(ಮಾಯ್

ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ -’ದಾಯ್ಜ್ ’-ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್‍ಯಾಂತ್, ಕೊಂಕಣಿ ಖಾತಿರ್.

ಮಿತ್ರ್ ದಾಯ್ಜ್ ಸಾಹಿತಿಕ್ ಶಿಭಿರ್ 2006

ಕಾರ್ಕಳ್ (ಮಾಯ್ 20): ಕೊಂಕ್ಣಿ ಭಾಸೆಚ್ಯಾ ವಾಡಾವಳೆಂತ್ ಎಕಾ ಸಾಹಿತಿಕ್ ಪಾತ್ರ್ ವರ್ತೊ ಜಾವ್ನಾಸಾ - ಹೆಂ ಸತ್ ಮಾಂದುನ್ ಘೆವ್ನ್ ಕೊಂಕ್ಣಿ ಸಾಹಿತ್ಯಾಂತ್ ಆಸಕ್ತ್ ಆಸ್ಚಾಂಕ್ ಜೊಕ್ತೆಂ ಉತ್ತೇಜನ್ ಆನಿ ಪಾಟಿಂಬೊ ತಶೆಂಚ್ ಮಾರ್ಗ್‌ದರ್ಶನ್ ದಿಂವ್ಚಾ ಇರಾದ್ಯಾನ್, ಆಮ್ಚಾ ಫಿರ್ಗಜೆ ಥಾವ್ನ್ ಫಿರ್ಗಜೆಂತ್ ಆಸ್ಚಾ ತಾಲೆಂತ್‌ವಂತ್ ಬರವ್ಪ್ಯಾಂಕ್ ಸೊಧುನ್ ಕಾಡ್ಚಾ ಇರಾದ್ಯಾನ್ ದಾಯ್ಜಾನ್ ವರ್ಸಾನ್ ವರಸ್ ಆಸಾ ಕರ್ಚೆಂ ಪಯ್ಲೆಂ ಸಾಹಿತಿಕ್ ಶಿಭಿರ್, ಕಾರ್ಕಳ್ ವಾರಾಡ್ಯಾಚ್ಯಾ ಯುವಜಣಾಂಕ್, 2006 ಇಸ್ವೆಚ್ಯಾ ಮಾಯ್ 20 ತಾರಿಕೆರ್ ಕಾರ್ಕಳ್ ಟೌನ್ ಫಿರ್ಗಜೆಚ್ಯಾ ಸಭಾಸಾಲಾಂತ್ ಆಸಾ ಕೆಲೆಂ.

ಎಕಾ ದಿಸಾಚೆಂ ಹೆಂ ಸಾಹಿತಿಕ್ ಶಿಭಿರ್ ಮಿತ್ರ್ ಹಾಫ್ತ್ಯಾಳ್ಯಾಚಾ ಸಹಯೋಗಾನ್, ಸಕಾಳಿಂ 9 ವೊರಾರ್ ಬಾಯ್ ವಾಯ್ಲೆಟ್ ಪಿರೇರಾನ್ ಶಿಭಿರಾರ್ಥಿಂಚಿ ನೊಂದಾವ್ಣಿ ಕೆಲಿ.

ಹ್ಯಾ ಶಿಭಿರಾಚೆಂ ಉಗ್ತಾವಣ್ ಕರುಂಕ್ ಕಾರ್ಕಳ್ ಫಿರ್ಗಜೆಚೊ ವಿಗಾರ್ ಬಾಪ್ ಮಾ|ಲಾರೆನ್ಸ್ ಗೋಮ್ಸ್ ಹಾಣೆಂ ಕೆಲೊ. ವಿತೊರಿ ಕಾರ್ಕಳಾನ್ ಸ್ವಾಗತ್ ಕರುನ್ ಸಯ್ರ್ಯಾಂಕ್ ವೆದಿಕ್ ಆಪವ್ನ್ ಹಾಡ್ಲೆಂ. ಕೊಂಕ್ಣೆಚೆ ಫಾಮಾದ್ ಸಾಹಿತಿ ಎಡ್ವಿನ್ ಜೆ. ಎಫ್. ಡಿ’ಸೋಜ್, ಡೊಲ್ಫಿ ಕಾಸ್ಸಿಯಾ, ಮಿತ್ರ್ ಹಾಫ್ತ್ಯಾಳ್ಯಾಚೊ ಸಂಪಾದಕ್ ಎಲ್ಯೆರ್ ತಾಕೊಡೆ, ತಶೆಂಚ್ ದಾಯ್ಜ್ ಡೊಟ್ ಕಾಮಾಚೊ ಸಂಪಾದಕ್ ವಲ್ಲಿ ಕ್ವಾಡ್ರಸ್ ವೆದಿಚೆರ್ ಹಾಜರ್ ಆಸ್ಲೆ.

