ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಕಥಾಝರ್ - 46. ಮ್ಹನ್ ವ್ಹಾಳ್ತಾ ವ್ಹಾಳ್ತಾನಾ
ಮಾಯಾ ಅನಿಲ್ ಖರ್ಘಟೆ: ಕೊಂಕ್ಣೆಂತ್ ಸೃಜನಾತ್ಮಕ್ ರಿತಿಚ್ಯೊ ಮಟ್ವ್ಯೊ ಕಾಣ್ಯೊ ಬರಯ್ತೆಲಿಂ ಭೋವ್ ಉಣಿಂ ತರ್ಯೀ ತಾಂತ್ಲಿ ಎಕ್ಲಿ ಬಾಯ್ ಮಾಯಾ ಅನಿಲ್ ಖರ್ಘಟೆ ಜಾವ್ನಾಸಾ. ಶಿಕ್ಷಕಿ ಜಾವ್ನ್ ವಾವ್ರ್ ಕರ್ನ್ ಆಸ್ಚಾ ಹಿಣೆಂ ರೇಡಿಯೊ-ಟಿವಿಚೆರ್ ಕಾರ್ಯಿಂ ದಿಲ್ಯಾಂತ್. ಹಿಚ್ಯೊ ಮಟ್ವ್ಯೊ ಕಾಣ್ಯೊ ಮರಾಠಿಂತ್ ಅನುವಾದಿತ್ ಜಾವ್ನ್ ಪರ್ಗಟ್ ಜಾಲ್ಯಾತ್. ಹಿಚ್ಯಾ ಮಟ್ವ್ಯಾ ಕಾಣ್ಯಾಂಚೆ ತಶೆಚ್ ಕವಿತಾಂಚೆ ಬೂಕ್ ಪರ್ಗಟ್ ಜಾಲ್ಯಾತ್. ಹಿ ಮಟ್ವಿ ಕಾಣಿ ಉಂಚ್ಲ್ಯಾ ಮಟ್ಟಾಚಿ ಕಾಣಿ ಜಾವ್ನಾಸಾ.
ಮಾಯಾ ಖರ್ಘಟೆ
"ದೀಪೂ.... ಬಾಬ್ ರೇ......! ದೀಪೂ.....? ಯೋರೆ ಪಾಪ್ಯಾ"
"ಆಯ್ಲೊಂ ಮಾಂ, ...... ಚಲ್ ಉಮಾ, ಧಾಂವ್.....!’
"ಧಾಂವ್ ತುಂ, ....... ಯೆತಾಂ ಹಾಂವ್"
ಉಮಾನ್ ಥಂಡ್ಪಣಾನ್ ಮ್ಹಳೆಂ, ತಾಣೆಂ ಯೆತಾಂ ಮ್ಹಳ್ಳೆಂ ಖರೆಂ, ಪೂಣ್ ತೆಂ ಹಾಂತುಳ್ನಾ ವಯ್ಲೆಂ ಉಟ್ಲೆಂಚ್ ನಾ. ತಾಕಾ ಉಭ್ಗಣ್ ಆಯ್ಲಿ. ತಾಣೆ ಮನಾಂತ್ಲ್ಯಾ ಮನಾಂತ್ ಮ್ಹಳೆಂ,.... ದೀಪೂ, ಮಾಂಯ್ಚೆ ಆಶೆ ಉಲೆ ಯೆವಪ್ ಮ್ಹಳ್ಯಾರ್ ತುವೆಂಚ್ ಧಾಂವ್ಪಾಚೆಂ.... ತಿಕಾ ತುಜಿ ಗರ್ಜ್ ಆಸಾ. ಮ್ಹಜಿ ನ್ಹಂಯ್..... ಏಕ್ ಮಿನಿಟ್ ತಿ ತುಕಾ ಆನಿ ಮ್ಹಾಕಾ ಎಕ್ಟಾಂಯ್ ರಾವೊಂಕ್ ದಿಂವ್ಚಿ ನಾ..... ತಿಚಿಂ ನಾಟ್ಕಾಂ ತುಕಾ ಕಳಾನಾಂತ್..... ಹಾಂವ್ ಜಣಾಂ..... ತುಜೆ ಕಡೆಲ್ಯಾನ್ ಸಾಸ್ಪುನ್ ಘೆತ್ಲೆ ಬಗಾರ್ ತಿಕಾ ನೀದ್ಯೀ ಲಾಗ್ಚಿನಾ. ಶಿ..... ಹೆಂ ಯೆವ್ಜಪ್ ಮ್ಹಳ್ಯಾರ್ ಬೆಗಿನ್ ಮ್ಹಾಕಾ ಪಾತಾಕ್ಶೆಂ ದಿಸ್ತಾ.... ಪುಣ್ ಕಿತೆಂ ಕರುಂ..... ಮಾಂಯ್ಚಿಂ ಭಗ್ಣಾಂ ಪಳೆಲ್ಯಾರ್, ...ಶಿ...., ಶಿ... ಪುತಾನ್ ಸಾಸ್ಪಿತಾಕ್ಚ್ ತಿ ನಿದಾನಾ.... ಮಾಗಿರ್ ಹಾಂಗಾ ಯೆತಕ್ಚ್ ಪೂತ್ ಆವಯ್ಚೆ ಚಿಂತೆನ್ ತಕ್ಲಿ ಧರುನ್ ಸುಸ್ಕಾರೊನ್ ಬಸ್ತಲೊ. ...ಮಾಗಿರ್ ಆಮ್ಚಿ ರಾತ್ ಪಿಡ್ಡ್ಯಾರ್.... ಆವಯ್-ಪುತಾಚಿಂ ನಾಟ್ಕಾಂ ಪಳೆಂವ್ಕ್ ವಚೆಂ ನಾ ಮ್ಹಣ್ ಕರ್ತಾಂ ಹಾಂವ್, ಪೂಣ್.... ದೀಪುಚಿ ಕಾಕ್ಳುತ್ ದಿಸ್ತಾ. ..... ತಾಕಾ ಆವಯ್ಚೊ ಘುಟ್ ಕಳ್ತಾನಾ.... ತೊ ಬಾವ್ಡೊ ಖರ್ಯಾನ್ಚ್ ಮಾತ್ರ್ಭಕ್ತ್... ಖಂತಿನ್ಚ್ ತಳ್ಮಳ್ತಾ ಆವಯ್ ಖಾತಿರ್..... ಲಗ್ನಾಕ್ ಸ ಮಹಿನೆ ಜಾಲ್ಯಾತ್ ಆಮ್ಚಾ... ಅಜೂನ್ ಆಮಿಂ ದೊಗಾಂಯ್ ಎಕ್ಟಾಂಯ್ ಬಸ್ಲಿಂ ತರ್ ಹಿಕಾ ಕಿತೆಂ ತರ್ಯ್ ಜಾತಾ... ಖರೆಂ ಮ್ಹಣಾತ್ ಕೊಣ್ಯ್? .... ನಾಂವಾಚಿಂ ರಾತಿಚಿಂ ತಿಚಿಂ ನಾಟ್ಕಾಂ... ಹನಿಮೂನಾಕ್ ವೆತಾನಾ ಲೆಗೂನ್ ನಾಟ್ಕಾಂ.... ಖರ್ಯಾನಿಂಚ್ ಪಾಂಯ್ ನಿಸ್ರೊನ್ ಪಡ್ಲಿ, ಕಾಂಯ್ ಕಿತೆಂ ಮ್ಹಣೊನ್ ದೆವಾಕ್ ಖಬಾರ್... ಮಾಗಿರ್ ಮಾತ್ರ್ಭಕ್ತ್ ಹನಿಮೂನಾಕ್ ಕಸೊ ವೆತಲೊ? ಯಾದ್ ಲೆಗೂನ್ ಕಾಡ್ಲ್ಯಾರ್ ಸಂತಾಪ್ ಯೆತಾ... ವೆತಾಂಚ್ ಹಾಂವ್... ತೆಂ ಮಾಲ್ಕಿರ್ಯಾದ್ ಬಾಯ್ಲೆಕ್ ಹಾಂವ್ ಯೆತಗೊಚ್ಚ್ ನಸಾಯ್ ಜಾತಾ... ವೆತಾಂ ಆನಿ, ದೀಪುಕ್ ತೆಂಕುನ್ ಉಭೆಂ ರಾವ್ತಾಂ.... ಬರೀ ಫಡ್ಫಡುಂದಿ ಭಿತರ್ಲ್ಯಾ ಭಿತರ್.....
