ದಾಯ್ಜ್ ತೆಸಾಂವ್: "ಕೊಂಕ್ಣಿ ಉಲಯ್, ಕೊಂಕ್ಣಿ ಉರಯ್, ಕೊಂಕ್ಣಿ ಆಮ್ಚಿ ಆವಯ್"
ನಿರ್ಭಾಗ್ಯಾಚೆಂ ಸ್ವಪಾಣ್
ಅವಸ್ವರ್ 10
ಮೆಲ್ವಿನಾಚಿ ತಸ್ವೀರ್ ಸಿಂತಿಲಾಗಿಂ ದೆಖ್ಲ್ಲ್ಯಾ ಜೆಸ್ಸಿಕ್ ಕಾಳ್ಜಾಕ್ ಭಾಲಿಚ್ ತೊಪ್ಲ್ಲ್ಯಾಬರಿ ಜಾಲೆಂ. ’ಹೆಂ ಸತ್..ಹಾಯ್...... ಆಶೆಂ ಜಾಂವ್ಚೆಂ ಕಶೆಂ? ಮೆಲ್ವಿನಾನ್ ಸಿಂತಿಚೊ ಮೋಗ್ ಕರ್ತಾಂ ಆಸ್ತಾನಾ ಆಪ್ಣಾಕ್ ಫಟಯ್ಲೆಂ ಕಿತ್ಯಾಕ್? ದೆವಾ, ಜೀವನಾಂತ್ ಕಸಲೆಂ ಹೆಂ ವಿಕಾಳ್ ಅನಾಹುತ್? ಜೆಸ್ಸಿ ಧ್ದುಳ್ದಳ್ಯಾಂ ರಡ್ಲೆಂ.
"ರಡಾನಾಕಾ ಜೆಸ್ಸಿ. ಜಾಲ್ಲೆಂ ತೆಂ ಜಾವ್ನ್ ಗೆಲೆಂ", ಸಿಂತಿನ್ ಭುಜೈಲೆಂ ತಾಕಾ, "ಸಂಸಾರಾಂತ್ ಅಸಲೆ ಘಾತ್ಕಿ ಚೆಡೆ ಸಬಾರ್ ಆಸಾತ್. ತಾಚ್ಯಾ ಪಾಸಾಕ್ ಸಾಂಪಡ್ಚ್ಯಾ ಆದಿಂಚ್ ತುಕಾ ಹಾಂವೆಂ ಜಾಗೈಲ್ಲೆಂ ಬರೆಂ ಜಾಲೆಂ"
"ರೀಜಾ.....ಆಮಿಂ ಚಲ್ಯಾಂ...." ಜೆಸ್ಸಿ ಸಂಪೂರ್ಣ್ ಕಂಗಾಲ್ ಜಾಲ್ಲೆಂ. ದೊಗಾಂಯ್ ಘುಂವ್ಲಿಂ ಆನಿಂ ಸವ್ಕಾಸ್ ಚಲೊಂಕ್ಲಾಗ್ಲಿಂ. ಸಿಂತಿ ವೆಚ್ಯಾ ತಾಂಕಾಂ ಪಳೆವ್ನ್ ಮತಿಂತ್ಚ್ ಹಾಸ್ಲೆಂ. ’ಮೆಲ್ವಿನಾಚಿ ಆನಿಂ ಜೆಸ್ಸಿಚಿ ಇಷ್ಟಾಗತ್ ಇತ್ಲ್ಯಾರ್ಚ್ ಅಖೇರ್ ಜಾಲಿ.’ ಮ್ಹಣೊನ್ ಆಪ್ಲೆಸ್ತಕ್ತಿಂ ಚಿಂತುನ್ ತೆಂ ಖುಶ್ ಪಾವ್ಲೆಂ.
"ಗಿಬ್ಬಾ ಆನಿಂ ಮೆಲ್ವಿನ್..." ರಿಜಾ ಕಿತೆಂಗಿ ಸಾಂಗೊಂಕ್ ತೊಂಡ್ ಕಾಡ್ತಾಲೆಂ.
"ರಿಜಾ.." ಜೆಸ್ಸಿಚ್ಯಾ ತಾಳ್ಯಾಂತ್ ಅಪರಿಮಿತ್ ದುಃಖ್ ಆಸ್ಲ್ಲೆಂ, "ಮ್ಹಾಕಾ ಕಾಂಯ್ಚ್ ಸಮ್ಜಾನಾ ರಿಜಾ.....ಹಾಯ್, ಹಾಂವ್ ಕಿತೆಂ ಕರುಂ?"
"ರಡಾನಾಕಾ ಜೆಸ್ಸಿ. ಸಿಂತಿಚಿಂ ಉತ್ರಾಂ ಪಾತ್ಯೆಂವ್ಕ್ ತುಕಾ ಅಧಾರ್ ಕಸಲೊ?"
"ತಿ ಫೊಟೊ ರಿಜಾ......ತಾಚೆಲಾಗಿಂ ಮೆಲ್ವಿನಾಚೊ ಪೊಟೊ ಕಶಿ ಆಯ್ಲಿ?"
"ಮೆಲ್ವಿನಾಲಾಗಿಂ ಉಲೈನಾಸ್ತಾಂ ಕಿತೆಂಯಿ ನಾಕಾ ಜಾಲ್ಲೆಂ ಚಿಂತಿನಾಕಾ - ಬಾ," ರಿಜಾನ್ ಭುಜೈಲೆಂ, "ಹಾಂತುಂ ಕಿತೆಂಗಿ ಮಿಸ್ತೆರ್ ಆಸ್ತೊಲೊ"
ಪುಣ್ ದುಃಖಿ ಜೆಸ್ಸಿಕ್, ರಿಜಾಚ್ಯಾ ಉತ್ರಾಂನಿ ಕಾಂಯ್ ಪರಿಣಾಮ್ ಹಾಡ್ಲೊನಾ. ಸಂಸಾರಾಚ್ಯಾ ಚ್ಯಾರ್ಯಿ ಕೊನ್ಶಾಂನಿ ವಾಟ್ ಬಂದ್ ಜಾಲ್ಲ್ಯಾಬರಿ ಬೊಗ್ತಲೆಂ ತಾಕಾ. ತೆಂ ತಶೆಂಚ್ ರಿಜಾ ಸಾಂಗಾಂತಾ ಘರಾ ಚಲ್ತೆಂ ಕೊಣ್ಣಾ. ಪುಣ್ ತಾಂಕಾಂಚ್ ಸೊದ್ತೆಲ್ಯಾ ಮೆಲ್ವಿನ್ ಆನಿಂ ಗಿಬ್ಬಾಚಿ ದೀಷ್ಟ್ ಪಯ್ಸ್ ಥಾವ್ನ್ ತಾಂಚೆರ್ ಪಡ್ಲಿ ಆನಿಂ ತೆ ಥಾಂವೊನ್ ಆಯ್ಲೆ.
"ಜೆಸ್ಸಿ, ರಿಜಾ..... ಆಮ್ಕಾಂ ಸೊಡ್ನ್ ವೆತಾತ್ ಖಂಯ್" ವಿಚಾರ್ಲೆಂ ಮೆಲ್ವಿನಾನ್ ಖರ್ಶೆವ್ನ್.
ಜೆಸ್ಸಿನ್ ಜಾಪ್ ಕಾಡ್ಲಿನಾ. ರಿಜಾಯಿ ಉಲೈಲೆಂನಾ.
"ಜೆಸ್ಸಿ, ಕಿತೆಂ ಜಾಲೆಂ? ಸಿಂತಿ ಖಂಯ್ ಆಸಾ?" ಮೆಲ್ವಿನ್ ಘಾಬಾರ್ಲೊ.
"ಸಿಂತಿಚಿ ಖಬಾರ್ ಬರಿ ಕರ್ನ್ ತುಂಚ್ ಜಾಣಾ ಆಸೊಂಕ್ ಫಾವೊ" ಕಠೋರ್ ಉತ್ರಾಂನಿ ಮ್ಹಣಾಲೆಂ ರಿಜಾ.
"ರಿಜಾ! ವೊಪಾರಿ ಕಿತ್ಯಾಕ್ ಉಲೈತಾಯ್? ಸಿಂತಿ ತುಮ್ಕಾಂ ಸೊಡ್ನ್ ಖಂಯ್ಸ್ರ್ ಗೆಲೆಂ?" ಮೆಲ್ವಿನಾಕ್ ಮಿಸ್ತೆರ್ಚ್ ಜಾಲ್ಲೊ.
"ಸಿಂತಿ? ತೆಂ ಸಗ್ಳಿ ಸಾಂತ್ ಭಂವ್ತಾ, ತುಜಿ ಫೊಟೊ ಘೆವ್ನ್" ರಿಜಾನ್ ಸಾಂಗ್ಲೆಂ.
"ಮ್ಹಜಿ ಫೊಟೊ! ಜೆಸ್ಸಿ, ಹೆಂ ಕಿತೆಂ?" ಮೆಲ್ವಿನಾಚೆ ದೊಳೆ ರುಂದಾಲೆ. ಗಿಬ್ಬಾ ಸಗ್ಳೊಚ್ ಶೆರ್ಮೆಲ್ಲೊ.
"ತುಜಿ ಪೊಟೊ ಸಿಂತಿಲಾಗಿಂ ಕಶಿ ಆಯ್ಲಿ ಮೆಲ್ವಿನ್? ತುವೆಂ, ಜೆಸ್ಸಿಕ್ ಹ್ಯಾ ಥರಾನ್ ಕಿತ್ಯಾಕ್ ಘಾತ್ ಕೆಲೊಯ್?" ರಿಜಾಚೊ ತಾಳೊ ಕಾಂಪ್ತಾಲೊ.
"ನಾ...ನಾ ರಿಜಾ. ಹೆಂ ಬಿಲ್ಕುಲ್ ಜಾಂವ್ಕ್ ನಜೊ. ಹಾಂವ್ ಖರೆಂಚ್ ಸಾಂಗ್ತಾಂ, ಹಾಂವೆಂ ಸಿಂತಿಕ್ ನ್ಹಂಯ್, ಬಗಾರ್ ಕೊಣಾಕ್ಚ್ ಮ್ಹಜಿ ಫೊಟೊ ದೀಂವ್ಕ್ ನಾ.." ಉದ್ವೇಗಾನ್ ಉಲೈಲೊ ತೊ. ತಾಕಾ ಸುಸ್ತಾಲ್ಲೆಂ ಸಿಂತಿ ಕಸಲೊಗಿ ಖೆಳ್ ಖೆಳ್ಳಾಂ ಮ್ಹಣ್.
"ಮೆಲ್ವಿನ್....ಸಿಂತಿ ಕಿತೆಂಗಿ ಖೆಳ್ ಹಾಡ್ನ್ ಆಯ್ಲಾಂ..... ತೆಂ ಧಾಂವ್ಲೆಂ ತರೀ ಖಂಯ್ ಆತಾಂ?" ಗಿಬ್ಬಾ ದಾಂತ್ ಚಾಬೊನ್ ಮ್ಹಣಾಲೊ.
ಮೆಲ್ವಿನಾಚ್ಯಾ ಮಸ್ತಕಾರ್ ಕ್ರೋಧ್ ಚಡ್ಲ್ಲೊ. "ಗಿಬ್ಬಾ ತುಂ ಹಾಂಗಾಚ್ ರಾವ್. ಹಾಂವ್ ಆತಾಂಚ್ ತಾಕಾ ವೋಡ್ನ್ ಹಾಂಗಾ ಹಾಡ್ತಾಂ.." ಖರ್ಕಸ್ ಉತ್ರಾಂನಿ ಉಲೈಲೊ ಮೆಲ್ವಿನ್. ತಶೆಂ ಸಾಂತೆಚ್ಯಾ ಕುಶಿಂ ಚ್ಯಾರ್ ಮೆಟಾಂ ಕಾಡಿಲಾಗ್ಲೊ.
