ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್ ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಬೂಕ್ ಸಮೀಕ್ಶಾ - 6
ಪಯ್ಲಿಂ ಮೆಟಾಂ
ಬೂಕ್: ಪಯ್ಲಿಂ ಮೆಟಾಂ
ಕವಿ: ಜಿಯೊ, ಆಗ್ರಾರ್
ಪ್ರಸ್ತಾವನ್: ಟೈಟಸ್ ನೊರೊನ್ಹಾ, ತಾಕೊಡೆ
ಛಾಪ್ಲ್ಲಿ ಲಿಪಿ: ಕಾನಡಿ.
ಪಾನಾಂ: 56
ಮೋಲ್: ರು. 25
ಪ್ರಕಾಶಕ್: ಸಾಂಗಾತಿ ಮೀಡಿಯಾ
ಪರ್ಗಟ್ ಜಾಲ್ಲಿ ಇಸ್ವಿ: 2003
ಸಮೀಕ್ಶಾ ಚಲಯ್ಣಾರ್: ಪ್ರಿಯಾ ಸಿಕ್ವೇರಾ
ತಾರಿಕ್: 8 ಜುಲಾಯ್ 2005
ಜಾಗೊ: ಸಾಲ್ಮಿಯಾ, ಕುವೇಯ್ಟ್
ಎಚ್ಚೆಮಾನ್ ಕೆಲ್ಲೆಂ ಸಮೀಕ್ಶಾ ಲೇಖನ್
ಪ್ರಿಯಾ ಸಿಕ್ವೇರಾ
ಜಿಯೊ, ಆಗ್ರಾರ್
ಕವಿಚಿ ವ್ಹಳೊಕ್:
ಜಿಯೊ ಡಿ’ಸಿಲ್ವಾ ಆಗ್ರಾರ್ ಏಕ್ ನಾಟಕಿಸ್ತ್ ತಶೆಂಚ್ ನಟ್ ಮಾತ್ರ್ ನ್ಹಯ್, ಏಕ್ ಚಿಂತ್ಪಿ ಆನಿಂ ವಿಚಾರ್ವಂತ್ ಜಾವ್ನಾಸಾ. ಸಮಾಜೆಕ್ ಫಕತ್ತ್ ಮನರಂಜನ್ ದಿಂವ್ಚಾಕ್ ಹಾಣೆಂ ಬರಂವ್ಚೆಂ ನ್ಹಯ್, ಬಗಾರ್ ಎಕಾ ಬರವ್ಪ್ಯಾಕ್ ಆಸ್ಚಿ ಸಾಮಾಜಿಕ್ ಜವಾಬ್ಧಾರಿ ಬರ್ಯಾ ರಿತಿನ್ ಸಮ್ಜಾಲ್ಲೊ ಜಿಯೊ ಏಕ್ ಕಲಾಕಾರ್ಯ್ ಜಾವ್ನಾಸಾ.
ಸಮೀಕ್ಶಾ ಲೇಖನ್
ನವೊ ಭರ್ವಸೊ ದಿಂವ್ಚಿಂ ಪಯ್ಲಿ ಮೆಟಾಂ - ಪ್ರಿಯಾ ಸಿಕ್ವೇರಾ, ಫೆರಾರ್
’ಪಯ್ಲಿಂ ಮೆಟಾಂ’ ಜಿಯೊಚೊ ಪಯ್ಲೊ ಬೂಕ್ ಜಾವ್ನಾಸಾ. ಹೊ ಪಯ್ಲೊ ಬೂಕ್ ಜಾಲ್ಯಾರೀ ಸಮಾಜೆಂತ್ ಘಡ್ಚಿ ಘಡಿತಾಂ, ಸಮಾಜಿಚಿ ನಿಯಾಮಾಂ, ಮೊಗ್, ಎಕ್ಸುರ್ಪಣ್ ಹ್ಯೊ ಸಂಗ್ತಿ ಕವಿತಾದ್ವಾರಿಂ ಉಚಾರ್ಲ್ಲಿ ರೀತ್ ಮೆಚ್ವಣೆಕ್ ಫಾವೊ ಜಾಲ್ಲಿ. ಹಾಂವ್ ಕೊಂಕ್ಣಿ ಶೆತಾಂತ್ ನವಿಂ. ಹ್ಯಾ ಬುಕಾಚೆರ್ ಸಮೀಕ್ಶಾ ಚಲಂವ್ಚಾ ತಿತ್ಲಿ ಅನ್ಭೋಗ್ ಮ್ಹಾಕಾ ನಾ ತರ್ಯೀ, ಮ್ಹಜಾ ಜಾಣ್ವಾಯೆಪುರ್ತೆಂ ಹ್ಯಾ ಬುಕಾ ವಿಶ್ಯಾಂತ್ ಉಲಂವ್ಕ್ ಹಾಂವೆಂ ಧಯ್ರ್ ಘೆತ್ಲಾಂ.
ಟೈಟಾನಿಕ್ ಬುಡ್ಲ್ಲ್ಯಾ ವೆಳಾರ್, ಥಂಯ್ಸರ್ ಬಚಾವ್ ಕರುಂಕ್ ಕೊಣೀ ನಾತ್ಲ್ಲಿಂ...ಉದ್ಕಾಂತ್ ಬುಡೊನ್ ತಾಂಚೆಂ ಅಂತ್ಯ್ ಜಾಲ್ಲೆಂ. ಸೊರ್ಯಾವರ್ವಿಂ ಸಭಾರ್ ಕುಟ್ಮಾಂನಿ ನಾಸಮಧಾನ್, ಕುಟ್ಮಾಂ ನಾಸ್ ಜಾವ್ನಾಸಾತ್ ಮ್ಹಣ್ಚಿ ಹಿ ಕವಿತಾ.
ಆಟ್ಲಾಂಟಿಕಾಂತ್ ಬುಡ್ಲೆಂ
ಏಕ್ ’ಟೈಟಾನಿಕ್’
ಹಾಂಗಾಯೀ ಬುಡ್ತಾತ್ ಸದಾಂನೀತ್
ಹಜಾರ್ ಕುಟ್ಮಾಂ ದುಃಖಾಂತ್
ಪಿಯೆವ್ನ್ ’ಟೈಟ್ ಟೊನಿಕ್’
ಕವಿ ಅವಯ್ಚಾ ಪೊಟಾಂತ್ ಆಸ್ಚೆ ತೆ ಭಾಗಿ ನೋವ್ ಮಯಿನೆಂ...ಥಂಯ್ಸರ್ ನಾ ಭಿರಾಂತ್, ನಾ ಲಜ್..ಭಾಗಿ ತೆ ದೀಸ್..ಭಾಗಿ ತೊ ಗರ್ಭ್ ಮ್ಹಣ್ ಆವಯ್ಚಾ ಗರ್ಭಾಕ್ ವೊಲಾಯ್ತಾ.
ಆನಿಂ ಹ್ಯಾ ಭೂಗರ್ಭಾಂತ್ ಆಸ್ಚೆಂ ಪೊಕ್ಳೆಪಣ್, ಜಾಂವ್ಚೊ ಆನ್ನ್ಯಾಯ್, ಅಧಿಕಾರಾಚೊ ದುರುಪಯೋಗ್ ಪಳೆವ್ನ್ ಕವಿ ’ವಾಟ್ ಗರ್ಭಾಕ್’ ಮ್ಹಳ್ಳ್ಯಾ ಕವಿತಾಧ್ವಾರಿಂ ಆಪ್ಲೊ ಶಿಣ್ ಉಚಾರ್ತಾ. ಹೆಂ ಸರ್ವ್ ಸೊಸುಂಕ್ ತಾಂಕಾನಾಸ್ತಾಂ ಕವಿ ಆಶೆ ಮ್ಹಣ್ತಾ. ದಾಕಯ್ ವಾಟ್ ದೆವಾ ಮ್ಹಜಾ ಪಾಟಿಂ ವೆಚಾಕ್ ಗರ್ಭಾಕ್ ತ್ಯಾ ಸಮಾಜೆಂತ್ ಜಾಂವ್ಚಿ ಅನ್ನ್ಯಾಯ್ ಪಳೆವ್ನ್ ಕವಿಕ್ ಕಾಂಠಾಳೊ ಆಯ್ಲಾ, ಆನಿ ಪರ್ತ್ಯಾಕ್ ತೊ ಆವಯ್ಚಾ ಗರ್ಭಾಕ್ ವೆಚಾಕ್ ದೆವಾಕ್ ಉಲೊ ಮಾರ್ತಾ.
ಹಾಂಗಾಸಾರ್ ಕವಿಚೆ ನಿರಾಸ್ಪಣ್ ಝಳ್ಕತಾ. ಆನಿ ಕವಿ ಹ್ಯಾ ಸಂಸರಾಥಾವ್ನ್ ಪಲಾಯನ್ ಆಶೆತಾ. ಆಧುನಿಕ್ ಕುಟ್ಮಾಚಿ ಪರಿಸ್ಥಿತೆಕ್ ಆರ್ಸೊ ಧರ್ಚಿ "ಮೊವಾಂ ಪೊಳಿ’ ಕವಿತಾ. ಗಲ್ಫಾಗಾರಾಂಚಿ ಆವಸ್ಥಾ ಎಕಾ ಮೊವಾಚೆ ಪೊಳಿಯೆಕ್ ಸರಿ ಕೆಲ್ಲಿ ರೀತ್ ನಿಜಾಯ್ಕಿ ಶಾಭಾಸ್ಕೆಕ್ ಫಾವೊ. ಕುಟ್ಮಾಖಾತಿರ್ ಸಗ್ಳಿ ಜಿಣಿ ಗಲ್ಫಾಂತ್ ಗಳೊನ್ ಆಖ್ರೇಕ್ ಗಾಂವಾಂತ್ ಸುಶೆಗ್ ಘೆತಾನಾ ಕಸಲೆಂ ತಾಚೆ ಜಿವಿತ್. ತಾಕಾ ಆಶೆಲ್ಲೊ ತೊ ಮೋಗ್, ತೊ ಮಾನ್ ತಾಕಾ ಮೆಳಾನಾ.
ಕಿತ್ಯಾಕ್ ತೊ ಆತಾಂ ಮೊಂವ್ ಚಿಂವೊನ್ ಕಾಡ್ಲ್ಲ್ಯಾ ಏಕಾ ಪೊಳಿಯೆಬರಿ. ಮೊಂವ್ ಕಾಡ್ಲ್ಲ್ಯಾ ಉಪ್ರಾಂತ್ ತಿ ಪೊಳಿ ಉಪ್ಕಾರ್ತಾಗಿ? ನಾ ಕಾಂಯ್ ಫಾಯ್ದೊ ನಾ ಮ್ಹಣ್ ಆಮಿ ಕಾಡ್ನ್ ಉಡಯ್ತಾಂವ್. ತಿಚ್ ಆವಸ್ಥಾ ಗಲ್ಫಾಂತ್ ಕಾಮ್ ಕೆಲ್ಲ್ಯಾಂಚಿ ಮ್ಹಣ್ ಹ್ಯಾ ಕವಿತಾಧ್ವಾರಿಂ ಕವಿ ಸಾಂಗ್ತಾ.
ಸಗ್ಳೆಂ ಆಪ್ಲೆಂ ಲುಟುನ್ ವ್ಹೆಲಾಂ
ಮ್ಹೊಂವ್ ಚಿಂವ್ಲಾಂ, ಪೊಳಿ ಸಾಂಡ್ಲ್ಯಾ.
’ಜಿಯೊಂ ಮ್ಹಜಿ ಮಾಂಯ್’ ಕವಿತಾ ವಾಚ್ತಾನಾ ನಿಜಾಯ್ಕಿ ತಿಂ ಅನಾಥ್ ಬಾಳಾಂ ಮ್ಹಜೆ ಮುಖಾರ್ ಯೇವ್ನ್ ರಡ್ತಾತ್ ತಶೆಂ ಭೊಗ್ಲೆಂ. ತರ್ನಾಟ್ಪಣಾರ್ ಕೆಲ್ಲ್ಯಾ ತ್ಯಾ ಚುಕಿಕ್ ಕಿತ್ಯಾಕ್ ತ್ಯಾ ಬಾಳಾಕ್ ಶಿಕ್ಶಾ ಮ್ಹಳ್ಳೆಂ ಸವಾಲ್? ಪಳೆಯಾ ತ್ಯಾ ನೆಣ್ತ್ಯಾ ಆನಾಥ್ ಬಾಳಾಚೆಂ ರುದಾನ್ ಕವಿನ್ ನಿಜಾಯ್ಕ್ಯ್ ಕಾಳಿಜ್ ಶಿಂದ್ಚಾ ರಿತಿನ್ ವಿವರ್ಸಿಲಾಂ..
