ಹೆಂ ಮನ್ [ಶರತ್‌ಚಂದ್ರ ಶೆಣಯ್, ಎರ್ನಾಕುಳಮ್]

ಎಕಲೊ ಜಾಣಟೊ ಕವಿ ಅಶೆಂ ಮ್ಹಣತಾ; 'My mind to me a kingdom is.', ಆನೀ ಖರೆಂಚ್ ಜಾವನ್ ಮನಶಾಚೆಂ ಮನ್‌ಚ್ ಮನಶ್ಯಾಚಿ ರಾಜ್ವಟಕಿ. ಹಾಂಗಾಸರ್ ಬರೆಂ ಆನೀ ವಾಯಟಾಚೆರ್ ತರಕ್ ಜಾತಾ, ಸಂವಾದ್ ಜಾತಾ, ವಾರಜಿಕ್ ಜಾತಾ ಆನೀ ಉಪರಾಂತ್ ನೀತ್ ಜಾತಾ. ಮನ್‌ಚ್ ಏಕ್ ಕೋರ್ಟ್ ಮನಶಾಕ್. ದೆಕುನ್ ಮನೀಸ್ ಅಪಣಾಕ್ ಹೆರಾಂ ಖಯಸ್ ಕರತಾತ್ ವಾ ನಾ ತೆಂ ಅಮಕಾಂ ಪಡೊನ್ ಗೆಲ್ಲೆಂ ನಾ, ದೆಕುನ್ ತ್ಯೇ ವಿಶಯಾಂತ್ ಆಮಿ ಚಡಿತ್ ಚಿಂತಿತ್ ಜಾಂವಚಿ ಗರಜ್ ನಾ ಮ್ಹಣತಾ ಸ್ವಾಮಿ ವಿವೇಕಾನಂದ; 'Like me or hate me, both are in my favour, If you like me I am in your heart, if you hate me I am in your mind.'

ಬಾಬ್ ಶರತ್‌ಚಂದ್ರ ಶೆಣಯ್ (ಎರ್ನಾಕುಳಮ್) ಕೇರಳಾಚೊ ನಾಮಣೆಚೊ ಕೊಂಕಣೀ ಕವಿ. ಸಾಹಿತ ಅಕಾಡೆಮಿ, ಟಿ.ಎಮ್.ಎ.ಪೈ ಬೂಕ್ ಪುರಸ್ಕಾರ್ ಅಸಲೆ ಪ್ರತಿಶ್ಟಿತ್ ಪುರಸ್ಕಾರ್ ಜಿಕಪಿ. ಹಿ ಕವಿತಾ ವಾಚುನ್ ಹ್ಯಾ ಕವಿತೆಚೊ ಸ್ವಾದ್ ಭಗುಂಕ್ ತುಮ್ಕಾಂಚ್ ಸೊಡತಾಂ.

[ಕವಿತಾ] ಹೆಂ ಮನ್ [ಶರತ್‌ಚಂದ್ರ ಶೆಣಯ್, ಎರ್ನಾಕುಳಮ್]

ಹೆಂ ಮನ್

ಮನ್ ಹೆಂ ಧಾಂವ್ತಾ ಗೆಲ್ಲ್ಯಾ ದಿಸಾಂಚ್ಯಾ ಫಾಟ್ಲ್ಯಾನ್

ಮಾಕಾ ಭೊಂವಂಡಾಯತಾ ಉಡ್ಗಾಸಾಂಚ್ಯಾ ಉದ್ಯಾನಾನ್

ಉಡ್ಗಾಸ್ ಹಾಸಯ್ತಾಯ್, ಉಡ್ಗಾಸ್ ರಡಯ್ತಾಯ್

ಉಡ್ಗಾಸ್ ಖಾಸ್ ಹೆ ಸಹಜ್ ಮಿತ್ರಾಂಚ್ಯಾ ಸಮಾನ್.

