ಸೊಬೀತ್- ಮ್ಹೊವೆ ದೀಸ್ [ಮನೋಜ್ ನರೇಂದ್ರ ಕಾಮತ್]

ಜಿವಿತ್ ಮುಕಾರ್ ಗೆಲ್ಲೆಪರಿಂಚ್ ಕವಿತೆಚ್ಯಾ ಥೊಡ್ಯಾಚ್ ಉತ್ರಾಂನಿ ಪಾಟಿಂ ಉರ್‌ಲ್ಲ್ಯಾ ತೆಂಪಾದ್ಲ್ಯಾ ಯಾದಿಂಕ್ ಸಂಗಿಂ ವ್ಹರುಂಕ್ ಜಾಯ್ನಾ ತರ್‌ಯೀ ಏಕ್ ಬರೊ ನಿಯಾಳ್ ಕಾಡ್ಚಿ ಸಕತ್ ಹ್ಯಾ ಕವಿತೆಂತ್ ದಿಸ್ತಾ. ತೊ ಗಾಂವ್ ತೆ ಗಾದೆ ಬೆಟಾಂ ಆನಿ ಕೊಸ್ಚಿಂ ಜೊತಾಂ ಘೊಳ್ಚೆ ಶೆತ್ಕಾರ್, ಕುಲ್ಕಾರ್ ಆನಿ ಭಾಟ್ಕಾರ್ ಸರ್ವ್ ದೀಸ್ ಗೆಲ್ಲೆಪರಿಂಚ್ ಹಳ್ತಾರ್ ಮಾಜ್ವೊನ್ ವಚೊನ್ ಆಸಾ ತೆಂ ಸರ್ವ್ ಹ್ಯಾ ಕವಿತೆಂತ್ ಜಿವೆಂ ಕರ್ಚೆಂ ಪ್ರೇತನ್ ಕವಿನ್ ಕೆಲ್ಲೆಂ ದಿಸುನ್ ಯೆತಾ.

ವೃತ್ತೆನ್ ಶಿಕ್ಷಕ್ ಜಾವ್ನಾಸ್ಚೊ ಬಾಬ್ ಮನೋಜ್ ಕಾಮತ್ ಹ್ಯಾ ಕಲೆಂತ್ ಮಾಹೀರ್ ಮ್ಹಣುನ್ ತಾಚಿಂ ಕವಿತಾ ವಾಚ್ತಾನಾ ಗಮ್ತಾ. 2018 ಇಸ್ವೆಂತ್ ಪಯ್ಣಾರಿ ಆನಿ ವೀಜ್ ಹಾಣಿಂ ಮಾಂಡುನ್ ಹಾಡ್‌ಲ್ಲ್ಯಾ ದೆ|ವಿಲ್ಫಿ ರೆಬಿಂಬಸ್ ಸ್ಮಾರಕ್ ರಾಶ್ಟ್ರೀಯ್ ದ್ವಿಲಿಪಿ ಕೊಂಕಣೀ ಸಾಹಿತಿಕ್ ಸ್ಪರ್ಧ್ಯಾಂತ್ ಹುಮೆದಿಚೆಂ ಇನಾಮ್ ಆಪ್ಣಾಯಿಲ್ಲಿ ಹಿ ಕವಿತಾ ವಾಚುಂಕ್ ಆನಿ ತಾಚೊ ಸ್ವಾದ್ ಚಾಕುಂಕ್ ತುಕಾ ಆಪೊವ್ಣೆಂ ದಿತಾಂ.

