ಮೊಳ್ಬಾಚಿಂ

ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್ ಕೊಂಕಣಿ ಪರ್‍ಯಾಂತ್, ಕೊಂಕಣಿ ಖಾತಿರ್.

"ತುಜಾ ಇಸ್ಟಾಚಿ ವಳೊಕ್ ಸಾಂಗ್ ತುಜಿ ವಳೊಕ್ ಸಾಂಗ್ತಾಂ, ತುವೆಂ ವಾಸ್ಚೆ ಬೂಕ್ ಕಸಲೆ ಕಳಯ್ ತುಜೆಂ ವೆಕ್ತಿತ್ವ್ ಉಚಾರ್ತಾಂ."

ಕೊಂಕ್ಣಿ ಬುಕಾಂಚಿ ಸಮಿಕ್ಶಾ

ವಾಚಾಪ್ ಮ್ಹಳ್ಯಾರ್ ಕಿತ್ಯಾಕ್‌ಗೀ ಚಡ್ತಾವಾಂಕ್ ಆಮ್ಕಾಂ ಆಳ್ಸಾಯ್, ಮತಿಕ್ ಬೆಸೊರ್ ಪಡ್ತಾ ದೆಕುನ್ ವಾಸ್ಚೆಂ ಮ್ಹಳ್ಯಾರ್ ಆಮ್ಕಾಂ ಅಲರ್ಜಿ. ವಾಚುನ್ ಉದ್ದಾರ್ ಜಾಲ್ಲೆ ಕೊಣ್ ಮ್ಹಳ್ಳಿಂ ಸವಾಲಾಂ ಆಮ್ಚಾ ಮತಿಂತ್. ಆಮಿಂ ದಿಸಾಳಿಂ ಘೆತಾಂವ್ ಜಾವ್ಯೆತಾ, ಪುಣ್ ತಾಂತ್ಲೆಂ ಕಿತ್ಲೆಂ ವಾಚಾಪ್ ವಾಚ್ತಾಂವ್? ಆಯ್ಲೆವಾರ್ ನ್ಯೂಯೋರ್ಕಾಚಾ ಎಕಾ ದಿಸಾಳ್ಯಾನ್ ಪರ್ಗಟ್ಲೆಲ್ಯಾ ದಿಸಾಳ್ಯಾಪ್ರಕಾರ್ ಸಾಂಗ್ಚೆಂ ತರ್; ಸತ್ತರ್ ಠಕ್ಕೆ ಶಿಕ್ಪಿ ಲೋಕ್ ಮಾತ್ರ್ ದಿಸಾಳಿಂ ವಾಚ್ತಾ, ಹ್ಯಾ ಸತ್ತರ್ ಠಕ್ಕೆ ಲೊಕಾಂಪಯ್ಕಿ ಫಕತ್ತ್ ಸಾಠ್ ಠಕ್ಕೆ ಲೋಕ್ ಫಕತ್ತ್ ತಕ್ಲೆನಾಂವಾಂ ಮಾತ್ರ್ ವಾಚ್ತಾ, ಆನಿಂ ಧಾ ಠಕ್ಕೆ ಲೋಕ್ ಜಾಹಿರಾತಾಂ ಯಾ ಮನರಂಜನಾಚಿಂ ಬರ್ಪಾಂ ವಾಚ್ತಾ ತರ್ ಫಕತ್ತ್ ತೀಸ್ ಠಕ್ಕೆ ವಾಚ್ಪಿ ಮಾತ್ರ್ ವಾಚ್ಪಾಂ ವಾಚ್ತಾ.

