ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್ ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಮೆಲ್ವಿನ್ ಜೆರಾಲ್ಡ್ ವಾಸ್: ಕೆಲರಾಯ್ ಫಿರ್ಗಜೆಜೊ, ಪಾಟ್ಲ್ಯಾ ಭಾರಾ ವರ್ಸಾಂ ಥಾವ್ನ್ ಕುವೆಯ್ಟಾಂತ್ ವಾವ್ರ್ ಕರುನ್ ಆಸಾ. ಚಡುಣೆಂ ಪಂದ್ರಾ-ಸೊಳಾ ವರ್ಸಾಧಿಂ ಸಾಹಿತ್ಯಾಚಿ ಸುರ್ವಾತ್ ಕರುನ್, 35 ಮಟ್ವ್ಯೊ ಕಾಣ್ಯೊ ಆನಿ ಏಕ್ ಕಾದಂಬರಿ ಬರಯಿಲ್ಲಿ ತರ್ಯೀ ಸಭಾರ್ ವರ್ಸಾಂನಿ ತಿ ಜಿವಾಳ್ ದವ್ರುಂಕ್ ಸಕಾನಾಸ್ತಾಂ ರಾವ್ಲೊ ತರ್ಯ್ ಕೊಂಕ್ಣಿ ಸಾಹಿತ್ಯಾಚೆರ್ ತೊಚ್ಚ್ ಮೋಗ್ ಆನಿ ಹುಸ್ಕೊ ಅಸೊನ್, ಆಯ್ಲೆವಾರ್ ಸರಾಗ್ ರಿತಿನ್ ವೆವೆಗ್ಳ್ಯಾ ಪ್ರಕಾರಾಚಿ ಸಾಹಿತಿಕ್ ಕೃಷಿ ಕರುನ್ ಕೊಂಕ್ಣಿ ವರ್ತುಲಾಂತ್ ನಾಂವಾಡ್ದಿಕ್ ಜಾಲಾ. ಕಾಣ್ಯಾಂಶಿವಾಯ್ 4 ನಾಟ್ಕುಳೆ, 75 ಕವಿತಾ, 10 ಲೇಖನಾಂ, 20 ವಿಮರ್ಶೆ/ಸಮೀಕ್ಶಾ ಬರಯ್ಲ್ಯಾತ್. ಹಾಚೊ ಸ್ವತಾಚೊ ( ಫುಡ್ಲದ್) ಕವಿತಾಜಮೊ ’ಆಟ್ವ್ಯಾ ರಂಗಾಚೊ ಧೊಣು’ ವೆಗಿಂಚ್ ’ಆಶಾವಾದಿ ಪ್ರಕಾಶನ್’ ಪರ್ಗಟ್ಚಾರ್ ಆಸಾ. ಹಾಚ್ಯಾಧಿಂ ಹಾಚಿಂ ಕವಿತಾಂ/ಲೇಕನಾಂ ’ಮೊತಿಯಾಂ ಆನಿ ತಾರಾಂ’, ’ಸಾಗೊರಾಚ್ಯಾ ವಾಟೆಚ್ಯೊ ಝರಿ’, ’ಕವಿತಾಪಾಠ್’ ಆನಿ ’ದರ್ಯಾಕ್ ಉದಾಕ್’ ಬುಕಾಂನಿ ಪರ್ಗಟ್ಲ್ಯಾಂತ್. ಪಾಟ್ಲ್ಯಾ ದೋನ್ ವರ್ಸಾಂ ಥಾವ್ನ್ ದಾಯ್ಜ್.ಕೊಮ್ ಸಾಯ್ಟಿಚೊ ಸಹ-ಸಂಪಾದಕ್ಯೀ ಹೊ ಜಾವ್ನಾಸಾ.
ಭ್ರಮಿದೆಂತ್ಲ್ಯೊ ಸಾವ್ಳ್ಯೊ: ಏಕ್ ಸಾಮಾಜಿಕ್ ಕಾದಂಬರಿ, ಪ್ರಮುಖ್ ಜಾವ್ನ್ ತೆಗಾಂಚ್ಯಾ ತೀನ್ ರಿತಿಚಾ ಸಂಭಂಧಾಂಚೆ ಎಕಾಮೆಕಾಚೆ ಗಾಂಚ್ ಮ್ಹಣ್ಯೆತಾ. ವಾಚ್ಪ್ಯಾಂಕ್ ಸಿಂತಿಮೆಂತಾಂ, ಚಿಂತಾಪ್, ಭಗ್ಣಾಂ, ಉಮಾಳೆ ಜಾಗಂವ್ಕ್ ಜರೂರ್ ಸಕ್ತೆಲಿ ಮ್ಹಳ್ಳೊ ಮ್ಹಜೊ ಭರ್ವಸೊ.
ಪುಸ್ತಕ್ ದೋನ್
ತುಜೆಂ ಜಿವಿತ್ ತುಜಿ ವಿಂಚವ್ಣ್
ನ್ಹಂಯ್
ಆವಸ್ವರ್ ಪಂದ್ರಾ: ಮಿಶೇಲ್ ರಾಯನ್ ಆಲಿಯಾ
ಸಾಂಜೆಚಾ ಪ್ರಶಾಂತ್ ಹವ್ಯಾಂತ್, ಸೊಂತೊಸಾನ್ ಆನಿ ಖುಶಾಲ್ಕಾಯೆನ್ ಮ್ಹಳ್ಳ್ಯಾ ಪರಿಂ ಜೀಪ್ ಚಲಂವ್ಚೊ ಸದಾಂಚೊ ರಾಯನ್ ಆಜ್ ಪೃಕೃತಿಚಾ ಮೊಗಾರ್ ನಾತ್ಲ್ಲೊ. ಜಿಪಾ ಭಿತರ್ಲ್ಯಾ ಸ್ಟೀರಿಯೊ ಡೆಕಾಕ್ ಚಿಕ್ಕೆ ವ್ಹಡ್ ಆವಾಜಾರ್ ದವರುನ್ ತಾಚ್ಯಾ ತ್ಯಾ ಮನ್ ಭುಲಂವ್ಚ್ಯಾ ಆವಾಜಾಂತ್ ಆಪ್ಲ್ಯಾ ಪಸಂದೆಚಿಂ ಗಾನಾಂ ಆಯ್ಕೊನ್ ತಾಣೆ ಕರ್ಚೆಂ ತೆಂ ’ಸ್ಲೋ ಡ್ರೈವ್’ ತಾಕಾ ಚಡ್ಚ್ ಖುಶಾಲ್ಕಾಯೆಚೆಂ. ಮುಂಬಯಿ ಶ್ಹೆರ್ ರಾತಿಚಾ ವಗ್ತಾರ್ ವೀಜ್ ದಿವ್ಯಾಂಚಾ ಉಜ್ವಾಡಾಂತ್ ಪೆಟೊನ್ ಸೊಭ್ತಾ ತಶೆಂ ತ್ಯಾ ಪೆಟೊನ್ ಸೊಭ್ಚ್ಯಾ ಸೊಭಾಯೆಕ್ ಆಪ್ಲ್ಯಾ ಜಿಪಾಚಾ ಭಿತರ್ ಥಾವ್ನ್ಚ್ ಚಾಕೊನ್ ರಾಯನಾನ್ ಡ್ರೈವ್ ಕರ್ಚೆಂ ತೆಂ ಸದಾಂಚೆಂ ಡ್ರೈವಿಂಗ್.
ಮುಂಬಯಿಚಿ ಸೊಭಾಯ್ ಚಾಕೊಂಕ್ ಜಾಯ್ ತರ್ ಸುರ್ಯೊ ನಿದ್ಲ್ಯಾ ಉಪ್ರಾಂತ್ ತುಂ ಜಾಗೊ ಜಾ! ಮುಂಬಯಿ ತುಕಾ ದುಸ್ರ್ಯಾಚ್ ಸಂಸಾರಾಕ್ ವರುನ್ ಪಾವಯ್ತಾ!
ಸಾಂಜೆಚ್ಯಾ ಆಪ್ಲ್ಯಾ ಸ್ಲೋ ಡ್ರೈವಿಂಗಾಕ್ ವಿಚಾರುನ್ ಕೊಣೆಯ್ ಸವಾಲ್ ಕೆಲೆಂ ತರ್ ತಾಂಕಾ ರಾಯನಾನ್ ದಿಂವ್ಚಿ ಹಿ ಸಾದಿ ಆನಿ ಸೊಂಪಿ ಜವಾಬ್!
ಪುಣ್ ಆಜ್!
ಆಜ್ ರಾಯನಾಚಿ ಮತ್ ಹ್ಯಾ ಪೃಕೃತೆಚಾ ಸೊಭಾಯೆ ಥಾವ್ನ್ ಪಯ್ಸ್ ಪಾವ್ಲ್ಲಿ.
ಆಜ್ ರಾಯನಾಚೆ ಪಾಂಯ್ ತ್ಯಾ ಕಾಳ್ಯಾ ಚವರ್ಲೆಟ್ ಜಿಪಾಚೆಂ ಆಕ್ಸಿಲೇಟರ್ ಭಳಾನ್ ದಾಂಬ್ತಾಲೆ.
ಆಲಿಯಾನ್ ರಾಂವ್ಚಾ ಹೊಟೆಲಾ ಥಾವ್ನ್ ಭಾಯ್ರ್ ಸರ್ಲಲೊ ರಾಯನ್ ವೆಗಿಂಚ್ ಘರಾ ಪಾವೊಂಕ್ ಆಶೆತಾಲೊ.
ಎದೊಳ್ಚ್ ತಾಣೆಂ ಜಿಪಾರ್ ಥಾವ್ನ್ ದೋನ್ ಪೊನಾಂ ಕರುನ್ ಜಾಲ್ಲಿಂ.
ಪಯ್ಲೆಂ ಪೋನ್ ಸಾಂವಂತಾಕ್!
"ಸಾವಂತ್.... ಫಾಲ್ಯಾ ಸಾಕಾಳಿಂ ಭರ್ತಿ ಧಾ ವೊರಾಂಕ್ ಮ್ಹಾಕಾ ಮ್ಹಜ್ಯಾ ಆಫೀಸಾಂತ್ ಯೇವ್ನ್ ಮೇಳ್!" ರಾಯನಾನ್ ಸಾವಂತಾಕ್ ಇತ್ಲೆಂಚ್ ಸಾಂಗ್ಲ್ಲೆಂ.
ದುಸ್ರೆಂ ಪೋನ್ ಸ್ಮಿತಾ, ಆಪ್ಲ್ಯಾ ಆಫೀಸ್ ಸೆಕ್ರೆಟರಿಕ್!
"ಬೃಂದಾವನ್"! ಬಾಂದ್ರಾಂತ್ಲೆಂ ಆಪ್ಣಾಚೆಂ ಪ್ಲ್ಯಾಟ್ ಖಾಲಿ ಕರುನ್ ಜಾತಾ ತಿತ್ಲ್ಯಾ ವೆಗ್ಗಿಂ ತೆಂ ಪ್ಲ್ಯಾಟ್ ಫರ್ನಿಶಿಂಗ್ ಕರುನ್ ರೆಡಿ ಕರಯ್!" ಸ್ಮಿತಾಕ್ ತಾಣೆಂ ಆರ್ಡರ್ ದಿಲ್ಲೆಂ.
ತೀನ್ ವೊರಾಂ ಪಯ್ಲೆಂ ತೊ ಆಪ್ಲ್ಯಾ ಘರಾ ಥಾವ್ನ್ ಭಾಯ್ರ್ ಸರ್ತಾನಾ ತಾಣೆಂ ಚಿಂತುಂಕ್ ಸಯ್ತ್ ನಾತ್ಲ್ಲೆಂ ಕೀ ಸಾವಂತಾಚೆ ಸಂಕಷ್ಟ್ ಇತ್ಲ್ಯಾ ವೆಗ್ಗಿಂ ಪರಿಹಾರ್ ಜಾತೆಲೆ.
ಪಯ್ಲ್ಯಾ ಪಾವ್ಟಿಂ ದೊಗಾಂ ಚಲಿಯಾಂನಿ ರಾಯನಾಚಾ ಜಿವಿತಾಂತ್ ಉಮಾಳೊ ಹಾಡ್ಲ್ಲೊ.
ಆಪ್ಣಾ ವಯ್ರ್ ಆನಿ ಆಪ್ಲ್ಯಾ ಭುದ್ವಂತ್ಕಾಯೆಚಾ ವಯ್ರ್ ಪಾತ್ಯೆವ್ನ್ ಆಸ್ಚ್ಯಾ ರಾಯನಾಕ್ ಆಪ್ಲ್ಯಾ ಸಮ್ಜಣೆಚಾ ಭಾಯ್ರ್ಯ್ ಥೊಡೆಂ ಆಸಾ ಮ್ಹಳ್ಳ್ಯಾ ಪರಿಂ ಆಜ್ ನಖ್ಖಿ ಜಾಲ್ಲೆಂ.
ಮಿಶೇಲಾಚೆಂ ಯೆಣೆಂ ಆನಿ ಆಲಿಯಾಚಿ ಸೊಭಾಯ್!
ದೊನ್ಯ್ ತಾಚ್ಯಾ ಜಿವನಾಂತ್ ಅವ್ಚಿತ್ತ್!
ಹ್ಯಾ ಅವ್ಚಿತ್ತ್ಪಣಾಂತ್ ರಾಯನಾಚೆಂ ಜಿವಿತ್ ಮಾತ್ರ್ ತಾಣೆಂ ಆಶೆಲ್ಲ್ಯಾ ದಿಶೆನ್ಚ್ ಧಾಂವ್ಲ್ಲೆಂ.
ಆಲಿಯಾ ಜರೀ ತಾಚ್ಯಾ ಜಿವಿತಾಂತ್ ಆಜ್ ಆಯಿಲ್ಲೆಂ. ಪುಣ್ ಮಿಶೇಲ್....?
"ಡಾರ್ಲಿಂಗ್! ಐ ಯಾಮ್ ಕಮಿಂಗ್!"
ಮಿಶೇಲಾಚಾ ಸೊಭಿತ್ ರುಪ್ಣ್ಯಾಕ್, ಆಪ್ಲ್ಯಾ ದೊಳ್ಯಾಂ ಮುಕಾರ್ ಯೇವ್ನ್ ರಾವ್ಲೆಲ್ಯಾ ತ್ಯಾ ನಿರಾಪ್ರಾಧಿ ರುಪ್ಕಾರಾಕ್, ಆಪ್ಲ್ಯಾ ಕಾಳ್ಜಾಚಾ ದೊಳ್ಯಾಂನಿ ಪಳವ್ನ್ ರಾಯನ್ ಮನಾಂತ್ಚ್ ಘುಣ್ಗುಣ್ಲೊ.
ಹ್ಯಾ ಉಪ್ರಾಂತ್ ಥೊಡೊಚ್ ವೇಳ್!
ವೇಗ್ ಆರಾಯಿಲ್ಲೆಂ ರಾಯನಾಚೆಂ ಜೀಪ್ ತಾಕಾ ಆಪ್ಲ್ಯಾ ವೆಂಗೆಂತ್ ಘೆವ್ನ್ ಆಪ್ಲ್ಯಾ ಬಿಡಾರಾಕ್ ಪಾಟಿಂ ಪರ್ತಾಲ್ಲೆಂ.
"ಸ್ವೀಟ್ ಹಾರ್ಟ್!"
ದಾರ್ ಉಗ್ತೆಂ ಜಾವ್ನ್ ಆಪ್ಣಾ ಮುಕಾರ್ ಮಿಶೇಲ್ ಉಭೆಂ ಜಾತಾನಾ, ರಾಯನಾನ್ ಆಪ್ಲ್ಯಾ ಬಾವ್ಳ್ಯಾಂಕ್ ಮಿಶೇಲಾಚಾ ಪೆಂಕ್ಡಾ ಭೊಂವಾರಿ ವಿಸ್ತಾರಾವ್ನ್ ಮಿಶೇಲಾಕ್ ಘಟ್ ಧರ್ಲ್ಲೆಂಚ್ ತಶೆಂಚ್ ತಾಣೆಂ ತಾಕಾ ಉಕೊಲ್ಲೆಂ.
"ರಾ.....ಯನ್......?"
ಅಚಾನಕ್ ಜಾಲ್ಲ್ಯಾ ರಾಯನಾಚಾ ವರ್ತನಾ ಥಾವ್ನ್ ಆಪ್ಲ್ಯಾ ಘೊವಾಕ್ ಕಿತೆಂ ಜಾಲಾಂ ತೆಂ ಮಿಶೇಲಾಕ್ ಸಮ್ಜಾಲೆಂ ನಾ.
ಮಿಶೆಲಾಕ್ ತಶೆಂಚ್ ಆಪ್ಲ್ಯಾ ಹಾತಾಂನಿ ಉಕ್ಲುನ್ ಧರುನ್ ಹಾಸ್ತ್ಯಾ ಮುಖಮಳಾನ್ ತೊ ಮಿಶೇಲಾಕ್ಚ್ ಪಳಂವ್ಚ್ಯಾರ್ ಪಡ್ಲೊ.
"ರಾಯನ್!" ಮಿಶೇಲ್ ಜ್ಯೋರಾನ್ ಹಾಸ್ಲೆಂ.
ಆಪ್ಲ್ಯಾ ಬಾಯ್ಲೆನ್ ಇತ್ಲ್ಯಾ ಖುಶಾಲ್ಕಾಯೆನ್ ಹಾಸ್ಲ್ಲೆಂ ಹಾಚ್ಯಾ ಆದಿಂ ರಾಯನಾನ್ ಪಳಂವ್ಕ್ ನಾತ್ಲ್ಲೆಂ. ತಶೆಂಚ್ ರಾಯನಾನ್ ಇತ್ಲ್ಯಾ ಸಂತೊಸಾಂತ್ ಆಪ್ಣಾಕ್ ಆಶೆಂ ಉಕೊಲ್ಲ್ಲೆಂ ಮಿಶೇಲ್ ನೆಣಾಂ.
ಮಿಶೇಲಾಚಾ ತೊಂಡಾ ವಯ್ಲ್ಯಾ ಹ್ಯಾ ಹಾಸ್ಯಾಂಕ್ ಪಳೆತಾನಾ ಉದೆವ್ನ್ ಯೆಂವ್ಚ್ಯಾ ಫಾಂತ್ಯಾಚಾ ಸುರ್ಯಾಕ್ ಆನಿ ಹ್ಯಾ ಮಿಶೇಲಾಚಾ ತೊಂಡಾ ವಯ್ಲ್ಯಾ ಹಾಸ್ಯಾಂಕ್ ಕಾಂಯ್ಚ್ ವ್ಯತ್ಯಾಸ್ ನಾತ್ಲ್ಲೊ.
ಮಿಶೇಲಾನ್ ಆತಾಂ ಆಪ್ಲೆ ಹಾತ್ ಉಕ್ಲುನ್ ರಾಯನಾಚಾ ತಕ್ಲೆಕ್ ಧರ್ಲೆಂ.
"ಯು ಆರ್ ಗ್ರೇಟ್ ಮಿಶೇಲ್! ಯು ಆರ್ ಗ್ರೇಟ್!"
ಉದ್ಗಾರ್ಲ್ಲ್ಯಾ ರಾಯನಾನ್ ಮಿಶೇಲಾಕ್ ಸವ್ಕಾಸ್ ಸಕಯ್ಲ್ ದೆಂವಯ್ಲೆಂ.
ತಿತ್ಲ್ಯಾರ್!
ಮಿಶೇಲಾಚಾ ನಾಕಾಕ್ ಕಸಲೊಗೀ ಏಕ್ ದುಸ್ರೊಚ್ ಪರ್ಮಳ್ಚೊ ಆದಾಳ್ಳೊ.
ಆಜ್ ರಾಯನಾಚಾ ವಸ್ತುರಾ ಥಾವ್ನ್, ಎದೊಳ್ ಮಿಶೇಲಾನ್ ಹುಂಗುಂಕ್ ನಾತ್ಲ್ಲೊ, ಎದೊಳ್ ತಾಣೆಂ ಸೆಂವ್ಕ್ ನಾ ಮ್ಹಳ್ಳ್ಯಾ ತಸಲೊ ಏಕ್ ವಿಚಿತ್ರ್ ಪರ್ಮಳ್!
ರಾಯನಾನ್ ಆಪ್ಣಾ ಖಾತಿರ್ ಸದಾಂ ವಾಪಾರ್ಚೆಂ ಫರ್ಪ್ಯೂಮ್ ಕಸಲೆಂ ಮ್ಹಳ್ಳೆಂ ತೆಂ ಮಿಶೇಲ್ ಜಾಣಾಂ. ತ್ಯಾ ಪರ್ಮಳಾಕ್ ತೆಂ ರಾಯನಾಚಾ ಸವೆಂ ಪಾರ್ಕುನ್ ಜಾಣಾಂ. ಪುಣ್ ಆಜ್...? ಹ್ಯಾ ಘಡಿಯೆರ್?
"ಡಾರ್ಲಿಂಗ್ ಯು ಆರ್ ಸೋ ಲಕ್ಕಿ ಟು ಮಿ!"
ಮಿಶೆಲಾಕ್ ತಶೆಂಚ್ ಆಪ್ಲ್ಯಾ ಬಾವ್ಳ್ಯಾಂನಿ ಆರಾಯಿಲ್ಲೊ ರಾಯನ್ ಮುಕ್ಲ್ಯಾ ಸೋಫಾಚೆರ್ ಗಳ್ಳೊ.
"ಕಿತೆಂ ಜಾಲೆಂ ರಾಯನ್?"
ಅಚಾನಕ್ ರಾಯನಚಾ ವಸ್ತುರಾ ಥಾವ್ನ್ ಯೇವ್ನ್ ಆಪ್ಣಾಚ್ಯಾ ನಾಕಾಕ್ ಆದಳ್ಲ್ಲ್ಯಾ ತ್ಯಾ ಮಾದಕ್ ಪರ್ಮಳಾಕ್ ಚಿಂತ್ಚಿ ಮಿಶೇಲಾಚಿ ಮತ್ ತ್ಯಾ ತಾಚ್ಯಾ ಚಿಂತ್ನಾಂ ಥಾವ್ನ್ ಭಾಯ್ರ್ ಆಯ್ಲಿ. ತಾಕಾ ಆಪ್ಲ್ಯಾ ಘೊವಾಚೆಂ ಉದ್ರೇಕಿತ್ ವರ್ತನ್ ಏಕ್ ಸವಾಲ್ ಮ್ಹಳ್ಳ್ಯಾ ಪರಿಂ ಜಾಲ್ಲೆಂ. ಹ್ಯಾ ವರ್ತಾನಾಚೆಂ ಕಾರಾಣ್ ತೆಂ ಅಜೂನ್ ನೆಣಾಂ ಆಸ್ಲ್ಲೆಂ.