[ಕವಿತಾ] ಸೊಬೀತ್- ಮ್ಹೊವೆ ದೀಸ್  [ಮನೋಜ್ ನರೇಂದ್ರ ಕಾಮತ್]

ಸೊಬೀತ್- ಮ್ಹೊವೆ ದೀಸ್

ಮ್ಹಜ್ಯಾ ಗಾಂವ್ಚಿ ಯಾದ್

ಶೆಣಿಲ್ಲ್ಯಾ ಉಗ್ಡಾಸಾಂಚೊ ಸಾಂಗಾತ್

ತರ್ತರಿಲ್ಲ್ಯಾ ಶೆತಾಂ- ಭಾಟಾಂತ್

ಕುಳ್ವಾಡ್ಯಾಂಚೊ ಕಶ್ಟಿ ಹಾತ್

ಪೆಟಿಲ್ಲೆಂ ಆಂಗಣ್

ಸಾರತ್ಲ್ಲೆಂ ಶೆಣ್ , ಶಿತೊಡೊ

ವಿಣಿಲ್ಲಿ ದಾಳಿ - ಹಾಂತೊರ್

ಉಕ್ಡ್ಯಾ ಭಾತಾಂತ್ ಮಾರಿಲ್ಲೊ ಚಾಳೊ

ಹಾಂಬೆರ್ ಘಾಲ್ಪಿ ಗೊರ್ವಾಂ

ತಣಾಚೆ ಕುಡೆ , ಭರೆ

ರಂವ್ಥ್ ಕರ್ತನಾ

ದುದಾಚೆ ಫುಟ್ಪಿ ಝರೆ

ಹಾಣ್ಯಾಂತಲೆಂ ಕಡ್ಕಡೀತ್ ಉದಕ್

ಪೆಟಿಲ್ಲ್ಯಾ ಇಂಗಳ್ಯಾಂಚಿ ಭರ್

ಭಾಜಿಲ್ಲಿಂ ಕಣ್ಗಾಂ ,ಧೊಣ್ಸಾಂ

ಕಾಜೂಚೆ ಹುನ್ಹುನೀತ್ ಗರ್

ಅಡುಳಶಾಚ್ಯಾ ಪಾಲ್ಯಾನ್

ದೆವ್ಪಿ ತಾಪ್

ಕೊಡುಲಿಂಬು , ಕಿರಾಯ್ತ್ಯಾಚಿ ಗುಳಿ

ಥಂಡೆಕ್ ಬಸ್ತಾ ಚಾಪ್

ಶೆತಾಂತಲೆ ದಿಫ್ಳೆ

ಕಿಲ್ಲಲ್ಲೊ ತರ್ವೊ-ಭಾತ್

ರೊಪಿಲ್ಲೆ ಥಾಮ್

ಪಾಂಚ್ವೆಂಚಾರ್ ಲ್ಹಾರೆವ್ಪಿ ಶೆತ್

ಗಾಳೀಂತಲೆ ಮ್ಹುಟ್ಟೆ ರೊಸಾಳ್

ಗುಂಥಿಲ್ಲಿ ಮಾಳ್ ಹುಸ್ಕೆ ದೆಠಾರ್

ಸಾಳೀಚೆ ಕಾಂಟೆ ,ಮ್ಹಾತಾರೆ ಕೆಂಸ್

ಮೊರಾಚೆಂ ಪಾಂಖ್ , ಹಾಂಸೊ ಒಂಠಾರ್

ಸುಪಾಂತಲೆ ಆಸ್ಡಿಲ್ಲೆ ತಾಂದೂಳ್

ಪಾಟ್ಲೆ , ಕರೆ, ಸುಪ್ಲ್ಯೊ

ಅೊಜ್ಯಾನಿ ಭರಿಲ್ಲೆ ನಾಲ್ಲ್

ಆಡ್ಸರಾಂಕ್ ಮಾರಿಲ್ಲ್ಯೊ ತವ್ಲ್ಯೊ

ಕೊಯ್ತೆ, ಕೊಯ್ತುಲಾಂ, ವ್ಹಿಳೆ

ಖೊರಿಂ, ತಾಸ್ಕುದಳಿ, ಕುರಾಡಿಂ

ಮಾಡಾ ಮುಳಾಂತಲಿಂ ಆಳಿಂ

ಉದ್ಕಾ ಲೊಟಾಂತ್ ಬುಡೀಲ್ಲಿ ಮಾಡಿ