"ಕಚ್ರ್ಯಾ ರಾಶಿಂತ್ ಸಾಂಡ್ಲ್ಲ್ಯಾ ಮ್ಹಜ್ಯಾ ಆವಯ್ಕ್ ತುಮಿ ದೆಖ್ಲಾಂ."
ತೆಂ ಲ್ಹಾನ್ ಭುರ್ಗೆಂ ಹಾಂಗಾಸಾರ್ ಸರ್ವಾಂ ಕಡೆನ್ ದುಕಾನ್ ಉಲಯ್ತಾ.
ಎಕ್ಲೊ ರಾಯ್ ತರೀ ಯೇಂವ್ ಪಾಲ್ವಲ್ಯಾಂತ್ಗಿ ತಾರಾಂ
ಸಗ್ಳಿಂ ಉಜ್ವಾಡ್ ಮ್ಹಾಕಾ ಹಾಡುಂ ವಾಟ್ ದೆಖ್ತಾಂ
ತೆ ಸಾಂಡುನ್ ಘಾಲ್ಲೆಂ ಬಾಳ್
ಕೊಣಿ ಪುಣಿಂ ಮಾಕಾ ಆಪ್ಣಾಂವ್ದಿತ್.
ಸವಾಲ್ ತಾಚೆ ತ್ಯಾ ತಾರಾಂಕ್..
ಆಪ್ಣಾಕ್ ಉಜ್ವಾಡ್ ದೀಂವ್ಕ್ ಎಕ್ ನೆಕೆತ್ರ್ ತರೀ ನಾಂಗಿ?
ಹ್ಯಾ ದುಖಿಂತ್ ತರೀ ತಿ ಗಾಯ್ತಾತ್
ಆಮ್ಚಿಂ ಮಾಂಯ್ ಸದೆಂವ್ ಜಾಂವ್!!
ಕಸಲೆಂ ಏಕ್ ಉದಾರ್ಪಣ್. ಪರಾಮಶೆನ್ ಘಡ್ಲ್ಲ್ಯಾ ತ್ಯಾ ಎಕಾ ಚುಕಿಖಾತಿರ್ ತ್ಯಾ ಪಿಂಪ್ರ್ಯಾಕ್ ತಶೆಂ ವಾಟೆರ್ ಸೊಡುಂಕ್ ಕಶೆಂ ಮನ್ ಯೆತಾ? ಜಾಂವ್ಕ್ ಪುರೊ ಸಮಾಜೆಕ್ ಭಿಯೆವ್ನ್. ಪುಣ್ ಚೂಕ್ ಕರ್ತಾನಾ ಸಮಾಜೆಚೆಂ ಭ್ಯೆಂ ಖಂಯ್ಸ್ರ್ ಲಿಪ್ಲ್ಲೆಂ? ತ್ಯಾ ನೆಣ್ತ್ಯಾ ಬಾಳಾಂಚೆಂ ಗಾಯನ್ ಜರೂರ್ ತ್ಯಾ ಆವಯಾಂಕ್ ಪಾವಂವ್ಕ್ ಆನಿ ತಾಂಚೆ ಅಂತಸ್ಕರ್ನ್ ಜಾಗೆಂ ಜಾಂವ್ಕ್ ಹೆಂ ಕವಿತಾ ಕಾರಣ್ ಜಾಂವ್ದಿ ಮ್ಹಣ್ ಕವಿ ಆಶೆತಾ.
ತರ್ನಾಟ್ಪಣ್ ಜಿಣ್ಯೆಚೆಂ ಏಕ್ ಪ್ರಮುಖ್ ಹಂತ್. ಹ್ಯಾ ಪ್ರಾಯೆರ್ ಜಿಣ್ಯೆಂತ್ ಏಕ್ ಉರ್ಭಾ ಆಸ್ತಾ. ಕಿತೆಂಯೀ ಕರ್ಯೆತ್ ಮ್ಹಳ್ಳಿ ಶ್ಯಾಥಿ ಆಸ್ತಾ. ಕವಿನ್ "ಚುಕ್ಲೆಲೆಂ ತರ್ನಾಟ್ಪಣ್" ಹ್ಯಾ ಕವಿತಾಂತ್ ತರ್ನಾಟ್ಪಣಾಂಕ್ ಪೀಕ್ ದಿಂವ್ಚೆಂ ಫಳಾಧಿಕ್ ಶೆತ್ ಮ್ಹನ್ ವೊಲಾಯ್ತಾ.
ಪಿಕಾಚ್ಯಾ ಫಳಾಧಿಕ್ ಶೆತಾಕ್
ಸುಕಿದಾಡೆಚಿ ಭುಂಯ್ ಕೆಲಿ
ಜರ್ತರ್ ಹ್ಯಾ ವೆಳಾರ್
ಕಷ್ಟ್ ಕಾಡ್ನ್, ಘಾಮ್ ಪೀಳ್ನ್,
ಬರಿ ಜಿಣಿ ಜಿಯೆತಾ
ತೊ ಭರ್ಪೂರ್ ಫಳ್ ಜೊಡೊಂಕ್ ಪಾವ್ತಾ.
ನಾಂ ತರ್ ತಿ ಜಿಣಿ
ಸುಕಿದಾಡೆಚಿ ಭುಂಯ್ ಜಾಂವ್ಕ್ ಪಾವ್ತಾ.
ಆಜ್ ಕಾಲ್ಚೆ ಕಿತ್ಲೆಶೆ ತರ್ನಾಟೆ
ಪಾಡ್ ವಾಟೆನ್ ಚಲೊನ್ ಆಸಾತ್.
ಆವಯ್ ಬಾಪಯ್ಚೆಂ ಉತಾರ್
ತಾಂಕಾ ನಾಟ್ವನಾ.
ಆಪ್ಣಾನ್ ಕೆಲ್ಲೆಂ ಸಾರ್ಕೆಂ ಮ್ಹಳ್ಳೆಂ ಚಿಂತಾಪ್.
ಏಕ್ ಪಾವ್ಟಿ ತರ್ನಾಟ್ಪಣ್ ಉತರ್ಲ್ಯಾ
ಉಪ್ರಾಂತ್ ಪ್ರಾಯ್ ಜಾತಾನಾ ತಿ ಜಿಣಿ
ಕರ್ಪೊನ್ ಗೆಲ್ಲ್ಯಾ ಇಂಗ್ಳ್ಯಾಬರಿಂ.
ಪಳೆಯಾ ಹಾಂಗಾಸರ್ ಕವಿಚಿಂ ಉತ್ರಾಂ ಧರ್ತೆಕ್ ಗಳ್ಚೆ ವಾಲಿಕ್ ಆತಾಂ ಪರ್ನೊ ಉಡಾಸ್ ಜಾಗೆ ಜಾಲಾ ಹ್ಯಾಚ್ ಶೆತಾಂತ್ ಝರ್ ಜಾವ್ನ್ ಥಂಡ್ಸಾಣ್ ದಿತೊಂ ಝಾಡ್ ಜಾವ್ನ್ ಸಾವ್ಳಿ ದಿತೊಂ ಫುಲಾಂ ಫುಲವ್ನ್ ಫಳಾಂ ದಿತೊಂ ಗಳೊನ್ ವೆಚ್ಯಾಂಕ್ ಭರ್ವಸೊ ಜಾತೊ..? ಕಸಲೆಂ ಏಕ್ ಉಂಚ್ಲೆ ಚಿಂತಾಪ್ ನಂಯ್ಗಿ??
ಝರ್ ಜಾವ್ನ್ ಪೆಲ್ಯಾಕ್ ಥಂಡಾಯ್ ದಿವ್ಯೆತ್, ಕಶ್ಟಾಂತ್ ಆಸಲ್ಯಾಂಕ್ ಆಸ್ರೊ ಜಾವ್ಯೆತ್, ನಿರಾಸ್ ಜಾಲ್ಯಾಂಕ್ ಭರ್ವಸೊ ಜಾವ್ನ್ ಜಿಣಿ ನಂದನ್ ಕರಿಜಾಯ್. ಪೆಲ್ಯಾಕ್ ಉಪ್ಕಾರಾಕ್ ಪಡ್ಚಿ ಜಿಣಿ ಜಿಯೆಜಾಯ್ ಮ್ಹಳ್ಳೆಂ ಕವಿಚೊ ಉಲೊ ಹಾಂಗಾಸರ್ ದಿಸ್ತಾ. ಕವಿ ಹ್ಯಾ ಸಂಸಾರಿ ಘಾತ್ಕಿ ಲೊಕಾ ವಿಶ್ಯಾಂತ್ ರಾಗಿಷ್ಟ್ ಜಾಲಾ. ತೊ ದುಸ್ರಾಂಚೆಂ ನಾಸ್ ಆಶೆಂವ್ಚಾಂಕ್, ಮಾಟ್ ಮಂತ್ರಾ ಕರ್ತೆಲ್ಯಾಂಕ್ ಬ್ರುಟಾಸ್ ಮ್ಹಣ್ ಆಪಾಯ್ತಾ. (ಬ್ರುಟಸ್ ಮುಳ್ಯಾರ್ ಏಕ್ ಕ್ರೂರ್ ಮನ್ಜಾತ್).
ಹೊ ಸಂಸಾರ್ ಆಬ್ಲೆಶಿ ಲೊಕಾಚೆಂ ಭಂಡಾರ್. ಖಂಯ್ಸರ್ ಪಳೆಲ್ಯಾರೀ ಆನ್ನ್ಯಾಯ್, ಘಾತ್. ಹಾಂಚಾ ಮಧೆಂ ಎಕ್ಲೊ ಪುಣಿ ಬರೊ ಮನಿಸ್ ಮೆಳಾತ್ಗಿ...ಹಿ ಕವಿಚಿ ಸೊಧ್ನಾಂ.
ಪುಣ್ ಹ್ಯಾ ಲೊಕಾಕ್ ಪಳೆಯಾ ಕವಿಚಿ ಜಾಗ್ವಣ್ ಪುಣ್ ತುಂ ಕಶೆಂ ಮ್ಹೆಳೆ ಹಾತ್ ಕುಸ್ಡೆಂ ಕಾಳಿಜ್, ಕದ್ವಳ್ ಮನ್ ಬ್ರುಟಸಾಂಬರಿಂ ಘೆವ್ನ್ ದೀಸ್ ಲೊಟ್ತಾಯ್ ಪಳೆಯಾಂ? ಬರೆಂ ಕೆಲ್ಯಾರ್ ಬರೆಂಚ್ ಮೆಳ್ತಾ. ಪುಣ್ ಘಾತ್ಕ್ಯಾಂಕ್ ಏಕ್ ದೀಸ್ ಯೆತಲೊಚ್, ತಾಂಚ್ಯಾ ಪಾಡ್ ಕಾಮಾಂ ಖಾತಿರ್ ಚುರ್ಚುರ್ಚೆ ದೀಸ್. ಆನಿ ಹಾಂಚೆ ಆಂತ್ಯ್ ಜರೂರ್ ಜಾತೆಲೆಂ.