ಉಗ್ತಾವಣ್ ಕರುನ್, ಸಮಾಜೆಂತ್ ಲೊಕಾಂಚಾ ಮತಿಂನಿ ಗಿನ್ಯಾನಾಚೊ ದಿವೊ ಪೆಟಂವ್ಚಿ ಜವಾಭ್ದಾರಿ ಎಕಾ ಸಾಹಿತಿಚಿ ದೆಕುನ್ ಸಾಹಿತಿಂನಿ ಅಸಲ್ಯಾ ಜವಾಭಾರೆಂತ್ ಮೌಲ್ಯಾಂ ಸಾಂಭಾಳ್ಚಿ ಗರ್ಜ್ ಆಸ್ಚೆವಿಶಿಂ ಮಾ|ಲಾರೆನ್ಸ್ ಗೋಮ್ಸ್ ಉಲಯ್ಲೊ.

[ವಲ್ಲಿ ಕ್ವಾಡ್ರಸ್, ಎಡ್ವಿನ್ ಜೆ. ಎಫ್. ಡಿ’ಸೋಜ್, ಮಾ|ಲಾರೆನ್ಸ್ ಗೋಮ್ಸ್, ಡೊಲ್ಫಿ ಕಾಸ್ಸಿಯಾ, ಎಲ್ಯೆರ್ ತಾಕೊಡೆ]

ಕಾರ್ಯಾಚಾ ಪಯ್ಲ್ಯಾ ವಾಂಟ್ಯಾರ್ ’ಕೊಂಕ್ಣಿ ವಾವ್ರ್’ ಚೆರ್ ಸವಿಸ್ತಾರ್ ರಿತಿನ್ ಉಲವ್ಪ್ ಚಲ್ಲೆಂ. ಫಾಮಾದ್ ಕೊಂಕ್ಣಿ ವಾವ್ರಾಡಿ ತಶೆಂಚ್ ಬರವ್ಪಿ ಉಲವ್ಪಿ ಜಾವ್ನ್ ಆಸ್ಲೆ, ಡೊಲ್ಫಿ ಕಾಸ್ಸಿಯಾ, ಗ್ಲೇಡಿಸ್ ರೇಗೊ, ಜೆರಿ ಡಿಮೆಲ್ಲೊ ಬೆಂದುರ್ ಆನಿ ವಲ್ಲಿ ಕ್ವಾಡ್ರಸ್ ಹಾಣಿಂ ಕೊಂಕ್ಣಿ ವಾವ್ರಾಚಿ ಗರ್ಜ್ ಆನಿ ಮಹತ್ವಾಚೆರ್ ಉಲಯ್ಲೆ. ಉಪ್ರಾಂತ್ ಶಿಭಿರಾರ್ಥಿಂನಿ ಎಕಾಮೆಕಾ ಸಂವಾದ್ ಚಲಯ್ಲೊ.