ಭೋವ್ಶಾ ಕೊಂಕ್ಣೆಂತ್ ಅಸಲಿ ಸಮೀಕ್ಶಾ ಕೆಲಿ ತರ್ ಆಮ್ಕಾಂ ಮೆಳ್ಚೆ ಆಂಕ್ಡೆ ಭೋವ್ಶಾ ಪಾತ್ಯೆಂವ್ಕ್ ಕಸ್ಟ್ ಮಾರ್ಚೆತಸಲೆ ಮ್ಹಣ್ಯೆತಾ. ಕೊಂಕ್ಣಿ ವಾಚ್ಪಾಚೆರ್ ತಿತ್ಲೊ ತಾತ್ಸಾರ್ ಕಿತ್ಯಾಕ್ ಜಾವ್ಯೆತ್? ಲ್ಹಾನ್‌ಪಣಾ ಥಾವ್ನ್ ಭೋವ್ಶಾ, ವಾಂಜೆಲ್, ರಜಾರ್, ಮಾಗ್ಣಿಂ, ವ್ಹೊರೆಸಾಂವಾಂ ವಾಚುನ್ ವಾಚುನ್ ಮತ್ ಥಕ್ಲ್ಯಾ, ಪಿಕ್ಲ್ಯಾ ದೆಕುನ್? ದಿಸಾಕ್ ಉಣ್ಯಾರ್ ಉಣೆಂ ಏಕ್ ಪಾನ್ ತರ್‌ಯೀ ವಾಚಾಪ್ ಭಲಾಯ್ಕೆಕ್ ಗರ್ಜೆಚೆಂ ಮ್ಹಳ್ಳೆಂ ವಯ್ಜ್ ಸಯ್ತ್ ಒಪ್ತಾತ್. ತಿ ಭಲಾಯ್ಕಿ ಕುಡಿಚಿ, ಮತಿಚಿ, ಚಿಂತ್ಪಾಚಿ ಆನಿಂ ಕಾಳ್ಜಾಚಿ.

ಹೆಚ್ಚ್ ಕಾರಾಣಾಕ್ ಲಾಗೊನ್ ಜಾವ್ಯೆತ್ ದಿಸಾನ್‌ದೀಸ್ ಕೊಂಕ್ಣಿ ವಾಚ್ಪಿ ಉಣೆ ಜಾವ್ನ್ ಯೆತಾತ್, ಆನಿಂ ಹ್ಯಾ ಪರಿಗತೆಂತ್ ಕೊಂಕ್ಣಿ ಬೂಕ್ ಪರ್ಗಟ್ಚೆಂ ಧಯ್ರ್ ಕೊಣಾಕ್ ಆಸತ್? ಎಕಾಧಾವೆಳಾ ಆಸ್ಲ್ಯಾರ್‌ಯೀ ಕೊಣಾಕ್ ಹಾಂಚಿ ವಳೊಕ್ ಆಸಾ? ಕಿತ್ಯಾಕ್ ಅಶೆಂ? ಕೊಂಕ್ಣಿ ಬುಕಾಂಚಿ ವಳೊಕ್ ಕಶಿ ಆಸ್ತಿ? ಕೊಂಕ್ಣಿ ಬುಕಾಂಕ್ ವಾಸ್ಚೆಂ ಸೊಡ್ಯಾಂ, ಬುಕಾಂಚಿ ಸವಿಸ್ತಾರ್ ವಳೊಕ್ ಕಿತ್ಲೆಶ್ಯಾಂಕ್ ಆಸಾ? ವಾಚ್ಪ್ಯಾಂಕ್ ಸೊಡಾ - ಪತ್ರಾಂಕ್ ಆಸಾ?

ಕೊಂಕ್ಣಿ ಬುಕಾಂಚಿ ಪರಿಚಯ್ ಚಡ್ತಾವ್ ಪತ್ರಾಂನಿ ಯೆತಾ ತರ್‌ಯ್ ತಿ ಪರಚಯ್ ಭೋವ್ಶಾ ಮ್ಹಜಾ ಆಬಾಚಾ ಆಬಾಚಾ ಕಾಳಾಥಾವ್ನ್ ಆಯಿಲ್ಲಿಚ್ಚ್ ಪಾರಂಪರಿಕ್ ರಿತಿನ್, ಬುಕಾಚೆಂ ಮೋಲ್, ಬರವ್ಪ್ಯಾಚೆಂ, ಪ್ರಕಾಶಕಾಚೆಂ ನಾಂವ್, ಪ್ರಸ್ತಾವನ್ ಬರಯಿಲ್ಲ್ಯಾಚೆಂ ನಾಂವ್ ಸೊಡ್ಲ್ಯಾರ್ ತ್ಯಾ ಬುಕಾಚೆಂ ಸಮೀಕ್ಶಾ ಲೇಖನ್ ಯೆಂವ್ಚೆಂ ಭೋವ್ ಅಪ್ರೂಪ್. ಕಿತ್ಯಾಕ್? ಭೋವ್ಶಾ ಕಸಲಿಗೀ ದಾಕ್ಶೆಣ್-ಮುಲಾಜ್. ಬುಕಾವಿಶಿಂ ಕಾಂಯ್ ದೋನ್ ವಾಯ್ಟ್ ಸಬ್ಧ್ ಬರಯ್ಲೆ ತರ್ ಮೊಸ್ರಾನ್ ಬರಯ್ಲೆಂ ಮ್ಹಣ್ತಾತ್ ಕೊಣ್ಣಾ ಮ್ಹಳ್ಳಿ ದಾಕ್ಶೆಣ್. ಅಪ್ಣಾಚೆಂ ನಾಂವ್ ಪಾಡ್ ಜಾತಾ ಕೊಣ್ಣಾ ಮ್ಹಳ್ಳಿ ಕಾವ್ಜೆಣಿ.