ಆಮ್ಚೊ ಕ್ರಿಸ್ತಾಂವ್ ಭಾವಾಡ್ತ್ ಕೇವಲ್ ಏಕ್ ಭಾಯ್ಲೊ ಆಡಂಬರ್. ಮಿಸಾಕ್ ವೆತಾಂವ್, ಶೆರ್ಮಾಂವ್ ಆಯ್ಕಾತಾಂವ್, ಇಗರ್ಜೆ ಭಿತರ್ ಆಸಲ್ಲೆಂ ತೆಂ ಸಾಂತಿಪಣ್, ತಿ ಭಕ್ತ್, ಭಾಯ್ರ್ ಆಯಿಲ್ಲೆಂಚ್ ನಪಂಯ್ಚ್. ಸೆಜಾರ್ಯಾಲಾಗಿಂ ಝಗ್ಡಿಂ, ದುಸ್ರ್ಯಾಂಚೊ ಖಬ್ರೊ. ದುಸ್ರ್ಯಾಂನಿ ಕಿತೆಂಯಿ ಬರೆಂ ಕೆಲೆಂ ತರ್ ತಾಚೊ ಖೊಡಿ ಕಾಡ್ಚ್ಯೊ ಹಿಚ್ ಆಮ್ಚ್ಯಾ ಕ್ರಿಸಾಂವ್ ಲೊಕಾಚಿ ಆವಸ್ಥಾ. ಖುರಿಸ್, ಮಾಗ್ಣಿಂ ಕೇವಲ್ ಭಾಯ್ಲ್ಯಾ ದೆಖಿಕ್. ಮ್ಹಣ್ ಕವಿ ಹ್ಯಾ ಕವಿತಾಧ್ವಾರಿಂ ಸಂದೇಶ್ ದಿತಾ.
ಕೊಣಾ ಮರ್ಜೆಕ್
ಕೊಣಾ ಗರ್ಜೆಕ್
ಕೊಣಾ ಮಾನಾಕ್
ಹೊ ಖುರಿಸ್ ಕೊಣ್ಯಿ ನೆಣಾ
ಭೊಂವ್ತಿ ರಾವೊನ್ ದೆಕ್ಶಿ ತರ್
ತಾಂಬ್ಡ್ಯಾ ಗುಡ್ಯಾರ್
ಧವ್ಯಾ ರಂಗಾರ್ ರಾವ್ಲಾ
ಖುರಿಸ್ ಎಕ್ಸುರೊ
’ದಾಧ್ಲೊ ಗರ್ಭೆಸ್ತ್ ಜಾಲ್ಯಾರ್’ ಕವಿತಾಂತ್ ಕವಿ ಸಾಂಗ್ತಾ;
ಜರ್ತರ್ ದಾಧ್ಲೊ ಗರ್ಭೆಸ್ತ್ ಜಾಲೊ ತರ್,
’ಪಿಂಪ್ರೆ ವಾಡ್ಚಾ ಪಯ್ಲೆಂಚ್,
ಕಿರ್ಕಿರಿ ನಾಕಾ ಮ್ಹಣ್ ನಿಸ್ರಾವ್ನ್ ಸೊಡ್ತೊ.
ಸ್ತ್ರೀಯೆಕ್ ನಿಜಾಯ್ಕಿ ಆಸ್ಚೆಂ ತಿ ಸೊಸ್ಣಿಕಾಯ್,
ದಾದ್ಲ್ಯಾಂಕ್ ನಾ. ನಿಜಾಯ್ಕೀ
ಆವಯ್ಪಣ್ ಏಕ್ ದೆವಾಚೆಂ ದೆಣೆಂ.
ಕವಿ ನಿಜಾಯ್ಕಿ ಸ್ತ್ರೀಯೆಕ್ ಉಂಚ್ಲ್ಯಾ ಮಟ್ಟಾಕ್ ದವರುಂಕ್ ಪ್ರಯತನ್ ಕರ್ತಾ. ಪುಣ್ ಹಿ ಸಕಯ್ಲಿಂ ಉತ್ರಾಂ ಪಳೆಯ್ತಾನಾ ಮ್ಹಾಕಾ ನಿಜಾಯ್ಕಿ ಗುಸ್ಫೊಡ್ ಜಾತಾ. ಪುಣ್ ಹಾಂಗಾಸರ್ ಆಮಿಂ ಪಳೆಂವ್ಯಾ. ತರೀ ದಾದ್ಲೊ ಬಾವ್ಡೊ ಗರ್ಭೆಸ್ತ್ ಜಾವ್ನ್ ಪಿಂಪ್ರೆ ವಾಡೊಂಕ್ ಸೊಡ್ತೊ ವೆಳಾ ಆದಿಂಚ್ ಬಾಳಂತ್ ಜಾತೊ ಘಟ್ಮುಟ್ ದಾದ್ಲ್ಯಾಚೊ ಪುಷ್ಟಿ ಪಿಲೊ ಜಲ್ಮಾ ದಿಸಾಚ್ ಚಲೊನ್ ವೆತೊ. ಜರ್ ದಾಧ್ಲೊ ಗರ್ಭೆಸ್ತ್ ಜಾಲ್ಯಾರ್ ನೋವ್ ಮಹಿನೆ ವಾವಂವ್ಚಿ ಗರ್ಜ್ಚ್ ನಾ. ಆನಿಂ ತ್ಯಾ ಪಿಲ್ಯಾನ್ ಚಲೊಂಕ್ ಶಿಕೊಂವ್ಕ್ ಮಹಿನ್ಯಾಂಕ್ ರಾಕಜಾಯ್ ಮ್ಹಣ್ ಗರ್ಜ್ ನಾ, ಜಲ್ಮಾ ದಿಸಾಚ್ ಚಲೊನ್ ವೆತೊ. ಹಿಂ ವಯ್ಲಿಂ ಉತ್ರಾ ಉಚಾರ್ನ್ ದಾಧ್ಲೊ ಸ್ತ್ರಿಯೆಚಾಕ್ ಏಕ್ ಮೇಟ್ ಮುಕಾರ್ ಕವಿ ಹಾಂಗಾಸರ್ ಸಾಂಗೊಂಕ್ ಸೊಧ್ತಾಗಿ? ಯಾ ದಾದ್ಲ್ಯಾಂಕ್ ಆಸಾಧ್ಯ್ ಮ್ಹಳೆಂ ಖಂಯ್ಚೆಂಚ್ ನಾ ಮ್ಹಣ್ ಕವಿ ಸಾಂಗ್ತಾ? ಹಾಂಗಾಸರ್ ಕವಿ ಕಿತೆಂಗಿ ಘುಸ್ಫಡ್ಲಾ.
ಕೊಂಕ್ಣಿ ಭಾಶೆಚೆರ್ ಕವಿಕ್ ಆಸ್ಚೊ ಹುಸ್ಕೊ "ಕೊಂಕ್ಣಿ ವಿಸ್ರಾಲೊ" ಮ್ಹಳ್ಳ್ಯಾ ಕವಿತಾಂತ್ ಆಮಿ ಪಳೆವ್ಯೆತ್.
ಕೊಂಕ್ಣಿ ಮಾಯೆಚೊ ಚಿಂವೊ ಸೊಡುನ್
ಫಿಂರ್ಗಿ ಬಾಯ್ಲೆಚೊ ಪಾನೊ ಚಿಂವ್ತಾಯ್
ಸುಟಾಂತ್ ಬುಟಾಂತ್ ಕಾಶ್ಟಿ ಲಿಪವ್ನ್
ಸ್ವತಾಃ ಆವಯ್ಕ್ ಪರ್ಕ್ಯಾಕ್ ಸೊಡ್ತಾಯ್
ಹಾಂಗಾಸರ್ ಕೊಂಕ್ಣಿ ಭಾಸೆಕ್ ಕವಿನ್ ಸ್ವತಾ: ಎಕಾ ಆವಯ್ಕ್ ಸರಿ ಕೆಲಾಂ. ಆವಯ್ಕ್ ದಿಂವ್ಚೊ ಮಾನ್ ಭೋವ್ ವರ್ತೊ.
ಸ್ವಂತ್ ಆವಯ್ಕ್ ಸೊಡ್ನ್ ದುಸ್ರ್ಯಾ ಆವಯೆಕ್ ವೆಂಗ್ಚೆಂ ಏಕ್ ಪಿಶೆಂಪಣ್. ಆನಿ ಆಶೆಂ ಕರ್ತಲೊ ನಿಜಾಯ್ಕಿ ನಿಷ್ಟುರ್ ಮನಿಸ್. ಪುಣ್ ಆಮ್ಚ್ಯಾ ಲೊಕಾಂನಿ ಕೊಂಕ್ಣಿ ಆವಯ್ಕ್ ಸೊಡ್ನ್ ಸೊಡ್ಲಾ ಆನಿ ಫಿಂರ್ಗಿ ಆವಯ್ಚಾ ಪಾಟಿಕ್ ಪಡ್ಲಾಂ. ಹಿ ಭಾರಿ ಬೆಜಾರಾಯೆಚಿ ಆನಿಂ ಲಜೆಚಿ ವಿಶಯ್.
"ಕಷ್ಟಾಂತ್ ಮಾತ್ರ್ ಬೊಭಾಟ್ತಾಯ್, ಕೊಂಕ್ಣೆಂತ್ಚ್ "ಏ ಆವಯ್".
ಹಾಂಗಾಸರ್ ಕವಿನ್ ನಿಜಾಯ್ಕಿ ಸತ್ ಉಚಾರ್ಲಾ. ಫಿಂರ್ಗಿ ಭಾಶೆಚಾ ಮೊಗಾರ್ ಪಡಲ್ಲ್ಯಾಂಕ್ ಖಂಡಿತ್ ಹೆಂ ಜಾಗ್ವಣೆಚೆ ಉತಾರ್ ಜಾಂವ್ದಿ. "ರಚ್ನಾರಾ - ಅಭಾರ್’ ಕವಿ ಆಪ್ಣಾಕ್ ದಿಲ್ಲ್ಯಾ ದೆಣ್ಯಾ ಖಾತಿರ್ ದೆವಾಕ್ ಆಭಾರಿ ಮ್ಹಣ್ ಹ್ಯಾ ಕವಿತಾಂತ್ ಸಾಂಗ್ತಾ. ಆಮ್ಕಾಂ ದಿಲ್ಲ್ಯಾ ದೆಣ್ಯಾಂಕ್ ಆಮಿ ಸದಾಂಚ್ ದೆವಾಚೊ ಉಪ್ಕಾರ್ ಆಟಾಂವ್ಕ್ ಫಾವೊ ಮ್ಹಳ್ಳೆ ಲಿಸಾಂವ್ ಮೆಳ್ತಾ. ರಚ್ತಾನಾಂಚ್ ರಚ್ನಾರಾ ಎಕಾಪ್ರಾಸ್ ಎಕಾ ವರ್ತ್ಯಾ ದೆಣ್ಯಾನಿಂಚ್ ಭರ್ಲಾಂಯ್ ಮ್ಹಾಕಾ ಅಬಾರ್ ತುಕಾ...
ಕವಿ ಜಿಯೊನ್ ’ಪಯ್ಲಿಂ ಮೆಟಾಂ’ ಬೂಕ್ ಸಾಮಾಜಿಕ್ ಜಾಗ್ವಣ್ ದಿಂವ್ಚೊ ಬೂಕ್ ಮ್ಹಣ್ ಸಾಂಗ್ಯೆತ್. ಕವಿನ್ ಸಂಸರಾಂತ್ ಘಡ್ಚಿ ಘಡಿತಾಂ ಭೋವ್ ಆಪುರ್ಬಾಯೆನ್ ಉಗ್ಡಾಪಿಂ ಕೆಲ್ಯಾಂತ್. ಆನಾಥ್ ಬಾಳಾಚೆಂ ರುದಾನ್, ಘಾತ್ಕಿ ಲೊಕಾಕ್ ಜಾಗ್ವಣ್, ಕೊಂಕ್ಣಿ ಭಾಶೆಚಿ ನಿರ್ಲಕ್ಶಾ, ಗಲ್ಫಾಗಾರಾಂಚಿ ಪರಿಸ್ಥಿತಿ, ಸೊರ್ಯಾ ವರ್ವಿಂ ಕುಟ್ಮಾಚೆಂ ದೆಸ್ವಾಟ್ ಹಾಚೆ ವಿಶ್ಯಾಂತ್ ಅರ್ಥಾಭರಿತ್ ಥರಾನ್ ಕವನಾಂ ಘಡ್ಲ್ಯಾಂತ್.