ಉಮಾ ಮನಾಂತ್ಲ್ಯಾನ್ ಫಡ್ಫಡುನ್ ಮಾಂಯ್ಚೆ ಕುಡಾಂತ್ ಗೆಲೆಂ. ಥಂಯ್ ಸದಾಂಚೆ ಪರಿ ದೀಪಕ್ ಆವಯ್ಕ್ ಸಾಸ್ಪಿತ್ ಬಶಿಲ್ಲೊ. ತಿ ತಾಚೊ ಹಾತ್ ಘಟ್ ಧರುನ್ ಪೊಶೆತಾಲಿ ಆನಿ ಸುಸ್ಕಾರೆ ಸೊಡಿತ್ ಹೆಕ್ಟೆನ್ ತೆಕ್ಟೆನ್ ತಕ್ಲಿ ಹಾಲಯ್ತಾಲಿ. ಮಧೆಂಚ್ ಮ್ಹಣ್ತಾಲಿ... ಮೊರ್ನಾ ರೆ ಹಾಂವ್... ಸೊಸುಂಕ್ ಜಾಯ್ನಾ ಮ್ಹಜ್ಯಾನ್ ಹೆ ತ್ರಾಸ್.....
".....ಕಾಂಯ್ ಜಾಯ್ನಾಂ ತುಮ್ಕಾಂ ಮಾಂ, ಹಾಂವ್ ಬಾಮ್ ಲಾಯ್ತಾಂ".
ಉಮಾಚೆಂ ಉಲವ್ಣೆಂ ಆಯ್ಕೊನ್ ಖಿಣಾ ಪಯ್ಲಿ ಪಿಂರ್ಗುಟ್ಪಿ ತಿ ಬಾಯ್ಲ್ ಸಟ್ಟ್ ಕರುನ್ ಮ್ಹಣೊಂಕ್ ಲಾಗ್ಲಿ......"ನಾಕಾ ನಾಕಾ ತುಜೊ ಹಾತ್ ಲಾಗಾನಾ, ದೀಪು ಬರೋ ಜ್ಯೊರಾನ್ ಚೆಪ್ತಾ, ಬಾಮಾ ಪರಸ್ ತಶೆಂಸ್ ಚಡ್ ಬರೆಂ ದಿಸ್ತಾ.."
ಉಮಾ ದೀಪುಕ್ ತೆಂಕೂನ್ ಉಭೆಂ ರಾವ್ಲೆಲೆಂ. ತೆಂ ಪಳವ್ನ್ ತಿಚಿ ತಕ್ಲಿ ಖಾಂದ್ಯಾನಿಚ್ ಉಸ್ಳುಪಾಕ್ ಲಾಗ್ಲಿ.
"ಆಸೊಂ ಬಾಬ್...., ಪುರೊ, ಆತಾಂ ನಿದೊಂಕ್ ಚಲಾತ್ ತುಮಿಂ, ತಕ್ಲಿ ಮಾತ್ಶಿ ಬರಿ ದಿಸ್ತಾ ಆತಾಂ."
ಪುತಾಚೊ ಹಾತ್ ಸಾಸ್ಪಿತ್ತ್ ಶಾರದೆನ್ ಮ್ಹಳೆಂ.
ತೊಚ್ಚ್ ಆವ್ಕಾಸ್ ಘೆವ್ನ್ ಉಮಾನ್ ದೀಪುಕ್ ಹಾತಾಕ್ ಧರುನ್ ಉಟಯ್ಲೊ ಆನಿ ವೊಡುನ್ ಮ್ಹಣ್ತಾತ್ ತಶೆಂ ಘೆವ್ನ್ ಗೆಲೆಂ. ಮನಾಂತ್ಲ್ಯಾನ್ ತಾಣೆಂ ಮ್ಹಳೆಂ,
"ಮಾತ್ರ್ಭಕ್ತಾ, ತುಕಾ ಆಸೊ ವೆಲೊ ನಾ ಜಾಲ್ಯಾರ್ ತುಂ ರಾತ್ಭರ್ ಆವಯ್ ಸಾಂಗಾತಾ ಬಸೊನ್ ತಿಕಾ ಸಾಸ್ಪಿತ್ ರಾವ್ತಲೊಯ್. ಹಾತ್ ಪಾಂಯ್ ಚೆಪುನ್ ರಾವ್ತಲೊಯ್. ದಾದ್ಲ್ಯಾಂಚಾ ಸಹಾವಾಸಾಕ್ ಆಶೆಲ್ಲಿ ತಿ ಬಾಯ್ಲ್, ತುಜ್ಯಾ ಸ್ಪರ್ಶ್ ಸುಖಾಂತ್ ಗುಂಗ್ ಜಾವ್ನ್ ತುಕಾ ನಿದೊಂಕ್ ವ್ಹಯ್ ಲೆಗುನ್ ಮ್ಹಣ್ಚಿನಾ."
"...... ಉಮಾ, ರಾತ್ ಖೂಬ್ ಜಾಲಿ. ಫಾಲ್ಯಾಂ ವೆಗ್ಗಿಂ ಉಟೊಂಕ್ ಜಾಯ್. ಆನಿ ನಿದುಯಾಂ ನ್ಹಂಯ್?"
ಉಮಾನ್ ವ್ಹಯ್ ಮ್ಹಣ್ಚಾ ಪಯ್ಲೆಂಚ್ ದೀಪಕ್ ಹಾಂತುಳ್ನಾರ್ ಆಡ್ವೊ ಜಾಲೊ. ಲಾಯ್ಟ್ ಪಾಲ್ವೊನ್ ಉಮಾಯ್ ಆಡ್ ಪಡ್ಲೆಂ. ಪೂಣ್ ತಾಚೆ ದೊಳೆ ತಶೆಚ್ ಉಗ್ತೆ ಆಸ್ಲೆ.
"......ಹೆಂ ಆಶೆಂಚ್ ಸದಾಂ ಜಾಲ್ಯಾರ್ ಆಮ್ಚೊ ಫುಡಾರ್ ಕಸೊ?" ಹ್ಯಾ ಪ್ರಶ್ನಾಚಾ ಭೊಂವ್ತಣಿಂ ತೆಂ ಗಿರ್ಗಿರಾತ್ ರಾವ್ಲೆಂ.
ಉಮಾ ಲಗ್ನ್ ಜಾವ್ನ್ ಯೆತಾ ಸಾಕುನ್ ಆವಯ್-ಪುತಾಚಿಂ ಹಿಂ ನಾಟ್ಕಾಂ ಪಳಯ್ತಾಲೆಂ. ವ್ಹಯ್, ತಾಕಾ ಹಿಂ ಆತಾಂ ನಾಟ್ಕಾಂ ದಿಸ್ತಾಲಿಂ ಆಪ್ಲೊ ಘೊವ್ ಕಿತ್ಲೊ ಮಾತ್ರ್ಭಕ್ತ್ ಆನಿ ಮಾಂಯ್ ತಾಚೊ ಕಸೊ ಫಾಯ್ದೊ ಘೆತಾ ಹೆಂ ತಾಕಾ ಕಳ್ಳೆಂ. ದೀಪಕಾಕ್ ಮಾಂಯ್ಚಾ ಹಾತಾಂತ್ಲ್ಯಾನ್ ಕಸೊ ಬಾಯ್ರ್ ಕಾಡೊಪ್ ಹೆಂ ತಾಕಾ ಕಳಾನಾಸ್ಲೆಂ. ನವಿ ವ್ಹಕಾಲ್ ಮ್ಹಣೊನ್ ಉಮೆದಿನ್ ರಸ್ರಸ್ಪಾಚೆ ನವೆ ದೀಸ್. ಪೂಣ್ ಭಿತರ್ಲ್ಯಾನ್ ಚಿಂತ್ನೆಚೊ ಕಿಡೊ ತಾಕಾ ಪೊಕರ್ತಾಲೊ.
ದೀಪಕಾಚಿ ಮಾಂ ಮ್ಹಳ್ಯಾರ್ ಶಾರದೆಚೆಂ ಲಗ್ನ್ ಜಾವ್ನ್, ದೀಪಕ್ ದೋನ್ ವರ್ಸಾಂಚೊ ಆಸ್ತಾನಾಂಚ್ ತಿಚೊ ಘೊವ್ ಸರ್ಲೊ. ಜಿಣ್ಯೆಂತ್ಲಿ ಉಮೆದ್ ಫುಲ್ಚೆ ಪಯ್ಲೆಂಚ್ ಬಾವ್ಡಿ ಸಗ್ಳೆಂ ಸಗ್ಳೆಂ ಭೊಗ್ಪಾಚಿ ಇಚ್ಚಾ ಜ್ಯಾರಿ ಜಾಂವ್ಚಾ ಪಯ್ಲೆಂಚ್ ಜಿಣ್ಯೆಚೊ ಸಾಥಿದಾರ್ ಉಟೊನ್ ಗೆಲೊ.
