ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಕಥಾಝರ್ - 49. ಸಾಳಕ್ ಫುಲ್ಲೆಂ
ವಿಲ್ಸನ್ ಒಲಿವೆರಾ: ಕೊಂಕ್ಣೆಂತ್ ಹೊ ಗಾವ್ಪಿ ಜಾವ್ನ್ ಫಾಮಾದ್ ತರ್ಯೀ ಹೊ ಏಕ್ ಭಳ್ವಂತ್ ಕಾಣ್ಯೆಗಾರ್ ಸಯ್ತ್. ಸಾಮಾಜಿಕ್ ಚಿಂತ್ಪಾಚ್ಯೊ ಸಭಾರ್ ಮಟ್ವ್ಯೊ ಕಾಣ್ಯೊ ಹಾಣೆಂ ಬರಯ್ಲ್ಯಾತ್.
ವಿಲ್ಸನ್ ಒಲಿವೆರಾ
ಸದಾಂಚ್ಯೆ ಬರಿ ವೊರಾಂ ಸಕಾಳಿಂಚಿಂ ಇಕ್ರಾ ವ್ಹಾಜ್ತಾನಾ ಪೆದೊ "ತಾವ್ರೊ ಇಂಡಸ್ಟ್ರೀಸ್" ಹಾಚಾ ಮಧ್ಲ್ಯಾ ದಾರಾಂತ್ಲ್ಯಾನ್ ಬಿತರ್ ರಿಗ್ಲೊ. ಹರ್ಯೇಕ್ ಯಂತ್ರ್ ಕಾಮಾರ್ ಆಸ್ಲ್ಲೆಂ. ಕರ್ಕಶ್ ಆವಾಜ್ ಕಾನಾಂಕ್ ಆಪ್ಟಾಲೊ ತರ್ಯಿ ತಾಚಿ ಕಾಂಯ್ ಪರ್ವಾ ಕರಿನಾಸ್ತಾಂ ತೊ, ಸೀದಾ ಮುಖಾರ್ ಚಮ್ಕೊನ್ ಡೊನಿ ಆಸ್ಲ್ಲ್ಯಾ ಜಾಗ್ಯಾಕ್ ಗೆಲೊ.
"ನಮಸ್ಕಾರ್ ರಾಯರಿಗೆ" ಪೆದೊ ಸಾಂಗ್ತಾ ತರು ಯಂತ್ರಾಂಚಾ ಆವಾಜಾನ್ ಡೊನಿಕ್ ಆಯ್ಕೊಂಕ್ ನಾ, ತರ್ಯಿ ಪೆದ್ಯಾಚೆ ವೊಂಟ್ ಹಾಲ್ಚೆ ದೆಕೊನ್,
"ಹಾಂ ಬರ್ಬೇಕು ಬರ್ಬೇಕು" ಪೆದ್ಯಾಕ್ ತಾಣೆಂ ಯೆವ್ಕಾರ್ ಮಾಗ್ಲೊ.
ಆಪ್ಲ್ಯಾ ಬ್ಯಾಗಾಂಕ್ ಸೊಧುನ್ ಸೊಧುನ್ ಪೆದ್ಯಾನ್ ದೋನ್ - ತೀನ್ ಕಾಗ್ದಾಂ ಕಾಡುನ್ ಓಡ್ನಿಚ್ಯಾ ಮೆಜಾರ್ ಘಾಲುನ್, "ಬರ್ತೇನೆ ರಾಯ್ರೆ" ಆಷೆಂ ಸಾಂಗೊನ್ ತೊ, ತಾಚೊ ವಾವ್ರ್ ಮುಂದರುಂಕ್ ಭಾಯ್ರ್ ಚಮ್ಕಾಲೊ.
ಕಿತೆಂ ಆಯ್ಲಾಂ ತರಿ, ಪಯ್ಲೆಂ ಪಾಟ್ಲೊ ವಿಳಾಸ್ ಪಳೆಂವ್ಚಿ ಡೋನಿಚಿ ಸದಾಂಚಿ ಸವಯ್. ತ್ಯಾ ಪ್ರಕಾರ್ ತೊ ಕಾಗ್ದಾಂಚಾ ಪಾಟ್ಲ್ಯಾ ಕುಶಿಕ್ ಚೊಯ್ಲಾಗ್ಲೊ.
’ಡೀನಾ ತಾವ್ರೊ, ಗೋವಾ’
ತೆಂ ಕಾಗಾದ್ ತಾಣೆಂ ಉಸಯ್ಲೆಂ.
"ಆರೆ! ಹೆಂ ಕಿತೆಂ ಆಜ್! ಸ- ಸಾತ್ ಮಹಿನ್ಯಾಂ ಉಪ್ರಾಂತ್ ಪಯ್ಲೆಂ ಪಾವ್ಟಿಂ ಕಾಗಾದ್ ಲಿಖ್ತಾ!"
ಖರೆಂ. ’ಡೀನಾ ತಾಚಾ ವ್ಹಡ್ಲ್ಯಾ ಬಾವಾಚಿ ಬಾಯ್ಲ್. ತಾಂಚೆಂ ಕಾಜಾರ್ ಜಾವ್ನ್ ಸಾತ್ ಮಹಿನ್ಯಾಂನಿ ತೆಂ ಡೊನಿಕ್ ಪಯ್ಲೆಂ ಪಾವ್ಟಿಂ ಕಾಗಾದ್ ಲಿಖ್ತಾ. ಹಾಚ್ಯೆ ಆದಿಂ ಕಾಗ್ದಾಂ ತಾಚೊ ಭಾವ್ ರುಡೊಲ್ಫ್ಚ್ ಲಿಖ್ತಾಲೊ.
ಕಾಗಾದ್ ಉಸವ್ನ್ ತೊ ವಾಚುಂಕ್ ಲಾಗ್ಲೊ. ಸುಂದರ್ ಹಾತ್ - ಬರ್ಪಾನ್ ತೆಂ ಲಿಖ್ಲ್ಲೆಂ.
"ಮೊಗಾಚಾ ಡೊನಿ, ಡೀನಾ ಲಿಖ್ತಾ ಹಿಂ ದೋನ್ ಉತ್ರಾಂ, ದಯಾ ಕರುನ್ ಸೈರಾಣ್ ಸಾಂಬಾಳುನ್ ವಾಚ್.
ಪಯ್ಲೆಂ ಪಾವ್ಟಿಂ ಹಾಂವ್ ತುಕಾ ಲಿಖ್ತಾಂ ದೆಕುನ್, ಕಶೆ ಆರಂಭ್ ಕರುಂ ಆಣಿಂ ಕಶೆಂ ಮುಂದರುನ್ ವ್ಹರುಂ ತೆಂ ಮ್ಹಾಕಾಚ್ ಸಮ್ಜಾನಾ ದೆಕುನ್, ಕಾಂಯ್ ಫರಾಮಸ್ ಘಡ್ಲ್ಯಾ ತರ್ ವಿಸರ್ ತಿ ದಯಾ ಕರುನ್.