"ಮೆಲ್ವಿನ್...." ಜೆಸ್ಸಿಚ್ಯಾ ತಾಳ್ಯಾನ್ ವೆಚ್ಯಾ ತಾಕಾ ಆಪಯ್ಲೆಂ.
"ಜೆಸ್ಸಿ...." ಮೆಲ್ವಿನ್ ಪಾಟಿಂ ಘುಂವ್ಲೊ. "ಜೆಸ್ಸಿ, ಸಿಂತಿನ್ ತುಕಾ ಕಿತೆಂ ಸಾಂಗ್ಲೆಂ?"
ಜೆಸ್ಸಿಕ್ಯಿ ಆತಾಂ ಹೊ ಮಿಸ್ತೆರ್ ಸಿಂತಿನ್ಚ್ ರಚ್ಲ್ಲೊ ಮ್ಹಣ್ ಕಳೊನ್ ಆಯಿಲ್ಲೆಂ. ತಾಣೆಂ ಕುಡ್ಕ್ಯಾ ಉತ್ರಾಂನಿ ಸಿಂತಿನ್ ಮ್ಹಳ್ಳೆಲಿಂ ಉತ್ರಾಂ ಸಾಂಗ್ಲಿಂ.
ಗಿಬ್ಬಾ ವ್ಹಡ್ಲ್ಯಾನ್ ಹಾಸೊಂಕ್ ಲಾಗ್ಲೊ ತಿ ಕಾಣಿ ಆಯ್ಕೊನ್, "ವ್ಹಾರೆವ್ಹಾ ಚಿಂತಾನಾ ತುಜೆರ್ ಫಾರಿಕ್ಪಣ್ ಘೆಂವ್ಕ್ ಸಿಂತಿ ತೀಸ್ ಮಯ್ಲಾಂ ಪಯ್ಣ್ ಕರ್ನ್ ಕಾರ್ಕಳಾಕ್ ತರೀ ಆಯ್ಲೆಂ"
"ನಾ..ಗಿಬ್ಬಾ. ತಾಕಾ ಆಶೆಂಚ್ ಸೊಡ್ಲ್ಯಾರ್ ಜಾಯ್ನಾ. ಹಾಂವ್ ತಾಕಾ ಆತಾಂಚ್ ಧರ್ನ್, ಉಬೆಂಚ್ ಚಿರ್ತಾ" ಮೆಲ್ವಿನ್ ರಾಗಾನ್ ಕಾಂಪ್ತಾಲೊ.
"ಹೊ ಮಿಸ್ತೆರ್ ಚಿಕ್ಕೆ ಸೊಡವ್ನ್ ಸಾಂಗಾನಾಂತ್? ಗಿಬ್ಬಾ, ತುಂ ಪುಣಿ ಹಿ ಗಜಾಲ್ ಸಾಂಗ್. ಸಿಂತಿನ್ ತಶೆಂ ಕರುಂಕ್ ಕಿತೆಂ?" ರಿಜಾನ್ ವಿಚಾರ್ಲೆಂ.
ಮೆಲ್ವಿನ್ ತಗ್ಸಾಲ್ಲ್ಯಾ ಸ್ವರಾನ್ ಮ್ಹಣಾಲೊ "ಜೆಸ್ಸಿ, ತುಜೆ ಥಾವ್ನ್ ಹಾಂವೆಂ ಸಿಂತಿಚಿ ಖಬಾರ್ ಲಿಪೊಂವ್ಕ್ ನಜೊ ಆಸ್ಲ್ಲಿ. ಪುಣ್ ಸಾಂಗೊಂಕ್ ಮ್ಹಾಕಾ ಸಂದರ್ಭ್ ಜಾಲ್ಯಾರೀ ಮೆಳ್ಳೊನಾ...." ಆನಿಂ ತಾಣೆಂ ಸಿಂತಿ ಆನಿಂ ಆಪ್ಣಾಚಿ ಗಜಾಲ್ ಸಂಕ್ಶಿಪ್ತ್ ಥರಾನ್ ಸಾಂಗ್ಲಿ. ಬರೆ ಸಿಂತಿಚ್ಯಾ ರುಪಾಕ್ ದೋನ್ ಪಾವ್ಟಿಂ ಆಪುಣ್ ಬಲಿ ಜಾಲ್ಲಿ ಸಂಗತ್ ತಾಣೆಂ ಲಿಪೈಲಿ. ಕಿತ್ಯಾಕ್ ತಾಚೆ ವರ್ವಿಂ ಜೆಸ್ಸಿಕ್ ದುಃಖಾತ್ ಮ್ಹಣ್ ತೊ ಬಿಯೆಲೊ.
"ಜೆಸ್ಸಿ.... ತ್ಯಾ ದೀಸ್ ತೆಂ ಮ್ಹಜ್ಯಾ ಕುಡಾಂತ್ ಯೇವ್ನ್ ಬೂಕ್ ಸೊದ್ತಾಲೆಂ. ತೆದಾಳಾಚ್ ಮ್ಹಜಿ ಫೊಟೊ ತಾಣೆಂ ಉಬಾರ್ಲ್ಯಾ ಆಸ್ತೆಲಿ. ತೆಂ ಮ್ಹಾಕಾ ಮೆಳೊಂದಿ. ಉಪ್ರಾಂತ್ ಶಿಕೈತಾಂ ಬೂದ್" ಮೆಲ್ವಿನಾನ್ ಕುಡ್ಸಿಲೆಂ.
ಜೆಸ್ಸಿನ್ ಸಮಾಧಾನೆಚೊ ಶ್ವಾಸ್ ಸೊಡ್ಲೊ. "ಮೆಲ್ವಿನ್ ಮ್ಹಜಿಚ್ ಚೂಕ್ ಜಾಲಿ ಬಾ. ತುಜೆಲಾಗಿಂ ವಿಚಾರಿನಾಸ್ತಾಂ ಹಾಂವೆಂ ನಾಕಾ ಜಾಲ್ಲೊ ದುಬಾವ್ ಚಿಂತ್ಲೊ. ಮುಳಾಂತ್ಚ್ ಆಮಿಂ ಹೆಂ ಅನ್ವಾರ್ ನಿವಾರ್ಲೆಂ. ಹಾಂವ್ ಚಿಂತ್ತಾಂ, ಗಾವ್ಪ್ಯಾಂಕ್, ಗಾವ್ಪ್ಯಾಂಚೊಚ್ ಕೆದಾಳಾಯಿ ಮೋಗ್. ಸಿಂತಿ ತುಜ್ಯಾ ಮೊಗಾರ್ ಪಡ್ಲಾಂ ಆಸ್ತೆಲೆಂ. ತುಂ ಗಾಯನಾಂತ್ ಫಸ್ಟ್ ಆಯಿಲ್ಲಿ ಖಬಾರ್ ಮ್ಹಾಕಾ ಕಿತ್ಯಾಕ್ ಸಾಂಗೊಂಕ್ ನಾಂಯ್?" ಜೆಸ್ಸಿ ಹಾಸ್ಲೆಂ.
"ಹಾಂವೆಂ ಸಾಂಗೊಂಕ್ ನಾ ಕಿತ್ಯಾಕ್ ಮ್ಹಳ್ಯಾರ್..... ಗಾವ್ಪಿ ನಹಿಂ ಆಸ್ಲ್ಲೆಂ ತುಂ ಮ್ಹಜೊ ಮೋಗ್ ಕರ್ಚೆಂನಾಂಯ್ ಮ್ಹಳ್ಳ್ಯಾ ಬಿಂಯಾನ್" ಮೆಲ್ವಿನಾನ್ ಹಾಸೊನ್ ಸಾಂಗ್ತಾನಾ, ಜೆಸ್ಸಿ ಲಜೆನ್ ದೊಡ್ಲೆಂ. ಗಿಬ್ಬಾ ಆನಿಂ ರಿಜಾ ಧಾದೊಶಿ ಹಾಸ್ಲಿಂ.
ತತ್ಕಾಲಾಕ್ ಸಿಂತಿನ್ ಹಾಡ್ಲೆಲ್ಯಾ ಘಾತಾಚೆರ್ ಸಕ್ಡಾಂನಿ ಉಲವ್ಣೆಂ ಬಂಧ್ ಕೆಲೆಂ. ಟ್ಯಾಕ್ಸಿ ಕರ್ನ್ ಚೊವ್ಗಾಂಯಿ ಘರಾ ಗೆಲಿ.
ದುಸ್ರೊ ದೀಸ್ ಫೆಸ್ತಾಚೊ. ಸಕಾಳಿಂ ಸಂಭ್ರಮಿಕ್ ಫೆಸ್ತ್ ಮೀಸ್ ಆಸ್ಲ್ಲೆಂ. ಘರ್ಚಿಂ ಸಕ್ಡಾಂ ಮೀಸಾಕ್ ವಚೊನ್ ಆಯ್ಲಿಂ. ಸಯ್ರಿಂ ಘರ್ ಭರ್ ಆಸೊನ್ ಫೆಸ್ತಾಚಿ ಖುಶಾಲಾಯ್ ಮುಲ್ಯಾಂಮುಲ್ಯಾಂನಿ ದಿಷ್ಟಿಕ್ ಪಡ್ತಾಲಿ. ದನ್ಪರಾಂಚೆಂ ಜೆವಾಣ್ ಗಮ್ಮಾತಾಯೆಚೆಂ ಜಾವ್ನ್ ಆಸ್ಲ್ಲೆಂ. ಜೆವ್ಣಾರ್ ಸೊರ್ಯಾಚೊ ಈದ್ರ್ ಘೆವ್ನ್ ಭಲಾಯ್ಕಿ ಮಾಗ್ತಾನಾ ಕಾಪಿಲ್ ಶೆಣಯ್ ಮ್ಹಣಾಲೊ. "ಆಜ್ ತುಮಿಂ ಸರ್ವ್ ಹ್ಯಾ ಫೆಸ್ತಾಚ್ಯಾ ದಿಸಾ ಆಮ್ಗೆರ್ ಹಾಜರ್ ಆಸ್ಲ್ಲ್ಯಾಕ್, ಆಮಿಂ ತುಮ್ಚೊ ಉಪ್ಕಾರ್ ಬಾವುಡ್ತಾಂವ್ ತರೀ, ಏಕ್ ಬೆಜಾರಾಯೆಚಿ ಗಜಾಲ್ ಆಸಾ, ಕಿತೆಂಗಿ ಮ್ಹಳ್ಯಾರ್ ಮ್ಹಜೊ ಪೂತ್ ಹೆರಿ ಆಯ್ಚ್ಯಾ ದಿಸಾ ಹಾಂಗಾಸರ್ ಹಾಜಿರ್ ನಾ. ತಾಣೆಂ ಬರೈಲಾಂ -’ಕಶೆಂಯ್ ಜಾಲೆಂ, ಚ್ಯಾರ್ ಮಹಿನ್ಯಾಂನಿ ಮ್ಹಜೆಂ ಶಿಕಾಪ್ ಕಾಬಾರ್ ಜಾತಾ. ತಾಚ್ಯಾ ಉಪ್ರಾಂತ್ ಹಾಂವ್ ಗಾಂವಾಕ್ ಯೆತಾ. ಆತಾಂ ಪರೀಕ್ಶೆಕ್ ಮ್ಹಸ್ತ್ ತಯಾರಾಯ್ ಕರುಂಕ್ ಆಸ್ಲ್ಲ್ಯಾನ್ ಫೆಸ್ತಾಕ್ ಯೇಂವ್ಕ್ ಜಾಯ್ನಾ’ ಮ್ಹಣ್. ಜಾಂವ್ದಿ ತ್ಯಾ ಬದ್ಲಾಕ್, ಮಂಗ್ಳೂರ್ ಥಾವ್ನ್ ಆವ್ಜಿತ್ತ್ ದೋಗ್ ಶಿಕ್ಪಿ ತರ್ನಾಟೆ ಆಮ್ಗೆರ್ ಆಯ್ಲ್ಯಾತ್. ವರ್ತೊ ಸಂತೊಸ್ ಆಮ್ಕಾಂ ಸಕ್ಡಾಂಕ್. ಆಶೆಂಚ್ ಕೆದಾಳಾಯ್ ತುಮಿಂ ಯೇವ್ನ್ ಕರ್ನ್ ಆಮ್ಚಿ ಹಿ ಇಷ್ಟಾಗತ್ ಆನಿಂ ಮಾಯಾಮೋಗ್ ಸ್ಥಿರ್ ದವರ್ಚೊ.