ಸುರ್ವೆಕ್ ತಾಚ್ಯಾ ಆವಯ್-ಬಾಪಾಯ್ನ್, ಭಾಂವ್ಡಾನಿ ತಾಕಾ ಎಕ್ಲೆಂ ಸೊಡ್ಲೆಂ ನಾ. ಹರ್ ಥರೆನ್ ತಾಚೆಂ ಮನ್ ಭುಜಂವ್ಚೆಂ ಯತ್ನ್ ತಾಣಿಂ ಕೆಲೆಂ. ಬಾಯ್ಲೊ ಘಾಯ್ ವಕ್ತಾನ್ ಥಾಂಬ್ಲೊ ಮ್ಹಣಾ ಕಾಳ್ಜಾಚೊ ಘಾಯ್ ತಿತ್ಲ್ಯಾ ವೆಗ್ಗಿ ಥಾಂಬಾನಾ.
ಪೂಣ್ ಶಾರದೆನ್ ದೋನ್ ವರ್ಸಾಂಚಾ ಆಪ್ಲ್ಯಾ ದೀಪುಕ್ ಪಳವ್ನ್ ಆಪ್ಲ್ಯಾ ಮನಾಕ್ ಆಪ್ಲ್ಯಾ ಬಾವನಾಂಕ್ ಆವರ್ ಘಾಲೊ. ದೀಪಕಾ ಪಾಸೊನ್ ಆಪ್ಲ್ಯಾಕ್ ಜಾಗೊಂಕ್ ಜಾಯ್ ಹೆಂ ತಾಣೆ ಆಪ್ಲ್ಯಾ ಮನಾಕ್ ಪಾಟವ್ನ್ ದಿಲೆಂ, ಆನಿ ಗಳ್ಸಣಿಲ್ಲೆ ಆವಸ್ಥೆಂತ್ಲ್ಯಾನ್ ತೆಂ ಭಾಯ್ರ್ ಸರ್ಲೆಂ. ತಾಚಿಂ ಆವಯ್-ಬಾಪಯ್ ಮಾತ್ರ್ ವೆಗ್ಳೊಚ್ ವಿಚಾರ್ ಕರ್ತಾಲಿಂ..... ಇಲ್ಲ್ಲ್ಯಾಶಾ ಪುತಾಕ್ ಘೆವ್ನ್ ಯೆದೆಂ ವ್ಹಡ್ ಜಿಣೆ ತುಂ ಕಶೆಂ ಸಾರ್ತೆಲೆಂ..... ಆಮಿಂ ಪಿಕ್ಲ್ಲಿಂ ಪಾನಾಂ. ತುಕಾ ಸಾರೊದಾರ್ ಪಾವೊಂಕ್ ಸಕಾನಾಂತ್... ತಾಚ್ಯಾ ಭಾಂವ್ಡಾಂಕ್ ತಾಂಚೊ ತಾಂಚೊ ಸಂಸಾರ್ ಆಸಾ... ತಿಂ ಮ್ಹಣೊನ್ ತಾಕಾ ಕಿತ್ಲಿಂ ಸಂಭಾಳ್ತೆಲಿಂ....... ತಾಂತೂನ್ ಪಾಂಚ್ವಿಶಿಂ ಲೆಗೂನ್ ಶಿಕೊಂಕ್ ನಾತ್ಲ್ಲೆಂ ಶಾರಾದಾ, ದಾದ್ಲ್ಯಾ ಮನ್ಶ್ಯಾಚೊ ಆದಾರ್ ನಾಸ್ತಾನಾ ಎಕ್ಲೆಂ ಕಶೆಂ ಜಾಗ್ತೆಲೆಂ. ಆಮ್ಚೆಂ ಕಿತೆಂಯ್ ಬರೆಂ ವಾಯ್ಟ್ ಜಾಂವ್ಚೆ ಪಯ್ಲೆಂ ತಾಕಾ ಎಕ್ ಖರೊ ಆದಾರ್ ದೀಂವ್ಕ್ ಜಾಯ್.... ತಾಚೊ ಪುನರ್ವಿವಾಹ್ ಕರಪ್.... ವ್ಹಯ್, ಪರತ್ ತಾಚೊ ಲಗ್ನ್ ಕರಪ್.... ತಾಣಿ ಹೊ ವಿಚಾರ್ ಹೆರ್ ಬುರ್ಗ್ಯಾಂಕ್ ಸಾಂಗ್ಲೊ. ಸಗ್ಳ್ಯಾಂಕ್ಯ್ ವಿಚಾರ್ ಪಾಟ್ಲೊ. ಪೂಣ್ ಖಾಸ್ ಶಾರದೆಕ್ ಮಾತ್ರ್ ತೊ ಮಾತ್ಯ್ ಪಾಟ್ಲೊ ನಾ. ತಾಣೆಂ ಸರಳ್ ಸಾಂಗ್ಲೆಂ,
"...... ಏಕ್ದಾಂ ಸಂಸಾರಾಚಿ ಘಡಿ ವಿಸ್ಕಟ್ಲ್ಯಾ, ಆತಾಂ ಪರತ್ ನವಿ ಘಡಿ ಘಾಲೊಪ್ ಮ್ಹಾಕಾ ಜಾಂವ್ಚೆ ನಾ. ಆನಿ ಮ್ಹಜೊ ದೀಪು.... ಮ್ಹಾಕಾ ಘೊವ್ ಮೆಳಾತ್, ತಾಕಾ ಬಾಪಯ್ ಮೆಳ್ತಲೊ? ತಾಚಿ ಆವಯ್ ಜಿತಿ ಆಸ್ತಾನಾ ತಾಕಾ ಬೆವಾರ್ಶಿ ಜಾಂವ್ಕ್ ದಿಂವ್ಚೆಂ ನಾ ಹಾಂವ್..... ಹಾಂವ್ ಎಕ್ಲೆಂ ತಾಕಾ ಸಮರ್ಥ್ಪಣಾನ್ ವಾಡೊಂವ್ಕ್ ಸಕ್ತಾಂ. ತುಮ್ಚೆಂ ಪಾಟ್ಭಳ್ ಮೆಳ್ಳ್ಯಾರ್ ಪುರೊ. ಪಯ್ಶ್ಯಾಂಚೊ ಪ್ರಶ್ನ್ ಹಾಣಿಂ ಸೊಡಯ್ಲ್ಯಾಚ್. ಆತಾಂ ವೇಳ್ ವಚ್ಪಾ ಪಾಸೊನ್ ಹಾಂವ್ ಘರಾನ್ ಬಸೊನ್ ಕಿತೆಂಯ್ ಕರಿನ್."
ಶಾರದೆಚಾ ಹ್ಯಾ ನಿರ್ಣಾಯಾಚೆರ್ ತಾಚೆ ಆವಯ್, ಬಪಯ್, ಬಾಂವ್ಡಾಂ ವೊಗಿಂ ರಾವ್ಲಿಂ.
ಶಾರದಾ ಘರಾಂತ್ಚ್ ಖುಶೇನ್ ಜಿಯೆಂವ್ಕ್ ಲಾಗ್ಲಿ. ದೀಪು ಕಡೆನ್ಯ್ ಲಕ್ಷ್ಯ್ ದೀಂವ್ಕ್ ಮೆಳ್ತಾಲೆಂ ಆನಿ ವೇಳ್ಯ್ ಪಾಶಾರ್ ಜಾತಾಲೊ. ದೀಪಕಾಕ್ ಬರೆ ಥರಾನ್ ವ್ಹಾಡವ್ಪ್, ತಾಕಾ ಬಾಪಯ್ಚೆಂ ಉಣೆಂಪಣ್ ದಾಖವ್ನ್ ದಿವಪ್ ನಾ. ಹ್ಯಾ ಎಕಾಚ್ಚ್ ವಿಚಾರಾನ್ ಶಾರದಾ ಧೃಡ್ ರಾವ್ಲೆಲ್ಯಾ ಪರಿ ಜಾಲಿ. ತಿಣೆ ಆಪ್ಲ್ಯೊ ಆವ್ಡಿ ನಿವ್ಡಿ ಇಚ್ಚಾ ಸಗ್ಳ್ಯೊ ಚಿಡ್ಡುನ್ ದವರ್ಲ್ಯೊ. ತರ್ಯ್ ಲೆಗಿನ್ ಕೆದ್ನಾಂ ಕೆದ್ನಾಂ ತಿಚಿಂ ಭಾವನಾಂ ಉಚಾಂಭಳಿತ್ ಜಾತಾಲ್ಯೊ. ಘೊವಾಚ್ಯಾ ಯಾದಿನ್ ತೆಂ ಆಕಳ್-ಪಿಕೂಳ್ ಜಾತಾಲೆಂ. ಅಸ್ಲ್ಯಾ ವೆಳಾರ್ ತೆಂ ದೀಪಕಾಕ್ ಛಾತಿಚಾ ಕಡೆನ್ ಘಟ್ಟ್ ಆಂವ್ಳುನ್ ಧರ್ತಾಲೆಂ. ಆನಿ ತಾಕಾ ಪೊಶೆವ್ನ್ ರಾವ್ತಾಲೆಂ. ತಾಚೊ ಎಕಾನ್ ಏಕ್ ಉಮೊ ಘೆತಾಲೆಂ. ಆನಿ ದೊಳ್ಯಾಂತ್ಲ್ಯಾನ್ ದೆಂವ್ಚಾ ದುಖಾನಿಂ ತಾಕಾ ಭಿಜಯ್ತಾಲೆಂ.