ಹೊ ಪಯ್ಲೊ ಬೂಕ್ ತರೀ ಹಾಂತ್ಲಿ ಕವಿತಾ ಲಿಸಾಂವ್ ಜೊಡ್ಚಾ ತಸಲಿಂ. ಕೇವಲ್ ಆಪ್ಣಾಕ್ ತಾಲೆಂತ್ ಆಸಾ ಮ್ಹಣ್ ಚಿಂತುನ್ ಕಿತೆಂಯೀ ಬರವ್ನ್ ಗೆಲ್ಯಾರ್ ತಾಕಾ ಮೋಲ್ ನಾ. ತಾಕಾ ಆರ್ಥ್ ಆಸೊಂಕ್ ಜಾಯ್, ವಾಚ್ತೆಲ್ಯಾಂಕ್ ಸಂದೇಶ್ ಮೆಳಾಜಾಯ್, ಲಿಸಾಂವ್ ಜೊಡ್ಚಾ ತಸಲೆಂ ಜಾಯ್ಜಾಯ್. ತೆದಾಳಾ ಮಾತ್ರ್ ತೆಂ ಖರೆಂ ಸಾಹಿತ್ಯ್ ಜಾಂವ್ಕ್ ಪಾವ್ತಾಂ. ಏಕ್ ಕೃಶಿಕ್ ಕೃಶಿ ಕರ್ತಾನಾ ಭರ್ಪೂರ್ ಮಿನತ್ ಘೆತಾ ಆನಿ ವಾಂವ್ಟ್ ಕಾಡ್ತಾ. ಆನಿ ತೊ ತಾಕಾ ಖಂಚಾ ಬೆಳ್ಯಾಂತ್ ಫಾಯ್ದೊ ಆಸಾಗಿ ತೆಂಚ್ ತೊ ಕರ್ತಾ. ಥಂಯ್ಸರ್ ಏಕ್ ದ್ಯೇಯ್ ಝಳ್ಕತಾ ನಂಯ್ಗಿ. ತಶೆಂಚ್ ಎಕಾ ಕವಿಚಿ ಜವಬ್ದಾರಿ. ತಾಚೆಂ ಸಾಹಿತ್ಯ್ ಬರೆಂ ಫಳ್ ದಿಂವ್ಚಾ ತಸಲೆಂ ಜಯ್ಜಾಯ್. ಆಸಲೆಂ ಏಕ್ ಲಿಸಾಂವ್, ಸಂದೇಶ್ ಜಿಯೊಚಾ ಸಗ್ಳ್ಯಾ ಕವಿತೆಂನಿ ನ್ಹಯ್ ತರ್ಯೀ ಚಡಾವತ್ ಕವಿತೆಂನಿ ಝಳ್ಕತಾ ಮ್ಹಳ್ಳೆಂ ಮ್ಹಜಿ ಅಭಿಪ್ರಾಯ್.
ಮೊಣ್ಕ್ಯಾ ಥಾವ್ನ್ ಮೊರ್ನಾಕ್, ಮೊರ್ನಾ ಥಾವ್ನ್ ಗರ್ಭಾಕ್ [- ಹೆನ್ರಿ ಎಮ್. ಪೆರ್ನಾಲ್]
ಜಿಯೊ ಅಗ್ರಾರ್ ಹಾಚೊ ಪುಡ್ಲದ್ ಪುಸ್ತಕ್ ಕವಿತಾ ಜಮೊ ’ಪಯ್ಲಿಂ ಮೆಟಾಂ’ ಅಧ್ಯಯನಾಕ್ ಘೆತಾನಾ ಎಕಾ ವಿದ್ಯಾರ್ಥಿಕ್ ಏಕ್ ಕವಿತಾ ಮ್ಹಳ್ಳೆಂ ಶರ್ತ್ ಹಾಜರ್ ಆಸ್ಚ್ಯಾ ಆಮಿ ಸಗ್ಳ್ಯಾಂನಿ ಮಾಂದುನ್ ಘೆತ್ಲಾಂ ತರ್ಯಿ, ಹ್ಯಾ ಬುಕಾಂತ್ಲ್ಯೊ ಸಗ್ಳ್ಯೊ ಕವಿತಾ ವಾಚುನ್ ಕಾಡ್ಲ್ಯಾ ಉಪ್ರಾಂತ್ ಅಸಲೆಂ ಏಕ್ ಶರ್ತ್ ಮಾಂದುನ್ ಘೆಂವ್ಚ್ಯಾಂತ್ ಹಾಂವೆಂ ತರ್ಯಿ ಕಿತ್ಯಾಕ್ ಅಮ್ಸೊರ್ ಕೆಲೊ ಮ್ಹಣ್ ಭೊಗ್ತಾ.
ದೆಕುನ್ ಪಯ್ಲಿಂ ಮೆಟಾಂ ಪಾಠ್ ಪುಸ್ತಕ್ ಮ್ಹಣ್ ಮಾಂದುನ್ ಘೆತ್ಲ್ಲ್ಯಾ ಹ್ಯಾ ಅಧ್ಯಯನಾಚ್ಯಾ ವರ್ಗಾಂತ್ ಜಮ್ಲೆಲ್ಯಾಂಚಿ ಪರ್ವಣ್ಗಿ ಮಾಗೊನ್ ಹಾಂವ್ ಜಿಯೊಚಿ ’ವಾಟ್ ಗರ್ಭಾಕ್’ (ಪಾನ್ 17)
ಮೂಳ್ಪಾಠ್ ಮ್ಹಣ್ ’ದಿ ದೆವಾ ತಾಂಚೆಂ ಇಲ್ಲೆಂ ಮ್ಹಾಕಾ’ (ಪಾನ್ 30) ಆನಿ ’ರಚ್ನಾರಾ ಅಭಾರ್’ (ಪಾನ್ 51) ಪೂರಕ್ ಪಾಠ್ ಮ್ಹಣ್ ಘೆತಾಂ.
’ವಾಟ್ ಗರ್ಭಾಕ್’ ಕವಿತೆಂತ್ಲೊ ನಾಯಕ್ ಆಮ್ಕಾಂ ಆಮ್ಚ್ಯಾ ಸರ್ವಾಂಚ್ಯಾ ಅನ್ಬೋಗಾಂತ್ಲೆಂ ದೋನ್ ಸಂಸಾರ್ ದಾಕಯ್ತಾ. ಏಕ್ ಭೌತಿಕ್ ಜಲ್ಮಾ ಆದ್ಲೊ ವಾ ಪಯ್ಲೆಂಚೊ ಅನ್ಯೇಕ್ ಭೌತಿಕ್ ಜಲ್ಮಾ ಉಪ್ರಾಂತ್ಲೊ ವಾ ಭಾಯ್ಲೊ. ಮ್ಹಣ್ಜೇ ಏಕ್ ಭಿತರ್ಲೊ ದುಸ್ರೊ ಭಾಯ್ಲೊ. ಏಕ್ ಆವಯ್ಚೊ ಗರ್ಭ್ ಆನಿ ದುಸ್ರೊ ಭುಂಯ್ಚೊ ಗರ್ಭ್.
ಭುಂಯ್ಕ್ ವಾ ಮಾತ್ಯೆಕ್ ಆಮಿ ಸರ್ವಾಂ ಆವಯ್ ಮ್ಹಣ್ತಾಂವ್. ಭುಂಯ್ ಮಾತಾ, ದೆಕುನ್ ದೋನ್ಯಿ ಗರ್ಭ್ ಆವಯ್ಚೆಚ್ ಜಾಲೆ. ದೋನ್ ಆವಯೊ ಜಾಲ್ಯೊ. ದೋನ್ ಗರ್ಭ್ ಜಾಲೆ. ಏಕ್ ಭಿತರ್ಲೊ ಆನಿ ಏಕ್ ಭಾಯ್ಲೊ. ಆನಿಕ್ಯಿ ಸ್ಪಶ್ಟ್ ಥರಾನ್ ಸಾಂಗ್ಚೆಂ ತರ್ ಜಲ್ಮಾಚ್ಯಾ ಪಯ್ಲೆಂಚೊ ಆನಿ ಜಲ್ಮಾ ಉಪ್ರಾಂತ್ಲೊ.
ಕವಿತೆಂತ್ಲೊ ನಾಯಕ್ ಲಜ್, ಭಿರಾಂತ್, ಕಾವ್ಜೆಣ್ ಮೊಗಾಗಿರಾಂತ್ ಇತ್ಯಾದಿ ಲೌಕಿಕ್ ಸಂಗ್ತಿಂಕ್ ಪಯ್ಲ್ಯಾ ಗರ್ಭಾಂತ್ಚ್ ಖೊಟಾವ್ನ್ (ಹಾಂಗಾ ’ಥಂಯ್ಚ್ ಖೊಟಾವ್ನ್ ಭಾಯ್ರ್ ಉಡ್ಲೊಂ’ ಮ್ಹಣ್ಚಿ ಅಭಿವ್ಯಕ್ತಿ ಗರ್ಜೆಚೆಂ) ಭುಂಯ್ಕ್ ಪಡ್ತಾ ವಾ ಜಲ್ಮ್ ಘೆತಾ. ಮಾನ್ ಮಾಣ್ಸುಗಿ ಲಜ್ ಕಾವ್ಜೆಣಿ ಭ್ಯೆಂ ಭಿರಾಂತ್, ಮೊಗಾ ಗಿರಾಂತ್ ಥಂಯ್ಚ್ ಖೊಟಾವ್ನ್ ಭಾಯ್ರ್ ಉಡ್ಲೊಂ ಭುಂಯಿಕ್ ಪಡ್ಲೊಂ ಗರ್ಭಾಂತೂನ್ ಕಾಂಯ್ premature delivery ಗಾಯ್?
ಆಸೊಂ, ಆತಾಂ ಹೆಂ
"ಥಂಯ್ಚ್ ಖೊಟಾವ್ನ್ ಭಾಯ್ರ್ ಉಡ್ಚೆ’
ಆದ್ಲೊ ಸಂಸಾರ್ ಪಳೆವ್ಯಾಂ. ಅಮಾಸೆಂತ್ ಪುನವ್, ಕೊಡ್ಸಾಣೆಂತ್ಯಿ ಗೊಡ್ಸಾಣ್, ಧಾವೆಂತ್ಯೀ ತಣ್ಸಾಣ್ - ಸುಕಾಚೊ ಸುಶೆಗಾಚೊ ಕಸಲಿಚ್ ಖಂತ್ ಪರ್ವಾ ಜವಾಬ್ದಾರಿ ನಾತ್ಲ್ಲೊ. ಪುಣ್ ಹ್ಯಾ ಸುಖಾ ಸವ್ಲತೆಚೊ ಸಂಸಾರ್ ಸಾಸ್ಣಾಚೊ ಕಾಂಯ್ ನ್ಹಯ್. ತೆಂ ಕವಿತೆಚೊ ನಾಯಕ್ಯಿ, ಆಮಿಯೀ ಜಾಣಾಂವ್.
"ಥಂಯ್ ತೆ ನೋವ್ ಅಮಾಸ್ ನಾಚೊನ್ಚ್ ಕಾಡ್ಲೆ"
ಹೊ ಜಾಲೊ ಕವಿತೆಚೊ ಪಯ್ಲೊ ವಾಂಟೊ. ಅಧ್ಯಯನಾಚ್ಯೆ ಗರ್ಜೆಕ್ ಮ್ಹಣ್ ಹಾಂವ್ ಕವಿತಾ ತೀನ್ ವಾಂಟೆ ಕರ್ತಾಂ. ಪಯ್ಲ್ಯಾ ವಾಂಟ್ಯಾಂತ್ ಕವಿತೆಚೊ ನಾಯಕ್ ಆಮ್ಕಾಂ ಭಿತರ್ಲ್ಯಾ ಗರ್ಭಾಚ್ಯಾ ಸುಕಾಚೆಂ ದರ್ಶನ್ ದಿತಾ. ಹಾಂಗಾ ಇಮಾಜ್ಯೊ ನಾಂತ್. ಅಲಂಕಾರ್ನಾ.