ಭಲಾಯ್ಕಿ ಮಾಗೊನ್ ತೆಂ ಸರ್ಬರಾಯೆಚೆಂ ಜೆವಾಣ್ ಆಖೇರ್ ಜಾಲೆಂ. ಜೆವ್ಣಾ ಉಪ್ರಾಂತ್ ಚಿಕ್ಕೆ ಆಡ್ ಪಡ್ಲ್ಲ್ಯಾ ಮೆಲ್ವಿನಾಕ್ ಜಾಗ್ ಜಾಲಿ ಜೆಸ್ಸಿನ್ ಉಟೈತಾನಾ.
"ಮೆಲ್ವಿನ್ ಊಟ್-ಬಾ. ಹಾಂವ್, ರಿಜಾ ಆನಿಂ ಗಿಬ್ಬಾ ನ್ಹೆಸೊನ್ ತಯಾರ್ ಜಾಲ್ಯಾಂವ್. ಊಟ್ ತೊಂಡ್ - ಬಿ ಧುವ್ನ್ ಚಾ ಪಿಯೆ"
ಆಳ್ಸಾಯೆಚಿ ಜಾಂಬಾಯ್ ಕಾಡ್ಲಿ ಮೆಲ್ವಿನಾನ್. ತಶೆಂ ಜೆಸ್ಸಿಚ್ಯಾ ಪೊಲ್ಯಾಕ್ ಹಳೂ ಥಾಪುಡ್ನ್ ತಾಣೆಂ ವಿಚಾರ್ಲೆಂ "ಖಂಯ್ ವಚೊಂಕ್ ಜೆಸ್ಸಿ?"
"ಘುಮ್ಟ್ಯಾ ಸರ್ಶಿಂ......ಊಟ್ ವೆಗಿಂ. ವೇಳ್ ಜಾಲೊ"
"ಘುಮ್ಟ್ಯಾ ಸರ್ಶಿಂ ಕಿತ್ಯಾಕ್? ಮ್ಹಾಕಾ ಪಳೆ ಜೆಸ್ಸಿ, ಘುಮ್ಟ್ಯಾಕ್ ಪಳೆಲ್ಲ್ಯಾಬರಿ ಜಾಯ್ನಾಂವೆ ತುಕಾ?" ತೊ ಹಾಸೊನ್ ಮ್ಹಣಾಲೊ.
"ತುಕಾ ಏಕ್ಚ್ ತಮಾಷೆ!" ಕ್ರತಕ್ ರಾಗಾನ್ ತೆಂ ಉಲೈಲೆಂ. "ಬರೆಂ ತುಂ ನಿದ್ತಾಯ್ ಜಾಲ್ಯಾರ್ ನಿದೆ, ಹಾಂವ್, ಗಿಬ್ಬಾ ಆನಿಂ ರೀಜಾಚ್ ವೆತಾಂವ್."
"ಹಾಂ.....ಗಿಬ್ಬಾ ಸಾಂಗಾತಾ ವೆತಾಯ್? ನಾ....ತ್ಯಾ ಗಿಬ್ಬಾಕ್ ಪಾತ್ಯೆಂವ್ಕ್ ಜಾಯ್ನಾ" ಹಾಸಾತ್ತ್ ಮೆಲ್ವಿನ್ ಉಟ್ಲೊ ಆನಿಂ ತೊಂಡ್ ಧುಂವ್ಕ್ ನ್ಹಾಣಿಯೆಕ್ ಚಲ್ಲೊ. ನ್ಹೆಸೊನ್ ಜಾತಾನಾ ಜೆಸ್ಸಿನ್ ಚಾ ಹಾಡ್ನ್ ದಿಲಿ. ತಿ ಪಿಯೆತಾಚ್ ಚೊವ್ಗಾಂಯಿ ಘರಾ ಥಾವ್ನ್ ಭಾಯ್ರ್ ಸರ್ಲಿಂ.
ಘುಮ್ಟ್ಯಾ ಸರ್ಶಿಂ ವಚೊಂಕ್ ಕಿತ್ಲಿ ವಾಟ್ ಆಸಾ?" ಗಿಬ್ಬಾ ವಿಚಾರಿಲಾಗ್ಲೊ.
"ಸಾಧಾರ್ಣ್ ಅರ್ಧೊ ಘಂಟೊ ಚಲೊಂಕ್ ಆಸಾ. ಪಾಂಯ್ ವೊಳಾನಾಂತ್ಮೂ" ವಿಚಾರ್ಲೆಂ ರಿಜಾನ್.
"ಚಲಿಯಾಂ ಸಾಂಗಾತಾ ಮುಯೆಬರಿ ಚಲ್ತಾನಾ ಪುರಾಸಣ್ ಬೊಗ್ಚಿ ತರಿ ಕಶಿ?" ಮೆಲ್ವಿನಾನ್ ಸವಾಲ್ ಕೆಲೆಂ.
"ಚಲೊಂಕ್ ಸುರು ಕೆಲೆಂ ತರ್, ತುಮ್ಕಾಂ ಚಲ್ಯಾಂಕ್ ಸೊಡ್ನ್ ದಿಂವ್ಚೆನಾಂವ್" ತಾಂಬ್ಡೆಂ ಜಾಲ್ಲೆಂ ರಿಜಾ ಮ್ಹಣಾಲೆಂ. ಆಶೆಂಚ್ ಗಜಾಲಿ ಕರ್ನ್ ವಾಟ್ ಸಾಗ್ಸಿಲಿ. ನಿಮಾಣೆಂ ತೊ ಚರಿತ್ರೆ ಪ್ರಸಿದ್ಧ್ ಘುಮ್ಟೊ ಆಸ್ಲ್ಲ್ಯಾ ಗುಡ್ಯಾಚ್ಯಾ ಮುಳಾಂತ್ ತಿಂ ಪಾವ್ಲಿಂ.
"ಓ.....ಮೈ ಗೊಡ್.... ವಯ್ರ್ ವಚೊಂಕ್ ಇತ್ಲಿಂ ಮೆಟಾಂ ಆಸಾತ್?" ಉದ್ಗಾರ್ ಕಾಡ್ಲೊ ಗಿಬ್ಬಾನ್.
"ಇತ್ಲಿಚ್ ಸಾಮರ್ಥಿ ತುಂಮ್ಚಿ. ಆಮಿಂ ಚೆಡ್ವಾಂ ತರೀ, ಹಾಂಗಾ ಆಯಿಲ್ಲ್ಯಾಕ್ ಲೇಕ್ಚ್ ನಾ" ಜೆಸ್ಸಿನ್ ಸಾಂಗ್ಲೆಂ.
"ತರ್ ಮ್ಹಜಿ ಸಾಮರ್ಥಿ ದಾಕೈತಾಂ..." ಆಶೆಂ ಮ್ಹಣೊನ್ ತಿಂ ಲೇಕ್ ನಾತ್ಲ್ಲಿಂ ಮೆಟಾಂ ಚಡೊನ್ ಗಿಬ್ಬಾ ಧಾಂವ್ಲೊ. ತಾಚ್ಯಾ ಒಟ್ಟುಕ್ ಮೆಲ್ವಿನ್ಯಿ ಧಾಂವೊಂಕ್ ಲಾಗ್ಲೊ. ಖರ್ಶೆವ್ನ್ ಪುರಾಸಾಣೆನ್ ದೊಗಿ ವಯ್ರ್ ಗುಡ್ಯಾಕ್ ಪಾವ್ಲೆ, ಆನಿಂ ಸಾಸೂ ಕರ್ನ್ ಥಂಯ್ಚ್ ವಿಶೆವ್ ಘೆಂವ್ಕ್ ಆಡ್ ಪಡ್ಲೆ. ಜೆಸ್ಸಿ ಆನಿಂ ರಿಜಾ ಕರ್ನ್ ಸವ್ಕಾಸ್ ಮೆಟಾಂ ಚಡೊನ್ ಆಯ್ಲಿಂ. ಲಾಗಿಂ ಪಾವ್ತಚ್ಚ್ ಕಿಟಿಕಿಟಿ ಹಾಸೊಂಕ್ಲಾಗ್ಲಿಂ.
"ವಿಶೇಷ್ ಸಾಮರ್ಥಿ ಆಸ್ಲ್ಲೆ ಗ್ರಾಯ್ಕ್ ಕೆದಾಳಾಚ್ ಖರ್ಶೆನಾಂತ್" ರಿಜಾ ಮ್ಹಣಾಲೆಂ " ನಹಿಂಗಿ ಬಾ ಜೆಸ್ಸಿ"
ಹಾಣಿಂ ದೊಗಾಂನಿ ಜಾಪ್ ಕಾಡ್ಲಿನಾ.
"ಹುಂ...ಆತಾಂ ದೊಗಾಂಕಿ ಹಾಂಗಾಚ್ ಸೊಡ್ನ್ ಆಮಿಂ ಭಂವ್ಚೆಂ ಬರೆಂ. ಕಿತ್ಯಾಕ್, ಹಾಂಕಾ ಆತಾಂ ಉಟೊಂಕ್ ತಾಂಕಾನಾ ರಿಜಾ" ಜೆಸ್ಸಿನ್ ಮ್ಹಳೆಂ.
ಗರ್ವಾನ್ ದೊಗಿ ಉಟ್ಲೆ.
"ಆತಾಂ ಪಳೆಯಾ. ಹೊಚ್ ತುಮ್ಚ್ಯಾ ಮುಖಾರ್ ಉಬೊ ಆಸ್ಚೊ ಘುಮ್ಟೊ. ವಳೊಕ್ ಕರ್ನ್ ದಿಂವ್ಚಿ ಗರ್ಜ್ ನಾ ಮ್ಹಣ್ ದಿಸ್ತಾ" ಜೆಸ್ಸಿ ಸಾಂಗಾಲಾಗ್ಲೆಂ.
"ನಾಕಾ ಜೆಸ್ಸಿ...." ಹಾಸ್ಲೊ ಮೆಲ್ವಿನ್, "ಘುಮ್ಟ್ಯಾ ವಿಷ್ಯಾಂತ್ ಆಮಿಂ ಆಯ್ಕೊನ್ ಜಾಣಾಂವ್, ಖುದ್ಧ್ ಪಳೆಂವ್ಕ್ ಆತಾಂ ಸಂದ್ರಾಪ್ ಲಾಭ್ಲೊ".
ಮಜ್ಭೂತ್ ಎಕಾಚ್ ಫಾತ್ರಾಕ್ ತಾಸುನ್ ಆಸಾ ಕೆಲ್ಲಿ ತ್ಯಾ ಪ್ರಸಿದ್ಧ್ ಶಿಲ್ಪಿಚಿ ಅಮರ್ ಕ್ರತಿ ಉಭಿ ರಾವ್ಲ್ಲಿ ಗಂಭೀರ್ ಥರಾನ್ ಕಸಲಿ ಹಾತ್ ಚಲಾಕಿ ಥಂಯ್ ದಿಸ್ತಾಲಿ!. ಹಿಂವಾಕ್, ಉಬೆಕ್ ಬಾಗ್ವನಾಸ್ತಾಂ, ವಾರ್ಯಾ ವಾದಾಳಾಕ್ ಲಕ್ಶನಾಸ್ತಾಂ, ಸಂಸಾರಾಚೆಂ ಭ್ಯೆಂ ಆಪ್ಣಾಕ್ ನಾ ತಶೆಂ ನೀಟ್ ರಾವ್ಲ್ಲೊ ತೊ ಘುಮ್ಟೊ. ನಶ್ವರ್ ಮನ್ಶಾಕ್ ’ತುಂ ಕಿತ್ಲೊ ಆಲ್ಪೊ! ಹರ್ಯೇಕಾ ಸಂಗ್ತಿತ್ ಕಿತ್ಲಿ ಖಂತ್ ತುಂ ಕರ್ತಾಯ್! ಮ್ಹಾಕಾ ಪಳೆ, ಕಸಲ್ಯಾಚ್ ಸಂಗ್ತಿಚಿ ಪರ್ವಾನಾ. ಹಾಂವ್ ಕಿತ್ಲೊ ಸುಖಿ!" ಆಶೆಂ ಮಣ್ತಾಸೊ ತೊ ದಿಸ್ತಾಲೊ.