ಸಾಂಜೆರ್ ರಾಯನ್ ಆಪ್ಲೆಂ ಘರ್ ಭಾಯ್ರ್ ಸರೊನ್ ವೆತಾನಾ ಮಿಶೇಲ್ ಖಾಟಿಯೆರ್ ನಿದೆಚ್ಯಾ ಆಮಾಲಾರ್ ಆಸ್ಲ್ಲೆಂ. ತಶೆಂಯ್ ಮಿಶೇಲ್ ರಾಯನಾಚಾ ಕಸಲ್ಯಾಯ್ ಆಫಿಶಿಯಲ್ ವಿಶಯಾಂತ್ ಮೆತೆರ್ ಜಾಯ್ನಾತ್ಲ್ಲೆಂ. ತಾಕಾ ತಿ ಅಭಿರುಚಿ ನಾತ್ಲ್ಲಿ. ತಶೆಂಚ್ ಆಜ್! ಪುಣ್ ಆಪ್ಲ್ಯಾ ಘೊವಾಕ್ ತೆಂ ಆಪ್ಣಾ ಸಂಗಿಂ ಆಶೆತಾಲೆಂ.
"ತುಂ ಹಾಚ್ಯಾಕ್ಯ್ ಪಯ್ಲೆಂ ಮ್ಹಾಕಾ ಕಿತ್ಯಾಕ್ ಮೆಳೊಂಕ್ ನಾಂಯ್ ಡಾರ್ಲಿಂಗ್.....?" ಸೋಫಾರ್ ಬಸ್ಲೆಲ್ಯಾ ರಾಯನಾನ್ ಮಿಶೆಲಾಚಾ ಖಾಂದಾರ್ ಹಾತ್ ಘಾಲೊ. ತಶೆಂಚ್ ಮಿಶೇಲಾಕ್ ವೊಡುನ್ ಆಪ್ಲ್ಯಾ ಉಸ್ಕ್ಯಾರ್ ಉದಾರೆಂ ಕೆಲೆಂ ತಾಣೆಂ.
"ತುಂ ಆಸಾ ಪಳೆ ಮಿಶೇಲ್!" ರಾಯನ್ ಮಿಶೇಲಾಚ್ಯಾ ದೊಳ್ಯಾಂಕ್ಚ್ ಪಳೆತಾಲೊ. "ತುಂ ಮ್ಹಜೆಂ ನಶೀಬ್! ....... ಸತ್ತ್...!"
ರಾಯನ್ ಮಿಶೇಲಾಚಾ ದೊಳ್ಯಾಂಕ್ಚ್ ಪಳೆತಾಲೊ. ತಾಕಾ ಆಜ್ ಮಿಶೇಲಾ ಶಿವಾಯ್ ದುಸ್ರೆಂ ಕಾಂಯ್ಚ್ ದಿಸಾನಾತ್ಲ್ಲೆಂ. ತಾಚ್ಯಾ ಮತಿಚ್ಯಾ ಕೊನ್ಶ್ಯಾ ಕೊನ್ಶ್ಯಾಂನಿ ತಾಕಾ ಮಿಶೇಲ್ಚ್ ದಿಸ್ತಾಲೆಂ.
"ಸತ್ತ್.....?" ರಾಯನಾಚಿಂ ಉತ್ರಾಂ ಆಯ್ಕೊನ್ ಮಿಶೇಲ್ ಆಪ್ಣಾಕ್ಚ್ ವಿಸ್ರಾಲೆಂ.
"ದೆಕುನ್ಚ್ ತುಕಾ ಹಾವೆಂ ವಿಚಾರ್ಲ್ಲೆಂ ತುಂ ಮ್ಹಾಕಾ ಹಾಚ್ಯಾ ಪಯ್ಲೆಂ ಕಿತ್ಯಾಕ್ ಮೆಳೊಂಕ್ ನಾಂಯ್.....?"
"ತುಂ ಮುಂಬಯಿ ಆಸ್ತಾನಾ ಹಾಂವೆಂ ತುಕಾ ಕಶೆಂ ಮೆಳ್ಚೆಂ.....?"
ಮಿಶೇಲಾನ್ ಆಪ್ಲ್ಯಾ ನದ್ರೆಕ್ ರಾಯನಾಚಾ ನದ್ರೆ ಥಾವ್ನ್ ಪಾಟಿಂ ಕಾಡ್ಲೆಂ. ತಾಚ್ಯಾ ವೊಂಟಾರ್ ತ್ಯೊ ಮಂದ್ ಹಾಸೊ ಅಜೂನ್ ಖೆಳ್ತಾಲ್ಯೊ.
ನೆಣ್ತ್ಯಾ ಭುರ್ಗ್ಯಾನ್ ಸವಾಲ್ ಕೆಲ್ಲ್ಯಾ ಪರಿಂ ಆಪ್ಲ್ಯಾ ಬಾಯ್ಲೆನ್ ಕೆಲ್ಲ್ಯಾ ಸವಾಲಾಕ್ ಆಯ್ಕೊನ್ ಮಿಶೇಲಾಚಾ ನೆಣಾರ್ಪಣಾ ಥಂಯ್ ತೊ ಮೆಚ್ವಾಲೊ.
ತಿತ್ಲ್ಯಾರ್!
ರಾಯನ್ ಆಪ್ಲ್ಯಾ ಮತಿಂತ್ ಕಿತೆಂಗೀ ಚಿಂತ್ಲೆಲ್ಯಾ ಪರಿಂ ಜಾವ್ನ್, ಮಿಶೇಲಾಚಾ ತಕ್ಲೆಕ್ ಧರುನ್ ಮಿಶೆಲಾಕ್ ಆಪ್ಲ್ಯಾ ಉಸ್ಕ್ಯಾರ್ ಥಾವ್ನ್ ತಾಣೆಂ ಉಟಯ್ಲೆಂ.
"ಮಿಶೇಲ್ ಊಟ್....!"
ಆಪುಣ್ ಸೋಫಾ ವಯ್ಲೊ ಉಟೊನ್ ಉಭೊ ಜಾತಾನಾ ಮಿಶೇಲಾಕ್ಯ್ ರಾಯನಾನ್ ಆಪ್ಲ್ಯಾ ಹಾತಾನ್ ಧರುನ್ ಉಟಯ್ಲೆಂ.
"ಆಜ್ ಆಮಿಂ ಜೆವ್ಣಾಕ್ ಭಾಯ್ರ್ ಯಾ! ಗೆಟ್ ರೆಡಿ ಫಾರ್ ಎ ಡಿನ್ನರ್!
"ಕ್ಯಾಂಡಲ್ ಲೈಟ್ ಡಿನ್ನರ್!"
ಆಯ್ಚಾ ಆಪ್ಲ್ಯಾ ಘೊವಾಚ್ಯಾ ಸಂತೊಸಾಚೆಂ ಕಾರಾಣ್ ಮಿಶೇಲಾಕ್ ಕಳ್ಳೆಂಚ್ ನಾ. ಹ್ಯಾ ವಿಶಿಂ ಜಾಣಾಂ ಜಾಂವ್ಕ್ ತೆಂ ಆಶೆಲೆಂ ನಾ.
*************
ಬಾಲಿವುಡಾ ಭಿತರ್ಲ್ಯಾ ಚಕಾಮುಕಿಂತ್ ರಾಯನಾಕ್ ಕರೋಡಾಗಟ್ಲ್ಯಾನ್ ಲುಕ್ಸಾಣ್ ಜಾತಾ ತೆಂ ಸಾಂವಂತ್ ಆನಿ ಅಮೃತಾ ದೊಗಾಂಯ್ ಜಾಣಾಂ ಆಸ್ಲ್ಲಿಂ. ಸಾವಂತ್ ಹ್ಯಾ ಲುಕ್ಸಾಣೆ ಥಾವ್ನ್ ರಾಯನಾಕ್ ವಾಂಚಂವ್ಕ್ ಪಳೆತಾಲೊ. ತಾಕಾ ತಾಚ್ಯಾ ಫುಡಾರಾಚಿ ಖಂತ್ ಆಸ್ಲ್ಲಿ. ತೊ ಬಾಲಿವುಡಾಂತ್ಲೊ ನಾಂವಾಡ್ದೀಕ್ ಡೈರೆಕ್ಟರ್ ನ್ಹಯ್ ತರ್ಯ್ ಆಪ್ಲ್ಯಾ ಪ್ರಯತ್ನಾಚೆಂ ಪಯ್ಲೆಂ ಫಿಲ್ಮ್ಚ್ ಬಾಲಿವುಡಾಂತ್ ಗೋತಾ ಮಾರುನ್ ಸಗ್ಳೆ ಪ್ರೊಡ್ಯೂಸರ್ಸ್ ಸಾವಂತಾಕ್ ವಿಸ್ರೊಂಚಾ ವಗ್ತಾರ್ ಸಾವಂತಾಕ್ ಸಾಂಗಾತ್ ದಿಲ್ಲೊ ಮ್ಹಳ್ಯಾರ್ ರಾಯನಾನ್ ಮಾತ್ರ್!.
’ಅಮೃತಾ ಗಾಯಕ್ವಾಡ್!’
ಅಡೇಜ್ ವರ್ಸಾಂ ಪಯ್ಲೆಂ ಅಮೃತಾ ಗಾಯಕ್ವಾಡಾಕ್ ಬಾಲಿವುಡಾಂತ್ ಸಾವಂತಾನ್ ಪಯ್ಲಿ ಬ್ರೇಕ್ ದಿಲ್ಲಿ. ಥಂಯ್ ಹಾಂಗಾ ಮ್ಹಣೊನ್ ಮಾರ್ ಖಾವ್ನ್ ಆಸ್ಲ್ಲೆಂ ಅಮೃತಾ ಸಿಲ್ವರ್ ಸ್ಕ್ರೀನಾಚೆರ್ ದಾಕ್ಟ್ಯಾ ದಾಕ್ಟ್ಯಾ ಪಾತ್ರಾಂನಿ ದಿಸೊನ್ ಯೆವ್ನ್ ಆಸ್ತಾಸ್ತನಾ ರಾಯನಾಚಾ ಫಿಲ್ಮಾಂತ್ ಸಾವಂತಾನ್ ತಾಕಾ ಪಯ್ಲೆ ಪಾವ್ಟಿಂ ಹಿರೋಯಿನ್ ಜಾವ್ನ್ ಸೈನ್ ಕೆಲ್ಲೆಂ.
ದೊಗಾಂಯ್ಕ್ಯ್ ಹ್ಯಾ ಫಿಲ್ಮಾ ಥಾವ್ನ್ ನವಿ ಇಮೇಜ್ ಆಯಿಲ್ಲಿ.
ಎಕಾ ಲೋ ಬಜೆಟಿಚ್ಯಾ ಫಿಲ್ಮಾ ಥಾವ್ನ್ ಹೈ ಕ್ರೆಡಿಟ್ ಜೊಡ್ಚ್ಯಾ ತತ್ವಾಂಕ್ ಸಾವಂತಾಚಾ ಮುಕಾರ್ ರಾಯನಾನ್ ಪಸ್ತುತ್ ಕೆಲ್ಲೆ. ಹಾಚೊ ಪ್ರತಿಫಳ್ ಜಾವ್ನ್ ರಾಯನಾಕ್ ಕಾಂಯ್ ಫಾಯ್ದೊ ನಾತ್ಲ್ಲೊ. ತೆಂಯ್ ಸಾವಂತ್ ಆನಿ ಅಮೃತಾ....? ಫಿಲ್ಮಾಚ್ಯಾ ಪಯ್ಲ್ಯಾ ಉಗ್ತಾವಣಾಂತ್ ಥೊಡೆಂ ಥೊಡೆಂ ಚಲ್ಲ್ಲೆಂ ಫಿಲ್ಮ್ ದುಸ್ರ್ಯಾ ಹಪ್ತ್ಯಾಂತ್ ಥಾವ್ನ್ ವೀಕ್ಷಕಾಂಕ್ ವೊಡುನ್ ಹಾಡ್ಚ್ಯಾಂತ್ ಸುಫಳ್ ಜಾಲ್ಲೆಂ. ಹಾಂಗಾ ಥಾವ್ನ್ಚ್ ಸಾವಂತ್ ಆನಿ ಅಮೃತಾ ಲೊಕಾಕ್ ಪರಿಚಿತ್ ಜಾಲ್ಲಿಂ.
ಲೋ ಬಜೆಟ್ ಫಿಲ್ಮ್ ಬಾಕ್ಸ್ ಆಫೀಸಾಂತ್ ಹಿಟ್ ಜಾಲೆಂ ಜಾಲ್ಯಾರ್ ತಾಚ್ಯೆ ಥಾವ್ನ್ ಆಪ್ಣಾಕ್ ಕಾಂಯ್ ಫಾಯ್ದೊ ನಾಂ ತೆಂ ರಾಯನ್ ಜಾಣಾಂ. ಪುಣ್ ತಾಕಾ ಫುಡಾರಾಚಿ ಖಂತ್ ಅಸ್ಲ್ಲಿ.
ಹ್ಯಾ ಖಂತಿಕ್ ಮುಖ್ಯ್ ಕಾರಾಣ್ಚ್ ಹೆಂ ಕೀ ಹಾಚ್ಯಾ ಪಾಟ್ಲಿಂ ತಾಣೆಂ ಪಯ್ಶೆ ವೊತ್ಲ್ಲಿಂ ದೋನ್ ಫಿಲ್ಮಾಂ ನಾಂವಾಡ್ದೀಕ್ ಹೀರೊ ಆನಿ ಹೀರೊಯಿನ್ ಆಸೊನ್ಯ್ ಬಾಕ್ಸ್ ಅಫೀಸಾಂತ್ ಬುಡ್ಲ್ಲಿಂ. ತಾಣೆಂ ಇನ್ವೆಸ್ಟ್ ಕೆಲ್ಲೆ ಪಯ್ಶೆ ತಾಕಾ ಪಾಟಿಂ ಆಯಿಲ್ಲೆ ಜಾಲ್ಯಾರ್ಯ್ ತ್ಯಾ ಪಯ್ಶ್ಯಾಂನಿ ತಾಣೆಂ ಆಶೆಲ್ಲ್ಯಾ ತಿತ್ಲೆಂ ವಜನ್ ನಾತ್ಲ್ಲೆಂ. ಹ್ಯಾ ಶಿವಾಯ್ ಫುಡಾರಾಕ್ ತಾಚ್ಯಾ ಬ್ಯಾನರಾ ಪಾಟ್ಲ್ಯಾನ್ ’ಪ್ಲಾಪ್’ ಮ್ಹಳ್ಳೊ ಬಿಲ್ಲೊ ನ್ಹೆಸೊನ್ ತಯಾರ್ ರಾವ್ಲ್ಲೊ.
ಹ್ಯಾ ಖಾತಿರ್ ರಾಯನಾನ್ ಕೆಲ್ಲೊ ಉಪಾಯ್ ಎಕ್ಚ್!
ಲೋ ಬಜೆಟಿಚೆರ್ ನವ್ಯಾಂ ಕಲಾಕಾರಾಂಕ್ ವಿಂಚುನ್ ಹೈ ಕ್ರೆಡಿಟ್ ಜೊಡ್ಚೆಂ!
ಫಿಲ್ಮ್ ಚಲ್ಲೆಂ. ರಾತ್ ಬುಡುನ್ ದೀಸ್ ಉದೆಂವ್ಚಾ ಭಿತರ್ ಸಾವಂತ್ ಆನಿ ಅಮೃತಾಚೆಂ ನಾಂವ್ ಸಗ್ಳ್ಯಾ ಲೊಕಾಚ್ಯಾ ಜಿಬೆರ್ ಘಾಜೊಂಕ್ ಲಾಗ್ಲೆಂ.
ಪಾಟಿಂ ಆಪ್ಲ್ಯಾ ಗಾಂವಾಕ್ ಪೊಟ್ಲಿ ಬಾಂದ್ಚೊ ಸಾವಂತ್ ತ್ಯಾ ವರ್ಸಾಚೊ ಬೆಸ್ಟ್ ಡೈರೆಕ್ಟರ್!
ಆಮಾಸೆಚಾ ರಾತಿಕ್ ಮಾತ್ರ್ ದಿಶ್ಟಿಕ್ ಪಡ್ಚೆಂ ಅಮೃತಾ ಎಕಾಚ್ ದಿಸಾ ಭಿತರ್ ಬೆಸ್ಟ್ ಆಕ್ಟ್ರೆಸ್!
ರಾಯನಾನ್ ಹ್ಯಾ ಫಿಲ್ಮಾ ಥಾವ್ನ್ ಏಕ್ ಆವಾರ್ಡ್ ಮಾತ್ರ್ ಜಿಕ್ಲೊ ಶಿವಾಯ್ ತಾಣೆಂ ಆಶೆಲ್ಲೆಂ ತಾಕಾ ಲಾಭೊಂಕ್ ನಾತ್ಲ್ಲೆಂ!
ಆಪ್ಣೆಂ ಆಶೆಲ್ಲೆಂ ಆಪ್ಣಾಚಾ ಮುಕ್ಲ್ಯಾ ಪ್ರಾಜೆಕ್ಟಾಂತ್ ಜೊಡುಂಕ್ ರಾಯನ್ ಚಿಂತಾಲೊ. ಹ್ಯಾ ಹಿಟ್ ಜಾಲ್ಲ್ಯಾ ಫಿಲ್ಮಾಚಾ ಆಧಾರಾರ್ ಮುಕ್ಲ್ಯಾ ಫಿಲ್ಮಾ ಥಾವ್ನ್ ಜಾತಾ ತಿತ್ಲೆಂ ಜೊಡ್ಚಿ!
ರಾಯನ್ ಪಕ್ಕಾ ಬಿಜ್ನೆಸ್ಮ್ಯಾನ್! ಖಂಯ್ಚಾ ವಾಟೆನ್ ಕಶೆಂ ಜಯ್ತ್ ಜೊಡ್ಯೆತ್ ತೆಂ ತೊ ಜಾಣಾಂ ಆಸ್ಲ್ಲೊ.
ಮುಕ್ಲ್ಯಾ ಫಿಲ್ಮಾಕ್ ರಾಯನಾನ್ ಹೈಯಸ್ಟ್ ಪಬ್ಲಿಸಿಟಿ ದಿವಯ್ಲಿ. ಫಿಲ್ಮ್ಯ್ ಹಿಟ್ ಜಾಲೆಂ. ಹಾಚೆ ಸಾಂಗಾತಾ ಸಾವಂತ್ ಆನಿ ಅಮೃತಾ ಬಾಲಿವುಡಾಕ್ ಸಾಸ್ಣಾಕ್ ಘಟ್ ಜಾಲಿಂ.
ಬಿಜ್ನೆಸಾಂತ್ ರಾಯನ್ ಕೆದ್ನಾಂಯ್ ಸಿಂತಿಮೆಂತಾಂಕ್ ಮಧೆಂ ಹಾಡಿನಾ. ಹೊ ತಾಚೊ ಜಲ್ಮಾಗೂಣ್!
ತಶೆಂಚ್ ಆಜ್!
ಆಮೃತಾ ಆಪ್ಣಾ ಸವೆಂ ಆಶೆಂ ಕಿತ್ಯಾಕ್ ಕರ್ತಾ ಮ್ಹಳ್ಳೆಂ ತೆ ರಾಯನ್ ಪುರ್ತೆಂ ನೆಣಾಂ ಆಸ್ಲ್ಲೊ. ತಾಕಾ ಫಕತ್ತ್ ಸಾವಂತಾ ಥಾವ್ನ್ ಖಬಾರ್ ಮಾತ್ರ್ ಲಾಭ್ಲ್ಲಿ ಸೊಡ್ಲ್ಯಾರ್ ತ್ಯಾ ಖಬ್ರೆಕ್ ಪುಷ್ಟಿ ಕರುಂಕ್ ಕಾಂಯ್ ಆಧಾರ್ ನಾತ್ಲ್ಲೊ. ಪುಣ್ ಆಪ್ಣಾ ವಿರೋಧ್ ಆಪ್ಣಾ ಪಾಟ್ಲ್ಯಾನ್ ಕಾಂಯ್ ತರ್ಯ್ ಘುಟ್ಮಳ್ ಚಲ್ತಾ ಮ್ಹಣೊನ್ ತೊ ಜಾಣಾಂ ಆಸ್ಲ್ಲೊ. ಹ್ಯಾ ಪರಿಸ್ಥಿತೆಂತ್ ಆಪುಣ್ ಶಿರ್ಕೊನ್ ಉರ್ಚ್ಯಾಕ್ಯ್ ಆಪ್ಣೆ ಭಾಯ್ರ್ ವಚೊನ್, ಜಾಲ್ಲ್ಯಾ ಲುಕ್ಸಾಣೆಕ್ ಭರುನ್ ಘೆಂವ್ಚೆಚ್ ಚಡ್ ಬರೆಂ ಮ್ಹಣೊನ್ ತಾಣೆಂ ಚಿಂತ್ಲ್ಲೆಂ.
ಹ್ಯಾಚ್ ಖಾತಿರ್ ರಾಯನಾನ್ ಹೊ ನಿರ್ಧಾರ್ ಘೆತ್ಲ್ಲೊ!
ಪುಣ್ ಆಜ್ ಹೊ ನಿರ್ಧಾರ್ ತಾಣೆಂ ಆಲಿಯಾ ವಯ್ಲ್ಯಾ ಧಯ್ರಾನ್ ಘೆತ್ಲ್ಲೊ!
ಆಲಿಯಾನ್ಯ್ ಆಯಿನ್ನ್ ವೆಳಾರ್ ಪ್ರವೇಶ್ ಕೆಲ್ಲೊ!