’ಕೊಣೆಂ ಕರಿಜೆ ಆಸ್‌ಲ್ಲೆಂ?’ ಮ್ಹಳ್ಳೆಂ ಸವಾಲ್ ದಾಯ್ಜ್ ವಿಚಾರಿನಾ, ಬಗಾರ್ ಆಮಿಂ ಕರ್ತಾಂವ್ ಮ್ಹಳ್ಳೆಂ ಚಿಂತಾಪ್ ಘೆವ್ನ್ ಮುಕಾರ್ ಯೆತಾ. ಆಯ್ಲೆವಾರ್ ಪರ್ಗಟ್ಲೆಲ್ಯಾ ಬುಕಾಚೆರ್ ಸಮೀಕ್ಶಾ ಚಲಂವ್ಕ್, ಬುಕಾಂತ್ ಆಸ್ಚಾ ಸಾಹಿತ್ಯಾಚೆರ್ ವಿಷ್ಲೇಷಣ್ ಕರ್ಚಾಕ್, ಅಧ್ಯಯನ್ ಕರ್ಚಾಕ್ ಆನಿಂ ಎಕಾಮೆಕಾ ಭಾಸಾಭಾಸ್ ಚಲಂವ್ಚಾಕ್. ಆಮ್ಚಾ ಸಮೀಕ್ಶಾಕ್ ಆಮ್ಚೆ ಮಾತ್ರ್ ಬೂಕ್ ಆಮಿಂ ಘೆನಾಂವ್, ನವೆ ನವೆ ಬೂಕ್ ಘೆತೆಲ್ಯಾಂವ್ ತಶೆಂಚ್ ಪರ್ನ್ಯಾ ಬುಕಾಂಚೆರ್‌ಯ್ ಸಮಿಕ್ಶಾ ಚಲಯ್ತೆಲ್ಯಾಂವ್.

’ದಾಯ್ಜ್’ ಪಂಗ್ಡಾನ್ ಎದೊಳ್ ಸಮೀಕ್ಶಾ ಚಲಯಿಲ್ಲೆ ಬೂಕ್

01. ವ್ಹಳೂ ವ್ಹಳೂ ವ್ಹಾಳ್ ವ್ಹಾಳ್ಯಾ [ಆಂಡ್ರು ಎಲ್. ಡಿ’ಕುನ್ಹಾಚೊ ಫುಡ್ಲದ್ ಕವಿತಾಜಮೊ]

02. ಕಟ್‌ಪುತ್ಳಿ [ವಲ್ಲಿ ಕ್ವಾಡ್ರಸಾಚೊ ದುಸ್ರೊ ಕವಿತಾಜಮೊ]

03. ಕಯ್ದ್ಯಾಚ್ಯೊ ಕವಿತಾ [ಎಚ್ಚೆಮಾಚೊ ದುಸ್ರೊ ಕವಿತಾಜಮೊ]

04. ಪರತ್ ಪರತ್ [ದೆ|ಜೊರ್ಜಿ ಪೀಂತ್, ಆಯ್ಕೊಳ್ ಹಾಚೊ ಫುಡ್ಲದ್ ಕವಿತಾಜಮೊ]

05. ಮೊಳ್ಬಾಚಿಂ ದೆಳಿಂ [ನೆಲ್ಲು ಪೆರ್ಮನ್ನೂರ್, ಹಾಚೊ ಫುಡ್ಲದ್ ಕವಿತಾಜಮೊ]