ಥೊಡೊ ವೇಳ್ ತಿಂ ನಿಶ್ಚಲ್ ರಾವೊನ್ ಘುಮ್ಟ್ಯಾಕ್ ಪಳೆತಾಲಿಂ ತಿಂ, ಉಪ್ರಾಂತ್ ಖಡ್ಪಾಚೆರ್ ಬಸ್ಲಿಂ. ಉಂಚ್ಲ್ಯಾ ತ್ಯಾ ಗುಡ್ಯಾರ್ ಥಾವ್ನ್ ಕಾರ್ಕಳ್ ಶಹರ್ ಸಗ್ಳೆಂ ದಿಷ್ಟಿಕ್ ಪಡ್ತಾಲೆಂ. ಸುರ್ಯೊ ಆತಾಂ ಗುಡ್ಯಾಂ ಮಧೆಂ ನಪಂಯ್ಚ್ ಜಾತಾಲೊ. ಮಂಗ್ಳೂರಾಂತ್ ಸುರ್ಯೊ ಬುಡ್ತಾನಾ ದಿಸ್ಚಿ ದೀಷ್ಟ್ಚ್ ದುಸ್ರಿ. ಥಂಯ್ ದರ್ಯಾಂತ್ ತೊ ಲಿಪ್ತಾಲೊ ದಿಸ್ತಾನಾ, ಮೊಳಾಬ್ ಉಜ್ವಲ್ ತಾಂಬ್ಡೆಂ ಜಾವ್ನ್ ಪ್ರಜಳ್ತಾಲೆಂ. ಹಾಂಗಾಚಿ ದ್ರಶ್ಯಾಚ್ ವೆಗ್ಳಿ. ರೂಕ್ ಝಡಾಂ ಆನಿಂ ಗುಡ್ಯಾ ಮಧೆಂ ಸುರ್ಯೊ ಬುಡ್ತಾನಾ ವಿಚಿತ್ರ್ ಏಕ್ ಸೊಭಾಯ್ ಭುಮಿರ್ ಫಾಂಕ್ತಾಲಿಂ.
ಸ್ರಷ್ಟೆಚ್ಯಾ ಸೊಭಾಯೆಂತ್ ತಲ್ಲೀನ್ ಜಾಲ್ಲ್ಯಾ ತಾಕಾ ಜೆಸ್ಸಿ ಜಾಗಾವ್ನ್ ಮ್ಹಣಾಲೆಂ - "ಮೆಲ್ವಿನ್, ಕಿತೆಂ ಸ್ವಪ್ಣೆತಾಯ್ಗಿ ಕಿತೆಂ?"
"ಹಾಂ....." ತೊ ಜಾಗ್ರುತ್ ಜಾಲೊ. ಜೆಸ್ಸಿ ಎಕ್ಲೆಂಚ್ ತಾಚ್ಯಾ ಸಾಂಗಾತಾ ಬಸೊನ್ ಆಸ್ಲ್ಲೆಂ ತಾಣೆಂ ದೆಖ್ಲೆಂ. ವಿಜ್ಮಿತ್ ಜಾವ್ನ್ ತೊ ಮ್ಹಣಾಲೊ -"ಗಿಬ್ಬಾ ಆನಿಂ ರಿಜಾ?"
ತೆಂ ಹಾಸ್ಲೆಂ - "ಕವಿಕ್ ಆಪ್ಲ್ಯಾ ಕಲ್ಪನಾ ರಾಜಾಂತ್ ಸೊಡ್ನ್ ದೊಗಾಂಯ್ ಗುಡೊ ಭವೊಂಕ್ ಗೆಲ್ಯಾಂತ್..."
ಏಖ್ ಕ್ಷಣ್ ವೊಗೊ ರಾವ್ಲೊ ತೊ. ಉಪ್ರಾಂತ್ ತಾಣೆಂ ಮ್ಹಳೆಂ "ಪುಣ್ ಕಲ್ಪನಾರಾಣಿಯೆಕ್ ಸೊಡ್ನ್ ಗೆಲ್ಯಾಂತ್?" ತೆಂ ಅಮ್ರುಕೆಂ ಹಾಸ್ತಾನಾ ತಾಚ್ಯಾ ಗಾಲಾಂಚೆರ್ ಪೊಂಡ್ ಪಡ್ತಾಲೆ. ಕಸಲೊ ಸುಂದರ್ ಹಾಸೊ. ಆಪ್ಲ್ಯಾ ವಿಚಿತ್ರ್ ಸೊಭಾಯೆಚಿ ಪರ್ವಾಚ್ ನಾತ್ಲ್ಲ್ಯಾ ಬರಿ ತೆಂ ಉಲೈಲೆಂ. "ಹಾಂವ್ ತುವೆಂ ಮ್ಹಣ್ಚ್ಯಾ ತಿತ್ಲೆಂ ಸೊಭಿತ್ ನ್ಹಂಯ್. ತುಜ್ಯಾ ತಿತ್ಲಿಂ ಯೋಗ್ಯತಾ ಯೇಂವ್ಕ್ ಹಾಂವೆಂ ತಪಾಸ್ ಕರುಂಕ್ಜಾಯ್"
"ಹಾಂ ಪುರೊ, ಶ್ರೇಷ್ಟ್ ಮನಿಸ್ ಆಪ್ಣಾಕ್ ಕೆದಾಳಾಯ್ ವ್ಹಡ್ ಕರ್ನ್ ಉಲೈನಾಂತ್"
"ಹಾಂವ್ ಶ್ರೇಷ್ಟ್" ಮೆಲ್ವಿನಾಕ್ ತಮಾಷೆ ಕರ್ಚ್ಯಾಬರಿ ತೆಂ ಹಾಸ್ಲೆಂ. "ಮ್ಹಾಕಾ ಫಾವೊ ನಹಿಂ ಆಸ್ಚೆಂ ಸ್ಥಾನ್ ತುಂ ದಿತಾಯ್. ಹಾಂವ್ ಚಿಂತ್ತಾಂ, ತುಕಾ ಮ್ಹಜೆರ್ ಆಸ್ಲ್ಲೊ ಮೋಗ್ಚ್ ಆಶೆಂ ಮ್ಹಣಾಶೆಂ ಕರ್ತಾಂ"
"ತುಂ ಕಿತೆಂಯ್ ಸಾಂಗ್ ಜೆಸ್ಸಿ. ತಳ್ವಾತ್ ಪಳೆಂವ್ಕ್ ಆರ್ಸೊ ನಾಕಾ" ಆಶೆಂ ಮ್ಹಣೊನ್ ಥೊಡೊ ವೇಳ್ ತೊ ವೊಗೊಚ್ ರಾವ್ಲೊ. ದುಸ್ರ್ಯಾ ದಿಸಾ ಮಂಗ್ಳೂರ್ ಪಾಟಿಂ ವೆಚಿ ಆಲೋಚನ್ ತಾಣೆಂ ಕೆಲಿ. ತರೀ ಜೆಸ್ಸಿಕ್ ಹಿ ಖಬಾರ್ ಕಶಿ ಸಾಂಗ್ಚಿ? ತಾಕಾ ಖಂಡಿತ್ ಜಾವ್ನ್ ಬೆಜಾರಾಯ್ ಬೊಗ್ತೆಲಿ....ತೊ ತ್ಯಾಚ್ ಚಿಂತ್ನಾಂನಿ ಮೌನ್ ಜಾವ್ನ್ ರಾವ್ಲೊ.
"ಚಿಂತ್ತಾಯ್ ಕಿತೆಂ ಮೆಲ್ವಿನ್! ಮ್ಹಜೆರ್ ಬೆಜಾರಾಯ್ಗಿ?" ವಿಚಾರ್ಲೆಂ ಜೆಸ್ಸಿನ್.
"ಬೆಜಾರಯ್ ತುಜೆರ್! ತುಜೆರ್ ಬೆಜಾರಾಯ್ ಕೆಲ್ಯಾರ್ ಹಾಂವ್ ಪಿಸೊ ಜಾಯ್ನ್, ಮ್ಹಣಾಲೊ ತೊ, "ಪುಣ್ ಜೆಸ್ಸಿ...."
"ಕಿತೆಂ? ಸಾಂಗ್.." ಮೆಲ್ವಿನಾಚೊ ಹಾತ್ ಆಪ್ಲ್ಯಾಂತ್ ಘೆವ್ನ್ ಉಲೈಲೆಂ ತೆಂ.
"ತುಕಾ ಹಿ ಖಬಾರ್ ಕಶಿ ಸಾಂಗ್ಚಿ.... ಹಾಂವೆಂ ಫಾಲ್ಯಾಂ ಮಂಗ್ಳೂರಾಕ್ ..."
ಅರ್ಧ್ಯಾರ್ಚ್ ತಾಚಿಂ ಉತ್ರಾಂ ಮೊಡ್ಲಿಂ ಜೆಸ್ಸಿನ್." ಫಾಲ್ಯಾಂಚ್ ಮಂಗ್ಳೂರ್ ವೆತಾಯ್..... ತೆಂ ಜಾಯ್ನಾ. ತುವೆಂ ಅನಿಕೀ ಥೊಡೆ ದೀಸ್ ರಾವಾಜಾಯ್.." ತಾಚೆಂ ತೊಂಡ್ ರಡ್ಕುರೆಂ ಜಾಲ್ಲೆಂ. ತಾಳ್ಯಾಂತ್ ಮೆಲ್ವಿನಾನ್ ರಾವಾಜಾಯ್ ಮ್ಹಳ್ಳಿ ವತ್ತಾಯ್ ಆಸ್ಲ್ಲಿ.
ಮೆಲ್ವಿನಾಕ್ ಕಿತೆಂ ಜಾಪ್ ದಿಂವ್ಚಿ ಕಳ್ಳೆಂ ನಾ. ಉತ್ರಾಂ ಚಿಂತುನ್ ತೊ ಮ್ಹಣಾಲೊ. "ಜೆಸ್ಸಿ, ತುಕಾ ಸೊಡ್ನ್ ವಚೊಂಕ್ ಮ್ಹಜೆಂಯಿ ಕಾಳಿಜ್ ರಡ್ತಾ. ಪುಣ್ ಹಾಂವೆಂ ಕ್ಲಾಸಿಕ್ ವಚಾಜಾಯ್ ನಹಿಂವೆ? ಕ್ಲಾಸ್ ಖಳ್ಳ್ಯಾರಿ ತಿತ್ಲೆಂ ವ್ಹಡ್ ನ್ಹಂಯ್. ಮಾಂಯ್ಚ್ಯಾ ತೊಂಡಾಂತ್ಲೆಂ ಕಶೆಂ ಬಚಾವ್ ಜಾಂವ್ಚೆಂ?"