ಡೊನಿ, ತುಜ್ಯಾ ಭಾವಾಚೊ ಹಾತ್ ಹಾಂವೆಂ ಧರುನ್, ಆಯ್ಚ್ಯಾನ್ ಸಾತ್ ಮಹಿನೆ ಬಾರಾ ದೀಸ್ ಸಂಪ್ತಾತ್. ಹ್ಯಾ ದಿಸಾಂನಿ ಹಾಂವ್ ತಾಕಾ ಸಾರ್ಕಿಂ ಸಮ್ಜಾತಾಂ ತರ್ಯಿ ತುಜೆ ತಿತ್ಲಿ ಸಮ್ಜೊಂಕ್ ಸಕಾಶಿಂ ನಾ ಮ್ಹಣೊನ್ ಚಿಂತಾಂ,..ಕಿತ್ಯಾಕ್, ತುಂ ತಾಚೊ ಸಾಂಗಾಂತಾ ಜಲ್ಮಾಲ್ಲೊ ಭಾವ್. ದೆಕುನ್ ತಾಚೆ ವಿಶಿಂ ತುಂ ಸಗ್ಳೆಂ ಜಾಣಾಂಯ್.
ಆಯ್ಕ್ ಡೋನಿ, ಆಮಿಂ ಗಾವಾ ಥಾವ್ನ್ ಗೊಂಯಾಂಕ್ ಯೇವ್ನ್ ಸ- ಸಾಡೆಸ ಮಹಿನೆ ಉತರ್ಲೆ ತರ್ಯಿ, ರುಡೊಲ್ಫಾನ್ ಏಕ್ಚ್ ಏಕ್ ದಿಸಾ ಲೆಗುನ್ ಆಮೊರಿ ಜಾಂವ್ ತೇರ್ಸ್ ಜಾಂವ್ ಮ್ಹಳ್ಳೋಚ್ಚ್ ನಾಂ. ಹ್ಯಾ ವಿಶ್ಯಾಂತ್ ಹಾಂವ್ ಸದಾಂಯ್ ತಾಕಾ ಒತ್ತಾಯ್ ಕರ್ತಾ ಜಾಲ್ಯಾರಿ, ತೊ ಮ್ಹಾಕಾ ಆಯ್ಕೊಂಕ್ಚ್ ಆಯ್ಕಾನಾ. ಹರ್ಯೇಕಾ ಸಂಗ್ತಿನಿ ಮ್ಹಾಕಾ ತೊ ಆಯ್ಕಾತಾ. ಆನಿಂ ಸಮ್ಜಾತಾ ತರ್ಯಿ ಹ್ಯಾ ದೈವಿಕ್ ಸಂಗ್ತಿನಿಂ ಮ್ಹಾಕಾ ತೊ ಬಿಲ್ಕುಲ್ ಆಯ್ಕಾನಾ, ತಿತ್ಲೆಂ ಕಿತ್ಯಾಕ್, ಆಯ್ತಾರಾಚೆಂ ಮಿಸಾಕ್ ಲೆಗುನ್ ಯೇನಾ, ಹಾಂವೆಂ ಎಕ್ಲ್ಯಾನ್ಂಚ್ ವಚಾಜಾಯ್. ಮ್ಹಾಕಾ ತೊ ಮ್ಹಣ್ತಾ "ತುಂ ದೇವ್ - ದೇವ್ ಮ್ಹಣೊನ್ ನಾತ್ಲ್ಲ್ಯಾ ದೆವಾಕ್ ತುಜಾ ಮತಿಂತ್ ಚಿಂತುನ್, ತುಜೊ ವೇಳ್ ಬೆಷ್ಟೊಚ್ ವಿಬಾಡ್ತಾಯ್" ಮ್ಹಳ್ಯಾರ್ ರುಡೊಲ್ಫ್ ಮ್ಹಣ್ತಾಕಿ, "ದೇವ್ ಆಸೊಂಕ್ ಬಿಲ್ಕುಲ್ ಸಾಧ್ಯ್ ನಾ"
"ಹ್ಯೆ ವಿಶಿಂ ಕಾಜಾರ್ ಆದಿಂ ಮ್ಹಾಕಾ ಕಾಂಯ್ಚ್ ಕಳಿತ್ ನಾತ್ಲ್ಲೆ. ಡೊನಿ, ಕಾಜಾರಾ ಮಾಗಿರ್ ಜಾಲ್ಯಾರಿ, ಗಾಂವಾಂತ್ ಆಮಿಂ ತುಮ್ಚೆಂ ಸಂಗಿಂ ಆಸ್ತಾನಾ, ತಾಚೆ ವಿಶಿಂ ಮ್ಹಾಕಾ ಕಳೊಂಕ್ ನಾ. ಪುಣ್ ಹಾಂಗಾಸರ್ ಹಾಂವ್ ದೆಖ್ತಾಂ ಕಿತೆಂ? ಹಾಂವ್ ಏಕ್ ಭಾವಾಡ್ತಿ ಸ್ತ್ರೀ ಆನಿಂ ಮ್ಹಜೊ ಘೊವ್ ಏಕ್ ಆಣ್ಭಾವಾಡ್ತಿ ದಾದ್ಲೊ! ಆಶೆಂ ಜಾಂವ್ಕ್ ಬಿಲ್ಕುಲ್ ನಜೊ ಆಸ್ಲ್ಲೆಂ, ಕಥೊಲಿಕ್ ದೆವಾಳಾಂತ್ ತೊ ಮ್ಹಜೆ ಸಂಗಿಂ ಲಗ್ನಾಂತ್ ಎಕ್ವಟ್ಲಾ ಆಣಿಂ ಆತಾಂ ಮ್ಹಣ್ತಾ - ತುಜೆ ಬರಿ ದೇವ್ - ದೇವ್ ಮ್ಹಣ್ಚ್ಯಾ ಪಿಶ್ಯಾ ಲೊಕಾಚಾ ದೊಳ್ಯಾಂಕ್ ಮಾತಿ ಲಾಂವ್ಕ್ ಹಾಂವ್ ದೆವಾಳಾಂತ್ ಯೇವ್ನ್ ತುಜೊ ನವ್ರೊ ಜಾಲೊ" ಮ್ಹಣೊನ್. ಆನ್ ಭಾವಾಡ್ತ್ಯಾನ್ ಭಾವಾಡ್ತಿ ಸ್ತ್ರೀಯೆ ಲಗಿಂ ಕಾಜಾರ್ ಜಾಂವ್ಚೆಂ ನಾಕಾ ಆಸ್ಲ್ಲೆಂ. ಕಿತ್ಯಾಕ್ ಉಜ್ವಾಡಾಚಾ ಮುಳಾಂಕ್ ಆಸ್ಚೊ ಕೊಣ್ಂಚ್ ಕಾಳ್ಕಾಕ್ ವಚೊಂಕ್ ಖುಶಿ ವ್ಹರಾನಾ.
