ದಾಯ್ಜ್ (- ಸಂಗೀತಾ ನಾಯ್ಕ್)

[ಕವಿತಾ] ದಾಯ್ಜ್ (- ಸಂಗೀತಾ ನಾಯ್ಕ್)

ವೇಳ್ ಬದ್ಲುನ್ ಆಸಾ ವ ವೇಳ್ ಮುಕಾರ್ ಗೆಲ್ಲೆಪರಿಂ ಮನಿಸ್ ಬದ್ಲುನ್ ಆಸಾ? ಏಕ್ ಪಿಳ್ಗಿ ಬದ್ಲುನ್ ದುಸ್ರಿ ಪಿಳ್ಗಿ ಉದೆತಾನಾ ಜಾಯ್ತಿ ಬದ್ಲಾವಣ್ ತ್ಯಾ ನವ್ಯಾ ಪಿಳ್ಗೆನ್ ಹಾಡುಂಕ್ ಪಡ್ತಾ. ವೆಳಾಕಾಳಾಕ್ ತೆಕಿದ್ ಸಗ್ಳೆಂ ಬದಲ್ತಾನಾ ಫೆಸ್ತಾಂ-ಪರ್ಬೊ, ನ್ಹೆಸಪ್-ಖಾಣಾಂ, ನಾತಿಂ ಆನಿ ಆಮ್ಚಿಂ ಮುಳಾಂ-ಪಾಳಾಂಚಿ ಸಯ್ತ್ ವಿಸರ್ ಪಡುನ್ ಜಿಯೆಂವ್ಚೊ ಕಾಳ್ ಆಯ್ಲಾ ದೆಕುನ್ ಆಯ್ಚಿ ಪಿಳ್ಗಿ ಆಮ್ಚೆಂ ದಾಯ್ಜ್ ಮ್ಹಳ್ಳೆಂ ಕಿತೆಂ ಮ್ಹಳ್ಳೆಂಚ್ ಸಮ್ಜುಂಕ್ ಸಕಾನಾ ಜಾಲಾ ಮ್ಹಳ್ಳೆಂ ಮಾರ್ಮಿಕ್ ಚಿಂತಪ್ ಹ್ಯಾ ಕವಿತೆಂತ್ ಆಸಾ.

[ಕವಿತಾ] ದಾಯ್ಜ್ (- ಸಂಗೀತಾ ನಾಯ್ಕ್)

ದಿವಾಳೆ ಫರಾಳ್, ನಾತ್ಲಾ ಕುಸ್ವಾರ್, ಈದಾಚ್ಯೊ ಶೆವ್ಯಾ ಖೀರಿ

ವಾಡ್ಯಾ ವಾಡ್ಯಾರ್ ವಾಟತ್ ಭೊಂವ್ಪಿ, ಭುರ್ಗ್ಯಾಂಚಿಂ ಭೀರಿಂ

ಕೆಳ್ಬಾಯ್, ಲಯ್ರಾಯ್, ಮಿಲಾಗ್ರ್ ಮಾಯ್ ಮೆಳೂನ್ ಖೆಳ್ಟಾತ್ ಖೆಳ್

ಸುರ್ಲಾ ತಾರೀರ್ ಪೀರಾಕ್ ಭೆಟುಕ್, ಯೆತಾ ಶಿಗ್ಮ್ಯಾ ಮೆಳ್

ಗೊಯ್ಚೆಂ  ಫೆಸ್ತ್, ಸಾಖ್ಳೆ ಉರೂಸ್, ಫಾತ್ರ್ಪೆಚಿ ಜಾತ್ರಾ

ವೆಗ್ಳೆಚಾರ್ ವಿಸ್ರುನ್ ಸಗ್ಳಿ, ಬೆಂಸಾವೀತ್ ಗಾತ್ರಾಂ

ದೆವ್ಚಾರಾಕ್  ರೊಟ್,  ಜಾಗ್ಯಾಚ್ಯಾಕ್ ಫುಲ್, ಭೆಟಯ್ತನಾ ಖುರ್ಸಾಕ್ ವಾತ್

ಘೆವ್ನ್ ಹಾಂಗಾ ಬಸ್ನಾಶೀಲ್ಲೊ ಕೊಣ್, ಧರ್ಮ್ ಆನಿ ಜಾತ್

ಮುಸಳ್ ಫೆಳ್, ಬಾಂಯ್ತಲೊ ಸಾಂಜಾವ್, ಮಾತ್ಯೆಂತಲೊ ಚಿಖಲ್ ಕಾಲೊ

ಮನೀಸ್ ಮೊಗಿ ಗೊಯಂಕಾರಾನ್, ದೆವಾಕ್ ಸೈಮಾರೂಪಾನ್ ಜೊಖ್ಲೊ

ಎಕ್ಚಾರ್ ಮೀರಯ್ತ್, ಆಪ್ಲೆಪಣ್ ಮುರಯ್ತ್,  ಪಿಳ್ಗ್ಯೊ ಜಾಲ್ಯೊ ವ್ಹಡ್

ಘಟ್ಟ್ ವೀಣೀನಂ ಗುತತ್ ಗೆಲೆ, ಸಾಸ್ಣಾಂ ನಾತ್ಯಾ ಪೊಡ್

ಕೊಣೆ ಪಾಪ್ಯಾನಿ  ಒಂಪ್ಲಾ ಹಾಲಿ, ದುಸ್ವಾಸಾಚೆ ಬಿಂ, ಖಣುನ್ ಮನಿಸಪಣಾನ್ ಚರ್

ಅಚ್ಳಯ್ ಸುಕೂಂಕ್ ಲಾಗ್ಲ್ಯಾ, ಹಾಂಗ್ಚಿ ಸಹಿಷ್ಣುತೆ ಝರ್ ...

ಹುಸ್ಕೊ ಕರ್ನಾಸ್ತಾನಾ ಸಾಯ್ಬಾ ರಾವುಂ ನಜೊ ಆಯ್ಜ್

ಹಾತಾಂತ್ಲ್ಯಾನ್ ಅಳಂಗ್ ಸುಟತ್ ಚಲ್ಲಾ...

ದಿಸಾ ಮಾಸಾನಿ ಶೆಣತ್ ಚಲ್ಲಾ...

ಗೊಂಯ್ಚೆಂ ಮ್ಹಜ್ಯಾ ದಾಯ್ಜ್!   ಮ್ಹಜ್ಯಾ ಗೊಂಯ್ಚೆಂ  ದಾಯ್ಜ್!

- ಸಂಗೀತಾ ನಾಯ್ಕ್. [ಮಾಯ್, 2020]