ದೋನ್ ದಿಸಾಂನಿ ಆಲಿಯಾಚ್ಯಾ ವಸ್ತೆ ಖಾತಿರ್ ಆಪ್ಣಾಚೆಂ ಬಾಂದ್ರಾಂತ್ಲೆಂ ಪ್ಲ್ಯಾಟ್ ರಾಯನಾನ್ ಸ್ಮಿತಾಕ್ ಸಾಂಗೊನ್ ತಯಾರ್ ಕರಯ್ಲೆಂ. ಹಾಚ್ಯೆ ಸವೆಂ ಆಲಿಯಾ ಹೊಟೆಲಾ ಥಾವ್ನ್ ಬಾಂದ್ರಾ ’ಬ್ರಂದಾವನ’ ಕ್ ವಸ್ತೆಕ್ ಗೆಲೆಂ.
ಪರ್ತ್ಯಾಕ್ ಲೋ ಬಜೆಟ್ ಫಿಲ್ಮ್!
ರಾಯನಾನ್ ಸಾವಂತಾಕ್ ಆರ್ಡರ್ ದಿಲ್ಲೆಂ!
ಪುಣ್ ಹ್ಯಾ ಪಾವ್ಟಿಂ ರಾಯನಾಚೊ ಉದ್ದೇಶ್ ಫಕತ್ತ್ ಲುಕ್ಸಾಣ್ ಭರುನ್ ಕಾಡ್ಚೊ ಮಾತ್ರ್ ನ್ಹಯ್ ಆಸ್ಲ್ಲೊ. ಅಮೃತಾಕ್ ಸಾಸ್ಣಾಕ್ ಬಾಲಿವುಡಾ ಥಾವ್ನ್ ತಾಣೆಂ ಭಾಯ್ರ್ ಧಾಂವ್ಡಾಂವ್ಕ್ ಚಿಂತ್ಲ್ಲೆಂ! ಆಪ್ಣಾ ವಿರೋಧ್ ಉಟ್ಲ್ಲ್ಯಾಂಕ್ ಭೊಗ್ಸುಂಚೊ ಸ್ವಭಾವ್ ರಾಯನಾ ಲಾಗಿಂ ಭಿಲ್ಕುಲ್ ನಾತ್ಲ್ಲೊ!
ಹ್ಯಾ ಪಾವ್ಟಿಂ ಸಾವಂತಾಚಾ ಮುಕಾರ್ ವ್ಹಡ್ಲಿ ಜವಾಬ್ದಾರಿ ಆಸ್ಲ್ಲಿ. ಆಜ್ ತಾಚೆಂ ಫಿಲ್ಮ್ಯ್ ಹಿಟ್ ಜಾಂವ್ಕ್ ಜಾಯ್! ರಾಯನಾಕ್ ಲುಕ್ಸಾಣ್ ಜಾಲ್ಲೆ ಪಯ್ಶೆಯ್ ಯೇಂವ್ಕ್ ಜಾಯ್! ತ್ಯಾ ಭಾಯ್ರ್.... ಅಮೃತಾ ವಯ್ಲೆಂ ರಾಯನಾಚೆಂ ಫಾರಿಕ್ಪಣ್ಯ್ ಜಿಕೊಂಕ್ ಜಾಯ್!
ಹೆಂ ಸಗ್ಳೆ ಸಾದ್ಯ್ ಜಾಂವ್ಕ್ ಜಾಯ್ ಜಾಲ್ಯಾರ್ ಫಿಲ್ಮ್ ಶೆಂಬರ್ ಠಕ್ಕೆ ಬಾಕ್ಸ್ ಆಫೀಸಾಂತ್ ಚಲೊಂಕ್ ಜಾಯ್. ಫಿಲ್ಮ್ ಜರ್ ಚಲ್ಲೆಂ ನಾ...?
"ಫಿಲ್ಮಾಚಿ ಕಾಣಿ ಬದ್ಲಿ ಕರ್ ಸಾವಂತ್!"
ರಾಯನಾನ್ ಸೂಚನ್ ದಿಲ್ಲೆಂ. ಥೊಡೆ ದೀಸ್ ಗೆಲ್ಯಾರ್ಯ್ ರಾಯನಾಕ್ ಪರ್ವಾ ನಾತ್ಲ್ಲಿ. ಪುಣ್ ಆಪ್ಲೆಂ ಹಟ್ಟ್ ಮಾತ್ರ್ ಜಿಕೊಂಕ್ ಜಾಯ್ ಮ್ಹಳ್ಳೆಂ ತೊ ಆಶೆತಾಲೊ.
ಸಾವಂತ್ ಆತಾಂ ಕಾಣಿ ಸೊಧುನ್ ಭೊಂವ್ಲೊ.
ಇಮ್ತಿಯಾಜ್ ಆಲಿಚಿ ಏಕ್ ಕಾಣಿ ತಾಕಾ ಮಸ್ತ್ ಪಸಂದ್ ಜಾಲಿ. ಫಕತ್ತ್ ಥೊಡೆಂ ಗ್ಲ್ಯಾಮರ್ ಆನಿ ಸಂಗೀತ್ ಲಾಗಿಂ ಹಾಡ್ಲ್ಯಾರ್ ಜಾಲೆಂ....!
ಆತಾಂ ಜಾಯ್ ಆಸ್ಲ್ಲೆಂ ಸಂಭಾಶಣ್! ಜಹಾಂಗೀರ್ ಹ್ಯಾ ದಿಸಾಂನಿ ಬಿಜಿ ಆಸ್ಲ್ಲೊ ಜಾಲ್ಯಾರ್ಯ್ ಜಾತಾ ತಿತ್ಲ್ಯಾ ವೆಗ್ಗಿಂ ಬರವ್ನ್ ದಿತಾಂ ಮ್ಹಣೊನ್ ತಾಣೆ ಭಾಸಾಯ್ಲೆಂ. ಸಾವಂತ್ ಆತಾಂ ತಾಚ್ಯಾ ಮುಕ್ಲ್ಯಾ ಕಾಮಾಂನಿ ಮಗ್ನ್ ಜಾಲೊ.
************
ಆಯ್ಚ್ಯಾ ದಿಸಾ ಆಲಿಯಾ ಸಗ್ಳೆಂಚ್ ಖುಶ್ ಆಸ್ಲ್ಲೆಂ. ತಾಣೆಂ ಆಶೆವ್ನ್ ಆಯಿಲ್ಲ್ಯಾ ವಾಟೆಕ್ ಪಾಂಯ್ ತೆಂಕುಂಕ್ ತಾಕಾ ಆನಿ ಫಕತ್ತ್ ಏಕ್ ದೀಸ್ ಆಸ್ಲ್ಲೊ. ಫಕತ್ತ್ ಏಕ್ ದೀಸ್! ಹ್ಯಾ ದಿಸಾ ಖಾತಿರ್ ಆಶೆವ್ನ್ ಆಲಿಯಾನ್ ತಾಚ್ಯಾ ಜಿವಿತಾಂತ್ಲ್ಯಾ ದೋನ್ ಮಹಿನ್ಯಾಂಕ್ ತಾಚ್ಯಾ ಪ್ಲ್ಯಾಟಾಚಾ ಹ್ಯಾ ಬಾಲ್ಕನಿಚೆರ್ ಬಸೊನ್ ತಾಣೆಂ ಸಾರ್ಲ್ಯಾತ್. ಹ್ಯಾಚ್ ಎಕಾ ದಿಸಾಕ್ ಪಳಂವ್ಕ್ ತಾಣೆಂ ಕಿತೆಂ ಸಗ್ಳೆಂ ಕರುಂಕ್ ನಾ? ಹ್ಯಾಚ್ ಫಾಲ್ಯಾಂಚಾ ದಿಸಾ ಖಾತಿರ್!
ಫಾಲ್ಯಾಂಚಾ ದಿಸಾ ಆಲಿಯಾ ತ್ಯಾ ಬಾಲಿವುಡಾಂತ್ ಆಪ್ಲೆಂ ಪಯ್ಲೆಂ ಮೇಟ್ ದವರ್ತೆಲೆಂ ಆನಿ ತೆಂ ಎಕೇಕ್ಚ್ ಮೇಟ್ ಕಾಡುನ್ ಮುಕಾರ್ ವೆತೆಲೆಂ.
ಎಕೇಕ್ಚ್ ಮೇಟ್!
ಹ್ಯಾ ಧರ್ತೆ ಥಾವ್ನ್ ತ್ಯಾ ಮೊಳಾಬಾಕ್!
ಹ್ಯಾ ಪ್ಲ್ಯಾಟಾ ಥಾವ್ನ್ ತ್ಯಾ ತಾರಾಂಕ್!
ಅಪುಣ್ ತ್ಯಾ ಮೊಳಾಬಾರ್ ಉಭೊಂಕ್ ಸಕಾನಾ ತರ್ಯ್ ತ್ಯಾ ಮೊಳಾಬಾ ವಯ್ಲೆಂ ಉಜ್ವಳ್ಚೆಂ ನೆಕೆತ್ರ್ ಜಾವ್ನ್ ಸೊಭ್ತೆಲಿಂ. ನಿಮಾಣೆ ತರ್ಯ್ ಆಪ್ಣಾಚಿ ಆಶಾ ಸುಫಳ್ ಜಾತಾ! ಆಪುಣ್ ಹ್ಯಾಚ್ ಧರ್ತೆರ್ ರಾವೊನ್ಯ್ ಆಪ್ಣಾಚಾ ನಾಂವಾಕ್ ತ್ಯಾ ಮೊಳಾಬಾ ವಯ್ಲ್ಯಾ ತಾಂರಾಚೆರ್ ಖಂಚವ್ಕ್ ಪಾವ್ತೆಲಿಂ!
ಆಲಿಯಾ ಆಪ್ಲ್ಯಾ ಪ್ಲ್ಯಾಟಾಚ್ಯಾ ಬಾಲ್ಕನಿಂತ್ ಬಸೊನ್ ಆಪ್ಣಾ ತಿತ್ಲ್ಯಾಕ್ ನಿಯಾಳ್ತಾಲೆಂ. ತಾಕಾ ಮೆಳೊಂಕ್ ಆಯಿಲ್ಲೊ ರಾಯನ್ ಯೆದೊಳ್ಚ್ ತಾಚ್ಯಾ ಆಫೀಸಾಕ್ ಪಾಟಿಂ ಗೆಲ್ಲೊ. ಆತಾಂ ಆಲಿಯಾ ಎಕ್ಸುರೆಂ. ಫಾಲ್ಯಾಂಚಾ ದಿಸಾ ಪಾಸೊನ್ ತೆಂ ಎಕ್ಸುರೆಂ!
ಏಕ್ ಚಲಿ ಜಾವ್ನ್ ಜಲ್ಮೊನ್ ಆಪ್ಲೆಂ ಆಸ್ಥಿತ್ವ್ ಉರಂವ್ಕ್ ಪೆಚಾಡ್ಚ್ಯಾ ಝುಜಾಂತ್ ಆಲಿಯಾ ಹರ್ಯೆಕ್ ವಾಟಾಂನಿ ಚಲ್ಯಾಚಾ ಮುಕಾರ್ ಸಲ್ವಾಲ್ಲೆಂ! ಪುಣ್ ಸಲ್ವಣಿ ಮಾಂದುನ್ ಘೆಂವ್ಕ್ ತೆಂ ಭಿಲ್ಕುಲ್ ತಯಾರ್ ನಾತ್ಲ್ಲೆಂ. ತ್ಯಾ ತಾಚ್ಯಾ ಸಲ್ವಣೆಕ್ ತಾಣೆಂ ಆಪ್ಣಾಚೆಂ ಜಯ್ತ್ ಮ್ಹಣೊನ್ ಮಾಂದ್ಲ್ಲೆಂ
ಜರ್ತರ್ ತ್ಯಾ ದಿಸಾಂನಿ ಏವಿಯೇಶನ್ ಕ್ಯಾಂಪಸಾಂತ್ ಕ್ಯಾಪ್ಟನ್ ರಾಣಾ ಮುಖಾರ್ ತೆಂ ಖಾಲ್ತೆಂ ಜಾಲ್ಲೆಂ ಜಾಲ್ಯಾರ್ ಆಲಿಯಾಚೆಂ ಜಿವಿತ್ಚ್ ಆಜ್ ದುಸ್ರೆಂ ಆಸ್ತೆಂ!
ಪಯ್ಲೆಂ ಆಯಿಲ್ಲೊ ಸಮೀರ್. ಸಮೀರಾಚಾ ಉತ್ರಾಂ ವಯ್ರ್ ಆಲಿಯಾನ್ ಭರ್ವಸೊ ದವರ್ಲ್ಲೊ ಜಾಲ್ಯಾರ್ ಆಲಿಯಾ ಆಜ್ ಹ್ಯ್ಯಾ ದೇಶಾ ಥಾವ್ನ್ಚ್ ಚಡ್ ಪಯ್ಸ್ ಆಸ್ತೆಂ. ಆಜ್ ತೆಂ ಏಕ್ ದಾಕ್ತೆರ್ ಜಾವ್ನ್ ಆಸ್ತೆಂ!
ತ್ಯಾ ಉಪ್ರಾಂತ್ ಆಯಿಲ್ಲೊ ಕ್ಯಾಪ್ಟನ್ ರಾಣಾ! ಏಕ್ ಪೈಲೆಟ್ ಜಾಂವ್ಕ್ ಆಸ್ಲ್ಲೆಂ ಆಲಿಯಾ, ಕ್ಯಾಪ್ಟನ್ ರಾಣಾ ಥಾವ್ನ್ ಏಕ್ ಏರ್ಹೊಸ್ಟೆಸ್ ಜಾಲ್ಲೆಂ!
ತ್ಯಾ ಉಪ್ರಾಂತ್ ಆಯಿಲ್ಲೊ ನಾಸಿರ್! ಆಪ್ಣೆ ನಿಖಾ ಜಾಲ್ಲೊ ಘೊವ್! ಆವಯ್ ಬಾಪಾಯ್ಕ್ ಪೊಟ್ಲುನ್ ಧರುನ್ ಬಾಯ್ಲೆಕ್ ಕುಜ್ನಾಂತ್ ವಾವ್ರುಂಕ್ ಲಾಂವ್ಚ್ಯಾ ತಾಚ್ಯಾ ಉದ್ದೇಶಾ ಮುಕಾರ್ ಆಲಿಯಾ ಸಗ್ಳ್ಯಾ ತಾಚ್ಯಾ ಕುಟ್ಮಾಚ್ಯಾಂಕ್ ಏಕ್ ಕಾಂಟೊ ಮ್ಹಳ್ಳ್ಯಾಪರಿ ಜಾಲೆಂ!
ತ್ಯಾ ಉಪ್ರಾಂತ್! ಕಾಂಟೊ ಜಾವ್ನ್ಯ್ ಆಲಿಯಾನ್ ಆಪ್ಲೆಂ ಜಿವಿತ್ ಜಿಯೆಂವ್ಚ್ಯಾ ಧಯ್ರಾಕ್ ಸಾಂಡುಂಕ್ ನಾತ್ಲ್ಲೆಂ. ತೆಂ ಕಶೆಂ ತರೀ ಜಿಯೆಂವ್ಕ್ ಸಕ್ತೆಂ. ಪುಣ್ ಪರ್ತ್ಯಾಕ್ ತಾಚ್ಯಾ ಜಿವಿತಾಂತ್ ಆಯ್ಲಿ ತಿಚ್ಚ್ ಚಲ್ಯಾಚಿ ಘಮಂಡಿ ಜಾತ್! ಇಕ್ಬಾಲ್ ಭಾಯಿಚೊ ಭಾವ್ ರಾಶಿದ್!
ರಾಶಿದಾನ್ ಆಲಿಯಾಚಾ ಜಿವಿತಾಂತ್ ವಾದಾಳ್ಚ್ ಹಾಡ್ಲೆಂ!
ಅಮೀನಾ ನಾಸಿರಾಕ್ ಲಾಗಿಂ ಜಾಲೆಂ ಆನಿಂ ಆಲಿಯಾಚೆಂ ತಲಾಖ್!
ಜಿವಿತಾನ್ ಇತ್ಲ್ಯಾರ್ಚ್ ವಿಶೆವ್ ಘೆತ್ಲೊ ನಾ!
ವಿಶು ಕುಮಾರ್!
ಅಪರಿಚಿತ್! ಆಲಿಯಾನ್ ಆಯ್ಕೊನ್ ಪಾಸೊನ್ ನೆಣಾಂ ಆಸ್ಲ್ಲೊ ಅಪರಿಚಿತ್! ಹ್ಯಾ ಅಪರಿಚಿತಾನ್ ಆಲಿಯಾಚಾ ಪಾಯಾಂಮುಳಾಕ್ಚ್ ಕುರಾಡ್ ಮಾರ್ಲ್ಲಿ.
ಆನಿ ನಿಮಾಣೆಂ ಜಾವ್ನ್ ಮನೋಜ್ ಕುಮಾರ್! ಆಪ್ಣಾಚೊ ಆಸಿಸ್ಟಂಟ್ ಮ್ಯಾನೇಜರ್!
ಕಾಂಯ್ಚ್ ಚೂಕ್ ನಾತ್ಲೆಲ್ಯಾ ಆಪ್ಣಾಚೊ ಸಾರ್ಕೊ ವಿಚಾರ್ ಕರಿನಾಸ್ತಾನಾಚ್ ಆಪ್ಣಾಚಾ ಹಾತಿಕ್ ಟರ್ಮಿನೇಶನ್ ಪೇಪರ್ ವೊಡ್ಡಾಯಿಲ್ಲೊ!
ಬಾಲ್ಕನಿಚೆರ್ ಬಸೊನ್ ಫಾಲ್ಯಾಂಚೆಂ ಚಿಂತ್ಚ್ಯಾ ಆಲಿಯಾಚಾ ಮತಿಕ್ ಕಾಲ್ಚ್ಯಾ ತಾಚ್ಯಾ ಜಿವಿತಾಂತ್ಲಿಂ ಘಡಿತಾಂ ಎಕಾ ಪಾಟ್ಲ್ಯಾನ್ ಏಕ್ ಉಡಾಸಾಂತ್ ಯೇವ್ನ್ ಗೆಲಿಂ. ಆಲಿಯಾಕ್ ಮೊಳಾಬಾ ವಯ್ರ್ ಉಭ್ಚಿ ಆಶಾ ಆಸ್ಲ್ಲಿ ಖರಿ. ಪುಣ್ ಹ್ಯಾ ಎಕಾಚ್ ಆಶೆಕ್ ಲಾಗೊನ್ ತಾಚೆಂ ಜಿವಿತ್ ಆಜ್ ತಾಕಾ ಹ್ಯಾ ಎಕ್ಸುರ್ಪಣಾಚಾ ಪಾಂವ್ಡ್ಯಾರ್ ಹಾಡುನ್ ಉಭೆಂ ಕರಿತ್ ಮ್ಹಣೊನ್ ತಾಣೆಂ ಕೆದ್ನಾಂಚ್ ಚಿಂತ್ಲ್ಲೆಂ ನಾ. ಆಲಿಯಾ ತಾಚ್ಯಾ ಜಿವಿತಾಚಾ ವಾಟೆರ್ ಎಕ್ಸುರೆಂ ಜಾಲ್ಲೆಂ.
ಪುರ್ತೆಂ ಎಕ್ಸುರೆಂ!
ಆಜ್ ತೆಂ ಆಪ್ಲ್ಯಾ ಆವಯ್ ಬಾಪಯ್ ಲಾಗಿಂ ಪಾಸೊನ್ ವಚೊಂಕ್ ಸಕಾನಾತ್ಲ್ಲೆಂ.
ಆಲಿಯಾಚೊ ನಿಮಾಣೊ ಭರ್ವಸೊ ಜಾವ್ನ್ ಆಯಿಲ್ಲ್ಯಾ ರಾಯನಾ ವರ್ವಿಂ ಫಾಲ್ಯಾಂ ಆಪ್ಣಾಚೆಂ ಸಪಾಣ್ ಖಂಡಿತ್ ಸತ್ ಜಾತಾ ಮ್ಹಳ್ಳಿ ಏಕ್ಚ್ ಏಕ್ ಪಾತ್ಯೆಣಿ ಆಲಿಯಾಕ್ ಆಸ್ಲ್ಲಿ. ನಿಮಾಣೆಂ ತರ್ಯ್ ಆಪುಣ್ ತ್ಯಾ ಮೊಳಾಬಾರ್ ಪಾವ್ತೆಲಿಂ ಮ್ಹಳ್ಳಿ ತಾಚಿ ಇಚ್ಚಾ ಪಾಲೆಂವ್ಕ್ ಲಾಗ್ಲ್ಲಿ.
ಆಲಿಯಾಕ್ ಆಯ್ಚೊ ವೇಳ್ ಸಾರುಂಕ್ ಕಷ್ಟ್ ಜಾತಾಲೆ.
ಉದೆಲ್ಲೊ ದೀಸ್ ರಾಯನಾ ಸಂಗಿಂ ಪಾಶಾರ್ ಜಾತಾನಾ ಧನ್ಪಾರ್ ಜಾಲ್ಲೆಂ. ಧನ್ಪಾರಾಚಾ ವಿಶೆವಾಕ್ ತಾಚಿ ಮತ್ ತಯಾರ್ ಜಾಲಿ ನಾ. ತೆಂ ಟಿ.ವಿ ಪಳವ್ನ್ ಬಸ್ಲೆಂ. ಸಾಂಜ್ ಜಾತಾನಾ ರಾಯನ್ ಆಯ್ಲೊ. ತಾಚ್ಯೆ ಸಂಗಿಂ ಥೊಡೊ ವೇಳ್ ಕಸೊ ಪಾಶಾರ್ ಜಾಲೊ ತೆಂ ತಾಕಾಚ್ ಕಳ್ಳೆಂ ನಾ. ಆನಿ ಆತಾಂ ತಿಚ್ಚ್ ರಾತ್ ಪರ್ತ್ಯಾಕ್ ಉದೆಲಿ. ಎಕ್ಸುರ್ಪಣಾಚಿ! ಹ್ಯಾ ಎಕ್ಸುರ್ಪಣಾಂತ್ ಆಲಿಯಾನ್ ಆಪ್ಲ್ಯಾ ಭಗ್ಣಾಂಕ್ ದಾಂಬುನ್ ವೆಲೆಂ. ತಾಕಾ ಫಾಲ್ಯಾಂಚಿ ರಾಕೊಣ್ ಆಸ್ಲ್ಲಿ! ತೆಂ ಫಾಲ್ಯಾಂ ಹ್ಯಾ ಸಂಸಾರಾಕ್ ’ಆಲಿಯಾ’ ಮ್ಹಳ್ಯಾರ್ ಕಿತೆಂ ಆನಿ ಎಕಾ ಚಲಿಯೆಚೆಂ ಆಸ್ಥಿತ್ವ್ ಮ್ಹಳ್ಯಾರ್ ಕಿತೆಂ ಮ್ಹಣೊನ್ ದಾಖಂವ್ಕ್ ಸೊಧ್ತಾಲೆಂ.