ದೀಪಕ್ ಜಸೊ ಜಸೊ ವ್ಹಡ್ ಜಾಂವ್ಕ್ ಲಾಗ್ಲೊ ತಶ್ಯೊ ತಾಕಾ ಆವಯ್ಚ್ಯೊ ಭಾವನಾ ಮಾತ್ಸ್ಯೊ ಮಾತ್ಸ್ಯೊ ಕಳೊಂಕ್ ಲಾಗ್ಲ್ಯೊ. ಆವಯ್ನ್ ಆಶೆಂ ತಾಕಾ ವೆಂಗೆಂತ್ ಘೆವ್ನ್ ರಡೊಂಕ್ ಲಾಗ್ತಾನಾ ತಾಣೆಂ ವಿಚಾರ್ಚೆಂ "ಮಾಂ ಪಪ್ಪಾಚೊ ಯಾದ್ ಆಯ್ಲೊ?"
ದೀಪಕ್ ವ್ಹಡ್ ಜಾತಾಲೊ ತಸೊ ತೊ ಆಪ್ಲ್ಯಾ ಇಷ್ಟಾಂ ಸಾಂಗಾತ್ಯಾಂ ಸಾಂಗಾತಾ ರಾವೊಂಕ್ ಲಾಗ್ಲೊ. ತಾಚೆಂ ವಿಶ್ವ್ ಆತಾಂ ಬದಲ್ಲೆಂ. ಮಾಂಯ್ಚೆ ಭೊಂವ್ತಣಿ ಘುಂವ್ಚೆಂ ಉಣೆಂ ಜಾಲೆಂ.
ದೀಪಕ್ ಆಪ್ಲ್ಯಾ ವಿಶ್ಯಾಂತ್ ಜಾಣಾಂ ಜಾತಾಲೊ ತಿತ್ಲೆಂ ಶಾರದೆಕ್ ಆಪ್ಲೆಂ ಎಕ್ಸುರ್ಪಣ್ ಚಡ್ ಖಾಂವ್ಕ್ ಯೇಂವ್ಕ್ ಲಾಗ್ಲೆಂ. ಹ್ಯಾ ವೆಳಾರ್ ತಿಚೆ ಮನಾಂತ್ ಚಿಡ್ಡುನ್ ದವರಿಲ್ಲ್ಯೊ ಭಾವನಾ ಪರತ್ ಪರತ್ ಉಚಾಂಭಳುನ್ ಯೆತಾಲ್ಯೊ. ಅಸಲ್ಯಾ ವೆಳಾರ್ ದೀಪಕಾಕ್ ಘಟ್ಟ್ ವೆಂಗೆಂತ್ ದರ್ಚಿ ಆಶಾ ತಾಕಾ ದಿಸ್ತಾಲಿ. ಪೂಣ್ ದೀಸ್ಭರ್ ದೀಪಕ್ ತಸೊ ಘರಾಂತ್ ಸಾರ್ಕೊ ಉರಾನಾತ್ಲ್ಲೊ. ರಾತ್ಚೊ ತೊ ಬನಿಯಾನ್ ಘಾಲುನ್, ಟಿ.ವಿ. ಮುಖಾರ್ ಬಸ್ಲೊ ಜಾಲ್ಯಾರ್ ಶಾರದಾ ತಾಚ್ಯಾ ಲಾಗಿಂ ಬಸ್ತಾಲಿ. ತಾಕಾ ವಿಚಿತ್ರ್ ಥರಾನ್ ಪೊಶೆತಾಲಿ. ದೀಪಕಾನ್ ಏಕ್ ದೀಸ್ ತಿಕಾ ವಿಚಾರ್ಲೆಂ,
"....... ಮಾಂ, ತುಂ ಆಶಿ ಕಿತೆಂ ಸಾಸ್ಪಿತಾ, ಹಾಂವ್ ಆತಾಂ ಲ್ಹಾನ್ ನಾ."
"....... ವ್ಹಡ್ ಜಾಲಾ ಜಾಯ್ತ್ ತುಂ, ಪೂಣ್ ಮ್ಹಾಕಾ ಲ್ಹಾನ್ಚ್. ದೀಸ್ಭರ್ ಖಂಯ್ ಮೆಳ್ತಾ ತುಂ ಮಾಕಾ?. ಎಕ್ಲೆಂಚ್ ಆಸ್ತಾಂ ಹಾಂವ್ ಘರಾಂತ್. ಆತಾಂ ಮಾತ್ಶೆಂ ತುಜ್ಯೆ ಸರ್ಶಿಂನ್ ಬಸೊನ್ ತುಕಾ ಪೊಶೆಲೊ ಕಾಂಯ್ ಜಿವಾಕ್ ಸುಶೆಗ್ ಜಾತಾ ಮ್ಹಜ್ಯಾ."
ದೀಪಕಾಕ್ ಆವಯ್ನ್ ವಿಚಿತ್ರ್ ಥರಾನ್ ಪೊಶೆಂವ್ಚೆ, ತೆನ್ನಾಂಚಿ ತಿಚಿ ವಿಚಿತ್ರ್ ರೀತ್ ಮಾತ್ಯ್ ತಾಕಾ ಆವಡ್ನಾಸ್ಲಿ. ಪೂಣ್ ಆವಯ್ಚಿ ಆಪ್ಣಾವೆಲಿ ಮಾಯಾ ತಾಕಾ ಖಬರ್ ಆಸ್ಲಿ. ತಿಕಾ ದುಖಂವ್ ನಾಯೆ ಮ್ಹಣೊನ್ ತೊ ವೊಗ್ಗಿಂ ರಾವ್ತಾಲೊ. ರಾತ್ಚೊ ತೊ ಶಾರದೆಚಾ ಕುಡಾಂತ್ಚ್ ನಿದ್ತಾಲೊ. ತಾಕಾ ಆಸೊ ಪೊಶೆಲೊ ಕಾಂಯ್ ತಿಚೆಂ ಉಚಾಂಭಳಿತ್ ಜಾಲ್ಲೆಂ ಮನ್ ಶಾಂತ್ ಜಾತಾಲೆಂ. ಶಾರದೆಕ್ ಆತಾಂ ತೊ ಸಾಂಗಾತಿ ಕಸೊ ಲಾಗಿಲ್ಲೊ.
ತಿಚ್ಯಾ ಎಕಾ ಮನಾಕ್ ಆಪುಣ್ ಹೆಂ ಕಿತೆಂ ಕರ್ತಾಂ ಅಸೊ ಪ್ರಸ್ನ್ ಉಟ್ತಾಲೊ. ಪೂಣ್ ದುಸ್ರೆಂ ಮನ್ ತಾಚ್ಯೆರ್ ದೆಂಖ್ಣ್ಯೊ ಘಾಲ್ತಾಲೆಂ ".......ತೊ ಮ್ಹಜೊ ಪೂತ್, ಆವಯ್ನ್ ಪುತಾಕ್ ಪೊಶೆಲ್ಯಾರ್ ಕಿತೆಂ ಜಾತಾ?......"
