ಫಕತ್ತ್ ತಿ ಜೊಡುಂಕ್ ಮನ್ ಆಸ್ಚಾಂತ್, ಆನಿ ಸುಟ್ಕಾ ಮೆಳ್ತಾ ಫಕತ್ತ್ ತಿ ಜೊಡ್ಚೆಂ ಹಠ್ ಆಸ್ಚಾಂಕ್.. ಸುಟ್ಕಾ ಮೆಳ್ಚಿ ತಿ ಜೊಡ್ಚಾಕ್ ಮಿನತ್ ಕರ್ಚಾಂಕ್..
ಏಕ್ ಹಾಂವ್, ಮ್ಹಜಿ ಕೊಟ್ರಿ ಆನಿ ಥೊಡಿಂ ಫುಲಾಂ ಝಾಡಾಂ ಆನಿ ತೆಂ ಪಿಶೆಂ ಕಾಮಾಚೆಂ ಚೆಡುಂ.. ಇತ್ಲೊಚ್ ಮ್ಹಜೊ ಸಂಸಾರ್ ಜಾವ್ನಾಸ್ಲ್ಲೊ ಪಾಟ್ಲ್ಯಾ ಮುಕ್ಕಾಲ್ ವರ್ಸಾಂ ಥಾವ್ನ್.. ಪುಣ್ ಆತಾಂ ಹಳ್ತಾರ್ ತೆಂ ಹ್ಯಾ ಸಂಸಾರಾಂತ್ ಶಾಮೀಲ್ ಜಾಂವ್ಚೆಂ ಚಿಂತಾಪ್ ಮ್ಹಾಕಾ ಕಿತ್ಯಾಕ್ಗಿ ಅಥ್ವೆಂಚ್ ದಿಸ್ಲೆಂ..
***********
ಅಶೆಚ್ಚ್ ಸುಮಾರ್ ಸಾದೆ ದೀಸ್ ಪಾಶಾರ್ ಜಾಲೆ..
ಎಕಾ ದಿಸಾ ಕಾಮಾಚೆಂ ಚೆಡುಂ ಪರತ್ ಮ್ಹಾಕಾ ಸವಾಲಾಂ ವಿಚಾರ್ಚ್ಯಾ ಮೂಡಾರ್ ಆಸ್ಲ್ಲೆಂ ಜಾಯ್ಜಯ್; ದೆಖುನ್ "ಸರ್ ತೆಂ ಡೈವೋರ್ಸ್ ಜಾಲ್ಲೆಂ ಚೆಡುಂ ತುಮ್ಚೆವಿಶ್ಯಾಂತ್ ಮ್ಹಜೆಲಾಗಿಂ ಸವಾಲಾಂ ಕರ್ತಾಲೆಂ. ತುಮ್ಚೆಂ ಕಾಜಾರ್ ಜಾಲಾಂಗಿ? ತುಮಿಂ ಕಾಮಾಕ್ ವೆತಾತ್ಗಿ ವ ಕೊಲೆಜಿಕ್.... ಅಶೆಂ ಪುರಾ ಸವಾಲಾಂ ಕರ್ತಾಲೆಂ.."
ಹಾಂವ್ ಕಿತೆಂಚ್ ಉಲಂವ್ಕ್ ಆಶೆನಾತ್ಲ್ಲೊಂ..
"ತುಕಾ ಪೋರ್ ಹಾವೆಂ ಸಾಂಗ್ಲ್ಲೆಂ ತೆಂ ಝಡ್ ಮೊರೊನ್ ಯೆತಾ ದೆಖುನ್ ಇಲ್ಲೆಂ ಸಾರೆಂ ಹಾಡ್ ಮ್ಹಣ್? ತುಕಾ ಹಾಡುಂಕ್ ಪುರ್ಸೊತ್ ಆಸಾಗಿ? ಬೆಶ್ಟೆಂಚ್ ನಾಕಾ ಜಾಲ್ಲ್ಯೊ ಖಬ್ರೊ".. ಹಾಂವ್ ಶಿಣ್ಲೊಂ.
"ಸರ್ ಹಾವೆಂ ಇಲ್ಲೆಂ ಸರ್ಕಾರಿ ಸಾರೆಂ ಹಾಡ್ಲಾಂ ಸರ್.. ಹೋ ವಿಸರ್ಲಿಂ.." ಮ್ಹಣೊನ್ ತೆಂ ಭಿತರ್ ವಚೊನ್ ಏಕ್ ಲ್ಹಾನ್ ಪೊಟ್ಲಿ ಹಾಡ್ನ್ ಮ್ಹಾಕಾ ಧಾಖಯ್ಲಾಗ್ಲೆಂ.
"ತರ್ ಪಳೆತಾಯ್ ಕಿತ್ಯಾಕ್? ವಚ್ ಆನಿ ತೊ ಈಟ್ ಘಾಲ್...’" ಹಾವೆಂ ದೆಂಕ್ಣೊ ಘಾಲ್ಯೊ. ಆನಿ ತೆಂ ಝಡಾಕ್ ಏಕ್ ಮೂಟ್ ಸರ್ಕಾರಿ ಸಾರೆಂ ಘಾಲ್ನ್ ಉದಾಕ್ ವೊತ್ತಾನಾ ಹಾಂವ್ ’ಭೋವ್ಶಾ ಹೆಂ ಝಡ್ ಪರತ್ ಪಾಲೆಂವ್ಕ್ ಪುರೊ’ ಮ್ಹಣ್ ಚಿಂತುನ್ ಬಾಲ್ಕನಿ ತೆವ್ಶಿನ್ ಮ್ಹಜೆಂ ವೀಲ್ಚೇರ್ ಲೊಟಿಲಾಗ್ಲೊಂ.
**********
About us | Feedback | Contact us
Copyright © 2005
DAAIZ.COM All rights reserved.
Page concept, designed and maintained by Ashawadi
Publications