ಫಾಲೆಂ ಉದೆಂವ್ಕ್ ಆಯ್ಚಿ ರಾತ್ ಬುಡೊಂಕ್ ಜಾಯ್! ಆಲಿಯಾ ಹ್ಯಾ ರಾತಿಕ್ ಬುಡೊಂಕ್ ಆಶೆತಾಲೆಂ!
ಭಾಯ್ಲ್ಯಾನ್ ರಾತ್ ಉದೆಲ್ಲಿ.
ತ್ಯಾ ಮೊಳಾಬಾಚೊ ನಿಳ್ಸೊ ರಂಗ್ ಉಬ್ಲ್ಲೊ!
ತಿಂ ಕುಪಾಂ ನಪಂಯ್ಚ್ ಜಾಲ್ಲಿಂ!
ತಿಂ ಸುಕ್ಣಿಂ ಆಪ್ಲ್ಯಾ ಘೊಂಟೆರಾಂತ್ ಲಿಪೊನ್ ಗೆಲ್ಲಿಂ!
ಪುಣ್ ಹಾಂವ್!
ಹಾಂವ್ ಆಲಿಯಾ ತ್ಯಾ ಮೊಳಾಬಾ ಪರಿಂ ನ್ಹಯ್. ತ್ಯಾ ಕುಪಾಂ ಪರಿಂ ನ್ಹಯ್ ತ್ಯಾ ಸುಕ್ಣ್ಯಾಂ ಪರಿಂ ನ್ಹಯ್!
ತಿಂ ಹ್ಯಾ ಸಂಸಾರಾ ಥಾವ್ನ್ ಪಯ್ಸ್ ಆಸೊನ್ ಸ್ವತಂತ್ರ್!
ಹಾಂವ್ ಹ್ಯಾ ಸಂಸಾರಾಂತ್ಚ್ ರಾವೊನ್ ಸ್ವತಂತ್ರ್ ಜಾತಾಂ!
ಆಪ್ಲ್ಯಾ ಸ್ವತಂತ್ರಾಚೆಂ ಝುಜ್ ಆಪುಣ್ ಝುಜ್ತಾಂ!
ಹ್ಯಾಚ್ ಸಂಸಾರಾಂತ್ ರಾವೊನ್!
ಎಕಾ ಚಲಿಯೆಚಾ ಸೈಂಬಾಚೆಂ ಝುಜ್!
ಚಿಂತ್ನಾ ಮತಿಕ್ ಥಕವ್ನ್ ದೊಳ್ಯಾಂಕ್ ಜೆಮ್ ಹಾಡಯ್ತಾ ಪಾಸೊನ್ ಆಲಿಯಾ ಭಾಯ್ರ್ ತ್ಯಾ ಬಾಲ್ಕನಿರ್ ಬಸ್ಲೆಂ. ತಾಕಾ ಹಿ ಬಾಲ್ಕನಿ ಮಾತ್ರ್ ಸಾಂಗಾತ್ ದೀಂವ್ಕ್ ಸಕ್ತಾಲಿ ಶಿವಾಯ್ ದುಸ್ರೆಂ ಕೋಣ್ಯ್ ತಾಕಾ ಸಾಂಗಾತ್ ದಿಂವ್ಚೆಂ ನಾತ್ಲ್ಲೆಂ. ಹ್ಯಾಚ್ ಬಾಲ್ಕನಿರ್ ಬಸೊನ್ ಆಲಿಯಾ ತ್ಯಾ ಮೊಳಾಬಾ ವಯ್ಲ್ಯಾ ತಾರಾಂ ಸವೆಂ ಉಲಯ್ತಾಲೆಂ. ತ್ಯಾ ಕುಪಾಂಕ್ ಪಳವ್ನ್ ಹಾಸ್ತಾಲೆಂ. ತ್ಯಾ ಉಬ್ಚ್ಯಾ ಸುಕ್ಣ್ಯಾಂ ಸವೆಂ ಉಭ್ತಾಲೆಂ.
ಆಜ್ ಜಾಲ್ಯಾರ್ಯ್ ತಶೆಂಚ್! ಆಲಿಯಾ ಫಾಲ್ಯಾಂಚೆಂ ಚಿಂತುನ್ ಹ್ಯಾ ಬಾಲ್ಕನಿರ್ ಬಸ್ಲ್ಲೆಂ. ಮತಿಂತ್ಲಿಂ ಚಿಂತ್ನಾಂ ತಾಚ್ಯಾ ಮತಿಕ್ ಥಕವ್ನ್ ತಿಂ ನಿದೆಕ್ ಆಂವ್ಡೆತಾನಾ ಆಲಿಯಾ ನಿದೊಂಕ್ ಗೆಲೆಂ. ಪುಣ್ ನಿದೊಂಕ್ ಗೆಲ್ಲ್ಯಾ ತಾಕಾ ತ್ಯಾ ಖಾಟಿಯೆರ್ ಆಡ್ ಪಡ್ತಾನಾ ಪರ್ತ್ಯಾಕ್ ತಿಂಚ್ ಆದ್ಲಿಂ ಚಿಂತ್ನಾಂ ದೊಸುಂಕ್ ಲಾಗ್ಲಿಂ. ತಾಚ್ಯಾ ದೊಳ್ಯಾಂಕ್ ತ್ಯಾ ಖಾಟಿಯೆರ್ ಜೆಮ್ ತುರ್ತಾನ್ ಆಯ್ಲಿ ನಾ. ಆತಾಂ ತೆಂ ಕಾಲ್ಚೆಂ ಸೊಡುನ್ ಫಾಲ್ಯಾಂಚೆಂ ಚಿಂತುಂಕ್ ಲಾಗ್ಲೆಂ.
ಪಯ್ಲೆ ಪಾವ್ಟಿಂ ಹೆಂ ಆಲಿಯಾ ಫಾಲ್ಯಾಂಚಾ ದಿಸಾ ಬಾಲಿವುಡಾಚಾ ಸಂಸಾರಾಂತ್ ಪಾಂಯ್ ದವರ್ತೆಲೆಂ. ಫಾಲ್ಯಾಂಚಾ ಉಪ್ರಾಂತ್ ಹೊಚ್ಚ್ ಲೋಕ್ ಹ್ಯಾ ಆಲಿಯಾಕ್ ಸದಾಂನೀತ್ ಪಳಂವ್ಕ್ ಆಶೆತಲೊ.
ಹೆಂಚ್ ಆಲಿಯಾ! ಹ್ಯಾ ಲೊಕಾಂನಿ ಸದಾಂ ಪಳಂವ್ಕ್ ಆಶೆಂವ್ಚೆಂ. ಆಪ್ಣಾ ಭೊಂವಾರಿಂ ಹ್ಯಾ ಉಪ್ರಾಂತ್ ಲೊಕಾಚಿ ಖೆಟ್ ಜಾತೆಲಿ. ಸಗ್ಳ್ಯಾಂಚಾ ಜಿಬೆರ್ ಆಪ್ಣಾಚೆಂ ನಾಂವ್ ಖೆಳ್ತೆಲೆಂ. ಸಭಾರ್ ಜಣ್ ಮ್ಹಾಕಾ ಸವಾಲ್ ಕರ್ತೆಲೆ. ಹಾವೆಂ ಸಭಾರಾಂಕ್ ಜಾಪಿ ದಿಂವ್ಚ್ಯೊ ಪಡ್ತೆಲ್ಯೊ. ಪೊಟೋಗ್ರಾಫರ್ಸ್ ಕ್ಯಾಮರಾ ಹಾತಿಂ ಘೆವ್ನ್ ಮ್ಹಜ್ಯಾ ಪಾಟ್ಲ್ಯಾನ್ ಮುಕ್ಲ್ಯಾನ್ ಯೆತೆಲೆ. ಮೀಡಿಯಾಚೆ ತಾಂಚ್ಯಾ ಪತ್ರಾಂನಿ ಭರುಂಕ್ ಮ್ಹಜೆಂ ಕಿತೆಂಯ್ ಮಾಗ್ತೆಲೆ. ಪುಣ್ ಮ್ಹಾಕಾ ಹಾಂಚಿ ಪರ್ವಾ ನಾ. ಮ್ಹಾಕಾ ಪರ್ವಾ ಆಸ್ಚಿ ಹಾವೆಂ ಝುಜೊಂಕ್ ವೆಚ್ಯಾ ಝುಜಾಚಿ!
ಮ್ಹಾಕಾ ಪರ್ವಾ ಆಸ್ಚಿ ಹಾವೆಂ ಜೊಡುಂಕ್ ವೆಚ್ಯಾ ಜಯ್ತಾಚಿ!
ಮ್ಹಾಕಾ ಪರ್ವಾ ಆಸ್ಚಿ ಹಾವೆಂ ಬದ್ಲುಂಕ್ ವೆಚ್ಯಾ ಹ್ಯಾ ಸಮಾಜೆಚಿ!
ಮ್ಹಾಜ್ಯಾಚ್ ಚಲಿಯೆ ಜಾತಿಚಾ ಸಮಾಜೆಚಿ!
ಹ್ಯಾ ಝುಜಾಕ್ ಆರಂಭ್ ಕರುಂಕ್ ಆನಿ ಅಂತ್ಯ್ ಪಾಸೊನ್ ತೆಂ ಚಲೊನ್ ವರುಂಕ್ ಕೋಣ್ ಮ್ಹಾಕಾ ಸಾಂಗಾತ್ ದಿತಲೊ? ಹ್ಯಾ ರಂಗ್ ರಂಗೀನ್ ಬಾಲಿವುಡಾಚಾ ಸಂಸಾರಾಂತ್ ಆಪ್ಣಾಕ್ ಆಪ್ಣಾಚೆಂ ಏಕ್ ಮೇಟ್ ಕಾಡುಂಕ್ ಜಾಯ್ ತರ್ಯ್ ರಾಯನಾ ತಸಲ್ಯಾ ಎಕಾ ವ್ಯಕ್ತಿಚಿ ಗರ್ಜ್ ಆಸಾ. ಹ್ಯಾ ಬಗಾರ್ ಹ್ಯಾ ಬಾಲಿವುಡಾಂತ್ ಮೇಟ್ ಕಾಡುಂಕ್ ಸುಲಭ್ ನಾ. ಹಾಂಗಾಸರ್ ಹಾವೆಂ ಕಾಡ್ಚ್ಯಾ ಮೆಟಾಂಕ್ ಕೋಣ್ ತರ್ಯ್ ಮ್ಹಾಕಾ ಹಾತ್ ಧರುನ್ ಆಧಾರ್ ಭಾಸಾಂವ್ಚೊ ಆಸೊಂಕ್ಚ್ ಜಾಯ್!
ತರ್ ಹ್ಯಾ ಬಾಲಿವುಡಾಂತ್ ಮ್ಹಾಕಾ ಕೋಣ್ ಸಾಂಗಾತ್ ದಿತಲೊ?
ರಾಯನ್...? ಸಾವಂತ್...?
ಕೊಣ್ಯ್ ಮ್ಹಾಕಾ ಸಾಂಗಾತ್ ದೀಂವ್ ಯಾ ನಾ ದೀಂವ್ ಫಾಲ್ಯಾಂ ರಾತಿಂ ಹ್ಯಾ ಅಖ್ಖ್ಯಾ ದೆಶಾಚಾ ಪ್ರಿಂಟರಾಂಚಾ ಹಾತಿಂ ಮ್ಹಜಿ ತಸ್ವೀರ್ ಆಸ್ತೆಲಿ.
ಆಲಿಯಾ!
ಸಗ್ಳ್ಯಾನಿತ್ಲ್ಯಾನ್ ಆಲಿಯಾ!
ಮ್ಹಜೆಂ ನಾಂವ್ ಹ್ಯಾ ಬಾಲಿವುಡಾ ಥಾವ್ನ್ ಸಗ್ಳ್ಯಾ ದೇಶಾಂತ್ ಘಾಜ್ತೆಲೆಂ.
ಸಗ್ಳ್ಯಾ ದೇಶಾಚಿಂ ಹ್ಯಾ ಆಲಿಯಾಕ್ ಪಳಂವ್ಕ್ ಆಶೆತೆಲಿಂ ಹ್ಯಾ ಆಲಿಯಾಚಿ ಸೊಭಾಯ್ ವರ್ಣಿತೆಲಿಂ. ಹ್ಯಾ ಆಲಿಯಾ ಪರಿಂಚ್ ಜಾಂವ್ಕ್ ಚಿಂತೆಲಿಂ.
ಸಗ್ಳ್ಯಾನಿತ್ಲ್ಯಾನ್ ಆಲಿಯಾಚ್ ಆಲಿಯಾ!
ತೆದ್ನಾಂ ಮ್ಹಜೆಂ ಝುಜ್ ಆರಂಭ್ ಜಾತೆಲೆಂ!
ಎಕಾ ಚಲಿಯೆಕ್ ಲ್ಹಾನ್ಪಣ್ ದಾಖಂವ್ಕ್ ಕಾರಾಣ್ ಜಾಲ್ಲ್ಯಾ ಹ್ಯಾ ಹರ್ಯೆಕ್ ಚಲ್ಯಾ ಜಾತಿ ವಯ್ರ್ ಆಲಿಯಾಚೆಂ ಝುಜ್ ಆರಂಭ್ ಜಾತೆಲೆಂ. ಹ್ಯಾ ವಾಟೆರ್ ಆಪ್ಣಾಕ್ ಕಿತೆಂ ಸಗ್ಳೆಂ ಕರುಂಕ್ ಜಾಯ್ ತೆಂ ಸಗ್ಳೆಂ ಆಪುಣ್ ಕರ್ತೆಲಿಂ. ಖಂಯ್ಚಾಯ್ಕ್ಯ್ ಆಪುಣ್ ಪಾಟಿಂ ಸರ್ಚಿಂ ನಾ! ಸಗ್ಳೆಂ ಕರ್ತೆಲಿಂ!
ಸಗ್ಳೆಂ!
ಕಿತ್ಯಾಕ್.... ಆಪ್ಣಾಕ್ ಹೆಂ ಝುಜ್ ಜಿಕೊಂಕ್ ಜಾಯ್! ಚಲಿ ಹ್ಯಾ ಸಮಾಜೆಕ್ ಬದ್ಲುಂಕ್ ಸಕ್ತಾ ಮ್ಹಳ್ಳೆಂ ರುಜು ಕರುಂಕ್ ಜಾಯ್!
ಆಪ್ಣಾಕ್ ಹ್ಯಾ ಪಾಂವ್ಡ್ಯಾ ಪಾಸೊನ್ ಹಾಡುನ್ ಪಾವಯಿಲ್ಲ್ಯಾ ಹ್ಯಾ ಚಲ್ಯಾ ಜಾತಿ ವಯ್ರ್ ಝುಜ್!
ಆಲಿಯಾ ಆಪ್ಲ್ಯಾ ಭಿತರ್ಲ್ಯಾ ಧಯ್ರಾ ಲಾಗಿಂ ಉಲಯ್ತಾಲೆಂ
ಸಗ್ಳಿ ರಾತ್ ಚಿಂತ್ನಾಂನಿ ಪಾಶಾರ್ ಕರುನ್ ಆಲಿಯಾ ಮಧ್ಯಾನ್ ರಾತಿಕ್ ನಿದೆಕ್ ವೆಂಗ್ಲೆಂ.
ದುಸ್ರ್ಯಾ ದಿಸಾ ಸಾಕಾಳಿಂ ತಾಕಾ ವೆಗ್ಗಿಂ ಉಟೊಂಕ್ ಸಾದ್ಯ್ ಜಾಲೆಂ ನಾ ಜಾಲ್ಯಾರ್ಯ್ ತಾಚ್ಯಾ ಫುಡಾರಾಚ್ಯಾ ತಾಣೆ ಝುಜೊಂಕ್ ಆಸ್ಚ್ಯಾ ಝುಜಾನ್ ಆಲಿಯಾಕ್ ಜಾಗಯ್ಲೆಂ.
ಆಲಿಯಾನ್ ಆಶೆಲ್ಲೊ ದೀಸ್ ಉದೆಲ್ಲೊ!
ಆಜ್ ತೆಂ ಮಸ್ತ್ ಖುಶ್ ಆಸ್ಲ್ಲೆಂ!
ಆಪ್ಣಾಚೆಂ ಜಯ್ತ್ ಆಪ್ಣಾ ಸಾಂಗಾತಾ ಆಪ್ಣಾಕ್ ಸಾಂಗಾತ್ ದೀವ್ನ್ ಆಸಾ ತಶೆಂ ತಾಕಾ ಭೊಗ್ಲೆಂ.
ಆತಾಂ ಆಲಿಯಾ ಆಯ್ಚಾ ದಿಸಾಚಾ ತಾಚ್ಯಾ ತಾಣೆಂ ಅಭಿನಯ್ ಕರುಂಕ್ ಆಸ್ಚ್ಯಾ ಪಯ್ಲ್ಯಾ ಸಿನೇಮಾಚಾ ಲಾಂಚಿಂಗಾಕ್ ತಯಾರ್ ಜಾಂವ್ಕ್ ಲಾಗ್ಲೆಂ.
"ಪಳೆ ಆಲಿಯಾ! ತುಜಿ ಆತಾಂ ಕಿತ್ಲಿ ಪಬ್ಲಿಸಿಟಿ ಜಾತಾ... ತುಜ್ಯಾ ರುಪಾಕ್ ಲೋಕ್ ಕಿತ್ಲೊ ಪಸಂದ್ ಕರ್ತಾ ತಿತ್ಲೆಂ ವ್ಹಡ್ಲೆಂ ಜಯ್ತ್ ತುಕಾ ಲಾಭ್ತೆಲೆಂ. ದೆಕುನ್ ತುವೆಂ ಮ್ಹಜ್ಯಾಕ್ಯ್ ಚಡ್ ತುಜ್ಯಾ ಫುಡಾರಾಚೆಂ ಚಿಂತುಂಕ್ ಆಸಾ. ತುಂ ಕಿತ್ಲೆಂ ತುಜ್ಯಾ ಫುಡಾರಾ ವಿಶಿಂ ಚಿಂತಾಯ್ ತಿತ್ಲೆಂ ಮ್ಹಜೆಂ ಫಿಲ್ಮ್ ಬರೆಂ ಜಾತೆಲೆಂ!" ರಾಯನಾನ್ ಆಲಿಯಾಕ್ ಜಾಗಯಿಲ್ಲೆಂ.
ರಾಯನ್ ಜಾಲ್ಯಾರ್ಯ್ ಬಿಜ್ನೆಸ್ಮ್ಯಾನ್! ಆಲಿಯಾಚಿ ತಸ್ವೀರ್ ಪಳವ್ನ್ ಜಿತ್ಲ್ಯಾ ಜಾಣಾಂನಿ ಆಂಯ್ಡೆ ಗಳಯ್ಲೆ ತಿತ್ಲ್ಯಾ ಚಡ್ ತಾಚೆ ಪಯ್ಶೆ ತಾಕಾ ಪಾಟಿಂ ಆಯ್ಲೆ.
ಜಾಣಾಂ ಆಸೊನ್ ಯಾ ಜಾಣಾಂ ನಾಸೊನ್ ಆಲಿಯಾ ಮಾತ್ರ್ ತಾಚ್ಯಾ ಝುಜಾಚಾ ವಾಟೆರ್ ಆಪ್ಲೆಸ್ತಾಕಿಂ ಮುಕಾರ್ ವೆತಾಲೆಂ. ರಾಯನ್ ಆಪ್ಣಾಕ್ ಫಾಯ್ದೊ ಜೊಡ್ಚ್ಯಾ ಉದ್ದೇಶಾಂತ್ ಆಲಿಯಾಚಾ ಫಾಯ್ದ್ಯಾಕ್ಯ್ ನೆಣಾಂ ಆಸೊನ್ಚ್ ಬಗ್ಲೆಕ್ ಘೆವ್ನ್ ಚಲ್ತಾಲೊ. ರಾಯನ್ ಆಲಿಯಾಚಾ ಝುಜಾಂತ್ ನೆಣಾಂ ಜಾವ್ನ್ ಭಾಗಿದಾರ್ ಜಾಲ್ಲೊ.
ಫಿಲ್ಮ್ ಲಾಂಚಿಂಗಾಚಾ ಪಾರ್ಟೆಂತ್ ರಾಯನಾನ್ ಆಲಿಯಾ ಥಾವ್ನ್ ಪಯ್ಸ್ ರಾಂವ್ಚೆಂ ಪ್ರಯತ್ನ್ ಕೆಲ್ಲೆಂ. ಪತ್ರಕರ್ತ್ ಆನಿ ಲೊಕಾಂ ಮುಕಾರ್ ತೊ ಪಡಾನಾತ್ಲ್ಲೊ. ತಾಂಚೆ ಮುಕಾರ್ ಪಡೊಂಕ್ ತೊ ಸಾವಂತಾಕ್ ತಯಾರ್ ಕರ್ತಾಲೊ.