[ಕೊಂಕ್ಣಿ ವಾವ್ರ್: ವಲ್ಲಿ ಕ್ವಾಡ್ರಸ್, ಡೊಲ್ಫಿ ಕಾಸ್ಸಿಯಾ, ಜೆರಿ ಡಿ’ಮೆಲ್ಲೊ ಆನಿ ಗ್ಲೇಡಿಸ್ ರೇಗೊ]

ದುಸ್ರ್ಯಾ ಭಾಗಾಂತ್ ಕೊಂಕ್ಣಿ ’ಮಟ್ವ್ಯೊ ಕಾಣ್ಯೊ’ ಚೆರ್ ಫಾಮಾದ್ ಕಾಣ್ಯೆಗಾರ್ ಎಡ್ವಿನ್ ಜೆ. ಎಫ್. ಡಿ’ಸೋಜ್ ಆನಿ ಕೆವಿನ್ ಡಿ’ಮೆಲ್ಲೊ ಕಾರ್ಕಳ್ ಉಲಯ್ಲೆ. ಎಡ್ವಿನ್ ಜೆ. ಎಫ್. ಡಿ’ಸೋಜಾನ್ ಎಕಾ ಕಾಣ್ಯೆಚ್ಯಾ ತಾಂತ್ರಿಕತೆಚೆರ್, ಕಾಣಿ ಕಶಿ ಮಾಂಡುನ್ ಹಾಡ್ಚಿ, ಎಕಾ ಕಾಣ್ಯೆಂತ್ ಆಟಾಪೊನ್ ಆಸಾಜಯ್ ಜಾಲ್ಲ್ಯಾ ಸಂಗ್ತ್ಯಾಂಕ್, ಭಾಸೆಚೊ ಪ್ರಯೋಗ್, ಪಾತ್ರ್ ಚಿತ್ರಣ್, ತಶೆಂಚ್ ಸಂಪ್ಣಿ ಕರ್ಚೆವಿಶ್ಯಾಂತ್ ಸವಿಸ್ತಾರ್ ರಿತಿನ್ ಮಾಹೆತ್ ದಿಲಿ, ಅಪ್ಲಿ ’ಏಕ್ ಕೋಪ್ ಹುನೊನಿ ಕೊಫಿ’ ಕಾಣ್ಯೆಚೊ ದಾಖ್ಲೊ ದಿಲೊ.

ಕೆವಿನ್ ಡಿ’ಮೆಲ್ಲೊನ್ ಪ್ರಸ್ತುತ್ ಪರಿಗತೆಂತ್ ಸಮಾಕಾಳಿನ್ ಕಾಣ್ಯೆಗಾರಾಂಚಾ ಮೆಳಿಂತ್ ಕೊಂಕ್ಣಿ ಕಾಣ್ಯೊ ಕಿತ್ತುನ್ ಆಸಾತ್ ಮ್ಹಳ್ಳ್ಯಾಚೆರ್ ಉಲಯ್ಲೊ. ಉಪ್ರಾಂತ್ ಶಿಭಿರಾರ್ಥಿಂನಿ ಎಕಾಮೆಕಾ ಸಂವಾದ್ ಚಲಯ್ಲೊ.

ದನ್ಪಾರಾಂ ಜೆವಾಣ್ ಜಾತೆಚ್ಚ್ ವಿತೊರ್ ಕಾರ್ಕಳ್, ಅರುಣ್ ಅಜೆಕಾರ್ ಹಾಣಿಂ ಕೊಂಕ್ಣಿ ಕ್ವಿಜ್ ಮಾಂಡುನ್ ಹಾಡ್ಲೊ ಆನಿ ಶಿಭಿರಾರ್ಥಿಂಚಿ ಕೊಂಕ್ಣಿ ಜಾಣ್ವಾಯ್ ಪಾರ್ಕಿಲಾಗ್ಲೆ.