ಪಯ್ಸ್ ದಿಗಂತಾಕ್ ದೀಷ್ಟ್ ಜೊಕುನ್ ಆಸ್ಲ್ಲೆಂ ಜೆಸ್ಸಿ. ಹಾಳ್ವಾಯೆನ್ ವ್ಹಾಳ್ಚ್ಯಾ ವಾರ್ಯಾಕ್ ತಾಚೆ ಮುದಿಯಾಳೆ ಕೇಸ್ ಉಬ್ತಾಲೆ. ದುಸ್ರ್ಯಾ ಘಡಿಯೆ ತೆಂ ತಕ್ಲಿ ಹಾಲೊವ್ನ್ ಮ್ಹಣಾಲೆಂ "ವ್ಹಯ್...ತುವೆಂ ಪಾಟಿಂ ವಚೊಂಕ್ಜಾಯ್. ಮ್ಹಜೆ ಖಾತಿರ್ ತುವೆಂ ಕ್ಲಾಸ್ ಖಳೊಂಕ್ ನಜೊ"
ಮೆಲ್ವಿನಾಚೆಂ ಕಾಳಿಜ್ ಭರಾಧಿಕ್ ಜಾಲೆಂ - "ತುಕಾ ಬೆಜಾರಾಯ್ ಜಾತಾ ತರ್, ಹಾಂವ್ ರಾವ್ತಾಂ ಜೆಸ್ಸಿ.."
"ನಾ ಮ್ಹಾಕಾ ಕಸಲಿ ಬೆಜಾರಾಯ್? ಎದೊಳ್ಚ್ ತುಜಿ ದೋನ್ ದಿಸಾಂಚಿ ಕ್ಲಾಸ್ ಖಳ್ಳಿ ಆನಿಂ ಮ್ಹಸ್ತ್ ಲಿಸಾಂವ್ ತುಕಾ ಚುಕ್ಲೆಂ. ತುಕಾ ವತ್ತಾಯೆನ್ ರಾವ್ ಮ್ಹಣ್ಚೆಂ ಮ್ಹಜೆಂಚ್ ಪಿಶೆಪಣ್..." ಆಶೆಂ ಸಾಂಗೊನ್ ತೆಂ ಬಾರೀಕ್ ಹಾಸ್ಲೆಂ.
ಸುರ್ಯೊ ಬುಡ್ಲ್ಲೊ. ಪುಣ್ ಭುಮಿ ವಯ್ಲೊ ಪ್ರಕಾಸ್ ಮಾಜ್ವೊಂಕ್ ನಾತ್ಲ್ಲೊ. ಫಾಡ್ಲಾ ಕುಶಿಂ ಅಂತ್ರಳಾಕ್ ದೀಷ್ಟ್ ಜೊಕುನ್ ಮೆಲ್ವಿನಾನ್ ಮ್ಹಳೆಂ. "ಸುರ್ಯೊ ಬುಡ್ಲೊ ಜೆಸ್ಸಿ...."
ಜೆಸ್ಸಿನ್ ದೀರ್ಘ್ ಏಕ್ ಶ್ವಾಸ್ ಸೊಡ್ಲೊ. "ಜಲ್ಮಲ್ಲಿ ಹರ್ಯೇಕ್ ವಸ್ತ್ ನಪಂಯ್ಚ್ ಜಾತಾ ಮೆಲ್ವಿನ್. ಸಂಸಾರಾಚಿ ರೀತ್ ತಿ." ಸವ್ಕಾಸ್ ಉತ್ರಾಂ ತಾಚ್ಯಾ ತೊಂಡಾಂತುನ್ ಭಾಯ್ರ್ ಪಡ್ಲಿಂ.
ವಿಜ್ಮಿತ್ ಜಾವ್ನ್ ತೊ ಜೆಸ್ಸಿಕ್ಚ್ ಪಳೆಂವ್ಕ್ ಪಡ್ಲೊ. ಜೆಸ್ಸಿಚ್ಯಾ ಮುಖಾಚೆರ್ ತ್ಯಾ ಸ್ವಾಭಾವಿಕ್ ಹಾಸ್ಯಾಂ ಮಧೆಂ ದುಃಖಾಚಿ ನಿಶಾನಿ ಉದೆಲ್ಲಿ. ದೊಳ್ಯಾಂಚ್ಯಾ ಕುಶಿಂನಿ ಮೊತಿಯಾಂ ಸಾರ್ಕಿಂ ದೋನ್ ದುಃಖಾಂ ಆಯ್ತಿಂ ರಾವ್ಲ್ಲಿಂ. ಆಸ್ಡ್ಯೊ ಪಾಪ್ಡಿನಾಸ್ತಾಂ ತೆಂ ಪಯ್ಸ್ ಖಂಯ್ಗಿ ದೆಖ್ತಾಲೆಂ - ಕಿತೆಂಗಿ ಸೊದ್ಚ್ಯಾಬರಿ ಆನಿಂ ತ್ಯಾ ಸೊಧ್ನೆಂತ್ ಸಲ್ವಲ್ಲ್ಯಾಬರಿ.
"ತುಂ ಕಿತ್ಯಾಕ್ ರಡ್ತಾಯ್ ಜೆಸ್ಸಿ? ತುಜ್ಯಾ ಉಲಣ್ಯಾಚೊ ಇರಾದೊ ಮ್ಹಾಕಾ ಕಳಾನಾ" ಮೆಲ್ವಿನ್ ಕಳ್ವಳೊನ್ ಸಾಂಗಾಲಾಗ್ಲೊ.
"ಮೆಲ್ವಿನ್....ಫಾಲ್ಯಾಂ ಹಾಂವ್ ಮೊರಾನ್ ತರ್, ಕಿತೆಂ ಕರ್ತಾಯ್?" ಜೆಸ್ಸಿನ್ ಸವಾಲ್ ಉಡೈಲೆಂ.
ಅನೀರಿಕ್ಶಿತ್ ಜಾವ್ನಾಸ್ಲ್ಲೆಂ ತೆಂ ಸವಾಲ್. ಮೆಲ್ವಿನಾಕ್ ಹಾಸ್ಚೆಂ ವ ರಡ್ಚೆಂ ತೆಂ ಕಳ್ಳೆಂನಾ. ಏಕ್ ಕ್ಷಣ್, ಜಾಪ್ ದಿಂವ್ಚ್ಯಾ ಸೊಧ್ನೆಂತ್ ತೊ ಗುಸ್ಪುಡ್ಲೊ. ಉದ್ವೇಗಾನ್ ಜೆಸ್ಸಿಚೊ ಹಾತ್ ಧರ್ನ್ ತಾಣೆಂ ಮ್ಹಳೆಂ - "ಜೆಸ್ಸಿ, ತುಂ ಆಶೆಂ ಕಿತ್ಯಾಕ್ ಮ್ಹಣ್ತಾಯ್? ಆಮ್ಚ್ಯಾ ಹ್ಯಾ ಅಮರ್ ಮೊಗ ಮಧೆಂ ಮೊರ್ನಾಚಿ ಖಬಾರ್ ಕಿತ್ಯಾಕ್ ಹಾಡ್ತಾಯ್. ತುಂ ಮೊರಾನಾಂಯ್ ಆನಿಂ ಹಾಂವ್ಯಿ ಮೊರಾನಾ. ಪಳೆ ಜೆಸ್ಸಿ, ಹಾಂವೆಂ ದೆಖ್ಲಾಂ ಏಕ್ ಸುಂದರ್ ಸ್ವಪಾಣ್. ಮ್ಹೊಂವಾ ಸಾರ್ಕ್ಯಾ ತ್ಯಾ ಸ್ವಾಧಿಕ್ ರಾಜಂತ್ ಹಾಂವ್ ಆನಿಂ ತುಂಚ್ ಜೆಸ್ಸಿ ಮ್ಹಜೆಂ ಸ್ವಪಾಣ್ ಫಟ್ಕಿರೆಂ ನ್ಹಂಯ್. ಫಾಲ್ಯಾಂ ಹೆಂ ಸ್ವಪಾಣ್ ನೀಜ್ ಜಾಂವ್ಕ್ ಆಸಾ. ತೆದಾಳಾ ಮ್ಹಜೊ ಆನಿಂ ತುಜೊ ಎಕ್ವೊಟ್ ಜಾತಾಲೊ. ಆಮಿಂ ಆಮ್ಚೆಂಚ್ ರಾವ್ಳೆರ್ ಬಾಂದುನ್ ಜಿಯೆತೆಲ್ಯಾಂಚ್ ಜೆಸ್ಸಿ. ಥಂಯ್ ಕಸಲ್ಯಾಚ್ ಖಂತಿ ಬೆಜಾರಾಯೆಕ್. ತಾಳ್ನ್ಯಾ ವಿಘ್ನಾಂಕ್ ಆಸ್ರೊ ಆಸ್ಚೊನಾ. ಹ್ಯಾ ಸಂಸಾರಾಥಾವ್ನ್ ಭೋವ್ ಪಯ್ಸ್....... ಪಯ್ಸ್ ತ್ಯಾ ರಾಜಾಂತ್ ಮ್ಹಜ್ಯಾ ಆನಿಂ ತುಜ್ಯಾ ಬಗಾರ್ ಕೊಣ್ಂಚ್ ಆಸ್ಚೊನಾ. ಜೆಸ್ಸಿ... ತುಂ ಕಾಂಯ್ಚ್ ಬಿಂಯೆನಾಕಾ...."
ಜೆಸ್ಸಿನ್ ದುಃಖಾಂ ಪುಸ್ಲಿಂ. "ಹಾಂವ್ ಜಾಣಾ ಮೆಲ್ವಿನ್. ತುಂ ಮ್ಹಾಕಾ ಕೆದಿಂಚ್ ಸಾಂಡ್ಚೊನಾಂಯ್ ಮ್ಹಣ್. ಹಾಂವ್ಯಿ ತುಕಾ ಸೊಡ್ನ್ ಮೊರಾಶಿನಾ. ತುಜೆಂ ಆನಿಂ ಮ್ಹಜೆಂ ಸ್ವಪಾಣ್ ನೀಜ್ ಜಾತೆಲೆಂ..." ಅಮ್ರುಕೆಂ ಹಾಸೊನ್ ತೆಂ ಉಲೈಲೆಂ.
ಸುಕ್ಣಿಂ ಸಾವ್ಜಾಂ ಘೊಂಟೆರಾಕ್ ಉಬೊನ್ ವೆತಾಲಿಂ. ಆಯ್ಚ್ಯಾ ದಿಸಾಚೊ ವಾವ್ರ್ ಸಂಪ್ಲೊ ಮ್ಹಣ್ಚ್ಯಾ ಅರ್ಥಾರ್. ಹಿಂವಾಳ್ ವಾರೆಂ ಆತಾಂ ವ್ಹಾಳೊನ್ ಯೆತಾಲೆಂ. ಮೆಲ್ವಿನಾಕ್ ಆನಿಂ ಜೆಸ್ಸಿಕ್, ಭವಿಷ್ಯಾಚ್ಯಾ ಚಿಂತ್ನಾಂನಿ ಭಂವ್ತೊಣಿಚ್ಯಾ ವಾತಾವರಣಾಚಿ ಪರ್ವಾಚ್ ನಾತ್ಲ್ಲಿ. ದೊಗಾಂಯ್ಚಿ ಕಾಳ್ಜಾಂ ಸಂತೊಸಾನ್ ಫುಲ್ಲ್ಲಿಂ. ’ತೊ ದೀಸ್ ಆಮಿಂ ಆಶೆಂವ್ಚೊ ತೊ ದೀಸ್ ವೆಗಿಂಚ್ ಯೇಂವ್ದಿ...’ ಆಶೆಂ ಜಾವ್ನಾಸ್ಲ್ಲೆಂ ತಾಂಚೆಂ ಮಾಗ್ಣೆ
ತ್ಯಾಚ್ ವೆಳಾರ್, ಚಿಕ್ಕೆ ಪಯ್ಸ್ ಎಕಾ ಖಡ್ಪಾಕ್ ಬಸ್ಲ್ಲೊ ಗಿಬ್ಬಾ ಸಿಗ್ರೆಟಿಚೆಂ ಮೂಳ್ ಚಿಂವ್ತಾಲೊ. ತಾಚೆ ಥಾವ್ನ್ ಚಿಕ್ಕೆ ಸರೊನ್ ಬಸ್ಲ್ಲೆಂ ರಿಜಾ ಅಂತ್ರಳಾಕ್ ದೆಖ್ತಾಲೆಂ. ರಿಜಾಚೆಂ ಮುಖಮಳ್ ಬಾವ್ಲ್ಲೆಂ.
