DKA-n Monoilo Osmitai Dis, Dr. Jack de Sequeira-cho Kelo Ugddas Khasgi Paunddear Dr. Sequeiracho Putllo bandat : Prof. Dr. Edward D’ Lima-an Keli Suchovnni
Ponnje : Ghorant koxei uloyat punn somazant chear-chougam modem ‘standard’ bhas ulounk zai kiteak Konknni hich amchi osmitai oxem mhunnpi Prof. Edward D’ Lima-n, Dr. Jack de Sequeira-acho khoro ugddas dovortole zalear saman’ya monis ektthaim zaun vo ek Trust ghoddun Betim ek 100 metr zago ghauncho ani thoim Ponnje thaun dista oso putllo ubharcho oxi suchovnni keli. 53vea Opinion Poll Dis ugddasa somoyar mukhel soiro mhonn uloitalo. Tache borabor DKA-cho Odheokx Tomazinho Cardozo, Chittnis Vincy Quadros, Bhanddari Celso Fernandes ani Vavurpi Somiticho Vangddi Afonso Braganza hajir asle. Ho somorombh 16 Janer 2020 disa DKA-chea Reginald Fernandes Conference Hall-ant Ponnje zalo.
Konknnik lagun amkam Gõykar mhonn vollkhotat oxem sangtanam Prof. D’ Liman Inglezichio dekhi diun bhas veg-vegllie toren koxi uloitat tem sanglem ani amchi osmitai jevnnantlean, sonskrutayentlean porzolltta hachioi dekhi dilio. Tannem mukhar sanglem, Hindu ani kristanvam modem kednanch futt nasli ani nam punn rajki monis futt ghaltat ani ‘westernisation’-ak lagun ami Konknni ulounk visortat hi khontichi gozal.
Karyavollichie survatek Dr. Jack de Sequeirachea fottvak fulam omplea uprant lhan-xie sonskrutik karyavollint Violet, Jenifer, Irene Cardozo ani Tomazinho Cardozo hannim gitam gailim zalear Ana Tereza Rodrigues, Mischelle Coutinho, Lourence Fernandes ani Silvestrina Pereira hannim ‘Opinion Poll’-acher kovita sador kelio.
DKA-cho Odheokx Tomazinho Cardozo hannem aplem yezmanponnachem ulovp kortanam Gõykaranchio chali-riti, jevnnam, sonskrutai ani Konknni bhas sambhallunk ulo marlo. Vincy Quadrosan prastiv kortanam ‘Opinion Poll’-achem mohotv sanglem ani sutrsonchealon kelem. Celso Fernandes-an yeukar dilo zalear Afonso Branganza hannem soglleanche upkar mandle. Raxttrgit mhunnon karyavoll sompli.