"ಆನ್ಭಾವಾಡ್ತಿ ಮ್ಹಣೊನ್ ತುಜಾ ಭಾವಾಕ್ ಹಾಂವೆಂ ಬಿಲ್ಲೊ ಲಾಯ್ತಾನಾ, ತುಕಾ ದೂಃಕ್ ಬೊಗಾತ್ ಡೊನಿ. ತಶೆಂ ಕಾಂಯ್ ಜಾಯ್ತ್ ತರ್ ಮ್ಹಾಕಾ ಬೊಗ್ಸಿ. ಪುಣ್ ಡೊನಿ, ತಾಚೆ ಸಂಗಿಂಚ್ ಜಿಯೆಂವ್ಚಾ ಮ್ಹಜಾ ಕಾಳ್ಜಾಕ್ ಕಿತ್ಲೆಂ ದುಃಖಾ ನಾ ಜಾಯ್ತ್. ಹಾಂವೆಂ ಆರಾಧನ್ ಕರ್ಚಾ ದೆವಾಕ್, ರುಡೊಲ್ಫ್ ನಿಂದಾ ಕರ್ತಾ ಜಾಲ್ಯಾರ್, ಹಾಂವ್ ಕಶೆಂ ಸೊಸುಂ ಡೋನಿ? ಉಜ್ವಾಡ್ ಫಾಂಕವ್ಚಾ ಚಂದ್ರಾಕ್ಚ್ ಕೊಣೀ ಶಿರಾಪ್ತಾ?
"ದಯಾ ಕರುನ್ ಡೊನಿ, ತುಜ್ಯಾ ಭಾವಾಕ್ ಸಂಪೂರ್ಣ್ ಸಮ್ಜಾವ್ನ್ ಕಾಗಾದ್ ಬರಯ್. ಆನಿಂ ತುಜ್ಯಾ ಮಾಗ್ಣ್ಯಾಂತ್ ಸದಾಂಚ್ ತಾಚೆ ಖಾತಿರ್ ಮಾಗ್. ಹಾಂವೆಂ ವ್ಹಾಳಯಿಲ್ಲೀ ದುಃಖಾಂ ಲೆಗುನ್ ತಾಕಾ ಪರಿವರ್ತಿತ್ ಕರುಂಕ್ ಎದೊಳ್ ಸಕ್ಲಿಂ ನಾಂತ್. ಪುಣ್ ತುಜೆಂ ಮಾಗ್ಣೆಂ ಆಣಿಂ ಸಮ್ಜೊಣಿ ತಾಕಾ ಪರಿವರ್ತಿತ್ ಕರ್ತಿತ್ ಮ್ಹಣೊನ್ ಭರ್ವಸ್ತಾ.
"ನಿಮಾಣೆಂ ಪರ್ತ್ಯಾನ್ ಮ್ಹಣ್ತಾಂ ಕಿ, ರುಡೊಲ್ಫ್ ಭಾವಾಡ್ತ್ ಪರತ್ ವೆಂಗ್ತಾಸರ್ ಹಾಂವ್ ಸುಖಿ ಆಸ್ಚಿಂ ನಾ, ತುಜಾ ಮೊಗಾಚಿ - ಡೀನಾ".
ಕಾಗಾದ್ ವಾಚುನ್ ಆಖೇರ್ ಕೆಲ್ಲ್ಯಾ ಡೊನಿನ್ ನೀಳ್ ಶ್ವಾಸ್ ಸೊಡೂನ್ ವಯ್ರ್ ಪಾಕ್ಯಾಕ್ ಚೊಯ್ಲೆಂ. ಪಾಕ್ಯಾಕ್ ಚೊಯ್ಲೆಂ. ಪಾಕ್ಯಾಕ್ ಧಾಂಪ್ಲ್ಲಿಂ ಸಿಮಿಟೆಚಿಂ ಪತ್ತಿಂ ತೊಂಡ್ ಉಸಯ್ತಾತ್ ತಶೆಂ ಭಾಸ್ ಜಾಲೆಂ ತಾಕಾ. ಯಂತ್ರಚಾ ಕರ್ಕಶ್ ಆವಾಜಾಂತ್ ಕಸಲಿಗೀ ಮನ್ಜಾತ್ ಬೊಬಾಟ್ತಾ ತಶೆಂ ಭೊಗ್ಲೆಂ ತಾಕಾ.
ಮಿಲ್ಲಾಂತ್ ಕಾಮಾಗಾರ್ ತಾಂತಾಂಚಾ ವಾವ್ರಾಂತ್ ಮನ್ಗ್ ಜಾಲ್ಲೆ. ಹಾತ್ ದೊಡುನ್ ಮೆಜಾಕ್ ತೆಂಕುನ್ ಖಾಡ್ಕೆಕ್ ಆಧಾರ್ ದಿಲೊ ತಾಣೆಂ. ಆನಿಂ ಬಸ್ಲ್ಲ್ಯಾ ಲಾಗಿಂಚ್ ಚಿಂತಾಮಗ್ನ್ ಜಾಲೊ. ಚಿಂತ್ನಾಂ ಸ್ಮ್ರತಿ ಪರ್ತುನ್ ವ್ಹಾಳೊಂಕ್ ಲಾಗ್ಲಿಂ.
ದೊಗ್ ಜಣ್ ಭಾಭಾವ್ ತೆ. ಬಾಪುಯ್ ಸರೊನ್ ಪಾಂಚ್ ವರ್ಸಾಂ ಉತ್ರಲ್ಲಿಂ. ’ತಾವ್ರೊ ಇಂಡಸ್ಟ್ರೀಸ್’ ಬಾಪಾಯ್ನ್ ಪುತಾಂಚಾ ಫುಡಾರಾ ಖಾತಿರ್ಚ್ ಬಾಂಧಾಯಿಲ್ಲೆಂ. ತಾಂತುಂ ಫೊವ್, ತೇಲ್, ಪಿಟೊ, ತಾಂತುಳ್ ಹರ್ಯೇಕ್ಯಿ ತಯಾರ್ ಕರುಂಕ್ ವಿವಿಧ್ ಯಂತ್ರಾಂ ಆಸ್ಲ್ಲಿಂ. ಸಕಾಳಿಂಚ್ಯಾ ಸಾಡೆ - ಸಾತ್ ವೊರಾಂ ಥಾವ್ನ್ ರಾತಿಚಾ ಆಟ್ ವೊರಾಂ ಪರ್ಯಾಂತ್ ತ್ಯಾ ಯಂತ್ರಾಕ್ ದೋನ್ ಮಿನುಟಾಂಚಿ ಲೆಗುನ್ ಪುರ್ಸುತ್ ಮೆಳಾನಾತ್ಲ್ಲಿ. ಮ್ಹಳ್ಯಾರ್ ತ್ಯೆ ರೀತಿರ್ ’ತಾವ್ರೊ ಇಂಡಸ್ಟ್ರೀಸ್’ ಚಲ್ತಾಲಿ.
