ಕವಿತಾकविताPoem

ಗುಲಾಬಾಚೊ ಕಾಂಟೊ [- ಉದಯ್ ಮ್ಹಾಂಬ್ರೊ]

[ಕವಿತಾ] ಗುಲಾಬಾಚೊ ಕಾಂಟೊ [- ಉದಯ್ ಮ್ಹಾಂಬ್ರೊ]

ಹಾಂಗಾಸರ್ ಗುಲೊಬ್ ಆಸಾ ಕಾಂಟೆ ಆಸಾತ್ ಆನಿ ಜಾಯ್ತ್ಯೊ ಹೆರ್ ಇಮಾಜ್ಯೊ ಆಸಾತ್. ಜೆದ್ನಾಂ ಕವಿತೆಚೆಂ ವೋಕ್ಲ್ ಘಾಲುನ್ ಚೊಯ್ಲೆಂ ತರ್ ವೆವೆಗ್ಳಿಂ ರೂಪಕಾಂ ದಿಸುಂಕ್ ಪುರೊ. ಗುಲೊಬ್ ಸೊಭಾಯೆಚಿ ದೀತ್ ಕಾಂಟೆ ವಿಘ್ನಾಂಚಿ ಕುರುಃ ದೀತ್ ಪುಣ್ ಕಾಂಟ್ಯಾಂಚಿ ಮುಳಾವಿ ಜವಾಭ್ದಾರಿ ರಾಕ್ವಣ್ ಕರ್ಚಿ.

ಬಾಬ್ ಉದಯ್ ಮ್ಹಾಂಬ್ರೊ ಸಮಾಜಿಕ್ ಕಾಳ್ಜಿ ಆಸ್ಚೊ ಸಂವೇದನ್‌ಶೀಳ್ ಕವಿ ಮ್ಹಣ್ತಚ್ ಹಿ ಕವಿತಾ ಫಕತ್ ಫುಲ್-ಕಾಂಟೊ, ಸೊಭಾಯ್-ಶೃಂಗಾರಾಚೆರ್ ಗುಂತ್‌ಲ್ಲಿ ಕವಿತಾ ನ್ಹಯ್ ಬಗರ್ ಸಮಾಜಿಕ್ ಸಂಗ್ತೆಂಚೆರ್ ವಿಣ್ಲ್ಯಾ ಆನಿ ಜಾಯ್ತೆ ಮಿಸ್ತೆರ್ ಆಟಾಪ್ತಾ ಆನಿ ತೆ ಮಿಸ್ತೆರ್ ಸುಟಂವ್ಚೆಂ ಕಮ್ ತುಜೆರ್ ಸೊಡ್ತಾಂ

[ಕವಿತಾ] ಗುಲಾಬಾಚೊ ಕಾಂಟೊ [- ಉದಯ್ ಮ್ಹಾಂಬ್ರೊ]

ಗುಲಾಬಾಚೊ ಕಾಂಟೊ

ಮೊಗ್ರಿ ಜಾಯೂಕ್ ಸಾಂಗ್ತಾಲೆ

ಜ್ಯುಸ್ತ್ ಗುಲಾಬಾಚ್ಯಾ ಕಾನಾರ್ ಪಡ್ಲೆ

ಪಾವ್ಸಾಬಗರ್ ಆಮ್ಚೆ ಜಾಯ್ನಾ ಖರೆಂ

ಪೂಣ್ ಪಾವ್ಸ್ ಹಿಸ್ಪಾಭಾಯರ್ ಪಡ್ಲ್ಯಾರ್

ಮ್ಹಜ್ಯೊ ಕಳ್ಯೊಚ್ ಕುಸ್ತಾ

ಜಾತ್ರೆತ್ಲ್ಯಾ ಹೊಮ್ಖಣಾಂತ್ ಮಾತ್

ಎಕಎಕದಾಂ ಟವ್ಟವೀತ್ ಫುಲ್ತಾ

ಜಾಯೂಕ್ ಸಾಮ್ಕೆಂ ಪಟ್ಲೆಂ ಮೊಗ್ರೆಚೆ

ಉಟಂಗಾರಾಚ್ಯಾ ಪಾವ್ಸಾಂತ್

ತಾಚೊಯ್ ಮಳೊ ಘುಸಮ್ಟ್ಟಾ

ವತ್ ಕೆನ್ನಾ ಯೆತ್ಲೆ ತಾಚಿ

ತಾಕಾಯ್ ಉಮ್ಳಶೀಕ್ ಆಸ್ತಾ

ಗುಲಾಬ್ ಥಂಯ್ಚ್ಯಾನ್ ಲ್ಹವು ಕಡ್ಸಲೊ

ಪಾವ್ಸ್ ಆಸುಂ ವಾ ಗೀಮ್

ಆಪ್ಲ್ಯಾ ಫುಲಾಂಚೆ ಕಾಂಟೆ

ಕೊಣಾಕೂಚ್ ತೊಪ್ನಾತ್

ತೊಪ್ಲ್ಯಾರೂಯ್ ಲೊಕ್

ಗುಲಾಬಾಚ್ಯಾ ರುಪ್ರಂಗಾಚಿ

ತೊಖ್ಣಾಯೂಚ್ ಕರ್ತಾತ್

ತೆಂಚ್ ಯೆವ್ಜೂನ್ ಯೆವ್ಜೂನ್

ಆಪ್ಲೆಭಿತರ್ ಮುರ್ಗುಟಲೊ

ವಾರ್ಯಾರ್ ಬರೊ ಧೊಲ್ಲೊ

ತೆವ್ಟೆನ್ ಎಕ್ಲೊ ಕೊಣ್ ವತಾಲೊ

ತಾಚೊ ನವೊತಾಲ್ಲ್ ಬುಶ್ಕೊಟ್

ಗುಲಾಬಾಚ್ಯಾ ಕಾಂಟ್ಯಾಕ್ ಫಾರಾವ್ಲೊ

- ಉದಯ್ ಮಾಂಬ್ರೊ [ಒಕ್ಟೋಬರ್, 2019]
ಉದಯ್ ಮಾಂಬ್ರೊ: ಗೊಂಯ್ಚೊ ಏಕ್ ನಾಮ್ಣೆಚೊ ಲೇಕಕ್, ಕವಿ, ವಾವ್ರಾಡಿ ತಶೆಂಚ್ ಪದಾಂ ಘಡ್ಣಾರ್. ’ಹಾಯ್ ಸಾಯ್ಭಾ’, ’ಮನ್ಶಾಚ್ಯಾ ಸೋಧಾಂತ್’ ಹಾಚೆ ಎದೊಳ್ ಪರ್ಗಟ್ ಜಾಲ್ಲೆ ಬೂಕ್. ಕವಿತಾ, ಕಥಾ, ಅಣ್ಬವ್ ಸಾಹಿತ್ ಬರಂವ್ಚೊ ಹೊ ಏಕ್ ಕೊಂಕಣಿ ವಾವ್ರಾಡಿ ತಶೆಂಚ್ ಚಿಂತ್ಪಿ ಜಾವ್ನಾಸ್ಚ್ಯಾ ಹಾಚ್ಯಾ ಕವಿತೆಂಚೆರ್ ಮುಂಬಂಯ್ತ್ ’ಕವಿತಾಪಾಠ್’ ಕಾಮಾಸಾಳಾಂತ್ ಅಧ್ಯಯನ್ ಚಲ್ಲಾಂ.