ದಾಯ್ಜ್ ತೆಸಾಂವ್: "ಕೊಂಕ್ಣಿ ಉಲಯ್, ಕೊಂಕ್ಣಿ ಉರಯ್, ಕೊಂಕ್ಣಿ ಆಮ್ಚಿ ಆವಯ್"
ನಿರ್ಭಾಗ್ಯಾಚೆಂ ಸ್ವಪಾಣ್
ಅವಸ್ವರ್ 4
"ಹೆಂ ಕಸಲೆಂ ಫುಂಕ್ಯಾಚೆಂ ಸರ್ಕಸ್ಬಾ? ನ್ಹಂಯ್, ನ್ಹೆಸೊಂಕ್ ಕಳನಾತ್ಲ್ಲ್ಯಾನ್ಯಿ ಕಲ್ಸಾಂವ್ ಶಿರ್ಕಾಂವ್ಚೆಂ ಮ್ಹಳ್ಯಾರ್!" ಕೊಣ್ಗಿ ಎಕ್ಲೆಂ ವ್ಹಡ್ಲ್ಯಾನ್ ಮ್ಹಣಾಲೆಂ. ಆಯ್ಕಾಲ್ಲೊ ಮೆಲ್ವಿನ್ ತ್ಯಾ ರಾತ್ಚ್ಯಾ ಥಂಡಾಯೆಂತ್ಯಿ ಬಾರಿಕ್ ಘಾಮೆಲೊ.
"ಸಿಂತಿ, ಆನಿಂ ತುಂಯಿ ಪೆಂಟಾಂ ಘಾಲುಂಕ್ ಸುರು ಕರ್. ಶೂಸ್ ಮಾತ್ರ್ ಘಾಲಿನಾಕಾ. ಕುಸ್ತಿ ಕರ್ಚಿ ಪಡಾತ್!" ದುಸ್ರ್ಯಾಚೊ ತಾಳೊ.
ಬಾಕಿ ಆಸ್ಲ್ಲೆಂ ತೆಂ ಸಿಂತಿನ್ಚ್ ಸಂಪೂರ್ಣ್ ಕೆಲೆಂ. "ನ್ಹಂಯ್ಬಾ ತೆಜ್ಜು, ತೊ ಬೆಲ್ಟ್ ಪಳೆ, ಆಮ್ಚ್ಯಾ ಪೆಟ್ಯಾಕ್ ಬಾಂದುನ್ ಘಾಲುಂಕ್ ಜಾತೊ."
ಸಕ್ಡಾಂ ಜ್ಯೋರಾನ್ ಹಾಸ್ಲಿಂ. ಮೆಲ್ವಿನಾಕ್ ತ್ಯಾ ವೆಳಾ ಭೊಗ್ಲ್ಲಿಂ ಬೊಗ್ಣಾಂ ತೊಚ್ ಜಾಣಾ. ತಾಚಿ ಕೂಡ್ ಸಗ್ಳಿ ಕಾಂಪ್ಲಿ. ರಗಾತ್ ಸಳ್ಸಳ್ಳೆಂ. ತರ್ನಾಟ್ಯಾ ಆಪ್ಣಾಕ್ ಇತ್ಲ್ಯಾ ಚೆಡ್ವಾಂನಿ ಆಕ್ಮಾನ್ ಕೆಲ್ಲೊ. ತಾಂತುಯಿ ಸಿಂತಿ ಪ್ರಮುಖ್ ಪಾತ್ರ್ ಘೆವ್ನ್ ಆಪ್ಣಾಕ್ ಹಿಣ್ಸಿತಾನಾ ....’ದೆವಾ ಕಿತೆಂ ಹಾಂವ್ ಕರುಂ?’ ತಾಣೆಂ ದಾಂತ್ ಚಾಬ್ಲೆ.
’ಮೆಲ್ವಿನ್.. ಆಸಲೊ ಆಕ್ಮಾನ್ ಭೊಗುನ್ ತುವೆಂ ಥಂಡ್ ರಾಂವ್ಚೆಂ ನ್ಹಂಯ್. ಎಕಾ ಚೆಡ್ವಾನ್ ತುಕಾ ಹಿಣ್ಸುಂಚೆ ಮ್ಹಳ್ಯಾರ್ ಕಿತೆಂ? ಚೆಡ್ವಾಚ್ಯಾಕಿ ಹೀನ್ಗಿ ತುಂ? ಘೆ, ಪಾರಿಕ್ಪಣ್ ಘೆ" ತಾಚೆಂ ದುಃಖೇಸ್ತ್ ಕಾಳಿಜ್ ಬೋಬ್ ಮಾರ್ತಾಲೆಂ.
ತಾಚಿ ಚಾಲ್ ಸವ್ಕಾಸ್ ಜಾಲ್ಲಿ. ಕಿತೆಂಗಿ ಸಟ್ಟ್ ಕರ್ನ್ ಮತಿಂತ್ ನಿಯಾಳ್ನ್ ತಾಣೆ, ತುರ್ತಾಚಿಂ ಮೆಟಾಂ ಕಾಡ್ಲಿಂ. ’ಜಾಲ್ಲೆಂ ಜಾತಾ, ಸಿಂತಿಕ್ ಮುಖಾಮುಖಿಂ ಮೆಳೊನ್ ಬೂದ್ ಶಿಕೈತಾಂ’ ಆಶೆಂ ನಿಚೆವ್ ಕರ್ನ್ ತೊ ಘರ್ಚ್ಯಾ ಆಕ್ಕಾಡ್ಯಾಲಾಗಿಂ ರಾವ್ಲೊ.
ದೋನ್ ಮಿನುಟಾಂ ಪಾಶಾರ್ ಜಾಲಿಂ. ತೊ ರಸ್ತ್ಯಾಕ್ ದೆಖ್ತಾಲೊ. ಸಿಂತಿಗೆರ್ ಉಜ್ವಾಡ್ ನಾತ್ಲ್ಲೊ. ಬಹುಶಃ ಮನ್ವೆಲಾಬ್ ಮೀಸಾಕ್ ಯೇಂವ್ಕ್ನಾಂಗಾಯ್? ಮೆಲ್ವಿನಾಕ್ ಮಿನುಟಾಂ ವೊರಾಂಬರಿಂ ದಿಸ್ಲಿಂ. ಆಖ್ರೇಕ್ ರಸ್ತ್ಯಾರ್ ಚಲೊನ್ ಯೆಂವ್ಚಿಂ ದೊಗಾಂ ಚೆಡ್ವಾಂ ತಾಕಾ ದಿಸ್ಲಿಂ. ತೊ, ಇಲ್ಲೊ ಕಾಳೊಕ್ ಆಸ್ಲ್ಲ್ಯಾಕಡೆ ಲಿಪ್ಲೊ.
ತಿಂ ಚೆಡ್ವಾಂ ಲಾಗಿಂ ಲಾಗಿಂ ಪಾವ್ಲ್ಲಿಂ. ತಾಂಚ್ಯಾ ಬರಾಬರ್ ಎಕ್ಲೊ ಭುರ್ಗೊಯಿ ಆಸ್ಲ್ಲೊ ಮೆಲ್ವಿನಾನ್ ದೆಖ್ಲೆಂ. ಆತಾಂ ಸಿಂತಿಚೊ ತಾಳೊ ತಾಕಾ ಆಯ್ಕಾಲೊ - "ಬರೆಂ ತುಂ ವೋಚ್ ಐವಿ. ಸಕಾಳಿಂ ನೊವಾಂಕ್ ಆಮ್ಗೆರ್ ಯೇ"
"ಜಾಯ್ತ್, ಖಂಡಿತ್ ಯೆತಾಂ" ಮ್ಹಣೊನ್ ಐವಿ ದಾಕ್ಟ್ಯಾ ಭಾವಾ ಸಾಂಗಾಂತಾ ಘರ್ಚಿ ವಾಟ್ ಮುಖಾರ್ಸುನ್ ಗೆಲೆಂ. ಸಿಂತಿ ರಸ್ತೊ ಉತ್ರೊನ್ ಘರ್ಚ್ಯಾ ಗೇಟಿಲಾಗಿಂ ಪಾವ್ಲ್ಲೆಂ.
"ಸಿಂತಿ.." ಮೆಲ್ವಿನಾಚೊ ತಾಳೊ ಖರ್ಕಸ್ ಜಾಲ್ಲೊ.
"ಕೋಣ್, ಮೆಲ್ವಿನ್?" ತೆಂ ಕಾವ್ಜೆಲೆಂ.
"ವ್ಹಯ್, ಹಾಂವ್ಚ್", ತೊ ಮಖಾರ್ ಆಯ್ಲೊ, "ಧರ್ ಸಿಂತಿ ಮ್ಹಜೊ ಬೆಲ್ಟ್ ಘೆ. ತುಮ್ಚ್ಯಾ ಪೆಟ್ಯಾಕ್ ಜಾಯ್ತ್"
"ಪುರೊ, ಚಡ್ ಉಲೈನಾಕಾ" ಸಿಂತಿ ಬಿಯಾನ್ ಉಲೈಲೆಂ. ವ್ಹಡ್ಲ್ಯಾನ್ ಉಲೊಂವ್ಕ್ಯಿ ತಾಕಾ ಕಾವ್ಜೆಣ್ ದಿಸ್ತಾಲಿ.
"ಸಿಂತಿ..." ಲ್ಹಾನ್ ತರೀ ಸ್ವಷ್ಟ್ ತಾಳ್ಯಾನ್ ಮ್ಹಣಾಲೊ ಮೆಲ್ವಿನ್, "ಮನ್ಶಾಚ್ಯಾ ಸೊಸ್ಣಿಕಾಯೆಕ್ ಏಕ್ ಗಡ್ ಆಸಾ. ತುಂ ಕಿತ್ತುನ್ ಪರ್ಯಾಂತ್ ಮ್ಹಾಕಾ ಪಾರ್ಕುಂಕ್ ಪಳೆತಾಯ್? ತುಮ್ಚ್ಯಾ ಘರಾಂತ್ ಹಾಂವ್ ರಾವ್ತಾಂ ವ್ಹಯ್. ಪುಣ್ ಹಾಂವ್ ತುಜೊ ಚಾಕೊರ್ ನ್ಹಂಯ್"
"ಆಳೆ, ಜಾಗ್ರುತ್ ಹಾಂ.....ಹಾಂವ್ ವ್ಹಡ್ಲ್ಯಾನ್ ಬೋಬ್ ಮಾರ್ತಾಲಿಂ!" ಮೆಲ್ವಿನ್ ಆಪ್ಣಾಚ್ಯಾ ಜಿವಾಕ್ ಘಾತ್ ಕರಿತ್ ಮ್ಹಣ್ ತೆಂ ಬಿಂಯೆಲ್ಲೆಂ.
"ವ್ಹಡ್ಲ್ಯಾನ್ ಬೋಬ್ ಮಾರ್ ಸಿಂತಿ. ಸಗ್ಳ್ಯಾ ವಾಡ್ಯಾಕ್ ಆವಾಜ್ ಕರ್ನ್ ಉಟಯ್. ಪುಣ್ ಕೊಣಾಚೆಂ ದೊಳೆ ತುವೆಂ ಬಾಂದ್ಲ್ಯಾರೀ, ದೆವಾಚೆ ಬಾಂದುಂಕ್ ಸಕ್ಚೆಂನಾಂಯ್. ತುವೆಂ ಮ್ಹಾಕಾ ಆಕ್ಮಾನ್ ಕೆಲಾಯ್ ಆನಿಂ ಆತಾಂ ತುಂ ಹಾಂಗಾ ಎಕ್ಸುರೆಂ ಆಸಾಯ್. ಹಾಂವೆಂ ತುಕಾ ಕಿತೆಂ ಕರಿಜಾಯ್ ತುಂಚ್ ಸಾಂಗ್....."ತಾಚಿ ತಕ್ಲಿ ತಾಪ್ಲ್ಲಿ.
"ಮೆಲ್ವಿನ್.." ಕಂಗಾಲ್ ಜಾಲ್ಲೆಂ ಸಿಂತಿ. ತಾಚೊ ಕ್ಶೀಣ್ ತಾಳೊ ತ್ಯಾ ರಾತ್ಚ್ಯಾ ವೆಳಾರ್ಯಿ ಸರ್ಶಿನ್ ಆಸ್ಲ್ಲ್ಯಾ ಮೆಲ್ವಿನಾಕ್ ಆಯ್ಕಾಲೊ ನಾಂ. ತಾಣೆಂ ತಾಚೊ ಬಾವ್ಳೊ ಘಟ್ಟ್ ಧರ್ಲ್ಲೊ. ಸಿಂತಿನ್ ಸುಟೊಂವ್ಕ್ ಪ್ರಯತ್ನ್ ಕೆಲೆಂನಾ. ತಶೆಂ ಬೋಬ್ ಮಾರುಂಕ್ಯಿ ತಾಕಾ ಜೀಬ್ ಸುಟ್ಲಿನಾ.
ಮೆಲ್ವಿನ್ ತಶೆಂಚ್ ತಾಚಿ ಖಾಡ್ಕಿ ಧರ್ನ್ ಉಕೊಲ್ಲಿ ಆನಿಂ ಸಿಂತಿಚ್ಯಾ ಮುಖಾಚೆರ್ ದೀಷ್ಟ್ ಘಾಲ್ನ್ ತೊ ಮ್ಹಣಾಲೊ ಕಡ್ಕಡ್ಚ್ಯಾ ಉತ್ರಾಂನಿ "ನಾ, ನಾ ಸಿಂತಿ. ತುಕಾ ಹಾವ್ ಘಾತ್ ಕರಿನಾ. ಕಿತ್ಯಾಕ್, ತುಜ್ಯಾ ಆಂಗಾಂಕ್ ಹಾತ್ ಲಾಂವ್ಚೆಂ ತಿತ್ಲೆಂ ಹೀನ್ ಕಾಮ್ ದುಸ್ರೆಂ ನಾ ಸಿಂತಿ, ಹಾಂಗಾ ಆಯ್ಕ್." ಉದ್ವೇಗಾನ್ ತೊ ಮ್ಹಣಾಲೊ, "ತುಂ ಬೋವ್ ಸುಂದರ್, ಸಿಂತಿ. ತುಜ್ಯಾ ರುಪಾಕ್ ಹಾಂವ್ ಆರಾಧಾನ್ ಕರ್ತಾಂ. ತರೀ ತುಜೆಂ ಕಾಳಿಜ್ ಆನಿಂ ಕೊಶೆಡ್ದ್ ಭೋವ್ ಖೊಟೆಂ. ಕಿತ್ಯಾಕ್, ಸೊಭಾಯೆನ್ ತುಕಾ ಗರ್ವಿಷ್ಟ್ ಕೆಲಾಂ. ಗ್ರೇಸ್ತ್ಕಾಯೆನ್ ತುಕಾ ಕುಡ್ಡೆಂ ಕೆಲಾಂ. ತುಕಾ ದೇವ್ಚ್ ಶಿಕ್ಷಾ ದಿತಾಲೊ ಶಿವಾಯ್, ಹಾಂವ್ ನ್ಹಂಯ್. ಉಡಾಸ್ ದವರ್, ಹಾಂವ್ ಎಕ್ಲೊ ಚೆಡೊ, ಮ್ಹಾಕಾ ಮ್ಹಜೊಚ್ ಮ್ಹಳ್ಳೊ ಮಾನ್ ಆಸಾ, ವ್ಯಕ್ತಿತ್ವ್ ಆಸಾ. ಹಾಂವ್ ಬಿಕಾರಿ ನ್ಹಂಯ್ ಆನಿಂ ತುಜ್ಯಾ ದಾರಾರ್ ಹಾಂವ್ ಮಾಗೊಂಕ್ ಯೇಂವ್ಕ್ ನಾ.ಆನಿಂ ಜರ್ತರ್ ಎಕಾ ವೆಳಾರ್ ತುಂ ತುಜಿ ಚೂಕ್ ವಳ್ಕೊನ್ ಮ್ಹಜೆಸರ್ಶಿಂ ಯೆಶಿ, ಹಾಂವ್ ತುಕಾ ಕಿತೆಂ ಸಾಂಗಾನ್ ಜಾಣಾಂಯ್ವೆ ಸಿಂತಿ? ’ತುಜೆ ತಸಲ್ಯಾ ಫುಲಾಥಾವ್ನ್ ಫುಲಾಕ್ ಉಡ್ಚ್ಯಾ ನೀಜ್ ಪಿಸೊಳ್ಯಾಂನಿ ಸಂಸಾರಾಂತ್ ವಾಂಚ್ಚೆಂಯಿ ಮಹಾ ಪಾಪ್. ತುವೆಂ ದರ್ಯಾಂತ್ ಉಡ್ಕಿ ಮಾರ್ಲ್ಲಿ ಬರಿ’ ಮ್ಹಣೊನ್.