ಬಾಪುಯ್ ಜೀವಂತ್ ಆಸ್ತಾನಾ, ಬಾಪಾಯ್ಚಾ ಖುಶೆ ಪ್ರಕಾರ್ ರುಡೊಲ್ಫ್ ಆಣಿಂ ಡೊನಿ ದೊಗ್ಯಿತ್ಯಾಚ್ಚ್ ಮಿಲ್ಲಾಂತ್ ವಾವುರ್ತಾಲೆ. ಪುಣ್ ಬಾಪುಯ್ ಸರೊನ್ ವರ್ಸಾ ಬಿತರ್ ರುಡೊಲ್ಫ್ ಗಾಂವ್ ಸಾಂಡುನ್, ಕಾಮಾ ಖಾತಿರ್ ಪರ್ಗಾಂವಾಕ್ ಗೆಲೊ. ಡೊನಿಚೆರ್ ಎಕ್ಲ್ಯಾಚೆರ್ ತಾಣೆಂ ಮಿಲ್ಲಾಚೊ ಭಾರ್ ಘಾಲೊ. ತಾಂತುಂ ವಾವ್ರುಂಕ್ ತಾಣೆಂ ಖುಶಿ ವೆಲಿ ನಾ.
ಪರ್ಗಾಂವಾಕ್ ಪಾವ್ಲ್ಲ್ಯಾ ರುಡಿಕ್ ಥೊಡ್ಯಾಚ್ಚ್ ದಿಸಾಂನಿ ಎಕಾ ವೊಕ್ತಾಚಾ ಕಂಪೆನಿಂತ್ ಕಾಮ್ ಲಾಭ್ಲೆಂ..ಪುಣ್
ವರ್ಸಾನ್ ಗಾಂವಾಕ್ ಆಯ್ಲೊ ತೊ. ಡೊನಿಕ್ ಆನಿಂ ಅವಯ್ಕ್ ಕಠಿಣ್ ಧಖೊ ಬಸ್ಲೊ. ಕಾರಣ್, ರುಡಿ ಧಾರ್ಮಿಕ್ ಪರಿಸರಾ ಥಾವ್ನ್ ಭಾಯ್ರ್ ಗೆಲಾ ತೆಂ ತಾಂಕಾ ಕಳಿತ್ ಜಾಲ್ಲೆಂ.
"ರುಡಿ, ಕೊಣಾಯ್ಚಾ ವಾಯ್ಟ್ ಶಿಕ್ಣ್ಯಾಂಕ್ ಭುಲೊನ್, ಆಡ್ ವಾಟೆಕ್ ವಚಾನಾಕಾರೆ; ಬರೆಂ ಸೊಡ್ನ್ ವಾಯ್ಟಾಕ್ ವೆಂಗ್ಚೆಂ ಸಾರ್ಕೆಂ ನ್ಹಂಯ್"
ಡೊನಿಚಾ ಉತ್ರಾಂಚೆಂ ತಾಣೆಂ ಗಣ್ಣೆಂ ಕೆಲ್ಲೆಂ ನಾಂ.
"ಪುತಾ ತುಂ ಆಸೊ ಕಸೊ ಜಾಲಾಯ್ ತೆಂ ಮ್ಹಾಕಾ ಕಳಾನಾ. ತುಜ್ಯಾ ಸರ್ಲ್ಲ್ಯಾ ಬಾಪಾಯ್ಚಾ ಆತ್ಮ್ಯಾಕ್ ಶಾಂತಿ ಲಾಭ್ಚೆ ಖಾತಿರ್ ಫುಣಿ, ಧಾರ್ಮಿಕ್ ತತ್ವಾಂ ಸಾಂಡಿನಾಕಾ.
ಆವಯ್ಚಾ ರಡ್ಕುರ್ಯಾ ಸ್ವರಾಕ್ ರುಡಿಚಿ ಜಾಪ್ -
"ಖಂಚೊ ಆತ್ಮೊ ಆನಿಂ ಕಸಲಿ ಶಾಂತಿ ಮಾಂಯ್? ಹಿಂ ಸರ್ವ್ ಆದ್ಲ್ಯಾ ಅಶಿಕ್ಪ್ಯಾಂಚಿಂ ಫಿತಿಸ್ಪಣಾಂ. ಆತಾಂ ಹ್ಯಾ ವೈಜ್~ಜಾನಿಕ್ ಯುಗಾಂತ್ಯಿ ತಿಂ ಸರ್ವ್ ಪಿಶಿಂ ತತ್ವಾಂ ಪಾತಿಯೆಂವ್ಚಿಂ ನ್ಹಂಯ್"
ಅಸಲ್ಯಾ ರಾಜಾಂವಾಕ್ ಆವಯ್ ತರ್ಯಿ ಕಿತೆಂ ಜವಾಬ್ ದಿತೆಲಿ?
ರುಡೊಲ್ಫಾಕ್ ಪರ್ತ್ಯಾನ್ ಭಾವಾಡ್ತಿ ಕರುಂಕ್ ಆವಯ್ - ಪುತಾಚಾ ಖಂಚಾಯ್ ಪ್ರಯತ್ನಾನ್ ಫಳ್ ದಿಲೊ ನಾಂ. ರುಡಿ ಕಾಂಯ್ಚ್ ಬದ್ಲಾನಾಸ್ತಾಂ, ಪರ್ತ್ಯಾನ್ ಪರ್ಗಾವಾಂಕ್ ಪಾಟಿಂ ಪರ್ತಾಲೊ.
ಉಪ್ರಾಂತ್ಲಿಂ ಥೊಡಿಂ ವರ್ಸಾಂ ಆಷಿಂಚ್ ಪಾಶಾರ್ ಜಾಲಿಂ. ಡೊನಿ ಆನಿಂ ಆವಯ್ ಸದಾನಿಂತ್ ರುಡಿಚಾ ಬದ್ಲಾವಣೆ ಪಾಸತ್ ಮಾಗ್ತಾಲಿಂ. ತಾಂಚಾ ಮಾಗ್ಣ್ಯಾಂಕ್ಯಿ ಫಳ್ ಲಾಭ್ಲೊ ನಾಂ? ತರ್ಯಿ ತಿಂ ಭರ್ವಸ್ತಾಲಿಂ.
ಆವಯ್ - ಭಾವಾಚಾ ಒತ್ತಾಯೆಕ್ ರುಡಿಚೆಂ ಕಾಜಾರ್ ಜಾಲೆಂ ತೆಂಯ್ ಕಥೊಲಿಕ್ ಧರ್ಮಾಂಚಿ ತತ್ವಾಂ, ಶಿಕವ್ಣ್ ಸರ್ವ್ ಜಾಣಾಂ. ತೊ ಆತಾಂ ನಾಸ್ತಿಕ್ ತರೀ, ಜಲೊನ್ ವಾಡ್ಲ್ಲೊ ಕಥೊಲಿಕ್ ಭಾವಾಡ್ತಾಂತ್ಚ್, ರುಡಿ ನಾಸ್ತಿಕ್ ತೆಂ ಘರ್ಚಾಂಕ್ ಸೊಡ್ಲ್ಯಾರ್ ದುಸ್ರ್ಯಾಂಕ್ ಕಶೆಂ ಕಳಿತ್?
