[ಪಾವ್ಸ್ ಯೆತೆಚ್ಚ್]

ಪಾವ್ಸ್ ಯೆತೆಚ್ಚ್ ಧರ್ತಿ ಜಿವಾಳ್ ಜಾತಾನಾ, ಎದೊಳ್ ಮ್ಹಣಾಸರ್ ತಾಪ್ಚ್ಯಾ ಸುರ್‍ಯಾಚಿ ಧಾವ್ ಸೊಸ್‌ಲ್ಲ್ಯಾ ಮಾತಿಯೆಂತ್ ಲಿಪೊನ್ ಆಸ್ಚೊ ಭಿಯಾಳ್ ಖಿರ್ಲತಾ, ಆಂಕ್ರೆತಾ ಆನಿ ಪಾಲೆತಾ. ಹಿ ಮಾಂಡಾವಳ್ ಪ್ರಾಕೃತಿಕ್ ತರ್‌ಯೀ ಸಹಜ್ ಜಾವ್ನಾಸಾ. ತೆಚ್ಚ್ ಪರಿಂ, ಕವಿ ಸಯ್ತ್ ಜಾಗೆ ಜಾತಾನಾ, ತಾಂಚೆ ಕಾವ್ಯಾಳ್ ಕೊಂಬ್ರೆ ಸಯ್ತ್ ಫುಟ್ತಾತ್.

ಮುಂಬಯ್ಚಾ ಪಾವ್ಸಾಕ್ ತಶೆಂಚ್ ಮುಂಬಯ್ಚಾ ಚೆಡ್ವಾಂಕ್ ಪಾತ್ಯೆನಾಯೆ ಮ್ಹಳ್ಳಿ ಪರ್ನಿ ಸಾಂಗ್ಣಿ ತರ್‌ಯೀ, ಮುಂಬಯ್ಚ್ಯಾ ಪಾವ್ಸಾಂತ್ ಏಕ್ ಅಥ್ವೊಚ್ಚ್ ಅನ್ಭೋಗ್ ಆಸಾ. ಜಾವ್ಯೆತಾ ರಸ್ತ್ಯಾದೆಗೆಲ್ಯಾ ಗುಡಾ ಆಂಗ್ಡೆಂನಿ, ಹಾತ್-ಗಾಡಿಯಾಂನಿ ಭರಾನ್ ವಿಖೊನ್ ವೆಚೆ ಭಜಿಯಾ/ವಡಾ ಜಾಂವ್, ಭುಟ್ಟಾ ಜಾಂವ್, ಆಲೆಂ (ಅದ್ರಕ್) ಘಾಲುನ್ ಕೆಲ್ಲಿ ಚಾಯ್ ಜಾಂವ್. ಆನಿ ಹೆಂ ಖಾಂವ್ಕ್/ಪಿಯೆಂವ್ಕ್ ಮ್ಹಣ್ತಾನಾ ಲೋಕ್ ಗಾಡಿಯಾಂನಿ ಜಾಂವ್, ಬಾಯ್ಕಾಂನಿ ವಾ ಚಲುನ್ ಜಾಂವ್, ಸರ್ವಾಂ ಪಾವ್ಸಾಚಿ ಮಜಾ ಲುಟ್ತಾನಾ, ರಸ್ತ್ಯಾಚೆರ್ ಜಮೊ ಜಾಲ್ಲ್ಯಾ ಕದ್ವಳ್ ಉದ್ಕಾಂತ್ ಸಯ್ತ್ ನ್ಹಾಂವ್ಕ್/ಉಪ್ಯೆಂವ್ಕ್/ಖೆಳುಂಕ್ ಭುರ್ಗ್ಯಾಂಕ್ ಅನ್ಯೇಕ್ ಮಜಾ.

ಹೆಚ್ಚ್ ಪಾವ್ಸಾಳ್ ಸಂಧರ್ಭಾಚೆರ್ ಪ್ರಸನ್ನ ನಿಡ್ಡೋಡಿನ್ ಬರಯಿಲ್ಲಿ ಕವಿತಾ.

ಮುಂಬಯ್ಚೊ ಪಯ್ಲೊ ಪಾವ್ಸ್....

ಪಯ್ಲ್ಯಾ ಪಾವ್ಸಾ ಥೆಂಬ್ಯಾಂನಿ

ಧರ್ಣಿ ಮೂರ್ ವಾರ್‍ಯಾಕ್ ಉಭಯ್ತಾನಾ

ಸಾಡಿ ಧರುನ್ ಪಾಲೊಂವ್ ವೊಡುನ್

ಆಂಗ್ ಹಿವ್ಳಾವ್ನ್ ಚಲ್ಚ್ಯಾ ನಾರಿನ್

ಸತ್ರೆ ಪಂದಾಕ್ ವೊಡುನ್ ಧರ್ಲೆಂ

ಮುಂಬಯ್ಚ್ಯಾ ಹ್ಯಾ ಪಯ್ಲ್ಯಾ ಪಾವ್ಸಾಕ್....

ಭುರ್ಗಿಂ ಸಂತೊಸಾನ್ ಉಡ್ಕಣಾ ಮಾರುನ್

ಪಾವ್ಸಾ ರಾಯಾಕ್ ಸ್ವಾಗತ್ ಕರ್ತಾನಾ

ಹಾತ್-ಗಾಡ್ಯೆರ್ ಚ್ಹಾ ಭಜಿಯಾ ಕರ್ಚೊ ಭಯ್ಯಾ

ಗೊಮ್ಟಿ ಲಾಂಬ್ ಕರುನ್ ಗಿರಾಕಿಂಕ್ ತಿಳ್ತಾ

ಮುಂಬಯ್ಚ್ಯಾ ಪಯ್ಲ್ಯಾ ಪಾವ್ಸಾಕ್.....

ಹಾಂವ್‌ಯೀ ಭಿಜೊನ್ ಕಾವ್ಳೊ ಜಾತಾನಾ

ಹಾತ್ ಗಾಡ್ಯೆ ಕುಶಿಂ ಹುನೊನಿ ಚ್ಹಾ

ತಾಳ್ಯಾರ್ ಸೊಡುನ್ ಪಾವ್ಸಾ ಹಿಂವ್ ದೂರ್

ಕರುಂಕ್ ಬೊಲ್ಸಾಕ್ ಹಾತ್ ಘಾಲ್ತಾನಾ

ಭಿಜ್‍ಲ್ಲೆ ನೋಟ್ ಚಿಡಾವ್ನ್ ಹಾಸ್ತಾಲೆ

ಮುಂಬಯ್ಚ್ಯಾ ತ್ಯಾ ಪಯ್ಲ್ಯಾ ಪಾವ್ಸಾಕ್.....!!

- ಪ್ರಸನ್ನ ನಿಡ್ಡೋಡಿ [ಜೂನ್, 2017]