ತ್ಯಾಚ್ ಬರಾಬರ್ ತೊ ಘುಂವ್ಲೊ ಆನಿಂ ಶೀದಾ ಘರಾ ಚಲ್ಲೊ. ಸಿಂತಿನ್ ದೊಳ್ಯಾಂಕ್ ಹಾತ್ ದರ್ನ್ ಕಸ್ಕಸೊನ್ ರಡ್ಚೆಂಯೀ ತಾಚ್ಯಾ ಕಾನಾಕ್ ಆಯ್ಕಾಲೆಂನಾ.
"ಹಾಂವೆಂ ಚೂಕ್ ಕೆಲಿ....ಚೂಕ್ ಕೆಲಿ." ರಡ್ಲೆಂ ಸಿಂತಿ. ತಾಚೆಂ ಕಾಳಿಜ್ ಭೆಸಾಂ ಜಾಲ್ಲ್ಯಾ ಬರಿ ಭೊಗ್ಲೆಂ ತಾಕಾ. ಮೆಲ್ವಿನಾಕ್ ಉಲೈಲ್ಲಿಂ ಉತ್ರಾಂ ಘಾಂಟಿಬರಿ ತಾಚ್ಯಾ ಕಾನಾಕ್ ವ್ಹಾಜ್ತಾಲಿ.
ವ್ಹಳೂ ಮೆಟಾಂ ಕಾಡ್ನ್ ಘರ್ಚಿಂ ಮೆಟಾಂ ತೆಂ ಚಡ್ಲೆಂ. ತೊಂಡಾ ವಯ್ಲೊ ಚಾರೊ ಜಾತಾ ತಿತ್ಲೊ ಲಿಪೈಲೊ ಆನಿಂ ದುಃಖಾಂ ಪುಸ್ಲಿಂ. ವ್ಹಳೂ ಬಾಗಿಲ್ ಬಡೊವ್ನ್ ತಾಣೆಂ ಉಲೊ ಕೆಲೆಂ - "ಪಪ್ಪಾ...."
ನಿದೆರ್ ಆಸ್ಲ್ಲ್ಯಾ ಮಾನ್ವೆಲಾಬಾಕ್ ಸಟ್ಟ್ ಕರ್ನ್ ಜಾಗ್ ಜಾಲಿ. ತಾಣೆಂ ದಾರ್ ಉಗಡ್ಲೆಂ. "ಸಿಂತಿ....ಮೀಸ್ ಜಾಲೆಂವೇ ಪುತಾ...? ಹೆಪ್ಪಿ ಕ್ರಿಸ್ಮಸ್"
"ಸೇಮ್ ಟು ಯೂ..ಪಪ್ಪಾ" ಸಿಂತಿಚ್ಯಾ ತಾಳ್ಯಾಂತ್ ಜೀವ್ಚ್ ನಾತ್ಲ್ಲೊ. ದುಸ್ರೊ ಸಬ್ದ್ ಕಾಡಿನಾಸ್ತಾನಾ ತೆಂ ಆಪ್ಲ್ಯಾ ಕುಡಾಕ್ ಗೆಲೆಂ, ಆನಿಂ ಮುಸ್ತಾಯ್ಕಿ ಬದ್ಲುನ್ ಹಾಂತುಳ್ಣಾರ್ ಪಡ್ಲೆಂ.
’ಹಾಂವ್ ಭಿಕಾರಿ ನ್ಹಂಯ್ ಸಿಂತಿ......ಮ್ಹಾಕಾ ಮ್ಹಜೆಂ ಮ್ಹಳ್ಳೆಂ ವ್ಯಕ್ತಿತ್ವ್ ಆಸಾ....’ ಮೆಲ್ವಿನಾಚೊ ತಾಳೊ ತಾಕಾ ಆಯ್ಕಾತಾಲೊ. ಸಿಂತಿನ್ ಆಂಗ್ ಕಾಡ್ಲೆಂ. ’ವ್ಹಯ್ ಮೆಲ್ವಿನ್ ಭಿಕಾರಿ ನ್ಹಂಯ್, ತಾಕಾ ಹಾಂವೆಂ ಅಕ್ಮಾನ್ ಕಿತ್ಯಾಕ್ ಕೆಲೊ?’
’ತುಜ್ಯೆ ತಸಲ್ಯಾ ಫುಲಾಥಾವ್ನ್ ಫುಲಾಕ್ ಉಬ್ಚ್ಯಾ ಪಿಸೊಳ್ಯಾಂನಿ ಸಂಸಾರಾಂತ್ ವಾಂಚ್ಚೆಯಿ ಮಹಾಪಾಪ್. ದರ್ಯಾಂತ್ ಉಡ್ಕಿ ಮಾರ್....’ಕಸಲಿ ಕಠೋರ್ ಉತ್ರಾಂ! ಸಿಂತಿಚೆಂ ಕಾಳಿಜ್ ದುಃಖಾನ್ ಭರೊನ್ ಯೆತಾಲೆಂ.
’ಮೆಲ್ವಿನಾಕ್ ಸುಂದರ್ ರೂಪ್ ಆಸಾ, ಶಿಕಾಪ್ ಆಸಾ. ಗಾಯನಾಂತ್ ತಾಣೆಂ ಆಪ್ಣಾಕ್ ಸಲ್ವಯ್ಲಾಂ. ಖಂಯ್ಚಾಂತ್ ಮೆಲ್ವಿನ್ ಉಣೊ ಆಸಾ? ತರೀ ತಾಕಾ ಪಳೆತಾನಾ ಆಪ್ಣಾಕ್ ಕಾಂಟಾಳೊ ಕಿತ್ಯಾಕ್ ಭೊಗ್ತಾ? ತೊ ದುಬ್ಳೊ ಮ್ಹಣ್ಗಿ? ಆಪ್ಣಾಚ್ಯಾ ಬಿಡಾರಾಂತ್ ಜಿಯೆತಾ ಮ್ಹಣ್ಗಿ? ಜಾವ್ಯೆತ್. ದೆಕುನ್ಂಚ್ ತಾಚೆಲಾಗಿಂ ಉಲೊ೦ಂವ್ಕ್ ಆಪ್ಣಾಕ್ ಬರೆಂ ಲಾಗಾನಾ’
ಸಿಂತಿಕ್ ನೀದ್ ಯೇನಾತ್ಲ್ಲಿ. ಭಾಯ್ರ್ ಸಂಸಾರ್ ನಿದೆಚ್ಯಾ ಸಾಗೊರಾಂತ್ ಬುಡೊನ್ ಸಕ್ಕಡ್ ವಿಸರ್ಲ್ಲೊ. ಕಿಡಿ ಮುಯಾಂಚೊ ಆವಾಜ್ ಸೊಡ್ನ್, ಪರಿಪೂರ್ಣ್ ಶಾಂತಿ. ತೆಂ ಹಾಂತುಳ್ಣಾರ್ ನಿದೊನ್ ಜನೆಂತ್ಲ್ಯಾನ್ ಭಾಯ್ರ್ ತಿಳ್ತಾಲೆಂ. ಅಂತ್ರಳಾರ್ ನೆಕೆತ್ರಾಂ ಮಿಣ್ಮಿಣ್ಚಿಂ ತಾಕಾ ದಿಸ್ತಾಲಿಂ. ಆಖ್ರೇಕ್ ವೆಳಾನ್ ಸಿಂತಿಕ್ ಭುಕ್ ಘಾಲಿ.....ನಿದ್ರಾ ದೇವಿಚ್ಯಾ ವೆಂಗೆಂತ್ ಆಪ್ಲೆಂ ಜ್ಞಾನ್ ಹೊಗ್ಡಾಯ್ತಾನಾ ಏಕ್ಚ್ ಸಬ್ದ್ ತಾಚ್ಯಾ ವೋಂಟಾರ್ ಆಸ್ಲ್ಲೊ "ಮೆಲ್ವಿನ್..."
ತೆಣೆಂ ಮೆಲ್ವಿನ್ ಕಿತೆಂಗಿ ಮಹಾ ಕಾರ್ಯೆಂ ಕೆಲ್ಲ್ಯಾಬರಿ ಚಿಂತಾಲೊ. ಹಾಂತುಳ್ಣಾರ್ ತೊ ಪಡ್ಲ್ಲೊ ತರಿ ತಾಕಾಯಿ ನೀದ್ ಯೇಂವ್ಕ್ ನಾತ್ಲ್ಲಿ. ಆಪ್ಣಾಕ್ ಜಾಲ್ಲೊ ಅಕ್ಮಾನ್ ಸಗ್ಳೊ ತೊ ವಿಸರ್ಲ್ಲೊ. ಏಕ್ಚ್ ತಾಚಿಂ ಚಿಂತ್ನಾಂ ಜಾವ್ನಾಸ್ಲ್ಲಿಂ ಆಪ್ಣೆಂ ಸಿಂತಿಕ್ ಉಲೈಲ್ಲಿ ತಿಂ ಉತ್ರಾಂ. ತಾಚ್ಯಾ ಬಾವ್ಳ್ಯಾಕ್ ಘಟ್ಟ್ ಧರ್ನ್, ಖಾಡ್ಕಿ ತಾಚಿ ಉಕೊಲ್ತಾನಾ ಕಸಲಿಂ ಭೊಗ್ಣಾಂ, ತಾಚ್ಯಾ ಜಿವಾ ಬಿತರ್ ಜಾಲ್ಲಿಂ, ತರೀ ತ್ಯಾ ವೆಳಾರ್ ರಾಗ್ ತಾಚ್ಯಾ ಮಸ್ತಕಾರ್ ಚಡ್ಲ್ಲೊ, ಆತಾಂ ತೊ ಪ್ರಸಂಗ್ ಪರತ್ ನಿಯಾಳ್ತಾನಾ, ತಾಚ್ಯಾ ಕಾಳ್ಜಾಂತ್ ಅವ್ಯಕ್ತ್ ಭೊಗ್ಣಾಂ ಯೆತಾಲಿಂ. ಸಿಂತಿಚೆಂ ರುಪ್ಣೆಂಚ್ ಚಿಂತುಂಕ್ ಲಾಗ್ಲೊ ತೊ ಸಬಾರ್ ವೇಳ್. ಆಖ್ರೇಕ್ ತಾಕಾ ನೀಡ್ ಯೆತಾನಾ, ನಿದೆಂತೀ ತಾಣೆಂ ದೆಖ್ಲೆಂ ಸ್ವಪಾಣ್ ಸಿಂತಿಚೆಂ.
ಮನಿಸ್ ಸ್ವಪ್ಣಾಂತ್ ಸಬಾರ್ ಸಂಗ್ತಿ ದೆಖ್ತಾ ಆನಿಂ ಸಬಾರ್ ವಸ್ತು ಆಶೆತಾ ವಿಚಿತ್ರ್ ಏಕ್ ಘಡಾಪ್ ಘಡ್ಲ್ಲೆಂ ಸಿಂತಿ ಆನಿಂ ಮೆಲ್ವಿನಾಚ್ಯಾ ಜೀವನಾಂತ್. ಆದ್ಲ್ಯಾ ರಾತಿಂ ಕಿತೆಂಗಿ ಬದ್ಲಾವಣ್ ಜಾಲ್ಲಿ. ವಿವಿಧ್ ನಮುನ್ಯಾಂಚಿಂ ಸ್ವಪ್ಣಾಂ ಸಗ್ಳಿ ರಾತ್ ತಿಂ ದೆಖ್ತಾಲಿಂ. ಸಕಾಳಿಂ ತಿಂ ಉಟ್ತಾನಾ, ಕಿತೆಂಗಿ ನವೆಂಸಾಂವ್ ಜೀವನಾಂತ್ ಸಂಭಾವ್ಲಾಶೆಂ ತಾಂಕಾಂ ಭೊಗ್ಲೆಂ. ಪುಣ್ ತ್ಯಾ ಸಕಾಳಿಂ ಮೆಲ್ವಿನಾಚ್ಯಾ ಜೀವನಾಂತ್ ಅಧಿಕ್ ಮಹತ್ವಾಚೆಂ ದುಸ್ರೆಂಚ್ ಘಡಾಪ್ ಜ್ಯಾರಿ ಜಾಂವ್ಚೆಂ ಆಸ್ಲ್ಲೆಂ. ನ್ಹಂಯ್ ತರ್, ತಾಚ್ಯಾ ಜಿಣಿಯೆಚಿ ಕಥಾಚ್ ವೆಗ್ಳಿ ಜಾತಿ. ಸಿಂತಿಕ್ ಆಪ್ಲೆಂ ಕರ್ನ್ ಘೆತ್ಲ್ಲೆಂ ಸ್ವಪಾಣ್ ತಾಣೆಂ ಪಳೆಲ್ಲೆಂ, ಪುಣ್ ನಿರ್ಭಾಗ್ಯಾಕ್ ದುಸ್ರೆಂಚ್ ಸ್ವಪಾಣ್ ರಾಕೊನ್ ಆಸ್ಲ್ಲೆಂ ತೆಂ ಉಪ್ರಾಂತ್ ಕಳ್ಳೆಂ.
ಮೆಲ್ವಿನಾಗೆರ್ ಭಾರಿಚ್ ಗವ್ಜಿ ಚಲ್ತಾಲಿ. ಭಯ್ಣ್ ಆನಿಂ ಬಾವೊಜಿ ಆಯಿಲ್ಲ್ಯಾನ್ ಜಿಲ್ಲಿಬಾಯೆಕ್ ಫೆಸ್ತಾದೀಸ್ ಪಾಕಾಟೆ ಆಯಿಲ್ಲೆ. ದುಕ್ರಾಚೆ ಮಾಸ್ ಸುಟಿ ಜಾವ್ನ್ ರಾಂದ್ಣಿರ್ ಉಕೊಡ್ತಾಲೆಂ. ಆತಾಂ ಕೊಂಬಿಯೆಚ್ಯಾ ಜಿವಾಕ್ ಆಪಾಯ್ ಕರ್ಚ್ಯಾ ಆಟ್ಟಾಣ್ಯಾರ್ ತಿಂ ಆಸ್ಲ್ಲಿಂ. ತ್ಯಾ ಬಿತರ್ ವಿತೊರಾಬಾನ್ ಕಾಜುಚ್ಯಾ ದೋನ್ ಬೊತ್ಲಿ ಸೊರ್ಯಾಚಿ ವಿಲೆವಾರಿಯಿ ಕರ್ನ್ ಜಾಲ್ಲಿ. ಮಿಲ್ಲಿಬಾಯ್ ರಾಂದ್ಚ್ಯಾ ಕುಡಾಂತ್ ಭಯ್ಣಿಕ್ ಕುಮಕ್ ಕರ್ತಾಲಿ. ವಿತೊರಾಬ್ ಘರ್ಚ್ಯಾ ದುಸ್ರ್ಯಾ ರಾಟಾವೆಳೆರ್ ಪಡ್ಲ್ಲೊ. ಫ್ರೆಡ್ಡಿಯಬ್ ಸಿಗ್ರೆಟ್ ವೊಡಿತ್ತ್ ಧಾಕ್ಟ್ಯಾ ಲೆನ್ಸಿಲಾಗಿಂ ಗಜಾಲಿ ಕರ್ನ್ ಬಸ್ಲ್ಲೊ.
ಪುಣ್ ಮೆಲ್ವಿನಾಕ್ ಹೆಂ ಸರ್ವ್ ತಕ್ಲೆಕ್ಚ್ ವಚೊಂಕ್ ನಾತ್ಲ್ಲೆಂ. ತಾಕಾ ಬೆಜಾರಾಯ್ಚ್ ಜಾಲ್ಲಿ. ’ಆತಾಂ ಘರಾ ಬಸೊನ್ ಕರ್ಚೆಂ ಕಿತೆಂ? ವೊರಾಂ ಧಾ ಜಾಲಿ ಮಾತ್ರ್. ಶೀನಾಗೆರ್ ಪರ್ಯಾಂತ್ ವೆಚೆಂ ಆನಿಂ ಜೆವ್ಣಾಚ್ಯಾ ವೆಳಾರ್ ಪಾಟಿಂ ಯೆಂವ್ಚೆಂ’ ಆಶೆಂ ಚಿಂತುನ್ ತೊ ಭಾಯ್ರ್ ಸರ್ಲೊ.