ಸಾವಂತಾನ್ ಆಲಿಯಾಕ್ ಸಭಾರ್ ಜಾಣಾಂಚಿ ವಳಕ್ ಕರುನ್ ದಿಲಿ. ಸಭಾರಾಂನಿ ಆಲಿಯಾಚಿ ತಸ್ವೀರ್ ಕಾಡ್ಲಿ. ಮೀಡಿಯಾಚ್ಯಾನಿ ಆಲಿಯಾಚಿ ಇಂಟರ್ವ್ಯೂ ಘೆತ್ಲಿ. ಹ್ಯಾ ಸಗ್ಳ್ಯಾ ಮಧೆಂ ರಾಯನ್ ಮಾತ್ರ್ ಆಲಿಯಾ ಥಾವ್ನ್ ಪಯ್ಸ್ ಆಸ್ಲ್ಲೊ.
ಆಲಿಯಾಚಾ ಫಿಲ್ಮ್ ಲಾಂಚಿಂಗಾಚಾ ಪಾರ್ಟೆಂತ್ ಆಲಿಯಾ ತಾಚ್ಯಾ ಜಿವಿತಾಂತ್ ಪಯ್ಲೆ ಪಾವ್ಟಿಂ ಬಹಿರಂಗ್ ಜಾವ್ನ್ ಇತ್ಲ್ಯಾ ಲೊಕಾಂ ಮುಕಾರ್ ಉಭೆಂ ಜಾಲ್ಲೆಂ. ಹ್ಯಾ ದಿಸಾಕ್ ತೆಂ ಆಪ್ಲ್ಯಾ ಜಿವಿತಾಂತ್ ವೆಗ್ಗಿಂ ಆಶೆಲ್ಲೆಂ ಖರೆಂ. ಪುಣ್ ಹ್ಯಾ ದಿಸಾಚೆಂ ರೂಪ್ ಆಶೆಂ ಆಸ್ತೆಲೆಂ ಮ್ಹಣೊನ್ ತಾಕಾ ಕಳಿತ್ ನಾತ್ಲೆಲೆಂ. ತಾಚ್ಯಾ ಮನಾಂತ್ಚ್ ತಾಣೆಂ ಹ್ಯಾ ದಿಸಾ ವಿಶ್ಯಾಂತ್ ಕಲ್ಪನ್ ಕೆಲ್ಲೆಂ. ಪುಣ್ ತ್ಯಾ ಕಲ್ಪನಾಕ್ ಆನಿ ಆಯ್ಚ್ಯಾ ಹ್ಯಾ ದಿಸಾಕ್ ಮಸ್ತ್ ಫರಕ್ ಆಸ್ಲ್ಲೊ.
ಆಲಿಯಕ್ ಹೊ ಏಕ್ ದುಸ್ರೊಚ್ ಸಂಸಾರ್ ಮ್ಹಳ್ಳ್ಯಾ ಭಾಶೆನ್ ಭೊಗ್ಲೊ. ಹಾಂಗಾಚಿಂ ಮನ್ಶ್ಯಾಂ ಜಾಲ್ಯಾರ್ಯ್ ತಶಿಂಚ್! ತ್ಯಾ ಆಪ್ಲ್ಯಾ ಸಾದ್ಯಾ ಸಂಸಾರಾಂತ್ ಆಸ್ಲ್ಲ್ಯಾ ತಸಲಿಂ ತಿಂ ನ್ಹಯ್ ಆಸ್ಲ್ಲಿಂ. ತ್ಯಾ ಭಾಯ್ರ್ ಥಂಯ್ ಹಾಂಗಾ ಪೋಟೋ ಗ್ರಾಫರಾಂಚೆ ಕ್ಯಾಮರಾ. ಘಡ್ಯೆ ಘಡ್ಯೆ ತಾಂಚೆ ಪ್ಲ್ಯಾಶ್! ತೆ ಮೈಕ್ಸ್! ತ್ಯೊ ಹಾಸೊ! ತಿಂ ಸವಾಲಾಂ! ತೊ ಸ್ಪರ್ಧೊ! ಥೊಡ್ಯಾಚ್ ವೆಳಾನ್ ತೆಂ ಥಕೊನ್ ಗೆಲೆಂ. ಪುಣ್ ಆಪ್ಣಾಚ್ಯಾ ಫುಡಾರಾಚೆಂ ಚಿಂತುನ್ ಆಲಿಯಾ ಆಪ್ಣಾಕ್ಚ್ ಸರ್ವಾಂ ಮುಕಾರ್ ಪ್ರಸ್ತುತ್ ಕರ್ತಾಲೆಂ. ಹ್ಯಾಚ್ ಪ್ರಸ್ತುತೆಂತ್ ಆಪ್ಣಾಚೊ ಧ್ಯೇಯ್ ಆಪ್ಣಾಕ್ ಆಪ್ಲ್ಯಾ ಜಯ್ತಾ ತೆವ್ಶಿಂ ಪಾವಯ್ತಲೊ ಮ್ಹಳ್ಳೊ ತಾಚೊ ಭರ್ವಸೊ.
ತಿತ್ಲ್ಯಾರ್!
"ಹಾಯ್!"
ಆಪ್ಣಾ ಲಾಗ್ಶಿನ್ಚ್ ಕೊಣೆಗೀ ಆಪ್ಣಾಕ್ ಉದ್ದೇಶುನ್ ಸಾಂಗ್ಲ್ಲ್ಯಾ ಪರಿಂ ಜಾತಾನಾ ಎಕಾಚ್ಚ್ ಫರಾ ಆಯ್ಕೊನ್ ಆಯಿಲ್ಲ್ಯಾ ತಾಳ್ಯಾ ತೆಂವ್ಶಿಂ ಆಲಿಯಾನ್ ಘುಂವೊನ್ ಪಳೆಲೆಂ.
ತಾಚ್ಯೆ ಸಾಮ್ಕಾರ್ ಏಕ್ ಸೊಭಿತ್ ತರ್ನಾಟೊ ಉಭೊ ಆಸ್ಲ್ಲೊ!
ಸ್ಟಿಫ್ ಕಾಳ್ಯಾ ಸುಟಾರ್ ತ್ಯಾ ತರ್ನಾಟ್ಯಾಕ್ ಪಳೆತಾನಾ ತಾಕಾ ಪಳೆಲ್ಲ್ಯಾ ತ್ಯಾ ಪಯ್ಲ್ಯಾ ನದ್ರೆಂತ್ಚ್ ಆಪ್ಲ್ಯಾ ಜಿವಾ ಭಿತರ್ ಆಲಿಯಾಕ್ ಕಿತೆಂಗೀ ಜಾಲ್ಲ್ಯಾ ಪರಿಂ ಜಾಲೆಂ.
"ಹಾಯ್!" ಆಲಿಯಾನ್ ತಾಕಾ ಪಾಟಿಂ ವಂದನ್ ಕೆಲೆಂ.
"ಕಾಂಗ್ರಾಜುಲೇಶನ್ಸ್!"
ಆಲಿಯಾಚಾ ಮುಕಾರ್ ಆಯಿಲ್ಲ್ಯಾ ತ್ಯಾ ವ್ಯಕ್ತಿನ್ ಆಲಿಯಾಕ್ ಹಾತ್ ಮೆಳಯ್ಲೊ.
"ಥ್ಯಾಂಕ್ ಯು!" ಆಲಿಯಾ ಹಾಸ್ಲೆಂ.
"ಪಯ್ಲ್ಯಾ ಪಾವ್ಟಿಂ ಹಾವೆಂ ತುಕಾ ಪಳಂವ್ಚೆಂ!" ತೊಚ್ಚ್ ಉಲಯ್ಲೊ.
"ವ್ಹಯ್!" ಮಟ್ವ್ಯಾನ್ ಜವಾಬ್ ದಿಲ್ಲೆಂ ಆಲಿಯಾನ್ ಹೆವ್ಶಿಂ ಘುಂವೊನ್ ಪಳೆಲೆಂ.
"ಬ್ರ್ಯಾಂಡ್ ನಿವ್....?" ತಾಣೆಂ ವಿಚಾರ್ಲೆಂ.
ತಾಚ್ಯಾ ಸವಾಲಾಕ್ ಆಲಿಯಾನ್ ತಾಕಾಚ್ ಪಳೆಲೆಂ ಶಿವಾಯ್ ತೆಂ ಕಾಂಯ್ ಉಲಯ್ಲೆಂ ನಾ.
"ಹೊ ಸಾವಂತ್ ಆಸಾ ಪಳೆ ನವ್ಯಾಂಕ್ ಸೊಧ್ಚ್ಯಾಂತ್ ಮಾತ್ರ್ ಭಾರಿಚ್ ಹುಶಾರ್!" ತ್ಯಾ ವ್ಯಕ್ತಿಚಾ ತೊಂಡಾರ್ ಆತಾಂ ಪಾತಳ್ ಹಾಸೊ ಆಸ್ಲ್ಲ್ಯೊ.
ತಿತ್ಲ್ಯಾರ್!
"ವಿಶು ಕುಮಾರ್!"
ಖಂಯ್ ಥಾವ್ನ್ಗೀ ಆಯಿಲ್ಲ್ಯಾ ಸಾವಂತಾನ್ ಆಲಿಯಾ ಲಾಗಿಂ ಉಲಂವ್ಚ್ಯಾ ತರ್ನಾಟ್ಯಾಕ್ ಹಾತ್ ಮೆಳಯ್ಲೊ.
"ಹಾಂವ್ ತುಜ್ಯಾಚ್ ವಿಶಯಾಂತ್ ಆಲಿಯಾ ಲಾಗಿಂ ಉಲಯ್ತಾಲೊಂ. ಹೆಂ ಫಿಲ್ಮ್ಯ್ ಡೆಫಿನೆಟ್ ಶೆಂಬರ್ ದೀಸ್ ಮಾರ್ತಾ ಪಳೆ!" ತೊ ತರ್ನಾಟೊ ಆಲಿಯಾಕ್ ಪಳವ್ನ್ ಹಾಸ್ಲೊ.
ತಿತ್ಲೆಂಚ್!
ಆಲಿಯಾಚಾ ಶಿರಾಂ ಶಿರಾಂನಿ ಜಗ್ಲಾಣೆ ಧಾಂವ್ಲೆಂ. ತಾಚ್ಯಾ ಕಾನಾಂಕ್ ತೆಂಚ್ ಪಾತ್ಯೆಲೆಂ ನಾ.
ವಿಶು ಕುಮಾರ್? ಹೊ ವಿಶು ಕುಮಾರ್....? ಆಪ್ಣಾಕ್ ಆಪ್ಲ್ಯಾ ಕಾಮಾ ಥಾವ್ನ್ ಟರ್ಮಿನೇಟ್ ಕರಯಿಲ್ಲೊ ವಿಶು ಕುಮಾರ್ ಹೊಚ್? ವಾ ತಾಚ್ಯಾಚ್ ನಾಂವಾಚೊ ಹೊ ದುಸ್ರೊ ಮನಿಸ್.....? ಆಲಿಯಾ ಜಾಗ್ರುತ್ ಜಾಲೆಂ.
ಅಚಾನಕ್ ತಾಣೆಂಚ್ ಚಿಂತಿನಾಸ್ತಾನಾ ತಾಚ್ಯಾ ವಾಟೆರ್ ಹೊ ವಿಶು ಕುಮಾರ್ ಆಯಿಲ್ಲೊ. ಪುಣ್ ಆಲಿಯಾಕ್ ಹೊ ತೊಚ್ಚ್ ವಿಶು ಕುಮಾರ್ ವಾ ಹೊ ದುಸ್ರೊ? ಮ್ಹಳ್ಳ್ಯಾ ವಿಶಿಂ ಸಮ್ಜೊಂಕ್ ಜಾಯ್ ಆಸ್ಲ್ಲೆಂ.
ವಿಶು ಕುಮಾರಾಲಾಗಿಂ ಉಲವ್ನ್ ಜಾವ್ನ್ ಸಾವಂತ್ ತೆವ್ಶಿಂ ವೆತಾನಾ ಆಲಿಯಾ ವಿಶು ಕುಮಾರಾ ತೆವ್ಶಿಂ ಘುಂವ್ಲೆಂ. ಆಜ್ ತಾಚ್ಯಾ ಝುಜಾಂತ್ ಸಂದರ್ಭ್ ತಾಚ್ಯಾಚ್ ಪಾಂಯಾಂಮುಳಾಂತ್ ಸೊಧುನ್ ಆಯಿಲ್ಲೊ. ಹ್ಯಾ ಸಂದರ್ಭಾಕ್ ಹೊಗ್ಡಾಂವ್ಕ್ ಆಲಿಯಾಕ್ ಮನ್ ಆಯ್ಲೆಂ ನಾ.
"ತುಂ ವಿಶು ಕುಮಾರ್....?" ಆಲಿಯಾಚ್ಯಾ ತೊಂಡಾರ್ ಆಶ್ಚರ್ಯ್ ಸ್ಪಶ್ಟ್ ಝಳ್ಕಾತಾಲೆಂ.
"ಎಸ್! ವನ್ ಎಂಡ್ ಓನ್ಲೀ" ವಿಶು ಕುಮಾರಾನ್ ಆಪ್ಲ್ಯಾ ವೊಂಟಾನಿ ಹಾಸೊ ಹಾಡ್ಲ್ಯೊ.
"ಐ ಮೀನ್ ಯು ಆರ್ ದಿ ಸೇಮ್......!" ಆಲಿಯಾ ಮುಕಾರ್ ಉಲಯ್ಲೆಂ ನಾ. ಆಪ್ಲ್ಯಾ ಜಿಬೆಕ್ ತಾಣೆಂ ದಾಂಬುನ್ ಧರ್ಲೆಂ.
"ಹೊ ತೊಚ್ಚ್ ವಿಶು ಕುಮಾರ್ ಜಾಲ್ಯಾರ್ ಹೊ ಆಪ್ಣಾಕ್ ವಳ್ಕಾನಾ ಕಿತ್ಯಾಕ್?" ಆಲಿಯಾನ್ ಆಪ್ಣಾಕ್ಚ್ ಸವಾಲ್ ಕೆಲೆಂ.
"ತುಂ ಜಾಣಾಂಯ್ ಮ್ಹಾಕಾ?" ವಿಶು ಕುಮಾರಾಕ್ ಆಶ್ಚರ್ಯ್ ಜಾಲೆಂ.
"ನಾ!" ಮ್ಹಳ್ಳೆಂ ಆಲಿಯಾ "ಎಕ್ಸ್ಕ್ಯೂಜ್ ಮಿ!" ಮ್ಹಣೊನ್ ತೆವ್ಶಿಂ ಗೆಲೆಂ. ಸಾವಂತಾ ಮುಕಾರ್ ತಾಕಾ ದುಬಾವ್ ಜಾಂವ್ಚಾ ತಸಲೆಂ ಕಾಂಯ್ ಘಡಾತ್ ಜಾಲ್ಯಾರ್ ಆಪ್ಣಾಕ್ ಆಪಾಯ್ ಆಸಾ ತೆಂ ಖಂಡಿತ್! ಚಿಂತ್ಲ್ಲೆಂ ಆಲಿಯಾ ಪಯ್ಸ್ ಗೆಲ್ಲೆಂ ತೆಂ ರಾವೊನ್ ಸವ್ಕಾಸ್ ಪಾಟಿ ಘುಂವ್ಲೆಂ.
ತಿತ್ಲೆಂಚ್!
ವಿಶು ಕುಮಾರ್ ತಾಕಾಚ್ ಪಳವ್ನ್ ರಾವ್ಲ್ಲ್ಯಾ ಕಡೆಚ್ಚ್ ರಾವ್ಲ್ಲೊ!
ಆತಾಂ ಆಲಿಯಾಚಾ ಕುಡಿರ್ ಸವ್ಕಾಸ್ ಘಾಮ್ ಫುಟೊಂಕ್ ಲಾಗ್ಲೊ. ವಿಶು ಕುಮಾರಾನ್ ಆಪ್ಣಾಚಿ ಕಾಂಯ್ ವಳಕ್ ಪುಣಿಂ ಧರುಂಕ್ ನಾ? ತಾಚ್ಯಾ ಮತಿಂತ್ ಸವಾಲ್ ಉದೆಲೆಂ.
ಛೇ.... ಆಪ್ಣೆಂಯ್ ತಾಚ್ಯಾ ಮುಕಾರ್ ತಿತ್ಲೆಂ ಉದ್ರೇಕಿತ್ ಜಾಂವ್ಕ್ ನಜೊ ಆಸ್ಲ್ಲೆಂ. ತಾಕಾ ಜರ್ ಮ್ಹಜಿ ವಳಕ್ ಮೆಳ್ಳ್ಯಾರ್.....? ಸಗ್ಳೆಂ ನಿರ್ಣಾಮ್! ಚಿಂತ್ಲ್ಲ್ಯಾ ಆಲಿಯಾನ್ ಆಪ್ಣಾಕ್ಚ್ ಪಳವ್ನ್ ರಾವ್ಲೆಲ್ಯಾ ವಿಶು ಕುಮಾರಾಕ್ ಹಾಸೊ ಪಾಟಯ್ಲ್ಯೊ.
ತಿತ್ಲೆಂಚ್!
ವಿಶು ಕುಮಾರ್ ಆಲಿಯಾ ತೆವ್ಶಿಂ ಚಲೊಂಕ್ ಲಾಗ್ಲೊ. ಹೆಂ ಕಳಿತ್ ಜಾಲ್ಲೆಂ ಆಲಿಯಾ ಮುಕಾರ್ ಚಲ್ಲೆಂ. ತಾಕಾ ಆತಾಂ ಕಿತೆಂ ಕರ್ಚೆಂ ತೆಂ ಸಮ್ಜಾಲೆಂ ನಾ. ಹೊ ವಿಶು ಕುಮಾರ್ ಕೋಣ್ ಜಾವ್ಯೆತ್? ಸರ್ವಾಂ ವರ್ನಿಂ ಪಯ್ಲೆಂ ಆಲಿಯಾಕ್ ಆಜ್ ಹೆಂ ಖಾತ್ರಿ ಕರುಂಕ್ ಜಾಯ್ ಆಸ್ಲ್ಲೆಂ ಕೀ ಆಪ್ಣಾಕ್ ಕಾಮಾ ಥಾವ್ನ್ ಕಾಡುಂಕ್ ಕಾರಾಣ್ ಜಾಲ್ಲೊ ತೊ ಹೊಚ್ ವಿಶು ಕುಮಾರ್? ವಾ ಆನಿ ದುಸ್ರೊ ಕೋಣ್ ವಿಶು ಕುಮಾರ್ ಮ್ಹಳ್ಳೊ ತೊ ಆಸಾ!
ಚಿಂತ್ನಾಂನಿ ಬುಡೊನ್ ಮುಕಾರ್ ಚಲ್ಚ್ಯಾ ಆಲಿಯಾಕ್ ಎಕಾ ಜಾಣ್ತ್ಯಾ ಬಾಯ್ಲೆನ್ ಉಲವ್ಣ್ಯಾಕ್ ರಾವಯ್ತಾನಾ ಆಲಿಯಾಕ್ ಮಾತ್ರ್ ಆಪುಣ್ ಫಸ್ಲಲೊ ಅನುಭವ್ ಜಾಲೊ.
ವಿಶು ಕುಮಾರ್ ತಾಚೆ ಲಾಗಿಂಚ್ ಚಲೊನ್ ಯೆತಾಲೊ.
ಚಲೊನ್ ಆಯಿಲ್ಲೊ ವಿಶು ಕುಮಾರ್ ಯೇವ್ನ್ ಆಲಿಯಾಚಾ ಬಗ್ಲೆಕ್ ರಾವ್ಲೊ.
ತಿತ್ಲೆಂಚ್!
ಏಕ್ ಪಾವ್ಟಿಂ ಆಲಿಯಾಕ್ ಆಪ್ಲೊ ಉಸ್ವಾಸ್ ಭಂಧ್ ಜಾಲ್ಲೊ ಅನ್ಭೋಗ್ ಜಾಲೊ.
ತಿತ್ಲ್ಯಾರ್!
"ವಿಶು.....!" ಆಲಿಯಾಕ್ ಉಲಂವ್ಕ್ ರಾವಯಿಲ್ಲಿ ತಿ ಬಾಯ್ಲ್ ಉದ್ಗಾರ್ಲಿ. "ಮಸ್ತ್ ಥೆಂಪಾ ಉಪ್ರಾಂತ್.....! ಖಂಯ್ ತುಂ.....?" ತಿ ಆತಾಂ ವಿಶುಚ್ಯಾ ತೆವ್ಶಿಂ ಘುಂವ್ಲಿ.
"ಕಾಂಯ್ ನಾ! ಥೊಡೊ ಬಿಜಿ ಆಸಾ! ತಶೆಂ!" ವಿಶು ಕುಮಾರ್ ಹಾಸ್ಲೊ.
ಹಾಂಚ್ಯಾ ಉಲವ್ಣ್ಯಾ ಥಾವ್ನ್ ಆಪ್ಣಾಕ್ ಕಾಂಯ್ ಕುಮಕ್ ಜಾಂವ್ಚೆಂ ಮೆಳಾತ್? ಹೊ ವಿಶು ಕುಮಾರ್ ಕೋಣ್ ಮ್ಹಳ್ಳೆಂ ತೆಂ ಆಪ್ಣಾಕ್ ಕಳಿತ್ ಜಾತೆಲೆಂ? ದುಸ್ರೊ ಉಪಾಯ್ ನಾತ್ಲೆಲ್ಯಾ ಆಲಿಯಾನ್ ಆಪ್ಲ್ಯಾ ಕಾಳ್ಜಾಕ್ ಘಟ್ ಕೆಲೆಂ. ತಾಣೆಂ ಚಿಂತುಂಕ್ಚ್ ನಾತ್ಲೆಲ್ಯಾ ಪರಿಂ ಬಾಲಿವುಡಾಕ್ ಪಾಂಯ್ ದವರ್ಲ್ಲ್ಯಾ ಪಯ್ಲ್ಯಾ ದಿಸಾಚ್ ಆಲಿಯಾಚೆಂ ಝುಜ್ ಆರಂಭ್ ಜಾಲ್ಲೆಂ. ಆತಾಂ ತಾಣೆಂ ಪಾಟಿಂ ಮುಕಾರ್ ಪಳಂವ್ಚ್ಯಾ ಪರಿಂಚ್ ನಾತ್ಲ್ಲೆಂ.