[ಮಟ್ವ್ಯೊ ಕಾಣ್ಯೊ: ಎಡ್ವಿನ್ ಜೆ. ಎಫ್. ಡಿ’ಸೋಜ್, ಕೆವಿನ್ ಡಿ’ಮೆಲ್ಲೊ]

ದನ್ಪಾರಾಂಚಾ ಭಾಗಾಂತ್ ಸಂವಾದ್ ಜಾತೆಚ್ಚ್ - ವೆದಿಚಾ ಕಾರ್ಯೆಂ ಚಲ್ಲೆಂ. ಕಾರ್ಯಾಚೆಂ ಅಧ್ಯಕ್ಶ್ ಸ್ಥಾನ್ ಕರ್ನಾಟಕ್ ಕೊಂಕ್ಣಿ ಸಾಹಿತ್ಯ್ ಅಕಾಡೆಮಿಚೊ ಅಧ್ಯಕ್ಶ್ ಬಾಬ್ ಎರಿಕ್ ಒಝೆರಿಯೊನ್ ಘೆತ್‌ಲ್ಲೆಂ. ಮುಖೆಲ್ ಸಯ್ರೆ ಜಾವ್ನ್ ಮಾ|ವಲೇರಿಯನ್ ಫೆರ್ನಾಂಡಿಸ್, ಎಡ್ವಿನ್ ಜೆ.ಎಫ್. ಡಿ’ಸೋಜ್, ಡೊಲ್ಫಿ ಕಾಸ್ಸಿಯಾ, ಗ್ಲೇಡಿಸ್ ರೇಗೊ ಆಸ್‌ಲ್ಲೆ.

ಮೆಲ್ವಿನ್ ಪೆರ್ನಾಲಾನ್ ಪಾಟ್ಲ್ಯಾ ದೋನ್ ವರ್ಸಾಂನಿ ಚಲ್‌ಲ್ಲ್ಯಾ ದಾಯ್ಜಾಚಾ ವಾವ್ರಾಚೆರ್ ಮಟ್ವೊ ವಿವರ್ ದಿಲೊ ತರ್ ಸುನಿಲ್ ಫೆರ್ನಾಂಡಿಸ್ ಕೋಟ ಹಾಣೆಂ ಮೊಕ್ಳಿಕ್ ಜಾಂವ್ಕ್ ಆಸ್ಚಾ ಪಾಂಚ್ ಬುಕಾಂಚಿ ವಳೊಕ್ ಕರ್ನ್ ದಿಲಿ.

[ಶಿಭಿರಾಂತ್ ವಾಂಟೆಲಿ ಜಾಲ್ಲಿಂ ಕಾರ್ಕಳ್ ವಾರಾಡ್ಯಾಚಿಂ]

ಉಪ್ರಾಂತ್ ಆಶಾವಾದಿ ಪ್ರಕಾಶನಾಚೆ ಪಾಂಚ್ ನವೆ ಕೊಂಕ್ಣಿ ಬೂಕ್ ಉಗ್ತಾವಣ್ ಚಲ್ಲೆ.

1. ಪಾಟಿಂ ಗಾಂವಾಕ್.

2. ಬಾಮುಣಾಂಚೆಂ ಚೆಡುಂ.

3. ದರ್ಭಾರಾಂತ್ಲಿ ಪಿಂರ್ಗೊಣ್.

4. ದರ್ಯಾಕ್ ಉದಾಕ್ (ಕವಿತಾಪಾಠ್ ಭಾಗ್-2).

5. ಸಾಗೊರಾಚ್ಯಾ ವಾಟೆಚ್ಯೊ ಝರಿ.

ಬುಕಾಂಚೆಂ ಉಗ್ತಾವಣ್ ಕಾರ್ಯೆಂ ಜಾತೆಚ್ಚ್, ಕೊಂಕ್ಣೆಂತ್ಲೊ ಪಯ್ಲೊ ಸಂಪೂರ್ಣ್ ಇ-ಬೂಕ್ ಜಾವ್ನಾಸ್ಚಾ ’ಸಾಗೊರಾಚ್ಯಾ ವಾಟೆಚ್ಯೊ ಝರಿ’ ಚೆಂ ಓನ್‌ಲಾಯ್ನ್ ಬುಕಾಚೆಂ ಉಗ್ತಾವಣ್ ಫಾಮಾದ್ ಕೊಂಕ್ಣಿ ವಾವ್ರಾಡಿ ಜೆರಿ ಡಿ’ಮೆಲ್ಲೊನ್ ಕೆಲೆಂ.