ರುಡಿಚೆಂ ಕಾಜಾರ್ ಜಾಲ್ಲೆಂ ಸಾತ್ ಮಹಿನ್ಯಾಂ ಆದಿಂ ಡೀನಾ ಲಾಗಿಂ. ಹಾಸ್ತ್ಯಾ ಚಾಲಿಚೆಂ ಖಾಲ್ತ್ಯಾ ಸ್ವಭಾವಾಚೆಂ ಡೀನಾ ರುಡಿಕ್ ಪತಿಣ್ ಜಾವ್ನ್ ಲಾಭ್ಲೆಂ. ಡೀನಾಚೊ ಮೊವಾಳ್ ಶೆಗುಣ್ ದೆಖ್ಲ್ಲ್ಯಾ ಆವಯ್ನ್ ಆನಿಂ ಡೊನಿನ್ ಚಿಂತ್ಲ್ಲೆಂ ಕಿ, ರುಡಿ ಥಂಯ್ ಆಮ್ಚಾನ್ ಸಾಧ್ಯ್ ಜಾಯ್ನಾತ್ಲ್ಲೆಂ ಡೀನಾಚಾನ್ ಸಾಧ್ಯ್ ಜಾಯ್ತ್.
ಪುಣ್ ಆಯ್ಚಾ ಪತ್ರಾಂತ್ ಡೊನಿ ಸಮ್ಜಾಲೊಕಿ, ಡೀನಾ ಆಪ್ಲ್ಯಾ ವಾವ್ರಾಂತ್ ಸಲ್ವಾಲೆಂ. ಜಯ್ತ್ ವ್ಹರುಂಕ್ ತೊ ಸಕ್ಲೆಂ ನಾಂ. ಆತಾಂ ಡೊನಿ ಚಿಂತುಂಕ್ ಲಾಗ್ಲೊ ಕಿ "ಡೀನಾ ಹುಜ್ರಿಂ ಆಪುಣ್ ಆತಾಂ ಗುನ್ಯಾಂವ್ಕಾರ್! ಡೀನಾನ್ ಲಿಖ್ಲ್ಲ್ಯಾ ಪತ್ರಾಂತ್ಲೆಂ ಏಕ್ ವಾಕ್ಯ್ ತಾಚಾ ಮತಿಂತ್ ಥಿರ್ ದೊಂಬ್ಲ್ಲೆಂ.
"ಉಜ್ವಾಡಾಚಾ ಮುಳಾಂತ್ ಆಸ್ಚೊ ಕೊಣ್ಂಚ್ ಕಾಳ್ಕಾಕ್ ವಚೊಂಕ್ ಖುಶಿ ವ್ಹರಾನಾ"
ವ್ಹಯ್. ತೆಂ ತಾಕಾ ಕಳಿತ್ ಉಜ್ವಾಡಾಚಾ ಮುಳಾಂತ್ ಆಸ್ಲ್ಲ್ಯಾಕ್ ಕಾಳ್ಕಾಕ್ ವಚೊಂಕ್ ಖುಶಿ ನಾಂ ತರ್ಯಿ. ಕಾಳ್ಕಾಂತ್ ಆಸ್ಲ್ಲ್ಯಾಕ್ ತಾಣೆಂ ನೀಟ್ ವಾಟ್ ದಾಖವ್ಯೆತಾ.
ಹೆಂ ತೊ ಪಾತ್ಯೆವ್ನ್ ಆಸ್ಲ್ಲೊ. ಪುಣ್.....
ಘಡ್ಲೆಂ ಬೊಲ್ತೆಂಚ್. ’ತುಜ್ಯಾ ಭಾವಾವಿಶಿಂ ಕಾಜಾರಾ ಪಯ್ಲೆಂ ತುಕಾ ಕಳಿತ್ ನಾತ್ಲ್ಲೆಂಗಿ? ಹೆಂ ಸವಾಲ್ ತರ್ ಡೀನಾ ತಾಕಾ ವಿಚಾರಿತ್, ತಾಕಾ ಕಶೆಂ ಜವಾಬ್ ದೀಂವ್ಕ್ ಸಕಾತ್ ಡೊನಿ?
’ಡೀನಾಕ್ ಕಿತೆಂ ಮ್ಹಣೊನ್ ಪತ್ರ್ ಬರೊಂವ್? ರುಡೊಲ್ಫಾಕ್ ಆನಿಂ ಕಸಲ್ಯಾ ರೀತಿರ್ ಸಮ್ಜಾಂವ್? ದೆವಾ! ತುಂಚ್ ಮ್ಹಾಕಾ ಸಾಂಬಾಳ್’. ಡೊನಿ ದೆವಾಚೆರ್ ಖೂಬ್ ಭರ್ವಸೊನ್ ತಾಚೆರ್ಚ್ ತಾಣೆಂ ಆಪ್ಲಿ ಸರ್ವ್ ರಾಟಾವಳ್ ಸೊಡ್ಲಿ. ಘರಾ ಗೆಲ್ಲ್ಯಾ ತಾಣೆಂ ಆವಯ್ಕ್ ಲೆಗುನ್ ಡೀನಾನ್ ಲಿಖ್ಲ್ಲ್ಯಾ ಪತ್ರಾಂವಿಶಿಂ ಕಾಂಯ್ಚ್ ಪ್ರಸ್ತಾಪ್ ಕಾಡ್ಲೊ ನಾಂ. ತಿಚಾಯ್ ಮಾತ್ಯಾರ್ ಖಂತ್ ಥಾಪುಂಕ್ ತಾಂಕಾಂ ಬರೆಂ ದಿಸ್ಲೆಂ ನಾಂ.
ಆಶೆಚ್ ಥೊಡೆ ದೀಸ್ ದಾಂವ್ಲೆ ತರೀ ಡೊನಿನ್ ಡೀನಾಕ್ ಪತ್ರ್ ಲಿಖ್ಲೆಂ ನಾಂ., ವ್ಹಯ್ ತರ್ ಕಿತೆಂ ಮ್ಹಣೊನ್ ತೊ ಲಿಖ್ತಲೊ? ದೆಕುನ್ ತೊ ಪಾಟಿಂ ಲೊಟಿಲಾಗ್ಲೊ ದೀಸ್.
ತ್ಯಾ ದಿಸಾಂಚಿಂ ಸಾಂಜೆಚಿಂ ಚಾರ್ ವೊರಾಂ ಉಅತರ್ಲೆಲಿ. ಡೊನಿ ಅಜೂನ್ಯಿ ಮಿಲ್ಲಾಂತ್ಚ್ ಆಸ್ಲ್ಲೊ. ಹ್ಯಾ ವಗ್ತಾ ಟೆಲಿಪೋನಾಚಿ ಕಾಂಪಿಣ್ ವ್ಹಾಜೊಂಕ್ ಲಾಗ್ಲಿ. ರಿಸೀವರ್ ಉಕಲ್ನ್ ಕಾನಾಕ್ ಲಾಯಿಲ್ಲ್ಯಾ ಡೊನಿನ್ - "ಹಲೋ...ಹಾಂವ್ ಡೊನಿ"
"......."