ಖಬ್ರೆ ಪತ್ರಾಂತ್ಲೆ ವರ್ದೆ ಪರ್ಮಾಣೆ ಎಕಾ ಉಸ್ವಾಸಾನ್ ಕವಿತೆಚೊ ನಾಯಕ್ ವಿವರ್ ಸಾಂಗೊನ್ ಸಂಪಯ್ತಾ. ಹೆ ಕವಿತೆಚ್ಯಾ ನಾಯಕಾಚೆಂ ಉಣೆಪಣ್ಯೀ ಜಾಂವ್ಕ್ ಪುರೊ. ವಾ ವ್ಹಡ್ವಿಕಾಯ್. ಅಮಾಸೆಂತ್ಯಿ ಪುನವ್ ಭಾಗಿ ತೊ ಗರ್ಭ್ ಎಕೆ ಅಸ್ವಾಭಾವಿಕ್ ವರ್ದೆನ್ ತಾಣೆ ತೊ ಭಿತರ್ಲೊ ಗರ್ಭ್ ಬಾಂದುನ್ ಸೊಡ್ಲೊ. ಎದೊಳ್ ಪರ್ಯಾಂತ್ಲೊ ಗರ್ಭ್ ಬಾಂದ್ಪಾಸ್, ತಾಂತುಂ ಪಾಲೆತಾನಾ ಕಸಲಿಯ್ ಅಸ್ಮಿತಾಯ್ ಆಸಾನಾ. ಖಾಣ್, ಪೀವನ್ ಆಕ್ರೇಕ್ ಚಿಂತಪ್ ಸಯ್ತ್ ಆವಯ್ಚೆಂ-ಆವಯ್ಚ್ಯಾ ರಗ್ತಾಚೆಂ ಮ್ಹಳ್ಳ್ಯಾ ಸಾಂಪ್ರದಾಯಿಕ್ ಜೆರಾಲ್ ಚಿಂತ್ಪಾಕ್ ಕವಿತೆಂತ್ಲೊ ನಾಯಕ್ ಕವಿತೆಚ್ಯಾ ಪಯ್ಲ್ಯಾ ವಾಂಟ್ಯಾಂತ್ಚ್ ಸವಾಲ್ ಕರ್ತಾ. ಹೆಂ ತಾಚೆಂ ಕ್ರಾಂತಿಕಾರಿ ಚಿಂತಪ್. ಜೆಂ ಥಂಯ್ಚ್ ಖೊಟಾವ್ನ್ ಭಾಯ್ರ್ ಉಡ್ಲೊಂ ಮ್ಹಣ್ಚೆ ತಸಲೆಂ.
ಕವಿತೆಚ್ಯಾ ದುಸ್ರ್ಯಾ ವಾಂಟ್ಯಾಂತ್ ಕವಿತೆಚೊ ನಾಯಕ್ ಆಮ್ಕಾಂ ದುಸ್ರ್ಯಾ ಮ್ಹಣ್ಜೆ ಭಾಯ್ಲ್ಯಾ ಅನ್ಯೇಕಾ ಆವಯ್ಚ್ಯಾ ಗರ್ಭಾಚೆಂ ದರ್ಶನ್ ದಿತಾ. ಹಾಂಗಾಯಿ ಚಡುಣೆ ವರ್ದಿ, ವರ್ದಿ ಮ್ಹಳ್ಳೊ ಸಬ್ದ್ ಹಾಂಗಾ ನಿಷ್ಪಕ್ಷ್ ಸಬ್ದಾಕ್ ಪರ್ಯಾಯ್ ಜಾವ್ನ್ ವಾಪಾರ್ಲಾ. ದೆಕುನ್ ಹಾಂವೆಂ ವಡ್ವಿಕಾಯ್ ಮ್ಹಳೆಂ.
"ಹಾಂಗಾ, ಪಾಪಿಚೆಂ ಬಾಜಾರ್
ಗಾಳಿಂಚೆಂ ರಜಾರ್ ...
ಲಫಂಗಾಂಚೆಂ ದರ್ಬಾರ್
ಆನಿ ಸತಾಂತ್ಯಿ ಘಾತ್
ಪುನ್ವೆಂತ್ಯಿ ಅಂದ್ಯಾರ್"
ಹೊ ಕವಿತೆಚ್ಯಾ ನಾಯಕಾನ್ ಪಳೆಯಿಲ್ಲೊ ಆನಿ ಭೊಗ್ಲ್ಲೊ ದುಸ್ರೊ ಗರ್ಭ್.
ಹಾಂಗಾ ಪುನ್ವೆಂತ್ಯಿ ಅಂದ್ಕಾರ್. ಕವಿತೆಚೊ ನಾಯಕ್ ಹ್ಯಾ ಭಾಯ್ಲ್ಯಾ ಗರ್ಭಾಚೆಂ ವಿಮರ್ಶಕಾಬರಿಂ ಅಧ್ಯಯನ್ ಕರ್ತಾ. ಕೊಡ್ತಿಂತ್ ನಿತಿದಾರಾ ಮುಕಾರ್ ಸವಾಲ್ ವಾದ್ ಕರ್ಚ್ಯಾ ವಕೀಲಾಂಬರಿ ತರ್ಕಾಂ ಮಾಂದ್ತಾ. ಪುಣ್ ಕವಿತೆಚ್ಯಾ ಪಯ್ಲ್ಯಾ ಆನಿ ದುಸ್ರ್ಯಾ ವಾಂಟ್ಯಾಂತ್ ಕವಿತೆಚೊ ನಾಯಕ್ ಜಾಯ್ತೊ ಘುಸ್ಪಡ್ಲಾ. ಪಯ್ಲ್ಯಾ ಗರ್ಭಾಂತ್ ತಾಕಾ ದೆಕುನ್ ಅಮಾಸೆಂತ್ ಪುನವ್ ದಿಸ್ತಾ ಆನಿ ದುಸ್ರ್ಯಾಂತ್ ಪುನ್ವೆಂತ್ಯಿ ಅಂದ್ಕಾರ್. ವಯ್ಲೆಬಾರ್ ಹ್ಯೊ ಅಮಾಸ್ ಪುನ್ವೆಚ್ಯೊ ಇಮಾಜಿ ಮತಿಕ್ ಖಂಯ್ಗೀ ಚಿಮ್ಟೊ ಕಾಡ್ಲ್ಲೆಬರಿಂ ವಾ ಎಕೆ ಘಡಿಯೆಚೆಂ ಝಗ್ಲಾಣೆಂ ಮಾರ್ಲ್ಲೆಬರಿಂ ದಿಸ್ಲ್ಯಾರ್ಯಿ ಚಡ್ ತೇಂಪ್ ಥಂಯ್ ಉರಾನಾಂತ್.
ಕಾರಣ್, ಏಕ್ ಸಾಹಿತಾಚೊ ವಿದ್ಯಾರ್ಥಿ ಜಾವ್ನ್ ಹಾಂವೆಂ ಸಮ್ಜಲ್ಲೆ ಪರ್ಮಾಣೆ ಕವಿತಾ ಮ್ಹಳ್ಯಾರ್ ಕಿತೆಂಯಿ ಉಚಾರ್ನ್ ಸಾಂಗ್ಚೆಂ ನ್ಹಂಯ್. ವಾ ಹೆಂ ತೆಂ, ತೆಂ ಹೆಂ ಮ್ಹಣ್ ಪಾಚಾರ್ಚೆಂ ನ್ಹಂಯ್. ಹೆಂ ಕಾಮ್ ಜರ್ ಕವಿತೆಚ್ಯಾ ನಾಯಕಾನ್ (ಹಾಂಗಾ ಕವಿನ್ ನ್ಹಂಯ್) ಕರ್ನ್ ಸೊಡ್ಲೆಂ ತರ್ ಉಪ್ರಾಂತ್ ಮ್ಹಜೆ ತಸಲ್ಯಾ ಸಾಹಿತ್ಯಾಚ್ಯಾ ವಿದ್ಯಾರ್ಥಿಕ್ ತಾಂತು ಸೊದುನ್ ಶಿಕೊಂಕ್ ಕಾಂಯ್ ಉರ್ಲೆಂನಾ ಅಸೊಂ.
ಆತಾಂ ಕವಿತೆಚ್ಯಾ ತಿಸ್ರ್ಯಾ ಆನಿ ನಿಮಾಣ್ಯಾ ವಾಂಟ್ಯಾಕ್ ಯಾ. ಹಾಂಗಾ ಕವಿತೆಚೊ ನಾಯಕ್ ಎಕಾ ವಿಮರ್ಶಕಾಥಾವ್ನ್, ಎಕಾ ಹುಶಾರ್ ವಕೀಲಾ ಥಾವ್ನ್ ಖರೆಂ ಸಾಂಗು? ಭಿಕಾರಿ ಜಾಲಾ. ಕವಿತೆಚ್ಯಾ ಪಯ್ಲ್ಯಾ ವಾಂಟ್ಯಾಂತ್ ’ಥಂಯ್ಚ್ ಖೊಟಾವ್ನ್ ಭಾಯ್ರ್ ಉಡ್ಲೊಂ’ ಮ್ಹಣ್ಚೆಂ ತಾಚೆಂ ದಾದ್ಲೆಪಣ್ ಹಾಂಗಾ ಇರೊನ್ ಗೆಲಾಂ? ದೆಕುನ್ ತೊ ನಿತಿದಾರ್ ಜಾಲಾ. ತಾಚಿ ವಿಂಚವ್ಣ್ ಸಂಪ್ಲ್ಯಾ ವಾ ಚಡ್ ಆನಿ ಚಡ್ ನಿರ್ದಿಷ್ಟ್ ’decisive' ಜಾಲ್ಯಾ. ಆತಾಂ ತಾಚ್ಯೆ ಮತಿಂತ್ ಗೊಂದೊಳ್ ನಾ, ಘಡ್ಬಡ್ ನಾ. ಸ್ಪಶ್ಟ್ ವಿಂಚವ್ಣ್ ಮ್ಹಳ್ಯಾರ್ ತಾಕಾ ಪಯ್ಲೊ ಗರ್ಭ್ಚ್ ಖರೊ ರಂಗೀನ್ ಆನಿ ಲಾಯೆಕ್ ದಿಸ್ತಾ. ದೆಕುನ್ ತೊ ಮ್ಹಣ್ತಾ.
ದಾಕಯ್ ವಾಟ್ ದೆವಾ ಮ್ಹಜ್ಯಾ ಪಾಟಿಂ ವೆಚ್ಯಾಕ್ ಗರ್ಭಾಕ್ ತ್ಯಾ ಹಾಂಗಾ ಕವಿತೆಚ್ಯಾ ನಾಯಕಾಕ್ ತೊ ಗರ್ಭ್, ಮ್ಹಣ್ಚೆ ಸ್ಪಶ್ಟ್ ವಿಂಚ್ಲ್ಲೊ. ಅಸಲೆಂ ಏಕ್ ಅಸ್ವಾಭಾವಿಕ್, ಚಿಂತಪ್ ಎಕಾ ಕವಿತೆಚೊ ನಾಯಕ್ ಮಾತ್ರ್ ಕರುಂಕ್ ಸಕ್ತಾ. ತಾಕಾ ಜಾಯ್ ಥಂಯ್ ಕಶೆಂ ಜಾಯ್ ತಶೆಂ ಅಸಲಿ ಏಕ್ ಸೊಡ್ದೊಡ್ ಕರ್ಚೆಂ ಲೈಸನ್ಸ್ ಕವಿನ್ ದಿಲಾಂ ಮ್ಹಣೊಂ? ಅಸೊಂ. ಪುಣ್ ಎಕಾ ಬಾಂದ್ಪಾಸಾಥಾವ್ನ್ ಕವಿತೆಚೊ ನಾಯಕ್ ಅನ್ಯೇಕಾ ಬಾಂದ್ಪಾಸಾಚೆ ವೆವಸ್ತೆಕ್ ಉತ್ರೊಂಕ್ಯಿ ದೆವಾಚಿ ಸಸಾಯ್ ಮಾಗ್ತಾ. ದಿಂಬ್ಯೆರ್ ಪಡ್ತಾ. ಅಡ್ದೊಸ್ ಮಾಗ್ತಾ. ದಾಕಯ್ ವಾಟ್ ದೆವಾ ಮ್ಹಜ್ಯಾ... ತ್ಯಾ ಭಿತರ್ಲ್ಯಾ ಗರ್ಭಾಂತ್ ತರ್ಯಿ ಸ್ವತಾಚೆಂ ಖಾಣ್ ನಾ ಪೀವನ್ ನಾ. ಆಕ್ರೇಕ್ ಚಿಂತಕ್ ಸಯ್ತ್ ನಾ.