ಏಕ್ ದೀಸ್ ಶಾರದೆಚಿ ಭಯ್ಣ್ ಬೀನಾ ತಾಂಗೆರ್ ರಾವೊಂಕ್ ಆಯ್ಲಿ. ತಿಕಾ ಶಾರದೆಚಿ ಚಾಲ್ ವಿಚಿತ್ರ್ ದಿಸ್ಲಿ. ಚಡ್ ಕರುನ್ ದೀಪಕಾಕ್ ಪೊಶೆತಾನಾ ತಿಚ್ಯಾ ದೊಳ್ಯಾಂತ್ ಯೆವ್ಪಿ ಉನ್ಮಾದಾಚಿ ಜಾಂಕ್ ಪಳೆವ್ನ್ ಭಯ್ಣ್ ಭಿಯೆಲಿ. ತಿಣೆಂ ದುಸ್ರ್ಯಾಚ್ ದೀಸ್ ದೀಪಕ್ ಭಾಯ್ರ್ ಸರೊನ್ ವೆತಾಚ್ ಶಾರದೆಕ್ ತಿಚೆ ವಾಗಣುಕೆ ವಿಶಿಂ ವಿಚಾರ್ಲೆಂ. ಶಾರದನ್ ಗುಳ್ಮುಳೀತ್ಶಿ ಜಾಪ್ ದಿಲಿ.
"....... ಮ್ಹಜೊ ಎಕ್ಲೊಚ್ ಆಪುರ್ಬಾಯೆಚೊ ಬಾಬ್ ತೊ. ತಾಚಿ ಆಪುರ್ಬಾಯ್ ಕೆಲಿ ಮ್ಹಣ್ ಕಿತೆಂ ಜಾಲೆಂ, ಭುರ್ಗೊ ಕೆದೋಯ್ ವ್ಹಡ್ ಜಾಲೊ ಮ್ಹಣೊನ್, ಆವಯ್ಕ್ ಲ್ಹಾನ್ಚ್ ನ್ಹಂಯ್?
ತಾಚೆ ಜಾಪಿನ್ ಭಯ್ಣಿಚೆಂ ಸಮಾಧಾನ್ ಜಾಲೆಂನಾ. ತಿಣೆ ತಾಕಾ ಮ್ಹಳೆಂ,
"....... ಹೆಚ್ಚ್ ಖಾತಿರ್ ತುಕಾ ಆಮಿಂ ದುಸ್ರೆಂ ಲಗ್ನ್ ಜಾ ಮ್ಹಣಿಲ್ಲೆಂ. ತೆನ್ನಾ ತುಜಿ ಪಿರಾಯ್ ಚಡ್ ನಾಶಿಲ್ಲಿ ಬಾಯ್. ಮನಾಚ್ಯೊ ಭಾವನಾ ತು ಚಿಡ್ಡಿಶಿ, ಕುಡಿಚ್ಯೊ ಭಾವನಾ ತುಂ ಕಿತ್ಲೊ ವೇಳ್ ಚಿಡ್ಡುನ್ ದವರ್ತೆಲೆಂ? ಆತಾಂ ತುಜೊ ಪೂತ್ ವ್ಹಡ್ ಜಾತಾ. ತುಕಾ ಸಾಂಬಾಳುನ್ ರಾವೊಂಕ್ ಜಾಯ್. ಆನಿ ಏಕ್, ದೀಪು ಆತಾಂ ವ್ಹಡ್ ಜಾಲೊ. ರಾತ್ಚೊ ತೊ ಇಸ್ಕೊಲಾಚಾ ಅಭ್ಯಾಸಾಕ್ ಬಸ್ತಾ. ಆಜೂನ್ಯ್ ತುಂ ತಾಕಾ ತುಜ್ಯಾ ಕುಡಾಂತ್ ನಿದಾಯ್ತಾಯ್? ಮ್ಹಣೊನ್ ಘಡ್ಯೆ ತುಜೆಂ ಮನ್ ಆಶೆಂ ಚಂಚಲ್ ಜಾತಾ ಜಾವ್ಯೆತ್. ಅಭ್ಯಾಸಾಚೆ ನಿಮೆತ್ತ್ ಧರುನ್ ತಾಕಾ ದುಸ್ರೆ ಕುಡಾಂತ್ ನಿದೊಂಕ್ ಲಾಯ್."
ಆಶೆಂ ಜಾಯ್ತೆಂ ಸಾಂಗೊನ್ ಭಯ್ಣ್ ಗೆಲಿ. ಶಾರದೆಕ್ ಭಯ್ಣಿಚಿ ಸಾಂಗ್ಣಿ ಮಾತ್ಶಿಶಿ ಪಾಟ್ಲಿ. ಆಪ್ಲಿ ಚೂಕ್ಯ್ ಕಳ್ಳಿ. ಪೂಣ್ ಮನ್ ವಳ್ಕೊಂಕ್ ತಯಾರ್ ನಾಸ್ಲೆಂ. .....ಪೂಣ್ ತೊ ಮ್ಹಜೊ, ....ತಾಕಾ ಮಾತ್ಸೊ ಪೊಶೆಲೊ ಮ್ಹಣ್ ಕಿತೆಂ ಜಾಲೆಂ..... ಪೂಣ್.....ನಾ.... ಹಾಂವ್ ತಾಕಾ ಮೊಗಾನ್ ಪೊಶೆತಾಂ... ಕಾಂಯ್.... ಕಾಂಯ್..... ಹೆಂ ಆಶೆಂ ಕಶೆಂ ಜಾಯ್ತ್.... ತಾಕಾ ಪೊಶೆತ್ಕೀರ್ ಹಾಂವ್ ಕಾಳ್ಜಾಂತ್ಲ್ಯಾನ್ ಸುಖವ್ತಾಂ.... ತಾಕಾ ಪೊಶೆತಾ ತಿತ್ಲೊ ಆನಿ ಪೊಶೆನ್ ದಿಸ್ತಾ.... ಘಟ್ಟ್ ಛಾತಿಯೆ ಕಡೆನ್ ಆಂವ್ಳುನ್ ದಿಸ್ತಾ.... ಆಶೆಂಚ್ ಮೂ? ಕಾಂಯ್ ಬೀನಾ ಸಾಂಗ್ತಾ ತಶೆಂ... ಕುಡಿಚಿ ಭುಕ್... ಶಿ... ಶಿ... ಕಸ್ಲೆ ವಿಚಾರ್ ಯೆತಾತ್ ಹೆ.... ಕಿತೆಂ ಉಲವ್ನ್ ಗೆಲೆಂ ಬೀನಾ..... ಪೂಣ್ ಮ್ಹಾಕಾ ಹೆಂ ಜಾತಾ ತೆಂ... ಬೀನಾಚೆಂ ಮ್ಹಣ್ಣೆಂ ತಶೆಂ ಸಾಮ್ಕೆಂಚ್..... ನಾ... ನಾ.... ತಶೆಂ ನ್ಹಯ್..... ನ್ಹಯ್ಚ್.... ತೊ ಮ್ಹಜೊ ಆಪುರ್ಬಾಯೆಚೊ ಪೂತ್..... ಪೂಣ್..... ನಾ.... ನಾ......
ಆಸ್ಲ್ಯಾ ಅರ್ತ್ಯಾ-ಪರ್ತ್ಯಾ ವಿಚಾರಾಂನಿ ಶಾರದಾ ಬೆಜಾರುನ್ ಗೆಲಿ. ಆಪ್ಲ್ಯಾ ಎಕಾ ಮನಾಚಿ ಆವ್ಟಿಕಾಯ್ ತಿಕಾ ಕಳ್ಳಿ. ಪೂಣ್ ದುಸ್ರೆಂ ಮನ್ ತಿ ಮಾನುನ್ ಘೆಂವ್ಕ್ ತಿ ತಯಾರ್ ನಾಸ್ಲಿ.
ತಿಣೆ ತಾಚ್ಯಾ ಅಭ್ಯಾಸಚೆಂ ನಿಮಿತ್ತ್ ಕರುನ್ ದೀಪಕಾಕ್ ದುಸ್ರೆ ಕುಡಾಂತ್ ನಿದ್ಪಾಕ್ ಲಾಯ್ಲೊ. ಪೂಣ್ ತಿಕಾ ಮನಾಂತ್ ಪಾಸೊನ್ ದಿಸ್ತಾಲೆಂ, ...... ದೀಪಕಾನ್ ದುಸ್ರೆ ಕುಡಾಂತ್ ನಿದೊಂಕ್ ತಯಾರ್ ಜಾಯ್ನಾಯೆ, ... ತುಂ ಎಕ್ಲಿ ಜಾತೆಲಿ ಆಶೆಂ ಮ್ಹಣೊನ್ ಆಪ್ಲ್ಯಾಚ್ ಬಗ್ಲೆಕ್ ನಿದ್ಚೊ. ಪೂಣ್ ದೀಪಕ್ ರೊಕ್ಡೊಚ್ ತಯಾರ್ ಜಾಲೊ. ತಾಕಾ ತಿಚಾ ಕರ್ನ್ಯಾಂಚೊ ಬೆಜಾರ್ ಯೆತಾಲೊ. ಪೂಣ್ ಆವಯ್ಕ್ ದುಖೊಂಕ್ ನಾಯೆ, ತಿಕಾ ಆಯಿಲ್ಲೊ ಮಾಯೆಚೊ ಉಮಾಳೊ. ವ್ಹಯ್, ತಾಕಾ ದಿಸ್ತಾಲೆಂ ಆವಯ್ಕ್ ಆಪ್ಲೆವೆಲೆ ಮಾಯೆಚೊ ಉಮಾಳೊ ಆಯ್ಲಾ, ತಿಕಾ ದುಖಂವ್ ನಾಯೆ ಮ್ಹಣೊನ್ ತೊ ಸಗ್ಳೆಂ ಸೊಸ್ತಾಲೊ. ಪೂಣ್ ಆವಯ್ನ್ ದುಸ್ರೆ ಕುಡಾಂತ್ ನೀದ್ ಮ್ಹಳ್ಳೆ ಬರಾಬರ್ ಉಮೆದಿನ್ ತಯಾರ್ ಜಾಲೊ. ರೊಕ್ಡೊಚ್ ತಾಣೆಂ ಆಪ್ಲೆಂ ಸಗ್ಳೆಂ ಸಾಮಾನ್ ತ್ಯೆ ಕುಡಾಂತ್ ವೆಲೆಂ.