"ರಿಜಾ......ಉಲೈನಾಂಯ್ ಕಿತ್ಯಾಕ್? ಹಾಂಗಾ ಕೊಣೀ ನಾ ತುಜಿಂ ಉತ್ರಾಂ ಆಯ್ಕೊಂಕ್..." ಮ್ಹಣ್ತಾಲೊ ಗಿಬ್ಬಾ.
"ಹಾಂವ್ ತುಜೆಲಾಗಿಂ ಉಲೈಂಚ್ ನಾ..." ಕ್ರತಕ್ ರಾಗಾನ್ ತೆಂ ಮ್ಹಣಾಲೆಂ.
"ಹಾಂವೆಂ ಕರ್ಚೆಂ ಕಿತೆಂ ಸಾಂಗ್ ಮ್ಹಜ್ಯಾ ಬಾಂಗಾರಾ..." ರಂಗೊವ್ನ್ ಮ್ಹಣಾಲೊ ತೊ, "ಹಾಂವ್ ಜರ್ತರ್ ಫಾಲ್ಯಾಂಚ್ಯಾ ದಿಸಾ ಘರಾ ಪಾವನಾ. ಘರ್ಚಿಂ ಹಾಂವ್ ಮೆಲೊಂ ಮ್ಹಣ್ ಮೊರ್ನಾಚೆಂ ಮೀಸ್ ದೀಂವ್ಕ್ ಆಸಾತ್"
"ತರ್, ಹಾಂಗಾ ಆಯಿಲ್ಲೊಯ್ ಕಿತ್ಯಾಕ್?"
"ಆಯಿಲ್ಲೊಂ ಕಿತ್ಯಾಕ್ ತೆಂಚ್ ಹಾಂವ್ ನೆಣಾ. ಬಹುಶಃ ಮ್ಹಜ್ಯಾ ಸೊವ್ಯಾ ಜ್ಞಾನೇಂದ್ರಿಯಾಕ್ Sixಣh Seಟಿse ಕಳ್ಲ್ಲೆಂ ಮ್ಹಣ್ ದಿಸ್ತಾ. ’ಕಾರ್ಕಳ್ ಗೆಲ್ಯಾರ್ ರಿಜಾ ಮ್ಹಳ್ಳ್ಯಾ ಎಕ್ಲ್ಯಾಕ್ ಪಳೆತೊಲೊಯ್’ ಮ್ಹಣ್. ನ್ಹಂಯ್ ತರ್ ಮ್ಹಾಕಾ ಕಿತೆಂ ಸ್ವಪಾಣ್ ಪಡ್ಲ್ಲೆಂವೆ ತುಂ ಹ್ಯಾ ಸಂಸರಾಂತ್ ಜಲ್ಮಾಲಾಂಯ್ ಮ್ಹಣ್?"
"ತುಕಾ ಆನಿಂ ದೋನ್ ದೀಸ್ ರಾವೊಂಕ್ ಕಿತೆಂ" ಪರಾತ್ಲೆಂ ತಾಣೆಂ.
"ರಾವ್ತೊ....ಪುಣ್ ರಿಜಾ, ಚೆಡ್ವಾಂ ಆಸ್ಲ್ಲ್ಯಾ ಕಡೆ ಮಹಾವೀಘ್ನ್ ಮ್ಹಣ್ತಾತ್. ಘೊಡ್ಯಾಚ್ಯಾ ಪಾಟ್ಲ್ಯಾನ್ ಆನಿಂ ಚೆಡ್ವಾಚ್ಯಾ ಮುಖ್ಲ್ಯಾನ್ ರಾವನಾಕಾ ಮ್ಹಳಾಂ ಕೊಣೆಂಗಿ..."
"ಛಿ.....ತಿ ಗಾದ್ ಘಡ್ಲ್ಲ್ಯಾಂಚೆಂ ಸತ್ತ್ಯಾನಾಸ್ ಜಾಂವ್ಕ್. ಚೆಡ್ವಾಂ ಕಿತೆಂ ವೀಘ್ನ್ ಹಾಡ್ತಾತ್ ತುಮ್ಕಾಂ ಚೆಡ್ಯಾಂಕ್?" ರಾಗಾನ್ ತೆಂ ಉಲೈಲೆಂ.
"ರಿಜಾ....ಚೆಡುಂ ಮ್ಹಳ್ಯಾರ್ ತಾಳ್ನಿ. ಆದ್ಲೆ ಋಷಿ ಸಗ್ಳೆ ಚೆಡ್ವಾಂಕ್ ಪಳೆಲ್ಯಾರ್ ಸತ್ತ್ಯಾನಾಸ್ ಜಾಯ್ತ್ ಮ್ಹಳ್ಳ್ಯಾ ಬಿಂಯಾನ್ ಹಿಮಾಲಯಾಕ್ ವಚೊನ್, ಏಕಾಂತರ್ ಜಾಗ್ಯಾರ್ ತಪಾಸ್ ಕರ್ತಾಲೆ. ಹಾಂವೆಂ ಹೆಂ ಪೂರಾ ಕಿತ್ಯಾಕ್ ಸಾಂಗ್ಚೆಂಗಿ ಮ್ಹಳ್ಯಾರ್ .....ತುಕಾ ಮ್ಹಜೆಲಾಗಿಂ ಕಾಜಾರ್ ಜಾಂವ್ಕ್ ಮನ್ ಆಸಾಮೂ..?"
"ತುಕಾ ಲಜ್ಚ್ ನಾ...ಕಿತೆಂ ಕಿತೆಂ ಉಲೈತಾಯ್" ಲಜೆನ್ ದೊಡೊನ್ ತೆಂ ಮ್ಹಣಾಲೆಂ.
"ರಿಜಾ.....ಹಾಂವೆಂ ಸಾಂಗ್ಚೆಂ ಕಿತೆಂಗಿ ಮ್ಹಳ್ಯಾರ್ ತುಜೆಲಾಗಿಂ ಕಾಜಾರ್ ಜಾಂವ್ಕ್ ಜಾಯ್ ಜಾಲ್ಯಾರ್ ಹಾಂವೆಂ ಜೊಡಿರ್ ಪಾವಾಜಾಯ್. ಜೊಡಿರ್ ಪಾವೊಂಕ್, ಮ್ಹಜೆಂ ಶಿಕಾಪ್ ಕಾಬಾರ್ ಜಾಯ್ಜಾಯ್. ಆನಿಂ ಶಿಕಾಪ್ ಕಾಬಾರ್ ಕರಿಜಾಯ್ ಜಾಲ್ಯಾರ್ ತುವೆಂ ಮ್ಹಜೆ ಥಾವ್ನ್ ಪಯ್ಸ್ ಆಸೊಂಕ್ ಜಾಯ್ ರಿಜಾ. ಕಿತ್ಯಾಕ್, ತಾಕಾ ಪಳೆತಾನಾ ಮ್ಹಜೆಂ ಶಿಕಾಪ್ ಗುಡೊ ಚಡ್ತೆಲೆಂ. ಆನಿಂ ಹಾಂವ್ ಕಾರ್ಕಳ್ಚೊ ಘುಮ್ಟೊ ಜಾತೊಲೊಂ..." ತಾಣೆಂ ಹಾಸೊನ್ ಮ್ಹಳೆಂ.
ರಿಜಾನ್ಯಿ ಹಾಸೊ ದಾಂಬುನ್ ಧರ್ನ್ ಮ್ಹಳೆಂ "ಹುಂ......ತರ್ ತುಕಾ ಮ್ಹಜೊ ಮೋಗ್ಚ್ ನಾ ಮ್ಹಣ್ ದಿಸ್ತಾ"
"ಮೋಗ್..?" ಕಿತೆಂ ಉಲೈತಾಯ್ ಮ್ಹಜ್ಯಾ ರಾಣಿಯೆ. ತುಜೆ ಖಾತಿರ್ ಸಾತ್ ಸಾಗೊರ್ ಉಪ್ಯೆಂವ್ಕ್ ತರೀ ಹಾಂವ್ ತಯಾರ್ ಆಸಾಂ. ಹಿಮಾಲಯ ಪರ್ವತ್ ಚಡೊಂಕ್ ಜಾಲ್ಯಾರಿ ಕಬೂಲ್ ಆಸಾಂ. ಚಡ್ ಕಿತ್ಯಾಕ್, ಮಂಗ್ಳೂರ್ಚ್ಯಾ ಸಿಟಿ ಬಸ್ಸಾಂನಿ, ಪಾವ್ಶಿಲ್ಯಾ ದಿಸಾಂನಿ ಪಯ್ಣ್ ಕರುಂಕ್ ಆನಿಂ ಸಿನೆಮಾಚಿ ಟಿಕೆಟ್ ಮಾರಾಮಾರಿ ಕರ್ನ್ ತರಿ ಕಾಡುಂಕ್ ಹಾಂವ್ ತಯಾರ್, ರಿಜಾ. ಉಲಯ್, ಥಂಡ್ ರಾವ್ಲೆಂಯ್ ಕಿತ್ಯಾಕ್? ಮ್ಹಜೆಂ ಕಾಳಿಜ್ ಪಳೆತಾಯ್ವೆ ತುಂ?"
ರಿಜಾಕ್ ಹಾಸೊ ತಡ್ವುಂಕ್ ಜಾಂವ್ಕ್ ನಾ. ಗಿಬ್ಬಾಯಿ ಹಾಸ್ಲೊ.
"ಪಳೆಯಾಂ, ತುಜೆಂ ಕಾಳಿಜ್ ಕಶೆಂ ಆಸಾ ಏಕ್ ಪಾವ್ಟಿಂ ಪಳೆವ್ನ್ ಸೊಡ್ತಾಂ" ರಿಜಾ ಮ್ಹಣಾಲೆಂ.
"ಪುರೊ....ಕಾನೂನಾಂ ಪುರೊ. ಮ್ಹಜೆಂ ಕಾಳಿಜ್ ಪಳೆಂವ್ಚ್ಯಾ ಆಶೆನ್ ಮ್ಹಾಕಾ ಮೊರ್ ಮ್ಹಣ್ತಾಯ್ ಕೊಣ್ಣಾ! ಚಲ್ ರಿಜಾ...... ಕಾಳೊಕ್ ಪಡೊನ್ ಆಯ್ಲೊ. ಕಾಳೊಕ್ ಜಾತಾನಾ ಮೆಲ್ವಿನಾಕ್ ಭ್ಯೆಂ ದಿಸ್ತಾ ಮ್ಹಣ್ತಾಲೊ" ಗಿಬ್ಬಾ ಸಾಂಗಾಲಾಗ್ಲೊ.
ದೊಗಾಂಯ್, ಮೆಲ್ವಿನ್ ಆನಿಂ ಜೆಸ್ಸಿ ಆಸ್ಲ್ಲ್ಯಾ ಕಡೆ ಆಯ್ಲಿಂ. ಪರ್ತುನ್ ಗಜಾಲಿ ಕರಿತ್ತ್, ಸಾಡೆ-ಸಾತ್ ಜಾತಾನಾ ಘರಾ ಯೇವ್ನ್ ಪಾವ್ಲಿಂ.
ದುಸ್ರ್ಯಾ ಸಕಾಳಿಂ ದೊಗಿ ಮಂಗ್ಳೂರಾಕ್ ಭಾಯ್ರ್ ಸರ್ತಾನಾ, ತಾಂಕಾಂ ವಚೊಂಕ್ ಸಬಾರ್ ಅಡ್ಜಳಿ ಆಸ್ಲ್ಲ್ಯೊ. ಕಾಮಿಲ್ ಶೆಣಯ್ ಆನಿಂ ರೊಫಿನ್ ಬಾಯೆನ್ ಮ್ಹಸ್ತ್ ಸಮ್ಜಾವ್ನ್, ವಚೊಂಕ್ ರಜಾ ಮೆಳಾಶೆ ಕರುಂಕ್ ಬಾರಿಚ್ ವಾಂವ್ಟ್ ಲಾಗ್ಲಿ ಹಾಂಕಾಂ.