ಬೆಜವಾಬ್ದಾರಿ ಬರಿ ಮ್ಹಣ್ಚೆ ತಿತ್ಲೊ ಕವಿತೆಚೊ ನಾಯಕ್ ನಿರಾಶಿ ಜಾತಾ. ಕಿತ್ಲ್ಯಾ ವಾಂಟ್ಯಾಕ್ ಮ್ಹಳ್ಯಾರ್ ಹ್ಯಾ ಗುಲಾಮ್ಪಣಾಂತ್ಲೊ ಸುರ್ಯೊ ತೊ ಅನ್ಯೇಕಾ ಗುಲಾಮ್ಪಣಾಕ್ ವೆತಾ. ದೆಕುನ್ ಹ್ಯಾ ಲೇಕನಾಂತ್ ಹಾಂವೆಂ ಭಿಕಾರಿ ಮ್ಹಳ್ಳೊ ಸಬ್ದ್ ವಾಪಾರ್ಲಾ. ತ್ಯಾ ದೆಕುನ್ ಮಾಫಿ ಅಸೊಂ.
ಆತಾಂ ಕವಿತಾಚೆ ತೀನ್ಯಿ ವಾಂಟೆ ಎಕ್ಟಾಯ್ ಕರ್ನ್, ಕವಿತಾ ಅಧ್ಯಯನ್ ಕೆಲಿ ತರ್ ಹಿ ಏಕ್ ಕ್ರಾಂತಿಕಾರಿ ಕವಿತಾ. ಪುಣ್ ಕೊಂಕ್ಣಿ ಕಾವ್ಯಾ ಚರಿತ್ರೆಂತ್ಲ್ಯಾ ಚಡಾವತ್ ಕವಿತೆಂಬರಿಂ ಹಾಂತುಯಿ ಝಳ್ಕಾತಾ. ’ರೆವುಲ್ಯೂಶನರೀ ಫೆಸ್ಸಿಮಿಸಂ’ ಮ್ಹಣ್ಚೆ ’ಕ್ರಾಂತಿಕಾರಿ ನಿರಾಶಾವಾದ್’.
ಕವಿತೆಚ್ಯಾ ಪಯ್ಲ್ಯಾ ವಾಂಟ್ಯಾಂತ್ ಭಿತರ್ಲ್ಯಾ ಗರ್ಭಾಕ್ ವರ್ಣುಂಚೊ ಕವಿತೆಚೊ ನಾಯಕ್, ದುಸ್ರ್ಯಾ ವಾಂಟ್ಯಾಂತ್ ಭಾಯ್ಲ್ಯಾ ಗರ್ಭಾಚೆಂ ಭಿರಾಂಕುಳ್ ದರ್ಶನ್ ದಿಂವ್ಚೆ ತಿತ್ಲ್ಯಾಕ್ ಮಾತ್ರ್ ರಾವ್ತಾ. ವರ್ದೆಬರಿಂ ಬಿಲ್ಕುಲ್ ಖಬ್ರೆ ಪತ್ರಾಂತ್ಲ್ಯಾ.
ತಿಸ್ರ್ಯಾ ವಾಂಟ್ಯಾಂತ್ ’ಥಂಯ್ಚ್ ಖೊಟಾವ್ನ್ ಭಾಯ್ರ್ ಉಡ್ಲ್ಲೊ’ ನಾಯಕ್ ಇತ್ಲೊ ಅಸ್ಕತ್ ಪಡ್ತಾ ಕೀ, ಪರತ್ ಮಾಫ್ ಕರಾ, ಎಕಾ ಭಿಕರ್ಯಾಬರಿಂ ದೆವಾಚ್ಯಾ ಪಾಯಾಂಥಳಾ ಸರ್ಪಡ್ತಾ. ತಾಚಿ ವಿಂಚವ್ಣ್ ಸ್ಪಶ್ಟ್ ಜಾಲ್ಯಾ. ಆನಿ ಅಸಲೆ ಎಕೆ ವಿಂಚವ್ಣೆಚಿಂ ತಾಚಿಂ ಪ್ರೇರಣಾಮ್ ಸೊದುನ್ ಗೆಲ್ಯಾರ್ ತಾಕಾ ಸಗ್ಳಿಂ ದಾರಾಂ ಬಂದ್ ಜಾಲ್ಯಾಂತ್ ಜಾಂವ್ಕ್ಯಿ ಪುರೊ, ಉಮೆದಿಚಿಂ ಕಿರ್ಣಾಂ ಮೆಲ್ಯಾಂತ್ ಜಾಂವ್ಕ್ ಪುರೊ ಅಸೊಂ. ಆತಾಂ ತೊ ದೆವಾ ಮುಕಾರ್ ದಿಂಬಿಯಾಂನಿ ಪಡ್ತಾ ಆನಿ ಮ್ಹಣ್ತಾ.
ದಾಕಯ್ ವಾಟ್ ದೆವಾ ಮ್ಹಜ್ಯಾ. ಆತಾಂ, ಏಕ್ ಪಾವ್ಟಿಂ ಭಾಯ್ಲ್ಯಾ ಗರ್ಭಾಕ್ ಆಯ್ಲ್ಯಾ ಉಪ್ರಾಂತ್. ಭಿತರ್ಲ್ಯಾ ಗರ್ಭಾಕ್ ಪಾಟಿಂ ವೆಚೆಂ ಪ್ರೇತನ್ ಇತ್ಲ್ಯಾ ಕಶ್ಟಾಂಚೆಂಗಿ. ತೆಂ ಮನ್ಶ್ಯಾವರ್ವಿಂ ಸಾದ್ಯ್ ನಾ ದೆಕುನ್ ವಾ ತ್ಯಾ ಜಾಣ್ವಿಕಾಯೆನ್ ಹ್ಯೆ ಕವಿತೆಚೊ ನಾಯಕ್ ದೆವಾ ಮುಕಾರ್ ಗುಲಾಮ್ ಜಾಲಾ. ಎಕಾ ನಿರ್ಲಿಪ್ತ್ ವಾ ಅಸಹಾಯಕ್ ಅಸ್ಕತ್ ಮನ್ಶ್ಯಾಬರಿಂ ಕವಿತೆಚೊ ನಾಯಕ್ ಭಾಯ್ಲ್ಯಾ ಗರ್ಭಾಚೆಂ ಭಿರಾಂಕುಳ್ ದರ್ಶನ್ ಮಾತ್ರ್ ವರ್ದೆಬರಿಂ ದೀಂವ್ಕ್ ಸಕ್ತಾ. ಪುಣ್ ಕೆದಿಂಕ್ಚ್ ಸವಾಲ್ ಉಡಂವ್ಚೆಂ ಏಕ್ ಪ್ರಾಮಾಣಿಕ್ ಖಾಲ್ತೆಂ ಪ್ರೇತನ್ ಜಾಂವ್, ಬದ್ಲುಂಕ್ ಪ್ರೇತನ್ ಕರ್ಯಾಂ ಮ್ಹಣ್ಚೆಂ ಆಶಾವಾದಿ ಚಿಂತಪ್ ಜಾಂವ್ ದಿಂವ್ಚೆ ರಾಟಾವಳೆಕ್ ಪಡಾನಾ. ಕವಿತೆಚ್ಯಾ ನಾಯಕಾಕ್ ಇತ್ಲೆಂ ಚಿಂತುಕ್ ಮಂಜೂರ್ ಕೆಲ್ಲಿಂ ಪ್ರೇರಣಾಂ ಲೆಕಾಕ್ ಧರ್ಲ್ಯಾರ್ಯಿ ತಾಚಿ ವಿಂಚವ್ಣ್ ಮಾತ್ರ್ ಭಿಲ್ಕುಲ್ ಅಮ್ಸೊರಾಚಿ ಜಾತಾ ಮ್ಹಣ್ ಮ್ಹಾಕಾ ಎಕಾ ಸಾಹಿತ್ಯಾಚೊ ವಿದ್ಯಾರ್ಥಿ ಜಾವ್ನ್ ಭೊಗ್ತಾ.
ಆತಾಂ ಕೊಂಕ್ಣಿ ಕವಿತಾಂನಿ ಹೆಂ ’ರೆವಲ್ಯೂಶನರೀ ಫೆಸ್ಸಿಮಿಸಂ’ ವಾ ’ಕ್ರಾಂತಿಕಾರಿ ನಿರಾಶಾವಾದ್’ ಕೊಂಕ್ಣಿ ಕವಿತಾ ಶಿಕ್ಚ್ಯಾ ಹಾವೆಂ ಸಮ್ಜಾಲ್ಲೆ ಪರ್ಮಾಣೆ ಕೊಂಕ್ಣಿ ಸಾಹಿತ್ಯಾಚ್ಯಾ ಪ್ರತ್ಯೇಕ್ ಥರಾನ್ ಕವಿತೆಚ್ಯಾ ಚರಿತ್ರೆಂತ್ ಆತಾಂಚೊ ವಾ ನವೊ ನ್ಹಂಯ್.
ದಾಕ್ಲ್ಯಾಕ್ ವರಕವಿ ಚಾ. ಫ್ರಾ. ದೆ. ಕೊಸ್ತಾಚಿ ಕವಿತಾ ’ದರ್ಯಾಕ್ ಉಜೊ ಪೆಟ್ಲಾ’ ಘೆಂವ್ಚಿ
"ತರ್ ದರ್ಯಾಕ್ ಉಜೊ ಪೆಟಾನಾಂಗಾ
ಸಾಂಗುಂಕ್ ಉತರ್ ಸುಟಾನಾಂಗಾ
ತರ್ಯಿ ತಾಂಚ್ಯಾ ಅಗ್ಟ್ಯಾಪುಡೆಂ
ಮ್ಹಜೊ ಧುಂವರ್ ಉಟನಾಂಗಾ
ದೆಕುನ್ ಮೊಣ್ಕೊ ಘೊಟ್ಲಾ
ರಾಜಾಂವ್ ಪೆಲ್ಯಾನ್ ಲೊಟ್ಲಾಂ."
ಮೊಣ್ಕೊ ಮ್ಹಳ್ಯಾರ್ ಅಮಾಲ್. ತೆಂಯಿ ದರ್ಯಾ ತಡಿರ್ ಬಸೊನ್ ತೊ ಮ್ಹಣ್ಚೆ ಕವಿತೆಂತ್ಲೊ ನಾಯಕ್ ಪಿಯೆತಾ ಆನಿ ಬೊಬಾಟ್ಚೆಂ ಪ್ರೇತನ್ ತರ್ಯಿ ಕರ್ತಾ.
ಖಂಯ್ ಮೊಣ್ಕ್ಯಾಚೆಂ ಅಮಾಲ್, ಖಂಯ್ ದೇವ್ ಧರ್ಮಾಚೆಂ, ಅಸೊಂ. ಅಮಾಲ್ ತೆಂ ಖಂಚೆಯಿ ಅಸೊಂ. ತೆಂ ಖಿಣಾಚೆಂ ವಾ ಕ್ಷಣಿಕ್. ವಾಸ್ತವಿಕತಾ ವಾ ಸತ್ ಗಜಾಲ್ ವಿಸ್ರೊಂಕ್ ತ್ಯೆ ಘಡಿಯೆ ಕವಿತೆಚ್ಯಾ ನಾಯಕಾಕ್ ಮದತ್ ಕರಿಜೆ. ದರ್ಯಾಕ್ ಉಜೊ ಪೆಟ್ಲಾ ಕವಿತೆಂತ್ಲೊ ನಾಯಕ್ ದೆಕುನ್ ಮೊಣ್ಕೊ ಘೊಟ್ತಾ. ಹ್ಯೆ ಕವಿತೆಂತ್ ಪಾದ್ರಿಬಾಬ್, ಮಾದ್ರಿ, ಬಿಸ್ಪ್, ಮೆಸ್ತ್ರಿ ಸಗ್ಳೆ ಎಕಾ ವ್ಯವಸ್ಥೆಚೆ, ಸಮಾಜಿಕ್ ವ್ಯವಸ್ಥೆಚೆ ಪ್ರತಿನಿಧಿ. ತಾಂಕಾಂ ತಾಂಚಿ ಅಡಿ ವಾ bಚಿse ಉರಂವ್ಕ್ ತಾಂಕಾಂ ದರ್ಯಾಕ್ ಉಜೊ ಪೆಟ್ಲಾ ಮ್ಹಣ್ಚಿ ಏಕ್ ಬೋಬ್ ಗರ್ಜೆಚಿ.