ರಸ್ತ್ಯಾರ್ ಚಲ್ತಾನಾ ತಾಕಾ ಸಟ್ಟ್ ಕರ್ನ್ ಉಡಾಸ್ ಆಯ್ಲೊ. ಸಾಂಜೆರ್ ಗಿಬ್ಬಾಗೆರ್ ವಚೊಂಕ್ ಆಸಾ ಮ್ಹಣ್. ಕಶೆಂಯಿ ದೋನ್ ದೀಸ್ ಖುಶಾಲಾಯೆನ್ ಥಂಯ್ ಪಾಶಾರ್ ಕರ್ಯೆತ್ ಮ್ಹಣ್ ಚಿಂತ್ಲೆಂ ತಾಣೆಂ. ತೊ ಆತಾಂ ಲೇಡಿಹಿಲ್ಲ್ ಬಸ್ಸ್ಸ್ಟೇಂಡಾಂತ್ ಉಬೊ ರಾವ್ಲೊ ತೊ ಆನಿಂ ವಳ್ಕಿಚೆ ಕೊಣ್ಯಿ ಮೆಳ್ತಾತ್ಗಿ ಮ್ಹಣ್ ಹೆಣೆಂ ತೆಣೆಂ ಪಳೆಂವ್ಕ್ ಪಡ್ಲೊ.
ತ್ಯಾಚ್ ಕ್ಷಣಾ ಹಂಪನ್ಕಟ್ಟಾ ಥಾವ್ನ್ ಆಯಿಲ್ಲೆಂ ಬಸ್ಸ್, ಸ್ಟೇಂಡಾ ಮುಖಾರ್ ಉಬೆಂ ಜಾಲೆಂ ಆನಿಂ ಥೊಡೊ ಲೋಕ್ ದೆಂವ್ಲೊ. ಹಾತಿಂ ಬೇಗ್ ಘೆವ್ನ್ ದೆಂವ್ತೆಲ್ಯಾ ಚಲಿಯೆಚೆರ್ ಪಡ್ಲಿ. ತ್ಯಾ ಚಲಿಯೆಕ್ ಹ್ಯಾ ಆದಿಂ ಖಂಯ್ಚ್ ತಾಣೆಂ ಪಳೆಂವ್ಕ್ ನಾತ್ಲ್ಲೆಂ. ಉರ್ವಾಚಿ ತಿ ಬಿಲ್ಕುಲ್ ನ್ಹಂಯ್. ಪ್ರಾಯೆನ್ ಕಾಂಯ್ ಆಟ್ರಾ ಜಾತಿತ್. ಗೊರೆಂ ಸುಪುಷ್ಟ್ ಆಂಗ್, ತಶೆಂ ಹಾಸ್ತೆಂ ತೊಂಡ್. ತಿಕಾ ಪಳೆತಾನಾ ಸಿಂತಿಕ್ ಪಳೆಲ್ಲ್ಯಾಬರಿ ದಿಸ್ಲೆಂ ಮೆಲ್ವಿನಾಕ್.
ಬಸ್ಸಾರ್ ಥಾವ್ನ್ ದೆಂವ್ಲ್ಲಿ ಚಲಿ ಏಕ್ ಘಡಿ ಹೆಣೆ ತೆಣೆ ಪಳೆಂವ್ಕ್ ಲಾಗ್ಲಿ. ತಿ ಹ್ಯಾ ವಾಡ್ಯಾಕ್ ನವಿಚ್ ಮ್ಹಣ್ ತಿಚೆಂ ತೊಂಡ್ ಸಾಂಗ್ತಾಲೆಂ. ಚಲಿಯೆಕ್ ಖಂಯ್ಚಾನ್ ವಾಟ್ ಮುಖಾರ್ಸುಂಚಿ ಮ್ಹಳ್ಳೆಂ ಕಳ್ಳೆಂನಾ ಜಾಯ್ಜಾಯ್. ಕುಡ್ಸಾಲ್ಲ್ಯಾ ಚ್ಯಾರ್ ರಸ್ತ್ಯಾಂನಿ ಖಂಯ್ ವೆಚೆಂ, ಕಿತೆಂ ಕರ್ಚೆಂ, ತಿ ಚಿಂತುಂಕ್ ಪಡ್ಲಿ. ಮೆಲ್ವಿನ್ಯಿ ಆಸ್ಡ್ಯೊ ಪಾಪುಡ್ನಾಸ್ತಾನಾ ತಿಕಾಚ್ ವಿಜ್ಮಿತ್ಕಾಯೆನ್ ಪಳೆತಾಲೊ.
ದುಸ್ರ್ಯಾ ಘಡಿಯೆ ತಿಣೆಂ ಮೆಲ್ವಿನಾಕ್ ಪಳೆಲೆಂ. ಲಜೀಸ್ಟ್ ಆನಿಂ ಲ್ಹಾನ್ ತಾಳ್ಯಾನ್ ತಿ ಮ್ಹಣಾಲಿ’ ಎಕ್ಸ್ಕ್ಯೂಜ್ ಮಿ, ಹಾಂಗಾಸರ್ ತೆರೆಜಾ ರೆಬೆಲ್ಲೊಚೆಂ ಘರ್ ಖಂಯ್ ಮ್ಹಣ್ ಜಾಣಾಂಯ್ಗಿ? ಉರ್ವಾ ಮಾರ್ಕೆಟಿಲಾಗಿಂ ಮ್ಹಣ್ ಎಡ್ರೆಸ್ ದಿಲಾ" ಇತ್ಲೆಂ ಸಾಂಗೊನ್ ತಿಣೆಂ ಹೆಂಡ್ಬೆಗಾಂತ್ಲೊ ಏಕ್ ಎಡ್ರೆಸ್ ಕಾಡ್ನ್ ತಾಕಾ ದಾಕೈಲೊ.
ಮೆಲ್ವಿನ್ ಚಿಕ್ಕೆ ಅಜಾಪ್ ಜಾವ್ನ್ಂಚ್ ತೊ ಎಡ್ರೆಸ್ ವಾಚುಂಕ್ಲಾಗ್ಲೊ. "ತುಂ ಹ್ಯಾ ವಾಡ್ಯಾಕ್ ನವೆಂಚ್ಗಿ? ಮ್ಹಾಕಾ ಸಾರ್ಕೆಂ ಉಡಾಸ್ ಯೇನಾ.....ಹೆಂ ಘರ್....’ ತೊ ಚಿಂತುಂಕ್ ಪಡ್ಲೊ.
ಚಲಿ ಹಾಸೊನ್ ಮ್ಹಣಾಲಿ -"ಉರ್ವಾ ಮಾರ್ಕೆಟಿ ಮುಖಾರ್ಚ್ ತಾಂಚೆಂ ಘರ್ ಖಂಯ್. ತಿಚೊ ಎಕ್ಲೊ ಪೂತ್ ವಾಡ್ಯಾಚೊ ಘುರ್ಕಾರ್. ಅನ್ಯೇಕ್ಲೊ ಕುವೇಯ್ಟ್ ಕಾಮ್ ಕರ್ತಾ"
ಆತಾಂ ಮೆಲ್ವಿನಾಕ್ ಸಮ್ಜಾಲೆಂ "ಓ...... ಮ್ಹಾಕಾ ಕಳ್ಳೆಂ. ತಾಂಚೆಂ ಘರ್ ಹ್ಯಾಚ್ ರಸ್ತ್ಯಾರ್ ಮುಖಾರ್ ಆಸಾ. ಚಲ್, ತಾಂಚ್ಯಾ ಘರಾ ಮ್ಹಣಾಸರ್ ಹಾಂವ್ ಯೆತಾಂ...." ತೊ ವಚೊಂಕ್ ಭಾಯ್ರ್ ಸರ್ಲೊ.
ಎಕಾ ಥರಾಚ್ಯಾ ದಾಕ್ಷೆಣೆನ್ ಆನಿಂ ಲಜೆನ್ ತಿ ಮ್ಹಣಾಲಿ "ತುಕಾ ಥಂಯ್ ಮ್ಹಣಾಸರ್ ಯೇಂವ್ಕ್ ಬೆಷ್ಟೆಂಚ್ ತೊಂದ್ರೆ. ಹಾಂವ್ ಎಕ್ಲಿಂಚ್ ವೆತಾ...."
"ನಾ,ನಾ. ಮ್ಹಾಕಾ ಕಾಂಯ್ ತೊಂದ್ರೆ ನಾಂತ್. ಕಿತ್ಯಾಕ್, ಮ್ಹಾಕಾ ತ್ಯಾಚ್ ವಾಟೆನ್ ವಚೊಂಕ್ ಆಸಾ" ಮೆಲ್ವಿನ್ ಸಾಂಗಾಲಾಗ್ಲೊ ಸುಂದರ್ ತ್ಯಾ ಚಲಿಯೆಲಾಗಿಂ ಆನಿಂ ಥೊಡೆಂ ಉಲಯಾಂ ಮ್ಹಣ್ ತಾಣೆಂ ಚಿಂತ್ಲೆಂ.
ನಾರ್ಗೊನ್ ಮೆಲ್ವಿನಾ ಸಾಂಗಾಂತಾ ತಿ ಚಲಿ ಮೆಟಾಂ ಕಾಡುಂಕ್ ಲಾಗ್ಲಿ. ಉರ್ವಾ ಮಾರ್ಕೆಟೆಕ್ ವೆಚ್ಯಾ ರಸ್ತ್ಯಾರ್.
ಥೊಡೆಂ ಧೈರ್ ಘೆವ್ನ್ ಮೆಲ್ವಿನ್ ಮ್ಹಣಾಲೊ "ತುಂ ಆಮ್ಚ್ಯಾ ಉರ್ವಾಕ್ ನವೆಂಚ್ ಜಾಯ್ಜಾಯ್?"
"ಖರೆಂ ತುವೆಂ ಮ್ಹಣ್ಚೆಂ" ಅಮ್ರುಕ್ ಹಾಸ್ಲಿ ತಿ, "ಆಮಿಂ ಆಸ್ಚೆಂ ಕಾರ್ಕಳಾಂತ್"
"ಓ.....ತರ್ ಭೋವ್ ಪಯ್ಸ್ ಥಾವ್ನ್ ಆಯ್ಲಾಂಯ್. ನತಲಾಂಚ್ಯಾ ಫೆಸ್ತಾಕ್ ಸಂದೇಶ್ ದೀಂವ್ಕ್ಗಿ?" ಮೆಲ್ವಿನ್ ಹಾಸ್ಲೊ, "ತೆರೆಜ್ಬಾಯ್ ತುಕಾ ಸಯ್ರಿಂ ಲೆಕ್ತಾಗಿ?"
"ನಾ, ನಾ......" ತಾಣೆಂ ಜಾಪ್ ದಿಲಿ, "ತಿ ಆಮ್ಚ್ಯಾ ವಳ್ಕಿಚಿ ಮ್ಹಳ್ಯಾರ್ ಮ್ಹಜಿ ಆವಯ್ ಕೊಡಿಯಾಳ್ ರಾವೊಂಕ್ ಯೆತಾ. ತೆರೆಜ್ಬಾಯೆಗೆರ್ ಬಾಡ್ಯಾಕ್ ಘರಾ ಆಸಾ ಮ್ಹಣ್ ತಿಣೆಂ ಖಬಾರ್ ದಾಡ್ಲ್ಲಿ....."
"ಓಹೋ......ತುಜಿ ಆವಯ್ ಮಾತ್ರ್ ಯೆತಾ. ತುಂ ಕಾರ್ಕಾಳಾಂತ್ಚ್ ರಾವ್ತಾಯ್? ಕಿತ್ಯಾ ಖಾತಿರ್? ನ್ಹಂಯ್, ವಿಚಾರ್ಲೆಂ ಮ್ಹಣ್ ಬೆಜಾರ್ ಜಾಯ್ನಾಕಾ"
"ಬೆಜಾರ್ ಕಾಂಯ್ ನಾ. ಹಾಂವ್ ಕಾರ್ಕಳ್ ಕಾಮ್ ಕರ್ತಾಂ. ಇಗರ್ಜೆ ಇಸ್ಕೊಲಾಂತ್ ಟೀಚರ್ ಹಾಂವ್. ಮ್ಹಜಿ ಮಾಂಯ್ ಚಿಕ್ಕೆ ಹುಶಾನ್ ನಾ. ತ್ಯಾ ಖಾತಿರ್, ವಕ್ತಾಚ್ಯಾ ಕಾರಣಾಕ್ ಲಾಗೊನ್ ಕೊಡಿಯಾಳ್ ವ್ಹಡ್ ಆಸ್ಪತ್ರ್ಯೊ ಆನಿಂ ದಾಕ್ತೆರ್ ನಾಂತ್ ಪಳೆ. ಮ್ಹಾಕಾ ಆಸ್ಚಿ ಮಾಂಯ್ ಆನಿಂ ವ್ಹಡ್ಲಿಮಾಂಯ್ ಮಾತ್ರ್. ತಿಂ ದೊಗಾಂ ಹಾಂಗಾಂ ರಾವ್ತೆಲಿಂ. ಹಾಂವ್ ಎಕ್ಲಿಂ ಕಾರ್ಕಳಾಂತ್..."
"ಹಾಂ ಹಾಂ....ತಶೆಂಗಿ? ಹಾಂವೆಂ ಆಶೆಂಚ್ ವಿಚಾರ್ಲೆಂ. ತುಜೆಂ ನಾಂವ್ ಜಾಣಾಂ ಜಾವ್ಯೆತ್ಗಿ ಹಾಂವೆ?"
ತಾಣೆಂ ಲಜೆನ್ ತಕ್ಲಿ ಬಾಗಾಯ್ಲಿ. ತಾಚೆ ಪೊಲೆ ತಾಂಬ್ಶೆ ಜಾಲೆಂ. ಮೆಲ್ವಿನಾಕ್ ಆಪ್ಣೆಂ ಹೆಂ ಸವಾಲ್ ಕೆಲ್ಲೆಂ ಸಾರ್ಕೆಂ ನ್ಹಂಯ್ ಮ್ಹಣ್ ಭೊಗ್ಲೆಂ. ಒಟ್ಟಾರೆ ಜಿಬೆನ್ ಏಖ್ ವ್ಹಡ್ ಚೂಕ್ ಕೆಲಿ. ಪರ್ಕಿ ಚಲಿಯೆಲಾಗಿಂ ನಾಂವ್ ವಿಚಾರುಂಕ್ ತಾಕಾ ಕಿತೆಂ ಅಧಿಕಾರ್? ತೊ ಕಳ್ವಳ್ಳೊ.
"ಮ್ಹಜೆಂ ನಾಂವ್ ಜೆಸ್ಸಿ" ತಾಣೆಂ ಕಾಜುಲ್ಯಾ ಬರಿ ದೊಳೆ ಘುಂವ್ಡಾಯ್ಲೆ. ಮೆಲ್ವಿನ್ ಲಜೆಲೊ ತರೀ, ಸಮಾಧಾನ್ ಪಾವ್ಲೊ.
"ಹೆಂಚ್ ತುವೆಂ ಅಪೇಕ್ಸುಂಚೆಂ ಘರ್..." ಉರ್ವಾ ಮಾರ್ಕೆಟಿ ಮುಖಾರ್ ಆಸ್ಚ್ಯಾ ತ್ಯಾ ವ್ಹಡ್ ಪೊರ್ಟಿಕೊಚ್ಯಾ ಘರಾಕ್ ತಾಣೆಂ ಬೋಟ್ ಜೊಕ್ಲೆಂ, "ಬರೆಂ ಹಾಂವ್ ಮ್ಹಜಿ ವಾಟ್ ಮುಖಾರ್ಸಿತಾಂ"
"ಮಸ್ತ್ ಥ್ಯಾಂಕ್ಸ್ ತುಕಾ. ಹೆಂ.....ತುಜೆಂ ನಾಂವ್ ......?" ಜೆಸ್ಸಿ ಮ್ಹಣಾಲೆಂ.
"ಹಾಂವ್ ಮೆಲ್ವಿನ್. ಇಂಟರ್ ಶಿಕ್ಚೊ ವಿದ್ಯಾರ್ಥಿ..."
ಮುಂಡು ನೆಸ್ಲ್ಲ್ಯಾ ತ್ಯಾ ವಿದ್ಯಾರ್ಥಿಕ್ ಪಳೆತಾನಾ ತಾಕಾ ಖರೆಂಚ್ ಅಜ್ಯಾಪ್ ಭೊಗ್ಲ್ಲೆಂ. ತರೀ ತೆಂ ಧೈರಾಚೆಂ ಉಲವ್ಣೆಂ ಆನಿಂ ಮೆಲ್ವಿನಾಚೆಂ ಹಾಸ್ತೆಂ ಮುಖ್ ಪಳೆತಾನಾ....’ಕೊಡಿಯಾಳ್ಚೆ ಸಕ್ಕಡ್ ವಿದ್ಯಾರ್ಥಿ ಆಶೆಚ್ಗಾಯ್?" ಚಿಂತಿಲಾಗ್ಲೆಂ ತೆಂ.