ಶಾರದಾ ಆತಾಂ ಬಾರಿಚ್ ಅಸ್ವಸ್ಥ್ ಜಾಲಿ. ತಿಕಾ ರಾತ್ ರಾತ್ ಭರ್ ನೀದ್ ಯೇನಾಸ್ಲಿ. ಭಯ್ಣಿಚಿ ಸಾಂಗ್ಣಿ ಲಕ್ಷಾಂತ್ ದವರುನ್ ತಿಣೆಂ ದೀಪಕಾಕ್ ಪೊಶೆವ್ಪಾಚೆಂ ಬಂದ್ ಕೆಲೆಂ. ಪೂಣ್ ತಿಚೆಂ ಮನ್ ತಾಡ್ವೊಡ್ತಾಲೆಂ. ಅಸಲ್ಯಾ ವೆಳಾರ್ ಧಾಂವೊನ್ ವಚೊನ್ ದೀಪಕಾಕ್ ಘಟ್ಟ್ ವೆಂಗೆಂತ್ ಘೆಂವ್ಚಿ ಆಶಾ ತಿಕಾ ಖರ್ಯಾಪಣಾನ್ ಯೆತಾಲಿ. ತ್ಯೆ ಶಿವಾಯ್ ತಿ ತಾಚ್ಯಾ ಬಗ್ಲೆನ್ ವೆತಾಲಿ. ಪೂಣ್ ತಿಚೆಂ ದುಸ್ರೆಂ ಮನ್ ತಿಕಾ ಆಡಾಯ್ತಾಲೆಂ. ಪರತ್ ತಿಚ್ಯಾ ಕುಡಾಂತ್ ವ್ಹರ್ತಾಲೆಂ. ಮನಾಚ್ಯಾ ಆನಿ ಕುಡಿಚ್ಯಾ ಹ್ಯಾ ಸಂಘರ್ಶಾಂತ್ ಶಾರದಾ ಥಕೊನ್ ಗೆಲಿ. ತಿಚಿ ಆವ್ಟಿಕಾಯ್ ಬರಿ ನಾಶಿಲ್ಲ್ಯಾ ಮನ್ಶಾ ಪರಿ ಜಾಲಿ. ತಿಕಾ ಭಿತರ್ಲ್ಯಾನ್ ಗಳ್ಸಣಿಲ್ಲೆ ಪರಿಂ ದಿಸ್ತಾಲೆಂ.
ಹೆಚ್ ಆವಸ್ಥೆಂತ್ ತಿಕಾ ತಾಪ್ ಯೇಂವ್ಕ್ ಲಾಗ್ಲೊ. ದೀಪಕ್ ತಿಚಿ ಮಾಯೆನ್ ಸೆವಾ ಕರುಂಕ್ ಲಾಗ್ಲೊ. ಪಯ್ಲೆ ಚಾರ್ ದೀರ್ ಕಾಲೇಜ್ ಚುಕವ್ನ್ ತೊ ಘರಾ ರಾವ್ಲೊ. ಮಾಗಿರ್ ಕಾಲೇಜಿಂತ್ಲ್ಯಾನ್ ಆಯ್ಲೊ ಕಾಂಯ್ ಆವಯ್ಚೆ ಭಂವ್ತಣಿ ರಾವ್ತಾಲೊ. ತಿಕಾ ಕಿತೆಂ ಜಾಯ್ ನಾಕಾ ಪಳೆತಾಲೊ. ತಿಚೆ ಪಾಂಯ್ ಚೆಪಪ್, ಕಪಾಲ್ ಚೆಪಪ್, ಜಾಯ್ ಜಾಲ್ಯಾರ್ ಬಾಮ್ ಲಾವಪ್, ಆಶಿಂ ಸಗ್ಳಿಂ ಕಾಮಾಂ ತೊ ಮಾಯೆನ್ ಕರ್ತಾಲೊ. ತಿಕಾ ನೀದ್ ಯೆತಾಸರ್ ತಿಚೆ ಬಗ್ಲೆನ್ ಬಸ್ತಾಲೊ.
ಶಾರದಾ ಹಾತ್ರುನಾರ್ ಮಯ್ನೊಭರ್ ಉರ್ಲಿ. ತಿಚೊ ತಾಪ್ ಆಟ್ ದಿಸಾನಿಂಚ್ ಗೆಲ್ಲೊ. ಪೂಣ್ ಶಾರದಾ ಹಾತ್ರುಣಾ ಸೊಡ್ ನಾಸ್ಲಿ. ದೀಪಕಾ ಕಡ್ಲ್ಯಾನ್ ಸೆವಾ ಕರುನ್ ಘೆತಾಚ್ ತಿ ಸುಖಿ ಜಾತಾಲಿ. ಭಯ್ಣ್ ಯೇವ್ನ್ ಗೆಲ್ಯಾ ಉಪ್ರಾಂತ್ ಆಪ್ಣೆ ಕೆಲ್ಲೊ ನಿಚೆವ್ ತಿಣೆ ತಾಪಾಚಾ ನಿಬಾನ್ ಪಯ್ಸ್ ದವರ್ಲೊ.
ಆಪ್ಲ್ಯಾಕ್ ಬರೆಂ ನಾ ಜಾಲ್ಯಾರ್ ದೀಪಕ್ ಕಿತ್ಲೊ ಕಳ್ವಳ್ತಾ ಆನಿ ಆಪ್ಲಿ ಕಶಿ ಸೆವಾ ಕರ್ತಾ ಹೆಂ ತಿಕಾ ಆತಾಂ ಕಳ್ಳೆಂ. ಆತಾಂ ತಿ ದೋನ್ ದೋನ್ ದಿಸಾಂನಿ ಬರಿ ನಾ ಜಾತಾಲಿ. ಕೆನ್ನಾ ಕೆನ್ನಾ ತಿ ಹಾತ್ ಪಾಂಯ್ ವೊಳೊನ್ ಯೆತಾತ್ ಮ್ಹಣ್ತಾಲಿ. ಕೆನ್ನಾ ಕೆನ್ನಾ ಪಾಟ್ ಭರುನ್ ಯೆತಾ ಮ್ಹಣ್ತಾಲಿ. ಹೆಂಚ್ ನಿಮಿತ್ತ್ ಕರುನ್ ತಿ ರಾತ್ಚೆಂ ನಿದ್ಚಾ ವೆಳಾರ್ ದೀಪಕಾ ಕಡ್ಲ್ಯಾನ್ ಹಾತಾ, ಪಾಂಯಾಂಕ್, ಪಾಟಿಕ್ ಬಾಮ್ ಲಾವ್ನ್ ಘೆತಾಲಿ, ಚೆಪುಂಕ್ ಲಾಯ್ತಾಲಿ. ಆತಾಂ ಹಾತುಂಚ್ ತಿ ಸುಖಾವ್ಕ್ ಲಾಗ್ಲಿ. ತಿಚ್ಯಾ ಕಾಳ್ಜಾಚೆ ತಳ್ಮಳೆ ಥಂಡ್ ಜಾಂವ್ಕ್ ಲಾಗ್ಲೆ. ಏಕ್ ದೀಸ್ ಜರೀ ತೊ ಖಂಯ್ ಗೆಲೊ ಕಿತೆಂಯ್ ಅಡ್ಚಣೊ ಯೇವ್ನ್ ತೊ ಆಯ್ಲೊ ನಾ ಜಾಲ್ಯಾರ್ ತಿಕಾ ರಾತ್ಭರ್ ನೀದ್ ಲಾಗಾನಾಸ್ಲಿ. ಚಡ್ ಕರುನ್ ತಾಚ್ಯಾ ಪರೀಕ್ಷೆಚಾ ದಿಸಾನಿಂ ತಾಕಾ ಆಪ್ಲೆ ಸೆವೆಕ್ ಆಪಂವ್ಕ್ ತಿಕಾ ಬರೆಂ ದಿಸಾ ನಾಸ್ಲೆಂ. ಪೂಣ್ ತಿಚಿ ಕೂಡ್, ಮನ್ ಹೆಂ ಮಾಂದುಕ್ ತಯಾರ್ ಜಾಯ್ನಾಸ್ಲೆಂ. ತಾಕಾ ದೀಪಕಾಚೊ ಸ್ಪರ್ಶ್ ಜಾಯ್ ಜಾಯ್ಚೊ ದಿಸ್ತಾಲೊ. ಅಸಲ್ಯಾ ವೆಳಾರ್ ಶಾರದಾ ಸಾಮ್ಕಿ ಅಸ್ವಸ್ಥ್ ಜಾತಾಲಿ, ಪಿಸಾಂತುರ್ ಕಶಿ ಜಾತಾಲಿ.