’ಆಡ್ ಪಡ್ಲಾ ತಾಚೊ ಪಾಂಯ್’ ಹಿ ಜಾಣ್ವಿಕಾಯ್ ಕವಿತೆಚ್ಯಾ ನಾಯಕಾಕ್ ಆಸಾ ದೆಕುನ್ ತೊ ಹ್ಯಾ ಸಗ್ಳ್ಯಾಂಕ್ ಮಾರ್ಕೆಟಿಂತ್ಲ್ಯಾ ಮಟನ್ ಸಾಯ್ಬಾಚ್ಯಾ ವರ್ಗಂತ್ ರಾವಯ್ತಾ. ಸಾಯ್ಬ್ ಮ್ಹಳ್ಯಾರ್ ಕಾಸಾಪ್ಪಿ. ಅಮಾಯಾಕ್ ಬೊಕ್ರ್ಯಾಂಕ್ ಕಾತರ್ನ್ ವಿಕ್ಚೊ, ಬಜಾರಿ. ಹಿ ಫಟ್ಕಿರಿ ದರ್ಯಾಕ್ ಉಜೊ ಪಡ್ಲಾ ಮ್ಹಣ್ಚಿ ಬೋಟ್ ಆಪಾಪ್ಲಿಂ ಸಾಳಾಂಪಾಳಾಂ ಉರಂವ್ಕ್ ಪೆಚಾಡ್ಯಾ ಸಮಾಜೆಚ್ಯಾ ತ್ಯಾ ವರ್ಗಾಕ್ ಗರ್ಜೆಜಿ ಮ್ಹಳ್ಳಿ ಜಾಣ್ವಿಕಾಯ್ ಆಸ್ಲ್ಯಾರ್ಯಿ ವರ್ಕವಿ ಚಾ. ಫ್ರಾ. ಚ್ಯಾ ಕವಿತೆಂತ್ಲೊ ನಾಯಕ್ ಸಲ್ವತಾ.
ತಾಚೆಂ ರಾಜಾಂವ್ ಘೆಂವ್ಚೆಂ ಕೋಣ್ನಾ ವಾ ಫಟ್ಕಿರ್ಯಾ ಬೊಬೆಂತ್ ತಾಚೊ ಅವಾಜ್ ದಾಂಬುನ್ ಗೆಲಾ ಜಾವ್ಯೆತ್. ದೆಕುನ್ ತೊ ವಾಸ್ತವಿಕತಾ ವಾ ಸತ್ ಗಜಾಲ್ ವಿಸ್ರೊಂಕ್ ’ಮೊಣ್ಕೊ’ ಘೊಟ್ತಾ.
ಮ್ಹಜ್ಯಾ ಅಧ್ಯಯನಾಚ್ಯೆ ಗರ್ಜೆಕ್ ಹಾಂವೆಂ ಅರ್ವಿಲಿ ಕೊಂಕ್ಣಿ ಚರಿತ್ರಾಯಿ ತೀನ್ ಪ್ರತಿನಿಧಿಕ್ ವಾಂಟೊ ಕೆಲ್ಯಾ.
ಪಯ್ಲೊ ವಾಂಟೊ ವರಕವಿ ಚಾ. ಪ್ರಾ ಮೊರಾಯಸ್ ಹಾಂಚೊ ಕಾಳ್.
ದುಸ್ರೊ ಮೆಲ್ವಿನ್ ರೊಡ್ರಿಗಸ್ ವಾ ಮಾವ್ರಿಸಾಚೊ ಕಾಳ್.
ತಿಸ್ರೊ ವಲ್ಲಿ ಕ್ವಾಡ್ರಸ್ ಜಿಯೊಚೊ ಕಾಳ್.
ಪುಣ್ ಹ್ಯಾ ತೀನ್ಯಿ ಪಿಳ್ಗ್ಯಾಂನಿ (ಜನರೇಶನ್ ಮ್ಹಳ್ಳ್ಯಾ ಅರ್ಥಾರ್) ಮ್ಹಾಕಾ ಕ್ರಾಂತಿಕಾರಿ ನಿರಾಶಾವಾದಿ ಕವಿತಾ ಮ್ಹೆಳ್ಳ್ಯಾತ್. ಚಾ. ಫ್ರಾ. ಚಿ ಅನ್ಯೇಕ್ ಕವಿತಾ
’ಹಾಡ್ ಚೆಡ್ವಾ ಬುಡ್ಕುಲೊ ಲಕಾಯ್ ತಳ್ಯಾಂತ್,
ಮ್ಹಜೆಂ ತುಜೆಂ ಲಗೀನ್ ಘಡೊಂ ಕಾಚ್ಚ್ಯಾ ಮೊಳ್ಯಾಂತ್’
ಆತಾಂ ಮೆಲ್ವಿನ್ ರೊಡ್ರಿಗಾಸಾಚಿ ಕವಿತಾ ಘೆವ್ಯಾಂ. ಮೊರ್ನಾಕ್ ಯೆವ್ಕಾರ್ (ಫಿಂತಾಂ)
"ಲಜೆನಾಕಾ ಯೇ ಮೊರ್ನಾ ಆಪವ್ನ್ ಮ್ಹಾಕಾ ವ್ಹರ್
ಪ್ರತಿಭೆಚಿಂ ಮ್ಹಜಿಂ ಕಿರ್ಣಾಂ ತರ್ನ್ಯಾರ್ ಫೊಂಡಾಂತ್ ಭರ್"
ಹಾಂಗಾ ಕವಿತೆಚೊ ನಾಯಕ್ ಪೊಂಡಾಂತ್ ಪೂರ್ ಮ್ಹಣಾನಾ ತೊ ಮ್ಹಣ್ತಾ ’ಭರ್’ ಮ್ಹಳ್ಯಾರ್ ತೊ ಅಜೂನ್ ಮೊರೊಂಕ್ ನಾ. ತೊ ಎಕಾ ನಿರ್ದಿಶ್ಟ್ ವರ್ಗಕ್ ಉದ್ದೇಸುನ್ ಉಲಯ್ತಾ.
ಎಕಾ ನಿರ್ದಿಶ್ಟ್ ಸಮಾಜೆಕ್ ವ್ಯವಸ್ಥೆಚ್ಯಾ ವರ್ಗಾಕ್. ಹೊ ವರ್ಗ್ ಕೆನ್ನಾಂಯಿ ಕಿತೆಂಚ್ ಪೂರಿನಾ. ಪುರ್ಲ್ಯಾರ್ ಸಂಪ್ಲೆಂ. ಗೆಲೆಂ. ತೊ ಸಗ್ಳೆಂ ಪ್ರತಿಭೆಚ್ಯಾ ತರ್ನಿಂ ಕಿರ್ಣಾಂ ಸಯ್ತ್ ಆಪ್ಲ್ಯಾ ಪೊಟಾಂನಿ ಆನಿ ಗುದಾಂವಾಂನಿ ಭರುಂಕ್ ಮಾತ್ರ್ ಜಾಣಾ. ಉಪ್ರಾಂತ್ ಹೊ ಭಂಡ್ವಾಳ್ ಹೊ ವರ್ಗ್ ತಾಂಕಾಂ ಜಾಯ್ ಜಾಲ್ಲೆಬರಿ ವಾಪಾರ್ತಾ. ’ಪ್ರತಿಭೆಚಿಂ ಮ್ಹಜಿಂ ಕಿರ್ಣಾಂ’ ಕವಿತೆಚೊ ನಾಯಕ್ ಮ್ಹಣ್ತಾ, ಕಿರ್ಣಾಂ - ತೆಂಯಿ ಪ್ರತಿಭೆಚಿಂ ಆನಿ ತರ್ನಿಂ.
ಚಿಂತ್ಲ್ಲಿ ತಿಂ ಗೊದಾವಾಂತ್ ಪೆಟೆಂತ್ ಭರ್ಲ್ಯಾರ್ ಕಿತೆಂ ಜಾಯ್ತ್? ದೆಕುನ್ ಪೊಂಡ್ ಕವಿತೆಚ್ಯೊ ಹೊ ಪಯ್ಲೊ ವಾಂಟೊ ಕ್ರಾಂತಿಕಾರಿಕ್. ಪೂಣ್ ಹಾಚ್ಯೊ ಕವಿತಾ ಸಂಪ್ಚಿ ರೀತ್ ಪಳೆಲ್ಯಾರ್
"ನಾಕಾ ಆತಾಂ ಗಳಾಯ್ ಕರುಂ ಭಿತರ್ ಸರ್ ಮರ್ಣಾ
ತುಂಯಿ ತಾಂಚ್ಯೆ ಮೆಳಿಂತ್ ಘುಸ್ಲಾಂಯ್ ಆತಾಂ ಮೊರ್ಚೆಂ ಕಿತೆಂ ಕಳಾನಾ"
ಹೊ ನಿರಾಶಾವಾದ್. ಕ್ರಾಂತಿಕಾರಿ ನಿರಾಶಾವಾದ್, ರೆವೊಲ್ಯೂಶನರೀ ಫೆಸ್ಸಿಮಿಸಂ. ಕವಿತೆಚೊ ನಾಯಕ್ ಸಗ್ಳೊಚ್ ಸಲ್ವೊನ್ ಮೊರ್ನಾ ಮುಕಾರ್ ಸರ್ಪಡ್ಲಾ. ಆತಾಂ ತೆಂ ಯೇನಾತ್ಲೆಂ ಪಳೆವ್ನ್ ಆತಾಂ ತಿಕಾ ಮೊರ್ನಾಚ್ಯಾ ’ಕ್ರೆಡಿಬಲಟಿ’ ವಯ್ರ್ಚ್ ತಾಕಾ ದುಬಾವ್ ಜಾಂವ್ಕ್ ಸುರು ಜಾಲಾ.
ತುಂಯಿ ತಾಂಚಿ ಮೆಳಿಂತ್ ಘುಸ್ಲಾಂಯ್ ಆತಾಂ ಮೊರ್ಚೆಂ ಕಶೆಂ ಕಳಾನಾ ಇತ್ಲಿ ಘಸ್ಪಡ್? ಆತಾಂ ಚಾ. ಫ್ರಾಚೊ ಮೊಣ್ಕೊ, ಮೆಲ್ವಿನಾಚೆಂ ಮರಣ್ ಆನಿ ಜಿಯೊಚೊ ಗರ್ಭ್, ಹ್ಯೆ ತೀನ್ಯಿ ಇಮಾಜಿ ಆನಿ ಪಿಂತುರಾಂ ಪಳೆವ್ಯಾಂ. ತೀನ್ ಪಿಳ್ಗೆಂಚ್ಯಾ ತೀನ್ ಕವಿಂನಿ ಕ್ರಾಂತಿಕಾರಿ ಜಾವ್ನ್ ಭಾಯ್ರ್ ಸರ್ಲ್ಲೆ ನಾಯಕ್ ಕಿತ್ಯಾಕ್ ಸಲ್ವಾಲೆ? ಅಮಾಲಾಕ್, ಮೊರ್ನಾಕ್, ಗರ್ಭಾಕ್ ಮ್ಹಣ್ಚೆ ಆವಸ್ಥೆಕ್ ಬಲಿ ಜಾಲೆ? ಕೊಂಕ್ಣಿ ಕವಿತಾ ಆನಿ ತಾಚಿ ಆರ್ವಿಲಿ ಚರಿತ್ರಾ ಕಾಳ್ಜಾ ಲಾಗ್ಶಿಲ್ಯಾನ್ ಶಿಕ್ಚ್ಯಾ ಮ್ಹಜೆ ತಸಲ್ಯಾ ವಿದ್ಯಾರ್ಥಿಕ್ ತೀನ್ ಕಾಳಾಂಚ್ಯಾ ತೀನ್ ಕವಿತಾಂನಿ ಸಮಾನತಾ (ಸಿಮಿಲ್ಯಾರಿಟಿಯಿ) ತಪಾವತ್ (ವೆರೈಟಿಯಿ) ಎಕಾಚ್ಯಾ ಮಾಫಾನ್ ದಿಸ್ತಾತ್.