[ಉಗ್ತಾವಣ್: ವಲ್ಲಿ ಕ್ವಾಡ್ರಸ್, ಮಾ|ವಲ್ಲಿ ಫೆರ್ನಾಂಡಿಸ್, ಗ್ಲೇಡಿಸ್ ರೇಗೊ, ಎರಿಕ್ ಒಝೆರಿಯೊ, ಡೊಲ್ಫಿ ಕಾಸ್ಸಿಯಾ, ಎಡ್ವಿನ್ ಜೆ. ಎಫ್. ಡಿ’ಸೋಜ್, ಜೆರಿ ಡಿ’ಮೆಲ್ಲೊ]

ಬುಕಾಂಚೆಂ ಉಗ್ತಾವಣ್ ಜಾತೆಚ್ಚ್, ದಾಯ್ಜ್ ಸಾಹಿತಿಕ್ ಸ್ಪರ್ಧೊ 2005 ಹಾಂತುಂ ಜಿಕೊನ್ ಆಯಿಲ್ಲ್ಯಾ ಸರ್ವಾಂಕ್ ಮುಖೆಲ್ ಸಯ್ರೊ ಮಾ|ಬಾ|ರೊನಾಲ್ಡ್ ಪ್ರಕಾಶ್ ಡಿಸೋಜಾನ್ ಇನಾಮಾಂ ತಶೆಂಚ್ ದಾಯ್ಜ್ ಶಿಫಾರಸ್ ಪತ್ರ್ ದಿಲೊ;

ಮಟ್ವಿ ಕಾಣ್ಯೆಚೊ ವಿಭಾಗ್:

ಎಚ್ಚೆಮ್ (5000 ರುಪ್ಯಾಂಚೆಂ) ಪಯ್ಲೆಂ ಇನಾಮ್

ಡಾ|ಎಡ್ವರ್ಡ್ ನಜ್ರೆತ್ (3000 ರುಪ್ಯಾಂಚೆಂ) ದುಸ್ರೆಂ ಇನಾಮ್

ಕೆವಿನ್ ಡಿ’ಮೆಲ್ಲೊ ಕಾರ್ಕಳ್ (2000 ರುಪ್ಯಾಂಚೆಂ) ತಿಸ್ರೆಂ ಇನಾಮ್

ಕವಿತಾ ಬರಂವ್ಚೊ ವಿಭಾಗ್:

ಎಚ್ಚೆಮ್ (5000 ರುಪ್ಯಾಂಚೆಂ) ಪಯ್ಲೆಂ ಇನಾಮ್

ಮೆಲ್ವಿನ್ ಪಿಂಟೊ ನೀರುಡೆ (3000 ರುಪ್ಯಾಂಚೆಂ) ದುಸ್ರೆಂ ಇನಾಮ್

ವಿಲ್ಸನ್ ಕಟೀಲ್ (2000 ರುಪ್ಯಾಂಚೆಂ) ತಿಸ್ರೆಂ ಇನಾಮ್

ಲೇಖನಾಂ ಬರಂವ್ಚೊ ವಿಭಾಗ್:

ಪಯ್ಲೆಂ ಇನಾಮ್ - ರೆಗ್ರೊ ಪಾಳುಂಕ್ ನಾತ್‌ಲ್ಲ್ಯಾನ್ ರದ್ದ್ ಕೆಲಾ

ಡಾ|ಎಡ್ವರ್ಡ್ ನಜ್ರೆತ್ (3000 ರುಪ್ಯಾಂಚೆಂ) ದುಸ್ರೆಂ ಇನಾಮ್

ಸ್ಟೀವನ್ ಕ್ವಾಡ್ರಸ್ ಪೆರ್ಮುದೆ (2000 ರುಪ್ಯಾಂಚೆಂ) ತಿಸ್ರೆಂ ಇನಾಮ್

[ಶಿಭಿರಾಂತ್ ವಾಂಟೆಲಿ ಜಾಲ್ಲಿಂ ಕಾರ್ಕಳ್ ವಾರಾಡ್ಯಾಚಿಂ]