ದೀಪಕಾಕ್ ಆವಯ್ಚೊ ಖರೊ ವ್ಹೇತ್ ಖಬಾರ್ ನಾಸ್ಲೊ. ತೊ ಭಕ್ತೆನ್, ಮಾಯೆನ್ ಆವಯ್ಕ್ ಸಾಂಬಾಳ್ತಾಲೊ. ಆವಯ್ ಮ್ಹಳ್ಯಾರ್ ತಾಕಾ ಸಾಮ್ಕಿ ಜೀವ್ ಕಶಿ ಆಸ್ಲಿ. ತಿಕಾ ಕಸ್ಲೊಚ್ ತ್ರಾಸ್ ಜಾಯ್ನಾಯೆ ಮ್ಹಣೊನ್ ತೊ ಜಪ್ತಾಲೊ.
ದೀಪಕಾಕ್ ಸೈರಿಕೊ ಯೇಂವ್ಕ್ ಲಾಗ್ಲ್ಯೊ. ತಶಿ ತಿಚ್ಯಾ ಎಕಾ ಮನಾಕ್ ಖುಶಿ ಜಾಲಿ. ದುಸ್ರೆಂ ಮನ್ ಮಾತ್ರ್ ಆಕ್ರೋಶ್ ಕರುನ್ ಉಟ್ಲೆಂ. ಲಗ್ನ್ ಜಾತಚ್ ತೊ ಮ್ಹಜ್ಯಾ ಲಾಗಿಂ ಯೆಂವ್ಚೊ ನಾ..... ಮ್ಹಾಕಾ ಪೊಶೆಂವ್ಚೊ ನಾ, .... ಬಾಮ್ ಲಾಂವ್ಚಾ ನಿಮತಾನ್...... ನಾ.... ನಾ..... ಹಾವೆಂ ಆಶೆಂ ಚಿಂತ್ಚೆಂ ನ್ಹಯ್.... ತಾಚೆಂ ಲಗ್ನ್ ಜಾಂವ್ಕ್ ಜಾಯ್.... ತಾಚೊ ಸಂಸಾರ್ ಫುಲೊಂಕ್ ಜಾಯ್..... ಪೂಣ್..... ಪೂಣ್.... ತೊ ಬಾಯ್ಲೆಕ್..... ವ್ಹಯ್,......ಸಗ್ಳೆಂ , ಸಗ್ಳೆಂ ದಿತಲೊ..... ಆನಿ ಹಾಂವ್..... ಮ್ಹಾಕಾ ಸ್ಪರ್ಶಾಚೆಂ ಸುಖ್ಯ್ ಮೆಳ್ಚೆಂ ನಾ..... ಶಿ.... ಶಿ..... ಕಸ್ಲೆ ವಿಚಾರ್ ಯೆತಾತ್ ಮ್ಹಜ್ಯಾ ಮನಾಂತ್.... ಹಾಂವ್ ಆವಯ್ ತಾಚಿ..... ಪೂಣ್ ತಾಚ್ಯಾ ಹಾತಾಚ್ಯಾ ಸ್ಪರ್ಶಾನ್ ಮ್ಹಜ್ಯಾ ಜಿವಾಕ್ ಪೆಟ್ಲ್ಲೊ ಉಜೊ ಥಂಡ್ ಜಾತಾ.... ಮ್ಹಾಕಾ ಸುಖ್.... ಶಿ.... ಶಿ.... ಹೆ ನಾಕಾ ಆಸ್ಲೆ ವಿಚಾರ್..... ಕೋಣ್ ಮುಕ್ತಿ ದೀತ್ ಮ್ಹಕಾ ಹಾತುಂತ್ಲ್ಯಾನ್?.....
ದೀಪಕಾಚೆಂ ಲಗ್ನ್ ಜಾಲೆಂ. ಪಯ್ಲೆ ರಾತಿಕ್ಚ್ ಶಾರದಾ ಬರಿ ನಾ ಜಾಲಿ. ತಿಚಿ ಛಾತಿ ಚಡ್ಚಡ್ತಾಲಿ, ಕಾನಾಂತ್ಲ್ಯಾನ್ ಉಜೊ ಸುರಿಲ್ಲೆ ಬಾಶೆನ್ ದಿಸ್ತಾಲೆಂ ಸಗ್ಳೆಂ ಆಂಗ್ ಥರ್ಥರ್ತಾಲೆಂ. ತಿಣೆ ವ್ಹಡಾ ವ್ಹಡಾನ್ ಕಿಂಕ್ರಾಟ್ಯೊ ಮಾರ್ಲ್ಯೊ. ಘರಾಂತ್ ಸಗ್ಳಿಂ ಜಾಗ್ ಆಸ್ಲಿಂ. ತರ್ಯ್ ತಿಚ್ಯಾ ಕಿಂಕ್ರಾಟ್ಯಾನಿ ದೀಪಕ್ ಧಾಂವೊನ್ ಆಯ್ಲೊ. ತಾಣೆ ಬಾಮ್ ಘೆವ್ನ್ ತಿಚ್ಯಾ ಆಂಗಾಕ್ ಲಾಯ್ಲೊ. ತಿಚೆ ಪಾಂಯ್ ಚೆಪ್ಲೆ. ವ್ಹಳೂ ವ್ಹಳೂ ಶಾರದಾ ಥಂಡ್ ಜಾಲಿ. ಪುತಾಚೊ ಹಾತ್ ಸಾಸ್ಪಿತ್ ಸಾಸ್ಪಿತ್ ತಿ ನಿದ್ಲಿ.
ಆತಾಂ ತಿಕಾ ಆಶೆ ಜಟ್ಕೆ ಯೇಂವ್ಕ್ ಲಾಗ್ಲೆ. ದೀಪಕಾನ್ ತಿಕಾ ದೊತೊರಾಕ್ ವ್ಹರುನ್ ದಾಖಯ್ಲಿ. ತಿಣೆಂ ಮನಾಂತ್ಲ್ಯಾನ್ ಮ್ಹಳೆಂ,... ಮ್ಹಾಕಾ ದೊತೊರ್ ಕಿತೆಂ ವಕಾತ್ ದಿತಲೊ .... ಮ್ಹಜೆಂ ವಕಾತ್ ಮ್ಹಾಕಾಚ್ ಖಬಾರ್ ಆಸಾ.....
ಉಮಾ ಲಗ್ನ್ ಜಾವ್ನ್ ಆಯ್ಲೆಂ ತೆನ್ನಾ ಪಯ್ಲಿಂ ಪಯ್ಲಿಂ ತಾಕಾ ಮಾಂಯ್ ಖರ್ಯಾನಿಂಚ್ ಬರಿ ನಾ ತಶಿ ದಿಸ್ತಾಲಿ. ತೆಂಯ್ ಘೊವಾ ಬಾರೊಬರ್ ಧಾಂವೊನ್ ಯೆತಾಲೆಂ. ಆಪುಣ್ಯ್ ತಿಚೆ ಪಾಂಯ್ ಚೆಪ್ತಾಲೆಂ. ಪೂಣ್ ಉಮಾ ಆಯ್ಲೆಂ ಕಾಂಯ್ ಶಾರದಾ ವಾಜೆತಾಲಿ. ’ತುಜ್ಯೆ ಹಾತ್ ಲಾಗಾಚ್ ನಾಂತ್. ದೀಪುಚ್ ಚೆಪುನಿ ಪಾಂಯ್....." ಆಶೆಂ ಮ್ಹಣೊನ್ ತಾಕಾ ಉಟಯ್ತಾಲಿ.