ಡೊನಿಚಾನ್ ತಿಂ ಉತ್ರಾಂ ಜಿರಂವ್ಕ್ ಸಾಧ್ಯ್ ಜಾಲೆಂ ನಾ. ತೊ ಘಡ್ಬಡ್ಲೊ. ಆಕಾಂತೊನ್ ತಾಣೆಂ ರಿಸೀವರ್ ಸಕ್ಲಾ ದವರ್ಲೆಂ. ಎಕಾ ಕಾಮಾಗಾರಾಲಾಗಿಂ ಕಿತೆಂಗೀ ಸಾಂಗೊನ್ ಘರ್ಚಾ ಕುಶಿಕ್ ಧಾಂವ್ಲೊ ತೊ. ರುಡೊಲ್ಫಾಕ್ ಅವ್ಘಡ್ ಘಡೊನ್ ತಾಚಿ ಸ್ಥಿತಿ ಗಂಭೀರ್ ಆಸ್ಲ್ಲಿ.
ಘರಾ ಪಾವ್ಲ್ಲ್ಯಾ ತಾಣೆಂ ಆವಯ್ಕ್ ಹಿ ಗಜಾಲ್ ವ್ಹಡ್ ಕರುನ್ ಸಾಂಗೊಂಕ್ ನಾ> ಗರ್ಜೆಚ್ಯೊ ಥೊಡ್ಯೊ ವಸ್ತು ಘೆವ್ನ್ ಗೊಂಯಾಕ್ ಗೆಲೊ ತೊ ಸಾಂಜೆಚ್ಯಾ ಗಾಡಿಯೆರ್.
ರುಡೊಲ್ಫಾಚಾ ಘರಾ ಪಾವ್ಲ್ಲೊ ತೊ, ಸೆಜಾರ್ಯ್ಂಚಾ ಕುಮ್ಕೆನ್ ಸೀದಾ ಆಸ್ಪತ್ರೆಕ್ ಗೆಲೊ. ರುಡೊಲ್ಫಾಕ್ ಎಮರ್ಜೆನ್ಸಿ ವಾರ್ಡಾಂತ್ ಸ್ಪೆಶಲ್ ರುಮಾಂತ್ ದವರ್ಲ್ಲೆಂ. ಭಾಯ್ರ್ ಬಾಂಕಾರ್ ಡೀನಾ ಆಪ್ಲ್ಯಾ ಸಾಂಗಾತಿಣಿ ಬರಾಬರ್ ಬಸೊನ್ ಆಸ್ಲ್ಲೆಂ. ದೊಳೆ ತಾಚೆ ಸುಜ್ಲ್ಲೆ ಆನಿಂ ತಾಂಬ್ಡೆ ಜಾಲ್ಲೆ. ತಾಂತುಯಿ ದುಖಾಂ ವ್ಹಾಳ್ತಾಲಿಂ. ಡೊನಿಕ್ ಪಳೆಲ್ಲ್ಯಾ ಫರಾ ತಾಚೆಂ ದುಖ್ ಉಮಾಳೊನ್ ಹುಸ್ಕಾರೊಂಕ್ ಲಾಗ್ಲೆಂ ತೆಂ. ತಾಚಾನ್ ಕಾಂಯ್ ಉಲೊಂವ್ಕ್ ಜಾಲೆಂ ನಾಂ. ದರ್ವಡ್ಚಾ ಡೊನಿಕ್ ದೆಖೊನ್ ಡೀನಾಚೆಂ ಸಾಂಗಾತಿಣ್ ಮ್ಹಣಾಲಾಗ್ಲೆಂ.
"ಎಕಾ ವೊರಾಂ ಆದಿಂ ಮತಿರ್ ನಾತ್ಲ್ಲೊ. ತೊ. ಆತಾಂ ಮತಿರ್ ಆಯ್ಲಾ. ತಾಚಾ ಆಶೆ ಪ್ರಕಾರ್ ಕುಮ್ಸಾರ್ ಕರುನ್ ಕುಮ್ಗಾರ್ ದೀಂವ್ಕ್ ಪಾದ್ರ್ಯಾಬ್ ಆಯ್ಲಾ.
ಡೊನಿನ್ ಬಿತರ್ ತಿಳ್ಳೆಂ. ಪಾದ್ರ್ಯಾಬ್ ಆಪ್ಲೊ ದಾವೊ ಕಾನ್ ರುಡಿಚಾ ತೊಂಡಾಲಾಗಿಂ ಧರುನ್ ಆಯ್ಕಾತಾಲೊ ಆನಿಂ ರುಡಿ ಕಷ್ಟಾಂನಿ ಕಿತೆಂಗೀ ಉಚಾರ್ತಾಲೊ. ಡೊನಿಚೆ ಪಾಯ್ ಬಿತರ್ ಧಾಂವೊಂಕ್ ಆಮ್ಸರ್ತಾಲೆ ತರ್ಯಿ ಪಾದ್ರ್ಯಾಬ್ ಕುಮ್ಸಾರ್ ಕರುನ್ ಆಸ್ತಾಂ ಥಂಯ್ ಧಾಂವೊಂಕ್ ತಾಕಾ ಜಾಲೆಂ ನಾ.
ಡೋನಿ ದೆಖೊನ್ಂಚ್ ಆಸ್ತಾಂ ಪಾದ್ರ್ಯಾಬಾನ್ ಕುಮ್ಗಾರ್ ಕಾಡ್ನ್ ರುಡಿಚಾ ಜಿಬೆಕ್ ಲಾಯ್ಲೊ ಆಣಿಂ ಗ್ಲಾಸಾಂತ್ಲೆಂ ಉದಾಕ್ ತೊಂಡಾಂತ್ ಸೊಡ್ಲೆಂ.
"ಶಾಂತಿ ತುಕಾ, ತುಜೆ ಕಷ್ಟ್ ತೊ ಸರ್ವೆಸ್ಫರ್ ದೇವ್ ಹಳೂ ಕರ್ತಲೊ ಆನಿಂ ತುಜ್ಯಾ ಕುಡೀಕ್ ಭಲಾಯ್ಕಿ ದಿತಲೊ." ಸಾಂಗೊನ್ ಪಾದ್ರ್ಯಾಬ್ ವಚೊಂಕ್ ಪಾಟಿಂ ಪರ್ತಾಲೊ.
"ವೆಳಾರ್ ಆಯಿಲ್ಲ್ಯಾನ್ ತುಮ್ಚೊ ಉಪ್ಕಾರ್ ಜಾಲೊ ಫಾದರ್." ಡೊನಿ ಹಾತ್ ಜೊಡುನ್ ಪಾದ್ರ್ಯಾಬಾಲಾಗಿಂ ಮ್ಹಣಾಲಾಗ್ಲೊ.