"ವ್ಹಯ್! ಕಾಜಾರ್ ಜಾಲ್ಯಾ ಉಪ್ರಾಂತ್ ಸಗ್ಳೆ ತಶೆಚ್!" ತಿ ಬಾಯ್ಲ್ ಹಾಸ್ತಾಲಿ. "ಖಂಯ್ ಆಸಾ ಬಾಯ್ಲೆಕ್ ಆಪವ್ನ್ ಹಾಡುಂಕ್ ನಾಂಯ್....?" ತಿ ತೆವ್ಶಿಂ ಘುಂವೊನ್ ಪಳೆಂವ್ಕ್ ಲಾಗ್ಲಿ.
"ನಾ! ತೆಂ ಮ್ಯಾಂಗಲೋರ್ ಗೆಲಾಂ!"
ತಿತ್ಲೆಂಚ್!
ಆಲಿಯಾಚೆ ಕಾನ್ ನೀಟ್ ಜಾಲೆ.
"ಮ್ಯಾಂಗಲೋರ್ ಕಿತೆಂ ಆಶೆಂಚ್....?"
"ವ್ಹಯ್! ಕಾಜಾರ್ ಜಾವ್ನ್ ಆಯಿಲ್ಲ್ಯಾಕ್ ತೆಂ ಗಾಂವಾಕ್ ವಚೊಂಕ್ ನಾತ್ಲ್ಲೆಂ ನೆ ತಶೆಂ!"
ವಿಶು ಕುಮಾರಾನ್ ಸಾಂಗ್ತಾನಾ ಆಲಿಯಾನ್ ವಿಶು ಕುಮಾರಾಕ್ಚ್ ಪಳೆಲೆಂ. ದೊಗಾಂಯ್ಚಿ ದೀಶ್ಟ್ ಥೊಡ್ಯಾ ಖಿಣಾಂಕ್ ಸಾಂಗಾತಾ ಮೆಳ್ಳಿ.
"ವಿಶು ಕುಮಾರ್..... ಮ್ಯಾಂಗಲೋರ್...... ಕಾಜಾರ್.... ಆಪ್ಣಾಚೆಂ ಪ್ಲೈಟ್.... ಪಂತೀಸ್ ವಿ.ಐ.ಪಿ..... ಟರ್ಮಿನೇಶನ್.....!" ಆಲಿಯಾಕ್ ಎಕೇಕ್ಚ್ ಉಡಾಸ್ ಆಯ್ಲೆಂ. ತರ್ ಹೊಚ್ಚ್ ತೊ ವಿಶು ಕುಮಾರ್..? ತ್ಯಾ ದೀಸ್ ಆಪ್ಣಾಕ್ ಹ್ಯಾ ವ್ಯಕ್ತಿಕ್ ಪ್ಲೈಟಾರ್ ಪಳೆಲ್ಲೊ ಉಡಾಸ್ ನಾ. ಆಪ್ಣೆ ತ್ಯಾ ದೀಸ್ ಝಗ್ಡೊಂಕ್ಯ್ ನಾ! ತರ್ ಆಮಿ ದೊಗಾಂಯ್ ಅಪರಿಚಿತ್!
ವಿಶು ಕುಮಾರ್ ಆಪ್ಣಾಕ್ ವಳ್ಕೊಂಕ್ ನಾತ್ಲ್ಲೊ. ತೊ ಆಪ್ಣಾಕ್ ವಳ್ಕೊಂಕ್ ನಾ ವಾ ತಾಕಾ ಆಪ್ಣಾಚಿ ವಳಕ್ಚ್ ನಾ?
ಆಪ್ಣಾಚಿ ವಳಕ್ ನಾಸ್ತಾನಾ ವಿಶು ಕುಮಾರಾನ್ ಆಪ್ಣಾಕ್ ಘಾತ್ ಕೆಲೊ?
ಹಾಂವ್ ತಾಕಾ ವಳ್ಕಾನಾ! ತೊ ಮ್ಹಾಕಾ ವಳ್ಕಾನಾ! ತರ್ ಕಾಂಯ್ ಹ್ಯಾ ಆಮ್ಚ್ಯಾ ದೊಗಾಂ ಮಧೆಂ ತಿಸ್ರೊ ಆಸಾ? ಜೊ ಆಮ್ಕಾಂ ದೊಗಾಂಯ್ಕ್ಯ್ ವಳ್ಕೊಂಚೊ?
ತಿಸ್ರೊ ಆಸಾ ಜಾಲ್ಯಾರ್ ತೊ ಕೋಣ್?
ಆಲಿಯಾಚಿ ಮತ್ ವಾರ್ಯಾ ವೇಗಾನ್ ಚಿಂತುಂಕ್ ಲಾಗ್ಲಿ. ತಾಣೆಂ ತ್ಯಾ ದಿಸಾಚೊ ಸಾರ್ಕೊ ಉಡಾಸ್ ಕಾಡ್ಲೊ. ನಾ! ಹ್ಯಾ ಮುಖಮಳಾಕ್ ಖಂಯ್ಚರ್ಯ್ ಪಳೆಲ್ಲೊ ಉಡಾಸ್ ನಾ! ತರ್ ಹಾಣೆಂ ಮ್ಹಜ್ಯೆ ವಯ್ರ್ ಕಂಪ್ಲೇಂಟ್ ಕಶೆಂ ದಿಲೆಂ? ತೆಂ ಕಶೆಂ ಸಾದ್ಯ್? ಸವಾಲಾ ವಯ್ರ್ ಸವಾಲ್ ತಾಚ್ಯಾ ಮತಿಂತ್ ಉದೆಂವ್ಕ್ ಲಾಗ್ಲೆಂ.
ಹ್ಯಾ ವಿಶು ಕುಮಾರಾ ಥಾವ್ನ್ ಕೊಣೆಂಯ್ ಹೆಂ ಕರಯ್ಲಾಂ! ತಾಚ್ಯಾ ಮತಿನ್ ತಾಕಾ ಜಾಗಯ್ಲೆಂ.
ಕೊಣೆ ಕರಯ್ಲಾಂ? ಆಲಿಯಾನ್ ಆಪ್ಲ್ಯಾ ಮತಿಂತ್ಲ್ಯಾ ದುಬಾವಾಕ್ ಉಸ್ತಿಲೆಂ. ತಾಚ್ಯೆಲಾಗಿಂ ಆತಾಂ ವೇಳ್ ನಾತ್ಲ್ಲೊ. ತಾಣೆಂ ಚಿಂತುಂಕ್ ಆರಂಭ್ ಕೆಲೆಂ. ಆಪ್ಣಾಕ್ ಆಪ್ಲ್ಯಾ ಕಾಮಾ ಥಾವ್ನ್ ಕಾಡವ್ನ್ ಕೊಣಾಕ್ ಫಾಯ್ದೊ ಆಸಾ? ಹ್ಯಾ ಮ್ಹಾಕಾ ವಳ್ಕಾನಾತ್ಲೆಲ್ಯಾ ವಿಶುಕುಮಾರಾಕ್ ತರೀ ಭಿಲ್ಕುಲ್ ನಾ. ತರ್...?
ಟರ್ಮಿನೆಶನ್ ಪೇಪರಾಂಕ್ ಮ್ಹಜ್ಯಾ ಹಾತಿಂ ದಿಲ್ಲ್ಯಾ ಮನೋಜ್ ಕುಮಾರಾಕ್?
ಸಾದ್ಯ್ ನಾ! ಮ್ಹಾಕಾ ಆನಿ ತಾಕಾ ಸಂಭಂಧ್ಚ್ ನಾ!
ಆಪ್ಣಾಕ್ ತಲಾಖ್ ದಿಲ್ಲೊ ಆಪ್ಣಾಚೊ ಘೊವ್?
ಆಮ್ಚೆಂ ತಲಾಖ್ ಜಾಲಾಂ ಮ್ಹಣ್ತಾನಾ ತಾಕಾ ಆಶೆಂ ಕರ್ಚಿ ಗರ್ಜ್ ತರ್ಯ್ ಕಿತೆಂ?
ಪ್ಲೈಟಾರ್ ಆಪ್ಣಾ ಸಾಂಗಾತಾ ಝಗಡ್ಲಲೊ ರಾಶಿದ್?
ಜಾಂವ್ಕ್ ಸಕ್ತಾ! ರಾಶಿದಾನ್ ಆನಿ ತಾಚ್ಯಾ ಭಾವಾನ್ ತೆದ್ನಾಂ ತಾಂಕಾಂ ಜಾಲ್ಲ್ಯಾ ಅವ್ಮಾನಾಕ್ ಆತಾಂ ಫಾರಿಕ್ಪಣ್ ಘೆತ್ಲಾಂ?
ಬಾಲಿವುಡ್ ಆನಿ ಅಂಡರ್ವರ್ಲ್ಡಾಕ್ ಸಂಭಂಧ್ ಆಸಾ ಮ್ಹಣೊನ್ ಆಪ್ಣಾಕ್ ರಾಯನಾ ಥಾವ್ನ್ ಕಳ್ಳಾಂ! ತರ್....?
ಆಶೆಂ ಜಾಂವ್ಕ್ ಸಕ್ತಾ?
ಆಶೆಂ ಜಾಂವ್ಕ್ ಸಕ್ತಾ ನ್ಹಯ್ ಆಶೆಂಚ್ ಜಾಲಾಂ! ಆಲಿಯಾಚಾ ಮತಿನ್ ದ್ರಡ್ ಕೆಲೆಂ.
ಆಪ್ಣೆಂ ಆತಾಂ ಜಾಗ್ರುತ್ ರಾವೊಂಕ್ ಜಾಯ್. ಕಶೆಂ ಪುಣಿಂ ಹ್ಯಾ ವಿಶುಕುಮಾರಾಕ್ ಆಪ್ಣೆ ಮುಟಿ ಭಿತರ್ ದವರುಂಕ್ ಜಾಯ್! ಆಪ್ಣಾಚಿ ತಸ್ವೀರ್ ಆಪ್ಣಾಚಾ ನಾಂವಾ ಸಂಗಿಂ ಫಾಲ್ಯಾಂ ಸಗ್ಳ್ಯಾ ಪತ್ರಾಂನಿ ಫಾಯ್ಸ್ ಜಾಂವ್ಚ್ಯಾ ಆದಿಂ ಆಪ್ಣೆ ವಿಶು ಕುಮಾರಾಕ್ ಆಪ್ಣಾಚೊ ಕರುಂಕ್ ಜಾಯ್. ನಾ ಜಾಲ್ಯಾರ್....?
ಏಕ್ ಪಾವ್ಟಿಂ ಆಪ್ಣಾಚಿ ಪಬ್ಲಿಸಿಟಿ ಜಾಲಿ ತರ್ ಹಿ ಖಬಾರ್ ರಾಶಿದಾಕ್ ಆನಿ ಇಕ್ಬಾಲಾಕ್ ಖಂಡ್ಕಿತ್ ಪಾವ್ತೆಲಿ. ಆನಿ ತೆ ಜಾಗೆ ಜಾತೆಲೆ. ತಾಣೆ ಚಿಂತ್ಲ್ಲ್ಯಾ ಪ್ರಾಸ್ ಉಲ್ಟೆಂಚ್ ಜಾಲಾಂ ತೆಂ ತಾಂಕಾಂ ಕಳ್ತಾನಾ ಆಪ್ಣಾಚಿ ಭದ್ರತಿ ರಿಸ್ಕೆರ್ ಪಡ್ತೆಲಿ!
ತೆದ್ನಾಂ!
ತೆದ್ನಾಂ ಆಪ್ಣಾಕ್ ಕುಮಕ್ ಕರುಂಕ್ ಸಕ್ಚೊ ಏಕ್ ಮಾತ್ರ್ ವ್ಯಕ್ತಿ ಮ್ಹಳ್ಯಾರ್ ರಾಯನ್!
ವ್ಹಯ್!
ಆಪ್ಣಾಚಾ ಫುಡಾರಾಚಾ ಝುಜಾಂತ್ ಆಪ್ಣಾಕ್ ಸಾಂಗಾತ್ ದೀಂವ್ಕ್ ಸಕತ್ ಆಸ್ಚೊ ಬಾಲಿವುಡಾಂತ್ಲೊ ಏಕ್ ಮಾತ್ರ್ ವ್ಯಕ್ತಿ ಮ್ಹಳ್ಯಾರ್ ರಾಯನ್!
ಆನಿ ವಿಶು ಕುಮಾರ್....?
ಕಿತೆಂ ಕರುಂ ಆತಾಂ?
ಆಲಿಯಾಚಿ ಮತ್ ತಾಚ್ಯಾಚ್ ಸ್ಥಿಮಿತಾ ಥಾವ್ನ್ ಚುಕೊನ್ ವೆತಾ ತಶೆಂ ತಾಕಾ ಭೊಗ್ಲೆಂ. ಎಕಾ ಕುಶಿನ್ ವಿಶು ಕುಮಾರ್! ಎಕಾ ಕುಶಿನ್ ರಾಯನ್! ದೊಗ್ಯ್ ಆಪ್ಣಾಕ್ ಜಾಯ್! ಆಪ್ಣಾಕ್ ಧಯ್ರಾಕ್ ರಾಯನ್ ಆನಿ ಝುಜ್ಚ್ಯಾಕ್ ವಿಶು ಕುಮಾರ್!
ಎಕಾಚ್ ಜಾಗ್ಯಾರ್ ಎಕಾಚ್ ವೆಳಾರ್ ಎಕಾಚ್ ಘಡಿಯೆಂತ್ ಹಾಂವ್ ದೊಗಾಂಕ್ ಕಶೆಂ....? ಆಲಿಯಾಚಿ ಮತ್ ವಾರ್ಯಾ ವೇಗಾನ್ ಚಿಂತುಂಕ್ ಲಾಗ್ಲಿ. ತಾಣೆ ಹ್ಯಾ ಇಕ್ಬಾಲ್ ಆನಿ ರಾಶಿದಾ ವಿಶ್ಯಾಂತ್ ಚಿಂತುಂಕ್ಚ್ ನಾತ್ಲ್ಲೆಂ.
ತಿತ್ಲೆಂಚ್!
ಮತಿಕ್ ಕಿತೆಂಗೀ ಜಳ್ಕಾಲ್ಲ್ಯಾ ಪರಿಂ ಜಾವ್ನ್ ತೆಂ ವಿಶು ಕುಮಾರಾ ತೆವ್ಶಿಂ ಘುಂವ್ಲೆಂ. ತೊ ಆಪ್ಣಾಕ್ ಪಳವ್ನ್ ಆಸ್ತಲೊ ಮ್ಹಳ್ಳೆಂ ತೆಂ ಜಾಣಾಂ ಆಸ್ಲ್ಲೆಂ. ತಾಣೆಂ ಚಿಂತ್ಲ್ಲ್ಯಾ ಪರಿಂಚ್ ಜಾಲ್ಲೆಂ. ವಿಶು ಕುಮಾರ್ ಆಲಿಯಾಕ್ ಪಯ್ಸ್ ಥಾವ್ನ್ಚ್ ಪಳವ್ನ್ ಆಸ್ಲ್ಲೊ. ತಶೆಂಚ್ ವಿಶು ಕುಮಾರಾಕ್ ಪಳವ್ನ್ ಹಾಸೊ ದಿಲ್ಲೆಂ ಆಲಿಯಾ ಆತಾಂ ಘುಂವ್ಲ್ಲೆಂಚ್ ರಾಯನಕ್ ಸೊಧುನ್ ಚಮ್ಕಾಲೆಂ.
ಮಾದಕ್ ಹಾಸೊ!
ಪಾರ್ವ್ಯಾಂಕ್ ಧರ್ಚ್ಯಾ ಪಯ್ಲೆಂ ತಾಂಕಾ ಭುಲಂವ್ಚ್ಯಾ ಪಾಸೊನ್ ಪಾಟಂವ್ಚ್ಯೊ ಹಾಸೊ!
ಆಲಿಯಾಕ್ ಆಪ್ಣಾಚಾ ಹಾಸ್ಯಾಂ ವಯ್ರ್ ಭರ್ವಸೊ ಆಸ್ಲ್ಲೊ. ವಿಶು ಕುಮಾರ್ ಆಪ್ಣಾಕ್ ಸೊಧುನ್ ಖಂಡಿತ್ ಯೆತಲೊ! ಆಲಿಯಾನ್ ಮತಿಂತ್ಚ್ ಗುಣಾಕಾರ್ ಕೆಲ್ಲೆಂ.
ವ್ಹಯ್! ತಾಚೆಂ ಗುಣಾಕಾರ್ ಸಾರ್ಕೆಂ ಜಾಲ್ಲೆಂ!
ಆಲಿಯಾನ್ ಚಿಂತ್ಲ್ಲ್ಯಾ ಪರಿಂಚ್ ಜಾಲ್ಲೆಂ!
ತಾಚ್ಯಾ ಸಮ್ಜಾನಾತ್ಲೆಲ್ಯಾ ವರ್ತಾನಾಕ್ ಪಳವ್ನ್ ವಿಶು ಕುಮಾರ್ ಆಲಿಯಾಕ್ ಸೊಧುಂಕ್ ಲಾಗ್ಲೊ. ತೆಂ ಆತಾಂ ರಾಯನಾ ಲಾಗಿಂ ಆಸ್ಲ್ಲ್ಯಾನ್ ವಿಶುಕುಮಾರಾಕ್ ಕಾಂಯ್ಚ್ ಕರುಂಕ್ ಜಾಲೆಂ ನಾ. ತೊ ಜೊಕ್ತ್ಯಾ ವೆಳಾಕ್ ರಾಕೊನ್ ರಾವ್ಲೊ.
*************
ಮಿಶೇಲ್!
ಸಂಸಾರಾಂತ್ಚ್ ಆಪ್ಣಾಕ್ ಸಗ್ಳ್ಯಾಂ ಪ್ರಾಸ್ ಅತೀ ಸುಖಿ ಮ್ಹಣೊನ್ ಮಿಶೇಲಾನ್ ಮಾಂದುನ್ ಘೆತ್ಲ್ಲೆಂ. ಮುಂಬಯಿ ಶ್ಹೆರಾಚ್ಯಾ ಪರಿಸರಾಕ್ ತೆಂ ಅಜೂನ್ ಹೊಂದೊನ್ ರಾವೊಂಕ್ ಸಕೊಂಕ್ ನಾತ್ಲ್ಲೆಂ ಜಾಲ್ಯಾರ್ಯ್ ತಾಚ್ಯಾ ಕಾಜಾರಾಚಾ ಭೆಸಾಚಾ ಸಂಸಾರಾಂತ್ ತೆಂ ರಾಯನಾಚಾ ಸಾಂಗಾತಾ ಸಂಪೂರ್ಣ್ ಹೊಂದೊನ್ ರಾವೊಂಕ್ ಸಕ್ಲ್ಲೆಂ.
ರಾಯನಾಚೆಂ ವರ್ತನ್ ಜಾಲ್ಯಾರ್ಯ್ ಮಿಶೇಲಾ ಸಂಗಿಂ ಚಡ್ ಮೊವಾಳ್ ಆನಿ ಚಡ್ ಮೊಗಾಳ್. ಕಾಜಾರ್ ಜಾವ್ನ್ ಮುಂಬಯಿ ಆಯಿಲ್ಲ್ಯಾ ಮಿಶೇಲಾಕ್, ಆಪ್ಲ್ಯಾ ಘೊವಾಕ್ ಸಮ್ಜೊಂಕ್ ಚಡ್ ದೀಸ್ ಗೆಲೆ ನಾಂತ್. ತೆಂ ಆದ್ಲೆಂ ತಾಚೆಂ ಮಂಗ್ಳುರ್ಚೆಂ ಪರಿಸರ್ಚ್ ದುಸ್ರೆಂ ಆನಿ ಹೆಂ ಆತಾಂ ಹಾಂಗಾ ಮುಂಬಯಿಚೆಂ ಪರಿಸರ್ಚ್ ದುಸ್ರೆಂ! ಮಂಗ್ಳುರಾಂತ್ಲೆಂ ತೆಂ ತಾಚ್ಯಾ ಆಜ್ಯಾಚೆಂ ಬಿಜ್ನೆಸ್ ಹ್ಯಾ ಮುಂಬಯಿಚ್ಯಾ ಬಿಜ್ನೆಸಾ ಮುಕಾರ್ ಕಾಂಯ್ಚ್ ನ್ಹಯ್ ಆಸ್ಲ್ಲೆಂ.
ಗಾವಾಂತ್ ಜಾಲ್ಯಾರ್ಯ್ ಮಿಶೇಲ್ ತಾಚ್ಯಾ ಆಜ್ಯಾ ಸಾಂಗಾತಾ ಸಗ್ಳ್ಯಾ ತಾಚ್ಯಾ ಕಾಮಾಂತ್ ಮೆತೆರ್ ಜಾತಾಲೆಂ. ತಾಕಾ ತೆಂ ಪಸಂದ್ಯ್ ಜಾತಾಲೆಂ. ತ್ಯಾ ಪೃಕೃತೆ ಸವೆಂ ಆಪ್ಣಾಚೊ ಕಸಲೊಗೀ ಸಂಭಂಧ್ ಆಸಾ ಮ್ಹಳ್ಳ್ಯಾ ಪರಿಂ ಭೊಗ್ತಾಲೆಂ. ಪುಣ್ ಮುಂಬಯಿಂತ್ ತಿ ಪೃಕೃತಿ ನಾತ್ಲ್ಲಿ. ತಿ ಸೊಭಾಯ್ ನಾತ್ಲ್ಲಿ. ಹಾಂಗಾಸರ್ ಸಗ್ಳೆಂ ಯಾಂತ್ರೀಕ್ರತ್ ಜೀವನ್! ಜಶೆಂ ವೇಳ್ ಧಾಂವ್ತಾ ತಶೆಂ ಮನ್ಶ್ಯಾನ್ ಧಾಂವೊಂಕ್ ಜಾಯ್!