ಮಾಗಿರ್ ಮಾಗಿರ್ ಉಮಾಕ್ ಮಾಂಯ್ಚಿಂ ನಾಟ್ಕಾಂ ಕಳ್ಳಿಂ. ಆಪ್ಲ್ಯಾ ಘೊವಾಚ್ಯಾ ಮಾತ್ರ್ಭಕ್ತ್ಪಣಾಚೊ ಮಾಂಯ್ ಕಸೊ ಫಾಯ್ದೊ ಘೆತಾ ತೆಂ ಪಳೆವ್ನ್ ತಾಕಾ ತಿಡಕ್ ಯೆತಾಲಿ. ತೆಂ ಫಕತ್ತ್ ಮನಾಂತ್ಲ್ಯಾ ಮನಾಂತ್ ಫಡ್ಫಡ್ತಾಲೆಂ.... ಕೊಣಾಕ್ ಸಾಂಗೊಂ ಹಾಂವ್ ಹಿ ಗಜಾಲ್.... ಕೊಣ್ ಖರೆಂ ಮ್ಹಣ್ತಲೊ..... ಮ್ಹಾಕಾಯ್ ಪಿಶ್ಯಾರ್ ಕಾಡ್ತೆಲಿ..... ಮಾಂಯ್ ಮ್ಹಾಕಾ ದೊಳ್ಯಾಂ ಮುಖಾರ್ ನಾಕಾ ಮ್ಹಣೊನ್ ಹಾಂವ್ ಆಶೆಂ ಉಲಯ್ತಾಂ ಮ್ಹಣ್ತೆಲಿಂ.... ಲಜ್ ನಾಶಿಲ್ಲಿ ಬಾಯ್ಲ್ ಹಿ... ತರ್ಯ್ ಬರೆಂ ಹಾಚ್ಯೆ ಮುಖಾರ್ ಗೆಲಿ ನಾ.... ಶಿ.... ಶಿ..... ಆಶೆಂ ಚಿಂತ್ಚೆಂ ಮ್ಹಳ್ಯಾರ್ ಪಾತಕ್ಶೆಂ...... ಪೂಣ್..... ಪೂಣ್ ಹಾತುಂತ್ಲ್ಯಾನ್ ಭಾಯ್ರ್ ಸರ್ಪಾಚೊ ಮಾರ್ಗ್ ಕಿತೆಂ..... ಕೊಣಾಕ್ ತರ್ಯ್ ವಿಚಾರುಂ.....
ನವೆ ವ್ಹಕ್ಲೆನ್ ಫುಲ್ಪಾಚೆಂ, ರಸ್ರಸ್ಪಾಚೆಂ ಸೊಡುನ್ ಉಮಾ ಆಸಲ್ಯಾ ಆರ್ತ್ಯಾ ಪರ್ತ್ಯಾ ವಿಚಾರಾನ್ ಭಿತರ್ಲ್ಯಾ ಭಿತರ್ಚ್ ಖರ್ಗಾತಾಲೆಂ. ತಾಚೆಂ ತೋಂಡ್ ಬಾವ್ಲೆಲ್ಯಾಪರಿ ಜಾಲ್ಲೆಂ.
ಏಕ್ ದೀಸ್ ತಾಂಗೆರ್ ಶಾರದಚಿ ಭಯ್ಣ್ ಬೀನಾ ಆಯ್ಲಿ. ತಿಣೆಂ ಉಮಾಕ್ ಪಳೆವ್ನ್ ಉಮೆದೀನ್ ವಿಚಾರ್ಲೆಂ.
"......ಉಮಾ, ವೊಡುನ್ ಕಾಡ್ಲೆಲ್ಯಾ ಬಾಶೆನ್ ದಿಸ್ತಾಮೂಗೊ ತುಂ. ಗುಡ್ ನ್ಯೂಸ್ ಕಾಂಯ್ ಕಿತೆಂ?"
ಹಿಂ ಫೊಕಾಣಾಂ ಆಯ್ಕೊನ್ ಮುಮುರ್ಕೆಂ ಜಾವ್ನ್ ಲಜ್ಚೆ ಬದ್ಲಾ ಉಮಾಚೊ ಛಾರೊ ತಿಡ್ಕಿನ್ ವಿಚಿತ್ರ್ಚೊ ಜಾಲೊ. ವೊಂಟಾಂತ್ಲ್ಯಾ ವೊಂಟಾಂನ್ ಪುರ್ಪುರೊನ್ ತೆಂ ಭಿತರ್ ಗೆಲೆಂ. ಬೀನಾಚ್ಯಾ ಮನಾಂತ್ ದುಬಾವಾಚಿ ಪಾಲ್ ಚುಕ್ಚುಕ್ಲಿ. ಭಯ್ಣಿಚೊ ಸ್ವಭಾವ್ ತೆಂ ಜಣಾಂ ಆಸ್ಲ್ಲೆಂ.
ದೋನ್ ದಿಸಾಂನಿಚ್ ತಾಕಾ ಭಯ್ಣಿಚಿಂ ನಾಟ್ಕಾಂ ಕಳ್ಳಿಂ. ಹಾತುಂತ್ಲ್ಯಾನ್ ಆಪ್ಣೆಚ್ ಮಾರ್ಗ್ ಕಾಡುಂಕ್ ಜಾಯ್ ಆಶೆ ತಾಕಾ ಖರ್ಯಾಪಣಿಂ ದಿಸ್ಲೆಂ. ರಾತ್ಭರ್ ತಾಣೆಂ ವಿಚಾರ್ ಕೆಲೊ. ದುಸ್ರೆ ದೀಸ್ ಸಕಾಳಿಂ ಸಗ್ಳಿಂ ಚ್ಹಾ ಪಿಯೆಂವ್ಕ್ ಬಸ್ಲೆಲ್ಯಾ ವೆಳಾರ್ ತಾಣೆಂ ಮ್ಹಳೆಂ,
"......ಶಾರದಾ, ಆತಾಂ ಸುನ್ ಆಯ್ಲಿ, ಮ್ಹಣ್ತಾಗಚ್ ತುಂ ಮೆಕ್ಳೆಂ ಜಾಲೆಂ. ಆಮ್ಗೆರ್ ಚಾರ್ ದೀಸ್ ರಾವ್ ತುಂ.... ಯೋ... ಆಮಿಂ ಟೂರಾಕ್ ವಚ್ಪಾಚೊ ವಿಚಾರ್ ಕರ್ತಾತ್. ತೂಂಯ್ ಯೋ ಆಮ್ಚೆ ಬರಾಬರ್."
"...... ಆಸೊಂಗೊ ತೊ ಟೂರ್-ಬೀರ್. ಮ್ಹಜ್ಯಾನ್ ಆತಾಂ ಕಾಂಯ್ ಜಾತಾ?."
".......ಮಾಂ ಆಶೆಂ ಮ್ಹಣಾನಾಕಾತ್, ........ಚಲಾತ್ ತುಮಿಂ. ಮನ್ ಪ್ರೆಶ್ ಜಾತೆಲೆಂ ತುಮ್ಚೆಂ. ದೀಪಕ್ ಸಾಂಗ್ ನೆಂ ತುಂ ಮಾಂಯ್ಕ್."
ಉಮಾನ್ ಉಮೆದಿನ್ ಮ್ಹಳೆಂ. ದೀಪಕಾನ್ಯ್ ಆವಯ್ಕ್ ಆಗೋ ಕೆಲೊ. ದೊಗಾಂಯ್ಚಾ ತೊಂಡಾ ವಯ್ಲಿ ಉಮೆದ್ ಪಳೆವ್ನ್ ಬೀನಾಕ್ ಆಪ್ಲ್ಯಾ ನಿರ್ಣಯಚಿ ಪಾವ್ತಿ ಮೆಳ್ಳಿ. ಶಾರದಾನ್ ಖೂಬ್ ಖಳ್ಖಳ್ ಕೆಲಿ. ಪೂಣ್ ಸಗ್ಳ್ಯಾಂಚೊ ಆಗೋ ಪಳವ್ನ್ ಗಳ್ಸಣಿಲ್ಲೆ ಆವಸ್ಥೆಂತ್ ತಿ ಸಾಮಾನ್ ಬಾಂದುಂಕ್ ಲಾಗ್ಲಿ.
About us | Feedback | Contact us
Copyright © 2005
DAAIZ.COM All rights reserved.
Page concept, designed and maintained by Ashawadi
Publications