ಮೆಲ್ವಿನ್ ಥೊಡೊ ಮುಖಾರ್ ವಚೊನ್ ಪಾಟಿಂ ಪಳೆತಾಲೊ. ಜೆಸ್ಸಿಕ್ ತಾಣೆಂ ಹಾತ್ ಹಾಲೈಲೊ. ಪರ್ತ್ಯಾನ್ ತೆಂ ಹಾಸ್ಲೆಂ ಆಣಿಂ ಆಫ್ಲೊ ಹಾತ್ ಹಾಲೊವ್ನ್ ತೆರೆಜ್ಬಾಯೆಚ್ಯಾ ಘರಾ ಪ್ರವೇಶ್ ಜಾಲೆಂ.
ಜೆಸ್ಸಿ ಕಾರ್ಕಳಾಂತ್ಚ್ ಜಲ್ಮಾಲ್ಲೆಂ ಆನಿಂ ಥಂಯ್ಚ್ ವ್ಹಡ್ ಜಾಲ್ಲೆಂ. ತಾಚೊ ಬಾಪುಯ್, ಕಷ್ಟಿ ರಯ್ತ್ ಜಾವ್ನಾಸ್ಲ್ಲೊ. ತಶೆಂ ಎಕ್ಲ್ಯಾಚ್ ಭುರ್ಗ್ಯಾಕ್ ತಾಕಾ, ಅವಯ್ ಬಾಪಾಯ್ನ್ ವ್ಹಡಾ ಮೊಗಾನ್ ಆನಿಂ ಜತ್ನೆನ್ ವಾಗೈಲ್ಲೆಂ. ಸಾಂಗಾಂತಾ ಆವಯ್ಚಿ ಆವಯ್ (ಮ್ಹಾತಾರಿ ಅಜಿಯಿ) ನಾತಿಚಿ ಚಾಕ್ರಿ ಕರ್ತಾಲಿ. ಜೆಸ್ಸಿಕ್ ಬಿ.ಎ. ಮ್ಹಣಾಸರ್ ಶಿಕೈಜಾಯ್ ಮ್ಹಣ್ ವ್ಹಡಿಲಾಂಚಿ ಆಶಾ. ತಶೆಂ ಶಿಕ್ಪಾಂತ್ ಧಾಕ್ಟೆಂ ಭುರ್ಗೆಂ ಜೆಸ್ಸಿ ಭೊವ್ಚ್ ಹುಶಾರ್ ಆಸ್ಲ್ಲೆಂ.
ತರೀ, ದೆವಾಚಿ ಮಾಂಡಾವಳ್ ದುಸ್ರಿಚ್ ಆಸ್ಲ್ಲಿ. ಜೆಸ್ಸಿ ಆಟ್ ವರ್ಸಾಂಚೆಂ ಜಾತಾನಾ, ತಾಚೊ ಬಾಪುಯ್ ಅವ್ಜಿತ್ತ್ ಪಿಡೆಕ್ ಬಲಿ ಜಾವ್ನ್ ಅಂತರ್ಲೊ. ತಾಂಚ್ಯಾ ಘರ್ಚೊ ಆಧಾರ್ಚ್ ನಾ ಜಾಲೊ. ಜೆಸ್ಸಿಚೆಂ ಪಾಲನ್ ಪೋಷಣ್ ತ್ಯಾ ಅಸ್ಕತ್ ದೊಗಾಂ ಸ್ತ್ರೀಯಾಂಚ್ಯಾ ಖಾಂದಾರ್ ಪಡ್ಲೆಂ. ಆಸ್ಲ್ಲೆಂ ಘರ್ ಆನಿಂ ಜಾಗೊ ರಿಣ್ಕಾರ್ಯಾಂನಿ ಘೆತ್ಲೊ. ಕಿತ್ಯಾಕ್, ಕಾಂಯ್ಚ್ ಹುಟ್ವೊಳ್ ನಾತ್ಲ್ಲ್ಯಾ ಘರಾಂತ್, ರಿಣಾವಿಣೆಂ ದೀಸ್ ಕಾಡುಂಕ್ ತಿಂ ಸಕ್ಲಿನಾಂತ್. ರಿಣ್ಕಾರ್ಯಾಂನಿಯಿ ಆಶೆಂಚ್ ರೀಣ್ ದೀಂವ್ಕ್ ನಾ. ದೊರಿ ಜಾತಾ ತಿತ್ಲಿ ಸಡಿಳ್ ಸೊಡ್ಲ್ಲಿ, ಆಯಿನ್ನ್ ವೆಳಾರ್ ಘಟ್ಟ್ ಧರ್ಲಿ. ಪರಿಣಾಮ್ ಜಾವ್ನ್ ಆಸ್ಲ್ಲೆಂ ಘರ್ ವಿಕೊನ್ ಗೆಲೆಂ. ಆನಿಂ ಮಾಗಿಬಾಯೆನ್ (ಜೆಸ್ಸಿಚಿ ಆವಯ್) ಭಾಡ್ಯಾಚೆಂ ಬಿಡಾರ್ ಸೊದಿಜಾಯ್ ಪಡ್ಲೆಂ. ತ್ಯಾ ವೆಳಾರ್ ಜೆಸ್ಸಿ ಮೆಟ್ರಿಕಾಂತ್ ಶಿಕ್ತಾಲೆಂ.ಲ್ಹಾನ್ ತೆಂ ಆಸ್ತಾನಾ ಆವಯ್-ಬಾಪುಯ್ನ್ ಕೆಲ್ಲಿ ಆಲೋಚನ್ -ಬಿ.ಎ. ಪರ್ಯಾಂತ್ ತಾಕಾ ಶಿಕೊಂವ್ಚಿ ಜಾರ್ಯೆಕ್ ಆಯ್ಲಿಂನಾ. ತ್ಯಾ ಲ್ಹಾನ್ ಪ್ರಾಯೆರ್ಚ್ ಘರಾಕ್ ಆಧಾರ್ ಜಾವ್ನ್ ತಾಣೆಂ ಕಾಮ್ ಕರ್ಚೆಂ ಪಡ್ಲೆಂ. ಪಿರ್ಗಜ್ ಪಾದ್ರಿನ್ ತಾಮ್ಚೆ ಕಷ್ಟ್ ಸಮ್ಜೊನ್,. ಆಪ್ಲ್ಯಾ ಇಸ್ಕೊಲಾಂತ್ ಜೆಸ್ಸಿಕ್ ಟೀಚರಿಚೆಂ ಕಾಮ್ ದಿಲೆಂ.
ಧುವ್ ಕಾಮ್ ಕರ್ಚೆಂ ಜಾತಾನಾ, ಜಿಣಿಭರ್ ಥಕ್ಲ್ಲಿ ಮಾಗ್ಗಿಬಾಯ್ ಉಸ್ಮೊಡಿಚ್ಯಾ ಪಿಡೆನ್ ವಳ್ವೊಳ್ತಾಲಿ. ತ್ಯಾ ವೆಳಾರ್ ಕಾರ್ಕಳ್ ತಸಲ್ಯಾ ಲ್ಹಾನ್ ತಾಲೂಕಾಂತ್ ವಕ್ತಾಂಚಿ ಫಾವೊತಿ ಸವ್ಲತ್ ನಾತ್ಲ್ಲಿ. ಆತಾಂ ತಿಕಾ ಕಾಮ್ ಕರುಂಕ್ ತಾಂಕಾನಾತ್ಲ್ಲೆಂ. ಮ್ಹಾತಾರಿ ಅಜಿ - ತಿಚೆ ಹಾತ್ ಪಾಂಯ್ ಚಿಕ್ಕೆ ಘಟ್ ಆಸ್ಲ್ಲ್ಯಾನ್ ಘರಾಂತ್ ನಿಸಾ-ಪೆಜೆಚೆಂ ಶಿಜ್ತಾಲೆಂ. ತರೀ ತಿಚೊ ಕಿತೆಂ ಚಡ್ ಕಾಳ್ ಭರ್ವಸೊ? ಆಖ್ರೇಕ್ ತಾಣೆಂ ನಿಶ್ಚಯ್ಸಿಲೆಂ - ಕೊಡಿಯಾಳ್ ವೆಚೆಂ ಮ್ಹಣ್. ಭಾಡ್ಯಾಚೆಂ ಬಿಡಾರ್ ಕಂಯ್ ಜಾಲ್ಯಾರ್ ಕಿತೆಂ? ಕೊಡಿಯಾಳಾಂತ್ ವಕ್ತಾಂಕ್ಯಿ ತೊಂದ್ರೆ ನಾಂತ್. ತ್ಯಾ ಶಿವಾಯ್ ಹೆಂ ಏಕ್ ವರ್ಸ್ ಗೆಲ್ಯಾರ್ ಜೆಸ್ಸಿಕ್ ಮಂಗ್ಳೂರಾಂತ್ಚ್ ಟೀಚೆರಿಚೆಂ ಕಾಮ್ ಮೆಳಾತ್.
ತಾಂಚ್ಯಾ ಘರ್ಚ್ಯಾ ಧನಿನೆನ್ ರೊಫಿನ್ಬಾಯೆನ್ಯಿ ತಶೆಂಚ್ ತಾಂಕಾಂ ಸಾಂಗ್ಲ್ಲೆಂ. ದಯಾಳ್ ಮನಾಚಿ ಸ್ತ್ರೀ ತಿ. ತಿಕಾ ಜೆಸ್ಸಿಗೆಲ್ಯಾಂಚಿ ಭರಿ ಬಿರ್ಮೊತ್ ಆಸ್ಲ್ಲಿ. ಮಾಗ್ಗಿ ಬಾಯ್ ಆನಿಂ ತಿಚಿ ಆವಯ್ ಕೊಡಿಯಾಳ್ ಗೆಲ್ಯಾ ನಂತರ್, ಜೆಸ್ಸಿಕ್ ಎಕ್ಲ್ಯಾಕ್ ಮೇ ವರೇಗ್( ಇಸ್ಕೊಲ್ ತೆದ್ನಾಂ ಆಖೇರ್ ಜಾತಾ) ತಾಂಗೆರ್ಚ್ ರಾವೊಂಕ್ ತಿಣೆಂ ಸಾಂಗ್ಲ್ಲೆಂ. ಆನಿಂ ಉರ್ವಾಚಿ ತೆರೆಜ್ಬಾಯ್ ತಿಕಾ ಲಾಗ್ಶಿಲಿ ಸಯ್ರಿ ಜಾಲ್ಲ್ಯಾನ್ ತಿಣೆಂಚ್ ತಾಂಕಾಂ ಘರಾಚಿ ವಿಲೆವಾರಿಯಿ ಕೆಲ್ಲಿ. ತ್ಯಾ ಪರಿಂ ಜೆಸ್ಸಿ ಕೊಡಿಯಾಳ್ ಆಯಿಲ್ಲೆಂ. ಕಿತೆಂಗಿ ನತಲಾಂಚ್ಯಾ ಫೆಸ್ತಾ ದಿಸಾಚ್ ತೆಂ ಕೊಡಿಯಾಳ್ ಭಾಯ್ರ್ ಸರ್ಲ್ಲೆಂ.
"ಆರೇ, ಜೆಸ್ಸಿ....!" ತೆರೆಜ್ಬಾಯ್ ಸಂತೊಸಾನ್ ಮ್ಹಣಾಲಿ, "ಕಿತೆಂಗೊ ಬಾಯೆ, ಬರ್ಯಾ ದಿಸಾಚ್ ಯೇವ್ನ್ ಪಾವ್ಲೆಂಯ್? ನ್ಹಂಯ್, ಯೆತಾನಾ ಆಪುಣ್ ಫಾಲಾಣ್ಯಾಂ ದಿಸಾ ಪಾವ್ತಾಂ ಮ್ಹಣ್ ಕಾಗ್ದಾರ್ ತಿಳ್ಸುಂಚೆಂ ನ್ಹಂಯ್ಗಿ ತುವೆಂ?"
"ನಾ ಮಾವ್ಶೆ, ಆಂವ್ಸರಾನ್ ಭಾಯ್ರ್ ಸರ್ಲೆಲ್ಯಾ ಮ್ಹಾಕಾ, ಪಯ್ಲೆಂ ಕಾಗಾದ್ ಬರೊಂವ್ಕ್ಯಿ ವೇಳ್ಚ್ ನಾತ್ಲ್ಲೊ. ಕಶಿ ಆಸಾಯ್ ತುಂ?"
"ಹಾಂವ್ ಬರಿಂ ಆಸಾಂ. ತಾಣಿ ತುಕಾ ರೆಕಾದ್ ದಿಲ್ಯಾತ್. ರೊಫಿನ್ಮಾವ್ಶೆನ್ಯಿ ತುಕಾ ವಿಚಾರ್ಲೆಂ"
"ಹಾಂ, ಸಕ್ಡಾಂಕ್ಯಿ ವಿಚಾರ್ನ್ ರೆಕಾದ್ ದಿತಾತ್. ಆಮ್ಗೆರ್ ಯೇಂವ್ಕ್ ತಾಂಕಾಂ ಪುಟ್ವಾನಾ" ದುರ್ಸಾಲಿ ತೆರೆಜ್ಬಾಯ್, "ಮ್ಹಾಕಾಯಿ ವೇಳ್ಚ್ ಮೆಳಾನಾ, ಏಕ್ ಪಾವ್ಟಿಂ ತೆಣೆಂ ವಚೊನ್ ಯೆವ್ಯೆತ್ ಮ್ಹಳ್ಯಾರ್. ಹೆಂ....ಘರ್ಚಿ ವಾಟ್ ಕಶಿ ಕಳ್ಳಿ ತುಕಾ? ಹ್ಯಾ ಆದಿಂ ಆಮ್ಗೆರ್ ತುಂ ಆಯಿಲ್ಲೆಂನಾಂಯ್?"
"ವಾಟೆರ್ ಎಕ್ಲೊ ತರ್ನಾಟೊ ಮೆಳ್ಳೊ. ತಾಣೆಂ ಹಾಂಗಾ ಮ್ಹಣಾಸರ್ ವಾಟ್ ದಾಕೈಲಿ" ಜೆಸ್ಸಿ ಮ್ಹಣಾಲೆಂ.
"ಹಾಂ, ಗಜಾಲಿ ಮಾಗಿರ್ ಕರ್ಯಾಂ. ಪಯ್ಲೆಂ ಮುಸ್ತಾಯ್ಕಿ ಬದ್ಲಿ. ಆಜ್ ರಾವೊನ್ ಫಾಲ್ಯಾಂ ಪಾಟಿಂ ವೆಶಿ. ಚಲ್, ತುಕಾ ತಾನೆಕ್ ಹಾಡ್ತಾಂ?"
"ನಾ ಮಾವ್ಶೆ. ಆಜ್ ಸಾಂಜೆರ್ಚ್ ಪಾಟಿಂ ವಚಾಜಾಯ್ ಮ್ಹಾಕಾ.." ಆಶೆಂ ಸಾಂಗೊನ್ ಜೆಸ್ಸಿ ಬಿತರ್ ಗೆಲೆಂ.
"ಹುಂ .....ಚೆಡುಂ ಘೊಡ್ಯಾರ್ ಆಯ್ಲಾಂ.." ಹಾಸತ್ತ್ ತೆರೆಜ್ಬಾಯ್ ರಾಂದ್ಚ್ಯಾ ಕುಡಾಕ್ ಗೆಲಿ, "ಹುಂ, ವೆಗ್ಗಿ ವಚೊಂಕ್ ದಿತಾಂ ತುಕಾ..."
ಘರಾ ಪಾವ್ಲ್ಲ್ಯಾ ಮೆಲ್ವಿನಾಚಿಂ ಚಿಂತ್ನಾಂ ದುಸ್ರಿಂಚ್ ಜಾವ್ನಾಸ್ಲ್ಲಿಂ. ಕಿತ್ಲೆಂ ಸುಂದರ್ ಜೆಸ್ಸಿ....ತೊ ನಿಯಾಳ್ತಾಲೊ. ತಾಚೆಂ ಉಲವ್ಣೆಂ ಕಿತ್ಲೆಂ ಸ್ವಾಧೀಕ್. ತೊಂಡಾ ವಯ್ಲೊ ತೊ ಆಮ್ರುಕೊ ಹಾಸೊ. ತಾಚಿ ತಿ ಚಾಲ್ - ಸಗ್ಳೆಂ ತಾಚೆಂ ರುಪ್ಣೆಂ ಚಿಂತಾನಾ ಮೆಲ್ವಿನ್ ಪಿಶ್ಯಾಬರಿ ಜಾಲ್ಲೊ.