ಮಂಗ್ಳುರಾಂತ್ ಆಸ್ತಾನಾ ಆಪ್ಲ್ಯಾ ನಶೀಬಾಕ್ ಚಿಂತುನ್ ಕರ್ಗೊನ್ ಬಸ್ಚೆಂ ಮಿಶೇಲ್ ಮುಂಬಯಿಂತ್ ರಾಯನಾಚಾ ಉತ್ರಾಂನಿ ಸಂತೊಸಾನ್ ನಾಚೊನ್ ಉಡ್ತಾಲೆಂ. ಆಪ್ಲ್ಯಾ ಜಲ್ಮಾ ಥಾವ್ನ್ ಆವಯ್ ಬಾಪಯ್ಕ್ ಹೊಗ್ಡಾವ್ನ್ ಮ್ಯಾಂಚೆಸ್ಟರಾ ಥಾವ್ನ್ ಮಂಗ್ಳುರಾಕ್ ಪಾವೊನ್ ಹಾಂಗಾಸರ್ಯ್ ದೊಗಾಂ ಜಾಣ್ತ್ಯಾಂಕ್, ದೊಗಾಂ ಪ್ರಾಯ್ವಂತಾಂಕ್ ಆಪುಣ್ ತಾಂಚಾ ಫುಡಾರಾಚೊ ದಿವೊ ಜಾವ್ನ್ ಉದೆವ್ನ್ ಆಯಿಲ್ಲೆಂ ಮಿಶೇಲ್ ಭಿತರ್ಲ್ಯಾ ಭಿತರ್ಚ್ ಭಿವ್ಕುರೆಂ ಜಾಲ್ಲೆಂ. ಆಪ್ಣಾ ಇತ್ಲ್ಯಾಕ್ ಸಭಾರ್ ಸವಾಲಾ ತೆಂ ವಿಚಾರ್ತಾಲೆಂ. ಸಭಾರ್ ಸವಾಲಾಂಕ್ ತೆಂಚ್ ಜವಾಬ್ ದಿತಾಲೆಂ. ತ್ಯಾ ಭಾಯ್ರ್ ತ್ಯಾ ಮುಗ್ದ್ ಗಾಂವ್ಚ್ಯಾ ಲೊಕಾಚೆಂ ಜಿವಿತ್ ತಾಣೆಂ ಪಳೆಲ್ಲೆಂ.
ಮುಂಬಯಿಂತ್ ಹೆಂ ಸಗ್ಳೆಂ ಕಾಂಯ್ ನಾ!
ಬಿಜ್ನೆಸಾಕ್ ಆನಿ ಘರ್ಚ್ಯಾ ರಾಟಾವಳಿಕ್ ರಾಯನ್ ಮಧೆಂ ಹಾಡಿನಾತ್ಲ್ಲೊ. ಘರಾ ಭಿತರ್ ಪಾಂಯ್ ದವರ್ತಾನಾ ರಾಯನ್ ಫಕತ್ತ್ ಮಿಶೇಲಾಚೊ ಘೊವ್ ಜಾವ್ನ್ ಮಾತ್ರ್ ಯೆತಾಲೊ. ಸಗ್ಳ್ಯಾ ವರ್ನಿಂ ಚಡ್ ಜಾವ್ನ್ ರಾಯನ್ ಮಿಶೇಲಾ ಸಂಗಿಂ ಖುಶ್ ಆಸ್ತಾಲೊ.. ಹ್ಯಾ ಖುಶಿಯೆಚೊ ಫುಲಾಂ ತುರೊ ತೊ ಮಿಶೇಲಾಚಾ ಮಾತ್ಯಾರ್ ಚಡಯ್ತಾಲೊ.
"ಹಾಂವ್ ಮಿಶೇಲ್, ಆಪ್ಲ್ಯಾ ಘೊವಾಕ್ ತಾಚೆಂ ನಶೀಬ್ ಕಶೆಂ ಜಾಂವ್ಕ್ ಸಕ್ತಾಂ?"
ರಾಯನ್ ಆಪ್ಲ್ಯಾ ಜಯ್ತಾಚೆಂ ಸುಂಕಾಣ್ ’ಮಿಶೇಲ್’ ಮ್ಹಣೊನ್ ವೊಲಾಯ್ತಾನಾ ಮಿಶೇಲ್ಯ್ ಖುಶ್ ಜಾತಾಲೆಂ. ಪುಣ್ ಭಿತರ್ಲ್ಯಾ ಭಿತರ್, ಜೆದ್ನಾಂ ರಾಯನ್ ಆಪ್ಣಾ ಥಾವ್ನ್ ಪಯ್ಸ್ ಆಸ್ತಾ ತೆದ್ನಾಂ ತೆಂ ಹ್ಯಾ ವಿಶಿಂ ಚಿಂತುಂಕ್ ಪಡ್ತಾಲೆಂ. ಪುಣ್ ರಾಯನಾನ್ ದಾಖಂವ್ಚ್ಯಾ ಖುಶಿಯೆ ಮುಕಾರ್ ಮಿಶೇಲಾಕ್ ಸತ್ ವಳ್ಕೊನ್ ಘೆಂವ್ಕ್ ಪಡ್ತಾಲೆಂ.
"ಜಾಂವ್ಕ್ ಪುರೊ! ಆಪುಣ್ ರಾಯನಾಕ್ ತಾಚೆಂ ನಶೀಬ್ ಜಾವ್ನ್ ಆಯ್ಲ್ಯಾಂ ಜಾಂವ್ಕ್ಯ್ ಪುರೊ!" ತೆಂ ಆಪ್ಣಾಕ್ಚ್ ಸಮ್ಜಾಯ್ತಾಲೆಂ.
ಪುಣ್ ಶೀತಲಾಚೆಂ ಜಿವಿತ್ ಶೀತಲಾಕ್ ನಶೀಬ್ ಘೆವ್ನ್ ಯೇಂವ್ಕ್ ನಾತ್ಲ್ಲೆಂ.
ಹೆಂ ಮಿಶೇಲಾಕ್ ತೆಂ ಮುಂಬಯಿ ಆಯ್ಲ್ಯಾ ಉಪ್ರಾಂತ್ ಆಜ್ ಕಳ್ಲ್ಲೆಂ!
ಆಜ್ಚ್ ಶೀತಲಾನ್ ಪೋನ್ ಕರುನ್ ಪೊನಾರ್ ಉಚಾರ್ಲ್ಲ್ಯಾ ಉತ್ರಾಂನಿ ತೆಂ ಸಮ್ಜಾಲ್ಲೆಂ.
ಶೀತಲಾಚೆಂ ಕಾಜಾರ್ಚ್ ರಾಯನಾಚಾ ಆನಿ ಮಿಶೇಲಾಚಾ ಎಕ್ವಟಾಕ್ ಕಾರಾಣ್ ಜಾಲ್ಲೆಂ. ಮಿಶೇಲ್ ಹಾಕಾ ಮಾಂದುನ್ ಘೆತಾಲೆಂ. ಶೀತಲಾಚೆಂ ಕಾಜಾರ್ ಜರ್ ಜಾಂವ್ಕ್ ನಾತ್ಲ್ಲೆಂ ಜಾಲ್ಯಾರ್ ನಾ ರಾಯನ್ ಮಂಗ್ಳುರಾಕ್ ಯೆತೊ ತಾ ತಾಂಚಿ ವಳಕ್ ಜಾತಿ ನಾ ತಾಂಚೆಂ ಕಾಜಾರ್ ಜಾತೆಂ.
ಮಿಶೇಲ್ ಜರ್ ತರ್ ಆಜ್ ಸುಖಾನ್ ಆಸಾ ಆನಿ ತಾಚ್ಯಾ ಘೊವಾ ಸಂಗಿಂ ಸಂತೊಸಾನ್ ಆಸಾ ಜಾಲ್ಯಾರ್ ತಾಕಾ ಕಾರಾಣ್ಚ್ ಶೀತಲ್!
ತೆಂಚ್ ಶೀತಲ್ ಆಜ್.....!?
ಆಪ್ಲ್ಯಾ ಭುರ್ಗ್ಯಾಪಣಾರ್ ಥಾವ್ನ್ ದೊಗಾಂಯ್ನಿ ಜಿವಿತ್ ಸಾಂಗಾತಾ ಕಾಡ್ಲ್ಲೆಂ.
ದೊಗಾಂಯ್ ಎಕಾಮೆಕಾ ಚಡ್ ಲಾಗ್ಶಿಲಿಂ ಇಶ್ಟಿಣಿಂ ಜಾಲ್ಲಿಂ.
ಕೊಣಾಯ್ ಲಾಗಿಂ ಸಾಂಗೊಂಕ್ ಜಾಯ್ನಾತ್ಲ್ಲೆಂ ತಿಂ ಎಕಾಮೆಕಾ ಸಾಂಗ್ತಾಲಿಂ.
ತರ್ ಆಜ್?
ಆಜ್ ಶೀತಲ್ ಕಿತ್ಯಾಕ್ ಆಶೆಂ ಉಲಯ್ತಾ?
ಆಪುಣ್ ಹಾಂಗಾಸರ್ ಇತ್ಲ್ಯಾ ಸಂತೊಸಾನ್ ಆಸ್ತಾನಾ ತ್ಯಾ ಕುಶಿನ್ ಶೀತಲ್ ಆಪ್ಲೆಸ್ತಕಿಂ ಉಜ್ಯಾರ್ ಬಸ್ಲೆಲ್ಯಾ ಪಾರ್ವ್ಯಾ ಪರಿಂ ದಡ್ಬಡ್ತಾ ತಶೆಂ ಮಿಶೇಲಾಕ್ ಭೊಗ್ಲ್ಲೆಂ.
ಗಾಂವಾಂತ್ಯ್ ತಾಂಚೆಂ ಜಿವಿತ್ ಸಾಂಗಾತಾ ಚಲ್ಲ್ಲೆಂ. ಹಾಂಗಾಸರ್ ಮುಂಬಯಿಂತ್ ಜಾಲ್ಯಾರ್ಯ್ ತಿಂ ಸಾಂಗಾತಾ ಆಸ್ಲ್ಲಿಂ. ಗಾಂವಾಂತ್ ತಾಂಚೆಂ ಘರಾಣೆಂ ಎಕಾಮೆಕಾ ಚಡ್ ವಳ್ಕಾತಾಲೆಂ ಜಾಲ್ಲ್ಯಾನ್ ತಿಂ ಎಕಾ ಘರಣ್ಯಾಪರಿಂ ಚಡ್ ಲಾಗಿಂ ಆಸ್ಲ್ಲಿಂ. ಪುಣ್ ಹಾಂಗಾ.....?
ಹಾಂಗಾ ಮಿಶೇಲಾಚೆಂ ಆನಿ ಶೀತಲಾಚೆಂ ಘರಾಣೆಂ ಪಯ್ಸ್ ಪಯ್ಸ್ ಆಸ್ಲ್ಯಾರ್ಯ್ ರಾಯನಾಕ್ ಆನಿ ವಿಶು ಕುಮಾರಾಕ್ ತಾಂಚಾ ಬಿಜ್ನೆಸಾಚ್ಯಾ ಸಂಸಾರಾಂತ್ ಆಸ್ಲ್ಲ್ಯಾ ಲಾಗ್ಶಿಲ್ಯಾ ಸಂಭಂಧಾ ಥಾವ್ನ್ ತಿಂ ಪಯ್ಸ್ ಆಸೊನ್ಯ್ ಲಾಗಿಂ ಆಸ್ಲ್ಲಿಂ! ತಿತ್ಲೆಂಚ್!
ಗಾಂವಾಂತ್ಲ್ಯಾ ಪರಿಸರಾಂತ್ ತಾಂಚಾ ಮಧೆಂ ಕಿತೆಂಯ್ ಆಸ್ಲ್ಯಾರ್ಯ್ ತಿಂ ಎಕಾಮೆಕಾಲಾಗಿಂ ಉಲಯ್ತಾಲಿಂ. ಪುಣ್ ಹಾಂಗಾ.....?
ಶೀತಲ್ ಅಪ್ರೂಪ್ ಮಿಶೇಲಾಕ್ ಪೋನ್ ಕರ್ತಾಲೆಂ. ತಾಚ್ಯಾ ಉಲವ್ಣ್ಯಾಂತ್ಯ್ ತೊ ಆದ್ಲೊ ಹುರುಪ್ ಯಾ ತೊ ಆದ್ಲೊ ಉತ್ಸಾಹ್ ಆತಾಂ ನಾತ್ಲ್ಲೊ.
ಆಜ್ ಜಾಲ್ಯಾರ್ಯ್ ಭಿಲ್ಕುಲ್ ನಾತ್ಲ್ಲೊ!
"ಶೀತಲ್....! ತುಕಾ ಆಮ್ಗೆರ್ ಯೇಂವ್ಕ್ ಜಾತಾ?"
ಫೊನಾ ವಯ್ಲ್ಯಾ ಶೀತಲಾಚಾ ಮಿಸ್ತೆರಾಚಾ ಉತ್ರಾಂಕ್ ಸಮ್ಜಾನಾಸ್ತಾನಾ ಮಿಶೇಲಾನ್ ಶೀತಲಾಕ್ ಆಪ್ಣಾಚಾ ಘರಾ ಯೇಂವ್ಕ್ ಆಪವ್ಣೆ ದಿಲೆಂ. ಪೋನಾ ವಯ್ಲೆಂ ದೊಗಾಂನಿ ಉಲಂವ್ಚೆಂ ತೆಂ ಉಲೊಣೆಂ ಆವಾಜಾಕ್ ಮಾತ್ರ್ ಸ್ಪಂದನ್ ಕರ್ತಾ ಶಿವಾಯ್ ದೋನ್ ಕಾಳ್ಜಾಂಕ್ ಯಾ ದೋನ್ ದಿಶ್ಟಿಂಕ್ ಸ್ಪಂದನ್ ಕರಿನಾ ಮ್ಹಳ್ಳೆಂ ಮಿಶೇಲ್ ಜಾಣಾಂ ಆಸ್ಲ್ಲೆಂ.
"ಹಾಂ ಶೀತಲ್? ತುಂ ಯೆತಾಯ್?" ಮಿಶೇಲಾಚಾ ಆಪವ್ಣ್ಯಾಕ್ ಶೀತಲಾ ಥಾವ್ನ್ ಕಾಂಯ್ಚ್ ಜವಾಬ್ ನಾತ್ಲ್ಲಿ.
"ಮ್ಹಾಕಾ ಮನ್ ನಾ ಮಿಶೇಲ್......!" ಶೀತಲಾಚಾ ಜವಾಬೆಂತ್ ಖಂತ್ ಆನಿ ಬೆಜಾರಾಯ್ ಸ್ಪಶ್ಟ್ ಝಳ್ಕಾತಾಲಿ. ತಾಚ್ಯಾ ಹ್ಯಾ ಜವಾಬೆ ಪಾಟ್ಲ್ಯಾ ಖಂತಿಚೆಂ ಕಾರಾಣ್ ಕಿತೆಂ ಮ್ಹಳ್ಳೆಂ ತೆಂ ಮಿಶೇಲಾಕ್ ಏಕ್ ಮಿಸ್ತೆರ್ ಮ್ಹಳ್ಳ್ಯಾ ಪರಿಂ ಜಾಲೆಂ.
"ಕಿತ್ಯಾಕ್......?"
"ಕಾಂಯ್ ನಾ! ಅಶೆಂಚ್......!"
"ಹಾಂವ್ ತುಜ್ಯೆ ಲಾಗಿಂ ಯೇಂವ್.....?" ವಿಚಾರ್ಲ್ಲೆಂ ಮಿಶೇಲ್ "ಓ.ಕೆ.! ಹಾಂವ್ ರಾಯನಾ ಲಾಗಿಂ ವಿಚಾರ್ತಾಂ ಆನಿ ಯೆತಾಂ!"
ಶೀತಲ್ ಆಪ್ಣಾಚಾ ಘರಾ ಯೇಂವ್ಕ್ ತಯಾರ್ ನಾ ತೆಂ ಕಳೊನ್ ಮಿಶೇಲಾನ್ಚ್ ಆತಾಂ ಆಪ್ಣೆಂ ಶೀತಲಾಚಾ ಘರಾ ವೆಚೊ ನಿರ್ಧಾರ್ ಘೆತ್ಲೊ.
"ರಾಯನಾಕ್ ಮಾತ್ರ್ ಕಾಂಯ್ ಸಾಂಗಾನಾಕಾ ಮಿಶೇಲ್!" ಶೀತಲಾನ್ ವಿನತಿ ಕೆಲಿ.
"ಡೋಂಟ್ ವರ್ರಿ! ತಾಕಾ ಹಾಂವ್ ಕಾಂಯ್ ಸಾಂಗಾನಾ. ತಶೆಂಯ್ ತೊ ಹ್ಯಾ ವಿಶಯಾಂತ್ ಮೆತೆರ್ ಜಾಯ್ನಾಂ ಶೀತಲ್!"
"ಐ ಹೋಪ್ ಸೋ!" ಶೀತಲಾಚೊ ಉದ್ಗಾರ್ ಕಿತ್ಯಾಕ್ಗೀ ಮಿಶೇಲಾಚಾ ಸಮ್ಜಣೆ ಭಾಯ್ರ್ ಆಸಾ ಮ್ಹಳ್ಳ್ಯಾ ಪರಿಂ ತಾಕಾ ಜಾಲೆಂ.
"ಜಾಯ್ತ್...! ಬಾಯ್. ಹಾಂವ್ ರಾಯನಾಕ್ ಪೋನ್ ಕರ್ತಾಂ!"
ಪೋನ್ ಭಂಧ್ ಕೆಲ್ಲೆಂ ಮಿಶೇಲ್ ಥೊಡೊ ವೇಳ್ ಚಿಂತುಂಕ್ ಪಡ್ಲೆಂ.
ಆಪ್ಣಾಚ್ಯಾ ಕಾಜಾರ್ ಥಾವ್ನ್ ಇತ್ಲೆಂ ಖುಶ್ ಆಸ್ಲ್ಲೆಂ ಶೀತಲ್ ಆಜ್ ಆಶೆಂ ಕಿತ್ಯಾಕ್ ಖಂತಿಶ್ಟ್ ಜಾಲಾಂ? ಮಂಗ್ಳುರ್, ಆಪ್ಲ್ಯಾ ಆವಯ್ ಬಾಪಾಯ್ಚೆಂ ಘರ್ ಸಾಂಡುನ್ ಯೆತಾನಾ ತಾಚ್ಯಾ ಮತಿಂತ್ ಕಿತ್ಲ್ಯೊ ನವ್ಯೊ ಆಶಾ ಆಸ್ಲ್ಲ್ಯೊ. ಜಿಮ್ಮಿಚ್ಯಾ ಫುಡ್ಯಾನ್ ತಾಣೆಂ ಹ್ಯಾ ಆಶೆಂಕ್ ಕಿತ್ಲ್ಯಾ ಸುಲಾಭಾಯೆನ್ ಉಚಾರ್ಲ್ಲೆಂ. ತೆಂ ಹ್ಯಾ ಮುಂಬಯಿಂತ್ ಏಕ್ ನವೆಂ ಜಿವಿತ್ ಜಿಯೆಂವ್ಚಿ ಆಶಾ ಘೆವ್ನ್ ಆಯಿಲ್ಲೆಂ. ಆಪ್ಲ್ಯಾ ಆವಯ್ ಬಾಪಾಯ್ಚ್ಯಾ ತ್ಯಾ ಬಿಜ್ನೆಸಾಚೊ ವಾಂಟೊ ಜಾವ್ನ್ ಜಿಯೆಲ್ಲ್ಯಾ ತಾಚ್ಯಾ ದೊಳ್ಯಾಂಕ್ ಜಿಮ್ಮಿನ್ ಉಗ್ತೆ ಕರ್ತಾನಾ ಶೀತಲ್ ಕಿತ್ಲೆಂ ಖಂತಿಶ್ಟ್ ಜಾಲ್ಲೆಂ ತಿತ್ಲೆಂಚ್ ತೆಂ ಆಪ್ಲ್ಯಾ ಫುಡಾರಾಚೆಂ ಜಿವಿತ್ ಆಪುಣ್ ಆಪ್ಲ್ಯಾ ನೊವ್ರ್ಯಾ ಸವೆಂ ಆಪ್ಲ್ಯಾ ಮತಿಂತ್ಲ್ಯಾ ಖುಶೆ ಪರಿಂ ಕಾಂಡುಂಕ್ ಸಕ್ತೆಲಿಂ ಮ್ಹಳ್ಳ್ಯಾ ಭರ್ವಸ್ಯಾನ್ ತೆಂ ಖುಶ್ ಜಾಲ್ಲೆಂ. ತಸಲೆಂ ಶೀತಲ್ ಆಜ್....? ಆಜ್ ತಾಣೆಂ ಖುಶ್ ಆಸೊಂಕ್ ಜಾಯ್ ಆಸ್ಲ್ಲೆಂ. ಜಿವಿತಾಕ್ ಜಿಯೆಂವ್ಚ್ಯಾ ವಾಟೆರ್ ಖಂಯ್ಚೆಂ ಬರೆಂ ಆನಿ ಖಯ್ಚೆಂ ವಾಯ್ಟ್ ಮ್ಹಳ್ಳೆಂ ಸಮ್ಜೊನ್ ಘೆಂವ್ಚಿ ಶಾಥಿ ತಾಚ್ಯಾ ಕಾಳ್ಜಾಂತ್ ಜಿಮ್ಮಿನ್ ವೊಂಪ್ಲ್ಲಿ. ಹ್ಯಾಚ್ ತಾಚ್ಯಾ ಶಾಥೆ ವಯ್ರ್ ತಾಕಾ ಭರ್ವಸೊಯ್ ಆಸ್ಲ್ಲೊ. ತರ್ ಆಜ್ ಹ್ಯಾ ಭರ್ವಸ್ಯಾಕ್ ಕಿತೆಂ ಜಾಲೆಂ? ಮಿಶೇಲಾಕ್ ಕಾಂಯ್ ಸಮ್ಜಾನಾತ್ಲ್ಲೆಂ.
ಆಜ್ ರಾಯನ್ ಮುಂಬಯಿ ಥಾವ್ನ್ ಪೂನಾ ಗೆಲ್ಲೊ. ಮಿಶೇಲಾನ್ ರಾಯನಾಕ್ ಪೋನ್ ಕೆಲೆಂ.