ಕವಿತಾ ಜಮೆ ಕವಿ ವಾಡ್ಲ್ಯಾತ್ ಜಾಂವ್ಕ್ ಪುರೊ ಪೂಣ್ ತೆ ಮಾಪಾನ್ ಎಕಾ ಸಾಹಿತ್ಯಾಚೊ ವಿದ್ಯಾರ್ಥಿ ಜಾವ್ನ್ ಹಾವೆಂ ಚಿಂತ್ಲ್ಲ್ಯಾ ವಾ ಆಶೆಲ್ಲ್ಯಾ ಮಾಪಾನ್ ಕಾವ್ಯಾಂತ್ ವಾಡೊಂಕ್ನಾ ಮ್ಹಣ್ ಮ್ಹಾಕಾ ಖಾಸ್ಗೆನ್ ಭೊಗ್ತಾ. ಹಾಕಾ ಹಾವೆಂ ಕವಿತ ವಾಚ್ಚಿ ವಾ ಪಳೆಂವ್ಚಿ ರೀತ್ಯಿ ಕಾರಣ್ ಜಾಂವ್ಕ್ ಪುರೊ.
ಪೂರಕ್ ಪಾಠ್: ಪೂಣ್ ಜಿಯೊಚ್ಯಾ ಬುಕಾಂತ್ ಹಾಂವೆಂ ವಯ್ಲ್ಯಾ ಬರ್ಪಾಂತ್ ಉಲ್ಲೇಕ್ ಕೆಲ್ಲ್ಯಾ ರೆವಲೂಶನರೀ ಫೆಸ್ಸಿಮಿಸಂ ಚಿಂತ್ಪಾಕ್ ತದ್ವಿರುದ್ದ್ ಚಿಂತ್ಪಾಚೊ ಕವಿತಾ ಆಸಾತ್.
ವಾ ಹೆ ಕವಿತೆಚೊ ದುಸ್ರೊ ವಾಂಟೊ ಮ್ಹಣೊಂ? ದಾಕ್ಲ್ಯಾಕ್ ದಿ ದೆವಾ ತಾಂಚೆಂ ಇಲ್ಲೆಂ ಮ್ಹಾಕಾ (ಪಾನ್: 30) ಹ್ಯಾ ಕವಿತೆಚೊ ನಾಯಕ್ ಮ್ಹಣ್ತಾ. ಜರ್ ಘೆಂವ್ಕ್ ಸೊಡ್ತಾಯ್ ಜಲ್ಮ್ ಅನ್ಯೇಕ್ ಜೆನ್ನಾ ಪರತ್ ಜಲ್ಮ್ ಘೆವ್ನ್ ಯೆತಾ ತೆನ್ನಾ... ಹ್ಯಾ ನಾಯಕಾಕ್ ಗೀದಾಚಿ ದೀಶ್ಟ್ ಜಾಯ್. ಹಸ್ತಿಚೆಂ ಬಳ್ ಜಾಯ್. ಸೊಂಶ್ಯಾಚೆ ಕಾನ್ ಜಾಯ್. ಸತಾಂಚೆಂ ಧರ್ಮ್, ಮೊಗಾಚೆಂ ಕಾಳಿಜ್ ಆನಿ ಕಾವ್ಳ್ಯಾಚೆಂ ಆವ್ಕ್ ಸಯ್ತ್ ಜಾಯ್. ಹಿಂ ಸರ್ವ್ ದೆಣಿಂ ತಾಣೆಂ ಮ್ಹಾಕಾ ನಾಕಾ ಮ್ಹಣ್ ಸೊಡ್ಲ್ಲ್ಯಾ ಭಾಯ್ಲ್ಯಾ ಗರ್ಭಾಂತ್ಲಿಂ.
ಹಿ ವಾಡಾವಳ್ ಲಾಗ್ಶಿಲ್ಯಾನ್ ಪಳೆಂವ್ಚಿ ತರ್ ಕಿತ್ಯಾಕ್ ಹ್ಯಾಚ್ ಕವಿತೆಚ್ಯಾ ನಾಯಕಾನ್ ಹಿಂ ಹಾತೆರಾಂ, ಜಿವೆಂ ಹಸ್ತಿಚೆಂ ಬಳ್ ಗಿದಾ ದೀಶ್ಟ್. ಭಾಯ್ಲ್ಯಾ ಗರ್ಭಾಂತ್ಲೆಂ ಉಣೆಂಪಣ್ ವಾ ಖೊಟೆಪಣ್ ಮಾರ್ನ್ ಕಾಡುಂಕ್ ಗಳ್ಸುಂಕ್ ನಜೊ? ಅಸಲಿಚ್ ಅನ್ಯೇಕ್ ಕವಿತಾ ’ ರಚ್ನಾರಾ-ಅಭಾರ್’ ಭಾಯ್ಲ್ಯಾ ಗರ್ಭಾಂತ್ ಫಾವೊ ಕೆಲ್ಲ್ಯಾ ದೆಣ್ಯಾಂಕ್ ಹ್ಯೆ ಕವಿತೆಚೊ ನಾಯಕ್ ತೆಚ್ ಕೊಣಾಕಡೆ ಪಾಟಿಂ ಗರ್ಭಾಕ್ ವೆಚಿ ಬಾಟ್ ದಾಕಯ್ ಮ್ಹಣ್ ಸರ್ಪಡ್ಲೊಲೊಗೀ ತ್ಯಾಚ್ ದೆವಾಕಡೆ ಅಭಾರ್ ಮಾಂದ್ತಾ.
ನಿಮಾಣೊ ಶ್ಹೆರೊ: ಗರ್ಭಾಂತ್ಚ್ ನಾಸ್ ಜಾಂವ್ಚ್ಯಾ ಮಾಸೂಮ್ ’ಪಿಂಪ್ರ್ಯಾ’ ಖಾತಿರ್ ಬೂಕ್ ಅರ್ಪುನ್ ಜಿಯೊನ್ ’ವಾಟ್ ಗರ್ಭಾಕ್’ ಕವಿತೆಚ್ಯಾ ನಾಯಕಾಕ್ ಮಾನ್ ಕೆಲಾ.
ಪ್ರತಿಕ್ರಿಯಾ
ಮೆಲ್ವಿನ್ ಪಿಂಟೊ, ನೀರುಡೆ: ಅಧ್ಯಯನ್ ಬರ್ಪಾಂತ್ ಮಾಂಡ್ಲಲೊ ವಾದ್ ನಿರಾಸ್ವಾದ್ ಮ್ಹಣ್ಚೆಪ್ರಾಸ್ ತೊ ಏಕ್ ಪಲಾಯನ್ವಾದ್ ಮ್ಹಣ್ಯೆತ್. ಕವಿಕ್ ಆನಿ ಕವಿತೆಚ್ಯಾ ನಾಯಕಾತ್ ವೆಗ್ಳೆಂ ಕರ್ನ್ ಪಳೆಯಿಲ್ಲೆಂ ಅಧ್ಯಯನಾಂತ್ ಕಿತ್ಲೆಂ ಸಾರ್ಕೆಂ?
ಎಚ್ಚೆಮಾಚಿ ಜಾಪ್: ಕವಿ ಏಕ್ ವ್ಯಕ್ತಿ ಜಾವ್ನ್ ಕಾವ್ಯಾಚ್ಯಾ ಅಧ್ಯಯನಾಕ್ ಮಹತ್ವಾಚೊ ವಾಂಟೊ ನ್ಹಂಯ್, ನಾಯಕ್ ಮ್ಹಳ್ಯಾರ್ ಕವಿಚ್ಯಾ ಕಾವ್ಯಾ ಜೀವನಾಚ್ಯಾ ವಾಡಾವಳಿಚೊ ಏಕ್ ಹಂತ್ ಮಾತ್ರ್. ಕವಿಚ್ಯಾ ಕಾವ್ಯಾ ಜೀವನಾಂತ್ಲೊ ಆಯ್ಚೊ ನಾಯಕ್ ಫಾಲ್ಯಾಂ ಅಪ್ರಸ್ತುತ್ ಜಾಯ್ತ್ ದೆಕುನ್ ಹಾಂವ್ ಕವಿಕ್ ವಿಸರ್ಲೊಂ ವಾ ತಾಕಾ ಕುಶಿಕ್ ಲೊಟ್ಲೊ.
ಕವಿಚಿ ಪ್ರತಿಕ್ರಿಯಾ [ಹಾಂವ್ ಪಿಲಾತಾಬರಿಂ ಹಾತ್ ಧುಯ್ನಾ - ಜಿಯೊ ಅಗ್ರಾರ್]
ಹಾಂವ್ ಪಿಲಾತಾಚ್ಯಾ ಜಾತಿಚೊ, ಹಾವೆಂ ಕಿತೆಂ ಬರಂವ್ಕ್ ಆಸ್ಲೆಲೆಂ ತೆಂ ಬರವ್ನ್ ಜಾಲಾಂ. ಪೂಣ್ ಪಿಲಾತಾಬರಿಂ ಹಾತ್ ಧುಂಯ್ನಾ. ಕಾವ್ಯೆಂ ಅವಾಳ್ಯಾಬರಿಂ ಖಾತೆಲ್ಯಾಚಾ ಜಿಬೆ ವಯ್ರ್ ರೂಚ್ ಬದಲ್ತಾ. ವೈಜ್ನಾನಿಕ್ ಚೂಕ್ ವಾಂಜೆಲಾಂತೀ ಘಡ್ಲ್ಯಾ. ಮ್ಹಜ್ಯಾ ಕವಿತೆಂತ್ಯಿ ತಿ ಆಸೊಂಕ್ ಪುರೊ. ಸೊಸುನ್ ವರ್ನ್ ತುಮಿ ಮೂಳ್ ವಿಶಯಾಚೆರ್ ಚಡ್ ಧ್ಯಾನ್ ದೀಜೆ. ಹಾಂವ್ ಹ್ಯಾ ಶೆತಾಂತ್ ಬೋವ್ ದಾಕ್ಟುಲೊಂ, ಹೆಂ ಮ್ಹಾಕಾ ಹೊಗ್ಳಾಪ್ ನ್ಹಯ್, ಏಕ್ ಜಾಗ್ವಣಿ.
ಪಯ್ಲೆ ಪಾವ್ಟಿಂ ಮ್ಹಾಕಾ ಮೆಳ್ಲ್ಲಿ ಹಿ ವೆದಿ ಖಂಡಿತ್ ಜಾವ್ನ್ ಹಾಂವ್ ಖರ್ಯಾ ಸ್ಪಿರಿತಾನ್ ಘೆತಾಂ ಆನಿ ಮ್ಹಜ್ಯಾ ಮುಕ್ಲ್ಯಾ ವಾಡಾವಳೆಕ್ ಕುಮಕ್ ಜಾಯ್ತ್ ಮ್ಹಣೊನ್ ಚಿಂತ್ತಾಂ.
21 ಜನೆರ್ 2004 ಕೊಡ್ಯಾಳಾಂತ್ ಚಲ್ಲ್ಲ್ಯಾ ಪಯ್ಲ್ಯಾ ಸಾಹಿತಿಕ್ ಸಂವಾದಾಂತ್ ಹಿಂ ಲೇಖನಾಂ ಪ್ರಸ್ತುತ್ ಜಾಲ್ಯಾಂತ್.
About us | Feedback | Contact us
Copyright ©
2005 DAAIZ.COM All rights reserved.
Page concept, designed and maintained by Ashawadi Publications