ದನ್ಪರಾಂಚ್ಯಾ ಜೆವ್ಣಾರ್ಯಿ ತಾಕಾ ಮನ್ ನಾತ್ಲ್ಲೆಂ. ಜೆವ್ಲ್ಲೆಂ ಶಾಸ್ತ್ರ್ ಕರ್ನ್ ತೊ ಆಪ್ಲ್ಯಾ ಕುಡಾಕ್ ಗೆಲೊ. ಸಿಂತಿಚಿಂ ಆನಿಂ ಜೆಸ್ಸಿಚಿಂಚ್ ಚಿಂತ್ನಾಂ ತಾಕಾ ಧೊಸ್ತಾಲಿಂ. ಮಧ್ಯಾನೆ ರಾತ್ಚಿ ಸಂಗತ್, ತಶಿಚ್ ಸಕಾಳಿಂ ಜೆಸ್ಸಿಚಿ ವಳೊಕ್ ಜಾಲ್ಲಿ ಘಡಿ ವಿವರ್ಸುನ್ ಪಳೆತಾನಾ ತೊಚ್ ಅಜಾಪ್ ಜಾಲೊ. ಕಶೆಂಯಿ ಕಷ್ಟಾಂನಿ ಚ್ಯಾರ್ ವೊರಾಂ ಜಾತಾ ವರೇಗ್ ತೊ ಘರಾ ರಾವ್ಲೊ. ಉಪ್ರಾಂತ್ ನ್ಹೆಸೊನ್, ಶೀದಾ ಸುಲ್ತಾನ್ ಬತ್ತೇರಿಕ್ ಗೆಲೊ.
ತಿ ಸಾಂಜ್ ಭೋವ್ ಸುಂದರ್ ಜಾವ್ನಾಸ್ಲ್ಲಿ. ಪಾಂಯಾಂ ಮುಳಾಂತ್ ಆಸ್ಲ್ಲಿ ತಿ ನ್ಹಂಯ್, ತಡಿರ್ ಟಿಪ್ಪುಚೆಂ ಕೊಟೆಂ, ತಾಚ್ಯಾ ವಯ್ರ್ ಚಡೊನ್ ದೆಖ್ತಾನಾ ಚ್ಯಾರಾಂಯೀ ಕುಶಿಂಚೆಂ ದೃಶ್ಯ್ ದಿಸ್ತಾಲೆಂ. ರೂಕ್ - ಝಡಾಂನಿ ಸೊಬ್ಚಿ ತಿ ಸೃಷ್ಟಿ. ಲೇಕ್ - ಮೀತ್ ನಾತ್ಲ್ಲೆ ಮಾಡ್, ಆನಿಂ ತಿಂ ಮೊಡ್ಲಾಂ ಸಾಂಜೆಚ್ಯಾ ವಾರ್ಯಾಕ್ ಧಲೊನ್ ನಾಚ್ತಾಲಿಂ. ಥಂಡಾಯೆಕ್ ಪಿಶಿಂ ಜಾವ್ನ್. ನ್ಹಂಯ್ತ್ ಥಂಯ್ ಥಂಯ್ ದೊಣಿ, ಪಯ್ಣಾರ್ಯಾಂಕ್ ಘೆವ್ನ್ ತ್ಯಾ ತಡಿಕ್ ಸಾಗ್ಶಿತಾಲ್ಯೊ. ಆಜ್ ಕ್ರಿಸ್ಮಸ್ ಜಾಲ್ಲ್ಯಾ ನಿಮ್ತಿಂ, ಸಬಾರ್ ಲೋಕ್ ದರ್ಯಾತಡಿಚೆಂ ವಾರೆಂ ಘೆಂವ್ಕ್ ತಂಡ್ರಬೈಲ್ ವೆತಾಲೊ. ಚೆಡೆ- ಚೆಡ್ವಾಂ, ದಾದ್ಲೆ - ಸ್ತ್ರೀಯೊ, ಭುರ್ಗಿಂ ಆಶೆಂ ಲೊಕಾಚಿ ಖೆಟ್ಚ್ ಜಾಲ್ಲಿ. ಆನಿಂ ಫೆಸ್ತಾಚ್ಯಾ ನಿಬಾನ್ ತ್ಯಾ ದೊಣ್ಕಾರಾಂಕಿ ಆಪ್ರೂಪ್ ವ್ಯಾರ್ ಜಾತಾಲೊ.
ಮೆಲ್ವಿನ್ ಮಾತ್ರ್ ಮತಿರ್ ಆಸೊನ್ಯ್ಯಿ, ನಾತ್ಲ್ಲ್ಯಾಬರಿ ತ್ಯಾ ಲೊಕಾಕ್ ಪಳೆವ್ನ್ಂಚ್ ಆಸ್ಲ್ಲೊ. ಥೊಡೊ ಪಾಟಿಂ ಯೆತಾಲೊ. ತಾಚೆಂ ಧ್ಯಾನ್ ಲೊಕಾಚೆರ್ ಆಸ್ಲ್ಲೆಂ, ಪುಣ್ ಮನ್ ದೋನ್ಂಚ್ ಪಿಂತುರಾಂ ದೆಖ್ತಾಲೆಂ -ಸಿಂತಿ ಆನಿಂ ಜೆಸ್ಸಿ.
ಸಿಂತಿಕ್ ತೊ ಲ್ಹಾನ್ ಆಸ್ತಾನಾ ಥಾವ್ನ್ ಜಾಣಾ. ತರಿಕ್ಯಿ ಆಜೂನ್ಯಿ ತಾಕಾ ತೊ ನೆಣಾ ಜಾಲ್ಲೊ. ಗ್ರೇಸ್ತ್ ಸಿಂತಿ, ದುಬ್ಳ್ಯಾ ಮೆಲ್ವಿನಾಕ್ ಕಶೆಂ ವಳ್ಕಾತೆಲೆಂ? ತಾಚೆಲಾಗಿಂ ಚ್ಯಾರ್ ಸಬ್ದ್ ಉಲೊಂವ್ಕ್ ಗೆಲ್ಲ್ಯಾ ಮೆಲ್ವಿನಾಕ್ ಆಕ್ಮಾನ್ ಆನಿಂ ನಿಷ್ಟುರ್ ಉತ್ರಾಂಚ್ ಮೆಳ್ಲ್ಲಿಂ. ಆನಿಂ ಕಾಲ್ಚ್ಯಾ ರಾತ್ಚೆಂ ಘಡಿತ್ ಅಂತಿಮ್ ಸ್ಥಾನಾಕ್ ಪಾವ್ಲ್ಲೆಂ ಆನಿಂ ಮೆಲ್ವಿನಾನ್ ಸಿಂತಿ ವಿಶ್ಯಾಂತ್ಲಿ ಆಪ್ಲಿಂ ಚಿಂತ್ನಾಂ ಸ್ವಷ್ಟ್ ಸಾಂಗ್ಲ್ಲಿಂ.
ಆನಿಂ ತಾಚ್ಯಾ ಉಪ್ರಾಂತ್ ಜೆಸ್ಸಿ. ಪರ್ಕಿ ಎಕಾ ಚಲಿಯೆಚಿ ತಾಕಾ ಬೆಟ್ ಜಾಲ್ಲಿ. ತ್ಯಾ ಥೊಡ್ಯಾ ಆವ್ದೆಂತ್ ತಿಣೆಂ ಆಪ್ಲಿ ಸಂಗತ್ ಸೂಕ್ಷ್ಮ್ ಥರಾನ್ ತಾಕಾ ಸಾಂಗ್ಲ್ಲಿ. ಕಿತ್ಲೆಂ ಖಾಲ್ತೆಂ ಉಲವ್ಣೆಂ ತಾಚೆಂ! ಮನ್ಶಾಚೊ ಸ್ವಭಾವ್ ತಾಚ್ಯಾ ಉಲವ್ಣ್ಯಾಂತ್ ಕಳ್ತಾ ಖಂಯ್. ’ನಿಜಾಕೀ ಜೆಸ್ಸಿ ತಸಲ್ಯೊ ಚಲಿಯೊ ಸಾಮಾಜಿಕ್ ಆಲಂಕಾರ್’ ಚಿಂತ್ಲೆಂ ತಾಣೆಂ. ತರೀ, ಜೆಸ್ಸಿ ವಿಷ್ಯಾಂತ್ ಚಿಂತುನ್ ಕಿತೆಂ ಫಾಯ್ದೊ? ತೆಂ ಕಾಂಯ್ ಸದಾಂನಿತ್ ಆಪ್ಣಾಕ್ ಮೆಳ್ಚ್ಯಾಬರಿ ನಾ. ತೆಂ ಕಾರ್ಕಳಾಂತ್ಚ್ ರಾವ್ತೆಲೆಂ. ಮೆಲ್ವಿನಾನ್ ಲಾಂಬ್ ಏಕ್ ಶ್ವಾಸ್ ಸೊಡ್ಲೊ. ತಾಚ್ಯಾ ಮತಿಂತ್ ಏಕ್ಚ್ ಸವಾಲ್ ಉಬ್ಜಾಲ್ಲೆಂ - ಎಕಾಚ್ ಜಾತಿಚ್ಯಾ ದೊಗಾಂ ಚಲಿಯಾಂ ಮಧೆಂ ಕಸಲೊ ಬೇಧ್!
ಮನಿಸ್ ತೊ ಮನಿಸ್ಚ್ ಜಾವ್ನಾಸ್ತಾಂ, ಅಭಿಪ್ರಾಯ್ ಆನಿಂ ನಡ್ತ್ಯಾಂತ್ ಎಕಾಮೆಕಾ ಬೇಧ್ ಆಸ್ತಚ್. ಥೊಡಿಂ ಖಾಲ್ತಿಂ ಜಾಲ್ಯಾರ್ ಥೊಡಿಂ ಗರ್ವಿ. ಥೊಡಿಂ ಶ್ಹಾಣಿ ತರ್, ಹೆರಾಂ ಬುದ್ದು. ಜಾಯ್ತಿಂ ದಯಾಳ್ ತರ್, ತಿತ್ಲಿಂಚ್ ಮೊಸ್ತಿಯಿ ಆಸ್ತಾತ್. ಆನಿಂ ಸಂಯ್ಭ್ ತೆಂ, ಕುಟ್ಮಾಕ್ಯಿ ಲೆಕಿನಾ. ಥೊಡ್ಯಾ ಪಾವ್ಟಿಂ ದ್ರಷ್ಟಾಂತಾಕ್ ಮೆಲ್ವಿನಾಕ್ಯಿ ಚಡ್ ತೇಂಪ್ ರಾಕೊಂಕ್ ಪಡ್ಲೆಂ ನಾ.
ತ್ಯಾ ರಾತಿಂ ಘರಾ ಆಂಟಿ ತಾಕಾ ಸಾಂಗಾ ಲಾಗ್ಲಿ - "ಮೆಲ್ವಿನ್ ಫಾಲ್ಯಾಂ ಹಾಂವ್ ತುಕಾ ಏಕ್ ಕಾಮ್ ದಿತಾಂ ಜಾಯ್ತ್ಗಿ?"
"ತುಜೊ ಬಾಪ್ಲ್ಯೊ ಕಾಲ್ ಆಮ್ಕಾಂ ಹಂಪನ್ಕಟ್ಟಾರ್ ಮೆಳ್ಲ್ಲೊ. ಫಾಲ್ಯಾಂ ಸಾಂಜೆರ್ ತಾಣೆಂ ಜೆವ್ಣಾಕ್ ಆಮ್ಕಾಂ ಆಪಯಿಲ್ಲೆಂ. ತುಂ ತಾಂಗೆರ್ ಯೇಂವ್ಕ್ ಜಾಯ್ನಾ ಬದ್ಲಾಕ್ ತಾಂಕಾಂಚ್ ಹಾಂಗಾ ಆಪಯ್."
ಮೆಲ್ವಿನಾಚೊ ಬಾಪ್ಲ್ಯೊ ವಾಲೆನ್ಸಿಯಾ ರವ್ತಾಲೊ. ಪಯ್ಲೆಂ ಥಾವ್ನ್ ತಾಂಕಾಂ ಹಾಂಕಾಂ ಸಳಾವಳ್ ತಶಿ ತಶಿಚ್. ತೊ ಗ್ರೇಸ್ತ್ ಜಾವ್ನಾಸ್ಲ್ಲೊ. ಪುಣ್ ಮನಾಂತ್ ತಿತ್ಲೊಚ್ ಸುರಾತಿ. ದೊಗಾಂಯ್ ಘೊವಾ - ಬಾಯ್ಲೆಕ್ ದಾನಾ ಧರ್ಮಾಂತ್ ಹಾತ್ ಪಾಟಿಂ. ಸ್ವತಃ ಆಪ್ಲ್ಯಾ ಭಾವಾಕ್ ವಿತೊರಾಬಾಕ್ಯಿ, ಕಷ್ಟಾಂಚ್ಯಾ ವೆಳಾರ್ ಪಾವ್ಲ್ಲೊ ಮನಿಸ್ ನ್ಹಂಯ್ ತೊ. ಆಶೆಂ ಆಸ್ತಾಂ ಕುಟ್ಮಾ ಮಧೆಂ ಆಸ್ಚೊ ತೂ ಮಯ್ಪಾಸ್ ನಾಂಚ್ ಜಾಲ್ಲೊ. ಎಕಾಮೆಕಾಗೆರ್ ಯೇವ್ನ್ ವೆಚೆಂ ಭೊವ್ ಆಪ್ರೂಪ್ ಜಾಲ್ಲೆಂ.
ತ್ಯಾಚ್ ಕಾರಣಾಕ್ ಲಾಗೊನ್ ಮೆಲ್ವಿನ್ ನರ್ಗೊನ್ ಮ್ಹಣಾಲೊ. "ವಚೊಂಕ್ ವೆತಾಂ ಆಂಟಿ ಪುಣ್ ಆಮ್ಕಾಂ ಆನಿಂ ತಾಂಕಾ.."
ಅರ್ಧ್ಯಾರ್ಚ್ ವಿತೊರಾಬ್ ಮ್ಹಣಾಲೊ. "ಹಾಂ, ಹಾಂ ....ತೊ ಪೂರಾ ಪ್ರಸ್ತಾಪ್ ನಾಕಾ ಆತಾಂ. ಹಾಬಾ, ತುಕಾ ಯೆದೆಶ್ಯಾಕ್ ತಿ ಖಬಾರ್ಗಿ? ತಾಂಚೆಂ ಲೆಕ್ ತಿಂ ದೆವಾಕ್ ದಿತೆಲಿಂರೆ ಮೆಲ್ವಿನಾ. ನ್ಹಂಯ್, ಆಶೆಂ ಹ್ಯಾ ಪ್ರಾಯೆರ್ಚ್ ಎಕಾಮೆಕಾ ಶಿಣ್ ದವರ್ಲ್ಯಾರ್ ಮುಖಾರ್ ಕಶೆಂ ಚಲಾತ್? ಮುಖ್ಲೆ ದೀಸ್ ಕಾಡುಂಕ್ ಆಸಾತ್ಮೂ ತುಕಾ? ತಾಣಿಂ ರಾಗ್ ಶಿಣ್ ಚಲೈಲ್ಯಾರ್ ವ್ಹಡ್ ನ್ಹಂಯ್. ಆಮಿಂ ತಾಂಕಾಂ ಮಾಯಾಮೋಗ್ಚ್ ಪಾಟಿಂ ದಿವ್ಯಾಂ"
"ಹಾವೆಂ ಕಾಂಯ್ ರಾಗ್ ಶಿಣ್ ಚಲೊಂವ್ಕ್ ನಾ" ದುಕೊನ್ ಮ್ಹಣಾಲೊ ಮೆಲ್ವಿನ್.
"ಹಾಂವೆಂ ತಶೆಂ ಮ್ಹಳೆಂವೆ? ಆತಾಂ?" ವಿತೊರಾಬ್ ಸಾಂಗಾಲಾಗ್ಲೊ, "ಆಂಟಿನ್ ಸಾಂಗ್ಲ್ಲ್ಯಾಬರಿ ತುಂ ಬಾಪ್ಪುಗೆರ್ ವೊಚ್ ಆನಿಂ ಸಾಂಗ್ಲ್ಲೆಂ ಕಾಮ್ ಕರ್."
"ತೊ ಆಂಗೆರ್ ಯೇಂವ್ಕ್ ಆಯ್ಕಾನಾ ಜಾಲ್ಯಾರ್?"
"ತಿ ಉಪ್ರಾಂತ್ಲಿ ಗಜಾಲ್. ತುಂ ವಚೊನ್ ಯೆ.."
ನಾಖುಶೆನ್ ತರೀ ದುಸ್ರ್ಯಾ ಸಕಾಳಿಂ ವಾಲೆನ್ಸಿಯಾ ಭಾಯ್ರ್ ಸರ್ಲೊ. ವೆತಾನಾ ಆಂಟಿನ್ ತಾಕಾ ರುಪಯ್ ದಿಲೊ. ಅರ್ಧ್ಯಾ ರಾಗಾನ್ ತಾಣೆಂ ಪೆಂಟ್ ಆನಿಂ ಶರ್ಟ್ಚ್ ಘಾಲೆಂ ಆನಿಂ ಲೇಡಿ ಹಿಲ್ ಬಸ್ಸ್ಟೇಡಾಕ್ ಗೆಲೊ.