06. ಪಯ್ಲಿಂ ಮೆಟಾಂ [ಜಿಯೊ ಆಗ್ರಾರ್, ಹಾಚೊ ಫುಡ್ಲದ್ ಕವಿತಾಜಮೊ]

07. ವಾಟ್ [ಮೆಲ್ವಿನ್ ರೊಡ್ರಿಗಸ್, ಹಾಚೊ ತಿಸ್ರೊ ಕವಿತಾಜಮೊ]

08. ಕಾಳೊಕಾಂತ್ಲಿಂ ಕಾಂತಾರಾಂ [ಮೆಲ್ವಿನ್ ರೊಡ್ರಿಗಸ್, ಹಾಣೆಂ ಸಂಪಾದನ್ ಕೆಲ್ಲೊ 44 ಕವಿಂಚಾ 44 ಕವಿತಾಂಚೊ ಬೂಕ್]

09. ಮೊತಿಯಾಂ ಆನಿ ತಾರಾಂ [ವಲ್ಲಿ ಕ್ವಾಡ್ರಸ್, ಹಾಣೆಂ ಸಂಪಾದನ್ ಕೆಲ್ಲೊ 11 ಕವಿಂಚಾ 54 ಕವಿತಾಂಚೊ ಬೂಕ್]

10. ಕವಿತಾಪಾಠ್ ಭಾಗ್ - 1 [ವಲ್ಲಿ ಕ್ವಾಡ್ರಸ್, ಹಾಣೆಂ ಸಂಪಾದನ್ ಕೆಲ್ಲೊ ಕವಿತಾಂಚಾ ಅಧ್ಯಯನಾಚೊ ಬೂಕ್]

11. ಪಿಂತುರಾಂ [ಮಾ|ಆಲ್ವಿ ಕಾರ್ಮೆಲಿತ್, ಹಾಚೊ ಫುಡ್ಲದ್ ಕವಿತಾಜಮೊ]

12. ಮಂಥನ್ [ಫ್ರಾನ್ಸಿಸ್ ಸಲ್ಡಾಞ್ ಕಾಮತ್, ಹಾಚೊ ಫುಡ್ಲದ್ ಕವಿತಾಜಮೊ]

13. ಪಣ್ತೆಚಿ ಪೆಲಿ [ಚಾ.ಫ್ರಾ ದೆ’ಕೋಸ್ತಾಚಾ ಸಾಹಿತ್ಯಾಚೊ ಜಮೊ]

14. ಬಾಮುಣಾಂಚೆಂ ಚೆಡುಂ [ಎಚ್ಚೆಮಾಚೊ ತಿಸ್ರೊ ಕವಿತಾಜಮೊ]

15. ದರ್ಭಾರಾಂತ್ಲಿ ಪಿಂರ್ಗೊಣ್ [ವಲ್ಲಿ ಕ್ವಾಡ್ರಸಾಚೊ ತಿಸ್ರೊ ಕವಿತಾಜಮೊ]

16. ದರ್ಯಾಕ್ ಉದಾಕ್ [ವಲ್ಲಿ ಕ್ವಾಡ್ರಸ್, ಹಾಣೆಂ ಸಂಪಾದನ್ ಕೆಲ್ಲೊ ಕವಿತಾಂಚಾ ಅಧ್ಯಯನಾಚೊ ದುಸ್ರೊ ಬೂಕ್]

17. ಸಾಗೊರಾಚ್ಯಾ ವಾಟೆಚ್ಯೊ ಝರಿ [ವಲ್ಲಿ ಕ್ವಾಡ್ರಸ್ ಹಾಣೆಂ ಸಂಪಾದನ್ ಕೆಲ್ಲೊ 100 ಕವಿಂಚಾ ಕವಿತಾಂಚೊ ಬೂಕ್]

18. ಕಾಳ್ಜಾಂತ್ಲೆ ಯಾದ್.. [ಗ್ಲೇಡಿಸ್ ರೇಗೊಚೊ ದುಸ್ರೊ ಕವಿತಾಜಮೊ]

ಕವಿತಾಪಾಠ್

ಪಾಟಿಂ ದಾಯ್ಜ್ ಪಾನಾಕ್

ಬುಕಾಚೆಂ

ಎಲ್ಯೆರಾಚಿ

ಪುರ್ಲಾ?