ಬುಕಾಂಚೆಂ ಉಗ್ತಾವಣ್ ಜಾತೆಚ್ಚ್ ಕಾರ್ಕಳ್ ವಾರಾಡ್ಯಾಂತ್ಲ್ಯಾ ಸರ್ವ್ ಕೊಂಕ್ಣಿ ಬರವ್ಪ್ಯಾಂಕ್ ಮುಖೆಲ್ ಸಯ್ರೊ ಮಾ|ಬಾ|ರಿಚಾರ್ಡ್ ರೇಗೊನ್ ದಾಯ್ಜ್ಶಿಫಾರಸ್ ಪತ್ರ್ ದೀವ್ನ್ ಸನ್ಮಾನ್ ಕೆಲೊ;

ಜೋರ್ಜ್ ಕ್ಯಾಸ್ತಲಿನೊ, ನಕ್ರೆ

ಕೆವಿನ್ ಡಿ’ಮೆಲ್ಲೊ, ಕಾರ್ಕಳ್

ಸ್ಟೀಫನ್ ಪಿಂಟೊ, ಕಾರ್ಕಳ್

ವಿತೊರಿ ಕಾರ್ಕಳ್

ಮೆಲ್ಕ ಮಿಯಾರ್

ಅವಿನಾ ಮಿಯಾರ್

ಸ್ಟೇನ್‌ರೊ ಅಜೆಕಾರ್

ಮಾ|ಬಾ|ರೊನಾಲ್ಡ್ ಪ್ರಕಾಶ್ ಡಿ’ಸೋಜ್

[ಉಭಿಂ ಆಸ್ಚಿಂ: ಮೆಲ್ಕ ಮಿಯಾರ್, ಅವಿನಾ ಮಿಯಾರ್, ವಿತೊರಿ ಕಾರ್ಕಳ್, ಕೆವಿನ್ ಡಿ’ಮೆಲ್ಲೊ, ಜೋರ್ಜ್ ಕ್ಯಾಸ್ತಲಿನೊ, ಮಾ|ರೊನಾಲ್ಡ್ ಡಿ’ಸೋಜ್, ಸ್ಟೀವನ್ ಪಿಂಟೊ, ಸ್ಟೇನ್‌ರೊ (ತರ್ಫೆನ್ ಪತಿಣ್ ವಿಲ್ಮಾ ತೌರೊ ಆನಿ ಧುವ್)] [ಬಸ್‌ಲ್ಲಿಂ: ಮಾ|ರಿಚಾರ್ಡ್ ರೇಗೊ, ವಲ್ಲಿ ಕ್ವಾಡ್ರಸ್, ಮಾ|ವಲ್ಲಿ ಫೆರ್ನಾಂಡಿಸ್, ಗ್ಲೇಡಿಸ್ ರೇಗೊ, ಎರಿಕ್ ಒಝೆರಿಯೊ, ಡೊಲ್ಫಿ ಕಾಸ್ಸಿಯಾ, ಎಡ್ವಿನ್ ಜೆ.ಎಫ್.ಡಿ’ಸೋಜ್, ಜೆರಿ ಡಿ’ಮೆಲ್ಲೊ]

ಹೆಚ್ಚ್ ಸಂದರ್ಭಾರ್ ಕೊಂಕ್ಣಿ ಸಮಾಜೆಕ್ ಸಾಹಿತ್ಯಾ ರುಪಾರ್ ತಶೆಂಚ್ ಹೆರ್ ಜಾಯ್ತ್ಯಾ ರಿತಿರ್ ವಾವ್ರ್ ಕರ್ಚಾ ಮಾನೆಸ್ತ್ ಜೆರಿ ಡಿ’ಮೆಲ್ಲೊಕ್, ಕರ್ನಾಟಕ್ ಕೊಂಕ್ಣಿ ಸಾಹಿತ್ಯ್ ಅಕಾಡೆಮಿಚೊ ಅಧ್ಯಕ್ಷ್ ಬಾಬ್ ಎರಿಕ್ ಒಝೆರಿಯೊನ್ ಶಾಳ್ ಪಾಂಗ್ರುನ್, ಫುಲಾಂ ಫಳಾಂ ಆನಿ ದಾಯ್ಜ್ ಶಿಫಾರಸ್ ಪತ್ರ್ ದೀವ್ನ್ ಸನ್ಮಾನ್ ಕೆಲೊ.