ತೊ ಬಾಪ್ಪುಗೆಲ್ಯಾ ಘರಾ ಪಾವ್ತಾನಾ ವೊರಾಂ ಇಕ್ರಾಂ ಜಾಲ್ಲಿಂ. ಬಾಪ್ಪು ಘರಾ ಆಸ್ಲ್ಯಾರ್ ಪುರೊ ಮ್ಹಣ್ ತೊ ಮತಿಂತ್ಚ್ ಮಾಗ್ತಾಲೊ. ಕಿತ್ಯಾಕ್, ಆಯಿಲ್ಲೆಂ ಕಾಮ್ ವೆಗಿಂಚ್ ತಿರ್ಸಿಯೆತ್. ಆನಿಂ ಜೆವ್ಣಾಕ್ ರಾಂವ್ಚೆಂ ಬಾಂದ್ಪಾಸ್ ಚುಕವ್ಯೆತ್ ಆಶಿ ತಾಚಿ ಆಲೋಚನ್. ತಾಂಗೆರ್ ಏಕ್ ಘಡಿ ರಾಂವ್ಚೆಂ ಮ್ಹಳ್ಯಾರ್ ತಾಕಾ ಕಿತೆಶೆಂ ಭೊಗ್ತಾಲೆಂ.
ಆಂಗ್ಣಾಂತ್ ಶೆಜಾರ್ಚಿಂ ಆನಿಂ ಘರ್ಚಿಂ ಲ್ಹಾನ್ ಭುರ್ಗಿಂ ಖೆಳ್ತಾಲಿಂ. ಮೆಲ್ವಿನಾಕ್ ಪಳೆತಾಚ್ ತಾಂಚೊ ಖೆಳ್ ಬಂಧ್ ಜಾಲೊ. ಘರ್ಚೊ ಪೆಟೊಯಿ ಸಾಂಖಳ್ ವೊಡ್ತಂ ವೊಡ್ತಾಂ ಘೊಂಕುಂಕ್ ಲಾಗ್ಲೊ. ತೊ ಘರ್ಚೆಂ ಮೆಟ್ ಚಡ್ತಾನಾ, ಬಿತರ್ ಥಾವ್ನ್ ತಾಚಿ ಮಾವ್ಶಿ ಸೆಲ್ಲಿಬಾಯ್ ಭಾಯ್ರ್ ಆಯ್ಲಿ.
"ಕೋಣ್....ಕೋಣ್ ತುಂ? ಆರೆರೇ.....ಮೆಲ್ವಿನ್! ತುಜಿ ವಳೊಕ್ಚ್ ಕಳ್ಳಿನಾಂಮೂರೆ ಮ್ಹಾಕಾ! ಕೋಣ್ ಸುಟ್ ಘಾಲ್ಲೊ ಮಾನಾಯ್ ಆಯ್ಲೊಗಾಯ್ ಮ್ಹಣ್ ಚಿಂತುಂಕ್ ಪಡ್ಲಿಂ ಹಾಂವ್!! ಬಸ್.."
ಕದೆಲಾರ್ ಬಸೊನ್ ತೊ ವಿಚಾರಿಲಾಗ್ಲೊ - "ಕಶಿ ಆಸಾಯ್ ಮಾವ್ಶೆ ತುಂ?"
"ಹಾಂವ್ ಕಶಿಂ ಆಸಾ ಮ್ಹಣ್ ವಿಚಾರ್ ಕರುಂಕ್ ಆಯ್ಲಾಯ್ಗಿ ತುಂ?" ನಂಜ್ಯಾಳಿ ಹಾಸೊನ್ ತಿ ಮ್ಹಣಾಲಿ, "ಹಾಂವ್ ಬರಿ ಆಸಾಂ. ಆಮ್ಚಿ ಕಸಲಿ ಖಬಾರ್ ಆತಾಂ ಉಲೊಂವ್ಚಿ? ಖಬಾರ್ ತುಮ್ಚಿ, ಬಿ.ಎ., ಎಮ್. ಎ., ಶಿಕ್ತೆಲ್ಯಾಂಚಿ, ಪೆಂಟಾ ಘಾಲ್ಲ್ಯಾಂಚಿ...."
"ಬಾಪ್ಪು ಘರಾ ನಾಂವೆ?" ತಿಚ್ಯಾ ನಂಜ್ಯಾಕ್ ಗುಮಾನ್ ಕರಿನಾಸ್ತಾಂ ತೊ ವಿಚಾರಿಲಾಗ್ಲೊ.
"ನಾ, ಆತ್ತಾಂ ಯೇಂವ್ಕ್ ಪುರೊ. ತುಂ ಕಸಲ್ಯಾ ಗರ್ಜೆನ್ ಆಯ್ಲೊಯ್?"
ತಾಣೆಂ ಆಯಿಲ್ಲೆಂ ಕಾರಣ್ ಮೆಟ್ವ್ಯಾನ್ ತಿಳ್ಸಿಲೆಂ. ಆಯ್ಕಾತಾಚ್ ಸೆಲ್ಲಿಬಾಯೆಚೆಂ ತೊಂಡ್ ಕಾಳೆಂ ಜಾಲೆಂ.
"ಮಾವ್ಶೆ, ಹಾಂವ್ ಆತಾಂ ಚಲ್ತಾಂ. ತುಂ ಹಿ ಖಬಾರ್ ಸಾಂಗ್ ಬಾಪ್ಪುಕ್." ತೊ ಉಟ್ಲೊ.
"ಹಾಂವೆಂ ಸಾಂಗಾಜಾಯ್? ಮ್ಹಾಕಾ ನಾಕಾ ತೊ ಪ್ರಸಂಗ್. ಹಾಂವೆಂ ಸಾಂಗ್ಲ್ಯಾರ್ ತೊ ಮುಜೆರ್ ಖುಬಾಳ್ತಾಲೊ. ತುಂಚ್ ಸಾಂಗ್ ಆನಿಂ ವೊಚ್....." ಇತ್ಲೆಂ ಸಾಂಗೊನ್ ತಿ ಬಿತರ್ ಚಲ್ಲಿ.
ಕುರ್ಲೆಕ್ ಧರುಂಕ್ ಗೆಲ್ಲ್ಯಾಕಡೆ ಕುರ್ಲೆನ್ಂಚ್ ತಾಕಾ ಧರ್ಲ್ಲ್ಯಾಬರಿ ಸ್ಥಿತಿ ಜಾಲಿ ತಾಚಿ. ಬಾಪ್ಪು ಯೆತಾ ಮ್ಹಣಾಸರ್ ರಾಕ್ಚೆಂ ಅನ್ಯೇಕ್ ವ್ಹಡ್ಲೆಂ ಪಾಚಿತ್. ಮತಿಂತ್ ಪುರ್ಪುರೊನ್ ತೊ ಬಸ್ಲೊ.
ವೊರಾಂ ಬಾರಾ ಜಾಲಿ. ತರಿಕೀ ಬಾಪ್ಪುಚಿ ಝಳಕ್ ನಾ. ಬಿತರ್ಲಿ ಸೆಲ್ಲಿಬಾಯೆಯ್ಯಿ ಭಾಯ್ರ್ ಯೇಂವ್ಕ್ ನಾ. ತಾಕಾ ಎಕ್ಸುರ್ಯಾಕ್ ಬಸೊನ್ ಉಬ್ಗೊಣ್ ಆಯ್ಲಿ. ತೆದಾಳಾಚ್ ’ಟ್ರಿನ್’ ಕರ್ನ್ ಸೈಕಲಾಚಿ ಬೆಲ್ಲ್ ವ್ಹಾಜ್ಲಿ. ಆನಿಂ ಪಾಟಾಪಾಟ್ - "ಅರೇ ಮೆಲ್ವಿನ್...... ಕೆದಾಳಾ ಆಯ್ಲೊಯ್?" ಮ್ಹಳ್ಳೊ ತಾಳೊ ಆಯ್ಕಾಲೊ. ಸೆಲ್ಲಿಬಾಯೆಚೊ ಮ್ಹಾಲ್ಘಡೊ ಪೂತ್ ಮೆಲ್ಕಿ ಹಾಸೊನ್ ಸೊಪ್ಯಾಚಿಂ ಮೆಟಾಂ ಚಡ್ಲೊ.
ಮೆಲ್ಕಿ ಬಿ.ಎ. ಶಿಕೊನ್, ಮಂಗ್ಳೂರ್ಚ್ಯಾ ಎಕಾ ವ್ಹಡ್ ವ್ಯಾಪಾರಿ ಸಂಸ್ಥ್ಯಾಂತ್ ಬರ್ಯಾ ಹುದ್ದ್ಯಾರ್ ಆಸ್ಲ್ಲೊ. ಮೆಲ್ವಿನಾಚಾಕಿ ಪಾಂಚ್ - ಸ ವರ್ಸಾಂಕ್ ವ್ಹಡ್ ತೊ. ಬರ್ಯಾ ಸಮ್ಜಣೆಚೊ ಆನಿಂ ತಸೊಚ್ ಮಯ್ಪಾಸಿ. ತಾಚೊ ಸ್ವಭಾವ್ ಆವಯ್ - ಬಾಪಾಯ್ಚ್ಯಾಕ್ ಸರೀ ಉಳ್ಟೊ. ದೆಕುನ್ಂಚ್ ಮೆಲ್ವಿನಾಕ್ ಮೆಲ್ಕ್ಯಾಬ್ ಮ್ಹಳ್ಯಾರ್ ಜೀವ್ ಆನಿಂ ತಾಕಾ ತೊ ಬರೊ ಮಾನ್ ದಿತಾಲೊ.
"ಕಸೊ ಆಸಾಯ್ ತುಂ ಮೆಲ್ವಿನ್? ತುಕಾ ಪಳೆನಾಸ್ತಾನಾ ವರ್ಸಾಂ ಜಾಲ್ಲ್ಯಾಬರಿ ದಿಸ್ತಾತ್" ಮೆಲ್ಕಿ ಹಾಸೊ.
"ಯೇಂವ್ಕ್ ವೇಳ್ಚ್ ಮೆಳ್ಳೊನಾ ಮೆಲ್ಕ್ಯಾಬಾ..." ಜಪ್ ದಿಲಿ ತಾಣೆಂ.
"ವೇಳ್ ಮೆಳಾನಾ.." ಅಮ್ರುಕೊ ಹಾಸೊನ್ ಮೆಲ್ಕಿ ಮ್ಹಣಾಲೊ, "ಹುಂ ...ಕೊಲೆಜಿಕ್ ವೆತಾಯ್ ನ್ಹಂಯ್ವೆ? ಶಿಕೊಂಕ್ಯಿ ಮಸ್ತ್ ಆಸಾ. ಹಾಂ, ಅವ್ಚಿತ್ತ್ ಕಿತೆಂ ತುಜಿ ಸವಾರಿ ಉದೆಲಿ?"
"ಮ್ಹಾಕಾ ಆಂಟಿನ್ ಧಾಡ್ಲೆಂ.."
"ಆಂಟಿನ್! ಕಿತ್ಯಾ ಖಾತಿರ್.."
"ಬಾಪ್ಪುನ್ ತುಮ್ಗೆರ್ ತಾಂಕಾಂ ಜೆವ್ಣಾಕ್ ಆಪವ್ಣೆಂ ದಿಲ್ಲೆಂ ಖಂಯ್. ತಿಣೆಂ ಸಾಂಗ್ಲಾಂ, ತಾಂಕಾಂ ಯೇಂವ್ಕ್ ಜಾಯ್ನಾ ಖಂಯ್, ಆನಿಂ ಬಾಪ್ಪುಕ್ಚ್ ಆಮ್ಗೆರ್ ಆಪಯ್ಲಾಂ"
ತಾಚೆಂ ತೊಂಡ್ ಬದ್ಲಾವಣ್ ಜಾಲ್ಲೆಂ ಮೆಲ್ವಿನಾನ್ ದೆಖ್ಲೆಂ. ಏಕ್ ಘಡಿ ಭರ್ ಚಿಂತೇಸ್ತ್ ರಾವೊನ್ ತೊ ಮ್ಹಣಾಲೊ. "ಇತ್ಲೆಂ ಸಾಂಗೊಂಕ್ ತುವೆಂ ಯೆಂವ್ಚಿ ಗರ್ಜ್ಚ್ ನಾತ್ಲ್ಲಿ ಮೆಲ್ವಿನ್. ಕಿತ್ಯಾಕ್, ತುಂ ಜಾಣಾಂಯ್ ಬಾಬ್ ತುಮ್ಗೆರ್ ಖಂಡಿತ್ ಯೆಂವ್ಚೊ ಬಾ ಮ್ಹಣ್. ಪಳೆ ಮೆಲ್ವಿನ್, ಮ್ಹಜಿಂ ಆವಯ್ - ಬಾಪುಯ್ ತುಮ್ಕಾಂ ನಿಜಾಕ್ಯಿ ಲೆಕಿನಾಂತ್. ಕಿತ್ಯಾಕ್, ತುಮಿಂ ದುಬ್ಳಿಂ ಮ್ಹಳ್ಳ್ಯಾ ಕಾರಣಾಕ್. ಹೆಂ ಪಳೆತಾನಾ ಮ್ಹಾಕಾಚ್ ಬೆಜಾರ್ ಆನಿಂ ಖಂತ್ ಬೊಗ್ತಾ. ಪುಣ್ ಮ್ಹಜೆಂ ಉತಾರ್ ವ್ಹಡಿಲಾಂ ಆಯ್ಕಾನಾಂತ್. ಆಜ್ ಲ್ಹಾನ್ ಧರ್ಣ್ ದಿಸಾನಾ, ಕುಟ್ಮಾಚಿ ವೊಡ್ನಿ ನಾ. ಪುಣ್ ದೆವಾಕ್ ಚಡ್ ವೇಳ್ ನಾ ಮೆಲ್ವಿನ್. ಆಮ್ಚಿ ಸ್ಥಿತಿ ಫಾಲ್ಯಾಂ ಬಿಕೆಫಾಸ್ಟ್ ಜಾಂವ್ಚಿನಾ ಮ್ಹಣ್ ಪಾತ್ಯೆಣಿ ಕಶಿ? ಒಟ್ಟಾರೆ, ಪಯ್ಶೆ ಮನ್ಶಾಚಿ ಮತ್ ಘುಂವ್ಡಾಯ್ತಾತ್. ಹಿ ಮ್ಹಜ್ಯಾ ಬಾಪಾಯ್ಚಿಚ್ ನ್ಹಂಯ್, ಬಗಾರ್ ಸಗ್ಳ್ಯಾ ಮನ್ಶಾಕುಳಾಚಿ ಅಸ್ಕತ್ಕಾಯ್"
ಥೊಡ್ಯಾ ವೆಳಾನ್ ಬಿತರ್ಲಿ ಮಾವ್ಶಿ ಭಾಯ್ರ್ ಯೇವ್ನ್ ಮ್ಹಣಾಲಿ - "ತಾಕಾ ಕಿತ್ಲೊ ವೇಳ್ ರಾಕ್ಚೆಂ? ತುಮಿಂ ಆತಾಂ ಜೆವಾಣ್ ಕರಾ. ಉಟಾ, ಮೆಲ್ವಿನ್ ಊಟ್......."
ಮನ್ ನಾತ್ಲ್ಯಾರಿ ಮೆಲ್ವಿನಾನ್ ಜೆವ್ಣಾಕ್ ರಾಂವ್ಚೆಂ ಪಡ್ಲೆಂ. ತಾಂಚೆಂ ಜೆವಾಣ್ ಜಾತಾನಾ ಬಾಪ್ಲ್ಯೊ ಘರಾ ರಾವ್ಲೊ.
"ಓ.......ಭಾರೀ ಅಪ್ರೂಪ್ ಮಾನಾಯ್! ಕಿತೆಂ ಸವಾರಿ ಉದೆಲಿ ಹಾಬಾ..? ವಿಚಾರ್ಲೆಂ ತಾಣೆಂ.
"ಕಾಂಯ್ ನಾ ಬಾಪ್ಪು, ಹಾಂವ್ ಆಷೆಂಚ್ ಗರ್ಜ್ ಸಾಂಗೊನ್ ಸೊಡ್ಲಿ. ಆಯ್ಕೊನ್ ಸಾಲಾಬಾಚೆಂ ತೊಂಡ್ ಕಾಳೆಂ ವಿದ್ರೂಪ್ ಜಾಲೆಂ.
