Moddganv : Daldago Konknni Akademin (DKA) Romi lipintlea borovpiam khatir 19 Mai 2019 disa Moddganvchea Ravindra Bhovonant Nibond Borovpachi Kar’yaxalla ghoddoun haddli. Margdorxok mhonn nibondant bhorpur onnbhov aslolo ani jyextth borovpi Tomazinho Cardozo hajir aslo. Tache borabor DKA-cho Chittnis Vincy Quadros ani Bhanddari Celso Fernandes machier asle.
Sumar 25 borovpiank margdorxon kortanam Tomazinhan veg-vegllea nibondkaranchim udahornnam diun ‘Nibond’ koso borovpacho tem oxie toren sangle, ‘Poilie suvater ek nibond borounche adim vixoi gorjecho, to poilim sodun kaddcho. Potram khatir boroitat tednam vixoya veli zata titli chodd mahiti ektthaim korchi, boroitanam favo to vell diuncho. Boroilam tem sarkem maddavollin ghalchem ani vichearanchi manddavoll sarki sambhallchi. Xikxonnik molla velea nibondank ek ‘thesis statement’ vo mukhel vidhan asta, toslem don vo tin vakyanchem toyar korchem, zalear vachpiak khub faideachem tharta. Uttavollin kelolem borovp dorjedar zaunk pavonam. Jem kitem chintlam tem odik sompurnn korpak suseg gheun ani monak xanti diun borounchem.
Tech borabor nibondak novi dixa koxi dium-ieta tacherui Tomazinhon uzvadd ghalo. Borovpian zaitem sodun kaddlolem asum, tori xikololea mon’xam koddem vo zanntteam koddem bhasabhas kelear vixoyak novi dixa mellonk xokta. Survat kortanam veglleponn aslear borem zata punn tem tujea lekhak sombondhit asonk zai. Nibondachea modlea bhagant vixoyachi mahiti divpachi goroz asa. Hanga vixoyak sombondhit ghoddnnio, bhasabhas, udahoronnam ghalunk zatat. Ani odik gorjechem zaun asa soglli mahiti eka-mekak zull’lloli aspak zai. Ani sogllem boroun xevott sarko zalo nam zalear vachpi niraxi zata. He khatir probhavi xevott korunk tannem kaim suchovnno kelio, tio oxio – jem kitem boroita tem khuinch ‘repeat’ zaunk zainam. Zata zalear mukhel vidhan survatek dilam tacho vichear hanga haddunk zata punn novea utramni yeunk zai. He xivai tannem kaim xittuksanni ballgunk sanglio tio oxio - Jednam konnacho ‘quote’ vaporta, to konnacho tem sangpak visronk zainam. Xevott kortanam voir manddlole mud’de haddunk upkaronant. Xevott tankta titlo lhan ani eka koddvea voir ascho nhoi. Xevott mhollear voilea mud’deanchi ‘summary’ nhoi hachii tannem chotrai dili.
Him nibondanchim sogllim angam sangle uprant tannem nibond kitlea vibhagamni vanttlolem asa tachi bariksannin mahiti dili, zoxe porim - bhasabhas korpi nibond, kothon korpi nibond, ttika korpi nibond, vornnon korpi nibond ani adi. Tech borabor nibond boroitanam koslio koslio mukhel chuki zaum-ietat, tacherui tannem uzvadd ghalo. Chukicho vixoi sodun kaddop, mon pois dovrun borovp, goroz naslolea ghoddnniancho ani teach teach xobdancho vapor korop, xevottant novi mahiti divop, chalti bhas vaprop ttallchem, Toxench zata titlim lhan vakyam aschim, bori utravoll aschi, utrancho gorivapor korcho nhoi ani adharavoll diunkui tannem agro kelo.
Hie kar’yaxallent Sonia Gomes, Anthony Menezes, Jasmine Rodrigues, Mathew D’ Costa, Moises Martires, Menino Almeida, Saynex D’ Souza, Pio Esteves, Savio Pinto, Albert Jaques, Kavita Pereira, Isito Gracias, Armando Fernandes, Irene Cardozo, Annie de Colvale, Maria Arcanjela Fernandes, Fausto V Da Costa, Esperance D’ Sa, Lizandra Marsha Fernandes, Shania D’ Costa, Jose Gomes, Pri. Ave Maria Afonso, Vassalo Carvalho, Jerome Succor Alphonso hea borovpiamni vantto ghetlo.
Survatek Vincy Quadrosan yeukar dilo zalear Celso Fernandesan soglleanche upkar mandle.