[ಜೆರಿ ಡಿ’ಮೆಲ್ಲೊಕ್ ಎರಿಕ್ ಒಝೇರಿಯೊ ಥಾವ್ನ್ ಸನ್ಮಾನ್]

ಮುಖೆಲ್ ಸಯ್ರೊ ಮಾ|ರಿಚಾರ್ಡ್ ರೇಗೊ (ರೆಗಾಮ್ ತಾಕೊಡೆ) ಉಲವ್ನ್, ಅಂತರ್ ಜಾಳಿಚಾ ಯುಗಾಂತ್ ಇ-ಬುಕಾರುಪಾರ್ ಕೊಂಕ್ಣಿ ಕಶಿ ಅಭಿವೃದ್ದಿ ಕರ್ಯೆತಾ ಮ್ಹಳ್ಳ್ಯಾಚೆರ್ ಉಲಯ್ಲೊ. ಅಧ್ಯಕ್ಶೀಯ್ ಭಾಶಣಾಂತ್ ಎರಿಕ್ ಬಾಬ್ - ಪರ್ಗಾಂವಾಂತ್ ಸಯ್ತ್ ಜಾಂವ್ಚಾ ಕೊಂಕ್ಣಿ ವಾವ್ರಾಚೊ ಉಲ್ಲೇಕ್ ಕರುನ್ ಹ್ಯಾ ವಾವ್ರಾಚಿ ದೇಕ್ ಆಮಿಂ ಘೆಂವ್ಕ್ ಜಾಯ್ ಆನಿ ಅಸಲೊಚ್ ವಾವ್ರ್ ಸರ್ವಾಂನಿ ಎಕ್ವಟಿತ್ ರಿತಿನ್ ಕರಿಜಾಯ್ ಮ್ಹಳ್ಳೊ ಉಲೊ ದಿಲೊ.

[ಮಯ್ನ್ಯಾಚಿ ಕವಯತ್ರಿ ಅವಿನಾ ಮಿಯಾರ್ ಹಿಕಾ ಇನಾಮ್ ದಿತಾ ಎರಿಕ್ ಒಝೇರಿಯೊ]

[ಶಿಭಿರಾಂತ್ ವಾಂಟೆಲಿ ಜಾಲ್ಲಿಂ ಕಾರ್ಕಳ್ ವಾರಾಡ್ಯಾಚಿಂ]