"ಕಿತೆಂ, ಹಾಂವೆಂ ತುಮ್ಗೆರ್ ಯೇಜಾಯ್?" ಕೆಂವ್ಚಾಲೊ ತೊ, "ಮ್ಹಾಕಾ ಪುರ್ಸುತ್ ನಾ. ಕಿತೆಂ, ತುಜಿ ಆಂಟಿ ಚಿಂತ್ತಾ ಆಸ್ತೆಲಿ ಮ್ಹಾಕಾ ದುಸ್ರೆಂ ಕಾಮ್ ನಾ. ಬಗಾರ್ ಕೊಣಾಕೊಣಾಗೆರ್ ಭಂವೊನ್ ಖಾಂವ್ಚೆಂ ಮ್ಹಣ್?"
ತಾಚಿಂ ಉತ್ರಾಂ ಮೆಲ್ವಿನಾಚ್ಯಾ ಕಾಳ್ಜಾಕ್ ಭಾಲ್ಯಾಬರಿ ರೊಂಬ್ಲಿಂ. ತರೀ ತಾಕಾ ಜಾಪ್ ದೀಂವ್ಕ್ ಜಾಂವ್ಕ್ ನಾ. ಮತಿಂತ್ಚ್ ತೊ ಚಿಂತ್ತಾಲೊ - ಮಾಂಯ್ಕ್ ಏಕ್ ಕಾಳ್ ಜಾಲ್ಯಾರ್ ಸುನೆಚೊ ದುಸ್ರೊಚ್ ಆಸ್ತೊಲೊ ಮ್ಹಣ್. ಉಪ್ರಾಂತ್ ತಾಕಾ ಘಡಿಭರ್ ರಾವೊಂಕ್ಯಿ ಮನ್ ಆಯಿಲ್ನಾ. "ಹಾಂವ್ ವೆತಾಂ ಬಾಪ್ಪು...." ಮ್ಹಣ್ ಸಾಂಗೊನ್ ತೊ ಉಟ್ಲೊ.
"ಹಾಂ, ಜಾಯ್ತ್. ಪುಣ್ ಹಾಂವ್ ಮಾತ್ರ್ ಯೇನಾ ಹಾಂ...."
"ಜಾಯ್ತ್, ತಶೆಂಚ್ ಸಾಂಗ್ತಾಂ.." ತಾಣೆಂ ಮ್ಹಳೆಂ, "ಹಾಂವ್ ವೆತಾಂ"
ಮೆಲ್ವಿನ್ ಘರಾ ಪಾವ್ತಾನಾ ವೊರಾಂ ದೋನ್ ಜಾಲ್ಲಿಂ. ಜಿಲ್ಲಿಬಾಯೆಚೆಂ ಜೆವಾಣ್ ಜಾಲ್ಲೆಂ. ಭಯ್ಣ್ ಆನಿಂ ಮಿವ್ಣೊ ಹಂಪನ್ಕಟ್ಟಾ ಗೆಲ್ಲಿಂ ಪಾಟಿಂ ಯೇಂವ್ಕ್ ನಾತ್ಲ್ಲೆಂ. ದನ್ಪಾರಾಂಚ್ಯಾ ಭಾರಾಕ್ ಆಯಿಲ್ಲ್ಯಾ ಪುತಾಕ್ ಪಳೆವ್ನ್ ಜಿಲ್ಲಿಬಾಯೆಚೆಂ ಕಾಳಿಜ್ ಚಡ್ಪಡ್ಲೆಂ. "ಕಿತೆಂರೆ, ಧಾಂವೊನ್ ಆಯ್ಲೊಯ್ ಕಿತ್ಯಾಕ್? ಬಾಪ್ಪು ಮೆಳ್ಳೊವೆ?" ತಿಣೆಂ ಪುತಾಕ್ ವಯ್ಲ್ಯಾ ವಯ್ರ್ ಸವಾಲಾಂ ಕೆಲಿಂ.
ಮೆಲ್ವಿನಾನ್ ಆಸ್ಲ್ಲಿ ಗಜಾಲ್ ಸಾಂಗ್ಲಿ. ಆಯ್ಕಾತಾಚ್ ಜಿಲ್ಲಿಬಾಯ್ ಮ್ಹಣಾಲಿ. "ಹುಂ. ತಶೆಂ ಮ್ಹಣಾಲೊಗಿ ತುಜೊ ಬಾಪ್ಲ್ಯೊ?.." ತಿಣೆಂ ಏಕ್ ಹುಸ್ಕಾರ್ ಸೊಡ್ಲೊ, "ವಯ್, ಮ್ಹಣ್ತಾಲೊಚ್ ತೊ. ದುಬ್ಳ್ಯಾಂಗೆರ್ ಯೆಂವ್ಚೆಂ ಮ್ಹಳ್ಯಾರ್ ತಾಚ್ಯಾ ವ್ಹಡ್ಪಣಾಕ್ ಸಹಜ್ಲ್ಲೆಂ ನ್ಹಂಯ್ ಪಳೆ. ರಾಟಾವಳ್ ಆಸಾ ಮ್ಹಳ್ಳೆಂ ನಿಬಾಂಚ್ಮೂ.."
ದನ್ಪರಾಂ ಜೆವ್ಣಾಕ್ ಪಾಟಿಂ ಪರ್ತಾನಾತ್ಲ್ಲಿಂ ಮಿಲ್ಲಿಬಾಯ್ ಆನಿಂ ಫ್ರೆಡ್ಡಿಯಾಬ್ ಸಾಂಜೆಚ್ಯಾ ಚ್ಯಾರ್ ವೊರಾಂಚೆರ್ ಘರಾ ಆಯ್ಲಿಂ. ಆಯಿಲ್ಲಿಂಚ್ ಮಿಲ್ಲಿಬಾಯ್ ಮ್ಹಣಾಲಿ - "ಜಿಲ್ಲಿ, ಫಾಲ್ಯಾಂ ಸಕಾಳಿಂ ಆಮಿಂ ಬೊಂಬಯ್ ಭಾಯ್ರ್ ಸರ್ಚಿ ಆಲೋಚನ್ ಕೆಲ್ಯಾ"
ಜಿಲ್ಲಿಬಾಯ್ ಆಜಾಪ್ಲಿ. "ಛೆ, ಹೆಂ ಕಿತೆಂ? ಇತ್ಲ್ಯಾ ತುರ್ತಾನ್ ವಚೊನ್ ಕಿತೆಂ ಕರುಂಕ್ ಆಸಾ ತುಮ್ಕಾಂ? ನಾಕಾ, ನಾಕಾ, ಆನಿಂ ಥೊಡೆ ದೀಸ್ ರಾವೊನ್ ಮಾಗಿರ್ ವಚ್ಯೆತ್"
"ನಾ ಜಿಲ್ಲಿ.." ಮಿಲ್ಲಿಬಾಯೆನ್ ಸಮ್ಜಯ್ಲೆಂ. "ಆಮಿಂ ಸಗ್ಳಿಂ ತಯಾರಾಯ್ ಕರ್ನ್ ಜಾಲ್ಯಾ. ಫಾಲ್ಯಾಂ ಸಕಾಳಿಂಚ್ಯಾ ಕಡೂರ್ಚ್ಯಾ ಬಸ್ಸಾಕ್ ಟಿಕೆಟ್ಯಿ ಕಾಡ್ಲ್ಯಾ"
"ಹಾಬ್ಬಾ....ಹಿಂ ಕಸಲಿಂ ಗುಮಾನಿತ್ ಕಾಮಾಂ? ಸಕಾಳಿಂ ಹಂಪನ್ಕಟ್ಟಾ ವೆತಾನಾ ತುಮ್ಕಾಂ ಹಿ ಖಬಾರ್ ನಾತ್ಲ್ಲಿ?"
"ಕರ್ಚೆಂ ಕಿತೆಂ ? ಹಂಪನಕಟ್ಟ್ಯಾರ್ ಆಮ್ಚೊ ಸೆಜಾರಿ ಶ್ರೀ ಸೋಜಾ ಮೆಳ್ಳೊ. ತೊಯಿ ಫಾಲ್ಯಾಂ ಬೊಂಬಯಾಕ್ ಭಾಯ್ರ್ ಸರ್ತಾ ಖಂಯ್. ಆಶೆಂ ತಶೆಂ ಮ್ಹಣ್ತಾನಾ ಆಮ್ಚಿಂ ಆಲೋಚನ್ ಘಟ್ ಜಾಲಿ..." ಸಾಂಗಾಲಾಗ್ಲೊ ಫ್ರೆಡ್ಡಿಯಾಬ್.
"ಹುಂ.....ತುಮ್ಚಿ ಖುಶಿ.....ವೆತೆಲ್ಯಾಂಕ್ ಆಡಾಂವ್ಕ್ ಜಾತಾವೆ?" ಬೆಜಾರಾಯೆನ್ ಜಿಲ್ಲಿಬಾಯ್ ರಾಂದ್ಚ್ಯಾ ಕುಡಾಕ್ ಗೆಲಿ.
"ಮೆಲ್ವಿನ್, ಕಾಮ್ ಏಕ್ ಪಾಡ್ ಜಾಲೆಂಮೂ? ತುಂವೆಂ ಬಾಪ್ಪುಕ್ ಘರಾ ಜೆವ್ಣಾಕ್ ಆಪಯ್ಲಾಂಯ್ಮೂ?" ಚುರ್ಚುರೊನ್ ಉಲೈಲಿ ಮಿಲ್ಲಿಬಾಯ್.
"ನಾ ಆಂಟಿ, ಸಂಗತ್ ಆಶಿ ಘಡ್ಲಿ..." ಮೆಲ್ವಿನಾನ್ ಬಾಪ್ಪುನ್ ಸಾಂಗ್ಲ್ಲೆಂ ಸಾಂಗ್ತಾನಾ, ತಿಕಾ ಸಮಾಧಾನ್ ಜಾಲೆಂ.
ಕಾಳೊಕ್ ಪಡ್ಚ್ಯಾ ಆದಿಂ ತಾಣಿಂ ಬೆಡ್ಡಿಂಗ್ ಬಾಂದ್ಲೆಂ. ತಿತ್ಲ್ಯಾಬಿತರ್ ಆವಯ್ಚ್ಯಾ ತಾಕಿದೆ ಪ್ರಮಾಣೆಂ ಮೆಲ್ವಿನ್ ಹಂಪನ್ಕಟ್ಟಾ ಗೆಲೊ ಆನಿಂ ವಳ್ಕಿಚ್ಯಾ ಟ್ಯಾಕ್ಸಿ ಡ್ರಾಯ್ವರಾಕಡೆ, ಸಕಾಳಿಂಚ್ಯಾ ಟ್ಯಾಕ್ಸಿಚಿ ವಿಲೆವಾರಿ ಕರ್ನ್ ಆಯ್ಲೊ.
ವಿತೊರಾಬಾಕ್, ಸಾಡು ಆನಿಂ ಮಿವ್ಣಿ ಇತ್ಲ್ಯಾ ವೆಗಿಂಚ್ ಚಲ್ತಾತ್ ಮ್ಹಣ್ ಭಾರಿ ಬೆಜಾರ್ ಜಾಲ್ಲೆಂ. ತಾಚ್ಯಾ ತಾಂಕಿ ಪ್ರಮಾಣೆಂ ಬರ್ಯಾ ಮಟ್ಟಾನ್ಂಚ್ ತಾಣೆಂ ತಾಂಕಾಂ ಸುಧಾರ್ಸಿಲ್ಲೆಂ ಆನಿಂ ತಿಂ ಆನಿಕೀ ಚ್ಯಾರ್ ದೀಸ್ ರಾವ್ಲ್ಯಾರ್ಯಿ ತೊ ಉಬ್ಗೊತೊನಾ.
ಸಾಂಜೆರ್ ಜಿಲ್ಲಿಬಾಯೆಚ್ಯಾ ಉತ್ರಾಕ್ ಸರಿ ಜಾವ್ನ್ ಅರ್ಧಿ ಬೋತ್ಲ್ ಸೊರೊ ತೊ ಹಾಡ್ನ್ ಆಯಿಲ್ಲೊ. ಹಾತಾಂತ್ ಗ್ಲಾಸ್ ಧರ್ನ್, ಜೆವ್ಣಾಚ್ಯಾ ಮೆಜಾರ್ ಫ್ರೆಡ್ಡಿಯಾಬ್ ಮ್ಹಣಾಲೊ "ತುಮಿಂ ಆಮ್ಕಾಂ ಇತ್ಲೆ ದೀಸ್ ಬರ್ಯಾ ಥರಾನ್ ಸುಧಾರ್ಸಿಲೆಂ. ತುಮ್ಕಾಂ ಮಸ್ತ್ ದೇವ್ ಬರೆಂ ಕರುಂ, ಬಾವೊಜೆ ಆನಿಂ ಬಾಯೆ. ತುಮ್ಚೊ ಉಡಾಸ್ ಆಮಿಂ ಕೆದಿಂಚ್ ವಿಸರ್ಚೆನಾಂವ್. ಆನಿಂ ತುಂ ಮೆಲ್ವಿನ್, ತುಜೆಂ ಶಿಕಾಪ್ ಬರ್ಯಾ ಥರಾನ್ ಕಾಬಾರ್ ಕರ್ನ್ ಬೊಂಬಯ್ ಯೆ. ತುಕಾ ಬರೆಂ ಕಾಮ್ ಹಾಂವ್ ಪಳೆತೊಲೊಂ. ದೇವ್ ಬರೆಂ ಕರುಂ" ವಿತೊರಾಬಾನ್ಯಿ ಗ್ಲಾಸ್ ವಯ್ರ್ ಕೆಲೊ.
"ಆಮಿಂ ತುಮ್ಕಾಂ ಆಮ್ಚ್ಯಾ ತಾಂಕಿ ಬಿತರ್ಲೆಂ ಸುಧಾರ್ಸಿಲೆಂ. ಕಾಂಯ್ ಚಡುಣೆಂ ಜಾಲಾಂ ಜಾಲ್ಯಾರ್.." ಜಿಲ್ಲಿಬಾಯೆಚಿಂ ಉತ್ರಾಂ ಅರ್ಧ್ಯರ್ಚ್ ರಾವೊವ್ನ್ ಮಿಲ್ಲಿಬಾಯ್ ಮ್ಹಣಾಲಿ - "ಛೆ, ಛೆ....ಆಶೆಂ ಕಿತ್ಯಾಕ್ ಉಲೈತಾಯ್ ಜಿಲ್ಲಿ? ಆಮಿಂ ನಿಜಾಕೀ ಭಾರಿ ಸಂತೊಸ್ಭರಿತ್ ಜಾಲ್ಯಾಂವ್"
"ಆನಿಂ ತುಮಿಂ ಪರ್ತ್ಯಾನ್ ಯೆಂವ್ಚೆಂ ಕೆದಾಳಾಗಿ?"
"ಯೆತಾಂವ್, ಯೆತಾಂವ್, ದೆವಾನ್ ನಿರ್ಮಿಲ್ಯಾರ್ ಮುಖ್ಲ್ಯಾ ವರ್ಸಾ ಯೆತೆಲ್ಯಾಂವ್" ಫ್ರೆಡ್ಡಿಯಾಬಾನ್ ಸಾಂಗ್ಲೆಂ.
ಜೆವಾಣ್ ಸಂಪ್ಲೆಂ. ಉಪ್ರಾಂತ್ ಥೊಡೊ ವೇಳ್ ತಿಂ ಗಜಾಲಿ ಕರ್ನ್ ಬಸ್ಲ್ಲಿಂ. ರಾತ್ಚಿಂ ಧಾ ವೊರಾಂ ವ್ಹಾಜ್ತಾನಾ, ಸಕ್ಡಾಂ ನಿದೊಂಕ್ ಗೆಲಿಂ. ತರೀ ವೆಗಿಂಚ್ಯಾಕ್ ಕೊಣಾಕ್ಯಿ ನೀದ್ ಆಯ್ಲಿನಾ.
ದುಸ್ರ್ಯಾ ಫಾಂತ್ಯಾರ್ ಪಾಂಚ್ ವೊರಾಂಚೆರ್ ’ಎಲಾರ್ಮ್’ ಮಾರ್ನ್ ಘಡಿಯಾಳಾನ್ ಸರ್ವಾಂಕ್ಯಿ ಜಾಗೈಲೆಂ. ಫ್ರೆಡ್ಡಿಯಾಬ್ ಆನಿಂ ಮಿಲ್ಲಿಬಾಯ್ ನ್ಹೆಸ್ಲಿಂ. ತ್ಯಾ ಬಿತರ್ ಜಿಲ್ಲಿಬಾಯೆನ್ ಕಾಫಿ ತಯಾರ್ ಕೆಲಿ., ಹಂಪನ್ಕಟ್ಟಾ ತಾಂಕಾಂ ಪಾವೊಂವ್ಕ್ ಮೆಲ್ವಿನ್ಯಿ ನ್ಹೆಸೊನ್ ಆಯ್ತೊ ಜಾಲೊ. ಇತ್ಲ್ಯಾರ್ ರಸ್ತ್ಯಾರ್ ಟ್ಯಾಕ್ಸೆಚೆಂ ’ಹೊರ್ನ್’ ಆಯ್ಕಾಲೆಂ.