"ಹೆಂ ಆಮ್ಚೆಂ ಕಾಮ್ ಬಾ. ವಚ್ ಪಯ್ಲೆಂ. ತುಂ ಮೆಳೊಂಕ್ ಆಯಿಲ್ಲ್ಯಾಂಕ್ ಮೇಳ್. ಆಮ್ಚಿಂ ಭೆಟ್ ಉಪ್ರಾಂತ್ ಜಾಂವ್ದಿ."
ಡೊನಿಚೊ ಉದ್ವೇಗ್ ದೆಖ್ಲ್ಲ್ಯಾ ಪಾದ್ರ್ಯಾಬಾಕ್, ತೊ ರುಡೊಲ್ಫಾಚೊ ಭಾವ್ ಮ್ಹಣೊನ್ ಕಳಿತ್ ನಾತ್ಲ್ಲೆಂ ತರ್ಯಿ, ಖಾಸ್ ಸಂಬಂಧಿ ಮ್ಹಳ್ಳೆಂ ಸಮ್ಜಾಲ್ಲೆಂ. ಪಿಡೆಸ್ತಾಚಿ ತಾಣೆಂ ಡೊನಿಲಾಗಿಂ ಉಲೊವ್ನ್ ವೇಳ್ ವಿಬಾಡೂಂಕ್ ಮನ್ ಕೆಲೆಂ ನಾ.
ರುಡೊಲ್ಫಾಕ್ ದೆಖ್ಲ್ಲ್ಯಾ ಡೋನಿಕ್ ಕಠಿಣ್ ಧಖೊ ಬಸ್ಲೊ. ಕಾರಣ್, ರುಡೊಲ್ಫಾಚಿ ಕೂಡ್ ಸಗ್ಳಿ ಘಾಯೆಲ್ಲಿ. ರಗತ್, ಆನಿಂ ಗ್ಲುಕೋಸ್ ಶಿರಾಂ ಥಾವ್ನ್ ಕುಡಿಕ್ ವೆತಾಲೊ. ಆಫ್ಲ್ಯಾ ಭಾವಾಕ್ ವೆಂಗೊಂಕ್ ಲೆಗುನ್ ತಾಕಾ ಸಾಧ್ಯ್ ಜಾಲೆಂ ನಾ. ಕಾರಾಣ್, ಸಗ್ಳ್ಯಾ ಕುಡಿಕ್ಚ್ ಪ್ಲಾಸ್ಟರ್ ಕೆಲ್ಲೆಂ ಮ್ಹಣ್ಯೆತಾ.
ರುಡೊಲ್ಫಾಚಾ ದೊಳ್ಯಾಂನಿ ದುಃಖಾಂ ವ್ಹಾಳ್ತಾಲಿಂ. ಉಜ್ವೊ ದೊಳೊ ಘಾಯೆಲ್ಲೊ. ಪ್ರತಿಕ್ರಿಯಾ ಜಾವ್ನ್ ಡೊನಿಚಾಯ್ ದೊಳ್ಯಾಂತ್ ದುಃಖಾಂ ಫಾಂಕ್ರೆಲಿಂ. ತಾಚಾನ್ ಕಾಂಯ್ ಉಲೊಂಕ್ ಸಾಧ್ಯ್ ಜಾಲೆಂ ನಾಂ. ಡೊನಿ ಸಂಪೂರ್ಣ್ ದೆದೆಸ್ಫಾರ್ ಜಾಲ್ಲೊ.
ತಾಣೆಂ ಭಂವ್ತಿಂ ದೊಳೆ ಘುಂವ್ಡಾವ್ನ್ ದೆಖ್ತಾನಾ, ತಾಚಾ ಪಾಟ್ಲ್ಯಾನ್ಂಚ್ ಡೀನಾ ಉಬೆಂ ಆಸ್ಲ್ಲೆಂ. ತಾಚಾಯ್ ದೊಳ್ಯಾಂನಿ ಝರಿ ಜಿವ್ಯೊ ಜಾತಾಲ್ಯೊ.
"ರುಡಿ!" ಡೊನಿನ್ ಉಲೊವ್ಣ್ಯಾಕ್ ಆರಂಭ್ ಕೆಲೆಂ. "ತುಜಿ ಸ್ಥಿತಿ ಆಶಿ ಕಶಿ ಕಾಲಿ ತೆಂ ಮ್ಹಾಕಾ ಸಮ್ಜಾನಾ. ಇತ್ಲೊ ಕಸೊ ಘಾಯೆಲೊಯ್ ರುಡಿ ತುಂ?"
ಹಾತ್ ಭಾಶೆನ್ ರುಡಿನ್ ಡೀನಾಕ್ ಸರ್ಶಿನ್ ಆಪಯ್ಲೆಂ. ಲೋವ್ ಆನಿಂ ಉಮಾಳ್ಯಾಂನಿ ಫುಸ್ಪುಸ್ಲೊ ತೊ.
"ಡೀನಾ..ಮ್ಹಜ್ಯಾ ಮೊಗಾ, ಹಾಂವ್ ಎದೊಳ್ಚ್ ಮೊರಾಜಾಯ್ ಆಸ್ಲ್ಲೊಂ..."
"ರುಡಿ!!" ತೆಂ ಬೊಬಾಟುನ್ ತಾಚಾ ತೊಂಡಾಕ್ ಹಾತ್ ದವರಿಲಾಗ್ಲೆಂ.
"ತಶೆಂ ಮ್ಹಣಾನಾಕಾ ರುಡಿ.." ಡೊನಿಉ ತಳ್ಮಳ್ಯಾಂನಿ ಮ್ಹಣಾಲಾಗ್ಲೊ.
ಡೀನಾನ್ ತೊಂಡಾಕ್ ದವರ್ಲ್ಲೊ ಹಾತ್ ಹಳೂ ಆಪ್ಲ್ಯಾ ಹಾತಾಂತ್ ಘೆವ್ನ್ ರುಡೀ ಮುಂದರಿಲಾಗ್ಲೊ.
"ಮ್ಹಾಕಾ ಉಲಂವ್ಕ್ ಸೊಡ್ ಡೀನಾ. ದೆವಾನ್ ಮ್ಹಾಕಾ ಎದೊಳ್ ಅವ್ಕಾಸ್ ದಿಲ್ಲೊ...ಫಕತ್ತ್ ತೀನ್ ಉದ್ದೇಶಾಂಕ್ ಲಾಗೊನ್. ಪರ್ತ್ಯಾನ್ ತಾಚೆ ಥಂಯ್ ಪರ್ತೊಂಕ್. ಭಾವಾಕ್ ಮ್ಹಜ್ಯಾ ಮೆಳೊಂಕ್ ಆನಿಂ ತುಜೊ ಫುಡಾರ್ ನವ್ಯಾನ್ ಘಡುಂಕ್"!
ಆನ್ಯೇಕಾ ಹಾತಾಂತ್ ಕಷ್ಟಾಂನಿ ತಾಣೆಂ ಡೋನಿಚೊ ಹಾತ್ ಧರ್ಲೊ.