ವೆದಿಚೆಂ ಕಾರ್ಯೆಂ ಸಂಪ್ತಚ್, ವಲ್ಲಿ ಕ್ವಾಡ್ರಸಾಚಾ ಅಧ್ಯಕ್ಶತೆಚೆಂ ಕವಿತಾಗೋಷ್ಟಿ ’ಕವಿತಾಸೊಭಾಣ್’ ಮಾಂಡುನ್ ಹಾಡ್ಲಿ. ಹ್ಯಾ ಕವಿತಾ ಸೊಭಾಣಾಂತ್, ತರ್ನೆ ತಶೆಂ ಪರ್ನೆ ಕವಿಂನಿ ಭಾಗ್ ಘೆತ್ಲೊ, ರಿಚ್ಚಿ ಪಿರೇರ್, ಗ್ಲೇಡಿಸ್ ರೇಗೊ, ವಿಲ್ಸನ್ ಕಟೀಲ್, ವಿಲ್ಫ್ರೆಡ್ ಸುರತ್ಕಲ್, ರೊನಿ ಕ್ರಾಸ್ತಾ ಕೆಲರಾಯ್, ವಿಕ್ಟರ್ ಲೋಬೊ ಬಜಾಲ್, ವಿತೊರಿ ಕಾರ್ಕಳ್, ಜೇಮ್ಸ್ ಕರುಗಳ್‌ನಡೆ, ಸುನಿಲ್ ಫೆರ್ನಾಂಡಿಸ್ ಕೋಟ, ಜಿಯೋ ಆಗ್ರಾರ್, ಜೆರಿ ಡಿ’ಮೆಲ್ಲೊ, ಸ್ಟೀಫನ್ ಪಿಂಟೊ, ಎಲ್ಯೆರ್ ತಾಕೊಡೆ, ಮೆಲ್ವಿನ್ ಪೆರ್ನಾಲ್, ವಾಯ್ಲೆಟ್ ಜೆ. ಪಿರೇರಾ, ಅವಿನಾ ಮಿಯಾರ್, ವಲ್ಲಿ ಕ್ವಾಡ್ರಸ್ ಹಾಣಿಂ ಭಾಗ್ ಘೆತ್ಲೊ. ಅವಿನಾ ಮಿಯಾರ್ ಹಿಕಾ ಮಯ್ನ್ಯಾಚಿ ಕವಯತ್ರಿ ಮ್ಹಣ್ ವಿಂಚುನ್ ಕಾಡ್ಲೊ ಆನಿ 500 ರುಪ್ಯಾಂಚೆಂ ಇನಾಮ್ ದಿಲೆಂ.

[ವಾರಾಡ್ಯಾಭಾಯ್ರ್ ಥಾವ್ನ್ ಶಿಭಿರಾಕ್ ಆಯಿಲ್ಲಿಂ]

ವಿತೊರಿ ಕಾರ್ಕಳಾನ್ ಕಾರ್ಯೆಂ ನಿರ್ವಾಹಣ್ ಕೆಲೆಂ. ಅಜೆಕಾರ್, ಹಿರ್ಗಾನ್, ನಕ್ರೆ, ಕಣಜಾರ್, ಅತ್ತೂರ್, ಕಾರ್ಕಳ್, ಮಿಯಾರ್, ಪರಪ್ಪಾಡಿ, ನೆಲ್ಲಿಕಾರ್ ಆನಿ ಕಾರ್ಕಳ್ ಟೌನ್ ಫಿರ್ಗಜೆಚೆ ಸುಮಾರ್ ಸತ್ತರ್ ಶಿಭಿರಾರ್ಥಿಂನಿ ಭಾಗ್ ಘೆತ್ಲೊ ತರ್ ಸಾಂಜೆಚ್ಯಾ ಕಾರ್ಯಾಕ್ ಶೆಂಭೊರಾಂ ವಯ್ರ್ ಲೊಕಾಂನಿ ಭಾಗ್ ಘೆತ್ಲೊ.

ಹ್ಯಾ ಕಾರ್ಯಾಚೆ ಫೋಟೊಗ್ರಾಫರ್ ಜಾವ್ನ್ ಸ್ನೇಹ ಸ್ಟುಡಿಯೋಚೊ ರೋನಿ, ತಶೆಂಚ್ ವರ್ದಿಗಾರಾಂಚೆ ತರ್ಫೆನ್ ಸುನಿಲ್ ಫೆರ್ನಾಂಡಿಸ್ ಕೋಟ, ವಾಯ್ಲೆಟ್ ಪಿರೇರಾ ಆನಿ ಜೋಸ್ಸಿ ಪಿರೇರಾ ಹಾಜರ್ ಆಸ್‌ಲ್ಲಿಂ.

- ವರ್ದಿ: ಆಮ್ಚೊ ಭಾತ್ಮಿ

ದಾಯ್ಜ್ ದಿವಸ್ 2005

ದಾಯ್ಜ್ ಪಾನಾಕ್

About us | Feedback | Contact us
Copyright © 2005 DAAIZ.COM All rights reserved. Page concept, designed, hosted and maintained by Ashawadi Publications