"ಯಾ, ಯಾ ಮೆಲ್ವಿನ್, ಚಿಕ್ಕೆ ಹೆಂ ಟ್ರಂಕ್ ಉಕ್ಲುಂಕ್ ಹಾತ್ ದೀ.." ಮ್ಹಣಾಲಿ ಮಿಲ್ಲಿಬಾಯ್. ವಿತೊರಾಬಾನ್ ಆನಿಂ ಮೆಲ್ವಿನಾನ್ ತಾಂಚೆಂ ಬೆಡ್ಡಿಂಗ್, ಟ್ರಂಕ್ ಇತ್ಯಾದಿ ಟ್ಯಾಕ್ಸೆ ವರೇಗ್ ವ್ಹರೊಂಕ್ ಕುಮಕ್ ಕೆಲಿ. ಫ್ರೆಡ್ಡಿಯಾಬ್, ಮಿಲ್ಲಿಬಾಯ್ ಆನಿಂ ಮೆಲ್ವಿನ್ ಕಾರಾರ್ ಬಸ್ಲಿಂ.
"ಆಮಿಂ ತರ್ ವೆತಾಂವ್, ಮೋಗ್ ಆಸೊಂದಿ" ಫ್ರೆಡ್ಡಿಯಾಬಾನ್ ಆದೇವ್ಸ್ ಮಾಗ್ಲೊ.
"ಧರ್ ಜಿಲ್ಲಿ ಘೆ.." ಮಿಲ್ಲಿಬಾಯೆನ್ ೨೦ ರುಪಯ್ ಭಯ್ಣಿಚ್ಯಾ ಹಾತಾರ್ ಘಾಲೆ. ಜಿಲ್ಲಿಬಾಯೆನ್ ಕಿತ್ಲೆಂ ನಿರಾಕರ್ಸಿಲ್ಯಾರಿ ಮಿಲ್ಲಿಬಾಯೆನ್ ಸೊಡ್ಲೆಂ ನಾ. ಆಖ್ರೇಕ್ ತಿಣೆಂ ಪಯ್ಶೆ ಸ್ವೀಕರ್ಸುಂಚೆಂಚ್ ಪಡ್ಲೆಂ.
"ಗುಡ್ ಬಾಯ್ ಬಾವೊಜೆ, ಬಾಯೆ..."
"ಬಾಯ್, ಮೋಗ್ ಆಸೊಂದಿ" ಟ್ಯಾಕ್ಸಿ ಸುಟ್ಲಿ.
ಹಂಪನ್ಕಟ್ಟಾರ್ ಟ್ಯಾಕ್ಸಿ ಉಬಿ ಜಾತಾನಾ, ಬಸ್ಸ್ಯಿ ತಯಾರ್ ಆಸ್ಲ್ಲೆಂ. ಮಿ. ಸೋಜಾಯಿ ಹಂಪನ್ಕಟ್ಟಾ ಪಾವ್ಲ್ಲೊ. ಕುಲ್ಕಾರಾ ಕರ್ನಾ ಟ್ರಂಕಾಂ ಆನಿಂ ಬೆಡ್ಡಿಂಗ್ ಬಸ್ಸಾಚ್ಯಾ ಟೊಪಾರ್ ಘಾಲೈಲೆಂ.
"ಬಸ್ಸ್ ಸುಟ್ಚೊ ವೇಳ್ ಜಾಲೊ..." ಕಂಡಕ್ಟರಾನ್ ಬೋಬ್ ಮಾರ್ಲಿ. ಮಿಲ್ಲಿಬಾಯೆನ್ ಮೆಲ್ವಿನಾಕ್ ಉದ್ದೇಶುನ್ ಮ್ಹಳೆಂ - "ಮೆಲ್ವಿನ್ ಆಮಿಂ ವಚೊನ್ ಯೆತಾಂವ್. ಚಡಿತ್ ತುಕಾ ಕಾಂಯ್ ಆಜ್ ಸಾಂಗೊಂಕ್ ನಾ. ತುಂ ಬರೆಂ ಕರ್ನ್ ಶಿಕೊನ್ ಪಾಸ್ ಜಾ. ಅಂಕಲಾನ್ ತುಕಾ ಭಾಸಾಯಿಲ್ಲ್ಯಾಬರಿ ಖಂಡಿತ್ ತುಕಾ ಕಾಮ್ ಕರ್ನ್ ದಿತೊಲೊ....ಧರ್ ಮೆಲ್ವಿನ್, ಘೆ ಹೆ ಪಯ್ಶೆ" ತಿಣೆಂ ಧಾ ರುಪಯ್ ಮೆಲ್ವಿನಾಕ್ ದಿಲೆಂ.
"ನಾಕಾ ಆಂಟಿ...."
"ಧರ್, ಘೆ.....ಆಮ್ಕಾಂ ತಡೊವ್ ಜಾತಾ. ತುಕಾ ಚ್ಯಾರ್ ದಿಸಾಮ್ಚ್ಯಾ ಖರ್ಚಾಕ್ ಜಾಲೆ...." ಮೆಲ್ವಿನಾನ್ ಕ್ರತಜ್ಞತೆನ್ ಪಯ್ಶೆ ಸ್ವೀಕರ್ಸಿಲೆ.
"ಬಾಯ್ ಬಾಯ್ ಮೆಲ್ವಿನ್......." ಮ್ಹಣಾಲಿಂ ಆಂಟಿ ಆನಿಂ ಅಂಕಲ್.
"ಬಾಯ್ ಬಾಯ್" ಮೆಲ್ವಿನಾಚೊ ತಾಳೊ ಉದ್ವೇಗಾನ್ ಭರ್ಲ್ಲೊ. ದುಸ್ರ್ಯಾ ಘಡಿಯೆ ಬಸ್ಸ್ ಸುಟ್ಲೆಂ ಆನಿಂ ಮಿನುಟಾನ್ ತಾಚ್ಯಾ ದಿಷ್ಟಿ ಭಾಯ್ರ್ ಜಾಲೆಂ. ತಾಣೆಂ ಲಾಂಬ್ ಏಕ್ ಶ್ವಾಸ್ ಸೊಡ್ಲೊ.
ಘರಾ ಆಯಿಲ್ಲಿಂ ಸೈರಿಂ ಪಾಟಿಂ ವೆತಾನಾ, ಸ್ವಾಭಾವಿಕ್ ದುಃಖ್ ಬೊಗ್ತಾ. ಮೆಲ್ವಿನಾಕ್ಯಿ ತಶೆಂಚ್ ಜಾಲೆಂ. ಆಂಟಿ ಆನಿಂ ಅಂಕಲ್ ಚ್ಯಾರ್ ದಿಸಾಂಕ್ ತಾಂಗೆರ್ ರಾವ್ಲ್ಲಿಂ. ತ್ಯಾ ವೆಳಾರ್ ಘರ್ ಭರ್ಲ್ಲ್ಯಾಬರಿ ದಿಸ್ತಾಲೆಂ ಆನಿಂ ಅತಾಂ ತಾಕಾ ತೆಂ ಖಾಲಿ ಜಾಲ್ಲ್ಯಾಬರಿ ದಿಸ್ತಾಲೆಂ. ತೊ ಚಿಂತೇಸ್ತ್ ಜಾಲ್ಲೊ.
ವೊರಾಂ ಸ ಜಾಲ್ಲಿಂ, ಭುಮಿರ್ ಪುರ್ತೊ ಉಜ್ವಾಡ್ ಪಡ್ಲ್ಲೊ. ಸುಕ್ಣಿಂ ಸಾವ್ಜಾಂ ತಾಂಚ್ಯಾ ಸ್ವಾಧೀಕ್ ತಾಳ್ಯಾನ್ ದೆವಾಚಿಂ ಮಹಿಮಾಂ ವರ್ಣಿತಾಲಿಂ. ಲೊಕಾಚೊ ಸಂಚ್ಯಾರ್ ಪರ್ತ್ಯಾನ್ ಪ್ರಾರಂಭ್ ಜಾಲ್ಲೊ. ಹಂಪನ್ಕಟ್ಟಾ ಅನ್ಯೇಕಾ ದಿಸಾಚ್ಯಾ ವ್ಯವಹಾರಿಕ್ ಜೀವನಾಕ್ ಆಯ್ತೆಂ ಜಾಲ್ಲೆಂ. ಸದಾಮ್ಚ್ಯಾ ಬರಿ ಬಸ್ಸಾಂ ಯೇವ್ನ್ ವೊಚೊಂಕ್ಯ್ಯಿ ಪ್ರಾರಂಭ್ ಜಾಲ್ಲಿಂ. ಮೆಲ್ವಿನ್ ಬಸ್ಸಾಕ್ ರಾಕೊನ್ ರಾವ್ಲೊ.,
ದೋನ್ ಮಿನುಟಾಂ ಪಾಶಾರ್ ಜಾತಾನಾ, ಉರ್ವಾ ಥಾವ್ನ್ ಸುಟ್ಲ್ಲೆಂ ಬಸ್ಸ್ ಯೇವ್ನ್ ಉಬೆಂ ಜಾಲೆಂ. ತ್ಯಾಚ್ ಬಸಾರ್ ಮೆಲ್ವಿನಾಕ್ ಘರ್ ವೊಚೊಂಕ್ಜಾ. ತೊ ಬಸಾ ವಯ್ಲೊ ಲೋಕ್ ದೆಂವೊಂಕ್ ರಾಕ್ತಾಲೊ.
ತಾಚಿ ದೀಷ್ಟ್ ಎಕಾಚ್ಚಾಣೆ ಬಸ್ಸಾರ್ ಥಾವ್ನ್ ದೆಂವ್ಚ್ಯಾ ಜೆಸ್ಸಿಚೆರ್ ಪಡ್ಲಿ. ಜೆಸ್ಸಿನ್ಯಿ ತಾಕಾ ಪಳೆಲೆಂ ಮ್ಹಣ್ ದಿಸ್ತಾ. ತಕ್ಲಿ ಬಾಗಾವ್ನ್ ಅಮೃಕೆಂ ಹಾಸೊನ್ ತಾಣೆಂ ಮ್ಹಳೆಂ - "ಗುಡ್ ಮೊರ್ನಿಂಗ್.."
"ಗುಡ್ ಮೊರ್ನಿಂಗ್.." ಮೆಲ್ವಿನ್ಯಿ ಹಾಸ್ಲೊ. "ಖಂಯ್ ಸವಾರಿ?"
"ಕಾರ್ಕಳಾಕ್ ಭಾಯ್ರ್ ಸರ್ಲಿಂ.." ಪ್ರಜಳಿಕ್ ಹಾಸೊ ಹಾಸೊನ್ ತೆಂ ಮ್ಹಣಾಲೆಂ. "ಹಾಂವ್ ಪೋಯ್ರ್ ಆಯಿಲ್ಲೆಂ ಕಾಮ್ ವ್ಹಡ್ಲಿಮಾಂಯ್ ಕೊಡಿಯಾಳಾಂತ್ ವಸ್ತಿ ಕರುಂಕ್ ಯೆತೆಲಿಂ."
"ತುಂ ಯೆಂವ್ಚೆನಾಂಯ್ ದಿಸ್ತಾ?" ತಾಚ್ಯಾ ಬರಾಬರ್ ಮೆಟಾಂ ಕಾಡ್ನ್ ಸರ್ವಿಸ್ ಬಸ್ಸ್ ಸ್ಟೇಂಡಾಕ್ ವೆತಾನಾ ಮೆಲ್ವಿನಾನ್ ವಿಚಾರ್ಲೆಂ.
"ತವಳ್ ತವಳ್ ಯೆತೆಲಿಂ.... ಆತಾಂ ಖೈಂಚಾಕ್ಯಿ ವೆಗಿಂಚ್ ಆಮ್ಕಾಂ ರಜಾ ಸಂಪೊನ್ ಕ್ಲಾಸ್ ಸುರು ಜಾಂವ್ಚ್ಯಾ ಆದಿಂ ಚ್ಯಾರ್ ದೀಸ್ ಹಾಂಗಾ ರಾವೊಂಕ್ ಮೆಳ್ತೆಲೆಂ"
"ತುಕಾ ಕಿತ್ಲ್ಯಾ ವೊರಾಂಚೆ ಬಸ್ಸ್....?"
"ಸಾಡೆ - ಸ ವೊರಾಂಚೆಂ ಬಸ್ಸ್...? ಆನಿಕಿಯಿ ಪಂದ್ರಾ ಮಿನುಟಾಂ ಉರ್ಲಿಂ" ಹಾತ್ ವೊಚ್ಯಾಚೆರ್ ದೀಷ್ಟ್ ವರ್ನ್ ತಾಣೆಂ ಮ್ಹಳೆಂ.
"ತುಕಾ ಬೆಜಾರಾಯ್ ನಾಂ ತರ್...." ತೊ ಕಿತೆಂಗಿ ಚಿಂತ್ತಾಲೊ.
"ಕಿತೆಂ....!" ಜೆಸ್ಸಿಕ್ ಮಿಸ್ತೆರ್ ಜಾಲ್ಲೊ.
’ಚೆಡ್ವಾಂಕ್ ಪೊಕೆಟ್ ಕರ್ಚೆಂ ಸಾಧನ್ ತಾಂಕಾ ಗೊಡ್ ಕರ್ಚೆಂ. ಏಕ್ ದೀಸ್ ಕಾಫಿ ಪಿಯೆಂವ್ಕ್ಗಿ ಹೊಟೆಲಾಕ್ಗಿ ಆಪವ್ನ್ ವ್ಹೆಲ್ಯಾರ್ ಸುಣ್ಯಾಬರಿ ಯೆತಾತ್....’ ಗಿಬ್ಬಾಚಿಂ ಉತ್ರಾಂ ಮೆಲ್ವಿನಾಚ್ಯಾ ಕಾನಾಕ್ ವ್ಹಾಜ್ತಾಲಿಂ. ತ್ಯಾ ಸುಂದರ್ ಜೆಸ್ಸಿಕ್ ಪಳೆತಾನಾ, ಆಂಟಿನ್ ದಿಲ್ಲೊ ಧಾಂ - ಚೊ ನೋಟ್ ಹುಳ್ವುಳೊಂಕ್ ಲಾಗ್ಲೊ ಮೆಲ್ವಿನಾಚ್ಯಾ ಬೊಲ್ಸಾಂತ್. "ಜೆಸ್ಸಿ, ಮ್ಹಾಕಾ ಎಕಾ ಕಾಫಿಯೆಕ್ ಸಾಂಗಾಂತ್ ದಿಶಿಗಿ?" ತಾಚೊ ತಾಳೊ ಕ್ಷೀಣ್ ಜಾಲ್ಲೊ. ಕಾಳಿಜ್ ಧಡ್ದಡ್ತಾಲೆಂ, ತೊಂಡ್ ರಗ್ತಾವಿಣ್ ಜಾಲ್ಲೆಂ.
ಜೆಸ್ಸಿ ಥಾವ್ನ್ ಜಾಪ್ ಯೇಮ್ವ್ಕ್ ವರ್ಸ್ ಗೆಲ್ಲ್ಯಾಬರಿ ದಿಸ್ಲೆಂ ತಾಕಾ. ಪುಣ್ ಸಬಾರ್ ವೆಳಾ ಉಪ್ರಾಂತ್ ಜೆಸ್ಸಿಚ್ಯಾ ತೊಂಡಾರ್ ದೀಷ್ಟ್ ವ್ಹರ್ತಾನಾ, ತಾಚೆಂ ಕಾಳಿಜ್ ನಿಜಾಕೀ ಕಾಂಪ್ಲೆಂ. ಜೆಸ್ಸಿಚೆಂ ತೊಂಡ್ ವರ್ಣಾಂತರ್ ಜಾಲ್ಲೆಂ.
[ಚುರ್ಚುರೆ ಆನಿಂ ಪಶ್ಚಾತ್ತಾಪ್ ವ ದಾದೊಸ್ಕಾಯ್ ಆನಿಂ ಸಮಾಧಾನ್?.....ಯೆಂವ್ಚ್ಯಾ ಹಪ್ತ್ಯಾಂತ್ ಪಳೆಯಾಂ]
ನಿರ್ಭಾಗ್ಯಾಚೆಂ ಸ್ವಪಾಣ್: ಪ್ರಸ್ತಾವನ್. ಅವಸ್ವರ್ 1, 2, 3
About us | Feedback
| Contact us
Copyright © 2005
DAAIZ.COM All rights reserved.
Page concept, designed and maintained by Ashawadi
Publications