"ಮ್ಹಜ್ಯೆ ಲಾಗಿಂ ವಿಚಾರುಂಕ್ ಕಿತೆಂ ಆಸಾ ಸ್ವೀಟ್ಹಾರ್ಟ್! ತುಕಾ ವೊಚೊಂಕ್ ಜಾಯ್ ಜಾಲ್ಯಾರ್ ತುಂ ವಚ್! ಪುಣ್ ವೆತಾಯ್ ಕಶೆಂ.....?" ರಾಯನಾನ್ ಕಾಂಯ್ಚ್ ವಿಚಾರಿನಾಸ್ತಾನಾ ಮಿಶೇಲಾಕ್ ಪರ್ವಣ್ಗಿ ದಿಲ್ಲಿ.
"ಅಫೀಸಾಕ್ ಪೋನ್ ಕರ್ತಾಯ್.....?"
"ಸ್ಮಿತಾಕ್ ಪೋನ್ ಕರ್ ಆನಿ ಡ್ರೈವರಾಕ್ ದಾಡುಂಕ್ ಸಾಂಗ್! ತೆಂ ದಾಡ್ತೆಲೆಂ!"
"ಹಾಂವ್ ಕರಿನಾ ತುಂ ಕರ್!" ಮಿಶೇಲಾಚೊ ತೊಚ್ಚ್ ನೆಣ್ತೊ ಸ್ವಭಾವ್.
"ಮಿಶೇಲ್ ಡಾರ್ಲಿಂಗ್....!" ರಾಯನಾನ್ ಆಪ್ಲ್ಯಾ ತಾಳ್ಯಾಂತ್ ತಾಳೊ ವೊಡ್ಲೊ. "......ತುಂ ರಾಯನಾಚಾ ಬಿಜ್ನೆಸಾಚೆಂ ರಾಣಿ ಡಾರ್ಲಿಂಗ್!"
"ಮ್ಹಾಕಾ ಬರೆಂ ಜಾಯ್ನಾಂ! ತುಂ ಪೋನ್ ಕರುನ್ ತಾಕಾ ಸಾಂಗ್.....!" ಆತಾಂ ಮಿಶೇಲಾನ್ ಆಪ್ಲ್ಯಾ ತಾಳ್ಯಾಂತ್ ತಾಳೊ ವೊಡ್ಲೊ.
"ಮ್ಹಳ್ಯಾರ್ ತುಕಾ ಪೋನ್ ಕರುಂಕ್ ನಾಕಾ......?"
"ತುಜ್ಯಾ ಆಫೀಸಾಚ್ಯಾಂಕ್ ಆರ್ಡರ್ ದೀಂವ್ಕ್ ಮ್ಹಾಕಾ ಬರೆಂ ಲಾಗಾನಾ!" ಮಿಶೇಲ್ ನರ್ಗಾಲೆಂ.
"ತುಂ ತುಕಾಚ್ ಇತ್ಲೆಂ ಲ್ಹಾನ್ ಮ್ಹಣೊನ್ ಕಿತ್ಯಾಕ್ ಚಿಂತಾಯ್ ಮಿಶೇಲ್?"...... "ಡಾರ್ಲಿಂಗ್ ತುಂ ಆತಾಂ ಮಂಗ್ಳುರಾಂತ್ ನಾಂಯ್! ತುಂ ಮುಂಬಯಿಂತ್ ಆಸಾಯ್.... ಮುಂಬಯಿಂತ್! ಯು ಆರ್ ಎ ಕ್ವೀನ್ ನೌ! ಆಲ್ಫ್ರೆಡ್ ರಾಯನ್ಸ್ ಕ್ವೀನ್!" ರಾಯನ್ ಹಾಸ್ಲೊ.
"ಡೋಂಟ್ ಬಿ ಸಿಲ್ಲಿ! ತುಂ ಪಯ್ಲೆಂ ಆಫೀಸಾಕ್ ಪೋನ್ ಕರ್. ಹಾಂವ್ ರೆಡಿ ಜಾತಾಂ. ಓ. ಕೆ. ಬಾಯ್!"
"ಹಲೋ ಹಲೋ..... ಏಕ್ ಮಿನಿಟ್! ತಿತ್ಲೊ ಆಮ್ಚೊರ್ ಕಿತೆಂ? ಬರೆಂ ಸೊಭಿತ್ ಥರಾನ್ ಬಾಯ್ ಮ್ಹಣ್ ಸಾಂಗ್ ಡಾ.........ರ್ಲಿಂಗ್!" ರಾಯನಾಚೊ ತಾಳೊ ಲಾಂಬೆಲೊ.
"ಓ.ಕೆ. ಬಾಯ್!" ಮ್ಹಳ್ಳ್ಯಾ ಮಿಶೇಲಾನ್ ಪೋನ್ ದವರ್ಲೆಂ. ತೆಂ ಆಪ್ಲ್ಯಾ ಘೊವಾಚಾ ಸ್ವಭಾವಾಕ್ ಜಾಣಾಂ ಆಸ್ಲ್ಲೆಂ. ರಾಯನಾಲಾಗಿಂ ಉಲವ್ನ್ ರಾವ್ಲ್ಯಾರ್ ತೊ ಖಂಡಿತ್ ಜಾವ್ನ್ ಪೋನ್ ಭಂಧ್ ಕರ್ಚೊ ನಾ. ವೊರಾಂಗಟ್ಲ್ಯಾನ್ ಜಾಲ್ಯಾರ್ಯ್ ತೊ ಮಿಶೇಲಾಲಾಗಿಂ ತಶೆಂಚ್ ಉಲವ್ನ್ ರಾವ್ತಲೊ.
ಮಿಶೇಲ್ ಆತಾಂ ನ್ಹೆಸೊಂಕ್ ಆಯ್ತೆಂ ಜಾಲೆಂ.
ಸುಮಾರ್ ವೀಸ್ ಮಿನುಟಾಂನಿ ರಾಯನಾಚಾ ಆಫೀಸಾ ಥಾವ್ನ್ ಡ್ರೈವರ್ ತಾಚ್ಯಾ ಮಾರುತಿ ಕಾರಾರ್ ರಾಯನಾಚಾ ಘರಾ ಯೇವ್ನ್ ಪಾವ್ಲೊ.
"ಖಂಯ್ಚೆಂ ಕಾರ್ ಭಾಯ್ರ್ ಕಾಡುಂ ಮ್ಯಾಡಮ್....? ಸಾಯ್ಬಾನ್ ಮರ್ಸಿಡೀಸ್ ಕಾಡುಂಕ್ ಸಾಂಗ್ಲಾಂ!" ಡ್ರೈವಾರಾನ್ ವಿನತೆನ್ ವಿಚಾರ್ಲೆಂ. ತಾಚ್ಯಾ ತೊಂಡಾರ್ ಭಿರಾಂತ್ ಸ್ಪಶ್ಟ್ ದಿಸ್ತಾಲಿ.
"ಬರೆಂ! ತೆಂಚ್ ಕಾಡ್!" ಮಿಶೇಲ್ ದುಸ್ರೆಂ ಕಾಂಯ್ ಉಲಯ್ಲೆಂ ನಾ.
ಮಿಶೇಲಾನ್ ಸಾಂಗ್ಲ್ಲೆಂ ಆಯ್ಕೊನ್ ಡ್ರೈವರಾನ್ ಆಫೀಸ್ ಕಾಮಾಚಾ ಮಾರುತಿ ಕಾರಾಕ್ ಗ್ಯಾರೇಜಿಂತ್ ದವರುನ್ ಧವ್ಯಾ ಮರ್ಸಿಡೀಸಾಕ್ ಸ್ಟಾರ್ಟ್ ಕೆಲೆಂ. ವಯ್ಲ್ಯಾಭಾರ್ ಕಾರಾಕ್ ಬಾನೆಟಾಚಾ ವಸ್ತುರಾನ್ ಪೊಶೆವ್ನ್ ಕಾರ್ ರಿವರ್ಸ್ ಕಾಡುನ್ ಹಾಡುನ್ ಮುಕ್ಲ್ಯಾ ದಾರಾ ಮುಕಾರ್ ತಾಣೆಂ ರಾವಯ್ಲೆಂ.
ತಿತ್ಲ್ಯಾರ್!
ನ್ಹೆಸೊನ್ ತಯಾರ್ ಜಾಲ್ಲೆಂ ಮಿಶೇಲ್ ಘರಾ ಥಾವ್ನ್ ಭಾಯ್ರ್ ಯೆತಾನಾ ಹ್ಯಾ ಕುಶಿಕ್ ಆಯಿಲ್ಲ್ಯಾ ಡ್ರೈವರಾನ್ ಪಾಟ್ಲೆಂ ದಾರ್ ತಾಕಾ ಉಗ್ತೆಂ ಕರುನ್ ದಿಲೆಂ. ಮಿಶೇಲ್ ಕಾರಾರ್ ಬಸ್ತಾನಾ ಡ್ರೈವರಾನ್ಚ್ ಕಾರಾಚೆಂ ದಾರ್ ದಾಂಪುನ್ ತೊ ಆತಾಂ ವೆವೆಗ್ಗಿಂ ಯೇವ್ನ್ ಡ್ರೈವಿಂಗ್ ಸಿಟಾರ್ ಬಸ್ಲೊ.
"ಕಾಂಯ್ ಘೆಂವ್ಕ್ ಆಸ್ಲ್ಲೆಂ ಮ್ಯಾಡಮ್....?" ಡ್ರೈವರಾನ್ ಸವಾಲ್ ಕೆಲೆಂ.
"ಕಾಂಯ್ ನಾ! .....ವಚ್!"
"ವಾರ್ಸೋವಾ ಮ್ಯಾಡಮ್....?" ಡ್ರೈವರಾನ್ ಪರ್ತ್ಯಾಕ್ ವಿಚಾರ್ಲೆಂ.
"ವ್ಹಯ್!"
ಮಿಶೇಲಾಚಿ ಜವಾಬ್ ಆಯ್ಕೊನ್ ಡ್ರೈವರಾನ್ ಕಾರಾಚೆಂ ಆಕ್ಸಿಲೇಟರ್ ದಾಂಬ್ಲೆಂ. ರಾಯನಾಚಾ ಬೊಂಗ್ಲ್ಯಾಚಾ ಕಂಪೌಂಡಾ ಥಾವ್ನ್ ಭಾಯ್ರ್ ಆಯಿಲ್ಲೆಂ ತೆಂ ಕಾರ್ ವ್ಹಳೂ ಮುಕ್ಲ್ಯಾ ರಸ್ತ್ಯಾಕ್ ದೆಂವ್ಲೆಂ.
"ಹಾಂವ್ ಆಫೀಸಾಂತ್ ನಾತ್ಲ್ಲೊಂ ಮ್ಯಾಡಮ್. ತಶೆಂ ಥೊಡೊ ವೇಳ್ ಜಾಲೊ!" ಕಾರ್ ರಸ್ತ್ಯಾರ್ ಪಾವ್ತಾನಾ ಡ್ರೈವರ್ಚ್ ಉಲಯ್ಲೊ.
ಮಿಶೇಲ್ ಮೌನ್ ಆಸ್ಲ್ಲೆಂ. ತಾಣೆಂ ಕಾಂಯ್ ಜಾಪ್ ಕಾಡ್ಲಿ ನಾ.
"ಬೆಂಗ್ಳುರ್ ಥಾವ್ನ್ ಏಕ್ ಬಿಜ಼ಿನೆಸ್ ಪಾರ್ಟಿ ಆಯ್ಲ್ಯಾ ಮ್ಯಾಡಮ್! ತಾಂಕಾಂ ಹೊಟೇಲಾಚೆಂ ಆರೇಂಜ್ ಕರುಂಕ್ ಆಸ್ಲ್ಲೆಂ. ತಶೆಂ.....!"
ಹೊ ಡ್ರೈವರ್ ಆಪ್ಣಾಕ್ ಕಿತೆಂಗೀ ಸಮ್ಜಾಂವ್ಕ್ ಪ್ರಯತ್ನ್ ಕರ್ತಾ ಮ್ಹಳ್ಳೆಂ ತೆಂ ತಾಚ್ಯಾ ಉತ್ರಾಂನಿ ಮಿಶೇಲಾಕ್ ಕಳಿತ್ ಜಾಲೆಂ.
ಕಾಂಯ್ ಹೊ ಆಪುಣ್ ವೇಳ್ ಕರುನ್ ಆಯಿಲ್ಲ್ಯಾಚೆಂ ಕಾರಾಣ್ ಸಾಂಗೊಂಕ್ ಸೊಧ್ತಾ?
ಡ್ರೈವರ್ ಆಪ್ಣಾಕ್ ವರುಂಕ್ ವೇಳ್ ಕರುನ್ ಆಯ್ಲಾ ಮ್ಹಣೊನ್ ಆಪುಣ್ ರಾಯನಾಕ್ ಸಾಂಗ್ತೆಲಿಂ ಆನಿ ಹ್ಯಾ ಡ್ರೈವರಾಚೆಂ ಕಾಮ್ ರಿಸ್ಕೆರ್ ಪಡ್ತೆಲೆಂ ಮ್ಹಣೊನ್ ಹೊ ಕಾಂಯ್ ಭಿಯೆಲಾ? ಮಿಶೇಲಾಚಾ ಮತಿಂತ್ ಸವಾಲಾಂ ಉದೆತಾನಾ,
ಮಿಶೆಲಾಚಿ ಮತ್ ಥೊಡ್ಯಾ ಖಿಣಾಂಕ್ ಪಾಟಿಂ ಪಾಟಿಂ ಧಾಂವ್ಲಿ. ತಾಚ್ಯಾ ದೊಳ್ಯಾಂ ಮುಕಾರ್ ಸವ್ಕಾಸ್ ತಾಚ್ಯಾ ಗಾಂವ್ಚೆಂ ಪಿಂತುರ್ ಉಭೆಂ ಜಾಲೆಂ.
ತ್ಯಾ ಪಿಂತುರಾಂತ್ಲೆಂ ತೆಂ ಜೀಪ್ ಆನಿ ತಾಚೊ ಡ್ರೈವರ್ ಜಿಮ್ಮಿ!
ಜಿವಿತ್ ಮನ್ಶ್ಯಾಕ್ ಖಂಯ್ ಥಾವ್ನ್ ಖಂಯ್ ಪಾವಯ್ತಾ!?
ತಾಂತುಂಯ್ ಎಕಾ ಚಲಿಯೆಚಾ ಜಿವಿತಾಕ್!
ಕಿತ್ಲೊ ವ್ಯತ್ಯಾಸ್ ತ್ಯಾ ಆದ್ಲ್ಯಾ ಜಿವಿತಾಂತ್ ಆನಿ ಆತಾಂಚಾ ಹ್ಯಾ ಜಿವಿತಾಂತ್!
ಕಿತ್ಲೊ ಅಂತರ್ ತ್ಯಾ ಗಾಂವಾಂತ್ ಆನಿಂ ಹ್ಯಾ ಶ್ಹೆರಾಂತ್!
ಸಗ್ಳೆಂ ಫಕತ್ತ್ ಎಕಾ ಸಂಭಂಧಾಕ್ ಲಾಗೊನ್!
ದೊಳ್ಯಾಂಕ್ ದಿಸಾನಾತ್ಲ್ಲೊ ಉತ್ರಾಂನಿ ಭಾಸಾಯಿಲ್ಲೊ ಸಂಭಂಧ್!!
ಪಳಯ್ಲ್ಯಾರ್ ಸಗ್ಳೆಂಚ್ ಆಸಾ. ಪಳಂವ್ಕ್ ಕಳಾನಾ ಜಾಲ್ಯಾರ್ ಕಾಂಯ್ಚ್ ನಾ!!!
ಕಾರಾರ್ ಬಸ್ಲೆಲ್ಯಾ ಮಿಶೇಲಾಕ್ ಆಪ್ಲ್ಯಾ ಜಿವಿತಾಚೊ ನಿಯಾಳ್ ಯೆತಾನಾ ಸವ್ಕಾಸ್ ತಾಚ್ಯಾ ವೊಂಟಾರ್ ಹಾಸೊ ಉದೆಲ್ಯೊ. ತಾಚಿ ಮತ್ ಉಲ್ಲಾಸಾನ್ ಭರ್ಲಿ. ತಾಚೆಂ ಕಾಳಿಜ್ ಸಂತೊಸಾನ್ ನಾಚ್ಲೆಂ.
ಪಂತೀಸ್ ಮಿನುಟಾಂಚಾ ಕಾರಾಚಾ ಧಾಂವ್ಣೆ ಉಪ್ರಾಂತ್ ಮಿಶೇಲಾನ್ ಬಸ್ಲೆಲೆಂ ಕಾರ್ ವಾರ್ಸೋವಾ ಯೇವ್ನ್ ಪಾವ್ಲೆಂ. ಮಿಶೇಲ್ ಹ್ಯಾ ಮುಂಬಯಿಚೆ ರಸ್ತೆ ನೆಣಾಂ ಆಸ್ಲ್ಲೆಂ. ತಾಕಾ ಸಗ್ಳೆ ರಸ್ತೆ ಎಕಾಚ್ ಥರಾಚೆ ದಿಸ್ತಾಲೆ.
"ಹಾಂವ್ ರಾವೊಂ ಮ್ಯಾಡಮ್....?" ಡ್ರೈವರಾಚೆಂ ಖಾಲ್ತೆಂ ಸವಾಲ್.
"ಹಾಂ.....!" ಜವಾಬ್ ದಿಲ್ಲೆಂ ಮಿಶೇಲ್ ಕಾರಾರ್ ಥಾವ್ನ್ ಸಕಯ್ಲ್ ದೆಂವ್ಲೆಂ.
ಮಿಶೇಲಾಕ್ ಪಳವ್ನ್ ಶೀತಲ್ ಮಸ್ತ್ ಖುಶಿ ಜಾಲೆಂ. ಜಶೆಂ ಕಸಲೆಂಗೀ ಏಕ್ ಮೋಡ್ ತಾಚ್ಯಾ ಮಾತ್ಯಾ ವಯ್ಲೆಂ ನಿತ್ಳೊನ್ ವಚೊನ್ ಥಂಯ್ಚರ್ ತಿಂ ಧವಿಂ ಧವಿಂ ಕುಪಾಂ ಉದೆವ್ನ್ ಆಯಿಲ್ಲ್ಯಾ ಪರಿಂ.
"ಬಸ್ ಮಿಶೇಲ್! ಕಿತೆಂ ಪಿಯೆತಾಯ್....?"
"ಕಾಂಯ್ ನಾಕಾ! ತುಂ ಪಯ್ಲೆಂ ಸಾಂಗ್ ಮ್ಹಾಕಾ..... ತುಂ ಕಶೆಂ ಆಸಾಯ್?"
"ಹಾಂವ್.....?" ಶೀತಲಾಚಾ ಸವಾಲಾಂತ್ ತೆಂ ಆದ್ಲೆಂಪಣ್ ನಾತ್ಲ್ಲೆಂ. "ತುಕಾ ಜ್ಯೂಸ್ ಹಾಡ್ತಾಂ!" ಶೀತಲ್ ಭಿತರ್ ಗೆಲೆಂ.
ಶೀತಲಾಕ್ ತಶೆಂಚ್ ಪಳೆಲ್ಲೆಂ ಮಿಶೇಲ್ ಆಪುಣ್ಯ್ ಉಟೊನ್ ಶೀತಲಾಚಾ ಪಾಟ್ಲ್ಯಾನ್ ಭಿತರ್ ಗೆಲೆಂ.
ಪ್ರಿಜ್ಜಾಂತ್ಲೊ ಜ್ಯೂಸ್ ಕಾಡುನ್ ಗ್ಲಾಸಾಕ್ ವೊತುನ್ ಶೀತಲ್ ಟ್ರೇ ಸೊಧುಂಕ್ ಲಾಗ್ಲೆಂ.
ತಿತ್ಲ್ಯಾರ್ ಮಿಶೇಲಾನ್ ತೊ ಜ್ಯೂಸಾಚೊ ಗ್ಲಾಸ್ ಹಾತಿಂ ಧರ್ಲೊ ಆನಿ ತೊಂಡಾಕ್ ತೆಂಕ್ಲೊ.
ತಿತ್ಲ್ಯಾರ್, ಟ್ರೇ ಕಾಡುನ್ ಹಾತಿಂ ಧರ್ಲ್ಲೆಂ ಶೀತಲ್ ಥೊಡಿಂ ಕ್ಷಣಾಂ ತಶೆಂಚ್ ಮಿಶೇಲಾಕ್ ಪಳವ್ನ್ ರಾವ್ಲೆಂ.
"ತುಂ ಕಾಯ್ಚ್ ಬದ್ಲೊಂಕ್ ನಾಂಯ್ ಮಿಶೇಲ್! ಜಶೆಂ ತುಂ ಗಾಂವಾಂತ್ ಆಮ್ಗೆರ್ ಯೆತಾನಾ ಕರ್ತಾಲೆಂಯ್ ತಶೆಂಚ್ ಹಾಂಗಾಯ್ ಕರ್ತಾಯ್!"
ಥೊಡೊ ಜ್ಯೂಸ್ ಪಿಯೆಲ್ಲೆಂ ಮಿಶೇಲ್ ಆತಾಂ ಗ್ಲಾಸಾಕ್ ಆಪ್ಲ್ಯಾ ಹಾತಿಂ ಧರುನ್ ಶೀತಲಾಕ್ಚ್ ಪಳಂವ್ಕ್ ಪಡ್ಲೆಂ.
"ಪುಣ್ ತುಂ ಮಸ್ತ್ ಬದ್ಲಾಂಲಾಂಯ್ ಶೀತಲ್! ಕಿತೆಂ ಜಾಲಾಂ?" ಶೀತಲಾಕ್ ಆಯ್ಕೊಂಕ್ ಮಿಶೇಲ್ ತಯಾರ್ ಜಾಲೆಂ.
*****************
[ಫುಡೆಂ ಕಿತೆಂ ಜಾತಾ ಮ್ಹಳ್ಳೆಂ ವಾಚುಂಕ್ ರಾಕೊನ್ ರಾವಾ....]
ಕಾದಂಬರಿಕಾರಾಚಿಂ ಉತ್ರಾಂ: 1, 2, 3, 4, 5, 6, 7, 8, 9, 10, 11, 12, 13, 14
About us | Feedback
| Contact us
Copyright © 2005
DAAIZ.COM All rights reserved.
Page concept, designed and maintained by Ashawadi
Publications