ಮನ್ ಹೆಂ ಮಗ್ನ್ ಭೊಗೂನ್ ಗೆಲೆಲ್ಯಾ ಅಣ್ಭವಾಂನಿ

ಶೆಣ್ಲೆಲ್ಯಾ, ವಿಸ್ರಾಂತ್ ಪಡ್ಲೆಲ್ಯಾ ಉತ್ರಾಂನಿ

ಖಿಣ್ಭರ್ ಮುಗ್ಧ್, ಸಾಮ್ಯ್ ನಾತ್ಲೆಲ್ಯಾ ಸಂತೊಷಾನ್

ಖಿಣ್ಭರ್ ತಪ್ತ್, ಸಾಮ್ಯ್ ನಾತ್ಲೆಲ್ಯಾ ಶೊಕಾನ್.

ಭೂತ್ಕಾಲಾಂತು ಘುಕ್ಲೂನ್ ಘಾಲಾ ಮಾಕಾ ಮನಾನ್

ಜಾಯ್ ಜಾಯ್ ಮ್ಹೂಣ್ ದಿಸ್ಪಿ ಜಾದೂಚ್ಯಾ ಜಗಾನ್

ಒಂಟ್ ಪಳಯ್ತಾಯ್ ಹಾಸೂಂಕ್, ದೊಳೆ ಪಳಯ್ತಯ್ ರಡೂಂಕ್

ಹ್ರದ್ಯಾಂತರ್ ಭರ್ಲಾ ಹೂನ್ ಹೂನ್ ಅಥ್ರೆಕಾನ್.

ಹಂಗಾಚ್ಯಾನ್ ಥಾಂಗಾ ಆನಿ ಥಂಯ್ಚೆಯ್ ಪೆಲ್ಯಾನ್

ಮಾರ್ತಾ ಉಡ್ಕ್ಯೊ ಎಕ್ ಮರ್ಕಡಾ ಭಾಶೆನ್

ವೆಳ್ ಕಾಳ್ ಚೊಯ್ನಾ, ಸಮಯ್ ಸಂದ್ರ್ಭ್ ಪಳಯ್ನಾ

ಭೊಂವ್ತಾ ಶೀಡ್ ಶೆಣ್ಲೆಲ್ಯಾ ವ್ಹಡ್ಯಾ ಭಾಶೆನ್.

ವರ್ತಮಾನ್ ಜಾಗಯ್ತಾ, ಭವಿಷ್ಯ್ ಆಪಯ್ತಾ

ಅಮೊಲೀಕ್ ರೆ ಮನಾ ದರ್ ಎಕ್ ಖೀಣ್

ವ್ಯರ್ಥ್ ಸಾರ್ಚೆಂ ನ್ಹಯ್ ನೆಣ್ತಾಂ ಶೆಣ್ಚೆಂ ನ್ಹಯ್

ಖಿಣಾಂನಿ ವಿಣ್ಲಿ ಆಸಾ ಹಿ ಜೀಣ್!

- ಶರತ್‌ಚಂದ್ರ ಶೆಣಯ್, ಎರ್ನಾಕುಳಮ್ [ಎಪ್ರಿಲ್ 2018]

ಶರತ್‌ಚಂದ್ರ ಶೆಣಯ್: ಎರ್ನಾಕುಳಮ್ ಕೇರಳಾಚೊ ನಾಮಣೆಚೊ ಕೊಂಕಣೀ ಕವಿ. ಸಾಹಿತ ಅಕಾಡೆಮಿ, ಟಿ.ಎಮ್.ಎ.ಪೈ ಬೂಕ್ ಪುರಸ್ಕಾರ್ ಅಸಲೆ ಪ್ರತಿಶ್ಟಿತ್ ಪುರಸ್ಕಾರ್ ಜಿಕಪಿ. ’ಇದಂ ನ ಮಮ್’ ಹಾಂಚೊ ಕವಿತಾಜಮೊ ಸವೆಂ ಸಭಾರ್ ಹೆರ್ ಬೂಕ್ ಸಯ್ತ್ ಸಂಪಾದನ್ ಕರುನ್ ಪರ್ಗಟ್ ಕೆಲ್ಯಾತ್.