ನ್ಹಯೆಂತ್ ಮಾರಿಲ್ಲ್ಯೊ ಬುಚಕ್ಳ್ಯೊ

ಗರಯ್ಲ್ಲ್ಯೊ ಖರ್ಚಿ, ಮುಡ್ಡಶೊ

ಸೊದಿಲ್ಲೊ ಥಾವ್

ನುಸ್ತ್ಯಾನ್ ತರ್ತರೀಲ್ಲ್ಯೊ ಮಾನ್ಶೊ

ಮಾಡಾಚಿ ಪೊಂಯ್

ಶೆವ್ಕಾಂಕ್ ಲಾಯೀಲ್ಲಿ ಕಾತಿ

ವ್ಹಾಂವ್ಪಿ ಸೂರ್, ಭರ್ಪಿ ಮಡ್ಕೆಂ

ಕಮ್ರಾಕ್ ದಾಬ್ಣೊ, ಕಾಂತ್ರಾಂ ಆನಿ ಜತಿ

ಘರಾಂಚಿಂ ದಾರಾಂ

ಆಡಾಂಬ್ಯಾಂಚೊ ಆಡೊಸ್

ಗಾಂವಾಂತಲೆ ಪಸ್ರೆ

ಪಿತುಳ್ಚ್ಯಾ ಚಾವ್ಯಾಂಚೊ ಘೊಂಸ್

ಕೊಂಕಾಯ್ಲ್ಲೆ ಆಂಬೆ

ಕಾಪೆ - ರಸಾಳ್ ಪಣಸ್

ಸಾಕ್ರಿನಾಚಿ ಗೊಡಿ

ರಸಾಳ್ ಮ್ಹೊವಾಚೆಂ ಶಿಜ್ತಾ ಧೊಣಸ್

ಪಿಕಿಲ್ಲ್ಯೊ ಚಿಂಚೊ

ಭಾಜೀಲ್ಲೆ ಚಿಂಚಾರೆ

ಶಿಣ್ಶಿಣಪಿ ದಾಂತ್

ಕಾಂಗಾಂಚೊ, ತಾಬುಲಫ್ಳ್ಯಾಚೊ ಸಾಂಗಾತ್

ಸಾನ್ನಧಾಪ್ಣ್ಯಾಂತಲಿಂ ಸಾನ್ನಾಂ

ವ್ಹಿರಾಂನಿ ದೊಣೆ ಶಿವಿಲ್ಲೆೆ

ಉಕ್ಡೀಲ್ಲೆ ಹೀಟ್, ಕಾಲ್ವಾಂಚೆಂ ತೊಂಡಾಕ್

ರಾಂದ್ನೀರ್ ಸುರ್ಬೂಸ್ ಶಿಜಿಲ್ಲೆಂ

ಸುಕತ್ ಘಾಲ್ಲಿಂ ಆಗ್ಳಾಂತಲಿಂ ಸೊಲಾಂ

ಗುಠ್ಯಾಚೆಂ ಕಾಡಿಲ್ಲೆಂ ಭಿಂಡೆಲ್

ಆಯ್ಕಕೂಂಕ್ ಉಣೆಂ ಯೆತ್ಲ್ಯಾಕ್ ಒಪಾರ್

ನುಸ್ತೆಂ ತಳ್ಪಾಕ್ ಹೆಂಚ್ ತೆಲ್

ಆಂಬೆ ಕಾಡ್ಪಿ ಕೊಬ್ಲೆಂ

ಶೆಲಾವ್ಣೆಂ , ಶೆಲ್

ಆಫೊಂಸ್, ಕುಲಾಸ್, ಶಾವೆರ್ ಫೆರ್ನಾಂದ್

ರುಚೀಕ್ ತಶೆಂಚ್ ತೆ ಗೊಡಾ ಮೆಲ್

ಭುರ್ಗೆಪಣಾಂತಲೆ ದೀಸ್

ಮ್ಹೊಂವೆ ತಶೆಂಚ್ ಸೊಬೀತ್

ಗಾಂವಾನ್ ಸಾಂಬಾಳೀಲ್ಲಿ

ಗಿರೆಸ್ತ್ , ಉರ್ಬೆನ್ ಭರೀಲ್ಲಿ ರೀತ್

- ಮನೋಜ್ ನರೇಂದ್ರ ಕಾಮತ್ [ಅಗೋಸ್ತ್, 2019]