"ಡೊನಿ ಹ್ಯಾ ಫುಡಾಂ ಡೀನಾ ತುಜೆಂ ತಾಕಾ ತುಂಚ್ ಆಧಾರ್ನ್ ಸಾಂಬಾಳ್. ತಾಕಾ ದುಖಯ್ನಾಕಾ ಆನಿಂ ಮ್ಹಜ್ಯಾ ಆತ್ಮ್ಯಾಕ್ ಶಾಂತಿ ಮೆಳ್ತೆಲಿ."
"ರುಡಿ ದಯಾಕರುನ್ ತಶೆಂ ಮ್ಹಣಾನಾಕಾ. ತುಂ ಬರೊ ಜಾತಾಯ್" ಡೊನಿ ತಾಕಾ ಸಮಾಧಾನ್ ಕರುನ್ ತಾಚಿಂ ದುಃಖಾಂ ಪುಸಿಲಾಗ್ಲೊ.
"ತುಂ ಚಡ್ ಉಲಯ್ನಾಕಾ ರುಡಿ" ಡೀನಾ ಉಸ್ಕಾರೊನ್ ಸಾಂಗಾಲಾಗ್ಲೆಂ.
"ಅತಾಂ ಉಲಯ್ನಾಸ್ತಾಂ ಆನಿಂ ಕೆದಾಳಾ ಉಲಂವ್ ಡೀನಾ? ತುಂ ಮ್ಹಾಕಾ ಆಡಾಯ್ನಾಕಾಬಾ."
ರುಡೀ ಭುರ್ಗ್ಯಾ ಸಾರ್ಕ್ಯಾ ಸ್ವರಾನ್ ಪರಾತ್ತಿಲಾಗ್ಲೊ. ತ್ಯಾ ವಕ್ತಾ, ಜಡ್ ಜಾಲ್ಲ್ಯಾ ಕಾಳ್ಜಾಂನಿ ಆನಿಂ ವ್ಹಾಳ್ಚಾ ದೊಳ್ಯಾಂನಿ ಡೀನಾ ಆನಿಂ ಡೋನಿ ಉಬಿಂ ಆಸ್ಲ್ಲಿಂ.
"ಮಾಂಯ್ಕ್ ಬೆಸಾಂವ್ ಮಾಗ್ಲಾಂ. ಡೀನಾಕ್ ಆನಿಂ ಮಾಂಯ್ಕ್ ಕೆದಿಂಕ್ಚ್ ಸಾಂಡಿನಾಕಾ"
ಮನಿಸ್ ಜಾವ್ನ್ ಜಲ್ಮಾಲ್ಲೊ ಕೋಣ್ ತೊ ರಡಾನಾ ಜಾಯ್ತ್? ಡೀನಾಚೆಂ ಸಾಂಗಾತಿಣ್ ಲೆಗುನ್ ಹುಸ್ಕಾರೊನ್ ರಡೊಂಕ್ ಲಾಗ್ಲೆಂ. ತ್ಯೆಚ್ ವೆಳಿಂ ಎಕ್ಲಿ ನರ್ಸ್ ಆನಿಂ ಪಾದ್ರ್ಯಾಬ್ ಬಿತರ್ ರಿಗ್ಲೆಂ.
ತಿ ಅಮ್ಸರಾನ್ ರುಡಿಚಾ ಖಟ್ಲ್ಯಾಲಾಗಿಂ ಯೇವ್ನ್ ರಗ್ತಾಚಿ ಬೋತ್ಲ್ ವೀಕ್ಶಣ್ ಕರುಂಕ್ ಲಾಗ್ಲಿಂ. ರಗತ್ ಆನಿಂ ಗ್ಲುಕೊಸ್ ಶಿರಾಂಕ್ ವೆಚೊ ಥಾಂಬಲ್ಲೊ. ಶಿರೆಚಿ ಸುವಿ ವೋಡ್ನ್ ತಿಣೆಂ ಅನ್ಯೇಕಾ ಶಿರೆಕ್ ದೀವ್ನ್ ಪ್ರೆಸ್ ಕೆಲೆಂ. ತರ್ಯಿ ರಗತ್ ಶಿರೆಕ್ ಚಡ್ಲೆಂನಾಂ. ತಿ ಅಮ್ಸರಾನ್ ಭಾಯ್ರ್ ಧಾಂವ್ಲಿ. ಎಕಾ ಕ್ಶ್ಃಅಣಾ ಭಿತರ್ ತಿ ದಾಕ್ತೆರಾ ಬರಾಬರ್ ಪರ್ತ್ಯಾನ್ ಪ್ರವೇಶ್ ಜಾಲಿ.
ರುಡಿಚೆ ದೊಳೆ ವಯ್ರ್ ಪರ್ತಾಲ್ಲೆ. ದಾಕ್ತೆರ್ ಅಮ್ಸೊರಾನ್ ಪರೀಕ್ಶಾ ಕರಿಲಾಗ್ಲೊ.
"ಡೊನಿ ಮಾಂಯ್ಕ್ ಸಾಂಗ್, ಹಾಂವ್ ಪರ್ತಾಲಾಂ ಆನಿಂ ಡೀನಕ್ ಸಾಂಬಾಳ್" ತಾಚಿ ತಕ್ಲಿ ಆಡ್ ಪರ್ತಾಲಿ.
"ರುಡಿ...!!" ದೋನ್ - ತೀನ್ ತಾಳೆ ಏಖ್ ಪಾವ್ಟಿಂ ಬೊಬಾಟ್ಲೆ. ದಾಕ್ತೆರ್ ತಕ್ಲಿ ಪಂದಾ ಘಾಲುನ್ ತಟಸ್ಥ್ ಜಾಲೊ. ಡೊನಿ ಆಣಿಂ ಡೀನಾ ರುಡೀಚಾ ಆಂಗಾಕ್ ವೇಂಗ್ ಮಾರ್ತಾನಾ, ಪಾದ್ರ್ಯಾಬ್ ವಯ್ರ್ ದೀಷ್ಟ್ ಉಬಾರುನ್ ಪುಸ್ಪುಸ್ಲೊ -
"ಬಾಪಾ ತುಜಿ ಖುಶಿ ಜಾಂವ್. ತುಜಾ ಚಾಕ್ರಾಕ್ ತುಜಾ ಗೊಪಾಂತ್ ಘೆ."
ಡೀನಾಚೊ ಹಾತ್ ರುಡಿನ್ ಎದೊಳ್ಚ್ ಡೊನಿಚಾ ಹಾತಾಂತ್ ಘಟ್ ಕೆಲ್ಲೊ. ರುಡಿನ್ ಸಂಸಾರಾಕ್ ಆದೇವ್ಸ್ ಕೆಲ್ಲೊ ತರ್ಯಿ, ಡೀನಾಚಾ ಕಾಳ್ಜಾಂತ್ ನವೆಂ ಸಾಳಕ್ ಫುಲ್ಲೆಂ!
About us | Feedback | Contact us
Copyright © 2005
DAAIZ.COM All rights reserved.
Page concept, designed and maintained by Ashawadi
Publications