’ತುಮಿಂ ರಾವಾನಾ ಮ್ಹಣ್ತಾತ್ ತರ್, ಆಮಿಂ ಕಿತೆಂ ಕರ್ಯೆತಾ? ಅಪ್ರೂಪ್ ಆಯಿಲ್ಲೆ ಸಯ್ರೆ, ಏಕ್ ಚಾರ್ ದೀಸ್ ರಾಂವ್ಚೆಂ ಸೊಡ್ನ್ ಆತಾಂಚ್ ಪೊಟ್ಲಿ ಬಾಂದ್ತಾತ್" ರೊಫಿನ್ ಬಾಯ್ ಮ್ಹಣಾಲಿ.
"ಛೆ, ತಶೆಂ ಮ್ಹಣಾನಾಕಾ ಮಾವ್ಶೆ. ಆಮ್ಕಾಂ ತರ್ ರಜಾ ಆಸ್ಲ್ಲಿ, ತುಮಿಂ ಲೊಟುನ್ ಭಾಯ್ರ್ ಘಾಲ್ಯಾರಿ ಆಮಿಂ ವೆತೆನಾಂವ್" ಗಿಬ್ಬಾ ಸಾಂಗಾಲಾಗ್ಲೊ.
"ವ್ಹಯ್, ಕೊಲೆಜಿಚೆಂ ನೀಬ್ ಏಕ್ ಬರೆಂಚ್ ದಿಲೆಂಯ್ ತುವೆಂ. ಆನಿಂ ತರ್, ಕೆದಾಳಾ ಯೆತಾತ್?"
"ಖಂಡಿತ್ ಪರ್ತುನ್ ಯೆತೆಲ್ಯಾಂವ್ ಮಾವ್ಶೆ. ಪುಣ್ ತಾಚ್ಯಾ ಪಯ್ಲೆಂ, ತುಮಿಂ ಕೊಡಿಯಾಳ್ ಯೇಂವ್ಕ್ ಜಾಯ್. ಥೊಡ್ಯಾ ದಿಸಾಂಕ್ ಪುಣಿ ಆಮ್ಗೆರ್ ಸಯ್ರಿಂ ಜಾವ್ನ್ ರಾವಾಜಾಯ್" ಮೆಲ್ವಿನ್ ಸಾಂಗಾಲಾಗ್ಲೊ.
ರೊಫಿನ್ಬಾಯೆಚೆಂ ತೊಂಡ್ ಪ್ರಕಾಸ್ಭರಿತ್ ಜಾಲ್ಲೆಂ. ಕಿತೆಂಗಿ ಚಿಂತುನ್ ತಿ ಮ್ಹಣಾಲಿ -"ವ್ಹಯ್ ಪುತಾ. ಆಮ್ಕಾಂಯ್ ವೆಗಿಂಚ್ ಕೊಡಿಯಾಳಾಕ್ ಯೇಂವ್ಕ್ ಆಸಾ. ಖಂಯ್ಚ್ಯಾಕಿ ಮ್ಹಜೊ ಪೂತ್ ಹೆರಿ ಯೇಂವ್ದಿ. ತೆದಾಳಾ ಸಕ್ಡಾಂ ಆಮಿಂ ಕೊಡಿಯಾಳಾಕ್ ಆಯಿಲ್ಲಿಂ, ತುಮ್ಗೆರ್ಯಿ ಯೆತಾಂವ್. ಜೆಸ್ಸಿ ಜಾಣಾ ಆಸ್ತೆಲೆಂ ತುಜೆಂ ಘರ್.."
ಥಟ್ಟ್ ಕರ್ನ್ ಏಕ್ ಆವಾಜ್ ಜಾಲೊ. ಮೆಲ್ವಿನಾಚ್ಯಾ ಕಾಳ್ಜಾಕ್ ದಖೊ ಬಸ್ಲ್ಲ್ಯಾ ಬರಿ ಜಾಲೆಂ. ಆಂಗಾರ್ ಬಾರೀಕ್ ಘಾಮ್ ಸುಟ್ಲೊ. ತಾಂಕಾಂ ಕಾಫಿ ದೀಂವ್ಕ್ ಮ್ಹಣ್, ಟ್ರೇಂಯ್ತ್ ಗ್ಲಾಸ್ ಘೆವ್ನ್ ಯೆಂವ್ಚ್ಯಾ ಜೆಸ್ಸಿಚ್ಯಾ ಹಾತಾಂತ್ಲಿ ಟ್ರೇಯ್ ಸಕ್ಲಾ ಪಡ್ಲ್ಲಿ ಆನಿಂ ಗ್ಲಾಸ್ ಪಿಟೊ ಜಾಲ್ಲೊ. ಜೆಸ್ಸಿ ಬಾಗ್ವೊನ್ ಗ್ಲಾಸಾಚ್ಯೊ ಕೊಂವ್ಚಿ ವಿಂಚ್ತಾಲೆಂ.
ರೊಫೀನ್ಬಾಯೆನ್ ಮ್ಹಳೆಂ "ಓ...ಗ್ಲಾಸ್ ಪುಟ್ಲೊಗಿ ಪುತಾ? ಕಾಂಯ್ ವ್ಹಡ್ ನಾ. ಇತ್ಲಿ ಘಡ್ಬಡಿ ಕಿತ್ಯಾಕ್? ಪುಟ್ಲ್ಲೊ ಗೆಲೊ. ಜೆಸ್ಸಿ, ತುಂ ಊಟ್ ಥಂಯ್ಚೆ. ತೆಂ ಮಾಡ್ತು ಖಂಯ್ ಗೆಲೆಂ? ಏ ಮಾಡ್ತೊ....ಹಾಂಗಾ ಯೇಗೊ ಬಾಯೆ. ತ್ಯೊ ಕೊಂವ್ಚಿ ವೀಂಚ್.." ತಿಣೆಂ ಚಾಕರ್ನಿಕ್ ಆಪಯ್ಲೆಂ.
"ನಾ ಮಾವ್ಶೆ, ಹಾಂವ್ಚ್ ವಿಂಚ್ತಾಂ" ಜೆಸ್ಸಿನ್ ಏಕ್ ಘಡಿ ತಕ್ಲಿ ಉಕೊಲ್ಲಿ. ತಾಚ್ಯಾ ದೊಳ್ಯಾಂತ್ಲ್ಯಾನ್ ದುಃಖಾ ವ್ಹಾಳ್ಚಿ ದೆಖ್ಲಿಂ ಮೆಲ್ವಿನಾನ್. ತಾಚೆಂ ಕಾಳಿಜ್ಽಽಯಿ ಬಿಂಯಾನ್ ಉಡೊಂಕ್ ಲಾಗ್ಲೆಂ. ಕಿತ್ಯಾಕ್ ಮ್ಹಣ್ ತೊಚ್ ನೆಣಾ ಜಾಲೊ.
"ಪಿಶೆಂ ಚೆಡುಂ....ಗ್ಲಾಸ್ ಪುಟ್ಲ್ಲ್ಯಾಕಿ ರಡ್ತಾ. ತೆಂ ತಶೆಂಚ್ ಪುತಾ ಮೆಲ್ವಿನ್. ಹರ್ಯೇಕಾ ವಸ್ತುಚಿ ಜಾಗ್ರುತ್ಕಾಯ್ ಆನಿಂ ಮೋಗ್ ಚಡ್ ಜೆಸ್ಸಿಕ್" ರೊಫೀನ್ಬಾಯೆನ್ ಹಾಸೊನ್ ಮೆಲ್ವಿನಾಕ್ ಪಳೆತಾನಾ ತೊ ಬಲತ್ಕಾರಾಚೊ ಹಾಸೊ ಹಾಸ್ಲೊ.
ದುಸ್ರಿ ಕಾಫಿ ಹಾಡ್ಲ್ಲಿ ತೆ ಪಿಯೆಲೆ. ಉಪ್ರಾಂತ್ ನ್ಹೆಸೊನ್ ತಯಾರ್ ಜಾಲೆ. ಪರ್ತ್ಯಾನ್ ಏಕ್ ಪಾವ್ಟಿಂ ಸಕ್ಡಾಂಕ್ ಆದೇವ್ಸ್ ಮಾಗ್ಲೊ.
"ತಾಂಕಾಂ ಬಸ್ಸ್ಸ್ಟೇಂಡಾ ಮ್ಹಣಾಸರ್ ಪಾಂವ್ಕ್ ಕೊಣ್ ವೆತಾಗೊ?" ವಿಚಾರ್ಲೆಂ ಶೆಣೈನ್.
ಜೆಸ್ಸಿ ಆನಿಂ ರಿಜಾ ನ್ಹೆಸೊನ್ ತಯಾರ್ ರಾವ್ಲ್ಲಿಂ. ದೊಗಾಂಕ್ಯಿ ಪಳೆತಚ್ ಕಾಮಿಲಾಬ್ ಹಾಸ್ಲೊ ಆನಿಂ ಮ್ಹಣಾಲೊ. "ಹಾಂ..... ತರ್ನಾಟ್ಯಾಂಕ್ ಪಾಂವ್ಕ್ ವೆಚೆಂ ಕೊಣೆ, ತರ್ನಾಟ್ಯಾನಿಂಚ್. ಆಮ್ಕಾಂ ಮ್ಹಾತಾರ್ಯಾಂಕ್ ದುಸ್ರೆಂ ಕಾಮ್ ಆಸಾ. ವಚಾ....ವಚಾ"
"ಬರೆಂ ಮಾವ್ಶೆಂ, ಬಾಪ್ಪು......ಆಮಿಂ ವೆತಾಂವ್. ತುಮ್ಕಾಂ ಮಸ್ತ್ ದೇವ್ ಬರೆಂ ಕರುಂ" ದೊಗಾಂಯ್ನಿ ಸಾಂಗ್ಲೆಂ.
"ವಚೊನ್ ಯೆಯಾ ಪುತಾ. ವೆಗಿಂಚ್ ಆಮಿಂಯಿ ತುಮ್ಕಾಂ ಪಳೆಂವ್ಕ್ ಯೆತಾಂವ್" ರೊಫಿನ್ಬಾಯೆನ್ ಸಾಂಗಾಲಾಗ್ಲಿ.
ಚೊವ್ಗಾಂನಿ ಬಸ್ಸ್ಸ್ಟೆಂಡಾಚಿ ವಾಟ್ ಧರ್ಲಿ. ಪುಣ್ ವಾಟೆರ್ ಕೊಣೀ ಉಲೈಲಿನಾಂತ್. ಜೆಸ್ಸಿಚೆಂ ಮುಖಮಳ್ ಕಾಂತಿಹೀನ್ ಜಾಲ್ಲೆಂ. ತಾಣೆಂ ಧರ್ಣಿಕ್ ಜೊಕ್ಲ್ಲಿ ದೀಷ್ಟ್ ವಯ್ರ್ ಉಕಲ್ಲಿ ನಾ.....ಗಿಬ್ಬಾ ಆನಿಂ ರಿಜಾ...ತಿಂಯಿ ಮತಿಂತ್ ಕಿತೆಂಗಿ ಚಿಂತುನ್ ವೆಗಿಂಚ್ ಆಸ್ಲ್ಲಿಂ. ಮೆಲ್ವಿನಾಚೆಂ ಕಾಳಿಜ್ ಬಿಂಯಾನ್ ಧಡ್ದಾಡ್ತಾಲೆಂ.
ಬಸ್ಸಾಕ್ ಟಿಕೆಟ್ ಕಾಡುಂಕ್ ವೆತಾನಾ ಜೆಸ್ಸಿನ್ ವಿಚಾರ್ಲೆಂ - "ಪಯ್ಶೆ ಆಸಾತ್ಗಿ ಮೆಲ್ವಿನ್?" ತಾಳ್ಯಾಂತ್ ಸದಾಂಚೊ ಸ್ವಾದ್ ನಾತ್ಲ್ಲೊ.
"ವ್ಹಯ್ ಜೆಸ್ಸಿ. ತುಂ ಖಂತ್ ಕರಿನಾಕಾ" ಮೆಲ್ವಿನಾನ್ ಭಾರಾಧಿಕ್ ತಾಳ್ಯಾನ್ ಜಾಪ್ ದಿಲಿ. ತಾಣೆಂ ಟಿಕೆಟ್ ಘೆತಾನಾ, ಬಸ್ಸ್ ಸುಟೊಂಕ್ ತಯಾರ್ ಜಾಲ್ಲೆಂ.
"ವೆತಾಂ ಜೆಸ್ಸಿ...." ಕಾಂಪ್ಚ್ಯಾ ಸ್ವರಾನ್ ತೊ ಉಲೈಲೊ. "ರಿಜಾ.....ಆಮಿಂ ವಚೊನ್ ಯೆತಾಂವ್"
"ಮ್ಹಸ್ತ್ ಥ್ಯಾಂಕ್ಸ್ ತುಕಾ ಮೆಲ್ವಿನ್. ಗಿಬ್ಬಾ, ತುಕಾಯಿ ಥ್ಯಾಂಕ್ಸ್..." ರಿಜಾನ್ ಮ್ಹಳೆಂ.
"ಆಮ್ಚೊ ಉಗ್ಡಾಸ್ ದವರಾ. ಕಾರ್ಕಳ್ ಆಮ್ಕಾಂ ಪಳೆಂವ್ಕ್ ಮೆಳಾಶೆಂ ಕೆಲ್ಲ್ಯಾ ಜೆಸ್ಸಿಕ್ ಆನಿಂ ಸುಧಾರ್ಸುನ್ ವ್ಹೆಲ್ಲ್ಯಾ ರಿಜಾಕ್ ಮ್ಹಜಿ ಕ್ರತಜ್ಞಾತಾ.." ಗಿಬ್ಬಾನ್ ಸಾಂಗ್ಲೆಂ.
ಜೆಸ್ಸಿಚೆ ದೊಳೆ ಉಲೈತಾಲೆ. ಪುಣ್ ವೋಂಟ್ ಸುಟ್ಲೆನಾಂತ್. ತಾಚಿ ದೀಷ್ಟ್ ಪಳೆತಾನಾ ಮೆಲ್ವಿನಾಕ್ ಕಿತೆಂಶೆಂ ಭೊಗ್ಲೆಂ. ಚಡ್ ವೇಳ್ ರಾವ್ಲ್ಯಾರ್ ಆಪ್ಣಾಕ್ ರಡೊಂಕ್ ಯೆತೆಲೆಂ ಮ್ಹಣ್ ತೊ ಜಾಣಾ ಜಾಲ್ಲೊ. ಬೊಗ್ಣಾಂ ದಾಂಬುನ್ ದವರ್ನ್ ತೊ ಬಸ್ಸಾರ್ ಚಡ್ಲೊ. ತಾಚ್ಯಾ ಪಾಟಾಪಾಟ್ ಗಿಬ್ಬಾಯಿ ಗೆಲೊ. ಜೆಸ್ಸಿನ್ ಆನಿಂ ರಿಜಾನ್ ಹಾತ್ ಹಾಲೈಲೊ. ಹಾಣಿಂಯಿ ಪಾಟಿಂ ಹಾತ್ ಹಾಲೈಲೊ. ಬಸ್ಸ್ ಸುಟ್ಲೆಂ ಆನಿಂ ಕಾರ್ಕಳ್ ಪೆಂಟೆಕ್ ಪಾಟ್ ಕರ್ನ್ ಮಂಗ್ಳೂರ್ಚ್ಯಾ ವಾಟೆಕ್ ಲಾಗ್ಲೆಂ.
ಥಟ್ಟ್ ಕರ್ನ್ ಮೆಲ್ವಿನಾಕ್ ಆದ್ಲ್ಯಾ ಏಕಾ ತಸಲ್ಯಾಚ್ ಸಕಾಳಿಂಚೊ ಉಗ್ಡಾಸ್ ಆಯ್ಲೊ. ಜೆಸ್ಸಿ ಕಾರ್ಕಳ್ ವೆಚ್ಯಾ ಬಸ್ಸಾರ್ ಚಡೊನ್ ಬಸ್ಲ್ಲೆಂ. ಮೆಲ್ವಿನ್ ಸಕ್ಲಾ ಉಬೊ ರಾವೊನ್ ಆಸ್ಲ್ಲೊ. ತ್ಯಾ ವೆಳಾರ್ಯಿ ದೊಗಾಂಯ್ಚಿಂ ಕಾಳ್ಜಾಂ ರಡ್ತಾಲಿಂ. ವೆಗ್ಳಾಚಾರ್ ಸೊಸುಂಕ್ ತಾಂಕಾನಾಸ್ತಾಂ. ತರೀ ತ್ಯಾ ದುಃಖಾ ಮಧೆಂ ಎಕಾ ಥರಾಚೆಂ ಸಮಾಧಾನ್ ತಾಂಕಾಂ ಭೊಗ್ತಾಲೆಂ. ಪುಣ್ ಆಜ್.. ಆಜ್ ತೊ ಕೊಡಿಯಾಳಾಕ್ ಭಾಯ್ರ್ ಸರ್ಲ್ಲೊ. ’ತೊಚ್ ತಾತ್ಕಾಲಾಕ್ ವೆಗ್ಳಾಚಾರ್. ಕಿತ್ಯಾಕ್ ಬಿಂಯಾನ್ ಕಾಂಪ್ತಾ? ಆಪ್ಣಾಕ್ ಜಾಲಾಂ ಕಿತೆಂ? ಸಕಾಳಿಂ ಜೆಸ್ಸಿನ್ ಗ್ಲಾಸ್ ಪುಟೈಲ್ಲ್ಯಾಕ್ಗಿ? ನಾ......ತ್ಯಾ ಅಪಶಕುನಾಂಕ್ ಆಪ್ಣೆ ಕಿತ್ಯಾಕ್ ಭಿಂಯೆಜಾಯ್?...’ ಮೆಲ್ವಿನ್ ಚಿಂತ್ತಾಲೊ.
’ಹಾಂವ್ ಫಾಲ್ಯಾಂ ಮೊರಾನ್ ತರ್.....ಕಿತೆಂ ಕರ್ತೊಲೊಯ್ ಮೆಲ್ವಿನ್?’
ತೊ ಪಯ್ಸ್ ಗುಡ್ಯಾರ್ ದಿಸ್ಚ್ಯಾ ತ್ಯಾ ಘುಮ್ಟ್ಯಾಕ್ಚ್ ಪಳೆತಾಲೊ - ಬಸ್ಸ್ ಧಾಂವ್ತಾನಾ, ಕಾಲ್ಚ್ಯಾ ಸಾಂಜೆರ್ ಜೆಸ್ಸಿನ್ ಮ್ಹಳ್ಳೆಲಿಂ ಉತ್ರಾಂ, ಆತಾಂ ಥಂಯ್ ಥಾವ್ನ್ ವ್ಹಾಳೊನ್ ಯೆಂವ್ಚ್ಯಾಬರಿ ಆಯ್ಕಾಲಿಂ ತಾಕಾ.
’ನಾ ಜೆಸ್ಸಿ....ತುಂ ಮೊರಾನಾಂಯ್. ಏಕ್ ಗ್ಲಾಸ್ ಪಿಟೊ ಜಾಲೊ ಮ್ಹಣ್ ತ್ಯಾಚ್ಪರಿಂ ಮ್ಹಜ್ಯಾ ದೊಳ್ಯಾಂ ಥಾವ್ನ್ ನಪಂಯ್ಚ್ ಜಾತೆಲೆಂಯ್ಗಿ? ನಾ.......ನಾ. ಹಾಂವ್ ಬೊಲ್ಮೆ ಪಾತ್ಯೆನಾ...’
’ಹಾಂವೆಂ ಏಕ್ ಸುಂದರ್ ಸ್ವಪಾಣ್ ದೆಖ್ಲಾಂ ಜೆಸ್ಸಿ. ತ್ಯಾ ಮ್ಹೊಂವಾ ಸಾರ್ಕ್ಯಾ ರಾಜಾಂತ್ ಹಾಂವ್ ಆನಿಂ ತುಂಚ್......ಹಾಂವ್ ಆನಿಂ ತುಂಚ್...ಹಾಂವ್ ಆನಿಂ...’
ಸಟ್ಟ್ ಕರ್ನ್ ತಾಚ್ಯಾ ಚಿಂತ್ನಾಂಕ್ ಭಂಗ್ ಜಾಲೊ. ತಾಚೊ ದಾವೊ ದೊಳೊ ಜ್ಯೋರಾನ್ ಉಡೊಂಕ್ ಲಾಗ್ಲೊ.
’ಹ್ಯಾ ಸಂಸಾರಾಥಾವ್ನ್ ಭೋವ್ ಪಯ್ಸ್.....ಪಯ್ಸ್ ತ್ಯಾ ರಾಜಾಂತ್....’ ಮೆಲ್ವಿನಾಕ್ ಆಪ್ಲೆಂ ಮ್ಹಳ್ಳೆಲಿಂಚ್ ಉತ್ರಾಂ ತ್ಯಾ ಗುಡ್ಯಾ ಥಾವ್ನ್ ಬೋಬ್ ಮಾರ್ನ್ ಯೆಂವ್ಚ್ಯಾ ಬರಿ ಬೊಗ್ಲೆಂ. ತಾಣೆಂ ಕಾನ್ ಧಾಂಪ್ಲೆಂ.
"ಹೆಂ ಸ್ವಪಾಣ್.....ಹೆಂ ಸ್ವಪಾಣ್......ನಿರ್ಭಾಗ್ಯಾಚೆಂ ಸ್ವಪಾಣ್......" ತಾಚ್ಯಾ ಕಾನಾಂಕ್ ಭಾಲಿಯೆಬರಿ ತಿಂಚ್ ಉತ್ರಾಂ ಆಪ್ಟಾತಾತ್ಶಿ ದಿಸ್ಲೆಂ. ಆಪ್ಶೆಂಚ್ ಮೆಲ್ವಿನಾಚ್ಯಾ ದೊಳ್ಯಾಂತ್ಲ್ಯಾನ್ ದುಃಖಾಂ ದೆವೊಂಕ್ ಸುರು ಜಾಲಿಂ.
[ನಿರ್ಬಾಗ್ಯಾಂಚೆಂ ಸ್ವಪಾಣ್! ನಿಜಾಕೀ ಮೆಲ್ವಿನ್ ನೆಣಾಸ್ಲ್ಲೊ ಆಪ್ಣಾ ಥಂಯ್ ಘಡೊಂಕ್ ಆಸ್ಚ್ಯಾ ಬಿರಾಂಕುಳ್ ಗಡಿತಾಂ ವಿಶ್ಯಾಂತ್. ಆನಿಂ ತಿಂ ತೊ ಆತಾಂಚ್ ಜಾಣಾ ಜಾಲ್ಲೊ ಜಾಲ್ಯಾರ್.....! ಪುಣ್, ನಶಿಬಾಚೊ ಕ್ರೂರ್ ಹಾತ್ ತಾಚೆ ವಿರೋಧ್ ಕಸೊ ಖೆಳ್ತಾ ತೆಂ ಮುಖ್ಲ್ಯಾ ಅಂಕ್ಯಾಂನಿ ಪಳೆಯಾಂ]
ನಿರ್ಭಾಗ್ಯಾಚೆಂ ಸ್ವಪಾಣ್: ಪ್ರಸ್ತಾವನ್. ಅವಸ್ವರ್ 1, 2, 3, 4, 5, 6, 7, 8, 9
About us | Feedback
| Contact us
Copyright © 2005
DAAIZ.COM All rights reserved.
Page concept, designed and maintained by Ashawadi
Publications
